Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 19-й де́нь.
Слу́жба святы́хъ преподо́бныхъ оте́цъ на́шихъ, пусты́нныхъ жи́телей, въ постѣ́ просія́вшихъ, Варлаа́ма и Іоаса́фа, въ вели́цѣй земли́, глаго́лемѣй Индíи.

ВЕЧЕРЪ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 6, гла́съ 6. Подо́бенъ: Все́ отло́жше.

Отъ ко́рене ца́рска* прекра́сна вѣ́твь израсте́,* благоуха́нный кри́нъ, блаже́нный ца́рь Іоаса́фъ,* и́же наказа́ніемъ духо́внаго наста́вника* возжелѣ́ ви́дѣти безцѣ́нный би́серъ,* позна́ въ Тро́ицѣ сла́вимаго Бо́га* и Того́ за́повѣдей* дѣ́латель изря́денъ показа́ся;* и ны́нѣ, въ вы́шнихъ ликовству́я,* мо́лится о душа́хъ на́шихъ. [Два́жды.]

Просвѣще́нный душе́ю, Варлаа́мъ* царю́ Іоаса́фу глаго́лаше:* позна́лъ еси́ Бо́га Творца́ всѣ́хъ,* То́й да просвѣти́тъ твоя́ о́чи серде́чныя* и да́стъ ти́ ду́хъ му́дрости и ра́зума,* да увѣ́дати и́маши,* что́ е́сть наде́жда зва́нія Его́,* я́ко напослѣ́докъ* и роди́телю твоему́ ко спасе́нію наста́вникъ бу́деши.* Азъ же не и́мамъ оста́ти здѣ́,* но отхожду́ въ пу́ть мо́й,* Бо́га наста́вника имѣ́я,* возводя́щаго мя́ ко спасе́нію. [Два́жды.]

Услы́шавъ до́блественный ца́рь Іоаса́фъ* о разлуче́ніи словеса́,* распали́вся душе́ю,* лице́ свое́ слеза́ми облива́я, глаго́лаше:* ты́, учи́телю духо́вный,* всѣ́хъ благи́хъ мои́хъ хода́таю,* па́ки ли оста́вити мя́ въ мíрѣ се́мъ хо́щеши?* Кто́ ми соверши́тъ тво́й чи́нъ учи́тельства?* Кто́ ми бу́детъ наста́вникъ ко спасе́нію?* Ты́ мене́ къ Бо́гу приве́лъ еси́* и въ чину́ сыно́внѣ наста́вника наста́вилъ еси́,* и тобо́ю надѣ́юся* отъ Христа́ прія́ти ве́лію ми́лость. [Два́жды.]

Сла́ва, гла́съ 6:

Зарда́ну извѣ́стно увѣ́дѣвшу ко о́троку учи́телево прилѣжа́ніе и ко Христу́ обраще́ніе, мно́ги ско́рби испо́лнися душа́ его́, зѣ́льную болѣ́знь себѣ́ притвори́; ни си́мъ возмо́же утаи́тися, подро́бну царю́ вся́ исповѣ́дая, и́мя Варлаа́мово нари́четъ: то́й, рече́, прельсти́ сы́на твоего́. Ца́рь же, я́ко ле́въ, отъ я́рости возревѣ́, вма́лѣ сме́рти не вкуси́, Іоаса́фу же безпреста́ни моля́щуся, призыва́я Спа́са ду́шъ на́шихъ.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Царю́ Авени́ру къ сы́ну глаго́лющу:* возлю́бленное мое́ ча́до,* че́сть бого́въ на́шихъ оста́вилъ еси́,* чужде́му же Бо́гу служи́ти изво́лилъ еси́.* Вску́ю, ча́до мое́, та́ко сотвори́лъ еси́?* а́зъ, любо́вію воспитава́я тя́,* надѣ́яхся прее́мника бы́ти ца́рствія моего́,* ты́ же, ча́до мое́, та́ко сотвори́лъ еси́,* Галиле́янину послѣ́довавъ.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Азъ отверго́хся де́монскія тмы́,* и къ свѣ́ту притеко́хъ богоразу́мія,* и́дольскую пре́лесть оста́вивъ,* и ко и́стинѣ прибли́жихся,* и Христу́ рабо́тати изво́лихъ:* То́й бо на́ше осужде́ніе дре́внее разруши́,* и естество́ на́ше на небеса́ вознесе́,* и Ца́рство небе́сное обѣща́ всѣ́мъ* лю́бящимъ Его́ вои́стинну.

