Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 27-й де́нь.
Свята́го великому́ченика Іа́кова Пе́рсянина.

[ВЕЧЕРЪ,]
На Го́споди воззва́хъ: стихи́ры му́ченика Іа́кова, на 6, гла́съ 2. Подо́бенъ: Егда́ отъ дре́ва.

Уды пожина́емь пло́ти, и нестерпи́мыя болѣ́зни и ра́ны терпя́, му́чениче Христо́въ, достосла́вне, Іа́кове, и мучи́телей суровство́ попра́въ му́жественно, побѣ́ды многоцѣ́нный вѣне́цъ прія́лъ еси́; и́мже ны́нѣ украша́емь, блаже́нне, Боже́ственному Влады́ки твоего́ престо́лу съ пострада́вшими съ тобо́ю предстои́ши.

Имѣ́я дерзнове́ніе ко Христу́, о всѣ́хъ, вѣ́рою соверша́ющихъ честны́й тво́й пра́здникъ, му́чениче приснопа́мятне, те́плѣ предстои́ши, отъ бѣ́дъ избавля́я и страсте́й свобожда́я, вся́каго обстоя́нія лю́тыхъ изыма́я, подава́я душа́мъ спасе́ніе боже́ственными твои́ми моли́твами, я́ко да свѣ́тлыя твоя́ по́двиги просла́вимъ.

Сла́ва, гла́съ 5:

Удиви́лъ еси́, о Іа́кове, въ му́кахъ всѣ́хъ долготерпѣ́въ, пе́рстомъ бо и рука́мъ, и мы́шцамъ отсѣ́ченымъ твои́мъ бы́вшимъ, подо́бнѣ и нога́мъ и лы́стомъ твои́мъ да́же до бедру́, претерпѣ́лъ еси́ про́чее, моля́щуся тебѣ́, и честну́ю главу́ твою́ отсѣко́ша. Му́чениче многострада́льне, о на́съ не преста́й Христу́ моля́ся поми́ловатися душа́мъ на́шимъ.

И ны́нѣ, богоро́диченъ, или́ крестобогоро́диченъ. Подо́бенъ: Ра́дуйся.

Агнца своего́ Агница иногда́ зря́щи, къ заколе́нію тща́щася, усе́рдно послѣ́доваше, сія́ вопію́щи Ему́: ка́мо и́деши, Ча́до Мое́ сладча́йшее, Христе́? Чесо́ ра́ди ско́рое тече́ніе сіе́, Долготерпѣли́ве, тече́ши нелѣ́ностно? Іису́се Вожделѣ́ннѣйшій, Безгрѣ́шне, Многоми́лостиве Го́споди, да́ждь Ми́ сло́во, Рабѣ́ Твое́й, Сы́не Мо́й Вселюбе́знѣйшій, не пре́зри, Ще́дре, молча́, Тя́ стра́нно Ро́ждшую, Бо́же Всеще́дре, да́руяй мíрови ве́лію ми́лость.

На стихо́внѣ окто́иха. Сла́ва, му́ченика, гла́съ 8. Гео́ргія Сике́лла:

Вѣ́рно соше́дшеся дне́сь, любозри́теле, ви́дите борьбу́ стра́нную и размѣне́нную Іа́кова, су́щаго отъ Перси́ды, на́мъ облиста́вшаго, я́ко звѣзду́, волхво́мъ я́вльшуюся и ко и́стинному позна́нію наста́вльшую. То́й бо, до́блественный, внегда́ па́дати, ра́тователи отража́ше, и внегда́ соста́вомъ удо́въ рѣ́занымъ бы́ти, му́чащія не́мощны творя́ше, вы́шнимъ про́мысломъ укрѣпля́емь, вопія́: а́ще и у́ды моя́ чу́вственныя су́щія сѣче́те, но и́мамъ Христа́ разу́мно ми́ вся́ быва́юща. Тѣ́мже прови́дя бу́дущую жи́знь, предлежа́щія ра́ди всѣ́хъ сме́рти, ко о́ной тща́шеся прейти́, въ не́йже и водворя́яся, про́ситъ на́мъ отъ вѣнцеда́теля Бо́га очище́ніе, просвѣще́ніе и ве́лію ми́лость, соверша́ющимъ па́мять его́.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ма очи́ма ви́дится, о Влады́ко:* содержа́й всю́ тва́рь* на дре́во воздви́женъ бы́въ* и умира́еши, всѣ́мъ дая́й жи́знь? —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь му́ченика Іа́кова, гла́съ 4:

