Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 22-й де́нь.
Слу́жба свята́го благовѣ́рнаго вели́каго кня́зя Михаи́ла Яросла́вича Тферска́го.

НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: [стихи́ры пра́здника, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* предпису́ется ны́нѣ* бу́дущее неизрече́нное,* во о́бразѣхъ дне́сь ви́димыхъ разумѣва́емая:* Свѣ́тъ бо мíру Боже́ственный возсія́вши,* невѣстоприво́дится ко свято́му хра́му.* Юже восхва́лимъ, я́ко хра́мъ Бо́жій пресвѣ́тлый,* святы́й свѣтоза́рный,* Свѣтода́теля Христа́. [Два́жды.]

Вои́стинну нача́токъ благопрія́тенъ* Іоаки́мъ му́дрый* со Анною принесо́ша* изво́лившему Боже́ственный пло́дъ да́ти и́мъ,* Богоотрокови́цу Дѣ́ву Марíю я́вѣ,* Еюже печа́ли отгна́ся до́лгъ.* Юже воспои́мъ, благоче́стно веселя́щеся,* ра́дости бо Хода́таица* бы́сть всему́ мíру Сія́.

Гряди́те, та́инственно стеце́мся* и предначне́мъ ны́нѣ,* свѣща́ми вѣ́ры украша́еми,* Дѣ́вы предше́ствіе:* во хра́мъ бо сла́вно вхо́дитъ Бо́жій,* обручена́ Христу́, всѣ́хъ Царю́.* Ея́же пра́зднуемъ кра́сное торжество́,* боголѣ́пно вси́ учрежда́ющеся* вхожде́ніемъ Тоя́.

Святому] стихи́ры, гла́съ 2. Подо́бенъ: Кíими похва́льными вѣнцы́?

Кíими похва́льными вѣнцы́ увязе́мъ честну́ю главу́ твою́ и всечестно́е тѣ́ло твое́ и богоизбра́нное? Пріи́мша заколе́ніе непра́ведное, въ чистотѣ́ воспита́нное житіе́ и цѣлому́дрое изво́лилъ еси́, нетлѣ́ннаго житія́ мужеу́мнымъ смы́сломъ вра́жію держа́ву разруши́лъ еси́ и Бо́жіимъ посо́біемъ, подая́ на́мъ ве́лію ми́лость.

Кíими пѣ́сненными похвала́ми соста́вимъ пра́здникъ че́стенъ богому́драго Михаи́ла? Иже Христа́ ра́ди оста́ви тлѣ́нную сла́ву земну́ю и сосу́дъ че́стенъ яви́ся Свята́го Ду́ха. Звѣзда́ свѣтоно́сная возсія́ въ Россíи, озаря́ющая вся́ концы́, и я́ко же́ртва непоро́чна принесе́ся Христу́: Ему́же прилѣ́жно мо́лится дарова́ти на́мъ ми́ръ и ве́лію ми́лость.

Кíими пѣ́нія пѣ́сньми тебе́, Михаи́ле, возвели́чимъ? Его́же Христо́съ, па́че естества́ возвели́чивъ, и непобѣди́ма во бранѣ́хъ показа́, свѣтоза́рное твое́ лице́ просвѣща́емо па́че со́лнца, и, въ Бо́жію си́лу оболче́нъ, Его́же уче́нію послѣ́довалъ еси́, беззако́ннымъ пло́ть твою́ пре́далъ еси́ и претерпѣ́лъ еси́ ле́стныя гнѣ́вы за любо́вь Созда́вшаго тя́.

Аще нѣ́сть литíи, ины стихи́ры, гла́съ 8. Подо́бенъ: О, пресла́внаго чудесе́!

Яко вои́стинну боже́ственная и честна́я, возсія́вши па́мять твоя́ Россíйскимъ страна́мъ дне́сь, сла́вный Михаи́ле, ца́рскаго ко́рене свята́я о́трасль, Христа́ возлюби́въ, Его́же ра́ди непра́ведное заколе́ніе претерпѣ́лъ еси́. Тѣ́мъ моли́, блаже́нне, дарова́ти душа́мъ на́шимъ очище́ніе согрѣше́ній, ми́ръ и ве́лію ми́лость.

Ра́дуются человѣ́цы ра́достію дне́сь, и да пое́тъ, лику́ющи, боже́ственными пѣ́сньми Це́рковь Христо́ва, хва́лящи блаже́ннаго кня́зя же и му́ченика, Христа́ бо ра́ди, я́ко преходя́щее, ца́рство земно́е возненави́дѣвша, Го́спода Спа́са отъ души́ возлюби́вша и непра́ведно убíйство претерпѣ́вша, ника́коже проти́вящася закала́ющему, и мо́лится спасти́ся душа́мъ на́шимъ.

Въ небе́сныя оби́тели, я́ко на колесни́цѣ, возше́лъ еси́, твое́ю кро́вію очервлени́въ одѣя́ніе, я́ко а́гнецъ, непра́ведно заколе́ніе прія́лъ еси́ отъ врага́ Кавгады́я, злѣ́ живо́тъ сво́й испрове́ргшаго. Соблюди́ гра́дъ се́й и це́рковь твою́ отъ вра́жія нападе́нія, благочестна́я лѣ́торасле, блаже́нный Михаи́ле, му́чениче преслову́щій, те́плый засту́пниче Россíйскія земли́ и всѣ́мъ страна́мъ утвержде́ніе. Но мо́лимъ тя́, моли́ся, свя́те, безъ вре́да сохрани́ти оте́чество твое́ и спасти́ся душа́мъ на́шимъ.

Сла́ва, гла́съ 6:

Возсія́ дне́сь, я́ко со́лнце, страстоте́рпца па́мять, вѣ́рныя созыва́ющи на весе́ліе та́йно. Хвала́ми, я́ко цвѣты́ кра́сными, вѣнцы́ спле́тше златоза́рны, къ честнѣ́й его́ главѣ́ принесе́мъ, глаго́люще: ра́дуйся, свѣ́тлая звѣздо́ мы́сленныя тве́рди и те́плый засту́пниче гра́ду на́шему; ра́дуйся, поспѣ́шниче су́щимъ въ бѣда́хъ и тве́рдое огражде́ніе къ тебѣ́ притека́ющимъ; ра́дуйся, побѣ́ды соверши́въ по́двигъ и вѣне́цъ пріи́мъ отъ Христа́ Бо́га. Его́же моли́ прилѣ́жно, преблаже́нне Михаи́ле, Импера́тору на́шему ми́ръ и здра́віе пода́ти и на проти́вныя побѣ́ду, и гра́дъ тво́й невреди́мь сохрани́ти моли́твами твои́ми, и спасти́ся душа́мъ на́шимъ.

