Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 27-й де́нь.
Слу́жба Зна́менія Пресвяты́я Богоро́дицы, бы́вшаго въ Вели́комъ Новѣ́градѣ.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Се́ ны́нѣ вре́мя благопрія́тно,* се́ ны́нѣ де́нь спасе́нія,* се́ хра́мъ пресвѣ́телъ и мѣ́сто свяще́нія,* Зна́менія ико́ны Твоея́, Пречи́стая,* пра́здникъ духо́внѣ соверша́юще, вопіе́мъ:* Влады́чице, Ма́ти Христа́ Бо́га,* изба́ви отъ бѣ́дъ ду́ши на́ша.

Чу́дное одолѣ́ніе,* и зна́меніе стра́шно, и ве́щь пресла́вную* дне́сь пра́зднующе, лю́діе Твои́, Богоро́дице,* похва́льную пѣ́снь съ Гавріи́ломъ прино́симъ Ти́, глаго́люще:* ра́дуйся, Обра́дованная.

Сла́ва, и ны́нѣ, гла́съ 1:

Ди́вна правосла́вныхъ торжества́, дне́сь, сте́кшеся, псало́мская пѣ́нія принесе́мъ, глаго́люще, — воскресни́, Го́споди, въ поко́й Тво́й, Ты́ и киво́тъ святы́ни Твоея́, — я́ко побѣ́ду дарова́лъ еси́ о́бразъ Пречи́стыя Твоея́ Ма́тере, Сло́ве. Ея́же моли́твами, Іису́се всеси́льне, спаси́ ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́му прему́дрости Бо́жія,* чу́дному святи́телю,* я́влься свѣ́тлымъ о́бразомъ,* дерза́ти повелѣва́етъ* и наде́жди не отпа́дати.

Сти́хъ: Воскресни́, Го́споди, въ поко́й Тво́й,* Ты́ и киво́тъ святы́ни Твоея́.

Въ хра́мъ Тво́й, Влады́чице,* соше́дшеся, наро́ди,* моля́щеся, глаго́лаху:* ви́ждь озлобле́ніе на́ше* и пода́ждь на́мъ по́мощь, Пречи́стая.

Сти́хъ: Кля́тся Госпо́дь Дави́ду и́стиною* и не отве́ржется ея́.

Ви́ждь, Пречи́стая, бѣды́ ра́бъ Твои́хъ* и не отри́ни на́съ въ коне́цъ,* на Твою́ по́мощь надѣ́ющихся,* да вси́ вопіе́мъ Ти́:* ра́дуйся, Обра́дованная.

Сла́ва, и ны́нѣ, гла́съ 1:

Стрѣло́ю стрѣли́вшихъ неразу́мнѣ о́бразу Твоему́, Пречи́стая, богора́нною стрѣло́ю тѣ́хъ уязви́ не то́кмо сердца́, но и ду́ши, и исто́чникъ честны́я ико́ны Твоея́ тѣ́мъ неутѣ́шимый пла́чь наведе́. На́мъ же, лю́демъ Твои́мъ, ра́дость ве́лію сотвори́ ико́ною Твое́ю, Пречи́стая Ма́ти Сло́ва, ея́же ра́ди спаси́ ду́ши на́ша.

Тропа́рь, гла́съ 4:

Яко необори́мую стѣ́ну и исто́чникъ чуде́съ стяжа́вше Тя́ раби́ Твои́, Богоро́дице Пречи́стая, сопроти́вныхъ ополче́нія низлага́емъ. Тѣ́мже мо́лимъ Тя́: ми́ръ гра́ду Твоему́ да́руй и душа́мъ на́шимъ ве́лію ми́лость.


НА ВЕЛИЦѢЙ ВЕЧЕРНИ,
Стихологису́емъ: Блаже́нъ му́жъ.., пе́рвый антифо́нъ. На Го́споди воззва́хъ: стихи́ры на 8, гла́съ 8. Самогла́сны:

Го́рдостію за́висти распали́вшеся и неи́стовствомъ одержи́ми, иногда́ ненака́занніи, наче́нше проти́вная на гра́дъ Тво́й, Пречи́стая, но оба́че са́ми спя́ти бы́ша и падо́ша, псало́мски, при а́дѣ, Богороди́тельнице. [Два́жды.]

Внегда́ у́бо му́діе Вели́каго Нова́града, ви́дѣвше себе́ проти́вными обстои́мы, ни отку́ду же по́мощи надѣ́ющеся, то́кмо Тебѣ́, Пречи́стая, моля́щеся, глаго́лаху: ви́ждь, Богоро́дице, бѣды́ ра́бъ Твои́хъ и не отри́ни моле́нія на́шего въ коне́цъ, да разумѣ́ютъ сопроти́вніи, я́ко Ты́ еси́, Пречи́стая, заступле́ніе душа́мъ на́шимъ. [Два́жды.]

Ди́вную гра́ду Твоему́ побѣ́ду дарова́ла еси́, Дѣ́во Пречи́стая, Ты́ бо еси́ тому́ тве́рдое огражде́ніе, на враги́ укрѣпля́ющи, и держа́вно непокори́выя покаря́ющи при́сно. Тѣ́мже чи́стою вѣ́рою сла́вимъ Тя́ и Сы́ну Твоему́ любе́зно вопіе́мъ: Іису́се всеси́льне, спаси́ всѣ́хъ, я́ко Милосе́рдъ. [Два́жды.]

Да́лъ еси́ зна́меніе живо́тное, о́бразъ Пречи́стыя Твоея́ Ма́тере, Сло́ве, Юже зря́ще, любе́зно облобыза́емъ, и, отъ сея́ ра́дости испо́лнившеся, стра́шни враго́мъ борю́щимся съ на́ми явля́емся, и, та́инство прему́дрости Бо́жія ви́дѣвше, хва́лимъ Тя́, па́че сло́ва ро́ждшагося изъ Нея́, Іису́се, чу́дная добро́то, спаси́ всѣ́хъ, я́ко Милосе́рдъ. [Два́жды.]

Сла́ва, и ны́нѣ, гла́съ 6:

Весели́теся, лю́діе и вси́ правосла́вніи собо́ри Вели́каго Нова́града, дне́сь, и рука́ми восплещи́те, язы́цы, съ весе́ліемъ, се́ бо Цари́ца, Царя́ Христа́ ро́ждшая, святи́телю яви́ся чу́днымъ о́бразомъ, дерза́ти наро́домъ повелѣва́я, я́коже нѣ́кій воево́да, въ печа́ли су́щимъ тогда́ ра́дость сотвори́, сопроти́вныхъ побѣди́вши, и Тебѣ́, Ра́дость ро́ждшей всѣ́мъ, любо́вію вопіе́мъ: Дѣ́во Пречи́стая, моли́ спасти́ся душа́мъ на́шимъ.

