Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 27-й де́нь.
Послѣ́дованіе преподо́бнаго и богоно́снаго отца́ на́шего Ѳеодо́сія Те́рновскаго, и́же на Кефала́рстѣй горѣ́ пости́вшагося.

НА МАЛѢЙ ВЕЧЕРНИ,
[На Го́споди воззва́хъ:] поста́вимъ стихо́въ 4 и пое́мъ стихи́ры, гла́съ 1. Подо́бенъ: Небе́сныхъ чино́въ ра́дованіе.

Въ чистотѣ́ и цѣлому́дріи пожи́ти изво́ливъ,* пло́ть твою́ въ постѣ́хъ и моли́твахъ истни́лъ еси́,* всего́ же себе́ воздержа́ніемъ очи́стивъ,* у́мъ и ду́шу просвѣти́лъ еси́.* Тѣ́мже мо́лимъ тя́: просвѣти́ очеса́ ду́шъ на́шихъ,* я́ко да воспое́мъ по достоя́нію по́двиги и труды́ твоя́,* о́тче Ѳеодо́сіе.

Пе́рвый насе́льникъ пусты́ни Кефала́рскія бы́въ,* мно́жество и́ноковъ въ не́й собра́лъ еси́ къ славосло́вію Бо́жію,* наставля́я и́хъ презира́ти* су́етнаго мíра красоту́* и иска́ти небе́снаго жи́тельства.* Тѣ́мже а́нгеломъ единовсе́льники сотвори́лъ еси́ я́,* о́тче Ѳеодо́сіе.

Го́рькое и му́тное ерети́ческое уче́ніе* изъ Це́ркве Христо́вы му́жественно отве́ргъ* и Правосла́вія догма́ты ре́вностію въ не́й утверди́въ,* въ благоче́стіи соблю́лъ еси́ лю́ди твоя́.* Тѣ́мже и мы́, ча́да твоя́,* благода́рственно почита́емъ* всечестну́ю па́мять твою́,* о́тче Ѳеодо́сіе.

Сла́ва, гла́съ 2:

Отве́ргся мíра и су́щихъ въ мíрѣ всѣ́хъ, ева́нгельски неукло́нно Христу́ послѣ́довалъ еси́, съ Ни́мъ непреста́нно пребыва́ти изволя́я; по́стническимъ же житіе́мъ пло́ть твою́ коне́чнѣ изнури́лъ еси́ и человѣкоубíйцу змíя удави́лъ еси́. Ны́нѣ же на небесѣ́хъ со а́нгелы водворя́яся, преподо́бне о́тче Ѳеодо́сіе, моли́ о на́съ, почита́ющихъ честну́ю па́мять твою́.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

На стихо́внѣ стихи́ры гла́съ 2. Подо́бенъ: До́ме Евфра́ѳовъ.

Звѣзду́, изъ Те́рнова возсія́вшую* и всѣ́хъ болга́ръ просвѣти́вшую,* пѣ́сньми восхва́лимъ,* я́ко вся́ въ нощи́ невѣ́денія наставля́ющую* и къ свѣ́ту богоразу́мія приводя́щую.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ Ду́ха Свята́го бы́лъ еси́, Ѳеодо́сіе,* вну́трь себе́ имѣ́я сло́во прему́дрости,* и́мже ерети́ческія побѣди́лъ еси́ полки́,* утверди́лъ еси́ въ вѣ́рѣ* царя́ и лю́ди.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Сы́й въ дому́ Отца́ Небе́снаго* и наслажда́яся зрѣ́ніемъ Неви́димаго,* Ѳеодо́сіе блаже́нне,* не преста́й моля́ся* спасти́ся душа́мъ на́шимъ.

Сла́ва, и ны́нѣ, богоро́диченъ, гла́съ и подо́бенъ то́йже:

Ра́дуйся, Марíе Богоро́дице,* хра́ме неразруши́мый,* па́че же святы́й,* я́коже вопіе́тъ проро́къ:* свя́тъ хра́мъ Тво́й, ди́вный въ пра́вдѣ.

Тропа́рь, гла́съ 3. Подо́бенъ: Боже́ственныя вѣ́ры.

Въ блаже́ннѣмъ безмо́лвіи пусты́ннѣмъ* и на собо́рѣхъ, любо́вію къ Бо́гу горя́,* посрами́лъ еси́ лука́выхъ бѣсо́въ и ерети́къ злочести́выхъ.* На моли́твѣ же стоя́, огня́ свѣ́тлостію просія́лъ еси́* и преставле́ніемъ твои́мъ а́нгеловъ пою́щихъ обвесели́лъ еси́,* Ѳеодо́сіе, о́тче на́шъ,* сего́ ра́ди мо́лимъ тя́:* моли́ся о душа́хъ на́шихъ.

Сла́ва, и ны́нѣ, богоро́диченъ:

Тя́, хода́тайствовавшую спасе́ніе ро́да на́шего,* воспѣва́емъ, Богоро́дице Дѣ́во:* пло́тію бо, отъ Тебе́ воспрія́тою,* Сы́нъ Тво́й и Бо́гъ на́шъ,* Кресто́мъ воспріи́мъ стра́сть, изба́ви на́съ отъ тли́,* я́ко Человѣколю́бецъ.