И ны́нѣ, пра́здника, гла́съ то́йже:

Дне́сь собо́ри вѣ́рныхъ, соше́дшеся, [духо́внѣ да торжеству́имъ и Богоoтрокови́цу Дѣ́ву и Богоро́дицу, въ хра́мъ Госпо́день приводи́му, благоче́стно восхва́лимъ, предъизбра́нну отъ всѣ́хъ родо́въ, во оби́телище всѣ́хъ Царя́ Христа́ и Бо́га: дѣ́вы, свѣщи́ нося́ще, предъиди́те, Приснодѣ́вы чту́ще честно́е происхожде́ніе, ма́тeри, печа́ль всю́ отложи́вше, ра́достно спослѣ́дствуйте Ма́тери Бо́га быва́ющей и ра́дости мíра Хода́таицѣ. Вси́ у́бо ра́достно, е́же — ра́дуйся, — со а́нгеломъ возопіи́мъ Обра́дованнѣй, при́сно моля́щейся о душа́хъ на́шихъ].

Вхо́дъ. Проки́менъ дне́. И чте́нія.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Аще настоя́тель изво́литъ пѣ́ти литію́: стихи́ры пи́саны на Го́споди воззва́хъ.., другíя.
Сла́ва, гла́съ 8: Яко вои́стинну Боже́ственная и честна́я... И ны́нѣ, пра́здника.

На стихо́внѣ стихи́ры пра́здника, [гла́съ 2. Подо́бенъ: До́ме Евфра́ѳовъ.

Дне́сь псало́мски* собо́ръ дѣ́вственныхъ,* свѣщи́ вже́гше,* свѣ́тло предхо́дятъ* еди́нѣй Всенепоро́чнѣй.

Сти́хъ: Приведу́тся Царю́ дѣ́вы въ слѣ́дъ Ея́,* и́скреннія Ея́ приведу́тся Тебѣ́.

Го́ру разу́мную* и трапе́зу боже́ственную,* мо́стъ и ста́мну,* проро́че, пріими́,* еди́ну Всенепоро́чную.

Сти́хъ: Приведу́тся въ весе́ліи и ра́дованіи,* введу́тся въ хра́мъ Царе́въ.

Две́ри святи́лища отве́рзъ,* Заха́ріе проро́че,* пріими́ и́стинно Бо́жію Ма́терь* и еди́ну Приснодѣ́ву].

Сла́ва, свята́го, гла́съ 8:

Пріиди́те, восхва́лимъ чудотво́рца и му́ченика, зако́нно пострада́вшаго, побѣ́ждшаго сопроти́внаго врага́: ны́нѣ бо, свѣ́тло укра́шенъ, предстои́тъ Христу́, ра́дуяся. Тѣ́мъ и мы́ пѣ́сньми па́мять его́ ве́село любо́вію похва́лимъ, вопію́ще: ра́дуйся, вселе́нныя засту́пниче и побори́телю на враги́; ра́дуйся, врачу́ боля́щихъ и де́моновъ прогони́телю; ра́дуйся, чу́дный Михаи́ле, люби́мый Христу́: за ны́ моли́ Святу́ю Тро́ицу умири́ти мíръ и спасти́ ду́ши на́ша.

И ны́нѣ, пра́здника, гла́съ то́йже:

По рождествѣ́ Твое́мъ, [Богоневѣ́сто Влады́чице, пришла́ eси́ въ хра́мъ Госпо́день воспита́тися во свята́я святы́хъ, я́ко освяще́нна; тогда́ и Гавріи́лъ по́сланъ бы́сть къ Тебѣ́, Всенепоро́чнѣй, пи́щу Тебѣ́ принося́. Небе́сная вся удиви́шася, зря́ще Ду́ха Свята́го, въ Тя все́льшася. Тѣ́мже, Пречи́стая и Нескве́рная, я́же на небеси́ и на земли́ сла́вима, Ма́ти Бо́жія, спаси́ ро́дъ на́шъ].

Тропа́рь, гла́съ 8:

Возвы́сивъ у́мъ тво́й къ Бо́гу, и житія́ со а́нгелы возжелѣ́лъ еси́, тлѣ́нную сла́ву земну́ю оста́вилъ еси́, блаже́нне, и положи́лъ еси́ ду́шу твою́ за лю́ди твоя́, воспрія́лъ еси́ вѣне́цъ проти́ву трудо́въ твои́хъ, богому́дре Михаи́ле, моли́ Христа́ Бо́га о чту́щихъ любо́вію святу́ю па́мять твою́.

Сла́ва, и ны́нѣ, пра́здника:

[Дне́сь благоволе́нія Бо́жія предображе́ніе и человѣ́ковъ спасе́нія проповѣ́даніе въ хра́мѣ Бо́жіи я́сно Дѣ́ва явля́ется и Христа́ всѣмъ предвозвеща́етъ. Той и мы велегла́сно возопіи́мъ: ра́дуйся, смотре́нія Зижди́телева исполне́ніе.]


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По пе́рвой и по второ́й каѳи́смѣ, сѣда́льны пра́здника:

[По 1-мъ стихосло́віи сѣда́ленъ, гла́съ 1. Подо́бенъ: Ка́мени запеча́тану.

Восхвали́те, дѣ́вы, ма́тери, предпра́зднуйте, лю́діе, славосло́вите, свяще́нницы, благослови́те Пречи́стую Ма́терь Бо́жію: пло́тію бо младе́нствующи пре́жде, во хра́мъ принесе́ся, я́ко хра́мъ Бо́жій святѣ́йшій. Тѣ́мже пра́здникъ соверша́юще духо́вный, воспое́мъ Ю, я́ко Предста́тельницу ро́да человѣ́ческаго.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Дави́де, предъиди́ въ хра́мъ Бо́жій, и, ра́дуяся, пріими́ Цари́цу на́шу, и То́й возопíй: вни́ди, Госпоже́, въ хра́мъ Царе́въ, вни́ди, Ея́же сла́ва покрове́нно разумѣ́ется. Изъ Нея́же хо́щетъ источи́тися на́мъ всѣ́мъ Свѣ́тъ — Христо́съ.

Сла́ва, и ны́нѣ, то́йже.

Велича́ніе:

Велича́емъ тя́, благовѣ́рный кня́же Михаи́ле, и чте́мъ святу́ю па́мять твою́, и́же за Христа́ кро́вь свою́ излія́лъ еси́, и ны́нѣ мо́лиши за на́съ Христа́, Бо́га на́шего.

Псало́мъ избра́нный: Бо́гъ на́мъ прибѣ́жище и си́ла...]

По поліеле́и сѣда́ленъ свята́го, гла́съ 4. Подо́бенъ: Яви́лся еси́ дне́сь.

Яви́ся дне́сь заступле́ніе гра́ду твоему́ и лю́демъ, пресвято́е тѣ́ло твое́ честно́е, е́же пріи́мши це́рковь Бо́жія, весели́тъ сердца́ пою́щихъ тя́, Михаи́ле. [Два́жды.]

Сла́ва, и ны́нѣ, богоро́диченъ:

Пречи́стыя ру́ки Твоя́, Дѣ́во Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Та́же чте́мъ о убіе́ніи его́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Луки́, зача́ло 106. Псало́мъ 50-й.

