Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 8-й де́нь.
Собо́ръ свята́го Архистрати́га Михаи́ла и про́чихъ безпло́тныхъ си́лъ.

Аще хра́мъ Собо́ра свята́го Архистрати́га Михаи́ла или́ изво́литъ настоя́тель, твори́ти бдѣ́ніе.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Всехва́льніи му́ченицы.

Безсме́ртніи а́нгели,* жи́зни и́стинно неги́бельныя* отъ пе́рвыя пріе́мше* Жи́зни, всеблаже́нніи,* присносу́щныя сла́вы,* и святíи зри́теліе му́дрости вѣ́чныя бы́сте,* свѣ́та исполня́еми* и свѣщи́ сообраща́емыя,* прили́чно показу́еміи.

Арха́нгели, а́нгели,* нача́ла, престо́ли,* госпо́дствія, и серафи́ми шестокрила́тіи,* и многоочи́тіи херуви́ми боже́ственніи,* му́дрости орга́ни,* си́лы и вла́сти боже́ственнѣйшіи,* Христу́ моли́теся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 4:

Ангельскихъ лико́въ чинонача́льниче, на небесѣ́хъ престо́лу предстоя́ трисо́лнечнаго Божества́ и бога́тно осіява́емь Боже́ственными свѣтлостьми́, испуща́емыми непреста́нно отту́ду, и на́съ, су́щихъ на земли́, трисвято́е пѣ́ніе ра́достно пою́щихъ, страсте́й мглы́ изба́ви и просвѣще́ніемъ уясни́, Михаи́ле Архистрати́же, моли́твенниче о душа́хъ на́шихъ.

И ны́нѣ, богоро́диченъ, [гла́съ то́йже:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ вопіе́мъ Ти́: ра́дуйся, еди́но предста́тельство ду́шъ на́шихъ.]

На стихо́внѣ стихи́ры, гла́съ 6. Подо́бенъ: Тридне́венъ.

Арха́нгельскія си́лы, Христе́,* престо́лу предстоя́ще Твоему́,* мо́лятся о ро́дѣ человѣ́честѣмъ.* Тѣ́хъ у́бо мольба́ми* язы́ковъ де́рзость низложи́,* ми́ръ всѣ́мъ вѣ́рнымъ подая́.

Сти́хъ: Творя́й а́нгелы Своя́ ду́хи* и слуги́ Своя́ пла́мень о́гненный.

Окру́гъ престо́ла всѣ́хъ Царя́* при́сно лику́юще,* а́нгеловъ чи́ни,* на́съ сохраня́йте,* вѣ́рою ва́съ призыва́ющія,* и муче́нія всѣ́хъ изба́вите.

Сти́хъ: Хвали́те Его́ вси́ а́нгели Его́,* хвали́те Его́ вся́ си́лы Его́.

Оте́цъ, Иже надъ всѣ́ми Бо́гъ,* си́лы небе́сныхъ умо́въ,* безобра́зны и невеще́ственны,* пѣвцы́ трисо́лнечныя сла́вы Своея́,* и еди́нственное Сло́во,* и Ду́хъ приведе́.

Сла́ва, и ны́нѣ, богоро́диченъ. Подо́бенъ то́йже:

Ра́дуйся, Богоро́дице Дѣ́во,* съ Гавріи́ломъ, согла́сно* Тебѣ́ вопіе́мъ:* Ты́ бо, ра́дость пе́рвую* свы́ше пріи́мши,* ра́дости вся́ ны́ испо́лни.

Тропа́рь, гла́съ 4:

Небе́сныхъ во́инствъ Архистрати́зи, мо́лимъ ва́съ при́сно мы́, недосто́йніи, да ва́шими моли́твами оградите́ на́съ кро́вомъ кри́лъ невеще́ственныя ва́шея сла́вы, сохраня́юще ны́, припа́дающія прилѣ́жно и вопію́щія: отъ бѣ́дъ изба́вите ны́, я́ко чинонача́льницы вы́шнихъ си́лъ.

Сла́ва, и ны́нѣ, богоро́диченъ 1-й, гла́са:

[Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Трисо́лнечнаго Божества́* предста́тель свѣтлѣ́йшій, Михаи́ле, явля́яся, Архистрати́же,* съ го́рними си́лами зове́ши, ра́дуяся:* Свя́тъ еси́, Отче,* Свя́тъ еси́, собезнача́льное Сло́во,* Свя́тъ еси́, и Святы́й Ду́ше;* еди́на сла́ва,* еди́но ца́рство и естество́,* еди́но Божество́ и си́ла. [Два́жды.]

И ви́дъ тво́й о́гненъ,* и добро́та чу́дна,* Михаи́ле первоа́нгеле,* невеще́ственнымъ бо естество́мъ* прехо́диши концы́,* исполня́я повелѣ́нія всѣ́хъ Творца́,* си́ленъ, въ крѣ́пости твое́й познава́емь* и, исто́чникъ исцѣле́ній хра́мъ тво́й содѣ́ловая,* зва́ніемъ твои́мъ святы́мъ почита́емый.

Творя́й а́нгелы Твоя́,* я́коже писа́ся, ду́хи* и служа́щія Тебѣ́ пла́мень о́гненный,* посредѣ́ чино́въ пе́рвенствующа* показа́лъ еси́, Го́споди, Твои́хъ арха́нгельскихъ* Михаи́ла Архистрати́га,* Твои́мъ манове́ніемъ повину́ющася, Сло́ве,* и пѣ́снь трисвяту́ю* со стра́хомъ возглаша́юща сла́вѣ Твое́й.

Ины стихи́ры, гла́съ 4. Подо́бенъ: Да́лъ еси́ зна́меніе.

Умъ Предвѣ́чный* свѣ́тъ соста́ви вторы́й,* Гавріи́ла тебе прича́стіи Боже́ственными* просвѣща́ющаго всю́ вселе́нную* и ю́же отъ вѣ́ка открыва́ющаго на́мъ* Боже́ственную и вели́кую и́стинно та́йну:* во утро́бѣ Воплоща́емаго дѣ́вственнѣй, су́ща Безтѣле́снаго* и бы́вша Человѣ́ка,* во е́же спасти́ человѣ́ка. [Два́жды.]

Престо́лу предстоя́ трисо́лнечнаго Божества́* и бога́тно осія́емь Боже́ственными свѣтлостьми́,* испуща́емыми непреста́нно отту́ду,* су́щія на земли́, ра́достно лику́ющія* и благохва́лящія тя́,* страсте́й мглы́ изба́ви* и просвѣще́ніемъ уясни́,* Гавріи́ле Архистрати́же,* моли́твенниче о душа́хъ на́шихъ.

Сокруши́ свирѣ́пства ага́рянская,* на ста́до твое́ ча́сто находя́щая,* уста́ви раздо́ры Це́ркве,* укроти́ бу́рю безмѣ́рныхъ искуше́ній,* изба́ви бѣ́дъ и обстоя́ній* любо́вію чту́щія тя́* и подъ кро́въ тво́й прибѣга́ющія,* Гавріи́ле Архистрати́же,* моли́твенниче о душа́хъ на́шихъ.