Вхо́дъ. Проки́менъ дне́. И чте́нія.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 6:

Ро́ги грѣ́шныхъ сотро́шася, и лу́цы и́хъ сокруши́шася, грѣхо́вною бо тмо́ю о́чи помрачи́вше, и, дру́гъ дру́га я́ко сопроти́вна зря́ще, ору́жіемъ неми́лостивно себе́ уязвля́ху, наро́ди же, ви́дѣвше по́мощь Твою́, Влады́чице, на сопроти́вныя устреми́шася, Тебе́ на по́мощь призыва́юще.

Якоже иногда́ крѣ́пкій Дави́дъ сопроти́вящагося го́рдаго Голіа́ѳа, си́лою Сы́на Твоего́ препоя́сався, низложи́, та́кожде и лю́діе Твои́, Пречи́стая, иму́ще о́бразъ Тво́й честны́й, пресла́вно одолѣ́ніе показа́ша.

Чу́дная побѣ́да и ди́вное одолѣ́ніе честны́я ико́ны Твоея́, Пречи́стая Ма́ти Сло́ва, удивля́етъ у́мъ и ужаса́етъ по́мыслъ, безору́жніи бо ору́жныя побѣжда́ху си́лою Твое́ю, Дѣ́во Всепѣ́тая, и посо́біемъ боже́ственнаго зра́ка Твоего́ во спасе́ніе душа́мъ на́шимъ.

Сла́ва, и ны́нѣ, гла́съ то́йже:

Се́ де́нь избавле́нія на́шего наста́ и сме́рти премѣне́ніе, ра́дуйтеся, собо́ри дне́сь Вели́каго Нова́града, и, веселя́щеся, торжеству́йте, и́же бо на на́съ подви́гшіися коне́чнѣ богора́нными я́звами уязви́шася. Тѣ́мже Пречи́стѣй и изъ Нея́ нетлѣ́нно воплоще́нному Сло́ву вопіе́мъ: Іису́се Всеси́льне, моли́твами Ро́ждшія Тя́ спаси́ всѣ́хъ на́съ, я́ко Милосе́рдъ.

На стихо́внѣ стихи́ры, гла́съ 1. Самогла́сны:

Якоже дре́вле во Іерусали́мѣ Зорова́велемъ держа́вная Твоя́ десни́ца чудодѣ́йствоваше, Го́споди, мно́жество безчи́сленное проти́вныхъ побѣди́, та́кожде и си́хъ низложи́, прише́дшихъ разори́ти гра́дъ, его́же искупи́лъ еси́ Кро́вію Твое́ю, Сло́ве, да разумѣ́ютъ отъ дѣ́лъ, я́ко Ты́, Изба́витель, съ на́ми еси́.

Сти́хъ: Воскресни́, Го́споди, въ поко́й Тво́й, Ты́ и киво́тъ святы́ни Твоея́.

Ди́вна правосла́вныхъ торжества́, дне́сь сте́кшеся, псало́мская пѣ́нія принесе́мъ, глаго́люще, — воскресни́, Го́споди, въ поко́й Тво́й, Ты́ и киво́тъ святы́ни Твоея́, — я́ко побѣ́ду дарова́ о́бразъ Пречи́стыя Твоея́ Ма́тере, Сло́ве. Ея́же моли́твами, Іису́се Всеси́льне, спаси́ ду́ши на́ша.

Сти́хъ: Кля́тся Госпо́дь Дави́ду и́стиною и не отве́ржется ея́.

Стрѣло́ю стрѣли́вшихъ неразу́мнѣ о́бразу Твоему́, Пречи́стая, богора́нною стрѣло́ю тѣ́хъ уязви́ не то́кмо сердца́, но и ду́ши, и исто́чникъ честны́я ико́ны Твоея́ тѣ́мъ неутѣ́шимый пла́чь наведе́, на́мъ же, лю́демъ Твои́мъ, ра́дость ве́лію сотвори́ ико́на Твоя́, Пречи́стая Ма́ти Сло́ва, ея́же ра́ди спаси́ ду́ши на́ша.

Сла́ва, и ны́нѣ, гла́съ 8:

Мня́щеся непокори́віи отъ основа́нія разори́ти гра́дъ Тво́й, Пречи́стая, не разумѣ́вше по́мощь Твою́, Влады́чице, но си́лою Твое́ю низложе́ни бы́ша, на бѣжа́ніе устремля́хуся, и, я́коже ю́зами желѣ́зными, слѣпото́ю свя́зани бы́вше и мра́комъ, я́коже дре́вле Еги́петъ, объя́ти не разумѣ́вше, до́ндеже и коне́чнѣ побѣжде́ни бы́ша. Тѣ́мже чи́стою вѣ́рою сла́вимъ Тя́ и Сы́ну Твоему́ любе́зно вопіе́мъ: моли́твами Ро́ждшія Тя́, Іису́се Всеси́льне, неизрече́нная Ра́досте, сохраня́й гра́дъ Тво́й невреди́мь, я́ко Милосе́рдъ и Человѣколю́бецъ.

На благослове́ніи хлѣ́бовъ: Тропа́рь, гла́съ 4: Яко необори́мую стѣ́ну.., три́жды. [Пи́санъ на ма́лѣй вече́рни.]
Аще нѣ́сть бдѣ́нія, глаго́лемъ тропа́рь еди́ножды.



[Зри́:] Аще хра́мъ Пресвяты́я Богоро́дицы Зна́менія, пое́тся слу́жба Зна́менія еди́наго. Кромѣ́ же хра́ма пое́тся слу́жба Зна́менія со Іа́ковомъ Пе́рсяниномъ си́це:

На ма́лѣй вече́рни. На Го́споди, воззва́хъ: стихи́ры на 4, гла́съ 1. Подо́бенъ: Небе́сныхъ чино́въ. Сла́ва, и ны́нѣ, гла́съ то́йже. На стихо́внѣ стихи́ры, гла́съ 2. Подо́бенъ: До́ме Евфра́ѳовъ, съ припѣ́вы и́хъ. Сла́ва, и ны́нѣ, гла́съ 1. И про́чее обы́чное, и отпу́стъ.

