Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 24-й де́нь.
Свята́го му́ченика Мерку́рія Смоле́нскаго, но́ваго чудотво́рца.

НА ВЕЛИЦѢЙ ВЕЧЕРНИ,
Стихосло́вимъ: Блаже́нъ му́жъ.., [1-й антифо́нъ.] На Го́споди воззва́хъ: стихи́ры, гла́съ 4:

Якоже отъ а́нгела или́ съ небесе́ зна́меніе пріе́млеши, къ тебѣ́ бо по́сланъ быва́етъ слуга́ це́ркве вели́цѣй Госпожи́ и Богоро́дицы, возвѣща́я и веля́ тебѣ́ изы́ти на срѣ́теніе си́лъ пога́ныхъ иноплеме́нникъ. Гла́су же къ тебѣ́ свы́ше соше́дшу: ра́бе Мо́й и уго́дниче Мерку́ріе, воста́въ, препоя́шися по́ясомъ во́инства, изы́ди ско́ро съ вели́кою де́рзостію сопроти́вныхъ побѣжда́я, съ тобо́ю е́смь побора́ющи по благовѣ́ріи. Не хощу́ бо, — рече́, — зрѣ́ти Мое́й плѣне́нѣ бы́ти це́ркви отъ пога́ныхъ, умоли́хъ бо Сы́на Моего́, да пода́стъ ти́ о се́мъ дерзнове́ніи твое́мъ вѣне́цъ небе́сный отъ животво́рныя десни́цы Его́.

Отъ ца́рска колѣ́на во́инъ изы́де, и посла́ся непобѣди́мый воево́да на́шему гра́ду, вели́ко поможе́ніе отъ Госпожи́ на́шея Богоро́дицы, во́инствуя бо, не земно́му царю́ угожда́я, но свы́ше повелѣ́ніе пріе́мля, богому́дре и блаже́нный страда́льче Мерку́ріе, жела́ніемъ и ре́вностію побора́я по благовѣ́ріи, му́ченически стражда́ и проти́вныхъ полки́ побѣжда́я пога́ныхъ иноплеме́нникъ, и са́мъ ну́ждною сме́ртію коне́цъ житію́ воспріи́меши, и ко Христу́ Бо́гу на не́бо востече́ши, и, ра́вными тебѣ́ святы́ми му́ченики ли́ку сочта́вся, возме́здіе пріи́меши. Тѣ́мже и ны́нѣ мы́, многогрѣ́шніи, мо́лимъ тя́, свя́те, имѣ́я дерзнове́ніе, помоли́ся о гра́дѣ на́шемъ, невоева́ну пребы́ти ему́, и душа́мъ на́шимъ дарова́ти ве́лію ми́лость.

Сла́ва, гла́съ 2:

Пріиди́те, благовѣ́рніи лю́діе, пріиди́те, со́нмище празднолюбе́зныхъ, пѣ́снь воскли́кнемъ и рука́ми воспле́щимъ къ Засту́пницѣ на́шей и Госпожѣ́, и Богоро́дицѣ, сы́нове гра́да Смоле́нска, ра́достію покрыва́ющеся, я́ко посла́ся отъ Нея́ непобѣди́мь во́инъ гра́ду на́шему, уго́дникъ Сея́, сы́й Мерку́рій, мно́го побора́я по на́мъ, пога́ныхъ побѣжда́етъ и забра́ло быва́етъ тве́рдо отъ всѣ́хъ ра́тей, находя́щихъ гра́ду на́шему. Сте́кшеся, гра́ждане вси́, въ хра́мъ святы́й Госпожи́ и Богоро́дицы и приступи́вше, объи́мемъ, лобза́юще се́рдцемъ же и усты́, гро́бъ свята́го Мерку́рія и похвала́ми пое́мъ его́: ра́дуйся, вопію́ще, худо́жества побѣди́вый зловѣ́рныхъ ва́рваръ, и свирѣ́пое и́хъ мучи́тельство обличи́вый, и ве́ліе дерзнове́ніе отъ Христа́ Бо́га пріи́мый. И ны́нѣ, свя́те, мо́лимъ тя́: не забу́ди твоего́ гра́да и люде́й, живу́щихъ въ не́мъ, идѣ́же е́сть гро́бъ съ блаже́ннымъ тѣ́ломъ твои́мъ, моли́ся побѣ́ду да́ти гра́ду на́шему, и душа́мъ на́шимъ проще́ніе мно́гихъ грѣхо́въ, и ве́лію ми́лость.

