Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 25-й де́нь.
Иже во святы́хъ, оте́цъ на́шихъ и священному́ченикъ, Кли́мента, па́пы Ри́мскаго, и Петра́ Александрíйскаго.

[Зри́:] Въ се́й де́нь отдае́тся пра́здникъ Вхо́да Пресвяты́я Богоро́дицы.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 1. Подо́бенъ: О, ди́внаго чудесе́!

Дне́сь хра́мъ одушевле́нный святы́я сла́вы Христа́ Бо́га на́шего, eди́на въ жена́хъ Благослове́нная Чи́стая, приво́дится въ храмъ зако́нный жи́ти во святы́хъ; и ра́дуются съ Не́ю Іоаки́мъ и Анна ду́хомъ, и дѣ́вственніи ли́цы Го́сподеви пою́тъ, псало́мски воспѣва́юще и чту́ще Ма́терь Eго́.

Ты́ — проро́ковъ проповѣ́даніе, апо́столовъ сла́ва, и му́чениковъ похвала́, и всѣхъ земноро́дныхъ обновле́ніе, Дѣ́во Ма́ти Бо́жія: Тобо́ю бо Бо́гу примири́хомся. Тѣ́мже чтимъ Твое́ въ храмъ Госпо́день вхожде́ніе и со а́нгеломъ вси́ пѣ́сненно, — ра́дуйся, — Тебѣ́, Пречи́стая, вопіе́мъ, Твои́ми моли́твами спаса́еміи.

Ины стихи́ры свята́го Кли́мента, гла́съ 2. Подо́бенъ: Егда́ отъ дре́ва.

Розга́ лозы́ жи́зненныя бы́въ, о́тче іера́рше, кра́сныя изне́слъ еси́ гро́зды Ду́хомъ догма́товъ, всему́дре, ка́плющія всегда́ спаси́тельное вино́ Боже́ственнаго позна́нія и веселя́щія всѣ́хъ благочести́выхъ сердца́, и́стинно тя́ чту́щихъ, Кли́менте богоно́сне всеблаже́нне.

Петра́ верхо́внаго учени́къ, о́тче, бы́въ, на ка́мени того́ созда́лъ еси́, я́ко ка́мень честны́й, тебе́ сама́го, всехва́льне, тве́рдостію слове́съ твои́хъ все́ разврати́лъ еси́ зда́ніе многобо́жное, хра́мы же воздви́глъ еси́ Боже́ственныя въ че́сть Тро́ицы, о Не́йже подвиза́лся еси́, блаже́нне, и муче́нія вѣне́цъ прія́лъ еси́.

Якоже свѣтода́тельное со́лнце, отъ за́падовъ возсія́лъ еси́, о́тче, просвѣща́я зе́млю заре́ю догма́товъ твои́хъ и ра́нами свѣ́тло, пости́глъ же еси́ страны́ восто́чныя, треблаже́нне, заше́лъ еси́, умерщвля́емь, и возсія́лъ еси́, Кли́менте, ко Христу́, и та́мо су́щими луча́ми бога́тно, непреста́нно по Боже́ственному причаще́нію просвѣща́емь.

Слава, и нынѣ, гласъ 8:

По рождествѣ́ Твое́мъ, Богоневѣ́сто Влады́чице, пришла́ eси́ въ хра́мъ Госпо́день воспита́тися во свята́я святы́хъ, я́ко освяще́нна; тогда́ и Гавріи́лъ по́сланъ бы́сть къ Тебѣ́, Всенепоро́чнѣй, пи́щу Тебѣ́ принося́. Небе́сная вся удиви́шася, зря́ще Ду́ха Свята́го, въ Тя все́льшася. Тѣ́мже, Пречи́стая и Нескве́рная, я́же на небеси́ и на земли́ сла́вима, Ма́ти Бо́жія, спаси́ ро́дъ на́шъ.

На стихо́внѣ стихи́ры пра́здника, гла́съ 5. Подобенъ: Ра́дуйся.

Ра́дуйся, не́бо и земля́, Не́бо Умное гряду́щее зря́ще, въ Боже́ственный до́мъ воспита́тися че́стно, Дѣ́ву eди́ну и непоро́чную, къ Не́йже, дивя́ся, Заха́рія вопія́ше: Две́ре Госпо́дня, хра́ма отверза́ю Тебѣ́ две́ри, ра́дующися, въ не́мъ ликовству́й, позна́хъ бо и вѣ́ровахъ, я́ко уже́ избавле́ніе пріи́детъ проявле́нно Изра́илево и роди́тся изъ Тебе́ Бо́гъ Сло́во, да́руяй мíрови ве́лію ми́лость.

Сти́хъ: Приведу́тся Царю́ дѣ́вы въ слѣ́дъ Eя́, и́скреннія Eя́ приведу́тся Тебѣ́.

Анна, боже́ственная благода́ть я́вѣ, отъ благода́ти да́нную, чи́стую Приснодѣ́ву приво́дитъ съ весе́ліемъ въ хра́мъ Бо́жій, призва́вши ити́ предъ Не́ю oтрокови́цамъ, свѣщи́ нося́щимъ, и глаго́лющи: пойди́, Ча́до, Да́вшему Тя́ бу́ди возложе́ніе и благово́нный ѳиміа́мъ. Вни́ди въ незаходи́мая, и увѣ́ждь та́йны, и угото́вися бы́ти Іису́сово вмѣсти́лище, весе́лое и кра́сное, подаю́щаго мíру ве́лію ми́лость.

Стихъ: Приведу́тся въ весе́ліи и ра́дованіи, введу́тся въ хра́мъ Царе́въ.

Вну́трь въ хра́мъ Бо́жій боговмѣсти́мый хра́мъ возлага́ется, Дѣ́ва Всесвята́я, и oтрокови́цы Eй ны́нѣ, свѣщи́ нося́ще, предхо́дятъ. Игра́етъ роди́телей сопряже́ніе изря́дное, Іоаки́мъ же и Анна, ликовству́юще, я́ко роди́ша Творца́ ро́ждшую, Яже ликовству́ющи въ Боже́ственныхъ ски́ніихъ и пита́ема руко́ю а́нгеловою, Всенепоро́чная, Христа́ яви́ся Ма́ти, Подаю́щаго мíру ве́лію ми́лость.

