Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 9-й де́нь.
Слу́жба Пресвятѣ́й Богоро́дицѣ ра́ди Аѳо́нскія чудотво́рныя Ея́ ико́ны, нарица́емыя Скоропослу́шница.

НА ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры [на 8], гла́съ 1:

Хра́мъ Божества́ су́щая,* вмѣсти́лище простра́нное* благода́ти и милосе́рдія* яви́лася еси́, Богоневѣ́сто.* Услы́ши у́бо ско́ро рабо́въ Твои́хъ,* всеблага́я Скоропослу́шнице,* и пода́ждь скорбя́щимъ утѣше́ніе,* бѣ́дствующимъ отъ бѣ́дъ избавле́ніе,* боля́щимъ здра́віе* и всѣ́мъ вѣ́рнымъ ве́лію ми́лость.

При́зри съ небесе́, Богоро́дице,* на предстоя́щія предъ свято́ю ико́ною Твое́ю* и Тебе́ съ вѣ́рою призыва́ющія* и благода́ть Твою́ ниспосли́ на́мъ,* да богоуго́дно по́прище жи́зни на́шея пре́йдемъ* и да сподо́бимся Твои́мъ хода́тайствомъ* отъ Сы́на Твоего́ прія́ти ве́лію ми́лость.

Ины стихи́ры, гла́съ 4:

Весели́ся, Дохіа́рская оби́тель арха́нгеловъ,* ра́дуйтеся, су́щіи во Аѳо́нѣ и повсю́ду, вѣ́рніи:* о́бщая бо всѣ́хъ Засту́пница* восхотѣ́ бы́ти ско́рая* моля́щихся Услы́шательница* вели́кія ра́ди Своея́ ми́лости. [Два́жды.]

Прите́кше подъ кро́въ кри́лъ* небе́сныхъ во́инствъ архистрати́говъ,* притеце́мъ и подъ кро́въ небесе́ и земли́ Влады́чицы:* благоутро́бно бо пріе́млетъ* и ско́ро вне́млетъ проше́ніемъ,* я́ко всеблага́я Скоропослу́шница,* къ о́бразу Ея́ со благоговѣ́ніемъ прибѣга́ющихъ* вели́кія ра́ди Своея́ ми́лости.

Богоизбра́нная Дѣ́во Всецари́це,* и́ноковъ необори́мый покро́ве* и всѣ́хъ христіа́нъ непосты́дное прибѣ́жище,* храни́ жре́бій Тво́й,* Россíю и вся́ гра́ды,* ве́си и оби́тели правосла́вныя* невреди́мы отъ вра́гъ ви́димыхъ и неви́димыхъ,* и всѣ́хъ на́съ заступи́ и спаси́* вели́кія ра́ди Твоея́ ми́лости.

Сла́ва, и ны́нѣ, гла́съ 7:

Егда́ трапеза́рь Дохіа́рскій Ни́лъ лиши́ся зрѣ́нія* за е́же не вня́ти гла́су Твоему́, Пречи́стая,* и принесе́ Тебѣ́ покая́ніе* предъ свято́ю ико́ною Твое́ю,* благоволи́ла еси́ рещи́ ему́:* о и́ноче, услы́шася моле́ніе твое́ ко Мнѣ́,* бу́ди проще́нъ и зря́й, я́ко и пре́жде,* возвѣсти́ же и про́чимъ* подвиза́ющимся отце́мъ и собра́тіямъ твои́мъ,* я́ко Азъ е́смь Ма́терь Бо́га Сло́ва* и свяще́нныя оби́тели арха́нгеловъ* по Бо́зѣ покро́въ, и по́мощь,* и держа́вное предста́тельство,* промышля́ющая о не́й, я́ко Избра́нная Прави́тельница.* И впре́дь и́ноцы да прибѣга́ютъ ко Мнѣ́* во вся́кой и́хъ ну́ждѣ,* и ско́ро и́мамъ слу́шати и́хъ* и всѣ́хъ, со благоговѣ́ніемъ прибѣга́ющихъ ко Мнѣ́* правосла́вныхъ христіа́нъ,* се́ бо Скоропослу́шница нарица́юся.

