Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 23-й де́нь.
Иже во святы́хъ, оте́цъ на́шихъ, Амфило́хія, епи́скопа Иконíйскаго, и Григо́рія, епи́скопа Акрагантíйскаго.

[ВЕЧЕРЪ,]
На Го́споди, воззва́хъ: стихи́ры святы́хъ на 6. Стихи́ры свята́го Амфило́хія, гла́съ 4. Подо́бенъ: Да́лъ еси́ зна́меніе.

Сѣ́ти сокруши́лъ еси́* и ловле́нія разруши́лъ еси́ ересе́й, преподо́бне,* догма́товъ пра́востію* и богосло́віемъ извѣ́стнѣйшимъ,* раздѣле́нія избѣ́гъ* и злѣ́йшаго, о́тче, стѣсне́нія.* Въ предѣ́лѣхъ же пребы́въ* благочести́выя на́шея вѣ́ры,* Тро́ицу проповѣ́далъ еси́ во Еди́ницѣ Божества́.

Хи́тростно умудри́въ* на земли́ ца́рствующаго,* того́ прете́клъ еси́ сы́на непокло́нна,* разу́мно науча́я,* я́ко непокло́нну презира́ему Сы́ну* негоду́етъ Оте́цъ теплѣ́йше,* Иже Сего́ пре́жде вѣ́къ роди́въ па́че ума́ нестра́стно,* я́ко безтѣле́сна,* я́ко То́й вѣ́сть, преподо́бне.

Ины стихи́ры, свята́го Григо́рія, гла́съ 8. Подо́бенъ: О, пресла́внаго чудесе́!

Отче свяще́нне Григо́ріе,* отъ пеле́нъ Бо́гу* возложе́нъ, прилѣпи́вся* неосла́бными манове́ніи вся́ сотво́ршему,* и уже́, отъ сего́ облистава́емь,* страсте́й преше́лъ еси́ но́щь* и возсія́лъ еси́ свѣ́тъ врачева́ній и чуде́съ благода́ти,* отгоня́ многолѣ́тныя неду́ги* и преле́стныя ду́хи.

Отче чу́дный, Григо́ріе, свѣтоявле́ньми у́мъ* чи́сто облиста́,* страсте́й успи́лъ еси́ многово́лненное мо́ре,* и безстра́стіемъ, лета́я* чистѣ́йшими кри́лы,* дости́глъ еси́, идѣ́же неизрече́нная добро́та и недомы́сленная,* о на́съ всегда́ моля́ся,* благохва́лящихъ тя́.

Отче отце́въ, Григо́ріе,* свяще́нства пра́вило,* цѣлому́дрія о́бразъ,* мона́шествующихъ крѣ́пость,* Це́ркве утвержде́ніе,* любве́ свѣти́льникъ,* престо́лъ чу́вства,* исто́чникъ чуде́съ,* язы́къ огнедухнове́нный,* уста́ сладкоглаго́лива,* сосу́дъ Боже́ственнаго Ду́ха* и у́мный бы́лъ еси́ ра́й, богоблаже́нне.

Сла́ва, и ны́нѣ, гла́съ 4:

Пріиди́те, вси́ вѣ́рніи, eди́ну Непоро́чную восхва́лимъ, отъ проро́ковъ проповѣ́данную и въ хра́мъ приведе́нную, пре́жде вѣ́къ пронарече́нную Ма́терь и въ послѣ́дняя лѣ́та я́вльшуюся Богоро́дицу. Го́споди, моли́твами Eя́ ми́ръ Тво́й пода́ждь на́мъ и ве́лію ми́лость.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Да приведу́тся, глаго́летъ богооте́цъ Дави́дъ,* Царю́ дѣ́вы въ хра́мъ Госпо́день* въ слѣ́дъ Тебе́, Дѣ́во,* со свѣ́тлыми свѣща́ми ликовству́юще* и во свята́я приводя́ще Тя́, Чи́стая,* я́ко святы́й киво́тъ Бо́жій.

Сти́хъ: Приведу́тся Царю́ дѣ́вы въ слѣ́дъ Ея́,* и́скреннія Ея́ приведу́тся Тебѣ́.

Да угото́вятся две́ри* и да отверза́ются хра́ма Госпо́дня,* и до́мъ сла́вы,* и еди́ну, Пребо́льшую небе́съ,* па́че ума́ бы́вшую,* да пріе́млютъ, ра́дующеся,* и Христа́ Спа́са да воспою́тъ.

Сти́хъ: Приведу́тся въ весе́ліи и ра́дованіи,* введу́тся въ хра́мъ Царе́въ.

Да отверза́ются две́ри Боже́ственнѣйшаго хра́ма,* да пріе́млютъ вну́трь небе́сную Две́рь,* и да торжеству́етъ человѣ́ческое естество́,* и да взыгра́ютъ а́нгели,* спра́зднующе обои́ ку́пно съ на́ми Богома́тере вхо́дъ.

