Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 28-й де́нь.
Слу́жба святи́телю Ѳео́дору, архіепи́скопу Росто́вскому, чудотво́рцу.
[1]

[НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ:] стихи́ры [на 8], гла́съ 4. Подо́бенъ: Да́лъ еси́.

Свѣти́льника тя́ стяжа́вше,* свяще́нную твою́ па́мять восхваля́емъ,* свяще́нно ублажа́юще,* Це́рковь бо Христо́ву украси́лъ еси́,* и лю́ди твоя́ просвѣти́лъ еси́,* вруче́нный тебѣ́ тала́нтъ умно́живъ,* ра́дости сподо́бился еси́ Го́спода твоего́,* и ны́нѣ, святи́телю,* мо́лишися о душа́хъ на́шихъ. [Три́жды.]

Воздержа́ніемъ до́брѣ воспита́вся,* въ пресла́вную добродѣ́телей высоту́ возше́лъ еси́,* святи́тельства оде́ждою украше́нъ,* благода́тію Боже́ственнаго Ду́ха осія́нъ,* просвѣти́ моли́твами твои́ми,* святи́телю Ѳео́доре,* достодо́лжно восхваля́ющихъ* свяще́нную и честну́ю па́мять твою́. [Три́жды.]

Яко зла́то чи́сто обрѣто́хомъ* честны́я твоя́ мо́щи,* святи́телю Ѳео́доре,* и си́хъ любо́вію почита́емъ,* торжеству́юще ра́достно,* и я́ко спасе́ніе душа́мъ обнося́щее,* Христа́ прославля́емъ,* да на́съ сподо́битъ* вѣ́чнаго наслажде́нія. [Два́жды.]

Сла́ва, гла́съ 8.

Блага́го Бо́га благíй ра́бе вѣ́рный, виногра́да прилѣ́жный дѣ́лателю, до́брѣ ста́до упа́слъ еси́, и Ева́нгельскими словесы́ люде́й твои́хъ напои́лъ еси́, и се́мя благоче́стно въ ни́хъ возрасти́лъ еси́, и ны́нѣ, предстоя́ Христу́, моли́ся, святи́телю Ѳео́доре, спасти́ и просвѣти́ти ду́ши на́ша.

И ны́нѣ, богоро́диченъ: Ца́рь Небе́сный...
Вхо́дъ, проки́менъ дне́ и чте́нія три́ святи́тельскія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ра хра́ма. Сла́ва, святи́телю, гла́съ 6:

Кро́токъ и незло́бивъ яви́лся, святи́телю Ѳео́доре, въ цѣ́лости подо́бяся нра́вомъ сро́дника твоего́ преподо́бнаго Се́ргія, сего́ ра́ди вку́пѣ съ ни́мъ наслѣ́довалъ еси́ кро́ткихъ зе́млю, и прича́стіемъ обожа́емой пи́щи наслажда́ешися, весе́лія и ра́дости неизрѣче́нныя, идѣ́же помина́й непреста́нно и́скренно тя́ почита́ющихъ и честны́хъ твои́хъ моще́й соверша́ющихъ обрѣ́теніе.

И ны́нѣ, богоро́диченъ: Богоро́дице, Ты́ еси́ лоза́...

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Святи́телю о́тче Ѳео́доре!* Боже́ственными добродѣ́тельми,* я́коже колесни́цею,* на высоту́ небе́сную возше́лъ еси́,* тѣ́ло же твое́ многотру́дное,* я́ко мѵ́ро многоцѣ́нное,* во гро́бѣ на́мъ оста́вилъ еси́,* вся́кимъ на́шимъ болѣ́знямъ* исцѣле́ніе подава́ющее,* и ду́хи лука́встія прогоня́ющее,* тѣ́мже тя́ ублажа́емъ,* всеблаже́нне.

Сти́хъ: Честна́ предъ Го́сподемъ* сме́рть преподо́бныхъ Его́.

