Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 12-й де́нь.
Иже во святы́хъ отца́ на́шего Іоа́нна, патріа́рха Александрíйскаго, Ми́лостиваго и преподо́бнаго отца́ на́шего Ни́ла [По́стника].

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Твою́ чистоту́,* и ума́ пра́вость, и нра́въ боже́ственный* Ви́дяй, та́йная* прови́дѣвъ, возво́дитъ на велича́йшій престо́лъ,* пома́завъ мѵ́ромъ тя́, му́дре, и соверши́въ,* и па́ствы корми́ла я́вѣ вручи́въ,* ю́же ко приста́нищу напра́вилъ еси́* боже́ственнаго хотѣ́нія,* Іоа́нне богоглаго́ливе.

Вся́ проше́нія* твоего́ се́рдца Госпо́дь,* досточу́дне, подаде́,* вся́ бо соблю́лъ еси́ законоположе́нія спаси́тельная.* Бо́га бо всеконе́чно* и бли́жняго, богоблаже́нне,* я́ко тебе́ сама́го, возлюби́лъ еси́* и тре́бующія удово́лилъ еси́:* сего́ ра́ди тя́ дне́сь, Іоа́нне, почита́емъ.

Ины стихи́ры преподо́бнаго, гла́съ 8. Подо́бенъ: Что́ вы нарече́мъ?

Что́ тя ны́нѣ нарече́мъ, свя́те?* Рѣку́, исходя́щую отъ мы́сленнаго Еде́ма,* пото́къ отъ Бо́га подае́мыхъ даро́въ,* наводне́ніе уче́ній благода́ти,* ча́шу му́дрости и зна́нія,* моле́бника крѣпча́йшаго,* учи́теля дѣйстви́тельнѣйшаго.* Моли́ спасти́ся душа́мъ на́шимъ.

Что́ тя возъимену́емъ, преподо́бне?* Земледѣ́лателя безсме́ртныхъ, блаже́нне, садо́въ,* садодѣ́лателя разу́мнаго рая́ вѣ́рныхъ,* зако́новъ богода́нныхъ иску́снѣйшаго толко́вника,* догма́товъ богодухо́вныхъ вѣ́дателя,* сказа́теля благоесте́ственнѣйша* и наказа́теля дово́льнѣйша.* Моли́ спасти́ся душа́мъ на́шимъ.

Что́ тя ны́нѣ нареку́, чу́дне?* Уставополо́жника сопру́жества,* цѣлому́дрія прави́теля,* наказа́теля мона́шествующихъ и дѣ́вства путевожда́,* пра́ведно обои́мъ мѣ́ряща,* я́ко иску́сомъ проше́дша обоя́.* Мно́га твоя́ дѣя́нія* и о Бо́зѣ твое́ поще́ніе.* Моли́ спасти́ся душа́мъ на́шимъ.

Сла́ва, гла́съ 2. Анато́ліево:

Ми́лости исто́чникъ тре́бующимъ умножа́етъ благосострада́тельныя щедро́ты, Іоа́ннъ, Христо́въ подо́бникъ, вели́кій па́стырь Алекса́ндрянъ и свѣти́ло. Пріиди́те, насы́тимся, ни́щіи ду́хомъ, подража́ющіи того́ ти́хости, любоблагоутро́бнымъ бо нра́вомъ Христа́ стра́нствовавшаго чрезъ ни́щія угости́въ, я́ко дре́вле Авраа́мъ, блаже́нства удосто́ися и со дерзнове́ніемъ мо́лится поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Дре́ву Кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мене́, Ро́ждшую Тя́, еди́ну, Свѣ́те Непристу́пный пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную Боже́ственныя Стра́сти Твоя́ сла́вящіи.

На стихо́внѣ окто́иха. Сла́ва, преподо́бнаго, гла́съ 8:

Мона́ховъ мно́жества наста́вника тя́ почита́емъ, о́тче на́шъ Ни́ле, твое́ю бо стезе́ю вои́стинну пра́во ходи́ти увѣ́дѣхомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ. Съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Му́ченицы Твои́.

Тя́ ви́дящи, пригвожда́ема на Крестѣ́, Іису́се, и стра́сти пріе́млюща во́лею, Дѣ́ва и Ма́ти Твоя́, Влады́ко, — увы́ Мнѣ́, — вопія́ше, — Ча́до сла́дкое! Ра́ны непра́ведно ка́ко терпи́ши, Врачу́, исцѣли́вый человѣ́ческое неможе́ніе и отъ тли́ всѣ́хъ изба́вивый благоутро́біемъ Твои́мъ.

