Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 26 де́нь.
Слу́жба святи́телю Инноке́нтію, епи́скопу Ирку́тскому, чудотво́рцу.

НА ВЕЛИЦѢЙ ВЕЧЕРНИ,
На Го́споди воззва́хъ, стихи́ры на 8, гла́съ 6.

Восхва́лимъ му́жа сла́вна въ бытіи́, и отца́ на́шего святи́теля Инноке́нтія: мно́гу бо сла́ву созда́ Госпо́дь въ неистлѣ́ніи свята́го тѣлесе́ его́, положи́въ е́, я́ко свѣти́льникъ на свѣ́щницѣ, и озари́въ луча́ми чуде́съ его́ Ирку́тскую па́ству, я́ко да не отъи́детъ отъ нея́ па́мять пра́ведника, но поживе́тъ и́мя его́ въ ро́ды родо́въ, да прему́дрость его́ повѣ́дятъ язы́цы, зря́ще святу́ю Це́рковь, въ пѣ́снехъ и пѣ́ніихъ духо́вныхъ вы́ну повѣ́дающую хвалу́ его́. [Два́жды.]

Восхва́лимъ но́ваго апо́стола Христо́ва, гряду́щаго со Ева́нгеліемъ въ зе́млю язы́ковъ чужди́хъ, облагоуха́вшаго вѣ́рою послѣ́днія концы́ Россíи, процвѣ́тшаго, я́ко кринъ, на восто́кѣ ца́рства Сиби́рскаго, на язы́ки, не напое́нные струя́ми благода́ти, одожди́вшаго глаго́лы прему́дрости небе́сныя. [Два́жды.]

Егда́ те́мное Хи́новъ ца́рство, омраче́нное го́рдостію дре́вняго змíя, не можа́ше вмѣсти́ти свѣ́та ца́рствія Іису́са Христа́, и не хотя́ше прія́ти благосла́внаго іера́рха Россíйскаго; тогда́ во язы́цѣхъ, дви́жимыхъ ски́птромъ Импера́тора правосла́внаго, нача́тъ расти́ и мно́житися свята́я вѣ́ра христіа́нская, уста́ми святи́теля вели́каго Инноке́нтія, моля́щагося о душа́хъ на́шихъ. [Два́жды.]

Мѵ́ро благово́нное бы́сть и́мя твое́, отче́, излія́нное на па́ству, озаре́нную луча́ми добро́тъ твои́хъ, и на лю́ди благоговѣ́йно чту́щія святу́ю па́мять твою́, и на вся́ гра́ды и страны́ христіа́нскія, прославля́ющія ди́внаго во святы́хъ Свои́хъ Бо́га Изра́илева, Его́же моли́ спасти́ся душа́мъ на́шимъ.

На тебѣ́, о́тче, утверди́ся и́стина Госпо́дня, предрече́нная усты́ проро́ка, дре́вле возгласи́вшаго: пра́ведникъ, я́ко фи́никсъ процвѣте́тъ и, я́ко ке́дръ, и́же въ Лива́нѣ, умно́жится, и бу́детъ я́ко дре́во, насажде́нное при исхо́дищихъ во́дъ. Тѣ́мже мо́лимъ тя́, преди́вный іера́рше, осѣня́й моли́твами твои́ми гра́дъ се́й, и вся́ христіа́ны правосла́вныя.

Сла́ва, гла́съ 8:

Отче святи́телю Инноке́нтіе, по и́мени бы́сть та́ко и житіе́ твое́, я́ко убѣле́нъ бы́лъ еси́ неви́нностію во вся́ дни́ житія́ твоего́; пребыва́я же на земли́, я́ко стра́нникъ и пришле́цъ, пріусво́илъ еси́ Святу́ю Тро́ицу, и угото́валъ еси́ въ непоро́чнѣмъ се́рдцѣ твое́мъ оби́тель Отцу́ и Сы́ну и Свято́му Ду́ху, сего́ ра́ди и во гро́бѣ процвѣте́ нетлѣ́ніемъ свято́е тѣ́ло твое́, и ни еди́на отъ богоспаса́емыхъ косте́й твои́хъ сокруши́ся. Тѣ́мже лобыза́юще съ вѣ́рою, просла́вленныя оби́ліемъ изцѣле́ній, честны́я мо́щи твоя́, мо́лимъ тя́, уго́дниче Бо́жій, па́стырю ре́вностный, іера́рховъ украше́ніе: сотвори́ ны уго́дны бы́ти Святѣ́й Тро́ицѣ, Юже на земли́ просла́вилъ еси́ преподо́біемъ и пра́вдою, и Ейже предстои́ши ны́нѣ, при́сно хода́тайствуя о ми́рѣ па́ствы твоея́ и о спасе́ніи ду́шъ на́шихъ.

И ны́нѣ, богоро́диченъ.
Вхо́дъ. Проки́менъ дне́. Чте́нія три́:

Проро́чества Иса́іина чте́ніе. [Глава 35.]

