Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 1-й де́нь.
Слу́жба преподо́бнаго отца́ на́шего Са́ввы, и́же надъ Ви́шерою рѣко́ю.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: поста́вимъ стихо́въ 6 и пое́мъ стихи́ры свята́го, гла́съ 5. Подо́бенъ: Преподо́бне о́тче.

Преподо́бне о́тче Са́вво,* любо́вію Боже́ственною разжига́емь,* оте́чество и ро́дъ оста́вилъ еси́* и въ чужди́хъ страна́хъ пусты́ню дости́гъ,* и та́мо сто́лпъ созда́въ,* и въ не́мъ до́брѣ подвиза́лся еси́.* Тѣ́мже и по преставле́ніи твое́мъ* благода́ть отъ Го́спода прія́лъ еси́ чуде́съ.* Моли́ спасти́ся тя́ почита́ющимъ. [Два́жды.]

Преподо́бне о́тче Са́вво,* любве́ ра́ди Учи́теля твоего́* вся́, я́же на земли́, преоби́дѣлъ еси́* и въ пусты́ню всели́вся,* пло́ти по́хотное мудрова́ніе умертви́лъ еси́* и по́стническими труды́ твое́ житіе́ уясни́лъ еси́,* отону́дуже и ученики́ собра́въ, ревну́ющія твоему́ житію́,* и сія́ Христу́ приве́лъ еси́,* Его́же моли́ спасти́ся всѣ́мъ пою́щимъ тя́. [Два́жды.]

Иже непра́ведно разбо́йнически наше́дшихъ* на оби́тель твою́, преподо́бне,* хотя́щихъ оскорби́ти ученики́ твоя́,* отъ столпа́ я́ко уви́дѣвъ,* то́кмо жезла́ ударе́ніемъ устраши́лъ еси́:* они́ же, я́ко позна́вше* свое́ безчеловѣ́чное суровство́,* съ студо́мъ къ бѣ́гству устреми́шася.* Христу́ моли́ся, спасти́ся душа́мъ на́шимъ. [Два́жды.]

Сла́ва, гла́съ 6:

Въ чужди́хъ страна́хъ водвори́вся, преподо́бне, и въ пусты́ню безмо́лвія вше́дъ, и та́мо сто́лпъ созда́лъ еси́, въ не́мже небе́сное бога́тство стяжа́лъ еси́: слеза́ми постя́ся у́бо сѣ́ялъ еси́, ра́достію же пожина́еши трудо́въ твои́хъ плоды́. Тѣ́мъ оби́тель, ю́же труды́ твои́ми стяжа́лъ еси́, со ученики́ не оста́ви, но ми́лостивно посѣща́й, и Христу́, о́тче Са́вво, моли́ся спасти́ся душа́мъ на́шимъ.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.]

Вхо́дъ, проки́менъ дне́ и чте́нія три́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры преподо́бнаго, гла́съ 2. Подо́бенъ: До́ме Евфра́ѳовъ.

Яко преходя́щую жи́знь,* ю́же на земли́ презрѣ́лъ еси́, блаже́нне:* и та́мо сподо́бился еси́* улучи́ти жи́знь блаже́нную* и Бо́жія сія́нія пріе́млеши, богоно́се.

Сти́хъ: Честна́ предъ Го́сподемъ* сме́рть преподо́бныхъ Его́.

Любве́ ра́ди Христо́вы,* преподо́бне Са́вво,* пло́ти рачи́тельное умертви́лъ еси́ мудрова́ніе* и отъ страсте́й ду́шу свобо́дну* Бо́гу предста́вилъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Бо́дренными моли́твами* и сле́зными исто́чники* Це́рковь вѣ́рныхъ* обогати́лъ еси́, богоблаже́нне.

Сла́ва, гла́съ 2:

Въ сто́лпъ я́ко вше́лъ еси́, преподо́бне, и отту́ду добродѣ́тели ра́ди къ небе́сному гра́ду преше́лъ еси́: дости́глъ пра́ведныхъ поко́я и святы́хъ ра́дованія. Тѣ́мже съ ни́ми прилѣ́жно, Са́вво, моли́ся о и́же вѣ́рою жи́знь твою́ почита́ющихъ и честно́е твое́ успе́ніе сла́вящихъ, вся́каго сопроти́внаго обстоя́нія изба́витися свяще́нному твоему́ ста́ду, да сего́ ра́ди тя́ вси́ вѣ́рно почита́емъ.

