Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 24-й де́нь.
Святы́я великому́ченицы Екатери́ны и свята́го великому́ченика Мерку́рія.

ВЕЧЕРЪ,
Блаженъ мужъ.., 1-й антифонъ. На Го́споди, воззва́хъ: стихи́ры на 6, гла́съ 1. Подо́бенъ: Небе́сныхъ чино́въ.

Дне́сь красу́ется гра́дъ Александрíя,* пелены́ твоя́, му́ченице,* въ Боже́ственнѣмъ хра́мѣ твое́мъ имѣ́я прему́дро.* Тѣ́мже и мы́ благоче́стно пра́зднуемъ,* Екатери́но, па́мять твою́ честну́ю:* моли́ся о чту́щихъ тя́.

Екатери́ны па́мять ны́нѣ пра́зднуимъ:* та́ бо и́стинно вся́ вра́жія си́лы* и сло́вомъ же и дѣ́ломъ низложи́ крѣ́пко* и ри́торское противле́ніе.* Но моли́твами ея́ изба́ви ны́, Бо́же,* отъ безбо́жныхъ вра́гъ.

Ра́дуйся, всесла́вная му́ченице Екатери́но честна́я:* Сина́йская бо гора́,* въ не́йже ви́дѣ купину́ Моисе́й неопали́му,* въ то́й Христо́съ богоуго́дное тѣ́ло твое́,* ны́нѣ преложи́въ, храни́тъ* да́же до вре́мене втора́го прише́ствія Своего́.

Ины стихи́ры му́ченика, гла́съ 4. Подо́бенъ: Яко до́бля.

Поборе́ніемъ Ду́ха, страстоте́рпче Мерку́ріе,* одолѣ́въ проти́внаго,* я́ко во́инъ непобѣди́мый,* ору́жіемъ вѣ́ры* тмы́ разу́мныхъ му́риновъ посѣ́клъ еси́* и, соверши́въ тво́й по́двигъ зако́нно,* со всѣ́ми страда́льцы вѣнча́лся еси́,* великому́чениче преблаже́нне.

Съ небесе́ тебѣ́ а́нгелъ,* я́звы твоя́ исцѣля́яй,* по́сланъ бы́сть ма́ніемъ Боже́ственнаго Ду́ха:* отне́лѣже исцѣлѣ́въ, достосла́вне,* рожны́ пробода́емь, льсти́вно разжже́нными,* терпѣ́лъ еси́, повѣ́шенъ и протяза́емь,* и къ ка́мени привяза́емь тя́жкому,* и кровьми́ твои́ми,* му́чениче, облива́емь всю́ду.

Царю́ во́инствуя* земно́му, Мерку́ріе,* отъ него́же де́мономъ повелѣва́емь жре́ти,* богому́дре блаже́нне,* му́ки претерпѣ́лъ еси́,* и попале́ніе о́гненное, и ну́ждную сме́рть,* и восте́клъ еси́ ко Христу́, вѣнцено́сецъ,* и сочета́лся еси́ му́чениковъ стадо́мъ,* о мíрѣ моля́ся.

Сла́ва, гла́съ 2:

Ра́достно къ торжеству́ богому́дрыя му́ченицы Екатери́ны стеце́мся, о мучениколю́бцы! И ту́ю похвала́ми, я́ко цвѣ́ты, увязе́мъ, — ра́дуйся, — вопію́ще е́й, — я́же буесло́вныхъ ри́торовъ свирѣпоу́стіе обличи́вши, яко ненаказа́нія испо́лненныхъ, и ты́я къ вѣ́рѣ Боже́ственнѣй руково́дствовавши; ра́дуйся, я́же тѣ́ло многоплете́ннымъ му́камъ вда́вши любве́ ра́ди Творца́ твоего́, и не низложи́вшися, я́ко отрокови́ца неги́блема; ра́дуйся, я́же го́рняя пребыва́лища, возме́здіе болѣ́зней наслѣ́довавши, и сла́вы вѣ́чныя наслажда́ешися. Ея́же жела́юще, пѣснопѣ́вцы твои́, наде́жды да не отпаде́мъ.

И ны́нѣ, пра́здника, гла́съ 8:

По рождествѣ́ Твое́мъ, Богоневѣ́сто [Влады́чице, пришла́ eси́ въ хра́мъ Госпо́день воспита́тися во свята́я святы́хъ, я́ко освяще́нна; тогда́ и Гавріи́лъ по́сланъ бы́сть къ Тебѣ́, Всенепоро́чнѣй, пи́щу Тебѣ́ принося́. Небе́сная вся удиви́шася, зря́ще Ду́ха Свята́го, въ Тя все́льшася. Тѣ́мже, Пречи́стая и Нескве́рная, я́же на небеси́ и на земли́ сла́вима, Ма́ти Бо́жія, спаси́ ро́дъ на́шъ].

Вхо́дъ. Проки́менъ дне́. И чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ра пра́здника, гла́съ 1:

Да ра́дуется дне́сь не́бо свы́ше, [и о́блацы весе́ліе да кропя́тъ о зѣло́ пресла́вныхъ вели́чіихъ Бо́га на́шего: се́ бо Две́рь, на восто́ки зря́щая, ро́ждшися отъ непло́дове безпло́дныя по обѣтова́нію и Бо́гу освяще́на бы́вши въ жили́ще, дне́сь въ хра́мъ я́ко непоро́чное приноше́ніе приво́дится, да ра́дуется Дави́дъ, бряца́я въ гу́сли: приведу́тся, рече́, Царю́ дѣ́вы въ слѣ́дъ Eя́, бли́жняя Eя́ приведу́тся вну́трь ски́ніи Бо́жія, внутрь очисти́лища Eго́, воспита́тися въ жили́ще пре́жде вѣ́къ отъ Oтца́ нетлѣ́нно Ро́ждшагося во спасе́ніе ду́шъ на́шихъ].

И святы́я стихи́ры, гла́съ то́йже:

Яко на тве́рдѣмъ ка́мени исповѣ́данія Христо́ва, водруже́на бы́вши, Екатери́но всехва́льная, гони́теля льсти́ваго во мра́цѣ погрузи́ла еси́ и вѣне́цъ побѣ́ды досто́йный воспрія́ла еси́.

Съ вы́шними чи́нми сочета́лася еси́, сла́вная, мíръ оста́вльши и Христа́ возжелѣ́вши, Екатери́но всечестна́я, проси́ на́мъ ве́лія ми́лости.

Гла́съ 2:

Яко алава́стръ мѵ́ра, кро́вь твою́ принесла́ еси́ Жениху́ твоему́, Христу́, Екатери́но му́ченице, страстоно́сице непобѣди́мая, возме́здіе же прія́ла еси́, вѣне́цъ нетлѣ́нный отъ Него́, досточу́дная. Тѣ́мже и началозло́бнаго врага́ кра́сными твои́ми нога́ми попра́ла еси́, призыва́ніемъ спасе́ннаго и́мене Спа́са Христа́, сего́ ра́ди и въ небе́сныхъ черто́зѣхъ водвори́лася еси́, я́ко дѣ́ва и му́ченица Христо́ва многострада́льная.

Гла́съ 4:

Сла́вимъ Твое́, Христе́, мно́гое благоутро́біе, и бла́гость на на́съ бы́вшую, я́ко и жены́ разруши́ша ле́сть идолобѣ́сія си́лою Креста́ Твоего́, Человѣколю́бче, мучи́теля не убоя́шася, попра́ша льсти́ваго, возмого́ша же въ слѣ́дъ Тебе́ идти́ и въ воню́ мѵ́ра Твоего́ потеко́ша, моля́щеся о душа́хъ на́шихъ.

Сла́ва, гла́съ 6:

Одесну́ю Спа́са предста́ дѣ́ва, и страстоно́сица, и му́ченица Екатери́на, одѣ́яна въ непобѣди́мое добродѣ́телей, и преукраше́на ма́сломъ чистоты́ и кро́вію страда́нія, и вопію́щи къ Нему́ въ ра́дости, свѣщу́ свою́ иму́щи: въ воню́ мѵ́ра Твоего́ теко́хъ, Христе́ Бо́же, я́ко уязвля́юся Твое́ю любо́вію а́зъ, не отлучи́ мене́, Женише́ Небе́сный. Тоя́ моли́твами, посли́ на́мъ, всеси́льне Спа́се, ми́лости Твоя́.

