Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 20-й де́нь.
Предпра́зднство во хра́мъ Вхо́да Пресвяты́я Богоро́дицы. И преподо́бнаго отца́ на́шего Григо́рія Декаполи́та, и и́же во святы́хъ отца́ на́шего Про́кла, архіепи́скопа Константи́на гра́да.

[ВЕЧЕРЪ,]
На Го́споди воззва́хъ: стихи́ры предпра́зднства, гла́съ 1. Подо́бенъ: Небе́сныхъ чино́въ.

Свѣщено́сицы дѣ́вы,* Приснодѣ́ву свѣ́тло провожда́юще,* проро́чествуютъ и́стинно Ду́хомъ бу́дущее:* хра́мъ бо Бо́жій Богоро́дице су́щи,* въ хра́мъ со сла́вою дѣ́вственною,* младе́нствующи, вво́дится.

Обѣща́нія свята́го и пло́дъ благосла́вный,* Богоро́дица вои́стинну яви́ся мíру,* я́ко всѣ́хъ превы́шшая,* я́же благоче́стно приводи́ма въ хра́мъ Бо́жій,* моли́тву ро́ждшихъ исполня́етъ,* соблюда́ема Боже́ственнымъ Ду́хомъ.

Небе́снымъ воспи́тана, Дѣ́во, хлѣ́бомъ* вѣ́рно въ хра́мѣ Госпо́дни,* родила́ еси́ мíру жи́зни Хлѣ́бъ, Сло́во.* Ему́же, я́ко хра́мъ избра́нный и всенепоро́чный,* предобручи́лася еси́ Ду́хомъ та́инственно,* обруче́нна Бо́гу и Отцу́.

Стихи́ры преподо́бнаго, гла́съ и подо́бенъ то́йже:

Въ небе́сныя оби́тели съ весе́ліемъ вселя́яся* и со а́нгелы, о́тче, предстоя́* дерзнове́нно престо́лу Госпо́дню,* на земли́ соверша́ющимъ па́мять твою́* грѣхо́въ оставле́ніе и страсте́й* дарова́ти моли́ся.

Моли́твеннымъ серпо́мъ, о́тче Григо́ріе,* страсте́й те́рнія изсѣ́къ* и воздѣ́лавъ ра́ломъ воздержа́нія зе́млю душе́вную,* вве́ргъ сѣ́мена благоче́стія въ ню́:* и́миже на́мъ возраща́еши* исцѣле́нія плоды́.

Добродѣ́телей тя́ прія́телище нарица́емъ, преподо́бне,* я́ко молча́нія дру́га, бдѣ́нія дѣ́лателя,* и о́бразъ цѣлому́дрія,* и моли́твы жили́ще некра́домое,* и чуде́съ сокро́вище,* и моли́твенника чту́щихъ тя́, Григо́ріе.

Сла́ва, и ны́нѣ, гла́съ 4:

Дне́сь боговмѣсти́мый хра́мъ, Богоро́дица, въ хра́мъ Госпо́день приво́дится, и Заха́рія Сію́ пріе́млетъ, дне́сь святы́хъ свята́я ра́дуются, и ли́къ а́нгельскій та́инственно торжеству́етъ, съ ни́миже и мы́, пра́зднующе дне́сь, съ Гавріи́ломъ возопіи́мъ: ра́дуйся, Благода́тная, Госпо́дь съ Тобо́ю, имѣ́яй ве́лію ми́лость.

Аще въ пято́къ ве́чера: Сла́ва, предпра́зднства. И ны́нѣ, догма́тикъ гла́са.

На стихо́внѣ стихи́ры свята́го Про́кла, гла́съ 4. Подо́бенъ: Да́лъ еси́ зна́меніе.

Догма́товъ свѣ́тлостію* и житія́ красото́ю* благоче́стно удобри́лъ еси́,* Про́кле приснопа́мятне, священнонача́ліе,* и Це́ркве сто́лпъ яви́лся еси́ и́стинно,* просвѣща́я вся́ словесы́ твои́ми.* Тѣ́мъ тя́ ублажа́емъ* и во псалмѣ́хъ же и пѣ́снехъ* святу́ю и всечестну́ю пра́зднуемъ па́мять твою́.

Сти́хъ: Честна́ предъ Го́сподемъ* сме́рть преподо́бныхъ Его́.

Свѣ́тло научи́лъ еси́* и богому́дренно проповѣ́далъ еси́* Богоро́дицу, пречи́стую Отрокови́цу,* ро́ждшую Су́щаго пре́жде вѣ́къ* Созда́теля и Влады́ку,* Сы́на и Сло́во Отчее,* и въ послѣ́дняя за ны́ Человѣ́ка бы́вша хотѣ́ніемъ* и невра́щна естество́мъ,* и Несто́рія посрами́въ,* я́ко нечести́ва и пребезу́мна.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Во́ды поче́рплъ еси́* златоза́рныя, приснопа́мятне,* му́драго богопроповѣ́дника,* Его́же и прее́мникъ* и благоче́стія яви́лся еси́, и сѣда́лища,* утвержда́я уче́ньми и́стины Христо́ву па́ству,* и того́ честнѣ́йшія и всечестны́я мо́щи,* я́коже у́тварь ца́рскую,* Це́ркви отда́лъ еси́.

Сла́ва, и ны́нѣ, гла́съ 4. Самогла́сенъ:

Пріиди́те, вси́ вѣ́рніи, еди́ну Непоро́чную восхва́лимъ, отъ проро́къ проповѣ́данную и въ хра́мъ приведе́нную, пре́жде вѣ́къ пронарече́нную Ма́терь и въ послѣ́дняя лѣ́та я́вльшуюся Богоро́дицу. Го́споди, моли́твами Ея́ ми́ръ Тво́й пода́ждь на́мъ и ве́лію ми́лость.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но молитвами и́хъ въ ми́рѣ упра́ви живо́тъ на́шъ.

Сла́ва, и ны́нѣ, предпра́зднства, гла́съ то́йже:

Ра́дость предобруча́етъ всѣ́мъ Анна ны́нѣ, печа́ли сопроти́вный пло́дъ прозя́бши, еди́ну Приснодѣ́ву, Юже и приво́дитъ, моли́твы исполня́ющи, дне́сь веселя́щися, въ хра́мъ Госпо́день, я́ко су́щій хра́мъ Бо́га Сло́ва и Ма́терь чи́стую.


НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, святы́хъ. И ны́нѣ, предпра́зднства.

По 1-й каѳи́смѣ, сѣда́ленъ, гла́съ 4. Подо́бенъ: Удиви́ся Іо́сифъ.

