Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 10-й де́нь.
Святы́хъ апо́столъ Ера́ста, Оли́мпа, Родіо́на, [Сосипа́тра, Куа́рта и Те́ртія].

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Мíра исполне́нія,* я́ко орли́ крила́тіи,* пресвѣ́тло преходя́ще,* священнопроповѣ́дницы,* уловле́нныя отъ злодѣ́я* привлеко́сте къ вѣ́рѣ непоро́чнѣй.* Тѣ́мъ моли́теся* дарова́ти душа́мъ на́шимъ* ми́ръ и ве́лію ми́лость.

Те́ртія и Сосипа́тра* гла́сы свяще́нными почти́мъ,* и Оли́мпа, и Родіо́на,* и съ си́ми Ера́ста священнотаи́нника,* и боже́ственнаго Куа́рта,* сла́вящія Христа́ Бо́га на́шего* и моля́щія Его́* дарова́ти душа́мъ на́шимъ* ми́ръ и ве́лію ми́лость.

Язы́ки приведо́сте Христу́* Бо́гу, блаже́нніи,* изба́влены Кро́вію* Благоволи́вшаго на земли́ роди́тися* и Кре́стъ и сме́рть претерпѣ́вшаго* во́лею, всему́дріи.* Его́же ны́нѣ моли́те* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, богоро́диченъ:

Всепѣ́тая Влады́чице,* наде́жде вѣ́рныхъ и утвержде́ніе,* прибѣ́жище и по́мощь,* Тя́ мо́лимъ:* отъ вся́кія бѣды́ рабы́ Твоя́ сохрани́,* вѣ́рою покланя́ющіяся Рождеству́ Твоему́.* Его́же моли́* дарова́ти душа́мъ на́шимъ* ми́ръ и ве́лію ми́лость.

Крестобогоро́диченъ:

Своего́ Агнца* Агница и непоро́чная Влады́чица* на Крестѣ́ я́ко ви́дѣвши,* ви́да не иму́ща, ниже́ добро́ты, —* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* гдѣ́ благолѣ́піе?* гдѣ́ благода́ть блиста́ющая о́браза Твоего́,* Сы́не Мо́й любе́знѣйшій?

Тропа́рь, гла́съ 3:

Апо́столи святíи, моли́те ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


НА УТРЕНИ,
Оба кано́на окто́иха и святы́хъ на 4, его́же краегране́сіе: Богоглаго́ливыя ученики́ пою́ спротяже́нно. Іо́сифъ. Гласъ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Боже́ственніи су́ще ученицы́ вопло́щшагося за милосе́рдіе Бо́га на́шего, Того́ моли́те грѣхо́въ дарова́ти проще́ніе соверша́ющимъ ва́шу па́мять, блаже́нніи.

Зерца́ла Бо́жія свѣтови́дная вмѣсти́тельна Того́ подая́ній яви́стеся, блаже́нніи, всѣ́мъ вѣ́рнымъ благода́тельно даю́ще спаси́тельныя зари́, богови́дцы апо́столи.

Возсія́ша всѣ́мъ просвѣще́ніе, озаре́ній исто́чникъ поче́рпше, Ера́стъ, и Те́ртій, и Оли́мпъ, и Родіо́нъ, и Сосипа́тръ ку́пно съ Куа́ртомъ, я́же благоче́стно ублажи́мъ.

Богоро́диченъ: Ро́дъ человѣ́ческій Твои́мъ Рождество́мъ, Дѣ́во, обнови́ла еси́, Сло́во бо родила́ еси́ Отчее, въ пло́ть ме́ртвенную одѣ́явшееся и безсме́ртія пути́ на́мъ показа́вшее.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Сло́во, я́ко свѣти́льникъ мы́сленный, принося́ще, апо́столи, богопоко́рно всю́ тва́рь проидо́сте, тоя́ мра́къ разгоня́юще и сы́ны явля́юще свѣ́та благода́тію, но́щи невѣ́дѣнія рабо́тающія.