Стихи́ра самогла́сна, гла́съ 6:

Дне́сь вѣ́рныхъ собо́ри, ли́къ духо́вный соста́вльше, въ па́мяти свята́го му́ченика святолѣ́пно ликовству́емъ, дне́сь весе́ліемъ просла́вимъ Го́спода, просла́вльшаго блаже́ннаго Михаи́ла, сему́ а́біе учу́вствившеся, дне́сь, кла́няющеся чудото́чному его́ гро́бу, возопіи́мъ: ра́дуйся, дру́же Госпо́день, попра́вый змíеву главу́; ра́дуйся, по обы́чаю невре́дно о́бразъ сохрани́вый; ра́дуйся, за Христо́вы за́повѣди убіе́ніе пріе́мый, его́же тѣ́ло по убіе́ніи на мѣ́стѣ пу́стѣ пове́ржено, мно́зи же вѣ́рніи ви́дѣша отъ него́ сто́лпъ о́гненъ отъ земли́ до небесе́; ра́дуйся, цвѣ́те благово́нный, неувяда́емый Россíйскій, не преста́й моля́ся Христу́ поми́ловати и спасти́ свѣтоно́сную па́мять твою́ пра́зднующихъ.

Кано́нъ пра́здника со ирмосо́мъ на 6, и свята́го два́ кано́на на 8.

[Кано́нъ пра́здника, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ вхожде́ніе.

Прему́дрости, Пречи́стая, Тя сокро́вище вѣ́мы и благода́ти, точа́щую исто́чникъ приснотеку́щій ра́зума, про́симъ: Твоя́ ка́пли одожди́, Влады́чице, е́же воспѣва́ти Тя́ при́сно.

Превы́шши, Пречи́стая, небе́съ бы́вши, хра́мъ и пала́та, въ хра́мъ Бо́жій возложи́лася еси́ Тому́ угото́ватися въ Боже́ственное жили́ще прише́ствія Его́.

Свѣ́тъ возсія́вши Богоро́дица благода́ти, вся́ просвѣти́ и совокупи́ пресвѣ́тлое Ея́ украси́ти торжество́ пѣ́сньми: пріиди́те, къ Не́й стеце́мся.

Две́рь сла́вная, по́мыслы непроходи́мая, две́ри отве́рзши хра́ма Бо́жія, ны́нѣ повелѣва́етъ на́мъ, совше́дшимъ, Боже́ственныхъ Ея́ чуде́съ наслади́тися.]

Кано́нъ свята́го, гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Въ по́мощь Тебе́, Христе́, призыва́ю и дерза́ю воспѣ́ти страстоте́рпца Твоего́ па́мять устна́ми недосто́йными: Влады́ко Христе́, утверди́ помышле́ніе на хвалосло́віе Твоего́ уго́дника.

Россíйское удобре́ніе, и Правовѣ́рному Импера́тору на́шему [и́мярекъ] похвалу́ и крѣ́пость тво́й показа́въ доброу́мный смы́слъ, богому́дре Михаи́ле досточу́дне.

Съ де́рзостію прія́лъ еси́ Христо́во уче́ніе въ се́рдцы, е́же положи́ти ду́шу твою́ за дру́ги твоя́; я́коже Христо́съ за ны́ кро́вь Свою́ пролія́.

Богоро́диченъ: Засту́пнице скорбя́щихъ, спасе́нія Наде́жда ненадѣ́ющихся, Богоро́дице Всепѣ́тая, моли́ прилѣ́жно изба́витися на́мъ отъ бѣ́дъ.

Другíй кано́нъ свята́го. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Яко по зако́ну ходи́въ, смире́нную му́дрость воспрія́лъ еси́, вели́кій страда́льче, со святы́ми Тро́ицѣ предстоя́, моли́ся очище́ніе на́мъ дарова́ти, тебе́ похваля́ющимъ.

Боже́ственное бога́тство исцѣле́ній и мѵ́ро благово́нное источа́етъ хра́мъ тво́й, свя́те, въ не́мже пое́мъ Христа́ Бо́га, просла́вльшаго тя́.

Незаходи́мое Со́лнце въ себѣ́ стяжа́въ — Христа́, Бо́га на́шего, пресла́вный Михаи́ле, освяти́ ны, честну́ю па́мять твою́ почита́ющія.

Богоро́диченъ: Красну́ и избра́нну Всечи́стую, разумѣ́въ Тя́, Сы́нъ Бо́жій, Всенепоро́чная, Сы́нъ Тво́й бы́сть, сы́ны сотвори́ благода́тію Богоро́дицу Тя́ чту́щія.

Катава́сія: Спасе́ лю́ди чудодѣ́йствуяй Влады́ка...

Пѣ́снь 3.

[Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ликъ себѣ́ совоку́пльшія, духо́вно утверди́, въ честно́мъ вхожде́ніи Твое́мъ вѣнце́въ сла́вы сподо́би.

Невѣстокраси́тель дне́сь яви́ся кра́сный Дѣ́вы хра́мъ и черто́гъ, пріе́мь одушевле́нный черто́гъ Бо́жій, Чи́стую, и Непоро́чную, и Свѣтлѣ́йшую всея́ тва́ри.

Дави́дъ, предначина́я ликова́ніе, игра́етъ, и ликовству́етъ съ на́ми, и Цари́цу зове́тъ Тя́ укра́шену, Пречи́стая, предстоя́щу, Всечи́стая, въ хра́мѣ Царю́ и Бо́гу.

Изъ нея́же преступле́ніе произы́де дре́вле ро́ду человѣ́ческому, изъ Тоя́ исправле́ніе и нетлѣ́ніе процвѣте́: Богоро́дица дне́сь приводи́ма въ до́мъ Бо́жій.

Игра́ютъ а́нгельская во́инства и всѣ́хъ человѣ́къ мно́жество, и предъ лице́мъ, Пречи́стая, предтеку́тъ Твои́мъ дне́сь свѣщено́сицы, зову́ще вели́чествія Твоя́ въ дому́ Бо́жіи.

Инъ.]

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Оби́телище бы́сть Свята́го Ду́ха твое́ свято́е се́рдце, и́мже не убоя́лся еси́ непра́веднаго царя́ я́рости, страстоте́рпче Михаи́ле.

Отъ святу́ю боку́ богому́дрыя Ксе́ніи, блаже́нне, роди́лся еси́, съ не́юже тя́ блажи́мъ, страда́льче прехва́льне, спаси́ гра́дъ тво́й и лю́ди, пою́щія тя́.

Заколе́нъ бы́лъ еси́ отъ непра́ведныхъ твои́хъ убíйцъ и вопія́лъ еси́ Влады́цѣ Христу́: пріими́ ду́хъ мо́й, Влады́ко, на Тя́ бо упова́ніе мое́ возложи́хъ, Го́споди.

Богоро́диченъ: Глаго́лы проповѣ́дникъ богогла́сныхъ исполня́ются, сего́ роди́ Дѣ́ва но́ваго Младе́нца, Ада́ма старѣ́йша и сопресто́льна Роди́телю.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Весе́ліемъ весели́тся Христо́ва Це́рковь въ па́мять твою́, свя́те, и Творцу́ вопіе́тъ: Ты́ моя́, Го́споди, крѣ́пость, и прибѣ́жище, и утвержде́ніе.