И ны́нѣ, пра́здника, гла́съ 5:

Возсія́ де́нь ра́достенъ [и пра́здникъ всече́стенъ: дне́сь бо я́же пре́жде Рождества́ и по Рождествѣ́ Дѣ́ва пребы́вши, въ хра́мъ Госпо́день приво́дится, и ра́дуется Заха́рія ста́рецъ, роди́тель Предте́чевъ, и вопіе́тъ ве́село: прибли́жися, Предста́тельница скорбя́щихъ, въ хра́мъ святы́й, я́ко Свята́, освяти́тися во оби́телище Всецаря́. Да весели́тся Іоаки́мъ пра́oтецъ, и Анна да ра́дуется, я́ко принесо́ша Бо́гу я́ко трилѣ́тствующую Юницу непоро́чную Влады́чицу. Ма́тeри, сра́дуйтеся, дѣ́вы, взыгра́йте, и непло́ды, сликовству́йте, я́ко отве́рзе на́мъ небе́сное Ца́рство пронарече́нная Всецари́ца, ра́дуйтеся, лю́діе, и весели́теся].

На стихо́внѣ стихи́ры пра́здника, гла́съ 1. Подо́бенъ: Небе́сныхъ чино́въ.

Пріиди́те, празднолю́бцы вси́,* пѣ́сньми почти́мъ* еди́ну Богоро́дицу* Чи́стую и Дѣ́ву:* вво́дится бо въ хра́мъ Бо́жій,* въ не́мъ жи́ти ны́нѣ свѣ́тло,* святѣ́йшій вои́стинну* Христо́въ хра́мъ,* и ра́дости вся́кія Хода́таица.

Сти́хъ: Приведу́тся Царю́ дѣ́вы въ слѣ́дъ Ея́,* [и и́скреннія Ея́ приведу́тся Тебѣ́].

Две́ри, проро́че, отве́рзи,* вѣ́рою пріе́мли въ хра́мъ Госпо́день приведе́нную,* всѣ́хъ а́нгелъ же и человѣ́къ похвалу́* и свѣ́тло ра́дованіе,* вну́трь жи́ти и ликова́ти,* я́же хра́мъ Бо́жій и оби́телище.

Сти́хъ: Приведу́тся въ весе́ліи и ра́дованіи,* [введу́тся въ хра́мъ Царе́въ].

Богоро́дица Марíя, въ хра́мъ приведе́на,* хлѣ́бъ пріе́млющи отъ а́нгела, яви́ся,* вопію́ща Ей, ра́дуйся:* зачне́ши Сы́на неискусому́жно,* Богоневѣ́стная благослове́нная Богоро́дице Дѣ́во,* земны́мъ благонаслѣ́діе и назда́ніе.

Сла́ва, гла́съ 2:

Житіе́ невеще́ственно навы́кши, суди́ще безбо́жное дости́гши, ста́ла еси́, побѣдоно́сице Екатери́но честна́я, цвѣтонося́щи Бо́жію свѣ́тлость, и, Боже́ственною мо́щію одѣ́яна, повелѣ́нію мучи́телеву поруга́лася еси́ и ри́торовъ утоли́ла еси́ буесло́вныя рѣ́чи, многострада́льная.

И ны́нѣ, пра́здника, гла́съ 8:

Дави́дъ провозглаша́ше Тебѣ́, Пречи́стая, прови́дя освяще́ніе вхо́да Твоего́ въ храмъ, въ не́мже концы́, днесь пра́зднующе, славосло́вятъ Тя, Всепѣ́тая: я́же бо пре́жде Рождества́ Дѣ́ва и по Рождествѣ́ пребы́вши нетлѣ́нна, Ма́ти Сло́ва Жи́зни. Днесь въ хра́мѣ Заха́рія весели́тся, воспріе́мъ Тя, Влады́чице, и свята́я святы́хъ ра́дуются, подъе́мши Тя, исто́чника жи́зни на́шея. Тѣ́мже и мы псало́мски вопіе́мъ Ти: о насъ моли́ Сы́на Твоего́ и Бо́га на́шего дарова́ти намъ ве́лію ми́лость.

Тропа́рь му́ченицы, гла́съ 4:

Агница Твоя́, Іису́се, [Екатери́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша].

Или́ се́й, гла́съ то́йже:

Добродѣ́тельми, я́ко луча́ми со́лнечными, просвѣти́ла еси́ неве́рныя мудрецы́. И, я́коже пресвѣ́тлая луна́ ходя́щимъ въ нощи́, невѣ́рія тму́ отгна́ла еси́ и цари́цу увѣ́рила еси́, вку́пѣ же и мучи́теля обличи́ла еси́, богозва́нная невѣ́сто, блаже́нная Екатери́но, жела́ніемъ востекла́ еси́ въ небе́сный черто́гъ къ прекра́сному Жениху́, Христу́, и отъ Него́ ца́рскимъ вѣнце́мъ вѣнча́лася еси́: Ему́же, со а́нгелы предстоя́щи, за ны́ моли́ся, творя́щія пречестну́ю па́мять твою́.

Сла́ва, му́ченика, гла́съ то́йже:

Му́ченикъ Тво́й, Го́споди, [Мерку́рій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша].

И ны́нѣ, пра́здника:

[Дне́сь благоволе́нія Бо́жія предображе́ніе и человѣ́ковъ спасе́нія проповѣ́даніе въ хра́мѣ Бо́жіи я́сно Дѣ́ва явля́ется и Христа́ всѣмъ предвозвеща́етъ. Той и мы велегла́сно возопіи́мъ: ра́дуйся, смотре́нія Зижди́телева исполне́ніе.]


НА УТРЕНИ,
На Бо́гъ Госпо́дь: Тропа́рь пра́здника, еди́ножды, и Екатери́ны, еди́ножды. Сла́ва, му́ченика. И ны́нѣ, пра́здника.

По 1-мъ стихосло́віи сѣда́ленъ святы́я, гла́съ 8. Подо́бенъ: Прему́дрости и Сло́ва.

Крове́й твои́хъ струя́ми, му́ченице Христо́ва, пото́ки благоче́стія вы́ну содѣва́еши, прехва́льная, одожде́ніемъ же благода́тнымъ слове́сныя ни́вы напая́ющи, благода́тію въ ни́хъ прозяба́еши кла́сы вѣ́ры. Тѣ́мже пресла́вно и по сме́рти яви́лася еси́, точа́щи живо́тъ муче́нія ра́ди, страстоно́сице прехва́льная Екатери́но, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, гла́съ 1. Подо́бенъ: Ка́мени запеча́тану.

Восхвали́те, дѣ́вы, ма́тери, пра́зднуйте, лю́діе, славосло́вите, свяще́нницы, благослови́те Пречи́стую Ма́терь Бо́жію: пло́тію бо младе́нствующи, пре́жде во хра́мъ принесе́ся, я́ко хра́мъ Бо́жій святѣ́йшій. Тѣ́мже пра́здникъ духо́вный соверша́юще, воспои́мъ Ю, я́ко Предста́тельницу ро́да человѣ́ческаго.

По 2-мъ стихосло́віи сѣда́ленъ [святы́я], гла́съ 4. Подо́бенъ: Вознесы́йся.

Прише́дшую ко Христу́ во́лею и украси́вшую добродѣ́тельми се́рдце, боголѣ́пно воспои́мъ всему́друю Екатери́ну, вѣ́рныхъ мно́жества, та́ бо посрами́ мучи́тельскую де́рзость, просія́вши, я́ко со́лнце, посредѣ́ беззако́нникъ, и по кончи́нѣ яви́ся земны́мъ утвержде́ніе Боже́ственное, вку́пѣ и держа́ва. [Два́жды.]