Глаго́лъ ва́шихъ проро́чески во всю́ изы́де вселе́нную вѣща́ніе спаси́тельное и дѣ́лъ свѣ́тлое показа́ніе всю́ зе́млю обтече́, ду́ши просвѣща́ющее, богоглаго́ливіи Госпо́дни апо́столи.

Все́лься въ душа́хъ ва́шихъ, му́дріи, Ду́хъ Всесвяты́й богови́дны весьма́ содѣ́ла; всю́ду мíръ обходя́ще, хра́мы разори́сте и́дольскія благода́тію и Бо́гу це́ркви воздвиго́сте.

Богоро́диченъ: Сы́на Отча единоро́днаго, безма́терня пе́рвѣе и изъ Тебе́ рожде́нна, увѣ́дѣвше безо́тча, Бо́жію Ма́терь исповѣ́даемъ Тя́, безстра́стно ро́ждшую и Дѣ́ву пребы́вшу па́че сло́ва, Марíе Богоневѣ́сто.

Конда́къ, гла́съ 4. Подо́бенъ: Яви́лся еси́.

Яви́ся дне́сь апо́столъ честно́е торжество́, подаю́щее я́вѣ всѣ́мъ прегрѣше́ній оставле́ніе, соверша́ющимъ и́хъ па́мять.

Та́же сѣда́ленъ, гла́съ 1. Подо́бенъ: Гро́бъ Тво́й.

Ера́ста и Оли́мпа, Сосипа́тра и Те́ртія, Родіо́на ку́пно и Куа́рта па́мять согла́сно почти́мъ, къ ни́мъ воспѣва́юще: боже́ственніи проповѣ́дателіе и слуги́ Сло́ва, ду́ши на́ша вѣ́чнующія му́ки моли́твами ва́шими изба́вите.

Сла́ва, и ны́нѣ, богоро́диченъ:

Безневѣ́стная, Чи́стая Богоро́дице Дѣ́во, еди́на вѣ́рныхъ Предста́тельнице и Покро́ве, бѣ́дъ, и скорбе́й, и лю́тыхъ обстоя́ній вся́ изба́ви, на Тя́ упова́ніе, Отрокови́це, иму́щія, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Нескве́рная Агница Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Утвержде́нія дре́вле неутвержде́нымъ бы́вше, раскопа́сте ва́шими богода́нными уче́ніи вра́жія тверды́ни всера́зныя и запустѣ́нію преда́сте, богови́дніи Спа́совы апо́столи.

Вельми́ Христо́ва вели́чія проповѣ́дающе, ума́леніи всеконе́чно, великопроповѣ́дницы, земны́я вельми́ просвѣти́сте свѣ́тло, вели́чіемъ благода́ти соверши́вше, боже́ственніи апо́столи.

Да похва́лится боже́ственный Оли́мпъ пѣснопѣ́ньми, и Родіо́нъ съ ни́мъ да возвели́чится благоче́стно, тече́ніе соверши́вше муче́нія съ Петро́мъ богопроповѣ́дникомъ въ Ри́мѣ, глава́ми отсѣка́еми.

Богоро́диченъ: Чуде́съ бо́льше всѣ́хъ, Всенепоро́чная, въ Тебѣ́ новосодѣ́явшееся чу́до показа́ся я́вственно: Бо́га бо родила́ еси́ тѣле́снѣ, земны́мъ за милосе́рдіе соедини́вшася въ несли́тнѣмъ соедине́ніи, Богоневѣ́сто.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Му́дрость Отча, все́ осуществова́вшая, учи́тели въ мíръ ва́съ посла́, въ му́дрости Ду́ха и и́стины явле́ніемъ вся́ умудря́ющія, сла́вніи.

Сло́ва вмета́юще, всему́дріи, у́дицу, возвлеко́сте изъ глубины́ невѣ́дѣнія благода́тію ры́бъ, су́щія безгла́сншія, и Го́споду вѣ́ровавшія приведо́сте.