До́бляго вѣне́чника и страда́льца Христо́ва восхва́лимъ свѣ́тло, научи́вшаго на́съ Христу́ вопи́ти: свя́тъ еси́, Го́споди.

Ни ца́рства жела́ніе, ни пи́щи наслажде́ніе, ни сребра́, ни зла́та возжелѣ́въ, но Христу́ еди́ному вопія́ше: свя́тъ еси́, Го́споди, ино́го бо, ра́звѣ Тебе́, не зна́ю.

Богоро́диченъ: Избавля́ющаго человѣ́ки преслуша́нія и лю́таго паде́нія, всему́ Вино́внаго, Чи́стая и Всенепоро́чная, родила́ еси́.

Конда́къ пра́здника, [гла́съ 4. Подо́бенъ: Вознесы́йся.

Пречи́стый хра́мъ Спа́совъ, многоцѣ́нный черто́гъ и Дѣ́ва, свяще́нное сокро́вище сла́вы Бо́жія, днесь вво́дится въ до́мъ Госпо́день, благода́ть совводя́щи, Яже въ Ду́сѣ Боже́ственномъ, Юже воспѣва́ютъ а́нгели Бо́жіи: Сія́ е́сть селе́ніе небе́сное.

Икосъ:

Неизрече́нныхъ Бо́жіихъ и Боже́ственныхъ та́инъ зря́ въ Дѣ́вѣ благода́ть явля́емую и исполня́емую я́вственно, ра́дуюся и о́бразъ разумѣ́ти недоумѣ́юся, стра́нный и неизрече́нный: ка́ко избра́нная, Чи́стая, еди́на яви́ся па́че всея́ тва́ри ви́димыя и разумѣва́емыя? Тѣ́мже восхвали́ти хотя́ Сію́, ужаса́юся зѣло́ умо́мъ же и сло́вомъ, оба́че дерза́я, проповѣ́даю и велича́ю: Сія́ есть селе́ніе небе́сное.]

И сѣда́ленъ свята́го, гла́съ 8. Подо́бенъ: Прему́дрости.

Му́дростію Бо́жіею уразумѣ́лъ еси́ мимоходя́щую жи́знь и о княже́ніи небре́гъ, но на небе́сное Ца́рство прите́клъ еси́, повину́яся сыновцу́, я́ко овча́ незло́биво, безъ пра́вды ноже́мъ закала́емь бы́лъ еси́, я́ко бо свирѣ́піи звѣ́ріе беззло́бива а́гнца безъ вины́ тя́ убива́ху. Тѣ́мъ и со а́нгелы веселя́ся, Михаи́ле свя́те, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній вся́ изба́ви на Тя́ наде́жду, Отрокови́це, иму́щія и ду́ши на́ша спаси́ Боже́ственными мольба́ми Твои́ми.

Пѣ́снь 4.

[Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Две́рь непрохо́дную Бо́жій до́мъ пріе́мля дне́сь, преста́ти сотвори́ вся́кой слу́жбѣ зако́нной, я́ко и́стинно яви́ся, зовы́й, су́щимъ на земли́ Истина.

Гора́ присѣ́нная, ю́же прови́дѣ дре́вле Авваку́мъ, предпроповѣ́да вну́трь вмѣсти́вшуюся въ нехо́дныхъ хра́ма, добродѣ́тели процвѣ́тши, и покрыва́етъ концы́.

Ви́дѣвши пресла́вная вся́ земля́ стра́нныя же и ди́вныя ве́щи, ка́ко Дѣ́ва, отъ а́нгела пи́щу пріе́млющи, о́бразы строе́нія но́ситъ.

Хра́мъ, и пала́та, и не́бо одушевле́нное я́вльшися, Богоневѣ́сто Царе́ва, во хра́мъ зако́нный приводи́ма дне́сь, Тому́ соблюда́ема, Пречи́стая.

Инъ.]

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Пріи́демъ, бра́тіе, къ честнѣ́й ра́цѣ во́ина Христо́ва и му́ченика Михаи́ла и облобыза́емъ серде́чными устна́ми, пріе́млюще неоску́дныя да́ры отъ трудополо́жника Христа́ и Спа́са ду́шъ на́шихъ.

Бо́жіимъ про́мысломъ и Свята́го Ду́ха дѣ́телію твое́ свято́е тѣ́ло отъ губи́тельныя страны́ принесено́ бы́сть, источа́ющее на́мъ рѣ́ки исцѣле́ній струя́ми крове́й твои́хъ, Михаи́ле.

Послѣ́довалъ еси́ Христу́ и му́цѣ Его́ уподо́бился еси́, преблаже́нне богоно́се Михаи́ле, пѣвцы́ твоя́ сохраня́й и гра́дъ на́шъ заступи́ отъ нахожде́нія пога́ныхъ и отъ всѣ́хъ бѣ́дъ богопрія́тными твои́ми моли́твами.

Богоро́диченъ: Просвѣти́, Чи́стая, души́ моея́ о́чи, Свѣ́тъ роди́вшая, да не пости́гнетъ мене́ грѣхо́вная тма́ тя́жкая и глубина́ отча́янія покры́етъ мя́, но Сама́ мя спаси́ и напра́ви къ тишинѣ́ Боже́ственнаго хотѣ́нія.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Благода́тію изъ мла́да въ вѣ́рѣ чи́стѣ воспита́нъ, ча́стыми труды́ и любо́вію Влады́цѣ послѣ́довалъ еси́ и наде́ждею Его́ льсти́ваго врага́ посрами́лъ еси́.

Врачевство́ неистощи́мое ра́ка твоя́ показа́ся, блаже́нне, и приста́нище небу́рное: вси́, вѣ́рою притека́ющіи, обрѣта́емъ отъ злы́хъ избавле́ніе.

Любо́вію ко Христу́ привяза́емь, тѣ́мъ и да́ра сподо́блься стра́сти разли́чныя исцѣля́ти. Сего́ ра́ди твое́ соверша́емъ пра́зднество, богому́дре.

Богоро́диченъ: Просвѣти́ мя, Пречи́стая Госпоже́, омраче́ннаго грѣхо́вными страстьми́, въ тлѣ́ніи лежа́ща, моли́твами Твои́ми свободи́.

Пѣ́снь 5.

[Ирмо́съ: Ужасо́шася вся́ческая въ честнѣ́мъ вхожде́ніи Твое́мъ: Ты бо, Неискусобра́чная Дѣ́во, вну́трь вошла́ еси́ въ хра́мъ Бо́жій, я́коже честнѣ́йшій хра́мъ, всѣ́мъ воспѣва́ющимъ Тя́ ми́ръ подава́ющая.

Свяще́ніе сла́вное и свяще́нное возложе́ніе, дне́сь Пречи́стая Дѣ́ва, возложи́вшися въ хра́мъ Бо́жій, Всецарю́ на́шему Бо́гу Еди́ному въ жили́ще соблюда́ется, я́ко вѣ́сть Са́мъ.

Добро́ту, Пречи́стая, души́ Твоея́ зря́ нѣ́когда, вѣ́рою Заха́рія возопи́: Ты́ еси́ избавле́ніе, Ты́ еси́ всѣ́хъ ра́дость, Ты́ еси́ воззва́ніе на́ше, Еюже Невмѣ́стный вмѣще́нъ мнѣ́ яви́тся.

