Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 26-й де́нь.
Слу́жба освяще́нія це́ркве свята́го великому́ченика Гео́ргія, я́же въ Кíевѣ предъ враты́ Святы́я Софíи.

ВЕЧЕРЪ,
Блаже́нъ му́жъ, [1-й антифо́нъ.] На Го́споди, воззва́хъ: стихи́ры [на 8], гла́съ 4. Подо́бенъ: Яко до́бля.

Страда́лецъ ди́вный,* во́инъ хра́брый непобѣди́мь* и свѣти́льникъ всемíрный,* по́двиги страда́ній твои́хъ* вся́ просвѣща́я мíра концы́,* отгоня́я мра́къ де́моновъ лю́тый,* Гео́ргіе страстоте́рпче,* удобре́ніе му́чениковъ* и сограждани́нъ небе́сныхъ во́инствъ. [Три́жды.]

Преслову́щій въ му́жествѣ,* красе́нъ въ во́зрастѣ бы́въ,* въ словесѣ́хъ и дѣ́лѣхъ отъ всѣ́хъ преудивля́емь,* хра́борски отлучи́вся къ подвиго́мъ муче́нія за Христа́,* небоя́зненно на враги́ воздви́глъ еси́ побѣ́ды* вели́кими твои́ми страда́ніи,* сего́ ра́ди тя́, Гео́ргіе,* во хвале́ніи чти́мъ ра́достно, досточу́дне,* красота́ му́чениковъ и похвала́. [Три́жды.]

На высоту́ небе́сную, ра́дуяся, возше́лъ еси́,* въ прекра́сную оде́жду облече́нъ,* отъ твои́хъ страда́льческихъ крове́й обагре́ную,* Царю́ всѣ́хъ предста́въ,* живонача́льною десни́цею вѣнча́емь.* Тѣ́мже дне́сь, Гео́ргіе великострада́льче,* твою́ па́мять свѣтоза́рную соверша́ющимъ* испроси́ просвѣще́ніе* и спасе́ніе ду́шъ на́шихъ. [Два́жды.]

Сла́ва, гла́съ 6. Самогла́сенъ:

Дне́сь пріиди́те, празднолю́бніи собо́ри, страстоте́рпца честно́е торжество́ свѣ́тло пра́зднуемъ, и́бо неви́димаго врага́ низложи́, зако́нно по Христѣ́ пострада́въ и досто́йно прія́ побѣ́ды отъ Спа́са вѣне́цъ, и ны́нѣ на небесѣ́хъ, со а́нгелы ра́дуяся, Тро́ицѣ свѣ́тло предстои́тъ. Тѣ́мже и мы́ пѣ́сньми хвале́нія воспое́мъ: ра́дуйся, тве́рдый страда́льче непобѣди́мый; ра́дуйся, хра́брый ору́жниче Христо́въ; ра́дуйся, многобо́жія льсти́ потреби́телю и и́стинныя вѣ́ры свѣ́тлый побо́рниче. Но, о страстоте́рпцевъ украше́ніе, Гео́ргіе! моли́ся Го́споду изба́витися на́мъ ви́димыхъ и неви́димыхъ вра́гъ и спасти́ся душа́мъ на́шимъ.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

