Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ноемврія въ 23-й де́нь.
Слу́жба святи́телю и чудотво́рцу Митрофа́ну, пе́рвому епи́скопу Воро́нежскому.

НА МАЛѢЙ ВЕЧЕРНИ.
На Го́споди, воззва́хъ: стихи́ры, гла́съ 1:

Пріиди́те, правосла́вныя Россíйскія Це́ркви ча́да, ублажи́мъ святи́теля Христо́ва Митрофа́на, и́же о ма́лѣ бы́въ вѣ́ренъ, надъ мно́гими поста́вленъ е́сть отъ небе́снаго Домовлады́ки, да мо́лится непреста́нно о вѣ́рою почита́ющихъ присносла́вную па́мять его́. [Два́жды.]

По достоя́нію о тебѣ́, святи́телю Христо́въ, ра́дуемся, и моще́й твои́хъ нетлѣ́ніемъ хва́лимся: пролива́я бо отъ гро́ба твоего́ цѣле́бныя струи́, я́ко во́ды, ми́ръ и благослове́ніе притека́ющимъ къ тебѣ́ подае́ши, я́ко предстоя́тель Го́рнія Сла́вы, имѣ́яй ве́лію благода́ть у Христа́ Бо́га на́шего.

На земли́ пожи́въ а́нгельски, на небеси́ жи́ти сподо́бился еси́, и свы́ше на оте́чество твое́ призира́я, низпосыла́еши благода́тныя да́ры, вѣ́рою и любо́вію всесла́вную твою́ па́мять соверша́ющимъ, исцѣля́я болѣ́зни душе́вныя и тѣле́сныя моли́твами твои́ми.

Сла́ва, гла́съ 6:

Во всечестнѣ́й па́мяти твое́й, пѣ́сньми и пѣ́ньми ликовству́юще, боголѣ́пно сла́вимъ вся́ческихъ Го́спода Влады́ку, Иже за многопло́дное души́ твоея́ дѣ́ланіе, многопло́дную благода́ть чудотворе́ній дарова́ тебѣ́, всеблаже́нне Митрофа́не, свы́ше: ты́ же моли́ изба́витися отъ бѣ́дъ душа́мъ на́шимъ.

И ны́нѣ, пра́здника.

На стихо́внѣ стихи́ры, гла́съ 5:

Имѣ́я свѣти́льникъ нога́ма твои́ма зако́нъ Христо́въ, и во свѣ́тѣ Боже́ственныхъ повелѣ́ній Его́ непреткнове́нно ходя́ и поуча́яся, жили́ще Пресвяты́я Тро́ицы, прему́дре Митрофа́не, бы́лъ еси́. Отону́дуже и на́мъ крѣ́пкій защи́тникъ отъ Бо́га показа́лся еси́, злы́я ду́хи си́лою Свята́го Ду́ха прогоня́я.

Сти́хъ: Честна́ предъ Го́сподемъ сме́рть преподо́бныхъ Его́.

Съ Правосла́вною Россíйскою Це́рковію, въ ми́рѣ правосла́вно ца́рствующаго Импера́тора утверди́, и во дне́хъ его́ непремѣня́емое благополу́чіе да́руй, освяще́нному же архіере́евъ собо́ру, и твоего́ престо́ла намѣ́стникомъ, въ благолѣ́пное Бо́жіихъ церкве́й устрое́ніе, моли́твъ твои́хъ, Митрофа́не, по́мощь низпосли́, прося́ на́мъ грѣхо́въ оставле́ніе всѣ́мъ дарова́ти, и ве́лію ми́лость.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

При́зри на славосло́віе пою́щихъ тя́, и прилѣ́жныя, Митрофа́не, пріими́ отъ на́съ моли́твы, и принеси́ я́ къ пренебе́сному престо́лу Вседержи́теля, да немо́лчнымъ хода́тайствомъ твои́мъ спасе́тъ ду́ши на́ша.

Сла́ва, и ны́нѣ, пра́здника.

Тропа́рь, гла́съ 4:

Пра́вило вѣ́ры и о́бразъ кро́тости, сло́вомъ и житіе́мъ, па́ствѣ твое́й, о́тче смиренному́дре Митрофа́не, бы́лъ еси́. Тѣ́мже и во свѣ́тлостехъ святы́хъ со́лнца свѣтлѣ́йше возсія́лъ еси́, вѣнце́мъ нетлѣ́нія и сла́вы украша́емь, моли́ Христа́ Бо́га Благочести́вѣйшему Импера́тору на́шему [и́мярекъ], и все́й Держа́вѣ Его́, и гра́ду твоему́ въ ми́рѣ спасти́ся.