Святи́телю о́тче Ѳео́доре!* ты́ отъ ю́ности Христа́ Бо́га возлюби́въ,* и се́рдце свое́ Боже́ственными заря́ми просвѣти́въ,* свѣтови́денъ ве́сь вои́стину бы́лъ еси́,* тѣ́мъ по достоя́нію* блаже́нныя жи́зни сподо́бился еси́,* сія́ же и на́съ прича́стниками содѣ́лай,* преблаже́нне,* притека́ющихъ съ вѣ́рою* къ честны́мъ моща́мъ твои́мъ,* непреста́нными моли́твами.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Святи́телю о́тче Ѳео́доре!* ты́ чу́вственныя стра́сти* воздержа́нія бразда́ми укроти́лъ еси́,* и ре́вность на земли́ безпло́тныхъ показа́лъ;* пло́ть нося́щи,* о пло́ти не ради́лъ еси́,* на сла́дость же вре́мянную* ника́коже воззрѣ́лъ еси́;* терпѣ́ніемъ свои́мъ, бдѣ́ніемъ,* и ча́стыми къ Бо́гу моли́твами* пло́ть свою́ ду́хови покори́лъ еси́,* сего́ ра́ди со а́нгельскими во́инствы* Пресвяту́ю Тро́ицу воспѣва́ти сподо́бился еси́,* и ны́нѣ моли́ся Христу́ Бо́гу* дарова́ти душа́мъ на́шимъ* ве́лію ми́лость.

Сла́ва, гла́съ то́йже:

Ра́дуйся, Правосла́вно-Россíйская Це́ркве, со архипа́стырьми и па́стырьми Христо́ва ста́да, торжеству́й и весели́ся пресла́вная Россíя, съ правосла́вными твои́ми ча́ды восплещи́те рука́ми, и воскли́кните Бо́гу гла́сомъ ра́дованія, и вси́ сы́нове россíйстіи, мона́си и простíи, ста́рцы съ ю́ношами, я́ко въ на́шемъ вѣ́кѣ яви́ Госпо́дь Россíи засту́пника и моли́твенника, скорбе́й и болѣ́зней но́ваго цѣле́бника Ѳео́дора, святи́теля Росто́вскаго, его́же дне́сь честны́мъ моща́мъ покланя́ющеся, усе́дно взыва́емъ си́це: ра́дуйся, богоблаже́нне святи́телю Христо́въ Ѳео́доре; ра́дуйся, свѣти́льниче пресвѣ́тлый; ра́дуйся, врачу́ боля́щимъ и те́плый моли́твенниче ко Христу́ Бо́гу на́шему, о и́же съ вѣ́рою и любо́вію притека́ютъ къ ра́цѣ моще́й твои́хъ.

И ны́нѣ, богоро́диченъ: Безневѣ́стная Дѣ́во...

Тропа́рь, гла́съ 4:

Отъ ю́ности твоея́ до́бре воспита́вся труда́ми, воздержа́ніемъ, посто́мъ и моли́твами, чи́сту и непоро́чну сотвори́лъ еси́ ду́шу твою́, сего́ ра́ди на престо́лѣ святи́тельства сѣ́лъ еси́, и я́ко звѣзда́ многосвѣ́тлая, просвѣща́я вѣ́рныхъ сердца́ заря́ми чуде́съ твои́хъ, о́тче на́шъ, святи́телю Ѳео́доре, и ны́нѣ моли́ Христа́ Бо́га, да спасе́тъ ду́ши на́ша.

Инъ тропа́рь, гла́съ то́йже:

Отъ ю́ности, прему́дре, прилѣ́жно подвиза́вся, и извѣще́ніемъ Свята́го Ду́ха превели́кую оби́тель воздви́же Пресвятѣ́й Богоро́дицѣ въ похвалу́ Рождества́ Ея́, струя́ми же сле́зъ твои́хъ безпло́тныя враги́ погрузи́лъ еси́, и житія́ твоего́ цѣлому́дріемъ со а́нгельскими ли́ки совокупи́вся, преподо́бне о́тче Ѳео́доре, съ ни́ми же Христа́ Бо́га моли́ спасти́ся душа́мъ на́шимъ.


НА УТРЕНИ,
По 1-й каѳи́смѣ сѣда́ленъ, гла́съ 3:

Яко пресвѣ́тлое со́лнце возсія́въ, и лю́ди твоя́ просвѣти́лъ еси́ уче́ніи слове́съ твои́хъ, страсте́й омраче́ніе потреби́лъ еси́, святи́телю Ѳео́доре, моли́ Христа́ Бо́га дарова́ти на́мъ ве́лію ми́лость. [Два́жды.]

