Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣсяца Ноемврія въ 26 день.]
Служба Святителю Иннокентію Епископу, Иркутскому Чудотворцу.

НА ВЕЛИЦѢЙ ВЕЧЕРНИ.
На Господи воззвахъ, Стихиры на 8, гласъ 6.

Восхвалимъ мужа славна въ бытіи, и отца нашего Святителя Иннокентія: многу бо славу созда Господь въ неистлѣніи святаго тѣлесе его, положивъ е яко свѣтильникъ на свѣщницѣ, и озаривъ лучами чудесъ его Иркутскую паству: яко да не отъидетъ отъ нея память праведника, но поживетъ имя его въ роды родовъ, да премудрость его повѣдятъ языцы, зря святую Церковь, въ пѣснехъ и пѣніихъ духовныхъ выну повѣдающую хвалу его. [Дважды.]

Восхвалимъ новаго Апостола Христова, грядущаго со Евангеліемъ въ землю языковъ чуждихъ, облагоухавшаго вѣрою послѣдніе концы Россіи, процвѣтшаго яко кринъ на востокѣ царства Сибирскаго; на языки, ненапоенные струями благодати, одождившаго глаголы премудрости небесныя. [Дважды.]

Егда темное Хиновъ царство, омраченное гордостію древняго змія, не можаше вмѣстити свѣта царствія Іисуса Христа, и не хотяше пріяти благославнаго Іерарха Россійскаго: тогда во языцѣхъ, движимыхъ скиптромъ ИМПЕРАТОРА православнаго, начатъ расти и множитися святая вѣра Христіанская, устами Святителя великаго Иннокентія, молящагося о душахъ нашихъ. [Дважды.]

Мѵро благовонное имя твое отче, изліянное на паству, озаренную лучами добротъ твоихъ, и на люди благоговѣйно чтущія святую память твою, и на вся грады и страны Христіанскія, прославляющія дивнаго во Святыхъ своихъ Бога Израилева, егоже моли спастися душамъ нашимъ.

На тебѣ отче, утвердися истина Господня, предреченная устами Пророка древле возгласившаго: праведникъ яко финиксъ процвѣтетъ, и яко кедръ, иже въ Ливанѣ, умножится; и будетъ яко древо, насажденное при исходищахъ водъ. Тѣмже молимъ тя, предивный Іерарше, осѣняй молитвами твоими градъ сей, и всѣхъ Христіанъ православныхъ.

Слава, гласъ 8:

Отче Святителю Иннокентіе, по имени бысть тако и житіе твое, яко убѣленъ былъ еси невинностію во вся дни житія твоего; пребывая же на земли, яко странникъ и пришлецъ, приусвоилъ еси Святую Троицу, и уготовалъ еси въ непорочномъ сердцѣ твоемъ обитель Отцу и Сыну и Святому Духу: сего ради и во гробѣ процвѣте нетлѣніемъ святое тѣло твое, и ни едина отъ богоспасаемыхъ костей твоихъ сокрушися. Тѣмже лобызающе съ вѣрою, прославленныя обиліемъ изцѣленій, честныя мощи твоя, молимъ тя угодниче Божій, пастырю ревностный, Іерарховъ украшеніе, сотвори ны угодны быти Святѣй Троицѣ, Юже на земли прославилъ еси преподобіемъ и правдою, и Ейже предстоиши нынѣ, присно ходатайствуя о мирѣ паствы твоея, и о спасеніи душъ нашихъ.

И нынѣ, богородиченъ.
Входъ. Прокименъ дне. Чтенія 3.


Пророчества Исаіина чтеніе. [Гл. 35.]

