Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 18-й де́нь.
Святы́хъ му́ченикъ Плато́на и Рома́на.

[ВЕЧЕРЪ,]
На Го́споди воззва́хъ: стихи́ры свята́го Плато́на, гла́съ 8. Подо́бенъ: О, пресла́внаго чудесе́!

По́лнъ до́блія му́дрости,* уде́съ отрѣ́заніе, и сѣче́ніе тѣлесе́,* и о́гнь несте́рпный,* гла́дъ и сме́рть* му́жественнѣйшимъ нра́вомъ претерпѣ́лъ еси́,* вѣ́чно предлежа́щую тебѣ́ сла́ву* ожида́я непрестаю́щую* и предзря́ вѣ́чнующее блаже́нство.

Вся́кое преше́дъ чу́вство* и къ вы́шнѣй жи́зни* преложи́въ мы́сль,* по́мысломъ богому́дрымъ* и душе́ю великому́дренною* ху́дость и смире́ніе* ви́димыхъ небре́глъ еси́.* Тѣ́мже, стру́жемь и огне́мъ пали́мь, за Христа́, му́чениче,* до́блественнѣйше претерпѣ́лъ еси́.

Вся́кое вра́жіе наше́ствіе* и гони́телей стремле́нія* разруши́лъ еси́ благода́тію,* побѣ́ды вѣнце́мъ вѣнча́лся еси́, всебога́те,* нетлѣ́ннаго весе́лія* и неизглаго́ланнаго сподобля́емь Боже́ственнаго сія́нія.* Идѣ́же ны́нѣ сы́й,* грѣхо́въ испроси́ оставле́ніе благохва́лящимъ тя́.

Ины стихи́ры свята́го Рома́на, гла́съ 4. Подо́бенъ: Яко до́бля.

Посто́мъ разжиза́емь,* страда́ніемъ тѣсни́мь* и мно́гими му́ками умуча́емь,* ме́чь бы́въ обоюдуо́стръ,* ссѣка́я полки́ де́монскія, Рома́не,* страда́льцевъ удобре́ніе,* Боже́ственная похвало́,* честно́е Це́ркве украше́ніе,* свое́ю кро́вію сконча́вшихся, всехва́льне.

Растяза́емь, и стру́жимь,* и въ темни́цѣ заключа́емь,* и язы́къ, сла́вне, отъе́млемь,* и че́люсти сокруша́емы,* и коне́цъ блаже́нный ну́жднымъ удавле́ніемъ, страстоте́рпче, пріе́мля,* непоколеби́мь и непрекло́ненъ яви́лся еси́* содѣ́йствомъ, Рома́не, Боже́ственнаго Ду́ха:* тѣ́мже вѣ́рно восхваля́емъ тя́.

Витíйствуетъ младе́нецъ,* и удивля́етъ безу́мныя,* и честны́ми противле́ніи украша́ется,* и сконча́ніемъ просвѣща́ется,* обогаща́ется благосла́віемъ святы́хъ страда́лецъ,* и́хже ре́вность стяжа́, достоблаже́нне,* Рома́не доблему́дре.* Съ ни́миже рѣше́ніе долго́въ всѣ́мъ на́мъ* низпосла́ти моли́ся.

Сла́ва, гла́съ 6. Самогла́сенъ:

Стра́шныя и пресла́вныя побѣ́ды, Го́споди, му́ченика Твоего́: ры́барей бо поревнова́въ дерзнове́нію, и мрежеплете́ннымъ богосло́віемъ Плато́ново басносло́віе, и истори́ческое кощу́нство словесы́ и дѣ́лы растерза́; ко́жи одира́емѣ и главѣ́ отсѣца́емѣ, лія́ніемъ крове́й его́ врага́ удави́. Но, о му́чениковъ удобре́ніе! со дерзнове́ніемъ проповѣ́давый и́мя Христо́во вели́кое, испроси́, чудотво́рче Плато́не всеблаже́нне, пода́ти душа́мъ на́шимъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное, е́же ви́жу, та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости; тѣ́хъ моли́твами спаси́ ду́ши на́ша.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Кано́нъ окто́иха еди́нъ [со ирмосо́мъ на 6] и святы́хъ два́ [кано́на на 8].

