Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 28-й де́нь.
Свята́го преподобному́ченика Стефа́на Но́ваго.

[ВЕЧЕРЪ,]
На Го́споди воззва́хъ: стихи́ры преподо́бнаго, на 6. Гла́съ 6. Подо́бенъ: Все́ отло́жше.

Четы́редесять днíй, я́ко Влады́ка, пости́лся еси́,* въ темни́цѣ блюдо́мь,* тебе́ сама́го ко страда́нію угото́валъ еси́,* свяще́нне Стефа́не,* мона́хомъ утвержде́ніе* и му́ченикомъ удобре́ніе.* Тѣ́мъ тя́, я́ко звѣ́ри неми́лостивіи напа́дше,* я́коже незло́биваго а́гнца влеку́ще,* непра́ведно растерза́ху* и со беззако́нными положи́вше,* страда́вша крѣ́пко* и со дерзнове́ніемъ моля́щася* о душа́хъ на́шихъ.

Лю́діе пребеззако́нніи,* пребеззако́нію повину́ющеся* пребеззако́ннаго царя́, преподо́бне,* ка́меніемъ тебе́ я́ко первострада́льца* и честна́го Стефа́на неща́дно поби́ша* и главу́ твою́ святу́ю, о́тче, сокруши́ша,* по у́лицамъ же влеку́ще суро́вѣйше,* излія́ша утро́бы твоя́, всеблаже́нне,* ниже́ по сме́рти ущедря́юще тя́.* О, твоего́ му́жества! О, нра́ва! О, мно́гаго терпѣ́нія!* Имже прія́лъ еси́, Стефа́не, вѣне́цъ неувяда́емый.

Сла́ва, гла́съ 6. Студи́тово:

Отъ младе́нства Бо́гу возложи́лся еси́, свяще́ннѣйше Стефа́не, я́коже вели́кій проро́къ Самуи́лъ, и, на го́ру возше́дъ, мона́шески угоди́лъ еси́ Ему́, па́ки же ко страда́нію обнажи́лся еси́ му́жески, и за о́бразъ Его́ изгна́нія и ско́рби подъя́лъ еси́ терпѣли́внѣйше, и у́зы, и темни́цы претерпѣ́лъ еси́, влачи́мь, и біе́мь, и ка́меніемъ побива́емь, и главо́ю сокруша́емь, вѣнце́въ сподо́бился еси́ отъ Христа́ Бо́га. Того́ моли́ любо́вію соверша́ющимъ твою́ присночестну́ю па́мять изба́витися отъ страсте́й, и искуше́ній, и бу́дущія ско́рби и спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Агнца Своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до Сладча́йшее,* что́ зрѣ́ніе сіе́,* но́вое и пресла́вное?* Ка́ко со́нмъ безблагода́тный суди́щу Пила́тову предаде́ Тя* и осужда́етъ на сме́рть* Живота́ вся́ческихъ?* Но воспѣва́ю Твое́ неизрече́нное,* Сло́ве, снизхожде́ніе.

На стихо́внѣ окто́иха. Сла́ва, гла́съ 8:

Еже по о́бразу соблю́дъ невреди́мо, преподо́бне о́тче, о Христо́вѣ о́бразѣ противоста́лъ еси́ му́жественнѣйше, не убоя́вся гноеимени́таго преще́ній, но Ду́ха мече́мъ того́ уби́лъ еси́. Тѣ́мъ дерзнове́ніе стяжа́въ къ Бо́гу, спаси́ па́ству твою́ отъ ересе́й всѣ́хъ, Стефа́не многострада́льне.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ми очесы́ ви́дится, о Влады́ко?* Содержа́й всю́ тва́рь* на дре́во воздви́женъ бы́въ* и умира́еши, всѣ́мъ дая́й жи́знь? —* Богоро́дица, пла́чущи, глаго́лаше,* егда́ узрѣ́ на Крестѣ́ возвыша́ема* су́щаго изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 4:

