Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 28-й де́нь.
Свята́го му́ченика Ирина́рха.

[Зри́:] Слу́жба свята́го му́ченика Ирина́рха пое́тся на повече́ріи.

Кано́нъ, его́же краегране́сіе: Ми́рную мнѣ́ пода́ждь, му́чениче, благода́ть. Гласъ 6.

Пѣ́снь 1.

Отъ собла́знъ жите́йскихъ и страсте́й, сту́жающихъ ми́, умири́ мо́й у́мъ, страда́льче Ирина́рхе, твою́ похвали́ти па́мять ти́хо сподо́би.

Струя́ми крове́й твои́хъ пла́мень гони́телей угаси́въ, напои́лъ еси́ помышле́нія вѣ́рныхъ возрасти́ти жела́ніе живота́ вѣ́чнаго благоче́стно, му́чениче Ирина́рхе.

Священнопобѣ́дныя вѣнцы́ я́ко страда́лецъ пріе́мъ, Ирина́рхе, преложи́лся еси́ отъ земли́ къ ми́ру нера́тному, и свѣ́ту, и животу́ и́стинному, блаже́ннѣйше.

Богоро́диченъ: Невмѣсти́мое Сло́во, во Твое́мъ чре́вѣ вмѣще́но, ро́ждши, Боговмѣсти́мая ски́нія, утѣсня́ющаго мя́ лю́тыхъ треволне́нія злы́хъ, Чи́стая, изба́ви.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Вжиля́ешися крѣ́постію боже́ственною и гряде́ши къ подвиго́мъ усе́рдно, всеблаже́нне, терпя́ ра́ны и растерза́нія гоня́щихъ, страстоте́рпче му́чениче до́блественнѣйше.

Крѣ́пость ти́ дае́тъ Христо́съ, вели́кій Страстополо́жникъ, погуби́ти пре́лесть и посрами́ти врага́, хва́лящася безсту́дно и су́етно, му́чениче, свирѣ́пѣющаго.

Низложи́ болѣ́зньми му́жественными злонача́льнаго змíя ли́къ святы́хъ, пострада́въ крѣ́пко и ра́ны и у́зы претерпѣ́въ си́лою Боже́ственнаго Ду́ха.

Богоро́диченъ: Юже ви́дѣ дре́вле Іа́ковъ отъ земли́ дося́жущу къ небе́снѣй высотѣ́ Боже́ственную лѣ́ствицу, я́вѣ Марíю Чи́стую, Влады́чню воспои́мъ пала́ту.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Зако́нно поте́клъ еси́, зако́нно пострада́лъ еси́ и зако́нно вѣнча́лся еси́, Бо́жіимъ зако́номъ укрѣпля́емь, и непревре́дна тебе́ сама́го соблюда́я, блаже́ннѣйше.

Не терпя́, сла́вне, въ пре́лести ходи́ти, къ богорожде́нію я́ко смы́сленъ, ра́дуяся устреми́лся еси́, Свѣ́тъ разу́мный пріе́мъ и свѣти́льникъ показу́яся.

Отню́дъ не покры́ глубина́, пріе́мши тя́, всеблаже́нне му́чениче, позна́вши тя́ Боже́ственныхъ страсте́й всеи́стиннѣйшаго Христа́ боже́ственнаго свидѣ́теля, Ирина́рхе.

Священнодѣ́йствуемы, и предзакала́емы, и стру́жемы ку́пно, и огне́мъ отвсю́ду пали́мы, не отверго́стеся Христа́, страстоте́рпицы досточу́дныя.

Богоро́диченъ: Дѣ́ва пребыла́ еси́ по Рождествѣ́, я́коже была́ еси́ пре́жде Рождества́, я́ко Бо́га Сло́ва родила́ еси́, изба́вльшаго ны́ хода́тайствомъ Твои́мъ, Всенепоро́чная.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Копіе́мъ уязви́ся вра́гъ терпѣ́нія крѣ́пкаго доблему́дреннаго му́ченика и того́ пята́мъ покори́ся, и смѣ́хъ ви́дится и посрамля́ется.