Сла́ва, гла́съ 6. Византíево.

Сра́дуйтеся на́мъ, вся́ а́нгельская чинонача́лія, первостоя́тель бо ва́шъ и на́шъ предста́тель, вели́кій Архистрати́гъ, въ дне́шній де́нь въ честнѣ́мъ его́ хра́мѣ пресла́вно явля́яся, освяща́етъ. Тѣ́мже, по до́лгу воспѣва́юще, тому́ возопіи́мъ: покры́й на́съ кро́вомъ кри́лъ твои́хъ, велича́йшій Михаи́ле арха́нгеле.

И ны́нѣ, богоро́диченъ:

Сра́дуйтеся на́мъ, вся́ дѣ́вственныхъ ликостоя́нія, Предста́тельница бо на́ша, и Хода́таица, и Покро́въ, и вели́кое Прибѣ́жище въ дне́шній де́нь въ честнѣ́мъ Ея́ и боже́ственнѣмъ хра́мѣ скорбя́щія утѣша́етъ. Тѣ́мже, по до́лгу воспѣва́юще Сію́, возопіи́мъ: покры́й ны́ боже́ственнымъ предста́тельствомъ Твои́мъ, Пречи́стая Богоро́дице Влады́чице.

Вхо́дъ. Проки́менъ дне́.

Іису́са Нави́на чте́ніе. [Глава́ 5.]

Бы́сть, егда́ бя́ше Іису́съ отъ Іерихо́на и, воззрѣ́въ очи́ма свои́ма, ви́дѣ человѣ́ка, стоя́ща предъ ни́мъ, и ме́чь его́ обнаже́нъ въ руцѣ́ его́. И, прише́дъ, Іису́съ рече́ ему́: на́шъ ли еси́ или́ отъ сопроти́вныхъ на́шихъ? Онъ же рече́ ему́: а́зъ, архистрати́гъ си́лы Госпо́дни, ны́нѣ пріидо́хъ сѣ́мо. И Іису́съ паде́ лице́мъ свои́мъ на зе́млю и рече́ ему́: влады́ко, что́ повелѣва́еши твоему́ рабу́? И рече́ архистрати́гъ Госпо́день ко Іису́су: разрѣши́ сапо́гъ тво́й отъ но́гъ твои́хъ, мѣ́сто бо, на не́мже ты́ стои́ши, свя́то е́сть. И сотвори́ Іису́съ та́ко.

Суде́й Изра́илевыхъ чте́ніе. [Глава́ 6.]

Бы́сть во дни́ о́ны, укрѣпи́ся Мадіа́мъ на сы́ны Изра́илевы, и тíи возопи́ша ко Го́споду Бо́гу; и се́ а́нгелъ Госпо́день пріи́де и сѣ́де подъ ду́бомъ, и́же въ Евфра́ѳѣ, въ земли́ Іоа́са, отца́ Езри́мова, и Гедео́нъ, сы́нъ его́, млатя́ше пшени́цу на гумнѣ́, е́же бѣжа́ти съ не́ю отъ лица́ Мадіа́мля. И яви́ся ему́ а́нгелъ Госпо́день и рече́ къ нему́: Госпо́дь съ тобо́ю, си́льный крѣ́постію. И рече́ къ Нему́ Гедео́нъ: во мнѣ́, Го́споди мо́й, и а́ще е́сть Госпо́дь съ на́ми, и чесо́ ра́ди обрѣто́ша ны́ вся́ зла́я сія́? И гдѣ́ су́ть вся́ чудеса́ Его́, ели́ка повѣ́даша на́мъ отцы́ на́ши, глаго́люще: не изъ Еги́пта ли изведе́ на́съ Госпо́дь? И ны́нѣ отве́рже ны́ Госпо́дь и предаде́ ны въ ру́ку Мадіа́млю. И воззрѣ́ на него́ а́нгелъ Госпо́день и рече́ ему́: иди́ въ крѣ́пости твое́й се́й и спасе́ши Изра́иля отъ руки́ Мадіа́мли, и се́ посла́хъ тя́. И рече́ къ Нему́ Гедео́нъ: во мнѣ́, Го́споди, въ чесо́мъ спасу́ Изра́иля? Се́ ты́сяща моя́ ху́ждша въ Манассíи, и а́зъ е́смь мнíй въ дому́ отца́ моего́. И рече́ къ нему́ Госпо́дь: поне́же Азъ бу́ду съ тобо́ю, и избіе́ши Мадіа́ма, я́ко му́жа еди́наго. И рече́ къ Нему́ Гедео́нъ: и а́ще обрѣто́хъ благода́ть предъ очи́ма Твои́ма, и да сотвори́ши мнѣ́ дне́сь зна́меніе, я́ко Ты́ глаго́леши со мно́ю. Не отыди́ отсю́ду, до́ндеже пріити́ мнѣ́ къ Тебѣ́, и принесу́ же́ртву мою́, и пожру́ предъ Тобо́ю. И рече́ къ нему́ а́нгелъ Госпо́день: Азъ е́смь, и преме́длю, до́ндеже обрати́шися ты́. Гедео́нъ же вни́де и сотвори́ ко́злище отъ ко́зъ и че́тверть муки́ опрѣсно́ковъ, и вложи́ съ мя́сомъ въ ко́шницу, и юху́ влія́ въ горне́цъ, и изнесе́ къ Нему́ подъ ду́бъ, и поклони́ся. И рече́ къ нему́ а́нгелъ Госпо́день: возьми́ мяса́ и хлѣ́бы прѣ́сныя и положи́ у ка́мене о́наго и юху́ излíй. И сотвори́ та́ко. И простре́ а́нгелъ Госпо́день коне́цъ жезла́, су́щаго въ руцѣ́ Его́, и косне́ся мясо́мъ и хлѣ́бомъ прѣ́снымъ, и возгорѣ́ся о́гнь изъ ка́мене, и пояде́ мяса́ и опрѣсно́ки, и а́нгелъ Госпо́день оты́де отъ оче́й его́. И ви́дѣ Гедео́нъ, я́ко а́нгелъ е́сть Госпо́день, и рече́ Гедео́нъ: увы́ мнѣ́, Го́споди, Го́споди, я́ко ви́дѣхъ а́нгела Госпо́дня лице́мъ къ лицу́. И рече́ ему́ Госпо́дь: ми́ръ тебѣ́, не бо́йся, не у́мреши. И созда́ та́мо Гедео́нъ же́ртвенникъ Го́споду и назва́ его́ ми́ръ Госпо́день, да́же до дне́ сего́.

Проро́чества Иса́іина чте́ніе. [Глава́ 14.]