Му́ченикъ Тво́й, Го́споди, Іа́ковъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Или́ се́й, гла́съ то́йже:

Муче́ніи странноужа́сными и до́блестію терпѣ́нія всѣ́хъ преудиви́лъ еси́, многострада́льне, надъ ко́имждо соста́вомъ удеси́ рѣ́занія, благода́рны мольбы́ преди́внѣ изре́клъ еси́ Го́споду. Тѣ́мъ, во страда́ніи твое́мъ вѣне́цъ пріе́мъ, къ престо́лу возше́лъ еси́ небе́снаго Царя́ Христа́ Бо́га, Іа́кове, Того́ моли́ спасти́ ду́ши на́ша.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха безъ му́ченичновъ и свята́го на 6, его́же краегране́сіе: Пе́рсина Іа́кова пѣ́сньми му́ченика пою́. Творе́ніе Іо́сифово. Гла́съ 2.

Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Христо́ву престо́лу ны́нѣ предстоя́, вѣнцено́сецъ, сла́вне му́чениче Іа́кове, свѣтоно́сную мнѣ́ зарю́ и благода́ть съ небесе́ да́ждь моли́твами твои́ми.

Якоже у́тро на́мъ возсія́лъ еси́ многосвѣ́тлое, отъ восто́ка исходя́, и просвѣти́лъ еси́ Христо́ву Це́рковь свѣ́тлостію страда́ній, му́чениче Іа́кове.

Юношеское сопротивле́ніе показа́въ, я́ко побѣди́тель сподо́бился еси́ по́чести, и соверше́ннаго натрижне́нія, и сла́вы вѣ́чныя, му́чениче Іа́кове.

Богоро́диченъ: Проро́ческія Тя́ трубы́ провозвѣсти́ша, е́же о Тебѣ́ та́инство проповѣ́дающе, Богоро́дице Дѣ́во, издале́ча зря́ще Твоя́ чудеса́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Бы́лъ еси́, я́ко избра́нна Христо́ва лоза́, серпо́мъ муче́ній очища́ема и мно́гъ пло́дъ нося́щая, въ точи́лѣхъ Спа́совыхъ приноси́мый.

Теку́щихъ тлѣ́нное и удоборазрѣ́шное презрѣ́лъ еси́ смы́сленно, вѣнцено́сче, я́ко остроу́мный же предъизбра́лъ еси́ приснопребыва́ющихъ незы́бленное.

Вѣнцы́ тебѣ́ свѣ́тлы, раздробля́емое тѣ́ло, суровство́мъ мучи́телей исхода́тайствова, Іа́кове, и пи́щи ра́йскія наслажде́ніе.

Богоро́диченъ: Поми́ловано бы́сть я́вѣ Рождество́мъ Твои́мъ Боже́ственнымъ, Дѣ́во, человѣ́чество, соедини́вшееся по ѵпоста́си Влады́цѣ всѣ́хъ, Богоневѣ́сто.

Сѣда́ленъ, гла́съ 8. Подо́бенъ: Прему́дрости.

Изъ Перси́ды звѣзду́ новоявле́нную Христо́съ возсія́ земны́мъ боже́ственнаго Іа́кова и приснопа́мятнаго му́ченика, того́ ра́ди пре́лести мра́къ отгна́, и вѣ́рнымъ благода́ть Ду́ха возсія́. Тѣ́мже па́мять его́ соверша́юще, вѣ́рно пра́зднуимъ и возопіи́мъ, глаго́люще: страстоте́рпче многострада́льне, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ ти́ну впа́дъ грѣхо́въ, и нѣ́сть мнѣ́ постоя́нія, лю́тѣ потопи́ мя бу́ря прегрѣше́ній, но я́ко ро́ждши Сло́во, еди́наго Человѣколю́бца, на мя́, раба́ Твоего́, при́зри и изба́ви мя́ вся́каго грѣха́, и страсте́й душетлѣ́нныхъ, и вся́каго озлобле́нія лука́ваго убíйцы, Богоро́дице Неискусому́жная, моли́ Христа́ Бо́га грѣхо́въ оставле́ніе да́ти ми́, Тебе́ бо наде́жду и́мамъ, ра́бъ Тво́й.

