Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 19-й де́нь.
Свята́го проро́ка Авдíя и свята́го му́ченика Варлаа́ма.

[ВЕЧЕРЪ,]
На Го́споди воззва́хъ: стихи́ры проро́ка, гла́съ 1. Подо́бенъ: Всехва́льніи му́ченицы.

Имиже вообража́ется Бо́гъ,* пе́рвыми, сво́йствы* и су́щественными указа́ніи,* си́хъ, сла́вніи* и честнíи проро́цы,* причаще́ніемъ и благода́тію,* второ́е, по да́ру причаща́ются,* просвѣща́ющу Го́споду уго́дники Своя́* Свое́ю свѣ́тлостію.

Незаходи́маго исполня́емь свѣ́та,* и сла́ву ви́дя* па́че ума́ и смы́сла,* и предстоя́ Влады́цѣ всѣ́хъ,* я́ко проро́къ сла́вный* и боже́ственный боговѣща́тель бы́въ.* Того́ моли́* дарова́ти душа́мъ на́шимъ* ми́ръ и ве́лію ми́лость.

Ины стихи́ры свята́го Варлаа́ма, гла́съ 4. Подо́бенъ: Яко до́бля.

Столпа́ твердѣ́йшій,* и мѣ́ди крѣпча́йшій,* и желѣ́за бы́лъ еси́ мощнѣ́йшій:* отступа́етъ бо жго́мо* и а́біе разруша́емо си́хъ ко́еждо огне́мъ,* того́ ну́ждею побѣжда́емо.* Твоя́ же непрекло́нна десни́ца просте́рта* у́гліемъ жгу́щимъ* пресла́вно преодолѣ́, всему́дре.

Свяще́нникъ я́коже бы́въ,* и Бо́гу предстоя́,* и къ Тому́, блаже́нне, приходя́,* не чужде́ю кро́вію, свое́ю же наипа́че,* и руко́ю му́ченическою* благово́нія кади́ло прине́слъ еси́,* не де́монскимъ пре́лестемъ,* Христу́ же Спа́су, и Влады́це,* и при́сно Ца́рствующему.

Свяще́нника принося́ща* и а́гнца приноси́маго,* того́жде обою́ду тя́, всехва́льне,* ра́достно имену́емъ,* я́ко су́ща обое́ тебе́ сама́го Бо́гу* я́ко всенепоро́чное заколе́ніе* всесоже́гъ о́гненнымъ муче́ніемъ.* Его́же моли́ спасти́ чту́щія при́сно* всесла́вную па́мять твою́.

Сла́ва, и ны́нѣ, богоро́диченъ:

Ту́чами Ду́ха Пресвята́го, Пречи́стая,* мою́ мы́сль ороси́,* я́же ка́плю ро́ждшая — Христа́, неизче́тно* безмѣ́рная беззако́нія человѣ́ковъ* щедро́тами измы́вшую,* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Крестобогоро́диченъ:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь му́ченика, гла́съ 4:

Му́ченикъ Тво́й, Го́споди, Варлаа́мъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


НА УТРЕНИ,
Кано́нъ окто́иха еди́нъ и святы́хъ два́.

Кано́нъ проро́ка, его́же краегране́сіе: Прозорли́ваго Авдíя пою́ сла́ву. Ѳеофа́ново. Гла́съ 5.
Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Спаси́телю Бо́гу, проро́чески предстоя́ ны́нѣ, со дерзнове́ніемъ моли́ся свѣща́тельными луча́ми просвѣща́ти, вѣ́рою, богодохнове́нне, тя́ блажа́щія.

Иже вся́ я́вѣ прозна́тельно зря́й, твоего́ се́рдца нему́тное, и чи́стое, и свѣтоза́рное, блаже́нне, ви́дя, проро́ка богопрія́тна тя́ поставля́етъ.

