Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 26-й де́нь.
Преподо́бнаго отца́ на́шего Али́пія Сто́лпника.

[ВЕЧЕРЪ,]
На Го́споди воззва́хъ: стихи́ры окто́иха или́ богоро́дицы, та́же свята́го, гла́съ 1. Подо́бенъ: Всехва́льніи му́ченицы.

Богому́дре Али́піе,* свѣти́ло яви́лся еси́ велича́йшее,* просвѣща́ющее подсо́лнечную чуде́съ сія́ніи* и боже́ственными дѣ́лы,* тѣ́мже по успе́ніи* незаходи́мый тя́ Свѣ́тъ прія́тъ.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Сто́лпъ бы́лъ еси́, му́дре, мона́ховъ непоколеби́мь,* превы́ше столпа́ стоя́,* и, дручи́мь зно́емъ, и хла́домъ,* и мно́гими поще́ніи,* тѣ́мъ и прія́лъ еси́ Ду́ха Боже́ственная дарова́нія* цѣли́ти неду́ги и отгони́ти стра́сти лютѣ́йшія.* И ны́нѣ моли́ся дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, богоро́диченъ. Подо́бенъ то́йже:

Ра́дуйся, купино́ неопали́мая,* совѣ́та вели́каго Ангела,* ра́дуйся, еди́на ро́ждшая;* ра́дуйся, изволе́ніе Честны́я Тро́ицы;* ра́дуйся, земны́мъ утвержде́ніе;* ра́дуйся, рая́ кла́съ прозя́бши невоздѣ́ланный,* Царя́ и Го́спода,* прозябе́нія изсуша́юща зло́бы.

Крестобогоро́диченъ, подо́бенъ то́йже:

Своего́ Агнца* Агница и непоро́чная Влады́чица* на Крестѣ́ я́ко ви́дѣвши,* зра́ка не иму́ща, ниже́ добро́ты, —* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* Гдѣ́ благолѣ́піе,* гдѣ́ благода́ть блиста́ющая о́браза Твоего́,* Сы́не Мо́й любе́знѣйшій?

Тропа́рь, гла́съ 1:

Терпѣ́нія сто́лпъ бы́лъ еси́, ревнова́вый пра́отцемъ, преподо́бне, Іову во страсте́хъ, Іо́сифу во искуше́ніихъ, и безпло́тныхъ жи́тельству сы́й въ тѣлеси́, Али́піе о́тче на́шъ, моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха и преподо́бнаго на 4, его́же краегране́сіе: Ра́дуяся, похваля́ю Али́піевы болѣ́зни. Іо́сифъ. Гла́съ 5.

Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Благода́тію испо́лненъ, ра́дости мою́ испо́лни ду́шу, похвали́ти житіе́ твое́, Али́піе, и жи́тельство, и́миже вся́ а́нгелы возвесели́лъ еси́, подвиза́вся.

Яко друга́го тя́ Самуи́ла Бо́гъ освяти́ изъ ма́терняго чре́ва, Али́піе блаже́нне, и зрѣ́ти пре́дняя я́ко проро́ка Боже́ственна содѣ́я тя́, достосла́вне.

Яко да Бо́гъ яви́тъ твою́ свѣ́тлость, ю́же напослѣ́докъ имѣ́лъ еси́, до́брѣ подвиза́вся, свѣ́та Боже́ственнаго испо́лни, тебѣ́ ро́ждшуся, преподо́бне, хра́мину па́че ума́.

Богоро́диченъ: Рече́ніе проро́ка честна́го коне́цъ прія́тъ: се́ бо Дѣ́ва пло́тію Бо́га роди́, человѣ́ки воззи́ждуща, сокруше́нныя пре́жде грѣхми́ и прегрѣше́ніи.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Яко свѣти́льникъ на свѣ́щницѣ, дѣя́нія лу́чшаго возложе́нъ, свѣтоза́рными твои́ми, о́тче, добродѣ́тельми вся́ку ду́шу, вѣ́рно къ тебѣ́ приходя́щую, благочестному́дренно просвѣти́лъ еси́, тмы́ грѣха́ избавля́я.

Ума́ твоего́ свяще́нная движе́нія творя́ къ соблюде́нію Боже́ственныхъ зако́новъ Ду́ха, а́нгелъ яви́лся еси́ на земли́, а́нгельское жи́тельство съ пло́тію воспріе́мъ, о́тче богоно́се Али́піе.

Разу́мно пли́щей жите́йскихъ, Али́піе, отше́льникъ яви́лся еси́ и приступи́лъ еси́ къ три́знамъ по́стническаго пребыва́нія усе́рдно, твое́ се́рдце жили́ще явля́я Ду́ха, преподо́бне.

