Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 17-й де́нь.
Слу́жба преподо́бнаго Ни́кона, [игу́мена Ра́донежскаго,] чудотво́рца.

НА МАЛѢЙ ВЕЧЕРНИ,
На Го́споди, воззва́хъ: стихи́ры на 4, гла́съ 1. Подо́бенъ: Всехва́льніи му́ченицы.

Отче преподо́бне Ни́коне,* отъ ю́ности твоему́ Влады́цѣ подо́бяся,* ди́вно житіе́ проше́лъ еси́,* о́бразъ всѣ́мъ добродѣ́тели собо́ю показу́я,* человѣколю́бія Бо́жія благода́ти* пучи́ну въ себѣ́ имѣ́я.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость. [Два́жды.]

Отче преблаже́нне Ни́коне,* кто́ по́двиги и страда́нія твоя́ повѣ́сть,* я́же подъя́лъ еси́, Христу́ послѣ́дуя?* Не да́лъ бо еси́ сна́ твои́мъ очесе́мъ,* ни вѣ́ждомъ дрема́нія,* и́миже ду́шу твою́ отъ страсте́й свободи́лъ еси́,* слеза́ми непреста́нными очища́я,* и ны́нѣ моли́ся* дарова́ти душа́мъ на́шимъ* ми́ръ и ве́лію ми́лость.

Отче преподо́бне Ни́коне,* чистоту́ тѣле́сную* и душе́вное умиле́ніе* отъ ю́ности твоея́ сохрани́лъ еси́* и очи́ма Бо́га зрѣ́ти сподо́бился еси́,* Тому́ еди́ному служа́ стра́хомъ и тре́петомъ,* наста́вникъ бы́лъ еси́ твоему́ ста́ду.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 6:

Пріиди́те, мона́ховъ мно́жество, дне́сь, духо́вно возвесели́мся въ наро́читомъ пра́здницѣ, и́бо пресвѣ́тлая па́мять отца́ на́шего наста́, въ ню́же, соше́дшеся, согла́сно воспое́мъ, глаго́люще: ра́дуйся, Ни́коне, пресла́вне, небе́сный человѣ́че, и земны́й а́нгеле, и Ду́ха Свята́го оби́телище; ра́дуйся, вѣ́рному Импера́тору похвала́ и утвержде́ніе, и всея́ Россíйскія земли́ пресвѣ́тлый свѣти́льниче; ра́дуйся, я́ко Тро́ицѣ предстоя́ со а́нгелы, Юже непреста́нно моли́ дарова́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Ду́ха Свята́го* бы́лъ еси́, преподо́бне,* зѣ́льнымъ поще́ніемъ,* я́ко благово́нными арома́ты,* напая́я ду́шу твою́.

Сти́хъ: Честна́ предъ Го́сподемъ* сме́рть преподо́бныхъ Его́.

Дрема́нія не да́лъ еси́* очесе́мъ твои́мъ, преподо́бне,* до́ндеже ду́шу отъ страсте́й свободи́лъ еси́* и возме́здіе обрѣ́лъ еси́,* со а́нгелы водворе́ніе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Боже́ственнымъ жела́ніемъ* уязви́вся, преподо́бне,* житіе́ непоро́чно проходя́,* до́ндеже дости́глъ еси́* Ца́рскаго престо́ла.

Сла́ва, гла́съ 8:

Имя́ше боже́ственная твоя́ душа́ и непоро́чная Ду́ха Пресвята́го исполне́ніе, о́тче преподо́бне Ни́коне. Отъ ю́ности нося́ соверше́нъ смы́слъ, любо́вію Христо́вою разгара́яся, Тому́ послѣ́довалъ еси́. Держа́вно надъ страстьми́ воцари́лся еси́, ко́зни де́монскія, низло́жъ, пове́рглъ еси́, по́двигъ тече́нія твоего́ соверши́лъ еси́. И ны́нѣ во Свѣ́тѣ невече́рнѣмъ водворя́яся и Тро́ицѣ со а́нгелы предстоя́, моли́ изба́витися ста́ду твоему́ отъ ви́димыхъ и неви́димыхъ вра́гъ и спасти́ ду́ши на́ша.

И ны́нѣ, богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

Тропа́рь, гла́съ 1:

Послуша́нія до́брый рачи́тель бы́въ, преподо́бне Ни́коне приснопа́мятне, Це́рковь бо прекра́сну Святы́я Тро́ицы въ похвалу́ отцу́ твоему́ воздви́глъ еси́. Тѣ́мже и мы́, ча́да твоя́, любо́вію вопіе́мъ ти́: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, и ны́нѣ, богоро́диченъ воскре́сенъ:

[Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.]


