Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 11-й де́нь.
Па́мять свята́го великому́ченика во царѣ́хъ, Стефа́на Се́рбскаго, и́же въ Деча́нѣхъ.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Небе́сніи ны́нѣ а́нгели торжеству́ютъ мы́сленно въ па́мять до́бляго подви́жника и, къ на́мъ неви́димо сходя́ще, осѣня́ютъ, поле́зная да́рующе.

Му́чениковъ честны́й собо́ръ, съ на́ми совоку́плься, сликовству́етъ и торжеству́етъ, сла́вя и воспѣва́я Христа́, Иже Стефа́на си́це просла́вльшаго.

Сла́ва, гла́съ 6:

Весна́ на́мъ дне́сь въ зи́мныя го́ды возсія́, пріиди́те, бра́тіе мучениколю́бцы, обере́мъ цвѣ́ты добродѣ́телей, я́же изнесе́ на́мъ Стефа́нъ, Христо́въ учени́къ нело́жный, и́же да́нный ему́ тала́нтъ до́брѣ умно́живый и вѣ́ренъ яви́ся своему́ Влады́цѣ, и и́же я́ко дре́во при исхо́дищихъ во́дъ пло́дъ сво́й да́стъ во вре́мя свое́, и на́мъ про́ситъ отъ Христа́ Бо́га ве́лію ми́лость.

И ны́нѣ, богоро́диченъ:

Арха́нгельски воспои́мъ, вѣ́рніи, небе́сный черто́гъ и две́рь запеча́тану вои́стинну: ра́дуйся, Ея́же ра́ди отрасте́ на́мъ Спа́съ всѣ́хъ Христо́съ, Жизнода́вецъ и Бо́гъ. Низложи́, Влады́чице, мучи́тели, безбо́жныя враги́ на́ша руко́ю Твое́ю, Пречи́стая, упова́ніе христіа́нъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Отъ за́пада со́лнце возсія́, зари́ благоче́стія испуща́я — Стефа́нъ, во царѣ́хъ му́ченикъ.

Сти́хъ: Пра́ведникъ, я́ко фи́никсъ процвѣте́тъ, [и я́ко ке́дръ, и́же въ Лива́нѣ, умно́жится].

Се́рбская племена́ вся́, усе́рдно стеци́теся, своего́ засту́пника сла́вяще.

Сти́хъ: Насажде́ни въ дому́ Госпо́дни во дво́рѣхъ [Бо́га на́шего процвѣту́тъ].

Послѣ́днимъ си́ вре́менемъ, ты́ красота́ показа́лся еси́, многострада́льне Стефа́не.

Сла́ва, гла́съ и подо́бенъ то́йже:

Го́сподеви предстоя́, сла́вне, Его́же возлюби́лъ еси́, твое́ ста́до помина́й.

И ны́нѣ, богоро́диченъ:

Богоро́дицу Тя́, вѣ́рніи, вси́ исповѣ́дуемъ, Марíе Приснодѣ́во.

Тропа́рь, гла́съ 4:

Ца́рство, е́же на земли́ до́брѣ окормля́я, страда́льче, и, багряни́цу нося́, смире́нно стяжа́лъ еси́ мудрова́ніе, ни́щихъ посѣща́я и си́мъ хлѣ́бъ раздробля́я, тѣ́мже Пребоже́ственная Тро́ица Ца́рствія ку́пно и му́ченичества венце́мъ увязе́ тя́.

Сла́ва, и ны́нѣ, богоро́диченъ:

Еже отъ вѣ́ка [утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА ВЕЛИЦѢЙ ВЕЧЕРНИ,
Стихосло́вимъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 2. Подо́бенъ: Кíими похва́льными.

Кíими благопохва́льными пѣ́сньми воспои́мъ Стефа́на, небе́снаго человѣ́ка и земна́го а́нгела, благоче́стія побо́рника и нече́стія отгони́теля, столпа́ непоколеби́маго своему́ оте́честву, во бра́нехъ до́блественнаго и въ напа́стехъ терпѣли́ваго, безчи́нствующихъ казни́теля стра́шнаго и благотеку́щихъ помо́щника те́плаго, и́мже Христо́съ да́руетъ на́мъ ве́лію ми́лость. [Два́жды.]

Кíими похва́льными вѣнцы́ вѣнча́имъ Стефа́на, богоразу́мія красоту́, смиренному́дрія высоту́, горды́ни низложи́теля, стѣ́ну необори́мую своея́ ему́ оби́тели, непобѣди́маго страда́льца и втора́го Іова ра́нами, бѣсо́въ прогони́теля стра́шнаго и а́нгеловъ сожи́теля сла́внаго, и́мже Христо́съ на́мъ да́руетъ ве́лію ми́лость. [Два́жды.]

Кíими благососта́вными гла́сы возвели́чимъ Стефа́на, высокопа́рнаго орла́ чистото́ю у́мною, си́рыхъ помо́щника и вдо́въ пита́теля, стра́ждущихъ утѣ́шителя и ни́щихъ служи́теля усе́рдна, до́браго строи́теля да́нныхъ ему́ отъ Бо́га, непра́вду возненави́дѣвша и пра́вду предпоче́тшаго, и на́мъ отъ Христа́ прося́ща ве́лію ми́лость. [Два́жды.]

Кíими добрособра́нными цвѣ́ты увязе́мъ Стефа́на, Христо́ва сосу́да избра́ннаго, въ не́мже со Отце́мъ и Ду́хомъ всели́ся, Іо́сифа втора́го въ напа́стехъ и въ кро́тости Дави́да друга́го, Соломо́ну въ прему́дрости ра́внаго и Иліи́ въ ре́вности то́чнаго, царе́й о́бразъ къ добродѣ́тели, и къ ми́лости наказа́ніе извѣ́стное, и́мже Христо́съ на́мъ да́руетъ ве́лію ми́лость. [Два́жды.]

