Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 22 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣ́сяца Ное́мврія въ 27-й де́нь.]
Слу́жба Пресвятѣ́й Богоро́дицѣ пре́дъ чудотво́рною ико́ною Ея́, я́же нарица́ется Ку́рская-Коренна́я.

НА ВЕЛИЦѢЙ ВЕЧЕРНИ,
По предначина́тельнѣмъ псалмѣ́, стихосло́вимъ: Блаже́нъ му́жъ, [1-й антифо́нъ]. На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!

Госпоже́ Богоро́дице,* упова́ніе непосты́дное,* ны́нѣ сердца́ съ колѣ́ны преклоня́юще,* уми́льно къ Тебѣ́ взыва́емъ:* страну́ на́шу Россíйскую,* я́же дре́вле До́мъ Тво́й нарица́шеся,* изъ руки́ діа́воли исхити́,* богоно́снѣи ру́цѣ Твои́ къ Сы́ну простира́ющи,* и моли́твою Твое́ю всю́ си́лу вра́жію попаля́ющи,* и зна́меніе ми́лости Твоея́ на́мъ явля́ющи.

О, всѣ́хъ ра́достей Ра́досте,* скорбя́щихъ пресла́дкое Утѣше́ніе,* грѣ́шныхъ Спору́чнице,* вѣ́рныхъ Спасе́ніе,* приведи́ на́съ въ небе́сное Ца́рствіе,* предста́тельствомъ Твои́мъ не́мощь на́шу восполня́ющи,* и на стра́шнѣмъ суди́щи Христо́вѣ предста́ни на́мъ,* му́ки вѣ́чныя на́съ избавля́ющи,* и зна́меніе ми́лости Твоея́ на́мъ явля́ющи.

О, слы́шанія чу́днаго,* о видѣ́нія пресла́внаго,* ико́на Богома́тере,* въ дубра́вѣ сокрове́нная,* исто́чникъ же воды́ живы́я приснотеку́щій* въ живо́тъ вѣ́чный источа́ющая,* тѣ́мже обрѣ́тше ю́ ликовству́емъ,* и рука́ми пле́щуще въ весе́ліи зове́мъ:* ра́дуйся, Всеблага́я,* я́ко къ на́мъ убо́гимъ пришла́ еси́.

Дре́вомъ Кре́стнымъ освяще́нная,* древеса́ дубра́вная Ма́тери пренепоро́чнѣй* на дре́вѣ ру́цѣ за на́съ Распросте́ршаго* служе́ніе прино́сятъ:* храня́тъ бо пречи́стаго Ея́ ли́ка о́бразъ,* я́ко да то́й обрѣ́тше чу́дно,* Це́рковь во благолѣ́піе свое́ облече́тся,* и вѣ́рніи благода́ти Боже́ственныя* прича́стницы бу́дутъ.

Ины стихи́ры, гла́съ 3:

Вси́ ро́ди земнíи,* ублажи́те Марíю Богоро́дицу,* пра́ведницы и грѣ́шницы* еди́ный ли́къ То́й соста́вите,* дѣ́вы воспо́йте Приснодѣ́ву и дѣ́вства Похвалу́,* ма́тери похвали́те Ма́терь Творца́ и Бо́га,* ста́рцы поклони́теся Ве́тхаго Де́ньми Воплоти́вшей,* младе́нцы просла́вите Предвѣ́чнаго Младе́нца* на руку́ Свое́ю Держа́щую,* убо́зіи возвели́чите* бога́тство ми́лости и благода́ти Иму́щую,* ца́ріе превознеси́те Цари́цу небесе́ и земли́,* мы́ же, Тоя́ честны́й о́бразъ лобыза́юще, возопіи́мъ:* ра́дуйся, Ра́досте неизглаго́ланная* и Спасе́ніе ду́шъ на́шихъ.

Зна́меніе Твоего́ къ на́мъ, Влады́чице, благоволе́нія* ико́на Твоя́ всечестна́я яви́ся,* къ не́йже притека́юще,* я́ко къ исто́чнику живоно́сному,* во́ду безсме́ртія почерпа́емъ,* и врачева́нія разли́чная ту́не пріе́млемъ,* и поклоня́ющеся вѣ́рно,* Тебѣ́, Первообра́знѣй, вопіе́мъ:* Пресвята́я Богоро́дице, спаси́ на́съ.

О, Дѣ́во Пречи́стая,* свѣ́те ду́шъ на́шихъ,* ра́досте и покро́ве,* скорбе́й отчужде́ніе и грѣхо́въ проще́ніе,* проше́ній смире́нныхъ исполне́ніе* и благода́ти исто́чникъ неизсяка́емый,* Ты́ еси́ Пренепоро́чная,* сего́ ра́ди къ Тебѣ́ припа́дающе мо́лимся:* къ Сы́ну Твоему́ и Бо́гу о на́съ не премолчи́ вопи́ти,* да Тобо́ю отъ бѣ́дъ изба́вльшеся,* обрѣте́мъ у Христа́ Го́спода, ве́лію ми́лость.

