Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 7-й де́нь.
Святы́хъ му́ченикъ три́десяти и тре́хъ, и́же въ Мелити́нѣ, и преподо́бнаго отца́ на́шего и чудотво́рца Ла́заря, въ Галисíйстѣй горѣ́ пости́вшагося.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля въ му́ченицѣхъ.

Съ Ника́ндромъ Иси́хія,* Аѳана́сія, Ма́манта,* боже́ственнаго Варахíя, и Каллини́ка,* и Ѳеоге́на, и Ни́кона,* Ло́нгина и Ѳео́дора,* Уалле́рія ку́пно и Ксанѳíя,* Ѳеоду́ла, и Каллима́ха, и Евге́нія,* вси́ соше́дшеся,* съ боже́ственнымъ Ѳеодо́хомъ и Острихíя почти́мъ.

До́бляго Іе́рона,* сла́внаго Епифа́нія,* Максиміа́на ку́пно и Дуки́тія,* Клавдіа́на, и Ѳео́фила,* и боже́ственнаго Гига́нтія,* и Дороѳе́я вѣ́рно, и Ѳеодо́та воспои́мъ,* и Кастри́кія, и Аники́ту ку́пно, и Ѳеме́лія,* Евтихíя же согла́сно,* и́стины свидѣ́тели.

Ины стихи́ры преподо́бнаго, гла́съ 6. Подо́бенъ: Все́ отло́жше.

Все́ отложи́въ страсте́й безслове́сіе* и пло́ть ду́ху покори́въ,* бы́лъ еси́ добродѣ́тели пра́вило,* мона́шествующихъ утвержде́ніе,* по́стниковъ о́бразъ, преподо́бныхъ удобре́ніе.* И ны́нѣ неизрече́нную добро́ту* зри́ши Творца́ твоего́,* пита́яся при́сно добро́тами,* су́щими на небесѣ́хъ ду́хомъ.* Тѣ́мъ, соше́дшеся,* въ пѣ́снехъ пѣ́ніи сла́дкими твою́ честну́ю* и всепра́зднственную па́мять пра́зднуемъ.

Все́ оттря́слъ еси́* ве́щи тяжкобре́менное* и многомяте́жное пло́ти волне́ніе,* укроти́въ, му́дре, дыха́нія,* пребы́лъ еси́, страстьми́ непрекло́ненъ,* я́ко сто́лпъ, укрѣпля́емь* духо́вными броня́ми, умо́мъ до́блественнымъ.* И ны́нѣ Боже́ственнаго получи́* вои́стинну видѣ́нія и свѣ́тлости,* и къ Нему́же жела́лъ еси́, преста́вился,* наслажда́яся Его́ неконе́чныя свѣ́тлости,* положе́ніемъ обожа́емь.

Иліи́ подо́бяся* и Іоа́нну свѣти́льнику,* Свѣ́тъ возлюби́въ,* молча́ти въ гора́хъ и въ пусты́няхъ сухи́хъ,* восхожде́нію всегда́ поуча́яся Боже́ственному* и преспѣва́я добродѣ́телей путе́мъ.* Тѣ́мже пости́глъ еси́ жела́ніе кра́йнее, прему́дре,* и, ра́дуяся, предстои́ши* трисія́нному Тро́ицы Свѣ́ту,* отъ Него́же нехода́тайственнѣ* Боже́ственную пріе́мля зарю́,* со дерзнове́ніемъ моли́ся* о душа́хъ на́шихъ.

Сла́ва, гла́съ 5:

Преподо́бне о́тче, не да́лъ еси́ сна́ твои́мъ очесе́мъ, ниже́ вѣ́ждамъ твои́мъ дрема́нія, до́ндеже ду́шу и тѣ́ло отъ страсте́й свободи́лъ еси́ и тебе́ сама́го угото́валъ еси́ Ду́ха жили́ще. Прише́дъ бо, Христо́съ со Отце́мъ оби́тель въ тебѣ́ сотвори́, и, Единосу́щныя Тро́ицы уго́дникъ бы́въ, великопроповѣ́дниче Ла́заре, о́тче на́шъ, моли́ся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Ра́дуйся.