Сла́ва, гла́съ 8:

Дне́сь честно́е торжество́ небе́сная пра́зднуютъ мы́сленно, земна́я къ весе́лію созыва́юще въ па́мять до́бляго подви́жника, Стефа́на терпѣливоду́шнаго. Се́й бо всеизря́дный Христо́выхъ за́повѣдей храни́тель бы́сть извѣ́стнѣйшій, не поми́лова тлѣ́ющихъ ца́рствія ра́ди вѣ́чныя и блаже́нныя вои́стинну жи́зни, но расточи́ и даде́ убо́гимъ и му́ченическимъ вѣнце́мъ вѣнча́ся: Святѣ́й Тро́ицѣ предстоя́ непосре́дственно, смире́ніе про́ситъ мíрови и грѣхо́въ оставле́ніе, и́же вѣ́рою того́ соверша́ющимъ торжество́.

И ны́нѣ, богоро́диченъ:

Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Та́же вхо́дъ. Проки́менъ дне́ и чте́нія.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры самогла́сны, гла́съ 1:

За́падная вся́, ра́дуйтеся и, веселя́щеся, взыгра́йте, посредѣ́ себе́ иму́ще звѣзду́ незаходи́мую и многосвѣ́тлую, со́лнечныя зари́ превосходя́щую, — Стефа́на великоимени́таго, свята́го ко́рене вѣ́твь многопло́дна и избра́нна, и́стиннаго за́повѣдей Христо́выхъ дѣ́лателя, и́же Христа́ мно́го возлю́бльшаго и на́мъ отъ Него́ прося́ща ве́лію ми́лость.

Се́рбстіи ро́дове вси́, духо́вно ликовству́юще, о́бщую по́льзу восхваля́йте въ наро́читый де́нь того́ па́мяти. Посредѣ́ бо ва́съ израсте́ пе́рвѣе, я́ко шипо́къ благово́нный, и ны́нѣ посредѣ́ му́чениковъ, я́ко звѣзда́ свѣ́тлая, преосіява́етъ, и на́съ не оставля́етъ я́ко па́стырь до́брый, но посѣща́етъ неви́димо и отъ Спа́са на́мъ да́руетъ ве́лію ми́лость.

Восто́чная, за́паднымъ сра́дуйтеся и невысокому́дрствуйте, и́бо со́лнце друго́е здѣ́ пресла́вно просія́, не къ за́падомъ творя́ тече́ніе и подъ земле́ю устремля́яся, но къ небесе́мъ восхо́дъ имѣ́етъ отъ земли́, и невеще́ственнымъ спребыва́я умо́мъ, и я́же отту́ду на́мъ предпосыла́етъ лучи́: и соблюда́етъ, и освяща́етъ, и отъ Христа́ на́мъ да́руетъ ве́лію ми́лость.

Сла́ва, гла́съ 5:

Востру́бимъ духо́вною цѣвни́цею въ наро́читый де́нь пра́здника на́шего, я́же о́крестъ созыва́юще благочестивому́дреннѣ, съ высо́кимъ проповѣ́даніемъ и глаго́люще: се́ и́же на земли́ стра́хомъ ца́рствовавый, ны́нѣ на небесѣ́хъ свобо́дно ца́рствуетъ. Пріиди́те, ца́ріе, и сему́ поревну́йте и, поревнова́вше, послѣ́дуйте дѣ́ланію, да и вы́ подо́бнымъ вѣнце́мъ пріобщи́теся, се́ ми́лостыни сокро́вище пребога́тое; пріиди́те, стра́ждущіи, и пріими́те исцѣле́нія: рука́ бо, я́же тогда́ пѣ́нязи даю́щая, та́яжде и ны́нѣ дае́тъ исцѣле́нія тѣле́снымъ болѣ́знемъ и душе́внымъ страсте́мъ. Бога́тіи и ни́щіи, здра́віи и немощнíи, прише́дше, почерпи́те по вѣ́рѣ проше́нія отъ ковче́га свяще́ннаго, я́ко отъ нетлѣ́нна исто́чника, во сла́ву Спа́са и Бо́га, прославля́ющаго и́же Того́ прославля́ющихъ.

И ны́нѣ, богоро́диченъ, гла́съ то́йже. Творе́ніе Ге́рмана патріа́рха:

Востру́бимъ трубо́ю пѣ́сней, прекло́ншіися бо свы́ше Всецари́ца, Ма́ти Дѣ́ва благослове́ньми вѣнчава́етъ воспѣва́ющія Ю. Ца́ріе и кня́зи да стеку́тся, и Цари́це да воспле́щутъ въ пѣ́снехъ, Царя́ ро́ждшей, сме́ртію одержи́мыя пе́рвѣе разрѣши́ти человѣколю́бно благоволи́вшаго. Па́стыріе и учи́теліе, До́браго Па́стыря Пречи́стую Ма́терь, соше́дшеся, восхва́лимъ: свѣ́щникъ златоза́рный, свѣтоно́сный о́блакъ, небе́съ простра́ннѣйшую, одушевле́нный киво́тъ, огнезра́чный Влады́чень престо́лъ, маннопріе́мную злату́ю ста́мну, заключе́нную Сло́ва две́рь. Всѣ́хъ христіа́нъ прибѣ́жище пѣ́сньми богоглаго́ливыми похваля́юще, си́це рце́мъ: пала́то Сло́ва, сподо́би смире́нныя ны́ небе́снаго Ца́рствія, ничто́же бо невозмо́жно хода́тайству Твоему́.

На стихо́внѣ стихи́ры, гла́съ 4. Подо́бенъ: Яко до́бля.

Яко тве́рда адама́нта, всеблаже́нне Стефа́не, соше́дшеся дне́сь, восхваля́емъ тя́: я́ко напа́сти претерпѣ́въ, и сме́рть подъя́лъ еси́ непра́ведную, я́ко да двои́мъ да́ромъ сподо́битъ тя́ Христо́съ, Его́же возлюби́лъ еси́: ца́рской діади́мѣ и вѣнцу́ му́ченическому.