Радуйся пустыня жаждущая, да веселится пустыня, и да цвѣтетъ яко кринъ. И процвѣтетъ и возвеселится пустыня Іорданова, и слава Ливанова дадеся ей, и честь Кармилова: и узрятъ людіе мои славу Господню, и высоту Божію. Укрѣпитеся руцѣ ослабленныя, и колѣна разслабленная; утѣшитеся малодушніи умомъ, укрѣпитеся, не бойтеся. Се Богъ нашъ судъ воздаетъ, и воздастъ; той пріидетъ, и спасетъ насъ. Тогда отверзутся очи слѣпыхъ, и уши глухихъ услышатъ. Тогда скочитъ хромый яко елень, и ясенъ будетъ языкъ гугнивыхъ: яко проторжеся вода въ пустыни, и дебрь въ земли жаждущей: и безводная будетъ во езера, и на жаждущей земли источникъ водный будетъ: тамо будетъ веселіе птицамъ и селитва трости, и лузи. И тамо будетъ путь чистъ, и путь святъ наречется, и не прейдетъ тамо нечистый, ниже будетъ тамо путь нечистъ: разсѣянніи же пойдутъ по нему, и не заблудятъ. И не будетъ тамо льва, ни отъ звѣрей злыхъ не взыдетъ нань, ниже обрящется тамо, но пойдутъ по нему избавленніи: и собранніи Господемъ обратятся, и пріидутъ въ Сіонъ съ радостію, и радость вѣчная надъ главою ихъ. Надъ главою бо ихъ хвала и веселіе, и радость пріиметъ я: отбѣже болѣзнь, печаль и воздыханіе.

Премудрости Соломони чтеніе. [Гл. 3.]

Праведныхъ душы въ руцѣ Божіей, и не прикоснется ихъ мука. Непщевани быша во очію безумныхъ умрети, и вмѣнися озлобленіе исходъ ихъ, и еже отъ насъ шествіе сокрушеніе: они же суть въ мирѣ. Ибо предъ лицемъ человѣческимъ аще и муку пріимутъ, упованіе ихъ безсмертія исполнено. И вмалѣ наказани бывше, великими благодѣтельствовани будутъ: яко Богъ искуси ихъ, и обрѣте ихъ достойны себѣ. Яко злато въ горнилѣ искуси ихъ, и яко всеплодіе жертвенное пріятъ я. И во время посѣщенія ихъ возсіяютъ, и яко искры по стеблію потекутъ: судятъ языкомъ, и обладаютъ людьми, и воцарится въ нихъ Господь во вѣки. Надѣющіися нань уразумѣютъ истину, и вѣрніи въ любви пребудутъ ему: яко благодать и милость въ преподобныхъ его, и посѣщеніе во избранныхъ его.

Премудрости Соломони чтеніе. [Гл. 4.]

Праведникъ аще постигнетъ скончатися, въ покои будетъ. Старость бо честна не многолѣтна, ниже въ числѣ лѣтъ исчитается: сѣдина же есть мудрость человѣкомъ, и возрастъ старости житіе нескверно. Благоугоденъ Богови бывъ, возлюбленъ бысть, и живый посредѣ грѣшныхъ преставленъ бысть: восхищенъ бысть, да не злоба измѣнитъ разумъ его, или лесть прельститъ душу его. Раченіе бо здобы помрачаетъ добрая, и пареніе похоти премѣняетъ умъ незлобивъ. Скончався вмалѣ исполни лѣта долга, угодна бо бѣ Господеви душа его: сего ради потщася отъ среды лукавствія. Людіе же видѣвше, и не разумѣвше, ниже положше въ помышленіи таковое: яко благодать и милость въ преподобныхъ его, и посѣщеніе во избранныхъ его.

На литіи стихиры, гласъ 5:

Лобызайте, Сибирстіи народи, слѣды красныхъ ногъ Іерарха Иннокентія, благовѣствовавшаго въ предѣлехъ вашихъ миръ и утвержденіе, положившаго во единомъ изъ градовъ вашихъ начало новаго священноначалія, и во единой изъ святыхъ обителей вашихъ процвѣтающаго нетлѣніемъ, якоже процвѣтаетъ вертоградъ напоенный, емуже не оскудѣ вода благодатная, безъ цѣны напаяющая жаждущихъ духовнаго и тѣлеснаго исцѣленія.

Ты еси славо града Иркутска Иннокентіе, ты еси украшеніе Сибирскихъ странъ, похвало Церкви православныя: величаніе Россіи Малыя, въ нейже процвѣлъ еси кринъ благоуханный, въ нейже возжеглся еси свѣтильникъ пресвѣтлый, въ нейже родился еси сынъ царствія Христова, изъ нея же призвался еси Апостолъ, со Евангеліемъ отъ престольныхъ градовъ протекшій до предѣловъ Монгольскихъ, въ животѣ и по смерти поучевающій омраченныя языки.