Сла́ва, и ны́нѣ, пра́здника, гла́съ 1. Подо́бенъ: Ка́мени запеча́тану.

Свята́я святы́хъ Богоро́дице су́щи, досто́йно приведе́ся жи́ти во свята́я, я́ко одушевле́нъ Госпо́день киво́тъ и Свята́го Ду́ха и́стинно вмѣсти́лище Боже́ственное, Дѣ́во Ма́ти: тѣ́мже всели́ся въ Тя́, Иже Отцу́ Единоро́дный и Свято́му Ду́ху соесте́ственный, Тво́й Сы́нъ неискусому́жно, обоготвори́въ все́ человѣ́чество.

По поліеле́и сѣда́ленъ [святы́я], гла́съ 8. Подо́бенъ: Прему́дрости и Сло́ва.

Прему́дрость вои́стинну съ небесе́, усты́ Михаи́ла Арха́нгела пріе́мши, му́ченице всехва́льная Екатери́но, въ страда́ніихъ непобѣди́ма, му́дрость бо внѣ́шнюю витíямъ посрами́ла еси́, му́дростію же Боже́ственною пре́лесть поплева́ла еси́. Тѣ́мже, ви́дяй по́двиги твоя́, Зижди́тель предста́, укрѣпляя́ тя́, — гряди́, — глаго́ля, — взы́ди, сокро́вища бо ти́ гото́ва. Моли́ся Христу́ и Бо́гу, согрѣше́ніемъ оставле́ніе дарова́ти, пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Удиви́ся Іо́сифъ.

Непоро́чная Агница [и нескве́рный черто́гъ, въ домъ Бо́жій Богоро́дица Маріа́мъ съ весе́ліемъ вво́дится пресла́вно, Юже а́нгели Бо́жіи дорино́сятъ вѣ́рно, и вси́ вѣ́рніи блажа́тъ при́сно и благода́рственно пою́тъ Ей непреста́нно ве́ліимъ гла́сомъ: на́ша сла́ва и спасе́ніе Ты́ еси́, Всенепоро́чная].

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ,* [Бо́гъ Изра́илевъ]. Сти́хъ: Въ це́рквахъ благослови́те Бо́га, [Го́спода отъ исто́чникъ Изра́илевыхъ]. Вся́кое дыха́ніе... Ева́нгеліе Матѳе́я, зача́ло 104.

По 50-мъ псалмѣ́ стихи́ра, гла́съ 2:

Дѣ́вства твоего́ красоты́ возжелѣ́въ Ца́рь сла́вы Христо́съ, я́ко непоро́чну тя́ невѣ́сту Себѣ́ обручи́, совокупле́ніемъ нетлѣ́ннымъ, и́бо во́лею Свое́ю, пода́въ добро́тѣ твое́й си́лу, на враги́ же и стра́сти непобѣди́му показа́, претерпѣ́вшу ра́ны го́рькія и му́ки свирѣ́пыя, сугу́бымъ вѣнце́мъ увязе́ тя́ и поста́ви одесну́ю Себе́, я́ко цари́цу испещре́ну. Того́ моли́, му́ченице честна́я и многострада́льная Екатери́но, пѣвце́мъ твои́мъ спасе́ніе, и жи́знь пода́ти, и ве́лію ми́лость.

Кано́нъ пра́здника, гла́са 4-го, со ирмосо́мъ на 6, и святы́я на 4 и му́ченика на 4.

[Кано́нъ пра́здника, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ вхожде́ніе.

Прему́дрости, Пречи́стая, Тя сокро́вище вѣ́мы и благода́ти, точа́щую исто́чникъ приснотеку́щій ра́зума, про́симъ: Твоя́ ка́пли одожди́, Влады́чице, е́же воспѣва́ти Тя́ при́сно.

Превы́шши, Пречи́стая, небе́съ бы́вши, хра́мъ и пала́та, въ хра́мъ Бо́жій возложи́лася еси́ Тому́ угото́ватися въ Боже́ственное жили́ще прише́ствія Его́.

Свѣ́тъ возсія́вши Богоро́дица благода́ти, вся́ просвѣти́ и совокупи́ пресвѣ́тлое Ея́ украси́ти торжество́ пѣ́сньми: пріиди́те, къ Не́й стеце́мся.

Две́рь сла́вная, по́мыслы непроходи́мая, две́ри отве́рзши хра́ма Бо́жія, ны́нѣ повелѣва́етъ на́мъ, совше́дшимъ, Боже́ственныхъ Ея́ чуде́съ наслади́тися.]

Кано́нъ му́ченицы, его́же краегране́сіе: Екатери́ну приснопа́мятную пѣ́сньми пою́. Ѳеофа́ново, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Екатери́ны, всему́дрыя му́ченицы, моли́твами, Христе́, мра́чное о́ко души́ моея́ просвѣти́, зарю́ ми́ дая́, Влады́ко, Твоего́ свѣтоли́тія, душетлѣ́нныхъ паде́ній мои́хъ ве́сь мра́къ потребля́ющую.

Направля́ема Влады́ки, всему́драя, Боже́ственными повелѣ́ніи и Того́ любо́вію пали́ма, потекла́ еси́, къ подвиго́мъ тща́щися, и мучи́телей ра́зумы, Екатери́но, устраши́ла еси́ сло́вомъ, и му́дростію, и благода́тію.

Управля́ема дла́нію, сла́вная, крѣ́пкою Христо́вою, и́дольскія бу́ри избѣ́гла еси́, му́ченице, немо́кренно преплы́вши креста́ вѣ́триломъ и Боже́ственными вѣ́тры Ду́ха, пѣ́снь Бо́гу воспѣва́ющи.

Ра́дующися дѣ́вственными добро́тами, Екатери́но му́драя, и Боже́ственное зна́ніе съ небесе́ иму́щи, лжеиме́ннаго зна́нія благодерзнове́нно и му́жественно предста́тели посрами́ла еси́, ты́я держа́внѣ побѣди́вши.

Богоро́диченъ: Иже Богоро́дицу Тя́ проповѣ́даетъ, Пречи́стая, вся́кія е́реси отринове́ніе и́мать: пло́ть бо бы́вша, неизме́нно родила́ еси́ превы́шша вся́кія, Богороди́тельнице, тва́ри Сло́во Бо́жіе Присносу́щное.

[Инъ кано́нъ му́ченика, его́же краегране́сіе: Мерку́ріева мя́ крѣ́пость да храни́тъ. Іо́сифъ, гла́съ 8.
Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Съ го́рними ли́ки, Мерку́ріе, благи́хъ исто́чнику, ра́дуяся, предстоя́, и Боже́ственныя сла́дости, приснопа́мятне, исполня́яся, любо́вію торжество́ твое́ соверша́ющія сохраня́й, Го́споду пою́щія: сла́вно бо просла́вися.

Во́льно вше́лъ еси́ въ три́знище муче́нія, му́дре, си́лою укрѣпля́емь Христо́вою, на́съ ра́ди стра́сти спаси́тельныя во́лею претерпѣ́вшаго пло́тію, и, ра́дуяся, взыва́лъ еси́: Го́споду пои́мъ, сла́вно бо просла́вися.

Глаго́лъ мучи́теля я́вѣ укори́лъ еси́, исповѣ́даніемъ Христо́вымъ, блаже́нне, украша́емь, и вся́кій болѣ́зней ви́дъ, веселя́ся, претерпѣ́лъ еси́, Мерку́ріе, вопія́ тебе́ Укрѣ́пльшему: Го́споду пои́мъ, сла́вно бо просла́вися.

Богоро́диченъ: Отъ Отрокови́цы Дѣ́вы яви́лся еси́, воплоща́емь на́съ ра́ди, по на́мъ Человѣ́къ бы́въ, и свидѣ́теля вѣ́рна страсте́й Свои́хъ явля́етъ, Мерку́рія, до́бляго Своего́ страда́льца, Тому́ крѣ́пко пою́ща: Го́споду пои́мъ, сла́вно бо просла́вися.]

Пѣ́снь 3.

[Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ликъ себѣ́ совоку́пльшія, духо́вно утверди́, въ честно́мъ вхожде́ніи Твое́мъ вѣнце́въ сла́вы сподо́би.

Невѣстокраси́тель дне́сь яви́ся кра́сный Дѣ́вы хра́мъ и черто́гъ, пріе́мь одушевле́нный черто́гъ Бо́жій, Чи́стую, и Непоро́чную, и Свѣтлѣ́йшую всея́ тва́ри.

Дави́дъ, предначина́я ликова́ніе, игра́етъ, и ликовству́етъ съ на́ми, и Цари́цу зове́тъ Тя́ укра́шену, Пречи́стая, предстоя́щу, Всечи́стая, въ хра́мѣ Царю́ и Бо́гу.

Изъ нея́же преступле́ніе произы́де дре́вле ро́ду человѣ́ческому, изъ Тоя́ исправле́ніе и нетлѣ́ніе процвѣте́: Богоро́дица дне́сь приводи́ма въ до́мъ Бо́жій.

Игра́ютъ а́нгельская во́инства и всѣ́хъ человѣ́къ мно́жество, и предъ лице́мъ, Пречи́стая, предтеку́тъ Твои́мъ дне́сь свѣщено́сицы, зову́ще вели́чествія Твоя́ въ дому́ Бо́жіи.

Инъ.]

Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Во́льными твои́ми стремле́ньми вошла́ еси́ ко страда́нію, во́лею Христа́ подража́ющи и побѣди́вши свѣ́тло тмы́ міроде́ржца, вѣнцено́сица яви́лася еси́, Екатери́но богопрія́тная.

Крѣ́постію ума́ обличи́ла еси́ мучи́тели, безбо́жія въ глубинѣ́ валя́ющіяся, ри́торствующи я́вѣ богозна́нія догма́ты, Бо́жіею му́дростію му́ченица уясня́ема всехва́льная.

Равнобо́жіе во у́ши Евинѣ пошепта́вый, отъ отрокови́цы млады́я ны́нѣ попира́ется, ору́жіемъ бо Креста́ огради́вшися, посрами́ Екатери́на му́ченица безмѣ́рно того́ хва́лящася.

Богоро́диченъ: Умерщвле́нный мо́й у́мъ жи́зни дѣ́йствомъ изъ Тебе́ я́вльшіяся мíру воздви́гни, я́звы и стру́пы истребля́ющи грѣхо́вныя, еди́на Богороди́тельнице Всенепоро́чная.

[Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Ве́сь разжига́емь Боже́ственною любо́вію, сла́вне, о́гнь и ю́зы, мечи́ и му́ки, я́коже со́нъ, вмѣни́лъ еси́, Мерку́ріе.

Воспѣва́лъ еси́ Сотво́ршаго, примѣша́яся лю́тымъ ра́намъ, му́чениче му́дре, и исцѣле́нія я́звъ пріима́лъ еси́, сла́вне.

Жезло́мъ укрѣпля́емь боже́ственнымъ, вра́жіе свирѣ́пство, я́ко страда́лецъ, му́чениче доблему́дренне, благомо́щно смири́лъ еси́.

Богоро́диченъ: Яко да прообрази́тъ Твое́ па́че ума́, Чи́стая, рождество́, купина́ яви́ся, огне́мъ пали́ма, и ника́коже сгара́ющи.]

Конда́къ пра́здника, гла́съ 4. Подо́бенъ: Вознесы́йся.

Пречи́стый хра́мъ Спа́совъ, многоцѣ́нный черто́гъ и Дѣ́ва, свяще́нное сокро́вище сла́вы Бо́жія, днесь вво́дится въ до́мъ Госпо́день, благода́ть совводя́щи, Яже въ Ду́сѣ Боже́ственномъ, Юже воспѣва́ютъ а́нгели Бо́жіи: Сія́ е́сть селе́ніе небе́сное.

Икосъ:

Неизрече́нныхъ Бо́жіихъ и Боже́ственныхъ та́инъ зря́ въ Дѣ́вѣ благода́ть явля́емую и исполня́емую я́вственно, ра́дуюся и о́бразъ разумѣ́ти недоумѣ́юся, стра́нный и неизрече́нный: ка́ко избра́нная, Чи́стая, еди́на яви́ся па́че всея́ тва́ри ви́димыя и разумѣва́емыя? Тѣ́мже восхвали́ти хотя́ Сію́, ужаса́юся зѣло́ умо́мъ же и сло́вомъ, оба́че дерза́я, проповѣ́даю и велича́ю: Сія́ есть селе́ніе небе́сное.

Та́же конда́къ Мерку́рія, гла́съ 4. Подо́бенъ: Яви́лся еси́ дне́сь.

Во бране́хъ непобѣди́маго во́ина и въ бѣда́хъ непосты́дна засту́пника, пѣ́сньми Мерку́рія ублажи́мъ, сла́вяще, пра́зднующія бо па́мять его́ ве́село отъ бѣ́дъ избавля́етъ и скорбе́й.

Сѣда́ленъ святы́я, гла́съ 4. Подо́бенъ: Вознесы́йся.

Жениха́ твоего́, Христа́, возлюби́вши, свѣщу́ твою́ свѣ́тло угото́вльши, добродѣ́тельми просія́вши, сла́вная. Тѣ́мже вошла́ еси́ съ Ни́мъ въ черто́гъ и, вѣне́цъ страда́нія отъ Него́ пріе́мши, отъ бѣ́дъ изба́ви на́съ, соверша́ющихъ, Екатери́но, па́мять твою́.

Сла́ва му́ченика, гла́съ то́йже. Подо́бенъ: Ско́ро предвари́.

Му́ченикъ Мерку́рій, подвиза́вся, льсти́ваго посрами́ и вѣне́чникъ крѣ́покъ Христо́въ бы́сть: тѣ́мже небе́снымъ ны́нѣ причте́ся лико́мъ, сла́вы непріе́мныя досто́йно причаща́яся. Сего́ ра́ди свяще́нную его́ па́мять соверша́емъ вѣ́рно.

И ны́нѣ, пра́здника, гла́съ то́йже:

Дави́де, предъиди́ въ хра́мъ Бо́жій, и, ра́дуяся, пріими́ Цари́цу на́шу, и То́й возопíй: вни́ди, Госпоже́, въ хра́мъ Царе́въ, вни́ди, Ея́же сла́ва покрове́нно разумѣ́ется, изъ Нея́же хо́щетъ источи́тися на́мъ всѣ́мъ Свѣ́тъ, Христо́съ.

Пѣ́снь 4.

[Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Две́рь непрохо́дную Бо́жій до́мъ пріе́мля дне́сь, преста́ти сотвори́ вся́кой слу́жбѣ зако́нной, я́ко и́стинно яви́ся, зовы́й, су́щимъ на земли́ Истина.

Гора́ присѣ́нная, ю́же прови́дѣ дре́вле Авваку́мъ, предпроповѣ́да вну́трь вмѣсти́вшуюся въ нехо́дныхъ хра́ма, добродѣ́тели процвѣ́тши, и покрыва́етъ концы́.

Ви́дѣвши пресла́вная вся́ земля́ стра́нныя же и ди́вныя ве́щи, ка́ко Дѣ́ва, отъ а́нгела пи́щу пріе́млющи, о́бразы строе́нія но́ситъ.

Хра́мъ, и пала́та, и не́бо одушевле́нное я́вльшися, Богоневѣ́сто Царе́ва, во хра́мъ зако́нный приводи́ма дне́сь, Тому́ соблюда́ема, Пречи́стая.

Инъ.]

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Страда́льческое, Екатери́но, противле́ніе показа́ла еси́, му́ченице приснопа́мятная, вражде́бнику зѣло́ терпѣли́вно противля́ющися и того́ попра́вши нога́ми кра́сными Креста́ си́лою, страстоно́сице, му́чениковъ похвала́.

Невѣ́ста Христо́ва, Екатери́но всеблаже́нная, яви́лася еси́, Боже́ственныя красоты́ свѣтови́дными луча́ми просвѣща́ема и добро́тою сія́ющи. Тѣ́мже и, веселя́щися, пѣснопое́ши Влады́цѣ: си́лѣ Твое́й сла́ва, Человѣколю́бче.

