Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія в 14-й де́нь.
Иже во святы́хъ отца́ на́шего Григо́рія [Пала́мы], архіепи́скопа Солу́нскаго, чудотво́рца.

Аще хо́щетъ настоя́тель, твори́мъ бдѣ́ніе.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 4. Подо́бенъ: Яко до́бля.

Гла́са тя́ Сло́ву, дыха́ніе Духо́вное,* о́гненный язы́къ* неугаса́емый богосло́вія, Григо́ріе,* собра́ніе скве́рненое ерети́ческое* свѣ́тло попали́вша благода́тію,* мо́лимъ, сопроти́вныхъ* велѣ́ній настоя́нія* изба́витися моли́твами ти́* правосла́вно воспѣва́ющимъ тя́.

Въ трудѣ́хъ пе́рвіе и безмо́лвіи просія́вша* и писа́ніе неудо́бь вѣ́домое* и глубо́кое съ Ду́хомъ возгремѣ́вша,* Христо́съ свѣ́щника тя́ возлага́етъ свѣ́тла Це́ркви, Григо́ріе,* мíръ вся́кій освѣща́юща,* о́тче, твои́ми моли́твами, и словесы́,* и чуде́съ си́лою,* и не утвержде́нныхъ утвержда́я.

Сла́ва, и ны́нѣ, богоро́диченъ:

Иму́ще Тя́, Богоро́дице, упова́ніе и помо́щницу, вра́жія крамолы́ не убои́мся, я́ко спаса́еши ду́ши на́ша.

[Стихи́ры на стихо́внѣ и тропа́рь зри́ на вели́цѣй вече́рни.]



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 5. Подо́бенъ: Преподо́бне о́тче.

Преподо́бне о́тче, свяще́нне Григо́ріе, отъ ко́рене прозябе́ боголюби́ва и свѣ́тла вѣ́твь, я́коже дре́во, узрѣ́ся, при исхо́дищихъ боже́ственныхъ во́дъ до́брѣ насажде́но, источа́я пре́жде вре́мене плоды́ безсме́ртія, удивля́я вся́къ слу́хъ естество́мъ, и сло́вомъ, и дѣя́ніи боже́ственными, витíй въ витíяхъ и прему́дръ въ любому́дрыхъ дѣя́ніихъ. Сосу́дъ держа́внаго боговидѣ́нія, Христо́ви моля́ся, Христа́ жада́я повсегда́ и превосходя́ отъ Боже́ственныя сла́вы въ сла́ву и отъ си́лы въ си́лу, вои́стину нетлѣ́нную. [Три́жды.]

Преподо́бне о́тче, досточу́дне Григо́ріе, сла́ву оста́вль вре́менную и ни́зу влеку́щую, нетлѣ́нная возлюби́въ и го́рняя, бога́тства мимотеку́щаго му́дре отступи́, бога́тство пребы́тное нищету́ вмѣни́въ, душе́вное твое́ о́ко очи́стивъ воздержа́ніемъ, и слеза́ми, и мно́гимъ пла́чемъ, отню́дуже сосу́дъ Ду́ха свѣ́телъ яви́ся, ве́сь благода́ти Того́ испо́лнь. Того́ сія́нія и Того́ сла́вы проси́ дарова́ти Еди́ному Бо́гу покланя́ющимся, Тро́ицѣ Всеси́льнѣй. [Три́жды.]

Преподо́бне о́тче, свяще́ннѣйшій Григо́ріе, ме́чь у́бо сло́ва обостри́въ Ду́хомъ, о́гнь чи́номъ бы́лъ еси́ богобо́рныхъ, я́коже съ высоты́ мо́лнія сходя́, отсѣка́я и попаля́я тѣ́хъ языкобо́лія, вѣ́рныхъ же всѣ́хъ наставля́я къ Боже́ственнѣй зари́ Трисо́лнечнѣй, е́юже просвѣща́емь, свѣ́тъ вторы́й яви́лся еси́, сопресто́ленъ и единочи́сленъ верхо́внымъ богосло́вцемъ, съ ни́ми хвали́мь, съ ни́ми пребыва́я, и ны́нѣ моли́ дарова́ти Це́ркви еди́нство, ми́ръ и ве́лію ми́лость. [Два́жды.]