Сла́ва, и ны́нѣ, пра́здника.



НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры пра́здника 3 и свята́го 5. Гла́съ 8:

Отче богому́дре Митрофа́не, ты́ отъ ю́ности возлюби́лъ еси́ взыска́ніе го́рняго мíра прему́дрости, и егда́ поще́ніемъ и моли́твою отъ Бо́га стяжа́лъ еси́ ю́, не въ земли́ сокры́лъ еси́ тала́нтъ тво́й, но уча́ и творя́ па́стырски непреста́нно, во сто́ кра́тъ о́ный умно́жилъ еси́, и бы́лъ еси́ іера́рхъ свѣти́льникъ Це́ркви. Тѣ́мъ въ воздая́ніе блаже́ннымъ трудо́мъ твои́мъ, вше́дъ ны́нѣ въ ра́дость Го́спода твоего́ Царя́ и Влады́ки, моли́ о душа́хъ на́шихъ. [Два́жды.]

Отче преподо́бне Митрофа́не, ты́ плѣни́въ у́мъ и се́рдце твое́ въ послуша́ніе Бо́гу, не о себѣ́, но о сла́вѣ Бо́жіей радѣ́лъ еси́: тружда́яся бо въ дѣ́ланіи мы́сленнаго виногра́да Христо́ва, вся́ку ро́згу, не творя́щую плода́, жи́во и дѣ́йственно сло́ва Бо́жія мече́мъ отребля́лъ еси́, вѣ́ру же и чи́стыя нра́вы ангелонра́внымъ по Бо́зѣ житіе́мъ твои́мъ, я́ко опло́томъ, соблюда́лъ еси́. И ны́нѣ, вѣнце́мъ нетлѣ́нія отъ руки́ Госпо́дни украси́вся, моли́ о душа́хъ на́шихъ. [Два́жды.]

Отче богоно́се Митрофа́не, ты́ разу́мно пра́вилъ еси́ ввѣ́ренное тебѣ́ сло́во и́стины: стоя́ бо на неусы́пнѣй стра́жи до́му Госпо́дня, и бдя́ о душа́хъ недре́мленно, па́ству твою́ угоди́ти Бо́гу сло́вомъ и дѣ́ломъ наставля́лъ еси́. Тѣ́мъ, я́ко до́брый па́стырь, Пастыренача́льнику, Сы́ну Бо́жію, о приставле́ніи Его́ сло́во бла́го возда́лъ еси́, моли́ о душа́хъ на́шихъ.

Сла́ва, гла́съ 6:

Святи́телей удобре́ніе и отце́въ сла́ву, священнолѣ́пно воспои́мъ дне́сь, и Царя́ царе́й Христа́ Бо́га на́шего восхва́лимъ: Се́й бо, я́ко Освяти́тель святы́хъ, и Творе́цъ чудотво́рцевъ, чуде́съ благолѣ́піемъ того́ та́ко просла́ви, я́ко ца́рь и кня́зи, архіере́и и свяще́нницы, и вси́ благовѣ́рніи лю́діе, отъ честны́хъ моще́й его́, я́ко отъ многоцѣле́бнаго исто́чника, благода́ть и исцѣле́ніе пріе́млюще, уми́льно глаго́лютъ: ра́дуйся, Бо́жіихъ дарова́ній сокро́вище, Митрофа́не, святи́телю блаже́нне.

И ны́нѣ, пра́здника.
Вхо́дъ, проки́менъ дне́. Чте́нія три́, святи́тельскія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ра хра́ма. Та́же стихи́ры Митрофа́на, гла́съ 5. Самогла́сны:

Тако́въ на́мъ подоба́ше архіере́й, преподо́бенъ, пра́веденъ, ми́лостивъ, и во всѣ́хъ оправда́ніяхъ Госпо́днихъ непоро́ченъ. Пріиди́те, пѣ́сньми и псалмы́ духо́вными свѣ́тло ликовству́имъ дне́сь, тому́ си́це зову́ще: ра́дуйся, оте́ческихъ обы́чаевъ ревни́телю, сто́лпе и утвержде́ніе вѣ́ры; ра́дуйся, Воро́нежская похвало́, Митрофа́не богоно́се свяще́ннѣйшій.

