Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 11-й де́нь.
Святы́хъ му́ченикъ Ми́ны, Ви́ктора, и Вике́нтія, и святы́я му́ченицы Стефани́ды, и преподо́бнаго отца́ на́шего и исповѣ́дника Ѳео́дора Студи́та.

[ВЕЧЕРЪ,]
На Го́споди воззва́хъ: стихи́ры му́чениковъ, гла́съ 4. Подо́бенъ: Яко до́бля.

Очесы́ избода́емь,* и на дре́вѣ повѣ́шаемь,* и свѣща́ми всю́ду пали́мь,* и свирѣ́пствомъ судя́щаго жи́лы прерѣ́заемь,* и мече́мъ въ главу́ усѣка́емь,* ра́довался еси́, Ви́кторе сла́вне,* страда́льче Спа́совъ,* побѣди́въ вра́жія ополче́нія* дѣ́йствомъ Ду́ха Свята́го.

Вѣнча́ тя Госпо́дь благода́тей вѣнце́мъ,* Стефани́до многострада́льная,* во́льно бо тебе́ саму́ю му́камъ предала́ еси́* душе́вною до́блестію,* привя́зана же, двѣма́* раздѣли́лася еси́ фи́никома* и возлетѣ́ла еси́ къ Бо́гу, я́ко вра́бій,* пло́ть въ ру́цѣ оста́вльши лови́телей,* му́ченице достосла́вная.

Ины стихи́ры преподо́бнаго, гла́съ 8. Подо́бенъ: О, пресла́внаго чудесе́!

Отче Ѳео́доре,* и́стинно тезоимени́та,* па́че ума́ дарова́нія пріе́мъ,* благоче́стно препо́далъ еси́ лю́бящимъ тя́* и, умно́живъ, блаже́нне, тала́нтъ,* Боже́ственный гла́съ услы́шалъ еси́,* вну́трь зову́щь тя́ черто́га,* идѣ́же ны́нѣ живе́ши,* у престо́ла Всецаря́, досточу́дне.

Отче отце́въ Ѳео́доре,* ты́ мона́шествующихъ мно́жества* Христу́ приве́лъ еси́,* спасе́нія вина́ бы́въ богоподо́бна,* уче́ньми озаря́емь* и предста́тельствы ду́шъ украша́емь,* уста́ показу́емь Госпо́дня, всему́дре, проро́чески.* Ему́же ны́нѣ предстоя́,* на́съ помина́й.

Благода́ть оби́льная Ду́ха,* священнотаи́нниче му́дре,* излія́ся устна́ми твои́ми,* исто́чникъ искипѣ́ уче́ній, Ѳео́доре,* благоче́стія я́вльши побо́рника* и и́стины зѣ́льна соглаго́льника,* сто́лпъ и тве́рдь правосла́вныя вѣ́ры,* мона́шескаго житія́* извѣ́стнѣйшее пра́вило, всему́дре.

Сла́ва, му́чениковъ, гла́съ 6. Византíево:

Па́ки на́мъ лѣ́тняя па́мять мíра свѣти́лъ возсія́, Ми́ны же, и Ви́ктора, и Вике́нтія, вѣ́рныхъ сердца́ просвѣща́ющи и́же за Христа́ и за Кре́стъ Его́ борьба́ми. Тѣ́мже сла́вою и че́стію вѣнча́вшаго ты́я, Христа́ Бо́га на́шего, въ пѣ́снехъ почита́емъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, непра́ведно пригвожда́ющія Тя́ на дре́вѣ, Дѣ́ва Чи́стая и Ма́ти Твоя́ зря́щи, я́ко Симео́нъ прорече́, утро́бою, Спа́се, уязвля́шеся.

На стихо́внѣ окто́иха. Та́же стихи́ра му́чениковъ, гла́съ 2.

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

Пріиди́те, любострада́льцы, трисія́нный му́ченикъ почти́мъ ли́къ — Ми́ну, и Ви́ктора, и Вике́нтія, я́ко кро́ви да́ша и купи́ша вѣ́чную жи́знь, тѣ́мъ и терпѣли́во противоглаго́лаху злы́хъ обрѣта́телю: не предсужда́емъ тлѣ́нная нетлѣ́нныхъ, не во́инствуемъ царю́ ме́ртвенну земно́му, но живу́щему Царю́ во́инствуемъ, при́сно вопію́щу вѣ́рнымъ: вѣ́руяй въ Мя́, а́ще и у́мретъ, жи́въ бу́детъ.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Го́споду, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́, распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? ка́ко на дре́вѣ умира́еши пло́тію повѣ́шенъ, жи́зни Пода́телю?

