Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія, въ 22-й де́нь.
Па́мять и́же во святы́хъ преподо́бныхъ и богоно́сныхъ оте́цъ на́шихъ Симео́на и Са́ввы, кти́торовъ свяще́нныя оби́тели Хиланда́рскія на Святѣ́й горѣ́ Аѳо́нстѣй.

[Зри́:] Соверша́ется въ то́йже оби́тели нау́тріе Вхо́да во хра́мъ Пресвяты́я Влады́чицы на́шея Богоро́дицы и Приснодѣ́вы Марíи, вку́пѣ со слу́жбою хра́ма.

НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ]. На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Добродѣ́телей боже́ственною колесни́цею восходя́, Са́вво сла́вне, къ Бо́гу, Его́же возлюби́лъ еси́, восте́клъ еси́ все́ю душе́ю и се́рдцемъ твои́мъ, и Его́ озаре́ніи осія́емь, всегда́, о́гненный сто́лпъ показа́лся еси́. Его́же моли́ отъ тли́ и бѣ́дъ изба́витися вѣ́рою соверша́ющимъ всечестну́ю па́мять твою́.

Просія́въ я́ко со́лнце, луча́ми слове́съ твои́хъ освѣти́лъ еси́ вся́ концы́ земли́, и Се́рбію озари́лъ еси́ луча́ми благода́ти, догма́тствуя благоче́стно и уча́, приснохва́льне, еди́наго Го́спода во двою́ естеству́ Сего́ почита́ти, я́ко Влады́ку вся́ческихъ со Отце́мъ и Ду́хомъ.

Просвѣще́нъ Боже́ственнымъ Ду́хомъ, Симео́не всеблаже́нне, сыно́внимъ стопа́мъ послѣ́довалъ еси́, и на Святѣ́й горѣ́ бы́ли есте́, чу́дніи, Бо́жій до́мъ и благопрія́тенъ въ не́й воздви́гше, въ не́мже ны́нѣ пою́тъ мона́шествующихъ мно́жества, хва́лящіи ны́нѣ ва́съ, отцы́ боже́ственніи, и Христа́ велича́ющи.

Вся́кую добродѣ́тель усе́рдно воздѣ́лавъ, богодухнове́нне, и пома́зався Ду́хомъ пома́заніемъ святы́мъ, свяще́нникъ свяще́ннѣйшій я́вѣ показа́лся еси́ и па́стырь и́стиненъ и вѣ́ры побо́рникъ. Сего́ ра́ди вся́ Це́рковь пра́зднуетъ па́мять твою́, свяще́нно соверша́ющи и Спа́са сла́вящи.

Сла́ва, гла́съ 6:

Еже по о́бразу соблю́дше невреди́мо, у́мъ влады́ку на стра́сти па́губныя по́стнически поста́вльше, на е́же по подо́бію, я́ко мо́щно, возшли́ есте́: му́жески бо естество́ пону́дивше, потща́стеся ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующимъ яви́стеся ве́рхъ, жи́теліе пусты́нніи, благотеку́щихъ обучи́теліе, пра́вила добродѣ́тели извѣ́стнѣйшая, и ны́нѣ на небесѣ́хъ, зерца́ломъ разрѣши́вшимся, отцы́ на́ши богому́дріи, чи́стѣ зри́те Святу́ю Тро́ицу, моля́щеся несре́дственнѣ о и́же вѣ́рою и любо́вію чту́щихъ ва́съ.

И ны́нѣ, богоро́диченъ, гла́съ то́йже:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́ и чте́нія.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 1:

Да ра́дуется дне́сь не́бо свы́ше, и о́блацы весе́ліе да кропя́тъ о зѣло́ пресла́вныхъ вели́чіихъ Бо́га на́шего: се́ бо Две́рь, на восто́ки зря́щая, ро́ждшися отъ непло́дове безпло́дныя по обѣтова́нію и Бо́гу освяще́на бы́вши въ жили́ще, дне́сь въ хра́мъ я́ко непоро́чное приноше́ніе приво́дится, да ра́дуется Дави́дъ, бряца́я въ гу́сли: приведу́тся, рече́, Царю́ дѣ́вы въ слѣ́дъ Eя́, бли́жняя Eя́ приведу́тся вну́трь ски́ніи Бо́жія, внутрь очисти́лища Eго́, воспита́тися въ жили́ще пре́жде вѣ́къ отъ Oтца́ нетлѣ́нно Ро́ждшагося во спасе́ніе ду́шъ на́шихъ.