Мучи́тельскую горды́ню низложи́ла еси́ и Боже́ственнымъ сло́вомъ му́дрости твоея́ я́ко отъ глубины́ ле́стнаго демоноговѣ́нія прельща́емыя исхи́тила еси́, уча́щи зва́ти Христу́ пѣснопою́щія: си́лѣ Твое́й сла́ва, Человѣколю́бче.

Благосла́вное и свѣтоно́сное торжество́ сла́вныя па́мяти твоея́, всехва́льная, крѣ́пко де́рзость вра́жію попра́вши, я́ко со́лнце, возсія́, въ не́мже велегла́сно Влады́цѣ вопіе́мъ: си́лѣ Твое́й сла́ва, Человѣколю́бче.

Богоро́диченъ: Ны́нѣ крѣ́пость низложи́ отмета́ющихся о́браза, Отрокови́це, поклоне́нія Тебе́, Чи́стыя, и па́че ума́ изъ Тебе́ воплоще́ннаго и мíръ ве́сь просвѣ́щшаго, и всѣ́хъ святы́хъ, вѣ́рою же чту́щія Тя́ просвѣти́, еди́на Всепѣ́тая.

[Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Присво́ился еси́ Зижди́телю твоему́ боже́ственнаго свидѣ́тельства, богому́дре, страстьми́ и свѣ́тлыя вѣнцы́ отъ Него́ прія́лъ еси́, сла́вне, я́ко непобѣди́мый.

Истка́нную отъ вы́шнія благода́ти въ ри́зу, му́чениче, ны́нѣ одѣ́ялся еси́, тли́ и ме́ртвости ри́зъ, му́чениче, совле́кся.

Да́же до кро́ве, сла́вне, ко грѣху́ подвиза́вся, побѣдоно́сецъ показа́лся еси́ и вы́шнія сла́вы сподо́бился еси́, Мерку́ріе.

Богоро́диченъ: На Тя́ спаси́тельное Сло́во сни́де, Приснодѣ́во, я́коже ту́ча, и изсуши́ многобо́жія наводне́нія.]

Пѣ́снь 5.

[Ирмо́съ: Ужасо́шася вся́ческая въ честнѣ́мъ вхожде́ніи Твое́мъ: Ты бо, Неискусобра́чная Дѣ́во, вну́трь вошла́ еси́ въ хра́мъ Бо́жій, я́коже честнѣ́йшій хра́мъ, всѣ́мъ воспѣва́ющимъ Тя́ ми́ръ подава́ющая.

Свяще́ніе сла́вное и свяще́нное возложе́ніе, дне́сь Пречи́стая Дѣ́ва, возложи́вшися въ хра́мъ Бо́жій, Всецарю́ на́шему Бо́гу Еди́ному въ жили́ще соблюда́ется, я́ко вѣ́сть Са́мъ.

Добро́ту, Пречи́стая, души́ Твоея́ зря́ нѣ́когда, вѣ́рою Заха́рія возопи́: Ты́ еси́ избавле́ніе, Ты́ еси́ всѣ́хъ ра́дость, Ты́ еси́ воззва́ніе на́ше, Еюже Невмѣ́стный вмѣще́нъ мнѣ́ яви́тся.

О, па́че ума́ чуде́съ Твои́хъ, Всечи́стая́! Стра́нное Твое́ рождество́ е́сть, стра́ненъ о́бразъ возраще́нія Твоего́, стра́нна и пресла́вна Твоя́, Богоневѣ́сто, вся́ и человѣ́ки несказа́нна.

Свѣ́щникъ многосвѣ́тлый су́щи, Богоневѣ́сто, дне́сь возсія́ла еси́ въ дому́ Госпо́дни и озаря́еши ны́ честны́ми дарова́ніи, Чи́стая, чуде́съ Твои́хъ, Богоро́дице всепѣ́тая.

Инъ.]

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Любо́вію огнепали́ма, му́ченице всесла́вная, Влады́ки твоего́ и и́щущи Того́ недомы́сленную добро́ту ви́дѣти, самово́льнымъ нра́вомъ ра́намъ себе́ вдала́ еси́, дѣ́вства сія́ющи благода́тьми.

Страстьми́ свяще́ннѣйшими, отрокови́це добродѣ́во, украси́вши тебе́ саму́ю благолѣ́пно, возшла́ еси́ къ небе́сному Христо́ву черто́гу и ны́нѣ свѣ́тло твоему́ Жениху́, веселя́щися, сочта́лася еси́, всеблаже́нная.

Отрокови́ца всесвѣ́тлая яви́лася еси́, возлюби́вши Еди́наго Жела́емаго, и, во слѣ́дъ Того́ крѣпча́йшее тече́ніе соверши́вши, въ воню́ мѵ́ра твоего́ у́мнаго истоще́ннаго, вопія́ла еси́: теку́, Женише́ мо́й.

Богоро́диченъ: Истинную Богоро́дицу Тя́ вси́ позна́вше, Пречи́стая Влады́чице, изъ Тебе́ ро́ждшагося Бо́га Сло́ва вѣ́дяще, проповѣ́даемъ во дву́ существа́хъ, хотѣ́ніихъ самовла́стныхъ познава́ема, Ма́ти Богоневѣ́стная.

[Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Растяга́емь и острото́ю, Мерку́ріе, неосла́бно разсѣка́емь, терпѣ́лъ еси́, Боже́ственными наде́ждами вжиля́емь.

Ка́менемъ мы́сленнымъ укрѣпи́въ твое́ се́рдце, ка́менемъ отягча́емь, не преврати́лся еси́, Мерку́ріе сла́вне.

Соприча́стникъ страсте́й Влады́ки твоего́ бы́въ, сла́вы пріобщи́лся еси́ Того́ и Боже́ственныя свѣ́тлости.

Богоро́диченъ: Умертви́, Дѣ́во, живу́щій мо́й грѣ́хъ, Жи́знь ро́ждшая, умертви́вшую сме́рть.]

Пѣ́снь 6.

[Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Вся́ческая Нося́й глаго́ломъ, моли́тву пра́ведныхъ услы́ша. Тѣ́мже непло́дныя разрѣши́лъ еси́ неду́гъ, я́ко Благоутро́бенъ, ра́дости Вино́вную симъ дарова́.

Сказа́ти хотя́ Госпо́дь язы́комъ Свое́ спасе́ніе, Неискусобра́чную ны́нѣ отъ человѣ́къ прія́тъ, примире́нія зна́меніе и обновле́нія.

Яко до́мъ су́щи благода́ти, въ не́мже сокро́вища лежа́тъ неизрече́ннаго Бо́жія строе́нія, Всечи́стая, въ хра́мѣ причасти́лася еси́ нетлѣ́нныя сла́дости.

Діади́му Тя ца́рскую пріе́мъ, храмъ, Богоневѣ́сто, просвѣща́шеся и подступа́ше лу́чшимъ, предрече́нныхъ зря́ на Тебѣ́ сбытіе́.

Инъ.]

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Всю́ тя́, добро́тою сія́ющу, дѣ́вства заре́ю, му́ченическими же, отрокови́це, обагре́ну кровьми́, ви́дѣвъ, благо́е Сло́во и пречи́стое въ черто́зѣхъ небе́сныхъ тя́ всели́.

Возмогла́ еси́ Кресто́мъ мучи́телей разрѣши́ти держа́ву, и мірскíя му́дрости обличи́вши суету́, богодохнове́ннаго уче́нія точа́щи догма́ты, велему́дренная Екатери́но приснопа́мятная.

Ле́стію пе́рвѣе Ада́ма ра́йскія сла́дости изгна́вшаго, ра́нъ болѣ́зни крѣ́пко терпя́щи, низложи́ла еси́ на зе́млю, му́ченице всесла́вная, и вѣнцы́ Ца́рствія вѣнча́лася еси́.

