Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 27-й де́нь.
Преподо́бнаго отца́ на́шего Палла́дія.

[Зри́:] Слу́жба свята́го Палла́дія пое́тся на повече́ріи.

Кано́нъ, его́же краегране́сіе: Твое́ почита́ю, всеблаже́нне о́тче, житіе́. Іо́сифъ. Гла́съ 4.

Пѣ́снь 1.

Боже́ственными свѣтлостьми́ озаря́емь, преподо́бне, о́блакъ разжени́ помышле́нія моего́, я́ко да узрю́ твое́ житіе́ свѣтоно́сное и исправле́ніе жи́тельства твоего́.

Утреневавъ къ Бо́гу, пра́вды Со́лнцу, отъ младе́нства, всебога́те, тмы́ избѣ́глъ еси́ тѣле́сныхъ страсте́й воздержа́ніемъ и да́ромъ чуде́съ обогати́лся еси́, преподо́бне.

Умную чистоту́ безстра́стіемъ стяжа́въ, Ду́ха бы́лъ еси́ вмѣсти́лище, досточу́дне Палла́діе всеблаже́нне, отце́въ украше́ніе, свѣти́льниче всемíрный.

Богоро́диченъ: Ты́ еди́на, Богоневѣ́сто, въ вы́шнихъ Сѣдя́шаго рука́ми носи́ла еси́, пло́ть бы́вшаго, Ты́ бо еси́ прія́телище досто́йно всѣ́хъ вѣко́въ Вседержи́теля.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Всено́щное, о́тче, моле́ніе, бо́дреннымъ принося́ по́мысломъ Бо́гу Вседержи́телю, стра́сти плотскíя успи́лъ еси́, тѣ́мже предста́тель неусы́пный всѣ́хъ на́съ бы́лъ еси́.

Умертви́въ у́ды воздержа́ніемъ, оживи́лъ еси́, о́тче, ду́шу Боже́ственными возраще́ніи, добродѣ́тельми вжиля́емь Вседѣ́тельными си́лами, отце́въ о́тче Палла́діе.

Вкуси́въ до́браго Бо́жія глаго́ла и ра́зума Боже́ственнаго прича́щся, молчали́во соверши́въ твое́ житіе́, прилѣпля́яся невозвра́тно, преподо́бне, Свѣтода́телю Бо́гу на́шему.

Богоро́диченъ: Ми́лостивыми Твои́ми, Отрокови́це, ка́плями у́гліе угаси́ страсте́й, Марíе Неискусобра́чная, и угаше́нный возжзи́ свѣти́льникъ се́рдца моего́, златы́й Свѣти́льниче, Всенепоро́чная.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Си́лою же и благода́тію Вседѣ́тельною всѣ́хъ Царя́, Бо́га на́шего, лука́вствія безпло́тныхъ вра́гъ отню́дъ избѣ́глъ еси́, о́тче Палла́діе богодухнове́нне.

Да возра́дуемся духо́внѣ, па́мять соверша́юще пра́зднственную знамено́сца и честна́го отца́ на́шего, свяще́нными того́ мольба́ми неудо́бныхъ избавля́еми.

Цѣле́ніе приснотеку́щее твоя́ ра́ка то́читъ, о Палла́діе сла́вне! Приходя́щихъ очища́етъ скве́рны плотскíя вку́пѣ и душе́вныя, о́тче отце́въ богопрія́тне.

Изба́ви ны́, преподо́бне, твои́ми моли́твами всѣ́хъ собла́знъ зміи́ныхъ сѣте́й, и исцѣли́ на́ша лю́тыя неду́ги ко Влады́цѣ мольба́ми твои́ми.

Богоро́диченъ: Яви́ся Боговмѣсти́мая вои́стинну Це́рковь всѣ́хъ Царя́, Пренепоро́чная Богороди́тельнице. Тѣ́мже благоче́стно Гавріи́лово, е́же — ра́дуйся, — вѣ́рніи, несумнѣ́нно прино́симъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Стра́сти пренебре́глъ еси́ плотскíя, богоблаже́нне, премно́гимъ воздержа́ніемъ, тѣ́мъ тебѣ́ благода́ть Боже́ственная дарова́ся стра́сти исцѣля́ти вѣ́рныхъ, о́тче, приходя́щихъ ти́, о Палла́діе пресла́вне!

Свя́то твое́ житіе́, всеблаже́нне, соверши́въ, тѣ́мже и ко святы́мъ причта́лся еси́, отъ вѣ́ка Бо́гу рабо́тавшимъ, всѣ́хъ освяща́еши ду́ши, хва́лящихъ твоя́ честна́я чудодѣя́нія.