Сти́хъ: Пра́ведникъ, я́ко фи́никсъ процвѣте́тъ [и я́ко ке́дръ, и́же въ Лива́нѣ, умно́жится].

Яко у́тро свѣтлѣ́йшее, терпѣ́нія свѣ́тлостію, достосла́вне, показа́лся еси́. Тѣ́мже и стека́ются свяще́нницы и ца́ріе, и́ноцы и мірстíи, бога́тіи и ни́щіи, ковче́гу припа́дающе святы́хъ твои́хъ моще́й, освяще́ніе пріе́млюще.

Сти́хъ: Насажде́ни въ дому́ Госпо́дни, во дво́рѣхъ Бо́га на́шего [процвѣту́тъ].

Іовъ дре́вле на восто́цѣ, сла́венъ и имови́тъ, богочте́цъ и пра́веденъ и му́чениковъ нача́ло; но и Стефа́нъ на за́падѣ сла́вою и бога́тствомъ нетлѣ́ннымъ, я́ко во́инъ всѣ́хъ Царя́ и страда́льцевъ исполне́ніе.

Сла́ва, гла́съ 3:

Пріиди́те, празднолю́бныхъ составле́нія, пріиди́те, и ли́къ соста́вимъ; пріиди́те, вѣнча́емъ пе́сньми вѣнце́въ тезоимени́таго Стефа́на, того́ ревну́юще я́же къ Бо́гу любви́ и терпѣ́ніе похваля́юще. Вои́стинну бо до конца́ претерпѣ́ въ зако́нѣ Госпо́дни и ну́ждную подъя́тъ сме́рть рука́ми убíйственными. И къ нему́ возопіи́мъ: многострада́льне и преблаже́нне, оби́тель, ю́же возлюби́лъ еси́, въ не́йже честны́мъ твои́мъ моще́мъ ста́ти изво́лилъ еси́, и ста́до, е́же собра́лъ еси́, сохраня́й и покрыва́й, я́ко имѣ́я ко Христу́ дерзнове́ніе.

И ны́нѣ, богоро́диченъ:

Безъ сѣ́мене отъ Боже́ственнаго Ду́ха, во́лею же Отчею, зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже непреста́й моли́ти изба́витися отъ бѣ́дъ душа́мъ на́шимъ.

На благослове́ніи хлѣ́бовъ: Тропа́рь, гла́съ 4:

Въ терпѣ́ніи добрострада́льныхъ по́двигъ твои́хъ многообра́зныя ра́ны претерпѣ́лъ еси́, и по кончи́нѣ свое́й вѣне́цъ отъ Бо́га съ му́ченическими ли́ки воспріе́млеши, и въ земли́ кро́ткихъ досто́йно водворя́ешися, блаже́нне, о на́съ Христа́ Бо́га моли́ дарова́ти душа́мъ на́шимъ ве́лію ми́лость. [Два́жды.]

И Богоро́дице Дѣ́во... [Еди́ножды.]



НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1. Подо́бенъ: Ка́мени запеча́тану.

Ра́ка твоя́, свя́те, другíй бы́сть Силоа́мъ, и́же вѣ́рою приходя́щимъ разли́чныхъ неду́говъ исцѣле́нія то́читъ. Сего́ ра́ди Се́рбская племена́ вся́ въ па́мяти твое́й ра́дуются и во хвале́ніи зову́тъ тебѣ́: сла́ва Просла́вльшему тя́, сла́ва Вѣнча́вшему тя́, сла́ва Дѣ́йствующему тобо́ю пресла́вная. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію свѣ́мы вси́ Дѣ́ву вои́стину, и по Рождествѣ́ я́вльшуюся, и́же любо́вію прибѣга́ющіи къ Твое́й бла́гости, Тебе́ бо и́мамы, грѣ́шніи, предста́тельство, Тебе́ стяжа́хомъ въ напа́стехъ спасе́ніе, еди́ну Всенепоро́чную.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Удиви́шася а́нгели, па́че есте́ственное зря́ще, на тебѣ́ быва́емо, отъ ца́рствія преходя́ща въ небе́сная Ца́рствія: ужасо́шася бѣ́сове, вѣнцено́сца тя́ ви́дяще, его́же бо мня́ху страда́ньми низложи́ти, си́мъ посра́мльшеся, падо́ша, Иже сего́ тогда́ укрѣпи́вый, просвѣти́ ду́ши на́ша. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́, и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́вою пребыва́етъ.

По поліеле́и сѣда́ленъ, гла́съ 3. Подо́бенъ: Красотѣ́ дѣ́вства.

Красе́нъ оте́честву твоему́ и вселе́ннѣй благоцвѣту́щъ, вои́стину цвѣ́тъ показа́лся еси́: о́чи всѣ́хъ у́мныя и серде́чная привлача́ разумѣ́нія къ добро́тѣ твои́хъ исправле́ній. Тѣ́мже удивля́еми, отъ усе́рдія зове́мъ ти́: ра́дуйся, Деча́номъ похвало́ нело́жная. [Два́жды.]

Сла́ва, и ны́нѣ, богоро́диченъ:

Красотѣ́ дѣ́вства Твоего́ и пресвѣ́тлой чистотѣ́ Твое́й Гавріи́лъ, уди́влься, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся, тѣ́мже, я́ко повелѣ́нъ бы́хъ, вопію́ Ти: ра́дуйся, Благода́тная.

Степе́нна, 1-й антифо́нъ, 4-го гла́са. Проки́менъ, гла́съ 4: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Ева́нгеліе отъ Луки́, зача́ло 63.

