Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 16-й де́нь.
Свята́го апо́стола и евангели́ста Матѳе́я.

НА ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Зва́нный свы́ше.

Испыту́яй сердца́ человѣ́ковъ,* егда́ тво́й боже́ственный ра́зумъ, апо́столе,* Боже́ственнымъ провѣ́дѣніемъ узрѣ́,* отъ непра́вды и отъ мíра тя́ изба́ви;* тогда́ тя́ всемíрный Свѣ́тъ содѣ́я,* вселе́нныя концы́ просвѣща́ти* и облиста́ти повелѣ́въ,* Его́же и Боже́ственное Ева́нгеліе* сподо́бился еси́ я́вѣ написа́ти.* Того́ моли́ спасти́ и просвѣти́ти ду́ши на́ша. [Два́жды.]

Иже отъ мыта́рства* при́званъ на учени́чество,* егда́ тя́ Безнача́льное Сло́во возгласи́,* послѣ́довати повелѣ́въ* и обще́ніе Ца́рствія обѣща́въ,* тогда́, всеблаже́нне, вся́ оста́вивъ* и смуще́нія мяте́жнаго отше́дъ,* Тому́ крѣ́пко послѣ́довалъ еси́* и ны́нѣ, богови́дче, насыща́емь,* неизрече́ннаго Его́ видѣ́нія я́сно.* Его́же моли́* спасти́ и просвѣти́ти ду́ши на́ша. [Два́жды.]

Проро́ческое нѣ́кое я́вѣ острозрѣ́ніе* дре́вле тя́, свята́го ка́меня, узрѣ́,* на земли́ валя́ющася* и преле́стная сокруша́юща ухищре́нія.* Сло́во же, всему́дре, Ѵпоста́сное,* свѣ́тъ тя́ мíра* и проповѣ́дника пра́вды и и́стины соверши́,* уясне́на луча́ми* Трисо́лнечнаго Свѣ́та, всече́стне,* Его́же моли́* спасти́ и просвѣти́ти ду́ши на́ша. [Два́жды.]

Пребоже́ственныя му́дрости слуго́,* егда́ непристу́пный Свѣ́тъ пріи́де пло́тію,* я́коже изво́ли,* невѣ́дѣнія разоря́я омраче́нія,* тогда́, призыва́емь, послѣ́довалъ еси́* жизноно́снымъ повелѣ́ніемъ* и храни́тель боже́ственный бы́въ па́че смы́сла,* церко́вный бы́въ свѣти́льникъ,* Матѳе́е, Христо́во оби́телище.* Его́же моли́* спасти́ и просвѣти́ти ду́ши на́ша.

Язы́комъ о́гненнымъ* пре́лесть попаля́я,* яви́лся еси́, всехва́льне,* Матѳе́е прему́дре,* Утѣ́шителево пріе́мь прише́ствіе,* существо́мъ тебе́ освѣща́юща,* отсю́ду удиви́лъ еси́ вся́ко помышле́ніе* слы́шащихъ слове́съ твои́хъ,* къ лю́демъ глаго́лавъ вели́чествія Вседержи́теля,* и ны́нѣ во всю́ зе́млю изы́де твое́ вѣща́ніе,* богодохнове́нне.* Его́же моли́* вся́ уще́дрити пою́щія тя́.

Сла́ва, гла́съ 4. Самогла́сенъ:

Зову́щу Христу́ ко учени́честву небе́сному усе́рдно послѣ́довалъ еси́, богопрія́тне, все́ упражне́ніе попече́нія земна́го еди́нощи отри́нувъ, досто́йный бо го́рняго Ца́рствія ра́зумъ благопоко́рнѣ воспріи́мъ, долѣре́вностнаго жи́тельства и сла́вы тщíя отступи́лъ еси́, благовѣ́стникъ отъ мытаря́ бы́въ, свѣ́тъ же во тмѣ́ су́щимъ яви́лся еси́ и заблу́ждшимъ путево́ждь ко спасе́нію; ны́нѣ же моли́твенникъ всего́ мíра теплѣ́йшій и тебе́ чту́щихъ, Матѳе́е, храни́тель спаси́тельный.

И ны́нѣ, богоро́диченъ:

Иже Тебе́ ра́ди богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость.

Вхо́дъ. Проки́менъ дне́ и чте́нія три́.

Собо́рнаго посла́нія Петро́ва чте́ніе. [Зача́ло 58.]

