Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 1-й де́нь.
Свята́го апо́стола Ана́ніи, еди́наго отъ седми́десяти и преподо́бнаго отца́ на́шего Рома́на Сладкопѣ́вца.

ВЕЧЕРЪ,
Обы́чная каѳи́сма. На Го́споди воззва́хъ: стихи́ры апо́стола, гла́съ 4. Подо́бенъ: Зва́нный свы́ше.

Иже зарю́ боже́ственную пріе́мь,* егда́ манове́ніемъ лу́чшимъ ослѣпле́нъ,* пре́жде мра́комъ держи́мь,* пріи́де къ тебѣ́ Са́влъ,* боже́ственнаго прося́ очище́нія,* тогда́, всеблаже́нне, я́ко іера́рхъ му́дръ* сынотвори́ши его́ креще́ніемъ,* пото́мъ хотя́щаго вселе́нную всю́ осынотвори́ти.* Тѣ́мъ съ ни́мъ блажи́мъ тя́,* Христо́ва апо́стола,* Ана́ніе богому́дре,* моли́теся спасти́ся на́мъ.

Научи́вся боже́ственнымъ пресла́вно,* гро́ма крѣ́пльше, блаже́нне,* воструби́лъ еси́ Сло́во Бо́жіе спаси́тельное* и спя́щія во гробѣ́хъ суеты́ возбуди́лъ еси́,* умерщвле́ніе отве́ргшія,* ме́ртвымъ сообита́ющее* и во а́дѣ держи́мыя возобраща́ющее,* я́же содѣ́лалъ еси́ Умертви́вшаго ме́ртвость* сосу́ды че́стны* Іису́са Влады́ки* и Спа́са ду́шъ на́шихъ.

Яко свѣтоно́сецъ,* я́ко боже́ственный проповѣ́дникъ,* я́ко свидѣ́тель богоизбра́нный* Страсте́й Христо́выхъ* и бу́дущія яви́тися неизрече́нныя сла́вы* снаслѣ́дникъ же и сприча́стникъ,* сы́й со Влады́кою,* и наслажда́яся истека́ющаго всегда́ свѣтоли́тія,* отъ незаходи́маго Свѣ́та, богоглаго́ливе,* свѣ́тлый соверша́ющія тво́й ны́нѣ пра́здникъ,* моли́твами твои́ми отъ мра́чныхъ бѣ́дъ, Ана́ніе, изба́ви.

Ины стихи́ры Рома́на, гла́съ 1. Подо́бенъ: Небе́сныхъ чино́въ.

Краснопѣ́снивая цѣвни́ца* Боже́ственнаго Ду́ха,* славíй и щу́ръ боже́ственныхъ пѣ́сней,* свирѣ́ль церко́вная* всѣ́мъ на́мъ своя́ предлага́етъ сладкопѣ́сненная учрежде́нія* и тѣ́ми весели́тъ богому́дрыя.

Свѣтлѣ́йшій свѣти́льникъ и проза́рнѣйшій,* сладковѣща́нная гу́сль,* струна́ благознамени́тыхъ Ду́ха слове́съ* пое́тъ я́сно, науча́я концы́* немо́лчными пѣ́сньми славосло́вити* Божества́ еди́ну зарю́.

Ты́, Влады́цѣ всѣ́хъ я́ко предстоя́* и дерзнове́ніе, о́тче, къ Нему́ стяжа́въ,* на́мъ, соверша́ющимъ па́мять твою́* и свѣ́тлое твое́ торжество́,* моли́ изба́витися бѣ́дъ и напа́стей,* Рома́не богоблаже́нне.

Сла́ва, апо́стола, гла́съ то́йже. Византíево:

Сосу́дъ избра́нный, вели́кое прія́телище Ду́ха, Па́вла апо́стола просвѣти́лъ еси́, преподо́бне, Бо́гомъ по открове́нію навы́къ, я́ко самови́децъ Сло́ва и таи́нникъ чуде́съ Его́, апо́столъ же пре́жде ученико́въ и вѣ́рный строи́тель Но́ваго Завѣ́та, тѣ́мъ подража́я Учи́теля Христа́, твою́ кро́вь пролія́лъ еси́, му́ченическою стра́стію исповѣ́дникъ бы́въ, Ана́ніе, священнонача́льниче Христо́въ, и тече́ніе соверши́въ, вѣ́ру же некра́дому соблю́дъ, съ вы́шними служи́тели въ высоча́йшихъ водворя́яся, моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Прехва́льніи му́ченицы.