Восхва́лимъ Оли́мпа, и вели́каго Родіо́на, и Те́ртія, и Сосипа́тра, ку́пно и Ера́ста, и боже́ственнаго Куа́рта, христопроповѣ́дники и всѣ́хъ благочести́выхъ защи́тники.

Богоро́диченъ: Зачала́ еси́ сло́вомъ Сло́во, Всенепоро́чная, и родила́ еси́ па́че ума́ и сло́ва, Богоневѣ́стная, бы́вша, Богоро́дице, Человѣ́ка. Тѣ́мъ Тя́ словесы́ богодухнове́нными всегда́ ублажа́емъ.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Пречестнíи, я́ко ка́меніе, валя́ющеся на земли́, привали́сте къ благоче́стію, и́же нра́вомъ лука́вымъ ка́менію нечу́вственному служа́щія, богови́дніи Сло́ва таи́нницы блаже́ннѣйшій.

Еди́ницу въ Тре́хъ Ли́цѣхъ неразлу́чну, несли́тну проповѣ́дающе, многобо́жную отъ земли́ разори́сте ле́сть, неле́стніи Христо́вы апо́столи, и лю́тѣ прельще́нныя къ свѣ́ту богозна́нія наста́висте.

Ра́зумы кра́сными несмы́сльство нему́дрыхъ, прему́дріи апо́столи, разори́сте, и утверди́сте Бо́гу, Всецарю́ еди́ному, вѣ́ровати, тва́рь всю́ Боже́ственными свѣтоли́тіи украша́ющему.

Богоро́диченъ: Яко ино́е не́бо, пе́рваго, Влады́чице, я́вльшися вы́шшее, Тя́ сла́вимъ, Со́лнце на́мъ Пра́вды возсія́вшее и глубо́кую невѣ́дѣнія тму́ отгна́вшее.

Конда́къ, гла́съ 2. Подо́бенъ: Вы́шнихъ ища́.

Боже́ственнымъ свѣ́томъ у́мъ озари́вше, витíйская плете́нія му́дрѣ разори́сте, и язы́ки вся́ улови́вше, апо́столи сла́вніи, Влады́цѣ приведо́сте, Тро́ицу Боже́ственную сла́вити науча́юще.

Икосъ:

Яко ученицы́ всѣ́хъ Влады́ки, мре́жею, богови́дцы, ва́шихъ моли́твъ изъ глубины́ прегрѣше́ній извлецы́те смире́нную ду́шу мою́, сѣтьми́ уловле́нную де́монскихъ ко́зней, да до́брѣ преше́дъ про́чее вре́мя живота́ моего́, пою́ ва́съ любо́вію и просла́влю житіе́ ва́ше непоро́чное, е́же на земли́ соверши́сте, лю́тѣ омраче́нныя просвѣти́вше, Тро́ицу Боже́ственную сла́вити науча́юще.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Тя́, свяще́нна иконо́ма, Ера́сте, Це́ркве Христо́вы су́щія во Іерусали́мѣ, пиша́ проповѣ́даше Па́велъ апо́столъ, съ ни́мже тя́ почита́емъ, пою́ще Христу́: хва́льный отце́въ на́шихъ Бо́же, благослове́нъ еси́.

Терпѣ́ніемъ искуше́ній, и скорбе́й, и гоне́ній искуси́вся и я́звами Христо́выми удобря́емь, Ера́сте пребога́те, велегла́сно взыва́лъ еси́: хва́льный отце́въ Бо́же, благослове́нъ еси́.

Зако́на но́ваго яви́лся еси́, Куа́рте, возвѣсти́тель, ве́тхаго беззако́нія отводя́ чуждему́дренныя и къ возновле́нію жи́зни преводя́ зову́щія: хва́льный отце́въ Бо́же, благослове́нъ еси́.