Вхо́дъ. Проки́менъ дне́. Чте́нія три́ Богоро́дицы.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

Аще изво́литъ настоя́тель пѣ́ти литíю, на о́ной стихи́ры:

Гла́съ 1: Собра́вшеся дне́сь, бра́тіе,* на моле́бное пѣснопѣ́ніе* предъ о́бразомъ Богома́тере Скоропослу́шницы,* духо́вное торжество́ соста́вимъ* и благода́ть незави́стную почерпе́мъ* отъ неистощи́маго исто́чника дарова́ній.* Блага́я бо Ма́терь су́щи* Всеблага́го Бо́га на́шего* богоподо́бными сія́етъ чудесы́,* стра́сти и болѣ́зни исцѣля́етъ,* въ мо́ри и на су́ши спаса́етъ* съ вѣ́рою къ Не́й прибѣга́ющія.

Гла́съ 2: Яже всѣ́мъ удо́бь послу́шная въ ско́рби* и въ печа́ли ско́ро помога́ющая* призыва́ющимъ Тя́ отъ души́ нело́жно,* умилосе́рдитися потщи́ся, Влады́чице,* и заступи́ рабы́ Твоя́,* избавля́ющи на́съ отъ бѣ́дъ моли́твами Твои́ми.

Гла́съ 3: Богоизбра́нная Приснодѣ́во,* Боже́ственныхъ даро́въ сокро́вище,* мíра Предста́тельнице,* ско́рая моля́щихся Послу́шательнице,* не лиши́ на́съ щедро́тъ Твои́хъ* и проше́нія на́ша уско́ри испо́лнити* во спасе́ніе ду́шъ на́шихъ.

Сла́ва, и ны́нѣ, гла́съ 7:

Ми́лостива, Благопребы́тна* и Скоропослу́шна на́мъ, Госпоже́, яви́ся,* призыва́ющимъ боже́ственную Твою́ благода́ть* во всѣ́хъ, случа́ющихся на́мъ:* всю́ бо наде́жду ду́шъ на́шихъ* возложи́хомъ къ Тебѣ́, Благосе́рдой,* и во всѣ́хъ упова́емъ на про́мыслъ Тво́й,* Ты́ и бу́дущія на́съ сла́вы,* и живота́ боже́ственнаго сподо́би.

На стихо́внѣ стихи́ры, гла́съ 5:

Пріиди́те, вѣ́рніи,* восхва́лимъ Приснодѣ́ву Богоро́дицу, —* ра́дуйся, — глаго́люще, —* киво́те пресвяты́й и всесвѣ́тлая ски́ніе* Царя́ царе́й, Христа́, Бо́га на́шего;* ра́дуйся, а́нгеловъ удивле́ніе и сла́во;* ра́дуйся, земноро́дныхъ похвало́ и весе́ліе,* спаса́ющая въ ми́рѣ ду́ши на́ша.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Ра́дуйся, Благослове́нная въ жена́хъ,* прароди́тельскія кля́твы разрѣше́ніе* и о все́мъ мíрѣ умилостивле́ніе;* ра́дуйся, христіа́нъ те́плое предста́тельство* и услы́шательнице ско́рая моля́щихся къ Тебѣ́ съ вѣ́рою;* ра́дуйся, покро́ве и спасе́ніе ду́шъ на́шихъ.

Сти́хъ: Слы́ши, Дщи́, и ви́ждь,* и приклони́ у́хо Твое́.

Ра́дуйся, Госпоже́ всеми́лостивая,* живоно́сный исто́чниче,* струи́ щедро́тъ точа́щій вѣ́рнымъ;* ра́дуйся, Аѳо́на тве́рдое огражде́ніе,* и́ноковъ наста́внице и промышле́ніе;* ра́дуйся, всѣ́хъ по́моще,* ра́досте и спасе́ніе ду́шъ на́шихъ.

Сла́ва, и ны́нѣ, гла́съ 8:

О, мно́гихъ Твои́хъ чуде́съ, Богоблагода́тная,* содѣ́ланныхъ о́бразомъ Твои́мъ, Скоропослу́шнице!* Вся́къ бо, прите́кшій къ Тебѣ́ съ вѣ́рою,* не оты́де отъ ли́ка Твоего́ то́щъ и не услы́шанъ:* слѣпíи у святы́я Твоея́ ико́ны прозрѣ́ша,* хромíи, разсла́бленніи* и глусíи исцѣли́шася;* безча́дія, плѣ́на,* пру́жія, треволне́нія морска́го* и ины́хъ бѣ́дъ и неду́говъ изба́вила еси́* призыва́ющихъ Тя́, Ма́терь Всеще́драго Бо́га на́шего,* подаю́щаго на́мъ Тобо́ю ве́лію ми́лость.