Пре́жде зача́тія, Чи́стая, освяти́лася еси́ Бо́гу и, ро́ждшися на земли́, да́ръ принесла́ся еси́ ны́нѣ Ему́, исполня́ющи оте́ческое обѣща́ніе, въ Боже́ственнѣмъ же хра́мѣ, я́ко су́що Боже́ственный хра́мъ, отъ младе́нства чи́стѣ, со свѣща́ми свѣ́тлыми отдана́ бы́вши, яви́лася еси́ прія́телище непристу́пнаго и Боже́ственнаго Свѣ́та, вели́ко вои́стинну предше́ствіе Твое́, еди́на Богоневѣ́сто и Приснодѣ́во.

Сла́ва и ны́нѣ, то́йже.

По 2-й каѳи́смѣ сѣда́ленъ, гла́съ и подо́бенъ то́йже:

Хра́мъ Бо́жій, многоче́стный черто́гъ, въ хра́мъ Бо́жій со свѣща́ми свѣ́тлыми, съ весе́ліемъ всели́тися происхо́дитъ; и ра́дуется о Не́й Заха́рія, зря́ явле́ніе я́сно, свяще́нныхъ проро́къ исполня́емо, и весели́тся, и предпра́зднственный пое́тъ гла́съ: ра́дость провозвѣща́етъ происхожде́ніе Твое́, Отрокови́це Дѣвома́ти.

Сла́ва и ны́нѣ, то́йже.

Кано́нъ предпра́зднства со ирмосо́мъ на 6 и святы́хъ о́ба кано́на на 8.

Кано́нъ предпра́зднства, его́же краегране́сіе по алфави́ту до седмы́я пѣ́сни. Подо́бно же и осма́я своя́ стихи́. Девя́тая же Іо́сифово, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Святы́хъ во свята́я Всесвята́я и Непоро́чная всели́тися происхо́дитъ, Пресвята́го Бо́га я́ко да бу́детъ хра́мъ освяще́нъ, и То́й предтеку́тъ дѣ́вы отрокови́цы.

Совѣ́тъ превѣ́чный Превѣ́чнаго Бо́га на́шего во исполне́ніе гряде́тъ предгряду́щей Ти́ воспита́тися во свята́я святы́хъ, Сло́ва въ жили́ще, Отрокови́це Всенепоро́чная.

Роди́теліе боже́ственніи Тя́, Бо́жію Роди́тельницу хотя́щу бы́ти, вво́дятъ воспита́тися во свята́я святы́хъ: моли́тву, е́юже моля́хуся, обѣща́ніе исполня́ютъ, Пречи́стая.

Укрѣпи́, Влады́чице, не́мощь се́рдца моего́ и утверди́, страстьми́ коле́блемое, я́ко да вѣ́рою Тя́ и любо́вію ублажа́ю, Присноблаже́нную и Всенепоро́чную.

Инъ кано́нъ преподо́бнаго Григо́рія, гла́съ 8. Творе́ніе Іо́сифа.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Умерщвле́нную сластьми́ тѣлесе́, смире́нную мою́ ду́шу твои́ми моли́твами оживи́, блаже́нне Григо́ріе: жи́знь бо ны́нѣ прія́лъ еси́ нестарѣ́ющуюся, умертви́въ я́же на земли́ у́ды, преподо́бне, по́стническими по́двиги.

Удержа́въ сла́сти тѣле́сныя ума́ чистото́ю, изъ млада́го, о́тче, во́зраста орга́нъ Ду́ха бы́лъ еси́, Того́ дѣ́йства свѣ́тло пріе́мля и богови́дѣнъ познава́яся.

Жела́ніемъ Боже́ственнымъ пло́ти жела́нія увяди́лъ еси́, и тебѣ́ самому́, блаже́нне, обручи́лъ еси́ супру́жницу — чистоту́, изъ нея́же ча́да тебѣ́ роди́шася — вся́ добродѣ́тели, присносла́вне, ча́до тя́ Бо́жіе содѣ́ловающія.

Богоро́диченъ: Отъ земли́ до небе́съ дося́жущи лѣ́ствица небе́сная, е́юже Бо́гъ Сло́во земны́мъ сни́де, Благослове́нная Пречи́стая, несказа́нное чу́до, недомы́сленное видѣ́ніе, спаси́ къ Тебѣ́ прибѣга́ющія.

Инъ кано́нъ свята́го Про́кла, гла́съ 1. Творе́ніе Ѳеофа́ново.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Дѣя́ніемъ же и сло́вомъ и́стиннымъ разу́мныхъ арха́нгеловъ бы́въ сообра́зенъ, богопрія́тне, и съ ни́ми престо́лу предстоя́ честны́я Тро́ицы, Юже, Про́кле, моли́ спасти́ на́съ.

Стопа́мъ послѣ́дуя я́вѣ Златоу́стаго, всеблаже́нне и приснопа́мятне, того́же боже́ственное свяще́нства, о́тче, одѣя́ніе я́ко наслѣ́діе взя́лъ еси́ оте́ческое, достосла́вне.

Дре́вле Бо́га на зе́млю Иса́іи вопію́щу Ду́хомъ пріити́, Несто́рій, умовре́дно оболгу́яй прелага́етъ воплоще́ніе, отъ тебе́, треблаже́нне, собо́рнѣ низверга́ется.

Богоро́диченъ: Словесы́ богодохнове́нными стра́шное отъ Дѣ́вы уясни́лъ еси́ воплоще́ніе Сло́ва Бо́га на́шего и Богоро́дицу Сію́ проповѣ́давъ, догма́томъ всему́дрымъ апо́столовъ послѣ́дуя.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Начина́ющія отрокови́цы дѣ́вы, свѣщи́ нося́щія свѣ́тло, бу́дущее подпису́ютъ: изъ Нея́ бо роди́тся просвѣще́ніе зна́нія, рѣша́щее пре́лести омраче́ніе.

Ревну́ющи дре́вле богому́дренно, Анна моли́тву исполня́етъ и Тебе́ привозлага́етъ святи́лищу, Всенепоро́чная, свяще́ннѣйшее зача́тіе имѣ́ти хотя́щу и рождество́.

Со́лнце простре́ лучи́, зря́ о́блакъ свѣ́тлый, простира́емь ма́ніемъ Боже́ственнымъ вну́трь во свята́я, изъ Нея́же одожди́тъ оставле́ніе оляденѣ́вшимъ страстьми́.

Обожа́етъ мя́ Бо́гъ, всели́вся въ Тя́ за милосе́рдіе, Всенепоро́чная, Чи́стая, укра́дена снѣ́дію пре́жде ле́стію зміи́ною, и тли́ нетлѣ́нія па́ки пи́щу воздае́тъ.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Добродѣ́телей на го́ру восте́къ, преподо́бне, во мра́къ видѣ́нія вше́лъ еси́ и, разумѣ́въ, ели́ко вмѣсти́лъ еси́ Непости́жнаго естество́мъ, просвѣще́нія испо́лненъ, о́тче, бы́въ.

Рожде́нный въ верте́пѣ за земны́хъ избавле́ніе, дре́вле тя́, въ верте́пѣ, всеблаже́нне, живу́ща, свѣ́томъ озари́ небе́снымъ, я́ко Па́вла, свѣтоза́рна показу́я тя́, о́тче Григо́ріе.