Видѣ́нія ви́дѣвъ и́стинно, отъ Бо́га тебѣ́ изъявля́емая, проповѣ́далъ еси́ злоче́стіе бра́тій, и па́губу лю́тую, и тѣ́хъ пра́ведное, блаже́нне, искорене́ніе.

Богоро́диченъ: Спа́сшіися Твои́мъ, Богороди́тельнице Чи́стая, безсѣ́меннымъ Рождество́мъ, мо́лимъ Тя́: мірскíя напа́сти изба́ви ны́, согла́сно зову́щія пѣ́снь побѣ́дную.

Инъ кано́нъ му́ченика, его́же краегране́сіе: Терпѣли́выя твоя́, Варлаа́ме, пою́ болѣ́зни. Ѳеофа́ново. Гла́съ 4.
Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Твоего́ страда́нія свѣтлостьми́ озаря́емь, на́съ, вѣ́рою чту́щихъ па́мять твою́, соблюди́, Варлаа́ме, моли́твами твои́ми.

Огнь угаси́вый нече́стія богоче́стія извѣ́стно огне́мъ богодохнове́ннымъ, да почти́тся пѣснопѣ́сньми Варлаа́мъ чу́дный.

О благоче́стіи подвиза́вся, вѣнчено́сче Варлаа́ме, вѣнце́мъ сла́вы ны́нѣ досто́йно почествова́лся еси́ десни́цею Вседержи́телевою.

Крѣ́пость тебѣ́ дарова́ Влады́ка на разли́чныя ра́ны, всеблаже́нне му́чениче, сего́ ра́ди побѣди́лъ еси́ безбо́жныхъ свирѣ́пство.

Богоро́диченъ: Лѣ́ствица яви́лася еси́ небе́сная, е́юже сни́де къ на́мъ Сло́во, Дѣ́во, ю́же дре́вле прови́дѣ Іа́ковъ, пра́отецъ Тво́й.

Пѣ́снь 3.

Ирмо́съ: Си́лою Креста́ Твоего́, Христе́, утверди́ мое́ помышле́ніе во е́же пѣ́ти и сла́вити спаси́тельное Твое́ Вознесе́ніе.

Во́дъ та́инственныхъ рѣка́, изъ пучи́ны происходя́ даро́въ Ду́ха, боговѣща́телю, бы́лъ еси́.

Хотѣ́ніемъ и про́мысломъ Бо́жіимъ провозвѣща́ти бу́дущая предложи́лся еси́, достосла́вне.

Просвѣща́емь Боже́ственнымъ свѣ́томъ и небе́снымъ, провозвѣсти́лъ еси́ бу́дущее язы́комъ спасе́ніе, всеблаже́нне.

Богоро́диченъ: Всели́ся Сло́во въ Тя́, Дѣ́во Ма́ти, спаса́етъ же, Богоро́дицу, му́дрствующія Тя́ хода́тайствомъ Твои́мъ, Всенепоро́чная.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Ве́сь пло́тскій сою́зъ и сочета́ніе твои́хъ удо́въ разрѣша́теся, но крѣ́пость соблюде́ся твоея́ души́ нерасте́рзана.

Стремле́ніе благомо́щно претерпѣ́лъ еси́, стру́жущихъ твоя́ ре́бра, всеблаже́нне, терпѣ́ніе ю́ношеское крѣ́пко показа́въ.

Кто́ твое́ крѣ́пкое и си́льное и по́мысла неужа́сное мудрова́ніе похвала́ми похва́литъ по досто́инству, всеблаже́нне?

Богоро́диченъ: Уста́вися тля́ сме́рти во Ѵпоста́сной пло́тію Жи́зни, Пречи́стая, человѣ́комъ я́вльшейся изъ чре́ва Твоего́, Богоневѣ́стная.

Сѣда́ленъ проро́ка, гла́съ 1. Подо́бенъ: Гро́бъ Тво́й, Спа́се.