Тропа́рь, гла́съ 4:

Къ Богоро́дицѣ притеце́мъ, су́щіи въ бѣда́хъ,* и святѣ́й ико́нѣ Ея́ ны́нѣ припаде́мъ,* съ вѣ́рою зову́ще изъ глубины́ души́:* ско́ро на́ше услы́ши моле́ніе, Дѣ́во,* я́ко Скоропослу́шница наре́кшаяся.* Тебе́ бо раби́ Твои́ въ ну́ждахъ* гото́вую Помо́щницу и́мамы.


НА УТРЕНИ,
[На Бо́гъ Госпо́дь: Тропа́рь Богоро́дицы, два́жды. Сла́ва, и ны́нѣ, то́йже.]

По 1-й каѳи́смѣ сѣда́ленъ, гла́съ 2:

Вчера́ воспѣ́ Свята́я Це́рковь собо́ръ небе́сныхъ си́лъ, благи́хъ покрови́телей на́шихъ; дне́сь пое́мъ пѣ́снь Тебѣ́, Всепѣ́той Богоро́дице, мíра держа́вному покро́ву, и прославля́емъ ра́достно бла́гость Твою́. Со безпло́тными у́бо моли́ся во е́же спасти́ся на́мъ.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 3:

Яко многосвѣ́тлая луна́, показа́ся въ честнѣ́й оби́тели арха́нгеловъ свята́я ико́на Твоя́, Дѣ́во Скоропослу́шнице: свѣти́ши бо благода́тію чуде́съ въ нощи́ бѣ́дъ су́щимъ и ско́рую по́мощь подае́ши во спасе́ніе ду́шъ на́шихъ.

Сла́ва, и ны́нѣ, то́йже.

На поліеле́и велича́ніе:

Велича́емъ Тя́, Пресвята́я Дѣ́во, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.

Псало́мъ избра́нный: Помяни́, Го́споди, Дави́да... [Зри́ на Рождество́ Богоро́дицы.]

По поліеле́и сѣда́ленъ, гла́съ 8:

Благоговѣ́йно обстоя́ще честны́й о́бразъ Ма́тере Свѣ́та, моли́твы Ей я́ко всеблаго́й Скоропослу́шницѣ усе́рдно принесе́мъ. Сію́ бо Не́бо одушевле́нное человѣколю́біемъ Госпо́дь содѣ́ла, излива́я То́ю, я́ко до́ждь, да́ры Своя́ во спасе́ніе ду́шъ на́шихъ.

Сла́ва, и ны́нѣ, то́йже.

По Ева́нгеліи стихи́ра, гла́съ 7:

Проше́нія испо́лни рабо́въ Твои́хъ,* Тебе́, Пресвята́я Дѣ́во, съ вѣ́рою призыва́ющихъ.* Отъ вся́кія ско́рби, неду́говъ и озлобле́нія* всѣ́хъ на́съ свободи́,* да благода́рственно воспѣва́емъ Тя́,* ско́рую моля́щихся Услы́шательницу,* подаю́щую вѣ́рнымъ ве́лію ми́лость.

Кано́на два́. Кано́нъ пе́рвый, творе́ніе Никоди́ма Святого́рца. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Чуде́съ Твои́хъ боже́ственныхъ мно́жество благохвали́ти предпринима́я, Тя́ молю́, Дѣ́во, отъ се́рдца, Скоропослу́шнице, благода́ть пода́ждь ми́.

Кто́ не изуми́тся Твоего́ о́браза чудесе́мъ, Дѣ́во? Отъ него́ бо служи́телю трапе́зы возгласи́ла еси́ три́жды, Скоропослу́шница наре́кшися.

Ка́ко чудодѣя́ніе Твое́ изрещи́ возмогу́, Отрокови́це? Ты́ бо пре́жде непоко́рнаго и́нока безо́чна содѣ́лала еси́ и па́ки сего́ устро́ила еси́ ви́дяща.

Ра́дуйся, свяще́нная оби́тель Дохіа́рская, ты́ бо и́маши всѣ́хъ Госпожу́ Предста́тельницу и покро́въ, я́коже Сама́ Она́ я́сно возвѣсти́.

Другíй кано́нъ, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ма́ти Присносу́щнаго Свѣ́та и Отчія Прему́дрости, умудри́ неразу́міе мое́ и просвѣти́ мя́ на пѣ́ніе и моли́тву предъ свято́ю ико́ною Твое́ю, Скоропослу́шнице.

Обрѣ́тшіи сокро́вище ра́дуются. Тѣ́мже и мы́, иму́ще Тя́, Всецари́це, милосе́рдія сокро́вище небе́сное и неиждива́емое, воспѣва́емъ, ра́дующеся, Твоя́ чудеса́.