Сла́ва, гла́съ 4:

Прему́дрости сло́во твое́ украси́въ, и добродѣ́телію непоро́чною преудо́бренъ во обои́хъ бы́лъ еси́, Григо́ріе, боговѣща́ннымъ ти́ гла́голомъ украша́я и веселя́ лю́ди разу́мно, Тро́ицы еди́но Божество́ прему́дре просте́ръ, тѣ́мже и препросла́вленными уче́ніи иноплеме́нныя е́реси попра́въ, держа́ву вѣ́ры въ концѣ́хъ воздви́глъ еси́, Христо́ви предстоя́ съ невеще́ственными служи́тели, и душа́мъ на́шимъ испроси́ ми́ръ и ве́лію ми́лость.

И ны́нѣ, богоро́диченъ:

Иже Тебе́ ра́ди богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость.

Вхо́дъ. Проки́менъ дне́ и чте́нія три́ святи́тельскія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, правосла́вія свѣти́льниче, Це́ркви свѣ́тлое, о́тче, со́лнце, похвала́ и́ночествующимъ, церко́вное пра́вило, и́же благодѣя́нія учи́тель изря́дный, святи́телю Григо́ріе, и́же прему́дрости и ра́зума жили́ще, бли́жнимъ и да́льнимъ орга́нъ духо́вный, пѣ́снивецъ одушевле́нъ, уста́ Госпо́дня, изводя́ отъ недосто́инства досто́йнаго, Христа́ моли́ низпосла́ти душа́мъ на́шимъ ми́ръ и ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, высо́кій у́ме, зри́телю та́инства, Ду́ха сосу́дъ дарова́ній, свѣтоно́сный свѣ́щниче, блиста́ніе Боже́ственнаго осія́нія, любви́ держа́вное и честно́е спребыва́ніе, кро́ткій вои́стину, и про́стъ, у́бо и незло́бивъ, открове́ніе и писа́ній явле́ніе, мо́ре разумѣ́ній боже́ственныхъ, Григо́ріе, бе́здна боже́ственна Сло́ва уче́нія неизчерпа́ема, Христа́ моли́ низпосла́ти душа́мъ на́шимъ ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, богосло́вія глубино́, правосла́вія пра́вило пра́вое, Тро́ицы еди́но естество́ возвѣсти́ высо́ко, во еди́номъ хотѣ́ніи и дѣ́йствіи, про́сто Божество́, всеси́льно и не созда́но, посрами́вый же благода́тію духо́вною и отве́ргшихся обоже́нія, уста́ богосло́вецъ, святи́телю Григо́ріе, сла́во отце́мъ боже́ственнымъ и, соприча́стникъ исчи́сленъ, свети́льниче церко́вный, да́руяй на́мъ моли́твами ти́ ве́лію ми́лость.

Сла́ва, гла́съ 4:

Житіе́ боже́ственно испра́вль, видѣ́ніемъ дѣя́ніе уясни́лъ еси́, богоявле́нне Григо́ріе, прему́дрость бо возлюби́въ жела́ніемъ боже́ственнымъ, изо у́стъ Ду́ха благода́ти обогати́ся, я́ко со́тъ ме́двеный, сла́дость твои́хъ слове́съ иска́пая, при́сно весели́ши ра́зумы боже́ственными Це́рковь Христо́ву, тѣ́мже, на небесѣ́хъ со святи́тели водворя́яся, о на́съ непреста́нно моли́ся, творя́щихъ па́мять твою́.

И ны́нѣ, богоро́диненъ:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

Тропа́рь, гла́съ 8:

Правосла́вію наста́вниче, святи́телемъ украше́ніе, богосло́вцемъ побо́рниче непобѣди́мый, Григо́ріе чудотво́рче, Солу́ню вели́кая похвала́, проповѣ́дниче благода́ти, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.


НА УТРЕНИ,
На Бо́гъ Госпо́дь: Тропа́рь свято́му, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

Боже́ственнаго Христо́ва святи́теля воспѣва́емъ, столпа́ о́гненнаго, свѣ́та о́блака, ду́хомъ предходя́ща въ разу́мную зе́млю ми́ра, въ митропо́ліи же о Христѣ́ перворо́дныхъ, вели́каго Григо́рія. [Два́жды.]

