Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 19-й де́нь.
Обрѣ́теніе честны́хъ моще́й свята́го преподобному́ченика Адріа́на Пошехо́нскаго
[1].

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 4. Подо́бенъ: Да́лъ еси́ зна́меніе.

Духо́внымъ жела́ніемъ распали́вся, преподобному́чениче Адріа́не, и вся́, я́же въ мíрѣ, возненави́дѣвъ, Христа́ еди́наго возлюби́лъ еси́. Того́ ра́ди оте́чество свое́ оста́вилъ еси́ и по́йде по пути́ спасе́нному, его́же возжелѣ́въ, обрѣ́лъ еси́ до́браго наста́вника себѣ́, и́ноческому житію́ окорми́теля. [Три́жды]

Житіе́ твое́ благо́е прови́дя, наста́вникъ тво́й, преподобному́чениче Адріа́не, устроя́етъ тя́ въ чину́ свяще́нномъ, во е́же служи́ти Бо́гу и́стиною въ преподо́біи и пра́вдѣ со вся́кимъ усе́рдіемъ, я́ко Го́сподеви уго́дно, та́ко и сотвори́. [Три́жды]

Го́споду хотя́щу просла́вити Своего́ уго́дника, преподобному́ченика Адріа́на, явле́ніемъ а́нгеловымъ е́же извести́ его́ отъ оби́тели тоя́ и пресели́ти на мѣ́сто ти́хо и безмо́лвно, и по не́мъ послѣ́дуя преподо́бный до пусты́ни, идѣ́же всели́тися показу́ще ему́ руко́ю, и а́біе неви́димъ бы́сть. [Два́жды]

Сла́ва, гла́съ 6:

Пріиди́те, бра́тія, пусты́нная ча́да, дади́мъ сла́ву и вели́чіе Христу́ Бо́гу на́шему, дне́сь бо прояви́ на́мъ уго́дника Своего́ преди́вными чудесы́, преподобному́ченика Адріа́на, и́же мно́га лѣ́та сокрове́ны бы́ша мо́щи его́, ны́нѣ же па́ки прино́сятся ко оби́тели свое́й, идѣ́же показа́ мно́гія труды́ и по́ты, Адріа́не преподо́бне, моли́ спасти́ся душа́мъ на́шимъ.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Проки́менъ дне́. Чте́нія три́ преподо́бническая.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Преподо́бне о́тче Адріа́не, житіе́ свое́ добродѣ́тельми просвѣти́лъ еси́, страсте́мъ бо ко́реніе погуби́лъ еси́, и яви́ся сосу́дъ Свято́му Ду́ху, и отто́лѣ обогати́ся безстра́стіемъ, поя́ въ се́рдцы свое́мъ Го́сподеви всегда́.

Преподо́бне о́тче Адріа́не, отъ всего́ усе́рдія своего́ изво́ли ева́нгельски послѣ́довати Христу́, та́ко бо помина́я псало́мская уче́нія — се́ удали́хся, бѣ́гая, и водвори́хся въ пусты́ни, ча́яхъ отъ Бо́га спасе́нія.

Го́споду хотя́щу просла́вити Свою́ Ма́терь, Пречи́стую Богоро́дицу, живу́щіи бо о́крестъ тоя́ пусты́ни лю́діе слы́шавше на де́бри зво́нъ по мно́ги дни́, идѣ́же собра́ся оби́тель во и́мя Пресвяты́я Богоро́дицы моли́твами преподо́бнаго Адріа́на.

Сла́ва, гла́съ то́йже:

Оста́вивъ мíръ, преподо́бне, и вся́, я́же въ не́мъ, возненави́дѣвъ, Христа́ еди́наго возлюби́лъ еси́ и, по Не́мъ послѣ́дуя, невозвра́тнымъ по́мысломъ, въ пусты́ню всели́вся, я́ко во огра́ду небе́сную, поя́ Го́сподеви со ученики́ свои́ми и Того́ Ро́ждшую призыва́я на по́мощь, Пречи́стую Богоро́дицу, поми́ловати лю́ди, и́же въ вѣ́рѣ Христо́вой живу́щія, моля́щеся о душа́хъ на́шихъ.