Агнца Своего́ Агница иногда́ зря́щи, къ заколе́нію тща́щася, усе́рдно послѣ́доваше, сія́ вопію́щи Ему́: ка́мо и́деши, Ча́до Мое́ сладча́йшее, Христе́? чесо́ ра́ди ско́рое тече́ніе сіе́, Долготерпѣли́ве, тече́ши нелѣ́ностно? Іису́се Возжелѣ́ннѣйшій безгрѣ́шне, Многоми́лостиве Го́споди, да́ждь Ми́ сло́во, рабѣ́ Твое́й. Сы́не Мо́й Вселюбе́знѣйшій, не пре́зри, Ще́дре, молча́, Тя́ стра́нно ро́ждшую, Бо́же Всеще́дре, да́руяй мíру ве́лію ми́лость.

На стихо́внѣ окто́иха. Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мже на небесѣ́хъ обрѣ́лъ еси́ мзду́ трудо́въ твои́хъ, де́моновъ разруши́лъ еси́ полки́, а́нгеловъ чи́ны пости́глъ еси́, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́ющія Тя́ на дре́вѣ, Дѣ́ва и Чи́стая Ма́ти Твоя́, зря́щи, я́коже Симео́нъ прорече́, утро́бою, Спа́се, уязвля́шеся.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, преподо́бнаго, гла́съ 8:

Бдѣ́нными моли́твами, тече́ньми сле́зными сто́лпъ омочи́лъ еси́, и изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ па́стырь, всѣ́мъ подая́ проще́ніе, преподо́бне о́тче на́шъ Ла́заре, моли́ся Христу́ Бо́гу спасти́ся душа́мъ на́шимъ.


НА УТРЕНИ,
Кано́нъ окто́иха еди́нъ и святы́хъ два́.

Кано́нъ му́чениковъ, его́же краегране́сіе: Му́дрымъ похвалу́ сію́ му́ченикомъ приношу́. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Совоку́пльшеся боже́ственнымъ небе́снымъ си́ламъ, всѣ́мъ проси́те очище́нія, свѣтоно́сную ва́шу па́мять похваля́ющимъ, добропобѣ́дніи му́ченицы.

Пу́ть муче́нія свѣ́тло ше́ствовати жела́юще, претерпѣ́сте крѣ́пко все́ треволне́ніе муче́нія, укрѣпля́еми Ду́хомъ Святы́мъ.

Свѣти́льницы яви́стеся на земли́, многобо́жія разруша́юще тму́, боже́ственніи страстоте́рпцы, сего́ ра́ди невече́рній Свѣ́тъ пріе́млете.

Богоро́диченъ: Ма́ніемъ вся́ содѣва́яй, изъ Тебе́ па́че сло́ва воплоща́ется, Ма́ти Чи́стая, страстоте́рпцы вѣнча́вый, побѣ́дно врага́ попра́вшія.

Инъ кано́нъ преподо́бнаго, его́же краегране́сіе: Мольбу́ пою́ второ́е тебѣ́, треблаже́нне. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Гряди́те, вѣ́рніи, Ду́хомъ Боже́ственнымъ веселя́щеся вѣ́рно, восхва́лимъ боже́ственнаго Ла́заря, къ нему́ вопію́ще: блаже́нне, твои́ми моли́твами бѣ́дъ изба́ви ны́.

Къ твоему́ па́ки оте́честву пріити́ тя Бо́гъ сотвори́ и не хотя́ща: тѣ́мъ приходя́ща мя́ при́сно къ страсте́мъ спаси́ моли́твами твои́ми.

Свѣтоза́рная богода́нная любо́вь, въ тебѣ́ возсія́вши бога́тно, свою́ ду́шу за бли́жняго тя́ усе́рдно, богоно́се, положи́ти сотвори́.

Богоро́диченъ: Спаси́ ны, Богороди́тельнице Всенепоро́чная, вся́каго гнѣ́ва и скорбе́й, покланя́ющіяся Твоему́ свято́му о́бразу и вѣ́рою Богоро́дицу исповѣ́дающія Тя́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Свяще́нными повелѣ́ніи твои́ми свяще́нныя му́ченики, сла́вне Іе́роне, къ боже́ственному страда́нію ты́ наста́вилъ еси́, и неради́ти о му́кахъ пресла́вно сотвори́лъ еси́, богоблаже́нне.

Сокруша́еми дре́віемъ, стра́сть честну́ю, святíи, преблага́го Влады́ки изобрази́ли есте́, сокруши́сте па́губныя лестцы́ тмы́ благода́тію Вседержи́теля.