Гла́съ 4:>

Преподо́бніи отцы́, добродѣ́тели усе́рдно воздѣ́лавше, орга́ны Свята́го Ду́ха яви́стеся, и отъ Него́ пріи́мше чуде́съ дѣ́йство, научи́сте человѣ́ки презира́ти наслажде́нія помышле́нія, отцы́ треблаже́нніи.

Въ премíрныя ски́ніи ду́хъ тво́й, святи́телю Са́вво о́тче му́дре, Христо́съ Бо́гъ досто́йно прія́: ты́ бо Тро́ицы проповѣ́дникъ показа́лся еси́, еди́ное Божество́ Сію́ воспѣ́въ я́вѣ, дѣ́йственное хотѣ́ніе по естеству́ еди́ному всемо́щному, подо́бяся апо́столовъ и отце́въ уче́нію въ мíрѣ, тѣ́мже чуде́съ дѣ́йство Христо́съ ны́нѣ тебѣ́ да́руетъ, утвержда́я твое́ дне́сь преставле́ніе, правосла́вно сла́вимъ просла́вльшаго тя́ Го́спода.

Гла́съ 6:

Пра́здникъ ра́достенъ въ концѣ́хъ дне́сь, свята́я па́мять богоно́сныхъ отце́въ Симео́на и Са́ввы: сего́ ра́ди Се́рбія сора́дуется, пра́зднуя въ пѣ́снехъ и въ пѣ́ніяхъ. Пра́зднуимъ же и мы́, бра́тіе, ра́достно всечестну́ю и́хъ па́мять соверша́юще во хвале́бныхъ пѣ́ніяхъ, и къ ни́мъ возопіи́мъ: ра́дуйся, Симео́не сла́вне и таи́нниче всѣ́хъ Влады́ки Христа́ Бо́га на́шего; ра́дуйся, Са́вво богодухнове́нне, проповѣ́дниче вѣ́ры и учи́телю вселе́нныя. Яко иму́ще дерзнове́ніе, чето́ свѣтоза́рная, Христа́ Бо́га на́шего моли́те поми́ловати ду́ши на́ша.

Сла́ва, гла́съ 5:

Преподо́бніи отцы́, гла́съ Ева́нгелія Госпо́дня услы́шавше, мíръ оста́вили есте́, бога́тство и сла́ву въ ничто́же вмѣни́вше, тѣ́мже всѣ́мъ вопія́ли есте́: возлюби́те Бо́га и обря́щете благода́ть вѣ́чную; ничто́же предпочти́те па́че любве́ Его́, да егда́ пріи́детъ въ сла́вѣ Свое́й, обря́щете поко́й со всѣ́ми святы́ми. Ихже моли́твами, Христе́, сохрани́ и спаси́ ду́ши на́ша.

И ны́нѣ, богоро́диченъ, гла́съ то́йже:

Блажи́мъ Тя́, Богоро́дице Дѣ́во, и сла́вимъ Тя́ вѣ́рніи по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

На стихо́внѣ стихи́ры, гла́съ 5:

Ра́дуйся, путеводи́телю слѣпы́хъ, наста́вниче ю́ношества, сла́вне, ста́рыхъ же́зле, блужда́ющихъ па́стырю, грѣ́шниковъ исправле́ніе, лу́же благоуха́ннѣйшій, мѵрополо́жниче Ду́ха, златостру́йная рѣко́, необурева́емое приста́нище, Святы́я Тро́ицы хра́ме, па́мятствовавшихъ, пою́ще тя́, избавля́яй отъ скорбе́й и болѣ́зней и вѣ́чнаго муче́нія, Христа́ моля́й, да́рующаго мíру ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, благоче́стія свѣти́льниче, Це́ркве свѣ́тлое, о́тче, со́лнце, сла́во мона́шествующихъ, пра́вило молча́нія, богомы́слія и дѣ́ланія учи́телю изря́днѣйшій, святи́телю богоглаго́ливе, прему́дрости и вѣ́дѣнія сокро́вище, Са́вво сла́вне, Тро́ицы селе́ніе, орга́не Ду́ха, псалти́рю одушевле́нне, уста́ Госпо́дня, изводя́щая отъ недосто́йнаго досто́йное. Христа́ у́бо моли́ дарова́ти душа́мъ на́шимъ ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Сто́лпъ свѣтя́щійся добродѣ́тельми утвержде́нный и о́блакъ осѣня́ющій яви́лся еси́ су́щимъ въ пусты́ни, къ не́бу отъ земли́ къ Бо́гу взира́ющихъ предводя́яй, Креста́ жезло́мъ разве́рзый мо́ре страсте́й, устремле́ніе же Амали́ка обрати́вый въ бѣ́гство. Невозвра́тный небе́сный пу́ть обрѣ́лъ еси́, богоблаже́нне, и неизрече́нную ча́сть со безпло́тными [у] престо́ла, ему́же, Симео́не, предстоя́, Христа́ у́бо моли́ дарова́ти душа́мъ на́шимъ ве́лію ми́лость.