Крестобогоро́диченъ:

Дѣ́ва и Ма́ти Изба́вителя, Кресту́ предстоя́щи, болѣ́зненно со слеза́ми рыда́ющи, ма́терски вопія́ше: что́ стра́нное сіе́, и пресла́вное, Сы́не? источа́яй всѣ́мъ человѣ́комъ безстра́стіе, посредѣ́ осужде́ною на Крестѣ́ распя́лся еси́, въ ре́бра пробода́емь и же́лчію напая́емь отъ ру́къ, я́же созда́лъ еси́? Но воста́ни и да́руй прегрѣше́ній оставле́ніе вѣ́рою пою́щимъ Боже́ственная Твоя́ страда́нія.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Вжиля́емь, сла́вне, отъ Бо́га да́ннымъ тебѣ́ всеору́жіемъ, огнеслужи́телей ле́сть всю́ попали́лъ еси́.

Очище́ніе на́мъ испроси́, честну́ю твою́ па́мять соверша́ющимъ, дерзнове́ніе имѣ́я, му́чениче Іа́кове.

Теку́щія кро́ве то́ки отъ твои́хъ уде́съ, треблаже́нне, пре́лести пла́мень ве́сь погаси́ша.

Богоро́диченъ: Упра́ви моя́ помышле́нія, Пречи́стая, къ благоти́хому приста́нищу Твоего́ безстра́стія и чистоты́.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Якоже нѣ́кая земля́ блага́я и добропло́дная, и́стинно бы́лъ еси́, ра́ломъ го́рькихъ му́къ раздробля́емь, му́дре, многокла́сное Зижди́телю принося́ земледѣ́ланіе.

Стрѣ́лы, всеизя́щне, разжже́нныя вра́жія угаси́лъ еси́, кро́вію отсѣ́ченыхъ твои́хъ уде́съ тѣле́сныхъ, треблаже́нне, наде́ждею бо яви́лся еси́ и вѣ́рою огражда́емь.

Всепло́дно, я́ко овча́, Христу́, прему́дре, твои́мъ удесе́мъ, рѣ́жемымъ лю́тѣ, побѣ́дную пѣ́снь и досто́йную хвалу́ на кíйждо приноси́лъ еси́.

Дае́ши очище́ніе душе́вныхъ мои́хъ скве́рнъ, сла́вне му́чениче Христо́въ, твоя́ болѣ́зни, избавле́ніе подава́я крове́й твоя́ то́ки, всехва́льне.

Богоро́диченъ: Истинствующій честно́му и стра́шному рождеству́ Твоему́ гла́съ се́рдцемъ и язы́комъ принося́ще я́сно, Тя́ ны́нѣ Богоро́дицу чи́стую имену́емъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Поуче́ніе смы́сленно пріе́мъ бли́жнихъ твои́хъ, ра́дуяся, устреми́лся еси́ къ подвиго́мъ, сла́вне, и вѣнцы́ побѣ́ды прія́лъ еси́.

Якоже въ чужде́мъ тѣлеси́ стражда́, терпѣ́лъ еси́, му́чениче Іа́кове, и, на у́ды раздробля́емь, Влады́цѣ пѣ́снь возсыла́лъ еси́.

Спасе́нія въ ри́зу я́вственно и весе́лія оде́жду, кро́вію твое́ю обагри́вшуюся, прему́дре, побѣдоно́сецъ, я́ко му́ченикъ, обле́клся еси́.

Муче́нія преплы́тіе соверши́въ, тѣ́мже священнопобѣ́дный вѣне́цъ прія́лъ еси́ и ны́нѣ съ му́ченическими чи́нми сликовству́еши досто́йно, Іа́кове сла́вне.