Сла́ва, и ны́нѣ, гла́съ 1:

Дне́сь, всепра́зднственный ли́къ составля́юще, пріиди́те воспои́мъ Дѣ́ву Богоро́дицу, и Тоя́ пречи́стый о́бразъ со умиле́ніемъ лобыза́юще, возопіи́мъ: о, Пресвята́я Влады́чице, достоя́ніе Твое́ отъ вра́гъ лю́тыхъ изба́ви, вѣ́рныя же къ соверше́нію благи́хъ укрѣпи́, Сы́на Твоего́ и Бо́га о всѣ́хъ умоля́ющи.

Проки́менъ дне́. И чте́нія три́, Богоро́дичны.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 4:

Пріиди́те вся́ оте́чествія язы́къ, въ хра́мъ Госпо́день стеце́мся, воспои́мъ Препѣ́тую Ма́терь Бо́га на́шего, и пречи́стому Ея́ о́бразу вѣ́рно поклони́мся, то́й бо я́ко зало́гъ спасе́нія ны́нѣ земли́ Россíйстѣй дарова́, тѣ́мже того́ пра́здникъ свѣ́тло соверша́юще, Богоро́дицѣ немо́лчно зове́мъ: ра́дуйся, гото́вая мíру по́моще, ра́дованіе и спасе́ніе ду́шъ на́шихъ.

Вся́ жите́йская попече́нія отлага́юще, и суеты́ мірскíя отвраща́ющеся, возведе́мъ о́чи мы́сленныя горѣ́, отню́дуже по́мощь пріи́детъ, се́ бо небе́сная Цари́ца, одесну́ю Сы́на Своего́ и Бо́га предстоя́щи, о на́съ непреста́нно мо́лится, тѣ́мже Тоя́ предста́тельствомъ отъ бѣ́дъ избавля́еми возвесели́мся, глаго́люще: ра́дуйся, те́плая на́ша Засту́пнице и спасе́ніе ду́шъ на́шихъ.

Гла́съ 2:

Ве́лія ра́дости дне́сь исполня́емся вси́ и со стра́хомъ и тре́петомъ уми́льно благодаря́ще взыва́емъ: отку́ду на́мъ сіе́, я́ко пріи́де къ на́мъ Ма́терь Бо́га на́шего? Се́ бо ико́на Ея́ цѣльбоно́сная посредѣ́ на́съ пребыва́етъ и то́й прикаса́тися дерза́емъ, и поклоня́тися, и ту́ю лобыза́ти, и моле́нія Первообра́знѣй, я́ко вои́стинну съ на́ми су́щей, приноси́ти, тѣ́мже Тоя́ снисхожде́нію чудя́щеся, вопіе́мъ: ра́дуйся, Благослове́нная Богоро́дице Дѣ́во.

Гла́съ 7:

Пріиди́те вси́ тружда́ющіися и обремене́нніи, пріиди́те пла́чущіи и скорбя́щіи, пріиди́те въ терпѣ́ніи оскудѣ́вшіи, пріиди́те убо́зіи и неду́жніи, предъ ико́ною Пречи́стыя Дѣ́вы припади́те, и кíйждо по потре́бѣ свое́й пріими́те, се́ бо Всепѣ́тая Богоро́дица всѣ́мъ вся́ подае́тъ незави́стно: больны́хъ е́сть исцѣле́ніе, въ печа́ли су́щихъ пресла́дкое утѣше́ніе, грѣ́шныхъ проще́ніе и спасе́ніе всѣ́хъ съ вѣ́рою къ Не́й прибѣга́ющихъ.

Сла́ва, и ны́нѣ, гла́съ 6:

Егда́ пріи́детъ време́нъ исполне́ніе, труба́ же арха́нгелова воструби́тъ, престо́ли суди́щныя поста́вятся, и рѣка́ о́гненная возшуми́тъ, ме́ртвіи возста́нутъ и живíи восхище́ни бу́дутъ, и яви́тся зна́меніе Сы́на Человѣ́ческаго на небеси́, вси́ земноро́дніи воспла́чутся, и вся́ си́лы небе́сныя поколе́блются, тогда́ Дѣ́ва Богоро́дица, грѣ́шныхъ спасе́ніе и ненеде́жныхъ наде́жда, одесну́ю Судіи́ предстоя́щи яви́тся, пречи́стѣи Свои́ ру́цѣ къ Сы́ну простира́ющи, и слеза́ми лани́ты Своя́ ми́лостивно ороша́ющи, и вѣ́чнаго муче́нія избавля́ющи, и́мя Ея́ препѣ́тое призыва́ющихъ. Тѣ́мже у́бо, бра́тіе, ны́нѣ потщи́мся, и къ Богоро́дицѣ прибѣга́ти не облѣни́мся, да и на́съ заступи́тъ въ о́ный стра́шный ча́съ, все́ упова́ніе на Ню́ возлага́ющихъ.

На стихо́внѣ стихи́ры, гла́съ 1:

Вои́стинну, Богоро́дице,* рѣ́ки благода́ти отъ ико́ны Твоея́ источа́еши,* се́ бо на мѣ́стѣ, идѣ́же обрѣ́теся,* цѣльбоно́сный исто́чникъ яви́ся,* всѣ́мъ же любо́вію къ не́й притека́ющимъ* жа́жду духо́вную утоля́еши,* и грѣхи́ омыва́еши,* ра́дость же и весе́ліе черпа́ти подае́ши.

