Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 24-й де́нь.
Слу́жба святѣ́й великому́ченицѣ Екатери́нѣ,
отправля́емая по церко́вному чиноположе́нію со всено́щнымъ бдѣ́ніемъ.

НА МАЛѢЙ ВЕЧЕРНИ,
[На Го́споди воззва́хъ,] стихи́ры му́ченицѣ на 4, гла́съ 4. Подо́бенъ: Яко до́бля.

И къ коле́самъ привяза́ема,* и звѣрьми́ растерза́ема,* и огне́мъ и водо́ю обостри́вши* тво́й по́мыслъ Боже́ственнымъ Ду́хомъ,* тмы́ нача́льника тече́ніи кро́вными,* му́жески удави́ла еси́,* и востекла́ еси́ къ разу́мнымъ черто́гомъ,* вѣ́но Жениху́ твоему́,* дѣ́во, прине́сши страда́ніе.

Жениха́ Христа́ Кро́вію* освяти́вшися, прехва́льная,* твое́ю кро́вію украси́ла еси́ плотску́ю оде́жду.* Тѣ́мже обою́ду просвѣ́щшися, прехва́льная, Екатери́но,* свѣ́тлаго сподо́билася еси́ черто́га Его́.* Его́же моли́,* отъ тли́ и бѣ́дъ изба́витися,* вѣ́рою творя́щимъ* всечестну́ю па́мять твою́.

Сла́ва, гла́съ 6:

Одесну́ю Спа́са предста́ дѣ́ва, и страстоте́рпица и му́ченица, Екатери́но, одѣ́яна добродѣ́тельми непобѣжде́на, и преукра́шена еле́емъ чистоты́, и кро́вію страда́нія, и вопію́щи къ Нему́, ра́достно свѣщу́ держа́щи: въ воню́ мѵ́ра Твоего́ теко́хъ, Христе́ Бо́же, я́ко уязви́хся Твое́ю любо́вію а́зъ, не отлучи́ мене́, Женише́ небе́сный. Тоя́ моли́твами, низпосли́ на́мъ, всеси́льне Спа́се, ми́лости Твоя́.

И ны́нѣ, пра́здника, гла́съ 2:

Две́ри небе́сныя, воспріими́те Дѣ́ву Марíю, Неискусому́жную, Чи́стую Богоро́дицу, изъ Нея́же человѣ́комъ избавле́ніе.

Проки́менъ дне́. И Сподо́би, Го́споди...

На стихо́внѣ стихи́ры, гла́съ 4. Подо́бенъ: Яко до́бля.

Мучи́тельскому шата́нію* и на́глому суровству́,* по́мысломъ сопроти́вльшися мужему́дренно,* бу́дущихъ предви́дящи* наслажде́ніе, богому́дренная,* пребыва́ющее при́сно во вѣ́ки неподви́жимо,* е́же и получи́ла еси́,* отъ земли́ преста́вльшися къ черто́гамъ небе́снымъ,* и ли́ку неразори́мому, сла́вная.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

Ца́рствія благолѣ́піе* и добро́ту кра́сную ви́дѣти сподо́билася еси́,* Жениха́ твоего́ Христа́,* укра́шена ра́нами тве́рдаго твоего́ страда́нія,* и Исто́чнику благи́хъ* досто́йно прибли́жилася еси́.* Отону́дуже боже́ственнаго весе́лія пло́дъ* бога́тно прія́ла еси́, блаже́нная,* и безсме́ртную сла́ву.

Сти́хъ: Въ це́рквахъ благослови́те Бо́га,* Го́спода отъ исто́чникъ Изра́илевыхъ.

Ни и́го рабо́тное,* ни сла́бость же́нская,* ни гла́дъ, ни ра́ны запя́ша ти́,* му́ченичестѣй тве́рдости уподо́битися, всесла́вная,* усе́рдіемъ души́ му́ки претерпѣ́ла еси́.* Отону́дуже получи́ла еси́ небе́сный черто́гъ,* и вѣнце́мъ благода́ти украси́лася еси́,* предстоя́щи Зижди́телю твоему́.

Сла́ва, гла́съ 5:

Дѣ́вства твоего́ красоты́, восхотѣ́ Ца́рь сла́вы Христо́съ, я́ко непоро́чну тя́ невѣ́сту Себѣ́ обручи́, совокупле́ніемъ нетлѣ́ннымъ, и́бо во́лею Свое́ю пода́въ добро́тѣ твое́й си́лу, на враги́ же и стра́сти непобѣди́му показа́, претерпѣ́вшую ра́ны го́рькія, и му́ки свирѣ́пыя, сугу́бымъ вѣнце́мъ увязе́ тя, и поста́ви одесну́ю Себе́ я́ко цари́цу испещре́ну. Того́ моли́, му́ченице честна́я и многострада́льная, Екатери́но, пѣвце́мъ твои́мъ спасе́ніе и жи́знь пода́ти, и ве́лію ми́лость.

И ны́нѣ, пра́здника, гла́съ 2. Лео́нта маи́стора:

Дне́сь въ хра́мъ приво́дится Всенепоро́чная Дѣ́ва, во оби́телище Всецаря́ Бо́га и всея́ жи́зни на́шея Пита́теля; днесь Чистѣ́йшая Святы́ня, я́ко трилѣ́тствующая Юница, во свята́я святы́хъ вво́дится; То́й возопіи́мъ, я́ко а́нгелъ: ра́дуйся, Eди́на въ жена́хъ Благослове́нная.

По трисвято́мъ тропа́рь му́ченицѣ, гла́съ 4:

Агница Твоя́, Іису́се, Екатери́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Или́ се́й, гла́съ то́йже:

Добродѣ́тельми, я́ко луча́ми со́лнечными, просвѣти́ла еси́ неве́рныя мудрецы́. И, я́коже пресвѣ́тлая луна́ ходя́щимъ въ нощи́, невѣ́рія тму́ отгна́ла еси́ и цари́цу увѣ́рила еси́, вку́пѣ же и мучи́теля обличи́ла еси́, богозва́нная невѣ́сто, блаже́нная Екатери́но, жела́ніемъ востекла́ еси́ въ небе́сный черто́гъ къ прекра́сному Жениху́, Христу́, и отъ Него́ ца́рскимъ вѣнце́мъ вѣнча́лася еси́: Ему́же, со а́нгелы предстоя́щи, за ны́ моли́ся, творя́щія пречестну́ю па́мять твою́.

Сла́ва, и ны́нѣ, пра́здника, гла́съ то́йже:

Дне́сь благоволе́нія Бо́жія предображе́ніе и человѣ́ковъ спасе́нія проповѣ́даніе въ хра́мѣ Бо́жіи я́сно Дѣ́ва явля́ется и Христа́ всѣмъ предвозвеща́етъ. Той и мы велегла́сно возопіи́мъ: ра́дуйся, смотре́нія Зижди́телева исполне́ніе.

Ектенія́ ма́лая и отпу́стъ.



НА ВЕЛИЦѢЙ ВЕЧЕРНИ,
Стихологису́емъ: Блаже́нъ му́жъ.., 1-й антифо́нъ. На Го́споди воззва́хъ: поста́вимъ стихо́въ 8, и пое́мъ стихи́ры пра́здника 3 и святы́я 5.
Стихи́ры пра́здника, гла́съ 1. Подо́бенъ: Небе́сныхъ чино́въ.

Пріиди́те, празднолю́бцы вси́,* пѣ́сньми почти́мъ* еди́ну Богоро́дицу* Чи́стую и Дѣ́ву:* вво́дится бо въ хра́мъ Бо́жій,* въ не́мъ жи́ти ны́нѣ свѣ́тло,* святѣ́йшій вои́стинну* Христо́въ хра́мъ,* и ра́дости вся́кія Хода́таица.

Две́ри, проро́че, отве́рзи,* вѣ́рою пріе́мли въ хра́мъ Госпо́день приведе́нную,* всѣ́хъ а́нгелъ же и человѣ́къ похвалу́* и свѣ́тло ра́дованіе,* вну́трь жи́ти и ликова́ти,* я́же хра́мъ Бо́жій и оби́телище.

