Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 15-й де́нь.
Святы́хъ му́ченикъ и исповѣ́дникъ Гу́рія, Само́на и Ави́ва.

Аллилу́ія.

Вѣ́стно бу́ди, я́ко а́ще случи́тся нача́ло поста́ сего́ въ суббо́ту: Въ пято́къ ве́чера, на Го́споди воззва́хъ: стихи́ры святы́хъ на 6. Аще ли въ недѣ́лю: Стихи́ры пре́жде окто́иха, и святы́хъ 3. Сла́ва, святы́хъ. И ны́нѣ, богоро́диченъ. На стихо́внѣ окто́иха. Сла́ва, святы́хъ. И ны́нѣ, богоро́диченъ. Ве́черъ и на у́трени, на Бо́гъ Госпо́дь: Тропа́рь святы́хъ. Сла́ва, и ны́нѣ, богоро́диченъ.

Въ про́чія же дни́ отъ понедѣ́льника до пятка́ пое́мъ аллилу́ія.., по́чести ра́ди нача́ла свята́го поста́. На Го́споди воззва́хъ: пое́мъ стихи́ры пре́жде Богоро́дицы 3 и святы́хъ 3. Сла́ва, и ны́нѣ, богоро́диченъ или́ крестобогоро́диченъ. Вмѣ́сто проки́мна пое́мъ аллилу́ія.., на гла́съ 6-й. На стихо́внѣ окто́иха. Сла́ва, и ны́нѣ, богоро́диченъ или́ крестобогоро́диченъ. На у́трени вмѣ́сто Бо́гъ Госпо́дь.., пое́мъ аллилу́ія... и тро́ичны; а по 6-й пѣ́сни конда́къ святы́хъ.


[НА ВЕЧЕРНИ,]
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Ави́въ всему́дрый,* и Само́нъ чу́дный,* и Гу́рій сла́вный,* о́бщій соста́вивше вѣ́рнымъ ли́къ,* въ ра́дости ны́нѣ сликовству́ютъ на́мъ страстоте́рпцы и свеселя́тся,* душа́мъ бо му́ченическимъ* отъ Бо́га сіе́ даде́ся,* здѣ́ быва́емая разу́мно зрѣ́ти.

Болѣ́зни претерпѣ́вше* нестерпи́мыхъ му́къ* и до́блественно пострада́вше,* Тро́ицы равночи́сленніи,* Само́не, и Ави́ве, и Гу́ріе богому́дре,* вѣ́чнаго и кра́снаго насыща́етеся ны́нѣ наслажде́нія* трудо́въ воздая́ніе возмѣря́ющу ва́мъ Христу́,* Его́же те́плѣ моли́те* спасти́ся душа́мъ на́шимъ.

Ко приста́нищу нево́лненному,* и къ жи́зни немяте́жнѣй,* и зати́шію благоути́шному,* страстоте́рпцы му́ченицы, приста́вше* превѣ́чнующему безстра́стнаго пребыва́нія,* и до́льнее ны́нѣ измѣни́сте,* трудо́въ воздая́нія и болѣ́зней* по́чести отъ Бо́га пріи́мше* досто́йне, блаже́нніи.

Ины стихи́ры Богоро́дицы. Гла́съ и подо́бенъ то́йже.
Аще ли аллилу́ія.., пое́мъ сíи стихи́ры пре́жде:

Одожди́ мнѣ́, Влады́чице,* Твоея́ ми́лости бе́здну* и опа́льшееся зно́емъ страсте́й се́рдце мое́,* я́ко ми́лостива, напо́й, Отрокови́це,* и умиле́нія ка́пли точи́ти* непреста́нно сотвори́, молю́ся,* и́миже утѣше́нія сподо́блюся, Чи́стая,* е́же получи́ти и́мутъ и́же и́скренно пла́кавшіися.

Де́монскими коле́блема прило́ги* и въ ро́въ поги́бели рѣ́ема,* уще́дри, Влады́чице,* и утверди́ мя на ка́мени добродѣ́телей,* и, совѣ́ты враго́въ разори́вши,* сподо́би мя́ твори́ти повелѣ́нія* Твоего́ Сы́на и Бо́га на́шего,* я́ко да получу́ оставле́ніе* въ де́нь Суда́.