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 6. Подо́бенъ: Все́ отло́жше.

Ве́сь отъ ю́ности Го́споду возложи́лся еси́,* Ни́коне преподо́бне,* земну́ю красоту́ и сла́ву въ ничто́же вмѣни́въ,* Христа́ еди́наго возлюби́лъ еси́,* и, Того́ кре́стъ на ра́мена взе́мъ,* боже́ственнѣ вооружи́вся,* Ла́вры вели́каго Се́ргія дости́глъ еси́,* и отъ него́ посыла́емь быва́еши* къ духо́вному настоя́телю Аѳана́сію,* и та́мо жела́емыхъ тобо́ю отъ него́ сподобля́ешися.* И ны́нѣ на небесѣ́хъ со а́нгелы* Тро́ицѣ предстоя́, Ни́коне о́тче на́шъ,* моли́ спасти́ся душа́мъ на́шимъ. [Два́жды.]

Стра́шное Христо́во прише́ствіе* въ се́рдцы твое́мъ пріи́мъ, Ни́коне преподо́бне,* разу́мно мимотеку́щихъ житія́ уступи́лъ еси́* и, сла́ву маловре́менную презрѣ́въ,* молча́ніе воспрія́лъ еси́:* на земли́ бо му́жески подвиза́лся еси́* и пло́ть потща́лся еси́ покори́ти ду́ху,* ду́шу же и у́мъ отъ страсте́й очи́стивъ,* ревнова́лъ житію́ вели́каго Се́ргія.* Съ ни́мже ны́нѣ на небесѣ́хъ престо́лу Влады́ки всѣ́хъ предстои́ши,* со дерзнове́ніемъ моля́ся о душа́хъ на́шихъ.

Преподо́бне о́тче Ни́коне,* измла́да возлюби́въ добро́ту Влады́чню* и къ Тому́ жела́ніе невозвра́тно имѣ́я,* оте́чество и ро́дъ оста́вилъ еси́;* бога́тство и сла́ву возненави́дѣвъ,* Христу́ еди́ному послѣ́довалъ еси́;* равноа́нгельно во оби́тели Пресвяты́я Тро́ицы пожи́въ,* огра́ду мона́шествующимъ созда́лъ еси́.* И ны́нѣ на небесѣ́хъ* со а́нгелы Тро́ицѣ предстои́ши,* Ни́коне преподо́бне,* со дерзнове́ніемъ моля́ся о душа́хъ на́шихъ.

Ины стихи́ры, гла́съ 4. Подо́бенъ: Зва́нный свы́ше.

Егда́ боже́ственное раче́ніе* на́йде на тя́, блаже́нне Ни́коне,* тогда́, мірска́я мудрова́нія* дале́че отри́нувъ,* къ боже́ственному Се́ргію прите́клъ еси́,* и отъ него́ наставля́емь,* посыла́ешися въ монасты́рь, Высо́кое нарица́емо,* къ того́ ученику́ Аѳана́сію;* и та́мо о́браза мона́шескаго* и свяще́нства сподобля́ешися,* мно́гимъ добродѣ́тели о́бразъ бы́въ.* Тѣ́мже мо́лимъ тя́:* моли́, преподо́бне,* спасти́ и просвѣти́ти ду́ши на́ша. [Два́жды.]

Судо́мъ Бо́жіимъ* и повелѣ́ніемъ вели́каго* па́ки ко отцу́ и па́стырю* въ монасты́рь прихо́диши* и отъ него́ съ вели́кою любо́вію, о́тче, пріе́млешися.* Отону́дуже и по преставле́ніи духо́внаго твоего́ отца́* па́стырь отъ него́ поставля́ешися* тоя́же оби́тели,* идѣ́же це́рковь прекра́сну* въ сла́ву Святы́я Тро́ицы,* преподо́бне Ни́коне, воздви́глъ еси́,* Юже непреста́нно о всѣ́хъ чту́щихъ тя́ моли́* спасти́ и просвѣти́ти ду́ши на́ша.

