Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 13-й де́нь.
Иже во святы́хъ отца́ на́шего Іоа́нна, архіепи́скопа Константи́на гра́да, Златоу́стаго.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Крести́теля подража́лъ еси́ тезоиме́ннаго до́брѣ* воздержа́ніемъ, о́тче,* и Илію́ вели́каго посто́мъ и чистото́ю:* ре́вностію уя́звленъ обои́хъ, Златоу́сте,* на ца́рское вели́чество смѣ́льствуеши,* я́ко па́стырь Це́ркве Христо́вы. [Два́жды.]

Боже́ственнымъ вдохнове́ніемъ Сло́ва* проте́къ, по пи́санному, всю́ зе́млю,* вѣща́ніе догма́товъ твои́хъ, о́тче, просвѣти́ мíръ:* отве́рзлъ еси́ на́мъ покая́нія вхо́дъ,* ни́щихъ попече́ніемъ* возобража́я Христо́во Ева́нгеліе.

Чи́стый души́ твоея́ и нескве́рный свѣ́тъ* со́лнечныя лучи́ осіява́етъ мíру догма́товъ благоче́стія,* о́тче му́дре Іоа́нне Златоу́сте,* и мглу́ отго́нитъ,* и просвѣща́етъ вселе́нную ко благоче́стію.

Сла́ва, гла́съ 4:

Бы́лъ еси́, Златоу́сте, богодохнове́нный орга́нъ, чрезъ его́же на́мъ Ду́хъ Святы́й провозгласи́: благознамени́тымъ бо гла́сомъ протече́ концы́ вѣща́ніе уче́ній твои́хъ, и, подража́тель бы́въ апо́столовъ, преподо́бне, ли́къ пости́же о́ный, его́же вожделѣ́лъ еси́. Моли́ся Го́споду, всеблаже́нне, умири́ти мíръ и спасти́ ду́ши на́ша.

И ны́нѣ, богоро́диченъ:

Изба́ви ны́ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ зове́мъ Ти́: ра́дуйся, еди́на предста́тельство ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Труба́ златови́дная,* свѣ́тло вопію́щи* Бо́жія вели́чія,* показа́лся еси́, Іоа́нне,* мíра въ концѣ́хъ.

Сти́хъ: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ.

Зако́нъ, я́коже Моисе́й,* прія́лъ еси́ отъ Го́спода, Златоу́сте,* мíръ умудря́я и просвѣща́я* боже́ственными твои́ми уче́ніи.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Проповѣ́дникъ я́ко и́стинно* боже́ственнаго Ца́рствія* бы́лъ еси́, Златосло́ве,* вопія́: пока́йтеся,* погружа́я отча́яніе.

Сла́ва, гла́съ и подо́бенъ то́йже:

Тро́ицы Честны́я* во единонача́ліе* научи́лъ еси́ вѣ́ровати,* Отца́, Сло́ва, Ду́ха,* Златоу́сте, о́тче на́шъ.

И ны́нѣ, богоро́диченъ:

Дѣ́во,* изъ Тебе́ ро́ждшагося* Бо́га Сло́ва моли́, Богоро́дице,* съ Златосло́внымъ Іоа́нномъ,* е́же спасти́ ду́ши на́ша.

Та́же, Ны́нѣ отпуща́еши... Трисвято́е... по Отче на́шъ...

Тропа́рь святи́теля, гласъ 8:

Устъ твои́хъ, я́коже свѣ́тлость огня́ возсія́вши, благода́ть вселе́нную просвѣти́: не сребролю́бія мíрови сокро́вища сниска́, высоту́ на́мъ смиренному́дрія показа́, но, твои́ми словесы́ наказу́я, о́тче Іоа́нне Златоу́сте, моли́ Сло́ва Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ:

Иже на́съ ра́ди [рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА ВЕЛИЦѢЙ ВЕЧЕРНИ,
Стихологису́емъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Златокова́нную трубу́,* богодохнове́нный орга́нъ,* догма́товъ пучи́ну неисчерпа́емую,* Це́ркве утвержде́ніе,* у́мъ небе́сный,* прему́дрости глубину́,* ча́шу всезлату́ю,* излива́ющую рѣ́ки уче́ній медото́чныхъ* и напая́ющую тва́рь,* пѣ́сненно воспои́мъ. [Три́жды.]

Звѣзду́ незаходи́мую,* заря́ми просвѣща́ющую уче́ній всю́ подсо́лнечную,* покая́нія проповѣ́дника,* гу́бу всезлату́ю,* мокроту́ лю́тую невѣ́дѣнія взе́млющую* и ороша́ющую иста́явшая сердца́ грѣхми́,* Іоа́нна досто́йно* Златослове́снаго почти́мъ. [Три́жды.]

Земны́й а́нгелъ и небе́сный человѣ́къ,* ла́стовица благоглаго́ливая и многогла́сная,* добродѣ́телей сокро́вище,* ка́мень наразсѣ́дный,* вѣ́рныхъ воображе́ніе,* му́ченикомъ подо́бенъ,* равностоя́тель святы́хъ а́нгелъ,* апо́столовъ единонра́венъ,* въ пѣ́снехъ да возвели́чится Златоу́стъ.