На Го́спода всѣ́хъ, богови́дніи му́ченицы, возло́жше упова́ніе, отню́дъ неподви́жими бы́сте стоя́нія бо́льшаго, но зако́нно боже́ственное тече́ніе соверши́сте нра́ва пра́востію.

Богоро́диченъ: Многоимени́тая Отрокови́це, ра́дуйся, Чи́стая Влады́чице, Яже неопи́санное Сло́во поро́ждши опи́санно пло́тію, Его́же ли́къ му́ченическій, Бо́га исповѣ́дая, стра́ждетъ крѣпча́йше.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Крѣ́постію Боже́ственною, му́дре, укрѣпля́емь, изба́вился еси́ звѣре́й свирѣ́пыхъ. Тѣ́мъ моли́ся Христу́ отъ звѣре́й мы́сленныхъ изба́вити пою́щія тя́.

Укрѣпля́емь Христо́вою си́лою, преподо́бне, жа́жду, и тя́жесть пусты́нную, и ску́дость поне́слъ еси́ до́блественно наде́ждею неизрече́нныя сла́дости.

Избѣ́глъ еси́ вражде́бныхъ напа́стей, всеблаже́нне, Ага́риныхъ вну́ковъ, Боже́ственною благода́тію покрыва́емь и мно́гимъ на по́льзу спаса́емь.

Богоро́диченъ: Влады́ку вся́ческихъ, Чи́стая, родила́ еси́, Дѣ́во, па́че сло́ва неизрече́нно, Его́же моли́, Всепѣ́тая, пою́щія Тя́ влады́чествія измѣни́ти страсте́й.

Конда́къ преподо́бнаго, гла́съ 4. Подо́бенъ: Яви́лся еси́.

Яко свѣти́льника превели́каго Це́рковь Христо́ва сла́витъ тя́ съ весе́ліемъ псало́мски. Тѣ́мже не преста́й моля́ся Христу́ да́ти всѣ́мъ прегрѣше́ній проще́ніе.

Сѣда́ленъ, гла́съ 4. Подо́бенъ: Удиви́ся.

Му́жества крѣ́пкое показа́вше, му́дріи, притупи́сте враго́въ всезло́бныя ко́зни, на суди́щи проповѣ́давше Христа́. Тѣ́мъ глава́ми усѣ́чени и Боже́ственною десни́цею вѣнча́стеся, и́же къ тре́мъ десяти́цамъ три́ блаже́нніи, Мелити́ны же жи́тели, на́съ, вѣ́рою вы́ чту́щія, помяни́те, честнíи му́ченицы.

Сла́ва, преподо́бнаго, гла́съ 3. Подо́бенъ: Боже́ственныя вѣ́ры.

Боже́ственный у́мъ твое́ се́рдце имы́й, преподо́бне, земна́я измѣни́ Боже́ственными и стоя́щими, и сликовству́еши а́нгеломъ, Свѣ́та невеще́ственнаго наслажда́яся, непреста́нно веселя́ся. Тѣ́мъ, преподо́бне Христа́ Бо́га моли́ дарова́ти на́мъ ве́лію ми́лость.

И ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая, Ма́ти Дѣ́во, чистото́ю а́нгелы превозше́дшая, па́че всѣ́хъ ме́не пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни Прозя́бшаго, ма́терски подо́бно, рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Заря́ми боже́ственныхъ по́двигъ, всебога́тіи, вселе́нныя вся́ концы́ просвѣща́ете пресла́вно и неви́димыхъ враго́въ тму́ отго́ните. Тѣ́мъ благочестному́дренно ва́ше соверша́емъ свѣтоно́сное и боже́ственное торжество́.

Равному́дріи вси́, по́двигъ соверши́вше, и по́чести ра́вно сподо́бистеся, да́вше кро́ви своя́ за Пострада́вшаго и Боже́ственную Кро́вь Источи́вшаго на дре́вѣ во́лею за на́ше спасе́ніе. Сего́ ра́ди вы́ ублажа́емъ.

Ны́нѣ му́дрыя восхва́лимъ му́ченики, Ѳеоге́на и Ма́манта, Іе́рона, Клавдіа́на, Ни́кона ку́пно и Ника́ндра, Ло́нгина, и Иси́хія, и Вара́хія, Каллини́ка вели́каго и Ксанѳíя боже́ственнаго, Ѳео́фила и Уалле́рія.