И ны́нѣ, богоро́диченъ:

О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Пусты́нное озлобле́ніе претерпѣва́я, блаже́нне, вся́ко сладостра́стіе отри́нулъ еси́ и къ по́двигу и́ноческому устреми́ся, я́ко же дре́вніи отцы́, ше́лъ еси́ въ пусты́ню, въ го́рнее селе́ніе, и а́нгельское ликова́ніе, и святы́хъ водворе́ніе.

Сти́хъ: Честна́ предъ Го́сподемъ сме́рть преподо́бныхъ Его́.

Весели́ся, пусты́не непло́дная, возопи́ съ весе́ліемъ, се́ бо въ тебѣ́ преподобному́ченикъ яви́ся, отъя́тъ отъ тебе́ вся́ку непра́вду и дре́внюю зло́бу, ему́же убíйственныхъ ру́цѣ вѣне́цъ испле́тше у́жемъ терпѣ́нія и ну́жднымъ умерщвле́ніемъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Весели́ся, це́рковь Бо́жія Ма́тере со и́ноки, и просты́ми, и со всѣ́ми окре́стными пусты́нями, се́ бо дре́вній яви́ся трудополо́жникъ Твоему́, Влады́чице, до́му, многострада́льный преподобному́ченикъ Адріа́нъ, и́же бо къ тебѣ́ гряде́тъ со свои́ми мощми́, и́хъ же отъ мно́гъ лѣ́тъ не ви́дѣша.

Сла́ва, гла́съ 8:

Весели́ся, пусты́не, прозя́бшая такова́го граждани́на, я́ко во блаже́нныхъ блаже́ннаго, Всесвята́го Ду́ха испо́лнена, возлюби́ бо пусты́нное пребыва́ніе и вся́ку добродѣ́тель испра́ви, того́ и мы́ хода́тая приводя́ще, мо́лимся: умоли́ Христа́ спасти́ся душа́мъ на́шимъ.

И ны́нѣ, [богоро́диченъ]:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Тропа́рь, гла́съ 4:

Христо́ву му́ченику тезоимени́тъ бы́лъ еси́, преподо́бне, мно́ги труды́ подъя́лъ еси́ терпѣ́ніемъ свои́мъ, и убіе́ніе отъ окре́стныхъ и ну́ждную сме́рть претерпѣ́лъ еси́, и ны́нѣ, о преподобному́чениче о́тче Адріа́не, моли́ душе́вныя и тѣле́сныя на́ша стра́сти уврачева́ти, и́же вѣ́рою и любо́вію обрѣ́теніе честны́хъ моще́й твои́хъ почита́ющихъ и всечестну́ю па́мять твою́ пра́зднующихъ.

Сла́ва и ны́нѣ, [богоро́диченъ]:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 4. Подо́бенъ: Яви́лся еси́.

Свѣтоли́тіемъ сія́я, я́ко заря́, просія́лъ еси́ въ пусты́няхъ чудесы́ свои́ми, Адріа́не, съ вѣ́рою приходя́щимъ къ тебѣ́. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Пречи́стая Дѣ́во, прибѣга́ющихъ, мольбу́ пріими́ отъ на́съ, непреста́нно моля́щися о на́съ Человѣколю́бцу Бо́гу.

По 2-й каѳи́смѣ сѣда́ленъ, гла́съ 4. Подо́бенъ: Ско́ро предвари́.

Явле́нію а́нгелову послѣ́довалъ еси́, преподо́бне Адріа́не, претерпѣ́лъ еси́ пусты́нное озлобле́ніе и разбо́йниче стремле́ніе, на тя́ бѣсо́вскими прило́гами воздви́женное, му́жески прія́лъ еси́. Тѣ́мже твою́ па́мять при́сно пѣ́сньми почита́емъ. [Два́жды.]

Сла́ва, и ны́нѣ, богоро́диченъ:

Въ Тво́й, Влады́чице, покро́въ прибѣга́ю а́зъ, смире́нный, и молю́ Тя, и ми́лъ ся дѣ́ю, поми́луй мя́, Чи́стая, я́ко превзыдо́ша главу́ мою́ грѣхи́ моя́, и бою́ся, Влады́чице, муче́нія, и трепе́щу. Моли́тву сотвори́, Чи́стая, къ Сы́ну Своему́ отъ си́хъ изба́вити мя́.