Лицу́ Твоему́, — предрече́ Дави́дъ, — помо́лятся бога́тіи лю́дстіи; исполня́ющуся сему́, вку́пѣ съ бога́тыми и мы́, добродѣ́тельми убо́зіи, мо́лимся Тебѣ́, Дѣ́во, предъ ли́комъ Твои́мъ.

Якоже о́чи ра́бъ въ руку́ госпо́дій свои́хъ, та́ко о́чи на́ши устремле́ни су́ть къ Тебѣ́ и къ о́бразу Твоему́, Всеблага́я Влады́чице, до́ндеже уще́дриши рабы́ Твоя́.

Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Безча́дныхъ благоча́дныхъ Ты́, Марíе, показа́ла еси́ и непло́дныхъ же́нъ содѣ́лала еси́, Скоропослу́шнице, веселя́щихся о ча́дѣхъ. Кто́ у́бо не изуми́тся, Дѣ́во, вели́чію Твоему́?

Булга́рія проповѣ́дуетъ Твоего́ о́браза чудеса́, о Скоропослу́шнице, восто́къ же и за́падъ. Исто́чникъ бо содѣ́лалася еси́, точа́щій благода́ти всѣ́мъ призыва́ющимъ и́мя Твое́.

Ра́ка болѣ́знь отъ руки́ исчеза́етъ честны́я жены́, Дѣ́во, посѣще́ніемъ Твои́мъ, тѣ́мже стра́ждущая, отъ неду́га свободи́вшися, ра́дующися, проповѣ́да благода́рственная.

Чу́дно украси́ся ико́на Твоя́, Скоропослу́шнице, и па́че луче́й со́лнечныхъ освѣща́етъ всѣ́хъ благода́тію Твое́ю, Пречи́стая. Кто́ у́бо не восхва́литъ Тя́, на небеси́ и на земли́ сла́вимую!

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Воззри́ Твои́ми очесы́, Марíе, и ви́ждь благоутро́бно предъ ико́ною Твое́ю предстоя́щихъ и Тя́ съ вѣ́рою призыва́ющихъ, и услы́ши си́хъ, Скоропослу́шнице.

Крѣ́пость да́руй на́мъ, Чи́стая, да твори́мъ во́лю Сы́на Твоего́ со стра́хомъ и любо́вію, укрѣпля́еши бо рабы́ Твоя́ я́ко Ма́терь Всеси́льнаго Бо́га на́шего.

Страстьми́ бори́міи и неви́димыми сѣ́ятелями зо́лъ, при́сно нужда́емся въ Твое́й, Влады́чице, необори́мой по́мощи, ея́же не лиши́ на́съ, Богоблагода́тная.

Спаси́тельный щи́тъ пода́ждь на́мъ, Госпоже́, Твое́ держа́вное заступле́ніе, и́мже началозло́бнаго побѣжда́юще кова́рства, вѣнце́въ сла́вы сподо́бимся.

Катава́сія: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

По 3-й пѣ́сни сѣда́ленъ:

Влады́чицу Тя́ мíра вѣ́мы, Марíе Всепѣ́тая, я́ко родила́ еси́ на́мъ всѣ́хъ Творца́, Спаси́теля мíра, Иже и просла́ви Тебе́, Пречи́стую Ма́терь Свою́, подая́ Тобо́ю благода́ть и ми́лость чту́щимъ Тя́ и моля́щимся Тебѣ́, Богоро́дице.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Во всѣ́хъ концѣ́хъ чудотво́рный Тво́й о́бразъ просла́вися, и ны́нѣ вси́ уста́ми Скоропослу́шницу произно́сятъ.

И во снѣ́, Всецари́це, и я́вѣ, Скоропослу́шнице, явля́яся, чудеса́ соверша́еши въ мíрѣ пресла́вная.

Кто́ Твое́, Дѣ́во, и́мя въ ну́ждѣ вся́кой призыва́ше, и ско́ро того́ не услы́шала еси́, я́ко Скоропослу́шница су́щая?

Блаже́нна еси́ Дохіа́рская оби́тель сла́вная, ико́ною бо обогати́лася еси́ Скоропослу́шницы всечестно́ю.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Припа́дая ко святѣ́й ико́нѣ Твое́й, Дѣ́во, вопію́ Ти́ отъ се́рдца сокруше́нна: не попусти́ ми́ поги́бнути, Всеми́лостивая Госпоже́, житіе́ мое́ во грѣсѣ́хъ ижди́вшему.