И ны́нѣ, богоро́диченъ:

Пре́йде сѣ́нь зако́нная, [благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ].

Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 4. Подо́бенъ: Яко до́бля.

Многообра́зными муче́ніи* лю́тый мучи́тель ка́знемъ злы́мъ преда́въ казни́ти* многострада́льное и долготерпѣли́вое тѣ́ло твое́,* богомы́сленне Мерку́ріе,* не отве́рглся еси́ Христа́,* ни кумíромъ поже́рлъ еси́,* но терпѣ́лъ еси́, я́ко ино́му стра́ждущу,* ожида́я бу́дущаго возда́нія* и безсме́ртнаго богосло́вія.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Воздви́жемь и стру́жемь,* и ка́меніемъ посыпа́емь, и желѣ́зомъ ураня́емь,* и мече́мъ скончава́емь,* непрекло́ненъ пребы́лъ еси́,* на Ка́мени у́мнѣмъ* ду́шу твою́ водрузи́въ.* И сего́ ра́ди а́нгельскимъ лико́мъ сочета́лся еси́,* свѣ́та невече́рняго сподобля́емь.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Исцѣле́ніе дарова́ній* жела́ющимъ источа́ютъ, сла́вне,* твоя́ мо́щи,* и потопля́ютъ страсте́й неду́ги, Мерку́ріе,* и разоря́ютъ лука́выхъ де́моновъ толпы́,* напая́ютъ же вѣ́рныхъ сердца́,* прозяба́ющая добродѣ́телей* плоды́ Боже́ственныя* и благоче́стія разумѣ́ніе.

Сла́ва, гла́съ 2:

Житіе́мъ до́брымъ и чистото́ю, свя́те, угожда́я Христу́ Бо́гу и Того́ ро́ждшей Богома́тери, къ суди́щемъ безбо́жныхъ иноплеме́нникъ постиза́еши, повелѣ́ніемъ да́же подо́бнѣ исходя́й на противоборю́щія, цѣлому́дріе проти́ву зловѣ́рнѣ цѣлу́ющаго, Мерку́ріе; ту́ побѣ́ду нося́, подвиза́ешися, и чу́до вели́ко о себѣ́ сотворя́я, ра́тника съ вели́кими си́лами побѣди́въ Христо́вою си́лою, и са́мъ ту́, внѣ́ предъ гра́домъ, блаже́нне, коне́цъ воспрія́лъ еси́, и си́мъ чудесе́мъ гра́дъ удивля́еши: отсѣ́ченную бо твою́ святу́ю главу́ отъ иноплеме́нника судо́мъ Бо́жіимъ, са́мъ, я́ко жи́въ, по сме́рти съ тѣ́ломъ во гра́дъ вне́слъ еси́ и ны́нѣ побѣ́ды вѣне́цъ имѣ́еши. Тѣ́мже и мы́, подвиза́ющеся, мо́лимъ тя́, обстоя́ще, свя́те, гро́бъ тво́й, да прише́дъ, побо́реши на гра́дъ тво́й и лю́ди держа́вы Госпожи́ и Богоро́дицы, злѣ́ ра́тующія, отъ Христа́ Бо́га прося́ на́мъ мíра и ве́лія ми́лости.

И ны́нѣ, богоро́диченъ воскре́сенъ, по гла́су:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

Тропа́рь, гла́съ 4:

Му́ченикъ Тво́й, Го́споди, Мерку́рій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, богоро́диченъ воскре́сенъ:

[Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
На Бо́гъ Госпо́дь: Тропа́рь то́йже.