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, преподо́бнаго, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, мона́шествующихъ богодухнове́нное удобре́ніе, Ѳео́доре прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ.



НА УТРЕНИ,
Кано́нъ окто́иха еди́нъ и святы́хъ два́, на 8.

Кано́нъ му́чениковъ, Іоа́нна мона́ха. Гла́съ 4.
Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Лю́діе свяще́нніи съ Моисе́емъ сла́внымъ и съ Маріа́мъ, жено́ю му́дрою и проро́чицею, не глубину́ Чермну́ю, но ны́нѣ Ми́ны страда́льца проходя́ще мо́ре по́двигъ сла́вно, пое́мъ Бо́гу на́шему, я́ко просла́вися.

Яростію преще́нія и ре́вностію гнѣ́ва дыша́ свирѣпогуби́тель и беззако́нный мучи́тель, я́ко Христо́въ во́инъ, предста́ти изво́лилъ еси́, Ми́но, благоче́стія побо́рниче. Ему́же и свѣти́льникъ яви́лся еси́, взыва́я: пое́мъ Бо́гу на́шему, я́ко просла́вися.

Егда́ возвы́шуся, привлеку́ земны́я, Ты́, Христе́, проре́клъ еси́, дѣ́ломъ же соверши́лъ еси́, му́ченическія чи́ны и лю́ди отъ коне́цъ призва́въ, въ ра́дости пою́щія: пое́мъ Бо́гу на́шему, я́ко просла́вися.

Богоро́диченъ: Же́злъ Ааро́новъ прозя́бшій, и́же отъ Іессе́я прообразова́ше возра́стшій ко́рень Тя́, Дѣ́во, нетлѣ́нный цвѣ́тъ мíру возсія́вшую, Бо́га воплоще́нна. Его́же о на́съ, Богоро́дице, моли́, при́сно прибѣга́ющихъ къ Тебѣ́.

Инъ кано́нъ преподо́бнаго, его́же краегране́сіе: Сла́внаго Ѳео́дора въ пѣ́снехъ почита́ю. Ѳеофа́ново. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣтолу́чными блиста́ніи Ду́ха Свята́го освѣща́емь, всесвѣ́тлый сто́лпъ, о́тче, бы́лъ еси́, путеводя́, богоглаго́ливе, къ земли́ обѣща́нія богому́дренно тща́щіяся, таи́нниче неизрече́нныхъ Ѳео́доре.

Всера́достно неосла́бными манове́ніи къ Бо́гу исходя́, пре́жде конца́ яви́лся еси́, ме́ртвостію жизноно́сною одѣ́янъ, преподо́бне, и жи́знь нестарѣ́ющуюся ны́нѣ прія́лъ еси́ досто́йно, о́тче богоно́се Ѳео́доре.

Побѣди́въ страсте́й игра́нія и мучи́телей стремле́нія ю́ношески, блаже́нне, вся́ укори́лъ еси́, му́жество показа́въ, Христо́въ о́бразъ чти́ти науча́я, богопрія́тне, и святы́хъ воображе́нія.

Очище́нною мы́слію, всему́дре, богодухнове́ннымъ писа́ніемъ поуча́яся, бога́тство добродѣ́телей собра́лъ еси́ и благоче́стія догма́ты, видѣ́ніемъ обогати́лся еси́ и житія́ свѣ́тлостію, возсія́въ обою́ду, преподо́бне.

Богоро́диченъ: Сло́ва Бо́жія воплоще́нна родила́ еси́, Иже пре́жде безпло́тнаго, богому́жно въ мíрѣ пожи́вшаго преесте́ственно, Всенепоро́чная Богоро́дице Дѣ́во. Тѣ́мъ Тя́ вси́ почита́емъ, по Бо́зѣ Предста́тельницу на́шу.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Гони́мь прему́дрыми твои́ми словесы́, мучи́тель тя́ ураня́етъ неща́дно суро́выми жи́лами говя́жіими, мнѣ́въ си́ми преклони́ти тя́, му́чениче непобѣди́ме.