Егда́ боже́ственное наи́тіе* на́йде на тя́, преподо́бне,* тогда́ мірска́я возненави́дѣлъ еси́,* и Христу́ прихо́диши,* и, Того́ яре́мъ взе́мъ,* по стопа́мъ блаже́ннаго Се́ргія изво́лилъ еси́ ходи́ти,* идѣ́же о́бразъ мно́гимъ добродѣ́тели бы́въ* и мно́гимъ воздержа́ніемъ и моли́твами* подо́бникъ твоему́ отцу́ во все́мъ.* Тѣ́мже мо́лимъ тя́, моли́ся, преподо́бне,* спасти́ и просвѣти́ти ду́ши на́ша.

Сла́ва, гла́съ 2:

Жела́ніемъ бу́дущихъ, преподо́бне, добродѣ́тельно пожи́лъ еси́, чистото́ю душе́вною спаси́тельныя пути́ проше́лъ еси́ и го́рдаго змíя воздержа́ніемъ уби́лъ еси́, небе́сная же во́инства удиви́лъ еси́ терпѣ́ніемъ твои́мъ, чи́стое прія́телище Ду́ха Пресвята́го, о́тче, бы́лъ еси́. И сего́ ра́ди отъ Вседѣ́тельныя Десни́цы вѣнча́лся еси́ и чуде́съ дарова́ній отъ Него́ сподо́бился еси́: моли́ спасти́ся душа́мъ на́шимъ.

И ны́нѣ, богоро́диченъ воскре́сенъ:

[Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.]

Вхо́дъ. Проки́менъ дне́. Чте́нія три́.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Дне́сь ликовству́етъ ра́достно боже́ственная и вели́кая Ла́вра и хва́лится твои́ми богоуго́дными дѣя́ніи, имѣ́ющи твоя́ святы́я мо́щи, блаже́нне Ни́коне, отъ ни́хже святы́ню почерпа́емъ оби́льно: подаю́тъ бо здра́віе съ вѣ́рою притека́ющимъ къ честнѣ́й твое́й ра́цѣ. Тѣ́мже, просвѣ́щшеся тобо́ю, глаго́лемъ: сподо́би и на́съ сла́вы небе́сныя Христо́вы, блаже́нне, и твое́ ста́до сохраня́й и спаси́ ду́ши на́ша.

Гла́съ 2:

Па́мять твоя́ во вѣ́къ пребыва́етъ, преподо́бне о́тче Ни́коне, и кро́тость се́рдца твоего́, уго́дниче Христо́въ блаже́нне, просія́ па́че со́лнечнаго сія́нія, озаря́ющи вѣ́рныхъ сердца́, и́бо вои́стинну честна́я ра́ка боже́ственныхъ моще́й твои́хъ, я́ко труба́, велегла́сно свидѣ́тельствуетъ, благоуха́ющи благода́тію Пресвята́го Ду́ха, и прогоня́ющи мра́къ грѣхо́вный, и на́съ науча́ющи багодари́ти и сла́вити Бо́га, тебе́ просла́вльшаго.

Гла́съ 3:

Ве́лія сла́ва житія́ твоего́, о́тче на́шъ Ни́коне, вся́, я́же земна́я, оста́вивъ, еди́наго Христа́ возлюби́лъ еси́ и, Тому́ служа́ чи́стою со́вѣстію, на земли́ а́нгельски пожи́лъ еси́, де́монская выше́нія разори́лъ еси́, возше́дъ на высоту́ небе́сную: блаже́нъ еси́, я́ко та́ко Христу́ рабо́тавъ. Тѣ́мже и мы́, тобо́ю пу́ть жи́зни позна́вше, тя́ непреста́нно ублажа́емъ.

Сла́ва, гла́съ 2:

Преподо́бне и богоблаже́нне о́тче на́шъ Ни́коне, гра́дъ живу́щій Бо́жій, вы́ше ра́зума благи́хъ воспрія́лъ еси́ жела́нія. Ангельское житіе́ соверши́въ, и ны́нѣ на небесѣ́хъ водворя́ешися, испе́рва подо́бну добро́ту о́браза сохрани́въ и на подо́бствіе, я́коже мо́щно, восхо́дъ безпа́костно обрѣ́тъ, и, Бо́гу со дерзнове́ніемъ предстоя́, зерца́ломъ разу́мнымъ чи́сто зри́ши Святу́ю Тро́ицу; за чту́щія тя́ вѣ́рою и любо́вію помоли́ся, о́тче на́шъ Ни́коне.

И ны́нѣ, богоро́диченъ воскре́сенъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Отъ ю́ности оте́ческому житію́* поревнова́въ во все́мъ, преподо́бне,* тѣ́мже оста́вилъ еси́ вся́,* я́же въ мíрѣ, жите́йская мудрова́нія,* моля́ о на́съ Человѣколю́бца.