По 50-мъ псалмѣ́ стихи́ра, гла́съ 6:

Дне́сь Це́рковь озаря́ется страстоте́рпца луча́ми и, я́ко цвѣ́ты, украша́ема, въ весе́ліи хва́лится, я́снымъ гла́сомъ вѣща́ющи: такова́, моя́ рожде́нія, такови́ моего́ чре́ва сы́нове. Ихже породи́хъ креще́ніемъ, воспита́хъ же млеко́мъ благоче́стія и му́ченики содѣ́лахъ и́стинны: да мо́лятся о вселе́ннѣй ко Го́споду.

Кано́нъ Богоро́дицы на 6, гла́са 2-го, и свята́го на 8.

Кано́нъ свята́го, его́же краегране́сіе: Но́вому му́ченику но́ву приношу́ да́ра пѣ́снь. Гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Новоявле́нна, я́ко со́лнце, изнесе́ тя за́падная страна́ заря́ми свѣтолу́чными, Стефа́не, концы́ осіява́юща и та́йно просвѣща́юща Го́сподеви побѣ́дную пѣ́снь пою́щихъ.

Очи стяжа́въ у́мныя лише́ніемъ чу́вственныхъ, и ны́нѣ зри́ши я́сно, я́же о́ко не ви́дѣ, по апо́столу, и на се́рдце человѣ́ку не взыдо́ша, я́же тебѣ́ даде́ Христо́съ, Того́ возлю́бльшему.

Вои́стинну, — рече́ Соломо́нъ, — па́мять пра́веднаго съ похвала́ми; се́ бо ны́нѣ собра́шася разли́чныхъ язы́къ ро́дове, хвала́ми вѣнчава́юще Стефа́новъ ве́рхъ нетлѣ́нный.

Очи́стивъ у́мъ и се́рдце и ду́шу свобо́дну содѣ́лавъ, сла́вне, бы́лъ еси́ сосу́дъ избра́нный, досто́инъ Бо́жія посѣще́нія. Тѣ́мже и, прише́дъ, Христо́съ съ Отце́мъ и Ду́хомъ оби́тель въ тебѣ́ сотвори́.

Богоро́диченъ: Гора́ высока́, ю́же ви́дѣ Даніи́лъ, отъ нея́же ка́мень отсѣче́ся, му́жескихъ ру́къ кромѣ́, Тебе́ прообразова́, Богоро́дице. Безъ му́жа бо на́мъ пло́тію породила́ еси́ Емману́ила.

Катава́сія по уста́ву.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Млеко́ сса́въ прему́дрости, отъ ю́ностнаго, блаже́нне, во́зраста и въ стра́сѣ Бо́жіи поуча́яся при́сно, преплы́лъ еси́ житія́ пучи́ну, Христа́ имѣ́я Ко́рмчія, Иже и наста́ви тя́ въ небе́сная блага́я приста́нища.

Уче́нію внима́я ева́нгельскому, пребога́те, блажа́щему ми́лостивыя, ми́лостивъ бы́лъ еси́ и кро́токъ, тѣ́мже и поми́лованъ бы́въ, зе́млю наслѣ́довалъ еси́, кро́ткимъ угото́ванную.

Моли́твами прилѣ́жными привле́клъ еси́ Утѣ́шителя, Иже и, всели́вся въ чи́стую твою́ ду́шу, свѣтови́дна всего́ тя́ содѣ́ла, стра́шна же и чу́дна всѣ́мъ и́же о́крестъ царе́мъ, въ на́шу похвалу́ и торжество́.

Устыдѣ́ся твои́хъ слове́съ боговѣща́нныхъ и прему́дрыхъ самоде́ржецъ Гре́ческій и собо́ръ святи́тельскій: не терпя́ше бо зрѣ́ти злосла́вныя, я́ко во́лки, посредѣ́ ста́да благочести́выхъ.

Богоро́диченъ: Рече́ боже́ственный Іезекіи́ль: и бу́детъ две́рь затворе́на. — Сіе́ на Тебѣ́ испо́лнися, Влады́чице: вни́де бо несказа́нно въ Тя́ Отчее Сло́во и мíрови яви́ся изъ Тебе́ пло́тію, Дѣ́ву Тя́ сохрани́въ во обои́хъ.

Сѣда́ленъ, гла́съ 8. Подо́бенъ: Прему́дрости сло́ва.

Прему́дрости рачи́тель бы́въ и сокро́вище добродѣ́телей, отону́дуже и поче́рплъ еси́ боже́ственная разумѣ́нія и, о тлѣ́ющихъ нерадѣ́въ, нетлѣ́ннымъ внима́лъ еси́. Тѣ́мже и, я́же возлюби́въ сія́, по кончи́нѣ наслѣ́довалъ еси́, пріе́мля досто́йныя мзды́ дѣ́ланіемъ отъ правосудя́щаго вся́ про́мысла. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти покланя́ющимся вѣ́рою святы́мъ моще́мъ твои́мъ. [Два́жды.]

Сла́ва, и ны́нѣ, богоро́диченъ:

Помышля́ю су́дъ и бою́ся истяза́нія, трепе́щу стра́шныя и ужа́сныя му́ки, огня́ болѣ́зни, тмы́ же и та́ртара. Увы́! что́ сотворю́, сту́дъ ка́ко претерплю́? егда́ кни́ги отве́рзутся и дѣя́нія облича́тся. Сего́ ра́ди припа́даю Ти́, Богоро́дице Пречи́стая: тогда́ предста́ни ми́, ну́жды о́ныя изыма́ющи, Тебе́ бо и́мамы прибѣ́жище, Влады́чице.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Человѣ́къ у́бо Стефа́нъ по естеству́, но па́че человѣ́ка ре́вностію, я́коже другíй Илія́, казня́ нечести́выя и снабдѣва́я правосла́вныя, еретико́въ же ча́да, я́ко душегу́бныя во́лки, отъ свои́хъ предѣ́лъ отгоня́етъ.