Тропа́рь, гла́съ 8:

Въ терпѣ́ніи твое́мъ стяжа́лъ еси́ мзду́ твою́, о́тче преподо́бне, въ моли́твахъ непреста́нно терпѣ́вый, ни́щія возлюби́вый и сія́ удовли́вый, но моли́ся Христу́ Бо́гу, Іоа́нне ми́лостиве, блаже́нне, спасти́ся душа́мъ на́шимъ.

Сла́ва, гла́съ то́йже:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Ни́ле, о́тче на́шъ, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ [или́ крестобогоро́диченъ].



НА УТРЕНИ,
Кано́нъ окто́иха еди́нъ и святы́хъ два́.

Кано́нъ іера́рха, творе́ніе Іо́сифово. Гла́съ 8.
Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Сострада́ніемъ ума́ просвѣща́емь и любо́вію Христо́вою, о́тче, озаря́емь, ми́лостыней блиста́я сія́ньми, Еди́наго ми́лостиваго Бо́га прія́телище чистѣ́йшее, Іоа́нне, бы́лъ еси́: тѣ́мъ тя́ ублажа́емъ.

Во вѣ́къ при́сно пребыва́ющая смотря́я, му́дрымъ смы́сломъ, о́тче свяще́ннѣйше, измѣни́лъ еси́ тлѣ́нная свѣ́тло нетлѣ́нными и ны́нѣ на небесѣ́хъ жи́тельствуеши, вопія́ со безпло́тными ли́ки: Го́споду воспои́мъ, сла́вно бо просла́вися.

Ми́лости Да́тель, одари́въ ми́лостивное, преподо́бне, твое́ помышле́ніе, поми́лова мно́гая боже́ственнымъ твои́мъ хода́тайствомъ, бы́лъ еси́ во утѣше́ніе ду́шъ, ни́щихъ же промышле́ніе, Іоа́нне всему́дре, богоблаже́нне свяще́ннѣйшій.

Богоро́диченъ: Благослове́нная, Чи́стая и Всепѣ́тая, еди́на ро́ждшая воплоще́ннаго Бо́га, приснотеку́щій исто́чникъ, на́мъ, надѣ́ющимся на Тя́, исцѣле́нія излива́юща, вѣ́рнымъ: моли́, Его́же родила́ еси́, дарова́ти мíру ве́лію ми́лость.

Инъ кано́нъ преподо́бнаго, его́же краегране́сіе: Напая́етъ мя́ Ни́лъ разу́мнымъ всепло́дствіемъ. Ѳеофа́ново. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Напое́ньми твои́ми, блаже́нне, та́инственными, напая́я бога́тно прозя́бшій мо́й по́мыслъ, я́ко кла́съ, пѣ́нія тебѣ́ принести́ твои́ми моли́твами сподо́би.

Глаго́лъ тече́нія твои́хъ, я́ко изъ Еде́ма, всебога́те Ни́ле, происходя́щая я́вственно, лице́ все́ приснотеку́щее церко́вное напая́ютъ.

Догма́товъ и слове́съ рѣка́ твои́хъ, богоглаго́ливе, сердца́ благочести́выхъ, наводня́ющи, напая́етъ, злочести́выхъ же потопля́етъ собра́нія.

Богоро́диченъ: Изблева́ въ слу́хи Евы я́дъ душетлѣ́нный губи́тель и вра́гъ; Христа́ же ро́ждши, Богома́ти, того́ вре́да исцѣли́ла еси́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Боголѣ́пна, я́коже отрокови́ца, отъ ма́слинъ вѣне́цъ нося́щи, яви́ся тебѣ́, досточу́дне, Ми́лостиваго благосострада́тельная благода́ть, привлача́щи тя́ къ Боже́ственнѣй ми́лости.

На престо́лѣ свяще́ннѣмъ судо́мъ Бо́жіимъ, сла́вне о́тче Іоа́нне, сѣ́лъ еси́, я́коже а́нгелъ, ты́ пожи́лъ еси́, ми́рныя вознося́ свяще́нныя же́ртвы Всеще́дрому.