Та́ко глаго́летъ Госпо́дь: вся́ земля́ да вопіе́тъ съ весе́ліемъ. И древа́ Лива́нова да возвеселя́тся о тебѣ́, и ке́дри Лива́новы реку́тъ: отне́лѣже ты́ усну́лъ еси́, не взы́де сѣкíй на́съ. Адъ до́лѣ огорчи́ся, срѣ́тивъ тебе́, гряду́щу ти́, воздви́же на тя́ исполи́ны вся́, нача́льствовавшія земле́ю. Аще воста́ли бы́ша отъ престо́лъ свои́хъ вси́ ца́ріе язы́честіи, вси́ отвѣща́ютъ и реку́тъ тебѣ́: и ты́ плѣне́нъ еси́, я́коже и мы́, съ на́ми же причта́лся еси́. Сни́де во а́дъ сла́ва твоя́ и мно́гое твое́ весе́ліе, подъ тобо́ю посте́лютъ гни́лость, и покро́въ тво́й — че́рви. Ка́ко спаде́ съ небесе́ денни́ца, зау́тра возсіява́ющая, сокруши́ся на зе́млю, посыла́яй ко всѣ́мъ язы́комъ. Ты́ бо ре́клъ еси́ въ помышле́ніи твое́мъ: на не́бо взы́ду, верху́ звѣ́здъ небе́сныхъ поста́влю престо́лъ мо́й и ся́ду на горѣ́ высо́цѣй, на гора́хъ высо́кихъ, су́щихъ къ сѣ́веру. И взы́ду вы́шше облако́въ, и бу́ду подо́бенъ Вы́шнему. Ны́нѣ же во а́дъ сни́деши, во основа́нія земли́. И ви́дѣвшіи тя́ почудя́тся и реку́тъ о тебѣ́: се́й человѣ́къ, смуща́яй зе́млю, потряса́яй цари́, положи́вый вселе́нную всю́ пу́сту, и гра́ды ея́ низложи́, и плѣне́нныхъ не разрѣши́ въ до́мы и́хъ. Вси́ ца́ріе язы́честіи успо́ша въ чести́, человѣ́къ въ дому́ свое́мъ, ты́ же отве́рженъ бу́деши въ гора́хъ, я́ко мертве́цъ, возгнуше́нъ со мно́гими мертвецы́, избоде́ными мече́мъ, низходя́щими во а́дъ. Имже о́бразомъ ри́за, кро́вію намоче́на, не бу́детъ чиста́, си́це ниже́ ты́ бу́деши чи́стъ, зане́ зе́млю Мою́ погуби́лъ еси́, и лю́ди Моя́ порази́лъ еси́, и не пребу́деши въ вѣ́чное вре́мя.

На литíи стихи́ры, гла́съ 1. Кипріа́ново:

Умныхъ си́лъ архистрати́зи, предстоя́ще непреста́нно Влады́чню престо́лу, моли́теся ко Го́споду ми́ръ мíру дарова́ти и душа́мъ на́шимъ ве́лію ми́лость.

Арсе́ніево:

Чинонача́льникъ вы́шнихъ си́лъ, Михаи́лъ, первостоя́тель боже́ственныхъ чино́въ, дне́сь на́съ къ торжеству́ созва́, и́же всегда́ съ на́ми ходя́й и сохраня́яй вся́ отъ вся́каго діа́воля обстоя́нія. Пріиди́те у́бо, празднолю́бцы и христолю́бцы, цвѣ́ты добродѣ́телей взе́мше, чи́стыми по́мыслы и со́вѣстію благостоя́нною арха́нгеловъ собо́ръ почти́мъ: то́й бо, непреста́нно Бо́гу предстоя́ и трисвяту́ю пѣ́снь воспѣва́я, мо́литъ спасти́ся душа́мъ на́шимъ.

Гла́съ 2. Студи́тово:

Невеще́ственное существо́, у́мныхъ си́лъ предста́тельствующе и трисо́лнечныя сла́вы блиста́ньми свѣтодаю́ще вселе́ннѣй, архистрати́зи, непреста́ннымъ гла́сомъ трисвяту́ю пѣ́снь воспѣва́ете. Тѣ́мже моли́теся спасти́ся душа́мъ на́шимъ.

Гла́съ то́йже. Арсе́ніево:

Невеще́ственный престо́лъ окружа́юще, у́мная существа́, боже́ственніи, безтѣле́сніи, трисвяту́ю пѣ́снь прави́телю-Бо́гу пла́менными устна́ми поете́: Святы́й Бо́же — Отче безнача́льный, Святы́й Крѣ́пкій — Сы́не собезнача́льный, Святы́й Безсме́ртный — единосу́щный Ду́ше, Отцу́ и Сы́ну спрославля́емый.

Анато́лія:

Безтѣле́сными устна́ми и у́мными усты́ а́нгельстіи чи́ни непреста́нное пѣ́ніе прино́сятъ Твоему́ непристу́пному Божеству́, Го́споди, и у́ми чи́стіи и служи́теліе Твоея́ сла́вы хва́лятъ Тя́, Го́споди. Съ ни́миже Михаи́лъ безтѣле́сный, и Гавріи́лъ зѣло́ благолѣ́пнѣйшій, и первостоя́теліе го́рнихъ си́лъ, архистрати́зи а́нгельстіи, учреди́теліе на́ши дне́сь бы́ша, пѣ́сни пѣ́сней повелѣва́юще на́мъ пѣ́ти непристу́пнѣй сла́вѣ Твое́й, Человѣколю́бче, Ейже мо́лятся непреста́нно за ду́ши на́ша.

Сла́ва, гла́съ 4:

Огненными устна́ми пою́тъ Тя́ херуви́ми, Христе́ Бо́же, безтѣле́сными же усты́ немо́лчно славосло́витъ Тя́ арха́нгельскій ли́къ, Михаи́лъ же, Архистрати́гъ вы́шнихъ си́лъ, побѣ́дную пѣ́снь непреста́нно прино́ситъ сла́вѣ Твое́й. То́й бо на́съ дне́сь озари́ къ торжеству́ свѣ́тлому возбряца́ти досто́йнѣ псало́мски хвалу́ трисвяту́ю бре́нными устна́ми, я́ко вся́ческая Твоего́ хвале́нія испо́лнишася, и подае́ши мíру тѣ́мъ ве́лію ми́лость.

И ны́нѣ, гла́съ то́йже. Гео́ргія Никомидíйскаго:

Дне́сь боговмѣсти́мый хра́мъ, Богоро́дица, въ хра́мъ Госпо́день приво́дится, и Заха́рія Сію́ пріе́млетъ: дне́сь Свята́я святы́хъ ра́дуются, и ликъ а́нгельскій та́инственно торжеству́етъ. Съ ни́миже и мы́, пра́зднующе дне́сь, съ Гавріи́ломъ возопіи́мъ: ра́дуйся, Благода́тная, Госпо́дь съ Тобо́ю, имѣ́яй ве́лію ми́лость.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Ангельски въ мíрѣ торжеству́юще,* су́щему на престо́лѣ сла́вы Бо́гу сѣдя́щему* возопіи́мъ пѣ́снь:* Свя́тъ еси́, Отче Небе́сный,* Свя́тъ еси́, соприсносу́щное Сло́во,* Свя́тъ еси́, и Ду́ше всесвяты́й.

Сти́хъ: Творя́й а́нгелы Своя́ ду́хи* и слуги́ Своя́ пла́мень о́гненный.