Блаже́нъ бы́лъ еси́ и́стинно, достосла́вне, ты́ бо въ пу́ть оправда́ній Всеви́дца Бо́га ходи́лъ еси́, незло́бивъ и кро́токъ бы́въ и восхожде́ніи до́брыми украша́емь.

Богоро́диченъ: Дале́че человѣ́чество Бо́га, Дѣ́во, бы́сть, Тебѣ́ же, заче́ншей Спа́са несказа́нно, Богора́дованная, па́ки въ ра́й вхо́дитъ, вѣ́рою ублажа́я Тя́, Всепѣ́тая.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Чи́сто житіе́ воспріе́мъ воздержа́нія, я́ко безпло́тенъ, испра́вилъ еси́ стоя́ніе всено́щное, моли́тву, му́дре, неоску́дну, вѣ́ру и́стинную, боже́ственное смире́ніе.

До́брыхъ видѣ́ніи украша́емь, я́ко а́нгелъ ви́дѣнъ бы́лъ еси́, въ пло́ти жи́тельствуя, и, преше́дъ, всели́лся еси́ со а́нгелы, о́тче богоблаже́нне Палла́діе.

Ангелы имѣ́я спомо́щники, де́монская отрази́лъ еси́ мечта́нія и вся́ лука́вствія, и безъ преткнове́нія проше́лъ еси́, о богоблаже́нне, стезю́, къ жи́зни вводя́щую.

Богоро́диченъ: Глаго́лы, Отрокови́це Всенепоро́чная, боже́ственнаго Гавріи́ла я́ко услы́шала еси́, Сло́во зачала́ еси́ въ безсѣ́меннѣмъ чре́вѣ Твое́мъ и па́че сло́ва Сего́ родила́ еси́.

Го́споди поми́луй, три́жды. Сла́ва, и ны́нѣ.

Сѣда́ленъ, гла́съ 1. Подо́бенъ: Ка́мени запеча́тану.

Мона́шествовавъ богоуго́дно, богоно́сне о́тче на́шъ, моли́твою и посто́мъ Бо́га взыска́лъ еси́ и бы́лъ еси́ прія́телище чи́сто Ду́ха, блиста́я вѣ́рнымъ добродѣ́тельныя зари́, и́миже просвѣща́еши вся́ чту́щія тя́. Сла́ва Просла́вльшему тя́ Христу́, сла́ва Укрѣ́пльшему тя́, сла́ва Дѣ́йствующему тобо́ю всѣ́мъ исцѣле́ніе.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Пресла́вными указа́ніи, всебога́те, чуде́съ всѣ́хъ ду́ши, притека́ющихъ къ тебѣ́, просвѣща́еши благода́тію Вседержи́телевою, просвѣти́вшаго твою́ ду́шу и показа́вшаго ю́, со́лнца свѣтлѣ́йшую.

Возлюби́въ соверше́ннѣйше Го́спода ума́ пра́востію и отъ Него́, всему́дре, соверше́ннѣ возлюби́ся, благода́ть прія́лъ еси́ лука́выя отгоня́ти ду́хи и исцѣля́ти вся́ неду́ги.

Сле́зъ твои́хъ тече́нія пріи́мъ, Всеви́децъ Бо́гъ утѣше́нія а́нгельскаго прича́стна тя́ содѣ́ла, е́же получи́ша Бо́гу служи́вшіи пра́востію се́рдца.

Богоро́диченъ: Ми́лостиваго ро́ждши Го́спода, еди́на Богоблагода́тная, десни́цею Его́, Чи́стая, поми́ловати мо́й у́мъ моли́ся, всегда́ лю́тѣ совраща́емый жите́йскими печа́льми.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Си́лою Боже́ственною ополче́нія де́монская па́губная потреби́лъ еси́, благода́ть же прія́лъ еси́ уста́вити не́мощи и отгони́ти ду́хи нечи́стыя, вопія́: Го́спода по́йте дѣла́ и превозноси́те Его́ во вся́ вѣ́ки.

Пожи́въ, всеблаже́нне, богоуго́дно, пра́веднымъ я́вѣ до́лжнымъ сно́мъ ны́нѣ усну́лъ еси́ и къ неконча́емому приве́лся еси́ наслажде́нію, преподо́бне, вопія́: Го́спода по́йте дѣла́ и превозноси́те Его́ во вся́ вѣ́ки.

Цѣльбы́ источа́етъ пресла́вно ра́ка твоя́, о́тче, прири́щущимъ уставля́ющи неду́ги, стра́сти же изсуша́ющи, е́йже покланя́ющеся, пое́мъ житіе́ твое́, болѣ́зни и боже́ственныя по́двиги, Палла́діе блаже́нне, свѣти́льниче мона́шествующихъ.