Не пло́ть и кро́вь яви́ тя, святи́телю богоизбра́нне, но Оте́цъ Небе́сный, Ему́же ты́, боже́ственною твое́ю кро́тостію угоди́въ, я́ко а́гнецъ незло́бивъ, чи́ны незло́бивыхъ въ ли́цѣ а́нгельстѣмъ наслѣ́дилъ еси́ и ны́нѣ, въ го́рнихъ предстоя́, моли́ дарова́ти на́мъ мно́жество щедро́тъ и ве́лію ми́лость.

По до́лгу блажи́мъ тя́, я́ко свѣти́льника вѣ́ры и а́нгела во пло́ти, поне́же житіе́ твое́, Митрофа́не, че́стно и успе́ніе со святы́ми. Просія́лъ бо еси́ благи́ми дѣ́лы, я́ко па́стырь богому́дрый, чудесы́ же твои́ми просвѣти́лся еси́, я́ко вѣ́рный слуга́ и дру́гъ Бо́жій. Тѣ́мже, припа́дающе, мо́лимъ тя́: моли́ся за ны́, чудотво́рче святы́й, ко Го́споду, да пода́стъ душа́мъ на́шимъ ве́лію и бога́тую ми́лость.

Сла́ва, гла́съ 8:

Дне́сь красу́ется сла́вный гра́дъ Воро́нежъ, боже́ственнымъ сокро́вищемъ моще́й твои́хъ, и оби́тель твоя́, ликовству́ющи, ра́дуется, и правосла́вніи твои́мъ просвѣще́ніемъ, блаже́нне Митрофа́не, хва́лятся; ты́ же моли́ Импера́тору на́шему, въ неруши́момъ здра́віи долгоде́нствіе дарова́ти, лю́демъ же Его́ тишину́, и земли́ плодоро́діе, и ве́лію ми́лость.

И ны́нѣ, пра́здника.

На стихо́внѣ стихи́ры, гла́съ 2:

Кíими благоговѣ́йными усты́ воспои́мъ Митрофа́на, святи́теля смире́нна, смире́нному Пастыренача́льнику подража́теля, подвиго́мъ вели́кихъ отце́въ Це́ркве соуча́стника, и высо́кимъ нра́вомъ и́хъ наслѣ́дника, му́жа жела́ній чи́ста, слугу́ Госпо́дня вѣ́рна, ревни́теля уста́вовъ Це́ркви непоколеби́ма? Его́же вѣнча́етъ Христо́съ Бо́гъ на́шъ, имѣ́яй мно́жество щедро́тъ и ве́лію ми́лость.

Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

Кíими свяще́нными пѣ́сньми ублажи́мъ Митрофа́на, іера́рха богому́дра, ева́нгельскаго Правосла́вія наста́вника, воздержа́нія учи́теля, а́нгеловъ собесѣ́дника, ни́щихъ и сиро́тъ пита́теля, оби́димымъ засту́пника и немощству́ющихъ врача́ преизря́дна? Его́же вѣнча́етъ Христо́съ Бо́гъ на́шъ, имѣ́яй мно́жество щедро́тъ и ве́лію ми́лость.

Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй.

Кíими похва́льными вѣнцы́ почти́мъ Митрофа́на, па́стыря блаже́нна, Це́ркви свѣти́льника, гра́да Воро́нежа сла́ву, Россíйстѣй Держа́вѣ утвержде́ніе, и́ночествующихъ о́бразъ, свяще́нства вѣне́цъ, іера́рховъ святолѣ́пное украше́ніе? Его́же вѣнча́етъ Христо́съ Бо́гъ на́шъ, имѣ́яй мно́жество щедро́тъ и ве́лію ми́лость.