Сла́ва, и ны́нѣ, богоро́диченъ:
Всели́ся въ Тя́ Божества́ все́ исполне́ніе, Чи́стая, я́коже Па́велъ предрече́, все́ обоготвори́ тлѣ́нныхъ естество́, Влады́чице, Ты́ же была́ еси́ нача́ло благода́ти таковы́я и спаси́тельное руково́дство и́же вѣ́рою и любо́вію чту́щихъ Тя́.

По 2-мъ стихосло́віи сѣда́ленъ, гла́съ 1. Подо́бенъ то́йже.

Измы́въ до́брѣ твои́хъ сле́зъ тече́ньми ду́хъ, у́мнѣ воспрія́лъ еси́ Боже́ственныя благода́ти, досточу́дне, прича́стникъ бы́лъ еси́ обоже́нія, е́же па́че естества́, Сло́ва. Еже проповѣ́далъ еси́ Несозда́но всѣ́мъ и Еди́но, богому́дре Григо́ріе. [Два́жды.]

Сла́ва, и ны́нѣ, богоро́диченъ:

Свѣ́та разу́мнаго свѣтлѣ́йшій сосу́дъ, тму́ моего́ разрѣши́ се́рдца, страсте́й же тяжча́йшее бре́мя, молю́ся, облегчи́, наставля́ющи мя́ къ покая́нію стезя́мъ и бу́дущему сподобля́ющи мя́ свѣ́ту, Всеблаже́нная Влады́чице.

По поліелео́сѣ сѣда́ленъ, гла́съ 8. Подо́бенъ: Прему́дрости.

Отсту́пль теку́щихъ, о́тче прему́дре Григо́ріе, ца́рскихъ, и друго́въ, и сро́дникъ, стяжа́лъ еси́ пребыва́ющая и стоя́щая, блаже́нне, и до́мъ ве́сь, и ро́дъ, приве́лъ еси́ Влады́цѣ всѣ́хъ, честно́е всесожже́ніе. Имже наставля́емъ, ду́шу освяти́лъ еси́ и у́мъ съ тѣ́ломъ Бо́гови, Григо́ріе, видѣ́ніемъ и дѣя́ніемъ же, моля́ся Ему́ прилѣ́жно согрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ пло́ть Твою́ одѣ́явся, я́ко Бла́гъ, зра́къ Влады́ка ра́бій обожи́, Влады́чице, совокупи́вся по соста́ву и естество́ все́ испо́лнивъ Ду́хомъ, святы́хъ собо́ры содѣ́лавъ благода́тію, отню́дуже пріи́мъ вину́ неизрече́нныхъ дѣ́лъ и пе́рвую, Ду́хомъ испо́лншуюся, пою́ще Тя́ отъ души́, зове́мъ Ти́: ра́дуйся, спасе́нія Нача́льнице; ра́дуйся, согрѣше́ніемъ разрѣше́ніе покланя́ющимся вѣ́рою Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми?] Ева́нгеліе отъ Іоа́нна, зача́ло 35 [отъ полу́].

По 50-мъ псалмѣ́ стихи́ра самогла́сна, гла́съ 6:

Благоче́стія и́стиннаго проповѣ́дника и Це́ркви пресвѣ́тлую звѣзду́ пѣ́сньми похва́льными почти́мъ, Солу́ню свѣ́тлаго свѣти́льника, Свѣ́ту ученика́ и дру́га Христо́ва, сѣ́яй сло́во благоче́стія боже́ственно въ сердца́ всѣ́хъ вѣ́рныхъ, всѣ́мъ ко спасе́нію да́руетъ и мо́лится прилѣ́жно Го́сподеви поми́ловатися душа́мъ на́шимъ.

Кано́нъ [Богоро́дицы со ирмосо́мъ на 6 и свята́го на 8], творе́ніе патріа́рха Филоѳе́я. Гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Ты́ дарова́ній исто́чнику и прему́дрости духо́внѣй, пресла́вне, уста́ и мы́сль приложи́въ, благода́ти яви́лся еси́ пучи́на, отъ нея́ же ка́плю, о́тче, и мнѣ́ пода́ждь, пою́щему тя́.