За всѣ́хъ жи́знь стра́ждеши,* кро́вь твою́ излива́я,* страстоте́рпче Гео́ргіе.* Кро́вь Свою́ тебе́ ра́ди излія́вшему,* приве́лся еси́ Христу́, блаже́нне,* тѣ́мъ о́бщника Своея́ сла́вы сотвори́ тя* и Ца́рства соприча́стника,* я́ко му́жествовавша крѣ́пко на льсти́ваго* и сего́ ухищре́нія до конца́ низложи́вшаго.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Благоче́стія сто́лпъ бы́лъ еси́,* основа́нъ тве́рдо на ка́мени вѣ́ры,* искуше́ній вѣ́тры непоколе́блемь,* муче́ній мно́гихъ, блаже́нне:* съ лю́тою бо я́ростію врази́ тебѣ́ прирази́шася,* тща́щеся низложи́ти,* и не возмого́ша крѣ́пости твоея́,* но, посра́млени, падо́ша,* побѣди́тельнымъ бо отъ Христа́ вѣнце́мъ* украси́тися возжелѣ́лъ еси́.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Вопло́щшемуся Христу́ Бо́гу на́шему* и стра́стію кре́стною* низложи́вшему отсту́пника,* во́льнымъ Того́ страсте́мъ,* страстоте́рпче Гео́ргіе, поревнова́въ,* и ра́нами протяза́емь,* хва́лящагося неви́димаго врага́,* съ пло́тію, му́чениче, побѣди́въ,* на зе́млю низложи́лъ еси́.

Сла́ва, гла́съ 4. Самогла́сенъ:

Пріиди́те, вѣ́рныхъ собо́ри, пріиди́те, пра́здникъ соста́вимъ, и́бо пресвѣ́тлая па́мять дне́сь яви́ся страстоте́рпца Гео́ргія, на́ша просвѣща́етъ неви́димо сердца́, добродѣ́тельми блиста́ющи. Тѣ́мже, единому́дренно воспѣва́юще, рце́мъ: ра́дуйся, во́ине вели́каго Царя́ Христа́; ра́дуйся, пресвѣ́тлая похвало́ вѣ́ры; ра́дуйся, всесвѣ́тле и пребога́те. О на́съ, преблаже́нне, всѣ́хъ Влады́ку Христа́ Бо́га моли́, сохране́ннымъ бы́ти отъ искуше́ній лука́ваго и спасти́ ду́ши на́ша.

И ны́нѣ, богоро́диченъ: При́зри на моле́нія...

Тропа́рь, гла́съ 4:

Дне́сь блажа́тъ тя́ мíра концы́, Боже́ственныхъ чуде́съ испо́лншеся, и земля́ ра́дуется, напи́вшися кро́ве твоея́. Христоимени́тіи же лю́діе гра́да Кíева освяще́ніемъ Боже́ственнаго хра́ма твоего́ ра́достію возвесели́шася, страстоте́рпче Гео́ргіе, сосу́де избра́нный Свята́го Ду́ха, уго́дниче Христо́въ. Его́же моли́ съ вѣ́рою и мольбо́ю приходя́щимъ во святы́й тво́й хра́мъ, да́ти очище́ніе грѣхо́въ, умири́ти мíръ и спасти́ ду́ши на́ша.

Сла́ва, и ны́нѣ, богоро́диченъ: Еже отъ вѣ́ка утае́ное...



[НА УТРЕНИ,]
На Бо́гъ Госпо́дь: тропа́рь два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4:

Страстоте́рпца дне́сь Гео́ргія благоче́стно сотворя́емъ пра́зднество — освяще́ніе хра́ма, я́ко непреста́нно мо́лится Го́споду всѣ́мъ да́ти ми́ръ и спасе́ніе душа́мъ на́шимъ. [Два́жды.]

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ, на́шу Помо́щницу и къ Бо́гу премѣне́ніе, Ея́же ра́ди тли́ изба́вихомся, Богоро́дицу, вѣ́рніи, ублажа́емъ.

По 2-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Земно́е во́инство и че́сть отри́нулъ еси́, я́ко ско́ро ги́бнущую, на небесѣ́хъ со а́нгельскими во́и бы́ти возжелѣ́въ и сла́вы, при́сно вѣ́чно пребыва́ющія. Тѣ́мже, мно́ги му́ки претерпѣ́въ, сме́рть прія́лъ еси́, сего́ ра́ди, дне́сь всесвяту́ю твою́ па́мять пра́зднующе, Христу́ прино́симъ хвалу́, треблаже́нне Гео́ргіе. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію мо́лимъ вси́ и Дѣ́ву вои́стинну, въ щедро́ты Твоя́ вопіе́мъ, любо́вію прибѣга́юще въ Твою́ бла́гость, Тя́ бо и́мамы, грѣ́шніи, засту́пницу, Тебе́ стяжа́хомъ въ напа́стехъ спасе́ніе, еди́ну Пречи́стую.