Богоро́диченъ: Ми́лостива мнѣ́ Судію́ и Сы́на Твоего́, Богоро́дице Дѣ́во, Твои́ми мольба́ми бы́ти въ де́нь суда́, Изба́вителя же лю́тыхъ, Ма́ти, сотвори́, къ Тебѣ́ бо еди́ной наде́жды возлага́ю.

[Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Вжиля́ше тя́ присносу́щное Сло́во, за Него́ вся́къ ви́дъ му́къ, му́чениче му́дре, терпя́ща тя́ ви́дя, и чрезъ а́нгела дерза́ти повелѣва́ше, Мерку́ріе, и ника́коже мучи́телей устраши́тися противле́нія.

Умертви́ся многообра́зный змíй и нога́ми попра́ся кра́сными страда́льца и до́бляго ору́жника, самово́льными бо стремле́ніи вше́дъ къ муче́нія ра́намъ, сме́рти, сла́вы испо́лненъ.

Всесоверше́нно Влады́цѣ прине́слъ еси́ серде́чное произволе́ніе, му́чениче, и Того́ ра́ди претерпѣ́въ сломле́нія, я́ко побѣди́тель отъ Него́ вѣнча́лся еси́, и Тому́ ны́нѣ на небесѣ́хъ со всѣ́ми му́ченики предстои́ши, Мерку́ріе.

Богоро́диченъ: Зачала́ еси́ гла́сомъ а́нгеловымъ Вели́каго совѣ́та Ангела, Отрокови́це, и отъ Твои́хъ пречи́стыхъ крове́й воплоще́нна, Всенепоро́чная, родила́ еси́ показа́вшаго всѣ́мъ жи́зни вхо́ды за неизглаго́ланную ми́лость.]

Конда́къ [святы́я], гла́съ 2. Подо́бенъ: Вы́шнихъ ища́.

Ли́къ честны́й боже́ственнѣ, мучениколю́бцы, воздви́гните ны́нѣ, почита́юще всему́друю Екатери́ну, сія́ бо въ три́знищи Христа́ проповѣ́да и змíя попра́, ри́торовъ ра́зумы укроти́вши.

Икосъ:

Отъ Бо́га му́дрость пріи́мши издѣ́тства, му́ченице, и внѣ́шнюю до́брѣ му́дрость всю́ извы́че, позна́вши у́бо отъ тоя́ стихíй движе́ніе же и творе́ніе по сло́ву, и сія́ изъ нача́ла сло́вомъ Сотво́ршаго, Тому́ благодаре́ніе въ нощи́ и во дни́ приноша́ше, и́долы низложи́вши и си́мъ несмы́сленно служа́щія ри́торовъ ра́зумы укроти́вши.

Пѣ́снь 7.

[Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Се́ дне́сь возсія́ конце́мъ весна́ ра́достная, просвѣща́ющи на́шу ду́шу, и помышле́ніе и у́мъ благода́тію, торжество́мъ Богоро́дицы дне́сь та́инственно да учреди́мся.

Да дароно́сятъ днесь вся́ческая Цари́цѣ, Ма́тери Бо́жіи, не́бо и земля́, и а́нгеловъ чи́ни, и человѣ́ковъ мно́жество и да вопію́тъ: во хра́мъ вво́дится Ра́дость и Избавле́ніе.

Писа́ніе мимотече́ и оскудѣ́ зако́нъ, я́коже сѣ́нь, и благода́ти лучи́ возсія́ша въ хра́мъ Бо́жій вше́дшей Тебѣ́, Дѣ́во Ма́ти Чи́стая, въ не́мъ благослове́нная.

Повину́ся Рождеству́ Твоему́, Всечи́стая, я́ко Творцу́ и Бо́гу не́бо, и земля́, и преиспо́дняя, и вся́къ язы́къ земны́хъ исповѣ́даетъ, я́ко Госпо́дь яви́ся, Спа́съ ду́шъ на́шихъ.

Инъ.]

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́. Сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще, поя́ху: благослове́нъ еси́, Бо́же оте́цъ на́шихъ.

Му́чениковъ хвала́, благоче́стія учи́тельница была́ еси́, свѣ́тлому твоему́ Жениху́ му́чениковъ мно́жество приве́дши, Христу́. Съ ни́миже зове́ши, всехва́льная, пою́щи: благослове́нъ Бо́гъ оте́цъ на́шихъ.

Сло́во твое́ прему́дрое ко спасе́нію мно́ги исхи́ти отъ идолонеи́стовства и свѣтоно́сны яви́ му́ченики, велегла́сно съ тобо́ю взыва́ющія: благослове́нъ Бо́гъ оте́цъ на́шихъ.

Отрокови́ца, въ слѣ́дъ Тебе́ иду́щи, Тебѣ́ приведе́ся, мече́мъ посѣ́чена, Твою́ подража́ющи стра́сть пречи́стую и Тебѣ́, Зижди́телю, вопію́щи и глаго́лющи: благослове́нъ Бо́гъ оте́цъ на́шихъ.

Богоро́диченъ: Святы́хъ Святы́й, въ Тебѣ́ свя́то всели́вся, Чи́стая Богоро́дице Дѣ́во, воплоще́нъ, изъ Тебе́ ражда́ется, за е́же спасти́ вѣ́рою зову́щія: благослове́нъ Бо́гъ оте́цъ на́шихъ.

[Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Свѣ́томъ го́рняго просвѣще́нія озаря́емь, до́блій во́ине, воспѣва́ющія тя́ ны́нѣ просвѣща́еши, пѣснопою́щія: благослове́нъ еси́, Го́споди Бо́же, во вѣ́ки.

Воспѣва́лъ еси́ всѣ́хъ Благодѣ́теля, распаля́емь Того́ ре́вностію, блаже́нне, и огне́мъ чу́вственнымъ жего́мь, и пѣснопоя́: благослове́нъ еси́, Го́споди Бо́же, во вѣ́ки.

Ка́менію принося́щіи че́сть, и́же чу́вство окамене́но иму́ще, ка́менемъ, му́чениче, отягчава́ютъ вы́ю твою́, вопію́ща, Мерку́ріе: благослове́нъ еси́, Го́споди Бо́же, во вѣ́ки.

Кровьми́ кро́вь смѣси́въ твою́ честну́ю Влады́ки Человѣколю́бца, о́бщникъ Того́ яви́лся еси́ страсте́й, вопія́, Мерку́ріе: благослове́нъ еси́, Го́споди Бо́же, во вѣ́ки.

Богоро́диченъ: Чи́ни а́нгельстіи ужаса́ются та́инства Твоего́ глубинѣ́, Богоро́дице: Бо́гъ бо изъ Тебе́ воплоще́нъ яви́ся, Ему́же пѣснопое́мъ: благослове́нъ еси́, Го́споди Бо́же, во вѣ́ки.]

Пѣ́снь 8.

[Ирмо́съ: Слы́ши, Отрокови́це, Дѣ́во Чи́стая, да рече́тъ у́бо Гавріи́лъ совѣ́тъ Вы́шняго, дре́вній, и́стинный: бу́ди къ прія́тію гото́ва Бо́жію, Тобо́ю бо Невмѣсти́мый съ человѣ́ки поживе́. Тѣ́мъ и ра́дуяся, вопію́: благослови́те, вся́ дѣла́ Госпо́дня, Го́спода.

Пречи́стый хра́мъ въ до́мъ Бо́жій приводя́щи Анна иногда́, вопію́щи, съ вѣ́рою рече́ свяще́ннику: ча́до, отъ Бо́га да́нное мнѣ́, пріи́мъ ны́нѣ, введи́ во храмъ Зижди́теля твоего́ и, ра́дуяся, по́й Ему́: благослови́те, вся́ дѣла́ Госпо́дня, Го́спода.

Рече́, ви́дѣвъ, Аннѣ иногда́ Ду́хомъ Заха́рія: Жи́зни Ма́терь вво́диши и́стинную, Юже свѣ́тло проро́цы Бо́жіи Богоро́дицу проповѣ́даша, и ка́ко хра́мъ вмѣсти́тъ Ю? Тѣ́мъ чудя́ся, вопію́: благослови́те, вся́ дѣла́ Госпо́дня, Го́спода.