Богоро́диченъ: Дѣ́во Чи́стая, Сло́ва пала́та, ду́шу мою́ покажи́ до́мъ Ду́ха и водо́ю исто́чника живонача́льнаго напо́й мя́, зно́емъ грѣха́ пали́маго, я́ко да по до́лгу сла́влю Тя́.

Сѣда́ленъ, гла́съ 4. Подо́бенъ: Ско́ро предвари́.

Свѣ́тлостію вѣ́ры и дѣ́тельнымъ свѣ́томъ яви́лся еси́ равноа́нгеленъ на земли́ вои́стинну, Али́піе преподо́бне, показа́лъ еси́ му́жественно крѣ́пкое ра́зума твоего́, побѣди́въ ополче́нія стра́стная посто́мъ. Тѣ́мже и по кончи́нѣ, я́ко жи́въ сы́й, моли́ спасти́ся на́мъ.

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Любо́вь и́стинную и милосе́рдіе, вѣ́ру и наде́жду тве́рду и жи́тельство нельсти́вое пріе́мь, о́тче, уго́дникъ Христо́въ бы́лъ еси́.

Стоя́ на столпѣ́, непрекло́ненъ проти́вными прило́ги, де́моновъ по́лкъ побѣди́лъ еси́ и коле́блемымъ бы́лъ еси́, всеблаже́нне, незы́бленное утвержде́ніе.

Во́дъ Боже́ственныхъ испо́лненъ бы́въ, и ороси́лъ еси́ ду́ши, иста́явшія зно́емъ лю́таго грѣха́, Али́піе богому́дре, всебога́те.

Яви́лся еси́ стра́шенъ и непристу́пенъ де́мономъ всѣ́мъ вои́стинну, ураня́я сія́ ра́ною свяще́нныхъ твои́хъ моли́твъ и дале́че отгоня́я, Али́піе.

Богоро́диченъ: Стра́сти души́ моея́ исцѣли́ и просвѣти́ у́мъ и се́рдце мое́, Влады́чице, Свѣтода́теля ро́ждши Христа́, преблага́го Бо́га.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Ве́сь возложи́вся Вседержи́телю, лѣ́тнымъ стоя́ніемъ безъ покро́ва, о́тче, дожде́мъ и зно́емъ зѣ́льно стражда́, усе́рдно претерпѣ́лъ еси́.

Въ пѣ́снехъ и мольба́хъ упраждня́яся, преподо́бне, Трисо́лнечныя Зари́ благода́ть ума́ чистото́ю прія́лъ еси́ и свѣ́тъ цѣле́ній возблиста́лъ еси́.

Тѣ́ло твое́ на столпѣ́ огради́въ, умо́мъ ше́ствовати невозбра́нно къ тебѣ́ Жела́емому, о́тче, попусти́лъ еси́, свѣ́та исполня́емь.

Богоро́диченъ: Свята́го родила́ еси́ Бо́га, бы́вша Человѣ́ка за милосе́рдіе, Свята́я Отрокови́це, освяща́ющаго и́же Того́ вѣ́рою и стра́хомъ освяща́ющія.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Ка́меніемъ тя́ ду́си зло́бы бію́ще я́вѣ, творя́ща стоя́ніе на столпѣ́, я́ко тве́рдаго ка́мене, ника́коже поколеба́ша.

Терпя́, преподо́бне, претерпѣ́лъ еси́, терпѣ́ніе тебѣ́ и́стинное Го́споду дарова́вшу и отъ всѣ́хъ неудо́бныхъ тя́ изба́вившу.

Пресла́вно, преподо́бне, свѣ́тъ ви́дѣнъ бы́сть вы́ше столпа́, на вся́къ де́нь просвѣща́ющь твоя́, чудотво́рче, душе́вная чу́вства.

Богоро́диченъ: Крѣ́пко Тя́ утѣше́ніе су́щіи въ ско́рби, и прибѣ́жище, и извѣ́стное вси́ и́мамы заступле́ніе, Богоро́дице: спаси́ отъ бѣ́дъ рабы́ Твоя́.

Конда́къ, гла́съ 8. Подо́бенъ: Яко нача́тки.

Яко добродѣ́телей вину́ и по́стниковъ удобре́ніе, Це́рковь сла́витъ тя́ дне́сь и воспѣва́етъ, Али́піе: моли́твами твои́ми пода́ждь чту́щимъ любо́вію до́блести твоя́ и боре́нія лю́тыхъ прегрѣше́ній избавле́ніе, я́ко тезоимени́тый.

Икосъ:

Али́піеву житію́ боже́ственному и равноа́нгельному, пріиди́те, почуди́мся, свяще́нницы, ца́ріе, и кня́зи, и мона́шествующіи, и вси́ лю́діе богому́дріи, и подража́имъ дѣя́нія его́, да и того́ ча́сти сподо́бимся мольба́ми его́, празднолю́бцы, и́бо то́й небе́сную пѣ́снь пое́тъ безпеча́льно Бо́гу, я́ко тезоимени́тый.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Терпѣли́вѣйшій и крѣ́пкій Али́пій, лѣ́ты мно́гими зимо́ю дручи́мь, Ду́ха теплото́ю грѣ́яшеся пресла́вно.