Въ земномъ училищи небесныя премудрости, былъ еси наставникъ, горняя а не земная мудрствовати научавшій, и въ юныхъ разумахъ напечатлѣвая древнія истины Евангельскія, явился еси самъ запечатлѣнъ Духомъ Святымъ богоносецъ, предъ Богомъ ходивый, по Бозѣ ревновавый, Богу представый, яко молитвенникъ о чтущихъ святую память твою Иннокентіе.

Слава, гласъ 4:

На тебѣ Святителю почи духъ премудрости и разума, имже умудрился еси во спасеніе языковъ: духъ совѣта и крѣпости, имже дивнымъ совѣтамъ прозорливаго ИМПЕРАТОРА, возмоглъ еси соотвѣщавати: духъ вѣдѣнія и благочестія, имже благочестно вѣдѣти Святую Троицу научилъ еси, ищущихъ духа и сердца новаго.

И нынѣ, богородиченъ: Призри на моленія...


На стиховнѣ стихиры, гласъ 7:

Поминаимъ братіе, наставника дивнаго, иже языкомъ благогласнымъ, и житіемъ благославнымъ глаголаше намъ слово спасенія: взирающе убо на блаженное скончаніе жительства его, подражаимъ вѣрѣ Іерарха, тлѣнное сіе облекшей въ нетлѣніе, и мертвенное сіе одѣявшей въ безсмертіе, преднаписующей образъ общаго воскресенія.

Стихъ: Праведникъ, яко финиксъ процвѣтетъ, и яко кедръ, иже въ Ливанѣ, умножится.

Виноградъ, принесенный отъ древняго града Кіева, на земли Сибирстѣй издаде цвѣтъ свой, простре розги своя за море, и сотвори плоды во изцѣленіе языковъ: въ немже обрѣтающе духовное веселіе вѣрніи, не изыдемъ изъ подъ сѣни его благодатныя, дондеже пріимемъ изцѣленіе недуговъ душевныхъ, вкупѣ же и тѣлесныхъ.

Стихъ: Хранитъ Господь вся кости его, и ни едина отъ нихъ сокрушится.

Пріидите языцы и видите, яко дѣло содѣла Господь во дни ваша, емуже не возмогли бысте вѣровати, аще бы кто повѣдалъ вамъ сицевое: но зрите и чудитеся, како хранитъ Господъ вся кости избранныхъ своихъ, и ни едина отъ нихъ сокрушается. Тѣмже убо не будите невѣрни, но вѣрни.

Слава, гласъ 8:

Отче Святителю Иннокентіе, явилъ еси въ преподобіи твоемъ славу царствія Христова, въ подвизѣхъ добрыхъ возглаголалъ еси силу благодати его, въ чудесахъ многихъ возвеличилъ еси побѣду, побѣждающую міръ, вѣру святую, и самъ яко священникъ облеклся еси во спасеніе: тѣмже и святыня Господня процвѣте на тебѣ, яко помазанномъ отъ Духа Святаго, егоже Благій да не отъиметъ отъ насъ согрѣшившихъ, но да обновитъ насъ молитвами твоими, угодниче Божій.

И нынѣ, богородиченъ: Безневѣстная Дѣво...
На благословеніи хлѣбовъ, тропарь Святителя, дважды и Богородице Дѣво, единожды.


Тропарь Святителя, гласъ 3:

Свѣтильниче Церкве пресвѣтлый, озаривый лучами добротъ твоихъ страну сію, и исцѣленми многими притекающихъ къ ракѣ твоей съ вѣрою Бога прославивый, молимъ тя Святителю отче Іннокентіе, ограждай молитвами твоими градъ сей отъ всѣхъ бѣдъ и печали.


НА УТРЕНИ,
На Богъ Господь: тропарь Святаго дважды. Слава, и нынѣ, богородиченъ.


По 1-мъ стихословіи сѣдальны, гласъ 5:

Не далъ еси сна очима твоима человѣче Божій, ниже вѣждома твоима дреманія, дондеже обрѣлъ еси мѣсто Господеви среди разрушающагося владычества древняго омрачителя языковъ: основалъ еси селеніе Богу Іаковлю ни во Іудеи, ни во Іерусалимѣхъ, но въ предѣлехъ Монгольскихъ. Тѣмже явился еси и Давидъ, положившій во странѣ невѣрія твердое основаніе вѣры, и Соломонъ, умудрившійся въ созиданіи спасенія стада твоего.