Сла́ва, и ны́нѣ, гла́съ 6:

Дне́сь собо́ри вѣ́рныхъ, соше́дшеся, духо́внѣ да торжеству́имъ и Богоoтрокови́цу Дѣ́ву и Богоро́дицу, въ хра́мъ Госпо́день приводи́му, благоче́стно восхва́лимъ, предъизбра́нну отъ всѣ́хъ родо́въ, во оби́телище всѣ́хъ Царя́ Христа́ и Бо́га: дѣ́вы, свѣщи́ нося́ще, предъиди́те, Приснодѣ́вы чту́ще честно́е происхожде́ніе, ма́тeри, печа́ль всю́ отложи́вше, ра́достно спослѣ́дствуйте Ма́тери Бо́га быва́ющей и ра́дости мíра Хода́таицѣ. Вси́ у́бо ра́достно, е́же — ра́дуйся, — со а́нгеломъ возопіи́мъ Обра́дованнѣй, при́сно моля́щейся о душа́хъ на́шихъ.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

Сла́ва, и ны́нѣ. Тропа́рь пра́здника, [гла́съ то́йже]:

Дне́сь благоволе́нія [Бо́жія предображе́ніе и человѣ́ковъ спасе́нія проповѣ́даніе въ хра́мѣ Бо́жіи я́сно Дѣ́ва явля́ется и Христа́ всѣмъ предвозвеща́етъ. Той и мы велегла́сно возопіи́мъ: ра́дуйся, смотре́нія Зижди́телева исполне́ніе].


[Зри́:] Подоба́етъ вѣ́дати, я́ко а́ще случи́тся отда́ніе пра́здника Вхо́да Пресвяты́я Богоро́дицы въ недѣ́лю, оставля́ется возслѣ́дованіе свята́го Петра́ и пое́тся, егда́ хо́щетъ екклисіа́рхъ.

Въ суббо́ту, на ма́лѣй вече́рни, Стихи́ры воскре́сны и Богоро́дицы по обы́чаю. Тропа́рь воскре́сенъ и пра́здника.

На вели́цѣй вече́рни. По обы́чной каѳи́смѣ, на Го́споди воззва́хъ: Стихи́ры воскре́сны 3 и восто́ченъ [Анато́ліевъ] еди́нъ. И пра́здника подо́бны 3, гла́съ 1: Дне́сь, вѣ́рніи... И свята́го Кли́мента подо́бны 3. Сла́ва, пра́здника, гла́съ 8: По Рождествѣ́ Твое́мъ... И ны́нѣ, богоро́диченъ пе́рвый, настоя́щаго гла́са. Вхо́дъ. Проки́менъ дне́. На литíи: Стихи́ры пра́здника. Сла́ва, и ны́нѣ, пра́здника. На стихо́внѣ: Стихи́ры воскре́сны. Сла́ва, и ны́нѣ, пра́здника. На благослове́ніи хлѣ́бовъ: Богоро́дице Дѣ́во.., три́жды. А идѣ́же нѣ́сть всено́щнаго, глаго́лемъ тропа́рь воскре́сенъ.

Сла́ва, тропа́рь Кли́мента, гла́съ 4:

Иже отъ Бо́га чудодѣ́йствы пресла́вно удивля́я вселе́нныя концы́ мíра, свяще́нный страда́льче, па́че естества́ мо́рю соста́вы вода́мъ содѣва́еши раздѣле́ніе, въ честнѣ́й па́мяти твое́й всегда́ притека́ющимъ усе́рдно въ богозда́нную ти́ це́рковь, чуде́снымъ твои́мъ моще́мъ, и по всенаро́дномъ хожде́ніи мо́ре во еди́но тече́ніе чудодѣ́тельнѣ твори́ши, Кли́менте преди́вный, моли́ Христа́ Бо́га спасти́ся душа́мъ на́шимъ.

И ны́нѣ, пра́здника.

На у́трени. На Бо́гъ Госпо́дь: Тропа́рь воскре́сенъ, два́жды. Сла́ва, Кли́мента. И ны́нѣ, пра́здника. По каѳи́смахъ: Сѣда́льны воскре́сны съ богоро́дичны и́хъ. Поліеле́й и тропари́: Ангельскій собо́ръ... Ипакои́ гла́са и степе́нна, проки́менъ и Ева́нгеліе воскре́сно. Воскресе́ніе Христо́во... Псало́мъ 50-й и стихи́ра воскре́сна. Кано́нъ воскре́сенъ со ирмосо́мъ на 4, и Богоро́дицы на 2, и пра́здника, пе́рваго гла́са, на 4, и Кли́мента на 4. Катава́сія: Христо́съ ражда́ется... По 3-й пѣ́сни: Конда́къ пра́здника и и́косъ.

И конда́къ Кли́мента, гла́съ 2. Подо́бенъ: Тве́рдыя.

Боже́ственнаго виногра́да священноодѣ́янна всѣ́мъ лоза́ яви́ся, ка́плющи сла́дость прему́дрости, моли́твами твои́ми, всече́стне, да тебѣ́ истка́ну, я́ко багряни́цу, пѣ́снь мы́сленную принесе́мъ, Кли́менте свя́те, спаси́ рабы́ твоя́.

И сѣда́ленъ свята́го. Сла́ва и ны́нѣ, пра́здника. По 6-й пѣ́сни: Конда́къ воскре́сенъ и и́косъ. На 9-й пѣ́сни стихосло́вимъ Честнѣ́йшую... Свѣти́ленъ воскре́сенъ. Сла́ва, свята́го. И ны́нѣ, пра́здника. На хвали́техъ: Стихи́ры воскре́сны 4 и пра́здника, со сла́внымъ, на 4, съ припѣ́вы пра́здничными. Сла́ва, стихи́ра ева́нгельская. И ны́нѣ, Преблагослове́нна еси́... Славосло́віе вели́кое. Тропа́рь воскре́сенъ то́чію, ектеніи́, и отпу́стъ, и ча́съ 1-й.

На часѣ́хъ. Тропа́рь воскре́сенъ. Сла́ва, пра́здника. И ны́нѣ, богоро́диченъ часо́въ. По Отче на́шъ: Конда́къ пра́здника и воскре́сенъ, глаго́лемъ премѣня́юще.