Та́ко глаго́летъ Госпо́дь: да возвесели́тся пусты́ня жа́ждущая, да возра́дуется пусты́ня и процвѣте́тъ, я́ко кри́нъ, и да прозя́бнетъ, и вся́ возвеселя́тся. И возра́дуются пусты́нная Іорда́нова, и сла́ва Лива́нова дана́ бы́сть е́й, и че́сть Карми́лова, и лю́діе мои́ у́зрятъ сла́ву Госпо́дню и высоту́ Бо́жію. Укрѣпи́теся, ру́ки осла́бленныя и колѣ́на разсла́бленная, утѣ́шитеся и рцы́те малоду́шнымъ мы́слію, укрѣпи́теся и не бо́йтеся: се́ Бо́гъ на́шъ су́дъ воздае́тъ, То́й пріи́детъ и спасе́тъ на́съ. Тогда́ отве́рзутся очеса́ слѣпы́хъ и ушеса́ глухи́хъ услы́шатъ. Тогда́ ско́читъ хро́мый, я́ко еле́нь, и я́сенъ бу́детъ язы́къ гугни́выхъ, я́ко прорази́ся въ пусты́ни вода́, и де́брь въ земли́ жа́ждущей. И бу́детъ безво́дная во бла́та, и въ жа́ждущей земли́ исто́чникъ воды́ бу́детъ: та́мо бу́детъ весе́ліе пти́цъ, водворе́ніе си́риновъ и тро́стій, и бла́та. Та́мо бу́детъ пу́ть чи́стъ, и пу́ть свя́тъ нарече́тся; и не мимои́детъ та́мо нечи́стъ, ниже́ бу́детъ та́мо пу́ть нечи́стый; разсѣ́янніи же по́йдутъ по нему́ и не заблу́дятъ. И не бу́детъ та́мо льва́, ниже́ звѣре́й лю́тыхъ взы́детъ на́нь, ниже́ обря́щется та́мо, но по́йдутъ по нему́ изба́вленніи и со́бранніи отъ Го́спода. И обратя́тся, и пріи́дутъ въ Сіо́нъ съ весе́ліемъ и ра́достію, и весе́ліе вѣ́чное надъ главо́ю и́хъ. Хвала́ и ра́дованіе, и весе́ліе пости́гнетъ ихъ́: отбѣже́ болѣ́знь, печа́ль и воздыха́ніе.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 5:

Лобыза́йте, Сиби́рстіи наро́ди, слѣды́ кра́сныхъ но́гъ іера́рха Инноке́нтія, благовѣствова́вшаго въ предѣ́лехъ ва́шихъ ми́ръ и утвержде́ніе, положи́вшаго во еди́нѣмъ изъ градо́въ ва́шихъ нача́ло но́ваго священнонача́лія, и во еди́нѣй изъ святы́хъ оби́телей ва́шихъ процвѣта́ющаго нетлѣ́ніемъ, я́коже процвѣта́етъ вертогра́дъ напое́нный, ему́же не оскудѣ́ вода́ благода́тная, безъ цѣны́ напая́ющая жа́ждущія духо́внаго и тѣле́снаго исцѣле́нія.

Ты́ еси́ сла́ва гра́да Ирку́тска, Инноке́нтіе, ты́ еси́ украше́ніе Сиби́рскихъ стра́нъ, похвала́ Це́ркве Правосла́вныя, вели́чаніе Россíи Ма́лыя, въ не́йже процвѣ́лъ еси́ кри́нъ благоуха́нный, въ не́йже возже́глся еси́ свѣти́льникъ пресвѣ́тлый, въ не́йже роди́лся еси́ сы́нъ Ца́рствія Христо́ва, изъ нея́же призва́лся еси́ апо́столъ, со Ева́нгеліемъ отъ престо́льныхъ градо́въ протекíй до предѣ́лъ Монго́льскихъ, въ животѣ́ и по сме́рти поуча́яй омраче́нныя язы́ки.

Въ земнѣ́мъ учи́лищи Небе́сныя прему́дрости бы́лъ еси́ наста́вникъ, го́рняя, а не земна́я му́дрствовати науча́вый, и въ ю́ныхъ ра́зумѣхъ напечатлѣва́я дре́внія и́стины Ева́нгельскія, яви́лся еси́ са́мъ запечатлѣ́нъ Ду́хомъ Святы́мъ Богоно́сецъ, предъ Бо́гомъ ходи́вый, по Бо́зѣ ревнова́вый, Бо́гу предста́вый, я́ко моли́твенникъ о чту́щихъ святу́ю па́мять твою́, Инноке́нтіе.

Сла́ва, гла́съ 4:

На тебѣ́, святи́телю, почи́ Ду́хъ прему́дрости и ра́зума, Имже умудри́лся еси́ во спасе́ніе язы́ковъ; Ду́хъ совѣ́та и крѣ́пости, Имже ди́внымъ совѣ́томъ прозорли́ваго Импера́тора возмо́глъ еси́ соотвѣщава́ти; Ду́хъ вѣ́дѣнія и благоче́стія, Имже благоче́стно вѣ́дѣти Святу́ю Тро́ицу научи́лъ еси́, и́щущія ду́ха и се́рдца но́ваго.

И ны́нѣ, богоро́диченъ: При́зри на моле́нія...