Слава, и нынѣ:

Бога изъ Тебе воплотившагося познахомъ, Богородице Дѣво, Того моли о спасеніи града нашего, и всѣхъ запечатлѣнныхъ именемъ Сына Твоего.

По 2-мъ стихословіи сѣдальны, гласъ 4:

Яко мѵро на главѣ, сходящее на браду, браду Аароню, сходящее на ометы одежды его, и яко роса Аермонская, сходящая на горы Сіонскія: тако благодать Духа Святаго, благоухая выну на прославленномъ нетлѣніемъ тѣлеси твоемъ, притекающихъ къ ракѣ твоей съ вѣрою напояетъ радостію о Господѣ, прославляющемъ тя.

Слава, и нынѣ:

Со Святителемъ, Пречистая, и всѣми Святыми, во Святыхъ единаго почивающаго умоли, всѣхъ освятити насъ, славословящихъ тя во вся вѣки.

По полѵелеи сѣдаленъ, гласъ 3:

Господь, не лишающій благихъ ходящихъ незлобіемъ, благодать и славу даде ти, Святителю Иннокентіе, юже вселилъ еси въ земли нашей: и на небеси убо сподоби ны твоими молитвами вѣчной славы съ тобою, и со всѣми Святыми, Богу благоугодившими.

Слава, и нынѣ:

Покровъ буди ми и предстательство, и заступленіе, и похвала Дѣво: яко Ты еси безпомощныхъ сило необоримая, и надеждо ненадѣемыхъ.

Посемъ 1-й антифонъ 4-го гласа. Прокименъ, гласъ 4: Честна предъ Господемъ смерть преподобныхъ Его. Стихъ: Что воздамъ Господеви о всѣхъ, яже воздаде ми? Таже: Всякое дыханіе... Евангеліе отъ Матѳея, зачало 11.

По Евангеліи стихира, гласъ 6:

Да исполнятся уста наша хваленія Твоего, Господи, яко да воспоимъ славу Твоего угодника, егоже прославилъ еси нетлѣніемъ и чудотвореніями, въ бѣдахъ сущимъ показалъ еси помощника, въ недугахъ скораго цѣлителя, въ скорбехъ утѣшителя, чтущихъ святую память его теплаго молитвенника.

Канонъ, гласъ 8.


Пѣснь 1.

Ирмосъ: Истрясшему въ мори мучительство Фараоне, и Израиля сушею наставльшему, поемъ Христу: яко прославися во вѣки.

Іерарше непорочне, призри съ небесе и виждь, и посѣти осѣненіемъ твоимъ виноградъ сей, егоже насади десница твоя во странѣ языковъ: да прославимъ благоговѣйно чудеса твоя, аще и не возможно есть исчислити я.

На пути иногда вразумляше Валаама ослица, да не идетъ проклинати Израиля, егоже и благослови пришедый отъ Месопотаміи: сице утомленными конми вразумленъ бяше преогорченный путникъ, да воздастъ Святителю Иннокентію славу, еюже обѣщася.

Ногъ болѣзнію, и разслабленіемъ всѣхъ членовъ недугующему, явился еси скорый цѣлитель, отче нашъ Иннокентіе: не презри убо и нынѣ съ вѣрою притекающихъ къ живоноснымъ и присноцѣлебнымъ мощамъ твоимъ.

Богородиченъ: Отцу собезначальнаго Сына плотію родила еси, пренепорочная Дѣво, егоже моли со Святителемъ, да сотворитъ ны сынами своего царствія, и наслѣдниками обѣтованія вѣчнаго.

Катавасія по уставу.


Пѣснь 3.

Ирмосъ: Утверди нашъ умъ и сердца, небеса словомъ утверждей, во еже пѣти и славити тя, во спасеніе душъ нашихъ.

Купину вторую показалъ еси словесный Пастырю, егда молитвами твоими сохранилъ еси среди пламени невредиму святую Церковь, въ нейже почиваше не у прославленное на земли, но съ небеси обиліемъ чудотвореній явственно свидѣтельствованное свято быти нетлѣнное тѣло твое.

Единой вѣрѣ доступенъ явился еси, непорочне: тѣмже съ премѣненіемъ естества уставовъ, мразъ и иней сокрыша чистоту твою отъ очесъ нечистыхъ, дерзнувшихъ въ невѣріи видѣти тя, имже не далъ еси узрѣти славы твоея, поучавая ны чистымъ сердцемъ тебе славити.