По 1-й каѳи́смѣ сѣда́ленъ, гла́съ 1. Подо́бенъ: Ли́къ а́нгельскій.

Во́инство на земли́ возненави́дѣвъ, му́чениче, на небесѣ́хъ возжелѣ́лъ еси́ сла́ву и болѣ́зни претерпѣ́лъ еси́ и ну́ждную сме́рть. Тѣ́мже дне́сь всесвяту́ю твою́ па́мять пра́зднуемъ, Христу́ принося́ще хвалу́, преблаже́нне Мерку́ріе. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію и Дѣ́ву мо́лимъ вси́ вои́стинну, въ щедро́ты Твоя́ вопіе́мъ, любо́вію прибѣга́юще къ Твое́й бла́гости, Тя́ бо и́мамы, грѣ́шніи, засту́пницу и Тебе́ стяжа́хомъ въ напа́стехъ спасе́ніе, еди́ну Пречи́стую.

По 2-й каѳи́смѣ сѣда́ленъ, гла́съ 4. Подо́бенъ: Яви́лся еси́ дне́сь.

Тече́ніе соверши́въ и́стинно, и мучи́телей всю́ крѣ́пость побѣди́лъ еси́, пріи́мъ вѣне́цъ отъ руки́ Вседержи́теля, Мерку́ріе всече́стне, и показа́лся еси́ а́нгеломъ соприча́стникъ. [Два́жды.]

Сла́ва, и ны́нѣ, богоро́диченъ:

Сло́во Отчее, Христа́ Бо́га на́шего, изъ Тебе́ вопло́щшееся, разумѣ́хомъ, Богоро́дице Дѣ́во, еди́на чи́стая и благослове́нная. Тѣ́мже всегда́ прославля́емъ Тя́, велича́юще.

[Велича́ніе:

Велича́емъ тя́, страстоте́рпче святы́й Мерку́ріе, и чте́мъ честна́я страда́нія твоя́, я́же за Христа́ претепѣ́лъ еси́.

Псало́мъ избра́нный: Бо́гъ на́мъ прибѣ́жище и си́ла...]

По поліеле́и сѣда́ленъ, гла́съ 4:

Во́ина Христо́ва непобѣди́маго, побѣди́теля на враги́ до́бляго, въ вели́кихъ чудесѣ́хъ возсія́вшаго при́сно вси́ восхва́лимъ вѣ́рою Мерку́рія страстоте́рпца, то́читъ бо цѣльбы́ прири́щущимъ вѣ́рою, и утоля́етъ стра́сти лю́тыя, и су́щія въ ско́рбехъ человѣ́ки заступа́етъ. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во, къ Тебѣ́ бо прибѣга́юще, невреди́ми пребыва́емъ, и па́ки согрѣша́юще, и́мамы Тя́ моли́твенницу. Тѣ́мъ, благодаря́ще, вопіе́мъ Ти́: ра́дуйся, Обра́дованная, Госпо́дь съ Тобо́ю.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится]. Сти́хъ: Насажде́ни въ дому́ Госпо́дни [во дво́рѣхъ Бо́га на́шего процвѣту́тъ]. Вся́кое дыха́ніе... Ева́нгеліе Луки́, зача́ло 106.

По 50-мъ псалмѣ́ стихи́ра, гла́съ 6:

Дне́сь вселе́нная вся́, страстоте́рпца луча́ми просвѣща́ема, и Бо́жія Це́рковь, цвѣты́ украша́ема, му́чениче Мерку́ріе, вопіе́тъ ти́: уго́дниче Христо́въ и засту́пниче те́плый, не преста́й моля́ся за рабы́ твоя́.

Кано́нъ пра́здника со ирмосо́мъ на 6 и свята́го на 8, гла́съ 8.

Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Отъ вы́шнихъ повелѣ́ній, свя́те, во́инствуеши, съ вы́шними ли́ки предстои́ши благи́хъ Исто́чнику и ра́дости Боже́ственнаго наслажде́нія, приснопа́мятне, наслажда́ешися, сохраня́й тве́рдѣ гра́дъ, въ не́мже соверша́ютъ, сла́вне, па́мять твою́, Го́сподеви пою́ще: сла́вно бо просла́вися.