Мно́гое милосе́рдіе милосе́рдаго Го́спода, о́тче, подража́я, за милосе́рдіе Обнища́вшаго пло́тію ни́щія удово́лилъ еси́, стра́нныя и безпокро́вныя собира́я, испо́лнитель повелѣ́ній Боже́ственныхъ бы́въ.

Богоро́диченъ: Всели́вся въ Дѣ́ву тѣле́снѣ, Го́споди, яви́лся еси́ человѣ́комъ, я́коже подоба́ше ви́дѣти Тя́: Юже и показа́лъ еси́, я́ко и́стинную Богоро́дицу, вѣ́рнымъ по́мощь, еди́не Человѣколю́бче.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Дарова́нія, о́тче, Ду́ха но́ситъ твое́ помышле́ніе, лука́вая помышле́нія отгоня́.

Мѵ́ро благово́ннѣйшее твоя́ моли́твы на́мъ вдохну́въ, священнодѣ́лателю, видѣ́ніемъ дѣ́тельнымъ пожи́въ.

Источи́лъ еси́ уче́нія ты́ небе́сная, всему́дре, я́ко отъ исто́чника, и церко́вныя пито́мцы обогати́лъ еси́.

Богоро́диченъ: Умертви́ мудрова́ніе пло́ти на́шея, Пречи́стая, Исто́чникъ безсме́ртія человѣ́комъ источи́вшая.

Конда́къ преподо́бнаго, гла́съ 8. Подо́бенъ: Взбра́нной.

Хвра́стная страсте́й, я́же отъ тѣлесе́, воста́нія сѣчи́тельно, Ни́ле блаже́нне, во бдѣ́нной твое́й ссѣ́клъ еси́ моли́твѣ, но, я́ко имѣ́я дерзнове́ніе ко Го́споду, отъ вся́кихъ мя́ бѣ́дъ свободи́, да зову́ ти: ра́дуйся, о́тче всемíрный.

Икосъ:

Кто́ земноро́дныхъ изрещи́ возмо́жетъ, Ни́ле, жи́тельства твоего́ страда́нія, и житія́ твоего́ безмѣ́рныя труды́, и мно́гая тща́нія твоя́, я́же на земли́, я́ко безпло́тный, соверши́лъ еси́? Но оба́че зову́: ра́дуйся, рѣко́ Боже́ственныхъ благода́тей; ра́дуйся, цѣвни́це Христо́выхъ уче́ній; ра́дуйся, ча́ше му́дрости и зна́нія; ра́дуйся, воздѣ́ланіе безсме́ртныхъ насажде́ній; ра́дуйся, догма́те дѣ́тельнѣйшій богодухнове́нныхъ слове́съ; ра́дуйся, зако́на богода́ннаго иску́снѣйшій толко́вниче; радуйся, садодѣ́лателю рая́ мы́сленнаго; ра́дуйся, дѣ́вства храни́лище ве́ліе; ра́дуйся, кра́сная гу́сль Ду́ха; ра́дуйся, страсте́й кореносѣ́чный мечу́; ра́дуйся, пра́ведныхъ муже́й высото́; ра́дуйся, вѣ́рныхъ земноро́дныхъ предста́телю. Ра́дуйся, о́тче всемíрный.

Сѣда́ленъ, гла́съ 8. Подо́бенъ: Прему́дрости.

Ми́лостивенъ нра́въ пріи́мъ, благосе́рдъ яви́лся еси́ и пода́теленъ ни́щимъ и тре́бующимъ, Іоа́нне богодухнове́нне. Сего́ ра́ди зва́ніемъ дѣя́нію подо́бно, па́че всѣ́хъ святы́хъ, блаже́нне, обогати́ тя зѣло́ Пода́тель благи́хъ — Христо́съ. Ему́же, богому́дре іера́рше пребога́те, моли́ся грѣхо́въ оставле́ніе пода́ти пра́зднующимъ любо́вію святу́ю па́мять твою́.

Сла́ва, преподо́бнаго, гла́съ то́йже. Подо́бенъ: Повелѣ́нное та́йно.

Украси́въ тво́й у́мъ видѣ́ніи, богосло́вія рѣ́ки отры́гнулъ еси́, напая́я сердца́, Ни́ле богоно́се, вѣ́рою почерпа́ющихъ твои́хъ уче́ній пи́во, проза́рное же и чи́стое, и чту́щихъ па́мять твою́ свѣтоза́рную же и честну́ю, преподо́бныхъ удобре́ніе и отце́въ хвало́.