Еже у́бо по о́бразу до́брѣ соблюде́ Стефа́нъ вои́стину, но и е́же по подо́бію въ таковѣ́мъ пла́ваніи житія́ на́шего мо́ри: у́мъ бо влады́ку страсте́мъ устро́и, зовы́й съ весе́ліемъ души́: сла́ва си́лѣ Твое́й, Го́споди.

Ниже́ ско́рбь, ни тѣснота́, ниже́ заточе́ніе многолѣ́тное, ни избоде́ніе оче́съ твое́ возмого́ша поколеба́ти отъ Влады́ки жела́ніе, но пребы́лъ еси́ неизмѣ́ненъ, зовы́й съ весе́ліемъ: сла́ва си́лѣ Твое́й, Го́споди.

Имѣ́я ко Влады́цѣ Твоему́, великому́чениче, дерзнове́ніе, вселе́ннѣй ми́ръ испроси́, твоего́ оте́чества хору́гвы укрѣпи́ на ва́рвары безбо́жныя и тишину́ да́руй твои́мъ лю́демъ, и́бо и съ на́ми егда́ бы́лъ еси́, ми́рно устрое́ніе на́ше имѣ́яше жи́тельство.

Богоро́диченъ: Изобразова́ше иногда́ дре́вняго Изра́иля въ Чермнѣ́мъ проше́ствіе Твое́ непостижи́мое Рождество́: я́коже бо о́нъ немо́кренными стопа́ми про́йде бе́здну морску́ю, та́ко и Христо́съ, Дѣ́во, безъ сѣ́мене отъ пречи́стыхъ Твои́хъ крове́й произы́де.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Къ ца́рствія о́бласти и учи́тельства да́ръ приложи́ся тебѣ́: вѣща́я бо поле́зная, всѣ́хъ сердца́ привле́клъ еси́ къ вѣ́рѣ и́стиннѣй и плодоно́сныхъ показа́въ. И, я́ко сотвори́въ и научи́въ, вели́къ обрѣ́лся еси́ во Ца́рствіи небе́снѣмъ.

Ужасъ объе́млетъ мя́ слы́шаща непра́ведныя ти́ сме́рти о́бразы, но ра́дость пріе́млетъ мя́, честны́я твоя́ мо́щи зря́ща. Вои́стинну бо, по вели́кому апо́столу, недосто́йна страда́нія ны́нѣшняго вре́мене ко откры́вшейся сла́вѣ на тебѣ́.

Не бы́лъ еси́ ме́ньшій вѣ́рою и жела́ніемъ боже́ственнымъ Симео́на и Са́ввы, свяще́нныхъ и богоно́сныхъ твои́хъ оте́цъ, но си́ми у́бо и и́нѣми добродѣ́тельми подо́бенъ и́мъ бы́лъ еси́, превозше́лъ же еси́ тѣ́хъ и́менемъ и вѣнце́мъ му́ченическимъ.

Очи всѣ́хъ ни́щихъ на тя́ упова́ху, — я́коже къ Бо́гу рече́ Дави́дъ, — и ты́ дая́лъ еси́ пи́щу и́мъ я́ко Бо́жій служи́тель предъ очи́ма Госпо́днима. Тѣ́мже и наслѣ́довалъ еси́, блаже́нне, угото́ванное ми́лостивымъ Ца́рствіе.

Богоро́диченъ: Го́ра Сина́йская дре́вле о́бразъ показа́ непостижи́маго Твоего́ Рождества́ законода́вцу въ купинѣ́, и́бо о́гнь та́мо не опали́ купину́, ниже́ здѣ́, Богороди́тельнице, Огнь Божества́ Твою́ Боговмѣсти́мую утро́бу.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Во бра́нѣхъ до́блественъ бы́лъ еси́, сопроти́вныхъ побѣжда́я не щито́мъ, ни копіе́мъ, не на лу́къ бо тво́й упова́лъ еси́ когда́, но честны́хъ ру́къ воздѣя́ніемъ, я́коже Моисе́й Амали́ка въ пусты́ни, и моли́твою го́рдыхъ низлага́лъ еси́.

Ублажи́ша тя́ ца́ріе, благослови́ша святи́теліе, слы́шаще пресла́вная твоя́ исправле́нія: о́бразъ бо и надписа́ніе къ добродѣ́тели стяжа́ша тя́. И ны́нѣ, вѣ́рою приходя́ще, честны́мъ стопа́мъ покланя́ются.

Прине́слся еси́, же́ртва непоро́чная, на́съ ра́ди Поже́ршемуся серде́чною чистото́ю и незло́біемъ: и всесожже́ніе и́стинно, свя́то и одушевле́нно му́ченическимъ исхо́домъ, заколе́ніе соверше́нно Бо́гови.

Разжже́ніе стрѣлы́ неви́димаго стрѣльца́, тебѣ́ прирази́вшееся, Стефа́не, погаси́лъ еси́ благода́рственнымъ терпѣ́ніемъ и недѣ́йственна показа́лъ еси́, дѣ́лы на́съ науча́я, терпѣ́ніемъ того́ ко́зни побѣжда́ти.

Богоро́диченъ: Образи подоба́ше пе́рвѣе пречи́стому Твоему́ написа́тися Рождеству́, е́же и предвозвѣсти́ и́же при Но́и ковче́гъ: я́коже бо о́нъ, Богороди́тельнице, отъ пото́па сохрани́ оста́нокъ ро́да, си́це и сіе́ отъ пото́па грѣхо́внаго спасе́ человѣ́чество.

Конда́къ, гла́съ 4. Подо́бенъ: Вознесы́йся.

Друга́го Константи́на стяжа́ тя́ Це́рковь благоче́стіемъ, блаже́нне, и кро́тостію, пра́вдою и ми́лостынями, но и великому́ченика и страда́льца и́стинна. Тѣ́мже и, тобо́ю крася́щися, вопіе́тъ: Стефа́нъ мнѣ́ похвала́ и утвержде́ніе.