По́двигъ тво́й ре́вности свидѣ́тельствова, му́дре, си́лою укрѣпля́емь Христо́вою, и проти́въ ра́тникъ исхо́диши, и, ра́дуяся, претерпѣ́лъ еси́ главы́ твоея́ отсѣче́ніе, и вопія́ше сла́вно повелѣ́ніемъ ея́.

Стра́жъ гра́ду яви́лся еси́, и мучи́теля я́вѣ укроти́лъ еси́, и болѣ́зненное отъ ни́хъ видѣ́ніе, веселя́ся, претерпѣ́лъ еси́, Мерку́ріе, вопія́ и моля́ся къ Посла́вшей тя́: Го́сподеви пои́мъ, сла́вно бо просла́вися.

Богоро́диченъ: Якоже и въ Кесарíи равноименова́нное тебѣ́ пріе́млеши су́ще зва́ніе, та́кожде и здѣ́ изво́ли благочести́вая Цари́ца, посыла́етъ тя́, Мерку́ріе, Богоро́дица, му́чениче. Къ То́й помоли́ся о мнѣ́, окая́ннѣмъ, ми́лостива обрѣсти́ на стра́шнѣмъ судѣ́ Сы́на Ея́.

Катава́сія: Христо́съ ражда́ется...

Пѣ́снь 3.

Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Отъ младе́нства вво́инился еси́ Христу́, ро́дъ и бога́тство оте́чества оста́вль, и ве́сь разжига́емь Боже́ственною любо́вію, и отъ Того́ Ро́ждшія, сла́вне, стра́жъ гра́ду Ея́ посла́лся еси́.

Воспое́мъ Го́спода и съ ро́ждшею Его́ Богома́терію, пода́вшаго стра́жа тве́рда гра́ду на́шему, во́ина до́бляго Мерку́рія и чуде́съ испо́лненнаго.

Десни́цею укрѣпля́емь Влады́чнею, вра́жіе па́губное наше́ствіе побѣди́лъ еси́, я́ко до́бръ страда́лецъ, богому́дре, за хра́мъ Богоро́дицы и за благовѣ́ріе.

Богоро́диченъ: О, Го́спода моего́ Ма́ти! Ты́ наде́жда отча́янныхъ и помо́щница всѣ́мъ грѣ́шникомъ! Не пре́зри, ми́лостивая Цари́це, мене́, окая́ннаго лю́тѣ и пребезмѣ́рно согрѣши́вшаго, па́че человѣ́ческаго естества́.

Сѣда́ленъ Мерку́рія, гла́съ 4. Подо́бенъ: Ско́ро предвари́.

Ри́млянинъ ро́домъ сы́й, но вѣ́рою благовѣ́рною огражде́нъ, а не полувѣ́ріемъ боля́й, но уго́дникъ Бо́гу бы́сть и Того́ Ро́ждшей. Льсти́ваго ра́тника посрами́, исполи́на съ сы́номъ порази́, и вѣне́чникъ Христо́въ яви́ся, и сла́вы ра́достныя причасти́ся. Сего́ ра́ди свяще́нную его́ па́мять пра́зднуемъ ны́нѣ. [Два́жды.]

Сла́ва, и ны́нѣ, богоро́диченъ:

Даніи́лъ Тя́ го́ру ве́лію нарече́, и́нъ же́злъ и катапета́сму, Іезекíиль же две́рь, е́юже про́йде Христо́съ Бо́гъ, Богоро́дице, не пре́зри, Ми́лостивая, но пріими́ мои́хъ скве́рныхъ окая́нныхъ усте́нъ моле́ніе и ту́не покажи́, Госпоже́, Твою́ ми́лость на мнѣ́, многогрѣ́шнѣмъ.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, я́ко неизрече́ннымъ совѣ́томъ, Бо́гъ сы́й присносу́щный отъ Дѣ́вы проше́лъ еси́, вопло́щся. Сла́ва снизхожде́нію Твоему́, Христе́, сла́ва си́лѣ Твое́й.