НА ВЕЛИЦѢЙ ВЕЧЕРНИ,
Глаго́лемъ: Блаже́нъ му́жъ.., 1-й антифо́нъ. На Го́споди воззва́хъ: поста́вимъ стихо́въ 8 и пое́мъ стихи́ры самогла́сны, гла́съ 1:

Мíръ возненави́дѣвъ, Христа́ возлюби́лъ еси́* и Сіо́на мы́сленнаго жи́тель бы́ти поревнова́лъ еси́,* блаже́нне Ѳеодо́сіе,* наказа́ніемъ же учи́теля твоего́* послуша́нія соверше́ннаго дости́глъ еси́* и искуше́ній мно́жество побѣ́днѣ претерпѣ́лъ еси́.* Тѣ́мже, Боже́ственнымъ Ду́хомъ себе́ вооружи́въ,* къ боре́нію льсти́ваго, ра́дуяся, изше́лъ еси́* и сего́ побѣди́лъ еси́* си́лою изъ Дѣ́вы Возсія́вшаго. [Два́жды.]

Отъ ю́ности цѣлому́дреннѣ* плотска́я мудрова́нія покори́въ ду́ху* и въ живоно́сную ме́ртвость одѣ́явся,* свѣти́льникъ яви́лся еси́ пресвѣ́тлый,* блаже́нне Ѳеодо́сіе;* благода́ти же испо́лненъ Боже́ственнаго Ду́ха,* и́стинный па́стырь показа́лся еси́,* и слове́сною цѣвни́цею* собра́нное о Христѣ́ ста́до до́брѣ упа́слъ еси́,* и на па́жить ра́йскую возве́лъ еси́.

Зрѣ́ти жела́я мы́сленную свѣ́тлость* Боже́ственнаго свѣтоли́тія* и житія́ вожделѣ́въ невеще́ственнаго,* мірска́я вся́ презрѣ́лъ еси́,* пусты́ню душе́вную воздѣ́лалъ еси́* и сію́ слеза́ми напои́лъ еси́.* Жела́ніе же улучи́въ Влады́цѣ твоему́ предстоя́нія,* ны́нѣ со а́нгелы на небеси́* священнолѣ́пно ликовству́еши и мо́лиши* спасти́ся душа́мъ на́шимъ.

Ины стихи́ры, гла́съ 4. Подо́бенъ: Свы́ше зва́нный.

Усе́рдно къ и́ноческому житію́ прите́къ,* наста́ви тя́ Бо́гъ къ равноа́нгельному Григо́рію,* я́ко да иску́съ пріи́мъ,* дѣя́нію и видѣ́нію отъ него́ научи́шися* и бу́деши избра́нный сосу́дъ благода́ти, о́тче Ѳеодо́сіе.* Тѣ́мже, творя́ще честну́ю па́мять твою́, мо́лимъ:* не забу́ди о на́съ сро́днаго промышле́нія,* но моли́ спасти́ся душа́мъ на́шимъ. [Два́жды.]

Богоме́рзское хуле́ніе іуде́йское не стерпѣ́въ,* дерзнове́нно царя́ и цари́цу,* вку́пѣ же и патріа́рха къ ре́вности возста́вилъ еси́* и собо́ру бы́ти тѣ́хъ упроси́лъ еси́, о́тче Ѳеодо́сіе,* идѣ́же му́жественно на богохули́телей ста́лъ еси́* и зловѣ́ріе и́хъ обличи́лъ еси́.* Тѣ́мже, почита́юще честну́ю па́мять твою́, мо́лимъ:* моли́ся о душа́хъ на́шихъ.

Неукло́нно ца́рскимъ путе́мъ ше́ствуя* и вся́ ко́зни вра́жія я́сно зря́,* дѣя́ніемъ тѣ́ло очи́стилъ еси́* и видѣ́ніемъ ду́шу просвѣти́лъ еси́,* безпрепя́тно во́лны мíра сего́ преплы́лъ еси́* и къ го́рнему приста́нищу дости́глъ еси́, о́тче Ѳеодо́сіе,* идѣ́же ны́нѣ несы́тно зри́ши Христа́.* Тѣ́мже, почита́юще честну́ю па́мять твою́, мо́лимъ:* моли́ся о душа́хъ на́шихъ.

Сла́ва, гла́съ 8:

Ца́рскаго лица́ и патріа́ршаго не устыдѣ́вся, ниже́ хитросплете́нныхъ слове́съ ересе́й убоя́вся, дерзнове́нно на собо́рѣ проповѣ́далъ еси́ въ Тріе́хъ Ли́цѣхъ Еди́наго Бо́га и Еди́наго Христа́, Бо́га же и Человѣ́ка; іуде́йское у́бо единоли́чіе, и Саве́ліево слія́ніе, и про́чихъ всѣ́хъ злоче́стіе посрами́въ, вѣ́рныя просвѣти́лъ еси́ и въ благоче́стіи утверди́лъ еси́. Ны́нѣ же я́ко побо́рника Це́ркве Правосла́вныя тя́ почита́юще, Ѳеодо́сіе, мо́лимъ: моли́ся о душа́хъ на́шихъ.

И ны́нѣ, богоро́диченъ, пе́рвый гла́са:

Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Вхо́дъ, проки́менъ дне́ и чте́нія три́ преподо́бнымъ.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 2:

Уподо́бился еси́ пчелѣ́ трудолю́бнѣй, обходя́ оби́тели и взыску́я духо́внаго ме́да, до́ндеже по се́рдцу обрѣ́лъ еси́ духо́вный у́лей, Григо́рія, и́мже и наста́вленъ бы́въ на по́двиги, многолѣ́тнѣ потруди́лся еси́ въ постѣ́ и безмо́лвіи и просія́лъ еси́ благода́тію. Ны́нѣ же во свѣ́тлостехъ Святы́я Тро́ицы водворя́яся, помина́й ны́, творя́щія честну́ю па́мять твою́.