Богоро́диченъ: Во́дъ мя́ испо́лни, Дѣ́во, Боже́ственныхъ, Яже Исто́чникъ ро́ждшая, изба́ви мя́ зно́я грѣхо́внаго и къ жи́зни путево́дстви, две́ре Боже́ственныя жи́зни, вопію́ща: Го́спода по́йте дѣла́ и превозноси́те Его́ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Возмо́гъ Бо́жіею си́лою и благода́тію, о́тче, побѣди́ти змíя, хва́лящася безу́міемъ, и па́губную главу́ его́ сокруши́ти, и попра́въ нога́ми твои́ми. Тѣ́мже, соше́дшеся, уми́льною душе́ю тебе́ ублажа́емъ.

Яви́лся еси́ не́бо высото́ю жи́тельства Твоего́, чудесы́ удобря́емь, всебога́те, я́ко Боже́ственными звѣзда́ми, и просвѣща́еши ду́ши благоче́стно всегда́ приходя́щихъ тебѣ́ и чту́щихъ вѣ́рою по́двиги твоя́, богоно́сне, свѣти́ло свѣтлѣ́йшее.

Уста́вилъ еси́ страсте́й тече́нія, преподо́бне, ту́чами сле́зъ твои́хъ, струи́ притека́ющимъ чуде́съ то́чиши, богоблаже́нне. Отрѣва́еши зно́й страсте́й всегда́, Палла́діе сла́вне, Це́ркве честно́е удобре́ніе.

Процвѣ́лъ еси́ я́вѣ, я́ко ши́покъ благово́нный, во Це́ркви Христо́вѣ и облагоуха́лъ еси́ чуде́сными воня́ми мíра концы́. Тѣ́мже боже́ственную твою́ па́мять торжеству́емъ, въ не́йже всѣ́мъ испроси́ оставле́ніе, богоно́сне, мно́гихъ согрѣше́ній.

Богоро́диченъ: Свѣ́тъ, Иже изъ Свѣ́та, возсія́ изъ чре́ва Твоего́, Ма́ти Приснодѣ́во, и пре́лести тму́ отгна́ и земны́я концы́ вся́ просвѣти́. Тѣ́мже вѣ́рою, — ра́дуйся, — зове́мъ Тебѣ́, Богоро́дице, преподо́бныхъ похвало́.

Стихи́ры, гла́съ 1. Подо́бенъ: Всехва́льніи му́ченицы.

Припѣ́въ: Преподо́бне о́тче Палла́діе, моли́ Бо́га о на́съ.

Умъ тво́й, просвѣща́емь свѣ́томъ,* всеблаже́нне Палла́діе, трисо́лнечнаго Божества́* хра́мъ бы́лъ еси́ чи́стый,* Боже́ственныя Свята́го Ду́ха зари́ разу́мно пріе́мля.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Ангелы споспѣ́шники имѣ́я, му́дре,* укрѣпля́ющія тя́,* де́монская мечта́нія* и лука́вая дѣя́нія отрази́лъ еси́, о́тче,* и пу́ть проше́лъ еси́,* вводя́щій къ Боже́ственному поко́ю.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва:

Душе́вною чистото́ю, му́дре,* богоно́сне сла́вне,* чи́стому уподо́бився Бо́гу* и Зижди́телю твоему́,* же́ртва жива́ Тому́ прине́слся еси́,* я́ко храни́тель Того́ повелѣ́ній.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

И ны́нѣ, богоро́диченъ:

Пречи́стый хра́мъ Бо́жій,* небе́съ ши́ршій* и херуви́мъ святѣ́йшій,* Богоблагода́тная, Всесвята́я Отрокови́це,* у́мъ мо́й облагодати́* и просвѣти́ серде́чныя о́чи,* подаю́щи ми́ благопрія́тнымъ Твои́мъ хода́тайствомъ* прегрѣше́ній всѣ́хъ отпуще́ніе.

Крестобогоро́диченъ. Подо́бенъ то́йже:

Дѣ́ва Нескве́рная дре́вле,* на дре́вѣ зря́щи Бо́га,* Его́же изъ безсѣ́менна чре́ва роди́,* не терпя́щи утро́бнаго уязвле́нія,* терза́ющися, глаго́лаше:* ма́ніемъ Содержа́й всю́ тва́рь,* ка́ко, я́ко осу́жденникъ,* на Крестѣ́ распя́лся еси́,* хотя́й спасти́ все́ человѣ́чество?

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 273 – 276.

/ Къ оглавленію раздѣла /


Наверхъ / Къ титульной страницѣ

0