Сла́ва, и ны́нѣ, гла́съ 5:

Возсія́ де́нь ра́достенъ и пра́здникъ всече́стенъ: дне́сь бо я́же пре́жде рождества́ и по рождествѣ́ Дѣ́ва пребы́вши, въ хра́мъ Госпо́день приво́дится, и ра́дуется Заха́рія ста́рецъ, роди́тель Предте́чевъ, и вопіе́тъ ве́село: прибли́жися, Предста́тельница скорбя́щихъ, въ хра́мъ святы́й, я́ко Свята́я, освяти́тися во оби́телище Всецаря́. Да весели́тся Іоаки́мъ пра́oтецъ, и Анна да ра́дуется, я́ко принесо́ша Бо́гу я́ко трилѣ́тствующую Юницу непоро́чную Влады́чицу. Ма́тeри, сра́дуйтеся, дѣ́вы, взыгра́йте, и непло́ды, сликовству́йте, я́ко отве́рзе на́мъ небе́сное Ца́рство пронарече́нная Всецари́ца, ра́дуйтеся, лю́діе, и весели́теся.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

Сла́ва, и ны́нѣ, пра́здника:

[Дне́сь благоволе́нія Бо́жія предображе́ніе и человѣ́ковъ спасе́нія проповѣ́даніе въ хра́мѣ Бо́жіи я́сно Дѣ́ва явля́ется и Христа́ всѣмъ предвозвеща́етъ. Той и мы велегла́сно возопіи́мъ: ра́дуйся, смотре́нія Зижди́телева исполне́ніе.]


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, святы́хъ. И ны́нѣ, пра́здника.

По 1-мъ стихосло́віи сѣда́ленъ, гла́съ 1. Подо́бенъ: Ка́мени запеча́тану.

Свята́я святы́хъ, Богоро́дице, су́щи, досто́йно приведе́ся жи́ти во свята́я, я́ко одушевле́нъ Госпо́день киво́тъ и Свята́го Ду́ха и́стинно вмѣсти́лище Боже́ственное, Дѣ́во Ма́ти. Тѣ́мже всели́ся въ Тя́, Иже Отцу́ Единоро́дный и Свято́му Ду́ху соесте́ственный, Тво́й Сы́нъ неискусому́жно, обоготвори́въ все́ человѣ́чество.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Весе́лія дне́сь вселе́нная испо́лнися вся́ въ благознамени́томъ пра́здницѣ Богоро́дицы, зову́щи: Та́ е́сть Сѣ́нь небе́сная.

Сла́ва, и ны́нѣ, то́йже.

Кано́нъ пра́здника, гла́съ 1, со ирмосо́мъ на 6. Ирмосы́ по два́жды.
Пѣ́снь 1.

Ирмо́съ: Пѣ́снь побѣ́дную пои́мъ вси Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Стеце́мся дне́сь, Богоро́дицу почита́юще пѣ́сньми, и торжеству́имъ духо́вный пра́здникъ: въ хра́мъ бо Бо́гу да́ръ прино́сится.

Пѣ́сньми да воспои́мъ Богоро́дицы сла́вное предше́ствіе: хра́му бо дне́сь, я́ко хра́мъ Бо́жій, прино́сится проро́чески да́ръ многоцѣ́нный.

Анна непоро́чная ра́довашеся, я́ко даръ многоцѣ́ненъ Бо́гу принося́щи въ хра́мъ ма́терски, Іоаки́мъ же съ не́ю торжеству́етъ свѣ́тло.

Дави́дъ, пра́отецъ Твой, воспѣ́ Тя́ дре́вле, Дѣ́во Богоневѣ́сто, Дще́рь глаго́ля Тя́ Царя́ Христа́, Его́же и, роди́вши, ма́терски Младе́нца дои́ла еси́.

И святы́хъ два́, на 8. Кано́нъ свята́го Амфило́хія, его́же краегране́сіе: Пре́лести смѣю́щася, пою́ па́стыря. Ѳеофа́ново. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Словеса́ злочести́выхъ ересе́й и киче́нія, правосла́вія заре́ю просвѣще́нъ, удо́бно разори́лъ еси́; въ не́мже тебе́ чту́щія, священноявле́нне, сохрани́.

Иже всѣ́хъ спасе́нія при́сно хотя́й, Госпо́дь свяще́нныя тя́ па́ствы путевожда́, іера́рше, предлага́етъ, сло́вомъ и житіе́мъ свѣтя́ща изря́дно ви́дѣвъ.

Зако́нно пострада́ти избра́въ по Христо́вѣ Це́ркви, всеору́жіемъ, о́тче, креста́ себе́ огради́лъ еси́ и побѣди́тель благода́тію и вѣне́чникъ яви́лся еси́, сла́вне.

Богоро́диченъ: Сло́во, Отцу́ Собезнача́льное и Соприсносу́щное, и Того́ существа́ зра́къ ро́ждшему су́ща, изъ Тебе́ воплоще́нна родила́ еси́ несказа́нно, Неискусобра́чная.

Инъ кано́нъ свята́го Григо́рія. Его́же краегране́сіе: Чудодѣ́йственному Григо́рію почуди́ся. Іо́сифово, гла́съ 8.
Пѣ́снь 1.

Ирмо́съ: Сокруши́вшему бра́ни мы́шцею Свое́ю и прове́дшему Изра́иля сквозѣ́ Чермно́е мо́ре, пои́мъ Ему́, я́ко Изба́вителю на́шему Бо́гу, я́ко просла́вися.

Заря́ми Ду́ха просвѣща́емь при́сно, свяще́нне Григо́ріе, и свѣтоза́рна звѣзда́ бы́въ, всего́ мя́ озари́ моли́твами твои́ми, я́ко да воспою́ тя.

Иже Предвѣ́децъ всѣ́хъ, облагода́тствивъ у́мъ тво́й богода́нными сія́ньми, отъ пеле́нъ тя́ освяща́етъ, боже́ственными добродѣ́тельми сія́ти хотя́ща, о́тче, и чудесы́.

Дрема́ніе отъ вѣ́ждей уны́нія отве́ргъ, свѣти́льникъ бо́дрый ты́ яви́лся еси́, богоно́се, показа́въ вещми́ зва́ніе твое́, Григо́ріе, и́стинствующее.