Пе́тръ, апо́столъ Іису́съ Христо́въ, избра́ннымъ прише́льцемъ разсѣ́янія, По́нта, Галатíи, Каппадокíи, Асíи и Виѳинíи, по прозрѣ́нію Бо́га Отца́ во святы́ню Ду́ха, въ послуша́ніе и кропле́ніе Кро́ве Іису́съ Христо́вы, благода́ть ва́мъ и ми́ръ да умно́жится. Благослове́нъ Бо́гъ и Оте́цъ Го́спода на́шего Іису́съ Христа́, Иже по мно́зѣй Свое́й ми́лости порожде́й на́съ во упова́ніе жи́во воскресе́ніемъ Іису́съ Христо́вымъ отъ ме́ртвыхъ, въ наслѣ́діе нетлѣ́нно, и нескве́рно, и неувяда́емо, соблюде́но на небесѣ́хъ ва́съ ра́ди, и́же си́лою Бо́жіею соблюде́ни вѣ́рою во спасе́ніе гото́вое яви́тися во вре́мя послѣ́днее. О не́мже ра́дуйтеся, ма́ло ны́нѣ, а́ще лѣ́по е́сть, приско́рбни бы́вше въ разли́чныхъ напа́стехъ, да искуше́ніе ва́шея вѣ́ры многочестнѣ́йше зла́та ги́бнуща, огне́мъ же искуше́на, обря́щется въ похвалу́, и че́сть, и сла́ву во открове́ніи Іису́съ Христо́вѣ. Его́же не ви́дѣвше, лю́бите, и на Него́же ны́нѣ не зря́ще, вѣ́рующе же, ра́дуетеся ра́достію неизглаго́ланною и просла́вленною, пріе́млюще кончи́ну вѣ́рѣ ва́шей спасе́ніе душа́мъ. О Не́мже спасе́ніи взыска́ша и испыта́ша проро́цы, и́же о ва́шей благода́ти прореко́ша, испыта́юще, въ каково́ или́ въ ко́е вре́мя явля́ше въ ни́хъ Ду́хъ Христо́въ, пре́жде свидѣ́тельствуя о Христо́вѣхъ страсте́хъ, я́же по си́хъ сла́вахъ, и́мже откры́ся, я́ко не и́мъ самѣ́мъ, но на́мъ служа́ху сія́, я́же ны́нѣ возвѣсти́шася ва́мъ, благовѣствова́вшими ва́мъ Ду́хомъ Святы́мъ, по́сланнымъ съ небесе́, въ ня́же жела́ютъ а́нгели прини́кнути. Тѣ́мже, возлю́бленніи, препоя́савше чре́сла помышле́нія ва́шего, трезвя́щеся, соверше́ннѣ упова́йте на приноси́мую ва́мъ благода́ть открове́ніемъ Іису́съ Христо́вымъ. Яко ча́да послуша́нія, не преобразу́ющеся пе́рвыми невѣ́дѣнія ва́шего похотѣ́ніи, но по зва́вшему вы́ Свято́му и са́ми свя́ти во все́мъ житіи́ бу́дите. Зане́ пи́сано е́сть: свя́ти бу́дите, я́ко Азъ Свя́тъ е́смь. И а́ще Отца́ называ́ете, нелицемѣ́рно судя́ща кому́ждо по дѣ́лу, со стра́хомъ житія́ ва́шего вре́мя жи́тельствуйте, вѣ́дяще, я́ко не истлѣ́ннымъ сребро́мъ или́ зла́томъ изба́вистеся отъ су́етнаго ва́шего житія́, отцы́ пре́даннаго, но честно́ю кро́вію я́ко Агнца Непоро́чна и Пречи́ста Христа́, предувѣ́дѣнаго у́бо пре́жде сложе́нія мíра, я́вльшася же въ послѣ́дняя лѣ́та ва́съ ра́ди. Иже Его́ ра́ди вѣ́руете въ Бо́га, воздви́гшаго Его́ изъ ме́ртвыхъ и сла́ву Ему́ да́вша, я́ко да вѣ́ра ва́ша и упова́ніе бу́детъ на Бо́га. Ду́ши ва́ша очи́стивше въ послуша́ніе и́стины ду́хомъ, въ братолю́біе нелицемѣ́рно, отъ чи́ста се́рдца дру́гъ дру́га люби́те прилѣ́жно, порожде́ни не отъ сѣ́мене истлѣ́нна, но неистлѣ́нна, сло́вомъ Жива́го Бо́га и пребыва́юща во вѣ́ки. Зане́ вся́ка пло́ть, я́ко трава́, и вся́ка сла́ва человѣ́ча, я́ко цвѣ́тъ тра́вный. Изсше трава́, и цвѣ́тъ ея́ отпаде́, глаго́лъ же Госпо́день пребыва́етъ во вѣ́ки, се́ же е́сть глаго́лъ благовѣствова́нный въ ва́съ. Отло́жше у́бо вся́ку зло́бу, и вся́ку ле́сть, и лицемѣ́ріе, и за́висть, и вся́ клеветы́, я́ко новорожде́ни младе́нцы, слове́сное и неле́стное млеко́ возлюби́те, я́ко да о не́мъ возрасте́те во спасе́ніе. Поне́же вкуси́сте, я́ко бла́гъ Госпо́дь. Къ Нему́же приходя́ще, Ка́меню Жи́ву, отъ человѣ́къ у́бо уничиже́ну, отъ Бо́га же избра́нну, че́стну, и са́ми, я́ко ка́меніе жи́во, зижди́теся въ хра́мъ духо́венъ, святи́тельство свя́то, возноси́ти же́ртвы духо́вны, благопрія́тны Бо́гови Іису́съ Христо́мъ. Зане́ пи́сано е́сть въ Писа́ніи: се́ полага́ю въ Сіо́нѣ Ка́мень Краеуго́ленъ, избра́нъ, че́стенъ, и вѣ́руяй въ Онь, не постыди́тся.