Сла́ва, гла́съ 6:

Преподо́бне, треблаже́нне, святѣ́йшій о́тче, па́стырю до́брый и началопа́стыря Христа́ учениче́, положи́вый ду́шу за о́вцы: са́мъ и ны́нѣ, всеблагохва́льне Іоа́нне Златоу́сте, проси́ моли́твами твои́ми дарова́ти на́мъ ве́лію ми́лость.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ, проки́менъ дне́ и чте́нія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ра хра́ма и свята́го самогла́сны, гла́съ 1. Анато́ліево:

Свѣти́льниче Іоа́нне, уста́ златосія́нная, удобре́ніе богодѣ́янныхъ добродѣ́телей, обита́лище писа́ній тайнонача́льныхъ: ты́ пречи́стое, Всесвята́го Ду́ха нетлѣ́нное сокро́вище бы́лъ еси́, отню́дуже возвесели́лъ еси́ всю́ Це́рковь спаси́тельнымъ твои́мъ сло́вомъ су́щимъ, дерзнове́ніе у́бо обрѣ́тъ къ Бо́гу, въ наслажде́ніи го́рняго наслѣ́дія моли́ся о на́съ, о́тче святѣ́йшій.

Излія́ся благода́ть во устна́хъ твои́хъ, преподо́бне о́тче Іоа́нне Златоу́сте, сего́ ра́ди пома́за тя́ Бо́гъ архіере́я лю́демъ Свои́мъ, па́ствити па́ству Его́ въ преподо́біи и пра́вдѣ. Тѣ́мже, препоя́санъ ору́жіемъ Си́льнаго, пресѣ́клъ еси́ языковре́дія ересе́й, и ны́нѣ не преста́й моля́ся умири́ти мíръ и спасти́ ду́ши на́ша.

Гла́съ 2. Студи́тово:

Тя́, вели́каго архіере́я и па́стыря, незло́бива и преподо́бна, покая́нія проповѣ́дника, златослове́сная уста́ благода́ти, восхваля́юще любо́вію, мо́лимся: препода́ждь на́мъ моли́твы твоя́, о́тче, во спасе́ніе ду́шъ на́шихъ.

Гео́ргія Никомидíйскаго:

Златы́ми словесы́ твои́ми, Це́рковь, я́ко у́тварію злато́ю, украси́вшися, Іоа́нне Златоу́сте, невѣ́стнически ра́дующися, вопіе́тъ тебѣ́: насы́тихся отъ твои́хъ златото́чныхъ во́дъ, украси́вшися златотка́нными и медозлаты́ми питіи́; отъ дѣя́нія бо въ видѣ́ніе возвожду́ся кро́ткихъ ра́ди твои́хъ поуче́ній и со Христо́мъ, у́мнымъ Женихо́мъ, соединя́юся, ца́рствующи съ Ни́мъ. Тѣ́мъ и мы́, совоку́пльшеся въ па́мять твою́, зове́мъ: не преста́й моля́ся за ны́ ко Го́споду, е́же спасти́ ду́ши на́ша.

Прія́лъ еси́, іера́рше, го́рнѣйшую филосо́фію и внѣ́ мíра бы́лъ еси́, живя́ вы́шше ви́димыхъ, и зерца́ло нескве́рное Бо́жіе боже́ственно показа́лся еси́, и сы́й, при́сно соедине́нъ Свѣ́томъ, свѣ́тъ пріима́лъ еси́, и яснѣ́йшій блаже́нный получи́лъ еси́ коне́цъ. Моли́ся, Златоу́сте, о душа́хъ на́шихъ.

Гла́съ 4:

Глаго́лы златоза́рнѣйшими зе́млю я́вѣ напои́лъ еси́, златоточи́ву имѣ́я ду́шу же и тѣ́ло, всеблаже́нне, вся́ позлати́въ словесы́ твои́ми, златодѣ́лателю догма́товъ твои́хъ, и, кни́ги написа́въ златопи́санныя, возлетѣ́лъ еси́ на небеса́. Тѣ́мъ вопіе́мъ ти́: златоточи́ве и Златоу́сте, Христа́ Бо́га моли́ спасти́ ду́ши на́ша.

Сла́ва, гла́съ то́йже. Ге́рманово:

Подоба́ше ца́рствующему градо́въ Іоа́нна имѣ́ти архіере́я, я́коже нѣ́кую у́тварь ца́рскую и златокова́нную трубу́, вся́ оглаша́ющу концы́ спаси́тельными догма́ты и вся́ совоздви́жущую къ ре́вности пѣ́ній боголѣ́пныхъ. Къ нему́же возопіи́мъ: златосло́ве и Златоу́сте, Христа́ Бо́га моли́ спасти́ ду́ши на́ша.

И ны́нѣ, богоро́диченъ:

Тя́ стѣ́ну стяжа́хомъ, Богоро́дице Пречи́стая, и благоути́шное приста́нище, и утвержде́ніе, тѣ́мже мо́лимъ, и́же въ житіи́ обурева́еміи, упра́ви и спаси́ ны́.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, златоза́рный и кра́сный Це́ркве богодохнове́нный орга́не; язы́че, человѣколю́бно покая́нія на́мъ разли́чныя о́бразы подпису́ющій; у́ме златозра́чный; ла́стовице златоу́стая; голуби́це же, псало́мски междора́міями златосія́ющая добродѣ́телей на зла́цѣ; струя́ златови́днѣйшая, пролива́ющая во́ды; уста́ боже́ственная и Боже́ственнаго человѣколю́бія поручи́тельная, Христа́ моли́ низпосла́ти душа́мъ на́шимъ ве́лію ми́лость.

Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

Ра́дуйся, сиро́тъ оте́цъ, оби́димыхъ бы́страя по́мощь, убо́гимъ подая́ніе, а́лчущимъ пи́ща, грѣша́щихъ исправле́ніе, ду́шъ благоуго́днѣйшій врачу́ и честнѣ́йшій, богосло́вія высо́кое извѣ́ство, сказа́ніе писа́ній духо́вныхъ, зако́нъ дѣ́йственнѣйшій, пра́вило пра́вѣйшее, видѣ́нія и дѣя́нія прему́дросте кра́йнѣйшая, Христа́ низпосла́ти душа́мъ на́шимъ моли́ ве́лію ми́лость.

Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ.

Ра́дуйся, Це́рковь вопіе́тъ ти́, жениху́ своему́, о Златоу́сте! Просія́вый во все́мъ мíрѣ па́че лу́чь со́лнечныхъ добродѣ́тельми и словесы́ би́серными, па́че му́дрыхъ прему́дрѣйшій и ри́торовъ превысоча́йшій, и́стинныхъ догма́тъ побо́рниче, лжи́ обличи́телю, покая́нія учи́телю. Ра́дуйся, тиша́йшая зна́нія пучи́но, и́же, по Па́влу вели́кому, уста́ и у́мъ наслѣ́довавъ Христо́въ. Его́же моли́ душа́мъ на́шимъ да́ти ве́лію ми́лость.

Сла́ва, гла́съ 6:

Труба́ златогла́сная показа́лся еси́, златоглаго́ливе Златоу́сте, златодѣ́йствуя сердца́ вѣ́рныхъ златотру́дными твои́ми уче́ніи, проро́чески бо изы́де вѣща́ніе исправле́ній твои́хъ, преподо́бне о́тче, и мíра всего́ концы́ просвѣти́лъ еси́.

И ны́нѣ, [богоро́диченъ]:

Творе́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни]. И Богоро́дице Дѣ́во, ра́дуйся.., еди́ножды.
А идѣ́же всено́щное бдѣ́ніе не быва́етъ, по тропарѣ́: Сла́ва, и ны́нѣ, богоро́диченъ и отпу́стъ.



НА УТРЕНИ,
На Бо́гъ Госпо́дь: Тропа́рь два́жды. Сла́ва, и ны́нѣ, богоро́диченъ воскре́сный.

По 1-омъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Златообра́зная звѣзда́, земны́мъ возсія́лъ еси́, Златоу́сте, свѣ́тло, Іоа́нне всеблаже́нне, просвѣща́я концы́ заря́ми слове́съ твои́хъ. Тѣ́мъ дне́сь всесвяту́ю твою́ па́мять пра́зднующе, грѣхо́въ всѣ́хъ про́симъ оставле́нія. [Два́жды.]

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ Предста́тельнице и Покро́ве, бѣ́дъ и скорбе́й и лю́тыхъ обстоя́ній вся́ изба́ви, на Тя́ упова́ніе, Отрокови́це, иму́щія и ду́ши на́ша спаси́ боже́ственными моли́твами Твои́ми.

По 2-омъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Цвѣтника́ слове́съ богодохнове́нныхъ писа́ній, наставля́ющаго на́съ къ покая́нію, мно́гая искуше́нія претерпѣ́вша, Златоу́стаго, вѣ́рніи, я́ко научи́вшеся отъ него́, почти́мъ по до́лгу: мо́лится бо Го́споду спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе, сла́ва Твоя́, Богоро́дице, всѣ́мъ простре́ся ко спасе́нію ду́шъ на́шихъ.

По поліеле́и сѣда́ленъ, гла́съ 8. Подо́бенъ: Прему́дрости.

Сокро́вище яви́лся еси́ духо́вное боже́ственными твои́ми словесы́, я́ко вои́стинну мíра, Златоу́сте, просія́въ конце́мъ, бога́тство спаси́тельное всѣ́мъ по́далъ еси́, наставля́я, блаже́нне, лю́ди къ покая́нію. Тѣ́мъ и тече́ніе соверши́въ житія́, престо́лу предстои́ши Вы́шняго, приснопа́мятне Іоа́нне Златоу́сте, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, [внуши́те, вси́ живу́щіи по вселе́ннѣй]. Вся́кое дыха́ніе... Ева́нгеліе отъ Іоа́нна, зача́ло 35, отъ полу́.

По 50-мъ псалмѣ́ стихи́ра свята́го, гла́съ 6:

Излія́ся благода́ть во устна́хъ твои́хъ, преподо́бне о́тче, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную во еди́номъ Божествѣ́.

Кано́нъ Пресвяты́я Богоро́дицы со ирмосо́мъ на 6. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Мно́гими содержи́мь напа́стьми, къ Тебѣ́ прибѣга́ю спасе́нія искíй, о Ма́ти Сло́ва и Дѣ́во! отъ тя́жкихъ и лю́тыхъ мя спаси́.