Небе́сная две́рь, Христо́ва Пречи́стая Ма́ти, прило́ги тя́ де́монскими окружа́ема, о́тче, впери́ и мо́щна крѣ́постію на ни́хъ содѣ́ла Ду́ха благода́тію.

Богоро́диченъ: Ра́дуйся, еди́на, ро́ждшая вся́ческихъ Го́спода; ра́дуйся, жи́знь человѣ́комъ исхода́таившая; ра́дуйся, осѣне́нная и несѣко́мая горо́, вѣ́рныхъ утвержде́ніе; ра́дуйся, Всенепоро́чная.

Инъ.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Свѣ́тъ изъ Свѣ́та богови́дно, всеблаже́нне, пріе́мъ, Це́ркве свѣ́тъ бы́лъ еси́. Тѣ́мже и Свѣ́тъ тебѣ́ Боже́ственный возсія́ разу́мно, я́коже е́сть пи́сано, и́мже просвѣща́емь, пою́щія озаря́еши па́мять твою́.

Воструби́въ догма́товъ гро́момъ, я́ко стѣ́ны низложи́лъ еси́ Іерихо́нскія ересе́й де́рзости вся́, и во́инства, и одолѣ́нія побѣ́ду возста́вилъ еси́, воплоще́ніе Бо́жіе е́же отъ Дѣ́вы проповѣ́давъ я́сно.

Исто́чнику му́дрости приложи́въ уста́ твоя́, богопрія́тне, и духо́вныя поче́рплъ еси́ му́дрости, Про́кле, боже́ственныя во́ды, му́тныя потопи́въ рѣ́ки, всеблаже́нне, Несто́ріева безбо́жная мнѣ́нія.

Богоро́диченъ: Иже горѣ́ Отцу́ Единоро́дный Сы́нъ неизрече́нно сразумѣва́емь, единоро́дный изъ Тебе́ до́лѣ, Пречи́стая, па́че вины́ и ра́зума роди́ся и обожа́етъ человѣ́ка, Пречи́стая Влады́чице Богоро́дице: тѣ́мже Тя́ сла́вимъ.

Конда́къ Григо́рія, гла́съ 3:

Свѣ́тлое тя́ со́лнце Це́рковь познава́етъ, добродѣ́телей красота́ми и исцѣле́ній луча́ми всѣ́хъ просвѣща́я, Христо́въ уго́дниче: тѣ́мже пра́зднуемъ честну́ю па́мять твою́ и почита́емъ по́двиги твоя́, всеблаже́нне о́тче прему́дре Григо́ріе.

Конда́къ Про́кла, гла́съ 4. Подо́бенъ: Яви́лся еси́.

Досто́йно дне́сь торжеству́етъ всѣ́хъ градо́въ честнѣ́йшій вои́стинну въ честно́мъ преставле́ніи твое́мъ, о́тче отце́въ, Про́кле му́дре.

Сѣда́ленъ Григо́рія, гла́съ 4. Подо́бенъ: Ско́ро предвари́.

Боже́ственною свѣ́тлостію озаря́емь, мра́къ изгна́лъ еси́ душетлѣ́нныхъ страсте́й, Григо́ріе прему́дре, взя́тся къ безстра́стія чистѣ́йшей высотѣ́, возсія́лъ еси́ пресла́вно врачева́ній зари́, всели́вся въ незаходи́мый свѣ́тъ Ца́рствія Христо́ва.

Сла́ва, Про́кла, гла́съ 3. Подо́бенъ: Боже́ственныя вѣ́ры.

Боже́ственный бы́въ священнопроповѣ́дникъ, боже́ственнымъ уче́ніемъ Це́рковь обогаща́я, тайноучи́телю всехва́льне, и Богоро́дицу Дѣ́ву Пречи́стую проповѣ́далъ еси́ и Несто́рія посрами́лъ еси́. Тѣ́мже вси́ чти́мъ вѣ́рно па́мять твою́, прося́ще прія́ти ве́лію ми́лость.

И ны́нѣ, предпра́зднства, гла́съ 1. Подо́бенъ: Ка́мени запеча́тану.

Восхвали́те, дѣ́вы, ма́тери, предпра́зднуйте, лю́діе, славосло́вите, свяще́нницы, благослови́те Пречи́стую Ма́терь Бо́жію: пло́тію бо младе́нствующи пре́жде, во хра́мъ принесе́ся, я́ко хра́мъ Бо́жій святѣ́йшій. Тѣ́мже пра́здникъ соверша́юще духо́вный, воспое́мъ Ю, я́ко Предста́тельницу ро́да человѣ́ческаго.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Свяще́нніи провозвѣсти́ша язы́цы Тебе́, Чи́стая, бы́ти село́ невмѣсти́маго Естества́, сего́ ра́ди Тя́ ли́цы дѣ́вственніи провожда́ютъ, свѣщи́ нося́ще во свята́я.

Сла́ву взя́тъ Іоаки́мъ со Анною, ходя́ще и нося́ще Тя́ съ весе́ліемъ во святы́й хра́мъ, хра́ме Бо́жій пресвяты́й, Чи́стая и Всенепоро́чная Влады́чице.

Разрѣша́ется изрече́ніе прароди́тельное: се́ бо процвѣте́ Лоза́, Яже Гро́здъ нетлѣ́нный на́мъ плодоно́ситъ, вино́ нося́щій весе́лія конце́мъ.

Еди́ну Тя́ Всенепоро́чную Содѣ́тель Сло́во обрѣ́тъ, всели́ся во Твое́ чре́во, содѣва́я на́ше спасе́ніе благода́тію, Пречи́стая, за неизглаго́ланную ми́лость.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

На́съ ра́ди стра́ннымъ соше́ствіемъ бы́въ, Григо́ріе, стра́ненъ благосты́нею, тебе́ Его́ ра́ди стра́нна ви́дѣвъ, отъ оте́чества бы́вша прія́тъ и Боже́ственна наслѣ́дника Своего́ Ца́рства, добродѣ́тельми укра́шена, содѣ́ла.

За Христа́, на́съ ра́ди младе́нствовавшего, и о́трока, преподо́бне, бы́вша, отроко́въ учи́лищу вда́лъ еси́ тебе́ сама́го, младе́нецъ зло́бою, богому́дре о́тче, бы́въ, и боже́ственнымъ смире́ніемъ вра́жію зло́бу смири́лъ еси́, блаже́нне Григо́ріе.

Ту́чами твои́хъ сле́зъ, о́тче Григо́ріе, я́коже росо́ю Боже́ственною, напая́емь, вся́ку возрасти́лъ еси́ добродѣ́тель, вся́кое благопло́діе пра́вды процвѣ́лъ еси́, я́ко дре́во плодоно́сное, при исхо́дищахъ во́дъ насажде́нъ соверше́ннаго по́стничества.