Небе́снымъ пе́рвствуя въ дерзнове́ніи мно́зѣмъ* и предстоя́ престо́лу стра́шному въ сла́вѣ,* самови́дче неизрече́нныхъ,* спаси́ ны́, Михаи́ле Архистрати́же,* су́щія въ ну́ждахъ бѣ́дъ и напа́стей* моли́твами твои́ми, мо́лимся.

Сти́хъ: Хвали́те Его́ вси́ а́нгели Его́,* хвали́те Его́ вся́ си́лы Его́.

Безпло́тныхъ а́нгеловъ пе́рвый еси́* и служи́тель Боже́ственнаго свѣтозаре́нія о́наго,* самови́децъ же и таи́нникъ,* спаси́ ны́, Михаи́ле Архистрати́же,* лѣ́тно чту́щія тя́ благоче́стно* и пою́щія Тро́ицу вѣ́рно.

Сла́ва, и ны́нѣ, гла́съ 8. Іоа́нна мона́ха:

Яко чинонача́льникъ, и побо́рникъ, и а́нгеловъ началово́ждь, архистрати́же, вся́кія ну́жды и ско́рби, неду́говъ и лю́тыхъ грѣхо́въ свободи́ вѣ́рно воспѣва́ющія и моля́щія тя́, сла́вне, я́вѣ, я́ко невеще́ственъ, Невеще́ственнаго зря́, и непристу́пнымъ свѣ́томъ Влады́чнія сла́вы осія́емь: То́й бо человѣколю́бно пло́ть на́съ ра́ди отъ Дѣ́вы прія́тъ, спасти́ восхотѣ́въ человѣ́чество.

Тропа́рь, гла́съ 4: Небе́сныхъ во́инствъ.., два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь: Небе́сныхъ во́инствъ.., два́жды. Сла́ва, и ны́нѣ, богоро́диченъ: Еже отъ вѣ́ка утае́ное...

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Престо́лу стра́шному предстоя́ще при́сно и свѣ́тлыми заря́ми трисо́лнечнаго Божества́ осія́еми, просвѣти́те ны́, грѣхо́вный мра́къ отгоня́ще, ва́шъ собо́ръ пра́зднующія свѣ́тло, и прилѣ́жно моли́те изба́витися на́мъ отъ бѣ́дъ, пресвѣ́тліи моли́твенницы.

Сла́ва, гла́съ то́йже. Подо́бенъ: Ли́къ а́нгельскій.

Ли́къ а́нгельскій, Архистрати́га имѣ́я, боже́ственнаго Михаи́ла, съ ни́мъ Святѣ́й Тро́ицѣ приноша́етъ пѣ́ніе, отъ не су́щихъ бо Содѣ́тель вся́ческихъ во́инства огнезра́чныхъ чино́въ сло́вомъ приведе́.

И ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ и сло́ва, непреста́нно моли́ съ го́рними си́лами пода́ти оставле́ніе грѣхо́въ на́шихъ всѣ́хъ, и исправле́ніе житія́, вѣ́рою и любо́вію сла́вящимъ Тя́.

По 2-мъ стихосло́віи сѣда́ленъ, гла́съ 2. Подо́бенъ: Егда́ снизше́лъ еси́.

Посредѣ́ полко́въ а́нгельскихъ старѣ́йшій яви́лся еси́, Михаи́ле Архистрати́же, Вы́шняго Царя́ непреста́нно моли́, до́льнихъ мучи́телей горды́ню низложи́ти. И, я́ко имѣ́я дерзнове́ніе у престо́ла огнезра́чнаго, моли́ за ны́ непреста́нно, рабы́ твоя́.

Сла́ва, гла́съ 4. Подо́бенъ: Ско́ро предвари́.

Херуви́ми и серафи́ми, многоочи́тая арха́нгеловъ служи́телей во́инства, со властьми́ престо́ли, госпо́дства, а́нгели, си́лы же и нача́ла, мо́лятъ Тя́, Творца́ на́шего, и Бо́га, и Влады́ку, да не пре́зриши моле́нія люде́й согрѣши́вшихъ, Бо́же Многоми́лостиве.

И ны́нѣ, богоро́диченъ:

Дѣ́во Всенепоро́чная, Яже пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

[Велича́ніе:

Велича́емъ тя́, святы́й Архистрати́же Бо́жій Михаи́ле, и ва́съ, святíи арха́нгели, а́нгели, нача́ла, вла́сти, престо́ли, госпо́дствія, си́лы, херуви́ми, стра́шніи серафи́ми, прославля́ющія Го́спода.

Псало́мъ избра́нный: Исповѣ́мся Тебѣ́, Го́споди, всѣ́мъ се́рдцемъ мои́мъ, и предъ а́нгелы воспою́ Тебѣ́...]

По поліеле́и сѣда́ленъ, гла́съ 8. Подо́бенъ: Прему́дрости.

Небе́сныхъ чино́въ наста́вникъ, служи́тель же сла́вы Боже́ственныя досто́йно бы́въ повелѣ́ніемъ Зижди́теля твоего́, христіа́номъ еси́ хода́тай спасе́нный, невеще́ственною твое́ю сла́вою земны́я назира́я. Тѣ́мже по до́лгу восхваля́емъ тя́ вси́, боже́ственное твое́ дне́сь воспѣва́юще торжество́, Михаи́ле Архистрати́же, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію свято́е твое́ торжество́.

Сла́ва, гла́съ 4. Подо́бенъ: Ско́ро предвари́.

Ангельстіи чи́ни со стра́хомъ предстоя́тъ престо́лу Твоему́, Влады́ко Христе́ Бо́же, и, и́же отту́ду заря́ми при́сно просвѣща́еми, пѣ́снь Ти́ немо́лчно побѣ́дную воспѣва́ютъ, и́хже свяще́нными моли́твами ми́ръ мíру да́руй и душа́мъ на́шимъ ве́лію ми́лость.

И ны́нѣ, богоро́диченъ:

Чи́стая, и Всенепоро́чная, и Неискусому́жная Дѣ́во Ма́ти, Яже еди́на безлѣ́тнаго Сы́на и Сло́ва Бо́жія въ лѣ́то поро́ждши, Сего́ со безпло́тными честны́ми небе́сными си́лами моли́ дарова́ти на́мъ очище́ніе грѣхо́въ и ве́лію ми́лость.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Творя́й а́нгелы Своя́ ду́хи,* и слуги́ Своя́ пла́мень о́гненный. Сти́хъ: Благослови́, душе́ моя́, Го́спода, [Го́споди Бо́же мо́й, возвели́чился еси́ зѣло́]. Вся́кое дыха́ніе... Ева́нгеліе Матѳе́я, зача́ло 52. Сла́ва: Моли́твами арха́нгеловъ... И ны́нѣ: Моли́твами Богоро́дицы...

По 50-мъ псалмѣ́ стихи́ра, гла́съ 6:

Ангели Твои́, Христе́, престо́лу вели́чества во стра́сѣ предстоя́ще и Твои́мъ свѣтоли́тіемъ при́сно осіява́еми, въ вы́шнихъ пѣснопѣ́вцы Твои́ и совѣ́та Твоего́ служи́теліе, отъ Тебе́ низпосыла́еми, да́ютъ просвѣще́нія душа́мъ на́шимъ.