Икосъ:

До́брый Влады́ка, Бо́гъ и Созда́тель, я́коже въ при́тчи ева́нгельской рече́ о дѣ́лателехъ виногра́да того́ за́повѣдей спаси́тельныхъ, коего́ждо во свое́ вре́мя дѣ́лавша и мзду́ пріе́мша, изнесе́ ны́нѣ во единонадеся́тый ча́съ къ концу́ лѣ́томъ и въ са́мое соверше́ніе ты́сящамъ вели́каго сего́ му́ченика и царя́, своему́ оте́честву непоколеби́мое забра́ло, и свое́й оби́тели, неруши́мую стѣ́ну и гри́вну всезлату́ю Це́ркви, ю́же и нося́щи, съ на́ми зове́тъ единогла́сно: Стефа́нъ мнѣ́ похвала́ и утвержде́ніе.

Мѣ́сяца Ное́мврія во 11-й де́нь. Па́мять свята́го великому́ченика во царѣ́хъ, Стефа́на Се́рбскаго, и́же въ Деча́нѣхъ.

                                                             Сти́хъ: Пя́тый у́бо Стефа́нъ по Симео́ну Се́рбскому,
                                                             Якоже дре́вле Іовъ по Авраа́му вѣ́рному.

Въ 11-й: Удавле́ніемъ Стефа́нъ востече́ къ Бо́гу.

Се́й святы́й и приснопомина́емый Стефа́нъ сы́нъ бя́ше Милути́на, царя́ Се́рбскаго, благочести́ва су́ща и свя́та му́жа. Къ нему́же оклевета́нъ бы́въ, я́ко ца́рство хо́щетъ си́лою похи́тити, я́тъ быва́етъ, и, пе́рвѣе у́бо, тому́ избода́ютъ о́чи, та́же въ Царигра́дъ посыла́ется въ заточе́ніе. И та́мо седмолѣ́тное препроводи́въ вре́мя, во оби́тели си́це нарица́емѣй Пантокра́торѣ, слеза́ми мно́гими и воздыха́ньми и ча́стыми моли́твами Бо́гу угожда́я, я́ко игу́мену оби́тели и всѣ́мъ бра́тіямъ диви́тися, и о́бразъ по́льзы того́ имѣ́ти. Но и самому́ царю́ того́ ча́сто призыва́ти къ себѣ́, слы́шавшу я́же о не́мъ, и́же и отъ него́ науче́нъ бы́въ, Акинди́нскія е́реси нача́льники прогна́въ, и ми́ръ отсю́ду прія́тъ Це́рковь. Та́же отъ заточе́нія Бо́жіимъ судо́мъ призва́нъ бы́сть, очи́ма ви́дя я́ко и пре́жде. И у отца́ бы́въ, лобза́ютъ дру́гъ дру́га, и проше́ніе между́ собо́ю пріе́млютъ. Та́же ма́ло нѣ́что того́ оте́цъ пожи́въ, ко Го́споду оты́де. То́йже моли́твы ку́пно и ца́рствія прее́мникъ бы́сть, е́же и упра́ви до́брѣ Бо́жіимъ окормля́емь стра́хомъ. Толи́ко же бы́сть ми́лостивъ, я́ко недовлѣ́ти и́ныхъ рука́мъ къ раздая́нію ни́щимъ; но и са́мъ по вся́ но́щи ходи́ти, и са́мъ свои́ма рука́ма подая́ти. Созда́ же оби́тель прекра́сну во сла́ву Вседержи́теля Христа́, и бли́зъ ея́ другу́ огра́ду, и та́мо мно́го мно́жество и́же свяще́ннаго собо́ра собра́, потре́бными всѣ́ми тѣ́хъ утѣша́я. Толи́ко же въ моли́твѣ преуспѣ́въ, въ таковы́хъ попече́ній сы́й, я́коже еди́нъ отъ вели́кихъ о́нѣхъ по́стникъ, и́мже о́бще ничто́же отъ мірски́хъ бя́ше. Имѣ́яше же и сле́зный да́ръ, согла́снѣйшее моли́твѣ дѣ́ло. Си́це дово́льна лѣ́та пребы́въ, и вруче́нная ему́ отъ Бо́га до́брѣ устро́ивъ, явля́ется ему́ тре́тіе вели́кій Никола́й, — угото́вися, — глаго́ля, — Стефа́не, не по мно́зѣ бо Влады́цѣ предста́ти и́маши. Онъ же и мно́жае приложи́ въ ми́лостыни, и и́нымъ добродѣ́телемъ. Та́же не по мно́гихъ дне́хъ воцари́ся сы́нъ его́, и́менемъ у́бо отцу́ подо́бенъ, дѣ́лы же ника́коже. И наше́дъ внеза́пу, е́млетъ человѣ́ка Бо́жія, къ вы́шнему ше́ствію гото́вяща потре́бная. И во еди́нъ отъ гра́довъ посла́въ, удавле́ніемъ отъ житія́ измѣни́ти повелѣва́етъ, и та́ко муче́нія вѣне́цъ воспрія́тъ. Свято́е же его́ тѣ́ло во свое́мъ ему́ монастырѣ́ положено́ бы́сть, идѣ́же и до дне́сь стои́тъ, творя́ чудеса́ пресла́вная, и исцѣле́нія подае́тъ вѣ́рою приходя́щимъ о Христѣ́ Іису́сѣ. Ами́нь.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Іису́съ Нави́нъ иногда́ а́нгела ви́дѣ, повелѣва́юща ему́ изу́ти сапо́гъ но́гу своею́, мѣ́сту бо, — глаго́лаше, — свя́ту бы́ти; ты́ же, всеблаже́нне, Никола́я ви́дѣлъ еси́ вели́каго, пло́ти совлещи́ся повелѣва́юща и въ земли́ святѣ́й присели́тися.