При Крестѣ́ предстоя́щи* Сы́на Твоего́ и Бо́га* и долготерпѣ́ніе Его́ смотря́ющи,* глаго́лала еси́, рыда́ющи, Ма́ти Чи́стая:* увы́ Мнѣ́, Ча́до Сладча́йшее,* что́ сія́ стра́ждеши* непра́ведно, Сло́ве Бо́жій,* да спасе́ши человѣ́чество?

Стихо́вна окто́иха.

И апо́стола сти́хъ, гла́съ 4, съ припѣ́вомъ: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ.

Страстоте́рпческое прія́телище, яви́лся еси́, Ана́ніе апо́столе, ка́меніемъ, я́ко цвѣ́ты, учаща́емь, за Пострада́вшаго пло́тію на́съ ра́ди распя́тіе во́льнѣ кро́вь твою́ пролія́лъ еси́. Тѣ́мъ и Дама́скъ хва́лится свяще́ннымъ твои́мъ торжество́мъ дне́сь. Не то́чію же то́й, но и вся́ подсо́лнечная, чуде́съ твои́хъ зна́менія я́вѣ проповѣ́дающи, вопіе́тъ: моли́ся къ Бо́гу дарова́ти на́мъ согрѣше́ній проще́ніе.

Сла́ва, преподо́бнаго, гла́съ 6:

Пе́рвое до́брыхъ нача́ло яви́лся еси́ спасе́нія вина́, Рома́не, о́тче на́шъ; а́нгельское бо соста́вивъ пѣснопѣ́ніе, боголѣ́пно показа́лъ еси́ житіе́ твое́; Христа́ Бо́га моли́ напа́стей и бѣ́дъ изба́вити пою́щія тя́.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь апо́стола, гла́съ 3:

Апо́столе святы́й Ана́ніе, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, преподо́бнаго, гла́съ 8:

Въ тебѣ́, о́тче, извѣ́стно спасе́ся, е́же по о́бразу: пріи́мъ бо кре́стъ, послѣ́довалъ еси́ Христу́, и дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй; тѣ́мже и со а́нгелы сра́дуется, преподо́бне Рома́не, ду́хъ тво́й.

И ны́нѣ, богоро́диченъ или́ крестобогоро́диченъ.



НА УТРЕНИ,
Кано́нъ окто́иха еди́нъ и апо́стола, на 4, его́же краегране́сіе: Ана́ніи сла́ва да просла́вится. Творе́ніе Іоа́нна мона́ха. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отве́рземъ уста́ похва́льная, уясни́мъ язы́къ въ па́мяти, вси́ вѣ́рніи, началопа́стыря Ана́ніи и съ ни́мъ Бо́гу на́шему воспои́мъ.

Жениху́ Пречи́стому невѣстово́дитъ нескве́рную невѣ́сту Ана́нія пресла́вный, Христу́ су́щую здѣ́ Це́рковь, съ не́юже я́сно Бо́гу на́шему воспои́мъ.

Пе́рвый бы́лъ еси́ учени́къ, но́вому дае́ши прозрѣ́ніе ученику́, дре́вле гони́телю, Ана́ніе, и пѣснопое́ши: воспои́мъ Бо́гу на́шему.

Богоро́диченъ: Чи́ни Тя́ а́нгельстіи и земны́хъ ро́ди, Безневѣ́стная Ма́ти, непреста́нно хва́лятъ: Зижди́теля бо и́хъ, я́коже Младе́нца, на объя́тіихъ Твои́хъ носи́ла еси́.