На вели́цѣй вече́рни. Блаже́нъ му́жъ.., 1-й антифо́нъ. На Го́споди воззва́хъ.., стихи́ры на 8: Богоро́дицы 4, гла́съ 8, самогла́сны: Го́рдостію за́висти... И му́ченика 4, гла́съ 2. Подо́бенъ: Егда́ отъ дре́ва: Мíра кра́сная оста́вль... Сла́ва, му́ченика, гла́съ 5: Ди́венъ бы́лъ еси́, Іа́кове... И ны́нѣ, Богоро́дицы, гла́съ 6: Весели́теся, лю́діе... Вхо́дъ. Проки́менъ дне́. Чте́нія Богоро́дицы три́. На литíи стихи́ры, гла́съ 6: Ро́ги грѣ́шныхъ сотро́шася... Сла́ва, и ны́нѣ, гла́съ то́йже: Се́ де́нь избавле́нія на́шего наста́... На стихо́внѣ стихи́ры, гла́съ 1, самогла́сны: Якоже дре́вле во Іерусали́мѣ.., съ припѣ́вы и́хъ. Сти́хъ 1: Воскресни́, Го́споди, въ поко́й Тво́й... Сти́хъ 2: Кля́тся Госпо́дь Дави́ду и́стиною... Сла́ва, му́ченика, гла́съ 8: Вѣ́рно соше́дшеся дне́сь... И ны́нѣ, Богоро́дицы, гла́съ то́йже: Мня́щеся непокори́віи... Тропа́рь му́ченика, гла́съ 4. Сла́ва, и ны́нѣ, гла́съ то́йже: Яко необори́мую стѣ́ну...

На у́трени. На Бо́гъ Госпо́дь: Тропа́рь Богоро́дицы, два́жды. Сла́ва, му́ченика. И ны́нѣ, Богоро́дицы. По 1-й каѳи́смѣ, и по 2-й, и по поліеле́и сѣда́льны Богоро́дицы и чте́ніе. Степе́нна, 1-й антифо́нъ, 4-го гла́са. Проки́менъ, гла́съ 4: Слы́ши, Дщи́, и ви́ждь, и приклони́ у́хо Твое́. Сти́хъ: Отры́гну се́рдце мое́... Ева́нгеліе Луки́, зача́ло 4: Воста́вши Маріа́мъ... По 50-мъ псалмѣ́ стихи́ра, гла́съ 6: Весели́теся, лю́діе... [Пи́сана на Го́споди воззва́хъ.., Сла́ва.] Кано́на два́ Богоро́дицы, на 8: еди́нъ, гла́съ 6, другíй, гла́съ 8. И му́ченика кано́нъ на 6, гла́съ 2. Катава́сія: Христо́съ ражда́ется... По 3-й пѣ́сни: Конда́къ му́ченика и и́косъ. И сѣда́ленъ Богоро́дицы, гла́съ 8. Сла́ва, свята́го сѣда́ленъ, гла́съ то́йже. И ны́нѣ, Богоро́дицы. По 6-й пѣ́сни: Конда́къ Богоро́дицы, гла́съ 4. Подо́бенъ: Яви́лся еси́ дне́сь: Честна́го о́браза Твоего́ зна́меніе... И и́косъ. И чте́мъ про́логъ. По 9-й пѣ́сни: Свѣти́ленъ Богоро́дицы. Сла́ва, му́ченика. И ны́нѣ, Богоро́дицы. На хвали́техъ стихи́ры на 4, гла́съ 6, самогла́сны: Непоко́рствомъ ра́зума... Сла́ва, му́ченика, гла́съ 2: Терпѣ́въ въ страда́ніи, му́чениче... И ны́нѣ, Богоро́дицы, гла́съ 8: Мня́щеся непокори́віи... Славосло́віе вели́кое. По трисвято́мъ: Тропа́рь свята́го. Сла́ва, и ны́нѣ, Богоро́дицы. Ектеніи́, и отпу́стъ, и ча́съ 1-й.

На 1-мъ часѣ́: Тропа́рь Богоро́дицы. Сла́ва, свята́го. И ны́нѣ, богоро́диченъ часо́въ. По трисвято́мъ на всѣ́хъ часѣ́хъ конда́къ Богоро́дицы непремѣ́нно. И соверше́нный отпу́стъ.

На литургíи. Блаже́нна Богоро́дицы, 1-го кано́на пѣ́снь 3-я, на 4 [и] 2-го кано́на пѣ́снь 6-я, на 4. Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода... Сти́хъ: Яко призрѣ́ на смире́ніе рабы́ Своея́... И му́ченика проки́менъ, гла́съ 4: Святы́мъ, и́же су́ть на земли́ Его́... Богоро́дицы Апо́столъ къ Евре́емъ, зача́ло 320. Му́ченика Апо́столъ къ Ефесе́емъ, зача́ло 233. Аллилу́ія, гла́съ 8: Слы́ши, Дщи́, и ви́ждь... Сти́хъ: Лицу́ Твоему́ помо́лятся бога́тіи лю́дстіи. И му́ченика сти́хъ: Мно́ги ско́рби пра́веднымъ... Богоро́дицы, Ева́нгеліе Луки́, зача́ло 54: Вни́де Іису́съ въ ве́сь нѣ́кую... Му́ченика, Ева́нгеліе Іоа́нна, зача́ло 50: Азъ е́смь лоза́ и́стинная... Прича́стенъ Богоро́дицы: Ча́шу спасе́нія... Му́ченика: Въ па́мять вѣ́чную...


Потре́бно е́сть вѣ́дати и се́: я́ко а́ще случи́тся въ недѣ́лю пра́здникъ Пресвяты́я Богоро́дицы, честна́го Ея́ Зна́менія, и свята́го великому́ченика Іа́кова Пе́рсскаго:

Ве́черъ, на ма́лѣй вече́рни. На Го́споди воззва́хъ: Стихи́ры воскре́сны гла́са, на 4. Сла́ва, и ны́нѣ, Зна́менія. На стихо́внѣ: Стихи́ра воскре́сна еди́на и Зна́менія стихо́вна со стихи́ ея́. Сла́ва, и ны́нѣ, Зна́менія. Та́же, Ны́нѣ отпуща́еши... И по трисвято́мъ: Тропа́рь воскре́сенъ. Сла́ва, и ны́нѣ, Зна́менія. Ектенія́ ма́лая: Поми́луй на́съ, Бо́же... И отпу́стъ.