Якоже и во свое́мъ оте́чествѣ присво́ился еси́ любе́знѣ Зижди́телю, и свѣ́тлый вѣне́цъ отъ Него́ воспрія́лъ еси́, и во́инствовалъ еси́ по благовѣ́ріи, я́ко непобѣди́мь, свя́те Мерку́ріе, помоли́ся, отъ Него́же получи́лъ еси́ дерзнове́ніе, о мнѣ́, окая́ннѣмъ, да получу́ ми́лость.

Истка́ себѣ́ порфи́ру благоче́стія па́че оте́цъ свои́хъ, въ ню́же обо́лкся, и во́инъ крѣ́покъ показа́ся, и ме́ртвости совлече́ ри́зу невѣ́рія, и поя́ше: сла́ва си́лѣ Твое́й, Го́споди.

Да́же до кро́ве ста́въ, подвиза́лся еси́, побѣжда́я проти́вныя ра́тники, побѣдоно́сецъ показа́лся еси́ и вы́шнія сла́вы сподо́бився, Мерку́ріе.

Богоро́диченъ: Якоже до́ждь на руно́ сни́де, та́коже въ Твою́ пречи́стую утро́бу Сло́во спаси́тельное сни́де, Приснодѣ́во, Ты́ же, Богоро́дице, я́ко ту́ча, изсуши́ мно́гихъ мои́хъ зо́лъ бре́мя.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Распросте́ръ ру́цѣ протя́гъ злы́й ва́рваринъ, хотя́ внеза́пу наити́ на гра́дъ и хра́мъ Богоро́дицы, ты́ же, неосла́бно просте́ръ твоя́ со ору́жіемъ святы́я ру́ки, изше́лъ еси́, и побѣди́лъ еси́ проти́вника, и отту́ду вѣнча́лся еси́.

Иже со́лнцу и огню́ служа́, пріи́де, ты́ же, свя́те, Христу́ и Того́ Ма́тери служа́, изше́лъ еси́, и того́ си́лу пресѣ́клъ еси́, и гра́дъ свободи́лъ еси́, и са́мъ отъ Христа́ просла́вился еси́.

Прича́стникъ страсте́й Влады́чнихъ яви́ся Мерку́рій, и сла́вы Того́ пріо́бщникъ бы́въ, и Того́ Боже́ственную свѣ́тлость наслѣ́дова.

Богоро́диченъ: Умертви́, о Дѣ́во, живу́щій во мнѣ́ грѣ́хъ, Жи́знь ро́ждшая и Умертви́вшаго сме́рть.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Вжиля́ше тя́ присносу́щное отъ высоты́, Мерку́ріе, зва́ніе всеви́дящее, и слуга́ церко́вный, му́дре, увѣ́ри тя́, я́коже а́нгелъ, повелѣва́ше ти́ дерза́ти и ника́коже устраши́тися ва́рварска наше́ствія.

Умерщвле́нъ бы́сть змíй вселука́вый, и не сбы́стся злохи́тріе его́, но нога́ми попра́ся кра́сными до́бляго во́ина и ору́жника Христо́ва Мерку́рія, вше́дъ бо, побѣди́ пога́нина.

Всесоверше́нно Влады́цѣ прине́слъ еси́ серде́чное изволе́ніе, му́чениче, и того́ ра́ди изше́лъ еси́ проти́во ра́ти пога́нскихъ си́лъ, и побѣди́тель ве́лій показа́лся еси́, и ны́нѣ на небеси́ предстои́ши, Мерку́ріе.

Богоро́диченъ: Зача́тіе неизрече́нно, рождество́ неизглаго́ланно, Отрокови́це, я́ко Бо́га ражда́еши пло́тію. Уми́лостивися о мнѣ́ окая́ннемъ, да улучу́ и а́зъ, лише́нный, заступле́ніе Твое́.

