Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 23-й де́нь.
Свята́го благовѣ́рнаго Вели́каго Кня́зя Алекса́ндра Не́вскаго, Влади́мірскаго и Новгоро́дскаго чудотво́рца, нарече́ннаго во и́ноцѣхъ Алексíя.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1. Подо́бенъ: Всехва́льніи му́ченицы.

Земны́хъ всѣ́хъ возгнуша́вся,* къ небе́снымъ ду́хомъ прилѣпи́лъ еси́ себе́.* Тѣ́мъ, безпло́тныхъ подража́въ житіе́,* со святы́ми всѣ́ми водвори́лся еси́;* съ ни́миже, преподо́бне, Христу́ моли́ся* па́мять твою́ творя́щимъ* пода́ти ми́ръ и ве́лію ми́лость.

Благоче́стіемъ и вѣ́рою* пресвѣ́тло укра́шенъ,* я́ко благочести́въ скиптроно́сецъ, и преизря́денъ,* и преимени́тъ, Пресвяты́я Тро́ицы* побо́рникъ бы́лъ еси́;* отъ Нея́же, просвѣти́вся,* чуде́съ свѣ́тъ мíру* провозсія́лъ еси́* и моли́твенникъ яви́лся еси́ о душа́хъ на́шихъ.

Сла́ва, гла́съ 6:

Преподо́бне о́тче Алекса́ндре, изъ мла́да возлюби́въ Христа́, богоимени́тъ вѣенцено́сецъ бы́лъ еси́, преподо́біемъ и пра́вдою свѣ́тло укра́шенъ, ми́лостынями же и чистото́ю простра́нное селе́ніе бы́лъ еси́ Ду́ха Свята́го. Ему́же непреста́нно моли́ся, о е́же сохрани́ти оте́чество твое́ и гра́дъ тво́й, отъ пога́ныхъ необори́мымъ бы́ти и сыново́мъ Россíйскимъ спасти́ся.

И ны́нѣ, пра́здника, гла́съ 8:

Дави́дъ провозглаша́ше Тебѣ́, Пречи́стая, прови́дя освяще́ніе вхо́да Твоего́ въ храмъ, въ не́мже концы́, днесь пра́зднующе, славосло́вятъ Тя, Всепѣ́тая: я́же бо пре́жде Рождества́ Дѣ́ва и по Рождествѣ́ пребы́вши нетлѣ́нна, Ма́ти Сло́ва Жи́зни. Днесь въ хра́мѣ Заха́рія весели́тся, воспріе́мъ Тя, Влады́чице, и свята́я святы́хъ ра́дуются, подъе́мши Тя, исто́чника жи́зни на́шея. Тѣ́мже и мы псало́мски вопіе́мъ Ти: о насъ моли́ Сы́на Твоего́ и Бо́га на́шего дарова́ти намъ ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Свята́го Ду́ха* поспѣше́ніемъ благода́ти* Алекса́ндръ яви́ся;* тѣ́мже, ны́нѣ соше́дшеся,* тому́ воспои́мъ пѣ́снь.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, царе́й Россíйскихъ похвало́* и во́иновъ соблюде́ніе,* ва́рваровъ побѣжде́ніе,* сиро́тъ и вдо́въ засту́пниче* и гра́да на́шего утвержде́ніе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Пріими́ ны́нѣ пѣ́ніе* люде́й твои́хъ, блаже́нне,* и моля́щимся ти́* у Христа́ испроси́ отъ грѣхо́въ избавле́ніе,* да ублажа́емъ тя́ при́сно.

Сла́ва, гла́съ 8:

Богому́дре Алекса́ндре, вели́кій кня́же, блаже́нъ еси́, я́ко блаже́нство наслѣ́довалъ еси́, его́же ра́ди вся́ земна́я презрѣ́въ, неотло́жно того́ взыску́я, ни́щія удовли́лъ еси́, сиро́тъ пита́тель, плѣ́нныхъ свободи́тель бы́лъ еси́. Тѣ́мъ въ нестарѣ́емую ра́дость вше́лъ еси́ Го́спода твоего́, Ему́же со а́нгелы предстоя́, моли́ вѣ́рою пою́щимъ тя́ гобзова́ніе щедро́тъ пода́ти и грѣхо́въ оставле́ніе.

И ны́нѣ, пра́здника, гла́съ 4:

Пріиди́те, вси́ вѣ́рніи, eди́ну Непоро́чную восхва́лимъ, отъ проро́ковъ проповѣ́данную и въ хра́мъ приведе́нную, пре́жде вѣ́къ пронарече́нную Ма́терь и въ послѣ́дняя лѣ́та я́вльшуюся Богоро́дицу. Го́споди, моли́твами Eя́ ми́ръ Тво́й пода́ждь на́мъ и ве́лію ми́лость.

По трисвято́мъ тропа́рь, гла́съ 4:

Яко благочести́ваго ко́рене пречестна́я о́трасль бы́лъ еси́, блаже́нне Алекса́ндре, яви́ бо тя́ Христо́съ, я́ко нѣ́кое Боже́ственное сокро́вище Россíйстѣй земли́, но́ваго чудотво́рца, пресла́вна и богопрія́тна. И дне́сь, соше́дшеся въ па́мять твою́ вѣ́рою и любо́вію, во псалмѣ́хъ и пѣ́ніихъ ра́дующеся, сла́вимъ Го́спода, да́вшаго тебѣ́ благода́ть исцѣле́ній. Его́же моли́ спасти́ гра́дъ се́й, и держа́вѣ сро́дникъ твои́хъ богоуго́днѣй бы́ти, и сыново́мъ Россíйскимъ спасти́ся.

Сла́ва, и ны́нѣ, пра́здника, гла́съ то́йже:

Дне́сь благоволе́нія Бо́жія предображе́ніе и человѣ́ковъ спасе́нія проповѣ́даніе въ хра́мѣ Бо́жіи я́сно Дѣ́ва явля́ется и Христа́ всѣмъ предвозвеща́етъ. Той и мы велегла́сно возопіи́мъ: ра́дуйся, смотре́нія Зижди́телева исполне́ніе.

Та́же, ектенія́ ма́лая: Поми́луй на́съ, Бо́же... И отпу́стъ.