И ны́нѣ, богоро́диченъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

Тропа́рь, гла́съ 4:

Отъ ю́ности твоея́ ве́сь Бо́гу порабо́тился еси́, блаже́нне, и Того́ ра́ди любве́ оте́чество и ро́дъ оста́вилъ еси́, въ пусты́ню всели́вся и въ не́й жесто́кое житіе́ показа́въ, чуде́съ дарова́нія отъ Го́спода прія́лъ еси́, Са́вво преподо́бне, моли́ Христа́ Бо́га спасти́ся душа́мъ на́шимъ.

[Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
На Бо́гъ Госпо́дь: Тропа́рь [свята́го], два́жды. Сла́ва, и ны́нѣ, богоро́диченъ: Еже отъ вѣ́ка утае́нное...

По 1-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

Удиви́ся, преподо́бне Са́вво, во все́мъ мíрѣ, богоно́се, житіе́ твое́, я́ко отъ утро́бы ма́терни избра́нъ еси́ Бо́гомъ. Тѣ́мъ ны́нѣ со а́нгелы лику́еши въ небе́сныхъ. Помина́й на́съ, творя́щихъ па́мять твою́, Са́вво преподо́бне. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́, и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ тве́рдымъ и крѣ́пкимъ терпѣ́ніемъ вои́стинну и посрами́вша зѣло́ сопроти́внаго всю́ горды́ню, и ны́нѣ моля́щася Го́сподеви поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Стра́шно чу́до зача́тія, и несказа́ненъ о́бразъ рождества́ въ Тебѣ́ позна́ся, Чи́стая Приснодѣ́во. Ужаса́етъ ми́ у́мъ и удивля́етъ помышле́нія: сла́ва Твоя́, Богоро́дице, всѣ́мъ простре́ся на спасе́ніе душа́мъ на́шимъ.

По поліеле́и сѣда́ленъ, гла́съ 1. Подо́бенъ: Гро́бъ Тво́й, Спа́се.

Погре́блъ еси́ страсте́й все́ воста́ніе умерщвле́ніемъ пло́ти, свяще́нный о́тче, жи́знь безконе́чную по сме́рти прія́лъ еси́. Тѣ́мже дне́сь Христо́ва Це́рковь пра́зднуетъ твою́ досточу́дную па́мять, преподо́бныхъ украше́ніе. [Два́жды.]

Сла́ва, и ны́нѣ, богоро́диченъ:

Наста́ви ны́ на пу́ть покая́нія, уклоня́ющіяся всегда́ ко злы́мъ безпу́тіемъ и преблага́го Бо́га прогнѣ́вающія, Неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе селе́ніе.

Степе́нна, [1-й антифо́нъ 4-го гла́са.] Проки́менъ, [гла́съ 4: Честна́ предъ Го́сподомъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми?] Вся́кое дыха́ніе... Ева́нгеліе преподо́бническое: [Матѳе́я, зача́ло 43.]

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ: тѣ́мже на небесѣ́хъ обрѣ́лъ еси́ мзду́ трудо́въ твои́хъ, де́монская разори́лъ еси́ по́лчища и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Го́споду, ми́ръ испроси́ душа́мъ на́шимъ.

Кано́нъ преподо́бнаго Са́ввы, гла́съ 4. Творе́ніе священномона́ха Пахо́мія.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Смири́лся еси́ Христа́ ра́ди, о́тче, и кре́стъ взе́мъ, отъ оте́чества и сро́дниковъ, я́ко отъ змíя, бѣ́галъ еси́: отню́дуже въ пусты́ню вше́дъ и въ не́й трудолю́бно подвиза́лся еси́, преподо́бне.

Отъ ю́ности твоея́, о́тче Са́вво, у́мъ къ Бо́гу впери́въ, и тлѣ́нными нетлѣ́нная, я́ко до́брый купе́цъ, купи́лъ еси́: тѣ́мже ны́нѣ сше́дшеся, па́мять твою́ почита́емъ.

