Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 29-й де́нь.
Свята́го му́ченика Парамо́на.

[ВЕЧЕРЪ,]
На Го́споди воззва́хъ: стихи́ры му́ченика 3, гла́съ 4. Подо́бенъ: 3ва́нный свы́ше.

Свѣтоявле́ніемъ* я́вѣ озаря́емь,* всеблаже́нне Парамо́не,* Боже́ственнаго Ду́ха,* тму́ глубоча́йшую до конца́* возненави́дѣлъ еси́ многобо́жія,* и прише́лъ еси́, благоключи́мное вре́мя пріе́мь, всеблаже́нне,* къ предлежа́щимъ страда́ніемъ доблему́дренно,* и, побѣдоно́сецъ я́влься,* низложи́лъ еси́ го́рдаго и ра́тника всѣ́хъ земны́хъ,* велича́я Христа́.* Его́же моли́* спасти́ и просвѣти́ти ду́ши на́ша.

За всѣ́хъ Бо́га и Царя́* мно́жество многочи́сленное* закала́емое разумѣ́въ, Парамо́не,* боже́ственною ре́вностію разже́глся еси́* и возопи́лъ еси́:* Христо́въ ра́бъ и́скренній е́смь всегда́,* разумѣ́йте, пребеззако́нніи мучи́тели,* я́ко бо а́гнецъ незло́бивъ, закла́тися* се́ ны́нѣ самозва́нъ пріидо́хъ.* Не пецы́теся у́бо:* же́ртва прія́тна* Пожре́нному пло́тію* мене́ ра́ди во́льно* бы́ти понужда́юся.

Седмочи́сленною* честву́емь десяти́цею,* трегу́бно же честны́й,* со́тницею ли́къ страда́льцевъ* многобо́жную низложи́лъ еси́ ле́сть* пребеззако́ннующихъ вѣ́рою,* съ ни́миже вѣнча́лся еси́,* подвиза́вся доблему́дренно, Парамо́не,* и лико́мъ безтѣле́сныхъ,* ра́дуяся, сочи́слился еси́.* Съ ни́миже моли́ся* вся́кія ско́рби и напа́стей* изба́витися на́мъ,* тя́ чту́щимъ и при́сно блажа́щимъ.

[Зри:] Аще изво́литъ настоя́тель пѣ́ти Аллилу́ія, да пое́тъ сíи стихи́ры Богоро́дицѣ пре́жде, гла́съ 8, подо́бенъ то́йже:

Изъ Безнача́льна Отца́* Сы́нъ безлѣ́тно,* снизхожде́нія ра́ди и спасе́нія человѣ́ковъ,* Бо́гъ человѣ́къ бы́сть,* да пода́стъ первозда́нному ны́нѣ ра́й,* тогда́ и все́ естество́ изба́вится* отъ пре́лести змíевы,* и о́бразъ па́дшій спасе́тъ* я́ко Благопремѣни́тель.* Отону́дуже Ма́терь содѣ́ла* Невѣсторо́дицу чи́сту, я́ко нескве́рну,* Юже, я́ко анки́ру вси́* и приста́нище, ублажа́емъ.

Воплоще́нна Созда́теля всѣ́хъ* имѣ́ла еси́ во утро́бѣ Твое́й, Богоблаже́нная,* вообрази́вшаго человѣ́ка,* пре́жде па́дшаго преступле́ніемъ зміи́нымъ,* Бо́га бо родила́ еси́* пло́тію несказа́нно на́мъ* и изъ тлѣ́нія свободи́ла еси́* естество́ все́ обветша́вшее* Рождество́мъ Твои́мъ.* Тѣ́мже пое́мъ и сла́вимъ* Твою́ благода́ть, Дѣ́во безневѣ́стная,* моли́тися не преста́й* спасти́ся душа́мъ на́шимъ.

Да Твоея́ всѣ́мъ мно́жество ми́лости* и бла́гости откры́еши на́мъ* неопредѣли́мую пучи́ну,* грѣхи́ рабо́въ Твои́хъ вся́ загла́ди,* и́маши бо, Всенепоро́чная,* я́ко Ма́ти су́щи Бо́жія,* вла́сть созда́нія* и во́диши вся́,* я́ко хо́щеши, си́лою Твое́ю,* и́бо благода́ть Ду́ха Свята́го,* я́вѣ все́льшаяся въ Тя́,* содѣ́йствуетъ Ти́ во все́мъ при́сно,* Всеблаже́ннѣйшая.

