Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 19-й де́нь.
Слу́жба преподо́бному Варлаа́му, игу́мену Пече́рскому.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 5:

Отче богому́дре Варлаа́ме, ты́ изъ мла́да Христа́ возлюби́въ и Боже́ственными заря́ми Пресвята́го Ду́ха се́рдце твое́ просвѣти́въ, свѣтови́денъ вои́стинну бы́лъ еси́, тѣ́мже ко хра́му твоему́ притека́ющихъ проше́нія къ по́льзѣ спасе́нія испо́лни и моли́ Христа́ Бо́га дарова́ти на́мъ ве́лію ми́лость.

Отче Варлаа́ме, ты́, кре́стъ сво́й на ра́мо воспріе́мь и кра́сное ше́ствіе Христа́ Царя́ твоего́ любе́зно прете́къ, во свято́мъ гра́дѣ небе́сномъ Живу́щему предста́лъ еси́, отню́дуже, призира́я ны́нѣ на чту́щихъ по́двиги твоя́, свя́те, моли́ Христа́ Бо́га е́же напра́вити и на́ша стопы́ на пу́ть ми́ра.

Сла́ва, гла́съ 8:

Мно́гимъ воздержа́ніемъ, преподо́бне, житіе́ твое́ украси́въ, пу́ть показа́лъ еси́, веду́щій въ жи́знь добродѣ́телей притяжа́ніемъ, мíра отве́ргся и вся́, я́же въ мíрѣ кра́сная, презрѣ́въ, жесто́кимъ житіе́мъ пло́ть свою́ изнуря́я, го́рдаго змíя смире́ніемъ попра́лъ еси́, тѣ́мже, на небеси́ водворя́яся, моли́ спасти́ся душа́мъ на́шимъ.

И ны́нѣ, богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Жи́знь преходя́щую, я́же на земли́, презрѣ́лъ еси́, блаже́нне, я́ко да улучи́ши жи́знь безконе́чную.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Любве́ ра́ди Христо́вы, преподо́бне Варлаа́ме, пло́ти рачи́тельное умертви́лъ еси́ мудрова́ніе.

Сти́хъ: Честна́ предъ Го́сподемъ сме́рть преподо́бныхъ Его́.

Бо́дренными твои́ми моли́твами помози́ въ напа́стехъ пою́щимъ любе́зно па́мять твою́, богоблаже́нне.

Сла́ва, гла́съ 2:

Въ пеще́ру вше́дъ, преподо́бне, отту́ду добродѣ́телей ра́ди къ небе́сному гра́ду преше́лъ еси́ и дости́глъ еси́ поко́я пра́ведныхъ и святы́хъ ра́дованія, тѣ́мже съ ни́ми прилѣ́жно моли́ся о всѣ́хъ, вѣ́рою па́мять твою́ почита́ющихъ, изба́витися вся́каго сопроти́внаго обстоя́нія, Варлаа́ме богому́дре.

И ны́нѣ, богоро́диченъ:

[Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.]

Тропа́рь, гла́съ 1:

Мíра кра́сная и сла́ву его́ оста́вль, прите́клъ еси́ въ пеще́ру, идѣ́же отъ си́лы преуспѣва́я въ си́лу, бы́лъ еси́ во́ждь Христо́ва ста́да, всесла́вне Варлаа́ме, е́же я́ко упа́съ до́брѣ, упаси́ и на́съ, мо́лимъ тя́, сохраня́я отъ всѣ́хъ зо́лъ, да тя́ ублажа́емъ.

Сла́ва, и ны́нѣ, богоро́диченъ по гла́су.

[Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.]


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры [на 6], гла́съ 4. Подо́бенъ: Зва́нный свы́ше.

Исто́чникъ приснокипя́щій слове́съ медото́чныхъ, исходя́щій отъ у́стъ вели́каго отца́, ви́дя, блаже́нне Варлаа́ме, я́ко еле́нь, на истека́ющія струи́ воды́ живы́я, несы́тною любо́вію возжажда́вся, приходи́лъ еси́. Отню́дуже, напои́въ ду́шу свою́ умиле́нія, вся́ кра́сная мíра сего́ презрѣ́лъ еси́ и отъ слове́съ Сло́ву послѣ́довалъ еси́. Ему́же ны́нѣ съ весе́ліемъ предстоя́, моли́ спасти́ и просвѣти́ти ду́ши на́ша. [Два́жды.]

Егда́ вели́кая свѣти́ла, кры́ющаяся подъ спу́домъ святы́я пеще́ры, мы́сленными очи́ма усмотрѣ́лъ еси́, преподо́бне, тогда́, свѣ́томъ добродѣ́телей въ ю́ности озари́въ се́рдце и Боже́ственнымъ огне́мъ къ сопребыва́нію и́хъ распали́вся, до́мъ, роди́тели и дру́ги оста́вилъ еси́ и бы́лъ еси́ и́ночествующимъ соприча́стникъ. Ны́нѣ же, свѣтоно́снымъ лико́мъ на небеси́ причте́нъ су́щи, луча́ми благода́ти земны́хъ на́съ просвѣти́ и пода́ждь дарова́нія, моля́щи Христа́ спасти́ и просвѣти́ти ду́ши на́ша. [Два́жды.]

Егда́ боже́ственное раче́ніе бла́гъ гряду́щихъ и присносія́ющую сла́ву въ черто́зѣ небе́сномъ оте́цъ достоблаже́нный тебѣ́ показа́, а́біе земна́я блага́я, а́ки уме́ты, вмѣни́лъ еси́: бога́тство, сла́ву и вели́чество ро́да своего́, кра́сныя черто́ги и обруче́нную ти́ невѣ́сту презрѣ́въ, еди́наго Христа́ возлюби́лъ еси́, и, Того́ нищетѣ́ подо́бяся, тѣ́сный въ по́двизѣхъ и трудѣ́хъ пу́ть проше́лъ еси́, и по кончи́нѣ жела́емая наслѣ́довалъ еси́, и́хже ны́нѣ наслажда́яся, моли́ Влады́ку умири́ти мíръ и спасти́ ду́ши на́ша. [Два́жды.]