Сла́ва, гла́съ 8:

Мона́ховъ мно́жества наста́вники ва́съ почита́емъ, отцы́ боже́ственніи, ва́шею бо стезе́ю вои́стинну пра́во ходи́ти позна́хомъ. Блаже́ни есте́, Христу́ рабо́тавшіи и вра́жію си́лу обличи́вшіи, а́нгеловъ собесѣ́дницы, преподо́бныхъ соприча́стницы и пра́ведныхъ. Съ ни́миже моли́теся Го́споду поми́ловатися душа́мъ на́шимъ.

И ны́нѣ, богоро́диченъ, гла́съ то́йже:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Тропа́рь преподо́бныхъ, гла́съ 1:

Оби́тели Хиланда́рскія свяще́нныхъ строи́телей и Аѳо́на свѣти́льники, Се́рбіи похвалу́, Симео́на велича́йшаго, преподо́бныхъ лѣ́поту, и ро́дъ его́ чу́дный, — святи́теля, глаго́лю, Са́вву, — пріиди́те, согла́сно почти́мъ, глаго́ля: моли́те Христа́ Бо́га о па́ствѣ ва́шей, блаже́нніи, и о е́же Це́ркви свобо́днѣй бы́ти отъ обстоя́ній.



НА УТРЕНИ.

По 1-мъ стихосло́віи сѣда́ленъ, гла́съ 8:

Па́стырское разумѣ́ніе воспрія́въ, мона́шествующихъ сто́лпе и стѣно́, до́брѣ упа́слъ еси́ су́щія разу́мныя па́ствы твоея́: возлюби́въ бо Христо́во Боже́ственное уче́ніе, въ ни́хъ сло́во посѣ́ялъ еси́, всему́дре, отсю́ду же и поревнова́ти а́нгельскому жи́тельству подви́глъ еси́ вся́, единоду́шно сла́вити Бо́га богому́дренно, Са́вво о́тче на́шъ, моли́ Христа́ Бо́га грѣхо́въ оставле́ніе дарова́ти, чту́щимъ любо́вію святу́ю па́мять твою́.

Сла́ва: то́йже. И ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣтоза́рный о́блакъ воспои́мъ, небе́сную лѣ́ствицу, слове́сный ра́й, Евино избавле́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ Сы́на Твоего́ и Бо́га прегрѣше́ній оставле́ніе дарова́ти благоче́стно покланя́ющимся пресвято́му Рождеству́ Твоему́.

По 2-мъ стихосло́віи сѣда́ленъ, гла́съ 4: [1]

[Гла́су Го́спода твоего́ послѣ́довалъ еси́, мíръ оста́вивъ и сла́дкая мíра, Симео́не богому́дре: великоду́шно поне́слъ еси́ тяготу́ пусты́ни, по́лчища де́моновъ му́жественно отгна́въ. Сего́ ра́ди па́мять твою́ всегда́ пѣ́сньми пра́зднуемъ вѣ́рно.

Сла́ва: то́йже. И ны́нѣ, богоро́диченъ:]

Обнови́ла еси́, Чи́стая, Боже́ственнымъ рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По поліеле́и сѣда́ленъ, гла́съ 3:

Столпи́ непоколеби́міи благоче́стія, основа́ніе богодухнове́нное Це́ркве яви́стеся, отцы́ сла́вніи: всея́ бо Се́рбіи концы́ просвѣти́сте сло́вомъ вѣ́ры, Са́вво сла́вне съ Симео́номъ богому́дрымъ, моли́те Христа́ Бо́га дарова́ти на́мъ ве́лію ми́лость.

