Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія во 2-й де́нь.
Свята́го священному́ченика Кипріа́на и святы́я му́ченицы Іусти́ны.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Яко до́бля.

Свяще́нническимъ пома́заніемъ* и му́ченическою кро́вію* Бо́гу прибли́жился еси́,* соверше́ннѣйше Кипріа́не всесла́вне,* цвѣ́те естества́,* добро́то слове́съ,* му́дрости верхо́вниче,* пра́вости догма́товъ мѣ́рило,* кано́новъ всесли́чная правота́* и Церкве́й благолѣ́піе. [Дважды.]

Стра́ждущимъ благосла́віе,* му́ченикомъ вѣне́цъ,* подпису́я увѣ́рилъ еси́ богому́дрыя* дерза́ти до́блественнѣйше* на разли́чныя му́ки и у́зы, и темни́цы,* и тѣле́съ обнаже́нія,* и вяза́нія, и сту́дени лютѣ́йшія,* и на ра́ны, и сме́рть по́слѣжде,* Кипріа́не всече́стне. [Дважды.]

На чарова́нія де́монская* пѣ́сньми Ду́ха* и креста́ зна́меніемъ проти́вльшися,* дѣ́вство соблюла́ еси́* и му́ченица непобѣди́мая привела́ся еси́ Христу́,* свяще́ннѣйшее заколе́ніе.* Тѣ́мъ получи́ла еси́ вѣнцы́ побѣ́дныя, Іусти́но,* дѣ́вамъ и му́ченикомъ* украше́ная свѣ́тлость. [Дважды.]

Сла́ва, гла́съ 2:

Уче́нія пре́лесть и зна́ніе и́доловъ отве́рглъ еси́ и́стинно, и креста́ одѣ́ялся еси́ ору́жіемъ на спасе́ніе, Кипріа́не всеблаже́нне, пове́ргъ кни́ги волше́бныя, человѣ́ка отложи́лъ еси́ ве́тхаго, и всели́ся въ тя́ богозна́ніе Тро́ицы Единосу́щныя: Сію́ моли́, іера́рше, со а́нгелы, е́же спасти́ся на́мъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сладча́йшее, почто́ оста́вилъ еси́ Мене́, Ро́ждшую Тя́, еди́ну, Свѣ́те непристу́пный Пребезнача́льнаго Отца́? Потщи́ся и просла́вися, я́ко да сла́ву получа́тъ боже́ственную, Боже́ственныя Стра́сти Твоя́ сла́вящіи.

На стихо́внѣ окто́иха. Сла́ва, гла́съ 2:

Свѣти́льника богосія́ннаго, Па́влова собесѣ́дника и дѣло́мъ соприча́стника, Кипріа́на восхва́лимъ; со а́нгелы бо весели́тся, пріи́мъ вѣне́цъ нетлѣ́нія отъ Еди́наго Бо́га, и мо́лится спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ Нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́, что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ же и сло́ва, кра́йнюю бла́гость, Человѣколю́бче.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, и видѣ́нія восхо́дъ: сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Кипріа́не, моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха безъ му́ченичновъ и святы́хъ кано́нъ на 6, его́же краегране́сіе: Пою́, бла́же, свѣтоза́рную твою́ благода́ть. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми, дре́вній пѣшеше́ствовавъ Изра́иль, крестообра́зныма Моисе́овыма рука́ма, Амали́кову си́лу въ пусты́ни побѣди́лъ е́сть.

Съ премíрными чи́нми ны́нѣ водворя́яся, о свяще́нная и боже́ственная главо́! Съ небесе́ при́зри на благоче́стно пою́щія тя́ и твои́ми моли́твами сохраня́й.

Во мра́цѣ невѣ́дѣнія, преподо́бне, лю́тѣ одержи́мь и душегу́бными страстьми́ пло́ти невоздержа́ніемъ ты́ разжига́емь, преложе́ніе пресла́вно обрѣ́лъ еси внеза́пу, всеблаже́нне.

Губи́телей у́бо на сѣда́лищи пре́жде, о́тче, сѣдѣ́лъ еси́, и на сѣда́лищи пресви́теровъ па́ки Христа́ просла́вилъ еси́, измѣни́вся явле́нно Влады́чнею Боже́ственною благода́тію.