На литургíи. Блаже́нна гла́са на 6 и пра́здника, пѣ́снь 9-я, на 4. По вхо́дѣ: Тропа́рь воскре́сенъ, и пра́здника, и свята́го. Та́же конда́къ воскре́сенъ. Сла́ва, свята́го. И ны́нѣ, пра́здника. Проки́менъ, Апо́столъ, аллилу́ія и Ева́нгеліе гла́са и пра́здника. Прича́стенъ: Хвали́те Го́спода... И пра́здника.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, святы́хъ: Бо́же оте́цъ на́шихъ... И ны́нѣ, пра́здника.

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Пра́ведныхъ пло́дъ, Іоаки́ма и Анны, прино́сится Бо́гу во святи́лище свято́е, пло́тію младе́нствующи, Пита́тельница Жи́зни на́шея, Юже благослови́ свяще́нный Заха́рія: Сію́ вси́ я́ко Ма́терь Бо́жію вѣ́рно да ублажи́мъ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Пре́жде зача́тія, Чи́стая, освяти́лася еси́ Бо́гу и, ро́ждшися на земли́, да́ръ принесла́ся еси́ ны́нѣ Ему́, исполня́ющи оте́ческое обѣща́ніе: въ Боже́ственнѣмъ же хра́мѣ, я́ко су́що Боже́ственный хра́мъ, отъ младе́нства чи́стѣ, со свѣща́ми свѣ́тлыми отдана́ бы́вши, яви́лася еси́ Прія́телище Непристу́пнаго и Боже́ственнаго Свѣ́та. Вели́ко вои́стинну предше́ствіе Твое́, еди́на Богоневѣ́сто и Приснодѣ́во.

Сла́ва, и ны́нѣ, то́йже.

Та́же кано́нъ пра́здника со ирмосо́мъ на 6 и святы́хъ о́ба кано́на на 8.

Кано́нъ пра́здника, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Стеце́мся дне́сь, Богоро́дицу почита́юще пѣ́сньми, и торжеству́имъ духо́вный пра́здникъ: въ хра́мъ бо Бо́гу да́ръ прино́сится.

Пѣ́сньми да воспои́мъ Богоро́дицы сла́вное предше́ствіе: хра́му бо дне́сь, я́ко хра́мъ Бо́жій, прино́сится проро́чески да́ръ многоцѣ́нный.

Тро́иченъ: Тро́ице Единосу́щная, Отче, и Сло́ве, и Ду́ше Святы́й, Тя́ вѣ́рно сла́вимъ, я́ко Творца́ всѣ́хъ, и Тебѣ́ вопіе́мъ благоче́стно: спаси́ ны, Бо́же.

Отъ ба́гра крове́й Твои́хъ, червлени́цею, Пречи́стая, одѣ́явся, проше́дъ, обнови́ Ца́рь и Бо́гъ ро́дъ ве́сь человѣ́ческій благоутро́біемъ Свои́мъ.

Инъ кано́нъ свята́го Кли́мента. Творе́ніе Ѳеофа́ново. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отъ Петра́ боже́ственнаго научи́вся, апо́столовъ верхо́внаго, и отъ него́ навы́къ Боже́ственное зна́ніе, о́тче, и́дольскую ле́сть обличи́лъ еси́.

Ло́зу богонасажде́ну на земли́, плоды́ добродѣ́тельныя уче́ній всеблагочести́выхъ Христо́съ тя́ предлага́етъ, и́стинно су́щій цвѣту́щь виногра́дъ.

Во вся́ концы́ протече́ вои́стинну Боже́ственныхъ повелѣ́ній твое́ вѣща́ніе, Кли́менте му́дре, и вся́ просвѣти́ Тро́ицу богосло́вити во еди́нствѣ Божества́.

Богоро́диченъ: Се́ прорече́нія проро́ческая о Тебѣ́ прія́ша коне́цъ вои́стинну, Сло́во бо безъ сѣ́мене заче́шни, Богороди́тельнице, пло́тію родила́ еси́.

Инъ кано́нъ свята́го Петра́, его́же краегране́сіе: Восхваля́ю трибога́таго Петра́. Творе́ніе Ѳеофа́ново. Гла́съ то́йже.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Во свѣтлѣ́йшихъ селе́ніихъ житіе́ имѣ́я, просвѣще́ніе ми́ пода́ждь моли́твами твои́ми, Пе́тре всеблаже́нне.

Зна́нію науче́нъ и свяще́нствомъ украша́емь, всеблаже́нне Пе́тре, Христу́ прине́слся еси́ кро́вію.

Утварь упещре́нная, я́коже многоцѣ́нное возложе́ніе, Христо́вѣ Це́ркви отъ Бо́га дарова́лся еси́, блаже́нне.

Богоро́диченъ: Пречи́стая Богоро́дице, воплоще́нное, Присносу́щное и Пребоже́ственное Сло́во па́че естества́ ро́ждшую, пое́мъ Тя́.

Катава́сія: Христо́съ ражда́ется...

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Торжеству́имъ, празднолю́бцы, и сра́дуемся ду́хомъ во святѣ́мъ пра́здницѣ, учрежда́ющеся дне́сь, Дще́ре Царе́вы и Ма́тере Бо́га на́шего.

Іоаки́ме, ра́дуйся дне́сь, и весели́ся, Анно, ду́хомъ, рожде́нную изъ васъ Го́споду приводя́ще трилѣ́тствующу, я́ко Юницу Чи́сту Всенепоро́чную.

Тро́иченъ: Свѣ́тъ Оте́цъ, Свѣ́тъ Сы́нъ Его́, Свѣ́тъ Ду́хъ Утѣ́шительный: я́ко отъ Со́лнца бо Еди́наго Тро́ицы, сія́юще, Боже́ственно озаря́етъ и соблюда́етъ ду́ши на́ша.

Тя проро́цы проповѣ́даша киво́тъ, Чи́стая, святы́ни, кади́льницу злату́ю, и свѣ́щникъ, и трапе́зу, и мы́, я́ко Боговмѣсти́мую ски́нію, воспѣва́емъ Тя́.

Инъ.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ и бу́ди на́мъ утвержде́ніе, Тя́ во и́стинѣ призыва́ющихъ.

Бога́тно излія́ся Ду́ха благода́ть въ твоя́ устна́, му́дре, е́юже вся́ просвѣти́лъ еси́ боже́ственными твои́ми уче́ніи и Христу́ приве́лъ еси́.

Огне́мъ воздержа́нія ты́ попали́лъ еси́ страсте́й огнепа́льная стремле́нія и хра́мъ себе́ соверши́въ Ду́ха Боже́ственнаго, доблему́дренне о́тче.