Собо́рнаго посла́нія Петро́ва чте́ніе. [Зача́ло 59.]

Возлю́бленніи, Христо́съ пострада́ по на́съ, на́мъ оста́вль о́бразъ, да послѣ́дуемъ стопа́мъ Его́. Иже грѣха́ не сотвори́, ни обрѣ́теся ле́сть во устѣ́хъ Его́, Иже укаря́емь, проти́ву не укаря́ше, стражда́, не преща́ше, предая́ше же судя́щему пра́ведно. Иже грѣхи́ на́ша са́мъ вознесе́ на тѣ́лѣ Свое́мъ на дре́во, да, отъ грѣ́хъ избы́вше, пра́вдою поживе́мъ, Его́же я́звою исцѣлѣ́сте. Бѣ́сте бо, я́ко о́вцы заблу́ждшія, не иму́ще па́стыря, но возврати́стеся ны́нѣ къ Па́стырю и Посѣти́телю ду́шъ ва́шихъ. Та́кожде же и жены́, повину́ющеся свои́мъ муже́мъ, да и а́ще нѣ́цыи не повину́ются сло́ву, же́нскимъ житіе́мъ безъ сло́ва плѣне́ни бу́дутъ, ви́дѣвше е́же со стра́хомъ чи́сто житіе́ ва́ше. Имже да бу́детъ не внѣ́шняя плете́нія вла́съ, и обложе́нія зла́та, или́ одѣя́нія ри́зъ лѣ́пота, но потае́нный се́рдца человѣ́къ въ неистлѣ́ніи кро́ткаго и молчали́ваго ду́ха, е́же е́сть предъ Бо́гомъ многоцѣ́нно. Та́ко бо иногда́ и святы́я жены́, упова́ющія на Бо́га, украша́ху себе́, повину́ющеся свои́мъ муже́мъ: я́коже Са́рра послу́шаше Авраа́ма, господи́на того́ зову́щи, ея́же бы́сте ча́да, благотворя́ще и не боя́щеся ни еди́наго стра́ха. Му́жіе, та́кожде вку́пѣ живу́ще съ свои́ми жена́ми по ра́зуму, я́ко немощнѣ́йшему сосу́ду, же́нскому воздаю́ще че́сть, я́ко и снаслѣ́дницы благода́тныя жи́зни, во е́же не прекраща́тися моли́твамъ ва́шимъ. Коне́цъ же — вси́ единому́дрени бу́дите, ми́лостиви, братолю́бцы, милосе́рдни, благоутро́бни, мудролю́бцы, смиреному́дри, не воздаю́ще зла́ за зло́ или́ досажде́нія за досажде́ніе, супроти́вное же благословя́ще, вѣ́дяще, я́ко на се́ зва́ни бы́сте, да благослове́ніе наслѣ́дите.

Собо́рнаго посла́нія Петро́ва чте́ніе. [Зача́ло 61.]

Возлю́бленніи, Христу́ пострада́вшу за ны́ пло́тію, и вы́ въ ту́ же мы́сль вооружи́теся, зане́ пострада́вый пло́тію преста́ отъ грѣха́. Во е́же не ктому́ въ человѣ́ческія по́хоти, но въ во́лю Бо́жію, про́чее во пло́ти жи́ти вре́мя. Довлѣ́етъ бо ва́мъ мимоше́дшее вре́мя житія́, во́лю язы́ческую твори́вшимъ, хо́ждшимъ въ нечистота́хъ, въ по́хотехъ, въ скотоло́жствѣ, въ по́мыслѣхъ, въ пія́нствѣ, въ козлогласова́ніихъ, въ лихоима́ніи и богоме́рзскихъ идолослуже́ніихъ. О не́мже дивя́тся, не сходя́щимся ва́мъ въ то́ же блуда́ разлія́ніе, ху́ляще, и́же воздадя́тъ сло́во гото́ву Су́щему суди́ти живы́мъ и ме́ртвымъ. На се́ бо и ме́ртвымъ благовѣсти́ся, да Су́дъ у́бо пріи́мутъ по человѣ́ку пло́тію, поживу́тъ же по Бо́зѣ Ду́хомъ. Всѣ́мъ же кончи́на прибли́жися, уцѣлому́дритеся у́бо и трезви́теся въ моли́твахъ. Пре́жде же всѣ́хъ дру́гъ ко дру́гу любо́вь прилѣ́жну имѣ́йте, зане́ любо́вь покрыва́етъ мно́жество грѣхо́въ. Страннолю́бцы дру́гъ ко дру́гу безъ ропта́ній. Кíйждо, я́коже прія́тъ дарова́ніе, между́ себе́ си́мъ служа́ще, я́ко до́бріи строи́теліе разли́чныя благода́ти Бо́жія. Аще кто́ глаго́летъ — я́ко словеса́ Бо́жія, а́ще кто́ слу́житъ — я́ко отъ крѣ́пости, ю́же подае́тъ Бо́гъ, да о все́мъ сла́вится Бо́гъ Іису́съ Христо́мъ, Ему́же е́сть сла́ва и держа́ва во вѣ́ки вѣко́въ, ами́нь.