О, па́че ума́ чуде́съ Твои́хъ, Всечи́стая́! Стра́нное Твое́ рождество́ е́сть, стра́ненъ о́бразъ возраще́нія Твоего́, стра́нна и пресла́вна Твоя́, Богоневѣ́сто, вся́ и человѣ́ки несказа́нна.

Свѣ́щникъ многосвѣ́тлый су́щи, Богоневѣ́сто, дне́сь возсія́ла еси́ въ дому́ Госпо́дни и озаря́еши ны́ честны́ми дарова́ніи, Чи́стая, чуде́съ Твои́хъ, Богоро́дице всепѣ́тая.

Инъ.]

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди ра́звѣ Тебе́ ино́го не вѣ́мы, и́мя Твое́ имену́емъ.

Го́споди Бо́же мо́й, — Михаи́лъ вопія́ше, — Ты́ у́бо, Го́споди, на́съ ра́ди сме́рти вкуси́лъ еси́ и спа́слъ еси́ ро́дъ человѣ́ческій Твое́ю кро́вію, Христе́ Бо́же.

Го́споди Бо́же мо́й, сподо́би мя́ прія́ти небе́снаго селе́нія и сла́вы неизрече́нныя и въ тлѣ́нныхъ мѣ́сто нетлѣ́нная пода́ждь, Влады́ко, вопія́лъ еси́, богови́дче.

Тезоимени́те вы́шняго воево́ды, Михаи́ле, огнезра́чнаго, съ ни́мже умоли́ Христа́ пода́ти ми́ръ Импера́тору на́шему [и́мярекъ] и утиши́ти вра́жія стремле́нія.

Богоро́диченъ: Укрѣпи́, Влады́чице, сла́вящаго Тя́ Импера́тора на проти́вныя враги́, я́ко Дави́да на Голіа́ѳа, да Тебе́, веселя́щеся, воспѣва́емъ: ра́дуйся, Покро́ве святы́й и Засту́пнице ро́да на́шего.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Наста́ всечестны́й пра́здникъ и свяще́нное торжество́ Михаи́ла сла́внаго, нося́щаго на́мъ ра́дость вѣ́чную, въ не́йже сла́вимъ Го́спода, просла́вльшаго его́.

Добродѣ́телей укра́шенный благолѣ́піемъ, свѣ́тлый Михаи́ле, страда́ніемъ вѣнча́вся, врага́ же и сыновца́ посрами́въ, по Христѣ́ пріе́мля заколе́ніе.

Слы́шано бы́сть во все́мъ мíрѣ честно́е и свяще́нное страда́ніе твое́, и вся́къ язы́къ составля́етъ сла́вити Христа́, тебе́ просла́вльшаго.

Богоро́диченъ: Преста́ у́бо тлѣ́ніе, Дѣ́ва бо роди́ нетлѣ́нно Бо́га Сло́ва па́че естества́ и сло́ва, Дѣ́ва и по Рождествѣ́ пребы́вши.

Пѣ́снь 6.

[Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Вся́ческая Нося́й глаго́ломъ, моли́тву пра́ведныхъ услы́ша. Тѣ́мже непло́дныя разрѣши́лъ еси́ неду́гъ, я́ко Благоутро́бенъ, ра́дости Вино́вную симъ дарова́.

Сказа́ти хотя́ Госпо́дь язы́комъ Свое́ спасе́ніе, Неискусобра́чную ны́нѣ отъ человѣ́къ прія́тъ, примире́нія зна́меніе и обновле́нія.

Яко до́мъ су́щи благода́ти, въ не́мже сокро́вища лежа́тъ неизрече́ннаго Бо́жія строе́нія, Всечи́стая, въ хра́мѣ причасти́лася еси́ нетлѣ́нныя сла́дости.

Діади́му Тя ца́рскую пріе́мъ, храмъ, Богоневѣ́сто, просвѣща́шеся и подступа́ше лу́чшимъ, предрече́нныхъ зря́ на Тебѣ́ сбытіе́.

Инъ.]

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Свѣ́томъ благода́ти озаря́емь, страстоте́рпче му́дре, невозвра́тно ше́ствовалъ еси́ путе́мъ, вводя́щимъ къ вы́шнему Іерусали́му: Святы́й бо Ду́хъ наста́ви тя́, обита́яй въ се́рдцѣ твое́мъ, Михаи́ле.

Тлѣ́нная бу́дущими измѣни́лъ еси́, я́ко ме́чь обоюдуо́стръ, вооружи́вся стра́хомъ Христо́вымъ, го́рькую сме́рть въ ничто́же вмѣни́лъ еси́, сла́вы вы́шнія жела́я.

Умъ тво́й къ Бо́гу впери́въ, наде́ждею и вѣ́рою укрѣпи́вся, я́ко во́инъ непобѣ́дный, заколе́нія непра́веднаго не убоя́лся еси́, му́дре, богови́дче Михаи́ле.

Богоро́диченъ: Тебѣ́ припа́дающе, Госпоже́, и вѣ́рою покланя́ющеся, мо́лимъ Тя́: ра́дуйся, Богоблаже́нная Дѣ́во, покро́ве и огражде́ніе на́ше, помо́щнице въ бѣда́хъ су́щимъ, спаси́ ны, не иму́щія по́мощи, на Тя́ бо надѣ́емся.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Житіе́ вре́менное презрѣ́въ и о княже́ніи неради́въ свѣ́та сего́, не воспроти́влься врагу́ и сыновцу́, но па́че на Го́спода взира́ше мы́слію.

Свѣ́тлый тво́й пра́здникъ о соверша́ющихъ, блаже́нне, моли́ся, оте́чество твое́ сохрани́ти отъ вра́гъ ненавѣ́тно и ми́рно строе́ніе дарова́ти Импера́тору на́шему [и́мярекъ] моли́твами твои́ми.

Княже́ніе земно́е и ца́рское украше́ніе оста́вивъ, воспрія́лъ еси́ вѣне́цъ изъ Бо́жія Влады́чни десни́цы и со а́нгелы лику́еши. Моли́ Го́спода за ны́, чту́щія твою́ па́мять.

Богоро́диченъ: Усты́, и по́мысломъ, и се́рдцемъ, Пречи́стая, проповѣ́дуемъ Тя́, веселя́щеся: Тобо́ю бо Бо́гу примири́хомся, отринове́нніи преступле́ніемъ пе́рвѣе пра́отца.

Конда́къ, гла́съ 2. Подо́бенъ: Вы́шнихъ ища́.

Вы́шнихъ ища́ и земну́ю сла́ву презрѣ́въ, Це́рковь Бо́жію обагри́лъ еси́ твое́ю кро́вію, за Ню́же и пострада́лъ еси́, свя́те Михаи́ле, заколе́ніе непра́ведное пріе́мь, веселя́ся. Тѣ́мже со а́нгелы предстоя́ Христу́ Бо́гу, моли́ непреста́нно за вся́ ны́.