НА ВЕЛИЦѢЙ ВЕЧЕРНИ,
Стихосло́вимъ: Блаже́нъ му́жъ.., 1-й антифо́нъ. На Го́споди воззва́хъ.., стихи́ры на 8: пра́здника 3 и Алекса́ндра 5.
Стихи́ры Алекса́ндра, гла́съ 2. Подо́бенъ: Кíими похва́льными.

Кíими похва́льными вѣнцы́ вѣнча́емъ блаже́ннаго Алекса́ндра? Царе́й благочести́выхъ держа́ву и князе́й правосла́вныхъ похвалу́, ди́внаго въ чудесѣ́хъ, безпло́тныхъ сожи́теля, исто́чника Боже́ственныхъ исцѣле́ній неисчерпа́емаго, рѣку́ чуде́съ мно́гихъ, проли́тіе дарова́ній духо́вныхъ, Его́же ра́ди Христо́съ земли́ Россíйстѣй да́руетъ ми́ръ и ве́лію ми́лость. [Два́жды.]

Кíими похва́льными вѣнцы́ увязе́мъ блаже́ннаго Алекса́ндра? Благоче́стія управле́ніе, ерети́ческихъ уче́ній обличе́ніе, Це́ркве свѣ́тлое украше́ніе, врача́ прему́драго и богопрія́тна, исцѣля́юща неду́ги и болѣ́зни на́ша. Его́же ра́ди враго́въ шата́нія Христо́съ низложи́, имѣ́яй ве́лію ми́лость.

Кíими смире́нными устна́ми воспое́мъ Алекса́ндра прему́драго? Со́лнца пресвѣ́тлаго, Всечестны́я Тро́ицы моли́твенника, печа́льныхъ утѣше́ніе и отча́янныхъ засту́пника, похвалу́ земли́ Россíйскія, рѣку́ ми́лости вои́стинну и больны́хъ врача́ безме́здна, смире́нія Христо́ва подража́теля, подаю́щаго на́мъ ве́лію ми́лость.

Кíими духо́вными пѣ́сньми воспое́мъ пресла́внаго? Свѣти́льника незаходи́маго Со́лнца мы́сленнаго, пра́вды пра́вило, весе́ліе земли́ Россíйскія, крѣ́пость гра́да на́шего и забра́ло, сиро́тъ пита́теля, оби́димыхъ засту́пника, столпа́ пресвѣ́тлаго, просвѣща́ющаго на́съ чуде́съ свѣтлостьми́ и подаю́ща ве́лію ми́лость.

Сла́ва, гла́съ 6:

Вся́къ гра́дъ и страна́, сла́вному гра́ду на́шему сра́дуйтеся и псало́мски восплещи́те рука́ми вку́пѣ, духо́вно торжество́ дне́сь пра́зднующе: се́ у́бо ди́вный на́шъ вра́чь и спаси́тель, Алекса́ндръ вели́кій, небе́снаго врачевства́ цѣльбы́ предлага́етъ и къ непреста́ннымъ цѣльба́мъ ти́хо созыва́етъ не хи́тростьми человѣ́ческими, не обвяза́ніемъ, но дѣ́йствомъ Свята́го Ду́ха, душе́вное и тѣле́сное исцѣле́ніе па́че естества́ подава́я. Его́же и пріе́млюще дово́льно, вся́къ ро́дъ и во́зрастъ сла́вимъ Христа́ Бо́га, подаю́щаго на́мъ его́ ра́ди ве́лію ми́лость.

И ны́нѣ, пра́здника, гла́съ 8:

По рождествѣ́ Твое́мъ, Богоневѣ́сто Влады́чице, пришла́ eси́ въ хра́мъ Госпо́день воспита́тися во свята́я святы́хъ, я́ко освяще́нна; тогда́ и Гавріи́лъ по́сланъ бы́сть къ Тебѣ́, Всенепоро́чнѣй, пи́щу Тебѣ́ принося́. Небе́сная вся удиви́шася, зря́ще Ду́ха Свята́го, въ Тя все́льшася. Тѣ́мже, Пречи́стая и Нескве́рная, я́же на небеси́ и на земли́ сла́вима, Ма́ти Бо́жія, спаси́ ро́дъ на́шъ.

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 3:

Земля́ на́ша и страна́, блаже́нне, чудеса́ твоя́ возвѣща́ютъ и воспѣва́ютъ у́бо всю́ду: Христо́съ бо тя́ на́мъ свѣти́льника показа́, просвѣща́юща ду́ши на́ша.

Гла́съ 4:

Ца́ріе и кня́зи, вку́пѣ бога́тіи и убо́зіи, ра́дуйтеся, свѣ́тлое дне́сь торжество́ пра́зднующе о́бщаго засту́пника, блаже́ннаго Алекса́ндра: воспѣва́йте у́бо, и́стинніи безмо́лвницы и простíи лю́діе, о́бщаго предста́теля, и помо́щника, и моле́бника о душа́хъ на́шихъ.

Гла́съ 5:

Богопрія́тне и преподо́бне Алексíе, отъ ложе́снъ поро́дъ свя́тъ Бо́гу нарече́нъ еси́, благи́ми дѣ́лы свѣ́тло украси́лся еси́, ми́лостынями и чистото́ю сосу́дъ Свята́го Ду́ха бы́лъ еси́, Имже дѣ́йствуеши пресла́вная чудеса́ съ вѣ́рою приходя́щимъ ко свято́му твоему́ гро́бу.

Боговѣнча́нный Алекса́ндре, царе́й держа́ва свѣтоно́сная, князе́й похвала́ велехва́льная, христіа́нъ побо́рниче непобѣ́дный, о ни́хже, жи́въ сы́й, ду́шу твою́ полага́лъ еси́, си́це и по сме́рти неотсту́пно оте́чество твое́ сохраня́й, сро́днику твоему́ Импера́тору на́шему [и́мярекъ] на ага́ряны моли́твами твои́ми спосо́бствуя.

Богому́дре Алекса́ндре преподо́бне, егда́ ре́вностію Бо́жіею разже́гся, въ зе́млю ше́ствовати невѣ́дущихъ Бо́га не отрица́лся еси́ и та́мо прише́ствіемъ твои́мъ безбо́жнаго царя́ удиви́лъ еси́, христоимени́тымъ же лю́демъ тишину́ исхода́тайствовалъ еси́. Тѣ́мъ и дне́сь къ Бо́гу хода́тайствуй о на́съ, да уще́дритъ ны́ въ де́нь су́дный.