Христо́вымъ раче́ніемъ, о́тче Са́вво, па́че огня́ распала́емь, настоя́щая я́ко ничто́же су́щая презрѣ́лъ еси́: и сего́ ра́ди въ поко́ища всели́лся еси́, идѣ́же пра́ведныхъ ду́ши веселя́тся.

Богоро́диченъ: Боля́ща исцѣли́ душе́ю и тѣ́ломъ, Влады́чице, раба́ Твоего́, блаже́ннаго Са́ввы моле́ніемъ: Тебе́ бо Предста́тельницу вси́ су́щіи въ печа́лехъ стяжа́хомъ, я́ко Ро́ждшую Спасе́ніе на́ше.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Сна́ твои́мъ очесе́мъ не да́лъ еси́, блаже́нне Са́вво, ни вѣ́ждомъ дрема́нія, до́ндеже сподо́бился еси́ пра́ведныхъ селе́нія, я́же угото́ва Бо́гъ, преподо́бне, лю́бящимъ Его́.

Бо́дренными твои́ми моли́твами, о́тче Са́вво, и жесто́кимъ воздержа́ніемъ Бо́гу на земли́ до́брѣ угоди́лъ еси́: сего́ ра́ди стра́шенъ враго́мъ и сла́венъ человѣ́комъ бы́лъ еси́.

Ра́йскую жи́знь и та́мо святы́хъ селе́ніе всегда́ во умѣ́ твое́мъ помина́лъ еси́, преподо́бне. Тѣ́мже во слеза́хъ и воздыха́ніихъ всю́ твою́ жи́знь, о́тче Са́вво, преше́лъ еси́. Сего́ ра́ди и по сме́рти Христо́съ чудесы́ тя́ просла́ви.

Богоро́диченъ: Источа́еши исцѣле́ній струи́ боля́щимъ, Дѣ́во, всю́ду: Тя́ бо исто́чникъ показа́ милосе́рдія, Влады́чице, Иже ми́лости исто́чникъ, изъ Тебе́ рожде́йся па́че ума́.

По 3-й пѣ́сни сѣда́ленъ, гла́съ 4. Подо́бенъ: Вознесы́йся.

Юность твою́, преподо́бне, воздержа́ніемъ увяди́лъ еси́, стра́сти тѣле́сныя, я́ко плѣ́нника ху́да, связа́въ, ду́ху повину́лъ еси́: и сего́ ра́ди, о́тче Са́вво, Христо́съ чудесы́ пресла́вно тебе́ вѣнча́етъ, Еди́нъ прославля́яй святы́я Своя́. [Два́жды.]

Сла́ва, и ны́нѣ, богоро́диченъ:

Умертви́ся вся́ крѣ́пость моя́ отъ мно́жества безмѣ́рныхъ мои́хъ зо́лъ, и, мно́гими скорбьми́ одержи́мь, уже́ отча́яхся: но помози́ ми, Влады́чице, Са́ввы блаже́ннаго предста́тельствомъ, я́ко Ра́дость ро́ждшая пла́чущимъ и утѣше́ніе.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Житіе́ твое́, о́тче Са́вво, чу́дно на земли́ показа́лъ еси́, вели́ко поще́ніе и смире́ніе: и сего́ ра́ди та́мошняго житія́ вели́чество наслѣ́дилъ еси́. Моли́ спасти́ся отъ бѣ́дъ пою́щимъ тя́.

Симео́на вели́каго, на столпѣ́ жи́вшаго, житію́ послѣ́дуя, преподо́бне, тѣ́мже тому́ ели́ко мо́щно именова́ніе отъ житія́ стяжа́лъ еси́, Са́вво пребога́те.

Посто́мъ и моли́твами тѣ́ло твое́, о́тче Са́вво, изнури́лъ еси́ и сего́ ра́ди сподо́бился еси́ ви́дѣти неизрече́нная блага́я, я́же святы́мъ угото́вана. Съ ни́миже, о́тче Са́вво, о на́съ моли́ся.