На помощь скоро притеклъ еси къ старцу, очима тяжко видящему, и прикоснувся болѣзненной главѣ его, явилъ еси на немъ дѣла Божія: просвѣти убо и наша душевныя очи молитвами твоими, Священноначальниче.

Богородиченъ: Твердое и непреложное упованіе вѣмы тя, Богородице, егоже держимся, и уповая молимся: сохрани градъ сей, и вся грады и страны Христіанскія отъ всѣхъ бѣдъ, находящихъ человѣкомъ согрѣшающимъ, но абіе молитвами твоими пріемлющимъ согрѣшеній оставленіе.

Сѣдаленъ по 3-й пѣсни, гласъ 3:

Таковъ намъ подобаше Архіерей, преподобенъ, незлобивъ, кротокъ, отлученъ отъ грѣшникъ, иже предъ вѣчнымъ Архіереемъ Іисусъ Христомъ молится выну о спасеніи стада своего: много бо можетъ молитва праведнаго, поспѣшествуема во благое.

Слава, гласъ тойже:

Проторжеся вода въ пустыни, источникъ исцѣленій истекаетъ отъ неистлѣнныхъ мощей Святителя Иннокентія: радость вѣчная надъ главою его, еяже да сподобимся и мы молитвами его, въ невечернѣмъ дни воскресенія.

И нынѣ, богородиченъ:

О тебѣ Отроковице, возгласи Пророкъ, глаголя: се врата востока, и будутъ затворена, и никтоже пройдетъ сквозѣ я; но Господь Богъ единъ пройдетъ, и будутъ врата затворена.

Пѣснь 4.

Ирмосъ: Услышахъ Господи, смотренія твоего таинство, разумѣхъ дѣла твоя, и прославихъ твое Божество.

Іисусъ въ домѣ Петровомъ прикоснуся руцѣ тещи его, огнемъ жегомой, и абіе остави ю огнь: сія же знаменія послѣдоваша тебѣ вѣрующему Чудотворцу; укротилъ бо еси огневицу единымъ прикосновеніемъ боку лежащаго на одрѣ смерти, но призвавшаго тя во упованіи жизни.

Исцѣлевахуся иногда вѣрующіе отъ нанесенія главотяжей и убрусцевъ Павловыхъ: не просты силы творяше Богъ и твоима рукама, новый Апостоле; персть бо отъ твоея священныя раки, и елей отъ лампады отверзаютъ слѣпотствующей очи, и даруютъ исцѣленіе.

Молитва вѣры спасе лютѣ болящаго, иже и исповѣда, яко врачеве не воскресятъ: упованіе же на тя; благосердый отче, николиже посрамляетъ съ вѣрою призывающихъ тя во благовременную помощь.

Богородиченъ: Отроковица неискусомужная раждаетъ провидѣннаго духомъ отъ Аввакума, и къ рожденному молится о душахъ нашихъ, мудрѣ пасомыхъ Пастыремъ, и по исходѣ своемъ выну съ нами въ неистлѣніи святаго тѣлесе своего пребывающимъ.

Пѣснь 5.

Ирмосъ: Отъ нощи невѣдѣнія, Боговѣдѣнія день, во свѣтѣ лица твоего Христе, да возсіяетъ ко утру хваленіе твое въ сердцахъ нашихъ.

Любовію погрузився во струяхъ упованія на угодника Божія, покрытый отъ главы до ногъ струпами, и въ плоти своей не обрѣтающій исцѣленія: и абіе очистися отъ нечистоты болѣзненной, якоже Нееманъ отъ проказы погруженіемъ во Іорданѣ, по глаголу Елиссееву.

Ищущимъ тебе обрѣтаешися готовый помощникъ, Святителю Иннокентіе, и скоро подаеши недуговъ исцѣленіе, якоже иногда женѣ, болѣзнующей десною рукою, явился еси въ сонномъ видѣніи, и сотворилъ еси ю здраву за единое призваніе святаго твоего имени.

Твердое благодати познаніе утверждая въ вѣрующихъ, научилъ еси насъ вѣдѣти тя, яко наставника милостиваго, благоутробія сокровище, правовѣрія учителя, архіереевъ похвалу, безпомощныхъ заступника, присно молящагося о спасеніи чадъ твоихъ, съ вѣрою къ тебѣ притекающихъ.