Богоро́диченъ: Дѣ́ва по рождествѣ́ пребыла́ еси́: Сама́го бо ро́ждши Творца́ всѣ́хъ и Го́спода, необы́чно и стра́нно на́мъ я́вльшася тѣ́ломъ, Богороди́тельнице Ма́ти Приснодѣ́во.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Яко Па́велъ, ко Христу́ душе́вную любо́вь преложи́въ, Кипріа́не всему́дре, того́ учени́къ бы́лъ еси́.

Обруча́етъ ти́ Христо́съ, вмѣ́сто ри́зъ стра́стныхъ одѣя́ніе сла́вы да́руя и возрожде́нія оде́жду.

Поу́стникъ по́стническій пре́жде бы́вый терпѣли́въ, по́слѣжде, Кипріа́не всехва́льне, свидѣ́тель Истины бы́лъ еси́.

Богоро́диченъ: Госпо́дьственно и и́стинно Тя́, Богоро́дицу, вѣ́рніи почита́емъ, Ты́ бо Бо́га родила́ еси́, пло́ть бы́вша, Всенепоро́чная.

Сѣда́ленъ, гла́съ 8. Подо́бенъ: Прему́дрости.

Нака́занъ въ пре́лести прилѣ́жно, я́ко Па́велъ, зва́нъ бы́сть съ небесе́, кресто́мъ наставля́емь къ свѣ́ту зна́нія. Честны́я бо дѣ́вы любо́вію разжига́емь, тоя́ ра́ди сочета́лся еси́ Зижди́телю человѣ́ковъ. Тѣ́мъ обличи́въ не́мощь вра́жію, съ не́ю сподо́бился еси́ ли́ку му́чениковъ. Кипріа́не, архіере́евъ удобре́ніе, моли́ Христа́ Бо́га грѣхо́въ оставле́ніе пода́ти честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безъ сѣ́мене, моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца и Па́стыря, и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Возбну́въ, богогла́се, отъ неи́стовства пе́рваго, де́монскую ле́сть и душетлѣ́нную пре́лесть всю́ обличи́лъ еси́, и ра́дуяся, взыва́лъ еси́: сла́ва си́лѣ Твое́й, Го́споди.

До́блественно Іусти́на укрѣпля́ема, и Чи́стую Дѣ́ву и Обра́дованную зѣло́ моля́щи, сѣ́тей избѣже́ и ко́зней же вра́жіихъ.

Укрѣпля́ема вѣ́рою твоего́ Жениха́ и кре́стною си́лою одѣ́яна, де́моны нея́тна, вопію́щи, пребыла́ еси́: сла́ва си́лѣ Твое́й, Го́споди.

Богоро́диченъ: Иже естество́мъ свобо́денъ Сы́й, о́бразомъ раба́ обнища́ бога́тствомъ бла́гости, Ма́ти Приснодѣ́во, изъ Тебе́ по ѵпоста́си все́ пріе́мь человѣ́чество.

Пѣ́снь 5.

Ирмо́съ: Ты́, Го́споди мо́й, свѣ́тъ въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Побо́рницу иму́щи я́вѣ Чи́стую Богома́терь, обога́щшися, Іусти́но, честно́е дѣ́вство сохрани́ла еси́ невре́дно.

Одушевле́нный Христо́въ и краснѣ́йшій о́бразъ, почти́мъ Іусти́ну, сокрове́нную добро́ту и некра́домое возложе́ніе.

Невѣ́ста Христо́ва при́сная и нескве́рная, страда́ніемъ и поще́ніемъ воспріе́мши, пра́ведно сугу́бъ вѣне́цъ но́ситъ.

Богоро́диченъ: Умъ а́нгельскій и человѣ́ческій не мо́жетъ сказа́ти неизрече́ннаго и пресла́внаго чудесе́ Рождества́ Твоего́, Всечи́стая.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Зло́бы дна́ преиспо́дняго доше́лъ еси́, къ кра́йнѣйшей же па́ки добродѣ́тели, о́тче, возше́лъ еси́ на высоту́, пресла́вно измѣни́вся боже́ственнымъ креще́ніемъ.

Бы́лъ еси́ служи́тель де́моновъ пе́рвѣе, но Христо́въ богоявле́нный учени́къ показа́лся еси́, при́сною любо́вію жела́ніе возлюби́въ послѣ́днее.

Мно́гія ты́ Влады́цѣ приве́лъ еси́ му́ченики, ку́плей велича́йшую явля́я, кро́вію малѣ́йшею Ца́рство небе́сное, богому́дре, купи́ти.