Кано́нъ Богоро́дицы, со ирмосо́мъ на 6, гла́съ 8. Ирмо́съ по два́жды: Пои́мъ Го́сподеви, прове́дшему лю́ди Своя́... [Пи́санъ во окто́ихѣ, во осмо́мъ гла́сѣ, въ недѣ́лю на у́трени тре́тій кано́нъ.] И безпло́тныхъ два́ кано́на на 8.

Пе́рвый кано́нъ, творе́ніе Іоа́нна мона́ха, его́же краегране́сіе: Да торжеству́емъ, богому́дріи, похвалу́ собо́ру безпло́тныхъ. Гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Вси́ воспои́мъ, вѣ́рніи, вся́ управля́ющую невеще́ственныя го́рнихъ лико́въ чинонача́лія, Тро́ицу несозда́нную: Свя́тъ, Свя́тъ, Свя́тъ еси́, вопію́ще, Бо́же Вседержи́телю.

Положи́лъ еси́ тва́рей нача́ло, существо́ безпло́тное, Тво́рче а́нгеловъ, пречи́стый Тво́й престо́лъ окружа́ющее, зва́ти Тебѣ́: Свя́тъ, Свя́тъ, Свя́тъ еси́, Бо́же Вседержи́телю.

Ра́дуйся, Гавріи́ле, тайнови́дче Бо́жія воплоще́нія, Михаи́ле же, чино́въ невеще́ственныхъ первостоя́телю, непреста́нно зову́ще: Свя́тъ, Свя́тъ, Свя́тъ еси́, Бо́же Вседержи́телю.

Богоро́диченъ: Трепе́щу та́инства, Христе́, Твоего́ снизхожде́нія, я́ко, Иже естество́мъ Бо́гъ, прія́лъ еси́ отъ Дѣ́вы роди́тися я́ко Человѣ́къ, да спасе́ши мíръ отъ рабо́ты проти́внаго.

Другíй кано́нъ, творе́ніе того́жде Іоа́нна мона́ха. Гла́съ то́йже.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Умныя безпло́тныхъ чино́въ ли́ки пѣ́сньми, я́ко служи́тели Боже́ственныя, пріиди́те, восхва́лимъ, ли́къ совоку́пльше, о на́шемъ спасе́ніи непреста́нно моля́щіяся и о покая́ніи на́шемъ сра́дующіяся.

Иже а́нгеловъ началовожди́, и предъизбра́нніи, и чинонача́льницы свѣ́тліи, безпло́тныя умы́ дне́сь воздви́жутъ къ наверше́нію пра́здника свѣ́тлыя и́хъ па́мяти, съ ни́миже ку́пно ра́дуются человѣ́цы, пѣ́ніе Тро́ицѣ принося́ще.

Да возвесели́мся со а́нгелы дне́сь, человѣ́цы, духо́внѣ въ ра́дости: Гавріи́лъ бо па́ки ны́нѣ благовѣству́етъ Це́рквей соедине́ніе и низложе́ніе вся́кія проти́вныя е́реси въ па́мяти архистрати́говъ.

Богоро́диченъ: Ражда́еши су́щее па́че естества́, Пречи́стая, въ Тебѣ́ все́льшееся Отчее Сло́во Ду́хомъ Святы́мъ, во дву́ у́бо естества́хъ и хотѣ́ніихъ су́ща, во Ѵпоста́си же непрело́жно еди́нѣй, Ея́же и зра́къ цѣлу́емъ.

Катава́сія: Отве́рзу уста́ моя́...

Пѣ́снь 3.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Крѣ́постію поста́вилъ еси́, Безсме́ртне, си́льныя, соверша́ющія всесвяту́ю Твою́ во́лю, Тебѣ́ въ вы́шнихъ всегда́ предстоя́щія.

Таи́нники Твоего́ вочеловѣ́ченія и честна́го воста́нія, а́нгельскія чинонача́льники, Христе́, за ны́ пріими́ моля́щіяся.

Ангелы приста́вилъ еси́ храни́тели человѣ́комъ, я́ко Благоутро́бенъ, служи́тели же показа́лъ еси́, Христе́, спасе́нія Твои́хъ уго́дниковъ.

Богоро́диченъ: Неизрече́нно зачала́ еси́ Го́спода и Спа́са, Богоневѣ́сто, избавля́ющаго ны́ отъ лю́тыхъ, Тя́ вои́стиннѣ призыва́ющія.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Ангеловъ пе́рвѣйшій и Тро́ицы свѣ́тъ вторы́й яви́лся еси́ на́мъ, Михаи́ле нача́льниче, вѣ́рно благохва́лящимъ тя́.

Заре́ю Боже́ственныя благода́ти Гавріи́лъ вѣ́рно испо́лни всю́ зе́млю, Бо́жіе проповѣ́давъ во пло́ти прише́ствіе.

Сопру́гъ приснопѣва́емый и свѣтоза́рная дво́ице невеще́ственная, свѣ́ты Бо́жія, вѣ́рно соверша́ющія ва́шу па́мять покажи́те.

Богоро́диченъ: Воспѣ́ Иса́ія Твое́, е́же па́че ума́, Чи́стая, рождество́, пою́ и а́зъ, да о́наго получу́ очище́нія.

Сѣда́ленъ, гла́съ 8. Подо́бенъ: Повелѣ́нное.

Небе́сныхъ нача́льницы и первостоя́теліе высокопресто́льныхъ и стра́шныхъ, Боже́ственныя сла́вы, Михаи́ле и Гавріи́ле архистрати́зи, а́нгеловъ чинонача́льницы, со всѣ́ми безпло́тными, о служи́теліе Влады́чни! О ми́рѣ непреста́нно моля́щеся, испроси́те оставле́ніе прегрѣше́нныхъ на́ми, и ми́лость, и благода́ть обрѣсти́ въ де́нь су́дный. [Два́жды.]

Сла́ва, и ны́нѣ, богоро́диченъ:

Богоблагода́тная, Чи́стая, Благослове́нная, благоутро́бія ра́ди щедро́тъ изъ Тебе́ Ро́ждшагося, съ вы́шними си́лами, и арха́нгелы, и всѣ́ми безпло́тными моли́ непреста́нно пода́ти на́мъ пре́жде конца́ ми́лостивно проще́ніе грѣхо́въ и житія́ исправле́ніе, я́ко да обря́щемъ ми́лость.

Пѣ́снь 4.

Ирмо́съ: Всѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.

Всѣ́лъ еси́ на а́нгелы, я́коже на ко́ни, Человѣколю́бче, и прія́лъ еси́ руко́ю Твое́ю брозды́ и́хъ, и спасе́ніе бы́сть ѣжде́ніе Твое́ непреста́нно вопію́щимъ: сла́ва си́лѣ Твое́й, Го́споди.

Покрыва́етъ а́нгелы добродѣ́тель Твоя́, Человѣколю́бче, и земли́ исполня́етъ концы́ Твоего́ сла́внаго, Безнача́льне, Боже́ственнаго хвале́нія, съ ни́ми Тебѣ́ вопію́щи: сла́ва си́лѣ Твое́й, Го́споди.