Страсте́й мя смуща́ютъ прило́зи, мно́гаго уны́нія испо́лнити мою ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Спа́са ро́ждшую Тя и Бо́га, молю́, Дѣ́во, изба́витися ми́ лю́тыхъ: къ Тебѣ́ бо ны́нѣ прибѣга́я, простира́ю и ду́шу и помышле́ніе.

Неду́гующа тѣ́ломъ и душе́ю, посѣще́нія Боже́ственнаго, и промышле́нія отъ Тебе́ сподо́би, еди́на Богома́ти, я́ко Блага́я, Блага́го же Роди́тельнице.

Кано́нъ свята́го на 8, его́же краегране́сіе: Ду́ха пою́ тя́, злато́е усто́. Ѳеофа́ново, Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Покая́нія бы́въ теплѣ́йшій проповѣ́дникъ, Златоу́сте, пока́ятися мнѣ́, о́тче, Бо́гу моли́ся отъ всего́ се́рдца моего́ и дре́внихъ прегрѣше́ній исцѣли́ти я́звы твои́мъ страда́тельствомъ умоли́.

Всю́ зарю́ Свята́го Ду́ха, о́тче, пріи́мъ, всесвѣ́телъ яви́лся еси́ сто́лпъ, предводи́теленъ Це́ркве, преподо́бне, свѣ́телъ же о́блакъ, всеблаже́нне, осѣня́ющь правосла́вныхъ собо́ры.

Отъ Христа́ рукоположе́нъ учи́тель, Боже́ственная уче́нія златови́днымъ язы́комъ, мы́слію же богому́дрою бога́тно ты́ источи́лъ еси́: Бо́жія бо рѣка́, во́дъ испо́лненъ Ду́ха, яви́лся еси́, богоявле́нне Златоу́сте.

Богоро́диченъ: Преукра́шена разли́чіемъ благода́ти, Богора́дованная, Отчее Сло́во, пло́ть бы́вшее за благоутро́біе мно́гое па́че ума́ и словесе́, Благослове́нная, родила́ еси́, пребы́вши Дѣ́ва нескве́рная.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Предста́телство и покро́въ жи́зни моея́ полага́ю Тя, Богороди́тельнице Дѣ́во, Ты мя окорми́ ко приста́нищу Твоему́, благи́хъ вино́вна, вѣ́рныхъ утвержде́ніе, еди́на Всепѣ́тая.

Молю́, Дѣ́во, душе́вное смуще́ніе, и печа́ли моея́ бу́рю разори́ти: Ты́ бо, Богоневѣ́стная, нача́льника тишины́ Христа́ родила́ еси́, еди́на Пречи́стая.

Благодѣ́теля ро́ждши, до́брыхъ вино́внаго, благодѣя́нія бога́тство всѣ́мъ источи́: вся́ бо мо́жеши, я́ко си́льнаго въ крѣ́пости Христа́ ро́ждши, Богоблаже́нная.

Лю́тыми неду́ги и болѣ́зненными страстьми́ истяза́ему, Дѣ́во, Ты́ ми помози́: исцѣле́ній бо неоску́дное Тя зна́ю сокро́вище, Пренепоро́чная, неиждива́емое.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Умо́мъ ты́ Христо́вымъ обога́щся, твои́мъ чи́стымъ житіе́мъ человѣ́комъ спасе́нія бы́лъ еси́ споспѣ́шникъ и повѣствова́тель, дѣ́йствитель, Златоу́сте, учи́тельства точа́ спаси́тельная, богодохнове́нне.

Отъ невеще́ственныхъ сокро́вищъ Ду́ха ты́ обогати́вся, отъ исто́чниковъ спасе́нія поче́рплъ еси́ приснотеку́щій исто́чникъ уче́ній и напои́лъ еси́ все́ Це́ркве, преподо́бне о́тче, лице́.

Оляденѣ́вшія душе́вныя, Златоу́сте, ни́вы, прему́дрымъ земледѣ́ланіемъ слове́съ изчи́стилъ еси́, му́дре, и плодоно́сны показа́лъ еси́, небе́сными ту́чами сія́ напая́я, богопрія́тне.

Богоро́диченъ: Поро́ка въ Тебѣ́ и скве́рны нѣ́сть отню́дъ, Дѣ́во, оби́тель же па́че яви́лася еси́ небе́сныхъ бла́гостей, въ Тебѣ́ бо всели́ся добродѣ́телей вся́ святы́ня, Всенепоро́чная.

Сѣда́ленъ, гла́съ 8. Подо́бенъ: Прему́дрости.

Неизрече́нныя му́дрости богови́дно поче́рплъ еси́ бога́тство ра́зума, всѣ́мъ сокро́вищствовалъ еси́ правосла́вія во́ды, вѣ́рныхъ у́бо сердца́ боже́ственнѣ веселя́щія, невѣ́рныхъ же мнѣ́нія досто́йно погружа́ющія: тѣ́мъ отобою́ду благоче́стія по́тами показа́лся еси́ непобѣ́дный Тро́ицы побо́рникъ, Іоа́нне Златоу́сте. Моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́.

Сла́ва, подо́бенъ то́йже:

Су́щую свы́ше му́дрость позна́въ и благода́ть слове́съ отъ Бо́га всѣ́мъ просія́лъ еси́, я́ко зла́то въ горни́лѣ, и Святу́ю Тро́ицу, Еди́ницу, проповѣ́далъ еси́, сребролю́бную ле́сть устрѣли́въ словесы́ твои́ми. Тѣ́мже и ре́вностію цари́цу обличи́въ, Аріево посрами́лъ еси́ иноплеме́нное киче́ніе, Іоа́нне Златоу́сте, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́.

