Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 27-й де́нь.
Слу́жба и́же во святы́хъ отца́ на́шего Іа́кова, епи́скопа Росто́вскаго, чудотво́рца.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры [на 8], гла́съ 6. Подо́бенъ: Все́ отло́жше.

Просвѣти́ся житіе́ твое́* добродѣ́тельными свѣтлостьми́,* и вѣ́рныя просвѣти́лъ еси́,* и льсти́ тму́ разгна́лъ еси́,* и́стинное бо яви́лся еси́* и свѣтоза́рное со́лнце,* іера́рше преблаже́нне Іа́кове,* и ны́нѣ всели́лся еси́,* идѣ́же сія́етъ Свѣ́тъ невече́рній,* сы́нъ дне́ благода́тію Ду́ха Свята́го бы́въ.* Тѣ́мже, твою́ боже́ственную па́мять и свѣтоно́сную* че́стно соверша́юще, приснопа́мятне,* любо́вію почита́емъ.

Умъ тво́й манове́ніемъ,* е́же къ Бо́гу,* му́дре, вѣ́рою удобря́емь,* свѣ́телъ яви́лся еси́, всесла́вне,* въ ме́ртвеннѣмъ тѣ́лѣ и тлѣ́ннѣмъ,* прему́дре, нетлѣ́нію поучи́вся,* притяжа́лъ еси́ безпло́тныхъ свѣ́тлости,* и страсте́й внѣ́ бы́въ,* безстра́стіемъ украша́яся,* Іа́кове о́тче, іера́рше прему́дре,* свѣтлѣ́йшее свѣти́ло* и моли́твенниче о чту́щихъ вѣ́рою па́мять твою́.

Ины стихи́ры, гла́съ 8. Подо́бенъ: О, пресла́внаго чудесе́!

Преподо́бне о́тче Іа́кове,* ты́ еще́ во утро́бѣ сы́й ма́терни,* архіере́йства прозва́ніе и́мя пріи́мъ нарече́нное,* измла́да Христа́ возлюби́лъ еси́,* вручи́вся же па́ствѣ слове́сныхъ ове́цъ,* до́брѣ па́слъ еси́ Це́рковь Христо́ву.* Тѣ́мъ пра́зднуемъ твое́ успе́ніе,* ра́достію се́рдца Христа́ велича́емъ,* прославля́ющаго Своего́ уго́дника. [Два́жды.]

Преподо́бне о́тче Іа́кове,* испроси́ я́же къ Бо́гу моли́твами твои́ми Це́ркви утвержде́ніе,* іера́рха покры́й моли́твою твое́ю,* Благочести́вому же и Христолюби́вому Импера́тору на́шему [и́мярекъ]* побѣ́ды да́руй на враги́ и одолѣ́ніе,* гра́ду же твоему́ крѣ́пкое и недви́жимое утвержде́ніе,* и вѣ́рнымъ лю́демъ грѣхо́въ оставле́ніе испроси́,* и о всѣ́хъ на́съ, притека́ющихъ къ ра́цѣ моще́й твои́хъ* и свѣ́тло творя́щихъ пра́зднество успе́нія твоего́,* свя́те, помоли́ся.

Преподо́бне о́тче и богоно́се святи́телю Іа́кове,* ты́ вои́стинну яви́лся еси́,* просвѣща́я всѣ́хъ омраче́нная сердца́,* наставля́я на пу́ть и́стинный.* Ты́ бы́лъ еси́ убо́гимъ и сирота́мъ и вдова́мъ засту́пникъ,* вельмо́жамъ тве́рдое наказа́ніе и утвержде́ніе,* всѣ́мъ, вѣ́рою притека́ющимъ* подъ кро́въ Пречи́стыя Бо́жія Ма́тере,* испроси́, свя́те, грѣхо́въ оставле́ніе,* моля́ся за ны́ ко Влады́цѣ.