Сла́ва, гла́съ 2:

Пріиди́те, христоимени́тіи собо́ри, богопочте́ніи ца́ріе и кня́зи, ку́пно же со святи́тели и христолюби́вое мно́жество, свѣ́тло соста́вльше, псало́мскую пѣ́снь боже́ственному сему́ вѣнцено́сцу Алекса́ндру принесе́мъ, реку́ще: ра́дуйся, Тро́ицы побо́рниче великоимени́тый; ра́дуйся, крестоно́сныхъ царе́й похвало́ боговѣнча́нная; ра́дуйся, христіа́нъ ро́гъ богоно́сный, о ни́хже Христу́ моля́ся, не оскудѣ́й дарова́ти ми́ръ и ве́лію ми́лость.

И ны́нѣ, пра́здника, гла́съ 5:

Возсія́ де́нь ра́достенъ и пра́здникъ всече́стенъ: дне́сь бо я́же пре́жде Рождества́ и по Рождествѣ́ Дѣ́ва пребы́вши, въ хра́мъ Госпо́день приво́дится, и ра́дуется Заха́рія ста́рецъ, роди́тель Предте́чевъ, и вопіе́тъ ве́село: прибли́жися, Предста́тельница скорбя́щихъ, въ хра́мъ святы́й, я́ко Свята́, освяти́тися во оби́телище Всецаря́. Да весели́тся Іоаки́мъ пра́oтецъ, и Анна да ра́дуется, я́ко принесо́ша Бо́гу я́ко трилѣ́тствующую Юницу непоро́чную Влады́чицу. Ма́тeри, сра́дуйтеся, дѣ́вы, взыгра́йте, и непло́ды, сликовству́йте, я́ко отве́рзе на́мъ небе́сное Ца́рство пронарече́нная Всецари́ца, ра́дуйтеся, лю́діе, и весели́теся.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Яко ве́ліе со́лнце,* яви́лся еси́, блаже́нне, вселе́ннѣй,* чудесы́ стра́шными просвѣща́я ве́сь мíръ.* Тѣ́мъ вси́, соше́дшеся,* Христа́ воспои́мъ, спаса́ющаго ны́ отъ бѣ́дъ* моли́твами твои́ми.

Сти́хъ: Честна́ предъ Го́сподемъ* сме́рть преподо́бныхъ Его́.

Свѣ́томъ сія́я Боже́ственныя благода́ти,* и чудодѣ́йствуеши непреста́нно.* И ны́нѣ моли́ Христа́ Бо́га,* блаже́нне Алекса́ндре,* изба́вити отъ бѣ́дъ ду́ши на́ша.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Не отъ Ри́ма возсія́лъ еси́,* ни отъ Сіо́на, богому́дре,* но въ Россíйстѣй земли́ яви́лся еси́,* чудотво́рецъ пресла́венъ,* исцѣле́ніе подава́я неоску́дно* всѣ́мъ, приходя́щимъ съ вѣ́рою.

Сла́ва, гла́съ 1. Самогла́сенъ:

Ра́дуйся и весели́ся, гра́де Влади́міре, и свѣ́тло торжеству́й, и лику́й Христо́ва Це́рковь, въ не́йже положено́ честно́е тѣ́ло блаже́ннаго Алекса́ндра, тѣ́ло драго́е, тѣ́ло пресла́вное, тѣ́ло, чудеса́ точа́щее всѣ́мъ, приходя́щимъ съ вѣ́рою. Пріиди́те, вси́ лю́діе, пріиди́те, вѣ́рніи, поклони́мся, тецы́те и собери́теся, и псало́мски того́ воспои́мъ, ра́дующеся, и облобыза́емъ че́стно мо́щи ди́внаго врача́ на́шего, печа́льныхъ при́сную утѣ́ху и отча́янныхъ наде́жду, похвалу́ земли́ Россíйстѣй, посо́бника на враги́ Благочести́вому Импера́тору, и всѣ́мъ человѣ́комъ засту́пника, и моли́твенника о спасе́ніи ду́шъ на́шихъ.

И ны́нѣ, пра́здника, гла́съ 6:

Дне́сь собо́ри вѣ́рныхъ, соше́дшеся, духо́внѣ да торжеству́имъ и Богоoтрокови́цу Дѣ́ву и Богоро́дицу, въ хра́мъ Госпо́день приводи́му, благоче́стно восхва́лимъ, предъизбра́нну отъ всѣ́хъ родо́въ, во оби́телище всѣ́хъ Царя́ Христа́ и Бо́га: дѣ́вы, свѣщи́ нося́ще, предъиди́те, Приснодѣ́вы чту́ще честно́е происхожде́ніе, ма́тeри, печа́ль всю́ отложи́вше, ра́достно спослѣ́дствуйте Ма́тери Бо́га быва́ющей и ра́дости мíра Хода́таицѣ. Вси́ у́бо ра́достно, е́же — ра́дуйся, — со а́нгеломъ возопіи́мъ Обра́дованнѣй, при́сно моля́щейся о душа́хъ на́шихъ.

На благослове́ніи хлѣ́бовъ: Тропа́рь свята́го, два́жды. И пра́здника, еди́ножды.
Аще нѣ́сть бдѣ́нія, глаго́лемъ тропа́рь свята́го, еди́ножды. Сла́ва, и ны́нѣ, пра́здника. [Пи́саны на ма́лѣй вече́рни.]



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Ра́дуйся, я́ко вторы́й Ѳессало́нь въ Россíйстѣй земли́, сла́вный гра́де Влади́міре, и любе́зными пѣ́сньми вку́пѣ лику́й, Боже́ственная це́рковь, въ не́йже пречестно́е тѣ́ло Алекса́ндра, прему́драго, блаже́ннаго подае́тъ разли́чно всѣ́мъ исцѣле́ніе. И сего́ ра́ди возопіи́мъ къ нему́: моли́твами твои́ми, блаже́нне, исцѣли́ неду́ги и болѣ́зни на́ша и вся́ческихъ изба́ви искуше́ній вѣ́рою и любо́вію па́мять твою́ восхваля́ющихъ. [Два́жды.]

Сла́ва, и ны́нѣ, пра́здника, гла́съ 1. Подо́бенъ: Ка́мени запеча́тану.