Уста́въ и пра́вило па́че естества́ и́ноческому жи́тельству ты́ бы́лъ еси́, уста́ богосло́вецъ же, и святи́тель, и учи́тель боже́ственная, отню́дуже, соше́дшеся вку́пѣ, тебѣ́ пѣ́ніе плету́тъ.

Инъ яви́лся еси́ отъ чре́ва Іеремíя вѣ́домъ, Сотво́ршему ве́сь возложе́нъ, освяще́нъ, богоно́се, ве́сь же, отню́дуже твоя́ уста́ Бо́жія сло́ва воспрія́ша.

Престо́лу предстоя́ Боже́ственному со а́нгелы, богови́дче Григо́ріе, лучу́ воспріе́мля ны́нѣ явле́ннѣ непристу́пную, моли́ся тмы́ грѣхо́вныя на́мъ разрѣши́тися, мо́лимся.

Богоро́диченъ: Свѣ́тъ, возсія́вшій, Богороди́тельнице, отъ Твоея́ утро́бы, ви́дѣти жела́я, Григо́рій, Тебе́ моли́твеницу къ Содѣ́телю представля́етъ и жела́емыя отъ Тебе́ получи́ благода́ти.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Юро́дство, прему́дре, мірску́ю му́дрость вмѣни́лъ еси́, кре́стное юро́дство возлюби́лъ еси́ и сего́, на ра́мо пріи́мъ, показа́лъ еси́, я́коже Па́велъ рече́, е́же юро́дствомъ мірскíя му́дрости превше́дъ.

Возлюби́лъ еси́, о́тче, отъ души́ нищету́, и смире́ніе, и ху́дость, и нестяжа́тельство, человѣ́къ бѣ́гая, отню́дуже гони́мь еси́ въ пусты́ню, всегда́, въ воню́ мѵ́ръ твои́хъ, Христо́ви зовя́ше: теку́ вслѣ́дъ Тебе́.

Умертви́лъ еси́, прему́дре, ве́тхаго тлѣ́ющаго человѣ́ка воздержа́ніемъ вся́кимъ и пла́чемъ, исто́чники сле́зными дово́льнѣ омыва́яся, житіе́мъ воспрія́лъ еси́ дре́внюю свою́ добро́ту о Христѣ́ и въ но́ваго одѣ́явся.

Восхва́лимъ, мно́жества и́нокъ съ мѣ́стныхъ же состоя́нія, со свяще́нники всѣ́ми и пита́тельницы, гла́сы кра́сными и словесы́ боже́ственными дне́сь о́бщаго учи́теля, и́же на́съ украси́вшаго дѣ́лы же и словесы́, Григо́рія.

Богоро́диченъ: Ви́дѣвъ, ю́же жела́ше, зарю́ духо́вную, Григо́ріе, предста́тельствомъ Богома́тере, яснѣ́йши же ны́нѣ Тою́ освѣща́емь, Тоя́ моли́, тмы́ страсте́й на́съ премѣни́ти Свѣ́томъ благода́тнымъ.

Сѣда́ленъ, гла́съ 8. Подо́бенъ: Прему́дрости.

Воздержа́ніемъ, и пла́чемъ, и моли́твою, и дѣ́йствомъ, и нището́ю, и о́бщимъ умове́ніемъ, Григо́ріе, сле́знымъ очи́стилъ еси́ свое́ се́рдце, ве́сь восхище́нъ бы́въ, и Христо́ви совокупи́ся ду́хомъ, отню́дуже, я́ко Па́велъ, неизрече́нныхъ услы́шавъ и сосу́дъ бы́въ избра́ненъ, ты́ поне́слъ еси́ Христо́во и́мя, Несозда́но проповѣ́далъ еси́ высо́цѣ и про́сто Еди́но Божество́, е́же моля́ непреста́й спасти́ся ста́ду твоему́. [Два́жды.]