Сла́ва, и ны́нѣ, богоро́диченъ:

Иже со Отце́мъ и Ду́хомъ* славосло́вимый Сы́нъ* въ вы́шнихъ отъ серафи́мовъ,* первозда́ннаго па́ки обнови́ти хотя́,* всего́ Себе́ истощи́ неизрече́нно* во утро́бѣ Твое́й, Богоро́дице Всепѣ́тая,* и, изъ Тебе́ возсія́вый,* просвѣти́ ве́сь мíръ Божество́мъ,* изба́вивый отъ идолонеи́стовства,* Собо́ю обожи́вый,* на небеса́ возведе́ человѣ́чество,* Христо́съ Бо́гъ* и Спа́съ ду́шъ на́шихъ.

Крестобогоро́диченъ. Подо́бенъ то́йже:

Не рыда́й Мене́, Ма́ти,* зря́щи на дре́вѣ повѣ́шена* Твоего́ Сы́на и Бо́га,* Иже на вода́хъ повѣ́сившаго зе́млю неодержи́мо* и всю́ тва́рь созда́вшаго,* и́бо воскресну́, и просла́влюся,* и а́дова ца́рствія сокрушу́ крѣ́постію,* и погублю́ того́ си́лу,* и свя́занныя изба́влю отъ злодѣ́йства его́,* я́ко Благоутро́бенъ,* и Отцу́ Моему́ приведу́,* я́ко Человѣколю́бецъ.

На стихо́внѣ окто́иха.



НА УТРЕНИ,
Оба кано́на окто́иха и свята́го на 4, его́же краегране́сіе: Воспѣва́ти твою́ ны́нѣ да́ждь, му́чениче, благода́ть. Іо́сифъ. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пою́ща свѣтоно́сную твою́ па́мять, му́чениче Парамо́не, свѣща́тельными Ду́ха заря́ми се́рдце мое́ просвѣти́ и пребыва́ти ми́ Боже́ственными законоположе́ньми укрѣпи́.

Му́ченическимъ пресвѣ́тло благосла́віемъ, блаже́нне, обогати́лся еси́, му́ченическими просія́въ добро́тами и кра́сными ра́нами украси́вся, Парамо́не. Тѣ́мже тя́ вѣ́рно ублажа́емъ.

Во́дъ животво́рныхъ Ду́ха сы́й испо́лненъ, безбо́жія зно́емъ лю́тѣ иста́явшія ороси́лъ еси́ и къ водѣ́, сла́вне, воспокое́нія путеводи́лъ еси́.

Богоро́диченъ: Въ лѣ́то Безлѣ́тнаго родила́ еси́, Человѣ́ка бы́вша, Его́же прилѣ́жно моли́, Чи́стая, я́ко Сы́на Твоего́ и Го́спода, души́ моея́ лѣ́тныя стра́сти уврачи́ти, Всенепоро́чная.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Возноше́ніе вра́жіе, смири́вся Христа́ ра́ди, разруши́лъ еси́ и того́ полки́ мече́мъ терпѣ́нія ссѣ́клъ еси́.

Разруши́лъ еси́ лука́вый совѣ́тъ и́же на вѣ́ру на́шу и крѣ́пко пострада́лъ еси́, му́чениче страстоте́рпче Парамо́не.

Укрѣпи́лся еси́ Боже́ственною благода́тію, я́ко во́инъ си́ленъ, и лю́тыя му́ки, му́чениче, я́коже со́нъ, вмѣни́лъ еси́.

Богоро́диченъ: Укрѣпи́ мо́й у́мъ, совраща́емь мно́гими страстьми́, Ма́ти Бо́жія Пречи́стая, я́ко да по до́лгу сла́влю Тя́.

Сѣда́ленъ, гла́съ 4. Подо́бенъ: Вознесы́йся.

Терпѣ́ніемъ Боже́ственныхъ повелѣ́ній очи́стилъ еси́ ду́шу отъ скве́рны и къ страда́льческому пости́глъ еси́ соверше́нію, жре́ти бо куми́ромъ отре́клся еси́ преле́стнымъ, подража́я Христа́, копіе́мъ закла́нъ бы́лъ еси́, но прилѣ́жно моли́ Его́ о мíрѣ, всебла́женне Парамо́не.