Раба́ Бо́жія бы́хъ а́зъ, — отвѣща́ Анна ему́, — призыва́ющи Сего́ вѣ́рою и моли́твою, прія́ти моея́ болѣ́зни плодъ, по прія́тіи же рожде́нную привести́ Да́вшему Ю. Тѣ́мъ, зовя́, вопію́: благослови́те, вся́ дѣла́ Госпо́дня Го́спода.

Зако́нное вои́стинну дѣ́ло есть, — свяще́нникъ рече́ е́й, — стра́нну же весьма́ ве́щь поразумѣва́ю, зря́ Приводи́мую въ до́мъ Бо́жій, пресла́вно превосходя́щую свята́я благода́тію. Тѣ́мъ и ра́дуяся, вопію́: благослови́те, вся́ дѣла́ Госпо́дня, Го́спода.

Инъ.]

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Твои́ми уче́ніи цари́ца, вѣ́рующи, притече́ ко благоче́стію, и крѣ́пко претерпѣ́вши болѣ́зней чу́вство, и Ца́рствія небе́снаго непрее́мнаго я́вственно сподо́бися, вопію́щи Влады́цѣ: свяще́нницы, благослови́те, лю́діе, превозноси́те во вся́ вѣ́ки.

Съ му́ченики да бу́дутъ вѣ́рныхъ проше́нія, страстоте́рпица бо Христу́ предстои́тъ, прося́щи лу́чшая и спасе́нія хода́тайственная всесвяту́ю и честну́ю ея́ па́мять усе́рдно соверша́ющимъ и вѣ́рно пѣснопою́щимъ: лю́діе, превозноси́те Христа́ во вѣ́ки.

Отве́рзъ, пріе́млетъ тя́ Жени́хъ, всему́драя, две́ри ра́йскія, и въ черто́зѣ всесвѣ́тлѣмъ обита́ти сотвори́, Ца́рствія прича́стницу я́ко соо́бщницу страсте́й явля́етъ. Ему́же ны́нѣ предстоя́щи, царе́ва дщи́, свѣ́тло укра́шена, на́съ не забу́ди.

Ухищре́нными глаго́лы искуша́ше мучи́тель, и увѣтливосло́віи, лю́тый, льстя́, разсла́бити твою́ крѣ́пость надѣ́явся, сла́вная, но уневѣ́ститися Христу́ хотя́щи, вопія́ла еси́ Влады́цѣ: свяще́нницы, воспо́йте, лю́діе, превозноси́те Христа́ во вѣ́ки.

Богоро́диченъ: Свяще́ннѣйши была́ еси́, Богоро́дице Всенепоро́чная, премíрнаго а́нгеловъ чи́на: си́хъ бо родила́ еси́ Содѣ́теля и Го́спода отъ дѣ́вственныя и неискусобра́чныя утро́бы, во дву́хъ существа́хъ неслія́нно и невра́щно, во еди́ной же ѵпоста́си Бо́га воплоще́нна.

[Инъ. Ирмо́съ то́йже.

Страда́льцевъ прило́гъ тя́ ли́къ прія́ше, укра́шена и свѣ́тла бы́вша честны́ми красота́ми пречестны́хъ твои́хъ страда́ній и благочести́ваго твоего́ и честна́го свидѣ́тельства, и ны́нѣ вопіе́ши непреста́нно: свяще́нницы, благослови́те, лю́діе, превозноси́те Христа́ во вѣ́ки.

Благочестивому́дренно, сла́вне, по́двигъ соверши́лъ еси́, и доблему́дренно врага́ посрами́лъ еси́, и, побѣ́ду небе́сную я́ко побѣди́тель взе́мъ, со а́нгельскими ны́нѣ ли́ки весели́шися, съ ни́миже, вопіе́ши непреста́нно: свяще́нницы, благослови́те, лю́діе, превозноси́те Христа́ во вѣ́ки.

Сконча́вся, всеблаже́нне, мече́мъ, Мерку́ріе, и получи́въ жела́емаго ти́ предлежа́щаго конца́, зе́млю у́бо кро́вными излія́ніи напои́лъ еси́, побѣдоно́сное же и блаже́нное тѣ́ло бѣлѣ́йше снѣ́га показа́лъ еси́, поя́: свяще́нницы, благослови́те, лю́діе, превозноси́те Христа́ во вѣ́ки.

Богоро́диченъ: Яко на́шего су́щи воззда́нія, Пречи́стая, вси́ вино́вную, вѣ́рніи, пое́мъ Тя́, Бо́га бо всевино́внаго па́че вины́ родила́ еси́, сокруши́вшійся о́бразъ зло́бою, Свои́мъ благоутро́біемъ назда́вшаго, еди́на Преблагослове́нная и Обра́дованная.]

Пѣ́снь 9.

[Ирмо́съ: Яко одушевле́нному Бо́жію киво́ту да ника́коже ко́снется рука́ скве́рныхъ, устнѣ́ же вѣ́рныхъ Богоро́дицѣ немо́лчно, гла́съ а́нгела воспѣва́юще, съ ра́достію да вопію́тъ: и́стинно вы́шши всѣ́хъ еси́, Дѣ́во Чи́стая.

Яко пресвѣ́тлую, Богоро́дице Чи́стая, душе́вныя чистоты́ иму́щи добро́ту, благода́тію же Бо́жіею исполня́ема съ небесе́, Свѣ́томъ Присносу́щнымъ просвѣща́еши всегда́ съ весе́ліемъ вопію́щія: и́стинно вы́шши всѣ́хъ еси́, Дѣ́во Чи́стая.

Прелета́етъ, Богоро́дице, Чи́стая, чу́до Твое́ си́лу слове́съ: тѣ́ло бо въ Тебѣ́ поразумѣва́ю па́че сло́ва, тече́нія грѣхо́внаго непрія́тно. Тѣ́мже благода́рственно вопію́ Ти: и́стинно вы́шши всѣ́хъ еси́, Дѣ́во Чи́стая.

Пресла́вно прообразова́ше, Чи́стая, зако́нъ Тя́ ски́нію и Боже́ственную ста́мну, стра́ненъ киво́тъ, и катапета́сму, и же́злъ, хра́мъ неразруши́мый и две́рь Бо́жію. Тѣ́мже науча́ютъ Тебѣ́ зва́ти: и́стинно вы́шши всѣ́хъ еси́, Дѣ́во Чи́стая.

Пѣснопоя́ Тебѣ́, провозглаша́ше Дави́дъ, глаго́ля Тя́ Дще́рь Царе́ву, красото́ю добродѣ́телей, одесну́ю предстоя́щую Бо́га, ви́дѣвъ Тя упещре́ну. Тѣ́мже, проро́чествуя, вопія́ше: и́стинно вы́шши всѣ́хъ еси́, Дѣ́во Чи́стая.

Инъ.]

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Преста́вилася еси́ къ черто́гомъ свѣтови́днымъ, невѣ́стными укра́шена у́тварьми, дѣ́вственную иму́щи свѣщу́ въ твое́й десни́цѣ, въ друго́й же держа́щи отсѣ́ченную твою́ главу́. И ны́нѣ, предстоя́щи Христу́, твоему́ Жениху́, Тя́ пою́щія сохрани́.

Прія́та бы́сть твоя́, богому́драя, моли́тва, вѣ́рою бо твое́ имену́ющія и́мя, честна́я, спаса́етъ Влады́ка отъ искуше́ній и благоздра́віе подае́тъ, неду́говъ избавля́я всеразли́чныхъ, душе́вныхъ же и тѣле́сныхъ. Тѣ́мъ тя́, веселя́щеся, Екатери́но, ублажа́емъ.

Приста́ла еси́ ти́хому приста́нищу ны́нѣ, благоопря́тно же и легко́ мо́ре мірско́е, му́ченице, преплы́вши треволне́ній, не искуси́вшися, всему́драя, бога́тство многоразли́чное Христу́ принося́щи, дѣ́во, мно́жество му́ченикъ, Екатери́но всеблаже́нная.