Сла́ва, и ны́нѣ, богоро́диченъ:

Иже пре́жде отъ не су́щихъ приве́дъ су́щихъ естества́, Сло́ве Бо́жій, поче́тъ о́бразомъ же и руко́ю человѣ́ка, истлѣ́вша того́ пре́лестію зміи́ною, назда́въ па́ки Кресто́мъ честны́мъ Ти́, вся́кое же естество́ освяти́лъ еси́, Ще́дре, Святы́мъ Твои́мъ Ду́хомъ и тѣле́снымъ воспрія́тіемъ, Ма́тере Твоея́ мольба́ми, Влады́ко Христе́ Бо́же, согрѣше́ній оставле́ніе да́руй покланя́ющимся вѣ́рою держа́вѣ твое́й.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Но́щь безлу́нную и тму́, Григо́ріе, страсте́й моли́твенною па́лицею ра́нивъ, я́коже Моисе́й Еги́пта, восте́клъ еси́ па́че естества́ къ видѣ́нію Боже́ственному и законода́вецъ на́мъ бы́лъ еси́.

На высоту́ возше́дъ Боже́ственную, о́тче Григо́ріе, добродѣ́телей, я́коже на Ѳаво́рѣ Христо́вы дру́зи и ученицы́, Оного узрѣ́лъ еси́, есте́ственную и Боже́ственную сла́ву явля́юща, и, обожи́вся, друго́е показа́ся со́лнце.

Таи́нникъ Божества́, богови́дче Григо́ріе, и неизрече́нныхъ прича́стникъ ты́ бы́въ, богосло́вити Того́ та́йну, Еди́но Тоя́ возвѣсти́въ и Несозда́но си́лою и Естество́мъ Тре́ми Соста́вы.

Богоро́диченъ: Сло́во Ро́ждшую, Бо́жіе Неизрече́нное, словесы́ воспѣ́лъ еси́ свяще́нными и та́йну свѣ́тло Боже́ственнаго воплоще́нія возвѣсти́лъ еси́, Юже ны́нѣ моли́ Це́рковь соблюда́ти необурева́ему.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Умъ Вели́кій, Прему́дрости глубина́ неизрече́нная, обрѣ́те тво́й, богоно́се, у́мъ вселе́ніе, Себѣ́ содруже́нъ, Уму́ и Прему́дрости орга́нъ тя́ Це́ркви дарова́лъ е́сть.

Яко лучу́ свѣ́тлую, пре́жде Аѳо́нъ, Григо́ріе, возсія́, свѣ́тлому тя́ гра́ду да́руетъ, Свѣ́томъ духо́внымъ Того́ богодви́жимь, освяща́я и оте́чески преднаставля́я.

Да́ръ Боже́ственный отъ Бо́га тя́ и бога́тство неистощи́мое обрѣ́тъ, Фитта́льская держа́вная митропо́лія созыва́етъ сосѣ́ды къ прича́стію твои́хъ слове́съ и чуде́съ, блаже́нне.

Жела́ющіи по́двига и слове́съ благода́тей Григо́ріевыхъ, пѣ́снь тому́ ны́нѣ принося́ще, того́ помо́лимъ его́же моли́твами Зижди́теля и Влады́ку ми́лостива всѣ́мъ содѣ́лати.

Богоро́диченъ: Просвѣти́вый земли́ широту́, со́лнца свѣ́тлостію, Свѣ́тъ су́щимъ яви́ся во тмѣ́, Дѣ́во, Невече́рній, Его́же моли́ тмы́ лю́тыя и грѣхо́вныя на́съ изба́вити, Влады́чице.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ нетлѣ́нія, Ро́ждшую сохрани́ неврежде́нну.

Пра́вило добродѣ́тели, обоже́ное житіе́ твое́ ви́дѣно бы́сть вѣ́рными вои́стину, Григо́ріе, благоче́стія же прави́тель сло́во твое́, и велѣ́ніе, и́ми же свое́ ро́дное и пусторо́дное разсужда́ется, Еди́наго Бо́га проповѣ́дающе всеси́льна, Еди́наго и Несозда́на.

Еди́но благоче́стно проповѣ́давъ Божество́, вели́кій на́мъ яви́ся, Григо́ріе, Соста́вми Треми́ Еди́но Естество́ и си́лу, вся́чески Ту́ю Про́сту и Несозда́ну, всѣ́хъ посрами́лъ еси́ держа́внѣ, буесло́вящихъ [въ те́кстѣ: блядосло́вящихъ] созда́но Божество́.