Скве́рну отмы́й* окая́ннаго се́рдца моего́,* Богоро́дице Всепѣ́тая,* и вся́ уязвле́нія, и гное́нія,* я́же отъ грѣха́, очи́сти, Чи́стая,* и ума́ моего́ утиши́ нестоя́ніе,* я́ко да си́лу Твою́* и вели́кое защище́ніе велича́ю стра́стный* и неключи́мый ра́бъ Тво́й.

Сла́ва, и ны́нѣ, богоро́диченъ:

Сла́бость и уны́ніе,* Дѣ́во Ма́ти Всенепоро́чная,* души́ моея́ преложи́ въ здра́віе и си́лу,* стра́хомъ и любо́вію* твори́ти же и дѣ́яти оправда́нія Христо́ва;* я́ко да избѣ́гну огня́ нестерпи́маго* и жре́бій небе́сный,* и жи́знь непрехо́дную* Тобо́ю воспріиму́, веселя́ся всегда́.

Аще въ сре́ду или́ въ пято́къ, крестобогоро́диченъ. Подо́бенъ: Яко до́бля.

Распина́ема Христа́ Человѣколю́бца* ви́дящи Пречи́стая* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.

Аще ли Бо́гъ Госпо́дь... Сла́ва, гла́съ 2. Самогла́сенъ:

Еде́съ весели́тся, я́ко ра́кою святы́хъ обогати́ся, Гу́рія, Само́на и Ави́ва, и, христолюби́вую па́ству созыва́я, вопіе́тъ: пріиди́те, мучениколю́бцы, просвѣти́теся въ па́мяти свѣ́тлѣй; пріиди́те у́бо, празднолю́бцы, возвесели́теся; пріиди́те и ви́дите свѣти́ла небе́сная, на земли́ жи́тельствовавшія; пріиди́те и услы́шите, какову́ сме́рть го́рькую до́бліи адама́нти подъя́ша, безконе́чныя ра́ди жи́зни. Тѣ́мже, пору́чницы су́ще и́стины, дѣви́цу спасо́ша, жи́ву во гро́бъ вве́ржену, и тѣ́хъ небре́гшаго всескве́рнаго па́губѣ преда́ша, я́ко убíйцу и неми́лостивна. И прилѣ́жно мо́лятъ Святу́ю Тро́ицу изба́витися отъ тли́, и искуше́ній, и вся́ческихъ бѣ́дъ вѣ́рою творя́щимъ па́мять и́хъ.

И ны́нѣ, богоро́диченъ.

На стихо́внѣ окто́иха. Сла́ва, гла́съ 2. Самогла́сенъ:

Пріиди́те, мучениколю́бцы вси́, Христо́вы ору́жники пѣ́сньми почти́мъ, Гу́рія, и Ави́ва, и Само́на, я́ко пресла́вно дѣ́йствуютъ чудеса́; кля́твы бо не презрѣ́ша предста́вити отрокови́цу, но, исполня́юще проше́ніе, дѣви́цу спасо́ша, пребеззако́нному го́тѳину мще́ніе сотвори́вше. Тѣ́хъ моли́твами, Христе́ Бо́же, спаси́ ны, я́ко Бла́гъ и Человѣколю́бецъ.

И ны́нѣ, богоро́диченъ.

Тропа́рь, гла́съ 5:

Чудеса́ святы́хъ Твои́хъ му́ченикъ стѣ́ну необори́му, на́мъ дарова́вый, Христе́ Бо́же, тѣ́хъ моли́твами совѣ́ты язы́ковъ разори́, ца́рства ски́птры укрѣпи́, я́ко еди́нъ Бла́гъ и Человѣколю́бецъ.