Нога́ твоя́ ста́ проро́чески, му́чениче, на пра́вости я́вѣ, непревра́тнымъ мудрова́ніемъ подпина́ющи многоко́зненнаго и стезя́ми муче́нія удобря́ема.

Ты́ зло́бу гоня́щихъ, незло́бивъ и про́стъ яви́ся, му́чениче, отри́нулъ еси́, Ирина́рхе, и конча́ніемъ твоея́ кро́ве вѣнцы́ нетлѣ́нія вѣнча́лся еси́.

Богоро́диченъ: Уразумѣ́въ издале́ча та́инственно проро́ковъ богосвѣ́тлый ли́къ, Дѣ́во Богоневѣ́стная, Боже́ственнаго Рождества́ Твоего́ глубину́ неизрече́нную, о́бразы свяще́нными Тя́ проначерта́.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Возше́дъ на во́ды, окормля́емь руко́ю живонача́льною, Ирина́рхе, и спа́слся еси́ си́ми, гони́телей погрузи́въ злоче́стія, моли́твою прилѣ́жною, свяще́ннѣйше.

Ма́лыми искупи́вше вели́кая, на вели́ка себе́ са́мыя преда́ша муче́нія свяще́нныя жены́, лестца́ Евина ду́хомъ умертви́вше, змíя началозло́бнаго.

Отроцы святíи, а́гнцы чи́стіи и приноше́нія соверше́нная, на́съ ра́ди Пожре́нному я́ко же́ртва Истинному Агнцу приведе́ни бы́ша, въ воню́ благово́нія веселя́щеся.

Богоро́диченъ: Се́ ны́нѣ воплоти́ся отъ крове́й Твои́хъ чи́стыхъ, Дѣвома́ти, Госпо́дь, и человѣ́комъ соединя́ется кромѣ́ враще́нія, за неизглаго́ланную ми́лость на́ше спасе́ніе содѣ́ловая.

Го́споди поми́луй, три́жды. Сла́ва, и ны́нѣ.

Сѣда́ленъ, гла́съ 2. Подо́бенъ: Гро́бъ Тво́й.

Ми́ръ тебѣ́ мно́гъ прибы́сть, му́чениче, пости́гшу врага́ и побѣди́вшу пре́лести ра́ть Боже́ственною благода́тію, крѣ́пко пострада́вшу ти́. Тѣ́мже вѣ́рою тя́ мо́лимъ: вся́каго вре́да изба́ви святу́ю твою́ па́мять чту́щихъ, Ирина́рхе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Любве́ е́же къ пло́ти распря́гъ тво́й у́мъ, блаже́ннѣйше, пали́мь и огне́мъ жго́мь, му́дре, о́троческую вопія́лъ еси́ пѣ́снь: благослове́нъ еси́, Го́споди Бо́же оте́цъ на́шихъ.

Ублаже́нъ бы́сть отроко́въ боже́ственный собо́ръ и же́нъ седмочи́сленный ли́къ святы́й, строга́нія, о́гнь и ра́ны крѣ́пко претерпѣ́вше ку́пно, и небе́сныхъ бла́гъ сподобля́еми.

Отгоня́ются отъ еди́наго твоего́ призыва́нія лука́віи ду́си, увѣ́дѣвше тя́, страда́льца непобѣ́дна Христо́ва, Ирина́рхе, пою́ща те́плѣ: благослове́нъ еси́, Го́споди Бо́же оте́цъ на́шихъ.

Богоро́диченъ: Уны́ніемъ мя́ обдержи́ма воздви́гни къ дѣ́йству, Пречи́стая, Боже́ственныхъ дѣя́ній, укрѣпля́ющи мя́ на враги́, при́сно борю́щія мя́ лю́тѣ и проти́вными помышле́ніи льстя́щія мя́.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Кро́вными тече́ніи еще́ ка́пля и ра́нъ добро́тою удобря́емь, Побѣдотво́рцу яви́лся еси́, Ирина́рхе, побѣ́ды по́чести отъ Него́ пріе́мля.