Кано́нъ свята́го Плато́на, его́же краегране́сіе: Твои́хъ похва́лъ, о Плато́не, пою́ широту́. Ѳеофа́ново. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Вѣ́чнаго Ца́рствія, сла́вне, чистѣ́йшую проходя́ широту́, отъ вся́кія ско́рби и напа́стей тѣсноты́, пою́щія тя́ спаси́, невозвра́тно ше́ствующія къ небе́снѣй стези́ вводя́.

Огражде́нъ благоче́стія ору́жіемъ, сто́лпъ незы́бленъ яви́вся, Плато́не, все́ свирѣ́пство ра́нъ претерпѣ́лъ еси́ и болѣ́зней тѣсноты́ подъя́лъ еси́, Боже́ственною благода́тію простира́яся.

Юношеское показа́въ противле́ніе, ме́ртвенную и тлѣ́нную дебе́лость страда́ніемъ отве́рглъ еси́, всему́дре, и въ нетлѣ́нную ри́зу одѣ́явся, ра́дуяся, Влады́цѣ предстои́ши.

Богоро́диченъ: Воплоще́нна, Отцу́ Собезнача́льна и Соприсносу́щна, Единоро́дна Сло́ва па́че ума́ родила́ еси́, Благослове́нная Пречи́стая Богоро́дице. Сего́ ра́ди пра́во му́дрствующе, проповѣ́даемъ Тя́ и всече́стно сла́вимъ.

Инъ кано́нъ свята́го Рома́на, его́же краегране́сіе: Страда́льческими тя́ вѣнцы́ похваля́ю, Рома́не. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Незаходи́мыми луча́ми сія́я Тро́ичными я́сно и со страстоте́рпческими ли́ки просвѣща́емь, просвѣще́ніе ми́ посли́, тму́ стра́стную отгоня́я богопрія́тными твои́ми, Рома́не, моли́твами.

Мо́ря и́дольскаго волне́ніемъ не обурева́емь, я́ко на Христо́вѣ ка́мени утверди́вся, треволне́нія разрѣши́лъ еси́ тишино́ю Боже́ственнаго Ду́ха многомяте́жнаго безбо́жія.

Цвѣтни́къ я́ко благосла́вный и благопло́дный, Це́рковь Христо́ву, гобзу́ющу всѣ́ми благи́ми, Рома́не, соблю́лъ еси́ отъ волко́въ непристу́пну, твои́мъ уче́ніемъ утвержда́я сію́.

Богоро́диченъ: Поми́ловася Тобо́ю, Всенепоро́чная, естество́ человѣ́ческое и́стинно: Творе́цъ бо, изъ Тебе́ воплоти́вся па́че сло́ва и смы́сла, за ны́ на сме́рть приведе́ся, избавля́я отъ а́да на́съ.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Якоже нетлѣ́нная и́скра, въ пла́мень лю́тый терпѣли́во, всеблаже́нне, вше́лъ еси́, благоче́стія я́вственно ре́вностію распала́емь и огне́мъ Боже́ственнымъ озаря́емь вѣ́ры.

Побѣди́въ па́че естества́ де́монскія слуги́, терпѣ́ніемъ же крѣ́пкихъ му́къ болѣ́зни подъе́мъ, а́нгеловъ все́льникъ и вѣнцено́сецъ яви́лся еси́, Плато́не богому́дре блаже́нне.

На земли́ за Христа́, всеблаже́нне, подвиза́вся, небе́сныя да́ры пріе́мъ и вѣнцы́, отъ Него́ приснопребыва́ющія, въ чи́стѣ мѣ́стѣ рая́ вселя́ешися.