Сла́ва, гла́съ 5:

Сра́дуйтеся на́мъ, Россíйстіи собо́ры дне́сь, въ свѣ́тлой па́мяти богоно́снаго отца́ на́шего и па́стыря, и́же до́брымъ житіе́мъ свои́мъ вѣ́рно угоди́въ Бо́гу, и во гро́бѣ сла́вою іера́ршескихъ добродѣ́телей свои́хъ сія́етъ, я́ко свѣти́ло, подая́ отъ нетлѣ́ннаго сокро́вища моще́й свои́хъ, благоуха́ніе Свята́го Ду́ха. Тѣ́мже у́бо, соше́дшеся, о́бщій ли́къ тому́ соста́вимъ, пѣ́сньми боже́ственными зову́ще: помина́й на́съ, о́тче, и за ны́ Христу́ моли́ся, я́ко вели́кій на́шъ хода́тай, Митрофа́не.

И ны́нѣ, пра́здника.
На благослове́ніи хлѣ́бовъ, тропа́рь свята́го два́жды, и пра́здника еди́ножды.



НА УТРЕНИ,
На Бо́гъ Госпо́дь: тропа́рь пра́здника и свята́го.

По 1-мъ стихосло́віи сѣда́ленъ, гла́съ 8:

Украси́въ ду́шу твою́ добродѣ́тельми, и вре́меннаго житія́ по́прище въ стра́сѣ Бо́жіи преше́дъ, обрѣ́лъ еси́ благода́ть предъ Бо́гомъ; Ему́же съ ли́ки а́нгелъ предстоя́, моли́, свя́те Митрофа́не, дарова́ти на́мъ живо́тъ вѣ́чный и ве́лію ми́лость.

Сла́ва, и ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

По 2-мъ стихосло́віи сѣда́ленъ, гла́съ 2:

Упра́вивъ па́ству твою́ до́брѣ, сло́во бла́го Пастыренача́льнику Бо́гу возда́лъ еси́, и отъ руку́ Его́ пра́ведное воздая́ніе пріи́мъ, моли́, о́тче на́шъ Митрофа́не, да блаже́ннаго въ Ца́рствѣ святы́хъ пребыва́нія, и на́съ хода́тайствомъ твои́мъ, по бога́той ми́лости Свое́й сподо́битъ.

Сла́ва, и ны́нѣ, богоро́диченъ:

Общую всѣ́хъ наде́жду, Дѣ́ву Пречи́стую, въ мольбу́ приво́димъ Ти́, Бла́же: заступи́ на́съ отъ бѣ́дъ, пода́ждь блага́я вѣ́чная и вре́менная, моле́ніемъ Честнѣ́йшія херуви́мъ, и всѣ́хъ си́лъ небе́сныхъ.

По поліеле́и сѣда́ленъ, гла́съ 8:

О всѣ́хъ сла́вныхъ, Це́ркви Святѣ́й благода́тію Бо́жіею отъ тебе́ быва́емыхъ, благода́рственная Бо́гу воздаю́ще, и Того́ боголѣ́пное снизхожде́ніе сла́вяще, мо́лимъ тя́, святи́телю Христо́въ Митрофа́не, помози́ на́мъ обрѣсти́ всѣ́мъ благода́ть и ми́лость въ Де́нь су́дный.

Сла́ва, и ны́нѣ, богоро́диченъ:

Ты́ Еди́на еси́ ко́рень дѣ́вства и неувяда́емый цвѣ́тъ чистоты́, Ты́ сте́рла еси́ главу́ змíеву, Ты́ на́съ изба́ви отъ прегрѣше́ній на́шихъ и душе́вныхъ скве́рнъ, Богоро́дице, и ко приста́нищу и́стиннаго покая́нія напра́ви.

[Степе́нна, 1-й антифо́нъ 4-го гла́са.] Проки́менъ, гла́съ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? [Вся́кое дыха́ніе да хва́литъ Го́спода.] Ева́нгеліе святи́тельское, [отъ Іоа́нна, зача́ло 36].

По 50-мъ псалмѣ́ стихи́ра, гла́съ 6:

Преподо́бне о́тче, всеблаже́нне Митрофа́не, па́стырю до́брый, уго́дниче Христо́въ усе́рдный, ско́рый на́шъ хода́таю и те́плый къ Бо́гу моли́твенниче, бу́ди на́мъ въ бѣда́хъ на́шихъ защи́тникъ и въ печа́лехъ утѣ́шитель, па́мять твою́ любо́вію почита́ющимъ.

Моли́тва: Спаси́, Бо́же, лю́ди твоя́... И про́чая.