По поліеле́и сѣда́ленъ, гла́съ 8. Подо́бенъ: Прему́дрости.

Яко лучи́, блиста́ніи чуде́съ вся́ просвѣща́еши мíра концы́, я́ко звѣзда́ пресвѣ́тлая, и красно́ благоуха́еши, я́ко Боже́ственный ра́й, при́сно ду́ши на́ша весели́ши и отго́ниши неду́ги. Тѣ́мже тя́, блаже́нне, по до́лгу пое́мъ и любо́вію чти́мъ честну́ю па́мять твою́, великому́чениче Гео́ргіе. Моли́ Христа́ Бо́га согрѣше́ній оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Прему́дрость и Сло́во въ Твое́мъ чре́вѣ заче́нши, неопа́льно, Ма́ти Бо́жія, мíру родила́ еси́, мíръ Содержа́щаго и во объя́тіяхъ понесла́ еси́ вся́ Нося́щаго, Пита́теля всѣ́хъ и Творца́ тва́ри. Тѣ́мже молю́ Тя, всесвята́я Дѣ́во, и вѣ́рно сла́влю Тя́, изба́витися мнѣ́ прегрѣше́ній, и въ де́нь Суда́, егда́ предста́ти и́мамъ предъ лице́мъ Созда́теля моего́, Влады́чице Дѣ́во Чи́стая, Твою́ по́мощь тогда́ пода́ждь ми́, вся́ бо мо́жеши, ели́ка хо́щеши, Всепѣ́тая.

Степе́нна, 1-й антифо́нъ 4-го гла́са. Проки́менъ, [гласъ 4]: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, [во дво́рѣхъ Бо́га на́шего процвѣту́тъ.] Вся́кое дыха́ніе... Ева́нгеліе Луки́, зача́ло 63.

По 50-мъ псалмѣ́ стихи́ра, гла́съ 6. Самогла́сна:

Дне́сь вселе́нная вся́ страстоте́рпца просвѣща́ется заря́ми, и Христо́ва Це́рковь, цвѣты́ украша́ема, Гео́ргіе, вопіе́тъ тебѣ́: уго́дниче Христо́въ и засту́пниче те́плый, не преста́й моля́ся о рабѣ́хъ твои́хъ.

Кано́нъ Богоро́дицы на 6 и свята́го на 8, гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Воспѣ́ти твоя́ страда́нія ра́зумъ да́ждь сла́вно, вѣнцено́сче страстоте́рпче Гео́ргіе, Царя́ всѣ́хъ престо́лу предстоя́ свѣ́тло, на́съ сохраня́й, пою́щихъ тя́.

О благоче́стіи крѣ́пцѣ подвиза́вся, великострада́льче Гео́ргіе, вѣнце́мъ сла́вы досто́йно почествова́лся еси́ десни́цею Вседержи́телевою.

Крѣ́пость даде́ тебѣ́ Христо́съ на по́двиги мно́ги, ви́ды му́къ до́блественнѣ и терпѣли́вно подъя́ти, тѣ́мъ и побѣди́лъ еси́ безбо́жныхъ шата́нія.

Богоро́диченъ: Лѣ́ствица яви́лася еси́ небе́сная, Дѣ́во, Еюже сни́де къ на́мъ Сло́во Бо́жіе, Тя́ дре́вле прови́дѣ Іа́ковъ, пра́отецъ Тво́й.

Катава́сія: Христо́съ ражда́ется...

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Плотскíй сою́зъ и сочета́ніе твои́хъ удо́въ разруша́шеся, но крѣ́пость соблюде́ся твоея́ души́ неразруши́ма.