Аще изво́литъ настоя́тель пѣ́ти литíю, зри́ сего́ мѣ́сяца въ 14-й де́нь:
[На литíи стихи́ра хра́ма и апо́стола, гла́съ 4. Подо́бенъ: Яко до́бля.

Тро́стію благода́ти* отъ глубины́ су́етства* человѣ́ки извле́клъ еси́, досточу́дне,* Учи́теля ма́ніемъ* повину́вся, Матѳе́е,* просвѣ́щшаго по всему́ твое́ разумѣ́ніе,* и апо́стола, и че́стна богоглаго́льника,* тя́, всеблаже́нне, показа́вша,* Того́ непостижи́маго Божества́.

Ду́ха сія́ніе на тя́ сни́де* во о́гненнѣ ви́дѣ* и тя́, блаже́нне, Боже́ственное прія́телище содѣ́ла,* ско́ро отгоня́ща безбо́жія мглу́* и мíръ просвѣща́юща* сія́ніемъ всему́дрыхъ твои́хъ слове́съ,* тайноглаго́льниче,* апо́столовъ украше́ніе,* Христо́въ самови́дче блаже́нне.

Мо́лніями проповѣ́данія* во тмѣ́ сѣдя́щія* невѣ́дѣнія, сла́вне, просвѣти́въ,* показа́лъ еси́ сы́ны* Влады́ки и Бо́га вѣ́ры ра́ди.* Его́же страсте́мъ ревнова́лъ еси́ и сме́рти,* и сла́вы бы́лъ еси́ наслѣ́дникъ,* я́ко му́дръ и богоглаго́ливъ,* я́ко учени́къ и́стины.

Сла́ва, гла́съ 2:

Оста́вивъ земна́я, послѣ́довалъ еси́ Христу́, и зна́менався дохнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія обраща́ти человѣ́ки во свѣ́тъ богозна́нія, апо́столе Матѳе́е, и, сконча́въ по́двиги боже́ственныя твоея́ стра́сти и му́къ разли́чныхъ, ду́шу твою́ Христу́ пре́далъ еси́. Того́ моли́, всеблаже́нне, дарова́ти на́мъ ве́лію ми́лость.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя́ подъ кро́вомъ Твои́мъ.]

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Слове́съ твои́хъ трубо́ю* человѣ́ки собра́лъ еси́* въ Бо́жіе позна́ніе, приснопѣва́еме,* и преле́стная собра́нія отъ земли́ отгна́въ,* во еди́но вѣ́рныя единомы́сліе упра́вилъ еси́* и мо́лишися ны́нѣ* отъ тли́ и бѣ́дъ изба́витися* вѣ́рою соверша́ющимъ при́сно* честну́ю па́мять твою́.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

Иже язы́комъ тя́ вооружи́въ* о́гненнымъ Ду́ха Свята́го,* крѣ́пка показа́ тя борца́* на пре́лесть, апо́столе,* Христо́съ Бо́гъ на́шъ,* Имже прія́лъ еси́ свѣ́тлыя по́чести благода́ти.* Его́же моли́ отъ тли́ и бѣ́дъ изба́витися* вѣ́рою соверша́ющимъ при́сно* честну́ю па́мять твою́.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

Во глубины́ Ду́ха прини́къ, апо́столе,* неистощи́мое бога́тство поразумѣ́лъ еси́* и, изъ Него́ поче́рпъ* благода́ть оби́льную,* на́мъ ева́нгельски всѣ́мъ сію́ разда́лъ еси́,* и мо́лишися ны́нѣ* отъ тли́ и бѣ́дъ изба́витися* вѣ́рою соверша́ющимъ при́сно* честну́ю па́мять твою́.

Сла́ва, гла́съ 6:

Изъ глубины́ зло́бы послѣ́днія къ зѣло́ кра́йнѣйшей высотѣ́ добродѣ́тели, я́ко оре́лъ высокопа́рный, пресла́вно восте́клъ еси́, Матѳе́е всехва́льне, покры́вшаго бо небеса́ добродѣ́телію и ра́зума Своего́ всю́ зе́млю испо́лнившаго, Христа́ послѣ́довалъ еси́ стопа́мъ: подража́тель, разжже́нъ во все́мъ Тому́, яви́лся еси́, благовѣству́я ми́ръ, жи́знь и спасе́ніе повину́ющимся благоче́стнѣ Боже́ственнымъ повелѣ́ніемъ: въ ня́же и на́съ наста́ви, благоугожда́ющія Зижди́телю и тебе́ ублажа́ющія.

И ны́нѣ, богоро́диченъ:

Творе́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

Тропа́рь, гла́съ 3:

Апо́столе святы́й и евангели́сте Матѳе́е, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Или́ се́й, гла́съ то́йже:

Усе́рдно отъ мы́тницы къ зва́вшему Влады́цѣ Христу́, я́вльшуся на земли́ человѣ́комъ за бла́гость, Тому́ послѣ́довавъ, апо́столъ избра́нный яви́лся еси́ и благовѣ́стникъ Ева́нгелія вселе́ннѣй велегла́сенъ. Сего́ ра́ди чти́мъ честну́ю па́мять твою́, Матѳе́е богоглаго́ливе, моли́ ми́лостиваго Бо́га да грѣхо́въ оставле́ніе пода́стъ душа́мъ на́шимъ.