Инъ кано́нъ преподо́бнаго Рома́на, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Свѣтосія́нныя лучи́ отъ небе́съ на́мъ низпосли́ моли́твами твои́ми, му́дре Рома́не боже́ственне, твою́ похвали́ти свяще́нную па́мять пѣ́сньми.

Отъ ю́ности ве́сь ты́ Христу́ тя́ сама́го предложи́въ, послѣ́довалъ еси́ Ему́, свѣтоза́рными сія́ньми у́мъ съ небесе́, Рома́не, облистава́я.

Укра́шенъ добро́тою Вседѣ́тельнаго и Свята́го Ду́ха, я́ко звѣзда́ свѣтосія́нная, добродѣ́телей свѣ́тлостію, му́дре, яви́лся еси́, Рома́не, мíра конце́мъ.

Богоро́диченъ: Изъ Тебе́ про́йде неизрече́нно Бо́жіе Сло́во Собезнача́льное въ послѣ́дняя времена́, и пе́рваго человѣ́ка Ада́ма, во тлю́ па́дшаго, Богоро́дице, возспасе́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Повелѣ́нію послѣ́дуя Учи́теля твоего́, бы́лъ еси́ архіере́й, страстоте́рпческое же приноше́ніе, апо́столе.

Ми́лостива моли́твами твои́ми богоувѣ́тливыми содѣ́лай Изба́вителя тебе́ пою́щимъ, Ана́ніе апо́столе.

Все́ тебѣ́ связа́ звѣ́ря стремле́ніе, Го́сподь яви́вся, свѣ́томъ неизрече́ннымъ омрачи́въ лице́.

Богоро́диченъ: Тя́ вси́ стяжа́хомъ, прибѣ́жище и стѣ́ну на́шу, христіа́не, и Тя́ славосло́вимъ немо́лчно, Безневѣ́стная.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Умъ тво́й, Рома́не му́дре, бы́сть оби́телище Тро́ицы Святы́я, исполня́емь благоче́стно зна́нія и́стиннаго, источа́я боже́ственная проповѣ́данія.

Струи́ искипѣ́ тече́ній честны́й тво́й язы́къ, поя́ боже́ственная и уясня́я му́дростно Христо́во къ на́мъ отъ Дѣ́вы Рождество́ неизрече́нное.

Се́ пита́еши оби́льно му́дрыми уче́ньми и кра́сными пѣснопѣ́ніи по́мыслы на́ша и исполня́еши сла́дости Боже́ственнѣйшія, Рома́не богогла́се.

Богоро́диченъ: Всѣ́хъ еси́ во́инствъ вы́шши, Дѣ́во, тѣ́хъ бо Содѣ́теля, Сы́на Бо́жія, зачала́ еси́ во утро́бѣ и, ро́ждши, пребыва́еши Приснодѣ́ва.

Конда́къ преподо́бнаго, гла́съ 8:

Боже́ственными добродѣ́тельми ду́ха измла́да украси́вся, Рома́не прему́дре, Це́ркви Христо́вѣ пречестно́е украше́ніе бы́лъ еси́: пѣ́ніемъ бо прекра́снымъ украси́въ ю́, блаже́нне. Тѣ́мъ мо́лимъ тя́: пода́ждь жела́ющимъ боже́ственнаго дарова́нія твоего́, я́ко да вопіе́мъ ти́: ра́дуйся, о́тче преблаже́нне, красото́ церко́вная.

Сѣда́ленъ, апо́стола, гла́съ то́йже. Подо́бенъ: Прему́дрости.

Просвѣще́нъ позна́ніемъ боже́ственнымъ, свяще́нникъ же, и му́ченикъ Іису́совъ, и боже́ственный апо́столъ, Ана́ніе, бы́лъ еси́. И иногда́ гони́теля Са́вла нарица́ема, ослѣпле́на манове́ніемъ вы́шнимъ, сла́вне, въ водѣ́ погрузи́въ, богосодѣ́тельнымъ науче́ніемъ лу́чша его́ показа́лъ еси́, просвѣти́теля душа́мъ на́шимъ. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти честву́ющимъ любо́вію святу́ю па́мять твою́.