Богоро́диченъ: Богоро́дицу Тя́ госпо́дственно и и́стинно исповѣ́дую: родила́ бо еси́ Го́спода несказа́нно, во дву́ существа́хъ и хотѣ́ніихъ, Пречи́стая Дѣ́во, разумѣва́ема.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Торжеству́имъ, празднолю́бцы, и сра́дуемся ду́хомъ во святѣ́мъ пра́здницѣ, учрежда́ющеся дне́сь, Дще́ре Царе́вы и Ма́тере Бо́га на́шего.

Іоаки́ме, ра́дуйся дне́сь, и весели́ся, Анно, ду́хомъ, рожде́нную изъ васъ Го́споду приводя́ще трилѣ́тствующу, я́ко Юницу Чи́сту Всенепоро́чную.

Бо́жіе селе́ніе во хра́мъ святы́й приво́дится, Богоро́дица Маріа́мъ, пло́тію трилѣ́тствующая, и То́й свѣщесвѣ́тятъ дѣ́вы, предтеку́ще.

Бо́жія Агница небла́зненная и голуби́ца нескве́рная, Боговмѣсти́мая ски́нія, сла́вы освяще́ніе, въ ски́ніи святѣ́й обита́ти избра́.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Боже́ственное и свѣтоза́рное твои́хъ догма́товъ сія́ніе погаси́ злочести́вый по́лкъ ерети́ческій, Амфило́хіе сла́вне.

Во́дъ животво́рныхъ, я́ко рѣка́, сы́й, отъ Бо́га испо́лнена, первосвяще́нникъ бы́въ, и́миже, благочести́віи, напая́емся.

Бога́тыми луча́ми просвѣща́емь, у́мъ осія́лъ еси́ та́йнымъ, преподо́бне, твои́хъ уче́ній благолѣ́піемъ.

Богоро́диченъ: Свѣ́щникъ Тя́ свѣтоза́рный, и душепита́тельную благоче́стія трапе́зу, и киво́тъ, Пречи́стая, вси́ вѣ́рніи, возвѣща́емъ.

Инъ.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Сего́ ра́ди тво́й пріе́мъ, о́тче, тру́дъ Зижди́тель, ста́рцу приведе́ тя́ въ пусты́ню, уча́щу тя́, Григо́ріе, вся́каго писа́нія сказа́нію.

Всю́ провожда́я седми́цу безпи́щенъ, о́тче, пита́лся еси́ снѣ́дію небе́сною, твои́хъ сле́зъ дожде́мъ напая́емь и Боже́ственно наслажда́емь.

Отъ Бо́га тебѣ́, іера́рше, простра́нство се́рдца даде́ся: источи́лъ бо еси́ бога́тно уче́ній чистѣ́йшія во́ды, сердца́ вѣ́рныхъ напая́ющія.

Богоро́диченъ: Глаго́лы проповѣ́дниковъ богоглаго́ливыхъ испо́лнишася: се́ бо роди́ Дѣ́ва мла́до Отроча́, Ада́ма дре́внѣйшее и сопресто́льное Роди́телю.

Конда́къ пра́здника, гла́съ 4. Подо́бенъ: Вознесы́йся.

Пречи́стый хра́мъ Спа́совъ, многоцѣ́нный черто́гъ и Дѣ́ва, свяще́нное сокро́вище сла́вы Бо́жія, днесь вво́дится въ до́мъ Госпо́день, благода́ть совводя́щи, Яже въ Ду́сѣ Боже́ственномъ, Юже воспѣва́ютъ а́нгели Бо́жіи: Сія́ е́сть селе́ніе небе́сное.

Икосъ:

Неизрече́нныхъ Бо́жіихъ и Боже́ственныхъ та́инъ зря́ въ Дѣ́вѣ благода́ть явля́емую и исполня́емую я́вственно, ра́дуюся и о́бразъ разумѣ́ти недоумѣ́юся, стра́нный и неизрече́нный: ка́ко избра́нная, Чи́стая, еди́на яви́ся па́че всея́ тва́ри ви́димыя и разумѣва́емыя? Тѣ́мже восхвали́ти хотя́ Сію́, ужаса́юся зѣло́ умо́мъ же и сло́вомъ, оба́че дерза́я, проповѣ́даю и велича́ю: Сія́ есть селе́ніе небе́сное.

И конда́къ Григо́рія, гла́съ 4. Подо́бенъ: Яви́лся еси́ дне́сь.

Свѣтолу́чными сія́ніи Це́рковь Свята́го Ду́ха свѣтово́дитъ свѣ́тлое соверша́ющихъ твое́ успе́ніе, преподо́бне о́тче всеблаже́нне Григо́ріе.

Сѣда́ленъ, гла́съ то́йже. Подо́бенъ: Ско́ро предвари́.

Просвѣща́еши концы́ въ твое́й па́мяти, му́дре: тѣ́ло бо твое́ источа́етъ исцѣле́ній исто́чникъ, Амфило́хіе сла́вне. Тѣ́мже и не́мощи избавля́еши вся́кія вѣ́рою приходя́щія къ честно́му твоему́ хра́му, сего́ ра́ди и ны́нѣ моли́ спасти́ся на́мъ.

Сла́ва, гла́съ 8. Подо́бенъ: Прему́дрости.