[Велича́ніе:

Ублажа́емъ тя́, преподобному́чениче Адріа́не, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8:

Смире́ніемъ Влады́цѣ Христу́ послѣ́дуя, воздержа́ніемъ житіе́ украси́въ и отъ сего́ плоды́ терпѣ́нія показа́лъ еси́, муче́ніемъ вѣнца́ досто́йно сподо́бився, преподо́бне Адріа́не, моли́ Христа́ Бо́га согрѣше́ніемъ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище су́щи Утѣ́шителя, Всепѣ́тая, беззако́ній мя́ су́ща скве́рно жили́ще и бѣсо́мъ игра́лище въ ра́зумѣ бы́вша, потщи́ся си́хъ злодѣ́йствія мя́ изба́вити, свѣ́тло жили́ще добродѣ́телемъ содѣ́лавше, Свѣтода́тельная и Нетлѣ́нная, разжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ я́же воздаде́ ми? Вся́кое дыха́ніе да хва́литъ Го́спода... Ева́нгеліе Ма́рка, зача́ло 37.

По 50-мъ псалмѣ́ стихи́ра, гла́съ 6:

Го́ры у́бо, и хо́лми, и вся́ окре́стныя дубра́вы, пріиди́те, возра́дуемся въ ны́нѣшнее торжество́, дне́сь созыва́етъ на́съ на весе́ліе преподобному́ченикъ Адріа́нъ, и́же съ побѣ́дою гряде́тъ, возвраща́етъ своя́ мо́щи на первообра́зное свое́ мѣ́сто, въ до́мъ Бо́жія Ма́тере, идѣ́же Влады́чица изво́лила ему́ бы́ти и показа́ мѣ́сто хлѣ́бомъ и ры́бою предъ о́бразомъ Свои́мъ.

Кано́нъ [Богоро́дицы, со ирмосо́мъ на 6 и свята́го на 8], гла́съ 3.
Пѣ́ніе моле́бно сло́жено по а́збуцѣ, соверше́но же и́менемъ списа́вшаго.

Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Агнецъ Непоро́чный, Бо́жій Сло́ве, отве́рзи ми́ устнѣ́ недосто́йніи, да поне́ возмогу́ воспѣ́ти преподобному́ченика Адріа́на, Твоего́ страда́льца.

Бы́лъ еси́, преподо́бне, пусты́ни Во́тхинскія пе́рвый жи́тель, сла́вне, и небе́снаго Ца́рствія наслѣ́дникъ яви́ся страда́ніемъ свои́мъ, и Христу́ предста́въ, ра́дуяся, поя́: сла́вно бо просла́вися.

Всего́ себе́ возложи́въ, преподо́бне, Бо́гови, и жили́ще яви́ся Пресвято́му Ду́ху и а́нгеломъ единокро́вниче, помина́й вѣ́рою чту́щихъ тя́, поя́ Бо́гови: сла́вно бо просла́вися.

Богоро́диченъ: Го́спода Роди́тельнице, Влады́чице Марíе, моли́, Его́же родила́ еси́, Бо́га и Царя́ на́шего, да ми́лостивъ бу́детъ на́мъ въ де́нь су́дный.

Пѣ́снь 3.

Ирмо́съ: Непло́дная душе́ и безча́дная, стяжи́ пло́дъ благосла́вный, веселя́щися, возопíй: утверди́хся Тобо́ю, Бо́же, нѣ́сть свя́тъ, нѣ́сть пра́веденъ, па́че Тебе́, Го́споди.

Дѣ́латель бы́въ, блаже́нне, за́повѣдемъ Госпо́днимъ, непреста́нно въ ни́хъ поуча́яся, сего́ ра́ди вни́де въ небе́сная селе́нія муче́ніемъ свои́мъ и вопія́, ра́дуяся: нѣ́сть свя́тъ и нѣ́сть пра́веденъ, па́че Тебе́, Го́споди.

Егда́ воззави́дѣ тебѣ́ прелука́вый, тогда́ наво́дитъ на тя́ лука́выхъ человѣ́къ разбо́йническимъ наше́ствіемъ, ты́ же, преподо́бне, не устраши́вся убіе́нія отъ ни́хъ, Христу́ вопія́: нѣ́сть свя́тъ и нѣ́сть пра́веденъ, па́че Тебе́, Го́споди.