И ны́нѣ, богоро́диченъ:

Яже непремѣ́ннаго Бо́га поро́ждшая, премѣня́емое при́сно се́рдце мое́ грѣхо́мъ и лѣ́ностію, прило́гми льсти́ваго, утверди́, Блага́я, моли́твами ма́терними Твои́ми: я́ко да и а́зъ благода́рно сла́влю Тя́, Богороди́тельнице Марíе, поми́луй ста́до Твое́, е́же стяжа́ла еси́, Всенепоро́чная.

Крестобогоро́диченъ:

Иже отъ крове́й Твои́хъ чи́стыхъ Вопло́щшагося и па́че ума́ изъ Тебе́, Чи́стая, Роди́вшагося, на дре́вѣ ви́сяща среди́ злодѣ́евъ зря́щи, утро́бою болѣ́зновала еси́ и, ма́терски пла́чущи, вопія́ла еси́: увы́ Мнѣ́, Ча́до Мое́, что́ Боже́ственное и неизрече́нное строе́ніе Твое́, и́мже оживи́лъ еси́ созда́ніе Твое́? Воспѣва́ю Твое́ благоутро́біе.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Чи́стая оби́тель яви́лся еси́ Святы́я Тро́ицы, преподо́бне, и хра́ма Боже́ственнаго сокро́вище, и іера́рховъ нача́токъ.

Мно́гое милосе́рдіе твое́ Госпо́дь внима́я Благосе́рдый, ду́шу твою́ освяти́, Іоа́нне, о́тче свяще́ннѣйше.

За́повѣдей непосты́денъ бы́лъ еси́ дѣ́латель Всеще́драго и испо́лнился еси́ благи́хъ Его́, въ се́лѣхъ святы́хъ водворя́яся.

Богоро́диченъ: Очище́ніе на́шихъ да́руй невѣ́дѣніи я́ко Безгрѣ́шенъ и умири́ мíръ Тво́й, Бо́же, моли́твами Ро́ждшія Тя́.

Инъ. Ирмо́съ то́йже.

Возведи́, всему́дре, отъ страсте́й мя́ плѣне́нія, я́ко избавле́ніе и цѣ́ну Бо́гу принося́ моли́твы твоя́.

Свяще́нно вчини́ти е́же о Христѣ́ му́дрости догма́ты, искуси́въ поще́ніемъ, себе́, всеблаже́нне, предочи́стилъ еси́.

Помышле́ній вся́кое возвыше́ніе, о́тче, взима́ющееся смири́лъ еси́, мно́жествомъ му́дрости твоея́ погуби́въ си́хъ па́мять.

Богоро́диченъ: Отцу́ Соприсносу́щный и я́ко Бо́гъ, Сло́во, пре́жде безпло́тное, въ послѣ́дняя воплоти́ся отъ чи́стыхъ крове́й Твои́хъ, Всепѣ́тая.

Пѣ́снь 5.

Ирмо́съ: Отъ но́щи невѣ́дѣнія по душелови́тельному пути́ при́сно блудя́щаго, свѣ́томъ ра́зума Твоего́, Го́споди, преднаставля́я мя́, на стезю́ за́повѣдей Твои́хъ напра́ви.

Умертви́вшемуся за ми́лость ме́ртвостію во́льною, о́тче му́дре, подо́бяся, распя́лся еси́ мíру и страсте́мъ, и жи́зни премíрныя сподо́бился еси́, достосла́вне.

Блаже́нства удосто́ился еси́, кро́токъ, сострада́тельнѣйшій, и мири́теленъ бы́въ, и а́лчущихъ хлѣ́бъ неижди́вный и ни́щимъ пода́тель, одѣя́ніе же наготству́ющимъ.

Боже́ственными причаще́ньми, о́тче, удобря́емь, я́коже а́нгелъ, Бо́гу непоро́чно свяще́нствовалъ еси́, вѣ́рныя просвѣща́я свяще́нными уче́ніи твои́ми.

Богоро́диченъ: Всѣ́хъ Бо́га безъ сѣ́мене въ Свои́хъ ложесна́хъ поне́сшую, Плотоно́сца же на́мъ ро́ждшую, Пречи́стую Богоро́дицу воспѣва́емъ, я́ко спасе́ніе ду́шъ на́шихъ.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Цѣлому́дренно жела́я, всему́дре, боже́ственныя чистоты́, оста́вилъ еси́ все́ житія́ пристра́стіе.