И ны́нѣ, богоро́диченъ:

Пла́мень гее́нскій и сгорѣ́ніе, пла́чь, и́же въ не́мъ и рыда́ніе, зѣло́ окая́ннѣйшее разлуче́ніе и горча́йшее, святы́хъ наслѣ́дія и собра́нія ра́достнаго, помышля́ющи, содрогни́ся, душе́ моя́, и возстени́, и писа́нія тми́нныхъ долго́въ твои́хъ истреби́ти потщи́ся умиле́нія слеза́ми, Споспѣ́шницу непосты́дную иму́щи, Чи́стую Богома́терь: Тоя́ бо ра́ди прегрѣше́ній дае́тся оставле́ніе, Сію́ Богоро́дицу правосла́вно сла́вящимъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Страсте́й мои́хъ смуще́ніе, ко́рмчію ро́ждшая Го́спода, и бу́рю утиши́ мои́хъ прегрѣше́ній, Богоневѣ́стная.

Милосе́рдія Твоего́ бе́здну призыва́ющу пода́ждь ми, Яже благосе́рдаго ро́ждшая, и Спа́са всѣхъ пою́щихъ Тя.

Наслажда́ющеся, Пречи́стая, Твои́хъ дарова́ній, благода́рственное воспѣва́емъ пѣ́ніе, вѣ́дуще Тя Богома́терь.

На одрѣ́ болѣ́зни моея́, и не́мощи низлежа́щу ми́, я́ко благолюби́ва, помози́, Богоро́дице, еди́на Приснодѣ́во.

Наде́жду и утвержде́ніе, и спасе́нія стѣ́ну недви́жиму, иму́ще Тя, Всепѣ́тая, неудо́бства вся́каго избавля́емся.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ина́го на́мъ апо́столовъ единонра́внаго, и́же промышле́ніемъ всѣ́хъ промышля́я, я́ко Бла́гъ, даде́ Христо́съ тя́, небе́снаго тайново́дства проповѣ́дника и боже́ственнаго сказа́теля та́инъ го́рнихъ, Іоа́нне всеблаже́нне, Златоу́сте.

Златоза́рнаго и златослове́снаго, почти́мъ Златоу́стаго Іоа́нна, вся́ позлати́вшаго златови́дными сія́ніи уче́нія и мíръ язы́комъ просвѣти́вша, зла́та свѣтлѣ́йшимъ и свѣ́та по́лнѣйшимъ, источа́ющимъ благода́ть Боже́ственную.

Ве́сь бы́лъ еси́ Бо́жіе жили́ще, ве́сь яви́лся еси́ орга́нъ Ду́ха, возглаша́ющь вся́кія добродѣ́тели богодохнове́нную пѣ́снь, и спасе́нія вину́, и добро́ту явля́я небе́снаго Ца́рствія, Іоа́нне всеблаже́нне Златоу́сте.

Ты́ Бо́жіе благоутро́біе проповѣ́далъ еси́, покая́нія о́бразы излага́я, и злы́хъ отбѣжа́нія изя́щнѣйше поуча́я, преблаже́нне и всесоверше́ннѣйше, и о дѣ́лѣхъ изря́дныхъ поуче́нія источа́я, всече́стне о́тче Златоу́сте.

Богоро́диченъ: По Бо́зѣ предста́тельницу Тя́ стяжа́хомъ, Ты́ бо Бо́жія Ма́ти была́ еси́ Творца́ и Содѣ́теля, и на́шъ зра́къ пріе́мшаго, Всенепоро́чная, и се́й спа́сшаго отъ тли́ и сме́рти и сла́вою боже́ственною просла́вившаго.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Испо́лни, Чи́стая, весе́лія се́рдце мое́, Твою́ нетлѣ́нную даю́щи ра́дость, весе́лія ро́ждшая вино́внаго.

Изба́ви на́съ отъ бѣ́дъ, Богоро́дице Чи́стая, вѣ́чное ро́ждши избавле́ніе, и миръ всякъ умъ преиму́щій.

Разрѣши́ мглу прегрѣше́ній моихъ, Богоневѣ́сто, просвѣще́ніемъ Твоея́ свѣ́тлости, Свѣтъ ро́ждшая Боже́ственный и превѣ́чный.

Исцѣли́, Чи́стая, души́ моея́ неможе́ніе, посѣще́нія Твоего́ сподо́бльшая, и здра́віе моли́твами Твои́ми пода́ждь ми.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Церко́внаго свѣти́льника вси́ тя́ вѣ́мы свѣтови́днѣйшаго и душа́мъ спаси́тельнаго, восхища́ющаго сія́ изъ горта́ни смертоно́сныя и къ жи́зни путеводя́ща вѣ́чнѣй, о́тче приснопѣва́емый.

Разруша́еши ополче́нія ерети́чествующихъ, треблаже́нне, огради́вся благоче́стія ору́жіи и му́жествомъ души́, свяще́ннѣйше, собира́еши же, ра́дуяся пресвѣ́тло, правосла́вныхъ ли́ки сою́зомъ Ду́ха.