Сла́ва: то́йже. И ны́нѣ, богоро́диченъ, гла́съ то́йже:

Боже́ственная ски́нія была́ еси́ Сло́ва, еди́на Пречи́стая Дѣ́во Ма́ти, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Та́же: Вся́кое дыха́ніе... Ева́нгеліе отъ Матѳе́я, зача́ло 43. Сла́ва: Моли́твами преподо́бныхъ Твои́хъ... И ны́нѣ: Моли́твами Богоро́дицы... Поми́луй мя́, Бо́же...

Стихи́ра самогла́сна, гла́съ 6:

Преподо́бніи отцы́, во всю́ зе́млю изы́де вѣща́ніе исправле́ній ва́шихъ, тѣ́мже на небесѣ́хъ обрѣли́ есте́ мзду́ трудо́въ ва́шихъ, де́монскія погуби́ли есте́ полки́ и а́нгельскія дости́гли есте́ чи́ны, и́хже житію́ непоро́чно поревнова́ли есте́, дерзнове́ніе иму́ще ко Христу́ Бо́гу, ми́ръ испроси́те душа́мъ на́шимъ.

Кано́нъ Богоро́дицы, со ирмосо́мъ, на 6 и святы́хъ, на 8.

Кано́нъ святы́хъ, его́же краестро́чіе по алфави́ту. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Восто́къ добродѣ́телей бы́въ, со́лнце незаходи́мое, святи́телю о́тче, ны́нѣ восхваля́ющему тя́ и прося́щему воспѣ́ти тя́, твои́ми моли́твами да́руй ми́ досто́йно, да воспою́ тя́, Са́вво святи́телю, о́тче на́шъ.

Ца́рское презрѣ́въ благоро́діе, бога́тство и сла́ву, му́дре, и взе́мъ кре́стъ, о́тче, на ра́мена, Христу́ послѣ́довалъ еси́, чи́стымъ по́мысломъ Ему́ слѣ́дуя, преподо́бне Са́вво, святи́телю изря́днѣйшій.

Земледѣ́лавъ добродѣ́тельми и труды́, сѣ́мя боже́ственное въ душа́хъ, о́тче, вѣ́рныхъ посѣ́ялъ еси́, и ны́нѣ стори́чествующій кла́съ боже́ственныхъ дѣ́лъ возда́лъ еси́ Земледѣ́лателю и Творцу́, Симео́не, вѣ́рныхъ похвало́.

Богоро́диченъ: Богоявле́нія Тебе́ ра́ди удосто́ися, Богоблагода́тная, сме́ртное естество́, Неодержи́маго бо во чре́вѣ Твое́мъ обита́вшаго, па́че ума́ и сло́ва, Благослове́нная, родила́ еси́, пребыва́ющи Дѣ́ва, Чи́стая.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Да́ры свѣтода́тельными озаре́нъ, преподо́бне, де́монскій мра́къ всецѣ́ло отгна́лъ еси́ и свѣ́тъ возсія́лъ еси́ въ сѣ́ни сме́ртнѣй сѣдя́щимъ, [тѣ́мже тя́, Са́вво, почита́емъ].

На Го́спода всю́, боже́ственніи преподо́бніи, возложи́вше наде́жду, ника́коже поколеба́стеся, е́же отпа́сти отъ лу́чшаго стоя́нія, но зако́нно соверши́сте боже́ственное тече́ніе ума́ пра́востію.

Житія́ чи́стаго улучи́ти потща́вшеся, пло́ть на земли́, богоно́сніи, умертви́ли есте́, и ны́нѣ безсме́ртную ча́сть наслѣ́довали есте́, Христу́, блаже́нніи, соца́рствующе.

Богоро́диченъ: Въ сѣ́нь сме́ртную впа́въ, Чи́стая, Тя́ призыва́ю, боже́ственную по́мощь Твою́ ско́ро посли́ ми́, я́ко да спасе́нъ бы́въ, досто́йно любо́вію ублажа́ю Тя́, я́коже прорекла́ еси́.

