Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 17-й де́нь.
Иже во святы́хъ отца́ на́шего Григо́рія епи́скопа, Неокесарíйскаго чудотво́рца.

[ВЕЧЕРЪ,]
На Го́споди воззва́хъ: стихи́ры на 6, гла́съ 8. Подо́бенъ: Что́ ва́съ нарече́мъ.

Что́ тя нареку́, Григо́ріе?* Влады́ку, я́ко стра́сти покори́лъ еси́ уму́;* дѣ́лателя, я́ко пожа́лъ еси́ му́дрости пло́дъ,* и Боже́ственнаго видѣ́нія сподобля́ема,* и богосло́віемъ небе́снымъ оглаша́ема;* священнодѣ́теля свяще́ннѣйша* и чудодѣ́лателя пречу́днаго.* Моли́ спасти́ся душа́мъ на́шимъ.

Что́ тя ны́нѣ нареку́, Григо́ріе?* Потреби́теля крѣ́пка безбо́жнаго злоче́стія,* уставополо́жника благоче́стія* и учи́теля му́драго;* ми́ра же пода́теля непобѣ́дна,* ра́тей разори́теля непобори́ма,* въ гора́хъ пребыва́юща* и зря́ща, я́же во градѣ́хъ.* Моли́ спасти́ся душа́мъ на́шимъ.

Что́ тя ны́нѣ провозвѣща́ю, преподо́бне?* Подража́теля апо́столовъ, я́ко чуде́съ самотво́рца,* рѣка́мъ запреща́юща призыва́ніемъ Христо́вымъ* и е́зеро братоубíйственное изсуша́юща,* собо́ръ богобо́рный разоря́юща,* христіа́нская составле́нія умножа́юща и просвѣща́юща.* Моли́ спасти́ся душа́мъ на́шимъ.

Что́ тя ны́нѣ провозглашу́, преподо́бне?* Путевожда́ заблу́ждшихъ* и неду́гующихъ врача́,* пода́теля тре́бъ прося́щимъ оби́льна,* гони́теля де́моновъ крѣпча́йша,* поусти́теля му́ченическаго по́двига,* проро́чески свѣтя́щася благода́тьми, достосла́вне.* Моли́ спасти́ся душа́мъ на́шимъ.

Сла́ва, гла́съ 6:

Во глубину́ видѣ́нія вше́дъ, всему́дреннѣ іера́рше Христо́въ, Боже́ственное навы́клъ еси́ Тро́ицы явле́ніе, Ду́хомъ прови́дя неукло́нно Христа́ Бо́га на́шего, чуде́съ бе́здну то́чиши на́мъ, мо́крое во́дъ естество́ въ каменови́дное претвори́въ и тре́бищника льсти́ премѣни́въ мра́чныя, гони́тели увѣща́лъ еси́ вѣ́ровати и́стинѣ и сто́лпъ благоче́стія добродѣ́телей яви́лся еси́ и́мъ, чудесы́ проро́къ наре́клся еси́. Тѣ́мъ мо́лимъ тя́, не преста́й о на́съ Спа́са моли́ти, е́же спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное, е́же ви́жу, та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

На стихо́внѣ окто́иха. Сла́ва, гла́съ 6:

Бо́дрость Бо́жія даде́ся тебѣ́, му́дре, по Даніи́лу, я́коже бо о́ному со́ніе, та́ко вѣ́ры та́инство откры́ся тебѣ́. Тѣ́мже моли́, преподо́бне о́тче, спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Всечи́стая, я́ко ви́дѣ Тебе́, на Крестѣ́ повѣ́шена, пла́чущи, вопія́ше ма́терски: Сы́не Мо́й и Бо́же Мо́й, сладча́йшее Мое́ Ча́до, ка́ко терпи́ши стра́сть поно́сную?