Богородиченъ: Вереи адовы сломишася, и заклепы вѣчныя сокрушишася рождшимся отъ тебе, пречистая мати: тѣмже молимъ тя, избави ны отъ вѣчныя смерти ходатайствомъ твоимъ, и всели ны во свѣтѣ сына твоего, свѣтъ искупленія мірови возсіявшаго.

Пѣснь 6.

Ирмосъ: Ризу мнѣ подаждь свѣтлу, одѣяйся свѣтомъ яко ризою, многомилостиве Христе Боже нашъ.

Елицы притекаху къ тебѣ, помощниче теплый, не отхождаху посрамлени, немощніи исцѣлевахуся, въ болѣзни дѣторожденія сущія отъ многоцѣлебной благостыни твоей пріимаху скорое недуга разрѣшеніе, слѣпіи прозираху: посѣти убо и насъ, щедрый отче, твоею помощію.

Не буди не вѣренъ, но вѣренъ, реклъ еси отче, вторицею явивыйся отъ преломленія ноги лютѣ страждущему, и ударивъ жезломъ въ мѣсто, идѣже стоястѣ нозѣ твои, язвою на древѣ уврачевалъ еси душевную язву омраченнаго невѣріемъ, абіе бо исповѣда быти тебе благодатнаго врача, воздвигшаго его отъ одра болѣзненнаго.

Непорочныма твоима рукама преподалъ еси, архіерею Божій, безсмертную пищу страждущей, о чудо! на небеси приобщаяся истѣе невечерняго свѣта, вящшее седмидесяти лѣтъ по твоемъ успеніи, и на земли являешися Священнодѣйствитель Божественныхъ таинъ, увѣряя паству твою въ неразлучномъ пребываніи выну, съ притекающими къ твоей помощи.

Истины учителю, настави ны во истиннѣй вѣрѣ, моля о спасеніи нашемъ съ пречистою Дѣвою Богородицею рожденнаго отъ нея на спасеніе всего міра.

Кондакъ, гласъ 1:

Непорочности соименнаго пастыря, проповѣдника вѣры въ языцѣхъ монгольскихъ, славу и украшеніе Иркутскія паствы, любовію восхвалимъ вси вѣрніи: той бо есть хранитель страны сея, и молитвенникъ о душахъ нашихъ.

Икосъ:

Ангельскимъ житіемъ возвысился еси, отче, до лицезрѣнія красоты несозданной, еюже наслаждаяся нынѣ на небеси, молишися о спасеніи нашемъ, насъ же на земли научаеши взывати тебѣ таковая: Радуйся крине, въ благорастворенномъ югѣ процвѣтшій, радуйся первенче духовнаго сыноположенія, отъ Малыя Россіи Богу посвященный, радуйся славо и величаніе града Кіева, радуйся въ земномъ училищи небесныя мудрости наставниче, радуйся мудрый исполнителю велѣній царя земнаго, радуйся мужественный подвижниче Царя небеснаго, радуйся проповѣдниче вѣры въ языцѣхъ монгольскихъ, радуйся началоположителю добраго священноначалія во странахъ сибирскихъ, радуйся украшеніе Иркутскія паствы, радуйся благоуханіе пустыни, радуйся общаго воскресенія въ нетлѣніи твоемъ увѣрителю, радуйся неизчерпаемыхъ чудесъ источниче, радуйся хранителю страны тобою избранныя, радуйся Иннокентіе, молитвенниче о душахъ нашихъ.

Пѣснь 7.

Ирмосъ: Въ началѣ землю основавый, и небеса словомъ утвердивый, благословенъ еси во вѣки, Господи Боже отецъ нашихъ.

Крѣпость и исцѣленіе пріимаху отъ тебе, отче, немощствующіи плотію: скорбніи же духомъ и удрученніи печальми житейскими обрѣтаху душевное утѣшеніе въ умиленномъ призываніи святаго и прославленнаго имени твоего, прославляющаго дивнаго во святыхъ своихъ Бога Израилева.

Отче, непорочности соименне, тако прославися свѣтъ твой предъ человѣки, яко видяще добрая дѣла твоя и чудотворенія многая, прославляютъ чудодѣйствующаго тобою, дивнаго во святыхъ своихъ Бога Израилева.