Сла́ва, гла́съ 8:

Апостоловъ ревни́теля Іа́кова, преблаже́ннаго отца́ и учи́теля, соше́дшеся дне́сь восхва́лимъ, и́мже Христа́ Бо́га позна́хомъ, и отъ тмы́ къ свѣ́ту прибли́жившеся, о́чи и сердца́ да просвѣти́мъ, и въ па́мять его́ ликовству́юще, ку́пно возвесели́мся, обрѣ́тше вождя́, пра́во веду́ща въ Ца́рствіе Бо́жіе.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. И чте́нія три́.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе. [Глава́ 4.]

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 8:

Преподо́бне о́тче Іа́кове, ты́ возше́дъ на лѣ́ствицу Боже́ственнаго ра́зума и къ Бо́гу приближа́яся, усыне́нія да́ръ отъ Него́ пріи́мъ, исцѣля́я неду́ги неисцѣ́льныя и отгоня́я ду́хи нечи́стыя. Тѣ́мъ твое́ успе́ніе пра́зднуемъ ра́достію се́рдца, Христа́ прославля́юще, велича́юща Своего́ уго́дника.

Гла́съ 4:

Воззрѣ́въ неукло́нно на высоту́ ра́зума и усмотри́лъ еси́ безвѣ́стно прему́дрости глубину́, уче́ніи мíръ обогати́лъ еси́, о́тче, о на́съ при́сно моли́ Христа́, святи́телю Іа́кове.

Человѣ́че Бо́жій, вѣ́рный уго́дниче, строи́телю Того́ та́инъ и му́жъ жела́ній духо́вныхъ, сто́лпе одушевле́нный, духо́вный о́бразъ, я́ко Боже́ственное сокро́вище Це́ркви обрѣ́тше тя́, моли́твенника о душа́хъ на́шихъ.

Гла́съ 8:

Святи́телю Іа́кове, высото́ю добродѣ́телей Бо́жіе просвѣще́ніе, духо́вный орга́не, правосла́вныхъ сла́во, зловѣ́рія обличи́телю, дѣ́вственному ли́ку вели́кое, и спасе́нное, и ди́вное мудрова́ніе показа́лся еси́.

Сла́ва, гла́съ 6:

Правосла́вныя вѣ́ры душе́вныя ра́ди му́дрости учи́тель яви́лся еси́, Іа́кове блаже́нне, Христа́ обрѣ́тъ наста́вника, совѣ́ты злосла́вныя ерети́ческія разгна́лъ еси́. Тѣ́мъ мо́лимъ тя́, свя́те: моли́ся Христу́ Бо́гу о на́съ всегда́, е́же о тебѣ́ извѣ́ствованную Правосла́вную вѣ́ру неподви́жну сохрани́ти на́мъ и ве́лію ми́лость испроси́, о́тче Іа́кове.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

На стихо́внѣ стихи́ры, гла́съ 4. Подо́бенъ: Яко до́бля.

Заря́ми духо́вными* просвѣще́нное свѣтоза́рное* со́лнце бы́лъ еси́,* я́коже лучи́ уче́нія* во вся́ концы́ простира́я* и вѣ́рныхъ озаря́я* исполне́ніе, блаже́нне,* и отгоня́я тму́, богоно́се, ересе́й* си́лою отъ Дѣ́вы Возсія́вшаго.

Сти́хъ: Честна́ предъ Го́сподемъ* сме́рть преподо́бныхъ Его́.

Благосказа́ніемъ слове́съ твои́хъ,* свяще́нный Іа́кове,* Це́рковь вся́ украша́ется,* ра́дующися уче́ньми кра́сными въ добродѣ́телехъ,* и почита́етъ свяще́нное твое́* преставле́ніе, пресла́вне,* свяще́нныхъ похвало́,* отце́въ верхо́вниче,* и Пресвяты́я Тро́ицы побо́рниче.

Сти́хъ: Свяще́нницы Твои́ облеку́тся въ пра́вду,* [и преподо́бніи Твои́ возра́дуются].