Сла́ва и ны́нѣ, богоро́диченъ:

Подъ кро́въ Тво́й, Пречи́стая Дѣ́во, прибѣга́ющихъ мольбу́ пріе́мши, о на́съ непреста́й моля́щи Человѣколю́бца, спасти́ся рабо́мъ Твои́мъ.

По 2-й каѳи́смѣ сѣда́ленъ, гла́съ 1:

Свяще́нства пома́заніемъ украша́емъ бы́лъ еси́, святи́телю Ѳео́доре, житіе́ твое́ украси́лъ еси́ добро́тами и боже́ственнымъ ко Христу́ повинове́ніемъ; сконча́въ тече́ніе твое́, ны́нѣ на небесѣ́хъ вопіе́ши со а́нгелы: сла́ва благоутро́бію Твоему́, Спа́се, сла́ва Ца́рствію Твоему́, сла́ва смотрѣ́нію Твоему́, еди́не Человѣколю́бче. [Два́жды.]

Сла́ва и ны́нѣ, богоро́диченъ:

Зача́тіе и Рождество́ Твое́ па́че сло́ва, вѣ́ки бо Созда́вшаго сло́вомъ родила́ еси́, Изба́вльшаго безслове́сія мíра концы́, Отрокови́це Неискусому́жная, Его́же моли́ всегда́ ми́ръ вселе́нней дарова́ти и ве́лію ми́лость.

По поліеле́и сѣда́ленъ, гла́съ 6:

Кро́тостію и смире́ніемъ Влады́цѣ Христу́ послѣ́довалъ еси́, воздержа́ніемъ житіе́ украси́лъ еси́, и отъ сего́ въ добродѣ́тели наказа́тель яви́лся еси́, тѣ́мже вопіе́мъ ти́, святи́телю Ѳео́доре: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва и ны́нѣ, богоро́диченъ:

Цари́цу и Влады́чицу Тя́ имену́емъ, Дѣ́во, подъ кро́въ Тво́й прибѣга́юще и по́мощи отъ Тебѣ́ прося́ще: со стра́хомъ пою́щихъ Ти́ моле́бный гла́съ услы́ши Влады́чице.

[Степе́нна, 1-й антифо́нъ 4-го гла́са. Проки́менъ, [гла́съ 4]: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Ева́нгеліе Іоа́нна, зача́ло 35 отъ полу́.]

По 50-мъ псалмѣ́, стихи́ра, гла́съ 4:

Излія́ся Ду́ха Свята́го благода́ть во устна́хъ твои́хъ, святи́телю о́тче Ѳео́доре, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную, во Еди́номъ Божествѣ́.

Кано́нъ [Богоро́дицы со ирмосо́мъ на 6, и свята́го на 8,] гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Го́споди Бо́же мо́й, отве́рзи моя́ недосто́йная уста́, Отчее Сло́во, да досто́йно возмогу́ воспѣ́ти по́двиги святи́теля Твоего́ и уго́дника.

Рѣши́ти и вяза́ти пріимы́й вла́сть отъ Архипа́стыря Небе́снаго, святи́телю Христо́въ Ѳео́доре, разрѣши́ свя́занный язы́къ мо́й плѣни́цами беззако́ній на славосло́віе и́мени твоему́ свято́му.

Еже пасти́ ста́до христоимени́то предъизбра́нъ бы́въ Боже́ственною благода́тію, ты́ же, я́ко ра́бъ послушли́вый, я́ко па́стырь до́брый, прилѣ́жное имѣ́лъ еси́ о ста́дѣ твое́мъ попече́ніе.

Богоро́диченъ: Ма́ти Бо́жія, Пречи́стая, и Благослове́нная, и Всенепоро́чная, души́ моея́ стра́сти исцѣли́, и стра́сти плотскíя отжени́, и свободи́ у́мъ мо́й отъ вся́каго вре́да и отъ вра́жія мя́ напа́сти изба́ви, Влады́чице.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Дѣ́латель бы́въ за́повѣдей Госпо́днихъ, непреста́нно въ ни́хъ поуча́яся, святи́телю Ѳео́доре, сего́ ра́ди возше́дъ на небеса́, и ны́нѣ предстои́ши престо́лу Влады́чню, со а́нгельскими ли́ки непреста́нно воспѣва́еши: нѣ́сть свя́тъ, па́че Тебѣ́, еди́не Человѣколю́бче.