По́стнически предподвиза́вся на горѣ́, у́мная враго́въ ополче́нія всеору́жіемъ Креста́ погуби́лъ еси́, всеблаже́нне, па́ки же ко страда́льчеству му́жески вооружи́лся еси́, уби́въ Копрони́ма мече́мъ вѣ́ры, и обои́хъ ра́ди вѣнча́лся еси́ отъ Бо́га, преподобному́чениче Стефа́не приснопа́мятне.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха и преподо́бнаго, на 6, его́же краегране́сіе: Христо́съ вѣнча́етъ тя́ му́ченическимъ вѣнце́мъ, блаже́нне. Іо́сифъ. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Ра́достно ты́ проше́дъ тѣ́сную стезю́ поста́, муче́нія широто́ю вра́жія попали́лъ еси́ стремле́нія и простра́нную жи́знь, блаже́нне, наслѣ́довалъ еси́.

Ко́рень тя́, непло́дный пре́жде, пло́дствуетъ Анны тезоимени́тый, я́ко дре́вле Самуи́ла, и да́вшему тя́ дае́тъ Бо́гу, житія́ твоего́, му́дре, благода́ть зна́менающи.

Въ свяще́ннѣйшій боже́ственный мона́ховъ прише́дъ чи́нъ, я́ко свѣтлѣ́йшая звѣзда́, добродѣ́тельми возсія́лъ еси́, вѣ́рныя озаря́я та́инственно, преподо́бне Стефа́не.

Стѣсни́въ тѣ́ло заключе́ніемъ тѣ́снаго до́му, впери́лъ еси́ у́мъ къ небе́снымъ, му́дре, восхожде́ніи до́брѣ распространя́яся.

Богоро́диченъ: Непрохо́дную две́рь, чи́стый чистоты́ хра́мъ, до́брую въ жена́хъ, Святу́ю Влады́чицу гла́сы свяще́нными, свяще́нніи лю́діе, просла́вимъ.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Умъ тво́й, зрѣ́ніемъ къ Бо́гу удобря́емь, о́тче, краснѣ́йшій яви́ся, и благода́ти вся́кія испо́лненъ вои́стинну, и Боже́ственныя свѣ́тлости прича́стникъ.

Честнѣ́й ико́нѣ Христо́вѣ и Того́ Ро́ждшія покланя́яся, блаже́нне, царя́ злочести́ваго повелѣ́ніе ме́рзское возненави́дѣ си́лою Боже́ственнаго Ду́ха.

Желѣ́зы тебе́, желѣ́зно иму́ща се́рдце, пребезу́мный, связа́въ, отсыла́етъ въ темни́цу я́ко храни́теля Христо́выхъ догма́тъ, Стефа́не всеблаже́нне.

Твоя́ кра́сныя я́вственно имѣ́лъ еси́, преподо́бне, но́ги, муче́нія къ стезя́мъ ступа́ющія свѣ́тло и главы́ вра́жія сокруша́ющія, Стефа́не многострада́льне.

Богоро́диченъ: Изъ Тебе́, еди́ныя Чи́стыя, Пребоже́ственное Сло́во воплоти́ся, я́ко вѣ́сть, и спасе́ ны отъ тли́, покланя́ющіяся за милосе́рдіе Боже́ственному Его́ снизхожде́нію.

Конда́къ, гла́съ 8. Подо́бенъ: Взбра́нной.

Тро́ицы рачи́теля и боже́ственнаго Стефа́на восхва́лимъ вѣ́рно пѣ́сньми, празднолю́бцы, отъ се́рдца, я́ко почествова́вша начерта́ніе кра́сное Влады́ки и Ма́тере Его́, и согла́сно ны́нѣ отъ любве́ возопіи́мъ ему́, ра́дующеся: ра́дуйся, о́тче присносла́вне.

Та́же сѣда́ленъ, гла́съ 1. Подо́бенъ: Гро́бъ Тво́й, Спа́се.

Кро́вь твоя́, му́дре, та́йно зове́тъ отъ земли́ къ Бо́гу, я́коже Авелева, богому́дре, я́сно бо проповѣ́да Христо́во вочеловѣ́ченіе. Тѣ́мже посрами́лъ еси́ иконора́тныхъ пре́лесть и преше́лъ еси́ въ небе́сныя черто́ги, моли́ спасти́ на́съ.