Тропа́рь, гла́съ 8:

Въ моли́твахъ бо́дрствуя, чуде́съ дѣ́ланьми претерпѣва́я, тезоиме́ніе стяжа́лъ еси́ исправле́нія; но моли́ся Христу́ Бо́гу, о́тче Григо́ріе, просвѣти́ти ду́ши на́ша, да не когда́ у́снемъ въ сме́рть.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха и свята́го на 6, его́же краегране́сіе: Чудодѣ́лателю Григо́рію похвалу́ тку́. Творе́ніе Ѳеофа́ново. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Твои́хъ чуде́съ во мнѣ́, Григо́ріе, боже́ственное дѣ́йство свѣ́тло, о́тче, и ны́нѣ покажи́, изъ глубины́ избавля́я мя́ прегрѣше́ній, блаже́нне, и твое́ю просвѣща́я свѣ́тлостію, да досто́йно воспою́ тя.

Яко опа́сный, и умоимѣ́теленъ, и му́дръ души́ благоро́дное плотски́хъ сласте́й, блаже́нне, предсуди́лъ еси́, му́дрости догма́ты трудолю́бно собира́я, и́миже она́ пита́ется, Григо́ріе, Бо́гу приближа́ющися.

Цѣлому́дріе сестру́ стяжа́въ, я́ко споспѣ́шницу благу́ю, тя́ ви́дѣвъ, лю́тый змíй, Григо́ріе, на тя́ за́висть воздви́же, его́же посрами́лъ еси́, о́тче, долготерпѣ́ніемъ, жену́, стра́стію объя́ту, исцѣли́въ.

На чужде́й странѣ́ жи́тельствуя, преподо́бне, всѣ́мъ че́стенъ ра́ди добродѣ́тели яви́лся еси́, благочести́въ и боголюби́въ, чудодѣ́йства да́ръ отъ Бо́га пріе́мъ, и́мже позна́нъ бы́лъ еси́, богоглаго́ливе, просія́ въ мíрѣ, я́ко со́лнце.

Богоро́диченъ: Изъ ко́рене, Чи́стая, ца́рскаго прозябла́ еси́ и Царя́ Христа́, Бо́жіе Сло́во, па́че ума́ и мы́сли воплоще́нно родила́ еси́ изъ чи́стыхъ Твои́хъ крове́й, сугу́ба естество́мъ су́ща и еди́нственна Ѵпоста́сію.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Очи́стивъ тво́й у́мъ стра́стнаго треволне́нія и любому́драго видѣ́нія испо́лненъ, яви́лся еси́ благолѣ́пенъ, му́дрости оби́телище, и проро́чества да́ромъ обогати́лся еси́, Григо́ріе.

Богодохнове́нному списа́нію прибесѣ́довавъ, всеблаже́нне, и разли́чнаго житія́ ви́ды избра́въ я́вѣ, еди́нъ добродѣ́тели о́бразъ въ себѣ́, богому́дре, утверди́лъ еси́, Григо́ріе.

Богоявле́нне навы́къ боже́ственнымъ тайново́дствомъ та́инство богосло́вія, просвѣти́ на́съ Тро́ицу Единосу́щную, Единоесте́ственну же почита́ти, Несозда́нну и Соприсносу́щну.

Бо́гомъ наста́вленъ, я́ко любо́вію Того́ взыска́въ, Чи́стую и Богоро́дицу Марíю и сы́на Гро́мова тайноучи́тели имѣ́лъ еси́, Тро́ицы Свѣ́ту тя́, богоглаго́ливе, науча́ющія.

Богоро́диченъ: Же́злъ, прозя́бшій Христа́, цвѣ́тъ нетлѣ́нія и злату́ю кади́льницу, вси́ Тя́ вѣ́мы, Чи́стая, Боже́ственнаго существа́ нося́щу на объя́тіихъ, Отрокови́це, Угль, Богоблаже́нная.

Сѣда́ленъ, гла́съ 3. Подо́бенъ: Боже́ственныя вѣ́ры.

Но́въ бы́лъ еси́ Моисе́й дѣ́лы, скрижа́ли вѣ́ры на горѣ́ та́инственнаго богоявле́нія пріи́мъ, законоположи́въ лю́демъ благоче́стіе Тро́ичныя та́йны, Григо́ріе. Тѣ́мже, вси́ вѣ́рніи, чти́мъ па́мять твою́, прося́ще тобо́ю ве́лію ми́лость. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая; па́че всѣ́хъ мене́, пе́рсть бы́вша, оскверне́нна плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница, Сло́ва нетлѣ́нная Дѣ́во-Ма́ти, на Крестѣ́ зря́щи повѣ́шена изъ Нея́ безболѣ́зненно Прозя́бшаго, матеролѣ́пно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Зе́млю до́брую, о́тче богому́дре, взора́въ, сло́ва сѣ́мя пріе́мъ, во сто́ ева́нгельски многосугу́биши, еще́ и ны́нѣ, Григо́ріе, приводя́ уче́ніи твои́ми Бо́гу пѣснопою́щія: си́лѣ Твое́й сла́ва, Человѣколю́бче.