Свята́я святы́хъ, Богоро́дице, су́щи, досто́йно приведе́ся жи́ти во свята́я, я́ко одушевле́нъ Госпо́день киво́тъ и Свята́го Ду́ха и́стинно вмѣсти́лище Боже́ственное, Дѣ́во Ма́ти. Тѣ́мже всели́ся въ Тя́, Иже Отцу́ единоро́дный и Свято́му Ду́ху соесте́ственный, Тво́й Сы́нъ неискусому́жно, обоготвори́въ все́ человѣ́чество.

По 2-й каѳи́смѣ сѣда́ленъ, гла́съ 3. Подо́бенъ: Красотѣ́ дѣ́вства.

Благода́рно зове́мъ вси́ Христо́ву уго́днику ми́лостивому, незло́бивому и кро́ткому, прилѣ́жно моля́щеся любо́вію: разруши́ бра́нь страсте́й на́шихъ, и отжени́ де́монская мечта́нія, блаже́нне, и моли́ Христа́ Бо́га дарова́ти на́мъ ве́лію ми́лость. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Яви́лся еси́ дне́сь.

Весе́лія дне́сь вселе́нная испо́лнися вся́ въ благознамени́томъ пра́здницѣ Богоро́дицы, зову́щи: Та́ е́сть сѣ́нь небе́сная.

[Велича́ніе:

Велича́емъ тя́, святы́й благовѣ́рный кня́же Алекса́ндре, и чте́мъ святу́ю па́мять твою́, ты́ бо мо́лиши о на́съ Христа́ Бо́га на́шего.

Псало́мъ избра́нный: Воскли́кните Го́сподеви, вся́ земля́...]

По поліеле́и сѣда́ленъ, гла́съ 8. Подо́бенъ: Прему́дрости.

Ду́хъ Святы́й тя́, блаже́нне, наста́ви оте́чествіе твое́ па́ствити на па́житехъ спаси́тельныхъ, и Христо́съ свѣти́льника тя́ я́вѣ показа́: сего́ ра́ди лику́й и весели́ся со дерзнове́ніемъ, я́ко сугу́быя вѣнцы́ отъ Вѣнцеда́вца пріи́мъ. [Два́жды.]

Сла́ва, и ны́нѣ, пра́здника:

Пре́жде зача́тія, Чи́стая, освяти́лася еси́ Бо́гу и, ро́ждшися на земли́, да́ръ принесла́ся еси́ ны́нѣ Ему́, исполня́ющи оте́ческое обѣща́ніе: въ Боже́ственнѣмъ же хра́мѣ, я́ко су́що Боже́ственный хра́мъ, отъ младе́нства чи́стѣ, со свѣща́ми свѣ́тлыми отдана́ бы́вши, яви́лася еси́ Прія́телище Непристу́пнаго и Боже́ственнаго Свѣ́та. Вели́ко вои́стинну предше́ствіе Твое́, еди́на Богоневѣ́сто и Приснодѣ́во.

Аще ли кто́ изво́литъ пѣ́ти по́слѣ отда́нія пра́здника Святы́я Богоро́дицы, глаго́летъ по сѣда́льнахъ, Сла́ва, и ны́нѣ, богоро́дичны сія́:

По 1-мъ сѣда́льнѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́вою пребыва́етъ.

По 2-мъ сѣда́льнѣ, богоро́диченъ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная.

По поліеле́и, богоро́диченъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся, и Младе́нецъ бы́сть, пре́жде вѣ́къ Сы́й Бо́гъ на́шъ: ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра самогла́сна, гла́съ 6:

Пріиди́те, вси́ лю́діе, хвалу́ принесе́мъ блаже́нному, вопію́ще си́це: ра́дуйся, пресвѣ́тлый сто́лпе, просвѣща́я на́съ чуде́съ свѣтлостьми́; ра́дуйся, ро́сный о́блаче, пла́мень погаша́яй страсте́й и ороша́яй вѣ́рныхъ мы́сли, боже́ственный Алекса́ндре.

Кано́нъ пра́здника со ирмосо́мъ на 6: И свято́му два́ кано́на, на 8.
Аще ли внѣ́ попра́зднства изво́литъ настоя́тель пѣ́ти благовѣ́рному кня́зю Алекса́ндру, пое́мъ кано́нъ Богоро́дицѣ со ирмосо́мъ на 6, гласъ 2: Нетре́ну, необы́чну...

Кано́нъ Алекса́ндру, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пріи́мша въ свое́мъ се́рдцы, Бла́же, Твою́ благода́ть духо́вную тве́рдо прему́драго повелѣ́нія и въ ду́ши благочести́выхъ вложи́вшаго, похвала́ми да́ждь ублажи́ти Алекса́ндра пресла́внаго.

Свѣти́льниче многосвѣ́тлый Россíйскія земли́, чудесы́, я́коже со́лнце второ́е, сія́я, всѣ́хъ на́съ помина́й, соверша́ющихъ па́мять твою́, Алекса́ндре блаже́нне.

Це́ркве бы́лъ еси́ Христо́вы красота́, блаже́нне, пѣ́ніемъ бо сію́ украси́лъ еси́, пресла́вне. И ны́нѣ мо́лимъ тя́: свободи́ ны отъ вся́кія бра́ни бори́теля, пою́щія тя́, Алекса́ндре.

Богоро́диченъ: Ра́дуйся, благода́ти исто́чниче; ра́дуйся, лѣ́ствице и две́рь небе́сная; ра́дуйся, свѣти́льниче, и ста́мно злата́я, и горо́ несѣко́мая, Дѣ́во, Жизнода́вца Христа́ мíру ро́ждшая.

Другíй кано́нъ свято́му, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Досто́йными похвала́ми воспѣ́ти пресла́внаго чудотво́рца у́мъ и смы́слъ да́руй ми́, Христе́ Бо́же, я́ко да воспою́, ра́дуяся, па́мять его́.

Пѣ́сньми и пѣ́ньми духо́вными восхва́лимъ блаже́ннаго, и честну́ю его́ и многоцѣле́бную ра́ку, обстоя́ще, любе́зно облобыза́емъ, и си́це вопіе́мъ: ра́дуйся, оте́честву твоему́ пресвѣ́тлый свѣти́льниче.

Богому́дре Алекса́ндре, а́ще тя́ и напослѣ́докъ лѣ́тъ новопросвѣще́нная Россíйская страна́ возрасти́, но дре́внихъ че́сти сподо́бился еси́, дарова́ніе чуде́съ досто́йно пріе́мъ.