Троиченъ: Душевныя наша болѣзни исцѣли, Боже, молитвами прославленнаго отъ тебе угодника, ускоряющаго на помощъ умиленною душею требующимъ дѣйственнаго его предъ тобою, Троица Святая, заступленія.

Богородиченъ: Умъ нашъ плѣни въ послушаніе вѣры, духъ и душу всесовершенны соблюди, и тѣло въ пришествіе Господа нашего Іисуса Христа непорочно сохрани, молитвами твоими, Богородительнице.

Пѣснь 8.

Ирмосъ: Безначальнаго Царя славы, егоже трепещутъ небесныя силы, пойте священницы, людіе превозносите во вся вѣки.

Широкій путь вводяй въ пагубу презрѣлъ еси, преподобне, и тѣсными вратами вшелъ еси въ небесное царствіе, отъонуду же призирая выну на призывающихъ тя съ вѣрою, укрѣпи убо и насъ понести благое и легкое иго креста, да внидемъ въ покой Бога благословеннаго.

Ангелоподобнымъ житіемъ на земли, обрѣлъ еси благодать исцѣленій, и явился еси воистинну ангелъ-хранитель паствы твоея, бодрственно утверждая ю въ вѣрѣ многоразличными твоими чудотвореніями, и соблюдая въ чистомъ исповѣданіи отцевъ Бога благословеннаго.

Христово благоуханіе явился еси, отче, въ спасаемыхъ тобою отъ недуговъ душевныхъ же и тѣлесныхъ: тѣмже обитатели града тобою избраннаго, прославляя святую память твою, благословляютъ прославившаго тя отцевъ Бога благословеннаго.

Богородиченъ: Нѣсть наша брань къ плоти и крови, но къ началомъ, и ко властемъ и къ міродержителемъ тьмы вѣка сего, къ духовомъ злобы поднебеснымъ: надъ ними же покажи ны, Владычице, побѣдители, яко да по образу непорочнаго пастыря возможемъ вся стрѣлы лукаваго разженныя угасити.

Пѣснь 9.

Ирмосъ: Проявленное на горѣ законоположнику во огни и купинѣ, Рождество Приснодѣвы, въ наше вѣрныхъ спасеніе, пѣсньми немолчными величаемъ.

Апостолъ языковъ былъ еси, отче, якоже и Павелъ, тѣмже нынѣ восхищенъ еси на высоту Божественнаго лицезрѣнія, идѣже молишися, да Богъ возраститъ, еже ты мудрый дѣлателю насадилъ и напоилъ еси.

Шлемъ спасенія воспріимъ, и мечемъ духовнымъ препоясався, изшелъ еси на дѣло твое, пастырю дивный, и соградилъ еси оплотъ благочестія во мракѣ язычества: моли убо преблагаго Бога, да укрѣпитъ, еже содѣла въ насъ рукою твоею.

Именемъ и житіемъ непорочне, пріими хвалебныя пѣсни, любовію къ тебѣ возносимыя, осѣняя молитвами твоими паству, осіянную лучами добротъ твоихъ, и ускоряя на помощь благодатнымъ заступленіемъ твоимъ во время благопотребно.

Богородиченъ: Херувимовъ честнѣйшая, и славнѣйшая безъ сравненія Серафимовъ, не презри моленія рабъ твоихъ, но покрый насъ честнымъ твоимъ покровомъ: спаси ИМПЕРАТОРА, и люди, благоговѣйно чтущія память непорочнаго пастыря, и молитвенника о градѣ семъ, дивнаго Иннокентія.

Свѣтиленъ, гласъ 1:

Слава тебѣ Богу, показавшему намъ свѣтъ спасенія въ житіи и словѣ твоего угодника: слава тебѣ Благодателю, возсіявшему просвѣщеніе истины въ поборникѣ благочестія и истины: слава тебѣ дивному щедротодавцу, удивившему милости своя на ходившемъ во свѣтѣ лица твоего Святителѣ и чудотворцѣ Иннокентіи.

Слава, и нынѣ, богородиченъ:

Свѣтъ мірови возсіялъ есть въ рождествѣ твоемъ, пречистая Богородице: осіяй убо умъ нашъ познаніемъ Сына твоего, сердце уязви любовію къ Божественнымъ заповѣдемъ, укрѣпляя ны молитвами твоими въ вѣрѣ и благодѣланіи.