Вели́кій Авдíй, Боже́ственными сія́ніи у́мъ свѣтови́дный стяжа́въ, сказу́етъ бу́дущая, Ду́хомъ Святы́мъ вѣща́я. Сего́ дне́сь благочестивому́дренно чту́ще, соверша́емъ свяще́нную его́ па́мять, сердца́ просвѣща́ющую.

Сла́ва, му́ченика, гла́съ 4. Подо́бенъ: Вознесы́йся.

Пла́мень нече́стія угаси́въ и росо́ю богозна́нія вже́глъ вѣ́рныхъ сердца́, ны́нѣ да почти́тся вѣ́рно Варлаа́мъ сла́вный пѣ́сньми боже́ственными. Се́й бо посрами́ и́дольскую ле́сть и, побѣ́дный вѣне́цъ взе́мъ, всѣ́мъ про́ситъ грѣхо́въ оставле́нія.

И ны́нѣ, богоро́диченъ:

Иже на престо́лѣ херуви́мстѣмъ сѣдя́й, и въ нѣ́дрѣхъ Отчихъ пребыва́яй, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ; вопло́щься бо, Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́. Его́же умоли́ спасти́ся рабо́мъ Твои́мъ.

Крестобогоро́диченъ:

Изъ Безнача́льнаго Отца́ рожде́ннаго, напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Услы́шахъ слу́хъ си́лы Креста́, я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди.

Проро́чества благода́ть, отъ страсте́й я́ко предъочи́стивъ твою́ ду́шу, Ду́хомъ Святы́мъ пріе́мъ, возопи́лъ еси́: сла́ва си́лѣ Твое́й, Го́споди.

Проро́къ Авдíй, заре́ю свѣтода́тельныя мо́лніи озаря́емь, просвѣти́ на́съ зва́ти Тебѣ́: сла́ва си́лѣ Твое́й, Го́споди.

Невѣстокраси́тель яви́лся еси́, всеблаже́нне, церко́вный, отъ Сіо́на проповѣ́давъ Спа́са изы́ти, Ему́же зове́мъ: сла́ва си́лѣ Твое́й, Го́споди.

Богоро́диченъ: Собезнача́льное и соприсносу́щное Сло́во Отчее родила́ еси́, Чи́стая, боголѣ́пно, Ему́же зове́мъ: сла́ва си́лѣ Твое́й, Го́споди.

Инъ.

Ирмо́съ: Твоего́ на земли́ явле́нія, Христе́ Бо́же, проповѣ́дуя проро́къ прише́ствіе, съ весе́ліемъ вопія́ше: сла́ва си́лѣ Твое́й, Го́споди.

Витíйское скверносло́віе отри́нувъ, уче́ніе же апо́стольское пріе́мъ и́стинное, сла́вне, свидѣ́тель и́стинный бы́лъ еси́.

Иже огня́ си́льнѣйшее произволе́ніе свяжа́въ, мучи́телей безу́міе низложи́въ, зове́ши: сла́ва си́лѣ Твое́й, Го́споди.

О Христѣ́ да́же до сме́рти, терпѣливоду́шне, огню́ и му́камъ проти́вился еси́, велегла́сно поя́: сла́ва си́лѣ Твое́й, Го́споди.

Си́льнѣйшимъ преусе́рдіемъ, всеблаже́нне, обдержи́мь, пре́лесть попра́лъ еси́ богому́дренно, поя́: сла́ва си́лѣ Твое́й, Го́споди.

Богоро́диченъ: Вопло́щся отъ Дѣ́вы, Безпло́тный на зе́млю къ человѣ́комъ пріи́де. Тѣ́мже вѣ́рою зове́мъ: сла́ва си́лѣ Твое́й, Го́споди.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ бо Тебе́, ино́го не вѣ́мы.

Утреневавъ ко Го́споду, прія́лъ еси́ съ небесе́ да́ръ Ду́ха Пресвята́го, всехва́льне.

Спомо́щника, житіе́ боже́ственное стяжа́въ, ви́дѣти сподо́бился еси́, неви́димо Разумѣва́емаго.