Сла́ва, и ны́нѣ, богоро́диченъ:

По Бо́зѣ въ Тво́й, Богоро́дице, прибѣга́ю смире́нный покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу. Моле́ніе сотвори́, Чи́стая, къ Сы́ну Твоему́, отъ си́хъ изба́вити мя́.

Крестобогоро́диченъ:

Изъ Безнача́льнаго Отца́ рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Се́рдце твое́, му́жествомъ огражда́емо и дерзнове́ніемъ, сла́вне, разжига́емо, му́ки многоплете́нныя младе́нецъ стрѣля́нія, му́чениче доблему́дренне, вмѣни́лъ еси́.

Умерщвля́еми повелѣ́ніемъ мучи́теля, страда́льцы ви́дѣвъ, я́коже они́, боже́ственную ре́вность прія́ше му́ченикъ Парамо́нъ и къ страда́нію пріи́де.

Крѣ́пко тя́ растяга́ема и ко́піи неми́лостивно бодо́ма, и ко́зни вра́жія побѣжда́юща, Христо́съ вѣнча́ тя подвигополо́жникъ, блаже́нне Парамо́не.

Терпѣ́нію удивля́яся му́чениковъ и тѣ́хъ соверше́нію дивя́ся, сла́вне, тѣ́хъ пріобщи́лся еси́ ре́вности вѣ́ры и пречестно́му страда́нію.

Богоро́диченъ: Умерщвле́ны человѣ́ки преступле́ніемъ, живоно́снымъ Твои́мъ Рождество́мъ, Дѣ́во Марíе, всѣ́хъ оживи́ла еси́. Тѣ́мъ Тя́ сла́вимъ и боголѣ́пно ублажа́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Да́ръ многоцѣ́нный, тебе́ сама́го, прине́слъ еси́ Творцу́ твоему́, пострада́въ и пре́лесть побѣди́въ, му́чениковъ удобре́ніе.

Куми́ры, му́дре, и де́монская ка́пища сокруши́лъ еси́, утвержде́но помышле́ніе стяжа́въ на ка́мени Боже́ственныя вѣ́ры, Парамо́не.

Де́моновъ мно́жество му́жественно острупи́лъ еси́, острупле́ніемъ пло́ти твоея́, страда́льче доблему́дренный, тѣ́мже тя́ ублажа́емъ.

Богоро́диченъ: Равноче́стенъ Отцу́ Сы́й и Ду́ху Госпо́дь отъ чи́стыхъ Твои́хъ крове́й воплоти́ся, Чи́стая, Человѣ́къ бы́въ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Не бы́лъ еси́ во вре́мя подвиго́въ лѣни́въ, встанли́въ же па́че и боже́ственному страда́нію до́блественъ. Сего́ ра́ди вѣне́цъ сла́вы получи́лъ еси́.

Му́чениковъ собо́ру себе́ сочета́лъ еси́, сконча́вшихся усе́рдно пре́жде твоего́ страда́нія, приснопа́мятне, и съ ни́ми небе́сному черто́гу сподо́бился еси́.

Ко́пія подража́теля тя́ Христо́ва содѣ́лаша, и́миже пробода́емь, му́чениче, къ Нему́ восте́клъ еси́, вѣнцено́сецъ, умертви́въ терпѣ́нія ору́жіемъ несмы́сленныя.

Богоро́диченъ: Изба́ви мя́ собла́зновъ жите́йскихъ, Пренепоро́чная, въ нощи́ невѣ́дѣнія безмѣ́стными помышле́ніи одержи́маго и зло́бою вра́жіею при́сно омрача́емаго.

По 6-й пѣ́сни му́чениченъ окто́иха.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Враче́вствъ и чуде́съ благода́тію, му́дре му́чениче, отъ Бо́га обога́щся свѣ́тло, врачу́еши зову́щія: благослове́нъ еси́ въ хра́мѣ сла́вы Твоея́, Го́споди.

Простира́емыхъ му́къ небре́глъ еси́, все́ попече́ніе имѣ́я на небесѣ́хъ и зовы́й, достосла́вне: благослове́нъ еси́ въ хра́мѣ сла́вы Твоея́, Го́споди.