Сти́хъ: Мно́ги ско́рби пра́веднымъ,* и отъ всѣ́хъ и́хъ изба́витъ я́ Госпо́дь.

Царю́ я́ростію и преще́ніемъ* свята́го о́трока устраши́ти хотя́щу, прирече́:* мно́гимъ му́камъ преда́мъ тебе́,* и зло́ю сме́ртію уморю́ тя,* и ктому́ сы́на тебе́ не нареку́,* но я́ко врага́ и отсту́пника;* и та́ко прети́въ, со гнѣ́вомъ отъи́де.* Іоаса́фъ же, въ пала́ту вше́дъ,* безпреста́ни Бо́гу моля́шеся.

Сла́ва, гла́съ 8. Самогла́сенъ:

Въ моли́твѣ свое́й Іоаса́фъ ца́рь глаго́лаше: Го́споди Бо́же мо́й, сла́дкая наде́ждо, нело́жное обѣща́ніе, тве́рдое прибѣ́жище на Тя́ надѣ́ющимся, укрѣпи́ мя во Твое́мъ благо́мъ исповѣ́даніи до коне́чнаго ми́ бы́ти издыха́нія: воспали́ся бо душа́ моя́ вели́кою къ Тебѣ́ любо́вію. Тѣ́мже да́ждь ми́ во все́й мое́й жи́зни за и́мя Твое́ и за Твое́ исповѣ́даніе вся́ страда́ти и всего́ мене́ Тебѣ́ пожре́ти: я́ко еди́нъ еси́ Побо́рникъ непобѣди́мый и Бо́гъ ми́лостивый.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 4:

Отъ духо́внаго наста́вника научи́вся, царю́ Іоаса́фе, Бо́га позна́ти, креще́ніемъ же просвѣти́вся, лю́ди къ вѣ́рѣ обрати́лъ еси́, и отцу́ твоему́ отъ купѣ́ли пріе́мникъ бы́въ, ца́рство оста́вивъ, пусты́ню дости́глъ еси́ и въ не́й трудолю́бнѣ подвиза́лся еси́. Моли́ Христа́ Бо́га со учи́телемъ твои́мъ Варлаа́момъ спасти́ся душа́мъ на́шимъ.

Сла́ва, и ны́нѣ, богоро́диченъ воскре́сенъ:

[Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 8. Подо́бенъ: Прему́дрости.

Ца́рь Авени́ръ, пріе́мъ совѣ́тъ отъ Арахíя, дру́га своего́, нача́тъ Іоаса́фа ласка́тельными и ти́хими словесы́, объима́я его́ и цѣлу́я, прельща́ти, глаго́ля: о ча́до мое́ вожделѣ́нное! Почестви́ отца́ твоего́ сѣди́ны и, моея́ послу́шавъ мольбы́, принеси́ же́ртву бого́мъ: та́ко бо о́нѣхъ ми́лость получи́ши, и долготу́ днíй, и сла́ву вся́кую, и ца́рство безвре́дно, и вся́ческихъ бла́гъ прича́стіе отъ ни́хъ пріи́меши. [Два́жды.]

Сла́ва, и ны́нѣ, богоро́диченъ:

Пречи́стая Дѣ́во, Ма́ти Бо́жія, души́ моея́ стра́сти лю́тыя исцѣли́, молю́ся, и проще́ніе да́руй мои́хъ прегрѣше́ній, я́же безу́мнѣ содѣ́яхъ, ду́шу и тѣ́ло оскверни́въ, окая́нный. Увы́ мнѣ́, что́ сотворю́ въ ча́съ о́нъ, внегда́ а́нгели ду́шу мою́ разлуча́тъ отъ стра́стнаго моего́ тѣлесе́? Тогда́ Помо́щница мнѣ́ бу́ди и Предста́тельница теплѣ́йшая: Тебе́ бо и́мамъ наде́жду, ра́бъ Тво́й.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Іоаса́фъ ко отцу́ глаго́лаше: нѣ́сть пра́ведно отца́ своего́ сѣди́ны чествова́ти, и́стиннаго же Бо́га безче́ствовати, ниже́ досто́йно, оста́вя Творца́ всея́ тва́ри, и́доломъ же́ртвы приноси́ти, но подоба́етъ и́стиннаго Бо́га чествова́ти и Тому́ еди́ному же́ртву приноси́ти. [Два́жды.]