Взира́я очесы́ у́мными ко Го́споду, плотскíя неудобосте́рпныя му́къ тя́жести претерпѣ́лъ еси́ нра́вомъ до́блественнѣйшимъ, достосла́вне.

Не убоя́вся муче́ній зѣло́ болѣ́зненныхъ, дыша́ ре́вностію боже́ственною, къ подвиго́мъ отлучи́лся еси́, зовы́й: неи́щемь, пріидо́хъ самозва́нъ.

Богоро́диченъ: Отъ а́довыхъ мя́ вра́тъ изъ Тебе́ Воплоще́йся возведе́, дре́ва вку́сомъ лука́вымъ умерщвле́наго, Всенепоро́чная, сме́рть во́льную пріе́мый.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Вжиля́емь Христо́вымъ, всеблаже́нне, всеору́жіемъ, я́звъ болѣ́зни претерпѣ́лъ еси́, ураня́емь лю́тѣ и въ темни́цѣ заключа́емь, я́ко о́бщникъ страсте́й и Ца́рствія бы́лъ еси́.

Богопокрыва́емь я́вѣ и Того́ ре́вностію разжига́емь, скве́рная уче́нія беззако́нныхъ разруши́лъ еси́ твои́ми уче́ніи, всему́дре, благода́тію бо отъ Бо́га, о́тче, обогати́вся досто́йно.

Въ видѣ́ніи дѣ́лателенъ, въ дѣя́ніи богосло́въ бы́лъ еси́ на́мъ, богоглаго́ливе, по́стникъ учи́теленъ, священному́ченикъ сла́венъ, Правосла́вія сто́лпъ, Це́ркве утвержде́ніе.

Богоро́диченъ: Соприсносу́щное Отцу́ и Ду́ху Бо́гъ Сло́во обнови́ти восхотѣ́въ родонача́льника, по Ѵпоста́си того́ изъ Тебе́, Чи́стая, прія́тъ, святѣ́йшу всѣ́хъ Тя́, Богома́ти, обрѣ́тъ.

Конда́къ [преподо́бнаго], гла́съ 2. Подо́бенъ: Вы́шнихъ ища́.

По́стническое и равноа́нгельное житіе́ твое́ страда́льческими уясни́лъ еси́ по́двиги и а́нгеломъ совсе́льникъ, богоблаже́нне, яви́лся еси́, Ѳео́доре. Съ ни́ми Христу́ Бо́гу моля́ся не преста́й о всѣ́хъ на́съ.

Икосъ:

По́стниковъ свѣ́тлую добро́ту, Це́ркве Христо́вы утвержде́ніе, ны́нѣ Ѳео́дора восхва́лимъ: но́вый бо сто́лпъ о́гненъ яви́ся, попаля́я главы́ ерети́чествующихъ, вѣ́рныхъ же просвѣща́я ду́ши къ вѣ́рѣ пра́вѣй, въ Боже́ственный гра́дъ, вы́шній Іерусали́мъ, я́коже друга́го Изра́иля, вводя́. Къ нему́же согла́сно возопіе́мъ: всеблаже́нне о́тче, не забу́ди, Христу́ моля́ся непреста́нно о всѣ́хъ на́съ.

Сѣда́ленъ [му́ченика], гла́съ 8. Подо́бенъ: Прему́дрости.

Иже пре́жде невѣ́дѣнія тмо́ю лю́тою, богому́дре му́чениче Ми́но, одержи́мый Еги́петъ возсія́ тя́, свѣти́льника всемíрна, безбо́жія но́щь крѣ́пко отгоня́ща заря́ми, блаже́нне, боже́ственныхъ по́двигъ твои́хъ. Тѣ́мъ, свѣтоно́сный и честны́й тво́й де́нь свѣ́тло пра́зднующе, прилѣ́жно зове́мъ ти́: страда́льцевъ удобре́ніе, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, преподо́бнаго, гла́съ 3. Подо́бенъ: Боже́ственныя вѣ́ры.

Боже́ственными догма́ты обогати́вся, вѣ́ру соблю́лъ еси́ правосла́вія, предбѣ́дствовавъ за ню́, Ѳео́доре, въ заточе́ніихъ пострада́въ и біе́ніихъ, въ темни́цахъ претерпѣ́въ озлобле́нія, о́тче преподо́бне, Христа́ Бо́га моли́ дарова́ти на́мъ ве́лію ми́лость.