Сла́ва, гла́съ 8:

На земли́ живы́й въ тѣле́сномъ соста́вѣ, житію́ безпло́тныхъ поревнова́лъ еси́, преподо́бне о́тче Варлаа́ме, сла́вы твоея́ отверже́ніемъ человѣ́ки удиви́лъ еси́, нището́ю и воздержа́ніемъ бѣ́сы посрами́лъ еси́, чистото́ю а́нгелы возвесели́лъ еси́ и вели́кими твои́ми по́двиги и́ночествующимъ о́бразъ бы́лъ еси́. Тѣ́мже по достоя́нію ублажа́емъ тя́, удобре́ннаго отъ вы́шняго Влады́ки, Его́же при́сно моли́, блаже́нне, ми́ръ Импера́тору на́шему дарова́ти и душа́мъ на́шимъ ве́лію ми́лость.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ, проки́менъ дне́ и чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Дне́сь ра́достно ликовству́етъ пеще́ра свята́я, имѣ́ющи святы́я мо́щи твоя́, блаже́нне Варлаа́ме, подава́ютъ бо здра́віе съ вѣ́рою притека́ющимъ къ честнѣ́й твое́й ра́цѣ. Отню́дуже и мы́, просвѣ́щшеся, глаго́лемъ: сподо́би на́съ даро́въ твои́хъ, блаже́нне, и ста́до твое́ сохраня́й моли́твами твои́ми, спасе́ніе подава́я душа́мъ на́шимъ.

Преподо́бне о́тче Варлаа́ме, ты́, изъ мла́да возлюби́въ добро́ту Влады́ки Христа́ и къ Нему́ жела́ніе невозвра́тно имѣ́яй, оте́чество и ро́дъ оста́вилъ еси́, бога́тство и сла́ву возненави́дѣлъ еси́ и, Тому́ еди́ному послѣ́довавъ, равноа́нгельно въ пеще́рѣ пожи́лъ еси́, тѣ́мъ, ны́нѣ на небесѣ́хъ со а́нгелы Ему́ предстоя́, со дерзнове́ніемъ моли́ся о душа́хъ на́шихъ.

Гла́съ 4:

Вседержи́тельною десни́цею укрѣпля́емь, преподо́бне о́тче на́шъ Варлаа́ме, воздержа́ніе въ пи́щи стяжа́лъ еси́, непреста́нною же моли́твою и нощны́мъ стоя́ніемъ Анто́нію блаже́нному соприча́стникъ бы́ти сподо́бився, сле́зными пото́ки вся́ бѣсо́вская ополче́нія потопи́лъ еси́. Тѣ́мже и Христо́съ, Его́же вожделѣ́лъ еси́ и Его́же ра́ди тяготу́ дне́вную поне́слъ еси́, дарова́ніемъ чуде́съ тя́ просла́ви, Его́же моли́ спасти́ся душа́мъ на́шимъ.

Гла́съ 3:

Пріиди́те, вси́ и́ночествующихъ собо́ры, псалмы́ и пѣ́сньми честно́е преподо́бнаго торжество́ дне́сь благоче́стно восхва́лимъ, и́же а́ще и послѣди́ возсія́, но дре́внихъ оте́цъ че́сти сподо́бися и мо́лится Христо́ви спасти́ся душа́мъ на́шимъ.

Честно́е прія́телище Ду́ха Пресвята́го бы́лъ еси́, Варлаа́ме преподо́бне: безпло́тнымъ бо во пло́ти подо́бяся, житію́ тѣ́хъ подража́лъ еси́, сего́ ра́ди отъ Вседержи́тельныя вѣнча́лся еси́ десни́цы, а́ще же и преста́вился еси́ отъ земли́, но Бо́гови жи́въ предстои́ши со святы́ми и мо́лишися о душа́хъ на́шихъ.

Сла́ва, гла́съ 8:

Красоты́ мíра сего́ отъ мла́да, преподо́бне, возненави́дѣвъ, Краснѣ́йшаго па́че сыно́въ человѣ́ческихъ отъ се́рдца возлюби́лъ еси́ и, Тому́ все́ю душе́ю прилѣпи́вся, я́ко безпло́тенъ на земли́, въ ме́ртвенномъ и тлѣ́нномъ тѣ́лѣ живы́й, нетлѣ́нія по́честь улучи́лъ еси́, и ны́нѣ, чи́стѣ зря́ Святу́ю Тро́ицу, прилѣ́жно помоли́ся, преподо́бне, умири́ти мíръ и спасти́ ду́ши на́ша.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На стихо́внахъ стихи́ры, гла́съ 8: Подо́бенъ: Что́ ва́съ нарече́мъ, святíи?

Что́ тя имену́емъ, преподо́бне? Ангела ли, во пло́ти су́ща? я́ко а́нгельски на земли́ пожи́лъ еси́; свѣти́льника ли преподо́бнымъ? я́ко тѣ́хъ по́двигомъ удиви́лъ еси́, бѣ́сы посрами́лъ еси́, покори́въ ду́ху тѣле́сныя стра́сти. И ны́нѣ, Христу́ предстоя́, моли́ спасти́ и просвѣти́ти ду́ши на́ша.

Сти́хъ: Честна́ предъ Го́сподемъ сме́рть преподо́бныхъ Его́.