Безу́мнаго мудрова́ніе облича́еши Акинди́на, я́ко и пре́жде Варла́ма го́рдаго, е́ллинскимъ бо пріобщи́вшимся сла́вамъ, сведо́ша Божество́ въ тва́рь, обесче́стивше, я́коже жи́дове пе́рвіе, Сы́на Бо́жія досто́инство.

Уста́вы приводя́ велѣ́ній, Григо́ріе, и словеса́ свѣ́тла, и́миже отве́рзлъ еси́ мы́сль честны́хъ богосло́вецъ Ду́хомъ, моли́твами ти́ неподви́жиму соблюди́ Христо́ву, избавля́ющи, Це́рковь отъ вся́кія е́реси.

Богоро́диченъ: Престо́лъ херуви́мскихъ и всѣ́хъ небе́сныхъ си́лъ, Влады́чице, и вся́каго вку́пѣ го́рняго чи́на вы́шши Ты́ показа́ся, я́ко престо́лъ неизрече́ненъ бы́вши Бо́жія Соста́ва, Его́же, я́ко Сы́на Своего́, ми́лостива ми́, вѣ́рно Тя́ пою́щу, содѣ́лай.

Конда́къ, гла́съ 8. Подо́бенъ: Взбра́нной.

Прему́дрости свяще́нный и боже́ственный орга́нъ, богосло́вія свѣ́тлую согла́сно трубу́, воспѣва́емъ тя́, Григо́ріе богоглаго́ливе, но, я́ко у́мнѣ, Пе́рвому Уму́ ны́нѣ предстоя́, къ Тому́ у́мъ на́шъ, о́тче, наста́ви, да зове́мъ ти́: ра́дуйся, проповѣ́дниче благода́ти.

Икосъ:

Ангелъ яви́лся еси́ на земли́, неизрече́нная Боже́ственная тлѣ́ннымъ возвѣща́я, безпло́тныхъ бо гла́сы, отъ человѣ́ческихъ сы́й и тѣ́ломъ живы́й, удиви́лъ еси́ и сотвори́лъ еси́ зва́ти ти́, богоглаго́ливе, сія́: ра́дуйся, его́же ра́ди Свѣ́тъ проповѣ́дася; ра́дуйся, его́же ра́ди тма́ отгна́ся; ра́дуйся, Несозда́ннаго Божества́ возвѣсти́телю; ра́дуйся, созда́ннаго естества́ и бу́яго вои́стину обличи́телю; ра́дуйся, высоту́ невосходи́мую, Бо́жіе естество́ рекíй; ра́дуйся, глубину́ неудо́бь зри́тельную, дѣ́йство рекíй; ра́дуйся, я́ко сла́ву Бо́жію до́брѣ ре́клъ еси́; ра́дуйся, я́ко мудрова́нія зло́бныхъ отре́къ; ра́дуйся, свѣти́ло, показа́вый Со́лнце; ра́дуйся, сосу́де, боже́ственнаго питія́ пода́тельный; ра́дуйся, и́мже и́стина сія́етъ; ра́дуйся, и́мже помрачи́ся тма́; ра́дуйся, проповѣ́дниче благода́ти.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Якоже гро́ма гла́съ твои́хъ велѣ́ній и слове́съ боже́ственныхъ молніеужа́сныхъ зрѣ́ти я́вственѣ, о́тче, не возмога́ютъ пре́лестію плѣне́нніи и осяза́ютъ, я́коже пи́шетъ, я́ко слѣпы́й, ны́нѣ стѣ́ны смѣ́шнѣ безу́мніи.

Но́щь не свѣтла́ непокори́вымъ бы́сть, и ны́нѣ Свѣ́тъ Есте́ственный — Ца́рство Сла́вы Бо́жія, и́же яви́ таи́нникомъ Человѣколю́бецъ на Ѳаво́рстѣй, Григо́ріе, е́юже, причасти́вся дово́льнѣ, пріобща́ешися угоди́вшимъ.