Гла́съ 6:

Удиви́ся наста́вникъ тво́й, вели́кій Григо́рій, въ тебѣ́ зря́ воздержа́ніе чрезмѣ́рное, и внима́ше мы́слію, хотя́щая ти́ напослѣ́докъ бы́ти, Ѳеодо́сіе; ви́дѣвъ бо твое́ по Бо́зѣ житіе́, вра́жіими прило́ги ника́коже коле́блемое, свидѣ́тельствоваше оте́цъ къ бра́тіи, вопія́: се ме́ньшій въ на́съ послѣди́ въ пусты́ни вели́кій свѣти́льникъ и́мать бы́ти Бо́га на́шего.

Гла́съ 8:

Житіе́ по Бо́зѣ испра́вивъ наказа́ніемъ отца́ твоего́, дѣя́нію и видѣ́нію отъ него́ научи́лся еси́, богоявле́нне Ѳеодо́сіе; жела́ніемъ бо боже́ственнымъ му́дрость возлюби́въ, Ду́ха благода́тію обогати́лся еси́ и, я́ко со́тъ ме́да, сла́дость слове́съ твои́хъ иска́пая, при́сно весели́ши ра́зумы боже́ственными Це́рковь Бо́жію. Тѣ́мже на небесѣ́хъ ны́нѣ водворя́яся, о на́съ непреста́нно моли́, соверша́ющихъ честну́ю па́мять твою́.

Гла́съ 4:

Бо́жіимъ изволе́ніемъ въ пусты́ни Кефала́рстѣй всели́лся еси́ и исто́чникъ медото́чныхъ слове́съ яви́лся еси́, источа́яй Боже́ственныя догма́ты благоче́стія. Тѣ́мже по вселе́ннѣй про́йде слу́хъ тво́й, Бо́гу прославля́ющу тя́, о́тче, и стеко́шася къ тебѣ́ мно́жества, я́коже еле́ни, жа́ждущіи воды́ живо́тныя, и́щуще напое́нія благода́ти. Но и ны́нѣ не преста́й моля́ся о восхваля́ющихъ тя́, прося́ на́мъ оставле́нія грѣхо́въ и спасе́нія ду́шъ на́шихъ.

Сла́ва, гла́съ 5:

Дѣ́ланіемъ добродѣ́телей Це́ркви вели́кое возсія́лъ еси́ со́лнце и сія́ніемъ слове́съ твои́хъ просвѣти́лъ еси́ вѣ́рныхъ люде́й собо́ры; сто́лпъ и утвержде́ніе Це́ркве Христо́вы бы́въ, сію́ непоколеби́му отъ искуше́ній лука́ваго соблю́лъ еси́, вся́ бо ересе́й разори́лъ еси́ злодѣ́йства, и лю́ди твоя́ научи́лъ еси́ Тро́ицѣ покланя́тися Единосу́щнѣй, и просвѣти́лъ еси́ Це́рковь Бо́лгарскую па́че со́лнечныхъ лу́чь сія́ти чистото́ю, я́же, моли́твами твои́ми неруши́ма, краси́тся да́же доны́нѣ. Тѣ́мже, соше́дшеся и благодаря́ще Бо́га, да́вшаго ти́ благода́ть такову́ю, вку́пѣ и тя́ почита́емъ, Ѳеодо́сіе, богому́дре о́тче.

И ны́нѣ, богоро́диченъ:

Ра́дуйся, две́ре Госпо́дня непроходи́мая;* ра́дуйся, стѣно́ и покро́ве притека́ющихъ къ Тебѣ́;* ра́дуйся, необурева́емое приста́нище и Неискусобра́чная,* ро́ждшая пло́тію Творца́ Твоего́ и Бо́га,* моля́щи не оскудѣва́й* о воспѣва́ющихъ и кла́няющихся Рождеству́ Твоему́.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Преподо́бне Ѳеодо́сіе, о́тче на́шъ,* ты́ сто́лпъ непоколеби́мь Христо́вы Це́ркве бы́лъ еси́,* боже́ственною бо ре́вностію разже́гся,* ерети́ческія ба́сни дерзнове́нно разори́лъ еси́,* царя́ и лю́ди утвержда́я* въ догма́тѣхъ благоче́стія;* тѣ́мже я́ко па́стырь до́брый* послужи́лъ еси́ лю́демъ твои́мъ* во сла́ву Христа́ Бо́га на́шего,* Его́же моли́ спасти́* любо́вію почита́ющихъ честну́ю па́мять твою́.

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бне Ѳеодо́сіе, о́тче на́шъ,* ты́ свѣти́льникъ яви́лся еси́ слове́сный* и язы́къ богоглаго́ливый,* боговѣща́ннымъ бо гла́сомъ весьма́ подвиза́вся* во сла́ву Бо́жію, богому́дре,* апо́столовъ бы́лъ еси́ подража́тель.* Тѣ́мже ре́вностію всѣ́хъ посрами́въ,* наслѣ́дникъ показа́лся еси́ Ца́рствія Христа́ Бо́га на́шего,* Его́же моли́ спасти́* любо́вію почита́ющихъ честну́ю па́мять твою́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Преподо́бне Ѳеодо́сіе, о́тче на́шъ,* се́ пріидо́ша Бо́лгарская мно́жества* дне́сь честно́е твое́ торжество́* благоче́стно пѣ́сньми восхвали́ти,* ты́ бо вои́стину воздержа́ніемъ тѣ́ло удручи́въ* и моли́твою ду́шу просвѣти́въ,* чистото́ю просія́лъ еси́,* я́коже заря́ Свѣ́та Трисо́лнечнаго,* и ны́нѣ на небеси́, наслажда́яся вѣ́чнаго блаже́нства,* непреста́нно мо́лиши Христа́ Бо́га на́шего* спасти́ любо́вію почита́ющихъ честну́ю па́мять твою́.