Богоро́диченъ: Зако́нъ кромѣ́ есте́ственныхъ, Дѣ́во, родила́ еси́ Законода́вца Бо́га, Человѣ́ка бы́вша: Того́, я́ко бла́га, моли́, Всенепоро́чная, на́ша беззако́нія презрѣ́ти.

Катава́сія: Христо́съ ражда́ется...

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Во ве́сь мíръ про́йде сла́ва чуде́съ твои́хъ, блаже́нне, и́миже просвѣти́лъ еси́ вселе́нную, отъ всѣ́хъ напа́стей избавля́я при́сно.

Благочести́ваго и вѣнцено́снаго Алекса́ндра, соше́дшеся, по достоя́нію восхва́лимъ, я́ко чуде́съ пода́теля оби́льнаго и Го́споду моля́щася о всѣ́хъ на́съ.

Исто́чникъ чуде́съ гро́бъ тво́й яви́ся неисчерпа́емый, отъ него́же рѣ́ки исцѣле́ній излива́еши вѣ́рно па́мять твою́ творя́щимъ, блаже́нне.

Богоро́диченъ: Ты́ еди́на на земли́ преесте́ственныхъ благи́хъ Хода́таица, Ма́ти Бо́жія, была́ еси́: тѣ́мъ Ти́, ра́дуйся, зове́мъ.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Свѣти́льникъ свѣ́та яви́лся еси́, Алекса́ндре боже́ственный, неду́говъ глубо́кую тму́ разруша́я всегда́ заре́ю свѣ́тлою чуде́съ, прему́дре.

Престо́лу предстои́ши благода́ти, со всѣ́ми а́нгелы ра́дуяся дне́сь и мíру исцѣле́нія раздава́я бога́тство, спаси́ всѣ́хъ на́съ моли́твами твои́ми, блаже́нне.

Житія́ твоего́ свѣ́тлость, преподо́бне, всѣ́мъ Бо́гъ я́вѣ показа́ возжже́ніемъ свѣщи́ у гро́ба твоего́. Тѣ́мже прибѣга́ющіи къ тебѣ́ съ вѣ́рою, вси́ просвѣща́ются.

Богоро́диченъ: Яко вои́стинну Госпо́дь воцари́ся въ Ца́рствіе неотпа́дающее и облече́ся псало́мски изъ Тебе́, Богома́ти, въ кра́сное благолѣ́піе, пло́ть святу́ю, е́юже сме́рть прія́тъ и разруши́ ея́ ца́рство.

Сѣда́ленъ, гла́съ 8:

Яко звѣзда́ многосвѣ́тлая, отъ восто́ка произше́дъ, яви́лся еси́ свѣ́тлаго ра́ди житія́ твоего́ и чистоты́ душе́вныя и тѣле́сныя сосу́дъ Свята́го Ду́ха; и сего́ ра́ди по успе́ніи твое́мъ отъ мно́гихъ лѣ́тъ во гро́бѣ нетлѣ́нны обрѣто́шася святы́я твоя мо́щи, отъ ни́хже источа́еши рѣ́ки чуде́съ исцѣле́ній вѣ́рно зову́щимъ ти́: ра́дуйся, благовѣ́рный вели́кій кня́же Алекса́ндре. [Два́жды.]

Сла́ва и ны́нѣ, пра́здника, гла́съ 4:

Непоро́чная Агница и нескве́рный черто́гъ, въ домъ Бо́жій Богоро́дица Маріа́мъ съ весе́ліемъ вво́дится пресла́вно, Юже а́нгели Бо́жіи дорино́сятъ вѣ́рно, и вси́ вѣ́рніи блажа́тъ при́сно и благода́рственно пою́тъ Ей непреста́нно ве́ліимъ гла́сомъ: на́ша сла́ва и спасе́ніе Ты́ еси́, Всенепоро́чная.

Аще ли нѣ́сть попра́зднства, глаго́лемъ: Сла́ва, и ны́нѣ, богоро́диченъ:

Яко Всенепоро́чная Невѣ́ста Творцу́, [я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми].

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Кто́ любо́вь твою́ и ми́лость ко всѣ́мъ человѣ́комъ, па́че же къ ни́щимъ изглаго́летъ? и по сме́рти у́бо, я́ко жи́въ, просте́рлъ еси́ ру́ку твою́ и прія́лъ еси́ отъ іера́рха сви́токъ грѣхо́въ проще́нія.

Дне́сь де́нь свята́го пра́зднственный мно́гія созыва́етъ на весе́ліе духо́вное, и трапе́зу, и пи́щу нетлѣ́нныя жи́зни Боже́ственнаго наслажде́нія.

Къ Боже́ственному свѣ́ту ны́нѣ преста́вился еси́, свѣ́та сы́нъ возлю́бленъ бы́въ, въ ра́дости и красотѣ́ съ ли́ки а́нгельскими ны́нѣ ра́достно лику́еши, блаже́нне.

Богоро́диченъ: Свѣ́та Твоего́ блиста́ньми озари́, Отрокови́це Всенепоро́чная, е́же въ нощи́ страсте́й искуше́ніи одержи́мое се́рдце мое́, пра́вды Со́лнце свѣ́тъ возсія́вши.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Заре́ю Трисо́лнечныя благода́ти сія́я, свѣ́тлѣ тво́й пра́здникъ творя́щихъ озари́ и стра́стнаго омраче́нія де́монскаго изба́ви, Алекса́ндре пресла́вне.

Источи́лъ еси́ рѣ́ки чуде́съ, блаже́нне, вѣ́рныхъ напая́ющія сердца́ и му́тныя во́ды многобо́жія изсуша́ющія.

Ца́ріе, и кня́зи, и свяще́нницы, и вельмо́жи, и ста́рцы со ю́нотами, и ве́сь во́зрастъ, свѣ́тло предъигра́йте и па́мять блаже́ннаго въ пѣ́снехъ возвели́чите.

Богоро́диченъ: Имѣ́ю Тя́ помо́щницу и не постыжду́ся, Пречи́стая Ма́ти Бо́жія, имѣ́ю Тя́ предста́тельницу и вра́гъ мои́хъ не убою́ся.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Досточу́дная и пресла́вная па́мять твоя́ возсія́ въ Россíйстѣй земли́, блаже́нне, и ра́достно вѣ́рныхъ весели́тъ собо́ры.