Сла́ва, и ны́нѣ, богоро́диченъ:

Себе́ пре́жде суда́ ны́нѣ пла́чу, помышля́я моя́ дѣла́ лука́вая и лю́тая, и прегрѣше́ній глубину́, одержа́щую мя́ отъ ю́ности и подавля́ющу у́мъ; но Твои́мъ, Чи́стая, предста́тельствомъ оставле́ніе ми́ пода́ждь и спасе́ніе улучи́ти сподо́би.

По Хвали́те и́мя Госпо́дне...

Припѣ́въ: Ублажа́емъ тя́, преподо́бне о́тче Іоаса́фе, и чте́мъ болѣ́зни и труды́ твоя́, и́миже труди́лся еси́ во исповѣ́даніи Христо́вѣ.

Псало́мъ избра́нный: Блаже́нъ му́жъ, боя́йся Го́спода...

По поліеле́и сѣда́ленъ, гла́съ 3:

Не престая́ше у́бо Авени́ръ о прельще́ніи сы́на своего́ промышля́ти, собра́въ витíи на состяза́ніе, рече́ и́мъ: а́ще вѣ́ру на́шу утвердите́, христіа́нскую же вѣ́ру низложите́, просла́витеся; а́ще же побѣдите́ся, то умертвите́ся. Подо́бнѣ рече́ и Іоаса́фъ къ Нахо́ру, нарица́ющуся Варлаа́му: а́ще ле́стныя витíи побѣди́ши, просла́вишися; а́ще же побѣжде́нъ бу́деши, се́рдце и язы́къ тво́й рука́ми изъе́мъ, псо́мъ въ снѣ́дь съ про́чими у́ды преда́мъ сія́. Да, тя́ ви́дяще, устраша́тся вси́ не прельща́ти сыно́въ царе́выхъ. [Два́жды.]

Сла́ва, и ны́нѣ, богоро́диченъ:

Те́плая Засту́пнице, наде́жда тве́рдая, стѣно́, и покро́ве, и приста́нище прибѣга́ющихъ къ Тебѣ́, Приснодѣ́во Чи́стая, необурева́емое, Сы́на Твоего́ и Бо́га моли́ ми́ръ пода́ти мíру, и спасе́ніе, и ве́лію и бога́тую ми́лость.

Та́же степе́нна, 1-й антифо́нъ 4-го гла́са. Проки́менъ, гла́съ 4: Пра́ведникъ, я́ко фи́никсъ процвѣте́тъ* и, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ до́му Бо́га на́шего процвѣту́тъ. Вся́кое дыха́ніе... Сти́хъ: Хвали́те Бо́га во святы́хъ Его́... Ева́нгеліе Матѳе́я, зача́ло 11.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ: тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́; дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицѣ, со ирмосо́мъ на 6, и Іоаса́фу на 8, гла́съ 8.

Пѣ́снь 1.

Ирмо́съ: Сокруши́вшему бра́ни мы́шцею Свое́ю и прове́дшему Изра́иля сквозѣ́ Чермно́е мо́ре, пои́мъ Ему́, я́ко Изба́вителю на́шему Бо́гу, я́ко просла́вися.

Царе́вы глаго́лы слы́шавъ, Нахо́ръ зѣло́ вострепета́: вмѣ́сто бо развраще́нія изрече́ благослове́ніе, облича́я іуде́и и е́ллины, проповѣ́дая же на земли́ Христо́во прише́ствіе, я́ко просла́вися.

Рече́нія Нахо́ръ о зако́нѣ изложи́, витíи же и жерцы́ посрами́шася и я́ко безгла́сни обрѣто́шася, царю́ же Іоаса́фу душе́ю веселя́щуся и сла́вящу Бо́га небе́снаго, я́ко просла́вися.

Іоаса́фъ ца́рь къ Нахо́ру рече́: благода́ть ти́ исповѣ́дую, я́ко по и́стинѣ побо́рникъ бы́лъ еси́, и а́ще Христа́ возлю́биши, жи́знь наслѣ́диши: обраща́ющимся бо къ Нему́ отверза́етъ врата́ небе́сная.