Сти́хъ: Слы́ши Дщи́, и ви́ждь* и приклони́ у́хо Твое́.

При ко́рени древе́снѣмъ* о́бразъ Дре́во Жи́зни Израсти́вшія обрѣ́теся,* тѣ́мже и на мѣ́стѣ, идѣ́же яви́ся,* я́ко са́дъ духо́вный, оби́тель насади́ся,* въ не́йже препѣ́тое и́мя Первообра́зныя сла́вится,* и моле́нія за мíръ ве́сь непреста́нно возно́сятся,* человѣ́цы же спасе́ніе со стра́хомъ содѣва́ютъ.

Сти́хъ: Кля́тся Госпо́дь Дави́ду и́стиною* и не раска́ется.

Небе́сныя во́и иму́ще помо́щники,* Воево́ду же Непобѣди́мую,* Дѣ́ву Богоро́дицу,* Честны́мъ Кресто́мъ вооружи́вшеся,* на враги́ спасе́нія на́шего ополчи́мся,* вопію́ще Преблагослове́ннѣй:* держа́вныя Твоея́ по́мощи не отыми́ отъ на́съ,* на Тя́ бо упова́ніе возложи́хомъ,* да не постыди́мся во вѣ́ки.

Сла́ва, и ны́нѣ, гла́съ 5:

Ру́цѣ Твои́ пречи́стіи, Дѣ́во Богоро́дице, о на́съ при́сно къ Бо́гу воздвиза́еміи, ко́ль кра́ты сильнѣ́йшіи су́ть ру́къ Моисе́овыхъ, тѣ́мже и сильнѣ́йшаго па́че Амали́ка врага́ побѣжда́еши, самаго́ кня́зя тмы́ съ по́лчищи его́ поража́ющи и побѣ́ды благоче́стно на стра́сти вою́ющимъ подаю́щи и обѣтова́нныя но́выя земли́, на не́йже обита́етъ пра́вда, наслѣ́дники тѣ́хъ показу́ющи.

Тропа́рь, гла́съ 4:

Яко необори́мую стѣ́ну и исто́чникъ чуде́съ, стяжа́вше Тя́ раби́ Твои́, Богоро́дице Пречи́стая, сопроти́вныхъ ополче́нія низлага́емъ, тѣ́мже мо́лимъ Тя́: ми́ръ оте́честву на́шему да́руй и душа́мъ на́шимъ ве́лію ми́лость. [Три́жды.]


НА УТРЕНИ,
[На Бо́гъ Господь: Тропа́рь Богоро́дицы, три́жды.]

По 1-мъ стихосло́віи, сѣда́ленъ, гла́съ 5:

Твои́ есмы́ раби́, Богоро́дице, ра́бство грѣху́ всеконе́чно оста́вивше и вы́и на́ша подъ благíй яре́мъ Христо́въ преклони́вше, тѣ́мже и свобо́ду ча́дъ Бо́жіихъ улучи́ти упова́ніемъ Твои́мъ о на́съ те́плымъ предста́тельствомъ, я́ко да о Тебѣ́ непреста́нно веселя́щеся, Сы́ну Твоему́ и Бо́гу на́шему зове́мъ: Спа́се на́шъ, сла́ва Тебѣ́.

Сла́ва, и ны́нѣ, гла́съ то́йже.

Ра́дуйся, вои́стинну въ со́лнце облече́нная и сла́вою неизрече́нно сія́ющая; ра́дуйся, Ма́ти Вседержи́теля, Сло́во Предвѣ́чное мíрови яви́вшая и главу́ змíеву пресла́вно попра́вшая, ада́мскій же ро́дъ Рождество́мъ Твои́мъ отъ тли́ свободи́вшая; ра́дуйся, и по рождествѣ́ еди́на Приснодѣ́ва.

По 2-мъ стихосло́віи, сѣда́ленъ, гла́съ 4:

Дне́сь вѣ́рніи согла́сно воспои́мъ всѣ́мъ тре́бующимъ да́ры ми́лости Своея́ бога́тно даю́щую и вся́ прибѣга́ющія къ Не́й въ держа́вный Сво́й покро́въ пріе́млющую, злы́я же и благíя любо́вію Ма́тернею объе́млющую; тѣ́мже мона́си и мірстíи, бога́тіи и ни́щіи еди́ный ли́къ соста́вивше, пріиди́те, да торжеству́етъ вку́пѣ Це́рковь земна́я и небе́сная, еди́ными усты́ Богоро́дицу воспѣва́юще и зову́ще: ра́дуйся, Благода́тная, Госпо́дь съ Тобо́ю.

Сла́ва, и ны́нѣ, то́йже.

По поліеле́и, припѣ́въ:

Досто́йно е́сть велича́ти Тя́, Богоро́дице, Честнѣ́йшую херуви́мъ и Сла́внѣйшую безъ сравне́нія серафи́мъ.

Псало́мъ избра́нный: Бо́же, су́дъ Тво́й Царе́ви да́ждь, и пра́вду Твою́ Сы́ну Царе́ву...