Кано́нъ свята́го на 8, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отъ мно́гихъ зо́лъ мно́гаго уны́нія испо́лнены, къ тебѣ́ прибѣга́емъ, святи́телю Христо́въ Митрофа́не, и отъ тебе́ ско́рыя по́мощи и заступле́нія ны́нѣ тре́буемъ.

Страсте́й на́съ бра́ни смуща́ютъ, па́стырю преподо́бне, ты́ же умири́ на́съ твои́мъ благопрія́тнымъ къ Бо́гу хода́тайствомъ.

Отъ бѣ́дъ и скорбе́й на́съ, чудотво́рче святы́й, изба́вивъ, му́жественное въ добродѣ́телехъ преспѣ́яніе всѣ́мъ да́руй, да вси́ о тебѣ́, свяще́ннѣйшій Митрофа́не, ра́дуемся.

Богоро́диченъ: Моли́тву на́шу пріими́, Пречи́стая, и моли́твою Твое́ю всемо́щною изба́витися на́мъ отъ вра́гъ ви́димыхъ и неви́димыхъ, отъ грѣхо́въ же и вся́кія му́ки, моли́, Его́же родила́ еси́, Человѣколю́бца Бо́га.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Покрови́теля жи́зни на́шея и моли́твенника къ Бо́гу почита́емъ тя́, присносла́вный о́тче на́шъ Митрофа́не: на стезю́ на́съ покая́нія напра́ви, архіере́евъ красото́ и вѣ́рныхъ утвержде́ніе.

Мо́лимъ, душе́вное на́ше смуще́ніе, и тьму́ бѣсо́вскихъ наважде́ній въ на́съ разори́ти: тебѣ́ бо, свя́те, даде́ся благода́ть Свята́го Ду́ха, злы́я ду́хи прогоня́ти.

Неду́гующе тѣ́ломъ, неду́гуемъ и душе́ю, богоблаже́нне, ты́ же не оста́ви на́съ во грѣсѣ́хъ на́шихъ поги́бнути, но въ ни́хже и са́мъ я́ко человѣ́къ искуша́емь бы́лъ еси́, и на́мъ, искуша́емымъ, ны́нѣ помози́.

Богоро́диченъ: Вся́ а́нгеловъ во́инства, Предте́че Госпо́день, апо́столовъ двоенадеся́тице, святíи вси́ съ Богоро́дицею, сотвори́те моли́тву, во е́же спасти́ся на́мъ.

Сѣда́ленъ, гла́съ 2:

Во святи́тельствѣ благоче́стно пожи́лъ еси́, святи́телю богоявле́нне, лю́ди къ богоразу́мію сло́вомъ и дѣ́ломъ наста́вилъ еси́, и Бо́гу до конца́ угоди́лъ еси́. Сего́ ра́ди отъ Него́ нетлѣ́ніемъ и чудесы́, о́тче Митрофа́не, почти́лся еси́, я́ко прича́стникъ Бо́жія благода́ти.

Сла́ва, и ны́нѣ, богоро́диченъ:

Му́чениковъ, проро́ковъ, апо́столовъ, іера́рховъ, преподо́бныхъ и святы́хъ всѣ́хъ отъ вѣ́ка пра́ведныхъ похвала́ Ты́ еси́, Пречи́стая, тѣ́мже Тя́ мо́лимъ: моли́ся съ ни́ми ко Го́споду, да спасе́тъ ду́ши на́ша.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Пла́мень погаси́ въ на́съ плотски́хъ обурева́ній и нечи́стыхъ на́шихъ помышле́ній, да пла́мени гее́нскаго огня́ твои́ми моли́твами, Митрофа́не, изба́вимся.

Ду́шу и помышле́ніе къ тебѣ́ простира́емъ, святи́телю богоизбра́нне: согрѣ́й на́шу вѣ́ру и любо́вь, я́же къ Бо́гу, да зако́ну Его́ усе́рдно послѣ́дующе, пре́йдемъ по́прище на́шего спасе́нія непреткнове́нно.

Сто́лпъ крѣ́пости стяжа́вше тя́ отъ Бо́га, отъ вра́гъ ви́димыхъ и неви́димыхъ огражда́емся тобо́ю безбѣ́дно; тѣ́мже тя́ вси́ по до́лгу, Митрофа́не, ублажа́емъ.