Богоро́диченъ: Ма́ти Бо́жія, Благослове́нная, Всенепоро́чная, души́ моея́ я́звы исцѣли́, сла́сти утоли́ плотскíя, омраче́нное се́рдце мое́ просвѣти́, умири́ у́мъ мо́й и вся́каго вре́да, и вра́жіихъ мя́ напа́стей изба́ви.

Инъ.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Глаго́лъ веща́нія и догма́товъ благогла́сный уче́ній твои́хъ гро́мъ Це́рковь Бо́жію му́дро веселя́тъ, ерети́ческое отго́нятъ свирѣ́пство, священноявле́нне Про́кле всесла́вне.

Якоже зла́то огне́мъ, свяще́ннѣйше, воздержа́ніемъ честно́е тѣ́ло твое́ очи́стивъ, му́дре, красно́ показа́лъ еси́ Творцу́. Сего́ ра́ди тебѣ́ одѣя́ніе свяще́нства вѣ́чно дарова́.

Зна́ніе боже́ственное навы́къ, бы́въ я́ко іера́рхъ свяще́нный, благопода́тно про́чее всѣ́мъ препо́далъ еси́ просвѣще́ніе и боже́ственныя свѣ́тлости во спасе́ніе ду́шъ, достосла́вне.

Богоро́диченъ: Угль Боже́ственный во утро́бѣ, Всенепоро́чная, пріе́мши па́че ума́, не опали́лася еси́ и́стинно: купина́ бо издале́ча обра́зно Твое́ Рождество́ прообразова́ во спасе́ніе на́ше и обновле́ніе.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Облацы да воска́плютъ пра́вду дне́сь, я́ко на небеси́ бо простира́ется Боже́ственный о́блакъ во хра́мѣ Бо́жіи, и́же ка́плетъ сла́дость, всю́ го́ресть ду́шъ на́шихъ изъе́млющу.

Стра́нно Твое́ зача́тіе, стра́нно Твое́ и рождество́, стра́нно твое́ происхожде́ніе, Дѣ́во, е́же вну́трь святи́лища введе́ніе, стра́нна и пресла́вна Твоя́, сло́во превосходя́ща и помышле́ніе, Пречи́стая.

Всю́ Тебе́ освяти́ Ду́хъ Всесвяты́й, вну́трь хра́ма пребыва́ющу и пита́ему пи́щею небе́сною, Невѣ́сто Отча прекра́сная, сего́ ра́ди была́ еси́ и Сло́ва Роди́тельница.

Къ Тебѣ́ мою́ всю́ наде́жду, Отрокови́це, полага́я, къ щедро́тамъ твои́мъ прибѣга́ю: вре́да де́монскаго яви́ неприча́стну па́дшую ду́шу мою́ и изнемо́гшую сласте́й потопле́ньми.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Дѣ́ланіемъ словесе́ лоза́ показа́лся еси́ плодоно́сна, преподо́бне, добродѣ́телей зрѣ́лыя и велича́йшія принося́щая гро́зды, спасе́нія вино́ духо́вное точа́щія, о́тче, и вѣ́рныхъ сердца́ веселя́щее.

Сла́вный Ри́мъ, о́тче, отъ восто́ка тя́ свѣти́льника незаходи́ма пріе́мъ вѣ́рою, просвѣти́ся честны́ми твои́ми дарова́ніи: Христа́ бо имѣ́лъ еси́ въ души́ я́ко свѣ́тъ, ви́дящія тя́, о́тче, озаря́юща.

Ползя́щаго змíя и наблюда́ющаго твою́ пя́ту, Григо́ріе, бо́дростію боже́ственною въ путе́хъ жи́зни ходя́ я́ко Бо́жій уго́дникъ, я́ко за́повѣдей Христо́выхъ дѣ́латель, умертви́лъ еси́ си́лою Ду́ха.

Богоро́диченъ: Предста́тельнице мíра, Ма́ти Приснодѣ́во, Ты́ мя́ окорми́, и путево́дстви мя́ на пра́вый пу́ть, и напра́ви къ пра́вды стезя́мъ пра́вымъ помышле́ніе мое́, души́ ше́ствія исправля́ющи.

Инъ.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Свѣтоно́сенъ, я́ко свѣти́льникъ, всеблаже́нне, бы́въ, боже́ственныя Це́ркве яви́лся еси́ побо́рникъ, и Бо́жія уясни́лъ еси́ е́же изъ Дѣ́вы Всесвяты́я Рождество́ невра́щное, сла́вне.

Воплоще́ніе Бо́жіе изъ Дѣ́вы сла́вное догма́товъ въ пра́щу вложи́въ, я́ко иноплеме́нника Голіа́ѳа, низложи́лъ еси́ Несто́ріевъ свирѣ́пый нра́въ, я́ко дре́вле боже́ственный Дави́дъ.

Па́вловыми уче́ніи сы́й испо́лненъ и того́ видѣ́нія узрѣ́въ, всеизбра́нне, Елиссе́й вторы́й показа́вся, ма́стію боже́ственною, свяще́нствомъ, пома́занъ та́инственно.

Богоро́диченъ: Ни смуще́нія, ни смѣше́нія во утро́бѣ прія́тъ Дѣ́вы Бо́гъ, пло́тію происходя́, но е́же бѣ́, пребы́сть, Бо́гъ и Человѣ́къ, невра́щно дѣ́йствы явля́емь.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Укрѣ́пльшеся Боже́ственною благода́тію, боже́ственныя Дѣ́вы роди́теліе Сію́ я́ко непоро́чную голуби́цу во свята́я воспита́тися любо́вію возлага́ютъ.

Тебѣ́, хотя́щей пріима́ти Свѣ́тъ, изъ Свѣ́та происходя́щій, свѣщи́ вжига́юще, отрокови́цы, Чи́стая, предхо́дятъ свѣтови́дно къ Боже́ственному хра́му, ликовству́юще.

Полна́ сла́вы Пала́та, вели́кое проро́ковъ оглаше́ніе, Престо́лъ святы́й вну́трь свята́я вво́дится, Царю́ всѣ́хъ гото́вящися.

Пою́ Твое́, Отрокови́це, зача́тіе, пою́ Твое́ и неизрече́нное рождество́, пою́ и покро́въ Тво́й, и́мже вре́да вся́каго избавля́емся, къ Твоему́ оти́шію прибѣга́ющіи.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Ма́ніемъ е́же къ Бо́гу обожа́емь, свяще́ннѣйше, видѣ́ніи та́инственными и Боже́ственными осія́ніи я́ко проро́къ боже́ственный, я́ко Бо́жій уго́дникъ сподо́бился еси́ Бо́жія благода́ти.

Молчали́во твою́ жи́знь соверши́лъ еси́, богодухнове́нне, мяте́жей жите́йскихъ яви́лся еси́ бо́льшій, и страсте́й вы́шшій, и земли́ всея́ стра́ненъ же и пришле́цъ.