Отъ земны́хъ нѣ́дръ воспріе́млемъ, я́ко да́ръ освяще́нъ, сокро́вище безцѣ́нное — честны́я твоя́ мо́щи, святи́телю Ѳео́доре, отъ ни́хже пріе́млемъ душа́мъ на́шимъ освяще́ніе, Христа́ воспѣва́юще: нѣ́сть свя́тъ, нѣ́сть пра́веденъ, па́че Тебѣ́, Го́споди.

Хра́мъ Свята́го Ду́ха отъ ю́ности бы́лъ еси́, о́тче Ѳео́доре, сего́ ра́ди и по сме́рти соблюде́ся тѣ́ло твое́ нетлѣ́нно, его́же христоимени́тіи лю́діе, отвсю́ду собра́вшеся, ра́достно облобыза́емъ, вопію́ще Христу́ Спаси́телю: нѣ́сть свя́тъ, нѣ́сть пра́веденъ, па́че Тебѣ́, Го́споди.

Богоро́диченъ: Цари́це и Влады́чице, Дѣ́во Богоро́дице, подъ кро́въ Тво́й прибѣга́юще и пою́ще, Сы́ну Твоему́ Христу́ Бо́гу воспѣва́юще: нѣ́сть свя́тъ, нѣ́сть пра́веденъ, па́че тебѣ́, Го́споди.

Сѣда́ленъ, гла́съ 8:

Яко виногра́дъ при́сно зеленѣ́ющій, архипа́стырскимъ твои́мъ всегда́шнимъ уче́нія напое́ніемъ, па́ствы твоея́ о́вцы сотвори́лъ еси́, и́хже, умно́живъ, въ благоче́стіи возрасти́лъ еси́, и отъ сего́ вѣ́ренъ ра́бъ и дѣ́латель виногра́да Христо́ва показа́лся еси́, сего́ ра́ди и труда́мъ возме́здіе досто́йно воспрія́лъ еси́, святи́телю, моли́ Христа́ Бо́га, да спасе́тъ ду́ши на́ша. [Два́жды.]

Сла́ва и ны́нѣ, богоро́диченъ:

Кади́льнице всезлата́я, Марíе Всенепоро́чная, Христа́ моли́, Его́же родила́ еси́, изба́витися на́мъ отъ бѣ́дъ и огня́ вѣ́чнующаго.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Поще́ніями въ жи́зни се́й, я́ко снѣ́дьми любоче́стія, пита́яся, ду́шу твою́, блаже́нне, ны́нѣ веселя́щуюся предста́вилъ Творцу́ всѣ́хъ, призыва́ющему тя́, въ вы́шней Боже́ственнѣй сла́дости ра́дуешися.

Моли́твою возше́лъ еси́ въ небе́сная, идѣ́же съ ли́ки оте́цъ пребыва́я, весели́шися, помина́й, всеблаже́нне, па́мять твою́ свѣ́тло торжеству́ющія.

Уясня́ютъ воспѣва́юще, а́нгельстіи чи́ни па́мять твою́, святи́телю Ѳео́доре, та́кожде и мы́, земнíи, уми́льно вопіе́мъ ти́: испроси́ оставле́ніе прегрѣше́ній и благи́хъ наслажде́ніе.

Богоро́диченъ: Правосла́вною вѣ́рою и любо́вію притека́ющихъ Ти́ и со стра́хомъ пою́щихъ Тя́, моле́бный гла́съ услы́ши, Влады́чице.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

Святи́тельства оде́ждою одѣ́янъ бы́лъ еси́, всеблаже́нне, прилѣ́жное моле́ніе за лю́ди твоя́ приноси́лъ еси́, да ми́лостива обря́щутъ въ де́нь су́дный.

Умиле́нія исто́чникъ мнѣ́ испроси́ въ честне́й па́мяти твое́й, святи́телю Ѳео́доре, да омы́ю скве́рну души́ моея́ покая́ніемъ и твои́ми моли́твами да обря́щу жи́знь вѣ́чную; пути́ моя́ напра́ви, молю́ся.

Повелѣ́нію Христо́ву послѣ́дствуя, кро́токъ и смире́ненъ се́рдцемъ и всѣ́мъ свя́тъ бы́лъ еси́, уподобля́яся вселе́нныя учи́телю и покая́нія наста́внику, моли́твами твои́ми просвѣти́ и мое́ се́рдце, грѣха́ми омраче́нное, пути́ моя́ напра́ви, молю́ся.