Огненными твои́ми уче́ніи* ересе́й вся́кая хвра́стная* попаля́ется ле́сть, прему́дре,* разу́мными глубина́ми* погружа́ется во́инство* неповину́ющихся злочести́выхъ,* свяще́нне о́тче Іа́кове, уче́ніи твои́ми,* и украша́ется вѣ́рныхъ всегда́* Це́рковь, велегла́сно чту́щихъ тя́.

Сла́ва, гла́съ 8:

Иже по о́бразу соблю́дъ невреди́мо, преподо́бне о́тче, о Христо́вѣ о́бразѣ проти́ву ста́лъ еси́ му́жески, не убоя́вся вра́жеского преще́нія, но духо́внымъ мече́мъ того́ уби́лъ еси́. Тѣ́мже, дерзнове́ніе стяжа́въ къ Бо́гу, спаси́ ста́до твое́ отъ ересе́й всѣ́хъ, Іа́кове многострада́льне.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

Тропа́рь, гла́съ 4:

Избра́нъ отъ ю́ности Бо́гови бы́въ, святи́телю Іа́кове, сего́ ра́ди архіере́йства са́номъ почте́нъ, упа́слъ еси́ лю́ди, я́же тебѣ́ Бо́гомъ вруче́нныя. Тѣ́мже и по преставле́ніи чуде́съ дарова́нія отъ Бо́га прія́лъ еси́ исцѣля́ти разли́чныя неду́ги. Моли́ о на́съ, соверша́ющихъ честну́ю па́мять твою́, да тебе́ непреста́нно велича́емъ.

Сла́ва, и ны́нѣ, богоро́диченъ:

[Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
На Бо́гъ Госпо́дь: Тропа́рь то́йже, [два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

Служи́тель бы́въ Христа́, вся́ческихъ Влады́ки, научи́лъ еси́ лю́ди и просвѣти́лъ еси́ Боже́ственнымъ креще́ніемъ, къ разумѣ́нію си́хъ наставля́я, святи́телю. Тѣ́мже тя́ проповѣ́дника и́стинна вси́ имену́емъ, всечестна́го святи́теля и уго́дника Христо́ва. [Два́жды.]

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на Предста́тельница вѣ́рныхъ и Покро́въ, бѣ́дъ, и скорбе́й, и лю́тыхъ обстоя́ній вся́ изба́ви, и́же на Тя́ упова́ніе иму́щія, Отрокови́це, и ду́ши на́ша спаси́ боже́ственными мольба́ми Твои́ми.

По 2-мъ стихосло́віи сѣда́ленъ, гла́съ 4:

Отъ ю́ности взе́мъ кре́стъ тво́й, благоче́стно послѣ́довалъ еси́ и увяди́въ плотско́е мудрова́ніе воздержа́ніемъ. Тѣ́мъ, на архіере́йстѣмъ сѣда́лищи сѣ́дъ, возвели́чилъ еси́ Влады́ку и Того́ Пречи́стую Ма́терь, зна́меньми разли́чными твою́ украси́вшія ра́ку, Іа́кове богоблаже́нне. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Пресу́щнаго Бо́га ро́ждшая, со іера́рхомъ Іа́ковомъ Того́ непреста́нно моли́ оставле́ніе согрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію чту́щимъ Тя́ по до́лгу, еди́на Всепѣ́тая.

[Велича́ніе:

Велича́емъ тя́, святи́телю о́тче Іа́кове, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 8. Подо́бенъ: Прему́дрости.

Надъ страстьми́ ца́рствовалъ еси́ плотски́ми, іера́рхъ яви́вся богоподо́бенъ, гра́дъ тво́й Росто́въ упа́слъ еси́, креще́ніемъ же просвѣти́лъ еси́ и наказа́лъ еси́ сла́вити Еди́наго Бо́га въ Тре́хъ Ѵпоста́сехъ. Тѣ́мже источа́еши исцѣле́нія и по кончи́нѣ вѣ́рою притека́ющимъ ко Пречи́стѣй Бо́жій Ма́тери и къ ра́цѣ моще́й твои́хъ, Іа́кове, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ. Вся́кое дыха́ніе... Ева́нгеліе отъ Іоа́нна, зача́ло 35.