Испо́лнены, я́коже фіа́лы, боже́ственныхъ арома́тъ лани́ты твоя́ и вселе́нную у́мными благово́ніи веселя́тъ мѵрова́рнымъ тайново́дствомъ разумѣ́ній и добро́тою слове́съ твои́хъ, всему́дре.

Богоро́диченъ: Яко Бо́га заче́нши, Содѣ́теля же, и Зижди́теля, и Го́спода, ро́ди Тя́ вси́ человѣ́честіи, Чи́стая, ублажа́ютъ, и безтѣле́сныхъ разу́мная чинонача́лія я́ко Ма́терь Бо́жію Тя́ сла́вятъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Сме́рти и тли́ я́ко спа́слъ есть, Са́мъ Ся́ изда́въ сме́рти, тлѣ́ніемъ и сме́ртію мое́ естество́ я́то бы́вшее, Дѣ́во, моли́ Го́спода и Сы́на Твоего́, враго́въ злодѣ́йствія мя изба́вити.

Предста́тельницу Тя живота́ вѣмъ, и храни́тельницу тве́рду, Дѣ́во, и напа́стей рѣша́щу молвы́, и нало́ги бѣсо́въ отгоня́ющу: и молю́ся всегда́, отъ тли́ страсте́й мои́хъ изба́вити мя.

Яко стѣ́ну прибѣ́жища стяжа́хомъ, и душъ всесоверше́нное спасе́ніе, и простра́нство въ ско́рбехъ, Отрокови́це, и просвѣще́ніемъ Твоимъ при́сно ра́дуемся: о Влады́чице, и ны́нѣ насъ отъ страсте́й и бѣдъ спаси́.

На одрѣ́ ны́нѣ немощству́яй лежу́, и нѣсть исцѣле́нія пло́ти мое́й, но Бо́га и Спа́са мíру, и Изба́вителя неду́говъ ро́ждшая, Тебѣ́ молю́ся Благо́й: отъ тли неду́гъ возста́ви мя.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Му́дростію духо́вною мíръ ве́сь обогати́лъ еси́, словесе́ раздава́тель бы́въ бога́тый: бога́та бо свы́ше, іера́рше, благода́ть излія́ся твои́мъ устна́мъ.

Во всю́, я́ко мо́лнія, зе́млю изы́де вѣща́ніе твое́, и си́ла же твои́хъ глаго́лъ, Златоу́сте, я́ко труба́ велегла́сная, вселе́нныя вся́ огласи́ концы́.

Свы́ше во истка́нную ри́зу одѣ́явся, всеблаже́нне, добродѣ́телей и слове́съ красото́ю обложи́вся, и́стины яви́лся еси́ сла́вное утвержде́ніе.

Богоро́диченъ: Вседержи́тельною си́лою нося́й вся́ческая, въ немощну́ю пло́ть изъ Тебе́ одѣ́явся, Дѣ́во Пренепоро́чная, на благодѣя́ніе человѣ́ковъ Человѣколю́бецъ.

Конда́къ, гла́съ 6. Подо́бенъ: Еже о на́съ испо́лнивъ.

Отъ небе́съ прія́лъ еси́ Боже́ственную благода́ть и твои́ми устна́ми вся́ учи́ши покланя́тися въ Тро́ицѣ еди́ному Бо́гу, Іоа́нне Златоу́сте, всеблаже́нне преподо́бне, досто́йно хва́лимъ тя́: еси́ бо наста́вникъ, я́ко боже́ственная явля́я.

Икосъ:

Всѣ́хъ Творцу́ преклоня́ю колѣ́на, превѣ́чному Сло́ву ру́ки простира́ю, сло́ва ища́ дарова́ніе, да воспою́ преподо́бнаго, его́же Са́мъ возвели́чи; глаго́летъ бо проро́комъ Живы́й во вѣ́ки: просла́влю вѣ́рою сла́вящія Мя́. Иже у́бо въ дре́внихъ Самуи́ла возвы́сивый, просла́ви ны́нѣ іера́рха: тала́нтъ бо, ему́же ввѣ́рися, до́брѣ ку́пльствовавъ, Царю́ принесе́, тѣ́мъ и превозвы́шши его́ Пресу́щественный. Сего́ благода́ти прошу́ недосто́йный а́зъ сло́во прія́ти ми́, да возмогу́ благоче́стно воспѣ́ти того́: конце́й бо то́й е́сть наста́вникъ, я́ко боже́ственная явля́я.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

На́ше спасе́ніе я́коже восхотѣ́лъ еси́, Спа́се, устро́ити, во утро́бу Дѣ́вы всели́лся еси́, Юже мíру предста́тельницу показа́лъ еси́: отецъ на́шихъ Бо́же, благослове́нъ еси́.

Воли́теля ми́лости, Его́же родила́ еси́, Ма́ти Чи́стая, умоли́ изба́витися отъ прегрѣше́ній, и душе́вныхъ скве́рнъ, вѣ́рою зову́щимъ: отецъ на́шихъ, Бо́же, благослове́нъ еси́.

Сокро́вище спасе́нія, и исто́чникъ нетлѣ́нія, Тя ро́ждшую, и сто́лпъ утвержде́нія, и дверь покая́нія зову́щимъ показа́лъ еси́: отецъ на́шихъ Бо́же, благослове́нъ еси́.