Сла́ва, гла́съ 6:

Звѣзда́ свѣтоза́рная, во гра́дѣ Те́рновстѣмъ возсія́лъ еси́ уче́ньми слове́съ твои́хъ, всеблаже́нне Ѳеодо́сіе приснопа́мятне. Яви́лъ бо ся еси́ му́дрый проповѣ́датель и благоче́стія побо́рникъ, царя́ и лю́ди утвержда́я правосла́віемъ. Тѣ́мже восхваля́емъ тя́, глаго́люще: ра́дуйся, отъ утро́бы ма́терни Бо́гомъ избра́нный оте́честву твоему́ въ наста́вника; ра́дуйся, я́ко ме́чь обоюдуо́стрый, посѣца́яй ерети́ческая злоче́стія; ра́дуйся, мѣ́рило извѣ́стное, всѣ́хъ наставля́ющее ко стези́ спасе́нія. Христа́ Бо́га на́шего моля́ не преста́й спасти́ ро́дъ на́шъ.

И ны́нѣ, богоро́диченъ, гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь,* изъ Твои́хъ ложе́снъ проше́дъ, въ мя́ оболкíйся,* пе́рвыя кля́твы Ада́ма свободи́.* Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ,* вои́стинну вопіе́мъ немо́лчно:* ра́дуйся а́нгельски, ра́дуйся, Влады́чице,* предста́тельство, и покро́ве, и спасе́ніе ду́шъ на́шихъ.

На благослове́ніи хлѣ́бовъ: Тропа́рь преподо́бнаго, два́жды. И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ: Тя́, хода́тайствовавшую...

По 1-мъ стихосло́віи сѣда́ленъ, гла́съ 8. Подо́бенъ: Прему́дрость и Сло́во.

Къ прему́дрости сло́ва добродѣ́тель* приложи́въ, Ѳеодо́сіе,* боговѣща́ннымъ твои́мъ гла́сомъ обвесели́лъ еси́* лю́ди твоя́ разу́мно,* Тро́ицы Единобо́жное проповѣ́дуя* и злочести́выя е́реси низлага́я,* концы́ держа́вы Бо́лгарскія* въ вѣ́рѣ правосла́внѣй утверди́лъ еси́.* Тѣ́мже ны́нѣ Христу́ предстоя́* съ невеще́ственными ли́ки,* проси́ душа́мъ спасти́ся* любо́вію почита́ющихъ честну́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Благода́рственное похвале́ніе до́лжнѣ,* я́коже вдова́ о́ная двѣ́ ле́птѣ,* приношу́ Тебѣ́, Влады́чице,* о всѣ́хъ Твои́хъ дарова́ніихъ.* Ты́ бо еси́ покро́въ мо́й ку́пно и по́мощь,* напа́стей мя́ и скорбе́й при́сно изъима́ющи.* Тѣ́мже, я́ко отъ среды́ пещи́ горя́щія,* изба́вився оскорбля́ющихъ,* отъ се́рдца взыва́ю:* Богоро́дице, помози́,* моля́щи Сы́на Твоего́, Христа́ Бо́га на́шего,* прегрѣше́ній оставле́ніе мнѣ́ дарова́ти,* Тя́ бо имѣ́ю наде́жду, ра́бъ Тво́й.

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства Твоего́.

Ересе́й ле́сть обличи́лъ еси́* и правосла́вную вѣ́ру уясни́лъ еси́,* я́ко благоче́стія побо́рникъ богоглаго́ливый* проповѣ́далъ еси́ Еди́наго въ Тро́ицѣ Бо́га,* Естество́мъ Единосу́щнаго и Ли́цы Неслія́ннаго —* Оте́цъ, и Сло́во, и Ду́хъ Святы́й.* Тѣ́мже тя́ по до́лгу воспѣва́юще,* почита́емъ честну́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Недомы́сленно и непостижи́мо е́сть,* Влады́чице Богора́дованная,* содѣ́ланное о Тебѣ́ стра́шное та́инство:* Необыме́ннаго бо заче́нши, родила́ еси́,* пло́тію обложе́нна отъ пречи́стыхъ крове́й Твои́хъ,* Его́же при́сно, я́ко Сы́на Твоего́, моли́* спасти́ся душа́мъ на́шимъ.

[Велича́ніе:

Ублажа́емъ тя́, преподо́бне о́тче Ѳеодо́сіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрость и Сло́во.