Богоро́дица Марíя, въ хра́мъ приведе́на,* хлѣ́бъ пріе́млющи отъ а́нгела, яви́ся,* вопію́ща Ей, ра́дуйся:* зачне́ши Сы́на неискусому́жно,* Богоневѣ́стная благослове́нная Богоро́дице Дѣ́во,* земны́мъ благонаслѣ́діе и назда́ніе.

Ины стихи́ры святы́я, гла́съ и подо́бенъ то́йже.

Дне́сь красу́ется гра́дъ Александрíя,* пелены́ твоя́, му́ченице,* въ Боже́ственнѣмъ хра́мѣ твое́мъ имѣ́я прему́дро.* Тѣ́мже и мы́ благоче́стно пра́зднуемъ,* Екатери́но, па́мять твою́ честну́ю:* моли́ся о чту́щихъ тя́. [Два́жды]

Екатери́ны па́мять ны́нѣ пра́зднуимъ:* та́ бо и́стинно вся́ вра́жія си́лы* и сло́вомъ же и дѣ́ломъ низложи́ крѣ́пко* и ри́торское противле́ніе.* Но моли́твами ея́ изба́ви ны́, Бо́же,* отъ безбо́жныхъ вра́гъ. [Два́жды]

Ра́дуйся, всесла́вная му́ченице Екатери́но честна́я:* Сина́йская бо гора́,* въ не́йже ви́дѣ купину́ Моисе́й неопали́му,* въ то́й Христо́съ богоуго́дное тѣ́ло твое́,* ны́нѣ преложи́въ, храни́тъ* да́же до вре́мене втора́го прише́ствія Своего́.

Сла́ва, гла́съ 2:

Ра́достно къ торжеству́ богому́дрыя му́ченицы Екатери́ны стеце́мся, о мучениколю́бцы! И ту́ю похвала́ми, я́ко цвѣ́ты, увязе́мъ, — ра́дуйся, — вопію́ще е́й, — я́же буесло́вныхъ ри́торовъ свирѣпоу́стіе обличи́вши, яко ненаказа́нія испо́лненныхъ, и ты́я къ вѣ́рѣ Боже́ственнѣй руково́дствовавши; ра́дуйся, я́же тѣ́ло многоплете́ннымъ му́камъ вда́вши любве́ ра́ди Творца́ твоего́, и не низложи́вшися, я́ко отрокови́ца неги́блема; ра́дуйся, я́же го́рняя пребыва́лища, возме́здіе болѣ́зней наслѣ́довавши, и сла́вы вѣ́чныя наслажда́ешися. Ея́же жела́юще, пѣснопѣ́вцы твои́, наде́жды да не отпаде́мъ.

И ны́нѣ, пра́здника, гла́съ 8:

По рождествѣ́ Твое́мъ, Богоневѣ́сто Влады́чице, пришла́ eси́ въ хра́мъ Госпо́день воспита́тися во свята́я святы́хъ, я́ко освяще́нна; тогда́ и Гавріи́лъ по́сланъ бы́сть къ Тебѣ́, Всенепоро́чнѣй, пи́щу Тебѣ́ принося́. Небе́сная вся удиви́шася, зря́ще Ду́ха Свята́го, въ Тя все́льшася. Тѣ́мже, Пречи́стая и Нескве́рная, я́же на небеси́ и на земли́ сла́вима, Ма́ти Бо́жія, спаси́ ро́дъ на́шъ.

Аще суббо́та: И ны́нѣ, богоро́диченъ 1-й, настоя́щаго гла́са.
Вхо́дъ. Проки́менъ дне́. И чте́нія.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ра пра́здника, гла́съ 1. Самогла́сная. Гео́ргія Никомидíйскаго.

Да ра́дуется дне́сь не́бо свы́ше, и о́блацы весе́ліе да кропя́тъ о зѣло́ пресла́вныхъ вели́чіихъ Бо́га на́шего: се́ бо Две́рь, на восто́ки зря́щая, ро́ждшися отъ непло́дове безпло́дныя по обѣтова́нію и Бо́гу освяще́на бы́вши въ жили́ще, дне́сь въ хра́мъ я́ко непоро́чное приноше́ніе приво́дится, да ра́дуется Дави́дъ, бряца́я въ гу́сли: приведу́тся, рече́, Царю́ дѣ́вы въ слѣ́дъ Eя́, бли́жняя Eя́ приведу́тся вну́трь ски́ніи Бо́жія, внутрь очисти́лища Eго́, воспита́тися въ жили́ще пре́жде вѣ́къ отъ Oтца́ нетлѣ́нно Ро́ждшагося во спасе́ніе ду́шъ на́шихъ.

Ины стихи́ры му́ченицы, самогла́сны, гла́съ 3:

Страда́льческое торжество́, вѣ́рніи, богому́дреннѣ соверша́емо, ви́дяще, чу́дному въ совѣ́тѣхъ Бо́гу на́шему, благода́рственное пѣснопѣ́ніе воспои́мъ: неви́димую бо держа́ву проти́вныя си́лы, въ же́нстѣмъ естествѣ́ побѣди́, и Боже́ственную Свою́ си́лу въ не́мощи соверши́въ доброму́ченицы; тоя́ моли́твами спаса́етъ ду́ши на́ша.

Истины ча́шу отъ свои́хъ крове́й страда́льческихъ всехва́льная му́ченица Христо́ва, Екатери́но, раствори́вши и сію́ всегда́ предлага́ющи Це́ркви, въ не́йже церко́вныя пито́мцы, му́дрости гла́сомъ созыва́етъ, глаго́лющи: почерпи́те пи́во Воскресе́нія свидѣ́тельное, невѣ́рныхъ прогони́тельное, и страсте́й чисти́тельное, благочести́вымъ же душа́мъ храни́тельно, Спа́су зову́ще: напои́вый на́съ пото́комъ сла́дости Ду́ха, спаси́ ду́ши на́ша.

Иже Кро́вію Христо́вою ду́ши запеча́тавше въ де́нь избавле́нія, кро́вь святу́ю, отъ му́ченическаго исто́чника востека́ющую на́мъ, съ весе́ліемъ духо́внымъ проро́чески почерпе́мъ, живото́чныхъ страсте́й Спа́совыхъ, и присносу́щныя сла́вы образова́тельну. Тѣ́мже Ему́ возопіи́мъ: прославля́яйся во святы́хъ Твои́хъ, Го́споди, пресла́вныя Твоея́ страстоте́рпицы моли́твами, спаси́ ду́ши на́ша.

Сла́ва, гла́съ 6:

Страда́льческимъ ше́ствовавши путе́мъ, мучи́тельскаго избѣжа́ла еси́ совѣ́та, [и́мярекъ], всечестна́я: я́ко дѣ́ва, у́бо мудра́, свѣшу́ нося́щи вошла́ еси́ во дворы́ Го́спода твоего́; я́ко му́ченица му́жествомъ, благода́ть прія́ла еси́ исцѣли́ти плотскíя стра́сти. Но и на́съ, воспѣва́ющихъ тя́, душе́вныхъ болѣ́зней изба́ви, я́же къ Бо́гу мольба́ми твои́ми.

И ны́нѣ, пра́здника, гла́съ 5. Лео́нта маи́стра.

Возсія́ де́нь ра́достенъ и пра́здникъ всече́стенъ: дне́сь бо я́же пре́жде Рождества́ и по Рождествѣ́ Дѣ́ва пребы́вши, въ хра́мъ Госпо́день приво́дится, и ра́дуется Заха́рія ста́рецъ, роди́тель Предте́чевъ, и вопіе́тъ ве́село: прибли́жися, Предста́тельница скорбя́щихъ, въ хра́мъ святы́й, я́ко Свята́, освяти́тися во оби́телище Всецаря́. Да весели́тся Іоаки́мъ пра́oтецъ, и Анна да ра́дуется, я́ко принесо́ша Бо́гу я́ко трилѣ́тствующую Юницу непоро́чную Влады́чицу. Ма́тeри, сра́дуйтеся, дѣ́вы, взыгра́йте, и непло́ды, сликовству́йте, я́ко отве́рзе на́мъ небе́сное Ца́рство пронарече́нная Всецари́ца, ра́дуйтеся, лю́діе, и весели́теся.