По 50-мъ псалмѣ́ стихи́ра, гла́съ 6. Самогла́сна:

Наслѣ́дниче Христо́въ, слуго́ Госпо́день Іа́кове, по и́мени твоему́ та́ко и житіе́ твое́, просія́въ бо сѣди́нами ра́зумъ, свидѣ́тельствоваше свѣ́тлость лица́ твоего́ душе́вное незло́біе, извѣ́ствоваше кро́тость сло́во молчали́вое, жи́знь твоя́ сла́вная и успе́ніе со святы́ми, моли́ о душа́хъ на́шихъ.

Кано́нъ Богоро́дицы на 6 и свята́го на 8, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Боже́ственными заря́ми и свяще́нными свѣтосія́ніи при́сно мою́ ду́шу озари́, тво́й, іера́рше, пра́здникъ, о́тче, сла́вяща.

Всесвѣ́тлую тя́ звѣзду́ мы́сленное показа́ Со́лнце, свѣ́тлость твои́хъ добродѣ́телей просвѣти́ зе́млю, святи́телю Христо́въ, му́дре Іа́кове.

Житіе́ при́сно очище́но и чи́сто и скве́рнѣ несмѣ́шено яви́въ, Христо́въ свяще́нъ сосу́дъ, прему́дре, показа́лся еси́ на земли́, Іа́кове блаже́нне.

Богоро́диченъ: Со Отце́мъ Сы́й Единоро́дный, земны́я обожи́въ, Чи́стая, за мно́гія щедро́ты я́ко Бо́гъ Преблагíй.

Катава́сія: Христо́съ ражда́ется...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Сы́нъ дне́ свѣ́та, ты́, святи́телю, труды́ твои́ми яви́лся еси́ и я́сно во свѣ́тлостехъ ны́нѣ святы́хъ сія́еши благода́тію.

Проповѣ́дая ны́нѣ благочести́вно Тро́ицы Еди́но Божество́, многобо́жную ле́сть искорени́лъ еси́ отъ земли́, я́ко честны́й святи́тель и я́ко Сло́ва и́стинный служи́тель.

Пу́ть обличи́лъ еси́, му́дре, всѣ́мъ прельще́ннымъ нечести́ваго искуше́нія и приве́лъ еси́ къ Сло́ву Пастыренача́льнику, я́ко па́стырь слове́сный и спаси́тельный.

Богоро́диченъ: Приста́нище бу́ди ми́ и окормле́ніе, бѣ́дствующу страстьми́ неосла́бно и погиба́ющу, приста́нище су́щи въ мо́ри жите́йстѣмъ, еди́на Чи́стая Приснодѣ́во.

Сѣда́ленъ, гла́съ 8. Подо́бенъ: Прему́дрости.

Украша́яся прему́дростію ра́зума, горды́ню низложи́лъ еси́ плотскíя тя́гости и бы́лъ еси́ оби́тель Ду́ха Пресвята́го, непремѣ́нно простира́яся ра́зумомъ къ Лю́бящему тя́. Тѣ́мъ ре́вностію Боже́ственною разгара́яся, сла́вне, сирота́мъ и убо́гимъ утвержде́ніе яви́лся еси́, а́нгеловъ собесѣ́дникъ Іа́кове, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, и́нъ сѣда́ленъ, гла́съ 4. Подо́бенъ: Яви́лся еси́ дне́сь.

Правовѣ́рно, преподо́бне, Це́рковь Христо́ву упа́слъ еси́, ерети́ческія отгна́лъ еси́ пле́велы и въ вы́шнихъ се́лѣхъ водворя́ешися, преблаже́нне.

И ны́нѣ, богоро́диченъ:

Яко Всенепоро́чная [Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми].

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Предвѣ́дый Бо́гъ, блаже́нне, твоея́ души́ красоту́ и ра́зума чистоту́, священнопроповѣ́дника му́дра и учи́теля показа́ тя.