На стихо́внѣ стихи́ры, гла́съ 7:

Помина́имъ, бра́тіе, наста́вника ди́внаго, и́же язы́комъ благогла́снымъ и житіе́мъ благосла́внымъ глаго́лаше на́мъ сло́во спасе́нія; взира́юще у́бо на блаже́нное сконча́ніе жи́тельства его́, подража́имъ вѣ́рѣ іера́рха, тлѣ́нное сіе́ обле́кшей въ нетлѣ́ніе, и ме́ртвенное сіе́ одѣ́явшей въ безсме́ртіе, преднапису́ющей о́бразъ о́бщаго воскресе́нія.

Сти́хъ: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится.

Виногра́дъ, принесе́нный отъ дре́вняго гра́да Кíева, на земли́ Сиби́рстѣй издаде́ цвѣ́тъ сво́й, простре́ ро́зги своя́ за мо́ре, и сотвори́ плоды́ во изцѣле́ніе язы́ковъ: въ не́мже обрѣта́юще духо́вное весе́ліе, вѣ́рніи, не изы́демъ изъ подъ сѣ́ни его́ благода́тныя, до́ндеже пріи́мемъ изцѣле́ніе неду́говъ душе́вныхъ, вку́пѣ же и тѣле́сныхъ.

Сти́хъ: Храни́тъ Госпо́дь вся́ ко́сти и́хъ, ни еди́на отъ ни́хъ сокруши́тся.

Пріиди́те язы́цы и ви́дите, я́ко дѣ́ло содѣ́ла Госпо́дь во дни́ ва́ша, ему́же не возмогли́ бы́сте вѣ́ровати, а́ще бы кто́ повѣ́далъ ва́мъ сицево́е, но зри́те и чуди́теся, ка́ко храни́тъ Госпо́дь вся́ ко́сти избра́нныхъ Свои́хъ, и ни еди́на отъ ни́хъ сокруша́ется; тѣ́мже у́бо не бу́дите невѣ́рни, но вѣ́рни.

Сла́ва, гла́съ 8:

Отче святи́телю Инноке́нтіе, яви́лъ еси́ въ преподо́біи твое́мъ сла́ву Ца́рствія Христо́ва, въ по́двизѣхъ до́брыхъ возглаго́лалъ еси́ си́лу благода́ти Его́, въ чудесѣ́хъ мно́гихъ возвели́чилъ еси́ побѣ́ду, побѣжда́ющую мíръ, вѣ́ру святу́ю, и са́мъ я́ко свяще́нникъ обле́клся еси́ во спасе́ніе; тѣ́мже и святы́ня Госпо́дня процвѣте́ на тебѣ́, я́ко пома́занномъ отъ Ду́ха Свята́го, Его́же Благíй да не отъи́метъ отъ на́съ согрѣши́вшихъ, но да обнови́тъ на́съ моли́твами твои́ми, уго́дниче Бо́жій.

И ны́нѣ, богоро́диченъ: Безневѣ́стная Дѣ́во...

На благослове́ніи хлѣ́бовъ, тропа́рь святи́теля два́жды, и Богоро́дице Дѣ́во... еди́ножды.

Тропа́рь святи́теля, гла́съ 3:

Свѣти́льниче Це́ркве пресвѣ́тлый, озари́вый луча́ми добро́тъ твои́хъ страну́ сію́, и исцѣле́ньми мно́гими притека́ющихъ къ ра́цѣ твое́й съ вѣ́рою Бо́га просла́вивый, мо́лимъ тя́, святи́телю о́тче Инноке́нтіе, огражда́й моли́твами твои́ми гра́дъ се́й отъ всѣ́хъ бѣ́дъ и печа́ли.


НА УТРЕНИ,
На Бо́гъ Госпо́дь: тропа́рь свята́го два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 5:

Не да́лъ еси́ сна́ очи́ма твои́ма, человѣ́че Бо́жій, ниже́ вѣ́ждома твои́ма дрема́нія, до́ндеже обрѣ́лъ еси́ мѣ́сто Го́сподеви посредѣ́ разруша́ющагося влады́чества дре́вняго омрачи́теля язы́ковъ, основа́лъ еси́ селе́ніе Бо́гу Іа́ковлю не во Іуде́и, ни во Іерусали́мѣхъ, но въ предѣ́лѣхъ Монго́льскихъ. Тѣ́мже яви́лся еси́ и Дави́дъ, положи́вый во странѣ́ невѣ́рія тве́рдое основа́ніе вѣ́ры, и Соломо́нъ, умудри́выйся въ созида́ніи спасе́нія ста́да твоему́. [Два́жды.]

Сла́ва, и ны́нѣ:

Бо́га, изъ Тебе́ воплоти́вшагося, позна́хомъ, Богоро́дице Дѣ́во, Того́ моли́ о спасе́ніи гра́да на́шего, и всѣ́хъ запечатлѣ́нныхъ и́менемъ Сы́на Твоего́.

По 2-мъ стихосло́віи сѣда́ленъ, гла́съ 4:

Яко мѵ́ро на главѣ́, сходя́щее на браду́, браду́ Ааро́ню, сходя́щее на оме́ты оде́жды его́, и я́ко роса́ Аермо́нская, сходя́щая на го́ры Сіо́нскія, та́ко благода́ть Ду́ха Свята́го, благоуха́ющи вы́ну на просла́вленномъ нетлѣ́ніемъ тѣлеси́ твое́мъ, притека́ющія къ ра́цѣ твое́й съ вѣ́рою напоя́етъ ра́достію о Го́сподѣ, прославля́ющемъ тя́. [Два́жды.]