На стихо́внѣ стихи́ры, гла́съ 4. Подо́бенъ: Яко до́бля.

Мучи́тельскому шата́нію* и на́глому суровству́,* по́мысломъ сопроти́вльшися мужему́дренно,* бу́дущихъ предви́дящи* наслажде́ніе, богому́дренная,* пребыва́ющее при́сно во вѣ́ки неподви́жимо,* е́же и получи́ла еси́,* отъ земли́ преста́вльшися къ черто́гамъ небе́снымъ,* и ли́ку неразори́мому, сла́вная.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

Ца́рствія благолѣ́піе* и добро́ту кра́сную ви́дѣти сподо́билася еси́,* Жениха́ твоего́ Христа́,* укра́шена ра́нами тве́рдаго твоего́ страда́нія,* и Исто́чнику благи́хъ* досто́йно прибли́жилася еси́.* Отону́дуже боже́ственнаго весе́лія пло́дъ* бога́тно прія́ла еси́, блаже́нная,* и безсме́ртную сла́ву.

Сти́хъ: Въ це́рквахъ благослови́те Бо́га,* Го́спода отъ исто́чникъ Изра́илевыхъ.

Ни и́го рабо́тное,* ни сла́бость же́нская,* ни гла́дъ, ни ра́ны запя́ша ти́,* му́ченичестѣй тве́рдости уподо́битися, всесла́вная,* усе́рдіемъ души́ му́ки претерпѣ́ла еси́.* Отону́дуже получи́ла еси́ небе́сный черто́гъ,* и вѣнце́мъ благода́ти украси́лася еси́,* предстоя́щи Зижди́телю твоему́.

Сла́ва, гла́съ 2:

Житіе́ невеще́ственно навы́кши, суди́ще безбо́жное дости́гши, ста́ла еси́, побѣдоно́сице Екатери́но честна́я, цвѣтонося́щи Бо́жію свѣ́тлость, и, Боже́ственною мо́щію одѣ́яна, повелѣ́нію мучи́телеву поруга́лася еси́ и ри́торовъ утоли́ла еси́ буесло́вныя рѣ́чи, многострада́льная.

И ны́нѣ, пра́здника, гла́съ 8:

Дави́дъ провозглаша́ше Тебѣ́, Пречи́стая, прови́дя освяще́ніе вхо́да Твоего́ въ храмъ, въ не́мже концы́, днесь пра́зднующе, славосло́вятъ Тя, Всепѣ́тая: я́же бо пре́жде Рождества́ Дѣ́ва и по Рождествѣ́ пребы́вши нетлѣ́нна, Ма́ти Сло́ва Жи́зни. Днесь въ хра́мѣ Заха́рія весели́тся, воспріе́мъ Тя, Влады́чице, и свята́я святы́хъ ра́дуются, подъе́мши Тя, исто́чника жи́зни на́шея. Тѣ́мже и мы псало́мски вопіе́мъ Ти: о насъ моли́ Сы́на Твоего́ и Бо́га на́шего дарова́ти намъ ве́лію ми́лость.

На благослове́ніи хлѣ́бовъ: Тропа́рь великому́ченицы, гласъ 4: Добродѣ́тельми, я́ко луча́ми.., два́жды. И пра́здника, гла́съ то́йже: Дне́сь благоволе́нія Бо́жія.., еди́ножды. [Пи́саны на ма́лѣй вече́рни.]



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, святы́я. И ны́нѣ, пра́здника.

По 1-й каѳи́смѣ сѣда́ленъ, гла́съ 5. Подо́бенъ: Собезнача́льное.

Благоче́стно порабо́тившися Вседержи́телю, злочести́вому же мучи́телю не порабо́тилася еси́, честна́я, но претерпѣ́ла еси́ тве́рдо те́мное заключе́ніе, и ра́нъ разжже́ніе, и преста́вилася еси́ къ Бо́гу, богому́драя му́ченице, Екатери́но, моли́ся о на́съ, соверша́ющихъ па́мять твою́. [Два́жды.]

Сла́ва, и ны́нѣ, пра́здника, гла́съ 1. Подо́бенъ: Ка́мени запеча́тану.

Восхвали́те, дѣ́вы, ма́тери, пра́зднуйте, лю́діе, славосло́вите, свяще́нницы, благослови́те Пречи́стую Ма́терь Бо́жію: пло́тію бо младе́нствующи, пре́жде во хра́мъ принесе́ся, я́ко хра́мъ Бо́жій святѣ́йшій. Тѣ́мже пра́здникъ духо́вный соверша́юще, воспои́мъ Ю, я́ко Предста́тельницу ро́да человѣ́ческаго.

По 2-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й.

Муче́ній о́гнь, Ду́ха росо́ю погаси́ла еси́, честна́я, и къ Свѣ́ту преста́вилася еси́ боже́ственному и невеще́ственному, и по кончи́нѣ блаже́ннѣй источа́еши исцѣле́ній ка́пли, Екатери́но, уставля́ющи разжже́ніе страсте́й си́лою духо́вною. [Два́жды.]

Сла́ва, и ны́нѣ, пра́здника, гла́съ то́йже. Подо́бенъ: Ка́мени запеча́тану.

Свята́я святы́хъ Богоро́дице су́щи, досто́йно приведе́ся жи́ти во свята́я, я́ко одушевле́нъ Госпо́день киво́тъ и Свята́го Ду́ха и́стинно вмѣсти́лище Боже́ственное, Дѣ́во Ма́ти: тѣ́мже всели́ся въ Тя́, Иже Отцу́ Единоро́дный и Свято́му Ду́ху соесте́ственный, Тво́й Сы́нъ неискусому́жно, обоготвори́въ все́ человѣ́чество.

Та́же поліеле́й, и по поліеле́и припѣ́въ:

Велича́емъ тя́, страстоте́рпице Христо́ва Екатери́но, и чте́мъ честно́е страда́ніе твое́, е́же за Христа́ претерпѣ́ла еси́.

Псало́мъ избра́нный: Бо́гъ на́мъ прибѣ́жище и си́ла, Помо́щникъ въ ско́рбехъ, обрѣ́тшихъ ны́ зѣло́...

По поліеле́и, сѣда́ленъ, гла́съ 4. Подо́бенъ: Вознесы́йся на Кре́стъ.

Прише́дшую Христу́ во́лею, и украси́вшую добродѣ́тельми се́рдце, благолѣ́пно воспои́мъ, Екатери́но, вѣ́рныхъ мно́жество: та́ бо посрами́ мучи́тельскую де́рзость, и просія́вши я́ко со́лнце посредѣ́ беззако́нникъ, по кончи́нѣ яви́ся земны́мъ подтвержде́ніе боже́ственное, вку́пѣ и держа́ва. [Два́жды.]

Сла́ва, и ны́нѣ, пра́здника, гла́съ 8. Подо́бенъ: Повелѣ́нное та́йно.

Да ра́дуется Дави́дъ пѣснопи́сецъ, и да ликовству́етъ Іоаки́мъ со Анною, я́ко пло́дъ святы́й изъ ни́хъ произы́де, Марíя свѣтоно́сная, Боже́ственная свѣща́, и ра́дуется, входя́щи въ хра́мъ, Юже и, зря́, благослови́ Варахíинъ сы́нъ и, ра́дуяся, взыва́ше: ра́дуйся, Чу́до всемíрное.

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе отъ Ма́рка, зача́ло 21: Во вре́мя о́но, по Іису́сѣ идя́ху наро́ди мно́зи... Сла́ва: Моли́твами святы́я великому́ченицы Екатери́ны... И ны́нѣ: Моли́твами Богоро́дицы... Та́же: Поми́луй мя́, Бо́же...