Сти́хъ: Честна́ предъ Го́сподемъ* сме́рть преподо́бныхъ Его́.

Послуша́нія отъ се́рдца жела́я, му́дре,* мíра и су́щихъ въ не́мъ жите́йскихъ отре́клся еси́.* И сего́ ра́ди въ вы́шнихъ* со а́нгелы Христу́ предстои́ши,* о всѣ́хъ моля́ся.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Аще и ю́нъ тѣ́ломъ,* преподо́бне Ни́коне,* но многолѣ́тныхъ житіе́мъ превозше́лъ еси́,* все́ плотско́е мудрова́ніе отсѣ́къ,* преподо́бному послуша́нію повину́лся еси́.

Сла́ва, гла́съ 8. Самогла́сенъ:

Помышля́я о́но житіе́ и вѣ́къ пребыва́ющій, вѣ́къ се́й, я́ко маловре́мененъ, оста́вилъ еси́ и потща́лся еси́ тлѣ́ющими нетлѣ́нная стяжа́ти: отону́дуже и тѣ́ло порабо́тилъ еси́ ду́ху, да Христа́ еди́наго пріобря́щеши. Его́же моли́ спасти́ся всѣ́мъ, любо́вію свяще́нную па́мять твою́ въ пѣ́снехъ при́сно почита́ющимъ.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

[На благослове́ніи хлѣ́бовъ: Тропа́рь свята́го [пи́санъ на ма́лѣй вече́рни], два́жды. И Богоро́дице Дѣ́во.., еди́ножды.]



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́ дне́сь.

Вѣ́къ, и́же на земли́, я́ко преходя́щій, возненави́дѣвъ, блаже́нне, и вѣ́къ о́нъ, я́ко непреходя́щій, отъ се́рдца возлюби́въ, ему́же и наслѣ́дникъ яви́лся еси́. О всѣ́хъ на́съ Христа́ моли́, при́сно въ пѣ́снехъ, преподо́бне, твою́ па́мять почита́ющихъ. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По 2-мъ стихосло́віи сѣда́ленъ, гла́съ 2. Подо́бенъ: Милосе́рдія су́щи.

Мона́шеское житіе́ отъ се́рдца, преподо́бне, возлюби́въ, и сего́ ра́ди мíръ и я́же въ мíрѣ возненави́дѣвъ, блаже́нне Ни́коне, духо́вному твоему́ отцу́ послуша́ніемъ и́скреннимъ вда́лся еси́. Съ ни́мже Го́споду моли́ся спасти́ся всѣ́мъ на́мъ. [Два́жды.]

Сла́ва, и ны́нѣ, богоро́диченъ:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́, на Тя́ бо упова́юще, — ра́дуйся, — вопіе́мъ Ти́, я́коже иногда́ Гавріи́лъ, безпло́тныхъ архистрати́гъ.

По поліеле́и сѣда́ленъ, гла́съ 8. Подо́бенъ: Прему́дрости.

Му́дрости измла́да подо́бію навы́къ и сего́ ра́ди вся́, я́же въ мíрѣ, возненави́дѣвъ, преподо́бне, Христа́ еди́наго возлюби́лъ еси́. Отону́дуже духо́вному твоему́ отцу́ всеконе́чно послуша́нію вда́лся еси́, отъ него́же тоя́же оби́тели па́стырь пресла́вно устроя́ешися, и мно́гимъ въ добродѣ́тели о́бразъ бы́въ: съ ни́мже моли́ся Го́споду, Ни́коне преподо́бне, грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ стихира, гласъ 6:

Отъ ю́ности, преподо́бне, изво́лилъ еси́ Бо́гу рабо́тати, тогда́ духо́вное раче́ніе распали́ ду́шу твою́, и, вско́рѣ роди́тели оста́вивъ, вели́каго отца́ дости́глъ еси́. Онъ же, ви́дѣвъ твое́ душе́вное жела́ніе, вма́лѣ искуше́ніе налага́етъ, да тя́ сотвори́тъ теплѣ́йша рачи́теля; ты́ же смире́ніе показу́еши, рече́ннаго отце́мъ достиза́еши и отъ него́ навы́клъ еси́ добродѣ́телей, ко отцу́ па́ки возвраща́ешися и па́стырь поставля́ешися. И ны́нѣ, преблаже́нне Ни́коне, предстоя́ престо́лу всѣ́хъ Царя́, испроси́ ми́ръ мíру, и Импера́тору на́шему держа́вы утвержде́нія, и спасе́ніе душа́мъ на́шимъ.