Сла́ва, и ны́нѣ:

Со святи́телемъ, Пречи́стая, и всѣ́ми святы́ми, во святы́хъ Еди́наго Почива́ющаго умоли́, всѣ́хъ освяти́ти на́съ, славосло́вящихъ Тя́ во вся́ вѣ́ки.

По поліеле́и сѣда́ленъ, гла́съ 3:

Госпо́дь, не лиша́яй благи́хъ, ходя́щія незло́біемъ, благода́ть и сла́ву даде́ ти, святи́телю Инноке́нтіе, ю́же всели́лъ еси́ въ земли́ на́шей; и на Небеси́ у́бо сподо́би ны́, твои́ми моли́твами, вѣ́чныя сла́вы съ тобо́ю, и со всѣ́ми святы́ми, Бо́гу благоугоди́вшими. [Два́жды.]

Сла́ва, и ны́нѣ:

Покро́въ бу́ди ми́, и предста́тельство, и заступле́ніе, и похвала́, Дѣ́во, я́ко Ты́ еси́ безпомо́щныхъ си́ла необори́мая, и наде́жда ненадѣ́емыхъ.

Посе́мъ 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Та́же: Вся́кое дыха́ніе... Ева́нгеліе отъ Матѳе́я, зача́ло 11.

По Ева́нгеліи стихи́ра, гла́съ 6:

Да испо́лнятся уста́ на́ша хвале́нія Твоего́, Го́споди, я́ко да воспои́мъ сла́ву Твоего́ уго́дника, его́же просла́вилъ еси́ нетлѣ́ніемъ и чудотворе́ньми, въ бѣда́хъ су́щимъ показа́лъ еси́ помо́щника, въ неду́зѣхъ ско́раго цѣли́теля, въ ско́рбехъ утѣ́шителя, чту́щихъ его́ святу́ю па́мять те́плаго моли́твенника.

Кано́нъ, [его́же краегране́сіе: Инноке́нтій, моли́твенникъ о душа́хъ на́шихъ.] Гла́съ 8.

Пѣ́снь 1.

Ирмо́съ: Истря́сшему въ мо́ри мучи́тельство фарао́не, и Изра́иля су́шею наста́вльшему, пои́мъ Христу́: я́ко просла́вися во вѣ́ки.

Іера́рше непоро́чне, при́зри съ Небесе́ и ви́ждь, и посѣти́ осѣне́ніемъ твои́мъ виногра́дъ се́й, его́же насади́ десни́ца твоя́ во странѣ́ язы́ковъ, да просла́вимъ благоговѣ́йно чудеса́ твоя́, а́ще и не возмо́жно е́сть исчи́слити я́.

На пути́ иногда́ вразумля́ше Валаа́ма осли́ца, да не и́детъ проклина́ти Изра́иля, его́же и благослови́ прише́дый отъ Месопота́міи; си́це утомле́нными ко́ньми вразумле́нъ бы́сть преогорче́нный пу́тникъ, да возда́стъ святи́телю Инноке́нтію сла́ву, е́юже обѣща́ся.

Но́гъ болѣ́знію, и разслабле́ніемъ всѣ́хъ чле́новъ неду́гующему, яви́лся еси́ ско́рый цѣли́тель, о́тче на́шъ Инноке́нтіе, не пре́зри у́бо и ны́нѣ съ вѣ́рою притека́ющихъ къ живоно́снымъ и присноцѣле́бнымъ моще́мъ твои́мъ.

Богоро́диченъ: Отцу́ Собезнача́льнаго Сы́на пло́тію родила́ еси́, Пренепоро́чная Дѣ́во, Его́же моли́ со святи́телемъ, да сотвори́тъ ны́ сы́ны Своего́ Ца́рствія, и наслѣ́дники обѣтова́нія вѣ́чнаго.

Катава́сія по уста́ву.

Пѣснь 3.

Ирмосъ: Утверди́ на́шъ у́мъ и сердца́, Небеса́ сло́вомъ утвержде́й, во е́же пѣ́ти и сла́вити Тя́, во спасе́ніе ду́шъ на́шихъ.

Купину́ втору́ю показа́лъ еси́, слове́сный па́стырю, егда́ моли́твами твои́ми сохрани́лъ еси́ посредѣ́ пла́мене невреди́му святу́ю це́рковь, въ не́йже почива́ше не у́ просла́вленное на земли́, но съ Небесе́ оби́ліемъ чудотворе́ній я́вственно свидѣ́тельствованное свя́то бы́ти нетлѣ́нное тѣ́ло твое́.

Еди́нѣй вѣ́рѣ досту́пенъ яви́лся еси́, непоро́чне: тѣ́мже съ премѣне́ніемъ естества́ уста́вовъ, мра́зъ и и́ней сокры́ша чистоту́ твою́ отъ оче́съ нечи́стыхъ, дерзну́вшихъ въ невѣ́ріи ви́дѣти тя́, и́мже не да́лъ еси́ узрѣ́ти сла́вы твоея́, поуча́я ны́ чи́стымъ се́рдцемъ тебе́ сла́вити.