Грѣхолюби́въ сы́й, удали́хся, Влады́чице, Сы́на Твоего́, и лише́нъ е́смь дерзнове́нія къ Нему́. Тѣ́мже къ покая́нію мя́ напра́вивъ, сподо́би получи́ти, е́же погуби́хъ.

Богоизбра́нная Отрокови́це, въ рунѣ́ ороше́нномъ предви́дѣнная, окропи́ росо́ю благода́ти изсо́хшую зе́млю се́рдца моего́ и благопло́дну содѣ́лай ду́шу мою́.

Ра́дуйся, Богоневѣ́сто, добродѣ́тельми, я́ко ря́сны златы́ми, преукра́шенная; ра́дуйся, сосу́де мѵ́ра, и́мже врачу́ются зову́щіи: сла́ва, Христе́, си́лѣ Твое́й.

Катава́сія: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Ка́ко на Тво́й пречи́стый о́бразъ а́зъ, недосто́йный, воззрю́, Скоропослу́шнице, нечи́стыми очесы́ мои́ми?

Мо́ре и земля́, Всецари́це, Твоея́ ико́ны чудеса́ проповѣ́дуютъ: Твои́хъ бо благода́тей сія́ обоя́ наслади́шася.

Та́тя явля́еши, пѣ́нязи похи́тивша бли́жняго, Матеродѣ́во, и возвраща́еши пра́ведно сія́ иму́щему.

Что́ воздади́мъ Тебѣ́, Всеблага́я, за благода́ть мно́гую, ю́же яви́ла еси́ на́мъ, дарова́въ ико́ну Твою́, бога́тство свяще́нное?

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Нѣ́сть, Всеми́лостивая Госпоже́, такова́го, и́же бы лиши́ся щедро́тъ Твои́хъ, прибѣ́гъ съ вѣ́рою къ Твоему́ благоутро́бію. Тѣ́мже прилѣ́жно мо́лимъ Тя́: сподо́би и на́съ грѣ́шныхъ ми́лости Твоея́.

Умилостивле́ніе о все́мъ мíрѣ су́щая, умоли́, Дѣ́во, Сы́на Твоего́, всѣ́хъ Судію́, да не помяне́тъ грѣхо́въ на́шихъ, и да изба́вимся Тобо́ю вся́каго преще́нія Его́, находя́щаго на лю́ди согрѣши́вшія.

Го́ру Твою́ и сію́ оби́тель, иму́щихъ о́бразъ Тво́й, всеблага́я Скоропослу́шнице, покры́й отъ вся́каго зла́, соблюда́ющи рабо́въ Твои́хъ въ едине́ніи ду́ха, во вся́кой благосты́ни и и́стинѣ.

Примири́теля вся́ческихъ ро́ждшая, всемо́щнымъ предста́тельствомъ Твои́мъ, Влады́чице, умиротвори́ на́съ къ Нему́, къ бли́жнимъ и къ себѣ́ сами́мъ, я́ко воспѣва́ющимъ Тя́ ми́ръ подава́ющая.

Катава́сія: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Яко любвеоби́льная Ма́терь я́вльшися, призыва́ла еси́ о́трока къ Себѣ́, до́ндеже изба́вила еси́ отъ руки́ разбо́йниковъ, Матеродѣ́во. Но да обрѣте́мъ Тя́ и мы́, Ма́терь любвеоби́льную!

Не и́мамы раби́ Твои́ ино́го, ра́звѣ Тебе́, предста́тельства и покро́ва. Тѣ́мже, Чи́стая, отъ се́рдца вопіе́мъ: вся́кія бѣды́ свободи́ ста́до Твое́ и вѣ́рныхъ, къ Тебѣ́ прибѣга́ющихъ.

Якоже спасла́ еси́ отъ морскíя бу́ри призва́вшихъ боже́ственное и́мя Твое́, та́ко и на́съ отъ чу́вственнаго круше́нія и мы́сленнаго, Дѣ́во, спаси́ и въ ти́хія приста́нища спасе́нія упра́ви.

Мíръ Тя́ прибѣ́жище стяжа́ и спасе́ніе, тѣ́мъ, Чи́стая, къ честнѣ́й Твое́й ико́нѣ отвсю́ду притека́ютъ лю́діе, и вси́ ско́ро и́хъ слу́шающую обрѣта́ютъ Тя́.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Ты́ — рабо́въ Твои́хъ утѣше́ніе, Всеблаже́нная; Ты́ — свѣ́тъ, удобре́ніе и наде́жда спасе́нія; Ты́ у́бо промышле́ніемъ Твои́мъ вся́кія ну́жды и ско́рби изба́ви на́съ.