Сла́ва, подо́бенъ то́йже:

Поще́ніемъ просвѣти́вся, я́ко зла́то въ горни́лѣ, облиста́лъ еси́, му́дре, зако́ннымъ страда́ніемъ и вѣне́цъ прія́лъ еси́, твоему́ зва́нію подо́бенъ. Тѣ́мъ, ра́дующеся, всесвяту́ю твою́ па́мять пра́зднуемъ, твоя́ по́двиги почита́юще, приснопа́мятне Стефа́не.

И ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній вся́ изба́ви, на Тя́ упова́ніе, Отрокови́це, иму́щія, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, собезнача́льне Отцу́ и Ду́ху! Что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Свѣ́томъ Ду́ха просвѣща́емь, мольба́ми Боже́ственными слѣпы́мъ свѣ́тъ, о́тче, по́далъ еси́, твоего́ Влады́ку и Бо́га подража́въ, богодохнове́нне.

Ви́дѣнъ бы́лъ еси́ издале́ча пла́вающими въ мо́ри, окормля́я ты́я, блаже́нне, къ ти́хому приста́нищу Боже́ственною благода́тію, призыва́ющія твое́ вѣ́рно, о́тче Стефа́не, и́мя.

Священнодѣ́йствуемь, я́коже заколе́ніе свяще́нное прине́слся еси́ тебе́ ра́ди Пожре́нному, Стефа́не, и перворожде́нныхъ во оби́телехъ воспочи́лъ еси́, ра́дуяся.

Честны́мъ твои́мъ глаго́ломъ пре́жде на по́лы сухíй здра́въ яви́ся ве́сь, удиви́вся, му́чениче, да́нной ти́ благода́ти съ высоты́ оби́льно человѣ́ковъ на исправле́ніе.

Богоро́диченъ: На Тя́, Пренепоро́чная, спасе́нія моего́ наде́жды возложи́хъ, къ Твоему́ покро́ву прибѣго́хъ, бу́ди ми́, Отрокови́це, помо́щница, лю́тыхъ избавля́ющи мя́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Му́ченическими вѣнча́ почестьми́ по́стническія твоя́ труды́ и́стинно, преподо́бне Стефа́не, Подвигополо́жникъ еди́нъ Бо́гъ на́шъ, на убíйцы укрѣпи́вый тя́.

Подвиза́яся благосла́вно, со мно́жествомъ му́ченикъ въ темни́цахъ пріобща́яся, му́чениче, обрѣ́лся еси́, тя́ бо, я́ко звѣ́зды незаходи́мое со́лнце, обстоя́ще, пребо́льше просвѣща́хуся.

Глаго́лы Боже́ственными свяще́нныя исповѣ́дники и подража́тели Боже́ственныхъ страсте́й ублажа́емъ, три́ ста́ и четы́редесять и два́, безбо́жныхъ пора́товавшія.

Власо́въ отъя́тіе руга́тельно, уше́съ отрѣ́заніе и ру́къ, уде́съ же боже́ственныхъ пожже́ніе по ико́нѣ Христо́вѣ подъя́ше мно́жество преподо́бныхъ благосла́внѣйшее.

Богоро́диченъ: Пресвята́я, Яже Бо́га еди́на на земли́ я́ко и́стинно Пресвята́го ро́ждшая, Тя́, Богоро́дицу, при́сно проповѣ́дающія освяти́ и спаси́ хода́тайствомъ Твои́мъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Слове́съ твои́хъ си́лы зло́бы обрѣта́тель претерпѣ́ти не возмо́же, тѣ́мже ю́замъ тя́, Стефа́не, и ра́намъ, сме́рти же ну́жднѣй су́рово льсте́цъ предаде́.

Яко хлѣ́бъ, пеко́мь огне́мъ и за но́зѣ неми́лостивно повѣ́шаемь, всесоже́глся еси́, Па́вле, и Бо́гу же́ртва прине́слся еси́, соводворе́нія му́ченикъ сподобля́емь.