Яко зерца́ло чи́стое, Боже́ственною заре́ю обогати́лся еси́, я́ко сосу́дъ свяще́нный, хра́мъ украси́лъ еси́, го́рнюю, Григо́ріе, и перворо́дныхъ Це́рковь просвѣти́лъ еси́.

Богоро́диченъ: Марíе, чи́стая пала́та Царе́ва, бы́вша мя́ разбо́йникомъ нечи́стый верте́пъ, моли́твами Твои́ми очи́стивши, изъ Тебе́ ро́ждшемуся хра́мъ свя́тъ покажи́.

Инъ.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Обыше́дшія, я́ко звѣ́ри, отгна́лъ еси́ ересе́й отъ ста́да Христо́ва побо́рники жезло́мъ разу́мнымъ твои́хъ уче́ній, Про́кле блаже́нне, къ па́ствѣ же правосла́вія па́ству испра́вилъ еси́.

Яко и́нъ ковче́гъ, Це́ркви Христо́вѣ тѣ́ло всеблаже́ннаго Златоу́ста вда́лъ еси́ твои́ми, Про́кле, поуче́ньми и возвесели́лъ еси́ правосла́вныхъ ли́ки прису́тствіемъ его́.

На вели́кое возше́дъ сѣда́лище, преподо́бне, велича́йшими исправле́ніи украси́лъ еси́ то́е боголѣ́пно. Тѣ́мже, соше́дшеся, благохва́лимъ тя́, архіере́е, великому́дренне Про́кле сла́вне.

Богоро́диченъ: Яви́лася еси́ херуви́мовъ, Богоблагода́тная Дѣ́во, преиму́щи: на ра́мѣхъ бо носи́ма тѣ́ми, Чи́стая, объя́тіи Твои́ми носи́ла еси́. Тѣ́мже Тя́ при́сно, Богоро́дице, вси́ сла́вимъ.

Конда́къ предпра́зднства, гла́съ 4. Подо́бенъ: Яви́лся еси́ дне́сь.

Весе́лія дне́сь вселе́нная испо́лнися вся́ въ благознамени́томъ пра́здницѣ Богоро́дицы, зову́щи: Та́ е́сть сѣ́нь небе́сная.

Икосъ:

Иже всѣ́хъ Творе́цъ, Созда́тель и Влады́ка, неизрече́ннымъ благоутро́біемъ приклони́выйся, еди́нѣмъ человѣколю́біемъ Свои́мъ, его́же Свои́ми устро́и рука́ми, ви́дѣвъ па́дша, уще́дри и возста́вити сего́ благоволи́, зда́ніе боже́ственнѣйшее, и истоще́ніемъ Свои́мъ, я́ко бла́гъ естество́мъ и ми́лостивъ. Тѣ́мъ Марíю хода́таицу пріе́млетъ и я́ко Дѣ́ву и чи́стую та́инства, изъ Нея́ на́ше естество́ носи́ти восхотѣ́: Та́ е́сть сѣ́нь небе́сная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Свѣтоно́сное Тя́ я́ко со́лнце, пріе́млетъ хра́мъ святы́й, вну́трь сія́ющу зарю́ конце́мъ спасе́нія, Чи́стая, хра́мъ бы́ти иму́щую Сы́на Бо́жія, Дѣ́во.

Рука́ми вси́ воспле́щемъ, избавле́нія нося́щую о́бразы Неискусобра́чную ви́дяще: руко́ю бо а́нгеловою пита́ется, Небе́сный Хлѣ́бъ на́мъ я́ко хотя́щу неизрече́нно породи́ти.

Ду́ши вся́ пра́ведныхъ подзе́мныя благовѣсти́ша Тя́, голуби́це злата́я, поко́й нося́щу пото́па разу́мнаго проявля́ютъ, и во святы́хъ свята́я благоче́стно ликовству́ющу.

Яко красна́, Кра́снаго родила́ еси́, нелѣ́поту на́шу возвраща́ющаго въ пе́рвый о́бразъ, Отрокови́це Всенепоро́чная, Ему́же и пое́мъ: отце́въ Госпо́дь и Бо́гъ, благослове́нъ еси́.

Инъ.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Сле́зъ пролія́ньми грѣха́ о́гнь погаси́лъ еси́, безстра́стія же во́ду и врачева́ній чи́стое пи́во пѣснопою́щимъ то́чиши, Григо́ріе: благослове́нъ Бо́гъ оте́цъ на́шихъ.

Пла́менною колесни́цею, честны́я любве́ соверше́ніемъ носи́мь, къ высотѣ́ возше́лъ еси́, въ не́йже стяжа́лъ еси́ твое́, богому́дре, житіе́, зовы́й: благослове́нъ Бо́гъ оте́цъ на́шихъ.

Страсте́й успи́лъ еси́ треволне́нія бо́дренными стоя́ньми: усну́въ же сно́мъ, пра́веднымъ подо́бно, къ Свѣ́ту преше́лъ еси Невече́рнему, зовы́й: благослове́нъ Бо́гъ оте́цъ на́шихъ.

Богоро́диченъ: Ме́ртва бы́вша грѣхо́мъ и погиба́юща, Жи́знь ро́ждшая, Чи́стая Дѣ́во, оживи́ и спаси́ мя и гее́нны исхити́, пою́щаго: благослове́нъ Бо́гъ оте́цъ на́шихъ.

Инъ.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Тѣ́ло, и у́мъ, и ду́шу очи́стивъ отъя́тіемъ страсте́й, іера́рше Про́кле му́дре, отту́ду догма́тствовалъ еси́, тѣ́ло, и ду́шу, и у́мъ отъ Дѣ́вы ро́ждшагося Бо́га кромѣ́ премѣне́нія, за е́же спасти́ ны, пріе́мшаго.

Ты́, ко Христу́ стяжа́въ, свя́те, дерзнове́ніе, на земли́ хва́лящимъ пѣснопѣ́сненно па́мять твою́ сла́вную вся́кихъ напа́стей изба́витися моли́, хва́льнаго пою́щимъ Бо́га пресла́внаго.

Огнь разу́мный, въ помышле́ніихъ вже́гъ твои́хъ, хвра́стную и гнилу́ю злочести́ваго Несто́рія е́ресь попали́лъ еси́. Тѣ́мже ти́ мо́лимся: хвра́стныя на́ша сла́сти, е́же къ Бо́гу мольба́ми твои́ми, поже́гъ, очи́сти, сла́вне.

Богоро́диченъ: Но́сиши Бо́га, пло́тію обложе́на, на объя́тіяхъ Твои́хъ, Чи́стая, я́коже престо́лъ херуви́мскій, Нося́щаго вся́ глаго́ломъ си́лы Своея́, Ему́же пѣснопое́мъ, веселя́щеся: препѣ́тый отце́въ Бо́же и препросла́вленный, благослове́нъ еси́.