Богоро́диченъ: Черто́же незаходи́маго Свѣ́та, Дѣ́во, нѣ́смы досто́йны черто́га небе́снаго, грѣхо́вныя ра́ди вины́; Ты́ же, Богороди́тельнице, ра́ди обнаже́ннаго на Крестѣ́ сла́дкаго Твоего́ Сы́на, и Блага́го на́шего Го́спода, покры́й сты́дъ лица́ на́шего и спаси́ на́съ.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Мо́лимъ ти ся и вопіе́мъ всеусе́рдно: испо́лни, боговдохнове́нне, весе́лія живо́тъ на́шъ, покрыва́я на́съ крѣ́пкимъ покро́вомъ защище́нія твоего́ отъ гла́да, я́звы и междоусо́бныя бра́ни, я́ко мо́жеши, о́тче, а́ще хо́щеши.

Мра́къ на́шихъ заблужде́ній и жите́йскія го́рдости свѣ́тлостію святы́хъ моли́твъ твои́хъ, Митрофа́не, прожени́, да по́мощію твое́ю грѣхо́въ оставле́ніе пріи́мше, ми́лость у Христа́ Бо́га обря́щемъ.

На одрѣ́ не́мощи и уны́нія низлежа́щу ми́, пода́ждь ру́ку по́мощи, па́стырю боговозлю́бленне, и не оста́ви мя́ лише́на бы́ти твоего́ спаси́тельнаго благода́тію Свята́го Ду́ха посѣще́нія.

Богоро́диченъ: Чистѣ́йшая еси́ па́че а́нгельскихъ чино́въ, отъ Нея́же Исто́чникъ святы́ни воплоти́ся на́съ ра́ди, да освяти́тъ естество́ человѣ́ческое, моли́твами Твои́ми, Богоро́дице, изба́ви на́съ отъ тимѣ́нія нечи́стыхъ на́шихъ дѣя́ній и неподо́бныхъ глаго́ланій.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Гра́ду твоему́ засту́пникъ бу́ди и оби́тели твоея́ храни́тель, гра́ды же и страны́ чту́щихъ любо́вію па́мять твою́, необори́мымъ моли́твъ твои́хъ предста́тельствомъ огради́, да вси́ тобо́ю, богому́дре Митрофа́не, хва́лимся.

Яко защи́тника тя́ отъ Бо́га вѣ́дуще, вла́сть на ду́сѣхъ нечи́стыхъ ве́лію иму́ща, мо́лимъ, отъ зла́го дѣ́йствія злы́хъ духо́въ на́ши ду́ши сохрани́ти безнавѣ́тны.

По до́лгу блажа́тъ тя́ вѣ́рніи, — ра́дуйся, Митрофа́не, — зову́ще: ты́ бо вои́стинну Россíйстѣй Це́ркви ра́дованіе и похвала́, Импера́тору же тя́ чту́щему на вся́ враги́ одолѣ́ніе, досточу́дне.

Богоро́диченъ: Го́ру Тя́ мы́сленную и Лѣ́ствицу Іа́ковлю проро́цы нарица́ютъ, Еюже Бо́гъ къ человѣ́комъ сни́де, поги́бшую дра́хму взыска́ти хотя́, ю́же обрѣ́тъ, па́ки къ небеси́ возво́дитъ. Тѣ́мже Тя́ вси́, я́ко Ма́терь Бо́жію, правосла́вно велича́емъ.

Конда́къ, гла́съ 8:

Воздержа́ніемъ тѣ́ло ду́ху порабо́тивъ, ду́шу же равноа́нгельну сотвори́въ, святи́тельскою одѣ́ялся еси́ оде́ждою, я́ко вѣне́цъ свяще́нства; и ны́нѣ, всѣ́хъ Влады́цѣ предстоя́, моли́, всеблаже́нне Митрофа́не, умири́ти и спасти́ ду́ши на́ша.

Икосъ:

Въ пусты́ни высото́ю смиренному́дрія, я́ко ра́йскій цвѣ́тъ, красу́яся, и на Воро́нежскія Це́ркви престо́лѣ украси́лся еси́ высо́кими удобре́ніи, прему́дре, и́бо бы́лъ еси́ іера́рхъ, о́бразъ вѣ́рнымъ сло́вомъ и житіе́мъ. Тѣ́мже и Бо́гъ, я́ко уго́дника Своего́ вознесе́ тя, нетлѣ́ніемъ и чудесы́ въ Це́ркви Свое́й прославля́я, да вси́ вѣ́рою зове́мъ ти́: ра́дуйся, Воро́нежская похвало́, Митрофа́не приснопа́мятне.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

На́съ обнови́ти хотя́ и на́шему спасе́нію, Спа́се, благопоспѣши́ти, Ты́ но́ваго Це́ркви Свое́й воздви́глъ еси́ свети́льника, Митрофа́на, къ Тебѣ́ зову́ща: отце́въ Бо́же, благослове́нъ еси́.