Сла́ва, преподо́бнаго, гла́съ 5. Подо́бенъ: Собезнача́льное Сло́во.

Насажде́нъ, я́коже дре́во, о́тче блаже́нне, при исхо́дищихъ во́дъ по́стническихъ, Боже́ственнымъ содѣ́йствомъ плоды́ болѣ́зней твои́хъ во вре́мя я́вственно Садодѣ́лателю и Творцу́ отда́лъ еси́. Сего́ ра́ди святу́ю твою́ пое́мъ па́мять, честву́юще тя́, Рома́не преподо́бне.

И ны́нѣ, богоро́диченъ:

Те́плая предста́тельнице и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы умире́ніе да́ти мíру, и спасе́ніе, и ве́лію ми́лость.

Крестобогоро́диченъ:

На Крестѣ́ зря́щи Тя́, Христе́, Ма́ти Твоя́, во́льно посредѣ́ разбо́йниковъ ви́сяща, растерза́ющися утро́бою, ма́терски глаго́лаше: безгрѣ́шный Сы́не, ка́ко непра́ведно на Крестѣ́, я́коже злодѣ́й, пригвожде́нъ еси́, человѣ́ческій ро́дъ хотя́ оживи́ти, я́ко Благоутро́бенъ?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Тобо́ю, Христе́, наказу́емъ, страда́льчески побѣжда́етъ сме́рть Ана́нія приснопа́мятный, отъ Тебе́ по́чести воспріима́я.

Учени́къ бы́лъ еси́ гони́маго Сло́ва, приснопа́мятне Ана́ніе, и учи́тель богоче́стія гоня́щему.

Яви́ тя́ Госпо́дь Са́влу безоче́сну кры́ющася, и показа́ тя хода́тая, Ана́ніе, того́ исцѣле́нія.

Богоро́диченъ: Бо́га, Его́же родила́ еси́, Пречи́стая Дѣ́во, Того́ моли́ отъ вся́каго обстоя́нія изба́вити вся́ пою́щія Тя́.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Прія́телище бы́лъ еси́ Боже́ственнаго Ду́ха и огнедохнове́нная уста́, возглаша́ющая боже́ственная пѣснопѣ́нія и наслажда́ющая ду́ши, Рома́не, притека́ющихъ ти́.

Яко цѣвни́ца ты́ бы́лъ еси́ небе́сная и гу́сль, вся́кую къ себѣ́ влеку́щи мы́сль повѣстьми́ твои́ми и кра́сными твои́ми песнопѣ́ніи.

Благода́ть дхне́ и всели́ся въ свѣтоно́сную твою́ ду́шу, Вседѣ́тельнаго и Пресвята́го Ду́ха, прехва́льне, и тя́ прія́телище и му́дра боговѣща́теля содѣ́ла.

Богоро́диченъ: Ядъ излія́ въ прама́тернія у́бо слу́хи змíй, но Ты́, Чи́стая, сего́ истрясла́ еси́, арха́нгеловымъ гла́сомъ заче́нши и ро́ждши Христа́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Въ бу́ри су́щимъ приста́нище боже́ственное приснотеку́щій Исто́чникъ показа́ тя; во тмѣ́ же су́щимъ зарю́ непристу́пный Свѣ́тъ содѣ́ла тя́, Ана́ніе блаже́нне, и я́ко ученика́ достоявле́нна, ми́лостивно въ тебѣ́ Воспочива́яй.

Ви́дяй сокрове́нная и пре́жде бытія́ Вѣ́дый вся́ческая, тебѣ́, тая́щемуся, тая́щагося со́лнца яви́, иногда́ гони́теля, не по мно́зѣ вре́мени, разоря́емыя отъ него́ Истины, апо́стола.

Постиже́нія коне́цъ неизслѣ́димый Твоего́ строе́нія: тѣ́мъ бо, Спа́се, стра́шная изничто́жися сме́рть. Сего́ ра́ди Ана́нія я́ко побѣди́тель и іера́рхъ за Тя́, ра́дуяся, закала́ется.