Конда́къ, гла́съ 4:

Яви́ся во бранѣ́хъ непобѣди́мь во́инъ, отъ ри́млянъ ро́домъ, сыновство́ имѣ́ гра́да Смоле́нска, я́ко бо си́хъ ра́ди нарече́ся, я́ко отъ Богоро́дицы стра́жъ крѣ́покъ посла́ся гра́ду, пѣ́сньми Мерку́рія ублажи́мъ, пра́зднующе ве́село па́мять его́, я́ко да изба́витъ гра́дъ на́шъ отъ бѣды́ ра́тникъ.

Икосъ:

Горды́ню низложи́въ льсти́ваго мучи́теля, на правосла́віе вознося́щагося нечести́ваго, и до конца́ сего́ лю́таго змíя главу́ отсѣ́клъ еси́, свя́те Мерку́ріе, и пу́ста его́ сотво́рь, и па́мять его́ съ шу́момъ бы́сть: ты́ бо исхо́диши на предгра́діе еди́нъ бра́тися съ ты́сящами безбо́жныхъ ва́рваръ. Яко бо отъ высоты́ имѣ́я повелѣ́ніе, наде́жду и упова́ніе отъ Самы́я Госпожи́ и Богоро́дицы, заступа́ющія и помога́ющія тебѣ́. Тоя́ же посо́біемъ непобѣди́мымъ и ра́тника злоко́зненнаго крѣ́пко удави́лъ еси́, и мно́жество си́лъ его́ побѣди́лъ еси́, и сама́го мучи́теля посрами́лъ еси́. Тѣ́мже, крѣ́пкій Христо́въ во́ине, зове́мъ ти́ ра́достно и ве́село пра́зднуемъ па́мять твою́: я́ко да изба́виши гра́дъ на́шъ отъ бѣды́ ра́тникъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Свѣ́томъ вы́шняго сія́нія озаря́емь, до́блій во́ине, воспѣва́ющія ны́нѣ па́мять твою́ просвѣти́, пою́щія: благослове́нъ Бо́гъ оте́цъ на́шихъ.

Воспѣва́лъ еси́ всѣ́хъ Благодѣ́теля, распаля́яся, и, изше́дъ на побѣжде́ніе ра́тниковъ, огня́ ре́вностію, блаже́нне, жего́мь, и поя́: благослове́нъ еси́, Го́споди Бо́же оте́цъ на́шихъ.

Въ кро́ви проти́ву ста́лъ еси́ беззако́нныхъ ополче́нія, свя́те, ка́менію и огню́ кла́няющихся. Ты́ же, къ Ка́мени — Христу́ вопія́, си́хъ побѣди́лъ еси́, поя́: благослове́нъ еси́, Го́споди Бо́же оте́цъ на́шихъ.

Зе́млю обагри́въ, блаже́нне Мерку́ріе, кро́вію твое́ю, Влады́ки Человѣколю́бца жела́я о́бщникъ Того́ бы́ти, поя́: благослове́нъ еси́, Го́споди Бо́же оте́цъ на́шихъ.

Богоро́диченъ: Чи́ни а́нгельстіи удивля́ются та́инства Твоего́ глубинѣ́, Богоро́дице, Бо́гъ бо, изъ Тебе́ воплоще́нъ, яви́ся, Его́же похва́лимъ: Бо́же, благослове́нъ еси́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Благоче́стно и му́дренно по́двигъ тво́й, сла́вне, соверши́лъ еси́ и доблему́дренно враги́ твоя́ побѣди́лъ еси́, я́ко бо дарова́ся тебѣ́, свя́тче, побѣ́да небе́сная. Тѣ́мже воспѣ́лъ еси́: свяще́нницы, воспо́йте, лю́діе, превозноси́те Го́спода во вѣ́ки.

Сконча́вся, свя́те, отъ исполи́на, Мерку́ріе, мече́мъ бо отсѣче́ главу́ твою́, и отту́ду получи́лъ еси́ жела́емаго тобо́ю вѣнца́ и зе́млю кро́вію отъ твои́хъ уде́съ истече́ніемъ напои́лъ еси́, поя́: свяще́нницы, воспо́йте, лю́діе, превозноси́те Го́спода во вѣ́ки.