Всеу́мно къ подвиго́мъ устреми́вшеся, содѣ́йствующу вся́, достосла́вніи, Боже́ственную благода́ть Изба́вителя обрѣто́сте и вся́ доблему́дренно претерпѣ́сте муче́нія, благода́рственно Христу́ пою́ще: си́лѣ Твое́й сла́ва, Человѣколю́бче.

Богоро́диченъ: Зако́на сѣ́ни и проро́ческая гада́нія Тя́ Ма́терь провозвѣсти́ша дре́вле бы́вшу Изба́вителя. Имже ны́нѣ соверше́ніе мы́ зря́ще, Всенепоро́чная, согла́сно Тя́ пое́мъ, страстоте́рпцевъ сла́во и му́ченикъ святы́хъ держа́ва.

Инъ.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Яко всѣ́хъ вре́менныхъ, преподо́бне, пристра́стія же и любве́ отбѣжа́въ, всю́ къ Бо́гу твою́ наде́жду стяжа́въ всегда́. И е́же стяжа́лъ еси́, ни́щихъ ру́ки прія́ша.

Де́монское злодѣ́йство, преподо́бне, отрази́въ, прираже́ніи звѣри́ными некоснове́нъ отъ сего́ отню́дъ пребы́лъ еси́, блаже́нне, Боже́ственною благода́тію покрыва́емь, тя́ при́сно во всѣ́хъ Заступа́ющаго.

Разсла́бити твою́ крѣ́пость, преподо́бне, вселука́вый тща́шеся, е́же къ Бо́гу зря́ твою́ любо́вь и благодаре́ніе, тѣ́мъ на тя́ псы́ поусти́, но во тщету́ его́ ухищре́ніе обличи́ся.

Богоро́диченъ: Пою́ Тя, Богоро́дице Влады́чице, и вопію́ Ти: Твое́ю моли́твою освяти́, соблюда́ющи, и наста́ви ко спасе́нію мно́гими грѣхи́ па́дающаго и прило́ги де́монскими коле́блема.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Му́дрыхъ страстоте́рпецъ, Максиміа́на и боже́ственнаго Евге́нія съ Ѳео́доромъ, Дуки́тія чту́ще, Каллима́ха, ку́пно Ѳеоду́ла и Дороѳе́я похва́лимъ, му́жески по́двигъ соверши́вшія.

До́бліи ору́жницы, во́лею умерщвля́еми и сокруша́еми, безсме́ртіе вѣ́чно наслѣ́доваша и въ ра́йстѣй лику́ютъ ны́нѣ широтѣ́, блаже́нныя наде́жды пріи́мше.

Дрема́ніе небреже́нія отрази́вше всехва́льніи, во вре́мя по́двигъ ку́пно бо́дростію боже́ственною потеко́сте тече́ніе боже́ственныя вѣ́ры муче́нія и къ приста́нищу небе́сному ны́нѣ пріидо́сте.

Богоро́диченъ: Свя́зана плени́цами мя́ прегрѣше́ній, всепѣ́тая Влады́чице, у́зы а́довы разрѣши́вшая боже́ственнымъ Твои́мъ Рождество́мъ, разрѣши́, молю́ся Тебѣ́, и пути́, вводя́щія къ жи́зни, ступа́ти поспѣши́.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Души́ твоея́ тве́рдое и ра́зума богостоя́нное, преподо́бне, лука́вый, низложи́ти надѣ́явся, во пса́ себе́ преложи́въ, та́ко пріи́де искуси́ти тя́.

Въ ску́дости мно́зѣй недоумѣ́нія вра́гъ бы́въ, отступи́, ничто́же отню́дъ стужи́вша тя́, блаже́нне, зря́, па́че же благода́рственно ску́дость нося́ща.

Же́злъ си́лы, я́коже ору́жіе, кре́стъ, преподо́бне, въ рука́хъ всегда́ нося́, все́ вра́жіе ко́зней дѣ́йство, я́ко пра́хъ, истни́лъ еси́.