На по́мощь ско́ро прите́клъ еси́ къ ста́рцу, очи́ма тя́жко ви́дящему, и прикосну́вся болѣ́зненной главѣ́ его́, яви́лъ еси́ на не́мъ дѣла́ Бо́жія; просвѣти́ у́бо и на́ша душе́вныя о́чи моли́твами твои́ми, священнонача́льниче.

Богоро́диченъ: Тве́рдое и непрело́жное упова́ніе вѣ́мы Тя́, Богоро́дице, его́же держи́мся, и упова́юще мо́лимся: сохрани́ гра́дъ се́й, и вся́ гра́ды и страны́ христіа́нскія отъ всѣ́хъ бѣ́дъ, находя́щихъ человѣ́комъ согрѣша́ющимъ, но а́біе моли́твами Твои́ми пріе́млющимъ согрѣше́ній оставле́ніе.

Сѣда́ленъ, гла́съ 3:

Тако́въ на́мъ подоба́ше архіере́й, преподо́бенъ, незло́бивъ, кро́токъ, отлуче́нъ отъ грѣ́шникъ, и́же предъ вѣ́чнымъ Архіере́емъ, Іису́съ Христо́мъ, мо́лится вы́ну о спасе́ніи ста́да своего́: мно́го бо мо́жетъ моли́тва пра́веднаго, поспѣшеству́ема во благо́е.

Сла́ва, гла́съ то́йже:

Прото́ржеся вода́ въ пусты́ни, исто́чникъ исцѣле́ній истека́етъ отъ неистлѣ́нныхъ моще́й святи́теля Инноке́нтія, ра́дость вѣ́чная надъ главо́ю его́, ея́же да сподо́бимся и мы́ моли́твами его́, въ невече́рнемъ дни́ воскресе́нія.

И ны́нѣ, богоро́диченъ:

О Тебѣ́, Отрокови́це, возгласи́ проро́къ, глаго́ля: се́ врата́ восто́ка, и бу́дутъ затворе́на, и никто́же про́йдетъ сквозѣ́ я́: но Госпо́дь Бо́гъ еди́нъ про́йдетъ, и бу́дутъ врата́ затворе́на.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божество́.

Іису́съ въ дому́ Петро́вѣ прикосну́ся руцѣ́ те́щи его́, огне́мъ жего́мыя, и а́біе оста́ви ю́ о́гнь; сія́ же зна́менія послѣ́доваша тебѣ́ вѣ́рующему чудотво́рцу, укроти́лъ бо еси́ огне́вицу еди́нымъ прикоснове́ніемъ бо́ку лежа́щаго на одрѣ́ сме́рти, но призва́вшаго тя́ во упова́ніи жи́зни.

Исцѣля́хуся иногда́ вѣ́рующіи отъ нанесе́нія главотя́жей и убру́сцевъ Па́вловыхъ; не про́сты си́лы творя́ше Бо́гъ и твои́ма рука́ма, но́вый апо́столе, пе́рсть бо отъ твоея́ свяще́нныя ра́ки и еле́й отъ лампа́ды отверза́ютъ слѣпотству́ющей о́чи и да́руютъ исцѣле́ніе.

Моли́тва вѣ́ры спасе́ лю́тѣ боля́щаго, и́же и исповѣ́да, я́ко вра́чеве не воскреся́тъ, упова́ніе же на тя́, благосе́рдый о́тче, николи́же посрамля́етъ съ вѣ́рою призыва́ющихъ тя́ во благовре́менную по́мощь.

Богоро́диченъ: Отрокови́ца неискусому́жная ражда́етъ Прови́дѣннаго Ду́хомъ отъ Авваку́ма, и къ Рожде́нному мо́лится о душа́хъ на́шихъ, му́дрѣ пасо́мыхъ па́стыремъ, и по исхо́дѣ свое́мъ вы́ну съ на́ми въ неистлѣ́ніи свята́го тѣлесе́ своего́ пребыва́ющимъ.

Пѣ́снь 5.

Ирмо́съ: Отъ но́щи невѣ́дѣнія, Боговѣ́дѣнія де́нь, во свѣ́тѣ лица́ Твоего́, Христе́, да возсія́етъ, ко у́тру хвале́ніе Твое́ въ сердца́хъ на́шихъ.

Любо́вію погрузи́ся во струя́хъ упова́нія на уго́дника Бо́жія, покры́тый отъ главы́ до но́гъ стру́пами и во пло́ти свое́й не обрѣта́яй исцѣле́нія, и а́біе очи́стися отъ нечистоты́ болѣ́зненныя, я́коже Неема́нъ отъ прока́зы, погруже́ніемъ во Іорда́нѣ, по глаго́лу Елиссе́еву.

Ищущимъ тебе́ обрѣта́ешися гото́вый помо́щникъ, святи́телю Инноке́нтіе, и ско́ро подае́ши неду́говъ исцѣле́ніе, я́коже иногда́ женѣ́, болѣ́знующей десно́ю руко́ю, яви́лся еси́ въ со́нномъ видѣ́ніи и сотвори́лъ еси́ ю́ здра́ву за еди́ное призва́ніе свята́го твоего́ и́мене.