НА УТРЕНИ,
Оба кано́на окто́иха и святы́хъ кано́нъ на 4, его́же краегране́сіе: Три́, ку́пно глаго́лющія, хвалю́ прему́дренно. Творе́ніе Ѳеофа́ново. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Тро́ицы единонача́ліе, святíи, богосло́вяще че́стно, многонача́лія нестоя́нную мглу́ удо́бно разруши́сте, восто́ка, многосвѣ́тліи, я́коже звѣ́зды возсія́вше.

Тріе́ исповѣ́дницы, благода́тію просвѣща́еми Нача́льныя Тро́ицы я́вственно, ле́сть многобо́жную, терпѣли́вно противле́ніе явля́юще, истреби́ша.

Ва́съ, у́бо сыноположи́въ, сла́вніи, любо́вію Есте́ственный Сы́нъ, ны́нѣ Ему́ наслѣ́дію, дае́му я́вѣ, я́ко Благоутро́бенъ снаслѣ́дники показа́ и Ца́рствія соприча́стники.

Богоро́диченъ: Му́дрости прему́дростныя ски́нія была́ еси́, Всенепоро́чная, Сво́й бо хра́мъ отъ Твои́хъ пречи́стыхъ крове́й, Чи́стая, созда́ти благоволи́ на спасе́ніе ду́шъ на́шихъ.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Тѣ́ло му́камъ во́лею и лю́тымъ ра́намъ Христо́вы преда́ша исповѣ́дницы и уго́дницы.

Изба́витися отъ лю́тыхъ грѣхо́вныхъ по́мыслъ, святíи, ва́шу па́мять вѣ́рою соверша́ющимъ умоли́те.

На дре́вѣ терпѣли́вно воздви́жени, честнíи свидѣ́теліе всеблагоче́стно невре́дно исповѣ́даніе соблюдо́ша.

Богоро́диченъ: Цѣле́ній Тя́ исто́чникъ въ Твою́ утро́бу Вше́дый показа́, Ма́ти Бо́жія, Пречи́стая, мою́ у́бо ду́шу исцѣли́.

Сѣда́ленъ, гла́съ 8. Подо́бенъ: Прему́дрости.

Кресто́мъ вооружи́вшеся Христо́вымъ, въ не́мъ мучи́телей всю́ крѣ́пость му́жески низложи́сте, я́ко вѣ́ры побо́рницы; безбо́жіе все́ и́дольское обличи́сте и Тро́ицу, святíи, усе́рдно проповѣ́давше. Тѣ́мъ досто́йно отъ Нея́ вѣнцы́ побѣ́ды прія́сте, я́ко зако́нно пострада́вше, страстоте́рпцы всесла́вніи, моли́те Христа́ Бо́га грѣхо́въ оставле́ніе пода́ти пра́зднующимъ любо́вію святу́ю па́мять ва́шу.

Сла́ва, и́нъ, гла́съ 8. Подо́бенъ то́йже:

Христу́ порабо́тавше му́ченически, порабо́тисте ле́сть мучи́тельскую, непорабоще́нну иму́ще ду́шу и му́дрость, и́бо Тро́ичною вѣ́рою уязви́вшеся, прехва́льніи, многобо́жія сла́ву несла́вную обличи́сте. Тѣ́мъ, я́ко звѣ́зды, свѣ́тло въ мíрѣ блиста́ніемъ сія́ете чуде́съ, блаже́нніи. Страстоте́рпцы всехва́льніи, моли́те Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять ва́шу.

И ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Тро́ицы равночи́сленніи вѣне́чницы трисія́нною свѣще́ю ны́нѣ соверша́ющія па́мять всесвяще́нную тѣ́хъ озаря́ютъ, всѣ́мъ исцѣле́нія подаю́ще.

Съ благоговѣ́ніемъ притеце́мъ къ свѣтоно́снѣй и свѣтоза́рнѣй, богому́дріи, ра́цѣ му́ченикъ, то́читъ бо врачева́нія вѣ́рою зову́щимъ: сла́ва си́лѣ Твое́й, Го́споди.

Исповѣ́дающе Боже́ственное строе́ніе и па́че ума́ та́инство, богосло́вными язы́ки все́ безбо́жіе мучи́телей боже́ственніи и всему́дріи исповѣ́дницы попра́ша.