Богоро́диченъ: Отча́явшихся наде́жда и предста́тельнице вѣ́рныхъ, спаси́ мя, Ма́ти Бо́жія, отъ вся́каго наси́лія враго́въ неви́димыхъ и ви́димыхъ, Всепѣ́тая.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Въ пѣ́снехъ страда́льца Ѳеодо́та, Иларіо́на, Гига́нтія му́драго, и Аѳана́сія, и боже́ственнаго Евти́хія со Епифа́ніемъ по до́лгу ублажи́мъ.

Да ублажа́тся вѣ́рно Іе́ронъ и Діодо́тъ, Кастри́хій му́дрый и боже́ственный Остри́хій, вели́кій Ѳеме́лій со Амони́томъ, Христо́вы до́бліи му́ченицы.

Крове́й ва́шихъ тече́ніемъ фарао́на неви́димаго потопи́вше со всѣ́мъ во́инствомъ, добропобѣ́дніи му́ченицы, небеса́ постиго́сте и перворожде́нныхъ Це́рковь украси́сте.

Богоро́диченъ: Ору́жія вра́жія, Богороди́тельнице, оскудѣ́ша, отне́лѣже копіе́мъ прободе́ся Христо́съ, Его́же родила́ еси́, Кро́вію и водо́ю обетша́вшія человѣ́ки назида́я.

Инъ.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Хра́мъ Бо́гу твое́ се́рдце хотя́ яви́ти, преподо́бне, Це́ркви обхожда́лъ еси́ святы́хъ, отъ ни́хже прія́лъ еси́ благода́ть оби́льно Свята́го Ду́ха мно́гимъ человѣ́комъ на утвержде́ніе.

Твое́ оте́чество, я́ко бога́тство, тя́, богому́дре, многоцѣ́нное, па́ки прія́тъ Боже́ственнымъ судо́мъ. Тѣ́мъ стра́нна мя́ оте́чества Еде́мскаго, преподо́бне, су́ща наслѣ́дника сему́ содѣ́лай.

Це́рковь тя́ Мари́ны дѣ́вы му́ченицы пе́рво прія́тъ все́льника, въ не́йже, я́ко незаходи́ма, возсія́лъ еси́, звѣзда́, озаря́я, преподо́бне, во тмѣ́ невѣ́дѣнія спя́щія.

Богоро́диченъ: Умоли́ Сы́на Твоего́ и Го́спода, Дѣ́во, о рабѣ́хъ Твои́хъ, вѣ́рою честно́му о́бразу зра́ка Твоего́, Всенепоро́чная, покланя́ющихся при́сно, и́бо мо́жеши.

Конда́къ, гла́съ 8. Подо́бенъ: Яко нача́тки.

Ли́къ му́ченическій я́сенъ, по́лкъ свѣтоно́сенъ, соше́дъ къ на́мъ разу́мно, Це́рковь дне́сь просвѣти́лъ е́сть чу́дными заря́ми. Тѣ́мже, пра́зднующе честну́ю па́мять и́хъ, про́симъ отъ Тебе́, Спа́се на́шъ: тѣ́хъ моли́твами отъ бѣ́дъ изба́ви на́съ, да пое́мъ Ти́: аллилу́ія.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Честну́ю твою́ ру́ку за и́стину, Іе́роне сла́вне, отсѣ́чену зря́, благода́рственныя пѣ́сни Всеви́дцу поя́, взыва́лъ еси́: оте́цъ на́шихъ Бо́же, благослове́нъ еси́.

Высо́кимъ смы́сломъ прообра́зіе сострада́льцемъ бы́лъ еси́, сла́вне Іе́роне, и съ ни́ми вы́шняго Ца́рствія жре́бій прія́лъ еси́, поя́: оте́цъ на́шихъ Бо́же, благослове́нъ еси́.

Во́ини до́бліи Царя́ я́вльшеся вѣ́чнующаго, му́жества ва́шего мече́мъ полки́ лестца́ погуби́ли есте́, пою́ще: оте́цъ на́шихъ Бо́же, благослове́нъ еси́.

Богоро́диченъ: Врача́ поро́ждши, Дѣ́во, се́рдца моего́ стра́сти уврачи́, Чи́стая, и вѣ́чнующаго мя́ муче́нія изба́ви, въ пѣ́снехъ зову́ща: оте́цъ на́шихъ Бо́же, благослове́нъ еси́.

Инъ.