Житіе́мъ добродѣ́тельнымъ Бо́гови угоди́лъ еси́ и лука́выхъ человѣ́къ посрами́лъ еси́, и́же не хотя́ху тя́ ви́дѣти на се́мъ мѣ́стѣ со ученики́ твои́ми, ты́ же Христу́ взыва́лъ еси́: нѣ́сть свя́тъ и нѣ́сть пра́веденъ, па́че Тебе́, Го́споди.

Богоро́диченъ: Зачала́ еси́ Отчее Сло́во Ѵпоста́сное, Его́же моли́, Богоро́дице, изба́вити отъ бѣ́дъ рабы́ Твоя́, вои́стинну Тя́ призыва́ющихъ.

Сѣда́ленъ, гла́съ 3. Подо́бенъ: Красотѣ́ дѣ́вства.

Бога́тство тлѣ́нно и сла́ву мимотеку́щую оста́вивъ, пусты́нное же пребыва́ніе па́че возлюби́лъ еси́, тѣ́мже ублажа́емъ честно́е страда́ніе твое́ и, торжеству́юще, вси́ вопіе́мъ ти́: помяни́ на́съ ко Го́споду, преподо́бне Адріа́не, о́тче на́шъ. [Два́жды.]

Сла́ва, и ны́нѣ, богоро́диченъ:

Яко недѣ́ланенъ, Дѣ́во, виногра́дъ, прекра́сный Гро́здъ прозябла́ еси́, источа́ющій на́мъ вино́ спасе́нное, всѣ́хъ веселя́щее ду́ши и тѣлеса́. Тѣ́мже, я́ко вино́вну Тя́ по до́лгу ублажа́юще, при́сно со а́нгеломъ вопіе́мъ: ра́дуйся, Обра́дованная, Госпо́дь съ Тобо́ю.

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

За ко́е дѣ́ло возста́ли есте́ на мя́, о отцы́ и бра́тіе, — преподо́бному моля́щуся убíйцамъ и глаго́лющу, — ма́ло осла́бите ми́, да помолю́ся, уже́ бо свѣ́та сего́ не и́мамъ ви́дѣти, — со слеза́ми Христу́ взыва́я, — сла́ва си́лѣ Твое́й, Го́споди.

Иногда́ преподо́бніи отцы́ въ Сина́и и Раи́ѳѣ избіе́ни бы́ша отъ невѣ́рныхъ, сіи́ же, вѣ́рніи, злѣ́е невѣ́рныхъ яви́шася, преподо́бнаго со ученики́ сме́рти преда́ша и мѣ́сто его́ опустоши́ша. Пра́ведніи же и по сме́рти непреста́нно Христу́ взыва́ютъ: сла́ва си́лѣ Твое́й, Го́споди.

Исполня́я за́повѣди Боже́ственныя, е́же злу́ не проти́витися, и ты́, преподо́бне, за убива́ющихъ тя́ моля́ше, — Го́споди, не поста́ви и́мъ грѣха́ сего́! — и вѣ́рно взыва́ше, — сла́ва си́лѣ Твое́й, Го́споди.

Богоро́диченъ: Кади́льнице всезлата́я, Марíе Всенепоро́чная, Христа́ моли́, Его́же родила́ еси́, изба́витися на́мъ отъ бѣ́дъ и огня́ вѣ́чнующаго.

Пѣ́снь 5.

Ирмо́съ: Къ Тебѣ́ у́тренюю, всѣ́хъ Творцу́, преиму́щему вся́къ у́мъ мíрови: зане́ свѣ́тъ повелѣ́нія Твоя́, въ ни́хже наста́ви мя́.

Лу́ки злы́хъ сокруши́лъ еси́ терпѣ́ніемъ свои́мъ и бра́нь и́хъ смире́ніемъ до конца́ разори́лъ еси́, преподо́бне, и вѣне́цъ нетлѣ́нія стяжа́лъ еси́.

Моли́твами и моле́ніемъ взы́де на небе́сная и, съ ли́ки преподо́бныхъ оте́цъ пребыва́я, весели́шися, помина́й, преподо́бне, на́съ, честны́хъ твои́хъ моще́й обрѣ́теніе свѣ́тло торжеству́ющихъ.

Нечести́віи лю́діе вску́ю шата́шася на свята́го, подоба́ше бо пра́веднаго дарми́ почти́ти, я́ко Госпо́дня проповѣ́дника и учи́теля и́хъ.