Богоро́диченъ: Кро́въ, и заступле́ніе, и прибѣ́жище бу́ди ми́, Дѣ́во, рабу́ Твоему́, исцѣли́ мя отъ безмѣ́рныхъ зо́лъ, воспѣва́ти, Пречи́стая: сла́ва Рождеству́ Твоему́.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Чи́сто житіе́ твое́ отъ ю́ности потща́лся еси́, преподо́бне, сохрани́ти: тѣ́мже, чистоту́ твою́ ви́дѣвъ, Пресвяты́й Ду́хъ въ тя́ всели́ся.

Яко преоби́дѣвъ тлѣ́нная, вѣ́чная, о́тче, сподо́бился еси́ прія́ти по нело́жному словеси́: проси́те и пріи́мете. Тѣ́мже я́ко проси́лъ еси́, сія́ по досто́инству прія́лъ еси́.

Мѣ́сто, е́же сподо́бися прія́ти честны́я мо́щи твоя́, преподо́бне, освяти́ся и по мно́гимъ страна́мъ прославля́емо е́сть, я́ко въ себѣ́ мо́щи твоя́ иму́щее.

Богоро́диченъ: Не преста́й моля́щи, Его́же родила́ еси́, Богоневѣ́сто, я́ко Спа́са и Влады́ку, разрѣше́ніе ми́ пода́ти скорбе́й и болѣ́зней облегче́ніе, я́ко да пріиму́ проще́ніе, пѣсносло́вя Тя́ во вѣ́ки.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Твое́ вели́кое житіе́ и чистоту́, къ си́мъ же безмѣ́рное смире́ніе прови́дѣвъ, Пресвяты́й Ду́хъ, сла́вна тя́ всѣ́мъ, о́тче, показа́. Тѣ́мже отъ сего́ житія́ ко о́ному преше́дъ, получи́лъ еси́ съ пра́ведными та́мо весе́ліе.

Дне́сь наста́вши свяще́нная па́мять твоя́, преподо́бне Са́вво, весели́тъ ученики́ твоя́, воспѣва́ющія любо́вію по́двиги твоя́, и́же, честно́е твое́ успе́ніе сла́вяще, торжеству́ютъ, я́же моли́твами твои́ми, о́тче, соблюди́.

Разбо́йницы пе́рвѣе прише́дше тебе́ оскорби́ти, преподо́бне, но тѣ́хъ разумѣ́въ лука́вство, воздви́гнути тѣ́мъ дре́во ре́клъ еси́, не могу́щимъ же мно́гимъ тебѣ́ еди́ному проти́витися. Тѣ́мже я́ко посра́млени про́чее со стра́хомъ отбѣжа́ша, па́че побѣжде́ни бы́вше, не́жели побѣди́ша.

Богоро́диченъ: Твою́ по́мощь да́ждь ми́ и изба́ви мя́ отъ бѣ́дъ и скорбе́й и прегрѣше́ній мои́хъ, я́же всѣ́хъ ро́ждши Избавле́ніе.

Конда́къ, гла́съ 8. Подо́бенъ: Взбра́нной Воево́де.

Оте́чества, преподо́бне, удали́вся и всели́вся въ пусты́ню, и та́мо на сто́лпъ вше́дъ, идѣ́же жесто́кое житіе́ показа́лъ еси́, и мно́гихъ житіе́мъ удиви́въ, отню́дуже дарова́ніе чуде́съ отъ Христа́ прія́лъ еси́, помина́й на́съ, честву́ющихъ па́мять твою́, да зове́мъ ти́: ра́дуйся, Са́вво, о́тче на́шъ.

Икосъ:

Ева́нгельскій гла́съ, о́тче, услы́шавъ, вся́ оста́вилъ еси́ плотска́я мудрова́нія, бога́тство и сла́ву въ ничто́же вмѣни́въ, на стра́сти, я́ко безпло́тенъ, подвиза́лся еси́, и безпло́тныхъ ликостоя́нія чистото́ю сподо́бился еси́, и ра́зума дарова́ніе отъ Бо́га прія́лъ еси́, е́же пода́ждь въ пѣ́снехъ пою́щему ти́ си́це: ра́дуйся, Са́вво преподо́бне и богоно́сне, небе́сный человѣ́че и земны́й а́нгеле; ра́дуйся, Ду́ха Свята́го прекра́сное оби́телище; ра́дуйся, богоблаже́нне, вельми́ подвиза́вся во вре́меннѣй жи́зни, по достоя́нію обогати́лся еси́ благода́тію Ду́ха, ея́же дарова́ніе пода́ждь на́мъ, ча́домъ твои́мъ, да зове́мъ ти́: ра́дуйся, преподо́бне Са́вво, о́тче на́шъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Источа́етъ чудеса́ честна́я ра́ка твоя́, преподо́бне, преизоби́лующи благода́тію, вѣ́рою приходя́щимъ здра́віе да́руетъ, Христу́ отъ души́ вопію́щимъ: благослове́нъ Бо́гъ отце́въ на́шихъ.