Богоро́диченъ: Неискусому́жно, Дѣ́во, родила́ еси́ и вѣ́чнуеши Дѣ́ва, явля́ющи и́стиннаго Божества́, Сы́на и Бо́га Твоего́, зна́менія.

Конда́къ, гла́съ 2. Подо́бенъ: Вы́шнихъ ища́.

Увѣ́рився до́брою сопру́жницею, терпѣливоду́шне, и стра́шнаго суди́ща убоя́вся, пе́рсское повелѣ́ніе и стра́хъ, Іа́кове, поплева́лъ еси́ и яви́лся еси́ му́ченикъ честны́й, тѣ́ломъ, я́ко розга́, рѣ́жемь.

Икосъ:

Отъ души́ возстене́мъ вси́, сле́зы пролива́юще, зря́ще му́ченика, го́рько раздробля́ема, подо́бно псо́мъ рыка́ющимъ, соше́дшеся, у́ды растерза́ютъ чу́днаго и до́бляго въ свидѣ́телехъ му́ченика, что́ у́бо е́сть да приреку́? а́ще хо́щете, ма́ло пожди́те, и реку́ вся́ со тща́ніемъ: ка́ко во еди́нъ де́нь бы́сть сме́рть, тѣ́ломъ Іа́ковъ, я́ко розга́, рѣ́жемь.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Крѣ́постію у́мною, терпѣ́ніемъ же душе́внымъ, раздробля́ему, му́чениче, твоему́ тѣ́лу, непрело́женъ и непрекло́ненъ бы́лъ еси́, вѣ́рою укрѣпля́емь Боже́ственною и зовы́й, Іа́кове: благослове́нъ еси́, Го́споди Бо́же оте́цъ на́шихъ.

Испра́вивъ твоя́ помышле́нія къ смотре́нію вы́шняго зва́нія и му́ками облива́емь, не потопи́лся еси́, но, терпя́ удо́бно я́звы беззако́нныхъ и разсѣка́емь, пѣ́лъ еси́: благослове́нъ еси́, Го́споди Бо́же оте́цъ на́шихъ.

Блаже́нъ еси́, и добро́ тебѣ́ е́сть ны́нѣ, блаже́ннѣйше, побѣди́вшу ти́ неукроти́мое лука́ваго свирѣ́пство и мучи́телеву я́рость, усе́рдно зову́щу ти́: благослове́нъ еси́, Го́споди Бо́же оте́цъ на́шихъ.

Богоро́диченъ: Незаходи́маго Свѣ́та и свѣщи́ Боже́ственнаго сія́нія яви́лася еси́ свѣ́щникъ златосія́ющь и мíръ ве́сь озаря́ющь заре́ю честна́го дѣ́вства и пою́щія спаса́еши: Благослове́нная, Яже Бо́га пло́тію ро́ждшая.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Си́лою Бо́жіею укрѣпи́вся, лука́выхъ собо́рища и ополче́нія разори́лъ еси́, блаже́нне, и, держа́вно отгна́въ, побѣ́ды вѣне́цъ прія́лъ еси́, зовы́й: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Отъя́тія уде́съ, я́ко приложе́нія благи́хъ, му́чениче, зрѣ́лъ еси́, не ны́нѣшнія ви́дя болѣ́зни, но бу́дущее смотря́я му́чениковъ кра́сное вѣнча́ніе, отъ Пра́веднаго Судіи́ угото́ванное.

Терпѣ́ніе преесте́ственное стяжа́въ тве́рдо, я́коже сто́лпъ, пребы́лъ еси́, блаже́нне, вра́жія стремле́нія безстра́шно и стрѣ́лы пріе́мля, зовы́й: благослови́те Христа́ во вѣ́ки.

Устремле́ніемъ мно́гимъ тебѣ́ приложи́вся началозло́бный вра́гъ и душетлѣ́нный, и мучи́тели подви́гнувъ низложи́ти души́ твоея́ крѣ́пость, и не возмо́же, сла́вне: во всеору́жіе бо Христо́во одѣ́ялъ еси́ себе́.