Разу́мная ты́ вы́ше зна́нія, богоявле́нне, мы́сленно пости́глъ еси́, едине́ніемъ Боже́ственнымъ науча́емь.

Облакъ тя́, ту́чами зна́нія, богоно́сне, все́ потопля́ющій неразу́міе, вѣ́мы.

Богоро́диченъ: Яко кри́нъ, сія́ющій посредѣ́ те́рнія, обрѣ́тъ, Жени́хъ Тя́, Дѣ́во Ма́ти, возлюби́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Моли́твами и посто́мъ упражня́яся и бдѣ́нно Бо́га моля́, открове́ній и зрѣ́ній Боже́ственныхъ сподо́бился еси́, богому́дре всебога́те, науча́емь су́щимъ па́че ума́ и по́мысла, му́дре, чистото́ю.

Яко а́нгелъ съ пло́тію, на земли́, о́тче, пожи́лъ еси́, же́ртвы ми́рныя, безкро́вныя вѣ́рою, и сокруше́ннымъ се́рдцемъ, и ду́хомъ, блаже́нне, Творцу́ принося́, Іоа́нне, ра́достно.

Житіе́ твое́, па́че со́лнца возсія́вшее, милосе́рдія испусти́ лучи́ тре́бующимъ, отгоня́щія те́мный о́блакъ нищеты́, всебога́те, грѣ́ющія же мра́зомъ лю́тыхъ держи́мыя, богодухнове́нне.

Богоро́диченъ: Не преста́й о на́съ моля́щися, Пресвята́я Богоро́дице Дѣ́во, я́ко вѣ́рныхъ утвержде́ніе Ты́ еси́, и наде́ждею Твое́ю крѣпи́мся и любо́вію Тя́ и изъ Тебе́ Вопло́щшагося непреста́нно сла́вимъ.

Инъ. Ирмо́съ то́йже.

Му́дрости да́ромъ украша́емь и житія́ свѣ́тлостію удобря́емь, священнодѣ́латель боже́ственный бы́лъ еси́, Зижди́телю хода́тайствуя, и зда́нію, и бы́лъ еси́ пресвѣ́телъ и обзо́рный, о́тче, учи́тель.

Къ горѣ́ добродѣ́телей прибли́жився и Боже́ственнымъ покры́вся, о́тче, мра́комъ, отъ Бо́га догма́товъ скрижа́ли богопи́санныя прія́лъ еси́, всебога́те, и вторы́й на́мъ Моисе́й законополо́жникъ показа́лся еси́ благода́ти.

Освяти́въ себе́ во́лею та́инственно, я́ко вольноже́ртвенную же́ртву предстоя́ніемъ Зижди́телю, Ни́ле, и видѣ́ніи и дѣя́ніи украша́емь, помина́й о на́съ, вѣ́рно соверша́ющихъ па́мять твою́.

Богоро́диченъ: Ви́дѣвше обра́зными явле́ніи стра́шныхъ Твои́хъ та́инъ глубину́, я́ко Бо́гу во чре́во Твое́ всели́тися, богоглаго́ливіи проро́цы провозвѣсти́ша, Всенепоро́чная, и ны́нѣ мы́, сбы́тіе ви́дяще, сла́вимъ.

Конда́къ, гла́съ 2. Подо́бенъ: Вы́шнихъ ища́.

Бога́тство твое́ расточи́лъ еси́ убо́гимъ и небе́сное бога́тство ны́нѣ воспрія́лъ еси́, Іоа́нне всему́дре, сего́ ра́ди вси́ тя почита́емъ, соверша́юще па́мять твою́, ми́лостыни о тезоимени́те!

Икосъ:

На ми́лость упова́въ Бо́жію, Іоа́нне, щедро́тами отъ Того́ и дарми́ обогати́вся, отону́дуже яви́лся еси́ и ми́лостивъ, я́ко Онъ, вся́ ущедря́я. Тѣ́мже, мою́ нищету́ уще́дривъ, пода́ждь мнѣ́ бога́тство твоея́ моли́твы и а́лчущее се́рдце мое́ испо́лни глаго́лъ Боже́ственныхъ, богому́дре, я́коже пре́жде а́лчущія пита́лъ еси́, ми́лостыни о тезоимени́те!

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Дѣ́лы словеса́ Спа́сова извѣсти́лъ еси́ и ублажа́емыхъ сочта́лся еси́ ли́ку, ми́лостивъ бы́въ и чи́стъ ду́хомъ, Іоа́нне богоно́се.