Отъ пеле́нъ Го́споду возложе́нъ, я́ко дре́вле пресла́вный Самуи́лъ, та́кожде зову́щаго тя́ Спа́са послу́шалъ еси́ и, ду́шу очи́стивъ до́брыхъ подая́ньми, свяще́нства благода́ть досто́йно взя́лъ еси́. Тѣ́мже на зла́цѣ боже́ственнаго зна́нія па́ствовавъ па́ству, врачева́ній изблиста́лъ еси́ дѣ́йства, Григо́ріе, моли́ Христа́ Бо́га, грѣхо́въ оставле́ніе дарова́ти пра́зднующимъ любо́вію святу́ю па́мять твою́.

И ны́нѣ, пра́здника, гла́съ 4. Подо́бенъ: Ско́ро предвари́.

Дави́де, предъиди́ въ хра́мъ Бо́жій, и, ра́дуяся, пріими́ Цари́цу на́шу, и То́й возопíй: вни́ди, Госпоже́, въ хра́мъ Царе́въ, вни́ди, Ея́же сла́ва покрове́нно разумѣ́ется, изъ Нея́же хо́щетъ источи́тися на́мъ всѣ́мъ Свѣ́тъ, Христо́съ.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ, позна́ешися, внегда́ пріити́ вре́мени, пока́жешися. Сла́ва си́лѣ Твое́й, Го́споди.

Проро́че Иса́іе, прорцы́ намъ, Дѣ́ва кто́ е́сть, иму́щая во чре́вѣ? Яже изъ Іу́дина ко́рене прозя́бши и ро́ждшися изъ Дави́да царя́, сѣ́мене свята́го пло́дъ благосла́вный.

Начина́йте, дѣ́вы, и воспо́йте пѣ́сни, рука́ми держа́ще свѣщи́, Чи́стыя Богоро́дицы предше́ствіе хва́ляще, ны́нѣ гряду́щія во хра́мъ Бо́жій, ку́пно съ на́ми пра́зднующи.

Іоаки́ме и Анно, весели́теся ны́нѣ, во хра́мъ приводя́ще Госпо́день Чи́стую Бо́га Ма́терь Христа́ Всецаря́ бу́дущую, отъ ва́съ же ро́ждшуюся, я́ко трилѣ́тствующую Юницу.

Свята́я святы́хъ су́щи, Чи́стая, во хра́мъ святы́й возлюби́ла еси́ всели́тися и, со а́нгелы, Дѣ́во, бесѣ́дующи, пребыва́еши, пресла́внѣ съ небе́съ хлѣ́бъ пріе́млющи, Пита́тельнице Жи́зни.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Амфило́хія боже́ственнаго и богоглаго́ливаго свяще́нное торжество́, богому́дріи, пріиди́те, вѣ́рою воспле́щимъ, того́ уче́ньми и богосло́віемъ укрѣпля́еми.

Невѣстово́децъ, богоно́се, це́ркве су́щія въ Христѣ́ бы́въ, добро́тою слове́съ сію́ украси́лъ еси́ и красото́ю правосла́вія уясни́лъ еси́.

Богосло́вный тво́й язы́къ и богоглаго́ливый нача́льныя Тро́ицы единоче́стную держа́ву всѣ́мъ уясни́ и Еди́но Божество́ чти́ти въ Тре́хъ Ѵпоста́сехъ.

Богоро́диченъ: Но́вую ски́нію Тя́, Дѣ́во, разумѣва́емъ, и чи́стое святи́лище всѣ́хъ Влады́ки: Того́ бо родила́ еси́ пло́тію, по Ѵпоста́си сте́кшася, Всенепоро́чная.

Инъ.

Ирмо́съ: Услы́шахъ, Го́споди, слу́хъ Тво́й и убоя́хся, я́ко неизрече́ннымъ совѣ́томъ, Бо́гъ сы́й Присносу́щный, отъ Дѣ́вы прише́лъ еси́, вопло́щся. Сла́ва снизхожде́нію Твоему́, Христе́, сла́ва си́лѣ Твое́й.

Земля́ я́ко добра́, процвѣ́лъ еси́ стори́чествующій, о́тче, кла́съ и серпо́мъ твои́хъ уче́ній пожа́лъ еси́ ерети́ческое злочести́вое мнѣ́ніе, собо́ра побо́рникъ яви́вся, преподо́бне Григо́ріе.

Небе́сный тя́ су́дъ архіере́я, Бо́жій уго́дниче, показу́етъ до́брѣ путево́дствити па́ству, ю́же стяжа́ Кро́вію Христо́съ, провѣ́дый твоея́ души́, о́тче, свѣ́тлость.

Хра́мъ Бо́жій бы́лъ еси́, очище́нъ страсте́й скве́рны, и, въ хра́мѣ свяще́ннѣмъ предстоя́, Ду́ха прише́ствіе прія́лъ еси́ я́вѣ ви́домъ чи́стыя голуби́цы, Христу́, тя́ просла́вльшу.

Богоро́диченъ: Ро́дъ человѣ́ческій спасе́ся па́че ума́ Твои́мъ Рождество́мъ и су́щіи во тмѣ́ тлѣ́нія, Пречи́стая Влады́чице, ви́дѣша Свѣ́тъ, возсія́вшій изъ чре́ва Твоего́, вино́внаго на́шего, Отрокови́це, воззда́нія.

Пѣ́снь 5.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́ Бо́же на́шъ.

Да свѣтлоно́симъ, правосла́вніи вси́, стека́ющеся и сла́вяще Богома́терь, я́ко Го́споду дне́сь приво́дится я́ко же́ртва благопрія́тна.