Отверзо́шася тебѣ́ две́ри Еде́мскія, и несказа́ненъ свѣ́тъ и трисія́ненъ возсія́, блаже́нне, въ неподви́жнѣмъ Ца́рствіи небе́снѣмъ, и пра́ведныхъ весе́ліе прія́лъ еси́ ра́дуяся.

Ны́нѣ Алекса́ндръ вели́кій, сиро́тъ и вдо́въ ми́лостивый печа́льникъ, оте́чествіе свое́ и вся́ вку́пѣ я́вѣ созыва́етъ: пріиди́те, собра́вшеся, я́ко о́бщему засту́пнику свѣ́тло торжеству́емъ.

Богоро́диченъ: Сы́й въ зра́цѣ Бо́жіи, Пребоже́ственный всели́ся во чре́во Твое́, въ зра́къ мо́й облече́ся Госпо́дь, Пренепоро́чная.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Прія́лъ еси́ исцѣле́ній благода́ть, Алекса́ндре сла́вне, су́щимъ въ бѣда́хъ подава́еши здра́віе твои́мъ заступле́ніемъ; тѣ́мъ ра́тныхъ де́рзость низложи́ и мíру подава́й чудеса́.

Яко звѣзда́ свѣтла́ яви́ся непреле́стная, плѣне́нныхъ свободи́тель, и ни́щихъ богати́тель, и боля́щихъ вра́чь, царе́й побо́рникъ и гра́да на́шего утвержде́ніе.

Яви́ся въ Россíйстѣй земли́ чудотво́рецъ, пресла́венъ Алекса́ндръ блаже́нный, я́ко всесвѣ́телъ свѣти́льникъ сія́я во все́мъ мíрѣ и во мра́цѣ страсте́й озаря́я вся́.

Богоро́диченъ: Ме́ртвости и тли́ изба́вила еси́ человѣ́чество, естество́мъ бо Жизнода́вца и Бо́га безъ сѣ́мене родила́ еси́, Дѣ́во Всенепоро́чная, на благодѣя́ніе восхваля́ющихъ Тя́ вѣ́рно.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Твоя́ свята́я па́мять, Алекса́ндре, вселе́нную весели́тъ, созыва́ющи вѣ́рныя въ честны́й хра́мъ тво́й, въ не́мже ны́нѣ ра́достію совоку́пльшеся, тя́ мо́лимъ: язы́ческаго наше́ствія изба́ви лю́ди твоя́, пресла́вне.

Весе́лія дне́сь вся́ испо́лнися Россíйская земля́, въ наро́читый де́нь пра́здника пресла́внаго чудотво́рца, Алекса́ндра блаже́ннаго: соблюда́етъ бо оте́чество свое́ вы́ну ненавѣ́тно.

Сиро́тъ и вдо́въ засту́пника и въ бѣда́хъ непобори́маго помо́щника, пѣ́сньми Алекса́ндра ублажи́мъ, сла́вяще: пра́зднующихъ бо па́мять его́ ве́село отъ бѣ́дъ избавля́етъ и скорбе́й.

Богоро́диченъ: Святы́й Іису́съ всели́ся во утро́бу Твою́, во святы́хъ, Дѣ́во, почива́яй и прославля́яй вѣ́рою и́стинною сего́, Отрокови́це, сла́вящія.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Отъ пречестна́го ко́рене изра́слъ еси́ вѣ́твь, пресла́вне, и благоче́стно на земли́ пожи́лъ еси́, и прія́телище чи́сто Ду́ха яви́лся еси́, освяща́я вѣ́рою притека́ющія ти́, блаже́нне.

Добродѣ́телемъ поло́жника и благочести́вымъ князе́мъ удобре́ніе, Це́рковь сла́витъ тя́ и воспѣва́етъ, блаже́нне: моли́твами твои́ми пода́ждь чту́щимъ любо́вію до́блести твоя́ и боре́нія лю́тыхъ прегрѣше́ній оставле́ніе.

Иже въ бѣда́хъ и въ ско́рбехъ су́щіи, къ ра́цѣ твое́й притека́юще, пріе́млютъ честна́я дарова́нія, отъ въ тебѣ́ живу́щія благода́ти: ты́ бо мíру при́сно источа́еши исцѣле́ніе.

Богоро́диченъ: Су́щи Пресвяты́й хра́мъ, Богоро́дице, Исто́чникъ родила́ еси́, Пренепоро́чная, неисчерпа́емый, Влады́чице.

Конда́къ, гла́съ 8. Подо́бенъ: Яко нача́тки.

Яко звѣзду́ тя́ пресвѣ́тлу, почита́емъ, отъ восто́ка возсія́вшую и на за́падъ прише́дшую: всю́ бо страну́ сію́ чудесы́ и добро́тою обогаща́еши и просвѣща́еши вѣ́рою чту́щія па́мять твою́, Алекса́ндре блаже́нне. Сего́ ра́ди дне́сь пра́зднуемъ твое́ успе́ніе, лю́діе твои́ су́щіи: моли́ спасти́ оте́чество твое́, и держа́ву Правосла́внаго Импера́тора на́шего [и́мярекъ] и вся́ притека́ющія къ ра́цѣ моще́й твои́хъ и вѣ́рно вопію́щія ти́: ра́дуйся, гра́ду на́шему утвержде́ніе.

Икосъ:

Ве́лій чудотво́рецъ яви́лся еси́ Россíйскія земли́, блаже́нный Алекса́ндре, неви́димо Христо́вы лю́ди посѣща́я и исцѣле́нія подава́я бога́тно всѣ́мъ отъ души́ приходя́щимъ и согла́сно вопію́щимъ си́це: ра́дуйся, сто́лпе пресвѣ́тлый, просвѣща́я на́съ чуде́съ свѣтлостьми́; ра́дуйся, велехва́льнаго краля́ побѣди́вый посо́біемъ Бо́жіимъ; ра́дуйся, свободи́вый гра́дъ Пско́въ отъ невѣ́рныхъ; ра́дуйся, лати́нская уче́нія презрѣ́вый и пре́лесть и́хъ въ ничто́же вмѣни́вый; ра́дуйся, я́ко воспрія́лъ еси́ въ тлѣ́нныхъ мѣ́сто нетлѣ́нная; ра́дуйся, Свѣ́та Непристу́пнаго зри́телю; ра́дуйся, я́ко лику́еши со а́нгелы; ра́дуйся, о́блаче ро́сный, вѣ́рныхъ мы́сли ороша́яй; ра́дуйся, те́мныхъ страсте́й прогони́телю; ра́дуйся, Россíйстѣй земли́ засту́пниче; ра́дуйся, Благовѣ́рному Импера́тору помо́щниче, ра́дуйся, гра́ду на́шему заступле́ніе.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Дне́сь Це́рковь Христо́ва, пра́зднующи Алекса́ндрово торжество́, бы́вшее о Бо́зѣ, соше́дшимся вои́стинну источа́етъ исцѣле́ніе, прилѣ́жно моля́щимся и любо́вію пою́щимъ его́.