Сла́ва, и ны́нѣ, богоро́диченъ:

Тя́, хода́тайствовавшую [спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ].


НА УТРЕНИ,
На Бо́гъ Госпо́дь: Тропа́рь два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й, Спа́се.

Пе́рвый Христо́во Ева́нгеліе написа́въ и всю́ просвѣти́въ подсо́лнечную тва́рь, Матѳе́й, зѣло́ прему́дрѣйшій и Христо́въ таи́нникъ изя́щный, ны́нѣ почита́емь свяще́нными пѣ́сньми, всѣ́мъ отпуще́нія грѣхо́въ про́ситъ любо́вію чту́щимъ того́. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію вѣ́мы вси́, Дѣ́ву вои́стинну и по рождествѣ́ я́вльшуюся, любо́вію прибѣга́ющіи къ Твое́й бла́гости: Тя́ бо и́мамы, грѣ́шніи, предста́тельницу, Тя́ стяжа́хомъ въ напа́стехъ спасе́ніе, еди́ну Всенепоро́чную.

По 2-й каѳи́смѣ сѣда́ленъ, гла́съ 3. Подо́бенъ: Боже́ственныя вѣ́ры.

Дѣ́лы просія́въ правовѣ́рія, все́ угаси́лъ еси́ злосла́віе, побѣди́тель бы́въ непребо́ренъ, Ева́нгеліе всѣ́мъ проповѣ́далъ еси́, Це́ркви вся́ бога́тно украси́лъ еси́, Матѳе́е апо́столе, Христу́ Бо́гу моли́ся дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ всенепоро́чну, еди́нъ Госпо́дь, Того́ прилѣ́жно моли́ дарова́ти на́мъ ве́лію ми́лость.

По поліеле́и сѣда́ленъ, гла́съ 8. Подо́бенъ: Прему́дрости и Сло́ва.

Во вся́ концы́ протече́ му́дрыхъ твои́хъ глаго́лъ я́ко вои́стинну вѣща́ніе, всехва́льне Госпо́день апо́столе, боговидѣ́ніе всѣ́мъ я́сно проповѣ́да и язы́къ неразу́міе въ ра́зумъ приведе́. Тѣ́мъ и́дольское омраче́ніе отгна́въ, свѣ́тъ ра́зума во тмѣ́ су́щимъ возсія́, Матѳе́е всехва́льне, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Во всю́ зе́млю [изы́де вѣща́ніе и́хъ,* и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ [сла́ву Бо́жію, творе́ніе же руку́ Его́ возвѣща́етъ тве́рдь]. Вся́кое дыха́ніе... Евангеліе Іоа́нна, зача́ло 67.

По 50-мъ псалмѣ́ стихи́ра, гла́съ 6:

Воспле́щемъ въ пѣ́снехъ дне́сь, вѣ́рніи, въ па́мяти честна́го апо́стола и евангели́ста Матѳе́я, то́й бо, пове́ргъ и́го и зла́то мыта́рства, послѣ́дова Христу́ и проповѣ́дникъ Ева́нгелія Боже́ственнаго бы́сть: отню́дуже изы́де проро́чески вѣща́ніе его́ во вселе́нную и мо́литъ спасти́ся душа́мъ на́шимъ.

Кано́нъ Богоро́дицы со ирмосо́мъ на 6 и апо́стола на 8. Ѳеофа́ново. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Бога́тно пода́ждь ми́ все́льшуюся въ тя́ благода́ть, Матѳе́е всесла́вне и слуго́ Христо́въ, да вопію́, свѣ́тло проповѣ́дая, и воспою́, ра́дуяся, твоя́ чудеса́.

Весьма́ оста́вилъ еси́ земны́хъ смуще́ніе, Сло́ва бо я́ко услы́шавъ вопло́щшагося гла́съ, и благода́ти яви́лся еси́ строи́тель и проповѣ́датель богопрія́тенъ, богоблаже́нне.

Самови́децъ бы́въ и слуга́ возсія́вшаго Сло́ва, апо́столе, Превѣ́чнаго Отца́, и проте́клъ еси́, Того́ прише́ствіе благовѣству́я всѣ́мъ язы́комъ.

Богоро́диченъ: Сме́рти потребле́ніе и тли́ разруше́ніе, Жи́зни же явле́ніе благовѣсти́лъ еси́, му́дре, Дѣ́ва бо во утро́бѣ заче́нши Непости́жнаго и мíръ обнови́.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Твоя́ апо́столы, Сло́ве Бо́жій, свѣти́льники показа́лъ еси́ жи́зни, мра́къ отгоня́ющія безбо́жія, Влады́ко, и Боже́ственною Твое́ю сла́вою мíръ ве́сь просвѣща́ющія.