Яко мо́лнія, о́тче, возсія́въ, житіе́ твое́ де́монскую ле́сть отгна́, свѣ́ту бо твоея́ добродѣ́тели о́ныхъ тма́ прикосну́тися не возмо́же. Тѣ́мже неоко́росъ душетлѣ́нная льсти́, валя́вся, я́коже ка́мень, свѣ́тится.

Мра́къ свѣ́та Боже́ственнѣйшаго ви́дѣти сподо́бился еси́, зако́нъ же богопи́санный, я́ко Моисе́й, о́тче, пріе́мъ, богосло́вія извѣ́стное навы́клъ еси́: отсю́ду законополо́жникъ Христо́вы Це́ркве показа́лся еси́, богому́дре Григо́ріе.

Ри́торскаго буесло́вія уклони́вся и сло́вомъ, о́тче, благода́ти озари́вся, апо́стольскую и́стинно вла́сть на де́моны прія́тъ, твоея́ бо отбѣга́етъ свѣтя́щіяся зари́ тмы́ предста́тель, Григо́ріе.

Богоро́диченъ: Киво́тъ Тя́ издале́ча прообрази́, пріе́мши зако́нъ богопи́санный, во чре́вѣ Живонача́льное Сло́во заче́ншую несказа́нно, Всенепоро́чная, пита́ющаго бога́тно ду́ши вопію́щихъ: си́лѣ Твое́й сла́ва, Человѣколю́бче.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Дѣ́ланіемъ твои́хъ слове́съ оляденѣ́вшая сердца́ угла́дивъ, и боже́ственное сѣ́мя въ ня́, іера́рше, вве́рглъ еси́, и пло́дъ многокла́сный Изба́вителю, спасе́ніе вѣ́рныхъ, богоглаго́ливе, прине́слъ еси́.

Бо́жій предста́тель, ре́вностію распала́емь, пома́за тя Фе́димъ не прише́дша, о́тче, Бо́гу вся́ческая вѣ́дящему благоче́стно упова́въ и честно́му твоему́ житію́ надѣ́явся, богоглаго́ливе Григо́ріе.

Струя́ми твои́хъ повелѣ́ній и́дольская разжже́нія угаси́лъ еси́ и уче́ньми твои́ми вѣ́рныя утверди́лъ еси́, всему́дре, возше́дъ на го́ру, я́ко Самуи́лъ, видѣ́ніи и, я́ко ду́бъ, бы́въ тве́рдостію.

Святи́телю богому́дре, твои́ми моли́твами лю́тыхъ мя́ избавля́й, мои́хъ прегрѣше́ній рукописа́ніе, о́тче, расто́ргни, я́ко свяще́нникъ сы́й, отъ Бо́га вла́сть пріи́мъ оставля́ти прегрѣше́нія.

Богоро́диченъ: Украси́лася еси́, Дѣ́во, дѣ́вственными Твои́ми пречи́стыми добро́тами, и пе́рвыя Евы покры́ла еси́ сту́дъ злообра́зный, Христа́ ро́ждши, одѣя́ніе безсме́ртія да́рующаго Тебе́ чту́щимъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Езеро, чудодѣ́йствуя, братоубíйственное изсуши́лъ еси́, и рѣки́ стремле́нія уста́вилъ еси́, всему́дре, же́злъ водрузи́въ, и́же вскорени́ся а́біе и возрасте́ Боже́ственнымъ манове́ніемъ, Григо́ріе.

Ре́вность Бо́жія пояда́ше тя́, всебога́те, не терпя́ бо зрѣ́ти Бо́га досажда́ема, лю́ди суему́дренныя твои́ми моли́твами, богоглаго́ливе, погуби́лъ еси́.