На го́ру боже́ственныхъ добродѣ́телей возше́дъ и мра́комъ покры́вся разу́мнымъ, узрѣ́лъ еси́ неизрече́нную въ чи́стѣй души́ твое́й духо́вную зарю́.

Богоро́диченъ: Неизрече́нно зачала́ еси́, Пречи́стая, Спа́са и Го́спода, изба́вльшаго на́съ отъ лю́тыхъ, Тя́ во и́стинѣ призыва́ющихъ.

Инъ.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че, Тебе́, Го́споди.

Возше́лъ еси́, ѣ́здя, я́ко на колесни́цѣ, твое́ю кро́вію, прему́дре, къ небе́снымъ, идѣ́же Предте́ча на́шъ Христо́съ вни́де, еди́нъ безгрѣ́шный.

Жи́знь тлѣ́нную оста́вилъ еси́ и жи́знь безсме́ртную обрѣ́лъ еси́, блаже́нне, идѣ́же вѣнцено́сецъ лику́еши, моля́ спасти́ся душа́мъ на́шимъ.

Якоже фи́никсъ процвѣ́лъ еси́ благопло́днѣйшій, я́ко ма́слина плодоро́дна яви́лся еси́, богодохнове́нне, во дво́рѣхъ Госпо́днихъ, я́ко сми́рна и лива́нъ и я́ко мѵ́ро благово́ннѣйшее.

Богоро́диченъ: Яко две́ри спаси́тельныя и ра́й кра́сный, Свѣ́та присносу́щнаго о́блакъ, су́щу Святу́ю Дѣ́ву воспое́мъ вси́, глаго́люще Ей: ра́дуйся.

Конда́къ, гла́съ 4. Подо́бенъ: Яви́лся еси́ дне́сь.

Це́ркве недви́жиміи и боже́ственніи пи́ргове, благоче́стія боже́ственніи столпи́ вои́стинну крѣ́пцыи, Кли́менте съ Петро́мъ всехва́льніи, ва́шими моли́твами соблюди́те вся́.

Сѣда́ленъ Кли́мента, гла́съ и подо́бенъ то́йже.

Возсія́въ, я́коже со́лнца заря́, и блиста́еши, преподо́бне, всему́ мíру свѣ́тло уче́ніи твои́ми, богогла́се Кли́менте свѣтоно́сне, му́чениковъ похвало́.

Сла́ва, Петра́, гла́съ 8. Подо́бенъ: Прему́дрости.

Отъ вы́шняго суда́ Христо́ва предста́тельствова ста́ду, на па́житехъ благожи́зненныхъ упа́слъ еси́ всему́дрыми твои́ми догма́ты, отгна́въ Арія, я́ко во́лка некро́ткаго, вше́дшаго въ ни́хъ безбо́жными уче́ніи. Тѣ́мже и ду́шу твою́ положи́лъ еси́ за ни́хъ, па́стырь наре́клся еси́, я́ко рече́ Госпо́дь, іера́рше Пе́тре блаже́нне, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

И ны́нѣ, пра́здника, гла́съ 4. Подо́бенъ: Удиви́ся Іо́сифъ.

Непоро́чная Агница и нескве́рный черто́гъ, въ домъ Бо́жій Богоро́дица Маріа́мъ съ весе́ліемъ вво́дится пресла́вно, Юже а́нгели Бо́жіи дорино́сятъ вѣ́рно, и вси́ вѣ́рніи блажа́тъ при́сно и благода́рственно пою́тъ Ей непреста́нно ве́ліимъ гла́сомъ: на́ша сла́ва и спасе́ніе Ты́ еси́, Всенепоро́чная.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ, позна́ешися, внегда́ пріити́ вре́мени, пока́жешися. Сла́ва си́лѣ Твое́й, Го́споди.

Проро́че Иса́іе, прорцы́ намъ, Дѣ́ва кто́ е́сть, иму́щая во чре́вѣ? Яже изъ Іу́дина ко́рене прозя́бши и ро́ждшися изъ Дави́да царя́, сѣ́мене свята́го пло́дъ благосла́вный.

Начина́йте, дѣ́вы, и воспо́йте пѣ́сни, рука́ми держа́ще свѣщи́, Чи́стыя Богоро́дицы предше́ствіе хва́ляще, ны́нѣ гряду́щія во хра́мъ Бо́жій, ку́пно съ на́ми пра́зднующи.

Тро́иченъ: Тро́ицу Ли́цы, Еди́ницу о́бразомъ, благоче́стно сла́вимъ Бо́га Истинна, Его́же пою́тъ а́нгельская и арха́нгельская чинонача́лія я́ко тва́ри Влады́ку, и человѣ́цы вѣ́рно, покланя́ющеся при́сно.

Моли́ непреста́нно, Пресвята́я Чи́стая, Его́же пло́тію родила́ еси́, Сы́на Твоего́ и Бо́га, отъ многообра́зныхъ сѣ́тей діа́волихъ и отъ вся́кихъ искуше́ній находя́щихъ вся́ изба́вити рабы́ Твоя́.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Отъ за́пада прише́дъ, блаже́нне, къ восто́ку, Петру́ примѣси́лся еси́ апо́столу: и того́ боже́ственными свѣтлостьми́ и уче́ніи просвѣща́емь, съ ни́мъ возвѣща́я спаси́тельное Сло́во, за́падную всю́ проте́клъ еси́ страну́.

Другíй Моисе́й, Кли́менте му́дре, бы́лъ еси́, зако́ны Боже́ственныя всѣ́мъ излага́я и свяще́нная пиша́ уче́нія, и церко́вное все́ вчиня́еши исполне́ніе. Отсю́ду законополо́жника тя́ и учи́теля вси́ иму́ще, вѣ́рою чти́мъ.

По́стническими по́ты очи́стився, священнонача́льникъ, блаже́нне, яви́лся еси́, къ благочести́вѣй вѣ́рѣ Христо́вѣй вся́ возводя́ боже́ственными твои́ми сказа́ніи, пострада́въ же зако́нно, подо́бнѣ болѣ́зни сплете́ вѣне́цъ, приснопа́мятне.