Твои́мъ вооружи́въ всеору́жіемъ Матѳе́я хра́брѣйшаго, Спа́се, мучи́телей крѣпча́йша сего́ содѣ́ялъ еси́, Влады́ко, и потреби́теля показа́лъ еси́ и́дольскія ле́сти, Человѣколю́бче.

Язы́ка твоего́ о́гненнаго вѣща́ніе де́монская пожже́ ка́пища, Матѳе́е богодохнове́нне, Паракли́товъ орга́не, чрезъ Его́же Христо́съ проповѣ́дается, всѣ́хъ Жи́знь Ѵпоста́сная.

Богоро́диченъ: Труба́ богосло́вная, вѣща́ющая крѣ́пко, просвѣти́ лю́ди, Матѳе́я богому́драго, Тро́ицы сія́ніе, па́че ума́ же воплоще́ніе Сло́ва изъ Тебе́, Пречи́стая.

Сѣда́ленъ, гла́съ 8. Подо́бенъ: Прему́дрости.

Во вся́ концы́ протече́ му́дрыхъ твои́хъ глаго́лъ я́ко вои́стинну вѣща́ніе, всехва́льне Госпо́день апо́столе, боговидѣ́ніе всѣ́мъ я́сно проповѣ́далъ еси́ и язы́ковъ неразу́міе въ ра́зумъ приве́лъ еси́. Тѣ́мже, и́дольское омраче́ніе отгна́въ, свѣ́тъ зна́нія во тмѣ́ су́щимъ возсія́лъ еси́, Матѳе́е всехва́льне, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, подо́бенъ то́йже:

Яко свѣти́льника Свѣ́та и ученика́, я́ко самови́дца Сло́ва боже́ственнаго вси́ хва́лимъ тя́, Госпо́день апо́столе, и́бо, благода́тныя твоя́ мре́жи простира́я, слове́сныя ры́бы уловля́еши повелѣ́ніемъ. Тѣ́мже и язы́цы уловля́хуся си́лою Ду́ха, наставля́еми вѣ́рою, неботаи́нниче всехва́льне, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

И ны́нѣ, богоро́диченъ:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Ѵпоста́сному Твоему́ Сло́ву, Бо́же, науче́нъ, мірску́ю му́дрость разруши́ богови́децъ учени́къ, велегла́сно зовя́ Тебѣ́: сла́ва си́лѣ Твое́й, Го́споди.

Ублаже́ному отъ Христа́, ко́е благохвале́ніе принесе́мъ тебѣ́, богоглаго́ливе? не мо́жетъ бо человѣ́къ цвѣтя́щія на тебѣ́ благода́ти сло́вомъ изрещи́, досточу́дне.

Нескве́рный тво́й и чи́стый у́мъ ви́дѣвъ Высоча́йшій, я́коже свѣщу́ на свѣ́щникъ высо́кій, су́щимъ во тмѣ́ свѣтя́щую, всѣ́мъ, богоявле́нне, предложи́.

Богоро́диченъ: Умерщвле́ное естество́ человѣ́ческое, Благослове́нная, возвы́сила еси́, я́ко Высоча́йшаго ро́ждшая крѣ́пость па́че естества́, всепѣ́тая Отрокови́це, я́коже Матѳе́й научи́.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Благода́ть пріе́мъ Всесвята́го Ду́ха, Боже́ственное оби́телище показа́лся еси́; боже́ственно научи́въ богозна́нія свѣ́ту, ввѣ́ренъ бы́лъ догма́ты Христо́вы писме́ны изложи́ти, я́ко самови́децъ богоизбра́нный.

Язы́къ тво́й тро́сть Паракли́та бы́сть, ско́рое избавле́ніе даю́щаго позна́вшимъ влады́чество Его́ и му́дрыхъ вды́шущаго душа́мъ ра́зумъ небе́сный, о Матѳе́е всече́стне.

Сія́юща чудесы́ и исцѣле́ній благода́тьми, тя́ Христо́съ посла́ мíру, де́монскую попира́юща крѣ́пость и ду́ши просвѣща́юща вѣ́рныхъ, всѣ́хъ пою́щихъ тя́, ми́ра проповѣ́дника.

Богоро́диченъ: Дѣ́ва родила́ еси́ Сы́на Превѣ́чнаго, въ естество́ обле́кшася человѣ́ческое, я́коже науча́я, богоглаго́ливый рече́, и спа́сшаго сіе́ отъ тли́ коне́чною благосты́нею, и Дѣ́ва пребыла́ еси́.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Евангели́стъ отъ мыта́рства я́ко послѣ́дова Тебѣ́, претвори́ся богоглаго́ливый всеси́льною Твое́ю, Вседѣ́телю, крѣ́постію, Матѳе́й всеизря́днѣйшій.

Управля́ется твоего́ благовѣ́стія душепита́тельными словесы́ язы́ковъ мно́жество, возвыша́емо къ добродѣ́телей высо́кому верху́, о Матѳе́е всеблаже́нне.

Матѳе́я уловля́ются богоплете́нными ученика́ мре́жами собо́ры вѣ́рующихъ всегда́, къ Твоему́ позна́нію, Благодѣ́телю, наставля́еми.