Икосъ:

Сла́ву возненави́дѣлъ еси́ тлѣ́нную и мимотеку́щую, и добродѣ́тели яви́лся еси́ сосу́дъ, сла́вне, отъ ю́ности и, зако́нъ Бо́жій отъ души́ возлюби́въ и зрѣ́ніе къ жи́зни гряду́щей, о че́сти земнѣ́й и сла́сти небре́гъ, нетлѣ́нное Ца́рство воспрія́лъ еси́; Христо́вѣ за́повѣди послѣ́дуя, положи́лъ еси́ ду́шу твою́ за ны́ и Христо́вѣ стра́сти уподо́бился еси́, заколе́нъ въ ре́бра, и кро́вію твое́ю изба́вилъ еси́ ны́ пога́ныхъ наше́ствія и го́рькія сме́рти. Сего́ ра́ди вопіе́мъ ти́: страстоте́рпче Михаи́ле, со а́нгелы предстоя́, моли́ся за вся́ ны́.

Пѣ́снь 7.

[Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Се́ дне́сь возсія́ конце́мъ весна́ ра́достная, просвѣща́ющи на́шу ду́шу, и помышле́ніе и у́мъ благода́тію, торжество́мъ Богоро́дицы дне́сь та́инственно да учреди́мся.

Да дароно́сятъ днесь вся́ческая Цари́цѣ, Ма́тери Бо́жіи, не́бо и земля́, и а́нгеловъ чи́ни, и человѣ́ковъ мно́жество и да вопію́тъ: во хра́мъ вво́дится Ра́дость и Избавле́ніе.

Писа́ніе мимотече́ и оскудѣ́ зако́нъ, я́коже сѣ́нь, и благода́ти лучи́ возсія́ша въ хра́мъ Бо́жій вше́дшей Тебѣ́, Дѣ́во Ма́ти Чи́стая, въ не́мъ благослове́нная.

Повину́ся Рождеству́ Твоему́, Всечи́стая, я́ко Творцу́ и Бо́гу не́бо, и земля́, и преиспо́дняя, и вся́къ язы́къ земны́хъ исповѣ́даетъ, я́ко Госпо́дь яви́ся, Спа́съ ду́шъ на́шихъ.

Инъ.]

Ирмо́съ: Халде́йская пе́щь, огне́мъ распаля́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Вели́чіе на́ше и похвала́, ты́ еси́, Михаи́ле богому́дре, тобо́ю бо отъ пога́нскія рабо́ты свободи́хомся. И ны́нѣ моли́ за ро́дъ тво́й и лю́ди, вопію́щія: благослове́нъ Бо́гъ оте́цъ на́шихъ.

Ты́ уподо́бился еси́ Моисе́ю богови́дцу, сокруше́ннымъ се́рдцемъ моля́ся о ста́дѣ твое́мъ изба́вити гра́дъ тво́й и лю́ди отъ вра́жія рабо́ты, вопію́щія: благослове́нъ Бо́гъ оте́цъ на́шихъ.

Всехва́льный гла́съ и мольбу́ тебѣ́ возсыла́емъ, къ ра́цѣ моще́й твои́хъ приходя́ще, блаже́нне Михаи́ле: проси́ ми́ра Импера́тору на́шему [и́мярекъ] и душа́мъ на́шимъ оставле́нія грѣхо́въ, пою́щимъ: благослове́нъ Бо́гъ оте́цъ на́шихъ.

Богоро́диченъ: Неиспи́санная мно́гими проро́ки, не свѣ́дома же бы́сть, Дѣ́во, небе́сными служа́щими Бо́гу а́нгелы, ны́нѣ же Тя́ вси́ вѣ́дуще, Богоро́дицу, Твоея́ тре́буемъ по́мощи и заступле́нія, Благослове́нная.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Ле́стію прелука́ваго дре́вле, очервлена́ бы́сть земля́ кро́вію Авеля братоубíйственною руко́ю Ка́ина, ны́нѣ же кро́вію твое́ю окропи́вшися, благоуха́нія же́ртву Христу́ приноша́етъ, вопію́ще: благослове́нъ Бо́гъ оте́цъ на́шихъ.

Боже́ственная и пресвѣ́тлая па́мять твоя́, я́ко не́бо, свѣтоза́рно показа́ся, я́ко со́лнце, свѣтоно́сно просвѣща́я безъ сумнѣ́нія Христу́ вопію́щія: благослове́нъ еси́, Бо́же оте́цъ на́шихъ.

Кто́ не удиви́тся и кто́ не воспое́тъ и просла́витъ вѣ́рно пресла́внаго му́ченика Христо́ва Михаи́ла? Христо́ва ра́ди смире́нія возненави́дѣвша діади́му и ца́рство.

Богоро́диченъ: Тобо́ю на́мъ, Дѣ́во, свѣ́тъ возсія́, те́мнымъ, и отпу́стъ плѣне́ннымъ, Ты́ бо родила́ еси́ Зижди́теля всѣ́хъ, Бо́га, у Него́же испроси́, Пречи́стая, посла́ти вѣ́рнымъ ве́лію ми́лость.

Пѣ́снь 8.

[Ирмо́съ: Слы́ши, Отрокови́це, Дѣ́во Чи́стая, да рече́тъ у́бо Гавріи́лъ совѣ́тъ Вы́шняго, дре́вній, и́стинный: бу́ди къ прія́тію гото́ва Бо́жію, Тобо́ю бо Невмѣсти́мый съ человѣ́ки поживе́. Тѣ́мъ и ра́дуяся, вопію́: благослови́те, вся́ дѣла́ Госпо́дня, Го́спода.

Пречи́стый хра́мъ въ до́мъ Бо́жій приводя́щи Анна иногда́, вопію́щи, съ вѣ́рою рече́ свяще́ннику: ча́до, отъ Бо́га да́нное мнѣ́, пріи́мъ ны́нѣ, введи́ во храмъ Зижди́теля твоего́ и, ра́дуяся, по́й Ему́: благослови́те, вся́ дѣла́ Госпо́дня, Го́спода.

Рече́, ви́дѣвъ, Аннѣ иногда́ Ду́хомъ Заха́рія: Жи́зни Ма́терь вво́диши и́стинную, Юже свѣ́тло проро́цы Бо́жіи Богоро́дицу проповѣ́даша, и ка́ко хра́мъ вмѣсти́тъ Ю? Тѣ́мъ чудя́ся, вопію́: благослови́те, вся́ дѣла́ Госпо́дня, Го́спода.

Раба́ Бо́жія бы́хъ а́зъ, — отвѣща́ Анна ему́, — призыва́ющи Сего́ вѣ́рою и моли́твою, прія́ти моея́ болѣ́зни плодъ, по прія́тіи же рожде́нную привести́ Да́вшему Ю. Тѣ́мъ, зовя́, вопію́: благослови́те, вся́ дѣла́ Госпо́дня Го́спода.

Зако́нное вои́стинну дѣ́ло есть, — свяще́нникъ рече́ е́й, — стра́нну же весьма́ ве́щь поразумѣва́ю, зря́ Приводи́мую въ до́мъ Бо́жій, пресла́вно превосходя́щую свята́я благода́тію. Тѣ́мъ и ра́дуяся, вопію́: благослови́те, вся́ дѣла́ Госпо́дня, Го́спода.