Иже нечести́вѣ въ благода́ть, пресла́вне, поху́лившимъ Бо́жіе безмо́лвіе и моли́тву, обоже́нію же неизрече́нному скве́рнѣ насмѣя́вшихся, тѣ́хъ посрами́въ, отгна́лъ еси́ Боже́ственнаго двора́, его́же соблюда́еши всегда́ твои́ми мольба́ми.

Богоро́диченъ: Пріиди́ ны́нѣ въ на́шу по́мощь, спасе́ніе о́бщее, Григо́ріевы моли́твы пріе́млющи, Влады́чице, стра́сти у́бо усыпа́ющи душе́вныя и тѣле́сныя и о́бщій мяте́жъ и тлѣ́ніе вско́рѣ разрѣша́ющи.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Яви́лся еси́, о́тче, ве́сь свѣ́телъ, сла́достенъ, пра́въ, кро́токъ, вѣ́рою приходя́щимъ ти́ источа́я сла́дкое слове́съ, Григо́ріе, боже́ственное пи́во, всѣ́хъ веселя́ благочести́выхъ сердца́, хапля́ неду́гующихъ душе́вными чу́вствы.

Умъ и язы́къ, вои́стину благоро́денъ, наказа́ніе же и словеса́ се́рдце очище́но обрѣ́тъ, Бо́жія въ тя́ всели́ся Прему́дрость, е́йже дру́гъ дру́гу сосвяза́вшися, о́тче, чу́до всѣ́мъ стра́нно показа́ тя мíрови.

Въ пещи́ дѣ́ти неврежде́ны евре́йскія показа́ держа́ва благоче́стія, и́мже подо́бяся, прему́дре, пла́мень удержа́лъ еси́ злоче́стія посреди́ пе́щи искуше́ній, и до́блественѣ поя́ Влады́ку, и опаля́я гоня́щія.

Умнаго погрузи́лъ еси́ фарао́на тече́ньми твои́хъ сле́зъ и все́ еги́петское потопи́лъ еси́ во́инство, возше́лъ еси́ на го́ру безстра́стія, побива́я отту́ду Ду́ха си́лою полки́ бори́тель, я́коже Моисе́й вели́кій.

Богоро́диченъ: Свѣ́тлый благода́ти, Чи́стая, проповѣ́дникъ и богосло́вецъ Ду́ха, Богоро́дице, да́ннаго Тобо́ю мíрови, ны́нѣ словесы́ торжеству́я пѣ́ніе, пѣ́сни же и ли́ки вся́ Ти́ собира́етъ, я́ко вѣ́рный ра́бъ, па́мять Твою́ сла́вя.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Престо́лу предстоя́, Григо́ріе, Трисо́лнечнаго и Безнача́льнаго Божества́ и дѣ́йствомъ дово́льнѣ насы́тився благода́тію, ю́же воспѣ́лъ еси́, содѣ́йственикъ и друго́въ, ны́нѣ воспомяну́вшихъ тя́, помина́й.

Обрѣ́лъ еси́ возда́ніе болѣ́зней твои́хъ, Ца́рство, о́тче, Бо́жіе безнача́льное, е́же благоче́стнѣ на земли́ воспроповѣ́далъ еси́, вѣнцы́ триплете́ны воспрія́лъ еси́ исповѣ́данія боже́ственнаго, свяще́нства же и безмо́лвія.

Яви́лся еси́ и́ночествующимъ похвала́, богосло́вецъ боже́ственъ, свяще́нства же пра́вило извѣ́стное, сего́ ра́ди здѣ́ да́стся ти́ чуде́съ Боже́ственная благода́ть, словеса́ твоя́ утвержда́я.

Зако́нъ похва́льныхъ, пресла́вне, и слове́сныхъ по́двигъ вои́стину исше́дъ, и на земли́ живы́й, и исше́дъ отъ тѣ́ла, но пріими́ ма́лое пѣ́ніе изря́днѣйши и проше́нія подава́й, тебе́ жела́ющихъ моли́твами твои́ми.

Богоро́диченъ: Уста́ стра́шнаго Рождества́ Твоего́ и богослове́сный язы́къ, Влады́чице, бы́сть, е́же па́че естества́ отъ Тебе́ я́вльшагося обоже́нія честны́й Тво́й ра́бъ Григо́рій, его́же ны́нѣ мольбы́ пріе́млющи, спаси́ всѣ́хъ.