Богоро́диченъ: Дѣ́ву ро́ждшую воспису́я, благовѣству́етъ Тя́, вся́ческая Сотво́ршаго, безъ сѣ́мене и тли́, Всенепоро́чная, Матѳе́й всеизя́щнѣйшій.

Конда́къ, гла́съ 4. Подо́бенъ: Вознесы́йся.

Мыта́рства и́го отве́ргъ, пра́вды и́гу притя́глся еси́ и яви́лся еси́ купе́цъ всеизря́днѣйшій, бога́тство прине́съ ю́же съ высоты́ прему́дрость. Отону́дуже проповѣ́далъ еси́ и́стины сло́во и уны́лыхъ воздви́глъ еси́ ду́ши, написа́въ ча́съ су́дный.

Икосъ:

Вра́жіе мучи́тельство ну́дитъ мя́ несы́тно и души́ моея́ все́ сѣ́мя восхища́етъ, Матѳе́е, дру́же Христо́въ. Но са́мъ, сѣ́мя моли́твъ твои́хъ да́въ, уплоди́ къ твоему́ служе́нію и покажи́ мя пѣснопѣ́вца твоего́ малѣ́йшаго и сказа́теля мно́гихъ твои́хъ и вели́кихъ исправле́ній; и ко Христо́вѣ любви́ ка́ко, вся́ а́біе оста́вивъ, послѣ́довалъ еси́ те́плѣ Зва́вшему, пе́рвый бы́въ благовѣ́стникъ въ мíрѣ, написа́въ ча́съ су́дный.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Бы́лъ еси́ пе́рваго осія́нія боже́ственное изображе́ніе, я́ко учени́къ Того́ свѣтлостьми́ распаля́емь, Ему́же, поя́, глаго́лалъ еси́: препѣ́тый отце́въ Госпо́дь и Бо́гъ, благослове́нъ еси́.

Яко слуга́ Сло́ва, всеблаже́нне, въ Боже́ственныя оби́тели, идѣ́же Христо́съ обита́етъ, ты́ всели́лся еси́, я́коже тебѣ́ обѣща́ пребоже́ственный отце́въ Госпо́дь и Бо́гъ еди́нъ всѣ́хъ.

Неду́зи, Матѳе́е, отго́нятся, и отбѣга́етъ мно́жество де́моновъ су́щими въ тебѣ́ дарова́ньми Боже́ственнаго Ду́ха, въ ни́хже пѣ́лъ еси́: препѣ́тый отце́въ Госпо́дь и Бо́гъ, благослове́нъ еси́.

Богоро́диченъ: Всепѣ́тую Дѣ́ву написа́лъ еси́ боже́ственными твои́ми словесы́, Творца́ всѣ́хъ ро́ждшую, апо́столе, Ему́же вси́ пое́мъ: препѣ́тый отце́въ Госпо́дь и Бо́гъ, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Манове́ньми, я́же въ Тебѣ́ неосла́бными, Матѳе́й свяще́ннѣйшій обожа́емь, положе́ніемъ же бы́въ, естество́мъ е́же бы́лъ еси́, вселе́нную, Влады́ко, привлече́ пѣ́ти Тебѣ́: Го́спода по́йте дѣла́ и превозноси́те во вся́ вѣ́ки.

Якоже мо́лнію вселе́ннѣй, Сло́во богосло́ва посла́, мра́къ у́бо отгоня́ща, язы́ки же просвѣща́юща богосло́вія догма́ты. Тѣ́мже и поя́ше: Го́спода по́йте дѣла́ и превозноси́те Его́ во вся́ вѣ́ки.

Сло́вомъ чи́стымъ и умо́мъ Бо́гъ съ тобо́ю бесѣ́довалъ е́сть, ти́ну бо я́ко изсѣ́клъ еси́, Тому́ прибли́жился еси́ и примѣси́лся еси́, сла́вне. Тѣ́мже и пое́ши: Го́спода по́йте дѣла́ и превозноси́те Его́ во вся́ вѣ́ки.

Богоро́диченъ: На благодѣя́ніе человѣ́ковъ Сло́во воплоти́тися изво́ли: две́рь бо дѣ́вства про́йде Госпо́дь и Богоро́дицу показа́. Тѣ́мже зове́мъ: Го́спода по́йте дѣла́ и превозноси́те Его́ во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Добро́ты у́мныя прія́лъ еси́ діади́му боже́ственную, апо́столе, и Ца́рствія же благолѣ́пнѣйшимъ вѣнце́мъ украси́лся еси́ десни́цею Вседержи́телевою, и свѣ́тишися, му́дре, со а́нгелы престо́лу предстоя́ Влады́ки Христа́, всеблаже́нне.

Дре́ва жи́зни досто́йно получи́лъ еси́, проповѣ́дникъ Жива́го Бо́га, благовѣствова́въ жи́знь мíру Боже́ственное посѣще́ніе: са́домъ бо зна́нія не растли́лъ еси́ у́мъ, пребы́въ незы́бленъ и неколе́бленъ Це́ркве степе́нь, всеблаже́нне.