Вѣ́дущи не́мощи на́ша, Богороди́тельнице, восполня́й духо́вную и веще́ственную ску́дость на́шу, да подаю́щаго на́мъ Тобо́ю вся́ блага́я Бо́га сла́вимъ.

Не оста́ви на́съ, Всеще́драя, внегда́ оскудѣва́ти крѣ́пости на́шей, не отступи́ отъ упова́ющихъ на Тя́ во исхо́дѣ и по исхо́дѣ яви́ на́мъ бла́гости Твоея́ си́лу.

Преблагослове́нная Марíе, кни́га Бо́жія запечатлѣ́нная, въ кни́зѣ живота́ вѣ́чнаго написа́тися на́мъ сподо́би, да отъ Тебе́ ро́ждшагося Бо́га сла́вимъ.

Катава́сія: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Конда́къ, гла́съ 8:

Въ мо́ри жите́йстѣмъ обурева́еміи,* треволне́нію подпа́даемъ страсте́й и искуше́ній.* Пода́ждь у́бо на́мъ, Госпоже́, ру́ку по́мощи,* я́коже Петро́ви Сы́нъ Тво́й,* и ускори́ отъ бѣ́дъ изба́вити ны́, да зове́мъ Ти́:* ра́дуйся, всеблага́я Скоропослу́шнице.

Икосъ:

Идѣ́же осѣни́тъ благода́ть Твоя́, Влады́чице, та́мо неду́жніи здра́ви быва́ютъ, бѣ́дствующіи во благополу́чіе прихо́дятъ, и вся́къ скорбя́щій ра́дости исполня́ется. Тѣ́мже благода́тію Твое́ю осѣни́ и на́съ, сицева́я ра́достная Тебѣ́ глаго́лющихъ: ра́дуйся, Богоблагода́тная, непристу́пнаго Божества́ селе́ніе; ра́дуйся, свята́я трапе́зо, Хлѣ́бомъ жи́зни на́съ снабдѣва́ющая; ра́дуйся, мѵ́ро многоцѣ́нное, облагоуха́ющее вѣ́рныхъ; ра́дуйся, ма́слино, еле́емъ милосе́рдія на́съ умаща́ющая; ра́дуйся, неистощи́мое сокро́вище даро́въ; ра́дуйся, приснотеку́щій исто́чниче чуде́съ; ра́дуйся, оби́димыхъ заступле́ніе; ра́дуйся, обурева́емыхъ благоути́шное приста́нище; ра́дуйся, глухи́хъ слы́шаніе и свѣ́те слѣпы́хъ; ра́дуйся, разсла́бленныхъ укрѣпле́ніе; ра́дуйся, свобожде́ніе плѣне́нныхъ; ра́дуйся, мíра всего́ упова́ніе; ра́дуйся, всеблага́я Скоропослу́шнице.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Слѣпы́мъ дарова́ла еси́ дѣ́йствіе очесе́мъ, Дѣ́во, е́же ви́дѣти, но и на́ша зѣ́ницы души́ и тѣлесе́ просвѣти́, да пое́мъ при́сно вели́чія Твоя́.

Глухи́мъ слы́шаніе дарова́ла еси́, Марíе Скоропослу́шнице, но и на́съ всѣ́хъ отве́рзи ушеса́ души́ и тѣлесе́, я́ко да пое́мъ при́сно вели́чія Твоя́.

Якоже дре́вле отъ пруго́въ изба́вила еси́ прибѣ́гшихъ къ Тебѣ́, Пречи́стая, та́ко и на́съ отъ си́хъ и вся́каго вре́да изба́ви, да пое́мъ при́сно вели́чія Твоя́.

Яко испра́вила еси́ пре́жде разсла́бленнаго, та́ко и на́съ, по обою́ разсла́бленныхъ, те́плымъ Твои́мъ предста́тельствомъ испра́ви, да пое́мъ при́сно вели́чія Твоя́.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Наста́внице ко спасе́нію рабо́въ Твои́хъ, души́ трича́стное, Госпоже́, испра́ви, да благода́ти безстра́стія сподо́бльшеся, пое́мъ: препѣ́тый отце́въ Госпо́дь и Бо́гъ, благослове́нъ еси́.

Жела́тельную си́лу души́ къ боже́ственному раче́нію напра́ви, да то́ю Бо́га всецѣ́ло возлю́бимъ и къ Нему́ при́сно стреми́мся, я́ко всеблаже́нному жела́ній кра́ю.