Богоро́диченъ:

Боже́ственная ски́нія была́ еси́ Сло́ва, еди́на Пречи́стая Дѣ́во Ма́ти, чистото́ю а́нгелы превозше́дшая, па́че всѣ́хъ мене́ пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница, Сло́ва нетлѣ́нная Дѣ́во Ма́ти, на Крестѣ́ зря́щи повѣ́шена изъ Нея́ безболѣ́зненно Прозя́бшаго, матеролѣ́пно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Кропле́ніемъ твои́хъ крове́й погасо́ша у́гліе многобо́жія, по́лкъ же де́монскій погрузи́ся, Христо́ва же напои́ся Це́рковь, страстоте́рпче всеблаже́нне Ми́но, хва́лящи тя́.

Иже на дре́вѣ повѣ́шеніемъ образу́еши стра́сть, Кресто́мъ змíя, му́чениче, го́рькаго умертви́вша, строга́нія терпи́ши, хода́тайствующія тебѣ́ наслажде́ніе, и́же на небесѣ́хъ до́блественнѣйше.

Па́че естества́ болѣ́зни, страда́льче, искуше́ніе прія́лъ еси́, и боже́ственное раче́ніе, твое́ удержа́вши естество́, забве́ніе прія́ти творя́ше, поуща́я тя́ простира́тися къ ра́намъ, веселя́щася.

Богоро́диченъ: Воплоще́нна неизрече́нно, Бо́га родила́ еси́, отъ Твои́хъ крове́й до́мъ Себе́ созда́вшаго, во дву́хъ существа́хъ и хотѣ́ніихъ зна́емаго боголѣ́пно, Неискусобра́чная.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Да́ръ Бо́жій да́лся еси́ мíру тезоимени́тъ, бога́тыми дарми́ сія́ющъ, я́ко исто́чникъ имѣ́яй и́стинно озаре́ній су́щихъ, блаже́нне Ѳео́доре. Тѣ́мъ учи́телемъ, по́стникомъ и свидѣ́телемъ сликовствова́ти мно́жеству сподо́бился еси́.

О, тве́рдаго и крѣ́пкаго твоего́ противле́нія! Имже мучи́телей свирѣ́пство попра́лъ еси́, его́же ра́ди я́вственно ты́ па́че ума́ благонача́льства коне́чное блаже́нство пости́глъ еси́, богому́дре, со безтѣле́сными поя́: си́лѣ Твое́й сла́ва, Человѣколю́бче.

Глаго́лъ Бо́жій въ тебѣ́ я́вственнѣйше все́лься, догма́товъ, прему́дре Ѳео́доре, рѣ́ки то́читъ оби́льно: тѣ́ми же ны́нѣ наслажда́ющеся, ученицы́ твои́, богодухнове́нне, благода́рно вопіе́мъ гла́сы немо́лчными: си́лѣ Твое́й сла́ва, Человѣколю́бче.

Богоро́диченъ: Всего́ въ Тебѣ́ обновля́етъ человѣ́ка, ве́сь всему́, Всечи́стая, соединя́емь, Иже, Оте́ческихъ нѣ́дръ не отсту́пль, и въ Твое́ чре́во всели́тися изво́ли, бога́тствомъ благоутро́бія во́льно обнища́въ и обогати́въ мíръ Божество́мъ.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Свидѣ́тельства облиста́въ свѣ́тлыми луча́ми, омрачи́въ те́мное безбо́жіе, всему́дре, просвѣти́лъ еси́ вѣ́рныхъ исполне́нія, воспѣва́ющихъ тя́, всехва́льне.

Исчезе́ вся́кое примышле́ніе враго́въ крѣ́пкимъ твои́мъ терпѣ́ніемъ, ни гла́дъ бо, ни ра́ны, ни опале́ніе, ни трезу́бецъ озлобле́ніе твоего́ усе́рдія помрачи́ша.

Вѣ́рою огра́ждся, я́ко со́лнце луча́ми, въ пусты́ню всели́лся еси́ и гра́ды вся́ просвѣти́лъ еси́, проповѣ́дая Христа́, Сы́на Бо́жія, въ пло́ти прише́дшаго, сла́вне.