Ярости стремле́ніе благомо́щно претерпѣ́лъ еси́ зѣло́ отъ му́чащихъ тя́, страстоте́рпче Гео́ргіе, терпѣ́ніе до́блественно крѣ́пко показа́въ.

Кто́ возмо́жетъ твое́ крѣ́пкое и си́льное и по́мысла неукло́нную му́дрость, Гео́ргіе, похвала́ми почестви́ти по достоя́нію, блаже́нне?

Богоро́диченъ: Уста́вила еси́ тлю́ сме́рти, я́же во ѵпоста́си пло́тію Живота́ ро́ждши, Пречи́стая, человѣ́комъ я́вльшася изъ чре́ва Твоего́, Пресвята́я.

Сѣда́ленъ, гла́съ 4. Подо́бенъ: Ско́ро предвари́.

До́блему страда́льцу и во́ину крѣ́пкому всецарю́ющаго Христа́ похвале́нія прино́симъ: ра́дуйся, му́чениковъ украше́ніе и лѣ́пота; ра́дуйся, пресвѣ́тлая Це́ркве звѣздо́, засту́пниче и спаси́телю къ тебѣ́ прибѣга́ющихъ, великому́чениче сла́вный Гео́ргіе, тя́ пою́щія спаса́й отъ всѣ́хъ навѣ́тъ вра́жіихъ и моли́твами твои́ми ко Го́споду Ца́рствія Его́ сподо́би на́съ. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, пребога́таго Бо́га ро́ждшая, со страстоте́рпцы Того́ моли́ непреста́нно оставле́ніе согрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Пѣ́снь 4.

Ирмо́съ: Небеса́ добродѣ́тель Твоя́ покры́ла е́сть, и земля́ испо́лнися сла́вы Твоея́, Христе́. Тѣ́мже вѣ́рно вопіе́мъ: сла́ва си́лѣ Твое́й, Го́споди.

Яростію де́монскою мучи́теліе одержи́міи, тя́, любо́вію Бо́жіею содержи́маго, неми́лостивно злодѣ́и ураня́ху, страстоте́рпче Гео́ргіе.

Огня́ сильнѣ́йши изволе́ніе стяжа́лъ еси́, мучи́теля несмы́сльство низложи́въ, посрами́лъ еси́, зовы́й, Гео́ргіе: сла́ва си́лѣ Твое́й, Го́споди.

По Христѣ́ да́же до сме́рти душе́ю терпѣли́вно вся́кимъ му́камъ сопроти́вился еси́, велегла́сно вопія́: сла́ва си́лѣ Твое́й, Го́споди.

Зѣ́льнѣйшимъ изволе́ніемъ, блаже́нне, одержи́мь, пре́лесть, Гео́ргіе, попра́лъ еси́, благода́рно вопія́: сла́ва си́лѣ Твое́й, Го́споди.

Богоро́диченъ: Вопло́щся изъ Дѣ́вы, Безпло́тенъ Сы́й на зе́млю къ человѣ́комъ пріи́де. Тѣ́мъ вѣ́рою зове́мъ: сла́ва си́лѣ Твое́й, Го́споди.

Пѣ́снь 5.

Ирмо́съ: Стяжа́вый ны́, избра́нныя лю́ди, кро́вію Твое́ю, Го́споди, Тво́й ми́ръ да́ждь на́мъ, во единомы́сліи сохраня́я ста́до Твое́.

Непобѣди́мою креста́ си́лою укрѣпля́емь, вели́кій страда́льче Гео́ргіе, возмо́глъ еси́ мучи́телево лю́тое побѣди́ти свирѣ́пство.

Поста́вивъ се́рдце твое́ велеу́мнѣ на тве́рдѣмъ ка́мени вѣ́ры, Гео́ргіе, нахожде́ньми искуше́ній му́къ непобѣди́мь пребы́лъ еси́.

Яко небе́снаго Царя́ во́инъ, со а́нгельскими во́и Тому́ предстоя́, страстоте́рпче Гео́ргіе, тебе́ вѣ́рою призыва́ющія отъ вся́кихъ искуше́ній изба́ви.