Яростную си́лу души́ помози́ на́мъ, Дѣ́во, обраща́ти на неви́димыя враги́ спасе́нія на́шего и спаси́тельныя любве́ испо́лни сердца́ на́ша къ бли́жнимъ и къ Бо́гу.

Слове́сное души́ къ богоуго́дному созерца́нію воскрыли́, Влады́чице, богопроти́вныхъ помышле́ній избавля́ющи, и всѣ́хъ на́съ благо́е мы́слити, глаго́лати и твори́ти укрѣпи́.

Катава́сія: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Отъ вся́кихъ болѣ́зней, Скоропослу́шнице, на́съ изба́ви, я́коже отъ си́хъ мно́гихъ изба́вила еси́.

Ико́на Твоя́, Дѣ́во, показа́ся исто́чникъ чуде́съ, отъ него́же жа́ждущіи снабдѣва́ются изоби́льно.

Поги́бшаго Ты́ явля́еши, Госпоже́, и подае́ши ра́дость обрѣ́тшимъ. Ко́ль мно́гая е́сть о́браза Твоего́ благода́ть!

Повелѣ́нію Твоему́, Влады́чице, повину́ются вся́ стихíи, отъ ни́хже вре́да да избавля́еши Тя́ призыва́ющихъ.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Па́жить плодоно́сну обрѣта́етъ ста́до подъ Твои́мъ, Богома́ти, управле́ніемъ, и душетлѣ́нніи во́лцы не мо́щны расх́тити слове́сныхъ ове́цъ, храни́мыхъ благода́тію Сы́на Твоего́ и Бо́га.

Блаже́нъ человѣ́къ, ему́же е́сть заступле́ніе его́ отъ Тебе́, Богоневѣ́сто, при́сно бо полага́етъ таковы́й восхожде́нія въ се́рдцѣ свое́мъ, до́ндеже у́зритъ себе́ спасе́нна и воспое́тъ: Го́спода по́йте дѣла́ и превозноси́те Его́ во вся́ вѣ́ки.

Седмисвѣ́щный свѣти́льниче, седмію́ дара́ми Ду́ха свѣтя́щій, сподо́би и на́мъ украси́тися духо́вными плода́ми, да, уще́дренніи чрезъ Тебе́ Бо́гомъ, пое́мъ: Го́спода по́йте дѣла́ и превозноси́те Его́ во вся́ вѣ́ки.

Горо́ Бо́жія, въ Не́йже благоволи́ жи́ти Бо́гъ, моли́ся къ Нему́ о на́съ, да по́мощію Его́ благо́е творя́ще, сподо́бимся узрѣ́ти премíрныя го́ры и та́мо пѣ́ти: Го́спода по́йте дѣла́ и превозноси́те Его́ во вся́ вѣ́ки.

Катава́сія: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Собери́теся усе́рдно въ оби́тель боже́ственную арха́нгеловъ, боля́щіи: Вра́чь бо въ не́й пребыва́етъ безме́здный.

Свяще́нная ико́на Твоя́ друга́я показа́ся Силоа́мская купе́ль, Дѣ́во, очища́ющая и цѣля́щая болѣ́зни души́ и тѣлесе́.

Воспламеня́етъ мя́ раче́ніе зрѣ́ти Твоего́ о́браза благода́тную лѣ́поту, и насыще́нія не и́мамъ велича́ти Тя́!

Да уви́жду Тя́, всеблага́я Скоропослу́шнице, во вре́мя сме́рти утѣша́ющую мя́ и зра́ки де́моновъ отгоня́ющую!

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Помяни́, Госпоже́, рабы́ Твоя́, любо́вію сла́вящія Тя́, услы́ши моля́щихся къ Тебѣ́ и моли́твами Твои́ми благоувѣ́тлива на́мъ содѣ́лай Сы́на Твоего́ и Бо́га, здѣ́ и на стра́шномъ Судѣ́ Его́, Всеблаже́нная Богоро́дице, Чи́стая Приснодѣ́во.

Ра́досте а́нгеловъ и человѣ́ковъ, свобо́дны на́съ печа́лей жите́йскихъ сотвори́ и хода́тайствомъ Твои́мъ не конча́емыхъ му́къ изба́ви, да вре́менныхъ и вѣ́чныхъ бѣ́дъ Тобо́ю избы́вше, вопіе́мъ: ра́дуйся, Всеблаже́нная Богоро́дице, Чи́стая Приснодѣ́во.