Что́ тя провѣща́емъ, сла́вне? столпа́ ли одушевле́нна? я́ко непоколеби́мь искуше́ніи пребы́лъ еси́; рѣку́ ли воды́ живо́тныя, струи́ духо́вныя благода́ти излива́ющую? наста́вника и́нокомъ изя́щна, и безпло́тнымъ единонра́вна, и те́плаго моли́твенника о душа́хъ на́шихъ.

Сти́хъ: Пра́ведникъ, я́ко фи́никсъ, процвѣте́тъ, и, я́ко ке́дръ, и́же въ Лива́нѣ, умно́жится.

Что́ тя нарече́мъ, свя́те? ненака́заннымъ наказа́теля и врача́ въ болѣ́знехъ су́щимъ и́стинна, благоуха́нное пеще́ры прозябе́ніе, и́нокомъ утвержде́ніе, исто́чника чуде́съ приснотеку́щаго и подви́жника до́бляго, ско́раго предста́теля всѣ́мъ, съ вѣ́рою къ тебѣ́ приходя́щимъ.

Сла́ва, гла́съ 6:

Преподо́бне о́тче, ты́, отъ ю́ности Бо́га возлюби́въ, ничто́же па́че Того́ предпоче́лъ еси́, мíра и житія́ сего́ молвы́ избѣ́гъ, въ безмо́лвное приста́нище святы́я пеще́ры доспѣ́лъ еси́ и, въ ню́, я́ко въ прекра́сный черто́гъ, всели́вся, ду́шу свою́ еди́ному Влады́цѣ уневѣ́стилъ еси́, предочи́стивъ ю́ посто́мъ и моли́твами; тѣ́мже бы́лъ еси́ кра́сная пала́та Святы́я Тро́ицы, Ейже ны́нѣ съ весе́ліемъ предстоя́, помяни́ чту́щихъ всечестну́ю па́мять твою́.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

[На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-й стихоло́гіи, сѣда́ленъ, гла́съ 5. Подо́бенъ: Собезнача́льное.

Пріиди́те, и́ночествующихъ Россíйстіи собо́ри, и ви́дѣвше въ святѣ́мъ его́ сла́ву Бо́жію, къ похвале́нію отве́рзите устнѣ́, благословя́ще Творца́ своего́ Влады́ку, прославля́ющагося въ святы́хъ Свои́хъ, и псало́мски воспо́йте, глаго́люще: на́мъ зѣло́ че́стны дру́зи Твои́, Христе́ Бо́же, зѣло́ бо утверди́шася влады́чествія и́хъ о Тебѣ́, Спа́сѣ и Изба́вителѣ ду́шъ на́шихъ. [Два́жды.]

Сла́ва, и ны́нѣ, богоро́диченъ:

Утверди́ся пѣ́ти се́рдце мое́, Всенепоро́чная Дѣ́во, Пречи́стое Рождество́ Твое́, и́мже изба́вила еси́ на́съ прароди́тельныя кля́твы и вознесла́ еси́ па́дшее человѣ́ческое естество́ къ высотѣ́, тѣ́мже Тя́ по до́лгу пое́мъ и велича́емъ.

По 2-й стихоло́гіи, сѣда́ленъ, гла́съ 1. Подо́бенъ: Ли́къ а́нгельскій.

Духо́вныя крилѣ́ вѣ́дѣнія и дѣя́нія отъ слове́съ вели́каго отца́ прія́лъ еси́, богому́дре Варлаа́ме, и, си́ми возводя́ у́мъ сво́й къ высотѣ́, избѣ́глъ еси́, я́ко пти́ца отъ сѣ́ти, ловя́щихъ, и кра́йняго, идѣ́же пра́ведныхъ водворя́ются ли́цы, блаже́нства дости́глъ еси́. Сла́ва Да́вшему ти́ на сіе́ и́стое жела́ніе, сла́ва Да́вшему ти́ на стра́сти побѣ́ду, сла́ва Приве́дшему тя́ въ вѣ́чное селе́ніе. [Два́жды.]

Сла́ва, и ны́нѣ, богоро́диченъ:

Пріе́мшая отъ Ду́ха Свя́та во чре́во, Дѣ́во Чи́стая, и ро́ждшая пре́жде вѣ́къ отъ Отца́ рожде́нное Сло́во, безслове́снымъ на́съ дѣя́ніи уподо́бльшихся къ ра́зуму приведи́ и да́ждь житію́ исправле́ніе, я́ко да при́сно Тя́ велича́емъ.

Велича́ніе:

[Ублажа́емъ тя́, преподо́бне о́тче Варлаа́ме, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и, сѣда́ленъ, гла́съ 8. Подо́бенъ: Прему́дрости возле́гъ.

Сія́нія боже́ственныхъ слове́съ заре́ю просвѣти́вся, въ мра́цѣ житія́ сего́ су́щее оста́вилъ еси́ и, ко свѣ́ту мы́сленному прите́къ, воспрія́лъ еси́ во пло́ти со безпло́тными житіе́ невеще́ственно; отню́дуже, Ду́ха благода́тію предочи́стився, бы́лъ еси́ и́ночествующимъ наста́вникъ, богому́дре Варлаа́ме, сего́ ра́ди хвала́ми вопіе́мъ ти́: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ ка́лъ грѣхолю́бія впадо́хъ, и нѣ́сть ми́ воста́нія наде́жды, лю́тѣ погружа́юся отча́яніемъ, но я́ко ро́ждшая спасе́нія наде́жду, на мя́, раба́ Твоего́, при́зри и изба́ви отъ губя́щаго мя́ грѣха́, и страсте́й душетлѣ́нныхъ, и всегда́шняго озлобле́нія льсти́ваго врага́, Богоро́дице неискусобра́чная, моли́ Христа́ Бо́га грѣхо́въ оставле́ніе дарова́ти ми́, Тя́ бо имѣ́ю наде́жду, ра́бъ Тво́й.