Богоро́диченъ: Упова́ніе и наде́жда на́ша Ты́ еси́, Пречи́стая, спаси́ правосла́вныя лю́ди, Тебѣ́ моля́щіяся и и́мя Твое́ призыва́ющія.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й, но простры́й, Влады́ко, высо́кую Твою́ мы́шцу, я́ко Петра́, мя, Упра́вителю, спаси́.

Призва́нъ бы́въ, преподо́бне, Боже́ственною благода́тію, во е́же въ пусты́ни послужи́ти Ма́тери Его́ и и́ноческое житіе́ лю́демъ показа́ти. Ты́ же, я́ко па́стырь и́стиненъ, за ста́до свое́ и за мно́гихъ хотя́щихъ спасти́ся ду́шу свою́ положи́лъ еси́.

Разу́мнѣ поуча́лъ еси́ ча́да своя́, преподо́бне, ча́сто наказу́я духо́вными словесы́, да пребу́дутъ, тве́рдо соблюда́юще и́ноческое обѣща́ніе.

Свяще́нствомъ, па́че же и старѣ́йшинствомъ, отъ святи́теля че́стно почте́нъ бы́лъ еси́, преподо́бне, прилѣ́жно моле́ніе за ста́до свое́ приноша́й и за лю́ди, и́хже Кро́вію Свое́ю стяжа́лъ Христо́съ Бо́гъ, да обря́щутъ ми́лость въ де́нь су́дный.

Богоро́диченъ: Ты́ еси́, Пречи́стая Богоро́дице, прибѣ́жище на́ше и утвержде́ніе, моли́ Сы́на Своего́ и Бо́га на́шего пода́ти на́мъ спасе́ніе и грѣхо́въ оставле́ніе.

Конда́къ, гла́съ 4:

Христа́ ра́ди до́блественнѣ претерпѣ́лъ еси́ и вѣне́цъ нетлѣ́нія отъ Него́ воспрія́лъ еси́ страда́нія своего́, приходя́щимъ же съ вѣ́рою къ тебѣ́ подае́ши цѣльбы́, о преподобному́чениче Адріа́не, приснопа́мятне, моли́твенниче о душа́хъ на́шихъ.

Икосъ:

Не уныва́й, предо́брая пусты́не, и́ноческое селе́ніе, честны́мъ воздыха́ніемъ, преста́ни отъ многолѣ́тныя печа́ли, се́ бо Госпо́дь моле́ніемъ Ма́тере Своея́ услы́ша воздыха́ніе твое́ и па́ки да́руетъ тебѣ́ пе́рваго отца́, честны́я его́ мо́щи на исцѣле́ніе боля́щимъ. Пріими́ у́бо ты́я съ ра́достію и весе́ліемъ, поклони́ся и́мъ и рцы́ любе́зно: о преподобному́чениче Адріа́не приснопа́мятне, моли́ся Христу́ Бо́гу спасти́ся душа́мъ на́шимъ.

Пѣ́снь 7.

Ирмо́съ: Тріе́ о́троцы въ пещи́, Тро́ицу прообрази́вше, преще́ніе о́гненное попра́ша и, пою́ще, вопія́ху: благослове́нъ еси́, Бо́же оте́цъ на́шихъ.

Веселя́тся пусты́нніи и́ноцы, воспѣва́юще обрѣ́теніе моще́й твои́хъ, Адріа́не преподо́бне, и мы́, ча́да твоя́, уми́льно вопіе́мъ: испроси́ на́мъ оставле́ніе согрѣше́ніемъ и благи́хъ наслажде́ніе.

Фарао́на мы́сленнаго кро́вію свое́ю потопи́лъ еси́, блаже́нне, отъ Христа́ дерзнове́ніе пріи́мъ, е́же цѣли́ти человѣ́ка, неду́ги разли́чными одержи́ма, и ве́ліе ра́дованіе всему́ мíру сотвори́лъ еси́, поя́: оте́цъ на́шихъ Бо́же, благослове́нъ еси́.

Христе́, Царю́ Безнача́льне, пріими́ моле́ніе ра́бъ Свои́хъ, прося́щихъ у Тебе́ вели́кія ми́лости Твоея́, прости́ на́ша согрѣше́нія, во́льная и нево́льная, моли́твами отца́ на́шего Адріа́на, да вси́ въ ра́дости душе́внѣй возопіи́мъ: оте́цъ на́шихъ Бо́же, благослове́нъ еси́.