Возвы́сився любо́вію Вседержи́телевою, гони́телей вознесе́нную горды́ню низложи́лъ еси́ и и́дольское смири́лъ еси́ киче́ніе, му́чениче страстоте́рпче Ирина́рхе всеблаже́нне.

Милосе́рдія мя́ Боже́ственнаго, му́чениче, сподо́би, искуше́ній и бѣ́дъ избавля́я вѣ́рою тя́ те́плою чту́щаго, Ирина́рхе, и подъ покро́въ тво́й прибѣга́ющаго.

Богоро́диченъ: Ра́дуйся, свята́я горо́ и богопрохо́дная неизрече́нныхъ веще́й; ра́дуйся, явле́ніе и слы́шаніе стра́шное, неудобови́димое видѣ́ніе; ра́дуйся, па́дшихъ воззва́ніе, Дѣ́во.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Са́мое послѣ́днее и кра́йнѣйшее жела́ній пости́глъ еси́, богому́дре Ирина́рхе, и прича́стіемъ бо́гъ бы́лъ еси́, поя́ съ безтѣле́сными: Свя́тъ, Свя́тъ, Свя́тъ, Тро́ице Вседѣ́тельная и Всеси́льная.

Избѣ́гъ сѣ́тей ловя́щихъ тя́, ко гнѣзду́ небе́сному воспочи́лъ еси́, сла́вне, и му́чениковъ совокупи́лся еси́ во́инствомъ, съ тобо́ю сострада́вшими. Тѣ́мже чти́мъ па́мять ва́шу, прера́достно торжеству́юще.

Крѣ́пость и си́лу Христа́ полага́я, лю́тую му́къ преплы́въ пучи́ну, и вы́шняго приста́нища дости́глъ еси́, ве́сь укра́шенъ, ве́сь Ду́ха свѣтоли́тіи оби́льно облива́емь.

Богоро́диченъ: Разумѣ́ти чу́до непости́жное Рождества́ Твоего́, Дѣвома́ти, не могу́ще, молча́ніемъ сіе́ па́че сла́вимъ и Тебе́ славосло́вимъ, Всеблаже́нную еди́ну и до́брую въ жена́хъ, о Всенепоро́чная.

Стихи́ры, гла́съ 6. Подо́бенъ: Тридне́венъ.

Припѣ́въ: Святы́й му́чениче Ирина́рхе, моли́ Бо́га о на́съ.

По́двиги честна́го страда́льца и болѣ́зни ору́жника Христо́ва, благохва́ляще по до́лгу, вѣ́рніи, возопіи́мъ Го́споду: того́ моли́твами вся́кія ну́жды изба́ви ны́.

Ми́ръ мно́гъ отъ Го́спода страда́вшу ти́ бы́сть, и бу́рю проше́дшу лю́тыхъ, Ирина́рхе всеблаже́нне, до́блій во́ине и моли́твенниче о благохва́лящихъ тя́.

Сла́ва:

Спострада́ съ тобо́ю же́нъ ли́къ и дѣте́й боже́ственное собра́ніе, со святы́мъ Ака́кіемъ крѣ́пко соверша́юще по́двигъ, пре́лесть умаля́юще, Ирина́рхе блаже́нне.

И ны́нѣ, богоро́диченъ:

Засту́пница и покро́въ мо́й Ты́ еси́, Всенепоро́чная Богоро́дице, Тя́ бо и́мамъ помо́щницу въ ско́рбехъ, и неду́зѣхъ, и тѣснота́хъ и Тя́ прославля́ю, Всепѣ́тую.

Крестобогоро́диченъ:

Лю́ди беззако́ннѣйшія, безъ пра́вды пригвожда́ющія Тя́ на дре́вѣ, Дѣ́ва и Чи́стая Ма́ти Твоя́ зря́щи, я́коже Симео́нъ прорече́, утро́бою, Спа́се, уязвля́шеся.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 297 об. – 300 об.

/ Къ оглавленію раздѣла /


Наверхъ / Къ титульной страницѣ

0