Богоро́диченъ: Ма́тернее дерзнове́ніе е́же къ Сы́ну Твоему́ иму́щи, Пречи́стая, сро́днаго промышле́нія е́же о на́съ не пре́зри, мо́лимся: я́ко Тебе́ и еди́ну христіа́не ко Влады́цѣ очище́ніе ми́лостивно предлага́емъ.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Яко благолѣ́пнѣйшо святи́лище, сосу́дъ я́ко чистѣ́йшій, Утѣ́шителева благода́ть обрѣ́тши тя́, Рома́не богому́дре, хра́мъ содѣ́ла, свѣ́томъ укра́шенъ, и всели́ся.

Воплоще́ннаго Сы́на Бо́жія Ро́ждшая и́стинно твою́ ду́шу просвѣти́ и у́мъ боже́ственнаго зна́нія испо́лни, въ нощи́ предста́вши тебѣ́, Приснодѣ́ва.

Списа́ньми твои́хъ свяще́нныхъ слове́съ, приснопа́мятне, яви́вся всѣ́мъ вои́стинну сладча́йшій, вся́ увеселя́еши, всѣ́хъ просвѣща́я у́мъ и вся́ науча́я зна́нію спаси́тельному.

Богоро́диченъ: Свѣ́тъ ро́ждшая, Отчее Сло́во Присносу́щное, Чи́стая, свѣща́тельными моли́твами Твои́ми просвѣти́ у́мъ мо́й и отжени́ тму́ души́ моея́, Пречи́стая Влады́чице.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Служи́ти навы́къ Бо́гу Жи́ву свяще́ннѣйше, разруши́лъ еси́ многоча́стное безу́мныхъ злонра́віе, Еди́ному науча́я, Ана́ніе, покланя́тися Тріѵпоста́сному Божеству́.

Пріе́мъ въ ру́цѣ твои́ церко́вная корми́ла, къ Ко́рмчію Христу́ прише́лъ еси́, апо́столе, и сію́ Ду́хомъ, я́ко кора́бль боже́ственный, Ана́ніе, упра́вилъ еси́.

Созда́вый пра́вый пу́ть, правоше́ствующему посыла́ему бы́ти сла́вному Твоему́ ученику́ повелѣ́лъ еси́, Влады́ко, пра́веднѣйшаго Твоего́ избра́нія сосу́дъ открыва́я, моля́щася.

Богоро́диченъ: Да изба́вимся отъ лю́тыхъ прегрѣше́ній мольба́ми Твои́ми, Богороди́тельнице Чи́стая, и да улучи́мъ, Пречи́стая, Боже́ственное сія́ніе изъ Тебе́ неизрече́нно Воплоще́ннаго Сы́на Бо́жія.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Просвѣще́нія исполня́емь и къ высотѣ́ добродѣ́телей боже́ственно возводи́мь, небре́глъ еси́ о всѣ́хъ земны́хъ: и сто́лпъ небе́сный, и свѣти́льникъ благоче́стія бы́лъ еси́.

Пло́ти увяди́лъ еси́ жела́нія и ду́шу твою́ украси́лъ еси́ свѣтлѣ́йшими чистоты́ озаре́ньми, и добро́ту рачи́тельную добродѣ́телей благолѣ́піемъ обложи́лъ еси́.

Возненави́дѣвъ привре́менное и су́етное, и гнило́е, и те́чное наслажде́ніе, къ хра́му Богоро́дицы прилѣжа́, у́мъ освяти́лъ еси́, и ду́шу, и тѣ́ло, достосла́вне.

Богоро́диченъ: Вси́ предзря́ще проро́цы свѣ́тло бу́дущее по́слѣжди отъ Дѣ́вы, Христе́ мо́й, Твое́ на земли́ пренепоро́чное Рождество́, я́вственно богови́дцы провѣща́ша.

Конда́къ апо́стола, гла́съ 2. Подо́бенъ: Въ моли́твахъ.

Въ моли́твахъ теплѣ́йшій засту́пниче и прося́щимъ скорѣ́йшій послу́шателю, пріими́ моле́ніе, Ана́ніе, на́ше и Христа́ моли́ поми́ловати ны́, Еди́наго во святы́хъ Почива́ющаго.