Богоро́диченъ: Новотвори́тъ истлѣ́вша мя́, ражда́емый изъ Тебе́ па́че естества́ Изба́витель, дре́внія мя́ кля́твы свобожда́я, Богома́ти Чи́стая, Его́же моли́ спасти́ мя.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Умъ, и ду́шу, и тѣ́ло сло́вомъ очи́стивъ, хра́мъ всече́стенъ Бо́га всѣ́хъ бы́лъ еси́, жи́въ же и одушевле́нъ, благово́нія же́ртву, всего́ себе́ Христу́ принося́, о́тче, іере́й и же́ртва бы́въ.

Осія́емь, блаже́нне, заре́ю Ду́ха, всѣ́мъ возблиста́лъ еси́ богосло́внымъ язы́комъ Тро́ичный Свѣ́тъ пречи́стый, воплоще́нія же е́же па́че ума́ Бо́жія Сло́ва неизрече́нное, о́тче, та́инство.

Разу́мно со а́нгелы ны́нѣ водворя́яся, Христа́ моли́ страсте́й и бѣ́дъ изба́вити блажа́щія и чту́щія всечестну́ю и боже́ственную па́мять страда́ній твои́хъ, богоно́се Ѳео́доре.

Богоро́диченъ: Неизглаго́ланнымъ, Дѣ́во, о́бразомъ Сы́нъ Бо́жій, въ Тя́ всели́вся, Человѣ́къ быва́етъ, пре́жде вѣ́къ изъ Отца́ возсія́вый, человѣ́ка отъ тли́ избавля́етъ и къ жи́зни и нетлѣ́нію возведе́, я́ко еди́нъ Благоутро́бенъ.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Безболѣ́зненъ пребыва́еши, огне́мъ изнуря́емь и власяны́ми претира́емь я́звы ру́бищи: Боже́ственная бо благода́ть, спрису́тствующи, Ми́но, укрѣпля́ше.

Предстои́ши предъ суди́щи мучи́телей, суди́мь, и, ле́сть облича́я, Ми́но всеприснопа́мятне, тебе́ сама́го сто́лпъ благоче́стія вѣ́рнымъ подая́.

По́ты твои́хъ боре́ній ле́сть изсуши́лъ еси́ и́дольскую, тебе́ сама́го хра́мъ созда́лъ еси́ Честны́я Тро́ицы, страстоте́рпче Ми́но досточу́дне.

Богоро́диченъ: Уврачи́ неисцѣ́льныя стра́сти, Всенепоро́чная, души́ моея́, бы́ліемъ Твоея́ бла́гости, блага́го Спа́са Христа́ су́щимъ въ мíрѣ ро́ждшая.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Цѣлому́дренно твою́ жи́знь, священноглаго́льниче, соверши́лъ еси́, пра́вдою же украси́вся, му́жествомъ и му́дростію, краснѣ́йшую колесни́цу добродѣ́телей сочета́лъ еси́ себѣ́, всеблаже́нне преподо́бне.

Благоуха́ютъ благолѣ́пно догма́товъ боже́ственная словеса́ твоя́ и изъ глубины́ злы́хъ ересе́й вся́ возво́дятъ, всему́дре, правосла́вія къ превы́шнѣй кра́йности.

Возсія́ тебѣ́ свѣ́тъ, и сего́, о́тче, сопру́гъ весе́ліе ны́нѣ свѣ́тлое я́вѣ: я́ко фи́никсъ, бо процвѣ́лъ еси́, всеблаже́нне Ѳео́доре, и, я́ко ке́дръ, умно́жился еси́, досточу́дне.

Богоро́диченъ: Да изба́вимся отъ лю́тыхъ прегрѣше́ній мольба́ми Твои́ми, Богороди́тельнице Чи́стая, и да улучи́мъ, Пресвята́я, Боже́ственнаго осія́нія изъ Тебе́ неизрече́нно воплоще́ннаго Сы́на Бо́жія.

Конда́къ, гла́съ 4. Подо́бенъ: Яви́лся еси́.

Во́инства исхити́ привре́меннаго и нетлѣ́ннаго показа́ тя небе́снаго о́бщника, страстоте́рпче Ми́но, Христо́съ, Бо́гъ на́шъ, Иже му́чениковъ нетлѣ́нный вѣне́цъ.