Да веселя́тся пра́отцы дне́сь, Влады́чице, и да ра́дуется ро́ждшая Тя́ со отце́мъ Твои́мъ, я́ко пло́дъ и́хъ Го́споду прино́сится.

Многоимени́тую и сла́внѣйшую Непоро́чную Юницу, я́ко пло́тію ро́ждшую Боже́ственнаго Тельца́, вси́ воспои́мъ, вѣ́рно пра́зднующе.

Уневѣ́щенія напису́ются Боже́ственная зна́менія па́че ума́ рождества́ Твоего́, Чи́стая Дѣ́во, дне́сь Ду́хомъ Святы́мъ въ дому́ Бо́жіи.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Просвѣща́емь свѣ́томъ Трисо́лнечнаго Божества́, сѣ́лъ еси́ на престо́лѣ архіере́йства, богому́дре Амфило́хіе.

Всецѣ́ла тебе́ сама́го Бо́гу освяти́лъ еси́ и бы́лъ еси́ богопроповѣ́дникъ велегла́сенъ, о́тче всеблаже́нне Амфило́хіе.

Ра́достный на́мъ пра́здникъ и всесвяще́нный наста́ боже́ственнаго и му́драго учи́теля, мíръ освяща́ющій.

Богоро́диченъ: О, всѣ́хъ вѣ́рныхъ благолѣ́пное удобре́ніе, Пречи́стая Богома́ти! души́ моея́ скве́рну омы́й моли́твами Твои́ми.

Инъ.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Глаго́ломъ твои́мъ очища́еши смра́дныя не́мощи прокаже́ннаго, иногда́ прише́дшаго къ тебѣ́ вѣ́рою: отъ Бо́га бо прія́лъ еси́ благода́ть чуде́съ, му́дре, я́коже Елиссе́й боже́ственный, богому́дре Григо́ріе.

Отве́рзлъ еси́ моли́твою твое́ю гугни́ваго уста́ и у́ши, Григо́ріе, врачева́ній, всеблаже́нне, дѣ́йствомъ обогати́лся еси́ и изры́гнулъ еси́ богосло́вія глубину́, моря́ безбо́жныхъ изсуша́ющу.

Земна́го пристра́стія очи́щся, о́тче, я́ко Пе́тръ первоизбра́нный апо́столовъ, сѣ́нію твое́ю цѣле́нія соверша́еши, содержи́мыя лю́тыми неду́говъ нападе́ньми боже́ственно врачу́я.

Богоро́диченъ: Нѣ́дръ Оте́ческихъ не истощи́въ, во е́же воплоща́тися, Всенепоро́чная, въ Твои́хъ нѣ́дрѣхъ ви́дится, держи́мь я́ко Младе́нецъ: Его́же ми́лостива сотвори́ благоче́стно Тя́ чту́щимъ, Дѣ́во Богоневѣ́сто.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мой, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Пра́зднуимъ, вѣ́рніи, пра́здникъ духо́вный Ма́тере Бо́жія, воспѣва́юще благоче́стно: е́сть бо святѣ́йша небе́сныхъ умо́въ.

Пѣ́сньми духо́вными восхва́лимъ, вѣ́рніи, Ма́терь Свѣ́та, я́ко дне́сь на́мъ яви́ся, предходя́щи въ хра́мъ Бо́жій.

Нескве́рная Агница и Чи́стая Голуби́ца преведе́ся обита́ти въ до́мъ Бо́жій, я́ко Непоро́чная, пронарече́нная бы́ти Ма́ти Бо́жія.

Въ хра́мъ зако́нный вхо́ды соверша́етъ Хра́мъ Бо́жій, небе́сная Ски́нія, изъ Нея́же на́мъ, су́щимъ во тмѣ́, Свѣ́тъ возсія́.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Умертви́въ въ пло́ти долѣре́вностное мудрова́ніе, безстра́стія благода́тію одѣ́ялся еси́, о́тче священнотаи́нниче, и всечи́стыми уче́ніи Тро́ицу проповѣ́далъ еси́. [Два́жды.]

Стра́хомъ огради́вся Боже́ственнымъ, богопрія́тне, и ду́шу отъ скве́рнъ чи́сту содѣ́явъ, богосло́вія яви́лся еси́ свяще́ннѣйшій орга́нъ, преподо́бне.

Богоро́диченъ: Чи́стое Тя́ и свято́е вѣ́дяще селе́ніе Царя́ сла́вы, и хра́мъ, и престо́лъ Превысоча́йшаго, мо́лимъ ду́ши на́ша спасти́, Всепѣ́тая.

Инъ.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Укрѣпля́ется отрокови́ца, тѣ́ломъ разсла́бленная въ лѣ́тѣхъ мно́жайшихъ, моли́твою твое́ю, преподо́бне, вѣ́рно прише́дши къ тебѣ́, и вино́внаго всѣ́хъ велича́етъ Христа́.

Стопа́мъ послѣ́дуя Влады́чнимъ житіе́мъ непоро́чнымъ, сла́вне, непра́веднѣ оскорбля́емь и оклевета́емь, не изничто́женъ пребы́лъ еси́.

Зло́бою соживу́щіи, тя́, незло́биваго а́гнца, я́ко свирѣ́піи звѣ́ріе, восхи́тивше, въ темни́цу осуди́ша, храни́ма, о́тче, Боже́ственною благода́тію.

Богоро́диченъ: Умъ разумѣ́ти недоумѣ́етъ вели́кое Твоего́ рождества́ та́инство: Бо́га бо родила́ еси́, человѣ́ка бы́вша, Приснодѣ́во, необмы́сленнаго.