Икосъ:

Просвѣще́ніемъ сія́нія Твоего́ просвѣти́въ, Христе́ мо́й, мра́къ моего́ се́рдца и слѣпоту́, да́ждь ми́ сло́во похвали́ти чи́стымъ смы́сломъ апо́стола богоза́рныя добродѣ́тели и стра́сти блаже́ннаго: Исто́чникъ бо Ты́ еси́ му́дрости и Пода́тель благи́хъ, Многоблагоутро́бне. Тѣ́мъ, уясни́въ язы́къ мо́й, пѣ́сненное пріими́ похвале́ніе, Еди́не во святы́хъ почива́яй.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Да востру́битъ му́дренно богоизбра́нное ста́до благогла́сною трубо́ю страда́нія па́стыря Ана́ніи, вопія́ своему́ началопа́стырю Христу́: отце́въ на́шихъ Бо́же, благослове́нъ еси́.

Да сла́витъ тя́, ученика́ Бо́жія, Ана́ніе, и іера́рха вѣ́рна, и свидѣ́теля Боже́ственныхъ страда́ній, возглаша́ющи, честна́я Це́рковь Христо́ва: отце́въ на́шихъ Бо́же, благослове́нъ еси́.

Не сме́рти боя́знію, но любо́вію па́ствы скрыва́яся, во́лка, я́коже а́гнца, зря́ укроти́вшася, Ана́нія зовя́ше: отце́въ на́шихъ Бо́же, благослове́нъ еси́.

Богоро́диченъ: Отъ дѣ́вственныхъ ложе́снъ вопло́щся, яви́лся еси́, Христе́, на спасе́ніе на́ше. Тѣ́мже Твою́ Ма́терь вѣ́дяще Богоро́дицу, правосла́вно зове́мъ: отце́въ на́шихъ Бо́же, благослове́нъ еси́.

Инъ.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Богоро́дицу Марíю богому́дра имѣ́лъ еси́ Учи́теля, вразумля́ющую тя́, и науча́ющую, и пѣ́ти повелѣва́ющую: благослове́нъ еси́, Го́споди, Бо́же оте́цъ на́шихъ.

Возсія́лъ еси́ въ мíрѣ, я́ко свѣтлѣ́йшее со́лнце, Рома́не богому́дре, и свѣ́тло просвѣща́я вѣ́рою зову́щія: благослове́нъ еси́, Го́споди, Бо́же оте́цъ на́шихъ.

Твои́хъ глаго́лъ вѣща́ніе вселе́нную испо́лни и красно́ пѣснопѣ́ти Христу́ человѣ́ки научи́: благослове́нъ еси́, Го́споди, Бо́же оте́цъ на́шихъ.

Богоро́диченъ: Ны́нѣ блажа́тъ Тя́ вси́ ро́ди человѣ́честіи, Богоро́дице Чи́стая, я́коже прорекла́ еси́, и вѣ́рою сла́вятъ: благослове́нъ, Пречи́стая, Пло́дъ чре́ва Твоего́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Стра́нно слы́шати, мня́ше Ана́нія сла́вный, отъ восхити́тельныя губи́теля ста́да Твоего́ си́лы, Влады́ко, па́че сло́ва премѣне́ніе къ па́стырскому чи́ну. Тѣ́мъ игра́я, вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Да ра́дуется дне́сь и да игра́етъ ду́хомъ всесла́вный и блаже́нный гра́дъ тво́й, твоего́ благополучи́въ заступле́нія, сла́вне, и, благодаря́ Спа́са, да вопіе́тъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Животворя́щимъ повелѣ́ніемъ, Ана́ніе прече́стне, свѣтотвори́вую Ви́дѣннаго си́лу Са́влу проповѣ́далъ еси́ и отрази́лъ еси́ ослѣпле́ніе, враче́вственныя твоя́ возложи́въ дла́ни, стрѣ́лы зміи́ныя исто́рглъ еси́, я́ко чешуи́, вопія́: превозноси́те Христа́ во вѣ́ки.