Зако́нно пострада́вше заключе́ни и удавле́ніемъ житіе́ оста́вльше во Ефе́сѣ преподо́бніи мона́си, о́смь къ три́десятимъ, я́же вѣ́рою и любо́вію ублажа́емъ.

Крѣ́пко судя́щему проти́вился еси́, и ра́нами ра́ниму твоему́ тѣ́лу, умре́ти изво́лилъ еси́ за Христа́ еди́наго Безсме́ртнаго, достосла́вне Пе́тре великоимени́тый.

Богоро́диченъ: Еди́ну Всепѣ́тую и до́брую въ жена́хъ Богороди́тельницу, христіа́нъ стѣ́ну необори́мую, Пречи́стую Влады́чицу несомнѣ́ннымъ се́рдцемъ ублажа́емъ.

Конда́къ, гла́съ 3. Подо́бенъ: Дѣ́ва дне́сь.

Изъ непло́дна, преподо́бне, ко́рене возрасте́ вѣ́твь первострада́льцу тезоимени́те, мона́ховъ наста́вникъ вели́къ, о́тче, яви́лся еси́ и, я́рости не убоя́вся царя́, не хотя́ща Христо́въ чествова́ти о́бразъ, сего́ ра́ди сконча́вся, му́ченическій вѣне́цъ прія́лъ еси́, Стефа́не.

Икосъ:

Иже за́висти оте́цъ и Бо́га чу́ждь, искуше́нія тебѣ́ мно́га и треволне́нія воздви́же, не терпя́ зрѣ́ти твоего́ Боже́ственнаго житія́ и пра́ваго твоего́ непреткнове́ннаго ше́ствія. Ме́рзскій лука́вствія на тя́ сшива́етъ, мнѣ́вся бы́ти учени́къ, я́коже Іу́да пре́жде, и тебе́ въ ру́ки беззако́нныхъ, о́тче, потща́ся вложи́ти, Христа́ проповѣ́дающа свѣ́тло и Того́ о́бразу любо́вію кла́няющася, Того́ ра́ди му́ченическій вѣне́цъ прія́лъ еси́, Стефа́не.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Возвести́ся тебѣ́ коне́цъ, блаже́нне, вседѣ́тельнымъ хотѣ́ніемъ, тѣ́мже бо́льшему посту́ вда́лъ еси́ себе́ и отъ сла́вы въ сла́ву прехо́диши, убіе́нъ за Христа́, су́щаго надъ всѣ́ми Бо́га.

Тезоиме́нно первострада́льцу спросла́вился еси́, и́бо камену́емь неми́лостивно, и влачи́мь, и біе́мь, кровьми́ испо́лнилъ еси́ зе́млю и ду́шу твою́ Го́споду, ра́дуяся, преда́лъ еси́.

На сто́гнахъ, му́чениче Стефа́не, гра́дскихъ неми́лостивно влачи́мь, угла́дилъ еси́ муче́нія стезю́ вѣ́рнымъ, на ню́же наступа́ющіи крѣ́пко къ небе́сному гра́ду я́вѣ доидо́ша.

Богоро́диченъ: Свяще́ннѣйшіи проро́цы провозвѣсти́ша, Чи́стая, явле́ннѣйше та́инство честна́го Твоего́ Рождества́, и ны́нѣ мы́, сбытіе́ свѣ́тло разумѣ́юще, благоче́стно Тя́ ублажа́емъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Свирѣ́пѣйше, я́коже звѣ́ріе, восхи́тиша Христо́ва а́гнца бію́щіи, убива́юще и съ му́жи беззако́нными спогреба́юще, пребеззако́ніемъ живу́щіи.

Неми́лостивно твою́ главу́ вра́гъ сокруши́, ю́же Бо́гъ въ высоча́йшихъ вѣнце́мъ вѣнча́ побѣди́тельнымъ, вѣне́чниче многострада́льне, сла́ва му́чениковъ и всѣ́хъ преподо́бныхъ.