Кано́нъ Богоро́дицы со ирмосо́мъ на 6, и преподо́бнаго кано́нъ на 8. Творе́ніе Пахо́мія іеромона́ха, и́же отъ Святы́я Горы́, его́же краегране́сіе: Похвалу́ блаже́нному Ни́кону тку́. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Прему́дростію ра́зума украша́емь, преподо́бне Ни́коне, ве́сь Христу́ порабо́тился еси́, къ Нему́ жела́ніе твое́ имѣ́я, Его́же моли́ спасти́ отъ бѣ́дъ пою́щія тя́.

О всѣ́хъ Христа́ моли́, преподо́бне Ни́коне, па́мять твою́ любо́вію пою́щихъ, изба́витися вѣ́чнаго муче́нія, да тебе́ вси́, я́ко те́пла предста́теля, пѣ́сньми велича́емъ.

Христу́ ве́сь порабо́тився, преподо́бне Ни́коне, и къ Нему́ все́ жела́ніе имѣ́я, и Того́ ра́ди любве́ мíра съ жела́ньми его́ отре́кся. Сего́ ра́ди тя́ вси́ пѣ́сньми ублажа́емъ, Ни́коне всеблаже́нне.

Все́ твое́ жела́ніе къ Бо́гу му́жески впери́въ, въ вы́шнихъ селе́ніе сотвори́лъ еси́ пресла́вно. Тѣ́мже тя́ пѣ́сньми, блаже́нне Ни́коне, почита́емъ.

Аще и дале́че житіе́мъ, но бли́зъ вѣ́рою и любо́вію духо́внаго твоего́ настоя́теля, и съ ни́мъ вку́пѣ пресла́вно чудеса́ твори́ши, вку́пѣ же и Бо́гу предстоите́, о всѣ́хъ на́съ моля́щеся.

Богоро́диченъ: Му́дрости прему́дростныя прія́телище была́ еси́, Пренепоро́чная, Сво́й бо хра́мъ отъ Твои́хъ пречи́стыхъ крове́й, Чи́стая, созда́ти благоизво́ли на спасе́ніе на́ше.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Лю́ди вся́, тебе́ вѣ́дущія и заступле́нія твоего́ ча́ющія, не пре́зри, о́тче, но, ели́ко мо́щно, предста́тельствуй, всѣ́мъ поле́зная прося́ моли́твами твои́ми.

Упова́ніе имѣ́лъ еси́, блаже́нне Ни́коне, и прибѣ́жище всѣ́хъ Бо́га, Того́ моли́, мо́лимъ тя́, о на́съ, любо́вію воспѣва́ющихъ тя́, приснопа́мятне.

Боже́ственнымъ жела́ніемъ, преподо́бне Ни́коне, разжига́емь, мірску́ю красоту́ преоби́дѣлъ еси́, мона́шеское житіе́ возлюби́въ. Тѣ́мже бы́лъ еси́ преподо́бнымъ единожи́тель и пра́веднымъ.

Богоро́диченъ: Исцѣле́ній Тя́ исто́чникъ, въ Твою́ утро́бу вше́дъ, показа́, Ма́ти Бо́жія Пречи́стая, мою́ у́бо ду́шу исцѣли́.

Сѣда́ленъ, гла́съ 3:

Укрѣпля́емь Боже́ственною си́лою, преподо́бне Ни́коне, возмо́глъ еси́ оскудѣ́ніе, отъ безбо́жныхъ ага́рянъ бы́вшее, напо́лнити: це́рковь бо но́ву и оби́тель краснѣ́йшу па́че воздви́глъ еси́. Тѣ́мже тя́ вси́ ублажа́емъ. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Невозвра́тно ше́ствовавъ вводя́щій пу́ть къ небе́сному гра́ду, Ни́коне преподо́бне, идѣ́же наста́ви тя́ Святы́й Ду́хъ, оби́тель имѣ́я се́рдце твое́.

Смире́ніе вознося́щее, Ни́коне блаже́нне, въ се́рдцѣ имѣ́лъ еси́, отону́дуже тя́ и мы́ мо́лимъ уще́дрити смире́ніе на́ше.

Страстьми́ разли́чными коле́блемыя и вѣ́рою притека́ющія къ твоему́ гро́бу, блаже́нне Ни́коне, святы́мъ твои́мъ хода́тайствомъ вся́ посѣти́ ми́лостивно къ Человѣколю́бцу.