Та́же, сѣда́ленъ, гла́съ 8:

Наста́ дне́сь пра́здникъ пресвѣ́тлый Богома́тере, въ о́ньже Заря́ духо́вная мíру возсія́ въ честнѣ́мъ Ея́ рождествѣ́, въ о́ньже и земли́ на́шей сокро́вище вели́кое явле́ніемъ пресла́вныя Богоро́дичныя ико́ны дарова́ся, Ей же со стра́хомъ ны́нѣ поклоня́ющеся, зове́мъ: ра́дуйся, Дѣ́во, вѣ́рныхъ спасе́ніе.

Сла́ва, и ны́нѣ, то́йже.

Та́же степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши Дщи́ и ви́ждь, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 2:

Ны́нѣ возвесели́ся оби́тель Ку́рская, красу́йся и ликовству́й страна́ Россíйская, се́ бо Сама́ небе́сная Цари́ца благода́тію Свое́ю и ли́комъ Пречи́стымъ посредѣ́ тебе́ пребыва́етъ, и на вѣ́рныя ми́лости Своя́ неоску́дно излива́етъ, тѣ́мже и слы́шитъ отъ всѣ́хъ непреста́нно: ра́дуйся, чу́до чуде́съ, Богоро́дице Марíе.

Кано́нъ [похвалы́] Богоро́дицы со ирмосо́мъ на 6 и пра́здника на 8.

Кано́нъ [пра́здника] Богоро́дицы, гла́съ 4, его́же краегране́сіе: Хвалу́ Ти приноси́ти дерза́ю, Богоро́дице.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ху́дость мою́ не пре́зри, Богоро́дице, и не́мощь мою́ воспо́лни, се́рдце же и у́мъ освяти́ и уста́ моя́ отве́рзи, пѣ́сни Ти́ приноси́ти дерза́ющу.

Вѣ́рою серде́чною пречи́стый Тво́й о́бразъ почита́емъ, и тому́ со умиле́ніемъ покланя́емся, я́ко и́стинную Самую Тя́, зря́ще Богоро́дице, ка́пли же сле́зныя точа́ще, взыва́емъ: ра́дуйся, Благода́тная Марíе, Ма́ти Бо́жія благослове́нная.

Ангельскія си́лы подража́юще, обстои́мъ Тво́й о́бразъ стра́хомъ и любо́вію, Тебе́, Первообра́зную, согла́сно велича́юще, и и́мя Твое́ пресла́дкое призыва́юще: ра́дуйся, Всенепоро́чная Богоневѣ́сто.

Любо́вію, вѣ́рніи пріиди́те, святу́ю ико́ну Богома́тере облобыза́имъ, то́читъ бо отъ тоя́ исцѣле́нія неоску́дно, и неисче́тная соверша́етъ чудеса́ вѣ́рою и наде́ждою къ не́й притека́ющимъ, тѣ́мже зове́мъ Приснодѣ́вѣ: ра́дуйся, Упова́ніе нело́жное христіа́номъ.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Умныя о́чи во глубину́ вѣко́въ устремля́юще, зри́мъ у́бо и та́мо ико́ну Твою́, Пречи́стая, луча́ми ми́лости па́че со́лнца сѣя́ющу, и зе́млю Россíйскую — До́мъ Тво́й, Богоро́дице, озаря́ющу, тѣ́мже зове́мъ Ти́: ра́дуйся, Покро́ве на́шъ и Заступле́ніе.

Те́мная дубра́ва Ку́рская въ нѣ́драхъ свои́хъ храня́ще свѣ́тлое чу́до — пречи́стую ико́ну Богома́тере, нечести́выми у́бо разсѣче́нную, си́лою же Бо́жіею пресла́вно сраще́нную, тѣ́мже и обрѣ́тше ю́, я́ко сокро́вище вели́кое, лю́діе Россíйстіи взыва́ху: отку́ду на́мъ сіе́, я́ко пріи́де къ на́мъ Преблагослове́нная Ма́ти Бо́жія.

Исто́чникъ воды́ живы́я истече́ на мѣ́стѣ, идѣ́же пребыва́ше о́бразъ Богоро́дицы, цѣльбоно́сными струя́ми вѣ́рныя напоя́я, и вся́кую я́зю и неду́гъ врачу́я, тѣ́мже возопіи́мъ Благода́тнѣй: ра́дуйся, и́стинный Живоно́сный Исто́чниче.

При ко́рени дре́ва ико́на обрѣ́теся, дре́во Жи́зни неизрече́нно прозя́бшія и мíрови благослове́нный Пло́дъ израсти́вшая, тѣ́мже ны́нѣ тоя́ явле́нія пра́здникъ соверша́юще, вопіе́мъ Пречи́стѣй: о, Всеблага́я Влады́чице, злы́я на́ша стра́сти изъ ко́рене посѣцы́, до́брыя обы́чаи въ на́съ вкореня́ющи, и добродѣ́телей са́дъ насажда́ющи, и прича́стники ра́йскія жи́зни бы́ти на́съ сподобля́ющи.