Возсія́ тебѣ́ свѣ́тъ, всеблаже́нне, я́ко проро́ку, и того́ супру́жница тебѣ́ весе́ліе дарова́ся.

Богоро́диченъ: Хотѣ́ніемъ вся́ческая, Пречи́стая, сотвори́вый, изъ Тебе́ созда́ся е́же по на́мъ Пребоже́ственный.

Инъ.

Ирмо́съ: Возсія́вый свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се, Сы́не Бо́жій.

Показа́вый на́мъ Свои́хъ страсте́й свидѣ́теля, вопію́ща: сла́ва Тебѣ́, сла́ва Тебѣ́, Іису́се, Сы́не Бо́жій.

Терпѣ́нію твоему́ мно́гому мзда́ и побѣ́ды вѣне́цъ исплете́ся, — сла́ва Тебѣ́, сла́ва Тебѣ́, — зову́щу, — Іису́се, Сы́не Бо́жій.

Стрѣ́лы глаго́лъ твои́хъ въ сердца́ вра́жія вонзи́лъ еси́, зовы́й: сла́ва Тебѣ́, сла́ва Тебѣ́, Іису́се, Сы́не Бо́жій.

Богоро́диченъ: Святу́ю го́ру, Чи́стая, и я́ко ски́нію Высоча́йшаго му́дрствующе Тя́, Дѣ́во, — сла́ва Тебѣ́, — зове́мъ, — Богоро́дице, на́ше упова́ніе.

Пѣ́снь 6.

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ Тебѣ́, Человѣколю́бцу, и спасе́ мя десни́ца Твоя́, Го́споди.

Си́лою Ду́ха Боже́ственнаго зрѣ́лъ еси́, проро́че, бу́дущая, о́бразы пріе́мля Боже́ственныхъ явле́ній, я́ко въ зерца́лѣ, души́ свѣ́тлостію.

Умоли́ Го́спода, проро́че всеблаже́нне, моли́твами твои́ми вѣ́рою соверша́ющимъ па́мять твою́ прося́ прегрѣше́ній дарова́ти проще́ніе.

Уми́лостивися рабо́мъ Твои́мъ и си́мъ прегрѣше́ній проще́ніе пода́ждь, Человѣколю́бче, имѣ́яй моля́щаго Тя́ Твоего́ проро́ка, мíру Тебе́ провозвѣсти́вшаго.

Богоро́диченъ: Вся́ческая нося́й сло́вомъ, Боже́ственною си́лою, объя́тіи Твои́ми но́сится, Неискусобра́чная, Его́же ны́нѣ моли́ спасти́ся душа́мъ на́шимъ.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Да бію́тся десни́цею разжже́нною ли́ца де́монская, сердца́ же вѣ́рныхъ да взыгра́ются и безпло́тныхъ ли́цы свѣ́тло да веселя́тся.

Украша́ются до́брыхъ твои́хъ по́двигъ побѣ́ды и одолѣ́нія, и страда́льческая зря́щихъ натрижне́нія, перворожде́нныхъ избра́нное и свѣтоно́сное торжество́.

Воста́ните, до́бріи ны́нѣ живопи́сцы, му́ченика о́бразъ ва́шими благохи́тростьми украси́те, подвигополо́жника я́вственно въ не́мъ начерта́юще.

Богоро́диченъ: Весели́тся о Тебѣ́, Богома́ти Всепѣ́тая, прама́ти, дре́внія кля́твы Рождество́мъ Твои́мъ изба́вльшися и сме́ртнаго го́рькаго осужде́нія.

Конда́къ му́ченика, гла́съ 4. Подо́бенъ: Яви́лся еси́.

Яви́лся еси́, преудивле́нъ крѣ́постію всесожже́нія, лива́нъ благово́ненъ, себе́ прине́слъ еси́ же́ртву Христу́, и, вѣне́цъ по́чести пріи́мъ, Варлаа́ме, при́сно моли́ за ны́, страда́льче.