Степе́нна, 1-й антифо́нъ, 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Ева́нгеліе преподо́бнаго [Матѳе́я, зача́ло 43].

Стихи́ра по Ева́нгеліи, гла́съ 6:

Сла́ву преподо́бныхъ и украше́ніе, вы́шняго Сіо́на граждани́на, земна́го а́нгела и небе́снаго человѣ́ка, по́стниковъ споспѣ́шника и дѣ́вствующихъ похвале́ніе, и́ноковъ вождя́ и удобре́ніе, пріиди́те, празднолю́бныхъ собо́ри, въ дне́шній де́нь съ на́ми воспое́мъ, похва́льныя вѣнцы́ любо́вію спле́тше, духо́вный ли́къ у честна́го гро́ба богоно́снаго отца́ на́шего соста́вимъ и принесе́мъ досто́йныя пѣ́сни, псало́мски пою́ще: честна́ сме́рть твоя́ предъ Го́сподемъ, преблаже́нне Варлаа́ме, ты́ бо, ду́хомъ а́ще и отше́лъ еси́ ко Влады́цѣ, но тѣ́ломъ вы́ну пребыва́еши съ на́ми, и покланя́ющихся моще́мъ твои́мъ даро́въ духо́вныхъ исполня́еши, и ны́нѣ, у́бо я́ко мно́го дерзнове́ніе стяжа́вый ко Го́споду, моли́ся о пою́щихъ честно́е твое́ успе́ніе, дарова́ти на́мъ единомы́сліе, правосла́вному Импера́тору укрѣпле́ніе, и всему́ мíру утвержде́ніе.

Кано́нъ [Богоро́дицѣ со ирмосо́мъ на 6 и] преподо́бному [на 8], гла́съ 1.
Пѣ́снь 1.

Ирмо́съ: Го́рькія рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пѣ́снь я́ко Благодѣ́телю пое́тъ Бо́гу, чудодѣ́ющему мы́шцею высо́кою, я́ко просла́вися.

Лю́тою рабо́тою печа́лей мíра сего́ мно́гихъ, блаже́нне, ви́дя плѣне́нныхъ, размы́слилъ еси́, я́ко нѣ́сть отъ тоя́ избавля́яй, ра́звѣ а́ще кто́ Изба́вителя Христа́ стопа́мъ послѣ́дуетъ, тѣ́мже Оному нелѣ́ностенъ бы́лъ еси́ ревни́тель. Бо́дрою у́бо твое́ю моли́твою, о́тче, и мене́, уны́лаго, къ похвале́нію твои́хъ по́двиговъ до́брѣ подви́гни, да ско́ро воспою́ пѣ́снь Бо́гу, я́ко просла́вися.

Напое́нъ бы́въ слове́съ медото́чныхъ отъ вели́каго отца́, не возжела́лъ еси́ про́чее зрѣ́ти вспя́ть, но, за́дняя забы́въ, на пре́дняя, а́ки перна́тъ, устреми́лся еси́, еди́но мы́сля, е́же взыска́ти всѣ́мъ се́рдцемъ Бо́га и вы́ну пѣ́ти Ему́ пѣ́снь, я́ко просла́вися.

Отъ бесѣ́ды преподо́бнаго Анто́нія те́плою къ Бо́гу любо́вію, а́ки пла́менемъ, се́рдцу твоему́ распали́вшуся, блаже́нне, ра́достенъ, а́ки нѣ́кое обрѣ́тъ сокро́вище, въ до́мъ сво́й возврати́лся еси́, предложе́ніе же во́ли твоея́ при но́гу достоблаже́ннаго отца́ оста́вилъ еси́, пото́мъ къ нему́ па́ки прите́къ, вы́ну воспѣва́лъ еси́ Бо́гу, я́ко просла́вися.

Вели́каго Анто́нія бесѣ́дѣ богодухнове́нной внима́я, запина́ющія міролю́бія сѣ́ти расто́рглъ еси́ и, прите́къ къ нему́, бы́лъ еси́ уче́нія того́ при́сный слы́шатель, поя́ ку́пно съ ни́мъ Бо́гу, я́ко просла́вися.

Богоро́диченъ: Стужа́ющія ми́ вы́ну напа́сти и прило́ги вра́жія разжени́ предста́тельствомъ Твои́мъ, Чи́стая Дѣ́во, и не посрами́ мене́ отъ ча́янія ми́лости Твоея́: еди́на бо еси́ съ Сы́номъ Твои́мъ наде́жда ненаде́жднымъ.

Пѣ́снь 3.

Ирмо́съ: Ка́мень, его́же небрего́ша зи́ждущіи, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́съ, ю́же отъ язы́къ искупи́.

Ка́мень небрего́мый, Христе́, Ты́ бы́лъ еси́ во главу́ у́гла, и на Тебѣ́ преподо́бный Тво́й, хотя́ до́мъ душе́вный созда́ти, предразсуди́ смире́нія, нищеты́ и про́чіихъ добродѣ́телей стѣ́ны положи́ти, тѣ́мже, прише́дъ къ вели́кому отцу́, моли́ его́, глаго́ля: на ка́мени за́повѣдей Госпо́днихъ утверди́ мя́, преподо́бне.

Въ сла́вѣ и бога́тствѣ со мно́гими о́троки прише́дъ къ пеще́рѣ святѣ́й, пове́рглъ еси́ подъ но́зѣ ста́рцу вся́ кра́сныя у́твари и себе́ сама́го, вку́пѣ низлага́я и лука́ваго горды́ню.