Тве́рдое благода́ти позна́ніе утвержда́я въ вѣ́рующихъ, научи́лъ еси́ на́съ вѣ́дѣти тя́, я́ко наста́вника ми́лостиваго, благоутро́бія сокро́вище, правовѣ́рія учи́теля, архіере́евъ похвалу́, безпомо́щныхъ засту́пника, при́сно моля́щагося о спасе́ніи ча́дъ твои́хъ, съ вѣ́рою къ тебѣ́ притека́ющихъ.

Богоро́диченъ: Вереи́ а́довы сломи́шася, и закле́пи вѣ́чніи сокруши́шася Ро́ждшимся отъ Тебе́, Пречи́стая Ма́ти. Тѣ́мже мо́лимъ Тя́: изба́ви ны́ отъ вѣ́чныя сме́рти хода́тайствомъ Твои́мъ и всели́ ны во свѣ́тѣ Сы́на Твоего́, свѣ́тъ искупле́нія мíрови возсія́вшаго.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ели́цы притека́ху къ тебѣ́, помо́щниче те́плый, не отхожда́ху посра́млени, немощнíи исцѣля́хуся, въ болѣ́зни дѣторожде́нія су́щія, отъ многоцѣле́бныя благосты́ни твоея́ пріима́ху ско́рое неду́га разрѣше́ніе, слѣпíи прозира́ху; посѣти́ у́бо и на́съ, ще́дрый о́тче, твое́ю по́мощію.

Не бу́ди невѣ́ренъ, но вѣ́ренъ, ре́клъ еси́, о́тче, втори́цею яви́выйся отъ преломле́нія ноги́ лю́тѣ стра́ждущему, и уда́ривъ жезло́мъ въ мѣ́сто, идѣ́же стоя́стѣ но́зѣ твои́, я́звою на дре́вѣ уврачева́лъ еси́ душе́вную я́зву омраче́ннаго невѣ́ріемъ, а́біе бо исповѣ́да бы́ти тебе́ благода́тнаго врача́, воздви́гшаго его́ отъ одра́ болѣ́зненнаго.

Непоро́чныма твои́ма рука́ма препо́далъ еси́, архіере́ю Бо́жій, безсме́ртную пи́щу стра́ждущей, о чу́до! на Небеси́ пріобща́яся и́стѣе Невече́рняго Свѣ́та, вя́щше седми́десяти лѣ́тъ по твое́мъ успе́ніи, и на земли́ явля́ешися священнодѣ́йствитель Боже́ственныхъ Та́инъ, увѣря́я па́ству твою́ въ неразлу́чномъ пребыва́ніи вы́ну съ притека́ющими ко твое́й по́мощи.

Богоро́диченъ: Истины учи́телю, наста́ви ны́ во и́стиннѣй вѣ́рѣ, моля́ о спасе́ніи на́шемъ съ Пречи́стою Дѣ́вою Богоро́дицею Рожде́ннаго отъ Нея́ на спасе́ніе всего́ мíра.

Конда́къ гла́съ 4:

Непоро́чности соиме́ннаго па́стыря, проповѣ́дника вѣ́ры въ язы́цѣхъ Монго́льскихъ, сла́ву и украше́ніе Ирку́тскія па́ствы, любо́вію восхва́лимъ вси́ вѣ́рніи: то́й бо е́сть храни́тель страны́ сея́, и моли́твенникъ о душа́хъ на́шихъ.

Икосъ:

Ангельскимъ житіе́мъ возвы́сился еси́, о́тче, до лицезрѣ́нія красоты́ несозда́нныя, ея́же наслажда́яся ны́нѣ на Небеси́, мо́лишися о спасе́ніи на́шемъ, на́съ же на земли́ науча́еши взыва́ти тебѣ́ такова́я: Ра́дуйся, кри́не, въ благорастворе́нномъ ю́зѣ процвѣты́й; ра́дуйся, пе́рвенче духо́внаго сыноположе́нія, отъ Ма́лыя Россíи Бо́гу посвяще́нный. Ра́дуйся, сла́во и велича́ніе гра́да Кíева; ра́дуйся, въ земно́мъ учи́лищи Небе́сныя му́дрости наста́вниче. Ра́дуйся, му́дрый исполни́телю велѣ́ній царя́ земна́го; ра́дуйся, му́жественный подви́жниче Царя́ небе́снаго. Ра́дуйся, проповѣ́дниче вѣ́ры въ язы́цѣхъ Монго́льскихъ; ра́дуйся, началоположи́телю до́браго священнонача́лія во страна́хъ Сиби́рскихъ. Ра́дуйся, украше́ніе Ирку́тскія па́ствы; ра́дуйся, благоуха́ніе пусты́ни. Ра́дуйся, о́бщаго воскресе́нія въ нетлѣ́ніи твое́мъ увѣри́телю; ра́дуйся, неизчерпа́емыхъ чуде́съ исто́чниче. Ра́дуйся, храни́телю страны́ тобо́ю избра́нныя; ра́дуйся, Инноке́нтіе, моли́твенниче о душа́хъ на́шихъ.

Пѣ́снь 7.

Ирмо́съ: Въ нача́лѣ зе́млю основа́вый и Небеса́ сло́вомъ утверди́вый, благослове́нъ еси́ во вѣ́ки, Го́споди Бо́же оте́цъ на́шихъ.