Возмога́ю, — рече́ Анна ему́, — зна́ющи, я́же глаго́леши, разумѣ́еши бо сія́ Ду́хомъ Бо́жіимъ, я́сно я́же Дѣ́вы проповѣ́далъ еси́; пріими́ у́бо Пречи́стую въ хра́мъ Созда́теля твоего́ и, ра́дуяся, по́й Ему́: благослови́те, вся́ дѣла́ Госпо́дня, Го́спода.

Свѣтоно́сна на́мъ возжже́ся свѣща́, — возопи́ свяще́нникъ, — ра́дость велича́йшую свѣтя́щи въ хра́мѣ; ду́ши проро́ческія да сра́дуются мнѣ́, я́ко пресла́вная зря́ще, соверша́емая въ дому́ Бо́жіи, и да вопію́тъ при́сно: благослови́те, вся́ дѣла́ Госпо́дня, Го́спода.

Инъ.]

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Въ наро́читый де́нь свята́го преставле́нія ра́достно пра́зднуемъ, пѣ́снь моле́бную Христу́ возсыла́юще, нетлѣ́ннымъ вѣнце́мъ вѣнча́вшу тя́, прехва́льне Михаи́ле: проси́ на́мъ оставле́нія грѣхо́въ, сла́вящимъ тя́ вѣ́рно.

Похва́льныя цвѣ́ты, я́ко ца́рскій вѣне́цъ, богому́дрѣй твое́й главѣ́ въ па́мять прино́симъ, ю́же Христо́съ нетлѣ́ніемъ вѣнча́, преблаже́нне Михаи́ле: моли́ся о ста́дѣ твое́мъ, изба́витися гра́ду твоему́ отъ вся́кія бѣды́.

Лива́нъ ли го́ру нарече́мъ тя́, богому́драя Ксе́ніе, или́ Фисо́нъ рѣку́, добрѣ́йши сапфи́ра и ка́менія честна́го, блаже́ннаго Михаи́ла ро́ждшую? Имже просвѣти́ся Россíйская страна́, и́же и мо́лится за на́съ ко Го́споду.

Богоро́диченъ: Горды́ню и шата́нія низложи́, и совѣ́ты непра́ведныя князе́й разори́, и зачина́ющія ра́ть погуби́, о Ма́ти Бо́жія, Пречи́стая Дѣ́во! Вѣ́рнаго Импера́тора на́шего [и́мярекъ] ро́гъ возвы́си, да Тво́й, Пречи́стая, пра́здникъ сла́вимъ, Богоро́дице Дѣ́во, во вѣ́ки вся́.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Просія́вши дне́сь пресвѣ́тлая па́мять твоя́, преблаже́нне, вѣ́рныя созыва́етъ ны́ на торжество́ просла́вити терпѣ́нія твоя́, Христу́ же вопи́ти: благослови́те, вся́ дѣла́ Госпо́дня, Го́спода.

Тѣ́ло твое́ свято́е и преблаже́нное пріи́мши, свята́я Це́рковь дне́сь весели́тся съ вѣ́рными, преди́вная чудеса́ ви́дящи, Христа́ превозно́симъ во вѣ́ки.

Богоявле́нный но́вый страда́лецъ Тебе́, Христе́, еди́наго возлюби́ и лю́ди наста́ви пѣ́ти Тя́, Творца́ всѣ́хъ: благослови́те и превозноси́те Его́ во вѣ́ки.

Богоро́диченъ: Свѣ́тъ и Свѣтода́вца Сло́во зачала́ еси́ и неизрече́нно родила́ еси́ Пресу́щнаго: Ду́хъ Бо́жій, Дѣ́во, въ Тя́ всели́ся. Тѣ́мъ Тя́ пое́мъ, Чи́стая, во вѣ́ки вся́.

Пѣ́снь 9.

[Ирмо́съ: Яко одушевле́нному Бо́жію киво́ту да ника́коже ко́снется рука́ скве́рныхъ, устнѣ́ же вѣ́рныхъ Богоро́дицѣ немо́лчно, гла́съ а́нгела воспѣва́юще, съ ра́достію да вопію́тъ: и́стинно вы́шши всѣ́хъ еси́, Дѣ́во Чи́стая.

Яко пресвѣ́тлую, Богоро́дице Чи́стая, душе́вныя чистоты́ иму́щи добро́ту, благода́тію же Бо́жіею исполня́ема съ небесе́, Свѣ́томъ Присносу́щнымъ просвѣща́еши всегда́ съ весе́ліемъ вопію́щія: и́стинно вы́шши всѣ́хъ еси́, Дѣ́во Чи́стая.

Прелета́етъ, Богоро́дице, Чи́стая, чу́до Твое́ си́лу слове́съ: тѣ́ло бо въ Тебѣ́ поразумѣва́ю па́че сло́ва, тече́нія грѣхо́внаго непрія́тно. Тѣ́мже благода́рственно вопію́ Ти: и́стинно вы́шши всѣ́хъ еси́, Дѣ́во Чи́стая.

Пресла́вно прообразова́ше, Чи́стая, зако́нъ Тя́ ски́нію и Боже́ственную ста́мну, стра́ненъ киво́тъ, и катапета́сму, и же́злъ, хра́мъ неразруши́мый и две́рь Бо́жію. Тѣ́мже науча́ютъ Тебѣ́ зва́ти: и́стинно вы́шши всѣ́хъ еси́, Дѣ́во Чи́стая.

Пѣснопоя́ Тебѣ́, провозглаша́ше Дави́дъ, глаго́ля Тя́ Дще́рь Царе́ву, красото́ю добродѣ́телей, одесну́ю предстоя́щую Бо́га, ви́дѣвъ Тя упещре́ну. Тѣ́мже, проро́чествуя, вопія́ше: и́стинно вы́шши всѣ́хъ еси́, Дѣ́во Чи́стая.

Богопрія́тну предзря́, Соломо́нъ, проповѣ́да Тя́ о́дръ Царе́въ, живы́й исто́чникъ запеча́тствованъ, изъ него́же нему́тная на́мъ произы́де вода́, вѣ́рою вопію́щимъ: и́стинно вы́шши всѣ́хъ еси́, Дѣ́во Чи́стая.

Подае́ши дарова́ній Твою́ тишину́, Богоро́дице, души́ мое́й, точа́щи жи́знь Тебе́ чту́щимъ по до́лгу, Сама́ защища́ющи, и покрыва́ющи, и соблюда́ющи, вопи́ти Тебѣ́: и́стинно вы́шши всѣ́хъ еси́, Дѣ́во Чи́стая.

Инъ.]

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе; на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Пріими́ похвалу́ отъ ра́бъ недосто́йныхъ и моли́тву о на́съ сотвори́ къ Бо́гу, че́стно творя́щихъ твою́ па́мять, да отъ бѣ́дъ, и печа́лей, и грѣ́хъ лю́тыхъ свободи́мся, тя́ велича́юще.