Нищету́ Рожде́ннаго отъ Дѣ́вы воспріи́мъ,* вмѣни́лъ еси́ траву́ привре́менная, блаже́нне;* разу́мнаго же дре́ва вкуси́въ,* мона́шествующихъ мно́жества* яви́лся еси́ наста́вникъ,* и́хже къ ре́вности а́нгельскаго жи́тельства воздвиза́я* и къ ра́зуму вѣ́ры, знамено́сне Ѳеодо́сіе.* Моли́ Христа́ Бо́га прегрѣше́ній оставле́ніе дарова́ти* пра́зднующимъ любо́вію честну́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Яко дѣ́ву Тя́ и еди́ну въ жена́хъ,* безсѣ́менно ро́ждшую Бо́га пло́тію,* вси́ ублажа́емъ, ро́ди человѣ́честіи:* Огнь бо всели́ся въ Тя́ Божества́* и я́ко младе́нца млеко́мъ пита́ла еси́* Зижди́теля всѣ́хъ и Го́спода*. Тѣ́мже досто́йно Тя́ прославля́юще,* согла́сно Тебѣ́ вопіе́мъ:* моли́ Христа́ Бо́га прегрѣше́ній оставле́ніе дарова́ти* покланя́ющимся вѣ́рою всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Матѳе́я, зача́ло 43: Вся́ Мнѣ́ предана́ су́ть Отце́мъ Мои́мъ... Иго бо Мое́ бла́го и бре́мя Мое́ легко́ е́сть.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ. Тѣ́мъ на небесѣ́хъ обрѣ́лъ еси́ мзду́ трудо́въ твои́хъ. Де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ [Богоро́дицы, со ирмосо́мъ на 6 и] преподо́бнаго, гла́съ 8, [на 8,] его́же краегране́сіе: Богода́нному [«Ѳеодо́сію»] воспѣва́етъ Дѣ́вій [«Парѳе́ній»] похвалу́.

Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль, пѣ́снь же воспѣва́шеся: Го́сподеви пои́мъ, сла́вно бо просла́вися.

Припѣ́въ: Преподо́бне о́тче Ѳеодо́сіе, моли́ Бо́га о на́съ.

Бо́жій Агнче и Сло́ве, свѣтозаре́ніемъ Свята́го Твоего́ Ду́ха помраче́нному уму́ моему́ свѣтоно́сную лучу́ ниспосли́ и сло́во ми́ вдохни́ восхвали́ти, его́же избра́лъ и прія́лъ еси́, ве́рхъ преподо́бныхъ — Ѳеодо́сія.

Озари́ благода́тію Боже́ственною раба́ твоего́ и разумѣ́нія ду́шу мою́ испо́лни, Ѳеодо́сіе о́тче, во е́же восхвали́ти житіе́ твое́, и́мже вся́ удиви́лъ еси́, подвиза́яся и Го́сподеви поя́: сла́вно бо просла́вися.

Гра́ду вели́кихъ добродѣ́телей твои́хъ, верху́ горы́ стоя́щему, преподо́бне, удиви́шася лю́діе, его́же свѣтозаре́ніемъ наказу́я, всѣ́хъ ко спасе́нію путеводи́лъ еси́, Го́сподеви поя́: сла́вно бо просла́вися.

Богоро́диченъ: Отроча́ Мла́до роди́вши мíра всего́ на спасе́ніе, Ада́ма дре́вняго старѣ́йшее и Роди́телю Предвѣ́чному Сопресто́льное, глаго́лы богогла́сныхъ проро́ковъ о Тебѣ́ испо́лнила еси́, Богоро́дице, и на́съ истлѣ́нія измѣни́ла еси́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Добродѣ́телей на го́ру восте́къ и во мра́къ видѣ́нія вше́дъ, позна́лъ еси́, ели́ко вмѣсти́тельно Непостижи́маго естество́мъ; просвѣще́нія же испо́лненъ бы́въ, воспрія́лъ еси́ бога́тно благода́ть Боже́ственную.

Алка́я добро́ты Еди́наго Бо́га и жа́ждая сла́вы Его́, блаже́нне, сла́ву земна́го пребыва́нія преходя́щую оста́вилъ еси́ и я́ко уго́дникъ Влады́ки всѣ́хъ Христа́ просія́лъ еси́.

Непреста́ннымъ жела́ніемъ ду́ха пло́ти жела́ніе увяди́лъ еси́ и себѣ́, блаже́нне, обручи́лъ еси́ сожи́тельницу — чистоту́, отъ нея́же ча́да тебѣ́ роди́шася — добродѣ́тели, ча́до тя́ содѣ́лавшія Невеще́ственнаго Свѣ́та.

Богоро́диченъ: Неизрече́нно Бо́гу изъ Твои́хъ ложе́снъ проше́дшу, на́съ отъ тлѣ́нія свободи́, Дѣ́во Чи́стая, и змíя мы́сленнаго умертви́, умертви́вшаго Ада́ма въ раи́ иногда́ и Евѣ прама́тери печа́ль содѣ́лавшаго.

Сѣда́ленъ, гла́съ 4. Подо́бенъ: Ско́ро предвари́.

Пре́лесть попали́лъ еси́ злосла́вныхъ* и вѣ́ру до́брѣ уясни́лъ еси́ правосла́вныхъ,* му́дре Ѳеодо́сіе,* и оте́чество твое́ просвѣти́лъ еси́,* отону́дуже побѣдоно́сный побѣди́тель показа́лся еси́,* сто́лпъ Це́ркве и па́стырь и́стинный.* Не преста́й у́бо моля́ся Христу́* спасти́ся на́мъ. [Два́жды.]