Конда́къ свята́го Амфило́хія, гла́съ 2. Подо́бенъ: Вы́шнихъ ища́.

Боже́ственный гро́мъ, труба́ Ду́ха, вѣ́ры садодѣ́лателю и сѣ́чиво ересе́й, іера́рше Амфило́хіе, Тро́ицы уго́дниче вели́кій, со а́нгелы предстоя́ при́сно, моли́ непреста́нно о всѣ́хъ на́съ.

Икосъ:

Отъ Ду́ха Свята́го прему́дрый іера́рхъ Христо́въ вдохну́вся, Це́рковь запеча́та, имѣ́я бо си́лы дѣ́йство, сла́вный таи́нникъ и учи́тель вѣ́ры прія́тенъ, услы́шавъ благочте́ніе Боже́ственныхъ Писа́ній, воображе́ніе Живоно́снаго и Честна́го Креста́ творе́ніемъ, Евно́мія отгна́ и, вѣ́ру уясни́въ, проповѣ́дая Христа́, мо́литъ непреста́нно о всѣ́хъ на́съ.

Пѣ́снь 7.

Ирмо́съ: Пе́щь, Спа́се, ороша́шеся, о́троцы же, лику́юще, поя́ху: отце́въ Бо́же, благослове́нъ еси́.

Ликовству́имъ, празднолю́бцы, днесь, воспои́мъ Чи́стую Влады́чицу, Іоаки́ма и Анну досто́йно чту́ще.

Проро́чествуй, Дави́де, глаго́ля Ду́хомъ: приведу́тся дѣ́вы въ слѣ́дъ Тебе́, приведу́тся Тебѣ́ во храмъ Цари́цы Ма́тери.

Ра́довахуся а́нгеловъ чи́ни, веселя́хуся пра́ведныхъ ду́си, я́ко Бо́жія Ма́терь во свята́я приво́дится.

Пріе́млющи пи́щу небе́сную, преспѣва́ше му́дростію и благода́тію, бы́вши Ма́ти по пло́ти Христа́ Бо́га.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Та́инственнѣйшимъ боговѣща́ніемъ твои́мъ вне́млюще любо́вію, Аріева, о́тче, разсѣче́нія Божества́ избѣга́емъ, Тро́ицу Несозда́нную и Единосу́щную вѣ́рою сла́вяще.

Облича́ема уче́ніемъ твои́мъ Македо́нія, о́тче, зря́ще, Ду́ха Блага́го, Отцу́ же и Сы́ну спокланя́ема и Собезнача́льна, вѣ́рою сла́вимъ.

Сло́вомъ уясни́въ е́же па́че сло́ва Сло́ва воплоще́ніе, чествова́ти въ дву́хъ существа́хъ Еди́наго Бо́га богому́дренно научи́лъ еси́ и раздѣле́нія, и смѣше́нія бѣжа́ти, богопрія́тне.

Богоро́диченъ: Вси́ усе́рдно Богоро́дицу восхва́лимъ, пріиди́те, вѣ́рою спа́сшіися, изъ Нея́ ро́ждшагося Вседержи́теля, — благослове́на Ты́ въ жена́хъ еси́, — вопію́ще, — Всенепоро́чная.

Инъ.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Чудодѣ́йствуетъ Зижди́тель, суди́му тебѣ́, блаже́нне, блудни́ца бо жени́що стремле́ніемъ взята́ де́монскимъ, всѣ́мъ показа́ тя́ чи́ста, Григо́ріе.

Свѣтопода́тельніи боже́ственніи ученицы́ Спа́совы, тебѣ́ предста́вше, преподо́бне, привя́зана дре́ву разрѣша́ютъ, ра́достно лобза́юще.

Терпѣ́нію твоему́, о́тче, Влады́ка, вне́мля, чудодѣ́йствы бо́льшими тя́ свяще́нно украша́етъ, неду́говъ мра́къ отгоня́ща.

Богоро́диченъ: Матеролѣ́пно всѣ́хъ родила́ еси́ Зижди́теля и рука́ми понесла́ еси́, я́ко херуви́мскій престо́лъ, содержа́щаго вся́, Неискусобра́чная.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Весели́тся дне́сь свѣ́тло Іоаки́мъ, и Анна непоро́чная Го́споду Бо́гу прино́ситъ же́ртву, да́нную е́й отъ обѣща́нія — Святу́ю Дще́рь.

Хва́лятся святíи Дави́дъ и Іессе́й, и Іу́да чти́тся, изъ ко́рене бо и́хъ израсте́ пло́дъ — Дѣ́ва Чи́стая, изъ Нея́же роди́ся Бо́гъ Превѣ́чный.

Марíя Пречи́стая и одушевле́нная ски́нія приво́дится дне́сь въ до́мъ Бо́жій, и пріе́млетъ Сію́ Заха́рія рука́ми, я́ко освяще́нное сокро́вище Госпо́дне.

Яко две́рь спаси́тельную и го́ру мы́сленную, я́ко лѣ́ствицу одушевле́нную, почти́мъ, вѣ́рніи, вои́стинну Дѣ́ву и Ма́терь Бо́жію, благослове́нную рука́ми іере́евъ.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Украси́шася пѣ́сненно уста́ твоя́, богосло́вящая я́сно Тро́ицу несозда́нну, безнача́льну, единосу́щну, несли́тну Треми́ Ѵпоста́сьми, о́тче богому́дре. Ейже вопіе́мъ: благослови́те, вся́ дѣла́ Госпо́дня, Го́спода.