Ирмо́съ: Вѣтíи яви́шася о́троцы любомудрѣ́йшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Трапе́зу оби́льну угото́ва, испо́лнену благи́хъ добродѣ́телей ти́ Боже́ственныхъ, и́миже вся́ пита́я, и пѣ́ти науча́ше: оте́цъ на́шихъ Бо́же, благослове́нъ еси́.

Глаго́ломъ уче́ній твои́хъ прему́дрыхъ послѣ́дующе, лю́діе, маловре́менныхъ всѣ́хъ любо́вь вои́стинну усе́рдно отложи́вше, и жи́тельство съ тобо́ю я́ко бла́го, всеблаже́нне, произво́лиша.

Образъ стяжа́въ житія́ ты́ Симео́на ди́внаго, я́ко ка́мень адама́нтъ, на столпѣ́ безъ покро́ва стоя́лъ еси́, зовы́й, веселя́ся: пребоже́ственный отце́въ и на́шъ Бо́же, благослове́нъ еси́.

Богоро́диченъ: Спаси́ мя́ отъ сѣте́й вра́жіихъ хода́тайствомъ Твои́мъ, Чи́стая, и любви́ коне́чнѣй блага́го Сы́на Твоего́ привяжи́, удаля́ема всегда́ отъ Него́ сластьми́ безмѣ́стными.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Умертви́вшеся мíру, жи́знь бу́дущую наслѣ́дуете и исцѣле́ній благода́ть источа́ете пою́щимъ: благослови́те вся́ дѣла́ Го́спода и превозноси́те Его́ во вѣ́ки.

Свѣ́тліи свѣти́льницы страда́ній сія́ньми я́вльшеся, облиста́ете мíръ, страстоно́сцы му́ченицы, вопію́ще: благослови́те вся́ дѣла́ Го́спода и превозноси́те Его́ во вѣ́ки.

Въ темни́цу вве́ржени, Боже́ственныя вои́стинну храни́теліе и́стины, и воло́выми жи́лами пло́ти неми́лостивно, блаже́нніи, ураня́еми, ника́коже пра́ваго пути́ соврати́стеся. Тѣ́мъ побѣ́дныя прія́сте вѣнцы́.

Словесы́ святы́ми, вѣ́рою просвѣща́еми, Бо́га Отца́ и Сы́на и Свята́го Ду́ха — Тро́ицу Нераздѣ́льну исповѣ́дуемъ, еди́но Ца́рство, еди́но Госпо́дство и еди́ну Вла́сть во вся́ вѣ́ки.

Богоро́диченъ: Яко святѣ́йши а́нгелъ, Чи́стая, прія́ла еси́ во святы́хъ почива́ющаго Бо́га всѣ́хъ: сего́ ра́ди вси́, вѣ́рніи, пое́мъ Тя́ и славосло́вимъ во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Навы́къ неле́стно отъ пре́жде тебе́ пости́вшихся отце́въ, о́тче, по́двиги и боре́нія, и потща́лся еси́ не яви́тися вторы́й, и я́ко не то́кмо яви́ся, но уже́ и превзы́де.

Испо́лнилъ еси́ моли́тву, е́юже моля́ся Бо́гу дре́вле, треблаже́нне, — Тво́й хлѣ́бъ всѣ́мъ предлага́ю, — глаго́ля, и — Тебѣ́ Твоя́ отъ Твои́хъ прино́симъ, Го́споди сла́вы, во вся́ вѣ́ки.

И сло́вомъ, о́тче, и дѣ́ломъ ты́, направля́я су́щія съ тобо́ю къ Боже́ственнѣй стези́, са́мъ мно́жае па́че си́хъ къ се́й направля́емь, и́мже чудеса́ соверши́лъ еси́: Бо́гъ бо моли́твами твои́ми гумно́ умно́жи.

Богоро́диченъ: Да ра́дуется не́бо, да весели́тся и земля́ съ человѣ́ки, Дѣ́ва бо Марíя Творца́ всѣ́хъ неизрече́нно роди́, Ему́же пои́мъ: Тя́ превозно́симъ, Христе́, во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Возмо́глъ еси́, си́лою Боже́ственною укрѣпля́емь, Іе́роне пречу́дне, многоко́зненнаго побори́ти ума́ крѣ́постію, и приве́лъ еси́ Христу́ страстоте́рпцевъ собо́ръ твои́ми поуче́ньми, съ ни́миже вѣ́рою тя́ при́сно ублажа́емъ.