Нощна́я твоя́ хожде́нія и я́же о ка́мень ча́стая претыка́нія, я́же подъя́лъ еси́, ни́щія посѣща́я, лѣ́ствицы тебѣ́ устро́ишася и степе́нь къ небе́снымъ и́миже къ Само́му Бо́гу дости́глъ еси́, Того́ десни́цею вѣнчава́емь.

Обои́ у́бо на тебѣ́ вѣнцы́, блаже́нне, стеко́шася, ца́рствія ку́пно и му́ченичества: обои́хъ бо чи́нъ соблю́лъ еси́. Тѣ́мже царе́й еси́ похвала́ и му́чениковъ красота́, свое́й же оби́тели звѣзда́ многосвѣ́тлая.

Широта́ земли́ и долгота́ со мно́гихъ язы́къ ро́довы тебѣ́ ввѣ́рися отъ Бо́га, отъ заточе́нія призва́вшаго тя́, ю́же и соблю́лъ еси́ до́брѣ во благоче́стіи и въ зако́нѣхъ пра́ведныхъ. Тѣ́мже и мзду́ прія́лъ еси́ досто́йную.

Богоро́диченъ: Роди́выйся Соприсносу́щенъ Бо́гу и Отцу́, Бо́гъ Сло́во, Богоро́дице, и съ на́ми Бо́гъ Человѣ́къ Тобо́ю сни́де къ на́шему смире́нію, свобожда́я отъ кля́твы пра́дѣднія: Тебе́ бо ви́дѣ Іа́ковъ лѣ́ствицу, до небе́съ дося́жущу.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Устнѣ́ у́бо дви́жа и ру́цѣ въ моли́твахъ воздѣва́я, о́чи же Госпо́дни призира́ху, и Того́ у́ши моли́тву послу́шаху, и хотѣ́нія твоя́ блага́я пресла́вно соверша́хуся.

Да́ръ че́стенъ вои́стину принесе́ тя Го́сподеви благоро́дное твое́ оте́чество па́че даро́въ Авелевыхъ и же́ртвъ Но́евыхъ: на вся́къ бо де́нь сокруше́ніемъ ду́ха же́ртва бы́лъ еси́ Созда́телю.

Ага́рянская ча́да, блаже́нне, подъ но́ги господа́мъ на́шимъ подложи́: се́ бо ча́сть достоя́нія твоего́ безъ вѣ́сти тща́тся сотвори́ти, но, предвари́въ, досто́йною накажи́ ка́знію.

Разшири́ша уста́ своя́, я́ко звѣ́ріе, спѣша́ще твое́ поглоти́ти оте́чество, измаили́те безбо́жніи: си́лою у́бо твое́ю си́хъ низложи́.

Богоро́диченъ: Иса́ія ви́дѣ Тя́ клещу́ у́гля Боже́ственнаго проро́ческима, Отрокови́це, очи́ма, того́ устна́мъ каса́ющася и грѣхи́ оставля́юща, и́бо изъ Тебе́ Бо́гъ вочеловѣ́чися, мíра грѣхо́въ оставле́ніе.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Аще и отъ на́съ преста́вленъ бы́лъ еси́ я́коже Илія́, но на́мъ оста́вилъ еси́ святы́я твоя́ мо́щи, я́коже ми́лоть честнѣ́йшую: и́миже на́съ, страда́льче, покрыва́й отъ вся́каго вре́да душетлѣ́ннаго.

Па́че зла́та и топа́зія ра́ка моще́й твои́хъ на́мъ яви́ся; па́мять же твоя́ сла́вная па́че со́та медо́внаго горта́немъ на́шимъ услади́ся, въ не́йже на́съ осіява́ютъ а́нгели, съ тобо́ю сходя́ще.

Юже жела́хомъ па́мять свѣтоно́сную твою́ и сладча́йшую прія́хомъ и облобыза́хомъ и мо́лимся, блаже́нне: твои́мъ ко Христу́ дерзнове́ніемъ сохраня́й и спаса́й ста́до твое́.

Сію́ ю́же стяжа́лъ еси́ оби́тель, ю́же возлюби́лъ еси́ и ю́же многоусе́рднѣ украси́лъ еси́, Стефа́не, и ны́нѣ мощми́ твои́ми просла́вилъ еси́ и ста́до, е́же въ не́й, моли́твами твои́ми окормля́еши.

Не и́мамы ина́го къ Бо́гу хода́тая, и́же твоея́ оби́тели и́ноцы, то́кмо тебе́, Стефа́не, на́съ собра́вшаго, и мо́лимъ тя́ прилѣ́жно: и та́мо на́съ не разлучи́ отъ дарова́нныя ти́ сла́вы отъ Бо́га.

Богоро́диченъ: Его́же вси́ проро́цы рече́ніями ку́пно и гада́ньми провозвѣсти́ша, Всецари́це, хотя́ща роди́тися и спасти́ человѣ́чество, Сего́ Ты́, заче́нши несказа́нно, неизрече́нно породила́ еси́, Богоро́дице, проро́ковъ бы́вши сбытіе́.

Свѣти́ленъ. Подо́бенъ: Пло́тію усну́въ.

Позлаще́нныма крыло́ма добродѣ́телей къ Бо́гу возлетѣ́въ, Стефа́нъ на́съ назира́етъ, и́же па́мять его́ творя́щихъ, и Свѣ́та исполня́етъ Невеще́ственнаго.

На хвали́техъ стихи́ры на 4, гла́съ 4. Подо́бенъ: Да́лъ еси́.

Да́лъ еси́ утвержде́ніе лю́бящимъ Тя́, Го́споди, страда́льца Твоего́ до́бляго, и́мже подви́глъ на́съ къ терпѣ́нія напа́стемъ и си́мъ низложи́лъ еси́ Твоего́ созда́нія ра́тника. Тѣ́мже Твое́ боже́ственное смотре́ніе сла́вимъ, Іису́се всеси́льне, Спа́се ду́шъ на́шихъ. [Два́жды.]