Ви́димо предъ о́бразомъ Твои́мъ предстоя́ще, неви́димо же къ Тебѣ́, одесну́ю Сы́на Твоего́ стоя́щей, у́мъ возводя́ще, мо́лимъ Ти ся прилѣ́жно: сподо́битися на́мъ ра́йскаго блаже́нства умоли́, Всеблаже́нная Богоро́дице, Чи́стая Приснодѣ́во.

Блага́го Царя́ Блага́я Ма́ти, Благочести́ваго Импера́тора на́шего [и́мярекъ], Ца́рствующій До́мъ и христолюби́вое во́инство Его́ осѣни́ необори́мымъ покро́вомъ Твои́мъ, Всеблаже́нная Богоро́дице, Чи́стая Приснодѣ́во.

Катава́сія: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Свѣти́ленъ:

Зря́щіи Тя́ ны́нѣ на ико́нѣ съ Предвѣ́чнымъ Младе́нцемъ, про́симъ Тебе́, Богоневѣ́сто: не лиши́ на́съ и въ бу́дущемъ вѣ́цѣ всеблаже́ннаго лицезрѣ́нія Твоего́ и воплоти́вшагося отъ Тебе́ Сы́на Бо́жія, да со благоугоди́вшими Ему́ и́мя Его́ и Твое́ велича́емъ. [Три́жды.]

На хвали́техъ стихи́ры [на 4], гла́съ 5:

Ди́вна дѣла́ Твоя́, Го́споди!* Пресвяту́ю Ма́терь Твою́ дарова́лъ еси́* безпомо́щнымъ ско́рую Помо́щницу,* си́льную Защи́тницу беззащи́тнымъ* и предста́тельство те́плое безотвѣ́тнымъ;* предстоя́ бо Тебѣ́, всѣ́хъ Влады́цѣ,* мо́лится при́сно о всѣ́хъ на́съ. [Два́жды.]

Ко́е досто́йное благодаре́ніе* принесе́мъ Ти́, Богоизбра́нная Приснодѣ́во?* За мно́жество даро́въ Твоего́ милосе́рдія,* явля́емаго съ вѣ́рою къ Тебѣ́ прибѣга́ющимъ,* неду́ги бо ду́шъ и тѣле́съ врачу́еши* и избавля́еши отъ бѣ́дъ,* моля́щися Бо́гу при́сно о всѣ́хъ на́съ.

Держа́вная Влады́чице мíра,* назира́ющая су́щихъ въ Горѣ́ Твое́й* и повсю́ду вѣ́рныхъ я́ко взбра́нная Прави́тельница,* не преста́й благоутро́бно промышля́ти о рабѣ́хъ Твои́хъ* и вся́ блага́я на́мъ ниспосыла́ти,* вре́менная же и вѣ́чная,* и моли́ся Бо́гу при́сно о всѣ́хъ на́съ.

Сла́ва, и ны́нѣ, гла́съ 3:

Свѣ́телъ преше́дшій пра́здникъ,* озаре́нный сла́вою архистрати́говъ,* ра́достенъ дне́шній,* свѣтя́ся благода́тію* а́нгеломъ говѣ́йнаго о́браза Богома́тере* и на рука́хъ Ея́ держи́маго Вседержи́теля.* Якоже бо Онъ рече́ на́мъ:* проси́те, и да́стся ва́мъ, —* та́ко и Всеблага́я Ма́терь Его́* повелѣ́ прибѣга́ти къ Не́й во вся́кой ну́ждѣ* и обѣща́ ско́ро слу́шати* со благоговѣ́ніемъ моля́щихся* предъ свято́ю Ея́ ико́ною,* ю́же и просла́ви чудесы́ мно́гими,* подаю́щи вѣ́рнымъ ве́лію ми́лость.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна пе́рваго кано́на, пѣ́снь 3-я, и втора́го, пѣ́снь 6-я. Проки́менъ, Апо́столъ, Ева́нгеліе и прича́стенъ Богоро́дицы: [Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Слу́жба Пресвятѣ́й Богоро́дицѣ ра́ди Аѳо́нскія чудотво́рныя Ея́ ико́ны, нарица́емыя Скоропослу́шница. — Изда́ніе второ́е Аѳо́нскаго Ру́сскаго Пантелеи́монова монастыря́. — М.: Въ сѵнодальной тѵпографіи, 1892. — Л. 1-17. [1-я паг.]

/ Къ оглавленію раздѣла /


Наверхъ / Къ титульной страницѣ

0