Сла́ва, и ны́нѣ, богоро́диченъ:

Ско́ро пріими́, Влады́чице,* моле́нія на́ша* и сія́ принеси́ Сы́ну Твоему́ и Бо́гу,* Госпоже́ Всенепоро́чная.* Побори́ обстоя́нія злосла́вныхъ,* разори́ ко́зни языковре́дныхъ* и низложи́ де́рзость нечести́выхъ,* вооружа́ющихся на рабы́ Твоя́,* Пречи́стая.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Образъ сѣ́ни зако́на, Моисе́омъ да́ннаго, зако́нъ благода́ти показа́лъ еси́ бы́ти, му́дре Ѳеодо́сіе, и Ева́нгеліе — та́инство и́стиннаго богоявле́нія, Христу́ взыва́я: сла́ва си́лѣ Твое́й, Го́споди.

Многотру́дныя по́двиги испо́лнивъ, блаже́нне, досто́йно сподо́бился еси́ безсме́ртія, идѣ́же, ра́дуяся, вѣне́цъ побѣ́ды прія́лъ еси́, вопія́: сла́ва си́лѣ Твое́й, Го́споди.

Удали́вся въ пусты́ню, Крести́теля житію́ поревнова́лъ еси́ и, чи́стѣ та́мо пожи́въ, благода́ти Христо́вы причаща́лся еси́, непреста́нно взыва́я: сла́ва си́лѣ Твое́й, Го́споди.

Богоро́диченъ: Враго́въ крѣ́пость низложи́, Ма́ти Бо́жія, оскорбля́ющихъ воспѣва́ющія Тя́, я́ко ро́ждшая Го́спода сла́вы, и невреди́мо ста́до Твое́ соблюда́й отъ злы́хъ прираже́ній, я́ко да по до́лгу Тя́ ублажа́емъ.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Отпадо́хъ лѣ́ностію, окая́нный, и къ сме́рти усну́хъ, но, я́ко па́стырь до́брый, воздви́гни мя́, о́тче, и стра́сти моя́ мучи́тельныя успи́, я́ко да чи́стѣ воспою́ твое́ свѣтоно́сное преставле́ніе.

Сохраня́й оте́чества твоего́ христолюби́выхъ люде́й моли́твами твои́ми, богоно́се о́тче, избавля́я враго́въ наше́ствія и па́губы вся́кія, я́ко да вси́ усе́рдно засту́пника тя́ ко Христу́, Бо́гу на́шему, почита́емъ.

Подража́тель яви́лся еси́ Иліи́ ре́вностію, не зна́меньми стра́шными ужаса́я, но Боже́ственныхъ слове́съ уче́ньми наставля́я и къ Правосла́вію христоимени́таго Изра́иля отъ пре́лести врага́ мно́гажды изводя́.

Богоро́диченъ: Еди́ну Тя́ о́блакъ разу́мный имену́емъ, изъ Тебе́ бо Христо́съ возсія́, неискусому́жно вопло́щся, Всенепоро́чная, и простра́ннѣйшу Тя́ небе́съ показа́ за милосе́рдіе неисповѣди́мое.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Въ вѣ́рѣ Правосла́внѣй еди́но бы́ти, при́снымъ твои́мъ о́бщее промышле́ніе творя́ се́рдцемъ и душе́ю, сла́вне Ѳеодо́сіе, ерети́ческихъ отрева́лъ еси́ заблужде́ній и раздѣле́ній бѣжа́ти всѣ́хъ учи́лъ еси́.

Ангеловъ оби́телище и ра́й и́стинный содѣ́лавъ пусты́ню, въ не́йже преизя́ществовалъ еси́ во вся́кой добродѣ́тели, по преставле́ніи же рая́ сла́дости сподо́бился еси́.

Единоро́днаго Сы́на Бо́жія, сла́дость весе́лія, — Христа́ Бо́га на́шего, мѵроно́сицъ сле́зы въ ра́дость обрати́вшаго, непреста́нными то́ки сле́зъ твои́хъ иска́палъ еси́.

Богоро́диченъ: Тя́ иногда́ написа́ скрижа́ль богообра́знѣ во проро́цѣхъ вели́кій Моисе́й, свѣ́щникъ же свѣ́та и же́злъ процвѣ́тшій, Всенепоро́чная, и лѣ́ствицу, е́юже вознесо́хомся отъ земли́ на не́бо.

Конда́къ, гла́съ 8. Подо́бенъ: Взбра́нной Воево́дѣ.

Проповѣ́дникъ велегла́сный Боже́ственныхъ догма́тъ* на собо́рѣхъ святы́хъ бы́лъ еси́, о́тче му́дре,* цари́ умудря́я и въ вѣ́рѣ утвержда́я;* благода́тію же Боже́ственною осіява́емь,* загради́лъ еси́ уста́ злосла́вныхъ, Ѳеодо́сіе.* Сего́ ра́ди вопіе́мъ ти́:* ра́дуйся, Бо́лгарская похвало́* и Правосла́вія свѣ́тлое ра́дованіе.

Икосъ:

По́стническое обуче́ніе усе́рдно проше́дъ, преподо́бне Ѳеодо́сіе, и страсте́й прило́ги тече́ніемъ сле́зъ твои́хъ вся́ притупи́въ и благоче́стіе на земли́ Бо́лгарстей но́во утверди́въ, лѣ́ствица боже́ственная, на не́бо возводя́щая, всѣ́мъ показа́ся богопрія́тное житіе́ твое́, е́юже са́мъ, возше́дъ въ го́рнія оби́тели, и на́мъ, уны́лымъ, путесотвори́лъ еси́ вхо́дъ, моли́твами твои́ми вы́спрь всегда́ на́съ вперя́я. Сего́ ра́ди вопіе́мъ ти́: ра́дуйся, Бо́лгарская похвало́ и Правосла́вія свѣ́тлое ра́дованіе.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: оте́цъ на́шихъ Бо́же, благослове́нъ еси́.