Богоро́диченъ: Утро́бы Твоя́ про́йде Умное, Богоро́дице, Со́лнце, Сего́ моли́ я́ко Сы́на Своего́ и Го́спода пода́ти на́мъ разрѣше́ніе отъ скорбе́й и болѣ́знемъ облегче́ніе, да ра́достною душе́ю вопіе́мъ Христу́ Бо́гу: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Веще́ственного огня́ пла́мень невеще́ственнымъ увяди́ша богозри́міи о́троцы и поя́ху: благослови́те, вся́ дѣла́ Госпо́дня, Го́спода.

Правосла́внымъ христіа́номъ испроси́, Адріа́не преподо́бне, ми́ръ, здра́віе, и спасе́ніе, и на враги́ одолѣ́ніе, да въ ра́дости душе́внѣй возопіи́мъ: благослови́те, вся́ дѣла́ Госпо́дня, Го́спода.

Чу́вственныя враги́ побѣди́въ и отъ ни́хъ муче́нія вѣнце́мъ увязе́ся, по достоя́нію вси́ тя́ ублажа́емъ я́ко му́ченика и пра́ведника, Адріа́не преподо́бне, не преста́й о на́съ моля́щи Христу́ Бо́гу, Ему́же возопіи́мъ: благослови́те, вся́ дѣла́ Госпо́дня, Го́спода.

Шу́мъ бы́сть отъ чу́вственныхъ враго́въ, и́же внеза́пу пріидо́ша на оби́тель свята́го и возложи́ша на тя́, преподо́бне, злы́я ра́ны ноже́мъ, изощре́ніемъ и о́гненнымъ подпале́ніемъ, коне́чно же ну́ждно и безчеловѣ́чно сме́рти преда́ша, ты́ же, до́блій страда́лецъ, вся́ претерпѣ́въ бу́дущія ра́ди жи́зни, поя́: благослови́те, вся́ дѣла́ Госпо́дня, Го́спода.

Богоро́диченъ: Ще́драго и Человѣколюби́ваго Бо́га роди́ти, Богоро́дице, сподо́билася еси́, Сего́ моли́, Неискусобра́чная Отрокови́це, низпосла́ти на́мъ, вѣ́рнымъ, ве́лію ми́лость.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Анто́нія, пустынножи́теля, житію́ поревнова́лъ еси́, преподо́бне, того́ ра́ди продли́въ Бо́гъ душе́вное твое́ усе́рдіе, е́же къ Нему́ стяжа́лъ еси́, прославля́етъ тя́, вели́кій Дарода́тель.

Иноческая ти́хая и безмо́лвная пусты́ня, отъ мно́гихъ лѣ́тъ въ пла́чѣ и сѣ́тованіи бы́вша, ны́нѣ у́бо ра́достію весели́тся, поне́же первообра́зная красота́ ея́ па́ки возврати́ся.

Та́ко рыда́ете и пла́чете, пусты́нная ча́да, сиро́тства и лише́нія отца́ своего́, се́й бо съ побѣ́дою гряде́тъ, вра́жію главу́ сокруши́въ до конца́, нося́ на главѣ́ кре́стное зна́меніе — Христо́во одолѣ́ніе.

Богоро́диченъ: Не дря́хлуй, Іо́сифе, зря́ Мене́, Дѣ́ву, непра́здну су́щу, у́зриши бо Ражда́емаго отъ Мене́ и ра́достію я́ко Бо́гу поклони́шися Ему́ со всѣ́ми.

Свѣти́ленъ:

Ди́вно чу́до несказа́нно! яви́ся Тебѣ́ а́нгелъ, имену́я себе́ и́нокомъ Безсту́жемъ, и́же и указа́ тебѣ́ мѣ́сто пусты́нное, Бо́гу та́ко изво́лившу. [Два́жды.]

Сла́ва, и ны́нѣ, богоро́диченъ:

Тя́ пѣ́сньми ублажа́емъ, Дѣ́во, Бо́га бо родила́ еси́ и на руку́ но́сиши, Того́ моли́ о душа́хъ на́шихъ.

[На хвали́техъ] стихи́ры на 4, гла́съ 2. Подо́бенъ: Егда́ отъ дре́ва.