Посе́мъ стихи́ра, гла́съ 2:

Ра́достно къ торжеству́ богому́дрыя му́ченицы Екатери́ны стеце́мся, о мучениколю́бцы! И ту́ю похвала́ми, я́ко цвѣ́ты, увязе́мъ, — ра́дуйся, — вопію́ще е́й, — я́же буесло́вныхъ ри́торовъ свирѣпоу́стіе обличи́вши, яко ненаказа́нія испо́лненныхъ, и ты́я къ вѣ́рѣ Боже́ственнѣй руково́дствовавши; ра́дуйся, я́же тѣ́ло многоплете́ннымъ му́камъ вда́вши любве́ ра́ди Творца́ твоего́, и не низложи́вшися, я́ко отрокови́ца неги́блема; ра́дуйся, я́же го́рняя пребыва́лища, возме́здіе болѣ́зней наслѣ́довавши, и сла́вы вѣ́чныя наслажда́ешися. Ея́же жела́юще, пѣснопѣ́вцы твои́, наде́жды да не отпаде́мъ.

Кано́нъ пра́здника, со ирмосо́мъ на 6, и святы́я на 8.

Кано́нъ пра́здника, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ вхожде́ніе.

Прему́дрости, Пречи́стая, Тя сокро́вище вѣ́мы и благода́ти, точа́щую исто́чникъ приснотеку́щій ра́зума, про́симъ: Твоя́ ка́пли одожди́, Влады́чице, е́же воспѣва́ти Тя́ при́сно.

Превы́шши, Пречи́стая, небе́съ бы́вши, хра́мъ и пала́та, въ хра́мъ Бо́жій возложи́лася еси́ Тому́ угото́ватися въ Боже́ственное жили́ще прише́ствія Его́.

Свѣ́тъ возсія́вши Богоро́дица благода́ти, вся́ просвѣти́ и совокупи́ пресвѣ́тлое Ея́ украси́ти торжество́ пѣ́сньми: пріиди́те, къ Не́й стеце́мся.

Две́рь сла́вная, по́мыслы непроходи́мая, две́ри отве́рзши хра́ма Бо́жія, ны́нѣ повелѣва́етъ на́мъ, совше́дшимъ, Боже́ственныхъ Ея́ чуде́съ наслади́тися.

Инъ кано́нъ му́ченицы, его́же краегране́сіе: Екатери́ну приснопа́мятную пѣ́сньми пою́. Ѳеофа́ново, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Екатери́ны, всему́дрыя му́ченицы, моли́твами, Христе́, мра́чное о́ко души́ моея́ просвѣти́, зарю́ ми́ дая́, Влады́ко, Твоего́ свѣтоли́тія, душетлѣ́нныхъ паде́ній мои́хъ ве́сь мра́къ потребля́ющую.

Направля́ема Влады́ки, всему́драя, Боже́ственными повелѣ́ніи и Того́ любо́вію пали́ма, потекла́ еси́, къ подвиго́мъ тща́щися, и мучи́телей ра́зумы, Екатери́но, устраши́ла еси́ сло́вомъ, и му́дростію, и благода́тію.

Управля́ема дла́нію, сла́вная, крѣ́пкою Христо́вою, и́дольскія бу́ри избѣ́гла еси́, му́ченице, немо́кренно преплы́вши креста́ вѣ́триломъ и Боже́ственными вѣ́тры Ду́ха, пѣ́снь Бо́гу воспѣва́ющи.

Ра́дующися дѣ́вственными добро́тами, Екатери́но му́драя, и Боже́ственное зна́ніе съ небесе́ иму́щи, лжеиме́ннаго зна́нія благодерзнове́нно и му́жественно предста́тели посрами́ла еси́, ты́я держа́внѣ побѣди́вши.

Богоро́диченъ: Иже Богоро́дицу Тя́ проповѣ́даетъ, Пречи́стая, вся́кія е́реси отринове́ніе и́мать: пло́ть бо бы́вша, неизме́нно родила́ еси́ превы́шша вся́кія, Богороди́тельнице, тва́ри Сло́во Бо́жіе Присносу́щное.

Катава́сія: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ликъ себѣ́ совоку́пльшія, духо́вно утверди́, въ честно́мъ вхожде́ніи Твое́мъ вѣнце́въ сла́вы сподо́би.

Невѣстокраси́тель дне́сь яви́ся кра́сный Дѣ́вы хра́мъ и черто́гъ, пріе́мь одушевле́нный черто́гъ Бо́жій, Чи́стую, и Непоро́чную, и Свѣтлѣ́йшую всея́ тва́ри.

Дави́дъ, предначина́я ликова́ніе, игра́етъ, и ликовству́етъ съ на́ми, и Цари́цу зове́тъ Тя́ укра́шену, Пречи́стая, предстоя́щу, Всечи́стая, въ хра́мѣ Царю́ и Бо́гу.

Изъ нея́же преступле́ніе произы́де дре́вле ро́ду человѣ́ческому, изъ Тоя́ исправле́ніе и нетлѣ́ніе процвѣте́: Богоро́дица дне́сь приводи́ма въ до́мъ Бо́жій.

Игра́ютъ а́нгельская во́инства и всѣ́хъ человѣ́къ мно́жество, и предъ лице́мъ, Пречи́стая, предтеку́тъ Твои́мъ дне́сь свѣщено́сицы, зову́ще вели́чествія Твоя́ въ дому́ Бо́жіи.

Инъ.

Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Во́льными твои́ми стремле́ньми вошла́ еси́ ко страда́нію, во́лею Христа́ подража́ющи и побѣди́вши свѣ́тло тмы́ міроде́ржца, вѣнцено́сица яви́лася еси́, Екатери́но богопрія́тная.

Крѣ́постію ума́ обличи́ла еси́ мучи́тели, безбо́жія въ глубинѣ́ валя́ющіяся, ри́торствующи я́вѣ богозна́нія догма́ты, Бо́жіею му́дростію му́ченица уясня́ема всехва́льная.

Равнобо́жіе во у́ши Евинѣ пошепта́вый, отъ отрокови́цы млады́я ны́нѣ попира́ется, ору́жіемъ бо Креста́ огради́вшися, посрами́ Екатери́на му́ченица безмѣ́рно того́ хва́лящася.

Богоро́диченъ: Умерщвле́нный мо́й у́мъ жи́зни дѣ́йствомъ изъ Тебе́ я́вльшіяся мíру воздви́гни, я́звы и стру́пы истребля́ющи грѣхо́вныя, еди́на Богороди́тельнице Всенепоро́чная.

Катава́сія: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Конда́къ пра́здника, гла́съ 4. Подо́бенъ: Вознесы́йся.

Пречи́стый хра́мъ Спа́совъ, многоцѣ́нный черто́гъ и Дѣ́ва, свяще́нное сокро́вище сла́вы Бо́жія, днесь вво́дится въ до́мъ Госпо́день, благода́ть совводя́щи, Яже въ Ду́сѣ Боже́ственномъ, Юже воспѣва́ютъ а́нгели Бо́жіи: Сія́ е́сть селе́ніе небе́сное.

Икосъ:

Неизрече́нныхъ Бо́жіихъ и Боже́ственныхъ та́инъ зря́ въ Дѣ́вѣ благода́ть явля́емую и исполня́емую я́вственно, ра́дуюся и о́бразъ разумѣ́ти недоумѣ́юся, стра́нный и неизрече́нный: ка́ко избра́нная, Чи́стая, еди́на яви́ся па́че всея́ тва́ри ви́димыя и разумѣва́емыя? Тѣ́мже восхвали́ти хотя́ Сію́, ужаса́юся зѣло́ умо́мъ же и сло́вомъ, оба́че дерза́я, проповѣ́даю и велича́ю: Сія́ есть селе́ніе небе́сное.

Сѣда́ленъ святы́я, гла́съ и подо́бенъ то́йже:

Жениха́ твоего́, Христа́, возлюби́вши, свѣщу́ твою́ свѣ́тло угото́вльши, добродѣ́тельми просія́вши, сла́вная. Тѣ́мже вошла́ еси́ съ Ни́мъ въ черто́гъ и, вѣне́цъ страда́нія отъ Него́ пріе́мши, отъ бѣ́дъ изба́ви на́съ, соверша́ющихъ, Екатери́но, па́мять твою́. [Два́жды.]