Свѣти́ленъ. Подо́бенъ: Со ученики́.

Ра́дуйся, отце́мъ похвала́, богосло́вецъ уста́, безмо́лвія жили́ще, до́мъ прему́дрости, учи́телей держа́ва, бе́здна сло́ва; ра́дуйся, дѣя́нія орга́нъ, видѣ́нія ве́рхъ, цѣли́телю страсте́й и болѣ́зней человѣ́ческимъ; ра́дуйся, Ду́ха Свята́го селе́ніе, и у́меръ, и жи́въ, о́тче. [Два́жды.]

Сла́ва, и ны́нѣ, богоро́диченъ:

Ра́дуйся, ра́дости хода́таице; ра́дуйся, кля́твѣ разрѣше́ніе; ра́дуйся, Ада́мово воскресе́ніе; ра́дуйся, паде́ніе бѣсово́мъ; ра́дуйся, же́нскаго студа́ потребле́ніе; ра́дуйся, а́дово испражне́ніе, тля́ сме́рти, освяще́ніе человѣ́ческаго естества́; ра́дуйся, Дѣ́во, ра́дуйся, всѣ́хъ Влады́чице; ра́дуйся, Бо́жія Ма́ти.

На хвали́техъ стихи́ры [на 4], гла́съ 8. Подо́бенъ: О, пресла́внаго чудесе́!

Отче, свяще́нне Григо́ріе,* ты́, Бо́га издѣ́тска возлюби́въ,* возненави́дѣлъ еси́ ве́щное пристра́стіе* и мíра не постоя́тельное* и, кре́стъ до́блественѣ воспріи́мъ,* своему́ Влады́цѣ послѣ́довалъ еси́,* пла́чемъ и слеза́ми* ду́шу очи́стивъ си́ и у́мъ,* ве́сь бы́лъ еси́ богови́днѣйшій. [Два́жды.]

Отче, свяще́нне Григо́ріе,* ты́ се́рдце до́брѣ видѣ́ніемъ же* и дѣя́ніемъ очи́стивъ си́,* Ду́хови бы́лъ еси́ селе́ніе* и, осія́ніе Того́ пріе́мля,* свѣ́тъ яви́лся еси́ вои́стину* приближа́ющимтися,* се́ сы́нъ Свѣ́та бы́лъ еси́ по благода́ти, сла́вне,* е́же Са́мъ Естество́ бы́въ Бо́жіе, не раздѣля́яся.

Отче, богому́дре Григо́ріе,* ты́ злѣ́йшее сѣ́мя и ко́рень раскопа́лъ еси́,* Варлаа́ма скве́рнаго отсѣ́клъ еси́ мече́мъ духо́внымъ,* преда́теля же а́біе вѣ́рѣ и стаи́нника сему́, суему́дренаго Акинди́на,* боже́ственнаго исполне́нія ерети́чествующихъ отгна́въ,* сочета́лъ еси́ ху́льникомъ евре́омъ,* поревнова́вши си́хъ безу́мію.

Сла́ва, свято́му, гла́съ 8:

Отче, богому́дре Григо́ріе, ду́шу очи́стилъ еси́, умо́мъ свои́мъ избѣжа́въ отъ нечи́стаго діа́вола, вои́стину сла́венъ свои́мъ вели́чествомъ, ду́хъ сво́й пре́далъ еси́ Христу́, Бо́гу на́шему.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое, [ектеніи́,] и ча́съ 1-й, и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, [гла́съ 1]: Уста́ моя́ возглаго́лютъ прему́дрость,* [и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй.] Апо́столъ къ Евре́омъ, зача́ло 318. [Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе отъ Іоа́нна, зача́ло 36. Прича́стенъ: [Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Кни́ги, съ Бо́гомъ святы́мъ, Мине́и, три́ мѣ́сяцы: Септе́мврій, Окто́врій и Ное́мврій. — М.: Въ Ца́рской тѵпогра́фіи, 1666. — Л. 366 – 369 об.

/ Къ оглавленію раздѣла /


Наверхъ / Къ титульной страницѣ

0