Изше́лъ еси́, Ще́дре, на спасе́ніе люде́й Твои́хъ, Христе́, созыва́еши же дру́ги — си́лы Твоя́, и весе́ліе бы́сть прише́ствіе Твое́ вѣ́рно Тебѣ́ вопію́щимъ: сла́ва си́лѣ Твое́й, Го́споди.

Богоро́диченъ: Дѣ́ва и Ма́ти преесте́ственно яви́лася еси́, Всечи́стая, я́ко Бо́га, Того́жде и Человѣ́ка Христа́, ро́ждшая. Ему́же со стра́хомъ вопію́тъ а́нгельскія чи́ни: сла́ва си́лѣ Твое́й, Го́споди.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Во Іерихо́нѣ яви́ся си́лы Госпо́дни Архистрати́гъ вою́ющему дре́вле Іису́су Нави́ну, побѣдотворя́ и побо́рствуя, Михаи́лъ вели́кій, безпло́тныхъ нача́льникъ сы́й, отъ него́же пріе́мъ си́лу, слуга́ Госпо́день, копіе́мъ плѣни́въ, я́тъ сопоста́ты.

Нача́льникъ нѣ́когда безпло́тныхъ си́лъ яви́ся, нося́ ча́да благовѣ́щенія, Заха́ріи іере́ю Гавріи́лъ вели́кій и боже́ственный и́стинно арха́нгелъ, тѣ́мже гла́съ Словесе́ роди́выйся Іоа́ннъ, отцу́ своему́ гла́съ проглаго́ланія отдае́тъ.

Ра́дуются ра́достію вси́ концы́ земнíи дне́сь, честну́ю па́мять пра́зднующе арха́нгеловъ Твои́хъ, Бо́же, Михаи́ла боже́ственнаго и Гавріи́ла богому́драго; сра́дуется же ку́пно и ве́сь а́нгельскій чи́нъ, я́ко сохраня́ется мíръ покро́вомъ и́хъ.

Богоро́диченъ: Еди́на Чи́стая пребыла́ еси́ и по рождествѣ́, еди́на то́кмо яви́лася еси́ Безму́жная, млеко́мъ пита́ющая Сло́во Отчее и́стинное, Ду́хомъ Святы́мъ пріе́мшее ра́бій зра́къ по на́мъ, Дѣ́во Богоро́дице, Его́же, Боже́ственное чту́ще зра́ка подо́біе, почита́емъ.

Пѣ́снь 5.

Ирмо́съ: Отъ но́щи невѣ́дѣнія по душелови́тельному пути́ при́сно блудя́щаго, свѣ́томъ ра́зума Твоего́, Го́споди, преднаставля́я мя́, на стезю́ за́повѣдей Твои́хъ напра́ви.

Невозвра́тнымъ жела́ніемъ при́сно къ высотѣ́, къ Тебѣ́, Христе́, носи́ми, кра́йнѣйшему всѣ́хъ жела́ній, а́нгельскія си́лы непреста́нно Тя́ сла́вятъ.

Ты́ у́мныя по существу́, нетлѣ́нныя благода́тію Твое́ю, Христе́, устро́илъ еси́ пѣснопѣ́вцы Твоего́ вели́чества, а́нгелы Твоя́ по о́бразу содѣ́лавъ, Непостижи́ме.

Ты́ непрекло́нны на го́ршее къ Тебѣ́ приближе́ніемъ, Христе́, сохрани́лъ еси́ Твоя́ слуги́, исто́чникъ бо бла́гости Ты́ еси́, благотвори́ши досто́йно Тебѣ́ служа́щія.

Богоро́диченъ: Умерщвле́нную мою́ ду́шу страстьми́ ме́рзкими, Всенепоро́чная, оживи́, жи́зни Храни́теля ро́ждшая, и къ стези́ вѣ́чнѣй, и блаже́ннѣй жи́зни упра́ви.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Непокаря́ющуся дре́вле Бо́жіимъ неизрече́ннымъ и Боже́ственнымъ чудесе́мъ Валаа́му волхву́, на распу́тіи а́нгелъ, ослу́ яви́вся, стра́шно обличи́ и, слове́сно живо́тное показа́въ, естества́ премѣни́ позна́ніе.

Яту бы́вшу Петру́ и въ темни́цѣ пребыва́ющу, а́нгелъ яви́ся Бо́жій, отъ ру́къ Иродовыхъ, и у́зъ, и сме́рти избавля́я. Тѣ́мже, пріиди́те вси́, я́ко ду́шъ храни́тели Боже́ственныя, му́дрыя арха́нгелы да почти́мъ.

Бра́ней крамолы́, а́нгели, арха́нгели, боже́ственныя си́лы Бо́жія, и церко́вныя е́реси, и вся́ собла́зны ва́шими разрѣши́те къ Бо́гу при́сными мольба́ми и на́съ въ ми́рѣ соблюди́те.

Богоро́диченъ: Во дву́ существа́хъ Еди́наго Тя́ вѣ́мы, Бо́га тва́ри, дѣ́йствы обѣ́ма и хотѣ́ніи су́ща несли́тна, Сы́на Бо́жія, отъ жены́ пло́ть пріи́мша, Ея́же о́бразъ почита́емъ на дщи́цахъ.

Пѣ́снь 6.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же, свя́заннаго мре́жами вра́жіими, я́ко отъ тли́ о́наго, спаси́.

Благолѣ́пнѣ отъ не су́щихъ, Го́споди, сло́вомъ Твои́мъ приве́лъ еси́ существа́ небе́сныхъ безсме́ртныхъ во́инствъ, свѣтови́дны ты́я содѣ́ловая.

Таи́нницы честнíи Бо́жія хвале́нія бы́сте, безпло́тніи, гра́ждане небе́сныя и Боже́ственныя и́стинно ски́ніи, Творцу́ досто́йно служа́ще.

Безпло́тныхъ чи́ни у́мніи Тя́, Сы́не Бо́жій пребезнача́льный, хва́лятъ непреста́нно и славосло́вятъ, я́ко Творца́ и Созда́теля вся́ческихъ.

Богоро́диченъ: Со Отце́мъ въ вы́шнихъ, Пречи́стая, безнача́льнѣ сѣдя́щаго, на объя́тіихъ Твои́хъ восклони́ти сподо́билася еси́: Его́же на́мъ пода́ждь, Чи́стая, рабо́мъ Твои́мъ, Ми́лостива.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Яко о́гнь, и пла́мень, и свѣ́тъ, безпло́тныя су́щія, отъ веще́ственныя тли́ умо́мъ восперя́еми, бре́нными устна́ми невеще́ственныя со стра́хомъ пѣ́сньми да почти́мъ.

Умертви́те страсте́й бу́ри, арха́нгели, и утиши́те съ ни́ми возмуще́нія вся́ на вѣ́ру, святíи Тро́ицы су́ще огнезра́чніи архистрати́зи.