Богоро́диченъ: Избавля́ющи на́съ яви́ся отъ бѣ́дъ и прегрѣше́ній, тлетво́рныхъ страсте́й, и скорбе́й, и обстоя́ній, пою́щія Тя́ вѣ́рою, Богоро́дице Приснодѣ́во.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Преди́венъ взо́ромъ, красе́нъ тѣ́ломъ, удобре́нъ же ду́хомъ, Гео́ргіе, отлучи́лся еси́ къ боре́нію злоко́зненнаго, и сего́ разрази́въ, побѣ́ды вѣне́цъ прія́лъ еси́.

Украша́ются до́брыхъ по́двигъ одолѣ́ніемъ, стра́дальческое зря́ще натрижне́ніе, перворожде́нныхъ избра́ніе и свѣтоно́сное собо́рище.

Небе́сныхъ блаже́нство воспріе́мля, отъ Го́спода угото́ванныхъ, Гео́ргіе страда́льче, и́хже ра́ди на земли́ подвиза́лся еси́ да́же до кро́ве, и побѣ́дныя по́чести пріи́мъ.

Богоро́диченъ: Яко бразда́, чре́во твое́, Чи́стая, яви́ся, пшени́цу принося́щи безсме́ртія, всѣ́хъ вѣ́рныхъ ду́ши пита́ющи и му́ченикъ веселя́щи.

Конда́къ, гла́съ 2. Подо́бенъ: Тве́рдыя.

Боже́ственнаго и вѣнцено́снаго великому́ченика Христо́ва Гео́ргія, на враги́ побѣ́ду взе́мшаго одолѣ́нія, соше́дшеся вѣ́рою во освяще́нный хра́мъ, восхва́лимъ, его́же благоволи́ Бо́гъ созда́ти во и́мя его́, Еди́нъ во святы́хъ почива́яй.

Икосъ:

Яко свѣти́льника незаходи́маго звѣзда́ показа́ся непреле́стна, Со́лнца Христа́ возвѣща́я заря́ми твои́ми, страстоте́рпче Гео́ргіе, созыва́еши отъ первопресто́льнаго ма́тере градо́въ, Бо́гомъ спасе́ннаго Кíева, во освяще́нный хра́мъ христолюби́вая мно́жества облагодѣ́тельствовати обы́чнѣ, хотя́щія восхвали́ти пѣ́сньми во гла́сѣ ра́дованія и исповѣ́данія, соста́вити пра́здникъ свяще́ннаго хра́ма: его́же благоволи́ Бо́гъ созда́ти во и́мя твое́, Еди́нъ во святы́хъ почива́яй.

Пѣ́снь 7.

Ирмо́съ: Оте́цъ на́шихъ Бо́же, не посрами́ на́съ, но да́руй на́мъ со дерзнове́ніемъ вопи́ти Тебѣ́: благослове́нъ еси́, Бо́же оте́цъ на́шихъ.

Крѣпча́йшимъ ра́зумомъ пла́мень ле́сти погаси́въ, во искуше́ніи непобѣди́мь бы́лъ еси́, Гео́ргіе, вопія́: оте́цъ на́шихъ Бо́же, благослове́нъ еси́.

Яко му́ченикъ и вели́къ страда́лецъ въ пресвѣ́тлый Боже́ственный черто́гъ вше́лъ еси́, Христо́въ уго́дниче, вопія́: оте́цъ на́шихъ Бо́же, благослове́нъ еси́.

Ви́дѣти сподо́бился еси́, Гео́ргіе, та́мо блаже́нства и наслажде́нія вѣ́чныхъ святы́хъ свѣ́тлостей, апо́столъ, и проро́къ, и му́ченикъ, іера́рховъ и всѣ́хъ пра́ведныхъ.

Богоро́диченъ: Яви́лася еси́ всѣ́мъ человѣ́комъ, чи́стая Ма́ти Бо́жія, держа́ва ве́лія, и покро́въ, и заступле́ніе, Тя́ пою́щимъ всегда́ свяще́нными пѣ́сньми.