Богоро́диченъ: Расто́ргни моя́ плени́цы согрѣше́ній, Богоневѣ́сто, грѣхо́внаго зако́на, жи́зни зако́номъ свобо́ду да́рующи, Влады́ку зако́на ро́ждшая.

Конда́къ, гла́съ 1. Подо́бенъ: Ли́къ а́нгельскій.

Отъ худо́жества волше́бнаго обрати́вся, богому́дре, къ позна́нію боже́ственному, показа́лся еси́ мíру вра́чь мудрѣ́йшій, исцѣле́нія да́руя честву́ющимъ тя́, Кипріа́не со Іусти́ною: съ не́юже моли́ся Человѣколю́бцу Влады́цѣ спасти́ ду́ши на́ша.

Икосъ:

Цѣле́ній твои́хъ, свя́те, дарова́нія мнѣ́ низпосла́въ, и неду́гующее мое́ се́рдце гно́емъ грѣхо́внымъ, моли́твами твои́ми исцѣли́, я́ко да сло́во пѣ́нія отъ скве́рныхъ усте́нъ мои́хъ ны́нѣ принесу́ ти и воспою́ болѣ́зни твоя́, я́же показа́лъ еси́, священному́чениче, покая́ніемъ до́брымъ и блаже́ннымъ, и Бо́гу приближа́ющимся. Того́ бо удержа́нъ руко́ю, напра́вился еси́, я́ко по лѣ́ствицѣ, къ небе́снымъ, непреста́нно моля́ся спасти́ ду́ши на́ша.

Пѣ́снь 7.

Ирмо́съ: Спасы́й во огни́ Авраа́мскія Твоя́ о́троки, и халде́и уби́въ, я́же пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

На священнонача́льство вше́дъ, свяще́ннѣйшій о́бразъ священнонача́льникомъ себе́ и пра́вило яви́лъ еси́, взыва́я: препѣ́тый Го́споди, Бо́же оте́цъ на́шихъ, благослове́нъ еси́.

Живонача́льныя тебѣ́ десни́цы и́стинно измѣне́ніе, о́тче, наше́дшее, му́дра тя́ сотвори́ боговѣща́теля, пою́ща: препѣ́тый Го́споди, Бо́же оте́цъ на́шихъ, благослове́нъ еси́.

Ору́жіе непобѣди́мое на́мъ на проти́внаго, блаже́нне, ты́ яви́лся еси́, того́ облича́я ле́сти, пою́щимъ: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Небе́сніи ли́цы и пренебе́сніи собо́ри, пѣсносло́вятъ изъ Тебе́, Богоро́дице, Рожде́ннаго, зову́ще: препѣ́тый Го́споди, Бо́же оте́цъ на́шихъ, благослове́нъ еси́.

Пѣ́снь 8.

Ирмо́съ: Весели́ся, Іерусали́ме, торжеству́йте, лю́бящіи Сіо́на: ца́рствуяй бо во вѣ́ки, Госпо́дь си́лъ пріи́де. Да благоговѣ́етъ вся́ земля́ отъ лица́ Его́ и да вопіе́тъ: благослови́те вся́ дѣла́ Госпо́дня Го́спода.

Прему́дро е́ллинскія му́дрости небре́глъ еси́, сла́вне, апо́столовъ же боже́ственное вѣща́ніе, Ду́хомъ бряца́емо, о́тче, и о́гненными язы́ки я́сно изглаша́емо, вопія́лъ еси́: благослови́те вся́ дѣла́ Госпо́дня Го́спода.

Восте́клъ еси́ на высо́кая и премíрная свѣ́тло селе́нія, Христу́ кро́вію, я́ко же́ртвою непоро́чною, приноси́мь, о́тче, заколе́ніе жи́во, прія́тно и благоуго́дно, воспѣва́я: благослови́те вся́ дѣла́ Госпо́дня Го́спода.

Побѣжда́еми отъ въ тебе́ все́льшіяся благода́ти, де́монстіи полцы́ отгоня́ются и отбѣга́ютъ стра́сти неду́гующихъ, богому́дре, вѣ́рніи же Боже́ственнаго свѣ́та насыща́емся, вопію́ще: благослови́те вся́ дѣла́ Госпо́дня Го́спода.