Тро́иченъ: Трисвѣ́тлое Божество́, Еди́нственную сія́ющую Зарю́, отъ Еди́наго Тріѵпоста́снаго Естества́, Роди́теля Безнача́льна, Единоесте́ственно же Сло́во Отчее и сца́рствующаго Единосу́щнаго Ду́ха, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Въ ну́ждахъ спаса́ющая и те́плѣ предста́тельствующая всѣ́мъ су́щимъ въ печа́ли, Всесвята́я Влады́чице, умилосе́рдися, спаси́ мя и лю́тѣ па́дша воздви́гни, ру́ку по́мощи пре́жде конца́ подаю́щи, да не но́щь мя́ сме́ртная обы́метъ спя́ща; да Тя́ по до́лгу сла́влю во вѣ́ки.

Инъ.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Всю́ мíра красоту́, и сла́дость, и сла́ву оттря́съ, ду́шу твою́ впери́лъ еси́ къ вы́шнимъ лико́мъ, къ та́мошнимъ сла́вамъ и свѣ́тлостямъ, му́дре, къ добро́тамъ неизрече́ннымъ, къ пребыва́ніемъ та́мошнимъ, къ свѣ́ту богонача́лія, зовя́: Тя́ превозно́симъ, Христе́, во вѣ́ки.

Боже́ственнымъ жела́ніемъ распаля́емь, восхожде́нія положи́лъ еси́ въ се́рдцы твое́мъ и безпло́тное во пло́ти житіе́ стяжа́лъ еси́. Ангельскимъ чино́мъ подо́бяся, му́дре, та́мо су́щая возлюби́лъ еси́ въ мíрѣ пѣснопѣ́нія, вѣ́рою, Рома́не, взыва́я: Тя́ превозно́симъ, Христе́, во вѣ́ки.

Высоковѣща́ніемъ боже́ственныхъ твои́хъ и сладча́йшихъ слове́съ, блаже́ннѣйше Рома́не, вся́къ по́мыслъ весели́ши человѣ́ковъ и услажда́еши, я́коже нѣ́кій пита́тель богатотво́рный, и просвѣща́еши свѣ́тло и науча́еши вопи́ти: Го́спода по́йте дѣла́ и превозноси́те во вся́ вѣ́ки.

Богоро́диченъ: Равнобо́жіемъ прельсти́въ мя́, человѣкоубíйца, змíй лука́внѣйшій, я́ко плѣ́нника, исхити́ сла́дости ра́йскія, но Влады́ка, естество́мъ Сы́нъ Бо́жій, вопло́щся, пріи́де отъ Дѣ́вы Марíи, и взя́тъ мя́ на высоту́, обожи́въ: Его́же превозно́симъ во вся́ вѣ́ки.

Пѣ́снь 9.

Ирмо́съ: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ си́лъ, немо́лчными славословле́ніи велича́емъ.

Разруши́лъ еси́, всехва́льне, тму́ невѣ́дѣнія; Свѣ́тъ же и́стинный возсія́лъ еси́ Дама́ску Тріѵпоста́сный: но я́ко чадолюби́вый оте́цъ и любо́вный пастыренача́льникъ въ правосла́внѣй вѣ́рѣ того́ сохрани́.

Сіе́ лѣ́тное соверша́юще торжество́, пріиди́те свѣтоза́рно сія́юще душе́внымъ досто́инствомъ: Тро́ицы служи́теля же и проповѣ́дника Ана́ніи трисія́нную добродѣ́тель воспои́мъ.

О, па́че человѣ́ча досто́инства твоего́, блаже́нне Ана́ніе! Яко учени́къ бо возлю́бленъ бы́лъ еси́, я́ко па́стырь почи́лъ еси́, и я́ко страда́лецъ Христу́ спросла́вился еси́, вѣнцы́ му́ченически украша́емь.