Бога́тство тебѣ́ и сла́ву честну́ю Ѵпоста́сная Му́дрость даде́, богосло́вившу ти́, прему́дре, благоче́стно, и ересе́й низложи́вшу горды́ню, и любо́вію пою́щу: благослови́те, вся́ дѣла́ Госпо́дня, Го́спода.

Иже всѣ́мъ подая́й жи́знь я́ко іера́рха вѣ́рна и богоглаго́лива въ Це́рковь тя́, преподо́бне, перворо́дныхъ вво́дитъ, свяще́нствующа та́инственно и вѣ́рно пою́ща: благослови́те, вся́ дѣла́ Госпо́дня, Го́спода.

Богоро́диченъ: Се́ ны́нѣ оскудѣ́ я́вѣ отъ Іу́дина колѣ́на нача́льникъ и во́ждь: Ты́ бо, Всенепоро́чная, родила́ еси́ Самаго́ отлежа́щаго, жда́ніе язы́ковъ Христа́, Ему́же пое́мъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Отрѣша́ется ра́ны де́монскія стра́шныя, моли́твою твое́ю, блаже́нне, я́же лука́вствомъ пребеззако́нныхъ муже́й оклевета́вшая тебе́, пра́веднаго, отрокови́ца, и посредѣ́ собо́ра тя́ прославля́етъ подвигополо́жникъ Бо́гъ во вся́ вѣ́ки.

Те́мнаго омраче́нія исполня́ются лука́вствомъ на тя́ поучи́вшіися, о́тче, и сія́етъ твое́ свѣтоза́рное житіе́ предъ отцы́, Григо́ріе, въ и́хже прише́ствіи, у́гліе держа́ руко́ю, чудодѣ́йствовалъ еси́.

Яко звѣзда́ свѣтлѣ́йшая, яви́лся еси́ и́стинно на высотѣ́, о́тче, церко́внѣй, озаря́еши ны́ добродѣ́тельми всегда́ и чуде́съ луча́ми, пою́щія твою́ свѣтоно́сную па́мять, святи́телю богому́дре Григо́ріе.

Богоро́диченъ: Пресла́вное рождество́ Твое́ помышле́нія на́ша ужаса́етъ, еди́на Благослове́нная: Бо́гъ бо изъ Тебе́ пло́ть прія́тъ, е́же бѣ́ пребы́въ, Богоро́дице, невра́щенъ естество́мъ. Его́же превозно́симъ во вѣ́ки.

Пѣ́снь 9.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся насъ ра́ди, бы́въ Человѣ́къ, Безнача́льный. Велича́емъ вси́ я́ко Ма́терь Бо́га на́шего Чи́стую.

Изъ пра́ведныхъ произы́де Іоаки́ма и Анны обѣща́нія пло́дъ — Богоотрокови́ца Марíя и, я́ко кади́ло прія́тное, пло́тію младе́нствующи, приво́дится во святи́лище свято́е я́ко Свята́я во святы́хъ обита́ти.

Младе́нствующую естество́мъ и па́че естества́ я́вльшуюся Ма́терь Бо́жію восхва́лимъ пѣ́сньми: въ хра́мъ бо зако́нный Го́споду дне́сь приво́дится въ воню́ благово́нія, пра́ведныхъ я́ко пло́дъ духо́вный.

Со а́нгеломъ, е́же — ра́дуйся, — Богоро́дицѣ прили́чнѣ возопіи́мъ, вѣ́рніи, — ра́дуйся, вседо́брая Невѣ́сто; ра́дуйся, о́блаче свѣ́тлый, изъ него́же на́мъ возсія́ Госпо́дь, во тмѣ́ невѣ́дѣнія сѣдя́щимъ; ра́дуйся, всѣ́хъ Наде́ждо.

Святы́хъ свята́я и Богома́ти Марíе, моли́твами Твои́ми, Чи́стая, свободи́ ны отъ сѣте́й вра́жіихъ и вся́кія е́реси и ско́рби, вѣ́рно покланя́ющіяся о́бразу свята́го Твоего́ зра́ка.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Еди́но Тріѵпоста́сное Естество́ всеблагоче́стно богосло́вивъ, Всесвяту́ю Тро́ицу, Богонача́льную, Непости́жную, ны́нѣ отъ Нея́ почествова́лся еси́, священноявле́нне Амфило́хіе.

Имѣ́я къ Бо́гу дерзнове́ніе, я́ко іера́рхъ, богоно́се, свяще́нную и свѣтоно́сную соверша́ющихъ па́мять твою́, всеблаже́нне, всегда́ помина́й, твоему́ Влады́цѣ предстоя́.

Дава́еши ми́ оби́льную благода́ть, похвалы́ тебѣ́, богому́дре, спле́тшу усе́рднымъ се́рдцемъ, грѣхо́въ разрѣше́ніе прося́щу, я́ко святи́тель вѣ́рнѣйшій, преподо́бне о́тче Амфило́хіе.

Богоро́диченъ: Ада́мова у́бо вну́ка яви́лася еси́, Бо́жія же Ма́ти позна́лася еси́: Ты́ бо отъ вѣ́ка яви́лася еси́ святѣ́йши вся́кія тва́ри, Благослове́нная Пречи́стая, тѣ́мъ Тя́ вси́ велича́емъ.

Инъ.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Се́ свѣ́тлое торжество́, се́ па́мять свяще́нная, се́ благода́ть всѣ́мъ соше́дшимся вѣ́рнымъ, оби́льно врачева́нія точа́щи, присту́пимъ: то́читъ бо на́мъ Григо́ріева ра́ка просвѣще́ніе присноте́чное и безсме́ртіе.