Пѣ́снь 7.

Ирмо́съ: Въ пещи́ о́гненнѣй пѣсносло́вцы спасы́й о́троки, благослове́нъ Бо́гъ оте́цъ на́шихъ.

Преесте́ственна и́стинно проро́къ Твои́хъ сла́ва, благослове́нный Бо́же оте́цъ на́шихъ.

Съ Бо́гомъ обита́ти сподо́бився, воспѣва́еши: благослове́нъ Бо́гъ оте́цъ на́шихъ.

Во проро́цѣхъ Твои́хъ Боже́ственную благода́ть Твою́ явля́еши, благослове́нный Бо́же оте́цъ на́шихъ.

Богоро́диченъ: Изба́вленніи Твои́мъ Рождество́мъ, Пречи́стая Дѣ́во, пѣснопое́мъ: благослове́нъ Бо́гъ оте́цъ на́шихъ.

Инъ.

Ирмо́съ: Оте́цъ на́шихъ Бо́же, не посрами́ на́съ, но да́руй на́мъ со дерзнове́ніемъ вопи́ти Тебѣ́: благослове́нъ еси́, Бо́же оте́цъ на́шихъ.

Съ му́ченическими ли́ки, я́ко непобѣди́мь му́ченикъ, сподо́бился еси́ Христу́ велегла́сно зва́ти: благослове́нъ Бо́гъ оте́цъ на́шихъ.

Со свѣща́ми свѣ́тлыми въ Боже́ственный черто́гъ вше́лъ еси́, Христу́, великому́чениче, зовя́: благослове́нъ Бо́гъ оте́цъ на́шихъ.

Крѣпча́йшу огня́ десни́цу стяжа́въ, предста́тель десны́й твоему́ Влады́цѣ, зове́ши: благослове́нъ Бо́гъ оте́цъ на́шихъ.

Богоро́диченъ: Изба́вленніи Твои́мъ Пречи́стымъ Рождество́мъ, пое́мъ Тя́, вѣ́рніи, непреста́нно зову́ще: благослове́нъ, Пречи́стая, Пло́дъ чре́ва Твоего́.

Пѣ́снь 8.

Ирмо́съ: Изъ Отца́ пре́жде вѣ́къ рожде́ннаго Сы́на и Бо́га и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы, по́йте, лю́діе, превозноси́те во вся́ вѣ́ки.

Отъ Бо́га просвѣ́щшеся, проро́цы провозвѣща́ютъ бу́дущихъ зна́ніе, богому́дренно взыва́юще: свяще́нницы, по́йте, лю́діе, превозноси́те во вся́ вѣ́ки. [Два́жды.]

Якоже заря́ въ пучи́нѣ, во тмѣ́ су́щія просвѣти́лъ еси́, Боже́ственными луча́ми, боговѣща́телю, озаря́емь, зовы́й: свяще́нницы, по́йте, лю́діе, превозноси́те во вся́ вѣ́ки.

Богоро́диченъ: По Боже́ственному существу́ Отцу́ Твоему́ Единосу́щне и на́мъ единоесте́ственъ яви́лся еси́, воплоти́вся отъ неискусому́жныя Ма́тере. Тѣ́мъ Тя́ пое́мъ, Христе́, и благослови́мъ во вся́ вѣ́ки.

Инъ.

Ирмо́съ: Вся́ дѣла́ Бо́жія и вся́ тва́рь, благослови́те Го́спода, я́ко человѣ́комъ отъ земли́ возсія́ Свѣ́тъ, и вселе́нную всю́ просвѣти́, и жи́знь вѣ́чную мíру дарова́, по́йте, лю́діе, и превозноси́те Его́ во вѣ́ки.

Все́ низложи́лъ еси́ вра́жіе всеору́жіе, Варлаа́ме достосла́вне, попали́лъ еси́ и́дольскую ле́сть, зовы́й: Тя́ превозно́симъ, Христе́, во вѣ́ки.