Дре́внимъ о́нѣмъ и вели́кимъ отце́мъ, въ постѣ́ просія́вшимъ, житіе́мъ подо́бяся, преподо́бне, въ пусты́ню всели́лся еси́ и та́мо въ поще́ніихъ мно́га лѣ́та пребы́лъ еси́, Са́вво, о́тче на́шъ.

Яко и́стиннаго и кро́ткаго Пастыренача́льника Христа́ незло́бивое овча́, о́тче Са́вво, бы́лъ еси́. Тѣ́мже незло́бивъ хотя́щимъ тебе́ озло́бити бы́лъ еси́, Христу́ вопія́лъ еси́: благослове́нъ Бо́гъ отце́въ на́шихъ.

Богоро́диченъ: Обощре́ны болѣ́зни ра́намъ мои́мъ отъ безмѣ́рныхъ мои́хъ прегрѣше́ній, Влады́чице, веду́тъ въ сме́рть душе́вную и тѣле́сную: но исхи́ти я́ко си́льна вся́кихъ скорбе́й и неду́гъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Издѣ́тска, преподо́бне о́тче, потща́лся еси́ свою́ со́вѣсть и се́рдце съ душе́ю чи́сто Го́споду предста́вити. Тѣ́мъ и Христо́съ чудесы́ тебе́ прославля́етъ, Тому́ вопію́ща: Го́спода воспѣва́йте дѣла́ и превозноси́те Его́ во вѣ́ки.

Ны́нѣ пусты́ня весе́ліемъ красу́ется, о́тче, иму́щи мо́щи твоя́ въ себѣ́, Са́вво преподо́бне. Ученицы́ же твои́, твоему́ житію́ ревну́юще, о твое́й па́мяти ра́дующеся, Творцу́ вопію́тъ: Го́спода воспѣва́йте дѣла́ и превозноси́те Его́ во вѣ́ки.

Въ пусты́ни, преподо́бне, идѣ́же селе́ніе имѣ́лъ еси́, та́мо прече́стенъ хра́мъ въ сла́ву Христа́ воздви́глъ еси́, въ не́мъ прославля́тися пречи́стому Того́ и́мени, и всѣ́мъ вопи́ти: Го́спода воспѣва́йте дѣла́ и превозноси́те Его́ во вѣ́ки.

Богоро́диченъ: Свѣти́льниче Свѣ́та Трисо́лнечнаго су́щи, заре́ю благоутро́бія Твоего́ тму́ отыми́ прегрѣше́ній мои́хъ, Богороди́тельнице, избавле́ніе ну́жныхъ болѣ́зней подаю́щи, вѣ́рою превознося́щему пречи́стое Твое́ Рождество́.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Отъ пусты́ннаго житія́ къ премíрнѣй и вѣ́чнѣй жи́зни, я́ко преше́дъ, блаже́нне, не преста́й моля́ Изба́вителя отъ разли́чныхъ напа́стей и бѣ́дъ изба́вити, любо́вію честно́е твое́ успе́ніе ны́нѣ пѣ́сньми сла́вящія.

Пѣвце́въ и́скренною любо́вію пою́щихъ и вѣ́рою тебѣ́ пѣ́ніе хвале́нія приноша́ющихъ, треблаже́нне Са́вво, отъ вся́кихъ бѣ́дъ и скорбе́й избавля́й, да тя́ вси́ велича́емъ.