Разумѣ́въ, свя́те, я́ко сокро́вище у́мное сокрове́нно е́сть въ пеще́рѣ святѣ́й, все́ принесе́нное тобо́ю бога́тство и себе́ сама́го прода́лъ еси́ Анто́нію и, я́ко доброразу́мный купе́цъ, купи́лъ еси́ село́ то́, на не́мже обогати́лся еси́ си́мъ, и́мже тя́ и по сме́рти прославля́емъ.

Вѣ́ка сего́ бога́тство, сла́ву и суету́ вся́ку, сѣ́ни скоропреходя́щей подо́бна бы́ти, проразсуди́лъ еси́, преподо́бне. Тѣ́мже, вся́ въ уме́ты вмѣня́я, да Христа́ Еди́наго пріобря́щеши, возлюби́лъ еси́ ше́ствовати къ Нему́ и́ночествующихъ стезе́ю.

Богоро́диченъ: Пу́ть живота́ моего́, беззако́нными страстьми́ оляденѣ́вшій, десни́цею, Чи́стая, е́юже Дѣ́лателя Вы́шняго носи́ла еси́, отреби́ и очи́сти, да и во мнѣ́ стезя́ добродѣ́телей яви́тся, и ду́хъ пра́въ обнови́тся во утро́бѣ мое́й.

Сѣда́ленъ, гла́съ 8:

Твое́ жела́ніе неотло́жно вели́кій во отцѣ́хъ ви́дѣвъ, возложи́ на тя́ шле́мъ спасе́нія, обле́къ тя́ въ броня́ пра́вды, причте́ къ и́ноческому полку́, ты́ же — во́инъ, въ Ца́рство небе́сное учине́нъ, до́брѣ подвиза́лся еси́ на ви́димыя и неви́димыя враги́, и́мже одолѣ́въ, прія́лъ еси́ вѣне́цъ небе́сныя по́чести, ю́же улучи́ти моли́, преподо́бне Варлаа́ме, и на́мъ, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

На борю́щіяся со мно́ю враги́ да́ждь по́мощь свы́ше, Богоневѣ́стная Дѣ́во, и научи́ мя, я́ко вѣ́дущая и́хъ хи́тростныя ко́зни, сія́ одолѣва́ти: никто́же бо и́хъ побѣди́тъ, а́ще не Ты́ пособи́ши изря́днѣе чту́щимъ любо́вію Пренепоро́чное Рождество́ Твое́.

Пѣ́снь 4.

Ирмо́съ: Слы́ша дре́вле Авваку́мъ, Христе́, чу́дный Тво́й слу́хъ и стра́хомъ взыва́ше: отъ ю́га Бо́гъ пріи́детъ и Святы́й отъ горы́ пріосѣне́нныя ча́щи спасти́ пома́занныя. Сла́ва си́лѣ Твое́й, Го́споди.

Слы́шавше три́ во́инствующіи супоста́ты, я́ко обнажи́шася любве́ твоея́, егда́ обле́клся еси́ въ ри́зу спасе́нія, возскорбѣ́ша на тя́ и, яря́щася, воздвиго́ша на тя́ отца́ твоего́, ты́ же положи́лъ еси́ се́рдце твое́ въ си́лѣ Госпо́дни.

Притече́ на ста́до свято́е неразу́мный оте́́цъ со мно́гими о́троки къ пеще́рѣ и, разгна́въ всѣ́хъ, извлече́ тебе́, теплѣ́йшею любо́вію къ Бо́гу привя́заннаго, на Него́же надѣ́яся, взыва́лъ еси́: сла́ва си́лѣ Твое́й, Го́споди.

Извле́къ тя́, блаже́нне, во́нъ оте́цъ тво́й, совлече́ святу́ю ма́нтію и вве́рже въ де́брь, та́кожде и шле́мъ спасе́нія, и́же бѣ́ на главѣ́ твое́й, сне́мъ, заве́рже, та́же облече́ во оде́жду свѣ́тлу и многоцѣ́нну. Ты́ же, вся́ сія́ презрѣ́въ, а́нгельскому житію́ неукло́нно поревнова́лъ еси́, взыва́я и вопія́: сла́ва си́лѣ Твое́й, Го́споди.

Ну́ждею одѣ́янъ въ пресвѣ́тлую оде́жду, попра́лъ еси́ ту́ въ ка́лъ, вку́пѣ съ не́ю попира́я го́рдаго врага́, льстя́щаго разли́чными су́етствы приближа́ющихся пѣ́ти: сла́ва си́лѣ Твое́й, Го́споди.

Богоро́диченъ: Студо́мъ беззако́ній лю́тыхъ покрове́нна мя́ совлецы́, Богоро́дице, и оскверне́нную ри́зу мою́, подаю́щи ми́ покая́ніе и умиле́ніе, благода́тію Твое́ю чи́сту сотвори́, да благода́рно предста́ну Ти́, зовы́й: ра́дуйся, оде́ждо наги́хъ дерзнове́нія, Влады́чице.

Пѣ́снь 5.

Ирмо́съ: Свѣ́тъ Тво́й незаходи́мый возсія́й, Христе́, въ сердца́ вѣ́рно пою́щихъ Тя́, ми́ръ подава́яй на́мъ па́че ума́; тѣ́мъ, отъ но́щи невѣ́дѣнія ко дню́ свѣ́томъ Твои́мъ теку́ще, славосло́вимъ Тя́, Человѣколю́бче.

Ну́ждею ведо́му ти́ въ до́мъ въ свѣ́тлыхъ ри́захъ, блаже́нне, свѣ́тъ Бо́жій незаходи́мый облиста́ се́рдце твое́, тѣ́мъ не воззрѣ́лъ еси́ на свѣ́тъ ле́стный, но, Бо́га еди́наго предзря́ одесну́ю себе́, Того́ славосло́вилъ еси́ я́ко Человѣколю́бца.