Инъ конда́къ, гла́съ 4:

Дне́сь Симео́нъ съ Са́ввою, блаже́нніи, въ ду́сѣ прише́дше, спаса́ютъ отъ обстоя́ній па́ству и́хъ: сíи бо Тро́ицу проповѣ́даша Еди́наго Бо́га, Це́ркве яви́шася утвержде́ніе, въ преподо́бныхъ мѵроточи́вый и во святы́хъ чудотво́рецъ: сíи бо показа́шася царе́й похвала́ и наро́да и́хъ крѣ́пость.

Сѣда́ленъ, гла́съ 8:

Ду́шу преда́вше любви́ Христо́вы, земна́я вся́ оста́вивше му́дре, всели́стеся, преподо́бніи, въ пусты́няхъ и гора́хъ: вкуси́вше бо отъ дре́ва вѣ́дѣнія, сла́вніи, а́ки отъ во́дъ таи́нницы, а́нгельски возсія́ли есте́. Тѣ́мже тму́ плотску́ю превозше́дше, мра́къ де́монскій отгна́ли есте́, блаже́нніи Симео́не и Са́вво сла́вніи: моли́те Христа́ Бо́га прегрѣше́ній оставле́ніе дарова́ти любо́вію пра́зднующимъ святу́ю па́мять ва́шу.

Сла́ва: то́йже. И ны́нѣ, богоро́диченъ:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нію мя́ су́щи скве́рно жили́ще и де́моновъ игра́лище въ ра́зумѣ бы́вша, потщи́ся отъ си́хъ злодѣ́йствія мя́ изба́вити, свѣ́тло жили́ще добродѣ́тельми содѣ́лавши, Свѣтода́тельная и Нетлѣ́нная, [отжени́ о́блакъ страсте́й и вы́шняго] прича́стія сподо́би и Свѣ́та невече́рняго моли́твами Твои́ми.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Наи́тіе Боже́ственнаго Ду́ха яви́ вы́ свѣти́льники, чудесы́ сія́ющія, Симео́не и Са́вво всехва́льніи.

Боже́ственнымъ озаре́ніемъ ввѣря́еми, яви́стеся а́ки огни́ просвѣща́юще вѣ́рныхъ всѣ́хъ по́мыслы, всеблаже́нніи.

Врачева́ній благода́ть Влады́ка всѣ́хъ ва́мъ дарова́ и вла́сть изгоня́ти нечи́стыя ду́хи, отцы́ досточу́дніи.

Богоро́диченъ: Въ нѣ́дрѣхъ Сѣдя́й, Чи́стая, Отчихъ, ны́нѣ въ Твои́хъ нѣ́дрѣхъ, Чи́стая, почи́, тлѣ́нное естество́ исправля́я.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Благода́тныя струи́ изгоня́ющія неду́ги и вла́сть на ду́хи нечи́стыя дарова́ тебѣ́ Христо́съ, му́дре, естество́ бо, о́тче, побѣди́въ, па́че естества́ даро́въ Ду́ха прича́стникъ бы́лъ еси́.

Чи́стымъ умо́мъ и души́ крѣ́постію, богоблаже́нне, вра́жія вся́ навѣ́ты на зе́млю низве́ргл еси́, Кре́стъ, я́ко ски́петръ, воспріи́мъ на ра́мена со Са́ввою, всеблаже́нніи.

Со безпло́тными, съ преподо́бными же, и святи́тели, со апо́столи соверша́емъ ва́ше торжество́, богоно́се Са́вво со отце́мъ твои́мъ Симео́номъ, согла́сно всегда́ ва́съ ублажа́юще.

Богоро́диченъ: Моля́щи не преста́й о воспѣва́ющихъ Тя́, Свята́я Влады́чице, Сы́на Твоего́ и Бо́га и Влады́ку и Го́спода, я́ко да да́стъ всѣ́мъ на́мъ оставле́ніе грѣхо́въ и ра́йскихъ бла́гъ наслажде́ніе.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Исто́чникъ исцѣле́ній животворя́щій, вои́стинну, гро́бъ тво́й содѣ́лася, Симео́не, ему́же предстоя́ще вси́, вѣ́рніи, исцѣле́нія воспріе́млемъ.

Житіе́ твое́ знамени́то, сла́ва, о́тче, вѣ́чна, пу́ть же тво́й свѣ́телъ, кончи́на честна́, предъ Го́сподемъ Бо́гомъ твои́мъ, Са́вво сла́вне.