Да́лъ еси́ украше́ніе деча́нской це́ркви, Го́споди, Стефа́на, твоего́ уго́дника, чудеса́ содѣва́юща и исцѣле́нія точа́ща, во сла́ву Твои́хъ дарова́ній. Тѣ́мже Твое́ боже́ственное смотре́ніе сла́вимъ, и́же отъ него́ со́бранніи, Іису́се всеси́льне, Спа́се ду́шъ на́шихъ.

Да́лъ еси́ удобре́ніе Се́рбскимъ царе́мъ, Го́споди, Стефа́на прему́драго, того́ ревнова́ти дѣ́ланіемъ, я́же къ Тебѣ́ любви́ созда́вшему и и́же къ стра́ждущимъ ми́лости. Тѣ́мже Твое́ боже́ственное смотре́ніе сла́вимъ, Іису́се всеси́льне, Спа́се ду́шъ на́шихъ.

Сла́ва, гла́съ 2:

Пріиди́те, и́ночестіи ли́цы, духо́вно возвесели́мся и киво́тъ, о́крестъ обсту́пльше, пѣ́сньми воспои́мъ похва́льными, благоговѣ́йно устна́ми святы́мъ прикаса́ющеся моще́мъ и къ слеза́мъ мольбу́ смѣси́вше, къ нему́ возопіи́мъ: Христо́въ уго́дниче Стефа́не и чудотво́рче вои́стинну, на́съ, и́хже собра́лъ еси́ здѣ́, и та́мо собери́ въ ча́сти спаса́емыхъ.

И ны́нѣ, богоро́диченъ:

Дѣ́во Богоро́дице, поми́луй рабы́ Твоя́ и изба́ви огня́ и вся́кія му́ки въ нощи́ и во дни́ вопію́щихъ Сы́ну Твоему́, Пречи́стая: не пре́зри ста́до Твое́ моли́твами, Христе́, Ро́ждшія Тя́.

Славосло́віе вели́кое. [Ектеніи́] и отпу́стъ.

Стихи́ра у́тренняя по славосло́віи.
Сла́ва, гла́съ 5. Самогла́сенъ:

Святíи Се́рбстіи просвѣти́теліе и учи́тели, преподо́бніи кра́льи, ца́ріе и кня́зи, Симео́не мѵроточи́вый, Са́вво равноапо́стольный, Арсе́ніе чудотво́рче, Стефа́не первовѣнча́нный, Владисла́ве и Са́вво вторы́й, со Ѳеокти́стомъ всехва́льнымъ и Евстра́тіемъ, пресла́вный Милути́не, Никоди́ме, Даніи́ле, Іоанни́кіе, Ефре́ме; во прему́дрости преди́вный и во страда́ніихъ адама́нтный, свѣ́тлый и вели́кій чудотво́рче, царю́ Стефа́не Деча́нскій, и Еле́но; сла́ва и Урошу младо́му, о́трасль его́ честна́ и свя́та; пресла́вный и вели́кій кня́же Ла́заре, и́же пролія́ кро́вь свою́ за вѣ́ру и оте́чество и достоя́ніе твое́. Сла́ва тебѣ́, всехва́льна цари́це и вели́кая княги́не деспо́тице, госпоже́ Анно, Анаста́сіе, Еле́но и Ангели́но; святíи сла́вни де́споти: Гео́ргіе, Стефа́не, Макси́ме, Іоа́нне, Сирмíйскія и Крушедо́льскія оби́тели. Сла́ва во бра́нехъ, во́ине Стефа́не Щиля́новичу, вели́кій цѣле́бниче приходя́щимъ къ тебѣ́ съ вѣ́рою. Святы́й Пе́тре Кори́жскій, Іоанни́кіе Дѣви́чскій, Про́хоре Пши́нскій, Іоа́нне Ры́льскій, Гавріи́ле Лесно́вскій, Иларіо́не Осого́вскій, Иларіо́не Мегли́нскій, Ефре́ме, Евѳи́міе, Не́сторе, и́же во Деча́нстѣй пусты́ни пости́вшіися, святы́й Васи́ліе, но́вый чудотво́рче Захолмíйскій, Пе́тре Черного́рскій, архіере́ю преосвяще́нный, и́же всѣ́хъ ва́съ прославля́емъ и сла́вимъ, я́ко вели́кія сто́лпы и предста́тели ро́да Се́рбскаго крестоно́снаго, моли́те Бо́га о душа́хъ на́шихъ, спасти́ся на́мъ.

И ны́нѣ, хра́ма.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́. Апо́столъ Дѣя́ній, зача́ло 29: Возложи́ Иродъ ца́рь ру́цѣ... Аллилу́ія, гла́съ 4. Пра́ведникъ, я́ко фи́никсъ процвѣте́тъ, и я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ Бо́га на́шего процвѣту́тъ. Ева́нгеліе отъ Іоа́нна, зача́ло 52: Сія́ заповѣ́даю ва́мъ... Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Мѣ́сяца Ное́мврія въ 11-й де́нь. Па́мять свята́го великому́ченика во царѣ́хъ, Стефа́на Се́рбскаго, и́же въ Деча́нѣхъ. // Моле́бное пѣ́ніе въ па́мять свята́го великому́ченика, Кра́ля Се́рбскаго, Стефа́на Деча́нскаго.Изда́ное попече́ніемъ преподо́бнаго отца́ Серафи́ма Хри́стича, іеромона́ха и скевофи́лакса оби́тели Деча́нскія. Кти́торомъ бы́сть Благовѣ́рный Кня́зь Се́рбскій, Алекса́ндръ Карагео́ргіевичь. — Бѣлгра́дъ: Въ Кня́жеско-Се́рбской Книгопеча́тни, 1850. — С. 3-34.

/ Къ оглавленію раздѣла /


Наверхъ / Къ титульной страницѣ

0