Мра́къ страсте́й отъ се́рдца твоего́ ты́, преподо́бне Ни́коне, очи́стивъ, Христо́ва повелѣ́нія вои́стинну свѣ́тъ пріе́мъ, въ постѣ́ просія́лъ еси́, умертви́въ тѣ́ло, ду́хомъ же, Ни́коне, ожи́лъ еси́.

Богоро́диченъ: Очище́ніе всѣ́хъ земны́хъ, вѣ́рою молю́ и припа́даю, Благослове́нная, моли́твами Твои́ми Судію́ и Сы́на Твоего́ ми́лостива сотвори́, я́ко да по до́лгу сла́влю Тя́.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Узкій и приско́рбный пу́ть ше́ствовалъ еси́, преподо́бне Ни́коне, восхожде́ньми боже́ственными се́рдца твоего́, а́може отца́ твоего́ наста́виша тя́ моли́твы.

Отъ грѣхо́вныхъ болѣ́зней мя́ облегчи́ ско́рбныхъ, и се́рдца моего́ лю́тость утоли́, и согрѣше́ній оставле́ніе испроси́, и́маши бо послу́шающа Христа́ чи́стыя твоея́ моли́твы.

Стра́сти тѣле́сныя воздержа́ніемъ, о́тче, увяди́въ, я́ко дре́во многопло́дное, пло́дъ чу́денъ прино́сиши Бо́гу: своя́ чу́дная исправле́нія, Ни́коне преподо́бне.

Всесвѣ́тлый свѣти́льникъ яви́лся еси́, озаря́я пою́щія тя́, Ни́коне преподо́бне. И сего́ ра́ди мо́лимъ тя́: вѣ́чнаго муче́нія изба́ви ны́, пою́щія тя́.

Богоро́диченъ: Ума́ моего́ уврачу́й изступле́ніе, Всенепоро́чная, и исцѣли́ стра́сти душе́вныя и уны́нія тму́ отжени́, я́ко да восхвалю́ Тя́ по достоя́нію, Богоро́дице Всепѣ́тая.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Свое́ се́рдце, преподо́бне Ни́коне, Святы́я Тро́ицы жили́ще и до́мъ созда́лъ еси́. Вси́, вѣ́рою притека́ющіи къ честнѣ́й твое́й ра́цѣ, просвѣще́ніе, и освяще́ніе, и очище́ніе, всеблаже́нне Ни́коне, пріе́млемъ.

Твоя́, всеблаже́нне Ни́коне, свяще́нныя и всесвяты́я мо́щи, во гро́бѣ лежа́ще, неду́ги врачу́ютъ, де́монскія же полки́ прогоня́ютъ всегда́, вѣ́рнымъ же источа́ютъ исцѣле́нія оби́льная, тебе́ по достоя́нію при́сно блажа́щимъ.

Яко ве́сь Христу́ приближа́яся яснѣ́йши, помяни́ всѣ́хъ, вѣ́рою помина́ющихъ тя́, Ни́коне всече́стне, грѣхо́въ проще́нія у Христа́ прося́ и небе́снаго Ца́рствія воспрія́тія.

Богоро́диченъ: Еди́на всѣ́мъ поможе́ніе, помози́ на́мъ, бѣ́дствующимъ, и ру́ку пода́ждь, и къ приста́нищу введи́ спасе́нія, Отрокови́це Богоблагода́тная.

Конда́къ, гла́съ 4. Подо́бенъ: Яви́лся еси́.

Духо́вному твоему́ настоя́телю, о́тче Ни́коне, вся́чески прилѣпи́вся и отъ него́ наставля́емь, во все́мъ Христо́ви порабо́тився, мона́ховъ бы́лъ еси́ чинонача́льникъ и преподо́бныхъ сожи́тель, съ ни́миже Христа́ Бо́га моли́ непреста́нно о всѣ́хъ на́съ.

Икосъ:

Ка́ко возмогу́ воспѣ́ти твоя́ исправле́нія? Или́ изрещи́ труды́ твоя́, и́миже труди́лся еси́ по отцѣ́ твое́мъ, а́ще не ты́ пода́си ми́ сло́во, недосто́йному рабу́ твоему́? ты́ бо бы́лъ еси́ по отцѣ́ мона́ховъ нача́льникъ, съ ни́миже Христа́ Бо́га моли́ непреста́нно о всѣ́хъ на́съ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Вся́ мимотеку́щая привре́менная пристра́стія, преподо́бне Ни́коне, отрази́въ, всю́ наде́жду къ Бо́гу стяжа́лъ еси́, Имже дѣ́йствуеши пресла́вная чудеса́.