Отве́рглъ еси́ су́щую на земли́ че́сть и сла́ву легкоги́бнущую, вѣ́чный же живо́тъ и достоя́ніе непоколеби́мое, всеблаже́нне, воспрія́лъ еси́, въ небе́сныхъ селе́ніяхъ водвори́вшись незы́блемѣйше.

Богоро́диченъ: Вседержи́телевою си́лою, вся́ нося́й, во объя́тіяхъ Твои́хъ, я́ко сме́ртный носи́мь бѣ́, Дѣ́во Всенепоро́чная, избавля́я на́съ отъ руки́ вра́жія.

Конда́къ, гла́съ 2:

Го́рнюю жи́знь возлюби́вше, сла́вніи, жи́знь су́щую на земли́ презрѣ́сте. Сего́ ра́ди, въ вы́шнихъ со а́нгелы всегда́ лику́юще, моли́те о всѣ́хъ на́съ.

Икосъ:

Кто́ возмо́жетъ досто́йно похвали́ти твои́хъ натрижне́ній и подвиго́въ и трудо́въ мно́гихъ сла́ву и вели́чіе? Но моли́твами твои́ми спомози́ ми́, и да́ждь ми́ благода́ть Ду́ха, я́ко да изреку́ твоя́ боре́нія вѣ́рно, и воспою́ па́че сло́ва си́лу твою́ и крѣ́пость, всеблаже́нне, е́юже кова́рнаго врага́ посрами́лъ еси́, Са́вво богоно́се съ Симео́номъ богому́дрымъ, не преста́йте моли́ти о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Изба́вите отъ вся́каго вре́да и плѣне́нія вра́жескаго ва́рварскаго, прибѣга́ющія къ ва́шей боже́ственнѣй защи́тѣ, о Симео́не хва́льне съ Са́ввою, во вѣ́ки.

Тѣ́ло, ду́шу же, и се́рдце, и по́мыслъ, и у́мъ очи́стивше, въ небе́сный ны́нѣ преста́вистеся бра́чный черто́гъ, о Симео́не хва́льне съ Са́ввою, во вѣ́ки.

Же́злъ си́лы держа́ — спаси́тельный Кре́стъ, Са́вво, до́блѣ, испыта́нія терпѣли́во подъе́млеши, великоду́шно воспѣва́я: благослове́нъ еси́, Го́споди Бо́же, во вѣ́ки.

Богоро́диченъ: Ты́ мя́ спаси́, Дѣ́во, и исхити́ изъ руки́ борю́щаго и кова́рнаго врага́ человѣкоубíйцы, я́ко да пою́, спаса́емый, Твою́ сла́ву во вѣ́ки.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Подви́жническому жи́тельству предава́я себе́, [блаже́нніи, вы́шшаго богомы́слія дости́гли есте́,] прія́телище показа́вшеся вмѣсти́тельное Ду́ха Животворя́щаго, пою́ще непреста́нно: лю́діе, превозноси́те Христа́ во вѣ́ки.

Преста́вившися, предвари́лъ еси́ во гра́дъ Сіо́нъ, во оби́тели же вѣ́чныя приспѣ́лъ еси́ и небе́сную ча́сть за труды́ обрѣ́тъ, со а́нгельскими ликостоя́ніи воспѣва́еши: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Всесвѣ́телъ, я́ко со́лнце, пусты́ни просвѣти́лъ еси́, мра́чныя отгна́въ де́моны, и сто́лпъ всесвѣ́телъ, досяза́ющь до не́ба, бы́лъ еси́, чудотво́рная сія́нія испуска́я, взыва́лъ еси́ непреста́нно: свяще́нницы, воспо́йте, лю́діе, превозноси́те Христа́ во вѣ́ки.

Богоро́диченъ: Невѣ́сто Бо́жія Всенепоро́чная, прибѣга́ющія къ Тебѣ́ исхити́ отъ плѣ́на страсте́й, и самовлады́чнюю свобо́ду, Чи́стая, Це́ркви правосла́вныхъ пода́ждь, вѣ́рою пою́щимъ: свяще́нницы, воспо́йте, лю́діе, превозноси́те Христа́ во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ра́дости и весе́лія духо́внаго всѣ́хъ ва́ша па́мять исполня́етъ, сла́вніи, вѣ́рою и любо́вію сію́ пра́зднующихъ.