Терпѣли́вно мучи́телю противля́яся, богому́дрый Андре́й ра́нами раздробля́ется, и неми́лостивно умерщвля́ется пра́ведный, поя́ Влады́цѣ Христу́ во вѣ́ки.

Святѣ́йшій до́мъ уже́ бы́въ, Иже надъ всѣ́ми святы́ми Воспочива́ющаго, во твое́мъ имѣ́лъ еси́ се́рдцѣ живу́ща, многострада́льне Стефа́не, во вся́ вѣ́ки.

Богоро́диченъ: Кропле́ніемъ Боже́ственныя Кро́ве, Богоблагода́тная, изъ ре́бръ истоще́нныя Сы́на Твоего́ и Бо́га, лука́вымъ грѣхо́мъ прибы́вшую мнѣ́ скве́рну, — молю́ся Тебѣ́, — омы́й, Дѣ́во.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ви́дѣвъ, ра́дуяся, а́нгеловъ чи́ны, патріа́рховъ, преподо́бныхъ, проро́ковъ, страда́льцевъ, апо́столовъ же и пра́ведныхъ всѣ́хъ, богодохнове́нне, съ ни́миже совокупля́яся, помяни́, заступи́ на земли́ чи́стѣ ублажа́ющихъ тя́.

Яко свѣ́тъ, я́ко у́тро, я́ко вели́кое со́лнце, я́ко не́бо, назвѣ́зденное чу́десъ свѣтлостьми́ и я́звами святы́ми бы́лъ еси́, всѣ́хъ помышле́нія, благохва́лящихъ тя́, Стефа́не, украша́я и́стинно, му́чениче многострада́льне.

Тве́рдыми по́стничества по́двиги низложи́въ тмы́ нача́ла, о́тче, пре́жде и въ послѣ́дняя пострада́въ крѣ́пко, всеконе́чнѣй па́губѣ сія́ преда́въ, Стефа́не, му́чениковъ добро́то и преподо́бныхъ похвало́.

Твоя́ пресла́вная па́мять дне́сь пресвѣ́тлыми заря́ми даро́въ Ду́ха озаря́етъ земна́я исполне́нія, ю́же ра́достно ны́нѣ пра́зднующія просвѣти́ и освяти́ ны, богоблаже́нне Стефа́не.

Богоро́диченъ: Свѣ́та прія́телище, Богора́дованная, священному́чениковъ и́стинно утвержде́ніе и преподо́бныхъ всѣ́хъ похвало́, спаси́ ны отъ бѣ́дъ и обстоя́ній, и враго́въ наше́ствія, воспѣва́ющія Тя́.

Свѣти́ленъ. Подо́бенъ: Ду́хомъ во святи́лищи.

Болѣ́зньми по́стническими началозло́бнаго змíя до конца́ умертви́лъ еси́, на концѣ́хъ же вѣне́цъ муче́нія взе́мъ, Стефа́не всехва́льне, поклоне́ніе подая́ честны́мъ образо́мъ, я́ко вѣ́дый на первообра́зное я́вѣ преходи́ти, всеблаже́нне.

Сла́ва, и ны́нѣ, богоро́диченъ:

Неизрече́ннаго Рождества́ была́ еси́ Всенепоро́чная Невѣ́ста, я́ко су́щи чистѣ́йшій хра́мъ, Богоро́дице, Свѣ́та бо превѣ́чнаго, въ Тя́ все́льшагося, родила́ еси́ — Бо́га Сло́ва, пою́ще Твое́ у́бо Рождество́, велича́емъ досто́йно Тебе́, всенепоро́чная Отрокови́це.


НА ЛИТУРГІИ,

Блаже́нна окто́иха на 4 и свята́го пѣ́снь 3-я, на 4. Проки́менъ, гла́съ 8: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, [хвале́ніе Его́ въ це́ркви преподо́бныхъ]. Апо́столъ къ Тимоѳе́ю, зачало 291. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́, [ро́дъ пра́выхъ благослови́тся]. Ева́нгеліе Матѳе́я, зача́ло 37. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 296 – 297, 300 – 303 об.

/ Къ оглавленію раздѣла /


Наверхъ / Къ титульной страницѣ

0