Укра́шенъ благолѣ́пно, Христу́ предста́лъ еси́, страда́льче приснопа́мятне, кро́вію му́ченическою очервле́ну нося́ багряни́цу и Влады́ку поя́ во вѣ́ки.

Благоче́стія огне́мъ разжже́нъ, я́ко те́рніе, попали́лъ еси́ вся́ де́монская мечта́нія, зовы́й: Тя́ превозно́симъ, Христе́, во вѣ́ки.

Богоро́диченъ: Благословя́щіи Тя́ вѣ́рно отъ Го́спода благословля́ются, Всенепоро́чная: ражда́еши бо благословя́щаго тва́рь Влады́ку, Его́же превозно́симъ, Чи́стая, во вся́ вѣ́ки.

Пѣ́снь 9.

Ирмо́съ: Тя́, па́че ума́ и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи, единому́дренно велича́емъ.

Сло́вомъ боже́ственнымъ и дѣя́ніемъ украша́емь впери́вся Ду́хомъ, проро́че чу́дный, бу́дущая зрѣ́ти сподо́бился еси́.

Идѣ́же проро́честіи ли́цы вселя́емь и святы́хъ свѣ́тлости, моли́ Го́спода спасти́ вѣ́рою благохва́лящія тя́, сла́вне.

Ве́сь Бо́гу те́плѣ прилѣжа́, чи́сто бесѣ́довалъ еси́ Боже́ственными явле́ніи, и́хже и ны́нѣ наслажда́ешися, всеблаже́нне.

Богоро́диченъ: Тя́, Свѣ́та свѣти́льникъ, пое́мъ, Чи́стая, Тя́, и скрижа́ль благода́ти, Сло́во воплоще́нное пріе́мшу, вѣ́дяще, велича́емъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Зако́нъ похвале́ній побѣжда́ется подвиго́въ твои́хъ вели́чествомъ, еди́нъ Влады́ка Христо́съ тя́ сла́вити вѣ́сть Боже́ственною свѣ́тлостію: Его́же прилѣ́жно моли́ о вѣ́рою воспѣва́ющихъ тя́.

Всего́ тебе́ сама́го Го́споду же́ртву жи́ву прине́слъ, ве́сь Того́ Ца́рствія сонаслѣ́дникъ яви́лся еси́ и прича́стникъ, и съ Ни́мъ, ра́дуяся, ны́нѣ ца́рствуеши, приснопа́мятне.

За Твою́, Спа́се, любо́вь кро́вію да́же и до сме́рти, мечу́, и огню́, и му́камъ боже́ственный му́ченикъ противоополчи́вся, е́же у Тебе́, Человѣколю́бче, безсме́ртіе пріе́мъ, наслажда́ется.

Богоро́диченъ: Тя́, Засту́пницу мíра и Богома́терь Дѣ́ву, всея́ жи́зни моея́ предста́тельницу и спасе́ніе, ра́дуяся, предлага́ю: Ты́ бо, Бо́га ро́ждшая, спаса́ти мо́жеши пою́щія Тя́.

Свѣти́ленъ. Подо́бенъ: Ученико́мъ зря́щимъ.

Авдíе проро́че, лику́й и весели́ся, твои́хъ глаго́лъ зря́ сбытіе́. Тѣ́мже, Тро́ицѣ предстоя́, соверша́ющія свѣтоно́сную твою́ па́мять помяни́ и тебе́ чту́щія, всеблаже́нне.

Богоро́диченъ:

Изъ пречи́стыхъ чре́слъ Твои́хъ проше́дшаго Бо́га Сло́ва неизрече́нно, Дѣ́во Ма́ти, ви́дящи распина́ема, взыва́ла еси́: сла́ва неизрече́нному Твоему́ строе́нію, Спа́се Мо́й, и́мже мíръ Тво́й спаса́еши.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 160 – 165.

/ Къ оглавленію раздѣла /


Наверхъ / Къ титульной страницѣ

0