Богоро́диченъ: Мои́хъ прегрѣше́ній плѣни́цы расто́ргни, Твоего́ Сы́на и Бо́га моля́щи, и томя́щій мя́ грѣ́хъ при́сно низложи́, я́ко да воспѣва́ю Тя́ всегда́, Всенепоро́чная, Тобо́ю спаса́емъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Го́рдаго змíя низложи́лъ еси́ ору́жіемъ смиренному́дрія, всеблаже́нне, и, возвы́сився ду́хомъ, во оби́тели присножи́зненныя всели́лся еси́, иде́же, со а́нгельскими во́инствы ликовству́я, въ Тро́ицѣ Еди́наго Бо́га воспѣва́еши.

Освяще́нъ бы́лъ еси́ Боже́ственною благода́тію, богому́дре Ѳео́доре, е́же пасти́ ста́до ове́цъ слове́сныхъ, ты́ же, я́ко па́стырь и́стинный, всеприлѣ́жное о вруче́нномъ тебѣ́ ста́дѣ имѣ́лъ попече́ніе.

Чи́на а́нгельскаго удосто́ился еси́, досточу́дне святи́телю, а́нгельскую ре́вность въ житіи́ свое́мъ показа́лъ еси́, съ ни́ми у́бо приле́жно моли́ изба́витися отъ напа́сти воспѣва́ющимъ тя́.

Богоро́диченъ: Крѣ́пость моя́, пѣ́ніе и спасе́ніе е́сть Госпо́дь, Юже Тя́, Ма́терь Пречи́стую и Невѣ́сту неневѣ́стную предъизбра́лъ, Его́же о рабѣ́хъ Твои́хъ при́сно непреста́й моли́ти, Чи́стая.

Конда́къ, гла́съ 4:

Въ моли́твахъ Го́сподеви предстоя́, я́коже крѣ́пкій адама́нтъ, по вся́ дни́ и но́щи предъ лице́мъ Бо́жіимъ свѣтя́ся моли́твами, и́хже ра́ди трудо́въ Незаходи́маго Свѣ́та сподо́бився, но́, я́ко имѣ́я дерзнове́ніе къ ро́ждшемуся отъ Святы́я Дѣ́вы, Христу́ Бо́гу на́шему, Его́же моли́ непреста́нно о всѣ́хъ на́съ.

[Икосъ:

Ангела о́бразомъ, человѣ́ка су́ща естество́мъ, имену́емъ тя́ бы́ти, преблаже́нне святи́телю Ѳео́доре, а́ще и тлѣ́нную на земли́ пло́ть носи́лъ еси́, но́ нетлѣ́ніемъ одѣ́янъ яви́лся еси́, тѣ́мже вопію́ще ти́ ра́дуйся прино́симъ: ра́дуйся, Це́ркве Христо́вы те́плый защи́тителю; ра́дуйся, избра́нный Ду́ха Свята́го сосу́де; ра́дуйся, а́нгеловъ собесѣ́дниче; ра́дуйся, апо́столовъ и́стинный прее́мниче; ра́дуйся, святи́телей сопресто́льниче; ра́дуйся, му́чениковъ похвало́; ра́дуйся, по́стниковъ пресла́вное удобре́ніе; ра́дуйся, преподо́бныхъ вѣ́нче; ра́дуйся, па́стырю до́брый; ра́дуйся, во́ине Христо́въ непобѣди́мый; ра́дуйся, звѣздо́ пресвѣ́тлая, въ Росто́вѣ возсія́вшая; ра́дуйся, но́вый чудотво́рче Ѳео́доре.]

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Изба́витися ста́ду твоему́ вся́каго озлобле́нія и ско́рби моли́ся, святи́телю Ѳео́доре, ты́ бо еси́ спасе́нія наде́жда непосты́дна, упова́ніе извѣ́стно, и́стина необори́мая.

Бо́жіимъ манове́ніемъ послѣ́днему ро́ду явле́на бы́ша честны́я мо́щи святи́теля Ѳео́дора, си́мъ у́бо прикаса́ющіися освяще́ніе пріе́млемъ, Христу́ вопію́щи: отце́въ на́шихъ Бо́же благослове́нъ еси́.

Жезло́мъ па́стырскимъ до́бре лю́ди твоя́ упа́слъ еси́, о ни́хже я́ко вѣ́ренъ па́стырь Христу́ возопи́лъ еси́: отце́въ на́шихъ Бо́же благослове́нъ еси́.