На хвалитехъ стихиры, гласъ 8:

Многое множество чудесъ твоихъ, Иннокентіе, проповѣдуетъ величество славы Бога нашего, на небеси Силами разумными неумолчно воспѣваемаго, на земли же въ душахъ и тѣлесѣхъ Святыхъ своихъ дивно прославляемаго: егоже моли препрославленне Святителю, о спасеніи душъ нашихъ.

Единѣми усты, и единѣмъ сердцемъ прославимъ людіе Бога чудодѣйствующаго, удивившаго щедроты своя во дни наша: древнія милости, глаголанныя ко отцемъ нашимъ въ чудесахъ Святыхъ своихъ, возглаголавшаго и нынѣ въ нетлѣніи непорочнаго пастыря, чудотворца новаго, утвердившаго красныя ноги своя во странахъ Сибирскихъ, и украсившаго пустыню яко кринъ красный.

Не отцы наши возвѣстиша намъ, отче, славу твою, не старцы наши повѣдаша намъ чудеса твоя, чудотворче, но сами видѣхомъ осѣняющую непорочное тѣло твое силу Божію, чудодѣйствующую тобою въ знаменіяхъ дивныхъ и многихъ: сродницы и знаеміи наши познаша благодатную помощь твою, еяже и мы дерзающе просимъ, и неоскудно пріемлемъ.

Древле Богъ глаголавый отцемъ во Пророцѣхъ, въ послѣдокъ дній возглагола намъ въ Сынѣ: егоже благодатію и до днесь глаголетъ намъ въ наставникахъ нашихъ, въ животѣ своемъ поучавающихъ насъ вѣрѣ и надеждѣ, по исходѣ же своемъ увѣряющихъ насъ въ любви совершеннѣй, николиже отпадающей.

Слава, гласъ тойже:

Радуйся отче Иинокентіе, непорочности соименне, Церкви утвержденіе, благодати познаніе, чудесъ неисчислимыхъ сокровище, Іерарховъ похвало, пастырей образъ, пасомыхъ помощниче, чуждихъ и дальнихъ молитвенниче, града Иркутска украшеніе, обители твоея благолѣпіе, славо державы Россійскія: о нейже молися, да угаснутъ расколовъ шатанія, и да процвѣтетъ міръ во днехъ чадъ ея православныхъ.

И нынѣ, гласъ тойже: Владычице пріими...
Славословіе великое.
По Славословіи, тропарь Святаго. Слава, и нынѣ, богородиченъ.



На ЛИТУРГІИ,

Блаженна отъ канона Святаго, пѣснь 3-я, и 6-я. Прокименъ, гласъ 1: Уста моя возглаголютъ премудрость, и поученіе сердца моего разумъ. Стихъ: Услышите сія вси языцы, внушите вси живущіи по вселеннѣй. Апостолъ къ Евреемъ, зачало 318. Аллилуіа, гласъ 1: Восхвалятся преподобніи во славѣ, и возрадуются на ложахъ своихъ. Стихъ: Слава сія будетъ всѣмъ преподобнымъ его. Евангеліе отъ Іоанна, зачало 36. Причастенъ: Въ память вѣчную [будетъ праведникъ, отъ слуха зла не убоится].


МОЛИТВА КО СВЯТИТЕЛЮ ХРИСТОВУ ИННОКЕНТІЮ.

Святче Божій, Пастырю добрый, дѣлателю вѣрный винограда Христова, Святителю отче Иннокентіе, призри на градъ сей и на люди сія! Моли Христа Бога, да сохранитъ паству твою отъ волковъ губящихъ ю: да низпослетъ Духа своего Святаго, во еже умудрити насъ, ходити предъ нимъ во всякомъ благочестіи и чистотѣ во вся дни живота нашего: да славословяще имя его всесвятое во дни и въ нощи, сподобимся быти наслѣдницы и жизни вѣчныя, и прославимъ Отца и Сына и Святаго Духа, нынѣ и присно, и во вѣки вѣковъ.

Источникъ: Служба Святителю Иннокентію Епископу, Иркутскому Чудотворцу. — М.: Въ Сѵнодальной Типографіи, 1849. — 22 с.

/ Къ оглавленію раздѣла /


Наверхъ / Къ титульной страницѣ

0