Богоро́диченъ: Съ Бо́гомъ Тя́ засту́пницу стяжа́хомъ, Ты́ бо Ма́ти Бо́жія была́ еси́ Творца́ и Содѣ́теля, на́шъ о́бразъ пріе́мша, Пренепоро́чная, и Того́ спа́сша отъ тли́ и сме́рти и сла́вою Боже́ственною просла́вльшаго.

Инъ.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Добродѣ́телей ше́ствовавъ стезе́ю, о́тче, пости́глъ еси́ оби́тели вы́шнія, богоно́сне, свяще́нства пома́заніемъ укра́шенъ и муче́нія сія́я кро́вію.

Ту́чами пото́ковъ твои́хъ крове́й, блаже́нне, угаси́лъ еси́ пе́щь пре́лести и гоня́щихъ погуби́лъ еси́ мра́къ, священному́чениче достосла́вне.

Но́вый Пе́тръ нѣ́кій на́мъ яви́лся еси́, и́стинно апо́стольскими сія́я дарова́ніи, священнодѣ́тель же и свидѣ́тель страсте́й Влады́ки твоего́, всебога́те.

Богоро́диченъ: Всѣ́хъ до́брыхъ исполне́ніе ро́ждши, испо́лни на́ша, Дѣ́во, моле́нія, грѣхо́въ на́мъ избавле́нія прося́щи, и просвѣще́нія, и ве́лія ми́лости.

Пѣ́снь 5.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́ Бо́же на́шъ.

Да свѣтлоно́симъ, правосла́вніи вси́, стека́ющеся и сла́вяще Богома́терь, я́ко Го́споду дне́сь приво́дится я́ко же́ртва благопрія́тна.

Да веселя́тся пра́отцы дне́сь, Влады́чице, и да ра́дуется ро́ждшая Тя́ со отце́мъ Твои́мъ, я́ко пло́дъ и́хъ Го́споду прино́сится.

Тро́иченъ: Пренача́льное и Присносу́щное Еди́но Божество́ славосло́вяще, поклони́мся, Тре́ми Ли́цы естество́мъ нераздѣ́льное и сла́вою равноче́стное.

Приста́нище благоути́шное и необори́мую стѣ́ну стяжа́хомъ, моли́тву Твою́ во обстоя́ніихъ, Богороди́тельнице, всегда́ избавля́еми бѣ́дъ и скорбе́й.

Инъ.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Во свѣ́тѣ за́повѣдей ходя́ Госпо́днихъ, ча́до вои́стинну яви́лся еси́ Того́, блаже́нне, нело́жное.

Всего́ на земли́ ты́ отре́клся еси́ пристра́стія, священнонача́льниче, да бу́дущее благосла́віе получи́ши и свѣ́тлости сла́вы Христо́вы.

Му́ченическими укра́шенъ свѣтлостьми́, со а́нгелы ны́нѣ предстои́ши Влады́цѣ, о пою́щихъ моли́ся.

Богоро́диченъ: Ма́ти Бо́жія, вѣ́рою Тя́ пою́щія отъ бѣ́дъ изба́ви моли́твами Твои́ми, Дѣ́во, я́ко Тя́ предста́тельницу вѣ́мы, Чи́стая.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

На ка́мень возше́дъ вѣ́ры, страстоте́рпче, неукло́ненъ пребы́лъ еси́ во искуше́ніи сопроти́вныхъ.

Ору́жіемъ пла́меннымъ Ду́ха Свята́го, іера́рше, Арія вредосло́вца Боже́ственнымъ судо́мъ закла́лъ еси́.

Крѣ́постію укрѣпля́емь, сла́вне, Спа́совою, вра́жію си́лу и крѣ́пость попра́лъ еси́.

Богородиченъ: Дѣву по рождествѣ, поемъ Тя, Богородице, Ты бо Бога Слова плотію міру родила еси.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мой, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Пра́зднуимъ, вѣ́рніи, пра́здникъ духо́вный Ма́тере Бо́жія, воспѣва́юще благоче́стно: е́сть бо святѣ́йша небе́сныхъ умо́въ.

Пѣ́сньми духо́вными восхва́лимъ, вѣ́рніи, Ма́терь Свѣ́та, я́ко дне́сь на́мъ яви́ся, предходя́щи въ хра́мъ Бо́жій.

Тро́иченъ: Оте́цъ, и Сы́нъ, и Ду́хъ пра́вый, Тріѵпоста́сная Еди́нице и Нераздѣли́мая Тро́ице, поми́луй покланя́ющіяся Боже́ственнѣй Держа́вѣ Твое́й.

Во чре́вѣ Твое́мъ вмѣще́нъ Невмѣсти́мый всѣ́ми, Богома́ти, бывъ, изъ Тебе́ произы́де, Пречи́стая, сугу́бъ естество́мъ Бо́гъ и Человѣ́къ.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Ре́вностію разжже́нъ Госпо́дни любве́, му́дре, и́дольскую ле́сть обличи́лъ еси́ крѣ́пко слове́сными противле́ніи и чуде́сными явле́ніи, всехва́льне.

Недрема́нно соблю́лъ еси́ о́ко се́рдца твоего́, за зло́бу ника́коже воздрема́въ, сла́вне, Боже́ственными восхожде́ніи вчиня́я добродѣ́телей къ верхо́вному.

Яко іера́рхъ че́стенъ, вяза́ти и рѣши́ти прегрѣше́нія вла́сть пріи́мъ отъ Спа́са Христа́, мно́гихъ мои́хъ прегрѣше́ній до́лгъ разрѣши́, возводя́ къ покая́нію.

Богоро́диченъ: Твои́ми мольба́ми, Чи́стая, бѣ́дъ и напа́стей исхи́ти мя́ лю́тыхъ и изба́ви мя́, молю́ся, Ты́ бо стѣна́ еси́ неразруши́ма, и приста́нище, и покро́въ, и необори́мое утвержде́ніе.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Цѣлому́дренно и пра́ведно Бо́гу ты́ жи́тельствовавъ, коне́цъ блаже́нный отъ Него́ прія́лъ еси́, всеблаже́нне Пе́тре.

Всесоверше́нную же́ртву и прія́тну, тебе́ сама́го прине́слъ еси́, Пе́тре ди́вный, же́ртва тебе́ ра́ди бы́вшему Бо́гу.

Слове́съ духо́вныхъ испо́лнився, Ду́хомъ дви́жимь орга́нъ бы́лъ еси́, пѣснопоя́, богоглаго́ливе, неизрече́нная.