На вели́цѣй вече́рни. По обы́чномъ стихосло́віи, на Го́споди воззва́хъ: Стихи́ры воскре́сны 3, и восто́ченъ [Анато́ліевъ] еди́нъ, и Зна́менія 3, и му́ченика Іа́кова 3. Сла́ва, Зна́менія. И ны́нѣ, богоро́диченъ пе́рвый гла́са. Чте́нія Зна́менія. На литíи: Стихи́ры Зна́менія. Сла́ва, му́ченика. И ны́нѣ, Зна́менія. На стихо́внѣ: Стихи́ры воскре́сны. Сла́ва, Іа́кова. И ны́нѣ, Зна́менія. На благослове́ніи хлѣ́бовъ: Тропа́рь Зна́менія, три́жды. Аще нѣ́сть бдѣ́нія, глаго́лемъ тропа́рь воскре́сенъ. Сла́ва, Іа́кова. И ны́нѣ, Зна́менія.

На у́трени. На Бо́гъ Госпо́дь: Тропа́рь воскре́сенъ, два́жды. Сла́ва, Іа́кова. И ны́нѣ, Зна́менія. По каѳи́смахъ сѣда́льны воскре́сны съ богоро́дичны и́хъ. Та́же поліеле́й и велича́ніе пое́мъ: Досто́йно е́сть блажи́ти Тя́, Богоро́дице Дѣ́во, Честнѣ́йшую херуви́мъ и Сла́внѣйшую безъ сравне́нія серафи́мъ. Или́: Пѣ́снь вся́ку духо́вную принесе́мъ Богоро́дицѣ. Псало́мъ избра́нный: Помяни́, Го́споди, Дави́да и всю́ кро́тость его́... И тропари́: Ангельскій собо́ръ... И сѣда́льны Зна́менія ку́пно вся́ три́. Степе́нна и проки́менъ, гла́са. Ева́нгеліе воскре́сно. Та́же, Воскресе́ніе Христо́во... Псало́мъ 50-й. Стихи́ра воскре́сна. Кано́нъ воскре́сенъ со ирмосо́мъ на 4, Зна́менія еди́нъ кано́нъ на 6. Му́ченику Іа́кову на 4. Катава́сія: Христо́съ ражда́ется... По 3-й пѣ́сни: Конда́къ Зна́менія [и и́косъ], и му́ченика [конда́къ и и́косъ], и сѣда́ленъ му́ченика. Сла́ва, и ны́нѣ, Зна́менія. По 6-й пѣ́сни: Конда́къ и и́косъ воскре́сенъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва му́ченика. И ны́нѣ, Зна́менія. На хвали́техъ: Стихи́ры воскре́сны 4 и Зна́менія, со сла́внымъ, 4, самогла́сны, гла́съ 6, со стихи́. Стихи́ же глаго́лемъ: Воскресни́, Го́споди, въ поко́й Тво́й... Кля́тся Госпо́дь Дави́ду и́стиною и не отве́ржется ея́. Сла́ва, стихи́ра ева́нгельская. И ны́нѣ, Преблагослове́нна еси́... Славосло́віе вели́кое и по трисвято́мъ тропа́рь воскре́сенъ то́чію. Ектеніи́ и отпу́стъ. Та́же ча́съ 1-й.

На часѣ́хъ. На 1-мъ часѣ́: Тропа́рь воскре́сенъ. Сла́ва, Зна́менія. И ны́нѣ, богоро́диченъ часо́въ. По Отче на́шъ: Конда́къ Зна́менія, и про́чее послѣ́дованіе пе́рваго часа́, и отпу́стъ. На 3-мъ часѣ́: Тропа́рь воскре́сенъ. Сла́ва, му́ченика. И ны́нѣ, богоро́диченъ часо́въ. Та́кожде и на 6-мъ часѣ́, и на 9-мъ глаго́лемъ тропа́рь Зна́менія и му́ченику, премѣня́юще; тропа́рь же воскре́сенъ глаго́лется непремѣ́нно. По Отче на́шъ: Кондаки́ воскре́сенъ и Зна́менія, глаго́лемъ премѣня́юще.

На литургíи. Блаже́нна гла́са на 6 и Богоро́дицы, пѣ́снь 3-я, на 4. По вхо́дѣ: Тропа́рь воскре́сенъ, и Зна́менія, и му́ченика. Конда́къ воскре́сенъ. Сла́ва, конда́къ му́ченика. И ны́нѣ, Зна́менія. Проки́менъ, Апо́столъ, аллилу́ія, Ева́нгеліе и прича́стенъ, пре́жде воскре́сенъ и пото́мъ Богоро́дицы.


НА УТРЕНИ,
На Бо́гъ Господь: Тропа́рь: Яко необори́мую стѣ́ну.., три́жды.

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́ дне́сь.

Очи мы́сленныя очи́стивше, пріиди́те, ли́цы Вели́каго Нова́града, дне́сь торжеству́имъ свѣ́тло, чту́ще Богоотрокови́цу, добро́ту Іа́ковлю и Невѣ́сту всѣ́хъ Царя́, Христа́ Бо́га на́шего: Сія́ бо показа́ся не́бо, и кра́сная пала́та, и хра́мъ одушевле́нный, и Сея́ си́лою проти́вныя побѣжда́емъ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Пречи́стая Твоя́ ико́на, Богоро́дице Дѣ́во, врачевство́ гра́ду Твоему́ дарова́ся духо́вное, къ не́йже приходя́ще, покланя́емся, и честву́емъ, и отъ жела́нія се́рдца цѣлу́емъ, исцѣле́ній благода́ть почерпа́юще, и неду́гъ тѣле́сныхъ, и душе́вныхъ страсте́й, Твои́ми моли́твами свобожда́емся.

Сла́ва, и ны́нѣ, то́йже.

[Велича́ніе:

Досто́йно е́сть блажи́ти Тя́, Богоро́дице Дѣ́во, Честнѣ́йшую херуви́мъ и Сла́внѣйшую безъ сравне́нія серафи́мъ.

Или́: Пѣ́снь вся́ку духо́вную принесе́мъ Богоро́дицѣ.

Псало́мъ избра́нный: Помяни́, Го́споди, Дави́да и всю́ кро́тость его́...]

По поліеле́и сѣда́ленъ, гла́съ 8. Подо́бенъ: Повелѣ́нное.