Тѣле́сныя сла́бости и душе́вныя неду́ги, Богороди́тельнице, любо́вію приступа́ющихъ ко кро́ву Твоему́, Дѣ́во, исцѣли́ти сподо́би, Спа́са Христа́ намъ ро́ждшая.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Бла́гости бе́здну и благоутро́бія навы́къ Бо́жія, пору́чникъ яви́лся еси́ спасе́нія ка́ющимся те́плѣ и вседу́шно Го́споду зову́щимъ: благослове́нъ Бо́гъ оте́цъ на́шихъ.

Управля́еши, Златоу́сте, уче́ніи твои́ми вся́кую мы́сль, и душе́вныя врачу́еши не́мощи, я́ко сострада́тельнѣйшій, и благотеку́щимъ спое́ши, веселя́ся: благослове́нъ Бо́гъ оте́цъ на́шихъ.

Возвы́сился еси́, бы́въ избра́нъ, преподо́бенъ, незло́бивъ, свяще́нникъ Высоча́йшаго, пра́вдою одѣ́янъ свѣ́тло и весе́ліемъ, зовы́й, всебога́те: благослове́нъ Бо́гъ оте́цъ на́шихъ.

Богоро́диченъ: Зачала́ еси́, Пречи́стая, Су́щаго надъ всѣ́ми Бо́га и Го́спода, благоволи́вшаго спасти́ человѣ́ческій ро́дъ отъ тлѣ́нія и сме́рти, Его́же, досто́йно пою́ще, зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

По́мощи я́же отъ Тебе́ тре́бующія, не пре́зри, Дѣ́во, пою́щія и превознося́щія Тя во вѣ́ки.

Неможе́ніе души́ моея́ исцѣля́еши, и тѣле́сныя болѣ́зни, Дѣ́во, да Тя просла́влю, Чи́стая, во вѣ́ки.

Исцѣле́ній бога́тство излива́еши вѣ́рно пою́щимъ Тя, Дѣ́во, и превознося́щимъ неизрѣче́нное Твое́ рождество́.

Напа́стей Ты прило́ги отгоня́еши, и страсте́й нахо́ды, Дѣ́во, тѣ́мже Тя пое́мъ во вся вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Иже разу́мно словесе́мъ твои́мъ бесѣ́дующе, Златоу́сте, богосло́вія честно́му учи́мся, и всепло́дствуемъ благи́хъ поле́зное, и зло́бы отбѣга́емъ вре́да: о́бщій бо строи́тель спасе́нія бы́лъ еси́, вопія́: превозноси́те Христа́ во вѣ́ки.

За ны́ моли́ Влады́ку, Златоу́сте, сострада́тельнѣйшее дерзнове́ніе имѣ́я и ми́лостивною и человѣколю́бною твое́ю, о́тче, любо́вію: тя́ бо ко Спа́су предлага́емъ, вѣ́рніи, хода́тая же, и предста́теля, и теплѣ́йша моли́твенника, богому́дре іера́рше, всеблаже́нне Іоа́нне.

Юношское противле́ніе, и непрекло́нное мудрова́ніе, и ца́рствующихъ непра́вду обличи́лъ еси́, те́плѣ предста́тельствуя оби́димыя, преподо́бне; и сиро́тъ, и вдо́въ, и ни́щихъ оте́цъ бы́лъ еси́ любо́внымъ предложе́ніемъ: превозноси́те, — вопія́, — Христа́ во вѣ́ки.

Богоро́диченъ: Тѣле́сными образова́ніи, и разли́чными гада́ніи, и символи́ческими, и знамена́тельными предъявле́ньми, Твое́ провозвѣсти́ша богоглаго́ливіи рождество́, преесте́ственное и чу́дное, Дѣ́во; тѣ́мъ Тя́, веселя́щеся, благоче́стно воспѣва́емъ, Христа́ превознося́ще во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

То́ка слезъ мои́хъ не отврати́ся, Яже отъ вся́каго лица́ вся́ку сле́зу отъе́мшаго, Дѣ́во, Христа́ ро́ждшая.

Ра́дости мое́ се́рдце испо́лни, Дѣ́во, Яже ра́дости пріе́мшая исполне́ніе, грѣхо́вную печа́ль потребля́ющи.

Свѣ́та Твоего́ заря́ми просвѣти́, Дѣ́во, мракъ невѣ́дѣнія отгоня́щи, благовѣ́рно Богоро́дицу Тя исповѣ́дающихъ.

На мѣ́стѣ озлобле́нія не́мощи смири́вшагося, Дѣ́во, исцѣли́, изъ нездра́вія во здра́віе претворя́ющи.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Истинно наслажда́яся, о́тче, жи́зни, о не́йже подвиза́лся еси́, ели́ко мо́щно, на земли́ житіе́мъ преизя́ществовавъ а́нгельскимъ и Христо́въ стяжа́въ язы́къ и уста́ ти́хая: спасти́ся, богоглаго́ливе, моли́ тя́ вѣ́рою изя́щнѣ блажа́щимъ.

Словеса́ твоя́, треблаже́нне, словеса́ жи́зни, жи́знь хода́тайствующая неконе́чную: тя́ бо исто́чника теку́ща показа́ Христо́съ и рѣку́, пролива́ющу боже́ственныхъ пото́ки уче́ній, сла́дости и́стинно пото́къ, оставле́нія же струю́ и покая́нія свѣ́тла проповѣ́дника.