Пѣ́снь 8.

Ирмо́съ: Слы́ши, Отрокови́це, Дѣ́во чи́стая, да рече́тъ у́бо Гавріи́лъ, совѣ́тъ Вы́шняго дре́вній и́стинный: бу́ди къ прія́тію гото́ва Бо́жію, Тобо́ю бо Невмѣсти́мый съ человѣ́ки поживе́. Тѣ́мъ и, ра́дуяся, вопію́: благослови́те, вся́ дѣла́ Госпо́дня, Го́спода.

Слы́ши и разумѣ́й, ста́рче му́дрый, — Заха́ріи Анна глаго́летъ, — совѣ́томъ Боже́ственнымъ, Юже и́мамъ Отрокови́цу Чи́стую до́блественною душе́ю пріими́, Тоя́ бо ра́ди бу́детъ избавле́ніе, и въ хра́мъ святы́й введи́ Сію́, вопія́: благослови́те, вся́ дѣла́ Госпо́дня, Го́спода.

Благослове́нъ еди́нъ Госпо́дь, — возопи́ свяще́нникъ, — жи́зни вхо́ды ны́нѣ указу́ютъ я́вѣ, на́мъ объяви́вше, въ ню́же хо́щетъ всели́тися, боговмѣсти́мую пала́ту, Христо́съ, Ца́рь вся́ческихъ, Ему́же вопіе́тъ вся́ земля́: благослови́те, вся́ дѣла́ Госпо́дня, Го́спода.

Се́, ста́рче мудрѣ́йше, — Анна рече́ благоговѣ́йно, — добрѣ́йшую Отрокови́цу, Юже даде́ мнѣ́ Бо́гъ, свѣ́тло пріими́ и проро́чествуй еди́ну, хотя́щую въ ве́щи произнести́ проповѣ́данія, съ ни́миже вопіе́ши проро́чески: благослови́те, вся́ дѣла́ Госпо́дня, Го́спода.

Ны́нѣ позна́хъ, же́но, я́вственнѣйше, — разу́мно рече́ ста́рецъ, — дре́во возраста́етъ посредѣ́ хра́ма, е́же процвѣте́тъ су́що Боже́ственный пло́дъ, въ ра́й вводя́щій снѣ́дію изгна́нныя тлѣ́нія, вопію́щія ра́достію: благослови́те, вся́ дѣла́ Госпо́дня, Го́спода.

Глаго́лъ неизрече́нныхъ уче́ній Твоя́ душа́, Отрокови́це Чи́стая, я́вѣ бу́детъ, — ста́рецъ рече́ я́сно, — въ Боже́ственный се́й, Дѣ́во, всели́шися хра́мъ: а́нгеломъ бо пита́ема, Совѣ́та вели́каго Ангела роди́ши, Ему́же пое́мъ: благослови́те, вся́ дѣла́ Госпо́дня, Го́спода.

Гла́съ Ти́ пое́мъ, Отрокови́це Чи́стая, ра́достно Гавріи́ловъ: ра́дуйся, всѣ́хъ вина́ еди́на ра́дости; ра́дуйся, ду́шъ очище́ніе, я́ко ро́ждшая избавле́ніе на́ше и возда́ніе, пѣснопою́щихъ Тому́: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Твои́ми къ Бо́гу мольба́ми терпѣли́вно дѣ́я, прія́лъ еси́, всеблаже́нне, вѣ́рою проси́мое: но́щію бо спя́щу, яви́вся тебѣ́ а́нгелъ, ме́чь пла́менный вдаде́, стра́сти се́рдца отсека́ющь, и огне́мъ тя́ невеще́ственнымъ очища́ющь, и сла́вою просвѣща́ющь неизрече́нно.

Всесвѣ́тлое я́ко со́лнце, разу́мно возсія́лъ еси́ свѣ́томъ добродѣ́телей свѣтоза́рно, Григо́ріе, чуде́съ же сія́ньми озаря́я всю́ зе́млю и просвѣща́я благоче́стно пѣснопою́щія: дѣ́ти, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Ангельскаго пѣснопѣ́нія слы́шавъ, Григо́ріе, еще́ ходя́ въ ме́ртвеннѣмъ твое́мъ тѣлеси́, отъ него́же чу́вствія твоя́ душе́вная я́вѣ наслади́въ, и богови́дѣнъ, и свѣтоза́ренъ позна́лся еси́, зовя́ Влады́цѣ: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Богоро́диченъ: Судію́ и Го́спода па́че сло́ва ро́ждшая, Того́ я́ко Сы́на Твоего́, Всесвята́я, умоли́ въ ча́съ суда́, осужде́нія, и огня́, и тмы́ несвѣ́тлыя, и скре́жета зубо́въ изба́вити вѣ́рою благоче́стно пѣснопою́щія: свяще́нницы, воспо́йте, лю́діе, превозноси́те Его́ во вѣ́ки.

Инъ.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Яко въ горни́лѣ свѣтоза́рнѣмъ, всесла́вне, чистото́ю стра́сти плотскíя очи́стивъ, я́ко зла́то, всѣ́мъ возсія́лъ еси́, воспѣва́я: вся́ дѣла́ Го́спода по́йте и превозноси́те Его́ во вѣ́ки.

Орга́номъ, блаже́нне, честна́го твоего́ язы́ка, украша́ема вѣща́ніемъ, Це́рковь Бо́жія на земли́ спаси́тельное низше́ствіе воспѣва́етъ, всѣ́мъ глася́щи я́сно и вопію́щи: Тя́ превозно́симъ, Христе́, во вся́ вѣ́ки.

Гу́сль боже́ственная яви́лся еси́ и́стинно, вѣща́ніе возглаша́ющая вѣ́рою пріе́млющимъ Бо́жіе, е́же къ на́мъ, спаси́тельное воплоще́ніе, Про́кле, о́тче блаже́нне, вѣ́рою зовы́й: Го́спода по́йте дѣла́ и превозноси́те Его́ во вѣ́ки.

Богоро́диченъ: Сохрани́въ зна́менія Твоего́, Дѣ́во, дѣ́вства невре́дна Влады́ка, про́йде Бо́гъ изъ Тебе́ па́че смы́сла, во е́же спасти́ вопію́щія: Го́спода по́йте и превозноси́те Его́ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Се́ Бо́жія гора́ свята́я со свѣща́ми свѣ́тлыми вну́трь во свята́я ше́ствуетъ, отъ Нея́же Ка́мень отсѣче́тся и тре́бища и кумíры де́монскія истни́тъ, человѣ́ки же са́мыя содѣ́лаетъ хра́мы и честна́я оби́телища.

Кля́тся Бо́гъ и ны́нѣ испо́лни, отъ колѣ́на Іу́дова на́мъ да́въ Приснодѣ́ву, Ея́же чре́во дре́во возрасти́тъ Жи́зни, смертоно́сныя снѣ́ди избавля́ющее, паде́нію пи́щею подни́кшія и укра́денныя пре́лестію зміи́ною.