Псалмы́ и пѣ́ніи ны́нѣ ва́съ похваля́емъ и ублажа́емъ въ пѣ́снехъ дне́сь, къ Боже́ственному хра́му ва́шему прибѣга́юще.

О, о́тче богоно́се, Са́вво іера́рше съ Симео́номъ, отце́мъ твои́мъ, моли́теся о на́съ, почита́ющихъ святу́ю па́мять ва́шу.

Богоро́диченъ: Благолюби́вая Дѣ́во, озло́бленную грѣхо́мъ ду́шу мою́ удобри́, Всеблаго́е Сло́во пло́тію носи́вшая.

Свѣти́ленъ:

Чудотво́рцы свѣти́льницы, Симео́не со Са́ввою, уврачу́йте ду́ши на́ша и тѣлесе́ неду́ги, отъ Го́спода пріи́мше благода́ть исцѣле́ній. [Два́жды.]

[Сла́ва, и ны́нѣ,] богоро́диченъ:

Су́щихъ отъ Бо́га дае́мыхъ мíру бла́гъ, Ты́ причи́ною была́ еси́, Пречи́стая, но и ны́нѣ уми́лостиви Сы́на Твоего́, Богоро́дице, о о́бщемъ спасе́ніи.

На хвали́техъ стихи́ры на 4, гла́съ 8:

О, пресла́внаго чудесе́! Свѣтосія́нный и ра́достный отце́въ пра́здникъ ны́нѣ на́мъ возсія́, Симео́на и Са́ввы, тѣ́мже, пріиди́те вѣ́рою, сни́демъ вку́пѣ въ па́мяти и́хъ веселя́щеся и возопіи́мъ: моле́ніи и́хъ спаси́ ны́, Го́споди Человѣколю́бче, я́ко Всеблагíй. [Два́жды.]

Отче Симео́не богому́дре, свѣтосія́ній у́мъ, чи́сто озаря́емъ, имѣ́яй, страсте́й умири́лъ еси́, идѣ́же неизрече́нная добро́та неопису́емая, о на́съ всегда́ моли́ся, хва́лящихъ тя́.

Са́вво богоглаго́льниче всему́дре, свяще́нства пра́вило, цѣлому́дрія о́бразъ, мона́ховъ укрѣпле́ніе, Це́ркве утвержде́ніе, любве́ свѣти́ло, престо́лъ чу́вства, исто́чникъ чуде́съ, язы́къ о́гненный, уста́ сладкоглаго́ливая, сосу́дъ Бо́жіяго Ду́ха и ра́й у́мный бы́лъ еси́, богоблаже́нне.

Сла́ва, гла́съ 2:

Добродѣ́телей лѣ́ствица и о́бразъ показа́шася на земли́ та́инственно, святíи, и́хже восхва́лимъ, я́ко по́стниковъ украше́ніе: подвиза́шася бо вои́стинну, я́ко вели́кій Анто́ній, безмѣ́рное у́бо смире́ніе яви́ша и упа́сше наро́дъ и́хъ благоче́стно, во огра́ду святу́ю введо́ша, идѣ́же ли́къ а́нгеловъ пребыва́етъ. Сего́ ра́ди вопіе́мъ прилѣ́жно: не забу́дите па́ствы ва́шея, Са́вво и Симео́не всеблаже́нніи, спаса́ти ду́ши на́ша.

И ны́нѣ, богоро́диченъ, гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

Славосло́віе вели́кое. Тропа́рь святы́хъ. Сла́ва, и ны́нѣ, пра́здника. Ектеніи́ и отпу́стъ.




НА ЛИТУРГІИ,

Блаже́нна отъ кано́на пра́здника, пѣ́снь 1-я и святы́хъ, пѣ́снь 6-я. Проки́менъ, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, [хвале́ніе Его́ въ це́ркви преподо́бныхъ]. Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. [Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся]. Ева́нгеліе отъ Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Примѣчаніе:
[1] См. Мине́я Февра́ль. М.: Издательскій совѣтъ Русской Православной Церкви, 2002. С. 499.

Источникъ: Србљак. Књига А. — Добрунска Ријека: «Дабар», 2015. — С. 374-386.

/ Къ оглавленію раздѣла /


Наверхъ / Къ титульной страницѣ

0