Икосъ:

Вели́каго хода́тай на́мъ е́сть весе́лія па́мять му́чениковъ, на стра́сти му́жество и побѣ́ду на враги́ показу́ющи въ свѣ́тлѣмъ и ра́достнѣмъ исповѣ́даніи благода́ти. Пріиди́те у́бо въ не́й, празднолю́бцы вси́, и возвесели́мся, вре́мя на́шего весе́лія лу́чшее и пребыва́ющее, Ми́ны страда́льца па́мять соверша́юще и пріе́млюще страсте́й разрѣше́нія да́ръ: сего́ же да́тель Христо́съ Бо́гъ е́сть, му́чениковъ нетлѣ́нный вѣне́цъ.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Совле́клъ еси́ ра́нами ты́ ко́жныя ри́зы грѣха́ и во одѣя́ніе одѣ́ялся еси́, не ктому́ обветша́ніе пріе́млющее, блаже́нне, е́же истка́ благода́ть я́вльшися.

Разжже́ніемъ честны́хъ, му́чениче, и крѣ́пкихъ твои́хъ по́двигъ терно́вное и лука́вое безбо́жіе пепели́тся, крове́й же тече́ньми погаша́ется невѣ́дѣнія возвы́шенный пла́мень, всеблаже́нне.

Имѣ́яй оби́льныя да́ры, и чудодѣ́йствія источа́еши честны́й тво́й пра́здникъ соверша́ющимъ, Ми́но досточу́дне, и содѣ́йствуеши пою́щимъ: Бо́же оте́цъ, благослове́нъ еси́.

Богоро́диченъ: Благослове́нъ Пло́дъ благослове́ннаго Твоего́ чре́ва, Его́же благословя́тъ небе́сныя си́лы и земны́хъ собра́нія, Иже на́съ изба́вивый кля́твы дре́внія, Благослове́нная.

Инъ.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Ви́дѣвъ Прови́децъ твоего́ ра́зума чистоту́, слове́сныхъ тя́ ове́цъ па́стыря, о́тче, предлага́етъ, Ему́же ны́нѣ, всеблаже́нне, зове́ши, Ѳео́доре, веселя́ся: благослове́нъ Бо́гъ оте́цъ на́шихъ.

Боже́ственному подо́бію о́браза, треблаже́нне, вочеловѣ́ченія Христо́ва, покланя́яся, пребыва́еши, богобо́рцемъ противля́яся да́же до кро́ве и поя́, Ѳео́доре: благослове́нъ Бо́гъ оте́цъ на́шихъ.

Сло́во твое́ со́лію услажде́но яви́ся, всебога́те, и житіе́ твое́, о́тче, просвѣще́но заре́ю Ду́ха, Имже ны́нѣ блиста́яся, вопіе́ши, ра́дуяся: благослове́нъ Бо́гъ оте́цъ на́шихъ.

Богоро́диченъ: Се́ ны́нѣ испо́лнися Дави́да боже́ственнаго боже́ственное прорече́ніе: мо́лятся и́стинно Твоему́ лицу́, Богороди́тельнице Чи́стая, иму́щіи бога́тство благода́ти ны́нѣ, благословя́ще Бо́га оте́цъ на́шихъ.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Вѣне́чникъ, Ми́но, яви́лся еси́, враги́ Креста́ Го́спода твоего́, низложи́въ у́бо, посрами́лъ еси́ и вопія́лъ еси́, всеблаже́нне: вся́ дѣла́ Го́спода по́йте и превозноси́те Его́ во вѣ́ки.

Ди́вна творя́ Бо́гъ въ па́мяти твое́й, источа́я на́мъ мощми́ твои́ми душе́вная исцѣле́нія и тѣле́сная, вопію́щимъ: вся́ дѣла́ Го́спода по́йте и превозноси́те Его́ во вѣ́ки.

Прине́слъ еси́ Бо́гу служе́ніе твое́ и на земли́, преклони́въ главу́ твою́, мече́мъ прія́лъ еси́ отсѣче́ніе, му́чениче, зовы́й: вся́ дѣла́ Го́спода по́йте и превозноси́те Его́ во вѣ́ки.

Яко багряни́цею и ви́ссомъ, кро́вію ва́шею Це́рковь украша́ется дне́сь, Ми́но, и Ви́кторе, и Вике́нтіе, вопію́щи: вся́ дѣла́ Го́спода по́йте и превозноси́те Его́ во вѣ́ки.