Богоро́диченъ: Яко на́шего существа́ поновле́ніе, Пречи́стая, вси́ вино́вну, вѣ́рніи, пое́мъ Тя́: Бо́га бо па́че сло́ва родила́ еси́, еди́на па́че земноро́дныхъ. Твои́мъ благоутро́біемъ и на́съ озари́, пою́щихъ Тя́.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Гно́еве му́ченчестіи благово́ніе ны́нѣ испуща́ютъ благода́тное, смра́дныя на́ша стра́сти исцѣлѣва́ютъ, источа́ютъ бо святы́я и́хъ мо́щи цѣле́бныя во́ды и напоя́ютъ ду́ши пою́щихъ тѣ́хъ чудодѣя́ніе.

Яко вели́ка столпа́ и тве́рдо забра́ло дарова́ тя Христо́съ, Мерку́ріе, гра́ду сему́, идѣ́же ны́нѣ то́чиши чуде́съ струю́ и помога́еши побѣ́дою на пога́ныя.

Спомо́щника имѣ́яху вси́ гра́ждане, страстоте́рпче Христо́въ до́блественный, копіе́ и щи́тъ тво́й вы́ну вели́кое посо́біе иму́ще, тя́ велича́ютъ, Христа́ Бо́га сла́вяще, вѣнча́вшаго тя́.

Богоро́диченъ: Просвѣти́, две́ре Свѣ́та, омраче́нную ду́шу мою́ страстьми́ и лука́выми по́мыслы очернѣ́вшую и бѣ́дствующую, и изба́ви искуше́ній, и бѣ́дъ, и скорбе́й, да сла́влю Тя́, упова́ніе вѣ́рныхъ и утвержде́ніе.

Свѣти́ленъ. Подо́бенъ: Ду́хомъ во святи́лищи.

Жениху́ свѣщу́ соблю́лъ еси́, жестоку́ стезю́ ше́ствовалъ еси́, въ Боже́ственныя стези́ вше́дъ, и къ простра́нству ра́йскому чи́стою пло́тію дости́глъ еси́, и свѣ́тло отъ Святы́я Тро́ицы вѣнча́лся еси́; чту́щія тя́ помяни́, свя́те Мерку́ріе. [Два́жды.]

[Сла́ва, и ны́нѣ,] богоро́диченъ:

Яко засту́пницу нера́тну, предгра́діе вои́стинну предлага́ю покро́въ Тво́й, Богоро́дице Дѣ́во, хода́таицу же къ Бо́гу, изба́витися ми́, Влады́чице, му́ки вѣ́чныя и жи́зни нетлѣ́нныя Тобо́ю причасти́тися, небе́снаго Ца́рствія.

На хвали́техъ стихи́ры на 4, гла́съ 4. [Пи́саны ве́чера, на Го́споди, воззва́хъ...]

[Друга́го тя́ пое́мъ, иму́щаго поборе́ніе по ду́ху, Христо́въ Мерку́ріе, я́ко непобѣди́маго во́ина, внегда́ бо по повелѣ́нію, уго́дниче, Госпожи́ и Богоро́дицы изше́лъ еси́ на срѣ́теніе пога́ныхъ си́лъ, и исполи́на съ сы́номъ крѣ́пкаго побѣди́лъ еси́ посо́біемъ Богоро́дицы. Подо́біе имы́й, я́коже святы́й му́ченикъ Не́сторъ, я́рость прекроти́въ злосвирѣ́паго мучи́теля, Лíя богобо́рца побѣди́ Христо́вымъ и́менемъ и си́лою. Или́ тезоимени́тому ти́ свято́му му́ченику Мерку́рію, я́коже во Александрíи о́нъ, побѣди́въ, прободе́ въ се́рдце мучи́теля и законопресту́пника, ревну́я по благоче́стіи. Ты́ же тѣ́хъ подража́я, сопроти́вныхъ и пога́ныхъ иноплеме́нникъ си́лу пресѣ́клъ еси́, я́ко во́инъ до́бръ и неко́сенъ; и соверши́лъ еси́ свое́ подвиза́ніе крѣ́пцѣ, по благовѣ́ріи святы́я це́ркве Госпожи́ и Богоро́дицы со всѣ́ми уго́дники Христа́ Бо́га, и вѣнча́ся ве́рхъ тво́й, свя́те и великому́чениче. [Два́жды.]