Богоро́диченъ: Две́ре Свѣ́та, свѣ́тлыми Ду́ха заря́ми укра́шена Богома́ти су́щи, Тобо́ю бо къ на́мъ Сло́во сни́де, просвѣща́ющее вся́ Боже́ственнымъ свѣ́томъ пою́щія Тя́.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Звѣ́ря разу́мнаго пра́щею уби́въ, Рома́не, словесы́ твои́ми па́ству Христо́ву спа́слъ еси́ отъ и́дольскаго вре́да нетлѣ́нну.

Возмога́я ору́жіемъ кре́стнымъ, прило́ги вра́жія возврати́лъ еси́ и не́мощь и́хъ обличи́лъ еси́, Рома́не му́дре достоблаже́нне.

Низложи́лъ еси́ вра́жія, сокруши́въ, че́люсти Рома́не сла́вне, за Христа́, блаже́нне, лани́тѣ стру́жимѣ, приснопа́мятне.

Богоро́диченъ: Естество́мъ еди́нъ Бо́гъ Сло́во Отчее и соесте́ственное Ду́ху, пло́тію изъ Тебе́ одѣ́явся, земны́я обожи́, Богома́ти.

Сѣда́ленъ свята́го Плато́на, гла́съ 8. Подо́бенъ: Прему́дрости.

Подвиго́въ широто́ю, му́чениче му́дре, простира́яся вѣ́рою, всесла́вне, вра́жія, утѣсни́въ, ко́зни погуби́лъ еси́ и, до́брѣ соверши́въ тече́ніе боже́ственное, ра́йскую широту́, ра́дуяся, дости́глъ еси́. Тѣ́мже Це́рковь, простра́нствомъ благоче́стія сія́ющи дне́сь, пра́зднуетъ па́мять твою́ и вопіе́тъ ти́, блаже́нне: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, свята́го Рома́на, гла́съ 4. Подо́бенъ: Вознесы́йся.

По́стнически лука́ваго попра́въ и страда́льчески, му́чениче Христо́въ, просла́вился еси́, претерпѣ́въ му́жески соверше́ннымъ умо́мъ. Тѣ́мже причта́лся еси́ лико́мъ му́ченическимъ и вѣ́чнующее Ца́рство стяжа́лъ еси́; въ не́мже лику́я, помяни́ на́съ, соверша́ющія вѣ́рою па́мять твою́.

И ны́нѣ, богоро́диченъ:

По Бо́зѣ въ Тво́й, Богоро́дице, прибѣга́ю, смире́нный, покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу, моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Изъ Безнача́льнаго Отца́ Рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, — увы́ Мнѣ́, любе́знѣйшій Іису́се! — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя́, Долготерпѣли́ве.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Раствори́вся ве́сь любо́вію Созда́теля твоего́, не чу́вствовалъ еси́ болѣ́зней тѣле́сныхъ, стра́стныя пло́ти ме́ртвенныя и ко́жныя ри́зы совле́кся и цѣлому́дрія и спасе́нія одѣ́явся, Плато́не, ри́зою.

Священнодѣ́латель Боже́ственный яви́лся еси́, я́ко непоро́чно овча́, му́жескій по́лъ и соверше́нное всесожже́ніе, му́чениче, тебе́ сама́го за всѣ́хъ закала́емому Христу́ прине́съ, Изба́вителю, ду́шу бо разже́гъ Влады́чнею любо́вію, о сожига́емѣй пло́ти небре́глъ еси́.

Юноши три́, су́щія въ Вавило́нѣ, подража́я, всея́дца огня́ не убоя́лся еси́, но крѣ́пко и ю́ношески того́ претерпѣ́въ пла́мень несте́рпный. Тѣ́мже тя́ Росода́вецъ со о́нѣми досто́йно прія́тъ въ черто́гъ сла́вы.