Отъ ру́къ недосто́йныхъ ма́лое сіе́ пѣ́сней хвале́ніе принося́щаго тебѣ́, пріими́, блаже́нне Са́вво: не бо́ возмого́хъ проти́ву твоего́ вели́чества украси́ти: но ма́лое сіе́ я́ко вели́ко пріими́, да тебе́ всегда́ въ пѣ́снехъ велича́ю.

Богоро́диченъ: Пѣ́ніе съ пѣ́снію и хвале́ніе исплете́ное отъ болѣ́зненныя души́ приноша́ю съ любо́вію, Тебѣ́, Ро́ждшей Христа́, естество́мъ Бо́га, е́же благопрія́тно пріе́мши, проше́нія на́ша, Богоро́дице, испо́лни и моли́твами Твои́ми мя́ соблюди́.

Свѣти́ленъ. Подо́бенъ: Жены́, услы́шите.

Процвѣ́лъ еси́, я́ко фи́никсъ, Дави́дски, о́тче, и оби́тель яви́лся еси́ Ду́ха Пресвята́го, Иже сла́вна тя́ вселе́ннѣй показа́. Того́ о на́съ непреста́нно моли́, почита́ющихъ вѣ́рою пречестну́ю па́мять твою́, преподо́бне Са́вво. [Два́жды.]

Сла́ва, и ны́нѣ, богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко Тро́ицы Еди́наго родила́ еси́, Богоро́дице, и но́сиши на боже́ственную руку́ пребога́тое Сло́во, непремѣ́нно и неизмѣ́нно.

На хвали́техъ стихи́ры преподо́бнаго на 4, гла́съ 8. Подо́бенъ: О, пресла́внаго чудесе́!

Преподо́бне о́тче Са́вво,* ты́ и́го Христо́во* на ра́мо взе́мъ,* до́блественнѣ наи́тіе* вра́жіе попра́лъ еси́.* Тѣ́мже тя́ вѣ́рою вси́ почита́емъ,* о преблаже́нне, мона́шествующихъ похвало́.* Тѣ́мже Христа́ непреста́нно моли́* спасти́ ду́ши на́ша. [Два́жды.]

Вѣ́рою соше́дшеся вси́,* я́ко по́стника тя́ Христо́ва почита́емъ, Са́вво:* ра́дуяся бо, ше́ствовалъ еси́* въ пусты́ни непрохо́днѣй, му́дре,* наста́вникъ бы́лъ еси́ че́стенъ.* Тѣ́мже Тебѣ́ мы́ вѣ́рою взыва́емъ, блаже́нне:* по́стниковъ похвало́,* о на́съ моли́ся ко Го́споду* поми́ловатися душа́мъ на́шимъ.

Преподо́бне о́тче на́шъ,* бу́дущія ра́ди жи́зни,* на рѣцѣ́, глаго́лемѣй Ви́шерѣ, всели́лся еси́,* ника́коже боя́ся неви́димыхъ враго́въ,* мно́гажды толца́нія творя́щихъ къ тебѣ́.* Ты́ же моли́твами сія́ безвѣ́стны сотворя́лъ еси́,* о терпѣли́вый душе́ю.* Тѣ́мже тя́ вѣ́рою вси́* чти́мъ и ублажа́емъ.

Сла́ва, гла́съ 8. Самогла́сенъ:

На не́бо теку́щею возше́дъ колесни́цею, чу́дне, добродѣ́тели, дости́глъ еси́ кра́йнее житіе́. Воздержа́ніемъ въ пусты́ни живы́й, смотря́я Вы́шняго Іерусали́ма красоту́, и болѣ́зненныхъ по́двиговъ досто́йно по́чести пріи́мъ, съ небе́сными ра́дуешися чинонача́ліи, преблаже́нне, вѣ́чныхъ бла́гъ наслѣ́дникъ и Ца́рствія жи́тель бы́въ. Но моли́ся, преподо́бне Са́вво, Спа́су всѣ́хъ, умири́ти мíръ и спасти́ ду́ши на́ша.

И ны́нѣ, богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

Та́же: Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба преподо́бныхъ: [Блаже́нна отъ кано́на свята́го, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 19 – 25.

/ Къ оглавленію раздѣла /


Наверхъ / Къ титульной страницѣ

0