Богоро́диченъ: Па́че ума́ родила́ еси́, о Дѣ́во, и по рождествѣ́ яви́лася еси́, дѣ́вствующи па́ки. Тѣ́мъ немо́лчными гла́сы, ра́дуйся, Тебѣ́, Влады́чице, вѣ́рою несомнѣ́нною вопіе́мъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Свѣ́тлостію я́вѣ подвиго́въ сія́юще, посрами́ша мучи́телей свирѣ́пый нра́въ вѣ́ры побо́рницы.

Во вся́ я́вственно вселе́нныя концы́ чудеса́ му́ченикъ проповѣ́дашася и вся́ вѣ́рою утверди́ша.

Якоже земля́ блага́я, благода́ти сѣ́мена пріе́мши, житіе́мъ трудолю́бно бога́тство блаже́нніи содѣ́яша.

Богоро́диченъ: Еди́нъ Благíй, пучи́ною благосты́ни вся́ческая, Богома́ти, содержа́й, Твои́ми объя́тіи держа́тися сподо́би.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Зако́нно, я́ко до́бріи во́ини, богому́дріи, удержа́вше вся́ и я́сно вѣ́ру соблю́дше, Боже́ственныя пра́вды прія́сте вѣнцы́.

Пре́жде у́бо Авваку́мъ высо́цѣ возвыша́ется Влады́чнимъ повелѣ́ніемъ, чрезъ ва́съ же отрокови́ца му́чима, богоглаго́ливіи, къ воспита́вшей возврати́ся.

Сія́етъ ра́ка му́ченикъ чудесы́ и рѣ́ки источа́етъ исцѣле́ній всѣ́мъ, приходя́щимъ вѣ́рою и тѣ́хъ терпѣ́нію дивя́щимся.

Богоро́диченъ: Тя́ еди́ну посредѣ́ те́рнія обрѣ́тъ, я́ко чистѣ́йшій кри́нъ и во удо́ліихъ цвѣ́тъ, о Богома́ти, Жени́хъ у́мный въ Тя́ всели́ся.

Конда́къ, гла́съ 2. Подо́бенъ: Вы́шнихъ ища́.

Съ высоты́, му́дріи, благода́ть пріе́мше, су́щимъ во искуше́ніихъ предстоите́, всехва́льніи. Тѣ́мже отрокови́цу, святíи, отъ сме́рти го́рькія изба́висте, вы́ бо вои́стинну есте́ Еде́су сла́ва и мíру ра́дость.

Икосъ:

Вра́жія мя́ рабо́ты изба́ви, Іису́се Жизнода́вче, Твои́хъ страда́лецъ мольба́ми умоля́емь, я́ко да непорабоще́нну стяжа́въ отъ страсте́й ду́шу мою́ и тѣ́ло, восхвалю́ тѣ́хъ скорѣ́йшую по́мощь, я́коже во гро́бѣ затворе́ная му́жа лука́вствіемъ, и сію́ ско́ро предвари́вше, отъ сме́рти изба́виша, зову́щу: Еде́су сла́ва и мíру ра́дость.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Авраа́мскія въ пещи́ дѣ́ти изба́вивый, Сы́й и стра́нную отрокови́цу лю́таго обстоя́нія спасе́ хода́тайствомъ ны́нѣ святы́хъ уго́дникъ, я́ко Благоутро́бенъ.

Суро́вѣйшаго безчеловѣ́чія му́ку да́вый, всѣ́хъ зо́лъ а́біе истя́занъ убíйца злоимени́тый судо́мъ пра́веднымъ Твои́мъ, Сло́ве Бо́жій, му́дросте и си́ла.

Укрѣпля́ема къ ва́мъ наде́ждею, сла́вніи, отрокови́ца, заключе́нная во гро́бѣ съ ме́ртвыми, ча́янія не погрѣши́, зову́щи: благослове́нъ еси́, Го́споди Бо́же оте́цъ на́шихъ.