Богоро́диченъ: Яко изъ ко́рене ца́рскаго су́щи, всѣ́ми влады́чествующаго, Сло́во Бо́жіе родила́ еси́ на́мъ, пло́ть бы́вша и пребы́вша непремѣ́нна. Тѣ́мже Тя́, Богоро́дицу, и́стинно и госпо́дьственно, Всесвята́я Дѣ́во, сла́вимъ.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Направля́емь, я́ко лѣ́ствицею, на дре́во возне́слся еси́, блаже́нне, неизглаго́ланною добро́тою и пребыва́ющій ли́къ пости́глъ еси́, му́чениче Рома́не достосла́вне.

Совле́кся ме́ртвенныя оде́жды въ му́кахъ, блаже́нне, и спасе́нія въ свѣ́тлую ри́зу свѣ́тло, всесла́вне му́чениче Рома́не, обле́клся еси́.

Умудри́вся вдохнове́ніемъ Утѣ́шителя, о́трочища язы́къ Тя́, Го́спода сла́вы, Творца́ проповѣ́да всѣ́хъ, Человѣколю́бче, и Бо́га, спасти́ могу́щаго.

Богоро́диченъ: Благослове́нъ, Дѣ́во, Пло́дъ Твоего́ чре́ва, Имже изба́вихомся кля́твы сме́ртныя, вся́ оте́чествія язы́ковъ, и Тобо́ю благослове́нніи я́ко жи́зни пое́мъ Тя́ Хода́таицу.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Дрема́нія твои́мъ вѣ́ждомъ и сна́ твои́мъ очесе́мъ не да́лъ еси́, му́чениче, до́ндеже сно́мъ блаже́ннымъ и подо́бнымъ, Бо́га лю́бящимъ, любе́знымъ усну́лъ еси́, блаже́нне, мече́мъ во главу́ усѣка́емь.

Якоже въ чужде́мъ тѣлеси́, всеблаже́нне, стражда́, подвиза́лся еси́, я́ко стра́ждущимъ ины́мъ ви́децъ бы́въ, ты́ пострада́лъ еси́, Боже́ственнымъ бо раче́ніемъ разже́гся, предлежа́щихъ му́къ не убоя́лся еси́, сла́вне.

Бога́тство обрѣ́лъ еси́ неотъе́млемо и сла́ву неувя́дную, въ небе́сныхъ оби́телехъ со а́нгелы ликовству́я и нетлѣ́ннаго безсме́ртія въ причаще́ніи бы́въ, всеизя́щнѣйше.

Богоро́диченъ: Разрѣше́ніе грѣхо́въ Твои́ми моли́твами пода́ждь рабо́мъ Твои́мъ, избавля́ющи ты́я искуше́ній, и бѣ́дъ, и скорбе́й, и ху́льныхъ еретико́въ одержа́нія, Дѣ́во Богоро́дице Всепѣ́тая.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Струя́ми страда́льческими крове́й твои́хъ потопи́лъ еси́ мо́ре безбо́жія, рѣ́ки же исцѣле́нія, Рома́не, источи́лъ еси́.

Яко да́ръ избра́нный, же́ртву я́ко непоро́чну, прине́слъ еси́ Влады́цѣ, Рома́не, богосло́вствующаго младе́нца закала́ема.

Юро́дство вра́жіе му́дростію Свята́го Ду́ха уязви́лъ еси́, уязви́въ твое́ тѣ́ло ра́нами, Рома́не всесла́вне.

Богоро́диченъ: Потреби́ла еси́ кля́тву, я́ко ра́дость ро́ждши, и обнови́ла еси́ человѣ́ки Твои́мъ Рождество́мъ, Дѣ́во Марíе Неискусобра́чная.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Вы́шши страсте́й и му́къ бы́въ, пло́ти отсѣче́нія претерпѣ́лъ еси́, сла́вне, Христа́ бо помо́щника и содѣ́теля имѣ́лъ еси́ и споспѣ́шника.