Сла́ва, и ны́нѣ, пра́здника, гла́съ то́йже:

Дави́де, предъиди́ въ хра́мъ Бо́жій, и, ра́дуяся, пріими́ Цари́цу на́шу, и То́й возопíй: вни́ди, Госпоже́, въ хра́мъ Царе́въ, вни́ди, Ея́же сла́ва покрове́нно разумѣ́ется, изъ Нея́же хо́щетъ источи́тися на́мъ всѣ́мъ Свѣ́тъ, Христо́съ.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Две́рь непрохо́дную Бо́жій до́мъ пріе́мля дне́сь, преста́ти сотвори́ вся́кой слу́жбѣ зако́нной, я́ко и́стинно яви́ся, зовы́й, су́щимъ на земли́ Истина.

Гора́ присѣ́нная, ю́же прови́дѣ дре́вле Авваку́мъ, предпроповѣ́да вну́трь вмѣсти́вшуюся въ нехо́дныхъ хра́ма, добродѣ́тели процвѣ́тши, и покрыва́етъ концы́.

Ви́дѣвши пресла́вная вся́ земля́ стра́нныя же и ди́вныя ве́щи, ка́ко Дѣ́ва, отъ а́нгела пи́щу пріе́млющи, о́бразы строе́нія но́ситъ.

Хра́мъ, и пала́та, и не́бо одушевле́нное я́вльшися, Богоневѣ́сто Царе́ва, во хра́мъ зако́нный приводи́ма дне́сь, Тому́ соблюда́ема, Пречи́стая.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Страда́льческое, Екатери́но, противле́ніе показа́ла еси́, му́ченице приснопа́мятная, вражде́бнику зѣло́ терпѣли́вно противля́ющися и того́ попра́вши нога́ми кра́сными Креста́ си́лою, страстоно́сице, му́чениковъ похвала́.

Невѣ́ста Христо́ва, Екатери́но всеблаже́нная, яви́лася еси́, Боже́ственныя красоты́ свѣтови́дными луча́ми просвѣща́ема и добро́тою сія́ющи. Тѣ́мже и, веселя́щися, пѣснопое́ши Влады́цѣ: си́лѣ Твое́й сла́ва, Человѣколю́бче.

Мучи́тельскую горды́ню низложи́ла еси́ и Боже́ственнымъ сло́вомъ му́дрости твоея́ я́ко отъ глубины́ ле́стнаго демоноговѣ́нія прельща́емыя исхи́тила еси́, уча́щи зва́ти Христу́ пѣснопою́щія: си́лѣ Твое́й сла́ва, Человѣколю́бче.

Благосла́вное и свѣтоно́сное торжество́ сла́вныя па́мяти твоея́, всехва́льная, крѣ́пко де́рзость вра́жію попра́вши, я́ко со́лнце, возсія́, въ не́мже велегла́сно Влады́цѣ вопіе́мъ: си́лѣ Твое́й сла́ва, Человѣколю́бче.

Богоро́диченъ: Ны́нѣ крѣ́пость низложи́ отмета́ющихся о́браза, Отрокови́це, поклоне́нія Тебе́, Чи́стыя, и па́че ума́ изъ Тебе́ воплоще́ннаго и мíръ ве́сь просвѣ́щшаго, и всѣ́хъ святы́хъ, вѣ́рою же чту́щія Тя́ просвѣти́, еди́на Всепѣ́тая.

Катава́сія: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Пѣ́снь 5.

Ирмо́съ: Ужасо́шася вся́ческая въ честнѣ́мъ вхожде́ніи Твое́мъ: Ты бо, Неискусобра́чная Дѣ́во, вну́трь вошла́ еси́ въ хра́мъ Бо́жій, я́коже честнѣ́йшій хра́мъ, всѣ́мъ воспѣва́ющимъ Тя́ ми́ръ подава́ющая.

Свяще́ніе сла́вное и свяще́нное возложе́ніе, дне́сь Пречи́стая Дѣ́ва, возложи́вшися въ хра́мъ Бо́жій, Всецарю́ на́шему Бо́гу Еди́ному въ жили́ще соблюда́ется, я́ко вѣ́сть Са́мъ.

Добро́ту, Пречи́стая, души́ Твоея́ зря́ нѣ́когда, вѣ́рою Заха́рія возопи́: Ты́ еси́ избавле́ніе, Ты́ еси́ всѣ́хъ ра́дость, Ты́ еси́ воззва́ніе на́ше, Еюже Невмѣ́стный вмѣще́нъ мнѣ́ яви́тся.

О, па́че ума́ чуде́съ Твои́хъ, Всечи́стая́! Стра́нное Твое́ рождество́ е́сть, стра́ненъ о́бразъ возраще́нія Твоего́, стра́нна и пресла́вна Твоя́, Богоневѣ́сто, вся́ и человѣ́ки несказа́нна.

Свѣ́щникъ многосвѣ́тлый су́щи, Богоневѣ́сто, дне́сь возсія́ла еси́ въ дому́ Госпо́дни и озаря́еши ны́ честны́ми дарова́ніи, Чи́стая, чуде́съ Твои́хъ, Богоро́дице всепѣ́тая.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Любо́вію огнепали́ма, му́ченице всесла́вная, Влады́ки твоего́ и и́щущи Того́ недомы́сленную добро́ту ви́дѣти, самово́льнымъ нра́вомъ ра́намъ себе́ вдала́ еси́, дѣ́вства сія́ющи благода́тьми.

Страстьми́ свяще́ннѣйшими, отрокови́це добродѣ́во, украси́вши тебе́ саму́ю благолѣ́пно, возшла́ еси́ къ небе́сному Христо́ву черто́гу и ны́нѣ свѣ́тло твоему́ Жениху́, веселя́щися, сочта́лася еси́, всеблаже́нная.

Отрокови́ца всесвѣ́тлая яви́лася еси́, возлюби́вши Еди́наго Жела́емаго, и, во слѣ́дъ Того́ крѣпча́йшее тече́ніе соверши́вши, въ воню́ мѵ́ра твоего́ у́мнаго истоще́ннаго, вопія́ла еси́: теку́, Женише́ мо́й.

Богоро́диченъ: Истинную Богоро́дицу Тя́ вси́ позна́вше, Пречи́стая Влады́чице, изъ Тебе́ ро́ждшагося Бо́га Сло́ва вѣ́дяще, проповѣ́даемъ во дву́ существа́хъ, хотѣ́ніихъ самовла́стныхъ познава́ема, Ма́ти Богоневѣ́стная.

Катава́сія: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Вся́ческая Нося́й глаго́ломъ, моли́тву пра́ведныхъ услы́ша. Тѣ́мже непло́дныя разрѣши́лъ еси́ неду́гъ, я́ко Благоутро́бенъ, ра́дости Вино́вную симъ дарова́.

Сказа́ти хотя́ Госпо́дь язы́комъ Свое́ спасе́ніе, Неискусобра́чную ны́нѣ отъ человѣ́къ прія́тъ, примире́нія зна́меніе и обновле́нія.

Яко до́мъ су́щи благода́ти, въ не́мже сокро́вища лежа́тъ неизрече́ннаго Бо́жія строе́нія, Всечи́стая, въ хра́мѣ причасти́лася еси́ нетлѣ́нныя сла́дости.

Діади́му Тя ца́рскую пріе́мъ, храмъ, Богоневѣ́сто, просвѣща́шеся и подступа́ше лу́чшимъ, предрече́нныхъ зря́ на Тебѣ́ сбытіе́.

Инъ.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Всю́ тя́, добро́тою сія́ющу, дѣ́вства заре́ю, му́ченическими же, отрокови́це, обагре́ну кровьми́, ви́дѣвъ, благо́е Сло́во и пречи́стое въ черто́зѣхъ небе́сныхъ тя́ всели́.

Возмогла́ еси́ Кресто́мъ мучи́телей разруши́ти держа́ву, и мірскíя му́дрости обличи́вши суету́, богодохнове́ннаго уче́нія точа́щи догма́ты, велему́дренная Екатери́но приснопа́мятная.