Яже небе́съ превы́шши су́щи, и херуви́мъ вои́стинну сла́внѣйши, и всея́ тва́ри честнѣ́йши, Дѣ́во Пречи́стая, дне́сь благода́рственная, раби́ Твои́, прино́симъ о́бразу честна́го Твоего́ подо́бія, Ты́ бо стра́нную побѣ́ду и ди́вное одолѣ́ніе гра́ду Твоему́ дарова́ла еси́. Тѣ́мже, согла́сно пою́ще, вопіе́мъ Ти́: Влады́чице Богоро́дице, моли́ Христа́ Бо́га грѣхо́въ оставле́ніе дарова́ти, Тебе́ бо наде́жду и́мамы, раби́ Твои́.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, [гла́съ 4]: Слы́ши, Дщи́, и ви́ждь,* и приклони́ у́хо Твое́. Сти́хъ: Отры́гну се́рдце мое́ сло́во бла́го, [глаго́лю а́зъ дѣла́ моя́ Царе́ви]. Вся́кое дыха́ніе... Ева́нгеліе Луки́, зача́ло 4: Во дни́ о́ны, воста́вши Маріа́мъ...

По 50-мъ псалмѣ́ стихи́ра, гла́съ 6:

Весели́теся, лю́діе [и вси́ правосла́вніи собо́ри Вели́каго Нова́града, дне́сь, и рука́ми восплещи́те, язы́цы, съ весе́ліемъ, се́ бо Цари́ца, Царя́ Христа́ ро́ждшая, святи́телю яви́ся чу́днымъ о́бразомъ, дерза́ти наро́домъ повелѣва́я, я́коже нѣ́кій воево́да, въ печа́ли су́щимъ тогда́ ра́дость сотвори́, сопроти́вныхъ побѣди́вши, и Тебѣ́, Ра́дость ро́ждшей всѣ́мъ, любо́вію вопіе́мъ: Дѣ́во Пречи́стая, моли́ спасти́ся душа́мъ на́шимъ].

Кано́на два́: ирмосы́ пе́рваго кано́на по два́жды, тропари́ во обою́ на 12.

Кано́нъ пе́рвый, творе́ніе священномона́ха Пахо́мія Логоѳе́та, его́же краегране́сіе: Да́ждь ми́ сло́во, Сло́ве Бо́жій, восхвали́ти Ро́ждшую Тя́. Гла́съ 6.
Пѣ́снь 1.

Ирмо́съ: Волно́ю морско́ю скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

Да ра́дуется ра́достію Боже́ственною мно́жество Нова́града дне́сь, зря́ще те́плую Засту́пницу, стра́нну побѣ́ду да́рующу на проти́вныя, и да пое́тъ Боже́ственными пѣ́сньми.

Якоже лѣ́ствицу превысоку́, зри́мъ дне́сь ико́ну Твою́, Дѣ́во Всенепоро́чная, ю́же сопроти́вніи зря́ще, коне́чнѣй слѣпотѣ́ преда́шася, мы́ же, къ не́й вѣ́рнѣ взира́юще, отъ бѣ́дъ избавля́емся.

Въ рождествѣ́ тли́ не пріи́мши, тлѣ́нія всѣ́хъ на́съ, Дѣ́во, измѣни́, печа́ли уставля́ющи Ма́тернимъ премѣне́ніемъ, Богора́дованная.

Другíй кано́нъ. Гла́съ 8.
Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Боже́ственныя си́лы же́злъ дне́сь пріоблиста́я благода́тію и свѣ́томъ безмѣ́рнымъ Бо́жіе свя́то жили́ще, чу́до па́че естества́ о́браза Твоего́, Пречи́стая.

Ви́дѣхомъ пресла́вное дне́сь зна́меніе бы́вшее Боже́ственнаго Твоего́ зра́ка, Ма́ти Бо́жія, па́че же и сопроти́вніи о́ни, я́ко ви́дяще со о́бразомъ и си́лу отвраща́ющу, а́біе тѣле́сныма очи́ма ослѣпо́ша.

Наде́жду иму́ще на Тебе́, Богороди́тельнице, и несумнѣ́нну вѣ́ру гра́да сего́ наро́ди, я́ко ца́рскій ски́петръ Тебе́ гра́ду забра́ла положи́ша, Дѣ́во Неискусобра́чная.

Якоже жи́ву Ма́терь Сло́ва ви́дѣвше Тя́ суему́дренныхъ многочи́сленное во́инство, я́коже бо́дреннаго блюсти́теля, на забра́лѣхъ обстои́му вѣ́рными, а́біе ру́цѣ и́хъ съ про́чими у́ды ослабѣ́ша.

Катава́сія: Христо́съ ражда́ется...

Пѣ́снь 3.

Ирмо́съ: Тобо́ю, Христе́, небеса́ утвержда́ема вся́, Сло́во Бо́жіе и Си́ла, исповѣ́дуютъ сла́ву неизрече́нну и вседѣ́тельныя руки́ Твоея́ сотворе́ніе, нѣ́сть бо пресвя́тъ, ра́звѣ Тебе́, Го́споди..

Яко звѣ́ри, устреми́вшеся на ста́до Твое́, Пречи́стая, но Ты́ тѣ́хъ че́люсти сокруши́ и си́хъ не́мощны до конца́ показа́.

Общаго Па́стыря, Влады́ку Христа́ ро́ждши, Дѣ́во Неискусобра́чная, Тому́ моли́ся настоя́щаго гнѣ́ва изба́вити на́съ и проти́вныхъ обстоя́нія, Влады́чице.

Ми́лостивая, Ми́лостиваго ро́ждши Спа́са, ви́ждь озлобле́ніе и воздыха́ніе люде́й Твои́хъ, ускори́, Пречи́стая, и уще́дри ны́.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Пе́рвѣе у́бо вседержи́тельная Твоя́ десни́ца, Го́споди, Моисе́емъ чудодѣ́йствуя, помрача́ше Еги́петъ, та́кожде и здѣ́ прише́дшія разори́ти гра́дъ Тво́й, о́бразомъ Ма́тере Твоея́ помрача́еши.

Якоже услы́ша чу́дный архіепи́скопъ обѣща́ніе Твое́, Богороди́тельнице, благовѣствова́ше наро́домъ ра́дость, глаго́ля: дерза́йте, Ма́ти бо Бо́га на́шего съ на́ми е́сть.

Пресла́вную побѣ́ду, испо́лнену у́жаса, ви́дѣвше, и́же тогда́ наро́ди на сопроти́вныя ополчи́вшеся и а́біе до конца́ тѣ́хъ побѣди́ша.