Послу́шавъ Влады́ку, на безсме́ртный обѣ́дъ зову́щаго, преподо́бне, оте́ческія трапе́зы не вкуси́лъ еси́, но, очи́ма до́лу зря́, у́мъ возводи́лъ еси́ къ высотѣ́, размышля́я трапе́зу небе́снаго Царя́ и блаже́нство сего́, и́же снѣ́сть обѣ́дъ въ Ца́рствіи небе́сномъ.

Кра́сную пала́ту творя́ въ се́рдцѣ свое́мъ Пресвято́му Ду́ху, не сѣ́лъ еси́ на сла́вномъ мѣ́стѣ въ пала́тѣ твое́й, но въ углѣ́ еди́номъ, изволя́я тѣ́сное житію́ мѣ́сто избра́ти къ славосло́вію Го́спода Человѣколю́бца.

Не уклони́лъ еси́ се́рдца въ словеса́ лука́вая обру́чницы твоея́, ни возше́лъ еси́ на ло́же ея́, внима́я рече́ннымъ: во сла́вѣ преподо́бніи возра́дуются на ло́жахъ свои́хъ, и́хже ны́нѣ еси́ прича́стникъ и наслѣ́дникъ.

Богоро́диченъ: На ло́жи злы́хъ лежа́ща мя́ воздви́гни, Богоро́дице, и Твои́мъ руководи́тельствомъ напра́ви живо́тъ мо́й, е́же бы про́чее вре́мя покая́ніемъ проводи́ти и славосло́вити Тя́, Благоутро́бнаго Христа́ Бо́га на́шего Ма́терь.

Пѣ́снь 6.

Ирмо́съ: Ве́сь отъ страсте́й безмѣ́рныхъ содержу́ся и ки́томъ зо́лъ снизпадо́хъ, но возведи́ изъ нетлѣ́нія мя́, Бо́же, я́коже пре́жде Іо́ну, и вѣ́рою безстра́стіе ми́ да́руй, я́ко да во гла́сѣ хвале́нія и спасе́нія ду́хомъ пожру́ Ти.

Ве́сь напа́стными искуше́ніи окружа́емь, къ Человѣколю́бцу взыва́лъ еси́, преподо́бне, е́же изба́вити тя́ отъ сѣ́ти ловя́щихъ, и пребы́лъ еси́ три́ дни́ а́лченъ, моли́твою то́кмо ду́шу пита́я и глаго́ля съ проро́комъ: отъ тли́ сея́ возведи́ мя́, Бо́же, и а́зъ про́чая лѣ́та и́стиннымъ ду́хомъ поживу́ Тебѣ́.

О тебѣ́, блаже́нне, въ толи́комъ искуше́ніи су́щу, моли́тва бѣ́ прилѣ́жна отъ святы́хъ, су́щихъ въ пеще́рѣ, воззва́ша бо пра́ведніи, и Госпо́дь услы́ша и́хъ и тя́ изба́ви отъ печа́ли, преклони́въ се́рдце отца́ твоего́ на ми́лость, и́же сожалѣ́ о терпѣ́ніи твое́мъ и, любе́зно тя́ цѣлова́въ, отпусти́ съ ми́ромъ въ святу́ю пеще́ру.

Гла́съ плаче́венъ тогда́ слы́шашеся въ дому́ отца́ твоего́: роди́тели пла́кахуся по тебѣ́, люби́момъ сы́нѣ, жена́ лю́тѣ рыда́ше тебе́, обру́чника своего́, раби́ и рабы́ни стеня́ху съ во́племъ по господи́нѣ, и провожда́ху тя́ вси́ со слеза́ми; ты́ же, ра́достенъ изше́дъ, а́ки отъ Еги́пта во обѣтова́нную зе́млю, свя́те, благодаре́ніе прине́слъ еси́ Бо́гу, я́ко изба́ви тя́ отъ лю́таго міроде́ржца.

Сла́ва Тебѣ́, Бо́гу Еди́ному, во Тро́ицѣ Святѣ́й сла́вимому, я́ко спа́слъ еси́ раба́ Твоего́ отъ треплете́ннаго супоста́та, отъ его́же спаси́ и на́съ моли́твами Твоего́ уго́дника, почита́ющихъ его́ па́мять.

Богоро́диченъ: Спаси́, Влады́чице, страстьми́ погруже́нныхъ и простри́ ру́ку отча́яннымъ, я́ко да, спа́сшеся Тобо́ю, и́стиннымъ ду́хомъ хвале́ніе принесе́мъ Тебѣ́ съ Единоро́днымъ Твои́мъ Сы́номъ и Бо́гомъ.

Конда́къ, гла́съ 2:

Оте́ческаго преще́нія не устраши́лся еси́, ласка́ніямъ того́ не повину́лся еси́, ниже́ ле́стію низложи́лся еси́ же́нскою, всече́стне Варлаа́ме, но непобѣди́мь отъ тѣ́хъ пребы́лъ еси́, надѣ́яся на Го́спода своего́, Ему́же моли́ся о душа́хъ на́шихъ.

Икосъ:

Самоизво́льное твое́ ви́дя страда́ніе, кто́ не удиви́тся, преблаже́нне Варлаа́ме? Обличи́лъ бо еси́ де́монскія ко́зни и, по́хотнымъ страсте́мъ до́блественно сопротивоста́въ, ко́ль мно́го отъ напа́сти пострада́лъ еси́, да чи́сту ду́шу твою́ предста́виши Бо́гови, Ему́же и о на́съ моли́ся прилѣ́жно, свя́те, да изба́вимся отъ я́рости плотски́хъ и неви́димыхъ враго́въ поспѣшеству́ющими твои́ми къ Бо́гу моли́твами о душа́хъ на́шихъ.