Богоро́диченъ: Еди́на сло́вомъ пло́тію Сло́во ро́ждшая, изба́ви, мо́лимся, сѣте́й вра́жіихъ ду́ши на́ша.

Конда́къ пра́здника, гла́съ 4. Подо́бенъ: Вознесы́йся.

Пречи́стый хра́мъ Спа́совъ, многоцѣ́нный черто́гъ и Дѣ́ва, свяще́нное сокро́вище сла́вы Бо́жія, днесь вво́дится въ до́мъ Госпо́день, благода́ть совводя́щи, Яже въ Ду́сѣ Боже́ственномъ, Юже воспѣва́ютъ а́нгели Бо́жіи: Сія́ е́сть селе́ніе небе́сное.

Икосъ:

Неизрече́нныхъ Бо́жіихъ и Боже́ственныхъ та́инъ зря́ въ Дѣ́вѣ благода́ть явля́емую и исполня́емую я́вственно, ра́дуюся и о́бразъ разумѣ́ти недоумѣ́юся, стра́нный и неизрече́нный: ка́ко избра́нная, Чи́стая, еди́на яви́ся па́че всея́ тва́ри ви́димыя и разумѣва́емыя? Тѣ́мже восхвали́ти хотя́ Сію́, ужаса́юся зѣло́ умо́мъ же и сло́вомъ, оба́че дерза́я, проповѣ́даю и велича́ю: Сія́ есть селе́ніе небе́сное.

Пѣ́снь 7.

Ирмо́съ: Пе́щь, Спа́се, ороша́шеся, о́троцы же, лику́юще, поя́ху: отце́въ Бо́же, благослове́нъ еси́.

Ликовству́имъ, празднолю́бцы, днесь, воспои́мъ Чи́стую Влады́чицу, Іоаки́ма и Анну досто́йно чту́ще.

Проро́чествуй, Дави́де, глаго́ля Ду́хомъ: приведу́тся дѣ́вы въ слѣ́дъ Тебе́, приведу́тся Тебѣ́ во храмъ Цари́цы Ма́тери.

Тро́иченъ: Просла́вимъ Тро́ицу Нераздѣ́льную, воспои́мъ Еди́но Божество́ со Отце́мъ Сло́во и Ду́ха Всесвята́го.

Моли́, Его́же родила́ еси́, Го́спода, я́ко благоутро́бна естество́мъ су́ща, Богороди́тельнице, спаси́ ду́ши воспѣва́ющихъ Тя́.

Инъ.

Ирмо́съ: Отроцы богочести́віи въ Вавило́нѣ, о́бразу злато́му не поклони́шася, но посредѣ́ пе́щи о́гненныя, ороша́еми, пѣ́снь воспѣва́ху, глаго́люще: превозноси́мый отце́въ и на́шъ Бо́же, благослове́нъ еси́.

Якоже у́тро, возсія́лъ еси́, просвѣща́я земли́ вся́ концы́ и но́щь преле́стную отгоня́, богогла́се, и́дольскаго безбо́жія, — благослове́нъ еси́, — вопія́, — Бо́же оте́цъ на́шихъ.

Вся́ спасти́ хотя́ Бо́гъ твои́ми моли́твами, прозрѣ́ніе дарова́ Сиси́нію, и души́, и тѣлеси́ очеса́ отве́рзъ, о́тче, отту́ду просвѣща́ется Боже́ственною ба́нею.

Струи́ исцѣле́ній то́чиши отъ боже́ственныя твоея́ ра́ки, Кли́менте сла́вне, страсте́й мно́гихъ избавля́еши всегда́ притека́ющія къ тебѣ́ и пою́щія: благослове́нъ Бо́гъ оте́цъ на́шихъ.

Богоро́диченъ: Подоба́ше безъ сѣ́мене воплоща́емому изъ Тебе́ проити́, Дѣ́во Пречи́стая, Ты́ бо возрасла́ еси́ всѣ́хъ, Чи́стая, пребо́льши. Тѣ́мже Ти́ непреста́нно зове́мъ: благослове́нъ Пло́дъ чре́ва Твоего́.

Инъ. Ирмо́съ то́йже.

Житіе́мъ боголѣ́пнымъ укра́шенъ и боже́ственнымъ свѣ́томъ просвѣща́емь, небе́сныхъ въ нехо́дная вше́лъ еси́, веселя́ся и вопія́, му́дре, Сотво́ршему: благослове́нъ Бо́гъ оте́цъ на́шихъ.

Яко да пресвѣ́тло благоугоди́ши Христу́ Бо́гу, богоблаже́нне, въ ру́ки беззако́нныхъ тя́ сама́го пре́далъ еси́ во́лею, поя́, пребога́те: благослове́нъ Бо́гъ оте́цъ на́шихъ.

Ве́сь просвѣще́нъ, сподо́бился еси́ ви́дѣти Христа́, тебѣ́ показу́юща свою́ ри́зу, лю́тѣ расте́рзану, истка́нную свы́ше, преподо́бне, — благослове́нъ еси́, — вопія́, — Бо́же оте́цъ на́шихъ.

Богоро́диченъ: Вся́, я́ко чиста́, прія́ла еси́ во утро́бѣ Твое́й Сло́во воплоща́емо, но Того́ моли́ очи́стити ми́ прегрѣше́ній ду́шу и тѣ́ло, Пречи́стая, къ Тебѣ́ чи́стою вѣ́рою прири́щущаго.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Весели́тся дне́сь свѣ́тло Іоаки́мъ, и Анна непоро́чная Го́споду Бо́гу прино́ситъ же́ртву, да́нную е́й отъ обѣща́нія — святу́ю Дще́рь.

Хва́лятся святíи Дави́дъ и Іессе́й, и Іу́да чти́тся, изъ ко́рене бо и́хъ израсте́ пло́дъ — Дѣ́ва Чи́стая, изъ Нея́же роди́ся Бо́гъ Превѣ́чный.

Тро́иченъ: Да пое́тся Трисвяты́й Оте́цъ, и Сы́нъ, и Ду́хъ Святы́й, Нераздѣ́льная Еди́ница, Еди́но Божество́, держа́щее дла́нію всю́ тва́рь во вся́ вѣ́ки.

Безнача́льное начина́ется Сло́во пло́тію, роди́вся, я́ко благоволи́, Бо́гъ же и Человѣ́къ изъ Отрокови́цы Дѣ́вы, возсозида́я ны́, пре́жде па́дшія, ра́ди кра́йняго благоутро́бія.