По 3-й пѣ́сни, сѣда́ленъ, гла́съ 7:

Кíй у́бо пра́здникъ свѣтлѣ́йшій и краснѣ́йшій, па́че пра́здника Пречи́стыя Богома́тере? ко́е же у́бо и́мя по и́мени Сладча́йшаго Іису́са сладча́йшее, па́че и́мене Богоро́дицы Марíи? Се́ бо чистото́ю и сла́вою вся́ ли́цы а́нгельскія превозше́дши, я́ко Ма́ти сѣя́ющи Вседержи́теля, ве́сь мíръ любо́вію Ма́тернею объе́млетъ, грѣ́шники спаса́етъ и пра́ведныя въ небе́сныя оби́тели вво́дитъ, враги́ низлага́етъ и главу́ змíеву пресла́вно попира́етъ, тѣ́мже зове́мъ Ей: о Тебѣ́ ра́дуется, Благода́тная, вся́кая тва́рь, сла́ва Тебѣ́.

[Сла́ва, и ны́нѣ, то́йже.]

Пѣ́снь 4.

Ирмо́съ: Сѣдя́й въ сла́вѣ на престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Россíйская Це́рковь дне́сь торжеству́етъ, сла́вою новоявле́нныя, Богоро́дичныя ико́ны, боголѣ́пно украша́яся, пѣ́сни же богокра́сныя воспѣва́ющи, вѣ́рныя вся́ призыва́етъ, глаго́ля: пріиди́те, возра́дуемся Ма́тери Бо́га на́шего, и честно́му Ея́ о́бразу поклони́мся, отъ него́же Пречи́стая Дѣ́ва благода́тныя да́ры бога́тно подае́тъ христоимени́тымъ лю́демъ, взыва́юще: сла́ва си́лѣ Твое́й, Го́споди.

Избра́нниче Ма́тере Бо́жія, преподо́бне о́тче Серафи́ме, моли́твенниче неусыпа́ющій за зе́млю Ру́сскую, зри́ши на́ше усе́рдіе те́плое, слы́шиши моле́нія предъ ико́ною Пречи́стыя на́ми возноси́мыя, отъ нея́же и тебѣ́ иногда́, о́троку лю́тѣ стра́ждущу, исцѣле́ніе подаде́ся, тѣ́мже у́бо ста́ни съ на́ми, воздѣ́я преподо́бнѣи твои́ ру́цѣ, и возопíй о на́съ къ Богоро́дицѣ, я́ко да тебе́ ра́ди моли́твы на́ша прія́ти благоволи́тъ.

Нечести́выхъ безбо́жникъ безу́мный совѣ́тъ, ико́ну Твою́, Влады́чице, разори́ти си́лою Твое́ю боже́ственною посрами́ла еси́, и соблюла́ еси́ сію́ отъ вся́каго дѣ́йства сокруши́тельна невреди́му, земли́ у́бо сотря́сшейся и столпо́мъ разруша́емымъ, ико́на Твоя́ то́кмо лице́ свое́ отъ скве́рныхъ дѣ́лъ человѣ́ческихъ отвраща́ющи обрати́, тѣ́мже, пресла́вному чу́ду дивя́щеся, мо́лимъ Ти́ ся прилѣ́жно, лиц́а Твоего́ пречи́стаго не отврати́ отъ на́съ, се́ бо се́рдцемъ сокруше́ннымъ къ Тебѣ́ прибѣга́емъ, и пла́чемъ, и уми́льно вопіе́мъ: да не одолѣ́етъ на́ша зло́ба Твоему́ милосе́рдію, но поми́луй и спаси́ ны.

Отъ руки́ злодѣ́й и лю́тыхъ безбо́жникъ, вся́ святы́ни Бо́жія попра́вшихъ, ико́ну Твою́ честну́ю соблюла́ еси́ невреди́му, и сію́ лю́демъ Твои́мъ дарова́ла еси́, Богоро́дице, ю́же и храни́мъ, я́ко зѣ́ницу о́ка, тѣ́мже, Влады́чице, то́ю на́мъ зна́менія ми́лости Твоея́ при́сно явля́й.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Свѣтоно́сный де́нь дне́шній свѣ́тло да пра́зднуемъ, въ о́ньже заря́ духо́вная во спасе́ніе мíру возсія́ Рождество́мъ Пречи́стыя Богоневѣ́сты, въ о́ньже и странѣ́ Россíйстѣй, во тмѣ́ бѣ́дъ и скорбе́й пребыва́ющей, я́ко звѣзда́ у́тренняя ико́на Богоро́дицы яви́ся, избавле́нія де́нь возвѣща́ющи, тѣ́мже зове́мъ Преблагослове́ннѣй: ра́дуйся, я́ко свѣти́льникъ неме́ркнущій упова́нія на́мъ возжгла́ еси́.

Идѣ́же грѣ́хъ пріумножа́ется, та́мо благода́ть Бо́жія преизбы́точествуетъ, тѣ́мже, Влады́чице, при́зри на не́мощь на́шу, ви́ждь уничиже́ніе безмѣ́рное, но и вѣ́ру ви́ждь и во́пль услы́ши, и на по́мощь на́мъ безпомо́щнымъ ускори́, ми́лостію Твое́ю на́съ облиста́ющи.