Богоро́диченъ: Безсме́ртія проза́рный вѣ́мы Тя́ исто́чникъ, Богоро́дице, я́ко ро́ждшую Сло́во безсме́ртнаго Отца́, вся́ сме́рти изба́вльшаго превознося́щія Его́ во вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Съ му́ченики я́ко му́ченикъ сликовству́я, треблаже́нне, и престо́лу предстоя́ Христо́ву, соверша́ющія па́мять твою́ и тво́й свѣтоно́сный съ весе́ліемъ дне́сь чту́щія пра́здникъ лю́тыхъ бѣ́дъ твои́ми моли́твами изба́ви.

Идѣ́же му́чениковъ собо́ри, идѣ́же всѣ́хъ святы́хъ свято́е упоко́ися мно́жество, идѣ́же пра́ведныхъ ду́си, идѣ́же Це́рковь перворожде́нныхъ, ны́нѣ на небесѣ́хъ всели́лся еси́ вои́стинну я́ко му́ченикъ, о Іа́кове!

Свѣщено́сецъ предста́лъ еси́ Спа́су всѣ́хъ, за Него́же тѣ́ла твоего́ уде́съ отсѣче́ніе претерпѣ́лъ еси́ и огня́, и ра́нъ искуше́нія неради́лъ еси́ крѣ́пко. Тѣ́мже тя́ вси́ вѣ́рою и любо́вію ублажа́емъ, Іа́кове.

Испещре́нною багряни́цею, кровьми́ твои́ми очервленѣ́вшеюся, ны́нѣ одѣ́янъ, со Христо́мъ ца́рствуеши, Іа́кове, страстьми́ бо безстра́стія обрѣ́лъ еси́ исто́чникъ, его́же наслажда́тися вѣ́чно, всеблаже́нне, сподо́бился еси́.

Богоро́диченъ: Яко Бо́га заче́ншую и Бо́жію Ма́терь бы́вшую и́стинно чи́стую, Тя́, Богоро́дицу, сла́вимъ, веще́й естеству́, зва́ніе прили́чествующе я́сно, и подо́бно боже́ственный Тебѣ́ гла́съ принося́ще.

Свѣти́ленъ. Подо́бенъ: Ду́хомъ во святи́лищи.

Яко ло́зу, обрѣ́заему мно́гими му́ками, просла́ви Госпо́дь, я́ко виногра́дъ честны́й, вино́ источа́ющь отъ исто́чникъ крове́й твои́хъ, Іа́кове страстоте́рпче и покрови́телю, любо́вію всесвяще́нную твою́ па́мять досто́йно творя́щихъ.

Богоро́диченъ:

Нѣ́сть отню́дъ во мнѣ́ спасе́нія, Дѣ́во, я́ко злѣ́ впадо́хъ во глубину́ грѣхо́вную и ожида́ю преще́нія, и стра́шнаго муче́нія, и ко́злищь ча́сти, уще́дри мя́ пре́жде суда́, я́ко су́щи те́плое заступле́ніе, Богоро́дице.

На стихо́внѣ окто́иха. Сла́ва, свята́го, гла́съ 2. Студи́тово:

Терпя́ въ страда́ніихъ, му́чениче Іа́кове, тѣ́ло твое́ преда́лъ еси́ за Христа́ Бо́га и, раздробля́емь ру́цѣ, и сте́гна, и мы́шцы, и лы́ста, и пе́рсты, и коне́чное главу́ твою́, возлетѣ́лъ еси́ на небеса́, сца́рствуя Царю́ всѣ́хъ. Тѣ́мже страда́льцемъ держа́внѣйше не оскудѣва́й моля́ся спасти́ся душа́мъ на́шимъ отъ вся́каго вре́да чужда́го.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ Нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́. Что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. [Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся.] Апо́столъ ко Ефесе́емъ, зача́ло 233. Аллилу́ія, [гла́съ 4: Воззва́ша пра́ведніи, и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ:] Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Іоа́нна, зачало 50. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 271 об. – 272 об., 276 – 279 об.

/ Къ оглавленію раздѣла /


Наверхъ / Къ титульной страницѣ

0