Инъ.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Учени́къ бы́въ Петро́въ, Боже́ственныя нра́вы того́ подража́я, Кли́менте страда́льче, тѣ́мже и престо́ла прее́мникъ и́стинно показа́лся еси́, просвѣща́я всю́ тва́рь.

Та́йно очервлени́въ твоя́ устна́ ча́шею му́дрости, Кли́менте, изры́гнулъ еси́ Боже́ственныхъ уче́ній пучи́ну, потопля́ющую демоностра́шіе, душа́мъ же человѣ́ческимъ источа́ющую спасе́ніе.

Яко пречестну́ю у́тварь, Це́рковь, стяжа́вши твоя́ Боже́ственная законоположе́нія, о тебѣ́ хва́лится и вся́ подвиза́етъ твою́ па́мять вѣ́рою почита́ти во вся́ вѣ́ки.

Богоро́диченъ: Марíе Дѣ́во Богоро́дице, Бо́га Спа́са человѣ́комъ ро́ждшая пло́тію, спаси́ вѣ́рою пою́щія Твое́ Рождество́ и превознося́щія во вся́ вѣ́ки.

Инъ.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Жиру́ющую соску́талъ еси́ па́губу Аріева злѣ́йшаго хуле́нія, отъ вѣ́рныхъ собо́рища отсѣ́къ и отгна́въ церко́вныхъ, богому́дре, огра́дъ.

Первостоя́тель ли́ка а́нгельскаго Пе́тръ яви́ся, боже́ственный верхо́вникъ, сто́лпъ же му́чениковъ бы́лъ еси́, всему́дре Пе́тре богоно́се, и священнодѣ́йствитель Боже́ственныхъ та́инствъ.

Научи́вся отъ Боже́ственнаго вдохнове́нія бу́дущихъ ра́зуму, богоглаго́ливе, и е́же отъ земли́ проувѣ́дѣвъ твое́ преставле́ніе муче́ніемъ, къ вы́шнихъ Го́споду сла́вы Христу́ во вѣ́ки вся́.

Богоро́диченъ: Во утро́бу Дѣ́вы все́льшагося и отъ Нея́ стра́шно и па́че сло́ва дре́вняго Ада́ма обно́вльшаго, Го́спода по́йте и превозноси́те во вся́ вѣ́ки.

На 9-й пѣ́сни Честнѣ́йшую... не пое́мъ, но пое́мъ припѣ́вы пра́здника.

Велича́й, душе́ моя, приведе́нную во хра́мъ Госпо́день и благослове́нную рука́ми іере́евыми.

Пѣ́снь 9.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся насъ ра́ди, бы́въ Человѣ́къ, Безнача́льный. Велича́емъ вси́ я́ко Ма́терь Бо́га на́шего Чи́стую.

Къ си́мъ тропаре́мъ то́йже припѣ́въ:

Велича́й, душе́ моя, приведе́нную во хра́мъ Госпо́день и благослове́нную рука́ми іере́евыми.

Изъ пра́ведныхъ произы́де Іоаки́ма и Анны обѣща́нія пло́дъ — Богоотрокови́ца Марíя и, я́ко кади́ло прія́тное, пло́тію младе́нствующи, приво́дится во святи́лище свято́е я́ко Свята́я во святы́хъ обита́ти.

Велича́й, душе́ моя, приведе́нную во хра́мъ Госпо́день и благослове́нную рука́ми іере́евыми.

Младе́нствующую естество́мъ и па́че естества́ я́вльшуюся Ма́терь Бо́жію восхва́лимъ пѣ́сньми: въ хра́мъ бо зако́нный Го́споду дне́сь приво́дится въ воню́ благово́нія, пра́ведныхъ я́ко пло́дъ духо́вный.

Велича́й, душе́ моя́, Тріѵпоста́снаго и Нераздѣ́льнаго Божества́ Держа́ву.

Тро́иченъ: Тріѵпоста́сное естество́, и Нераздѣ́льную сла́ву, и въ Божествѣ́ Еди́номъ пое́мую непреста́нно на небеси́ и на земли́ Тро́ицу Неразлу́чную просла́вимъ, съ Сы́номъ Отцу́ и Ду́ху покланя́ющеся благоче́стно.

Велича́й, душе́ моя́, Честнѣ́йшую и Сла́внѣйшую го́рнихъ во́инствъ, Дѣ́ву Пречи́стую, Богоро́дицу.

Подъ Твое́ благоутро́біе прибѣга́ющія вѣ́рно и покланя́ющіяся благоче́стно Сы́ну Твоему́, Дѣ́во Богороди́тельнице, я́ко Бо́гу и Го́споду мíра, моли́ся отъ тли́ и бѣ́дъ изба́вити и вся́ческихъ искуше́ній.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Тече́ніе твое́ соверши́въ мно́гими по́двиги и несомнѣ́нно соблю́дъ вѣ́ру Христо́ву, пра́веднымъ вѣнце́мъ украси́лся еси́.

Яко спа́слъ еси́ о́трока дре́вле, удержа́на въ мо́ри лѣ́тнымъ обхожде́ніемъ, му́чениче Христо́въ, си́це глубины́ грѣхо́вныя и мене́ спаси́.

Любо́вію тя́ чту́щія, Кли́менте страстоте́рпче, отъ напа́стей, и бѣ́дъ, и скорбе́й спаси́, моля́ Зижди́теля Христа́.

Богоро́диченъ: Ра́дости мое́ се́рдце испо́лни, Дѣ́во, Яже ра́дости пріе́мшая исполне́ніе, грѣхо́вную печа́ль потребля́ющи.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Предопредѣле́ннаго свяще́нно іера́ршествовати, и свяще́нства коне́цъ благосла́вно пріи́мша, и Христо́ву подража́вша стра́сть, Петра́ чу́днаго воспои́мъ.

Жезло́мъ укрѣ́пльшася си́лы Госпо́дни, и свяще́нствовавша, и свяще́нствованна, и Христу́ прине́сшагося же́ртва, Петра́ богоно́снаго воспои́мъ.

Всесмѣше́ннаго заре́ю Тро́ичною, и свѣтлѣ́йшаго ея́ насла́ждшася сія́нія, и на́мъ спасе́нія прося́ща, Петра́ богопрія́тнаго воспои́мъ.