Те́мныхъ си́лъ а́довыхъ не убои́мся, па́че же во ору́жія свѣ́та обо́лкшеся, тѣ́мъ противоста́немъ мужему́дренно, Воево́ду иму́ще Непобѣди́мую — Всепѣ́тую Богоро́дицу: се́ бо враги́ держа́вно побора́етъ и вѣ́рныя заступа́етъ, и́мя Ея́ пречи́стое призыва́ющія.

Истинную Богоро́дицу Тя́ исповѣ́дуемъ и зра́къ лица́ Твоего́ пречи́стаго правосла́вно почита́емъ, грѣха́ же и скве́рны вся́кія отвраща́емся, и блага́я соверша́ти мо́лимся пода́ти, и ду́ши на́ша смиря́юще, вопіе́мъ: Пресвята́я Богоро́дице, спаси́ на́съ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Да бѣжи́тъ отъ на́съ, бра́тіе, уны́ніе, ту́чи по́мысловъ Ду́хомъ Бо́жіимъ да развѣва́ются, се́ бо Сама́ Богома́терь посредѣ́ на́съ пребыва́етъ я́вственно, во ико́нѣ Свое́й чудотво́рнѣй поклоня́ема, и чудесы́ отъ тоя́ исходя́щими па́че со́лнца сія́ющи, тѣ́мже изъ глубины́ се́рдца возопіи́мъ: Пресвята́я Влады́чице, благода́тію Твое́ю неотсту́пно съ на́ми пребу́ди.

Егда́ наити́ на на́съ искуше́нію, егда́ впа́сти на́мъ въ ско́рби и болѣ́зни, егда́ терпѣ́нію въ на́съ оскудѣва́ти и ду́ху на́шему смуща́тися, притеце́мъ къ о́бразу Пречи́стыя Дѣ́вы и сле́зы точа́ще, То́й отъ се́рдца возопіи́мъ: богно́снѣи ру́цѣ Твои́ на́мъ простира́ющи, изъ глубины́ зо́лъ возведи́ ны́.

Ра́дость у́бо еси́ всѣ́хъ ра́достей, вѣ́чную Ра́дость мíрови ро́ждшая, и грѣхо́вную печа́ль разори́вшая, и отра́ду Боже́ственную душа́мъ смяте́ннымъ подаю́щая, въ моли́твахъ за мíръ христіа́нскій не усыпа́й, Богоро́дице, Тобо́ю бо по Бо́зѣ вся́къ спаса́ется и изъ бе́здны паде́ній возво́дится.

Зло́бніи де́монстіи полцы́, на христіа́нъ вою́ющіи, се́ стоя́тъ зря́ще издале́ча, не дерза́юще приступи́ти, трепе́щуще сла́вы Богоро́дичныя ико́ны, я́же нечести́выя и бѣ́сы попаля́етъ, вѣ́рныя же держа́вно заступа́етъ, отъ всѣ́хъ вра́гъ покрыва́ющи.

Конда́къ, гла́съ 4:

Пріиди́те, вѣ́рніи, свѣ́тло да пра́зднуемъ всечестна́го о́браза Богома́тере чу́дное явле́ніе и, отъ того́ благода́ть почерпа́юще, Первообра́знѣй уми́льно возопіи́мъ: ра́дуйся, Марíе Богоро́дице, Ма́ти Бо́жія, Благослове́нная.

Икосъ:

Тобо́ю, Богоро́дице, Сло́во предвѣ́чное пло́ть бы́сть, Тобо́ю узрѣ́ша человѣ́цы Со́лнце пра́вды, на Него́же а́нгели не смѣ́ютъ взира́ти; на Твои́хъ бо объя́тіяхъ херуви́мы Носи́мый ноша́шеся, и Твои́ма рука́ма пречи́стыма держи́мь бѣ́ Вседержи́тель и Творе́цъ вся́ческихъ; Ада́ма сме́ртнаго дщи́, Бо́гу нарекла́ся еси́ Роди́тельница, тѣ́мже, я́ко еди́на къ Тому́ Ма́тернее дерзнове́ніе уму́щи, въ моли́твахъ за мíръ ве́сь не усыпа́еши, богопрія́тнѣи Твои́ ру́цѣ къ Сы́ну воздѣва́ющи и Того́ человѣколю́біе къ рабо́мъ Твои́мъ преклоня́ющи, и́же Ти́ благода́рными усты́ непреста́нно зову́тъ: ра́дуйся, Марíе Богоро́дице, Ма́ти Бо́жія, Благослове́нная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ангели въ служе́ніи Тебѣ́ благоговѣ́инствуютъ, серафи́ми стра́хомъ Тебе́ сла́вятъ, Богоро́дице, ка́ко у́бо мы́, земноро́дніи, нечи́стыми усты́ воспѣ́ти Тя́ дерза́емъ? Оба́че на ми́лость Твою́ упова́емъ, и о Тебѣ́ непреста́нно Влады́цѣ и Творцу́ вся́ческихъ вопіе́мъ: Благослове́нъ еси́, Бо́же оте́цъ на́шихъ.