Крѣ́пость и исцѣле́ніе пріима́ху отъ тебе́, о́тче, немощству́ющіи пло́тію; ско́рбніи же ду́хомъ и удруче́нніи печа́льми жите́йскими обрѣта́ху душе́вное утѣше́ніе во умиле́нномъ призыва́ніи свята́го и просла́вленнаго и́мене твоего́, прославля́ющаго ди́внаго во святы́хъ Свои́хъ Бо́га Изра́илева.

Отче, непоро́чности соиме́нне, та́ко просла́вися свѣ́тъ тво́й предъ человѣ́ки, я́ко ви́дяще до́брая дѣла́ твоя́ и чудотворе́нія мно́гая, прославля́ютъ чудодѣ́йствующаго тобо́ю, ди́внаго во святы́хъ Свои́хъ Бо́га Изра́илева.

Тро́ичень: Душе́вныя на́ша болѣ́зни исцѣли́, Бо́же, моли́твами просла́вленнаго отъ Тебе́ уго́дника, ускоря́ющаго на по́мощъ умиле́нною душе́ю, тре́бующимъ дѣ́йственнаго его́ предъ Тобо́ю, Тро́ице Свята́я, заступле́нія.

Богоро́диченъ: Умъ на́шъ плѣни́ въ послуша́ніе вѣ́ры, ду́хъ и ду́шу всесоверше́ны соблюди́, и тѣ́ло въ прише́ствіе Го́спода на́шего Іису́са Христа́ непоро́чно сохрани́, моли́твами Твои́ми, Богороди́тельнице.

Пѣ́снь 8.

Ирмо́съ: Безнача́льнаго Царя́ Сла́вы, Его́же трепе́щутъ небе́сныя си́лы, по́йте, свяще́нницы, лю́діе, превозноси́те во вся́ вѣ́ки.

Широ́кій пу́ть, вводя́щій въ па́губу, презрѣ́лъ еси́, преподо́бне, и тѣ́сными враты́ вше́лъ еси́ въ небе́сное Ца́рствіе. Отъону́ду же призира́я вы́ну на призыва́ющихъ тя́ съ вѣ́рою, укрѣпи́ у́бо и на́съ понести́ благо́е и ле́гкое и́го Креста́, да вни́демъ въ поко́й Бо́га благослове́ннаго.

Ангелоподо́бнымъ житіе́мъ на земли́, обрѣ́лъ еси́ благода́ть исцѣле́ній, и яви́лся еси́ вои́стинну а́нгелъ-храни́тель па́ствы твоея́, бо́дрственно утвержда́я ю́ въ вѣ́рѣ многоразли́чными твои́ми чудотворе́ніи, и соблюда́я въ чи́стомъ исповѣ́даніи отце́въ Бо́га благослове́ннаго.

Христо́во благоуха́ніе яви́лся еси́, о́тче, въ спаса́емыхъ тобо́ю отъ неду́говъ душе́вныхъ же и тѣле́сныхъ; тѣ́мже обита́тели гра́да тобо́ю избра́ннаго, прославля́юще святу́ю па́мять твою́, благословля́ютъ просла́вившаго тя́, отце́въ Бо́га благослове́ннаго.

Богоро́диченъ: Нѣ́сть на́ша бра́нь ко пло́ти и кро́ви, но къ нача́ломъ, и ко власте́мъ, и къ міродержи́телемъ тьмы́ вѣ́ка сего́, къ духово́мъ зло́бы поднебе́снымъ; надъ ни́миже покажи́ ны, Влады́чице, побѣди́тели, я́ко да по о́бразу непоро́чнаго па́стыря возмо́жемъ вся́ стрѣ́лы лука́ваго разжже́нныя угаси́ти.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Апо́столъ язы́ковъ бы́лъ еси́, о́тче, я́коже и Па́велъ, тѣ́мже ны́нѣ восхище́нъ еси́ на высоту́ Боже́ственнаго лицезрѣ́нія, идѣ́же мо́лишися, да Бо́гъ возрасти́тъ, е́же ты́, му́дрый дѣ́лателю, насади́лъ и напои́лъ еси́.

Шле́мъ спасе́нія воспріи́мъ, и мече́мъ духо́внымъ препоя́сався, изше́лъ еси́ на дѣ́ло твое́, па́стырю ди́вный, и согради́лъ еси́ опло́тъ благоче́стія во мра́цѣ язы́чества. Моли́ у́бо преблага́го Бо́га, да укрѣпи́тъ, е́же содѣ́ла въ на́съ руко́ю твое́ю.

Именемъ и житіе́мъ непоро́чне, пріими́ хвале́бныя пѣ́сни, любо́вію къ тебѣ́ возноси́мыя, осѣня́я моли́твами твои́ми па́ству, осія́нную луча́ми добро́тъ твои́хъ, и ускоря́я на по́мощь благода́тнымъ заступле́ніемъ твои́мъ во вре́мя благопотре́бно.

Богоро́диченъ: Херуви́мовъ честнѣ́йшая, и сла́внѣйшая безъ сравне́нія Серафи́мовъ, не пре́зри моле́нія ра́бъ Твои́хъ, но покры́й на́съ честны́мъ Твои́мъ покро́вомъ: спаси́ Импера́тора, и лю́ди, благоговѣ́йно чту́щія па́мять непоро́чнаго па́стыря, и моли́твенника о гра́дѣ се́мъ, ди́внаго Инноке́нтія.