Ме́да вку́съ сладча́йшій преложи́ся во искуше́но зла́то тебѣ́: бога́тному бо твоему́ внима́я произволе́нію, Творе́цъ бога́тная тебѣ́ даде́ воздая́нія.

Свѣ́томъ Тро́ицы невече́рнимъ просвѣща́емь, уго́дниче Тро́ицы, чту́щія тя́ ны́нѣ просвѣща́еши и пою́щія: благослове́нъ еси́, Го́споди Бо́же, во вѣ́ки.

Богоро́диченъ: Тя́, ра́дость апо́столовъ, страстоте́рпцевъ же сла́ву, Богоро́дице, мо́лимъ вѣ́рно: ра́дости вѣ́чныя сподо́би ны́, пою́щія Тя́ непреста́нно.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Напая́емь, о́тче, ту́чами небе́сными, яви́лся еси́ многопло́денъ, плоды́ краснѣ́йшія принося́ Влады́цѣ, вѣ́рою зову́щія: оте́цъ на́шихъ Бо́же, благослове́нъ еси́.

Тво́й, всеблаже́нне, язы́къ, хля́би догма́товъ разве́рзъ, ерети́ческую ле́сть крѣ́пко потопля́етъ, вѣ́рныя же науча́етъ пѣ́ти: оте́цъ на́шихъ Бо́же, благослове́нъ еси́.

Жи́тельство а́нгельское въ тѣлеси́, о́тче, на земли́ пожи́лъ еси́, и Боже́ственныхъ видѣ́ній го́рнихъ позо́рищъ наслажда́яся, и пое́ши: оте́цъ на́шихъ Бо́же, благослове́нъ еси́.

Богоро́диченъ: Отъ утро́бы дѣ́вственныя вопло́щся, яви́лся еси́ въ на́ше спасе́ніе. Тѣ́мъ Тя́, Ма́терь, вѣ́дуще Богоро́дицу, благода́рственно зове́мъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Свѣтоза́рную звѣзду́ Христо́съ на высотѣ́ тя́ церко́внѣй яви́въ, о́тче, чрезъ тебе́ пою́щія вѣ́рою просвѣща́етъ: благослови́те вся́ дѣла́ Го́спода и превозноси́те Его́ во вѣ́ки.

Ми́лостивъ яви́лся еси́, кро́токъ, благосострада́тельнѣйшъ, незло́бивъ, о́тче, бога́тство ни́щихъ, у́тварь и одѣя́ніе наги́хъ, поя́ вѣ́рно: благослови́те вся́ дѣла́ Го́спода и превозноси́те Его́ во вѣ́ки.

Ма́рковъ престо́лъ свяще́нно украси́лъ еси́ дѣ́лы боже́ственными изря́дно, о́тче, ми́лостынею же и милосе́рдіемъ па́че всѣ́хъ наре́клся еси́ ми́лостивъ, милосе́рдіемъ возсія́вшихъ святы́хъ.

Богоро́диченъ: Ада́ма, Дѣ́во, па́дшаго у́бо, яви́лася еси́ Дщи́, Бо́га же Ма́ти, обно́вльшаго мое́ существо́. Его́же пои́мъ вся́ дѣла́ Го́спода и превозно́симъ во вся́ вѣ́ки.

Инъ.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Добродѣ́тель воспріи́мъ соверше́нну, благи́хъ пе́рвое возлюби́въ, и Того́ ны́нѣ блиста́ньми просвѣща́емь, зове́ши: Го́спода по́йте и превозноси́те Его́ во вѣ́ки.

Вѣ́дѣтельнымъ обогати́вся иску́сствомъ, дѣ́тельное пости́глъ еси́ благосла́віе, благода́ти зари́ посыла́я вопію́щимъ: Го́спода по́йте и превозноси́те Его́ во вѣ́ки.

Мірски́хъ мо́лвъ отбѣжа́въ, молча́нія приста́нище дости́глъ еси́ и страсте́й прило́ги умертви́лъ еси́, зовы́й: Го́спода по́йте и превозноси́те Его́ во вѣ́ки.