Ны́нѣ наста́ де́нь весе́лія — Зна́менія ико́ны Твоея́, Дѣ́во Богороди́тельнице, и пра́здникъ свѣ́телъ, его́же соверша́юще, вопіе́мъ: нѣ́сть Пречи́стыя, па́че Тебе́, Богоневѣ́сто.

Сѣда́ленъ, гла́съ 8. Подо́бенъ: Прему́дрости.

Яже дре́вле проро́ки проповѣ́дася, две́рь небе́сная, неопали́мая купина́, свѣ́щникъ многосвѣ́тлый, злата́я кади́льница, ру́чка и же́злъ пресла́вно дне́сь чу́дному святи́телю явля́ется, наро́домъ дерза́ти повелѣва́етъ и ди́вную побѣ́ду показу́етъ. Тѣ́мже благода́рная То́й возопіи́мъ: Дѣ́во Богороди́тельнице, моли́ Христа́ Бо́га грѣхо́въ оставле́ніе дарова́ти на́мъ, Тебе́ бо и́мамы наде́жду, раби́ Твои́.

Сла́ва, и ны́нѣ, то́йже.

Пѣ́снь 4.

Ирмо́съ: Удиви́ся Тво́й ра́зумъ отъ мене́, услы́шавшу пресла́вная велѣ́нія смотре́нія Твоего́, укрѣпи́ся же возлюбле́ніемъ Твоего́ схожде́нія: Ты́ бо моея́ нищеты́ не отве́рглся еси́.

Почита́ющій Тя́ гра́дъ, Пречи́стая, и по до́лгу сла́вящій, огражда́й отъ безбо́жныхъ, Чи́стая, иноплеме́нникъ, Ты́ бо тому́, Пречи́стая, бога́тство неотъе́млемо еси́, покро́въ же и сла́ва.

Мня́щіися, я́коже дре́вле Іерихо́нъ, разори́ти гра́дъ Тво́й, Пречи́стая Ма́ти Сло́ва, са́ми коне́чнѣй поги́бели преда́шася си́лою изъ Тебе́ Воплоще́ннаго, Влады́чице.

При́зри, Чи́стая, спаси́ пою́щія Тя́, потреби́тися хотя́ща отъ сопроти́вныхъ, тѣ́мже наше́дшаго преще́нія изба́ви, Богороди́тельнице.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Егда́ услы́шаша наро́ди чу́дное обѣща́ніе побѣ́ды, ра́достію неизрече́нною испо́лнившеся, и, я́коже крѣ́пка нѣ́коего храни́теля иму́ще, сопроти́вныя побѣжда́ху.

Многобога́тный да́ръ и неистощи́мое сокро́вище дарова́лъ еси́ гра́ду Твоему́ — ико́ну Ма́тере Твоея́, Сло́ве, и Сея́ по́мощію проти́вныя низлага́емъ.

Въ Боже́ственнѣмъ хра́мѣ Твое́мъ, Богора́дованная, идѣ́же чудотво́рная Твоя́ ико́на положена́ бы́сть, исцѣле́нія вѣ́рою приходя́щимъ подава́етъ.

Собо́ри вѣ́рныхъ и вся́ко состоя́ніе человѣ́ческое весели́тся, совоку́пльшеся въ честнѣ́мъ хра́мѣ Твое́мъ, зря́ще въ не́мъ, я́коже пресвѣ́тлое со́лнце, честны́й о́бразъ Тво́й, Влады́чице.

Пѣ́снь 5.

Ирмо́съ: Сою́зомъ любве́ связу́еми, апо́столи, влады́чествующему всѣ́ми себе́ Христу́ возло́жше, кра́сны но́ги очища́ху, благовѣству́юще всѣ́мъ ми́ръ.

Те́плая засту́пница къ Тебѣ́ прибѣга́ющимъ и ненадѣ́ющимся наде́жда, ви́ждь озлобле́ніе люде́й Твои́хъ и пода́ждь по́мощь, Пречи́стая.

Яже о́гнь ро́ждшая Боже́ственный, Дѣ́во, проти́вныхъ, Пречи́стая, моли́твою Твое́ю огне́мъ попали́, я́ко Ма́ти су́щи Зижди́теля, Всепѣ́тая.

Чи́стая Богоневѣ́сто, недоумѣ́нныя лю́ди уще́дри Ма́терними Твои́ми мольба́ми и я́же на ны́ проти́вныхъ обстоя́нія разори́ вско́рѣ моли́твами Твои́ми.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Якоже иногда́ въ ца́рствующемъ гра́дѣ неи́стовящаго и хули́теля, хотя́щаго о́бразъ Тво́й низложи́ти, того́ а́біе коне́чнѣ уязви́, та́кожде и ны́нѣ показа́ла еси́, Богороди́тельнице.

Яко щито́мъ, огражда́еми непобѣди́мою Твое́ю си́лою, Дѣ́во, проти́вныхъ побѣжда́ютъ неизрече́нное мно́жество на Тя́ наде́жду иму́щіи лю́діе Твои́, Всепѣ́тая.

Тя́ бога́тство неистощи́мое иму́ще и исцѣле́ній исто́чникъ вѣ́рою прибѣга́ющіи хра́му Твоему́, идѣ́же пребыва́етъ честны́й о́бразъ Тво́й, Влады́чице.

Пѣ́снь 6.

Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго, и погребе́нію да́вшагося, я́ко отъ черто́га отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Изба́ви ра́тныхъ наше́ствія рабы́ Твоя́, Пречи́стая, и не преда́ждь до конца́ поги́бнути наслѣ́дію Твоему́, Всепѣ́тая, но си́лою изъ Тебе́ Рожде́ннаго проти́вныя низложи́.

Многосогрѣ́шшихъ Тебѣ́ не пре́зри, но пріими́ мольбу́ Ма́тере Твоея́ о на́съ, Ще́дре, да не похва́лятся сопроти́вніи, — гдѣ́ е́сть Бо́гъ и́хъ? — глаго́люще, но да разумѣ́ютъ вси́, я́ко Ты́, Изба́витель, съ на́ми еси́.

Ны́нѣ по́мощи пріи́де вре́мя, ны́нѣ премѣне́нія потре́ба, Чи́стая. Моли́ся Сы́ну Твоему́ и Бо́гу, я́ко да уще́дритъ согрѣши́вшія и належа́щаго гнѣ́ва изба́витъ.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Су́щему тогда́ чу́дному архіере́ю яви́лася еси́ стра́ннымъ о́бразомъ, на де́рзость подвиза́ющи, наро́ди же, неизрече́нныя ра́дости испо́лнившеся, ору́жныя побѣжда́ху, Влады́чице.