Ле́стію пе́рвѣе Ада́ма ра́йскія сла́дости изгна́вшаго, ра́нъ болѣ́зни крѣ́пко терпя́щи, низложи́ла еси́ на зе́млю, му́ченице всесла́вная, и вѣнцы́ Ца́рствія вѣнча́лася еси́.

Богоро́диченъ: Ми́лостива мнѣ́ Судію́ и Сы́на Твоего́, Богоро́дице Дѣ́во, Твои́ми мольба́ми бы́ти въ де́нь суда́, Изба́вителя же лю́тыхъ, Ма́ти, сотвори́, къ Тебѣ́ бо еди́ной наде́жды возлага́ю.

Катава́сія: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Конда́къ святы́я, гла́съ 2. Подо́бенъ: Вы́шнихъ ища́.

Ли́къ честны́й боже́ственнѣ, мучениколю́бцы, воздви́гните ны́нѣ, почита́юще всему́друю Екатери́ну, сія́ бо въ три́знищи Христа́ проповѣ́да и змíя попра́, ри́торовъ ра́зумы укроти́вши.

Икосъ:

Отъ Бо́га му́дрость пріи́мши издѣ́тства, му́ченице, и внѣ́шнюю до́брѣ му́дрость всю́ извы́че, позна́вши у́бо отъ тоя́ стихíй движе́ніе же и творе́ніе по сло́ву, и сія́ изъ нача́ла сло́вомъ Сотво́ршаго, Тому́ благодаре́ніе въ нощи́ и во дни́ приноша́ше, и́долы низложи́вши и си́мъ несмы́сленно служа́щія ри́торовъ ра́зумы укроти́вши.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Се́ дне́сь возсія́ конце́мъ весна́ ра́достная, просвѣща́ющи на́шу ду́шу, и помышле́ніе и у́мъ благода́тію, торжество́мъ Богоро́дицы дне́сь та́инственно да учреди́мся.

Да дароно́сятъ днесь вся́ческая Цари́цѣ, Ма́тери Бо́жіи, не́бо и земля́, и а́нгеловъ чи́ни, и человѣ́ковъ мно́жество и да вопію́тъ: во хра́мъ вво́дится Ра́дость и Избавле́ніе.

Писа́ніе мимотече́ и оскудѣ́ зако́нъ, я́коже сѣ́нь, и благода́ти лучи́ возсія́ша въ хра́мъ Бо́жій вше́дшей Тебѣ́, Дѣ́во Ма́ти Чи́стая, въ не́мъ благослове́нная.

Повину́ся Рождеству́ Твоему́, Всечи́стая, я́ко Творцу́ и Бо́гу не́бо, и земля́, и преиспо́дняя, и вся́къ язы́къ земны́хъ исповѣ́даетъ, я́ко Госпо́дь яви́ся, Спа́съ ду́шъ на́шихъ.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́. Сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще, поя́ху: благослове́нъ еси́, Бо́же оте́цъ на́шихъ.

Му́чениковъ хвала́, благоче́стія учи́тельница была́ еси́, свѣ́тлому твоему́ Жениху́ му́чениковъ мно́жество приве́дши, Христу́. Съ ни́миже зове́ши, всехва́льная, пою́щи: благослове́нъ Бо́гъ оте́цъ на́шихъ.

Сло́во твое́ прему́дрое ко спасе́нію мно́ги исхи́ти отъ идолонеи́стовства и свѣтоно́сны яви́ му́ченики, велегла́сно съ тобо́ю взыва́ющія: благослове́нъ Бо́гъ оте́цъ на́шихъ.

Отрокови́ца, въ слѣ́дъ Тебе́ иду́щи, Тебѣ́ приведе́ся, мече́мъ посѣ́чена, Твою́ подража́ющи стра́сть пречи́стую и Тебѣ́, Зижди́телю, вопію́щи и глаго́лющи: благослове́нъ Бо́гъ оте́цъ на́шихъ.

Богоро́диченъ: Святы́хъ Святы́й, въ Тебѣ́ свя́то всели́вся, Чи́стая Богоро́дице Дѣ́во, воплоще́нъ, изъ Тебе́ ражда́ется, за е́же спасти́ вѣ́рою зову́щія: благослове́нъ Бо́гъ оте́цъ на́шихъ.

Катава́сія: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Пѣ́снь 8.

Ирмо́съ: Слы́ши, Отрокови́це, Дѣ́во Чи́стая, да рече́тъ у́бо Гавріи́лъ совѣ́тъ Вы́шняго, дре́вній, и́стинный: бу́ди къ прія́тію гото́ва Бо́жію, Тобо́ю бо Невмѣсти́мый съ человѣ́ки поживе́. Тѣ́мъ и ра́дуяся, вопію́: благослови́те, вся́ дѣла́ Госпо́дня, Го́спода.

Пречи́стый хра́мъ въ до́мъ Бо́жій приводя́щи Анна иногда́, вопію́щи, съ вѣ́рою рече́ свяще́ннику: ча́до, отъ Бо́га да́нное мнѣ́, пріи́мъ ны́нѣ, введи́ во храмъ Зижди́теля твоего́ и, ра́дуяся, по́й Ему́: благослови́те, вся́ дѣла́ Госпо́дня, Го́спода.

Рече́, ви́дѣвъ, Аннѣ иногда́ Ду́хомъ Заха́рія: Жи́зни Ма́терь вво́диши и́стинную, Юже свѣ́тло проро́цы Бо́жіи Богоро́дицу проповѣ́даша, и ка́ко хра́мъ вмѣсти́тъ Ю? Тѣ́мъ чудя́ся, вопію́: благослови́те, вся́ дѣла́ Госпо́дня, Го́спода.

Раба́ Бо́жія бы́хъ а́зъ, — отвѣща́ Анна ему́, — призыва́ющи Сего́ вѣ́рою и моли́твою, прія́ти моея́ болѣ́зни плодъ, по прія́тіи же рожде́нную привести́ Да́вшему Ю. Тѣ́мъ, зовя́, вопію́: благослови́те, вся́ дѣла́ Госпо́дня Го́спода.

Зако́нное вои́стинну дѣ́ло есть, — свяще́нникъ рече́ е́й, — стра́нну же весьма́ ве́щь поразумѣва́ю, зря́ Приводи́мую въ до́мъ Бо́жій, пресла́вно превосходя́щую свята́я благода́тію. Тѣ́мъ и ра́дуяся, вопію́: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Твои́ми уче́ніи цари́ца, вѣ́рующи, притече́ ко благоче́стію, и крѣ́пко претерпѣ́вши болѣ́зней чу́вство, и Ца́рствія небе́снаго непрее́мнаго я́вственно сподо́бися, вопію́щи Влады́цѣ: свяще́нницы, благослови́те, лю́діе, превозноси́те во вся́ вѣ́ки.

Съ му́ченики да бу́дутъ вѣ́рныхъ проше́нія, страстоте́рпица бо Христу́ предстои́тъ, прося́щи лу́чшая и спасе́нія хода́тайственная всесвяту́ю и честну́ю ея́ па́мять усе́рдно соверша́ющимъ и вѣ́рно пѣснопою́щимъ: лю́діе, превозноси́те Христа́ во вѣ́ки.

Отве́рзъ, пріе́млетъ тя́ Жени́хъ, всему́драя, две́ри ра́йскія, и въ черто́зѣ всесвѣ́тлѣмъ обита́ти сотвори́, Ца́рствія прича́стницу я́ко соо́бщницу страсте́й явля́етъ. Ему́же ны́нѣ предстоя́щи, царе́ва дщи́, свѣ́тло укра́шена, на́съ не забу́ди.

Ухищре́нными глаго́лы искуша́ше мучи́тель, и увѣтливосло́віи, лю́тый, льстя́, разсла́бити твою́ крѣ́пость надѣ́явся, сла́вная, но уневѣ́ститися Христу́ хотя́щи, вопія́ла еси́ Влады́цѣ: свяще́нницы, воспо́йте, лю́діе, превозноси́те Христа́ во вѣ́ки.