Ты́ крове́й, страда́льче, огне́мъ всю́ попали́лъ еси́ ве́щь безбо́жія, сла́вне, лука́вую; росо́ю же чуде́съ твои́хъ су́щія въ зно́и лю́тыхъ ороша́еши, Парамо́не, зовы́й: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Ра́дуйся, еди́на ра́дость ро́ждшая человѣ́комъ, ра́дуйся, не́бо и престо́ле херуви́мскій, и пресла́вная пала́то Ца́рствующаго всѣ́хъ вѣко́въ, всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Бо́драго тя́ храни́теля душа́мъ стяжа́вше, обогати́хомся, успову́юща де́монская мечта́нія всегда́, и пло́ти свирѣ́пыя во́лны, и бу́рю помышле́ній, му́чениче многострада́льне, вопію́щихъ: благослови́те, вся́ дѣла́ Госпо́дня,Го́спода.

Струя́ми твои́хъ, свяще́нныхъ крове́й багряни́цу очервлени́лъ еси́ себѣ́, обветша́ніе весьма́ прія́ти не иму́щу, и, свѣ́тло украша́емь, на небесѣ́хъ обита́еши, вопія́, блаже́нне: благослови́те, вся́ дѣла́ Госпо́дня, Го́спода.

Якоже овча́ чи́стое, и же́ртва непоро́чная, и приноше́ніе, всесожега́емо у́гльми свяще́ннаго, му́чениче, страда́нія, страстополо́жнику твоему́ Христу́ прине́слся еси́, му́дре, поя́: благослови́те, вся́ дѣла́ Госпо́дня, Го́спода.

Богоро́диченъ: Зако́на Тя́ сѣ́ни и проро́ковъ проначерта́ша, Чи́стая, проповѣ́данія, неизрече́нно хотя́щу бы́ти Бо́га на́шего роди́тельницу, Богоблагода́тная Чи́стая. Ему́же вси́ пое́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Се́ свѣтоза́рнаго страстоте́рпца свѣтоявле́нная осія́ па́мять, всѣ́хъ вѣ́рныхъ сердца́ просвѣща́ющи Боже́ственнымъ Ду́хомъ, ра́достно ликовству́ющихъ и вѣ́рою блажа́щихъ.

Яко седмокру́жною десяти́цею и трегу́бною со́тницею непобѣди́мыхъ му́чениковъ совокупля́емь, съ ни́миже тѣ́ло твое́, му́чениче Христо́въ, лежи́тъ, и съ ни́ми моли́ спасти́ся на́мъ.

По́прище проше́дше болѣ́зненное, многови́дныхъ му́къ испо́лнено, и со Христо́мъ, мíръ побѣди́вшимъ, свѣ́тло побѣди́вше, вѣнцено́сцы му́ченицы, на небесѣ́хъ жи́тельствуете.

Взя́тъ бы́лъ еси́ отъ земли́ и по́чести твои́хъ по́двигъ прія́лъ еси́, ны́нѣ же рѣ́ки источа́еши на́мъ чуде́съ, тебе́ чту́щимъ и благоче́стно па́мять твою́ торжеству́ющимъ, Парамо́не.

Богоро́диченъ: Просвѣти́ души́ моея́ зѣ́ницы, омраче́нныя невидѣ́ніемъ тлетво́рнаго грѣха́, Богороди́тельнице Пречи́стая, Влады́чице, Ты́ бо вѣ́рныхъ еси́ по́мощь и просвѣще́ніе, Чи́стая.

Свѣти́ленъ. Подо́бенъ: Жены́, услы́шите.

Мно́жество непобѣди́мое во́инства, сосло́віе боже́ственно непобѣди́мое му́чениковъ, благочестному́дренно воспои́мъ, иму́ще чинонача́льника Парамо́на чу́днаго, обличи́вшаго мучи́теля, и́же со всѣ́ми му́ченики вѣне́цъ получи́ сла́вы.

Сла́ва, и ны́нѣ, богоро́диченъ:

Ра́дуйся, Бо́жія пала́то; ра́дуйся, горо́ осѣне́нная; ра́дуйся, купино́ неопали́мая; ра́дуйся, престо́ле сла́вы; ра́дуйся, боже́ственная трапе́зо; ра́дуйся, ста́мно всезлата́я; ра́дуйся, свѣ́щниче всесвѣ́тлый; ра́дуйся, ле́гкій о́блаче, Дѣ́во Ма́ти Марíе.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 304 – 305, 308 – 310 об.

/ Къ оглавленію раздѣла /


Наверхъ / Къ титульной страницѣ

0