Яко голуби́ца цѣлому́драя, на фи́никсъ добродѣ́тели возше́лъ еси́, кри́ла иму́щи свяще́нна и позлаще́нна, и́миже возлетѣ́въ, въ ра́йстѣй пи́щи водворя́ешися, преблаже́нне.

Предстоя́ у престо́ла всѣ́хъ Влады́ки, богови́дче Михаи́ле, о творя́щихъ честно́е твое́ пра́зднество, гра́ду на́шему изба́витися отъ напа́стей и бѣ́дъ, здра́віе и побѣ́ду Благовѣ́рному Импера́тору на́шему [и́мярекъ] и всѣ́мъ князе́мъ на́шимъ на проти́вныя враги́, испроси́ моли́твами твои́ми.

Богоро́диченъ: Высо́кій Царю́, со Отце́мъ сѣдя́й и отъ Серафи́мъ пое́мый, при́зри на мольбу́ Ма́терню, ю́же Ти́ за ны́ дне́сь прино́ситъ. Очи́сти грѣхи́ на́ша, и спаси́ гра́дъ, и лю́ди умно́жи, и да́ждь Благовѣ́рному Импера́тору на́шему [и́мярекъ] здра́віе тѣлеси́ и на пога́ныя побѣ́ду, моли́твами ро́ждшія Тя́.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Укра́шенъ бы́въ Боже́ственными добро́тами, страда́ніи твои́ми къ Бо́гу восте́клъ еси́, вѣне́цъ побѣ́ды отъ Него́ пріе́мь. Тѣ́мъ твоя́ пѣвцы́ помина́й, да тя́ непреста́нно велича́емъ.

Отъ мла́да во́зраста освяти́ тя Вседѣ́тель Бо́гъ и ко́рмчія изря́дна пла́вающимъ въ мо́ри житія́ показа́въ. Тѣ́мъ согла́сно почита́емъ па́мять твою́.

Пріи́мъ блаже́нный поко́й, не преста́й моля́ся, пресла́вне, святы́хъ блаже́нству причасти́тися на́мъ, чту́щимъ па́мять твою́, Михаи́ле, пресла́вную.

Богоро́диченъ: Богоро́дице Дѣ́во, ро́ждшая Сло́во па́че словесе́, Зижди́теля Твоего́, Того́ моли́ за ны́ съ си́мъ блаже́ннымъ Михаи́ломъ, вѣ́рно чту́щія Тебе́, Богоро́дице.

Свѣти́ленъ:

Свѣти́ло, на́мъ просія́вшее въ послѣ́днее вре́мя, просвѣти́ ны, твоя́ пѣвцы́, святы́й великому́чениче Михаи́ле, и моли́ за ны́ Го́спода, чту́щія па́мять твою́. [Два́жды.]

Сла́ва, и ны́нѣ, пра́здника. [Подо́бенъ: Жены́, услы́шите:

Юже дре́вле предвозвѣсти́ проро́ческое сосло́віе, ста́мну, и же́злъ, и скрижа́ль, и несѣко́мую го́ру, Марíю Богоотрокови́цу вѣ́рно да восхва́лимъ: дне́сь бо вво́дится во свята́я святы́хъ воспита́тися Го́споду].

На хвали́техъ стихи́ры пра́здника 3, [гла́съ 6. Подо́бенъ: Тридне́венъ.

Дѣ́вы, сликовству́йте,* отрокови́цы, взыгра́йте,* свѣщи́ нося́ще,* воспо́йте свѣ́тло* еди́ну Богоро́дицу Чи́стую, Пресвяту́ю* и небе́сная воспо́йте.

Ангеловою Тя́ руко́ю, Дѣ́во,* пи́щею всѣ́хъ Творе́цъ,* Сы́нъ Тво́й, пита́етъ, Влады́чице Чи́стая,* святы́хъ во свята́я,* явля́я Твое́ мíру* вели́чествіе пребо́льшее.

Святы́хъ пресвята́я Дѣ́во Богоневѣ́сто,* ро́ждшая Влады́ку всѣ́хъ,* еди́наго отъ Тро́ицы,* Того́ моли́* всѣ́хъ воспѣва́ющихъ Тя́* изба́вити отъ бѣ́дъ].

И свято́му 3, гла́съ 1. Подо́бенъ: Небе́сныхъ чино́въ.

Свѣтоза́рна, и свя́та, и благообра́зна* кня́зя же и му́ченика* всепра́зднственная па́мять,* я́же, всю́ зе́млю просвѣща́ющи* и мра́къ грѣхо́вный отгоня́ющи,* врачева́ній благода́ть источа́етъ.

Ка́плями крове́й святы́ми* очервлени́въ ри́зы твоя́, свя́те Михаи́ле,* тѣ́мъ, весе́лымъ се́рдцемъ* па́мять твою́ пра́зднующе,* мо́лимся непреста́нно,* да мо́лишися за вся́ ны́.

Яко звѣзда́ свѣ́тлая, мíръ просвѣща́еши* чуде́сными блиста́ньми,* страстоте́рпче Михаи́ле,* мра́къ грѣхо́вный отгоня́.* Тѣ́мъ восхваля́емъ ра́достно,* похваля́юще твою́ па́мять.

Сла́ва, гла́съ 8:

Пріиди́те дне́сь, собо́ри Россíйстіи, и ви́дите, я́ко су́дъ безъ вины́ пріе́млетъ му́ченикъ Михаи́лъ, я́ко а́гнецъ беззло́бивъ, заколе́нъ бы́сть отъ окая́ннаго Кавгады́я, и пове́ржено бы́сть тѣ́ло его́ на земли́, и ники́мже врежде́но бы́сть. И се́й у́бо вѣнча́ся, то́й же безъ па́мяти поги́бе; и се́й въ мíрѣ сла́вимый е́сть, о́нъ же въ гее́ннѣ му́чится; се́й же Христа́ Бо́га мо́литъ о душа́хъ на́шихъ.

И ны́нѣ, пра́здника, [гла́съ 4:

Дне́сь боговмѣсти́мый хра́мъ, Богоро́дица, въ хра́мъ Госпо́день приво́дится, и Заха́рія Сію́ пріе́млетъ: дне́сь свята́я святы́хъ ра́дуются, и ликъ а́нгельскій та́инственно торжеству́етъ. Съ ни́миже и мы́, пра́зднующе дне́сь, съ Гавріи́ломъ возопіи́мъ: ра́дуйся, Благода́тная, Госпо́дь съ Тобо́ю, имѣ́яй ве́лію ми́лость].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на пра́здника, пѣ́снь 1-я и свята́го, пѣ́снь 6-я. Проки́менъ, [гла́съ 7]: Возвесели́тся пра́ведникъ о Го́сподѣ, [и упова́етъ на Него́]. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Ри́мляномъ, зача́ло 99. Аллилу́ія, гла́съ 4: Пра́ведникъ, я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится]. Сти́хъ: Насажде́ни въ дому́ Госпо́дни, [во дво́рѣхъ Бо́га на́шего процвѣту́тъ]. Ева́нгеліе Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 205 об. – 213.

/ Къ оглавленію раздѣла /


Наверхъ / Къ титульной страницѣ

0