Юже да́лъ еси́ на́мъ заступле́ніе, Ма́терь Твою́ Пречи́стую, Христе́, пріими́ ны́нѣ за ны́ те́плѣ Моля́щуюся, да Тоя́ хода́тайствы въ живо́тъ присносу́щный дости́гше, со всѣ́ми, и́же спасе́ніе улучи́ша, возопіи́мъ: благослове́нъ еси́, Бо́же оте́цъ на́шихъ.

Благослове́нную нарекíй Твою́ Ма́терь, Тоя́ мольба́ми, умоле́нъ бу́ди, Го́споди, и да зна́менуется на на́съ свѣ́тъ лица́ Твоего́, да отъ сна́ грѣхо́внаго, воспряну́вше, я́ко во дни́ благоче́стно ходи́ти на́чнемъ, въ сердца́хъ на́шихъ непреста́нно зову́ще: благослове́нъ еси́, Бо́же оте́цъ на́шихъ.

Отроко́мъ вавило́нскимъ подо́бящеся, о́бразу злато́му мамо́ны и человѣкоуго́дія не поклони́мся, о́бразъ же Непоро́чныя Ма́тере Бо́га на́шего почти́мъ, премíрныя ра́дости исполня́ющеся, и Благодѣ́телю всѣ́хъ Христу́ возопіи́мъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Гла́сы немо́лчными серафи́ми Тя́ пою́тъ, Приснодѣ́во, святы́хъ ли́цы сы́тости похва́лъ Твои́хъ не вѣ́дятъ, вся́ тва́рь славосло́витъ непреста́нно, мы́ ли у́бо еди́ны то́кмо въ молча́ніи пребу́демъ? Оба́че на милосе́рдіе Твое́ дерза́юще, а́ще и недосто́йни су́ще, Тя́ превозно́симъ во вѣ́ки.

О Тебѣ́ хвали́тися, Богоро́дице, сотворе́нная вся́ николи́же преста́нутъ, се́ бо, по глаго́лу апо́столову, язы́цы умо́лкнутъ и зна́ніе упраздни́тся, любы́ же непреста́нно пребу́детъ, тѣ́мже и славословле́нія, я́же отъ любве́ Тебѣ́ приноси́мая, воспѣва́тися и́мутъ во вѣ́ки.

Рцы́ у́бо на́мъ, Пречи́стая, ку́ю Ти́ похвалу́ досто́йную на́ше принесе́тъ неможе́ніе? Ко́има ли очи́ма взира́ти на честны́й Тво́й о́бразъ дерзне́мъ? Но оба́че, Блага́я су́щи, и ны́нѣ пѣ́ній на́шихъ не возгнуша́йся, и въ земли́ земна́го прише́льствія зра́къ лица́ Твоего́ пресвѣ́тлаго яви́ на́мъ, я́ко да Тя́ славосло́вимъ во вѣ́ки.

Обстоя́ще о́бразъ Тво́й приснопоклоня́емый, Влады́чице, стра́хомъ и любо́вію, жите́йская попече́нія вся́ отло́жше, о́чи же мы́сленныя на небеса́ возводя́ще, ра́йскую сла́дость предвкуша́емъ, ея́же наслади́тися на́съ сподо́би, да спасе́ніе и живо́тъ безконе́чный улучи́вше, въ ра́дости Тя́ воспѣва́емъ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Дѣ́во Всепѣ́тая, пѣ́нія на́ша пріими́, я́коже Сы́нъ Тво́й вдови́чу ле́пту, и пода́ждь на́мъ всегда́ Тебѣ́ сія́ приноси́ти, живо́тъ на́шъ въ ми́рѣ управля́ющи и грѣхо́мъ проще́ніе да́рующи, я́ко да въ небе́сныя оби́тели Тобо́ю вше́дше, милосе́рдіе Твое́ велича́емъ.

Иже Тя́, Богоро́дице, не исповѣ́дуютъ и ико́ны Твоея́ не почита́ютъ, да посра́мятся всеконе́чно, вѣ́рніи же о Тебѣ́ да возвеселя́тся, да бу́детъ и страна́ Россíйская, я́ко же дре́вле, До́мъ Тво́й, да умно́жатся святы́я оби́тели, и хра́мы да благоукра́сятся, лю́діе же да освятя́тся и да торжуству́ютъ съ весе́ліемъ, Тя́ велича́юще.

Цари́це Богоро́дице, одесну́ю Христа́ Бо́га въ небе́снѣмъ Ца́рствіи предстоя́щи, ца́рства христоимени́тая на земли́ утверди́, нечести́выхъ совѣ́ты разоря́ющи и вѣ́ру со благоче́стіемъ укрѣпля́ющи, да вси́ земноро́дніи Тя́ единомы́сленно велича́ютъ.