Богоро́диченъ: Пречи́стая, Всенепоро́чная, сосу́де благово́нія, испроси́ у Христа́, Его́же родила́ еси́, дарова́ти Импера́тору на́шему на враги́ побѣ́ду и отъ рабо́тнаго и́га да́ти осла́бу лю́демъ Твои́мъ: Тя́ бо непреста́нно велича́емъ.

Инъ.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Го́рнѣйшимъ, сла́вне, лико́мъ совокупи́лся еси́ безпло́тнымъ, идѣ́же неизрече́нная пребыва́етъ ра́дость и всегда́шнее наслажде́ніе, идѣ́же о́ный Богонача́лія свѣ́тъ е́сть и весе́ліе, идѣ́же неизглаго́ланная сла́ва, блаже́ннѣйше.

Съ пра́ведными вну́трь Боже́ственныя сла́вы всели́вся, зри́ши красоту́ неизрече́нную о́ную, зри́ши сла́дость неконча́емую, зри́ши добро́ты небе́сныя, и́стинно жела́нныя, му́дре, ви́диши патріа́рховъ ли́ки, Рома́не сла́вне.

Твою́ свѣтоно́сную па́мять вѣ́рно соверша́ющія отъ бѣ́дъ изба́ви моли́твами твои́ми, богому́дре, и отъ вся́каго вре́да, Рома́не, и ско́рби чужда́го и небе́сныя сла́вы получи́ти сподо́би и Ца́рствія го́рняго, блаже́ннѣйше.

Богоро́диченъ: Отъ дре́вняго паде́нія человѣ́ческій ро́дъ первозда́ннаго бы́сть тлѣ́ненъ, Дѣ́во Богоро́дице, и порабоще́нъ страстьми́ грѣхо́вными, но изъ Тебе́ рожде́йся Преблагíй Бо́гъ Свои́мъ благоутро́біемъ того́ воззва́.

Свѣти́ленъ окто́иха. Сла́ва, апо́стола. Подо́бенъ: Жены́, услы́шите.

Дама́скъ, апо́столе, ны́нѣ о тебѣ́ хва́лится, ему́же упространи́лъ еси́ крѣ́пость муче́ніемъ, Ана́ніе, учи́тель бы́въ Христа́ гоня́щему, я́ко учени́къ наро́читъ Христа́ гони́маго, къ Нему́же о на́съ моли́ся.

И ны́нѣ, богоро́диченъ:

О, та́инствъ Твои́хъ! О, чуде́съ Твои́хъ! Ка́ко по рождествѣ́ Дѣ́ва пребыла́ еси́, я́коже пре́жде рождества́? Ка́ко Бо́га вмѣсти́ла еси́, нигдѣ́же Вмѣсти́маго? Но вои́стинну несказа́нна Твоя́ су́ть вся́, Благослове́нная Дѣ́во Ма́ти, Марíе.

На стихо́внѣ окто́иха. Сла́ва, апо́стола, гла́съ 8. Анато́ліево:

Учениче́ Спа́совъ, іера́рше сла́вне, сла́во му́чениковъ, Ана́ніе, свѣти́льниче свѣтлѣ́йшій, на́шъ же градоде́ржче, прилѣ́жно моли́ся изба́вити ста́до твое́ отъ бѣ́дъ и спасти́ ду́ши на́ша.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Тя́ ви́дящи пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, вопія́ше, — Ча́до Сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый* милосе́рдіемъ Твои́мъ.


НА ЛИТУРГІИ:

Блаже́нна гла́са, на 4, и апо́стола пѣ́снь 3-я, на 4. Проки́менъ апо́стола, гла́съ 8: Во всю́ зе́млю изы́де вѣща́ніе и́хъ [и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ, Дѣя́ній, зача́ло 21, отъ полу́. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ.] Сти́хъ: Бо́гъ прославля́емь въ совѣ́тѣ святы́хъ. Ева́нгеліе Луки́, зача́ло 51. Прича́стенъ: Во всю́ зе́млю [изы́де вѣща́ніе и́хъ и въ концы́ вселе́нныя глаго́лы и́хъ].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 2 – 9.

/ Къ оглавленію раздѣла /


Наверхъ / Къ титульной страницѣ

0