Зна́меніе стра́шно, и ве́щь пресла́вну, и чу́дное одолѣ́ніе дне́сь пра́зднующе, лю́діе Твои́, Богоро́дице, похва́льная я́ко досто́йной похвалы́ прино́симъ, глаго́люще: ра́дуйся, Обра́дованная.

Честну́ю ико́ну Твою́ ра́достнымъ се́рдцемъ и душе́ю облобыза́емъ, веселя́щеся, и, те́плою вѣ́рою прикаса́ющеся, исцѣле́ніе почерпа́емъ.

Конда́къ, гла́съ 4. Подо́бенъ: Яви́лся еси́ дне́сь.

Честна́го о́браза Твоего́ зна́меніе пра́зднующе лю́діе Твои́, Богороди́тельнице, и́мже ди́вную побѣ́ду на сопроти́вныхъ гра́ду Твоему́ дарова́ла еси́. Тѣ́мже Тебѣ́ вѣ́рою взыва́емъ: ра́дуйся, Дѣ́во, христіа́нъ похвало́.

Икосъ:

Разрѣши́ тму́ мои́хъ согрѣше́ній, во умѣ́ мое́мъ лежа́щую, и Твои́мъ мя́ свѣ́томъ просвѣти́, Дѣ́во, я́ко да возмогу́ Тебѣ́ похвалу́ принести́, Юже Оте́цъ восхвали́, и Ду́хъ Святы́й осѣни́, Сы́нъ же и Сло́во Бо́жіе, всели́вся и нетлѣ́нно отъ пречи́стою Твое́ю боку́ проше́дъ, съ человѣ́ки поживе́. Тѣ́мже мы́, грѣ́шніи и недосто́йніи раби́ Твои́, дне́сь соверша́юще свяще́нное торжество́ зна́менія, бы́вшаго честно́ю ико́ною Твое́ю, е́юже пресла́вную побѣ́ду на проти́вныя гра́ду Твоему́ дарова́ла еси́, и, отъ всѣ́хъ чуде́съ испо́лнившеся, вмѣ́сто благово́нныхъ арома́тъ, ели́ко возмо́жно на́мъ, земны́мъ, похва́льная Тебѣ́ прино́симъ, глаго́люще: ра́дуйся, Богоро́дице, ра́досте а́нгеловъ и человѣ́ковъ; ра́дуйся, тве́рдая наде́жда и покро́ве гра́ду Твоему́; ра́дуйся, я́ко проти́вныя си́лою Твое́ю низлага́емъ; ра́дуйся, у́мнаго Со́лнца Ма́ти, вѣ́рныя просвѣща́ющаго, невѣ́рныя же помрача́ющаго; ра́дуйся, Дѣ́во, христіа́нъ похвало́.

Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене, во гро́бѣ ме́ртвъ бездыха́ненъ полага́ется, во спасе́ніе на́съ пою́щихъ: Изба́вителю Бо́же, благослове́нъ еси́.

Вои́стину сокро́вище че́стно гра́ду Твоему́, ико́на Твоя́, Пречи́стая, дарова́ся, ю́же и са́ми зря́ще, чудеси́ удивля́емся и Сы́ну Твоему́ вопіе́мъ: Изба́вителю Бо́же, благослове́нъ еси́.

Якоже иногда́ ниневи́тяны покая́нія ра́ди пощади́лъ еси́, Сло́ве Бо́жій, про́повѣдію Іо́ны проро́ка, та́кожде и здѣ́ показа́лъ еси́ о́бразомъ Пречи́стыя Твоея́ Ма́тере, Христе́, вопію́щимъ: Изба́вителю Бо́же, благослове́нъ еси́.

Хра́мъ Тя́ Бо́жій, Влады́чице, вѣ́дуще, во святѣ́мъ хра́мѣ Твое́мъ ру́ки на́ша возно́симъ на моли́тву: ви́ждь озлобле́ніе на́ше и пода́ждь на́мъ по́мощь.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Ви́ждь, Пречи́стая, озлобле́ніе ра́бъ Твои́хъ и не отри́ни въ коне́цъ, Твое́ бо есмы́ достоя́ніе и Твое́ю наде́ждею крѣпи́мся, да вси́ вопіе́мъ Ти́: ра́дуйся, Обра́дованная.

Свѣтоно́сная благода́ть и исцѣле́нія дарова́ніе даде́ся гра́ду Твоему́ — о́бразъ Тво́й, Пречи́стая, его́же любе́зно облобыза́юще, весели́мся.

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Собезнача́льное Сло́во Отчее, Дѣ́во Пречи́стая, нетлѣ́нно родила́ еси́ и отъ сосцу́ пита́ла еси́. Того́ моли́, Богороди́тельнице, отъ обстоя́нія вра́жія спасти́ пою́щія Тя́ и превознося́щія во вѣ́ки.

Его́же прови́дѣ на престо́лѣ превзя́тѣмъ Иса́ія, Сего́ въ ложесна́хъ, Дѣ́во, вмѣсти́ла еси́ и нетлѣ́нно родила́ еси́. Его́же моли́ спасти́ся рабо́мъ Твои́мъ, пою́щимъ: дѣ́ти, благослови́те, свяще́нніи, по́йте и превозноси́те Его́ во вѣ́ки.

Еди́на су́щи Блага́я, Преблаго́е Сло́во моли́ прилѣ́жно настоя́щаго гнѣ́ва рабо́мъ Твои́мъ изба́вится, несомнѣ́нною вѣ́рою Сы́ну Твоему́ пою́щимъ: дѣ́ти, благослови́те, свяще́нніи, по́йте и превозноси́те Его́ во вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

О всѣ́хъ наро́ди недоумѣ́вшеся, къ Тебѣ́ прибѣга́ютъ, вопію́ще: не преда́ждь на́съ враго́мъ на́шимъ, Влады́чице Богоро́дице, но держа́вною Твое́ю руко́ю ты́я низложи́, да Тя́ непреста́нно пое́мъ и превозно́симъ во вѣ́ки.