Душе́внымъ ра́зумомъ благолѣ́піе Созда́теля взира́я всегда́ и созерца́я добро́ту неизрече́нную, ви́димыхъ ху́дость небре́глъ еси́.

Богоро́диченъ: Яко одушевле́нный киво́тъ, Законода́вца вмѣсти́ла еси́, я́коже хра́мъ святы́й, прія́ла еси́ Свята́го, бы́вша Человѣ́ка, на благодѣя́нія человѣ́ковъ, Всеблаже́нная.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Ме́ртвость и тлю́ строга́ніемъ отложи́въ, жи́зни нетлѣ́нныя въ добро́ту одѣя́вся, му́чениче, укра́шенъ свѣтлостьми́, Рома́не, духо́вными, незаходя́щими.

Источи́въ я́ко кро́вныя то́ки уче́нія отрѣ́заный тво́й язы́къ, и́миже непогиба́ющее наслѣ́довалъ еси́, страстоте́рпче, блаже́нство, при́сно пребыва́ющее.

Прему́дрости пото́къ жажда́въ, испи́лъ еси́ совѣ́томъ ро́ждшія уста́ богосло́вна младе́нца, мече́мъ къ жи́зни прише́дша неконча́емѣй.

Богоро́диченъ: Ско́рое прибѣ́жище бу́ди мнѣ́, Пречи́стая, наси́лія избавля́ющи мя́, и стра́стнаго студа́ изыма́ющи, и къ Боже́ственнѣй стези́ направля́ющи, Богома́ти.

Конда́къ, гла́съ 3. Подо́бенъ: Дѣ́ва дне́сь.

Свята́я твоя́ па́мять вселе́нную весели́тъ, созыва́ющи вѣ́рныя вся́ въ пречестны́й хра́мъ тво́й, идѣ́же ны́нѣ, ра́достію совоку́пльшеся, пое́мъ въ пѣ́снехъ и свѣ́тлостехъ. Сего́ ра́ди, Плато́не, вопіе́мъ ти́: язы́ческаго наше́ствія изба́ви гра́дъ тво́й, свя́те.

Икосъ:

Еллинское оста́вивъ все́ су́етство, Христо́выхъ ученико́въ душеполе́зная уче́нія возлюби́ зѣло́ Плато́нъ богому́дрый. Тѣ́мъ и яви́ся всѣ́мъ че́стенъ, я́ко анки́ра вѣ́ры во оте́чествѣ, его́же и зва́ніе я́вѣ Анки́ра имену́ется. До́брѣ бо того́ воспита́вшее извѣ́стенъ покро́въ на враги́ и засту́пника те́пла въ ра́тѣхъ обрета́етъ всегда́, вопію́щи: язы́ческаго наше́ствія изба́ви гра́дъ тво́й, свя́те.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Зако́нно пострада́вша и враги́ твоя́ попра́вша, побѣ́ды вѣнце́мъ Законополо́жникъ тебе́ вѣнча́, велегла́сно вопію́ща и глаго́люща: благослове́нъ еси́, Бо́же оте́цъ на́шихъ.

Преста́вился еси́, ра́дуяся, къ присножела́нному тебѣ́ дре́вле, Его́же пречи́стѣй стра́сти, спасе́нія человѣ́комъ винѣ́ бы́вшей, подража́я, пѣ́лъ еси́: благослове́нъ еси́, Бо́же оте́цъ на́шихъ.

Удиви́шася вся́ небе́сныя си́лы терпѣ́нію твоего́ страда́нія и человѣ́цы, тогда́ зря́щіи. Преесте́ственно бо вопія́лъ еси́, сѣко́мый: благослове́нъ еси́, Бо́же оте́цъ на́шихъ.