Богоро́диченъ: Свяще́ннѣйши была́ еси́, Богоро́дице Всенепоро́чная, премíрнаго а́нгеловъ чи́на: си́хъ бо родила́ еси́ Содѣ́теля и Го́спода отъ дѣ́вственныя и неискусобра́чныя утро́бы, во дву́хъ существа́хъ неслія́нно и невра́щно, во еди́ной же ѵпоста́си Бо́га воплоще́нна.

Катава́сія: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

Ирмо́съ: Яко одушевле́нному Бо́жію киво́ту да ника́коже ко́снется рука́ скве́рныхъ, устнѣ́ же вѣ́рныхъ Богоро́дицѣ немо́лчно, гла́съ а́нгела воспѣва́юще, съ ра́достію да вопію́тъ: и́стинно вы́шши всѣ́хъ еси́, Дѣ́во Чи́стая.

Яко пресвѣ́тлую, Богоро́дице Чи́стая, душе́вныя чистоты́ иму́щи добро́ту, благода́тію же Бо́жіею исполня́ема съ небесе́, Свѣ́томъ Присносу́щнымъ просвѣща́еши всегда́ съ весе́ліемъ вопію́щія: и́стинно вы́шши всѣ́хъ еси́, Дѣ́во Чи́стая.

Прелета́етъ, Богоро́дице, Чи́стая, чу́до Твое́ си́лу слове́съ: тѣ́ло бо въ Тебѣ́ поразумѣва́ю па́че сло́ва, тече́нія грѣхо́внаго непрія́тно. Тѣ́мже благода́рственно вопію́ Ти: и́стинно вы́шши всѣ́хъ еси́, Дѣ́во Чи́стая.

Пресла́вно прообразова́ше, Чи́стая, зако́нъ Тя́ ски́нію и Боже́ственную ста́мну, стра́ненъ киво́тъ, и катапета́сму, и же́злъ, хра́мъ неразруши́мый и две́рь Бо́жію. Тѣ́мже науча́ютъ Тебѣ́ зва́ти: и́стинно вы́шши всѣ́хъ еси́, Дѣ́во Чи́стая.

Пѣснопоя́ Тебѣ́, провозглаша́ше Дави́дъ, глаго́ля Тя́ Дще́рь Царе́ву, красото́ю добродѣ́телей, одесну́ю предстоя́щую Бо́га, ви́дѣвъ Тя упещре́ну. Тѣ́мже, проро́чествуя, вопія́ше: и́стинно вы́шши всѣ́хъ еси́, Дѣ́во Чи́стая.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Преста́вилася еси́ къ черто́гомъ свѣтови́днымъ, невѣ́стными укра́шена у́тварьми, дѣ́вственную иму́щи свѣщу́ въ твое́й десни́цѣ, въ друго́й же держа́щи отсѣ́ченную твою́ главу́. И ны́нѣ, предстоя́щи Христу́, твоему́ Жениху́, Тя́ пою́щія сохрани́.

Прія́та бы́сть твоя́, богому́драя, моли́тва, вѣ́рою бо твое́ имену́ющія и́мя, честна́я, спаса́етъ Влады́ка отъ искуше́ній и благоздра́віе подае́тъ, неду́говъ избавля́я всеразли́чныхъ, душе́вныхъ же и тѣле́сныхъ. Тѣ́мъ тя́, веселя́щеся, Екатери́но, ублажа́емъ.

Приста́ла еси́ ти́хому приста́нищу ны́нѣ, благоопря́тно же и легко́ мо́ре мірско́е, му́ченице, преплы́вши треволне́ній, не искуси́вшися, всему́драя, бога́тство многоразли́чное Христу́ принося́щи, дѣ́во, мно́жество му́ченикъ, Екатери́но всеблаже́нная.

Въ черто́зѣхъ небе́сныхъ ны́нѣ вну́трь съ дѣ́вственныхъ ли́ки ликовству́ющи, му́ченическими озаря́ема луча́ми, Екатери́но всему́драя, разрѣши́ паде́ній мои́хъ плени́цы, усе́рдно моля́щи всѣ́хъ Благодѣ́теля, за Его́же кро́вь твою́ излія́ла еси́.

Богоро́диченъ: Яви́лася еси́, о Дѣ́во Ма́ти Бо́жія! па́че естества́ ро́ждши въ тѣлеси́ благо́е Сло́во, Его́же отъ се́рдца Своего́ Оте́цъ отры́гне пре́жде всѣ́хъ вѣко́въ, я́ко бла́гъ, Его́же ны́нѣ и тѣле́съ превы́шша разумѣва́емъ, а́ще и въ тѣ́ло облече́ся.

Катава́сія: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Свѣти́ленъ святы́я. Подо́бенъ: Ду́хомъ во святи́лищи.

Возжиля́ема мудрова́ніемъ же́нъ, о дѣ́во Екатери́но всечестна́я, страстоте́рпцевъ сла́во, филосо́фовъ хи́трость о Бо́зѣ обличи́ла еси́, я́ко буесло́віе су́щу и ба́снь, всенепоро́чную и́стинно Ма́терь Бо́жію спомо́щницу стяжа́вши. [Два́жды.]

Сла́ва, и ны́нѣ, пра́здника. Подо́бенъ: Ученико́мъ зря́щимъ.

Ангельстіи чи́ни и му́ченическій ли́къ пра́зднуетъ дне́сь съ на́ми въ боже́ственнѣмъ введе́ніи Богоотрокови́цы и Ма́тере Госпо́дни отъ Іоаки́ма же и Анны, вку́пѣ тве́рдаго Мерку́рія и пресла́вныя Екатери́ны. Ихже моли́твами обрѣсти́ на́мъ оставле́ніе мно́гихъ согрѣше́ній, мо́лимся.

На хвали́техъ стихи́ры на 6: пра́здника 3 и святы́я 3:
Стихи́ры пра́здника, гла́съ 2. Подо́бенъ: До́ме Евфра́ѳовъ.

Свѣ́тъ Тя́ трисія́нный* вже́гши, Богоро́дице,* въ хра́мѣ сла́вы* небе́сную Ти́ пи́щу посыла́етъ,* велича́я Тя́.

Изъ ко́рене у́бо Дави́дова* прозябла́ еси́, Дѣ́во,* Гавріи́лъ, Тебѣ́ ра́дость принося́,* вопія́ше:* Бо́га роди́ши, Пречи́стая.

Бла́го же свяще́нному* и боже́ственному сопряже́нію* Іоаки́ма и Анны,* изъ ни́хже Чи́стая роди́ся,* приведена́ бы́сть ны́нѣ Творцу́ Своему́.

Стихи́ры святы́я, гла́съ 4. Подо́бенъ: Да́лъ еси́ зна́меніе.

Па́мять всесвяще́нную,* Екатери́но всехва́льная,* честна́го твоего́ страда́нія соверша́юще,* сла́вимъ во гла́сѣхъ непреста́нныхъ* дарова́вшаго терпѣ́ніе тебѣ́ тве́рдое,* и побѣдоно́сну тя́ показа́вшаго,* и сло́во тебѣ́ пода́вшаго, устраша́ющаго ри́торы,* Іису́са Человѣколю́бца,* и Спа́са, и Го́спода.

Му́ченице самово́льная,* Екатери́но всесла́вная, яви́лася еси́,* мучи́теля благомо́щно обличи́вши* и лю́тое неи́стовство многобо́жія* богозна́нія сія́ніемъ низлага́ющи* и Боже́ственною благода́тію.* Отону́дуже, и я́ко му́ченицу,* и я́ко дѣ́ву непоро́чну, Христо́съ вѣнча́,* Спа́съ ду́шъ на́шихъ.

Благода́ть Ду́ха,* Екатери́но всесла́вная,* отверзе́ніемъ у́стъ прія́ла еси́,* очи́стивши тебе́ саму́ю житіе́мъ,* и по́мысломъ терпѣли́внымъ* мучи́телей го́рдость попра́ла еси́,* и добро́тою тѣле́сною* душе́вную красоту́ богому́дреннѣ предпочла́ еси́,* страда́льцевъ удобре́ніе.