Усты́ свѣ́тлыми Анна возопи́ въ хра́мѣ Бо́жіи: Тебѣ́ привозлага́ю, Юже мнѣ́ да́лъ еси́, Отрокови́цу, о Влады́ко! Изъ Нея́же за милосе́рдіе неизглаго́ланное, Плотоно́сецъ яви́вся, спасе́ши мíръ, его́же созда́лъ еси́, возвели́чивъ Ю я́ко Ма́терь Твою́.

Се́ озари́ся де́нь спасе́нія су́щимъ въ нощи́ лю́тыхъ: две́рь небе́сная, хра́ма две́ри отве́рзши, со свѣща́ми вхо́дитъ вну́трь во свята́я отъ святы́я пита́тися си́лы, свято́е Бо́га вселе́ніе.

Просвѣти́, Чи́стая, души́ моея́ о́чи, Свѣ́тъ ро́ждшая, да не пости́гнетъ мя́ грѣхо́вная тма́ глубоча́йшая, ниже́ глубина́ да покры́етъ мя́ отча́янія, но Сама́ мя спаси́ и окорми́ ко приста́нищу Боже́ственнаго хотѣ́нія.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

По́ты по́стническими грѣха́ угаси́лъ еси́ у́гліе и съ небесе́ я́вѣ огня́ въ ви́дѣ благода́ть прія́лъ еси́, не попаля́ющую, му́дре, но па́че ороша́ющую и крѣ́постію тя́ си́льна на стра́сти показу́ющую.

Яко ши́покъ, въ по́стническихъ, о́тче, процвѣ́лъ еси́ удо́ліихъ, Григо́ріе, и я́ко кри́нъ благово́нный. Сего́ ра́ди то́чиши мѵ́ро благово́нное, твоя́ ко́сти оби́льно уха́ютъ жи́знь: по́лны бо лани́ты твоя́, я́ко ча́ши, арома́тъ показа́шася.

Дне́сь съ на́ми собо́ръ по́стниковъ и преподо́бныхъ весели́тся, патріа́рховъ и проро́ковъ въ па́мяти твое́й, блаже́нне, спра́зднуютъ на́мъ апо́столи и му́ченицы, съ ни́миже помина́й чту́щихъ тя́ вѣ́рно, досточу́дне.

Ра́ка, идѣ́же честно́е и многострада́льное тѣ́ло твое́ лежи́тъ, чуде́съ благода́ть на́мъ источа́етъ, о́тче Григо́ріе, освяща́ющи на́ша ду́ши и тѣлеса́, обогати́вшихся тобо́ю и предста́теля и те́пла тя́ засту́пника иму́щихъ.

Богоро́диченъ: Гла́съ Тебѣ́ Гавріи́ловъ, вѣ́рніи, ра́достно привѣщава́емъ: ра́дуйся, раю́, Жи́зни дре́во прозя́бшій. Ра́дуйся, рѣше́ніе кля́твы, му́чениковъ вѣнча́ніе, преподо́бныхъ похвало́ и человѣ́ковъ благочести́выхъ утвержде́ніе.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Образы и сѣ́ни мимоте́къ и и́стинно Христа́ разумѣ́въ, породи́вся ба́нею креще́нія, свяще́нникъ же пома́занъ свяще́ннѣйшій. Тѣ́мже и Богоро́дицу, Того́ ро́ждшую, проповѣ́далъ еси́.

Нра́вы свяще́нныя и догма́ты Златоу́стаго, блаже́нне, впе́рсилъ еси́, ре́вность же его́ свяще́нную вѣ́ры, изры́гнулъ еси́ догма́товъ твои́хъ пучи́ну, ересе́й пото́ки изсуша́ющую благода́тію.

Уста́ви свяще́нными твои́ми моли́твами воздвиза́емое на ны́ смуще́ніе и отжени́ напа́стей омраче́ніе и человѣ́къ всѣ́хъ озлобле́ніе, я́ко имѣ́я дерзнове́ніе ко Влады́цѣ и Бо́гу на́шему.

Богоро́диченъ: О, па́че ума́ чуде́съ Твои́хъ! Бо́жіе бо Сло́во, пло́ть бы́вшее, еди́на родила́ еси́ преесте́ственно, Ма́ти Дѣ́во, вся́ческая Боже́ственнымъ хотѣ́ніемъ му́дрѣ Содержа́щаго, и окормля́юща, и соблюда́юща.

Свѣти́ленъ, Григо́рія. Подо́бенъ: Ученико́въ зря́щимъ.

Святы́ни хра́мъ бы́лъ еси́, іера́рше, по Боже́ственному же прича́стію ны́нѣ бо́гъ быва́еши и рая́ граждани́нъ, въ не́мже напитава́ешися невозбра́нно дре́ва зна́нія и нетлѣ́нныя сла́вы, па́мять творя́, Григо́ріе му́дре, о и́же отъ любве́ вѣ́рою хва́лящихъ тя́, свяще́нный о́тче.

Сла́ва, и ны́нѣ, предпра́зднства. Подо́бенъ: Жены́, услы́шите.

Де́нь предпра́зднетвенный хра́мъ приво́дитъ ны́нѣ пречи́стымъ введе́ніемъ Богоро́дицы Марíи, Юже пою́тъ а́нгели, и человѣ́цы ублажа́ютъ, дѣ́вы же провожда́ютъ, свѣщи́ нося́ще и игра́юще, въ хра́мъ Госпо́день.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Пріиди́те, вѣ́рніи, соше́дшеся, пѣ́сньми почти́мъ* отъ ма́тере непло́дныя пресла́вно ро́ждшуюся* Богоневѣ́стную Ма́терь Творца́,* и съ дѣ́вами же и свѣща́ми предъусря́щемъ Ю,* въ хра́мъ входя́щу во свята́я.

Сти́хъ: Приведу́тся Царю́ дѣ́вы въ слѣ́дъ Ея́,* и́скреннія Ея́ приведу́тся Тебѣ́.

Якоже цвѣ́ты разли́чныя собра́вше* отъ разу́мныхъ цвѣтнико́въ Ду́ха слове́съ,* похва́льныя вѣнцы́ ра́достно Дѣ́вѣ исплете́мъ* и предпра́зднственный да́ръ Ей* досто́йно принесе́мъ.

Сти́хъ: Приведу́тся въ весе́ліи и ра́дованіи,* введу́тся въ хра́мъ Царе́въ.

Да угото́вятся две́ри хра́ма Госпо́дня* и да отве́рзутся: и до́мъ сла́вы,* и еди́ну, Превы́шшую небе́съ,* па́че ума́ бы́вшую,* да пріе́млютъ, ра́дующеся,* и Христа́ Спа́са да воспою́тъ.