Яви́стеся во́инство честно́е, во Христѣ́ собра́но, великоимени́тіи, и проти́вистеся ко власте́мъ міроде́ржца и, побѣди́вше и́хъ ору́жіемъ Боже́ственныя вѣ́ры, вѣнцы́ взя́сте отъ руки́ живонача́льныя, веселя́щеся.

Взыгра́й, о Мелити́не, приве́дъ многочи́сленный собо́ръ Вседержи́телю честны́хъ му́чениковъ, и́хже митропо́лія вы́шняя и́мать, свяще́нно тече́ніе соверши́вшихъ, и со всѣ́ми вѣ́рно си́хъ гра́ды ублажа́й всегда́.

Со́лнце незаходи́мое, Христе́, моли́твами сла́вныхъ му́чениковъ Твои́хъ, соверша́ющія и́хъ свѣтоно́сное и боже́ственное страда́ніе, свѣ́тлыми заря́ми просвѣти́, и освяти́, и та́мо о́бщники Ца́рствія, я́ко Бо́гъ, сподо́би.

Богоро́диченъ: Трепе́щу Твоего́, еди́не Царю́, суда́ бу́дущаго и устраша́юся, да не ка́ко въ стра́сть и муче́ніе вве́ргуся. Но очи́сти мя́ отъ вся́кія скве́рны грѣхо́вныя, моли́твами Пречи́стыя Твоея́ Ма́тере, я́ко Человѣколю́бецъ.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Лѣ́ностію, увы́ мнѣ́, житіе́ соверши́хъ все́ и бою́ся суда́ стра́шнаго. Но, о Человѣколю́бче Го́споди, моле́ніемъ Ла́заря сле́зныя ми́ посли́ струи́, да тѣ́ми омы́ю скве́рну прегрѣше́ній мои́хъ.

Ти́ху имѣ́я ду́шу, кро́токъ же зра́къ, влѣ́поту имѣ́лъ еси́, о́тче, и увѣ́тливъ ко всѣ́мъ ве́сь явля́яся, струя́ми же твои́хъ глаго́лъ напая́я ду́ши, му́дре. Юже тишину́ и на́мъ Христа́ умоли́ пода́ти.

Явственнѣйшу всѣ́мъ добродѣ́тель твою́ боже́ственную подо́бно яви́ти хотя́ Бо́гъ, горѣ́ приступи́ти тя́, преподо́бне, содѣ́я къ жесто́кой, отъ нея́же па́че, о́тче, лучи́ удо́бь испуща́я житія́, озари́лъ еси́ вселе́нную.

Богоро́диченъ: Ми́лостива тогда́ яви́ мнѣ́ Судію́, Сы́на Твоего́, Его́же родила́ еси́ безъ сѣ́мене, во вре́мя, егда́ ся́детъ, я́коже пи́шется, на престо́лѣ святѣ́мъ, суди́ти, Отрокови́це, вся́ земны́я, о и́хже въ житіи́ безмѣ́стныхъ содѣ́яша.

Свѣти́ленъ. Подо́бенъ: Жены́, услы́шите.

Ору́жіемъ честна́го Твоего́ Креста́ защити́вшеся, страстоте́рпцы Твои́, Сло́ве, проти́вныя си́лы крѣ́пко побѣди́ша и мучи́теля посрами́ша, по Тебѣ́ пострада́ша и Тебѣ́, Христе́ мо́й, всѣ́хъ Царю́, сцарству́ютъ ку́пно.

И преподо́бнаго. Подо́бенъ: Не́бо звѣзда́ми.

Богоно́сца вси́ и Влады́чня подража́теля восхва́лимъ пѣ́сньми, Ла́заря приснопа́мятнаго, де́монское свирѣ́пство разори́вшаго Боже́ственною си́лою.

Богоро́диченъ:

Тя́ Даніи́лъ прописа́ несѣко́мую го́ру, отъ нея́же честны́й Ка́мень отсѣче́ся, сокруша́я и́дольскія хра́мы, Богороди́тельнице Марíе.


НА ЛИТУРГІИ,

Проки́менъ, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 56 об. – 63об.

/ Къ оглавленію раздѣла /


Наверхъ / Къ титульной страницѣ

0