Пѣ́снь 8.

Ирмо́съ: Вся́ дѣла́ Бо́жія и вся́ тва́рь, благослови́те Го́спода, я́ко человѣ́комъ отъ земли́ возсія́ Свѣ́тъ, и вселе́нную всю́ просвѣти́, и жи́знь вѣ́чную мíру дарова́, по́йте, лю́діе, и превозноси́те Его́ во вѣ́ки.

Низложи́въ вся́ вра́жія ору́жія, великому́чениче Гео́ргіе, попра́лъ еси́ и́дольскую ле́сть, зовы́й: по́йте, лю́діе, и превозноси́те Христа́ Бо́га во вѣ́ки.

Укра́шенъ зѣло́ благолѣ́пно, Христу́ предстоя́, страда́льче приснопа́мятне Гео́ргіе, отъ крове́й твои́хъ му́ченическихъ очервле́ну багряни́цу нося́, ве́село пое́ши: лю́діе, превозноси́те Его́ во вѣ́ки.

По́чести тебѣ́ Христо́съ подаде́, Гео́ргіе, во страда́ніяхъ твои́хъ, исповѣ́далъ бо еси́ Того́ велегла́сно, свидѣ́тельствуя, и зовы́й: по́йте, лю́діе, и превозноси́те Его́ во вѣ́ки.

Ны́нѣ предстои́ши живонача́льныя Свѣ́ту Тро́ицы, Боже́ственными сія́ніи, Гео́ргіе, просвѣща́емь, помина́й на́съ, вѣ́рою честву́ющія тя́ и превознося́щія Христа́ во вѣ́ки.

Богоро́диченъ: Законода́вца родила́ еси́, Христа́, зако́нно страда́вшаго вѣнча́вша страстоте́рпца и му́ченика, Его́же моли́ зако́номъ грѣха́ побѣжде́на мя́, Отрокови́це, исцѣли́ти.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Зако́нными повелѣ́ніи побѣжда́ется по́двигъ твои́хъ, Гео́ргіе, велича́вый, еди́нъ бо Влады́ка Христо́съ просла́ви тя́. Его́же моли́ о на́съ, страстоте́рпче, любо́вію пою́щихъ тя́.

Красе́нъ вои́стинну душе́ю и тѣ́ломъ ве́сь, сла́вне Гео́ргіе, ны́нѣ предстои́ши Царю́ царе́й всѣ́хъ красотѣ́, при́сно прича́стіи удобря́емь всекра́сныхъ, всече́стне, наслажде́ній.

Твою́, Царю́ Христе́, любо́вь Гео́ргій подража́въ кро́вію да́же до сме́рти, мечу́, огню́ же и му́камъ боже́ственный страда́лецъ сопроти́влься, и е́же отъ Тебе́, Человѣколю́бче, безсме́ртіе пріи́мъ, наслажда́ется.

Всего́ себе́ же́ртву прине́слъ еси́ Христу́, и Того́ Ца́рствія наслѣ́дникъ яви́лся еси́ и прича́стникъ, и при́сно съ ли́ки святы́хъ ра́дуяся, ны́нѣ вѣ́чно ца́рствуеши, страстоте́рпче Гео́ргіе.

Вѣ́рою страда́нія твоя́, Гео́ргіе, о на́съ, честву́ющихъ, Христа́ моли́, страстоте́рпче, прилѣ́жно, спасти́ся на́мъ бѣ́дъ треволне́нія и всѣ́хъ страсте́й, и до́брѣ прейти́ житіе́, и Боже́ственное блаже́нство улучи́ти.

Богоро́диченъ: Обле́кся изъ Тебе́ Ца́рь въ тѣле́сную багряни́цу, про́йде ве́сь красе́нъ изъ утро́бы Твоея́, и вся́ враги́ побѣди́, и побѣ́ду страда́льцемъ подаде́, еди́на Приснодѣ́во Ма́ти.