Въ черто́зѣхъ небе́сныхъ ны́нѣ вну́трь съ дѣ́вственныхъ ли́ки ликовству́ющи, му́ченическими озаря́ема луча́ми, Екатери́но всему́драя, разрѣши́ паде́ній мои́хъ плени́цы, усе́рдно моля́щи всѣ́хъ Благодѣ́теля, за Его́же кро́вь твою́ излія́ла еси́.

Богоро́диченъ: Яви́лася еси́, о Дѣ́во Ма́ти Бо́жія! па́че естества́ ро́ждши въ тѣлеси́ благо́е Сло́во, Его́же отъ се́рдца Своего́ Оте́цъ отры́гне пре́жде всѣ́хъ вѣко́въ, я́ко бла́гъ, Его́же ны́нѣ и тѣле́съ превы́шша разумѣва́емъ, а́ще и въ тѣ́ло облече́ся.

[Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Гно́еве му́ченчестіи благово́ніе ны́нѣ испуща́ютъ благода́тію и злосмра́дныя на́ша стра́сти неизрече́ннымъ сло́вомъ отгоня́ютъ, и источа́ютъ ко́сти врачева́ній во́ды и напая́ютъ ду́ши пою́щихъ тѣ́хъ чудодѣя́нія.

Яко вели́ка столпа́ Христо́вы Це́ркве свяще́нно тя́ почита́емъ, я́ко стѣ́ну непоколеби́мую, я́ко гра́дъ вои́стинну, му́чениче, неплѣня́емый, я́ко во́ина крѣ́пка Бо́га Всецаря́, я́ко потреби́теля враго́въ, я́ко свѣти́льника, у́мнаго и всемíрнаго.

Соше́ственника а́нгела свѣ́та къ страда́нію, богому́дре, получи́лъ еси́, тѣ́мже терза́емь, и свѣща́ми поджига́емь, и разсѣка́емь лю́тѣ, и мече́мъ посѣка́емь, не устраши́лся еси́, страстоте́рпче Христо́въ до́блественнѣйше.

Де́нь, по́лнъ просвѣще́нія, весе́лія и ра́дости, на́мъ возсія́ — боже́ственная па́мять твоя́, тебе́ чту́щимъ, му́чениче Мерку́ріе, въ не́мже помина́й на́съ, па́мять твою́ творя́щихъ, и лю́тыхъ искуше́ній, и бѣ́дъ, и страсте́й ны́ изба́ви.

Богоро́диченъ: Просвѣти́, Две́ре Свѣ́та, ослѣ́пшую ду́шу мою́ страстьми́, и лука́выми по́мыслы омрачи́вшуюся, и бѣ́дствующую, и изба́ви мя́ искуше́ній, бѣ́дъ и скорбе́й, да сла́влю Тя́, наде́жду вѣ́рныхъ и утвержде́ніе.]

Свѣти́ленъ святы́я. Подо́бенъ: Ду́хомъ во святи́лищи.

Возжиля́ема мудрова́ніемъ же́нъ, о дѣ́во Екатери́но всечестна́я, страстоте́рпцевъ сла́во, филосо́фовъ хи́трость о Бо́зѣ обличи́ла еси́, я́ко буесло́віе су́щу и ба́снь, всенепоро́чную и́стинно Ма́терь Бо́жію спомо́щницу стяжа́вши. [Два́жды.]

Сла́ва, и ны́нѣ, пра́здника. Подо́бенъ: Ученико́мъ зря́щимъ.

Ангельстіи чи́ни и му́ченическій ли́къ пра́зднуетъ дне́сь съ на́ми въ боже́ственнѣмъ введе́ніи Богоотрокови́цы и Ма́тере Госпо́дни отъ Іоаки́ма же и Анны, вку́пѣ тве́рдаго Мерку́рія и пресла́вныя Екатери́ны. Ихже моли́твами обрѣсти́ на́мъ оставле́ніе мно́гихъ согрѣше́ній, мо́лимся.

На хвали́техъ стихи́ры на 6: пра́здника стихо́вныя три́ и святы́я три́.
Стихи́ры пра́здника, гла́съ 2. Подо́бенъ: До́ме Евфра́ѳовъ.

Свѣ́тъ Тя́ трисія́нный* вже́гши, Богоро́дице,* въ хра́мѣ сла́вы* небе́сную Ти́ пи́щу посыла́етъ,* велича́я Тя́.

Изъ ко́рене у́бо Дави́дова* прозябла́ еси́, Дѣ́во,* Гавріи́лъ, Тебѣ́ ра́дость принося́,* вопія́ше:* Бо́га роди́ши, Пречи́стая.

Бла́го же свяще́нному* и боже́ственному сопряже́нію* Іоаки́ма и Анны,* изъ ни́хже Чи́стая роди́ся,* приведена́ бы́сть ны́нѣ Творцу́ Своему́.

Ины стихи́ры, святы́я, гла́съ 4. Подо́бенъ: Да́лъ еси́ зна́меніе.

Па́мять всесвяще́нную,* Екатери́но всехва́льная,* честна́го твоего́ страда́нія соверша́юще,* сла́вимъ во гла́сѣхъ непреста́нныхъ* дарова́вшаго терпѣ́ніе тебѣ́ тве́рдое,* и побѣдоно́сну тя́ показа́вшаго,* и сло́во тебѣ́ пода́вшаго, устраша́ющаго ри́торы,* Іису́са Человѣколю́бца,* и Спа́са, и Го́спода.

Му́ченице самово́льная,* Екатери́но всесла́вная, яви́лася еси́,* мучи́теля благомо́щно обличи́вши* и лю́тое неи́стовство многобо́жія* богозна́нія сія́ніемъ низлага́ющи* и Боже́ственною благода́тію.* Отону́дуже, и я́ко му́ченицу,* и я́ко дѣ́ву непоро́чну, Христо́съ вѣнча́,* Спа́съ ду́шъ на́шихъ.

Благода́ть Ду́ха,* Екатери́но всесла́вная,* отверзе́ніемъ у́стъ прія́ла еси́,* тебе́ саму́ю очи́стивши житіе́мъ,* и по́мысломъ терпѣли́внымъ* мучи́телей го́рдость попра́ла еси́,* и добро́тѣ тѣле́снѣй* душе́вную красоту́ богому́дреннѣ предпочла́ еси́,* страда́льцевъ удобре́ніе.

Сла́ва, гла́съ 2. Вави́лы мона́ха:

Житіе́ невеще́ственно навы́кши, суди́ще безбо́жное дости́гши, ста́ла еси́, побѣдоно́сице, Екатери́но честна́я, цвѣтонося́щи Бо́жію свѣ́тлость и Боже́ственною мо́щію одѣ́яна, повелѣ́нію мучи́телеву поруга́лася еси́ и ри́торовъ утоли́ла еси́ буесло́вныя рѣ́чи, многострада́льная.

И ны́нѣ, гла́съ то́йже:

Две́ри небе́сныя, воспріими́те Дѣ́ву Марíю, Неискусому́жную, Чи́стую Богоро́дицу, изъ Нея́же человѣ́комъ избавле́ніе.

[Славосло́віе вели́кое. Ектеніи́ и отпу́стъ.]



НА ЛИТУРГІИ,

Блаже́нна пра́здника, пѣ́снь 7-я и 8-я, на 4 и святы́я, пѣ́снь 6-я, на 4. Проки́менъ, [пра́здника, и святы́хъ], гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ ко Ефесе́емъ, зача́ло 233. Аллилу́ія, [пра́здника, и святы́хъ], гла́съ 1: Воззва́ша пра́ведніи и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ, пра́здника, и святы́хъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Анѳоло́гіонъ, сíесть Цвѣтосло́віе, или́ Трефоло́гіонъ, сíесть Словопита́ніе. — Кíевъ: Въ Тѵпогра́фіи Кіевопече́рской Ла́ѵры, 1745. — Л. 188 – 192 об.

/ Къ оглавленію раздѣла /


Наверхъ / Къ титульной страницѣ

0