Ду́хомъ просвѣще́нъ сы́й, су́щія во тмѣ́ пре́лести просвѣща́еши и креще́ніемъ сы́ны дне́ соверша́еши, святи́телю преслову́щій.

Отъ тмы́ звѣре́й изба́вилъ еси́ ста́до твое́, растерза́ти и́щущихъ и отступи́ти вѣ́ры непоро́чныя, святи́телемъ добро́то и па́стыремъ старѣ́йшинство.

Богоро́диченъ: Разу́мно въ купинѣ́ Тя́ огнепа́льнѣй Моисе́й ви́дѣвъ, я́вственно образу́ющей Бо́га, хотя́ща изъ Тебе́ роди́тися неизрече́нно, Богоро́дице Приснодѣ́во.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Святи́тельскую твою́ оде́жду свя́щенную носи́въ свяще́нно, нечести́выя просвѣти́лъ еси́, честны́й святи́телю, Еди́нство Несозда́нно въ Тре́хъ Ли́цѣхъ, Іа́кове пре́мудре, проповѣ́далъ еси́.

Отъ у́стъ во́лка мы́сленнаго восхи́тилъ еси́ лю́ди уче́ніемъ, богогла́се, уста́ ерети́ческая веле́рѣчивая, твои́ми богосло́віи загради́лъ еси́, о́тче.

Ме́рзскій низложе́нъ бы́сть твои́ми свяще́нными словесы́ Маркіа́нъ, и изгна́нъ бы́сть ра́ди вся́каго безмѣ́стія отрыга́яй скве́рны смра́дныя, Іа́кове пресла́вный.

Богоро́диченъ: Зако́ны естества́ Пресу́щный Бо́гъ обновля́етъ, Непоро́чная, изъ Твоея́ утро́бы ражда́ется, Еди́нъ усво́ивъ вся́ческая во́лею.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Возвы́шено смире́ніе чистото́ю ума́ и любо́вь нелицемѣ́рну, вѣ́ру и наде́жду имѣ́я и́стинну, Іа́кове всесла́вный, Тро́ицы яви́лся еси́ жили́ще.

Ны́нѣ отъ созна́нія твоего́ Ду́хомъ, прему́дре, и́же по тебѣ́ благода́тію слове́сныхъ ове́цъ наста́вника приво́диши къ же́ртвеннику, добродѣ́тели писа́ніемъ облиста́ема.

Вельми́ украси́вшася Росто́вскаго свяще́нія, сѣда́лищу тя́ учи́тъ, прехва́льне, Ду́хъ Святы́й, и тебе́ па́стыря руко́ю святи́тельскою, Іа́кове, соверша́етъ.

Богоро́диченъ: Две́рь Богоблагода́тная, отве́рзши две́ри небе́сныя, две́ри свѣ́та отве́рзи ми́, Влады́чице, и отъ вра́тъ сме́ртныхъ свободи́ мя, Чи́стая.

Конда́къ, гла́съ 8:

Яко архіере́евъ сопресто́льникъ и святи́телемъ изря́дный побо́рникъ бы́лъ еси́, святи́телю Іа́кове, непреста́нно сохраня́й оте́чество твое́, гра́дъ же и лю́ди, тебе́ вѣ́рою почита́ющія и честны́мъ моще́мъ твои́мъ покланя́ющіяся, да велегла́сно тебѣ́ вопіе́мъ: ра́дуйся, Іа́кове богому́дре.