Свѣти́ленъ. Подо́бенъ: Свѣ́те неизмѣ́нный.

Яко свѣтоза́рное со́лнце, чуде́съ луча́ми осія́еши всю́ тва́рь, пресла́вне Гео́ргіе страстоте́рпче, твою́ пра́зднующе па́мять, про́симъ отъ вся́кихъ бѣ́дъ изба́витися. [Два́жды.]

Сла́ва, и ны́нѣ, богоро́диченъ:

Ми́лости и щедро́ты Твоя́, Бо́же, на ны́, рабы́ Твоя́, низпосли́ моли́твами пречи́стыя Твоея́ Ма́тере и сла́внаго страстоте́рпца Твоего́ Гео́ргія и всѣ́мъ да́руй вели́кую Твою́ ми́лость.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Пресла́вный страстоте́рпче,* велему́дренне Гео́ргіе,* Христо́вымъ ору́жіемъ* себе́ вооружи́въ му́жески,* на суди́щи дерзнове́нно Го́спода всѣ́хъ Бо́га исповѣ́далъ еси́,* и врага́, побѣди́въ, умертви́лъ еси́.* Тѣ́мже побѣ́ды вѣнце́мъ* твою́ главу́ вѣнча́ Небе́сный Ца́рь,* великодарови́тый. [Два́жды.]

Си́лою Боже́ственною укрѣпля́емь, Гео́ргіе,* и́стинно непобѣди́мою,* го́рдаго врага́ посрами́лъ еси́,* Го́спода Бо́га предъ мучи́тели проповѣ́дая Творца́ всѣ́хъ,* за Него́же жи́зни не пощади́лъ еси́* и кро́вь твою́ излія́лъ еси́, сла́вне.* Тѣ́мже небе́сный а́нгеловъ Ца́рь* тя́ ца́рствовати ку́пно съ Собо́ю* вѣ́чно сподо́билъ е́сть.

Преудивле́нъ въ во́зрастѣ му́жества сы́й,* тѣлесе́ красото́ю удобре́нъ,* и души́ Боже́ственною благода́тію укра́шенъ,* и въ побѣ́дахъ преслову́щь,* въ словесѣ́хъ и му́дрости преди́венъ бы́въ,* о тлѣ́нныхъ че́стѣхъ земны́хъ неради́лъ еси́,* небе́сныхъ по́честей возжелѣ́въ,* и́хже получи́лъ еси́ у Царя́ ца́рствующаго,* на́съ, блаже́нне, помина́й.

Сла́ва, гла́съ 6:

По Христѣ́ зако́нно пострада́въ, Гео́ргіе, и съ земны́мъ вражде́бнымъ мучи́телемъ неви́димаго низложи́лъ еси́ врага́, досто́йно пріе́мь отъ вѣнцеда́вца Спа́са вѣне́цъ, и ны́нѣ на небесѣ́хъ со а́нгельскими чи́ны вы́шняго свѣтоли́тія наслажда́ешися, тріѵпоста́сному и пе́рвому Свѣ́ту причаща́яся оби́льно. Тѣ́мже и мы́, благовѣ́рніи лю́діе, любому́ченичныя пѣ́сни воспое́мъ ти́: ра́дуйся, адама́нте, непобѣди́мый душе́ю, и крѣ́пкій ору́жниче Христо́въ; ра́дуйся, ле́сти и́дольскія потреби́телю и и́стины побо́рниче свѣ́тлый; но моли́ся Го́споду, и на́мъ житіе́мъ боголюби́вымъ съ тобо́ю получи́ти стоя́ніе при престо́лѣ вели́чествія Его́.

И ны́нѣ, богоро́диченъ: Богоро́дице, Ты́ еси́ Лоза́ и́стинная...
Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, [гла́съ 4]: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ.] Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 265 об. – 271 об.

/ Къ оглавленію раздѣла /


Наверхъ / Къ титульной страницѣ

0