Человѣколю́бца Спа́са о на́съ, святи́телю Христо́въ, умоли́, разрѣши́тися на́мъ отъ прегрѣше́ній на́шихъ и душе́вныхъ скве́рнъ, да и мы́ Тому́, я́ко Всеси́льному Изба́вителю, зове́мъ: отце́въ Бо́же, благослове́нъ еси́.

Въ сла́ву Бо́жію одѣ́янный святи́тель и чудотво́рецъ на́мъ отъ Бо́га показа́лся еси́, Митрофа́не всехва́льне, да свѣ́тлостьми чуде́съ твои́хъ па́че со́лнечныхъ лу́чъ озаря́емы, зове́мъ ди́вная тобо́ю Соверша́ющему: отце́въ Бо́же, благослове́нъ еси́.

Богоро́диченъ: Вели́кая дарова́нія Тобо́ю отъ Го́спода прія́хомъ, Дѣ́во Пречи́стая, сего́ ра́ди благода́рственное пѣ́ніе прино́симъ Ти́ и зове́мъ: Благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Къ честны́мъ моще́мъ твои́мъ, я́ко къ необори́мому покро́ву, прибѣга́юще, немо́лчнаго твоего́ хода́тайства, богоно́се преподо́бне, про́симъ: ты́ же не пре́зри и́же отъ тебе́ тре́бующихъ по́мощи, но услы́ши и заступи́ всѣ́хъ, пою́щія тя́ и превознося́щихъ Христа́ во вѣ́ки.

Тѣле́сныя сла́бости и душе́вныя неду́ги си́лою моли́твъ твои́хъ благода́тно премѣня́я, премѣни́, о́тче Митрофа́не, вся́кое неможе́ніе пою́щимъ тя́ и превознося́щимъ Христа́ во вѣ́ки.

Пла́чущимъ ты́ сле́зы отира́еши, па́стырю преблаже́нне, и бѣ́дствующимъ подае́ши ру́ку спасе́нія отъ Бо́га, тѣ́мже и на́съ у престо́ла Влады́чня помяни́, вѣ́рою пою́щихъ тя́ и превознося́щихъ Христа́ во вѣ́ки.

Богоро́диченъ: Велича́емъ Твое́ тве́рдое заступле́ніе, исповѣ́дуемъ Ма́тернія Твоея́ моли́твы си́лу, благодари́мъ возвели́чившаго Тя́ Го́спода, ро́ждшагося отъ Тебе́, Богома́ти, Его́же моли́ спасти́ся душа́мъ на́шимъ.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ты́, и́же въ Дому́ Твое́мъ уго́дники Твоя́ насажда́еши, я́ко ма́слины и я́ко ке́дры, Спа́се, Митрофа́на уго́дника Твоего́ моле́ніемъ, насади́ въ на́съ добродѣ́тельное житіе́, да во вре́мя свое́ принесе́мъ Ти́ плоды́ покая́нія.

Со а́нгелы, служи́телю Святѣ́й Тро́ицѣ, Митрофа́не прему́дре, ра́дуйся, и на́мъ, вѣ́рою блажа́щимъ тя́, пода́ждь моли́твами твои́ми, о Ду́сѣ Свя́тѣ ра́доватися.

Аще и не́мощны есмы́ и премно́го согрѣша́емъ, недосто́йніи, но не отступа́емъ наде́жды мо́щнаго покро́ва твоего́, достосла́вне: ты́ же, Христу́ Бо́гу моля́ся, помози́ на́мъ обрѣсти́ всѣ́мъ съ ли́ки пра́ведныхъ стоя́ніе въ Де́нь су́дный.

На мѣ́стѣ озлобле́нія не́мощи смири́вшемуся, удиви́ моли́твъ твои́хъ си́лу, чудотво́рче святы́й, Митрофа́не, и по да́ннѣй тебѣ́ цѣле́бъ благода́ти, нездра́віе мое́ во здра́віе премѣни́.