Богоро́диченъ: Лику́ютъ со а́нгельскими, Пречи́стая, си́лами о Рождествѣ́ Твое́мъ, Богома́ти, и Богоро́дицу вѣ́рою Тя́ имену́ющіи: Ты́ бо Влады́ку и Изба́вителя на́мъ родила́ еси́, Ему́же пое́мъ: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, Прозябе́ніемъ чревоноше́нія мíрови благослове́ніе процвѣла́ еси́, тѣ́мъ Тя́ вси́ велича́емъ.

Свы́ше на́съ, благоче́стно пою́щихъ тя́, назира́еши Боже́ственною благода́тію, твои́ми моли́твами, богоглаго́льниче, и ору́жіемъ благоволе́нія вѣнчава́я, ми́ръ и спасе́ніе да́руй на́мъ, я́ко священнонача́льникъ боже́ственнѣйшій.

Тече́ніе исцѣле́ній оби́льно пе́рсть твоя́ лю́бящимъ тя́ воздае́тъ; тебе́ же, Кипріа́не, жены́ богоно́сны я́ко боже́ственно сокро́вище пріе́млютъ и усе́рдно явля́ютъ сокрове́ннаго, да вси́ тебе́ наслади́мся.

Напра́вити на́ше ко Христу́, пребога́те, ше́ствіе дѣя́ніемъ, и богоуго́днымъ житіе́мъ, и чистѣ́йшимъ очище́ніемъ су́що Бо́жію ти́хость умоли́, я́ко іера́рхъ сострада́тельнѣйшій.

Богоро́диченъ: Укрѣпи́ на́шу душе́вную не́мощь, Богома́ти, си́лою Твое́ю, разрѣши́ тяготу́, Пресвята́я, налага́емую рабо́мъ Твои́мъ, мíру пра́вды Со́лнце несказа́нно возсія́вшая.

Свѣти́ленъ. Подо́бенъ: Жены́, услы́шите.

Въ волхва́хъ несосужде́нна и еди́наго пребо́льша, премѣ́ншаго нра́въ и попали́вшаго кни́ги, наставля́ющія ко пре́лести, и свидѣ́тельства вѣне́цъ страннолѣ́пно пріе́мшаго, Кипріа́на похва́лимъ, страда́льцевъ зерца́ло.

Богоро́диченъ:

Дре́вле божества́ наде́ждею прельсти́вый мя́ злоко́зненный, пло́тнымъ предложе́ніемъ прему́дренно па́ки прельща́ется отъ Дѣ́вы Возсія́вшаго; и си́це осужде́ніе пло́тное пло́тію разрѣши́ся, сме́рти умертви́вшейся.

На стихо́внѣ окто́иха. Сла́ва, гла́съ 8:

Иже зло́бы пре́жде опа́сный побо́рникъ, Це́ркве по́слѣжди и́стинный учи́тель, и́же служи́тель пре́лести и́доловъ, священнонача́льникъ вѣ́ры яви́ся, и блу́дный — цѣлому́дренъ, честны́я ра́ди дѣ́вы; обои́хъ моли́твами спаси́ ны, Го́споди.

И ны́нѣ, богоро́диченъ или́ крестобогоро́диченъ:

Что́ зри́мое видѣ́ніе,* е́же Мои́ма очи́ма ви́дится, о Влады́ко?* Содержа́й всю́ тва́рь* на Дре́вѣ воздви́женъ бы́въ* и умира́еши, всѣ́мъ дая́й жи́знь, —* Богоро́дица, пла́чущи, глаго́лаше,* егда́ узрѣ́ на Крестѣ́ возноси́ма,* изъ Нея́ неизрече́нно возсія́вшаго* Бо́га и Человѣ́ка.


НА ЛИТУРГІИ,

Блаже́нна окто́иха на 4, и святы́хъ пѣ́снь 3-я на 4. Проки́менъ, гла́съ 7: Честна́ предъ Го́сподемъ [сме́рть преподо́бныхъ Его́]. Сти́хъ: Что́ возда́мъ [Го́сподеви о всѣ́хъ, я́же воздаде́ ми?] Апо́столъ къ Тимоѳе́ю, зача́ло 280. Аллилу́ія, гла́съ 2: Свяще́нницы Твои́ облеку́тся [въ пра́вду, и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 25 об. – 29 об.

/ Къ оглавленію раздѣла /


Наверхъ / Къ титульной страницѣ

0