Яко рѣка́, испо́лнился еси́ во́дъ Христо́выхъ, я́ко ма́слина, еле́й то́чиши жи́зни, я́ко фи́никсъ, возвы́сился еси́, Григо́ріе, я́ко лоза́, гро́здіе на́мъ добродѣ́телей твои́хъ но́сиши, отъ ни́хже напая́емся вино́мъ нетлѣ́нія.

Да сра́дуется дне́сь на́мъ въ па́мяти твое́й свяще́нныхъ собо́ръ, и преподо́бныхъ мно́жество, и всѣ́хъ а́нгелъ чи́нове: съ ни́миже предстоя́ Творцу́, озаря́емь, о́тче, помяни́ любо́вію тя́ пѣсносло́вящія.

Освяще́нъ бы́лъ еси́, о́тче, сосу́дъ Христо́въ, Це́ркве сто́лпъ, и приста́нище вѣ́рныхъ, и ме́чь, пре́лести изсѣка́ющій, исто́чникъ исцѣле́ній, и глубина́ боже́ственныхъ разумѣ́ній, и свѣща́ неугаса́ющая, и па́стырь па́стырей.

Богоро́диченъ: Свѣ́тъ ро́ждшая безлѣ́тный, возсія́вшій изъ Отца́, просвѣти́ мою́, Отрокови́це, ду́шу и у́мъ, дале́че отъ мене́ отгоня́щи тму́, Дѣ́во, страсте́й: да Тя́ ублажа́ю, Присноблаже́нную, вѣ́рныхъ наде́жду.

Свѣти́ленъ свята́го Амфило́хія. Подо́бенъ: Ученико́мъ.

Бо́гъ положе́ніемъ бы́въ въ безвеще́ственнѣмъ причаще́ніи Бо́жія естества́, всему́дре, отъ а́нгелъ пома́зався святи́тель боже́ственному при́чту, хода́тайствуя Созда́телю и созда́нію, богопрія́тне, Амфило́хіе о́тче. Тѣ́мже, твою́ соверша́юще па́мять, тя́ воспѣва́емъ, избавля́еми моли́твами твои́ми отъ тли́ и напа́стей.

Сла́ва, свята́го Григо́рія:

По́стнически житіе́ твое́ украси́въ, му́дре о́тче, и честны́я, Григо́ріе, Христо́вы Це́ркве іера́рхъ яви́лся еси́, блаже́нне, правосла́вныхъ просвѣща́я заря́ми уче́ній твои́хъ и неизглаго́ланными чудесы́. Тѣ́мже твое́ пресвято́е успе́ніе соверша́ющимъ испроси́ моли́твами твои́ми душе́вное спасе́ніе.

И ны́нѣ, пра́здника. Подо́бенъ: Жены́, услы́шите.

Юже дре́вле предвозвѣсти́ проро́ческое сосло́віе, ста́мну, и же́злъ, и скрижа́ль, и несѣко́мую го́ру, Марíю Богоотрокови́цу вѣ́рно да восхва́лимъ: дне́сь бо вво́дится во свята́я святы́хъ воспита́тися Го́споду.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Взя́тся граде́жъ средостѣ́нія* боже́ственнымъ и́стинно* Богоро́дицы вхожде́ніемъ,* и до́льняя съ вы́шними* ны́нѣ совокупи́хомся.

Сти́хъ: Приведу́тся Царю́ дѣ́вы въ слѣ́дъ Ея́,* и и́скреннія Ея́ приведу́тся Тебѣ́.

Воспѣ́ша дѣ́вственніи ли́цы* боже́ственную пѣ́снь,* провожда́юще въ до́мъ Бо́жій,* свѣщено́сныя,* еди́ну Всенепоро́чную.

Сти́хъ: Приведу́тся въ весе́ліи и ра́дованіи,* введу́тся въ хра́мъ Царе́въ.

Вну́трь святи́лища,* Святу́ю святы́хъ,* Богоро́дицу су́щую,* о Заха́ріе, пріе́мли* во свята́я святы́хъ.

Сла́ва, и ны́нѣ, гла́съ 6:

Дне́сь собо́ри вѣ́рныхъ, соше́дшеся, духо́внѣ да торжеству́имъ и Богоoтрокови́цу Дѣ́ву и Богоро́дицу, въ хра́мъ Госпо́день приводи́му, благоче́стно восхва́лимъ, предъизбра́нну отъ всѣ́хъ родо́въ, во оби́телище всѣ́хъ Царя́ Христа́ и Бо́га: дѣ́вы, свѣщи́ нося́ще, предъиди́те, Приснодѣ́вы чту́ще честно́е происхожде́ніе, ма́тeри, печа́ль всю́ отложи́вше, ра́достно спослѣ́дствуйте Ма́тери Бо́га быва́ющей и ра́дости мíра Хода́таицѣ. Вси́ у́бо ра́достно, е́же — ра́дуйся, — со а́нгеломъ возопіи́мъ Обра́дованнѣй, при́сно моля́щейся о душа́хъ на́шихъ.


НА ЛИТУРГІИ,

Блаже́нна пра́здника, пѣ́снь 4-я и 5-я, на 6. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́омъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. Сти́хъ: Зако́нъ Бо́га его́ въ се́рдцѣ его́, [и не за́пнутся стопы́ eго́]. Ева́нгеліе Матѳе́я, зача́ло 103. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 213 об. – 223.

/ Къ оглавленію раздѣла /


Наверхъ / Къ титульной страницѣ

0