Арха́нгели Бо́жіи, безпло́тныхъ нача́льницы, предста́тельствомъ ва́шимъ отъ вся́кія е́реси на́съ сохрани́те, Михаи́ле нача́льниче и Гавріи́ле, архистрати́зи.

Богоро́диченъ: Изъ утро́бы яви́лся еси́ во́лею, отъ Неискусому́жныя воплоща́емь, безпло́тенъ сы́й, я́ко Бо́гъ, Христе́, плотоно́сецъ же, я́ко Человѣ́къ, бы́лъ еси́. Его́же подо́бія, вѣ́рніи, ви́дъ почита́емъ.

Конда́къ, гла́съ 2:

Архистрати́зи Бо́жіи, служи́теліе Боже́ственныя сла́вы, а́нгеловъ нача́льницы и человѣ́ковъ наста́вницы, поле́зное на́мъ проси́те, и ве́лію ми́лость, я́ко безпло́тныхъ архистрати́зи.

Икосъ:

Ре́клъ еси́, Человѣколю́бче, въ Писа́ніихъ Твои́хъ: мно́жеству ра́доватися а́нгеловъ на небеси́ о человѣ́цѣ еди́номъ ка́ющемся, Безсме́ртне. Тѣ́мже мы́, и́же въ беззако́ніихъ, Безгрѣ́шне еди́не Сердцевѣ́дче, Тя́ моли́ти всегда́ дерза́емъ, я́ко Благоутро́бнаго, уще́дрити и низпосла́ти недосто́йнымъ умиле́ніе, Влады́ко, подая́й на́мъ проще́ніе, о всѣ́хъ бо на́съ мо́лятся Тебѣ́ безпло́тныхъ архистрати́зи.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Свѣ́ты яви́лъ еси́, Ще́дре, а́нгеловъ Твои́хъ невеще́ственное существо́, неизрече́ннаго свѣ́та исполня́еми непреста́нно, — благослове́нъ еси́, — зову́щія, — Бо́же, во вѣ́ки.

Ему́же предстоя́тъ непреста́нно, служа́ще, тмы́ а́нгеловъ, Лица́ же зрѣ́ти не терпя́тъ зрѣ́нія, — благослове́нъ еси́, — зову́ще, — Го́споди Бо́же, во вѣ́ки.

Сло́вомъ Твои́мъ Ѵпоста́снымъ а́нгельское естество́ содѣ́лалъ еси́, освяти́въ же Боже́ственнымъ Ду́хомъ, Тро́ицу богосло́вити научи́лъ еси́, Бо́же, во вѣ́ки.

Тро́иченъ: Три́ у́бо, у́мствующе, Ѵпоста́си, неопи́санное сла́вимъ Существо́, Отца́, Сло́ва со Ду́хомъ, вопію́ще: благослове́нъ еси́, Го́споди Бо́же, во вѣ́ки.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Съ ли́ки безпло́тныхъ и человѣ́ческій ро́дъ, пріиди́те, поклони́мся въ благознамени́тый де́нь се́й, па́мять соверша́юще му́дрыхъ арха́нгеловъ Христо́выхъ, — Свя́тъ, Свя́тъ, Свя́тъ, — пою́ще, — Бо́же оте́цъ на́шихъ.

Яко страннолюби́віи дре́вле, Авраа́мъ богови́децъ и Ло́тъ сла́вный, учреди́ша а́нгелы и обрѣто́ша обще́ніе со а́нгелы, зову́ще: Свя́тъ, Свя́тъ, Свя́тъ еси́, Бо́же оте́цъ на́шихъ.

Мано́ю до́блественному и Тови́ту прему́дрому яви́шася а́нгели, воздаю́ще натрижне́нія житія́ по досто́инству; и отроко́въ а́нгелъ угаси́ пла́мень иногда́, въ пещи́ о́гненнѣй су́щихъ.

Богоро́диченъ: Все́ на́ше по существу́ отъ Дѣ́вы поне́слъ еси́, кромѣ́ измѣне́нія, Іису́се, естествы́ сугу́ба, но еди́наго ѵпоста́сію, оте́чески Тя́ проповѣ́дуемъ, Его́же и ви́дъ вѣ́рно почита́емъ, изобразу́юще.

Пѣ́снь 8.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Ангельскому поревну́имъ житію́, и мы́сли впери́мъ къ высотѣ́, и съ ни́ми невеще́ственно воспои́мъ Го́спода, пою́ще и превознося́ще во вся́ вѣ́ки.

Лико́вственницы ликова́нія небе́сніи, престо́лъ обстоя́ще сла́вы, о́крестъ Бо́га же всегда́ обраща́ющеся, а́нгели пою́тъ и превозно́сятъ Его́ во вся́ вѣ́ки.

Невеще́ственнаго огня́ творя́щей пла́мень, на высотѣ́ непреста́нно служа́щія, и а́нгелы ду́хи явля́ющей, Тро́ицѣ покланя́емся и славосло́вимъ во вся́ вѣ́ки.

Богоро́диченъ: Ему́же на небеси́ предстоя́тъ съ тре́петомъ тмы́ а́нгелъ и арха́нгелъ, Того́ на объя́тіихъ носи́ти сподо́билася еси́, Богоро́дице, моли́ спасти́ся славосло́вящимъ Его́ во вся́ вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Нача́льникъ а́нгеловъ бы́сть Михаи́лъ арха́нгелъ, но сла́вится съ ни́мъ свѣтлѣ́е таи́нникъ благода́ти и Дѣ́вы обручи́тель честны́й, воево́да безпло́тныхъ, досто́йно ра́дость предвозвѣща́я, Гавріи́лъ, вопію́щимъ: лю́діе, превозноси́те Христа́ во вся́ вѣ́ки.

Ангельскія чи́ны въ разли́чномъ зра́цѣ уви́дѣвъ, Іезекíиль, предсказу́я, проповѣ́даше: въ ни́хже шестокри́льніи серафи́ми предстоя́ху, и херуви́ми многоочи́тіи окружа́ху, съ ни́миже арха́нгелы пресвѣ́тлыя зря́ще, Христа́ славосло́вящія во вся́ вѣ́ки.

Яко стра́шно прише́ствіе втора́го сѣда́лища Твоего́ явленнотворя́, Даніи́лъ предглаго́лаше: я́ко престо́ли поста́вишася, и Ве́тхій сѣдя́ше, и тмы́ а́нгеловъ ввожда́ше, со стра́хомъ предстоя́щія и гла́сы немо́лчными вопію́щія Тро́ицѣ во вся́ вѣ́ки.

Богоро́диченъ: Отцу́ и Ду́ху Единосу́щное Сло́во, во́лею яви́ся, и на́мъ, изъ Дѣ́вы, сообра́зенъ, не смѣси́въ въ дру́гъ дру́га, я́же стра́шнаго соедине́нія: Еди́нъ бо и То́йжде во обои́хъ показу́ется, во дву́ существа́хъ и еди́ной ѵпоста́си. Его́же ны́нѣ подо́бія о́бразу покланя́емся.

Пѣ́снь 9.