Сла́ва, и ны́нѣ, гла́съ то́йже. Гео́ргія Никомидíйскаго:

Да ра́дуется дне́сь не́бо свы́ше, и о́блацы весе́ліе да кропя́тъ о зѣло́ пресла́вныхъ вели́чіихъ Бо́га на́шего: се́ бо две́рь, на восто́ки зря́щая, ро́ждшися отъ непло́дове безпло́дныя по обѣтова́нію и Бо́гу освяще́на бы́вши въ жили́ще, дне́сь въ хра́мъ я́ко непоро́чное приноше́ніе приво́дится. Да ра́дуется Дави́дъ, бряца́я въ гу́сли: приведу́тся (рече́) Царю́ дѣ́вы въ слѣ́дъ Ея́, бли́жнія Ея́ приведу́тся вну́трь ски́ніи Бо́жія, вну́трь очисти́лища Его́, воспита́тися въ жили́ще пре́жде вѣ́къ отъ Отца́ нетлѣ́нно Ро́ждшагося во спасе́ніе ду́шъ на́шихъ.


НА ЛИТУРГІИ,

Блаже́нна предпра́зднства, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость, [и поуче́ніе се́рдца моего́ ра́зумъ]. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Апо́столъ дне́ и у́трешній подъ зача́ло. Та́же свята́го, ко Евре́емъ, зача́ло 351. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Сти́хъ: Зако́нъ Бо́га его́ въ се́рдцѣ его́, [и не за́пнутся стопы́ eго́]. Ева́нгеліе дне́ и у́трешнее подъ зача́ло. И свята́го, Іоа́нна зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


[Мрк:] Подоба́етъ вѣ́дати, я́ко а́ще случи́тся предпра́зднство Вхо́да Пресвяты́я Богоро́дицы въ недѣ́лю:

Въ суббо́ту на ма́лѣй вече́рни, стихи́ры воскре́сны и Богоро́дицы, по обы́чаю.

На вели́цѣй вече́рни, По обы́чной каѳи́смѣ, на Го́споди воззва́хъ: стихи́ры воскре́сны 3, и восто́ченъ [Анато́ліевъ1, и предпра́зднства 3, и преподо́бнаго Григо́рія 3. Сла́ва, предпра́зднства. И ны́нѣ, богоро́диченъ 1-й гла́са. На литíи обы́чны. На стихо́внѣ стихи́ры воскре́сны. Сла́ва, и ны́нѣ, предпра́зднства. На благослове́ніи хлѣ́бовъ: Тропа́рь Богоро́дице Дѣ́во, ра́дуйся.., три́жды. [Зри́:] Аще ли нѣ́сть бдѣ́нія, глаго́лемъ тропа́рь воскре́сенъ.

Сла́ва, [тропа́рь] Григо́рія, гла́съ 3:

Образъ бы́лъ еси́ воздержа́нія, Боже́ственнымъ Ду́хомъ вся́ просвѣти́въ: правовѣ́рія тече́ніе соверши́лъ еси́, уче́ніемъ мíръ просвѣти́лъ еси́ и зловѣ́рныхъ обличи́лъ еси́ смы́слы, о́тче преподо́бне Григо́ріе, Христа́ Бо́га моли́ дарова́ти на́мъ ве́лію ми́лость. И ны́нѣ, предпра́зднства.

[На у́трени,] на Бо́гъ Госпо́дь: Тропа́рь воскре́сенъ, два́жды. Сла́ва, Григо́рія. И ны́нѣ, предпра́зднства. По каѳи́смахъ: сѣда́льны воскре́сны и богоро́дичны и́хъ. Та́же поліеле́й и тропари́: Ангельскій собо́ръ.., ектенія́, ипакои́ гла́са, степе́нна, проки́менъ, и Ева́нгеліе воскре́сно, и про́чее до канона́. Кано́нъ воскре́сенъ со ирмосо́мъ на 4, и Богоро́дицы на 2, и предпра́зднства на 4, и преподо́бнаго Григо́рія на 4. Катава́сія: Отве́рзу уста́ моя́... По 3-й пѣ́сни: Конда́къ предпра́зднства и и́косъ, и конда́къ Григо́рія. Сла́ва, сѣда́ленъ его́. И ны́нѣ, предпра́зднства. По 6-й пѣ́сни: Конда́къ воскре́сенъ и и́косъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, Григо́рія. И ны́нѣ, предпра́зднства. На хвали́техъ стихи́ры воскре́сны 4 и предпра́зднства подо́бны 3, пи́саны на стихо́внѣ, и самогла́сенъ и́хъ, съ припѣ́вы. Сла́ва, стихи́ра ева́нгельская. И ны́нѣ, Преблагослове́нна еси́... Славосло́віе вели́кое. По трисвято́мъ тропа́рь воскре́сенъ то́чію, ектеніи́, и отпу́стъ, и ча́съ 1-й.

На 1-мъ часѣ́ тропа́рь воскре́сенъ. Сла́ва, предпра́зднства. И ны́нѣ, богоро́диченъ часо́въ. По Отче на́шъ: Конда́къ предпра́зднства. На 3-мъ часѣ́ тропа́рь воскре́сенъ. Сла́ва, Григо́рія. И ны́нѣ, богоро́диченъ часо́въ. По Отче на́шъ: конда́къ воскре́сенъ. Та́кожде и на про́чихъ часѣ́хъ глаго́лемъ конда́къ воскре́сенъ и предпра́зднства, премѣня́юще.

На литургíи: Блаже́нна гла́са на 6 и предпра́зднства пѣ́снь 3-я на 4. По вхо́дѣ тропа́рь воскре́сенъ, и предпра́зднства, и хра́ма свята́го, та́же тропа́рь Григо́рія. Конда́къ воскре́сенъ и хра́ма. Сла́ва, Григо́рія. И ны́нѣ, предпра́зднства. Проки́менъ, Апо́столъ, аллилу́ія, и Ева́нгеліе, и прича́стенъ, пре́жде воскре́сенъ, и пото́мъ свята́го, слу́жба преподо́бническая.

[Зри́:] Свята́го же Про́кла слу́жба пое́тся, егда́ разсу́дитъ екллисіа́рхъ.
Тропа́рь Про́кла, гла́съ 4:

Иже Боже́ственнымъ нача́ломъ прему́дрости, стра́хомъ Госпо́днимъ утве́рждся, отту́ду свяще́нными восхожде́ніи возше́лъ еси́ во учени́чество Златоу́ста, и архіере́йскаго того́ престо́ла досто́инъ бы́въ чистоты́ добро́тами, апо́стольскимъ пра́виломъ себе́ вообрази́въ, не себѣ́ живы́й, но Христу́ и ста́ду твоему́. Тѣ́мъ въ нетлѣ́нный живо́тъ апо́стольски всели́лся еси́, іера́рше Про́кле, моли́ Христа́ Бо́га спасти́ся душа́мъ на́шимъ.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 171 об. – 183.

/ Къ оглавленію раздѣла /


Наверхъ / Къ титульной страницѣ

0