Богоро́диченъ: Отчее Сло́во Соприсносу́щное, я́вльшееся земны́мъ, воплоти́ла еси́ и тѣ́ломъ, Отрокови́це, породила́ еси́ Человѣ́ка бы́вша, да спасе́тъ человѣ́ка, хва́льный отце́въ Бо́гъ и препросла́вленъ.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Нерасте́рзни столпи́ Христо́вы я́вльшеся Це́ркве, разори́сте злоче́стія стѣ́ны вся́, вѣ́рныя же, я́ко ка́меніе, назда́вше на ка́мени вѣ́ры, вопію́щія: вся́ дѣла́ Го́спода по́йте и превозноси́те Его́ во вѣ́ки.

Законополо́жницы яви́стеся вы́, Ду́ха зако́нъ напису́юще въ сердца́хъ вѣ́рныхъ, всеблаже́нніи, и́мже просвѣща́еми, вопія́ху: вся́ дѣла́ Го́спода по́йте и превозноси́те Его́ во вѣ́ки.

Украси́вся, блаже́нный Оли́мпе, въ о́ньже де́нь Пе́тръ вели́кій коне́цъ прія́тъ, я́вѣ сконча́вся ку́пно съ Родіо́номъ мече́мъ, повелѣ́ніемъ Не́рона, беззако́ннаго царя́, и совокупи́стеся небе́снымъ лико́мъ.

Богоро́диченъ: Ста́мна дре́вле, иму́щая ма́нну, Чи́стая, образова́ше Тя́, Христа́ бо, сла́дость на́шу, носи́ла еси́ во чре́вѣ и пло́тію родила́ еси́, избавля́ющаго вся́кія го́рести безмѣ́стныхъ прегрѣше́ній превознося́щія Того́ во вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Ра́вно тече́ніе соверши́вше, ра́вно отъ Влады́ки Сло́ва обога́щшеся, ра́вныхъ Ду́ха даро́въ сподо́бистеся и по́честей ра́вныхъ получи́сте, апо́столи Госпо́дни, просвѣти́теліе серде́цъ на́шихъ.

Якоже небе́сныя звѣ́зды, Богозна́меньми всю́ зе́млю просвѣти́сте, тму́ глубо́кую невѣ́дѣнія отгна́вше и сы́ны дне́ показа́вше, дре́вле порабоще́нныя козньми́ вражде́бника.

По́лкъ злоу́мныхъ погуби́сте, во глубину́ дре́вле ври́нувшихъ язы́ки люде́й, мно́жество же Бо́гу приведо́сте спаса́емыхъ, чино́мъ совокупля́еми невеще́ственныхъ си́лъ, всеизбра́нніи Христо́вы апо́столи.

Вше́дше къ премíрнымъ, Оли́мпъ вели́кій и Сосипа́тръ, Те́ртій ку́пно и Родіо́нъ, и Куа́ртъ, и Ера́стъ свяще́ннѣйшій и ны́нѣ о мíрѣ Изба́вителя мо́лятъ.

Богоро́диченъ: Пощади́ лю́ди Твоя́, Го́споди, нахожде́нія ва́рварскаго на́съ избавля́я, и грѣхо́въ, и напа́стей, и му́ки вѣ́чныя моли́твами Ро́ждшія Тя́ Дѣ́вы Пречи́стыя и сла́вныхъ апо́столъ Твои́хъ.

Свѣти́ленъ. Подо́бенъ: Не́бо звѣзда́ми.

Свѣ́тлая прія́телища Ду́ха Свята́го, пресвѣ́тлыя зари́ невече́рняго дне́, свѣтода́тельная мо́лнія, апо́столы, въ пѣ́снехъ вѣ́рно просла́вимъ вси́.

Богоро́диченъ: Тя́ Засту́пницу вси́ и́мамы, грѣ́шніи, о Пресвята́я Дѣ́во! Ты́ благоувѣ́тлива на́мъ содѣ́лай Сы́на Твоего́ ма́терними Твои́ми мольба́ми.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 84 об. – 88.

/ Къ оглавленію раздѣла /


Наверхъ / Къ титульной страницѣ

0