Ирмо́съ: Уста́вы прешла́ еси́ естества́, Содѣ́теля заче́нши и Го́спода, и две́рь спасе́нія мíрови была́ еси́, тѣ́мъ Тя́, Богоро́дице, непреста́нно велича́емъ.

Тя́, неизрече́нно соедини́вшаго небе́снымъ, Христе́, земна́я и еди́ну Це́рковь соверши́вша а́нгеловъ и человѣ́ковъ, непреста́нно велича́емъ.

Ангели же и арха́нгели, престо́ли, вла́сти и госпо́дства, нача́ла же и си́лы, херуви́ми и серафи́ми, съ Богоро́дицею о мíрѣ моли́теся.

Всѣ́хъ предста́теліе показу́ющіися, Михаи́лъ съ Гавріи́ломъ, посѣти́те отъ любве́ чту́щія всепра́зднственную па́мять ва́шу и вѣ́рно воспѣва́ющія: спаса́йте отъ вся́каго обстоя́нія.

Богоро́диченъ: Ра́дуйся, свята́я Богоневѣ́сто! Ра́дуйся, Свѣ́тъ мíру ро́ждшая вѣ́рнымъ! Ра́дуйся, стѣно́ и покро́ве всѣ́хъ на́съ: Бо́га, я́ко Благодѣ́теля, за ны́ непреста́нно моли́.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Неду́гующихъ, и пла́вающихъ, и су́щихъ въ ну́ждахъ ко спасе́нію побо́рницы яви́стеся, безпло́тныхъ пе́рвіи, Михаи́ле и Гавріи́ле.

Си́лъ и престо́ловъ Боже́ственныхъ слико́вственникъ, я́ко воево́да а́нгельскій и таи́нникъ Бо́жій, о на́съ Спа́су, Гавріи́ле, моли́ся.

Яко храни́теліе мíра и Це́ркве и чинонача́льницы вы́шнихъ си́лъ, о на́съ Спа́са умоли́те.

Богоро́диченъ: Согла́сно, Богоро́дице, Тя́ славосло́вимъ, я́ко отъ страсте́й и бѣ́дъ спаса́еши ны́ и на́ша моле́нія во благи́хъ исполня́еши.

Свѣти́ленъ. Подо́бенъ: Ду́хомъ во святи́лищи.

Огненныхъ, Архистрати́же, слу́гъ предста́тельство отъ Отца́ прія́лъ еси́, Михаи́ле, свѣ́товъ, тѣ́мъ и сія́ніе Того́ сла́вы сія́ющее и́маши, окру́гъ пречи́стаго престо́ла ты́ предстоя́, я́ко пе́рвый невеще́ственныхъ чино́въ.

Сла́ва. Подо́бенъ: Со ученики́.

Невеще́ственныхъ си́лъ, арха́нгелъ и а́нгелъ, госпо́дьствъ, и престо́лъ, и нача́лъ предста́тель предъ Бо́гомъ постоя́нный, Архистрати́же боже́ственне, Михаи́ле пресла́вне, нестерпи́мому бо престо́лу предстоя́й, покры́й, соблюди́, сохрани́ и спаси́ вся́, вѣ́рою тя́ почита́ющія, мірска́го предста́теля.

И ны́нѣ, богоро́диченъ:

Честнѣ́йшая еси́ херуви́мъ сла́вныхъ и серафи́мъ, Всепѣ́тая, стра́шныхъ безъ сравне́нія сла́внѣйшая и всѣ́хъ святы́хъ а́нгелъ святѣ́йшая, Пречи́стая: Зижди́теля бо всѣ́хъ пло́тски неизрече́нно родила́ еси́, Богоро́дице. Его́же моли́ рабо́мъ Твои́мъ разрѣше́ніе дарова́ти прегрѣше́ній.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Небе́сныхъ чино́въ я́ко преднача́льника* и су́щихъ на земли́ человѣ́ковъ крѣ́пкаго тя́ предста́теля,* храни́теля же и изба́вителя* воспѣва́емъ вѣ́рно,* Михаи́ле Архистрати́же,* моля́щеся вся́кія тлетво́рныя болѣ́зни на́съ изба́вити.

Чинонача́льникъ сы́й го́рнихъ боже́ственныхъ си́лъ* дне́сь созыва́етъ человѣ́ческія ли́ки* еди́нъ со а́нгелы свѣ́тлый пра́здникъ соста́вити* собо́ра и́хъ боже́ственнаго* и ку́пно пѣ́снь Бо́гу* воспѣ́ти трисвяту́ю.

Подъ кро́въ боже́ственныхъ ны́ кри́лъ твои́хъ* прибѣга́ющія вѣ́рою,* Михаи́ле, боже́ственный у́ме,* соблюда́й и покрыва́й чрезъ все́ житіе́.* И въ ча́съ, арха́нгеле, сме́ртный, стра́шный* ты́ предста́ни помо́щникъ* всѣ́мъ на́мъ благопріе́мнѣйшій.

Гла́съ 4. Ефре́ма Карíйскаго:

Трисо́лнечныя лучи́, Боже́ственнымъ свѣ́томъ осіява́еми, архистрати́зи, невеще́ственныхъ озаря́ете чинонача́лія, я́коже свѣ́тъ, бѣлообра́знѣ показу́ющеся въ вы́шнихъ, о́гнь облиста́ете въ мíрѣ непристу́пнаго Божества́. Тѣ́мъ и трисвяту́ю пѣ́снь пла́менными устна́ми непреста́нно поете́: свя́тъ, свя́тъ, свя́тъ еси́, Бо́же на́шъ, сла́ва Тебѣ́.

Сла́ва, гла́съ 5:

Идѣ́же осѣня́етъ благода́ть твоя́, арха́нгеле, отту́ду діа́воля прого́нится си́ла: не терпи́тъ бо свѣ́та твоего́ ви́дѣти спады́й денни́ца. Тѣ́мъ мо́лимъ тя́, огнено́сныя его́ стрѣ́лы, я́же на ны́ дви́жимыя, угаси́ хода́тайствомъ твои́мъ, избавля́я на́съ отъ собла́зновъ его́, достохва́льный Михаи́ле Архистрати́же.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна 1-го кано́на пѣ́снь 3-я и 2-го пѣ́снь 6-я. Проки́менъ, гла́съ 4: Творя́й а́нгелы Своя́ ду́хи,* и слуги́ Своя́ пла́мень о́гненный. Сти́хъ: Благослови́, душе́ моя́, Го́спода, [Го́споди Бо́же мо́й, возвели́чился еси́ зѣло́]. Апо́столъ ко Евре́емъ, зача́ло 305. Аллилу́ія, гла́съ 5: Хвали́те Го́спода, вси́ а́нгели Его́, [хвали́те Его́ вся́ си́лы Его́. Сти́хъ: Яко То́й рече́, и бы́ша, То́й повелѣ́, и созда́шася]. Ева́нгеліе Луки́, зача́ло 51. Прича́стенъ: Творя́й а́нгелы Своя́ ду́хи, [и слуги́ Своя́ пла́мень о́гненный].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 63 об. – 74об.

/ Къ оглавленію раздѣла /


Наверхъ / Къ титульной страницѣ

0