Богоро́диченъ: Аще и недосто́йнѣ принесо́хъ ти́ таково́е слове́съ изви́тіе, богому́дрый царю́ Іоаса́фе, пріими́ сія́ съ любо́вію и принеси́ къ Богома́тери моле́ніе за мя́, да ми́лость обря́щу въ де́нь стра́шнаго испыта́нія.

Катава́сія: Отве́рзу уста́ моя́...

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Словесы́ любе́зными ца́рь Нахо́ра наказа́въ, о́нъ же съ пла́чемъ и ра́достію пусты́ню дости́же, на вѣ́ру обрати́ся и креще́ніемъ просвѣти́ся, и, вмѣ́сто во́лка, овча́ Христо́во обрѣ́теся.

Ѳе́вда къ царю́ Авени́ру глаго́лаше: не убо́йся, царю́, галиле́йскихъ мудре́цъ: сíи бо ско́ро испаду́тъ, не и́мутъ предъ лице́мъ мои́мъ ста́ти, ни слове́съ проти́вныхъ глаго́лати.

Предста́виша отрокови́цы укра́шены царе́ву сы́ну на послуже́ніе, да прельстя́тъ пра́веднаго о́трока; о́нъ же, а́ще и разжже́ніе въ се́рдце плотско́е пріи́мъ, моли́твою же и поще́ніемъ отъ сѣ́ти о́ныя изба́вленъ бы́сть.

Богоро́диченъ: Напа́стьми мно́гими одержи́мь, изъ глубины́ се́рдца вопію́ Ти́: Влады́чице, изба́ви мя́, непотре́бнаго раба́ Твоего́, лю́тыхъ обстоя́ній и тишину́ пода́ждь се́рдцу моему́.

Сѣда́ленъ, гла́съ 3:

Чи́стая и непоро́чная душа́ боже́ственнаго о́трока ополче́нія вра́жія не устраши́ся, на по́двигъ му́жески укрѣпля́яся, свы́ше избавле́нія прося́, да не оскверни́тъ оде́жды, ю́же отъ свята́го креще́нія прія́тъ, да получи́тъ красоту́ и сла́ву Христо́ву. [Два́жды.]

Сла́ва, и ны́нѣ, богоро́диченъ:

Кíйждо идѣ́же спаса́ется, та́мо пра́ведно и притека́етъ; и ко́е ино́е таково́е прибѣ́жище, я́ко Ты́, Богоро́дице, покрыва́ющее ду́ши на́ша?

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Егда́ посто́мъ и моли́твою тѣ́ло свое́ удручи́, зри́тъ во снѣ́ па́жить прекра́сну и гра́да красоту́ недомы́сленну, во еди́номъ у́глѣ жела́етъ пребыва́нія, и гла́съ слы́шитъ: подвиза́ющимся сія́ угото́вашася.

Мину́въ мѣста́ о́на свѣ́тлая, зри́тъ мѣ́сто, тмы́ испо́лнено, и пе́щь, стра́шнымъ пла́менемъ шумя́щую, и гла́су глася́щу: сіе́ муче́ніе грѣ́шникомъ, дѣ́лы скве́рными себе́ оскверни́вшимъ.

Лежа́ на одрѣ́, убуди́вся отъ видѣ́нія, сле́зы, а́ки рѣ́ки, испуща́ше, и ве́сь стра́хомъ объя́тъ бы́въ и въ себѣ́ разсужда́я: ка́ко свѣ́тло пра́веднымъ воздая́ніе и грѣ́шнымъ стра́шно муче́ніе? и вопія́ Христу́: сла́ва си́лѣ Твое́й, Го́споди.

Богоро́диченъ: Бо́га на руку́ носи́вши, вся́ческая руко́ю Содержа́щаго, о Дѣ́во Всеблагослове́нная! Того́, Дѣ́ва, роди́вши, и по рождествѣ́ па́ки Дѣ́ва пребыла́ еси́.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди ра́звѣ Тебе́ ино́го не вѣ́мы, и́мя Твое́ имену́емъ.

Не здра́вствуетъ тво́й сы́нъ, повѣ́даше царю́; о́нъ же ско́ро притече́ и уми́льно вопроша́ше: что́ ти бы́сть, сы́не мо́й люби́мый, утѣ́хо ста́рости моея́? что́ та́ко лежи́ши на одрѣ́ твое́мъ, ни ма́ло къ кому́ бесѣ́дуя?