Егда́ манове́ніемъ Боже́ственнымъ мірскíя красоты́, ра́дуяся, о́тче, отше́лъ еси́, тогда́ предпоче́лъ еси́ яре́мъ Христо́въ, ева́нгельски ходи́ти во слѣ́дъ Го́спода, тѣ́сный и зѣло́ приско́рбный пу́ть ше́ствовати, претерпѣ́лъ еси́ пусты́нное озлобле́ніе, помина́я бу́дущее ра́дованіе, Адріа́не преподо́бне. [Два́жды.]

Егда́ всели́ся въ пусты́ню, преподо́бне, со ученико́мъ свои́мъ, тогда́ помышля́я вну́треннима очи́ма, идѣ́же Го́сподеви возсыла́ти непреста́нное славосло́віе, и, я́ко му́дрый прави́тель, вся́ боголѣ́пно устроя́я е́же къ по́двигу духо́вному, си́мъ возводя́ на высоту́ разумѣ́нія.

Егда́ беззако́нніи лю́діе ви́дѣвше тя́, преподо́бне, Бо́гу помога́ющи ти́ на духо́вное пребыва́ніе, тогда́ вооружа́ются на тя́, и прихо́дятъ со ору́жіемъ и дреко́льми, и, я́ко во́лцы, обыдо́ша ста́до твое́ и разли́чныя ра́ны на и́ноковъ возложи́ша, и́ныхъ ору́діемъ умертви́ша, и церко́вную лѣ́поту отъя́ша, и до конца́ все́ разори́ша. Сія́ ви́дѣвъ, преподо́бный со слеза́ми вопія́ше: сла́ва Бо́гу, вѣнча́вшему на́съ кро́внымъ проли́тіемъ!

Сла́ва, гла́съ 8:

Сле́зное рыда́ніе и серде́чное воздыха́ніе ко враго́мъ свои́мъ предлага́я, преподо́бне, уми́льно глаго́лаше: о отцы́ и бра́тіе, за ко́е дѣ́ло хо́щете мя́ уби́ти? а́зъ бо пріидо́хъ къ ва́мъ повелѣ́ніемъ Бо́жіимъ на спасе́ніе ва́ше, ны́нѣ же мене́ сме́рти предае́те. О, отцы́ и бра́тіе, молю́ся ва́мъ, припа́дая, ели́ко ма́ло умилосе́рдитеся, отпусти́те въ пре́жнее селе́ніе, идѣ́же и́ноческое мое́ обѣща́ніе, и та́мо иду́ и вселю́ся со отцы́ и бра́тіями мои́ми, да въ ра́дости почіе́мъ Го́спода своего́, Бо́же на́шъ, сла́ва Тебѣ́!

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.


НА ЛИТУРГІИ,

Слу́жба преподо́бническая: [Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]


Моли́тва свято́му преподобному́ченику Адріа́ну Пошехо́нскому.

О, вели́кій чудотво́рче, святы́й и преподобному́чениче, многострада́льне игу́мене Адріа́не! услы́ши мя́, грѣ́шнаго раба́ своего́, и и́же къ тебѣ́ моего́ моле́нія, я́ко имѣ́я дерзнове́ніе ко Святѣ́й Тро́ицѣ, помяни́ мя, да отпу́стятся грѣхи́ моя́, и небе́снаго Ца́рствія сподо́би мя́, преподобному́чениче, твои́ми моли́твами.

Примѣчаніе:
[1] Служба древняя, составлена не позднѣе XVII вѣка. См., напримѣръ, «Сборникъ Ярославскій» № 2065 (858) XVIII вѣка изъ собранія славяно-россійскихъ рукописей графа А. С. Уварова: «Мѣсяца Ноемврія въ 19-й день. Обрѣтеніе мощей преподобномученика игумена Андреяна Пошехонскаго, чюдотворца. (Служба). На велицѣй вечерни, на Господи воззвахъ, стихиры, гласъ 4-й. Подобенъ: Далъ еси знаменіе. Нач.: Духовнымъ желаніемъ распалився, преподобномучениче Андреяне...» (л. 89-113). (прим. — А. К.)

Источникъ: Мине́я Ноя́брь. Ча́сть втора́я — М.: Издательскій совѣтъ Русской Православной Церкви, 2002. — С. 130-140.

/ Къ оглавленію раздѣла /


Наверхъ / Къ титульной страницѣ

0