Богоро́диченъ: Избавля́еміи, Пречи́стая, Боже́ственнымъ Рождество́мъ дѣ́вства Твоего́ у́зъ сме́ртныхъ и кля́твы первозда́ннаго Ада́ма, Тя́, Богоро́дицу, му́дрствующе, зове́мъ: благослове́нъ Бо́гъ оте́цъ на́шихъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Удавле́ніемъ твои́мъ, страстоте́рпче, удави́въ змíя, обрѣ́лъ еси́ жи́знь и́стинно, пресла́вне Рома́не, зовы́й всегда́: благослове́нъ еси́ въ хра́мѣ сла́вы Твоея́, Го́споди.

Свѣ́та незаходи́маго луча́ми озаря́емь, пла́мень высо́кій угаси́лъ еси́, Рома́не, проро́ческимъ дарова́ніемъ украша́емь и съ му́ченическими ли́ки сочета́емь, зовы́й: благослове́нъ еси́ въ хра́мѣ сла́вы Твоея́, Го́споди.

Яко отъ са́да многоцвѣ́тнаго, ма́терними уче́ніи, ши́покъ благово́нный, младе́нческій во́зрастъ, му́ченическою кро́вію напая́емь, Христу́ нетлѣ́нно прино́сится.

Богоро́диченъ: Впа́дшія во глубину́ грѣхо́вную, Всепѣ́тая, еди́на Бо́га ро́ждшая безъ сѣ́мене, изведи́ ны, пою́щія Тя́: благослове́нна Ты́ въ жена́хъ, Всенепоро́чная Влады́чице.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свѣ́тлыми по́двиги у́бо подвиза́лся еси́, всехва́льне, свѣтлѣ́йше же мно́го благосла́віе Христо́съ тебѣ́ дарова́ и вѣ́чно пребыва́ющее, въ небе́сныя тя́ оби́тели всели́въ, усе́рдно пѣснопою́ща: свяще́нницы, воспо́йте, лю́діе, превозноси́те Христа́ во вѣ́ки.

Яко моле́бника вѣ́рнѣйша, я́ко предста́теля теплѣ́йша Всецарю́ и Творцу́ тва́ри, тя́ ны́нѣ предлага́емъ; за ны́ моли́ся, му́ченическимъ твои́мъ дерзнове́ніемъ хода́тайствуя о хва́лящихъ тя́ и вѣ́рно пѣснопою́щихъ: лю́діе, превозноси́те Христа́ во вѣ́ки.

Прія́ти сподо́бился еси́ Ца́рство недви́жимое твое́ю дѣ́тельною вѣ́рою, я́ко тебѣ́ да́ти обѣща́ нелжи́вый Бо́гъ, за Него́же тѣ́ло и огню́ и му́камъ пре́далъ еси́, зовы́й: свяще́нницы, воспо́йте, лю́діе, превозноси́те Христа́ во вѣ́ки.

Богоро́диченъ: Сло́ва Бо́жія, безнача́льнаго и Отцу́ сразумѣва́емаго, изъ не су́щаго Отчимъ совѣ́томъ все́ соста́вившаго, боголѣ́пно родила́ еси́, пло́ть бы́вша ра́ди на́съ, человѣ́ковъ. Тѣ́мъ Тя́, Богоро́дицу, правосла́вно му́дрствующе, Христа́ превозно́симъ во вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Глаго́ловъ послу́шникъ Христо́выхъ бы́лъ еси́, сла́вне, ду́шу твою́ положи́въ за па́ству твою́, усе́рдно за Него́ удавля́емь, му́чимь, и стру́жемь, и ураня́емь, вопія́лъ еси́: благослови́те вся́ дѣла́ Госпо́дня Го́спода.

Вои́стинну уста́ твоя́ и язы́къ ра́дости и весе́лія испо́лнися, благословя́ Бо́га непреста́нно: отрѣ́занъ бо и кро́вію ка́пля, зако́нъ вѣ́ры на́мъ, Рома́не, полага́етъ, вопія́: благослови́те вся́ дѣла́ Госпо́дня Го́спода.