Умертви́ся, восхотѣ́вый уничижи́ти тя́ окая́нный евре́инъ злочести́вый, Бо́гу тя́ прославля́ющему, богому́дре Григо́ріе, Того́ догма́товъ испо́лнителя показу́я.

Богоро́диченъ: На́йде Вседѣ́тельный на Тя́ Ду́хъ, Всенепоро́чная, и Сло́во Бо́жіе въ Тя́ всели́ся и пло́ть бы́сть неизрече́нно, пребы́въ неизмѣ́ненъ.

Конда́къ, гла́съ 2. Подо́бенъ: Вы́шнихъ ища́.

Чуде́съ мно́гихъ пріе́мъ дѣ́йство, зна́меньми ужа́сными де́моны устраши́лъ еси́ и неду́ги отгна́лъ еси́ человѣ́ческія, всему́дре Григо́ріе, чудотво́рецъ же имену́ешися, зва́ніе отъ дѣ́лъ пріе́мъ.

Икосъ:

Отку́ду начну́ похвалы́ тка́ти, окая́нный, зря́ мно́гія и пречу́дныя ве́щи? Аще отъ житія́ преподо́бнаго начну́, отню́дъ не возмогу́, вся́каго бо ума́ превосхо́дитъ житіе́ его́ боже́ственное. Аще отъ чуде́съ, и въ се́мъ про́чее постыжду́ся, па́че песка́ бо су́ще, сего́ ра́ди нарече́ся чудотво́рецъ, зва́ніе отъ дѣ́лъ пріе́мъ.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Отце́въ похвала́ и учи́телей честносло́віе, свѣти́льникъ Це́ркве, благоче́стія сто́лпъ неколе́бленный ты́ яви́лся еси́, Григо́ріе, зовы́й: благослове́нъ Бо́гъ оте́цъ на́шихъ.

Возсія́въ чудесы́, вселе́нную просвѣти́лъ еси́, сего́ ра́ди, богому́дре, совоку́пльшеся, тебе́ блажи́мъ, твои́ми словесы́ пита́ющеся, Григо́ріе, и пою́ще: благослове́нъ Бо́гъ оте́цъ на́шихъ.

Врачева́нія, всему́дре, немощны́мъ всѣ́мъ источи́лъ еси́, излія́ся бо благода́ть оби́льнѣйшая во устна́хъ твои́хъ чудодѣ́йственная, е́юже взыва́лъ еси́: благослове́нъ Бо́гъ оте́цъ на́шихъ.

Богоро́диченъ: Ны́нѣ вся́ испо́лнишася свѣ́та Боже́ственнаго Тобо́ю, Пречи́стая, Ты́ бо две́рь яви́лася еси́, е́юже мíру Бо́гъ пріобщи́ся, просвѣща́я вѣ́рою зову́щія: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Тобо́ю обогати́вшеся Тро́ицы сія́ніемъ, Единосу́щныя и Честны́я, Григо́ріе, твое́ ны́нѣ торжество́ соверша́юще, благода́тію чудодѣ́йственною озари́тися про́симъ, вопію́ще Влады́цѣ: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко новоявле́нно зерца́ло, пріе́мъ, всебога́те, сія́нія нача́льнаго Божества́, мíръ просвѣти́лъ еси́, лучи́ посыла́я свѣ́та пѣснопѣ́сненно правосла́віе пою́щимъ: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Бо́гомъ покрыва́емь, благоче́стія вина́, богочести́вымъ соблю́лся еси́, всему́дре, въ горѣ́ сокрыва́емь, я́ко законополо́жникъ ины́й Моисе́й, Содѣ́теля и Изба́вителя пѣ́ти науча́я: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Свѣ́та Незаходи́маго была́ еси́ оби́тель, Пречи́стая, дѣ́вства добро́тами свѣтя́щи и вся́ озаря́ющи, Богоро́дицу Тя́ и́стинную исповѣ́дающія отъ души́ и вопію́щія: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Изя́щнѣйшаго жи́тельства сія́я свѣ́томъ, ны́нѣ Свѣ́ту вели́кому предстои́ши богодѣ́ятельными чудодѣ́йствы, я́ко побѣди́тель вѣнча́емь, преподо́бне, о́тче іера́рше, чудотво́рче Григо́ріе богому́дре, свѣти́ло Це́ркве, правосла́вныхъ удобре́ніе.