Пѣ́снь 7.

Ирмо́съ: Проидо́ша, я́ко черто́гъ, пе́щный пла́мень нестерпи́мый, и́же за благоче́стіе иногда́ о́троцы святíи, показа́вшеся я́вѣ, и, согла́сно воспѣва́юще, пѣ́снь поя́ху: отце́въ Бо́же, благослове́нъ еси́.

Проше́лъ еси́, преподо́бне, искуше́нія пла́мень и, не опали́мъ пребы́въ отъ него́, врага́ па́че опали́лъ еси́, неви́димо борю́щагося съ тобо́ю, на́нь же посо́бствоваху тебѣ́ наста́вника твоего́ моли́твы, то́й бо непреста́нно зва́ше: отце́въ Бо́же, благослове́нъ еси́.

Почуди́ся Анто́ній терпѣливоду́шію твоему́, я́ко съ лю́тымъ веліа́ромъ боря́ся, не устраши́лся еси́ многоплете́нныхъ его́ ко́зней, и́миже а́ще и запя́тъ бы́лъ еси́, но терпѣ́ніемъ и смире́ніемъ побѣди́лъ еси́ и о́троческую воспѣ́лъ еси́ пѣ́снь: отце́въ Бо́же, благослове́нъ еси́.

Возвра́щшуся тебѣ́ съ побѣ́дою ко отце́мъ въ пеще́ру, ра́дости вси́ испо́лнишася, я́ко ви́дѣша тя́, вѣнцено́сца, возра́довася же и ста́рецъ тво́й, пріе́мый тя́ здра́ва, тѣ́мже и воспѣ́ша: отце́въ Бо́же, благослове́нъ еси́.

Ви́дѣвъ Анто́ній, я́ко на ко́рени уче́ній его́ добродѣ́тельми возра́слъ еси́, а́ки доброцвѣту́щее дре́во, преподо́бне, и лѣ́торасль ю́ности твоея́ ста́рческія благода́ти принесе́ плоды́, чуди́ся и благода́рственнѣ взыва́ше: отце́въ Бо́же, благослове́нъ еси́.

Богоро́диченъ: Гнію́щее грѣха́ми дре́во живота́ моего́ окропи́ отъ благода́ти Твоея́ росо́ю, Дѣ́во Чи́стая, я́ко да поне́ ма́лыя возрасту́тъ вѣ́тви и принесу́ Ти кра́сенъ, безсме́ртенъ смире́нія и моли́твы пло́дъ, зовы́й: ра́дуйся, плода́ безсме́ртнаго стяжа́ніе.

Пѣ́снь 8.

Ирмо́съ: Чу́да преесте́ственнаго показа́ о́бразъ огнеро́сная пе́щь дре́вле: о́гнь бо не опали́ ю́ныя дѣ́ти, Христо́во явля́я безсѣ́менное отъ Дѣ́вы Боже́ственное рождество́. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Чу́до! я́ко дарова́ніе еще́ въ ю́ности твое́й нача́ дѣ́йствовати, е́же ви́дѣвъ, Анто́ній вождя́ тя́ въ себе́ мѣ́сто поста́вилъ бра́тіи, и бы́лъ еси́ до́бръ па́стырь отце́мъ, пою́щимъ и превознося́щимъ Го́спода во вѣ́ки.

Пріе́мь нача́ло правле́нія, прія́лъ еси́ вно́вь нача́ло и житію́ твоему́, свя́те, и́бо приложи́лъ еси́ труды́ ко трудо́мъ и по́двиги во бдѣ́ніи сугу́бо, я́ко всѣ́мъ имѣ́ти тя́ во о́бразъ, хотя́щимъ пѣ́ти Го́спода во вѣ́ки.

До́бръ наста́вникъ и оте́цъ бы́лъ еси́, блаже́нне: я́коже бо са́мъ никогда́же не измѣни́лъ еси́ пра́вила твоего́, та́ко и бра́тію нака́зовалъ и моли́лъ еси́ имѣ́ти тща́ніе о спасе́ніи и прилѣжа́ти о души́, ве́щи безсме́ртнѣй, а́ще хо́щутъ со а́нгелы превозноси́ти Го́спода во вѣ́ки.

Мы́сленнаго ища́ Іерусали́ма, стра́нствовалъ еси́ къ чу́вственному, вся́кія труды́ въ пути́ Христа́ ра́ди сла́дцѣ терпя́; Его́же жизнопода́тельный Гро́бъ любе́зно цѣлова́въ, возврати́лся еси́, пою́щи Го́спода во вѣ́ки.

Богоро́диченъ: Всепѣ́тая Ма́ти, небе́сныхъ чино́въ Госпоже́, небеси́ и земли́ Цари́це, отъ земны́хъ мя́ отврати́ и да́ждь го́рняя иска́ти, сподо́би же въ го́рнемъ Іерусали́мѣ Тебе́ пѣ́ти и превозноси́ти Го́спода во вѣ́ки.

Пѣ́снь 9.

Ирмо́съ: Неизглаго́ланное Дѣ́вы та́инство: не́бо бо Сія́, и престо́лъ Херуви́мскій, и свѣтоно́сный черто́гъ показа́ся Христа́ Бо́га Вседержи́теля. Сію́ благоче́стно я́ко Богоро́дицу велича́емъ.

Неизглаго́ланныя ра́дости наслажда́ешися, о́тче, ны́нѣ: со а́нгельскими бо чи́ны предстои́ши Невече́рнему Свѣ́ту и на́съ въ свѣ́тѣ за́повѣдей Госпо́днихъ ходи́ти упра́ви моли́твами твои́ми.