Богоро́диченъ: Дѣ́вствуетъ чре́во и ро́ждши Сы́на, Его́же безъ сѣ́мене отъ Свята́го Ду́ха зача́тъ, Бо́га неопи́санна, въ пло́ть обле́кшася, Отцу́ собезнача́льна Сло́ва. Его́же вся́ дѣла́, я́ко Го́спода, пою́тъ и превозно́сятъ во вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Прогна́ны показа́лъ еси́, богоно́се Ѳео́доре, обрѣта́тели злочести́выхъ ересе́й, уча́ пречи́стый чти́ти о́бразъ Христо́въ, покланя́тися же и че́стно почита́ти богому́дренно и пѣ́ти Влады́цѣ: свяще́нницы, благослови́те, лю́діе, превозноси́те Его́ во вѣ́ки.

Во все́мъ житіи́ твое́мъ, богоглаго́ливе Ѳео́доре, правосла́вія путево́ждь бы́лъ еси́, свѣти́льникъ свѣтлѣ́йшій, богови́дный учи́тель, о́бразъ мона́ховъ и извѣ́стенъ законопи́сецъ, науча́я воспѣва́ти: свяще́нницы, благослови́те Влады́ку Христа́ и превозноси́те Его́ во вѣ́ки.

На земли́ подвиза́лся еси́ благоче́стія защи́тникъ и непра́вды нелжи́вый обличи́тель, всеблаже́нне, бы́въ, я́ко да́ръ Бо́жій, и на небесѣ́хъ пра́вды вѣнча́лся еси́ вѣнцы́, тече́ніе соверши́лъ еси́ и вѣ́ру соблю́лъ еси́, превознося́ Христа́ во вѣ́ки.

Смы́сломъ у́мъ украси́лъ еси́, цѣлому́дріемъ жела́ніе, я́ростное же му́жествомъ препоя́салъ еси́, Ѳео́доре всему́дре, пра́вдою испра́вивъ священнолѣ́пно душе́вныя твоя́ си́лы, согла́сно воспѣва́я: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Богоро́диченъ: Благослове́нная Пречи́стая, души́ моея́ стру́ны и грѣха́ я́звы очи́сти: Бо́га бо ро́ждшая, су́щаго надъ всѣ́ми, Отрокови́це Чи́стая, изъ дѣ́вственныя неискусобра́чныя утро́бы. Его́же благослови́тъ вся́ тва́рь и превозно́ситъ во вся́ вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Возлюби́лъ еси́ па́че не ме́ньше, не́жели возлю́бленъ бы́лъ еси́, страстоте́рпче, возлю́бленную твою́ ду́шу предложи́въ рачи́телю твоему́, Христу́, съ Собо́ю просла́вльшему свидѣ́тельство твое́, приснопа́мятне.

Свѣ́щникъ, свѣ́томъ трисо́лнечнымъ вжига́емь, му́чениковъ яви́ся тричи́сленная еди́ница, Ми́на, и Ви́кторъ же, и Вике́нтій, вѣ́рныхъ просвѣща́ющій и мра́къ де́монскій отгоня́ющій.

Пріими́ хвалу́, я́ко до́лгъ, отъ усе́рдія исходя́щу, превосходя́ща тя́, Ми́но, на́шихъ слове́съ у́бо всѣ́мъ, и возда́ждь безчи́сленно отъ сокро́вищъ твои́хъ дарова́нія.

Богоро́диченъ: Досто́йно Тя́ вси́, Ма́терь Царя́ и Влады́ки, дре́вле у́бо проро́цы хваля́ху, ны́нѣ же апо́столи и му́ченицы, съ на́ми сла́вяще, Тя́, Богоро́дицу, велича́ютъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Тече́ньми твои́хъ сле́зъ, я́ко по́стникъ, и исто́чники крове́й, я́ко свидѣ́тель Христо́въ, просвѣти́вся, сія́еши обою́ду свѣ́тло, пра́вдою, преподо́бне, одѣ́янъ, я́ко свяще́нникъ, въ боже́ственныхъ жи́тельствуеши ли́цѣхъ, ны́нѣ просвѣща́емь въ нехо́дныхъ, треблаже́нне.

Чи́стѣ твое́ житіе́ преше́дъ, во святы́хъ свята́я селе́ніихъ ны́нѣ живе́ши, вѣне́цъ благолѣ́пія пріе́мъ и ца́рства одѣя́ніе великолѣ́пное же и свяще́нное, въ ни́хже ны́нѣ, озаря́емь, предстои́ши невѣ́стнику, наслажда́яся обоже́нія.