Ди́внымъ воздержа́ніемъ умертви́въ плотскíя стра́сти, сосу́дъ чи́стъ и боговсе́льный бы́лъ еси́; тѣ́мже соверша́ющія свѣтоно́сную твою́ па́мять при́сно помина́й, пою́щія: оте́цъ на́шихъ Бо́же, благослове́нъ еси́.

Еже на на́съ вра́жіяго ополче́нія избѣ́гъ, легко́ преше́лъ еси́ къ го́рнимъ оби́телемъ, идѣ́же ны́нѣ водворя́яся и по́честь сла́вы воспріе́мля, со всѣ́ми святы́ми воспѣва́еши: оте́цъ на́шихъ Бо́же, благослове́нъ еси́.

Возлюби́лъ еси́ ху́дость ри́зную, преподо́бне, и отве́рглся еси́ мя́гкихъ, сла́вящихъ тѣ́ло, вѣ́сть бо душа́ сообразова́ти вну́тренняя внѣ́шнему устрое́нію, смиря́ющися и зову́щи: оте́цъ на́шихъ Бо́же, благослове́нъ еси́.

Богоро́диченъ: Имя превожделѣ́нное, Влады́чице, пресвѣ́тлаго Со́лнца о́блаче и две́ре небе́сная, всѣ́хъ христіа́нъ мольбу́ пріими́, Тя́ ублажа́ющихъ и Сы́ну Твоему́ зову́щихъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Истинное цѣлому́дріе стяжа́въ попремно́гу и чистоту́ тѣле́сную, я́коже подоба́етъ святы́мъ, смире́ніе и сокруше́ніе се́рдца вельми́ преумно́жилъ еси́ и ско́рбныхъ нанесе́ніе, ра́дуяся, пріима́лъ еси́, Бо́гу воспѣва́я: благослови́те, вся́ дѣла́ Госпо́дня, Го́спода.

Пожи́лъ еси́ на земли́, я́ко безпло́тенъ; человѣ́къ у́бо бы́въ естество́мъ, яви́лся еси́ сограждани́нъ а́нгеломъ, о́тче му́дре, съ ни́миже ны́нѣ пое́ши, зовы́й: благослови́те, вся́ дѣла́ Госпо́дня, Го́спода.

Обличи́лъ еси́ ху́льныхъ евре́й и свирѣ́пѣющія на ста́до Бо́жіе во́лки ерети́ческія, па́лицею же моли́твъ твои́хъ и уче́ній дале́че отъ Це́ркве Бо́лгарскія отгна́лъ еси́, я́же доны́нѣ ку́пно съ тобо́ю воспѣва́етъ, зову́щи: благослови́те, вся́ дѣла́ Госпо́дня, Го́спода.

Богоро́диченъ: Хра́мъ Тво́й святы́й щито́мъ вѣ́ры сохрани́, Богоро́дице Дѣ́во, и въ не́мъ славосло́вящія Тя́ ку́пно сла́вы Твоея́ сподо́би, нахожде́нія ва́рварскаго избавля́ющи и ума́ на́шего во́лны свирѣ́пыя укроща́ющи моли́твою Твое́ю, Всепѣ́тая.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Во Еди́но естество́ Тро́ицы вѣ́ровавъ правосла́вно, су́етная поуча́ющихъ обличи́лъ еси́ дерзнове́нно и боже́ственными наказа́ніи твои́ми вѣ́рныхъ, му́дрѣ увѣща́въ, укрѣпи́лъ еси́, а́нгеловъ сослужи́телю, преподо́бне о́тче, па́мять твою́ пра́зднующихъ въ ми́рѣ соблюди́.

Аще у́бо и слеза́ми го́рькими ни́ву се́рдца твоего́ напои́ти до́лженствовалъ еси́, о́тче богоно́се, но ны́нѣ въ ра́дости рукоя́тія собира́еши, подвиго́въ твои́хъ по́чести; тѣ́мже тя́ вси́ ублажа́емъ.

Лука́выхъ духо́въ кова́рства спасе́ся душа́ твоя́ свята́я, блаже́нне, и, де́моновъ стрѣля́нія избѣжа́вши, наслѣ́дія небе́снаго сподо́бися; помина́й у́бо пою́щія тя́.

Богоро́диченъ: Услы́ши моли́тву убо́гихъ на́съ, Богома́ти, всѣ́хъ тва́рей Творца́ поро́ждшая и всю́ тва́рь боже́ственною сла́вою превозше́дшая, и изба́ви на́съ отъ вра́жіихъ всѣ́хъ напа́деній, Тя́ велича́ющія.

Свѣти́ленъ гла́съ 3. Подо́бенъ: Посѣти́лъ ны́ е́сть.

Иноковъ учи́телю* и правосла́вныхъ утвержде́ніе,* де́моновъ побѣди́телю* и злочести́выхъ обличе́ніе,* Ѳеодо́сіе, о́тче на́шъ,* моли́твами твои́ми* сро́дныхъ твои́хъ при́сно огражда́й. [Два́жды.]

Сла́ва, и ны́нѣ, богоро́диченъ:

Яко иму́щи ве́ліе милосе́рдіе,* при́зри, Всепѣ́тая Богоро́дице,* на мое́ немощно́е смире́ніе* и страсте́й молву́ разори́, Отрокови́це,* и огня́ гее́нскаго изба́ви мя́* всеси́льными Твои́ми моли́твами.