Хода́тай яви́лся еси́, священнонача́льниче, Бо́га и человѣ́ковъ пресвѣ́тлый: ты́ бо свѣти́льникъ яви́лся еси́ благоче́стія богосвѣ́тлый и боже́ственнаго зна́нія и ми́лостыни наказа́тель, тѣ́мъ тя́, златосло́ве, серде́чною любо́вію ны́нѣ досто́йно велича́емъ.

Богоро́диченъ: Чи́стая препросла́вленная Ма́ти Бо́жія, пою́щія Тя́ любо́вію спаса́й, искуше́ній молву́ разрѣша́ющи ми́лостивно. Яко бо Бо́га ро́ждши, вся́, ели́ка хо́щеши, соверша́еши, успѣва́еши невозбра́нно и мо́жеши, Дѣ́во. Тѣ́мъ Тя́ вси́ велича́емъ.

Свѣти́ленъ. Подо́бенъ: Ду́хомъ во святи́лищи.

Златоза́рными словесы́ твои́ми Христо́ва Це́рковь свѣтлѣ́ется я́сно, о Златоу́сте о́тче! Ду́ши же веселя́тся вѣ́рныхъ, почита́ющія всесвяту́ю твою́ па́мять, ты́ бо всѣ́мъ показа́лся еси́ покая́нія наста́вникъ и во́ждь спасе́нія.

Сла́ва, ины́й. Подо́бенъ: Жены́, услы́шите.

Великогла́снѣйшаго покая́нія проповѣ́дника, сокро́вище убо́гихъ, уста́ Це́ркве злата́я и благоглаго́ливая, писа́ній явле́ніе, Іоа́нна всему́драго да восхва́лимъ вси́, я́ко отъ того́ утверди́вшеся.

И ны́нѣ, богоро́диченъ:

Дѣ́во Всенепоро́чная, Госпоже́ моя́ и Влады́чице, Твоего́ Сы́на умоли́ съ сла́внымъ Златоу́стомъ напа́стей изба́витися вся́ческихъ пою́щимъ Тя́ и вѣ́чныхъ получи́ти бла́гъ, Всесвята́я: можеши бо, ели́ка хо́щеши.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Сосу́дъ честнѣ́йшій Боже́ственнаго Ду́ха бы́лъ еси́* и па́стырь свяще́ннѣйшій,* а́нгелъ на земли́,* сто́лпъ церко́вный* и догма́товъ степе́нь,* грѣ́шныхъ пору́чникъ,* ка́ющихся боже́ственное утѣше́ніе,* ни́щихъ же промы́сленникъ и сиро́тъ утѣше́ніе,* Іоа́нне Златоу́сте,* моли́твенниче о душа́хъ на́шихъ.

Со́лнце многосвѣ́тлое,* вселе́нную словесы́ твои́ми озаря́я,* бы́лъ еси́ звѣзда́ свѣтлѣ́йшая,* свѣща́ свѣтя́щія зари́,* и́же въ мо́ри мíра всегда́ обурева́емыя* привлача́я ко приста́нищу тиша́йшему* спасе́нія благода́тію,* златосло́ве Златоу́сте,* моли́твенниче о душа́хъ на́шихъ.

Ангелъ земны́й и небе́сный человѣ́къ,* славíй добропѣ́снивый,* рѣка́, исполня́ема слове́сныхъ во́дъ,* о́блакъ ту́чи разу́мныя,* всѣ́мъ на́мъ бога́тно ка́плющій,* спасе́нія учи́тель и покая́нія споспѣ́шникъ,* Іоа́нне Златоу́сте, вои́стинну бы́лъ еси́.

Непра́ведно отъ па́ствы твоея́* изгна́нъ, о́тче преподо́бне,* пріобщи́лся еси́ скорбе́мъ* и го́рькимъ заточе́ніемъ,* въ ни́хже удосто́ился еси́ блаже́нныя кончи́ны,* а́ки до́блественный страда́лецъ,* побѣди́въ многоко́зненнаго,* и побѣ́ды діади́мою тя́ Христо́съ вѣнча́,* Іоа́нне Златоу́сте,* моли́твенниче о душа́хъ на́шихъ.

Сла́ва, гла́съ 8. Анато́ліево:

Златы́ми словесы́ и боговѣща́нными уче́ніи украси́въ Бо́жію Це́рковь, бога́тство духо́вное сокро́вищетвовалъ еси́ въ не́й, твоя́ богопре́данная словеса́. Тѣ́мъ вѣне́цъ изъ нетлѣ́нныхъ цвѣто́въ спле́тши пѣ́сньми, свяще́ннѣй твое́й прино́ситъ па́мяти, всезлаты́й душе́ю съ язы́комъ, Іоа́нне богому́дре, но, я́ко имѣ́я дерзнове́ніе, преподо́бне, моли́ся о душа́хъ на́шихъ.

И ны́нѣ, [богоро́диченъ]:

Влады́чице, пріими́ моли́тву ра́бъ Твои́хъ, и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

На трапе́зѣ быва́етъ бра́тіи вели́кое утѣше́ніе.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 111 – 122 об.

/ Къ оглавленію раздѣла /


Наверхъ / Къ титульной страницѣ

0