Богоро́диченъ: Сло́во ро́ждши Отчее Боже́ственнымъ Ду́хомъ, Дѣ́ва пребыла́ еси́, Богороди́тельнице безму́жная, превозше́дши есте́ственныя зако́ны рождество́мъ Твои́мъ. Тѣ́мже, ра́дующеся, пое́мъ: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Пріиди́те у́бо, боговѣнча́ннаго, мучениколю́бцы, воспои́мъ му́ченика, просте́ршаго благоче́стіе своего́ ро́ждія: и́бо лозы́ жи́зни са́дъ бы́въ, пло́дъ изно́ситъ, умиле́нія на́мъ вино́ точа́щій.

Честна́ предъ Бо́гомъ му́ченическая яви́ся сме́рть, присносу́щныя бо и неги́блемыя быва́етъ Хода́тай и́стинныя жи́зни и жре́бій нетлѣ́нный, и сла́ву безсме́ртную, и бога́тное подае́тъ воздая́ніе.

Всю́ твою́ жи́знь, му́чениче, Вседержи́телю Бо́гу освяти́лъ еси́ и, я́ко благоуго́дну, жи́ву же́ртву, тебе́ сама́го, ра́дуяся, прине́слъ еси́. Тѣ́мъ сла́дости су́щія па́че ума́ я́вѣ сподо́бился еси́, но моли́ изба́витися искуше́ній пою́щимъ тя́.

Богоро́диченъ: Спаси́ мя, Ма́ти Бо́жія, ро́ждшая Христа́ Спа́са моего́, Бо́га и Человѣ́ка, сугу́ба естество́мъ, но не ѵпоста́сію: Единоро́дна у́бо изъ Отца́, изъ Тебе́ же перворожде́на всея́ тва́ри. Тѣ́мже Тя́ вси́ при́сно велича́емъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Все́ твое́ жела́ніе, му́чениче, ко Влады́цѣ просте́рлъ еси́ и, многови́дныя ра́ны претерпѣ́въ, Рома́не сла́вне, сла́вы неизглаго́ланныя получи́лъ еси́ и блаже́ннаго наслажде́нія.

Се́ вмѣ́сто болѣ́зни сла́дость тебѣ́ пото́ка даде́ся, му́чениче, вѣне́цъ нося́щу ти́, Рома́не, и отъ кро́ве багряни́цу иму́щу: я́ко ши́покъ благоуха́ющъ и неувяда́ющъ, младе́нецъ закла́нъ бы́лъ еси́ Христа́ ра́ди.

Богоро́диченъ: Ты́ началороди́тельныя кля́твы, земны́я, Дѣ́во, изба́вила еси́ и отве́рзла еси́ на́мъ жи́знь Еде́ма Рождество́мъ Твои́мъ па́че естества́. Тѣ́мже, веселя́щеся, Тя́, Богоро́дице, велича́емъ.

Свѣти́ленъ. Подо́бенъ: Ду́хомъ во святи́лищи.

Жесто́кую ше́ствовалъ еси́ въ путе́хъ боже́ственную стезю́, къ широтѣ́ возше́лъ еси́ небе́снаго Ца́рствія, Плато́не, му́чениковъ сла́во, свѣ́томъ сія́я нетлѣ́нныя Тро́ицы. Тѣ́мже, сла́вѣ непрестаю́щей прича́щся, чту́щія тя́ помяни́.

Богоро́диченъ: Яко Засту́пницу нера́тну и предгра́діе вои́стинну предлага́ю покро́въ Тво́й, Богоро́дице Дѣ́во, Хода́таицу Бо́гу, изба́витися, Влады́чице, му́ки вѣ́чныя и въ жи́зни нетлѣ́ннѣй Тобо́ю причасти́тися небе́снаго Ца́рствія.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 153 об. – 159 об.

/ Къ оглавленію раздѣла /


Наверхъ / Къ титульной страницѣ

0