Яко неруши́мое забра́ло иму́ще раби́ Твои́ ико́ну Твою́, Пречи́стая, проти́вящіяся низлага́емъ и Сы́ну Твоему́ вопіе́мъ: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Чу́дному іера́рху яви́лася еси́, Пречи́стая, о́нъ же со мно́гимъ наро́домъ, чудеси́ уди́влься, а́біе съ ра́достію ко о́бразу Твоему́ прибѣга́етъ. Пода́ждь по́мощь, Влады́чице, глаго́лющимъ: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Что́ Ти принести́, Пречи́стая, отъ всея́ тва́ри сла́вимѣй, недоумѣ́емся, Влады́чице, то́чію е́же Гавріи́лъ на́съ научи́: ра́дуйся, Обра́дованная.

Пѣ́снь 9.

Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ высо́кими умы́, вѣ́рніи, пріиди́те наслади́мся, возше́дша Сло́ва, отъ Сло́ва научи́вшеся, Его́же велича́емъ.

Милосе́рдымъ о́комъ свы́ше при́зри на гра́дъ и лю́ди Твоя́, Пречи́стая, ины́я бо по́мощи не и́мамы, то́кмо Тебе́, Всенепоро́чная, да Тя́ вси́, Ма́терь Бо́жію, непреста́нно велича́емъ.

Еди́на, ро́ждшая Сло́во воплоще́нное, Дѣ́во Всепѣ́тая, приснотеку́щій исто́чникъ исцѣле́ній излива́еши вѣ́рою притека́ющимъ хра́му Твоему́, Пречи́стая.

Се́, раби́ Твои́, вопіе́мъ Ти́, Ма́ти Бо́жія: обы́чныя ми́лости Твоя́ на гра́дъ и лю́ди Твоя́ ми́лостивно показу́ющи, проти́вныхъ обстоя́ній на́съ измѣни́, да Тя́ вси́ непреста́нно велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Се́ вре́мя благопрія́тно и де́нь спасе́нія, въ не́мже зна́меніе ико́ны Твоея́, Пречи́стая, показа́ся, е́же пра́зднующе свѣ́тло, духо́внѣ торжество́ соверша́емъ.

Яко Боже́ственною свѣ́тлостію озаря́ему, зри́мъ дне́сь, Пречи́стая, ико́ну Твою́ честну́ю, е́йже вѣ́рою покланя́ющеся, Тя́ велича́емъ.

Мы́сли очи́стивше, празднолю́бнаго Нова́града собо́ри со архіере́йскимъ ли́комъ, восхвали́те, па́че наде́жди по́мощь на сопроти́вныя дарова́вшую.

Дѣ́вства Твоего́ зна́менія невреди́мо сохрани́въ, Сло́во Бо́жіе, изъ Тебе́ проше́дъ, сохрани́ гра́дъ Тво́й невреди́мь, Дѣ́во Всепѣ́тая, да Тя́ непреста́нно велича́емъ.

Свѣти́ленъ. Подо́бенъ: Посѣти́лъ ны́ е́сть.

Возжелѣ́въ Твоея́ добро́ты Іису́съ, Пречи́стая, въ Тя́ всели́ся и Тебе́ засту́пницу гра́ду Твоему́ Сло́во Бо́жіе дарова́, его́же сохраня́й заступле́ніемъ Твои́мъ при́сно, я́ко да Тя́ ублажа́емъ, Пренепоро́чная Отрокови́це.

Сла́ва, и ны́нѣ, то́йже.

На хвали́техъ стихи́ры, на 4, гла́съ 6. Самогла́сны:

Непоко́рствомъ ра́зума и го́рдостію разже́гшеся ненака́занніи на ста́до Твое́, Пречи́стая, е́же искорени́ти гра́дъ, въ не́мже пречестны́й Тво́й о́бразъ водворя́ется, но у́бо показа́ла еси́, я́коже иногда́ Сы́нъ Тво́й евре́емъ, досто́йно въ пусты́ни тѣлесы́ па́дшимъ.

Се́ хра́мъ пресвѣ́телъ и мѣ́сто свяще́нія, идѣ́же честна́я ико́на Ма́тере Твоея́, Сло́ве, приступи́те, человѣ́цы, и исцѣле́ніе почерпи́те, я́ко спасе́ніе Тоя́ ра́ди на́мъ дарова́ся и избавле́ніе отъ проти́вныхъ, потреби́ти на́съ хотя́щихъ, но тíи, по проро́ку, потреби́шася.

Якоже иногда́ кро́ткій Дави́дъ проти́вящагося го́рдаго Голіа́ѳа, си́лою Сы́на Твоего́ препоя́сався, низложи́, та́кожде и лю́діе Твои́, Пречи́стая, иму́ще о́бразъ Тво́й честны́й, пресла́вно одолѣ́ніе показа́ша.

Чу́дная побѣ́да и ди́вное одолѣ́ніе честны́я ико́ны Твоея́, Пречи́стая Ма́ти Сло́ва, удивля́етъ у́мъ и ужаса́етъ по́мыслъ, безору́жніи бо ору́жныхъ побѣжда́ху си́лою Твое́ю, Дѣ́во Всепѣ́тая, и посо́біемъ боже́ственнаго зра́ка Твоего́ во спасе́ніе ду́шъ на́шихъ.

Сла́ва, и ны́нѣ. Гла́съ 8:

Мня́щеся непокори́віи [отъ основа́нія разори́ти гра́дъ Тво́й, Пречи́стая, не разумѣ́вше по́мощь Твою́, Влады́чице, но си́лою Твое́ю низложе́ни бы́ша, на бѣжа́ніе устремля́хуся, и, я́коже ю́зами желѣ́зными, слѣпото́ю свя́зани бы́вше и мра́комъ, я́коже дре́вле Еги́петъ, объя́ти не разумѣ́вше, до́ндеже и коне́чнѣ побѣжде́ни бы́ша. Тѣ́мже чи́стою вѣ́рою сла́вимъ Тя́ и Сы́ну Твоему́ любе́зно вопіе́мъ: моли́твами Ро́ждшія Тя́, Іису́се Всеси́льне, неизрече́нная Ра́досте, сохраня́й гра́дъ Тво́й невреди́мь, я́ко Милосе́рдъ и Человѣколю́бецъ].

Славосло́віе вели́кое. [Ектеніи́] и отпу́стъ.



НА ЛИТУРГІИ,

[Блаже́нна отъ кано́на пе́рваго пѣ́снь 3-я, на 4, и отъ втора́го пѣ́снь 6-я, на 4.] Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, [се́ бо отъ ны́нѣ ублажа́тъ Мя́ вси́ ро́ди]. Апо́столъ ко Евре́емъ, зача́ло 320. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 279 об. – 290.

/ Къ оглавленію раздѣла /


Наверхъ / Къ титульной страницѣ

0