Къ высотѣ́ небе́снѣй имѣ́я жи́тельство, о тѣлеси́ небре́глъ еси́, я́ко растлѣ́тися иму́щемъ, и тому́, согнива́ему, неради́лъ еси́ о болѣ́знехъ.

Вся́каго сладостра́стія, о́тче, отве́ргся, съ зимо́ю и ва́ромъ боря́ся, пострада́лъ еси́, безпокро́венъ, поя́: благослове́нъ Бо́гъ оте́цъ на́шихъ.

Богоро́диченъ: Непостижи́мый пло́ть прія́тъ, у́мну же и одушевле́нну, изъ Тебе́, Приснодѣ́во, е́же спасти́ пою́щія: Бо́же, благослове́нъ еси́.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Но́вый Самуи́лъ, предзря́ бу́дущее ума́ чистото́ю, яви́лся еси́, Али́піе, всѣ́мъ предглаго́ля, я́ко Бо́жій проро́къ, отъ Го́спода явля́емая тебѣ́, о́тче.

Свѣтови́дный Це́ркве сто́лпъ, забра́ло незы́бленное, стѣна́ неруши́мая всѣ́хъ человѣ́ковъ, Бо́гу вѣ́ровавшихъ, Христо́въ уго́дникъ Али́пій да почти́тся.

Усну́лъ еси́ до́брѣ сно́мъ пра́веднымъ, о́тче, всѣ́мъ до́лжнымъ, успи́въ пре́жде стра́сти многообра́зныя мольба́ми и бдѣ́ніи. Тѣ́мже, неусы́пна тя́ предста́теля иму́ще ны́нѣ, обогати́хомся.

Богоро́диченъ: Твое́ Рождество́ роди́вшійся грѣ́хъ зло́бою зміи́ною обезпло́дстви ны́нѣ, еди́на кля́твы потреби́тельница, Дѣ́во. Тѣ́мже Тя́ чти́мъ во вся́ вѣ́ки.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Свяще́нное житіе́ твое́ отъ пеле́нъ яви́ся Христу́, сія́я добродѣ́тельнымъ свѣ́томъ, блаже́нне, честна́ же твоя́ сме́рть предъ Бо́гомъ бы́сть, о́тче Али́піе, мона́шествующихъ нача́льниче.

Яко свѣти́ло пресвѣ́тлое, просвѣща́еши всю́ зе́млю, отгоня́ лука́выя стра́сти, и разрѣша́я тму́ грѣхо́вную, и просвѣща́я Боже́ственными свѣтлостьми́ исцѣле́ній пою́щія тя́.

Стоя́ніе на столпѣ́ сотвори́лъ еси́ лѣ́та, му́дре, пятьдеся́тъ къ тре́мъ, я́ко страда́лецъ стражда́ усе́рднѣйше, и зимо́ю, и мра́зомъ, и зно́емъ, о́тче, неосла́бно дручи́мь.

Свята́я твоя́ па́мять Ду́хомъ Святы́мъ на́съ освяща́етъ, му́дре, сію́ свяще́нно соверша́ющія и вѣ́рою тя́ воспѣва́ющія, о́тче, въ не́й я́ко засту́пника и предста́теля ду́шъ на́шихъ.

Богоро́диченъ: Просвѣще́ніе мнѣ́ да́руй, во тмѣ́ су́щу страсте́й, окая́нному и грѣ́шному, и изба́ви мя́ лука́выхъ дѣ́лъ и пла́мене, предлежа́щаго ми́, Пречи́стая Влады́чице, Предста́тельнице пою́щихъ Тя́.

Свѣти́ленъ. Подо́бенъ: Жены́, услы́шите.

По́двиги па́че человѣ́ка проше́лъ еси́, о́тче преподо́бне, Христо́вою си́лою: пятьдеся́тъ бо къ тре́мъ лѣ́томъ на столпѣ́ стоя́лъ еси́, му́дре Али́піе, отвсю́ду дручи́мь, и ны́нѣ коне́чное, блаже́нне, благи́хъ всѣ́хъ обрѣ́лъ еси́.

Богоро́диченъ:

Ты́ моя́ предста́тельница, Чи́стая, и тве́рдое прибѣ́жище, Ты́ моя́ засту́пница и покро́въ, и, къ Тебѣ́ припа́дая, зову́: болѣ́зней мои́хъ изба́ви мя́, я́ко всѣ́хъ преиму́щи, и огня́ мя́ исхити́ вѣ́чнующаго, Дѣ́во, на Тя́ упова́ющаго.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 262 – 265 об.

/ Къ оглавленію раздѣла /


Наверхъ / Къ титульной страницѣ

0