Богоро́диченъ: Ты́ еси́, Пречи́стая Богоро́дице, прибѣ́жище на́ше и утвержде́ніе, моли́ Сы́на Твоего́ и Бо́га на́шего пода́ти на́мъ спасе́ніе и грѣхо́въ оставле́ніе.

Пѣ́снь 8.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Го́споду просла́вившу уго́дника Своего́ святи́теля Ѳео́дора, мно́гимъ бо лѣ́томъ преше́дшимъ, сокрове́ны бы́ша честны́я его́ мо́щи, но ны́нѣ вси́ я́вѣ зря́ще, согла́сно воспѣва́ютъ: благослови́те вся́ дѣла́ Госпо́дня Го́спода.

Хра́мъ Свята́го Ду́ха отъ ю́ности бы́лъ еси́ о́тче, сего́ ра́ди и по сме́рти соблюде́ся тѣ́ло твое́ нетлѣ́нно, и сіе́ ра́достно лобыза́юще вопіе́мъ: благослови́те вся́ дѣла́ Госпо́дня Го́спода.

Ми́лостивъ у́бо и кро́токъ, преподо́бенъ и незло́бивъ бы́въ, я́коже Па́велъ о Христѣ́, похваля́я, рече́: тако́въ на́мъ подоба́ше Архіере́й, — Его́же моли́, благослове́нне архіере́ю, въ ми́рѣ сохрани́ти ста́до твое́.

Богоро́диченъ: Упра́ви души́ моея́ движе́ніе, Всенепоро́чная, къ Боже́ственнымъ повелѣ́ніямъ Возсія́вшаго изъ чре́ва Твоего́, бу́ри избавля́ющи мя́ жите́йскихъ собла́зновъ хода́тайствомъ Твои́мъ.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Ужасо́хомся и почуди́хомся, па́че же стра́хомъ и ра́достію объя́ти бы́хомъ, я́ко по толи́цѣхъ лѣ́тѣхъ обрѣто́шася честны́я мо́щи святи́теля Ѳео́дора цѣ́лы и неразруши́мы, отъ ни́хже истека́етъ исцѣле́нія исто́чникъ приснотеку́щій.

Ра́дость и весе́ліе и неизрече́нное ра́дованіе твоему́ ста́ду, святи́телю, показа́ся обрѣ́теніе честны́хъ моще́й твои́хъ, о ни́хже испроси́ на́мъ оставле́ніе грѣхо́въ и ве́лію ми́лость.

Моли́твою, воздержа́ніемъ и бдѣ́ніемъ возше́лъ еси́ на небе́сная, идѣ́же, съ ли́ки а́нгельскими пребыва́я, весели́шися, помина́й, всеблаже́нне, па́мять твою́ свѣ́тло торжеству́ющія.

Богоро́диченъ: Глаго́ломъ Твои́мъ послѣ́дующе, ро́ди родо́въ, Блаже́нная, Тя́ ублажа́ютъ при́сно, Бо́га бо и́стинно родила́ еси́, Чи́стая Дѣ́во, вся́ блаже́нныя, Тому́ рабо́тающія нело́жно, творя́щаго.

Свѣти́ленъ:

Плотскíя мудрова́нія ду́ху повину́лъ еси́ и, я́ко зла́то огне́мъ, искуси́вся, прія́телище Ду́ху Пресвято́му яви́лся еси́, святи́телю о́тче Ѳео́доре. [Два́жды.]

[Сла́ва, и ны́нѣ,] богоро́диченъ:

Тя́ пѣ́сньми ублажа́емъ, Дѣ́во, Бо́га бо роди́вши, на руку́ носи́ла еси́, Того́ моли́ спасти́ ду́ши на́ша.

На хвали́тѣхъ стихи́ры гла́съ 2. Подо́бенъ: Егда́ отъ дре́ва.

Возрасти́лъ еси́ тала́нтъ Христо́въ,* да́нный тебѣ́, всече́стнѣ,* сугу́бою благода́тію,* я́ко ра́бъ и́скренній,* тѣ́мже слы́шиши:* благíй ра́бе, бу́ди тебѣ́,* я́ко и́стинному благо́му уго́днику,* и ны́нѣ вни́ди въ ра́дость Го́спода твоего́,* трудо́въ твои́хъ пріи́мъ воздая́ніе. [Два́жды.]