Отъ жи́зни сея́ къ вѣ́чному животу́ пресели́лся еси́, преподо́бне, и прія́лъ еси́ упокое́нія мѣ́сто. Жи́знь у́бо на́шу, обурева́ему наведе́ніи сопроти́вныхъ, невре́дну сохрани́ и ра́йскаго селе́нія да́ждь доспѣ́ти твои́мъ направле́ніемъ.

Возвраща́яся отъ Константи́на гра́да, отше́лъ еси́ душе́ю во всесвѣтя́щійся гра́дъ Царя́ Небе́снаго, мо́щи же своя́ оста́вилъ въ монастырѣ́ Святы́я горы́, я́же заповѣ́далъ еси́ пренести́ въ пеще́ру, идѣ́же ны́нѣ лежа́тъ нетлѣ́нны, точа́щія исто́чникъ чуде́съ приснотеку́щій.

Прославля́яйся во святы́хъ Свои́хъ, Еди́ный Бо́же, просла́ви всѣ́хъ вѣ́рныхъ, покланя́ющихся Твое́й великолѣ́пнѣй сла́вѣ: се́ бо приво́димъ Тебѣ́ въ моли́тву уго́дника Твоего́, его́же ра́ди спаси́ всѣ́хъ на́съ.

Богоро́диченъ: Славосло́вимъ Тя́, Дѣ́во, немо́лчными усты́ и ублажа́емъ по до́лгу; Ты́ бо Еди́на блаже́нная въ жена́хъ еси́, ро́ждши Отчее Единоро́дное Сло́во, съ Ни́мже Тя́ ку́пно, вѣ́рніи, велича́емъ.

Свѣти́ленъ:

Сла́дкимъ любве́ Христо́вы жела́ніемъ уязви́въ ду́шу твою́, преподо́бне, и тоя́ вы́ну насыща́тися хотя́щи, мíра тлѣ́ннаго съ по́хотьми отре́клся еси́, до́мъ и роди́тели оста́вилъ еси́, о обру́чницѣ твое́й небре́глъ еси́; сего́ ра́ди стори́цею прія́лъ еси́ и живо́тъ вѣ́чный наслѣ́дуеши, его́же и мы́ да не лиши́мся, да́ждь по́мощь твои́ми моли́твами. [Два́жды.]

Сла́ва, и ны́нѣ, богоро́диченъ:

Кра́сная пала́то, Марíе Богоневѣ́сто, Ея́же красоты́ жела́я Вы́шній, дѣ́йствомъ Всесвята́го Ду́ха всели́ся во всеосвяще́нное чре́во и пло́ть прія́тъ на́съ ра́ди: ду́шу мою́ сотвори́ пала́ту на вселе́ніе Небе́сному Царю́, да при́сно велича́ю Тя́, непотре́бный ра́бъ Тво́й.

На хвали́техъ стихи́ры, гла́съ 4. Подо́бенъ: Да́лъ еси́ зна́меніе.

Житіе́ нескве́рно, терпѣ́ніе, кро́тость и любо́вь къ Бо́гу нелицемѣ́рну, воздержа́ніе вели́ко, умиле́ніе Боже́ственное, о́тче, стяжа́въ, я́ко а́нгелъ пожи́лъ еси́ во пло́ти, Варлаа́ме блаже́нне, моли́твенниче о душа́хъ на́шихъ. [Два́жды.]

Добро́ту души́ своея́ до́мъ Ду́ху Свято́му предуготовля́я, красоту́ мíра сего́ презрѣ́лъ еси́, на ка́мени же за́повѣдей Госпо́днихъ незы́блемо основа́ніе положи́въ, высото́ю смире́нія соверши́лъ еси́ и бы́лъ еси́ селе́ніе Тро́ицы Пресвяты́я, Юже о на́съ моли́, душа́мъ на́шимъ да́ти добро́ту и бы́ти прія́тіемъ духо́вныя благода́ти.

Мы́сленное дре́во житія́ твоего́ отверже́ніемъ мíра израсти́въ, прине́слъ еси́ плоды́ добродѣ́телей Бо́гу, о́тче блаже́ннѣйшій, отъ Него́же пріе́мъ трудо́въ возме́здіе, наслажда́ешися ны́нѣ дре́ва жи́зни въ раи́, его́же сла́дости и на́мъ сподо́битися моли́ Іису́са Человѣколю́бца и Спа́са ду́шъ на́шихъ.

Сла́ва, гла́съ 8:

Иноковъ наста́вникъ, вели́кій во отцѣ́хъ, ви́дя твою́ къ Бо́гу, о́тче, теплоту́, мно́гими добродѣ́тельми испра́вленну, вручи́ тебѣ́ богосо́бранное ста́до, е́же на па́житехъ наказа́нія твоего́ до́брѣ упа́съ, приве́лъ еси́ цѣ́ло къ па́стырей Нача́льнику, Христу́ Бо́гу, Его́же ны́нѣ умоли́ разу́мное ста́до свое́ соблюсти́ въ ми́рѣ и сохрани́ти отъ волко́въ, гу́бящихъ е́.

И ны́нѣ, богоро́диченъ:

Влады́чице, пріими́ мольбы́ ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое, [ектеніи́] и отпу́стъ.



НА ЛИТУРГІИ,

Слу́жба преподо́бному, о́бща: [Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жбы преподо́бнымъ отце́мъ Пече́рскимъ, и́хже мо́щи въ Бли́жней и Да́льней пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1855. — Л. 21 об. – 26 об.

/ Къ оглавленію раздѣла /


Наверхъ / Къ титульной страницѣ

0