Препя́лъ еси́ сѣ́ть нога́мъ мои́мъ: вма́лѣ всели́лася бы во а́дъ душа́ моя́, а́ще не Госпо́дь помо́глъ бы ми́ и показа́ мнѣ́ пу́ть ко спасе́нію, и ктому́ не возмо́глъ бы еси́ мене́ ви́дѣти жи́ва и сы́на себѣ́ именова́ти.

Рыда́ніе и печа́ль съ го́рькимъ пла́чемъ сплета́ше ца́рь, неутоли́мь мяте́жъ имѣ́яше, рече́ въ себѣ́: ча́до, не то́кмо бого́въ отступле́нія, но и живота́ твоего́ отрица́ешися.

Богоро́диченъ: Неизглаго́ланно заче́нши Бо́га, и па́че естества́ родила́ еси́: Сего́ моли́, Всенепоро́чная, растлѣ́вша безмѣ́стными дѣя́ніи, поми́ловати мя́ за неизрече́нную ми́лость.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся, тѣ́мже, я́ко Іо́на, та́ко вопію́ Ти́: возведи́ отъ тли́ живо́тъ мо́й, Благоутро́бне Го́споди.

Шу́іяго стоя́нія изба́витися и десна́го стоя́нія сподо́битися жела́ти Іоаса́фу, та́ко и́стинствующу, и ничто́же чествова́ти па́че Христо́вы любве́: се́ бо и́стинная сла́дость, и весе́ліе, и вѣ́чное пребыва́ніе.

Убо Ѳе́вда глаго́лаше: почто́ бого́въ отступи́лъ еси́ и отца́ царя́ прогнѣ́валъ еси́? Сего́ ра́ди отъ всѣ́хъ люде́й возненави́дѣнъ еси́. Не бо́зи ли отца́ твоего́, моли́твы послу́шавше, тебе́ ему́ дарова́ша?

Возопи́ ца́рь Іоаса́фъ: о, заблужде́нія глубино́, вавило́нское сѣ́мя, столпотворе́нія вну́че, окая́нне чародѣ́ивый ста́рче! Почто́ укаря́еши спаси́тельную про́повѣдь Христо́ва прише́ствія, Его́же сла́вы не́бо и вся́ земля́ испо́лнишася?

Богоро́диченъ: Помози́, Влады́чице, и услы́ши глаго́лъ мо́й, Всенепоро́чная, его́же изъ глубины́ души́ приношу́ Ти, и разрѣше́ніе долго́въ пода́ждь ми́.

Конда́къ, гла́съ 8:

Вѣ́дый твое́ изъ младе́нства благо́е изволе́ніе, Іоаса́фе, еди́нъ сердцевѣ́децъ Бо́гъ, и отъ ца́рствія земна́го въ мона́шеское пребыва́ніе приведы́й тя́, вели́кому Варлаа́му послѣ́довати сподо́би. Съ ни́мже и ны́нѣ го́рній Іерусали́мъ всесвѣ́тлый оте́чество имѣ́я, жела́емыя добро́ты красно́ наслажда́яся Святы́я Тро́ицы, мо́лимъ тя́, ца́рская красото́, помина́й на́съ, вѣ́рою чту́щія тя́.

Икосъ:

Другíй, о́тче, яви́лся еси́ вра́чь и предста́тель, неду́гомъ одержи́мыхъ ско́рбію, Іоаса́фе чу́дне, исцѣля́я вся́ вѣ́рныя, притека́ющія подъ боже́ственный покро́въ тво́й. Тѣ́мъ и отъ на́съ слы́шиши: ра́дуйся, отца́ блага́го ко́реню; ра́дуйся, ма́тере благíя вѣ́твь; ра́дуйся, и́же тѣ́хъ любо́вь отри́нувый; ра́дуйся, и́же еди́наго Бо́га пріе́мый; ра́дуйся, я́ко оста́вилъ еси́ на земли́ во́инство; ра́дуйся, я́ко низложи́лъ еси́ ва́рварскую горды́ню; ра́дуйся, стѣна́ и храни́тель царе́й бы́вый; ра́дуйся, ору́жіе и сто́лпъ мíру я́влься; ра́дуйся, огне́мъ поже́гъ язы́чества; ра́дуйся, свѣти́льниче, сія́я чудесы́; ра́дуйся, наги́мъ мно́жицею покро́въ; ра́дуйся, плѣне́нныхъ изба́вителю; помина́й на́съ, вѣ́рою чту́щія тя́.