Якоже отъ а́нгела или́ съ небесе́ зна́меніе пріе́млеши, къ тебѣ́ бо по́сланъ быва́етъ слуга́ це́ркве вели́цѣй Госпожи́ и Богоро́дицы, возвѣща́я и веля́ тебѣ́ изы́ти на срѣ́теніе си́лъ пога́ныхъ иноплеме́нникъ. Гла́су же къ тебѣ́ свы́ше соше́дшу: ра́бе Мо́й и уго́дниче Мерку́ріе, воста́въ, препоя́шися по́ясомъ во́инства, изы́ди ско́ро съ вели́кою де́рзостію сопроти́вныхъ побѣжда́я, съ тобо́ю е́смь побора́ющи по благовѣ́ріи. Не хощу́ бо, — рече́, — зрѣ́ти Мое́й плѣне́нѣ бы́ти це́ркви отъ пога́ныхъ, умоли́хъ бо Сы́на Моего́, да пода́стъ ти́ о се́мъ дерзнове́ніи твое́мъ вѣне́цъ небе́сный отъ животво́рныя десни́цы Его́.

Отъ ца́рска колѣ́на во́инъ изы́де, и посла́ся непобѣди́мый воево́да на́шему гра́ду, вели́ко поможе́ніе отъ Госпожи́ на́шея Богоро́дицы, во́инствуя бо, не земно́му царю́ угожда́я, но свы́ше повелѣ́ніе пріе́мля, богому́дре и блаже́нный страда́льче Мерку́ріе, жела́ніемъ и ре́вностію побора́я по благовѣ́ріи, му́ченически стражда́ и проти́вныхъ полки́ побѣжда́я пога́ныхъ иноплеме́нникъ, и са́мъ ну́ждною сме́ртію коне́цъ житію́ воспріи́меши, и ко Христу́ Бо́гу на не́бо востече́ши, и, ра́вными тебѣ́ святы́ми му́ченики ли́ку сочта́вся, возме́здіе пріи́меши. Тѣ́мже и ны́нѣ мы́, многогрѣ́шніи, мо́лимъ тя́, свя́те, имѣ́я дерзнове́ніе, помоли́ся о гра́дѣ на́шемъ, невоева́ну пребы́ти ему́, и душа́мъ на́шимъ дарова́ти ве́лію ми́лость.]

Сла́ва, гла́съ то́йже:

Столпа́ твердѣ́йшаго и забра́ло тве́рдо гра́да на́шего воспое́мъ, и желѣ́зная врата́ су́ща, и посо́біе крѣ́пко иму́ща со ору́жіемъ свята́го Мерку́рія. Тѣ́мже, къ нему́ моля́щеся, возопіи́мъ: свя́тче, не забу́ди на́съ, предстоя́щихъ гро́бу твоему́, но моли́ся къ Человѣколю́бцу Бо́гу спасти́ ду́ши на́ша.

И ны́нѣ, богоро́диченъ:

[Богоро́дице, всѣ́хъ Цари́це, правосла́вныхъ похвало́, ерети́чествующихъ шата́нія разори́, и ли́ца и́хъ посрами́, не кла́няющихся, ниже́ чту́щихъ, Пречи́стая, честны́й Тво́й о́бразъ.]

Славосло́віе вели́кое, [ектеніи́] и отпу́стъ.



НА ЛИТУРГІИ,

Слу́жба му́ченическая: [Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 2: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Ева́нгеліе Луки́, зача́ло 63. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 245 об. – 251 об.

/ Къ оглавленію раздѣла /


Наверхъ / Къ титульной страницѣ

0