На хвали́техъ стихи́ры, гла́съ 5. Подо́бенъ: Преподо́бне о́тче.

Преподо́бне о́тче Ѳеодо́сіе,* еще́ въ ю́ности уязви́вся жа́ломъ любве́ Бо́жія,* уподо́бился еси́ купцу́, и́щущему драга́го би́сера,* и пчелѣ́ трудолю́бнѣй,* обходя́щей па́житей мно́жества* пресла́дкаго ра́ди ме́да благоче́стія.* И Бо́гу, тя́ водя́щу,* обрѣ́лъ еси́ Григо́рія,* вели́каго свѣти́льника и́ноческаго любому́дрія,* и напо́лнилъ еси́ сосу́дъ души́ твоея́* сла́дости неизглаго́ланныя* безмо́лвія и богозрѣ́нія,* Христа́ пріи́мъ въ се́рдце твое́ Единовсе́льника,* Того́ моли́, Тому́ помоли́ся, преподо́бне,* дарова́ти душа́мъ на́шимъ ми́ръ и ве́лію ми́лость.

Преподо́бне о́тче Ѳеодо́сіе,* повнегда́ согрѣ́лся еси́ огне́мъ Ду́ха Свята́го,* я́коже ко́кошь птенцы́ своя́ подъ крилѣ́,* собра́лъ еси́ духо́вныхъ ча́дъ мно́жество* на горѣ́ Кефала́рстѣй,* и наказа́ньми богодухнове́нными* очи́стилъ еси́ ду́ши и́хъ отъ непрія́зни лука́ваго,* и а́нгеломъ сожи́телей содѣ́лалъ еси́ я́:* Рома́на у́бо блаже́ннаго,* и Евѳи́мія многострада́льнаго,* и Діони́сія богопросвѣще́ннаго,* и про́чихъ всѣ́хъ въ ра́й сла́дости вве́лъ еси́ Христа́ Бо́га на́шего.* Того́ моли́, Тому́ помоли́ся, преподо́бне,* дарова́ти душа́мъ на́шимъ ми́ръ и ве́лію ми́лость.

Преподо́бне о́тче Ѳеодо́сіе,* по гора́мъ пусты́ннымъ псало́мски превита́я* и Бо́га всеусе́рдно любя́ па́че всѣ́хъ,* но и херуви́мски всю́ду проника́я мно́гими очесы́,* не небре́глъ еси́ столпа́ и́стины и утвержде́нія —* Це́ркве Бо́жія,* е́реси бо открыва́я* и на собо́рѣхъ дерзнове́нно облича́я,* Правосла́віе чи́сто соблю́лъ еси́* и въ не́мъ незы́блемо люде́й твои́хъ утверди́лъ еси́* на основа́ніи еди́наго Христа́ Бо́га на́шего.* Того́ моли́, Тому́ помоли́ся, преподо́бне,* дарова́ти душа́мъ на́шимъ ми́ръ и ве́лію ми́лость.

Преподо́бне о́тче Ѳеодо́сіе,* тече́ніе соверши́вшу ти́ земно́е* и вѣ́ру Правосла́вну соблю́дшу,* и вѣнце́мъ угото́ваннымъ тебѣ́, бы́вшимъ въ Ца́рствіи небе́снѣмъ,* попусти́ Госпо́дь до конца́ истлѣ́ти пло́ти твое́й неду́гомъ,* во е́же ду́ху твоему́ па́че обнови́тися.* Любо́вію же дру́га подвиза́емь* и мѵ́ра свята́го жела́ніемъ,* отше́лъ еси́ въ чужду́ю,* я́ко да отту́ду во оте́чество го́рнее возлети́ши* и, а́нгеломъ пою́щимъ,* ду́шу твою́ преда́си въ ру́цѣ Христа́ Бо́га на́шего.* Того́ моли́, Тому́ помоли́ся, преподо́бне,* дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:

Вели́кій дре́вле Анто́ній, бѣ́гая мíра суеты́ и въ пусты́ню всели́вся, мона́шествующимъ бы́сть оте́цъ и первоо́бразъ безмо́лвія, но изы́де па́ки въ мíръ, на враги́ Це́ркве ополча́яся, мучи́телей е́ллиновъ и Арія злочести́ваго. Отцу́ сы́нъ послѣ́дуя, Ѳеодо́сій блаже́нный, а́ще и въ пусты́ни безмо́лвствуя, но оба́че ре́вностію соблюде́ невѣ́сты Жениха́ Небе́снаго бѣ́лую чистоту́, Це́ркве Христа́ Бо́га на́шего свято́е Правосла́віе. Тѣ́мже и сугу́быя вѣнцы́ прія́тъ отъ десни́цы Вы́шняго преподо́бія же и учи́тельства, моля́ся непреста́нно о душа́хъ на́шихъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная,* возрасти́вшая на́мъ Пло́дъ живота́,* Тебѣ́ мо́лимся: моли́ся, Влады́чице,* со святы́ми Твои́ми* поми́ловатися душа́мъ на́шимъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Послѣ́дованіе съ житіе́мъ преподо́бнаго и богоно́снаго отца́ на́шего Ѳеодо́сія Те́рновскаго, и́же на Кефала́рстѣй горѣ́ пости́вшагося. † Левкійскій Парѳеній. — Софія: Държавно книгопечатно предприятие «Дечо Стефанов», 1951. — С. 33-51.

/ Къ оглавленію раздѣла /


Наверхъ / Къ титульной страницѣ

0