Сла́ва, гла́съ 2. Вави́лы мона́ха:

Житіе́ невеще́ственно навы́кши, суди́ще безбо́жное дости́гши, ста́ла еси́, побѣдоно́сице, Екатери́но честна́я, цвѣтонося́щи Бо́жію свѣ́тлость и Боже́ственною мо́щію одѣ́яна, повелѣ́нію мучи́телеву поруга́лася еси́ и ри́торовъ утоли́ла еси́ буесло́вныя рѣ́чи, многострада́льная.

И ны́нѣ, гла́съ 6. Се́ргія Агіополи́та:

Дне́сь собо́ри вѣ́рныхъ, соше́дшеся, духо́внѣ да торжеству́имъ и Богоoтрокови́цу Дѣ́ву и Богоро́дицу, въ хра́мъ Госпо́день приводи́му, благоче́стно восхва́лимъ, предъизбра́нну отъ всѣ́хъ родо́въ, во оби́телище всѣ́хъ Царя́ Христа́ и Бо́га: дѣ́вы, свѣщи́ нося́ще, предъиди́те, Приснодѣ́вы чту́ще честно́е происхожде́ніе, ма́тeри, печа́ль всю́ отложи́вше, ра́достно спослѣ́дствуйте Ма́тери Бо́га быва́ющей и ра́дости мíра Хода́таицѣ. Вси́ у́бо ра́достно, е́же — ра́дуйся, — со а́нгеломъ возопіи́мъ Обра́дованнѣй, при́сно моля́щейся о душа́хъ на́шихъ.

Славосло́віе вели́кое. По трисвято́мъ: Тропа́рь святы́я. Сла́ва, и ны́нѣ, пра́здника. [Пи́саны на ма́лѣй вече́рни.] Ектеніи́ и отпу́стъ.

На часѣ́хъ: Тропа́рь пра́здника, Сла́ва, святы́я. Кондаки́ пра́здника и святы́я премѣня́юще глаго́лемъ.



НА ЛИТУРГІИ,

Блаже́нна пра́здника, пѣ́снь 7-я и 8-я, на 4 и святы́я, пѣ́снь 6-я, [на 4]. По вхо́дѣ: Тропа́рь пра́здника и святы́я. Сла́ва, конда́къ святы́я. И ны́нѣ, пра́здника. Проки́менъ пра́здника, гла́съ 3. Пѣ́снь Богоро́дицы: Вели́читъ душа́ Моя́ Го́спода, [и возра́довася ду́хъ Мо́й о Бо́зѣ Спа́сѣ Мое́мъ]. Сти́хъ: Яко призрѣ́ на смире́ніе рабы́ Своея́, [се́ бо, отны́нѣ ублажа́тъ Мя́ вси́ ро́ди]. И святы́я, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Апо́столъ святы́я, ко Ефесе́емъ, зача́ло 233: Бра́тіе, возмога́йте о Го́сподѣ... [Аллилу́ія пра́здника, гла́съ 8: Слы́ши, Дщи́, и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. И святы́я,] гла́съ 4: Воззва́ша пра́ведніи и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Ева́нгеліе святы́я, отъ Луки́, зача́ло 106: Рече́ Госпо́дь Свои́мъ ученико́мъ: внемли́те отъ человѣ́къ... Прича́стенъ пра́здника: Прича́стенъ: Ча́шу спасе́нія пріиму́, и и́мя Госпо́дне призову́. И святы́я: Ра́дуйтеся пра́ведніи о Го́сподѣ, пра́вымъ подоба́етъ похвала́.


Подоба́етъ вѣ́дати, а́ще случи́тся попра́зднство Вхо́да Богоро́дицы и пра́зднество святы́я великому́ченицы Екатери́ны въ недѣ́лю:

Въ суббо́ту ве́чера, на ма́лѣй вече́рни: Стихи́ры воскре́сны 4. Сла́ва, святы́я. И ны́нѣ, пра́здника. На стихо́внѣ стихи́ра воскре́сна еди́на, та́же стихо́вна съ припѣ́вы свои́ми и Сла́ва, святы́я. И ны́нѣ, пра́здника. По трисвято́мъ: Тропа́рь воскре́сенъ. Сла́ва, святы́я. И ны́нѣ, пра́здника. И отпу́стъ.

На вели́цѣй вече́рни. На Го́споди воззва́хъ: Стихи́ры воскре́сны 3, и пра́здника 3 и святы́я 4. Сла́ва, святы́я. И ны́нѣ, богоро́диченъ 1-й гла́са. Вхо́дъ. Проки́менъ дне́ и чте́нія святѣ́й 3. На литíи: Стихи́ра пра́здника и святы́я [стихи́ры]. Сла́ва, святы́я. И ны́нѣ, пра́здника. На стихо́внѣ: Стихи́ры воскре́сны. Сла́ва, святы́я. И ны́нѣ, пра́здника. На благослове́ніи хлѣ́бовъ: Тропа́рь пра́здника, два́жды. И святѣ́й, еди́ножды.

На у́трени. На Бо́гъ Госпо́дь: Тропа́рь воскре́сенъ, два́жды. Сла́ва, святы́я. И ны́нѣ, пра́здника. По каѳи́смахъ: Сѣда́льны воскре́сны съ богоро́дичны и́хъ. И чте́ніе во Ева́нгеліи Толково́мъ. Поліеле́й и тропари́ Ангельскій собо́ръ... Ипакои́ гла́са. И сѣда́льны святы́я вси́, по еди́ножды. Сла́ва, сѣда́ленъ и́же по поліеле́и. И ны́нѣ, пра́здника. Та́же степе́нна и проки́менъ, гла́са. Ева́нгеліе воскре́сно и стихи́ра воскре́сна. Кано́нъ воскре́сенъ, со ирмосо́мъ на 4, и пра́здника на 4 и святы́я на 6. Катава́сія: Христо́съ ражда́ется... По 3-й пѣ́сни: Конда́къ пра́здника и и́косъ. И святы́я [конда́къ и и́косъ]. И сѣда́ленъ святы́я, [два́жды]. Сла́ва, и ны́нѣ, пра́здника. По 6-й пѣ́сни: Конда́къ и и́косъ воскре́сенъ. И чте́мъ про́логъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, святы́я. И ны́нѣ, пра́здника. На хвали́техъ: Стихи́ры воскре́сны 4. И святы́я, со сла́внымъ 4, съ припѣ́вы ея́. [Сти́хъ 1-й: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ 2-й: Въ це́рквахъ благослови́те Бо́га, Го́спода отъ исто́чникъ Изра́илевыхъ.] Сла́ва, стихи́ра ева́нгельская. И ны́нѣ, Преблагослове́нна еси́, Богоро́дице Дѣ́во... Славосло́віе вели́кое. По трисвято́мъ тропа́рь воскре́сенъ то́чію. И ектеніи́ и отпу́стъ.

На часѣ́хъ. Тропа́рь воскре́сенъ пре́жде. Сла́ва, пра́здника и святы́я премѣня́емъ. Конда́къ пра́здника, и воскре́сенъ и святы́я премѣня́емъ же.

На литургíи. Блаже́нна гла́са на 4, и пра́здника, пѣ́снь рядова́я, на 4, и святы́я, пѣ́снь 6-я на 4. По вхо́дѣ тропари́ и кондаки́ воскре́сны, и пра́здника, и хра́ма и святы́я. Проки́менъ гла́са и святы́я. Апо́столъ, и Ева́нгеліе и прича́стенъ, дне́ и святы́я.

Источникъ: Слу́жба святѣ́й великому́ченицѣ Екатери́нѣ, отправля́емая по церко́вному чиноположе́нію со всено́щнымъ бдѣ́ніемъ, въ Высокоторже́ственный де́нь Тезоимени́тства Ея́ Импера́торскаго Вели́чества, Благочести́вѣйшія Госуда́рыни Императри́цы Екатери́ны Алексíевны, Самоде́ржицы Всероссíйскія, Ное́мврія 24-го. — М.: Въ Моско́вской Тѵпогра́фіи, 1765. — 27 л.

/ Къ оглавленію раздѣла /


Наверхъ / Къ титульной страницѣ

0