Дае́ши оби́льно души́ мое́й спасе́ніе, я́ко первосвяще́нникъ бо и́маши вла́сть вяза́ти и рѣши́ти прегрѣше́ній вины́, твои́ми моле́ніи, свяще́ннѣйшій.

Богоро́диченъ: Ты́ еси́, Богоро́дице, ору́жіе на́ше и стѣна́, Ты́ еси́ заступле́ніе къ Тебѣ́ прибѣга́ющихъ, Тебе́ и ны́нѣ на моли́тву подвиза́емъ, да изба́вимся отъ вра́гъ на́шихъ.

Свѣти́ленъ. Подо́бенъ: Жены́, услы́шите.

Ны́нѣ благонаро́читъ яви́ся на́мъ де́нь, иму́щи свяще́нныхъ прее́мникъ, свяще́нныхъ апо́столъ, Петра́ ку́пно и Кли́мента, проповѣ́дники вѣ́ры и непобѣди́мыя му́ченики, и́хже лѣ́тнюю па́мять вѣ́рно соверша́емъ вси́.

Сла́ва, и ны́нѣ, пра́здника:

Юже дре́вле предвозвѣсти́ проро́ческое сосло́віе, ста́мну, и же́злъ, и скрижа́ль, и несѣко́мую го́ру, Марíю Богоотрокови́цу вѣ́рно да восхва́лимъ: дне́сь бо вво́дится во свята́я святы́хъ воспита́тися Го́споду.

На хвали́техъ стихи́ры на 6. Пра́здника 3, гла́съ 1. Подо́бенъ: Небе́сныхъ чино́въ.

Свѣщено́сицы дѣ́вы,* Приснодѣ́ву свѣ́тло провожда́юще,* проро́чествуютъ и́стинно Ду́хомъ бу́дущее:* хра́мъ бо Бо́жій Богоро́дица су́щи,* въ хра́мъ со сла́вою дѣ́вственною,* младе́нствующи, вво́дится.

Обѣща́нія свята́го и пло́дъ благосла́вный* Богоро́дица вои́стинну яви́ся мíру,* я́ко всѣ́хъ превы́шшая:* Яже благоче́стно приводи́ма въ хра́мъ Бо́жій,* моли́тву ро́ждшихъ исполня́етъ,* соблюда́ема Боже́ственнымъ Ду́хомъ.

Небе́снымъ воспита́на, Дѣ́во, хлѣ́бомъ* вѣ́рно въ хра́мѣ Госпо́дни,* родила́ eси́ мíру Жи́зни Хлѣ́бъ, Сло́во,* Eму́же, я́ко хра́мъ избра́нный и всенепоро́чный,* предобручи́лася eси́ Ду́хомъ та́инственно,* обручена́ Бо́гу и Oтцу́.

И свята́го Петра́ 3. Гла́съ и подо́бенъ то́йже.

Пресу́щныя Тро́ицы* Единосу́щное преотмща́я, всеблаже́нне,* я́ко Несозда́нныя Еди́ницы,* Арія низложи́лъ еси́,* показа́въ на́мъ Сы́на нераздѣ́льное,* я́ко Того́жде су́ща* Отцу́ и Ду́ху Божества́.

Гоня́щихъ преста́ убíйственное стремле́ніе,* крове́й лія́ніе ны́нѣ въ неявле́нное сконча́ся,* обоя́ запеча́ташася, Пе́тре му́дре,* свяще́ннымъ твои́мъ свидѣ́тельствомъ,* я́ко о́трочищу Моисе́еву ста́ тече́ніе,* ка́мыкомъ Сепфо́ры иногда́.

Па́стырски пожи́въ,* священному́чениче Христо́въ,* му́ченическія по́двиги показа́лъ еси́ до́блественно,* еди́нъ чрезъ обоя́ вѣне́цъ пріе́мъ,* обою́ду украша́емь,* свяще́нствомъ и болѣ́зньми страда́льческими,* сего́ ра́ди моли́ спасти́ся на́мъ.

Сла́ва, гла́съ 4. Самогла́сенъ:

Руко́ю Бо́жіею пома́зався во іере́я, верхо́внаго соиме́нне, и дѣ́лы, соприча́стниче, слове́сныя о́вцы ева́нгельскими препита́лъ еси́ зла́ками, я́ко му́дръ и и́стиненъ па́стырь, и Ма́рка прее́мникъ досто́йно показа́лся еси́, страстоте́рпческою кро́вію вѣ́ры тече́ніе соверши́лъ еси́, о лю́дехъ предпоже́рся, и Христу́ сообразу́яся, моли́ся о душа́хъ на́шихъ.

И ны́нѣ, пра́здника, гла́съ 2:

Дне́сь въ хра́мъ приво́дится Всенепоро́чная Дѣ́ва, во оби́телище Всецаря́ Бо́га и всея́ жи́зни на́шея Пита́теля; днесь Чистѣ́йшая Святы́ня, я́ко трилѣ́тствующая Юница, во свята́я святы́хъ вво́дится; То́й возопіи́мъ, я́ко а́нгелъ: ра́дуйся, Eди́на въ жена́хъ Благослове́нная.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна пра́здника обои́хъ кано́новъ, пѣ́снь 9-я на 8. По вхо́дѣ: Тропа́рь пра́здника и святы́хъ. Сла́ва, конда́къ святы́хъ. И ны́нѣ, пра́здника. Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода, [и возра́довася ду́хъ Мо́й о Бо́зѣ Спа́сѣ Мое́мъ]. Сти́хъ: Яко призрѣ́ на смире́ніе рабы́ Своея́, [се́ бо, отны́нѣ ублажа́тъ Мя́ вси́ ро́ди]. Святы́хъ проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Апо́столъ пра́здника, ко Евре́емъ, зача́ло 320. И святы́хъ, къ Филипписíомъ, зача́ло 246. Аллилу́ія, гла́съ 8: Слы́ши, Дщи́, и ви́ждь, [и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. И святы́хъ гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются.] Ева́нгеліе пра́здника, Луки́, зача́ло 54, и святы́хъ, Матѳе́я, зача́ло 11. Прича́стенъ: Ча́шу спасе́нія [пріиму́, и и́мя Госпо́дне призову́]. И святы́хъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 251 об. – 262.

/ Къ оглавленію раздѣла /


Наверхъ / Къ титульной страницѣ

0