Во всѣ́хъ страна́хъ произы́де вѣща́ніе: я́ко на́шего гра́да яви́ся чудотво́рецъ пресла́венъ, источа́я исцѣле́ній мно́жество, всѣ́мъ прося́щимъ те́плѣ.

Дне́сь весе́лія исполня́ется хра́мъ Бо́га на́шего, въ не́мже лежа́тъ честны́я мо́щи блаже́ннаго, и вси́ притека́ющіи облобыза́ютъ со стра́хомъ святу́ю ра́ку пресла́внаго и пріе́млютъ исцѣле́ніе.

Богоро́диченъ: Вы́шняго освяще́нное Бо́жіе селе́ніе, ра́дуйся, Тобо́ю бо даде́ся ра́дость, Богоро́дице, вопію́щимъ Ти́: благослове́на Ты́ въ жена́хъ еси́, Всенепоро́чная Влады́чице.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Яко звѣзда́, сія́я красно́, блаже́нне, заре́ю добродѣ́телей и мно́гимъ бы́сть просвѣще́ніе. Тѣ́мъ и на́съ просвѣти́, вопію́щихъ ти́: ра́дуйся, Алекса́ндре благоче́стне.

Ны́нѣ, сте́кшеся отъ всѣ́хъ стра́нъ и градо́въ, свяще́нницы, и кня́зи, и вельмо́жи, бога́тіи, и убо́зіи и вку́пѣ вси́, ра́дующеся, хвалу́ воздади́мъ Христу́ и уго́днику Его́, Алекса́ндру пресла́вному.

Чудесы́ у́бо твои́ми, я́ко цвѣ́тъ, процвѣ́лъ еси́, блаже́нне, и исцѣле́нія подава́еши притека́ющимъ въ кро́въ тво́й, му́дре и досточу́дне.

Богоро́диченъ: Отъ дѣ́вственныхъ ложе́снъ Твои́хъ вопло́щся Бо́гъ, и яви́ся на спасе́ніе на́ше. Тѣ́мже Тя́ Ма́терь вѣ́дуще, Богоро́дице, правовѣ́рно вопіе́мъ Ему́: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ангельстіи чи́ни хва́лятъ тя́, пресла́вне, и человѣ́честіи ро́ди пою́тъ непреста́нно, творя́ще вѣ́рно па́мять твою́, Алекса́ндре великоимени́те.

Тебе́ въ чудесѣ́хъ сла́вна Россíйскимъ страна́мъ показа́ Бо́гъ, Алекса́ндре, и украси́ тя небе́сными дарми́: Того́ моли́ поми́ловати всѣ́хъ на́съ.

Побѣ́ды истинноимени́тъ, вои́стинну вѣ́рнымъ лю́демъ въ бѣда́хъ и крѣ́покъ помо́щникъ яви́лся еси́, Алекса́ндре блаже́нне.

Богоро́диченъ: Свяще́нный Тя́ проро́къ благообра́зно проповѣ́да, Две́рь, и Го́ру, и Сѣ́нь, и Зе́млю святу́ю, и Облакъ свѣ́та, изъ Него́же во тмѣ́ су́щимъ возсія́ Со́лнце, Дѣ́во, еди́нъ Свѣтода́вецъ.

Инъ.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Яко у́тро, я́ко де́нь свѣ́тлый, тво́й пра́здникъ яви́ся, просвѣща́я на́ша сердца́ и всѣ́хъ, съ вѣ́рою восхваля́ющихъ тя́, Алекса́ндре пресла́вне.

Де́нь спасе́нія и пра́здникъ весе́лія наста́, стеце́мся, вѣ́рніи, очи́стивше вку́пѣ ду́ши и тѣлеса́: се́ бо на́съ призыва́етъ Алекса́ндръ боже́ственный.

Струя́ происхо́дитъ отъ ра́ки твоея́, Алекса́ндре, исцѣле́ній вся́ческихъ, и омыва́етъ скве́рны страсте́й, и гное́нія лю́тыхъ очища́етъ, и всѣ́хъ вѣ́рныхъ напая́етъ сердца́, любо́вію чту́щихъ тя́, пресла́вне.

Богоро́диченъ: Образы нося́щи дре́вле Рождества́ Твоего́, Дѣ́во Ма́ти, пе́щь у́бо ю́ношей не опали́, та́кожде и о́гнь Боже́ственный утро́бы Твоея́, Чи́стая.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Красе́нъ тѣ́ломъ и душе́ю, и благоче́стіемъ сія́я, сла́вне, боже́ственнаго ра́зума, орга́нъ бы́лъ еси́ Свята́го Ду́ха: и по сме́рти у́бо къ безсме́ртной жи́зни и неконча́емому блаже́нству преше́лъ еси́, ра́дуяся, Алекса́ндре богому́дре.

Яко свѣтоза́рное, блаже́нне, со́лнце, возсія́въ отъ за́пада, и всю́ заря́ми благоче́стія Россíйскую зе́млю просвѣти́лъ еси́, и отгна́лъ еси́ тму́ глубо́кую ерети́чествующихъ, Алекса́ндре пресла́вне.

Твое́ свято́е преставле́ніе дне́сь свѣ́тло пра́зднуемъ: испо́лни ра́дости и весе́лія восхваля́ющія тя́, Алекса́ндре великоимени́те.