Свѣти́ленъ, гла́съ 1:

Сла́ва Тебѣ́, Бо́гу, показа́вшему на́мъ свѣ́тъ спасе́нія въ житіи́ и словеси́ Твоего́ уго́дника; сла́ва Тебѣ́, Благода́телю, возсія́вшему просвѣще́ніе и́стины въ побо́рницѣ благоче́стія и и́стины; сла́ва Тебѣ́, ди́вному Щедротода́вцу, удиви́вшему ми́лости Твоя́ на ходи́вшемъ во свѣ́тѣ Лица́ Твоего́, святи́телѣ и чудотво́рцѣ Инноке́нтіи. [Два́жды.]

Сла́ва, и ны́нѣ, богоро́диченъ:

Свѣ́тъ мíрови возсія́ въ Рождествѣ́ Твое́мъ, Пречи́стая Богоро́дице, осія́й у́бо у́мъ на́шъ позна́ніемъ Сы́на Твоего́, се́рдце уязви́ любо́вію къ Боже́ственнымъ за́повѣдемъ, укрѣпля́ющи ны́ моли́твами Твои́ми въ вѣ́рѣ и благодѣ́ланіи.

На хвали́техъ стихи́ры, гла́съ 8:

Мно́гое мно́жество чуде́съ твои́хъ, Инноке́нтіе, проповѣ́дуетъ вели́чество сла́вы Бо́га на́шего, на Небеси́ си́лами разу́мными неумо́лчно воспѣва́емаго, на земли́ же въ душа́хъ и тѣлесѣ́хъ святы́хъ Свои́хъ ди́вно прославля́емаго. Его́же моли́, препросла́вленне святи́телю, о спасе́ніи ду́шъ на́шихъ.

Еди́нѣми усты́, и еди́нѣмъ се́рдцемъ, просла́вимъ лю́діе, Бо́га чудодѣ́йствующаго, удиви́вшаго щедро́ты Своя́ во дни́ на́ша: дре́внія ми́лости, глаго́ланныя ко отце́мъ на́шимъ въ чудесѣ́хъ святы́хъ Свои́хъ, возглаго́лавшаго и ны́нѣ въ нетлѣ́ніи непоро́чнаго па́стыря, чудотво́рца но́ваго, утверди́вшаго кра́сныя но́ги своя́ во страна́хъ Сиби́рскихъ и украси́вшаго пусты́ню, я́ко кри́нъ кра́сный.

Не отцы́ на́ши возвѣсти́ша на́мъ, о́тче, сла́ву твою́, не ста́рцы на́ши повѣ́даша на́мъ чудеса́ твоя́, чудотво́рче, но са́ми ви́дѣхомъ осѣня́ющую непоро́чное тѣ́ло твое́ си́лу Бо́жію, чудодѣ́йствующую тобо́ю въ зна́меніихъ ди́вныхъ и мно́гихъ: сро́дницы и зна́еміи на́ши позна́ша благода́тную по́мощь твою́, ея́же и мы́, дерза́юще, про́симъ и неоску́дно пріе́млемъ.

Дре́вле Бо́гъ, глаго́лавый отце́мъ во проро́цѣхъ, въ послѣ́докъ днíй возглаго́ла на́мъ въ Сы́нѣ, Его́же благода́тію и додне́сь глаго́летъ на́мъ въ наста́вницѣхъ на́шихъ, въ животѣ́ свое́мъ поуча́ющихъ на́съ вѣ́рѣ и наде́ждѣ, по исхо́дѣ же свое́мъ увѣря́ющихъ на́съ въ любви́ соверше́ннѣй, николи́же отпа́дающей.

Сла́ва, гла́съ то́йже:

Ра́дуйся, о́тче Инноке́нтіе, непоро́чности соиме́нне, Це́ркве утвержде́ніе, благода́ти позна́ніе, чуде́съ неисчи́слимыхъ сокро́вище, іера́рховъ похвало́, па́стырей о́бразе, пасо́мыхъ помо́щниче, чужди́хъ и да́льнихъ моли́твенниче, гра́да Ирку́тска украше́ніе, оби́тели твоея́ благолѣ́піе, сла́во держа́вы Россíйскія, о не́йже моли́ся, да уга́снутъ раско́ловъ шата́нія, и да процвѣте́тъ ми́ръ во дне́хъ ча́дъ ея́ правосла́вныхъ.

И ны́нѣ, гла́съ то́йже: Влады́чице пріими́...
Славосло́віе вели́кое.
По славосло́віи, тропа́рь свята́го. Сла́ва, и ны́нѣ, Богоро́диченъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́емъ, зача́ло 318. Аллилу́ія, гла́съ 1: Восхва́лятся преподо́бніи во сла́вѣ, и возра́дуются на ло́жахъ свои́хъ. Сти́хъ: Сла́ва сія́ бу́детъ всѣ́мъ преподо́бнымъ его́. Ева́нгеліе отъ Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ отъ слу́ха зла́ не убои́тся].

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 65 об. – 73.

/ Къ оглавленію раздѣла /


Наверхъ / Къ титульной страницѣ

0