Боже́ственная благода́ть духо́вная* пома́за тя́ мѵ́ромъ разу́мнымъ, святи́телю,* пресла́вному гра́ду Росто́ву первопресто́льника,* въ не́мже богоуго́дное твое́ житіе́* прекра́сна тя́ показа́,* богому́дре Ѳео́доре,* святи́телей бы́лъ еси́ благолѣ́піе,* преподо́бныхъ украше́ніе,* и ны́нѣ мíръ ве́сь просвѣща́еши* чуде́сными заря́ми.

Яко свѣща́ пресвѣ́тлая,* и я́ко свѣти́льникъ всемíрный,* и я́ко заря́ прекра́сная,* и я́ко звѣзда́ незаходи́мая* посреде́ вели́кія це́ркве,* просія́ша честны́я мо́щи твоя, святи́телю,* свѣтоно́сными благода́ти луча́ми,* слове́сное твое́ ста́до просвѣща́ющія,* всѣ́хъ со стра́хомъ прикаса́ющихся* и уми́льно взыва́ющихъ:* честна́ предъ Го́сподемъ сме́рть преподо́бныхъ его́.

Сла́ва, гла́съ то́йже:

Человѣ́че небе́сный, земны́й а́нгеле, дѣ́лателю виногра́да Христо́ва, святи́телю Христо́въ Ѳео́доре, медото́чными уче́ніи вѣ́рныхъ сердца́ просвѣти́лъ еси́, и па́ствы твоея́ слове́сныхъ ове́цъ до́бре упа́слъ еси́, и вся́ боголѣ́пно озари́лъ еси́, сего́ ра́ди ны́нѣ отъ Христа́ неувяда́емымъ вѣнце́мъ увя́злся еси́ и мо́лишися о душа́хъ на́шихъ.

И ны́нѣ богоро́диченъ: [Все́ упова́ніе мое́...
Славосло́віе вели́кое. Ектеніи́, и отпу́стъ.



НА ЛИТУРГІИ,

Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Примѣчаніе:
[1] Рукопись № 1075. Служба съ акаѳистомъ святителю Ѳеодору, архіепископу Ростовскому, чудотворцу; скороп. XIX в., въ листъ, на 12 л. — Въ концѣ запись: «Списано съ рукописи бывшаго діакона Лазаревской церкви Василія Стефановича Поникаровскаго. Николай Кайдаловъ».
       Св. Ѳеодоръ, архіепископъ Ростовскій, племянникъ препод. Сергія Радонежскаго, † 1394 г.; память его 28 ноября чтилась еще въ XV в. Тропарь и кондакъ ему помѣщенъ въ сборникѣ Кирилло-Бѣлозерскаго монастыря XV в. № 1083. (Макарій — т. IV, 260., т. VIII, 48). Имъ основанъ въ Москвѣ Симоновъ монастырь, гдѣ находится и икона святителя; мощи его почиваютъ въ Ростовскомъ Успенскомъ соборѣ. Премудрый Епифаній, по изслѣдованію В. О. Ключевскаго, задумывалъ написать житіе св. Ѳеодора, но не извѣстно, было ли оно написано, хотя списки житія есть и XVII в. Позднѣйшее житіе относится къ 1723 г. и напечатано въ Москвѣ архимандритомъ Симонова монастыря Петромъ Смѣличемъ (Сумилевичъ). Помѣщаемый здѣсь списокъ акаѳиста [службы съ акаѳистомъ] составляетъ большую рѣдкость, такъ какъ подлинный оригиналъ, вмѣстѣ со многими другими рукописями, Ростовскимъ Успенскимъ соборомъ утраченъ. Н. А. Кайдаловъ, авторъ описанія Ростовскаго собора, имѣлъ въ своемъ распоряженіи не мало драгоцѣнныхъ документовъ, относящихся до исторіи Ростова и его святыни.

Источникъ: А. А. Титовъ. Рукописи славянскія и русскія, принадлежащія Дѣйствительному Члену Императорскаго Русскаго Археологическаго Общества И. А. Вахромѣеву. Выпускъ пятый.  — М.: Печатня А. И. Снегиревой, 1906. — С. 181-188, 195-197.

/ Къ оглавленію раздѣла /


Наверхъ / Къ титульной страницѣ

0