Богоро́диченъ: Извѣ́стно вѣ́дяще, Дѣ́во, ро́ждшагося изъ Тебе́ Бо́га Сло́ва, пое́мъ Тя́ всеблагоче́стно, вѣ́рою пѣснопою́ще: Го́спода по́йте и превозноси́те Его́ во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Се́ тя́ по сконча́ніи сре́дняго пріе́млетъ дво́ица святы́хъ отце́въ, въ гро́бѣ свяще́ннѣйшую че́сть тебѣ́, о́тче, даю́щи.

Яко у́тро, я́ко де́нь, о́тче Іоа́нне, свѣтоза́рное твое́ возсія́ успе́ніе, просвѣща́ющее вѣ́рою тя́ блажа́щія.

Совокупи́лся еси́ лико́мъ архіере́евъ, проро́ковъ, апо́столовъ и му́чениковъ: съ ни́миже помина́й, о́тче, восхваля́ющія тя́.

Ра́ка, идѣ́же лежа́тъ, о́тче Іоа́нне, свяще́нныя твоя́ и святы́я мо́щи, исто́чникъ чуде́съ су́ть къ тебѣ́ приходя́щимъ.

Богоро́диченъ: Благолѣ́пная Дѣ́во, озло́бленную ду́шу мою́ грѣхо́мъ ублагости́, блага́го ро́ждшая Бо́га и Го́спода.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Расто́ргша пристра́стія мірска́го у́зы и Бо́гу приближа́ющася тя́ зря́, о́тче, губи́тель ва́рварская треволне́нія тебѣ́ воздви́же, разсла́бити твою́ мнѣ́въ крѣ́пость. Боже́ственнымъ же про́мысломъ того́ отрази́лъ еси́ кознодѣ́йства, всеблаже́нне.

Бога́тными сія́я заря́ми уче́ній многообра́зными, освѣти́лъ еси́ благоче́стія вѣ́рою приходя́щихъ тебѣ́ ду́ши, и́бо ча́ши, всему́дре Ни́ле, му́дрости чи́стѣй устнѣ́ прикосну́въ, поче́рплъ еси́ оби́льно и лю́бящимъ препода́лъ еси́.

Освяти́лъ еси́ усе́рдно себе́, о́тче, та́инственно, я́ко непоро́чное заколе́ніе Зижди́телю, Того́ возлюби́въ и́скренно: Его́же ны́нѣ престо́лу, всеблаже́нне Ни́ле, предстоя́, прилѣ́жно моли́ся вѣ́рою соверша́ющимъ твою́ па́мять получи́ти твоея́ свѣ́тлости.

Богоро́диченъ: Испра́вила еси́, Дѣ́во, же́нское поползнове́ніе, Сло́ва ро́ждши, исправля́юща низве́рженныя, я́ко бла́га и держа́вна си́лою, за благоутро́біе превозмо́гъ, изъ Тебе́ вопло́щшася, и спа́сша мíръ страстоубíйственными Свои́ми Страстьми́.

Свѣти́ленъ. Подо́бенъ: Жены́, услы́шите.

Ми́лость подража́я Бо́га любоще́драго, тре́бующимъ бога́тство расточи́лъ еси́, Іоа́нне, тѣ́мъ и бога́тство прія́лъ еси́ на небесѣ́хъ неистощи́мое. Того́ ра́ди ны́нѣ мо́лимся: моли́ся непреста́нно о хва́лящихъ тя́.

Сла́ва, преподо́бнаго. Подо́бенъ: Не́бо звѣзда́ми.

Ангельское житіе́ жела́я, удали́лъ еси́ себе́ въ пусты́ню и, стра́сти покори́въ плотскíя, равноа́нгеленъ яви́лся еси́, о́тче на́шъ богоно́се.

[И ны́нѣ,] богоро́диченъ:

Иже отъ Бо́га мíру да́нныхъ бла́гъ Ты́ вина́ еси́, Богоро́дице, но и ны́нѣ ми́лостива сотвори́ за о́бщее спасе́ніе благоувѣ́тливаго Бо́га.

На стихо́внѣ окто́иха. Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ: де́моновъ погуби́лъ еси́ полки́ и а́нгеловъ дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, Жи́зни Пода́телю?


НА ЛИТУРГІИ,

Блаже́нна окто́иха на 4 и святи́теля пѣ́снь 3-я на 4. Проки́менъ, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ ко Евре́омъ, зача́ло 311. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Сти́хъ: Зако́нъ Бо́га его́ въ се́рдцы его́, [и не за́пнутся стопы́ eго́]. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 104 – 111.

/ Къ оглавленію раздѣла /


Наверхъ / Къ титульной страницѣ

0