Напра́вити моли́ твои́ми моли́твами церко́вное ны́нѣ свяще́нство, избра́нное и освяще́нное, чудодѣ́лателю, и вѣ́рно ны́нѣ па́мять твою́ соверша́ющимъ получи́ти го́рняго Ца́рства и боже́ственнаго весе́лія сподо́битися умоли́.

Побѣди́въ де́монскія прило́ги, и плотско́е покори́въ мудрова́ніе, и архіере́й незло́бивъ и преподо́бенъ бы́въ, пра́вды одѣя́ніемъ облече́нъ, чудотво́рче, предстои́ши престо́лу всѣ́хъ Царя́ со дерзнове́ніемъ, всеблаже́нне.

Богоро́диченъ: Яви́лася еси́, о Дѣ́во, Ма́ти Бо́жія, па́че естества́ ро́ждши пло́тію Благо́е Сло́во, Его́же Оте́цъ отъ се́рдца Своего́ отры́гну, пре́жде всѣ́хъ вѣ́къ я́ко Бла́гъ, Его́же ны́нѣ и тѣле́съ вы́шша разумѣва́емъ, а́ще и въ тѣ́ло облече́ся.

Свѣти́ленъ. Подо́бенъ: Жены́, услы́шите.

Чудесы́ возсія́лъ еси́, чудотво́рче Григо́ріе, служи́теля и́дольскаго изба́вилъ еси́ отъ тли́ и пре́лести де́монскія, ка́мень подви́гнувъ повелѣ́ніемъ, е́зеро же изсуши́въ, и рѣку́ уста́вилъ еси́. Тѣ́мже тя́ вси́ согла́сно похваля́емъ, треблаже́нне.

Богоро́диченъ. Подо́бенъ то́йже:

Ра́дуйся, вѣ́рныхъ похвало́; ра́дуйся, преподо́бныхъ утвержде́ніе; ра́дуйся, пра́ведныхъ сла́во; ра́дуйся, свѣ́те су́щихъ во тмѣ́; ра́дуйся, хра́ме пресвяты́й; ра́дуйся, Бо́жій раю́; ра́дуйся, кля́твы разрѣше́ніе, Благослове́нная Марíе.

На стихо́внѣ окто́иха и свята́го стихи́ра, гла́съ 4.

Сти́хъ: Свяще́нницы Твои́ облеку́тся пра́вдою, и преподо́бніи Твои́ возра́дуются.

Свяще́нства избра́ніе отъ Бо́га пріе́мъ и въ боже́ственную ри́зу свы́ше одѣ́явся, пре́жде невѣ́рствія сы́ны ча́да свѣ́та и наслѣ́дники показа́лъ еси́, Бо́жія бо му́дрости благода́ти, излія́вшейся во устна́хъ твои́хъ, пресла́вныхъ веще́й самодѣ́лателю Госпо́день, Григо́ріе. Тѣ́мъ и ны́нѣ въ па́мяти твое́й моли́ся Христу́ Бо́гу о душа́хъ на́шихъ.

Сла́ва, гла́съ 8:

Преслову́щаго въ чудесѣ́хъ іера́рха и безду́шная стыдя́щеся, пресла́вно прелага́хуся: е́зеро бо и́зсше, бра́тію воумля́ющее, же́злъ же возраста́ше, рѣку́ обузда́ющи, ка́мень сло́вомъ преложи́ся, приводя́ невѣ́рныя къ Бо́жію позна́нію, его́же ра́ди пода́ждь, Бо́же, душа́мъ на́шимъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ми очесы́* ви́дится, о Влады́ко?* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица пла́чущи глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.


НА ЛИТУРГІИ,

Блаже́нна окто́иха и свята́го, пѣ́снь 3-я. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Кори́нѳяномъ, зача́ло 151. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Матѳе́я, зача́ло 34, отъ полу́. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 140 об. – 145 об.

/ Къ оглавленію раздѣла /


Наверхъ / Къ титульной страницѣ

0