Еда́ Ти́ хвалу́, Влады́чице, досто́йную принесо́хомъ? Еда́ о́бразъ Тво́й честны́й по до́лгу просла́вихомъ? Вѣ́мы бо, я́ко пѣ́сни, а́ще и тмочи́сленныя, къ прославле́нію Твоему́, Дѣ́во, не су́ть дово́льны; а́ще бо на́мъ усе́рдія серде́чнаго послу́шати, пѣ́ніямъ на́шимъ то́кмо начина́тися подоба́ше, что́ у́бо сотвори́мъ, недоумѣва́емъ и ужаса́емся, зна́менія ми́лости Твоея́ сла́вимъ, оба́че и усто́мъ умо́лкшимъ, любо́вію серде́чною при́сно Тя́ пое́мъ и велича́емъ.

Свѣти́ленъ, гла́съ 3:

Со́лнца свѣтлѣ́йшая Дѣ́во Богоро́дице, вѣ́ры Христо́вы свѣти́льникъ неме́ркнущій во странѣ́ на́шей благода́тію Твое́ю возжги́, да тѣ́мъ невѣ́рія тма́ просвѣти́тся, сердца́ же вѣ́рныхъ о то́мъ да возра́дуются, благодаре́ніе принося́ще Христу́ Человѣколю́бцу, подаю́ще всѣ́мъ ве́лію ми́лость.

Сла́ва, и ны́нѣ, гла́съ то́йже:

Ри́зы креще́нія грѣхми́ совлеко́хся, ка́ко вни́ду на ве́черю Госпо́дню, не имы́й одѣя́нія бра́чна? Аще не Ты́, Богоро́дице, ри́зою Твое́ю мя́ покры́еши и сло́во о мнѣ́ окая́ннѣмъ къ Царю́ сла́вы рече́ши. Тѣ́мже на Тя́ еди́ну надѣ́яся, ру́цѣ моя́ къ Тебѣ́ простира́ю, услы́ши, покры́й и заступи́ мя.

На хвали́техъ стихи́ры на 4, гла́съ 8:

Сердца́ съ колѣ́ны преклоня́юще,* о́чи же мы́сленныя горѣ́ возводя́ще,* припаде́мъ предъ ли́комъ Пречи́стыя Богоро́дицы,* не́мощь на́шу исповѣ́дающе,* Тоя́ же всеси́льныя по́мощи прося́ще* и живо́тъ сво́й те́плому Ея́ предста́тельству вруча́юще,* вѣ́руемъ бо я́ко моле́ніе на́ше не пре́зритъ,* вся́ку слезу́ отъ лица́ земли́ утоли́вшая. [Два́жды.]

Кíя Ти́ пѣ́сни воспое́мъ, Богоро́дице?* Кíя Ти́ да́ры принесе́мъ?* Нищету́ на́шу духо́вную зри́ши.* Оба́че, я́ко би́серъ многоцѣ́ненъ,* сле́зныя на́ша ка́пли пріими́,* я́ко же ѳиміа́мъ —* моли́тву и воздыха́ніе серде́чное,* та́же и печа́ль на́шу на ра́дость преложи́;* Ты́ бо еси́ вѣ́рныхъ пресла́дкое утѣше́ніе.

Вся́ Ти́ возмо́жна су́ть, Влады́чице,* егда́ бо къ Сы́ну Твоему́ и Бо́гу мо́лишися,* проти́ву Ма́терняго дерзнове́нія Твоего́* никто́же постоя́ти мо́жетъ;* нѣ́сть бо грѣ́хъ побѣжда́яй Твое́ милосе́рдіе,* тѣ́мже въ держа́вный Тво́й покро́въ прибѣга́емъ,* на Твое́ всеси́льное хода́тайство упова́юще,* и Тебѣ́ по Бо́зѣ са́ми себе́ и дру́гъ дру́га,* и ве́сь живо́тъ на́шъ предае́мъ.

Сла́ва, и ны́нѣ, гла́съ 1:

За мíръ ве́сь те́плѣ помоли́ся, Богоро́дице, по́мощи бо Твоея́ тре́буемъ, сѣтя́мъ лука́ваго по всему́ лицу́ земли́ распросте́ртымъ, язы́комъ же шата́ющимся и бу́рямъ напа́стей на Це́рковь Бо́жію воздвиза́емымъ, тѣ́мже, я́ко въ Ка́нѣ Галиле́йстѣй иногда́, рцы́ сло́во къ Сы́ну Твоему́ и Бо́гу, да во́ду искуше́ній же и скорбе́й въ вино́ умиле́нія и весе́лія Боже́ственнаго претвори́тъ.

[Славосло́віе вели́кое. Ектеніи́ и отпу́стъ.]



НА ЛИТУРГІИ.

[Блаже́нна отъ кано́на, пѣ́снь 3-я и 6-я, на 8.] Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отъ ны́нѣ ублажа́тъ Мя́ вси́ ро́ди. Апо́столъ къ Евре́емъ, зача́ло 316. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.

Коне́цъ и Бо́гу сла́ва.

Источникъ: Слу́жба Пресвятѣ́й Богоро́дицѣ пре́дъ чудотво́рною ико́ною Ея́, я́же нарица́ется Ку́рская-Коренна́я. — Mahopac: Изда́ніе Сѵнода́льнаго Подво́рья «Но́вая Коренна́я Пу́стынь», 1951. [Репринтъ: Mahopac, 1992.]

/ Къ оглавленію раздѣла /


Наверхъ / Къ титульной страницѣ

0