Богоро́диченъ: Яко новосмѣше́ное и свѣтоза́рное пуща́я зерца́ло, Зарю́ Боже́ственнаго, Дѣ́во, сія́нія, приложи́вшуюся Тебѣ́, вмѣсти́ла еси́. Благослове́на Ты́ въ жена́хъ, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Всемíрный дне́сь на́мъ наста́ пра́здникъ му́ченикъ Христо́выхъ, озаря́ющъ благода́тію чуде́съ приходя́щія вѣ́рою и ра́достію духо́вною и любо́вію зову́щія: благослови́те вся́ дѣла́ Госпо́дня Го́спода.

Удо́бно исповѣ́дницы Твоего́ Божества́ все́ упраздни́ша безбо́жіе, Влады́ко, мучи́телей не убоя́вшеся преще́ній злоу́мныхъ, вѣ́рою укрѣпля́еми, взыва́юще: благослови́те вся́ дѣла́ Госпо́дня Го́спода.

Всему́дріи исповѣ́дницы, предстоя́ще боже́ственному повелѣ́нію, враго́въ полки́ побѣжда́ющи, мече́мъ закала́еми, побѣ́ду пресла́вно я́вѣ и пресія́щу показа́ша, па́дающе бо, проти́вныя побѣди́ша.

Богоро́диченъ: Естествы́ ви́димаго двѣма́, Христа́ родила́ еси́, еди́ну нося́ща я́вѣ Ѵпоста́сь сло́жну Божества́ и человѣ́чества, сте́кшуся есте́ственному и́стинно по соедине́нію: тѣ́мъ Тя́ благослови́мъ, Марíе Богоневѣ́стная.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Словесе́мъ послѣ́дующе боже́ственнымъ и богодухнове́ннымъ Христо́вымъ, исповѣ́дницы богосвѣ́тліи, кре́стъ на ра́мена, ра́дующеся, взя́сте, жизноно́снымъ стопа́мъ послѣ́дующе, достосла́вніи.

Всему́ свѣ́ту Тро́ицы съ весе́ліемъ до́бліи исповѣ́дницы вмѣ́щшеся, подвиго́въ че́сти воспринима́ютъ, безпло́тныхъ чино́въ сподо́бльшеся соводворе́нія.

Ны́нѣ не въ зерца́лѣ зрите́ блаже́нныхъ наде́жды, исповѣ́дницы Спа́совы; и́стины же па́че, всему́дріи, добро́ту зрите́, вѣнцено́сцы всечестнíи.

Яко Пребоже́ственныя Тро́ицы я́вѣ равночи́сленніи я́вльшеся исповѣ́дницы, богоглаго́ливіи, Тоя́ заря́ми просвѣща́етеся, я́ко Тоя́ ра́ди пострада́вше, Жи́зни нетлѣ́нныя ны́нѣ улучи́ша.

Богоро́диченъ: Пло́тію пріити́ восхотѣ́въ, украси́вый вся́, Сло́во въ Тя́ всели́ся, еди́ну святѣ́йшу всѣ́хъ обрѣ́тъ, и Богоро́дицу вои́стинну яви́, Ма́ти Дѣ́во.

Свѣти́ленъ. Подо́бенъ: Не́бо звѣзда́ми.

Иже отъ гро́ба отрокови́цу изба́вльше дре́вле, Гу́ріе, и Само́не, и Ави́ве, му́ченицы Христо́вы, предвари́те, я́ко отъ гро́ба прегрѣше́ній ны́ избавля́юще.

Богоро́диченъ: Крѣ́пкимъ Твои́мъ покро́вомъ отъ навѣ́тъ вра́жіихъ ны́, Чи́стая, Твоя́ рабы́, сохрани́ невреди́мы, Тя́ бо стяжа́хомъ еди́ну прибѣ́жище въ бѣда́хъ.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́,* [удиви́ Госпо́дь вся́ хотѣ́нія Своя́ въ ни́хъ]. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ ко Ефесе́омъ, зача́ло 233. Аллилу́ія, гла́съ 4: Воззва́ша пра́ведніи и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ [и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 64. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 129 – 133 об.

/ Къ оглавленію раздѣла /


Наверхъ / Къ титульной страницѣ

0