Твоея́ души́ тве́рдое и благостоя́нное ра́зума, преподо́бне Ни́коне, ника́коже лука́вый возмо́же соврати́ти, Бо́гу помога́ющу ти́, досточу́дне.

Мíру умертви́вся, бу́дущую жи́знь наслѣ́дилъ еси́, о́тче, исцѣле́ній Боже́ственную благода́ть источа́еши пою́щимъ: благослове́нъ Бо́гъ оте́цъ на́шихъ.

Нельсти́вно навы́къ пре́жде тебе́ бы́вшихъ оте́цъ по́стническому житію́, преподо́бне, но тѣ́хъ житіе́мъ пожи́въ, богоблаже́нне, воспѣва́я: благослове́нъ Бо́гъ оте́цъ на́шихъ.

Богоро́диченъ: Глаго́ломъ проро́ческимъ послѣ́дующе, Дѣ́во, Богоро́дицу, Тя́ исповѣ́дуемъ: родила́ бо еси́ отроча́ всѣ́хъ дре́внѣйшее, Емману́илъ нарица́емое. Ему́же зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Му́жествовавъ, побѣди́лъ еси́ стра́стная взыгра́нія вся́, у́мъ просвѣще́нъ имѣ́я, возмо́глъ еси́, я́же ви́дѣ отца́ творя́ща, сія́ дѣ́тели испо́лнити: тѣ́мже тя́ вси́ ублажа́емъ, Ни́коне всеблаже́нне.

Мы́слію очище́нною, прему́дре Ни́коне, Бо́гу приближа́яся, всѣ́мъ вся́къ бы́въ, да Христа́ пріобря́щеши. Тѣ́мже, въ небе́сныя оби́тели всели́вся, преподо́бне, дерзнове́нно зри́ши Святу́ю Тро́ицу, Юже непреста́нно моли́ спасти́ вся́, правосла́вно тя́ почита́ющія.

Серпо́мъ моли́твъ, о́тче Ни́коне, стра́стная те́рнія изсѣ́къ и воздѣ́лавъ воздержа́нія ра́ломъ душе́вную зе́млю, вве́рглъ еси́ сѣ́мена благоче́стія въ не́й: тѣ́мже исцѣле́нія плоды́ пожина́еши.

Добродѣ́телей тя́ прія́телище нарица́емъ, преблаже́нне, я́ко молча́нія дру́га, и бдѣ́нія дѣ́лателя, и о́бразъ цѣлому́дрія, и моли́твы жили́ще некра́домое, и чуде́съ сокро́вище, и моли́твенника о почита́ющихъ па́мять твою́, Ни́коне блаже́нне.

Богоро́диченъ: Ма́ти Бо́жія Всенепоро́чная, души́ моея́ я́звы исцѣли́, сла́сти утоли́ пло́ти моея́, омраче́нное се́рдце мое́ просвѣти́, и умири́ у́мъ мо́й отъ вся́каго вре́да, и вра́жіихъ мя́ изба́ви напа́стей.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Сле́зъ твои́хъ пролія́ніемъ грѣхо́вный о́гнь погаси́лъ еси́, безстра́стія же во́ду исцѣле́ній чи́стаго пи́ва пою́щимъ источа́еши, блаже́нне Ни́коне досточу́дне.

Ра́ка, идѣ́же лежи́тъ свято́е тѣ́ло твое́, преподо́бне Ни́коне, чуде́съ благода́ть источа́етъ, просвѣща́ющи на́ша ду́ши и тѣлеса́ и обогаща́ющи предста́теля тя́ те́пла и засту́пника иму́щія.

Дне́сь съ на́ми собо́ри а́нгелъ и преподо́бныхъ веселя́тся въ па́мять твою́, блаже́нне Ни́коне, съ ни́ми же помина́й ны́, чту́щія тя́ вѣ́рно, досточу́дне.

Уста́ви свяще́нными твои́ми моли́твами воздвиза́емое на ны́ смуще́ніе и человѣ́къ всѣ́хъ озлобле́ніе, я́ко имѣ́я дерзнове́ніе ко Влады́цѣ и Бо́гу на́шему, Ни́коне досточу́дне.