Икосъ:

Изъ чре́ва ма́терня освяще́ннаго святи́теля Госпо́дня хва́литъ ны́нѣ вся́ страна́ Россíйская, преподо́бнаго Іа́кова, Росто́ву гра́ду утвержде́ніе, благода́тныя да́ры пріе́мшаго Боже́ственныя сла́вы, къ нему́же притека́юще, вси́ вѣ́рою те́плою ра́ку моще́й его́ любе́зно цѣлу́емъ. Тѣ́мъ и а́зъ, недосто́йный и грѣ́шный, надѣ́яся на моли́твы твоя́, святи́телю, я́же ко Влады́цѣ и Пречи́стѣй Его́ Ма́тери, жела́ю, а́ки пси́ отъ крупи́цъ, па́дающихъ отъ трапе́зы госпо́дій свои́хъ, насыще́ніе прія́ти, е́же въ де́нь су́дный содѣ́янныхъ мно́ю зо́лъ, моли́твами твои́ми, свя́те, проще́ніе улучи́ти, да велегла́сно тебѣ́ вопію́: ра́дуйся, Іа́кове богому́дре.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Вразумля́лъ еси́ неразу́мныя, обраща́лъ еси́ прельще́нныя, совраща́ющіяся же, о́тче, спа́слъ еси́ и Бо́гу приве́лъ еси́ чи́сты, Тому́ пою́щія благоче́стно: благослове́нъ еси́, Го́споди Бо́же оте́цъ на́шихъ.

Украси́шася боже́ственніи твои́ по́двиги, воплоще́ніе проповѣ́дающе неизрече́ннымъ милосе́рдіемъ Возсія́вшаго на́мъ, Ему́же вопіе́мъ прилѣ́жно: благослове́нъ Бо́гъ оте́цъ на́шихъ.

Облада́въ страстьми́ тѣле́сными, поще́ніемъ, сла́вне, необлада́емь жите́йскими напа́стьми яви́лся еси́. Ны́нѣ пое́ши при́сно: благослове́нъ Бо́гъ оте́цъ на́шихъ.

Богоро́диченъ: Избавля́еши дре́вняго преступле́нія Рождество́мъ Твои́мъ, Пречи́стая, хва́лимъ Тя́, спасе́нніи Тобо́ю, Дѣ́во, и, пою́ще, вопіе́мъ Ти́: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Процвѣ́лъ еси́, я́ко фи́никсъ, во дворѣ́хъ Бо́жіихъ и до́лжнымъ сно́мъ преподо́бнымъ усну́лъ еси́, при́сно же наслажде́ніе пребоже́ственный гро́бъ тво́й и чу́до ви́дящимъ, Іа́кове проповѣ́дниче, показу́еши.

Бо́жіе бо Сло́во суще́ственное, свяще́нно тя́ и святи́теля возставля́етъ, пома́зающа лю́ди, священносвяти́телю и престо́льниче Росто́вскій и свѣти́льниче вселе́нныя.

Вопло́щшагося Сло́ва богосло́вилъ еси́, многобезслове́сія бо лю́ди изба́вивъ, боже́ственъ бы́лъ еси́ учени́къ Возсія́вшаго, Іа́кове богогла́се.

Богоро́диченъ: Священнонаучи́вся Твои́мъ та́йнамъ, проро́чески боже́ственный ли́къ, Богоро́дице, издале́ча уви́дѣвъ и я́ко положи́въ богопроповѣ́дно боже́ственнаго проповѣ́данія Рождества́ Твоего́.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Яко свѣ́тъ, я́ко свѣ́щникъ, я́ко вели́кое со́лнце, я́ко мо́лнія Христо́вѣ Це́ркви возсія́лъ еси́, и вѣ́рныхъ ра́зумы просвѣти́лъ еси́, и въ невече́рняя мѣста́ всели́лся еси́, поя́ трисвяты́ми гла́сы Тро́ицу Несозда́нную.

Пло́тію мíра кромѣ́ бы́въ, святи́телю, въ прекра́сныхъ чи́нѣ обита́я, ро́да на́шего обогаща́еши творе́ніемъ свѣ́тлымъ. Тѣ́мже па́мять твою́ вѣ́рою соверша́емъ на земли́, Іа́кове прему́дре.

Земля́ тѣ́ло твое́ блаже́нное скрыва́етъ, я́ко исцѣле́нія точа́щи вѣ́рнымъ, не́бо же ду́хъ со избра́нными отъ вѣ́ка но́ситъ, Боже́ственными сія́ніи озаре́нъ еси́ вои́стинну, я́ко всесла́вный.