Ви́дѣти сподо́бился еси́ благи́хъ исто́чникъ, богоно́се Ѳео́доре, я́ко проше́дъ житіе́ боже́ственнѣйшее и́стинно, отъ мірска́го сво́йства житіе́мъ чи́стымъ у́мъ свободи́въ, я́ко свидѣ́тель и страстоно́сецъ бы́лъ еси́, свяще́нне.

Глаго́лъ твои́хъ вѣща́ніе, дарова́ніе Бо́жіе, на́мъ всеслы́шанъ бы́сть, всехва́льне, я́ко гро́мъ, вселе́нныя въ концѣ́хъ, и, я́коже рѣ́ки, истека́ютъ твои́хъ уче́ній списа́нія. Тѣ́мъ тя́ богосло́ва и богоглаго́льника досто́йно имену́емъ.

Богоро́диченъ: Яви́лася еси́, о Дѣ́во Ма́ти Бо́жія, па́че естества́ ро́ждши въ тѣлеси́ благо́е Сло́во, Его́же Оте́цъ отъ се́рдца Своего́ отры́гну пре́жде всѣ́хъ вѣ́къ я́ко Бла́гъ, Его́же ны́нѣ и тѣле́съ превы́шша разумѣва́емъ, а́ще и въ тѣ́ло облече́ся.

Свѣти́ленъ окто́иха, и му́чениковъ. Подо́бенъ: Не́бо звѣзда́ми.

Небеса́ звѣ́зды украша́ютъ, Іису́се, Це́рковь же Ми́на, и Ви́кторъ, и Вике́нтій украша́ютъ и Стефани́да, и́хже ра́ди побѣ́ды на проти́вныя Импера́тору да́руй.

Сла́ва, преподо́бнаго:

Яко сто́лпъ одушевле́нъ, яви́лся еси́ догма́товъ правосла́вія благоче́стно, обличи́въ иконобо́рцовъ пре́лесть, тѣ́мъ и, страда́ніемъ соверши́въ исповѣ́даніе, Ѳео́доре, просла́вился еси́.

И ны́нѣ, богоро́диченъ:

Вси́ вѣ́рніи Хода́таицу Тя́ къ Ро́ждшемуся изъ Тебе́ ны́нѣ предлага́ютъ, Всечи́стая, мы́ же мно́жае, и́же сраспина́еміи Тому́. Тѣ́мъ не преста́й, Дѣ́во, за ны́ моли́тися.

На стихо́внѣ окто́иха. Та́же му́чениковъ стихи́ра, гла́съ 2:

Сти́хъ: Воззва́ша пра́ведніи, и Госпо́дь услы́ша и́хъ.

Пріиди́те, вѣ́рніи, почти́мъ страстоте́рпца Христо́ва — Ми́ну сла́внаго, до́бляго въ во́инѣхъ, до́брѣ подвиза́вшася по благоче́стіи, царе́й же и мучи́телей держа́ву низложи́вша. Тѣ́мъ дерзнове́ніе имѣ́я ко Христу́ Бо́гу, непреста́нно мо́литъ спасти́ ду́ши на́ша.

Сла́ва, преподо́бнаго, гла́съ 8:

Мона́ховъ мно́жества наста́вника тя́ почита́емъ, о́тче на́шъ Ѳео́доре, твое́ю бо стезе́ю вои́стинну пра́во ходи́ти позна́хомъ, блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Го́споди, а́ще и на суди́щи.

Го́споди,* егда́ Тя́, Со́лнца пра́вды* со́лнце ви́дѣ,* на дре́вѣ повѣ́шена,* лучи́ скры́,* и луна́ свѣ́тъ* во тму́ преложи́,* Всенепоро́чная же Твоя́ Ма́ти* утро́бою уязвля́шеся.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ къ Ефесе́емъ, зача́ло 233. И преподо́бнаго, Апо́столъ ко Евре́емъ, зача́ло 335. Аллилу́ія, гла́съ 4: Воззва́ша пра́ведніи, [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ]. Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Ева́нгеліе Матѳе́я, зача́ло 38. И преподо́бнаго, Ева́нгеліе Матѳе́я, зача́ло 10. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 88 – 96.

/ Къ оглавленію раздѣла /


Наверхъ / Къ титульной страницѣ

0