Богоро́диченъ: О, па́че ума́ чуде́съ Твои́хъ! Бо́жія бо Сло́ва воплоти́вшагося, Еди́наго родила́ еси́ па́че естества́, Ма́ти Дѣ́во, вся́ческая Боже́ственнымъ Свои́мъ хотѣ́ніемъ му́дрѣ держа́ща и окормля́юща.

Свѣти́ленъ:

Святы́ни хра́мъ бы́лъ еси́, преподо́бне, по Боже́ственному прича́стію ра́йскій граждани́нъ, въ не́мже наслажда́ешися невозбра́нно дре́ва зна́нія и нетлѣ́нныя сла́вы, па́мять творя́, Ни́коне преподо́бне, о и́же вѣ́рою хва́лящихъ тя́, о́тче богому́дре. [Два́жды.]

Сла́ва, и ны́нѣ, богоро́диченъ:

Ра́дуйся, вѣ́рныхъ похвало́; ра́дуйся, преподо́бныхъ утвержде́ніе; ра́дуйся, правосла́вныхъ сла́во; ра́дуйся, свѣ́те су́щихъ во тмѣ́; ра́дуйся, хра́ме пресвяты́й; ра́дуйся, Бо́жій раю́; ра́дуйся, кля́твы разрѣше́ніе, Благослове́нная Марíе.

На хвали́техъ стихи́ры, на 4, гла́съ 6. Подо́бенъ: Все отло́жше.

Вели́кая исправле́нія* по́стническихъ по́двигъ* вели́каго отца́, вои́стинну чу́днаго Се́ргія,* Ни́коне блаже́нне,* привлеко́ша тя́ жела́ннѣ* по́стническому сосло́вію,* и ди́вно добродѣ́телемъ его́ вообра́жся* тому́ сожи́тіемъ,* и сострада́лецъ подвиго́мъ до́блественъ,* я́ко учени́къ того́ и́стиненъ,* учи́тель же худо́женъ того́ ча́домъ.* И ны́нѣ моли́ся, преподо́бне,* поми́ловатися душа́мъ на́шимъ. [Два́жды.]

Мно́жество по́двигъ* и по́товъ твои́хъ по́стническихъ* раздражи́ша сопоста́та пра́ведныхъ,* наведе́ бо язы́ки раскопа́ти жили́ще честно́е,* но по́ты преподо́бнаго вели́каго Се́ргія* во вѣ́ки сія́ютъ предъ Бо́гомъ.* Тѣ́мже тобо́ю па́че утверди́* и бо́льше сіе́ распространи́,* но мо́лимъ тя́, преподо́бне,* подви́гнувъ вели́каго на моли́тву,* возбраня́й при́сно ва́рваръ стремле́ніе* и никогда́ же попусти́ обори́ти,* Ни́коне блаже́нне.

Дре́во добровѣ́твенно,* сѣ́нно и благопло́дно,* на вода́хъ прекра́сно жи́зненныхъ вои́стинну насажде́нное,* пита́ющее приходя́щія и осѣня́ющее опаля́емыя,* ты́ еси́, о́тче преподо́бне,* напая́емь уче́ніи Се́ргія,* и́миже пита́лъ еси́ твоя́ ученики́.* Тѣ́мже мо́лимъ тя́:* осѣни́ лю́ди, заступа́я отъ язы́ческихъ наше́ствій,* низлага́я и́хъ пре́жде воста́нія.* На́съ же въ ми́рѣ соблюди́,* Ни́коне, твои́ми моли́твами.

Сла́ва, гла́съ 2. Самогла́сенъ:

Па́мять пра́ведника — ра́дость боя́щихся Го́спода, хвала́ бо его́ — сла́дость вѣ́рныхъ е́сть: блаже́нъ бо вои́стинну, его́же избра́ и прія́тъ Госпо́дь. Тѣ́мже мы́, веселя́щеся, почита́емъ па́мять преподо́бнаго, ему́же ны́нѣ въ па́мять его́ моля́щеся, я́ко иму́щу дерзнове́ніе, о побѣ́дѣ Благочести́вому Самоде́ржцу на язы́ки проти́вныя, е́же низложи́ти востаю́щія непра́ведно, пода́ти же ми́ръ мíру, и це́рквамъ единомы́сліе, и душа́мъ на́шимъ ве́лію ми́лость.

И ны́нѣ, богоро́диченъ, гла́съ то́йже:

[Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

Славосло́віе вели́кое. Ектеніи́ и отпу́стъ.]



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Матѳе́я, зача́ло 10. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 145 об. – 153.

/ Къ оглавленію раздѣла /


Наверхъ / Къ титульной страницѣ

0