Пѣ́снь 7.

Ирмо́съ: Халде́йская пе́щь, огне́мъ распаля́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Сла́ву же, и ца́рство, и о́бласть всю́ на́двое раздѣ́льшему, о́ву себѣ́ оста́вль, о́ву же вруча́етъ сы́ну, царя́ его́ поста́вивъ; кня́зи же мно́ги и страти́ги преда́въ, любе́зно же и че́стно отпусти́ его́ на страну́ свою́.

Не про́сто къ ца́рству идя́ше, но честны́й кре́стъ предъ ни́мъ ноша́ху; вше́дъ же во гра́дъ, на всѣ́хъ столпѣ́хъ о́бразъ креста́ водружа́ше и ка́пища разоря́ше, прекра́сну це́рковь Влады́ки Христа́ воздви́же и всѣ́мъ собра́тися къ не́й повелѣва́ше; са́мъ же прилѣ́жно моля́шеся.

Христу́ вѣ́ровати вся́ подру́чныя уча́ше, изгна́нныя же отце́мъ епи́скопы, іере́и и мона́хи ра́достно срѣта́ше, и свои́ми рука́ми но́ги и́хъ омыва́ше, и вся́ко промышле́ніе о ни́хъ творя́ше; и усе́рдно взыва́ше: препросла́вленный Бо́же, благослове́нъ еси́.

Богоро́диченъ: Дре́вле у́бо Іа́ковъ Тя́ преднаписа́; Иса́ія же, у́глемъ Ду́ха очи́щся, Бо́га Емману́ила отъ утро́бы Твоея́ роди́тися прозна́менова. Къ Нему́же велегла́сно вопія́ше: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Убо Іоаса́фовъ до́мъ растя́ше, Авени́ровъ же умаля́шеся, а́біе ца́рь писа́ніемъ сы́на призыва́етъ, о́нъ же ско́ро прише́дъ, на вѣ́ру отца́ обрати́, и отъ купѣ́ли сему́ пріе́мникъ бы́въ, и возопи́ ра́достно: сла́влю Тя́, Христе́, во вѣ́ки вся́.

Бы́сть чу́до преди́вно: сы́нъ роди́телю своему́ оте́цъ яви́ся. Окре́стныя страны́ просвѣща́хуся, це́ркви созида́хуся, епи́скопи и іере́и же́ртву Бо́гу приноша́ху, пѣ́снь воспѣва́юще и сла́вяще Христа́ во вѣ́ки вся́.

Госпо́днею благода́тію ца́рь Авени́ръ веселя́шеся, всю́ ца́рскую вла́сть сы́ну предаде́, са́мъ же въ молча́ніи пребыва́ше: въ толи́ку глубину́ смире́нія вложи́ себе́, я́ко и дре́внихъ превзы́ти благовѣ́ріемъ, и сла́вяше Христа́ во вѣ́ки вся́.

Богоро́диченъ: Ины́я по́мощи не и́мамы, ра́звѣ Тебе́, Влады́чице: Ты́ крѣ́пость и утвержде́ніе, Ты́ похвала́, и ра́дованіе, и храни́тельница мíра; къ Тебѣ́ прибѣга́юще, спаса́емся вси́.

Пѣ́снь 9.

Ирмо́съ: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ си́лъ, немо́лчными славословле́ніи велича́емъ.

Мину́вшимъ дне́мъ нѣ́кіимъ по креще́ніи ца́рь Авени́ръ а́біе въ неду́гъ тѣле́сный впаде́, и егда́ нача́тъ приближа́тися коне́цъ житія́ его́, въ до́брѣмъ исповѣ́даніи, съ те́плыми слеза́ми ду́шу свою́ предаде́.

Ра́достными слеза́ми сы́нъ почита́ше отца́, не украси́ его́ ца́рскими оде́ждами, но просты́мъ одѣя́ніемъ тѣ́ло его́ покры́; надъ гро́бомъ ста́въ, ру́цѣ воздѣ́въ, Бо́гу благодаре́ніе возсыла́ше, въ покая́ніи того́ пріи́мшу.

Къ лю́демъ глаго́лаше, сѣдя́ на престо́лѣ ца́рстѣмъ: оте́цъ мо́й, ца́рь Авени́ръ, у́мре, я́ко еди́нъ отъ ни́щихъ, ничто́же ему́ послѣ́дова, ни бога́тство, ни ца́рская сла́ва; вы́ же избери́те себѣ́, его́же хо́щете, да ца́рствуетъ надъ ва́ми.