Невѣ́сту Христо́ву боже́ственно украси́лъ еси́ Ева́нгеліемъ твои́мъ, я́ко діади́мою, Це́рковь, богоблаже́нне, и ны́нѣ боже́ственную твою́ па́мять торжеству́етъ свѣ́тло, ю́же изба́вити вся́каго обстоя́нія и бѣ́дъ лю́тыхъ моли́, Матѳе́е апо́столе.

Богоро́диченъ: Нѣ́дръ не отступи́въ Безнача́льнаго Роди́теля, Сло́во Безнача́льное, я́коже благовѣству́етъ Матѳе́й, пиша, Бо́гъ воплоти́ся изъ Тебе́, Чи́стая, Всепѣ́тая, въ человѣ́чь о́бразъ всеобра́зно ве́сь одѣ́явся и того́ пріемъ сво́йства.

Свѣти́ленъ. Подо́бенъ: Посѣти́лъ ны́ е́сть.

Сказа́ на́мъ Боже́ственная чудодѣя́нія, сла́вный Христо́ва Ева́нгелія списа́тель, Матѳе́й богопрія́тный, его́же, любо́вію чту́ще, благосочета́нно воспои́мъ.

Слава, инъ:

Мыта́рства и́го отве́ргъ разу́мно, Христу́ послѣ́довалъ еси́, о Матѳе́е богому́дре! Слѣдо́мъ же Того́ чу́дно послѣ́дуя, въ прича́стіи бы́лъ еси́ Того́ Ца́рствія и сла́вы о́бщникъ, и таи́нникъ неизрече́нныхъ.

И ны́нѣ, богоро́диченъ:

Всесвяты́я ру́ки Твоя́, Богоро́дице Дѣ́во, и́миже Зижди́теля носи́ла еси́, поднеси́ въ моли́тву о на́съ къ Нему́, я́ко да изба́витъ ны́ вся́кихъ искуше́ній діа́вольскихъ и получи́ти бу́дущихъ о́ныхъ бла́гъ сподо́битъ, Всепѣ́тая.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Просія́лъ еси́, апо́столе,* свѣтови́денъ, я́коже со́лнце, луча́ми Ду́ха,* и всю́ озари́лъ еси́ вселе́нную,* блаже́нне, богозна́ніемъ,* и отгна́лъ еси́ мглу́ многобо́жія,* Матѳе́е всему́дре.* Тѣ́мже твое́ пресвѣ́тлое и досточу́дное* дне́сь соверша́емъ торжество́,* я́ко исто́чникъ свяще́нія. [Два́жды.]

На высотѣ́ сѣдя́ богозна́нія, апо́столе,* прія́лъ еси́ Ду́ха зарю́, яви́вшуюся тебѣ́* въ ви́дѣ и язы́цѣ о́гненнѣмъ,* всю́ попали́лъ еси́ я́вѣ* нече́стія ве́щь многобо́жную.* Тѣ́мъ тя́, я́ко апо́стола* и богоглаго́льника, почита́емъ,* свято́е твое́ дне́сь* соверша́юще торжество́.

Возгремѣ́лъ еси́, всему́дре,* вселе́ннѣй уче́нія* свяще́нная и спаси́тельная,* и всю́ тва́рь отъ идодонеи́стовства очи́стилъ еси́, Матѳе́е,* и просвѣти́лъ еси́ лю́ди* Ева́нгелія свѣтлостьми́;* и́дольская же ка́пища* разруши́въ благода́тію,* Це́ркви же въ сла́ву Бо́жію созда́лъ еси́.

Сла́ва, гла́съ 2. Византíево:

Иго оста́вивъ непра́вды и зла́то отве́ргъ лихои́мства, и́гу пра́вды прите́клъ еси́ и неистощи́мое бога́тство хища́еши, я́ко умоиму́щій купе́цъ, возъизмѣни́въ привре́менная на вѣ́чная и погиба́ющая на пребыва́ющая, богосія́нный бо и многоцѣ́нный би́серъ стяжа́въ, ке́сарева ке́сарю, до́лу влеку́щая разу́мно оста́вилъ еси́; и Всецарю́ удобопоко́рнѣ послѣ́довавъ Христу́, всю́ тва́рь обогати́лъ еси́ ева́нгельскими богоглаго́ланьми, му́дре. Но испроси́ и ны́нѣ, Матѳе́е преизря́днѣйше, тя́ чту́щимъ спасе́ніе и ве́лію ми́лость.

И ны́нѣ, богоро́диченъ:

Спаси́ отъ бѣ́дъ рабы́ Твоя́, Богоро́дице Дѣ́во, я́ко вси́ по Бо́зѣ къ Тебѣ́ прибѣга́емъ, я́ко къ неруши́мѣй стѣнѣ́ и предста́тельству.

Та́же славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна апо́стола отъ кано́новъ, пѣ́снь 3-я и 6-я. Проки́менъ, гла́съ 8: Во всю́ зе́млю изы́де вѣща́ніе и́хъ,* и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ къ Кори́нѳяномъ, зача́ло 131. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 30. Прича́стенъ: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 134 – 140.

/ Къ оглавленію раздѣла /


Наверхъ / Къ титульной страницѣ

0