Богоро́диченъ: Гла́съ арха́нгела Гавріи́ла пріе́мши, вели́каго Совѣ́та, Чи́стая, Христа́ Емману́ила родила́ еси́, со а́нгелы земны́я вся́ сочета́вшаго, еди́на вино́вна на́шего, Дѣ́во, блаже́нства.

Свѣти́ленъ. Подо́бенъ: Ученико́мъ.

Чу́днаго и сла́внаго святи́теля Іа́кова вели́каго, пріиди́те, пѣ́сньми боже́ственными и свяще́нными похва́лимъ, я́ко Росто́ву предсѣда́льника и а́нгельскимъ чино́мъ сослуже́бника бы́вша.

Сла́ва, другíй свѣти́ленъ. Подо́бенъ: Посѣти́лъ ны́ е́сть.

Сла́вно кра́сится дне́сь свѣтоза́рное торжество́, и́же во свѣ́тѣ сла́вы Бо́жія предстоя́, святи́телю, помяни́ на́съ, хва́лящихъ твою́ па́мять.

И ны́нѣ, богоро́диченъ:

Съ Бо́гомъ упова́ніе на Тя́ возложи́хомъ, Пречи́стая, Иже изъ Тебе́ проше́дшему сраспина́емся Христу́, Твои́ми же къ Нему́ моли́твами невреди́ми да́же до конца́ сохрани́.

На хвали́техъ стихи́ры, гла́съ 1. Подо́бенъ: Небе́сныхъ чино́въ.

На небеси́ сы́й почива́яй веселя́ся,* моли́ за ны́ Пресвяту́ю Тро́ицу* ми́лость пода́ти на́мъ, святи́телю,* и житіе́ безгрѣ́шно,* я́ко въ Ту́ю вѣ́рующихъ* при́сно ско́рби отгоня́етъ* и неду́ги исцѣля́етъ.

Милосе́рдія твоего́ исто́чникъ* на́мъ да́руй и благода́ть,* вско́рѣ ра́дости испо́лни,* пода́й же цѣльбы́ въ ско́рбехъ и печа́лехъ,* моля́ Христа́, всесла́вне,* спасти́ вся́, пою́щія тя́.

На весе́ліе вше́дъ нетлѣ́емое,* весе́ліе да́ти моли́,* е́же спасти́ рабы́ твоя́,* мо́жеши бо, Іа́кове,* въ моли́твахъ бѣды́ вся́ разгони́ти,* моля́ Христа́ исцѣли́ти боля́щія* и спасти́ ду́ши на́ша.

Отъ зако́ннаго ко́рене* израсте́ вѣ́твь всыне́нія,* вода́ми напое́нъ я́сно, Іа́кове,* и́бо Це́ркви Христо́вѣ,* я́ко фи́никсъ высокове́рхій,* процвѣ́лъ еси́ на́мъ, просвѣща́я вѣ́рныя.* Тѣ́мъ ны́нѣ со святи́тели* предстоя́ престо́лу Христо́ву,* моли́ся о душа́хъ на́шихъ.

Сла́ва, гла́съ 6:

Добродѣ́телей твои́хъ, о́тче преподо́бне, пло́дъ просвѣти́лъ е́сть вѣ́рныхъ сердца́: кто́ бо, слы́ша безчи́сленное твое́ смире́ніе, и терпѣ́нію не удиви́тся, е́же къ ни́щимъ ти́хость, скорбя́щимъ утѣше́ніе? Вся́ боголѣ́пно научи́лъ еси́, преподо́бне святи́телю Іа́кове. И ны́нѣ неувяда́емымъ вѣнце́мъ увя́злся еси́, моли́ о душа́хъ на́шихъ.

И ны́нѣ, богоро́диченъ:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое, [ектеніи́] и отпу́стъ. И ча́съ 1-й.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Слу́жба вся́ святи́тельская: [Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 290 – 296.

/ Къ оглавленію раздѣла /


Наверхъ / Къ титульной страницѣ

0