Богоро́диченъ: Лѣ́ствица Іа́ковля, Еюже дре́вле а́нгелы ви́дѣ сходя́ща; гора́ пріосѣне́нная, отъ Нея́же ка́мень безъ ру́къ отсѣче́ся; и две́рь небе́сная, Еюже Госпо́дь еди́нъ про́йде. Еди́на въ жена́хъ Ты́ еси́, Пречи́стая.

Свѣти́ленъ:

Ца́рство оста́вивъ, къ пусты́ни устреми́ся и въ хра́минѣ убо́гаго обита́, ца́рскую оде́жду совле́къ, убо́гому даде́, коне́чную ми́лостыню показа́въ, Христу́ послѣ́дова. [Два́жды.]

[Сла́ва, и ны́нѣ,] богоро́диченъ:

Въ це́рковь Твою́ прибѣга́юще, вопіе́мъ Ти́, Пречи́стая: пода́ждь на́мъ по́мощь и лю́тыхъ избавле́ніе, да при́сно велича́емъ Рождество́ Твое́.

На хвали́техъ стихи́ры на 4, гла́съ 6. Подо́бенъ: Все́ отло́жше.

Отъ ко́рене ца́рска* прекра́сна вѣ́твь израсте́,* благоуха́нный кри́нъ, блаже́нный ца́рь Іоаса́фъ,* и́же наказа́ніемъ духо́внаго наста́вника* возжелѣ́ ви́дѣти безцѣ́нный би́серъ,* позна́ въ Тро́ицѣ сла́вимаго Бо́га* и Того́ за́повѣдей* дѣ́латель изря́денъ показа́ся;* и ны́нѣ, въ вы́шнихъ ликовству́я,* мо́лится о душа́хъ на́шихъ. [Два́жды.]

Просвѣще́нный душе́ю, Варлаа́мъ* царю́ Іоаса́фу глаго́лаше:* позна́лъ еси́ Бо́га Творца́ всѣ́хъ,* То́й да просвѣти́тъ твоя́ о́чи серде́чныя* и да́стъ ти́ ду́хъ му́дрости и ра́зума,* да увѣ́дати и́маши,* что́ е́сть наде́жда зва́нія Его́,* я́ко напослѣ́докъ* и роди́телю твоему́ ко спасе́нію наста́вникъ бу́деши.* Азъ же не и́мамъ оста́ти здѣ́,* но отхожду́ въ пу́ть мо́й,* Бо́га наста́вника имѣ́я,* возводя́щаго мя́ ко спасе́нію.

Услы́шавъ до́блественный ца́рь Іоаса́фъ* о разлуче́ніи словеса́,* распали́вся душе́ю,* лице́ свое́ слеза́ми облива́я, глаго́лаше:* ты́, учи́телю духо́вный,* всѣ́хъ благи́хъ мои́хъ хода́таю,* па́ки ли оста́вити мя́ въ мíрѣ се́мъ хо́щеши?* Кто́ ми соверши́тъ тво́й чи́нъ учи́тельства?* Кто́ ми бу́детъ наста́вникъ ко спасе́нію?* Ты́ мене́ къ Бо́гу приве́лъ еси́* и въ чину́ сыно́внѣ наста́вника наста́вилъ еси́,* и тобо́ю надѣ́юся* отъ Христа́ прія́ти ве́лію ми́лость.

Сла́ва, гла́съ 6:

Преподо́бніи отцы́, во всю́ зе́млю изы́де вѣща́ніе исправле́ній ва́шихъ: тѣ́мъ на небесѣ́хъ обрѣто́сте мзду́ трудо́въ свои́хъ, де́монскія погуби́ли есте́ полки́ и а́нгельскія дости́гли есте́ чи́ны, и́хже житію́ непоро́чно поревнова́ли есте́. Дерзнове́ніе иму́ще ко Христу́ Бо́гу, ми́ръ испроси́те душа́мъ на́шимъ.

И ны́нѣ, [богоро́диченъ]:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Колосса́емъ, зача́ло 250. Аллилу́ія, гласъ 5: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Ева́нгеліе Матѳе́я, зача́ло 55, отъ полу́. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 165 об. – 171.

/ Къ оглавленію раздѣла /


Наверхъ / Къ титульной страницѣ

0