Богоро́диченъ: Свѣ́томъ мя́ Твоего́ милосе́рдія во тмѣ́ неразу́мія лежа́щаго озари́, еди́на Свѣтода́вца ро́ждшая, Изба́вителя и Бо́га, святы́хъ вѣнча́вшаго.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Ве́лій щи́тъ и крѣ́пость въ Россíйстей земли́, Алекса́ндре, обрѣ́лся еси́. Правосла́вному же Импера́тору на́шему похвале́ніе и сла́ва во всѣ́хъ язы́цѣхъ. И ны́нѣ мо́лимся ти́: сохраня́й оте́чество твое́ отъ язы́ка чужда́го.

Незаходи́маго свѣ́та луча́ми, во тмѣ́ су́щимъ сія́я, сла́вне, къ просвѣще́нію весе́лія наста́ви ны́, пою́щія тя́.

Блаже́нный Алекса́ндре, ка́ко тя́ возмо́жемъ воспѣ́ти досто́йно? Не мо́жетъ бо язы́къ человѣ́ческій изглаго́лати твоя́ разли́чная исцѣле́нія и мно́гая дарова́нія всѣ́мъ человѣ́комъ.

Богоро́диченъ: Яко у́тро, те́мнымъ и блудя́щимъ, Дѣ́во, возсія́ пра́вды Со́лнце, Христо́съ, Его́же на рука́хъ Твои́хъ носи́ла еси́, Чи́стая.

Свѣти́ленъ. Подо́бенъ: Жены́, услы́шите.

Слы́шана бы́сть во всѣ́хъ страна́хъ превели́кая сла́ва твоя́, и тогда́ жены́ Моави́тскія страша́ху дѣ́ти своя́ гро́знымъ твои́мъ и́менемъ. И ны́нѣ, блаже́нне, враги́ на́ша неви́димо устраша́й, ополча́ющіяся на христолюби́вое твое́ во́инство. [Два́жды.]

Сла́ва, и ны́нѣ, пра́здника. [Подо́бенъ то́йже.]

Юже дре́вле предвозвѣсти́ проро́ческое сосло́віе, ста́мну, и же́злъ, и скрижа́ль, и несѣко́мую го́ру, Марíю Богоотрокови́цу вѣ́рно да восхва́лимъ: дне́сь бо вво́дится во свята́я святы́хъ воспита́тися Го́споду.

Аще ли по отда́ніи пра́здника пое́тся свято́му, глаго́лемъ: Сла́ва, и ны́нѣ, богоро́диченъ се́й:

Совѣ́та вели́каго Ангела Отча, родила́ еси́ Христа́, препѣ́тая Отрокови́це, Царя́ сла́вы: Его́же Кре́стъ, апо́столи проповѣ́давше, просвѣти́ша язы́ки и научи́ша Тя́, Богоро́дицу, сла́вити и покланя́тися Твоему́ Рождеству́.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* сія́ніемъ Ду́ха Свята́го просвѣ́щся, Алекса́ндре богому́дре,* уче́нія лати́нская презрѣ́въ, и пре́лесть и́хъ обличи́въ,* и самѣ́хъ укори́въ, и чу́жди вѣ́ры пра́выя наре́къ,* и де́рзость и́хъ въ ничто́же вмѣни́въ.* И сего́ ра́ди отъ Христа́ Бо́га* прія́лъ еси́ воздая́ніе въ Ца́рствіи небе́снѣмъ,* со а́нгелы ликовствова́ніе* и съ пра́ведными ра́дованіе;* и ны́нѣ моли́ спасти́ся душа́мъ на́шимъ.

О, ка́ко возмогу́ досто́йно похвали́ти* или́ я́сно изглаго́лати пресла́вная чудеса́* блаже́ннаго и сла́внаго Алекса́ндра?* подае́тъ бо разли́чная исцѣле́нія* не то́кмо приходя́щимъ къ ра́цѣ моще́й его́,* но и въ да́льнихъ страна́хъ* призыва́ющихъ его́ никогда́же оставля́етъ.* Тѣ́мъ и повсю́ду хва́льно и́мя его́,* и ны́нѣ мо́литъ умири́ти мíръ* и спасти́ всѣ́хъ на́съ.

О, ка́ко возмо́жемъ воспѣ́ти блаже́ннаго Алекса́ндра,* я́ко апо́стола и я́ко проповѣ́дника?* вся́ко у́бо ерети́ческое нече́стіе попра́лъ е́сть,* свое́ же оте́чество до́брѣ упра́вивъ и соблюде́,* хра́мы разоре́нныя воздви́гнувъ,* пѣ́нія испо́лни* и распуже́нныя лю́ди собра́ въ до́мы своя́,* и ни́щимъ, и сирота́мъ, и вдова́мъ бы́сть печа́льникъ,* и въ бѣда́хъ засту́пникъ.* И ны́нѣ мо́литъ о спасе́ніи ду́шъ на́шихъ.

Сла́ва, гла́съ 2:

Пріиди́те, вси́ язы́цы, восплещи́те рука́ми, ликовству́юще, пріиди́те, вси́ Россíйстіи кня́зи, и свяще́нницы, и вельмо́жи, мона́си же и простíи, духо́внѣ свесели́мся въ наро́читомъ пра́здницѣ блаже́ннаго Алекса́ндра, и многоцѣле́бную его́ ра́ку, обстоя́ще, любе́зно облобыза́емъ, и того́, я́ко цвѣ́ты, пѣ́сньми и хвала́ми увязе́мъ, реку́ще: ра́дуйся, земли́ Россíйстѣй похвало́; ра́дуйся, сла́вному гра́ду Влади́міру утвержде́ніе; ра́дуйся, Импера́тору правосла́вному помо́щниче; ра́дуйся, оте́честву твоему́ заступле́ніе и моли́твенниче о душа́хъ на́шихъ.

И ны́нѣ, пра́здника, гла́съ 2:

Дне́сь въ хра́мъ приво́дится Всенепоро́чная Дѣ́ва, во оби́телище Всецаря́ Бо́га и всея́ жи́зни на́шея Пита́теля; днесь Чистѣ́йшая Святы́ня, я́ко трилѣ́тствующая Юница, во свята́я святы́хъ вво́дится; То́й возопіи́мъ, я́ко а́нгелъ: ра́дуйся, Eди́на въ жена́хъ Благослове́нная.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна пра́здника, пѣ́снь 5-я на 4 и свята́го пѣ́снь 6-я на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 223 – 233 об.

/ Къ оглавленію раздѣла /


Наверхъ / Къ титульной страницѣ

0