Богоро́диченъ: Упова́ніе и ра́досте на́ша, Марíе Богоневѣ́стная, покры́й на́съ честны́мъ Твои́мъ омофо́ромъ, да хва́лимъ непреста́нно и́мя Твое́, и пое́мъ съ безпло́тными ли́ки, Тя́ велича́юще.

Свѣти́ленъ:

Свѣтоза́рна свѣти́льника вѣ́ры, [Боже́ственно и] пресла́вно отъ Свѣтонача́льныя Тро́ицы возсія́вша, и на́съ со́лнца свѣтлѣ́йше чудесы́ свои́ми просвѣти́вша, Митрофа́на, па́стыря блаже́нна, пѣ́сньми восхва́лимъ.

Богоро́диченъ: Богоро́дице Дѣ́во, ра́дуйся, отъ а́нгела ра́дость пріи́мшая; ра́дуйся, Влады́чице, и спаси́ на Тя́ упова́ющихъ.

На хвали́техъ стихи́ры, гла́съ 8:

Тѣ́сенъ пу́ть въ житіи́ твое́мъ, преподо́бне Митрофа́не, преше́лъ еси́, по́двигомъ до́брымъ въ пусты́ни подвиза́яся, и тече́ніе благо́е во святи́тельствѣ соверша́я, Бо́гу же все́ю душе́ю рабо́тая, и до конца́ угожда́я вѣ́рно, я́ко сосу́дъ богоизбра́нный. Тѣ́мъ простра́нное обрѣ́лъ еси́ воздая́ніе у пра́веднаго Мздовоздая́теля и Царя́ святы́хъ, Го́спода; Ему́же, свя́те, моли́ся, ми́ръ Россíйстѣй Це́ркви дарова́ти, и душа́мъ на́шимъ ве́лію ми́лость.

Житіе́ чи́стое, терпѣ́ніе, кро́тость, и любо́вь нелицемѣ́рну, воздержа́ніе соверше́нное, умиле́ніе боже́ственное, вѣ́ру же и наде́жду и́стинну и милосе́рдіе стяжа́въ, равноа́нгельно, Митрофа́не, на земли́ пожи́лъ еси́, и на небеси́ съ ли́ки а́нгелъ предстои́ши, съ ни́миже, свя́те, моли́ся, ми́ръ Россíйстѣй Це́ркви дарова́ти, и душа́мъ на́шимъ ве́лію ми́лость.

Боже́ственною благода́тію Свята́го Ду́ха просвѣти́вся, и по сме́рти благода́тное ми́лости мѵ́ро отъ честны́хъ твои́хъ и многоцѣле́бныхъ моще́й источа́еши. Тѣ́мъ по до́лгу о тебѣ́, Митрофа́не, ра́дуемся, и па́мять твою́ священнолѣ́пно соверша́юще, священнолѣ́пными пѣ́сньми зове́мъ ти́: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, гла́съ 6:

Благíй и вѣ́рный ра́бе, усе́рдный дѣ́лателю виногра́да Христо́ва, ты́, я́ко до́брый па́стырь, ва́ръ и тяготу́ дневну́ю поне́слъ еси́, уча́ слове́сныя о́вцы, се́рдцемъ вѣ́ровати въ пра́вду, усты́ же исповѣ́дати во спасе́ніе, тѣ́мже и Бо́гъ я́ко избра́ннаго Своего́ вознесе́ тя, и па́мять твою́, досточу́дне Митрофа́не, просла́ви. Ты́ же непреста́нно моля́ся, испроси́ Импера́тору на́шему ми́ръ и долгоде́нствіе, лю́демъ же Его́ въ добродѣ́телехъ преспѣ́яніе, и ве́лію ми́лость.

И ны́нѣ, пра́здника.
Славосло́віе вели́кое, ектеніи́ и отпу́стъ.



НА ЛИТУРГІИ,

Блаже́нна пра́здника и свята́го, пѣ́снь 6-я. Проки́менъ, гла́съ 1: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Апо́столъ къ Евре́емъ, зача́ло 318. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 58 об. - 65.

/ Къ оглавленію раздѣла /


Наверхъ / Къ титульной страницѣ

0