Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 6-й де́нь.
Иже во святы́хъ отца́ на́шего Па́вла, архіепи́скопа Константи́на гра́да, исповѣ́дника.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.

Арія безбо́жнаго* и злочести́ваго Македо́нія* тве́рдыми догма́товъ твои́хъ жи́лами удави́лъ еси́,* пра́вымъ же сло́вомъ уче́нія* правосла́вныхъ мно́жества,* священному́чениче о́тче, утверди́лъ еси́.* Тѣ́мъ твое́ пресвѣ́тлое исповѣ́даніе пріе́мъ,* Ца́рствія показа́ о́бщника* Человѣколю́бецъ.

Тече́ніе соверши́вша тя́* и вѣ́ру соблю́дша,* іера́рше блаже́нне,* Христо́съ вѣнча́* свѣ́тлымъ вѣнце́мъ пра́вды* и украси́ твое́ исповѣ́даніе, досточу́дне.* Тѣ́мъ, небе́сное наслѣ́діе пріе́мъ,* Спа́су моли́ся* о воспѣва́ющихъ тя́.

Па́вле всеблаже́нне,* исповѣ́данія тезоимени́те,* те́плѣ благохва́ляшихъ тя́ предста́тель бы́въ,* отъ вся́кія бѣды́, вся́каго грѣха́, и бу́ри страсте́й,* и мучи́тельства, о́тче, изба́ви,* я́ко му́ченикъ непобори́мь и іера́рхъ благопрія́тенъ,* дерзнове́ніе бо стяжа́ ко Христу́, Бо́гу на́шему.

Сла́ва, гла́съ 1. Ге́рманово:

Архіере́йскою оде́ждею одѣ́явся, преподо́бне о́тче, тезоимени́тому Па́влу поревнова́лъ еси́, гоне́нія претерпѣ́въ и обстоя́нія, въ свои́хъ при́сныхъ болѣ́знехъ вредосло́вная мнѣ́нія Аріева посрами́лъ еси́, и, пострада́въ бо за Безнача́льную и Едино́сущную Тро́ицу, злочести́ваго и духобо́рца низложи́лъ еси́ Македо́нія и, правосла́вную всѣ́мъ уясни́въ вѣ́ру, съ невеще́ственными водворя́ешися а́нгелы. Съ ни́миже и ны́нѣ моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

Заколе́ніе Твое́ непра́ведное, Христе́,* Дѣ́ва зря́щи,* пла́чущи, вопія́ше Ти́:* Ча́до Сладча́йшее,* ка́ко безъ пра́вды умира́еши?* Ка́ко на дре́вѣ ви́сиши,* Иже всю́ зе́млю повѣ́шей на вода́хъ?* Не оста́ви Мене́ еди́ну, Благодѣ́телю Многоми́лостиве,* Ма́терь и рабу́ Твою́, молю́ся.

На стихо́внѣ во окто́ихѣ.

Та́же сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Стихи́ра, гла́съ 1:

Преподо́бне о́тче Па́вле, добродѣ́телію одѣ́явся отъ Христа́ Бо́га, вся́кій де́монскій и ва́рварскій до́блественнѣ побѣди́лъ еси́ по́лкъ; вѣ́рою укрѣпля́емь, на ка́мени утверди́лъ еси́ твое́ ста́до отъ вся́кія е́реси ненавѣ́тно. Тѣ́мъ, со а́нгелы ликовству́я, Спа́су моли́ся въ ми́рѣ сохрани́тися душа́мъ на́шимъ.

Сла́ва, гла́съ 2. Византíево:

По́стную пучи́ну преплы́въ воздержа́нія вѣ́тромъ, страсте́й бу́ри избѣ́глъ еси́, преподо́бне, тѣ́мъ наименова́ніемъ тезоимени́тъ бы́въ боже́ственному Па́влу, гоне́нія претерпѣ́лъ еси́ и обстоя́нія, озлобля́емь въ ерети́чествующихъ языкобо́ліихъ. Тѣ́мъ Аріева низложи́лъ еси́ мнѣ́нія и, Несто́ріевы е́реси побѣди́въ, Це́ркве Христо́вы яви́лся еси́ ревни́тель. Того́ моли́, іера́рше блаже́нне, спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ нескве́рная Агница ви́дѣ Своего́ Агнца, на заколе́ніе, я́ко Человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, ро́ждшую Тя́. Что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

Тропа́рь, гла́съ 3:

Боже́ственныя вѣ́ры исповѣ́даніемъ друга́го Па́вла тя́ Це́рковь, ревни́теля во свяще́нницѣхъ, показа́, свозопіе́тъ ти́ и Авель ко Го́споду, и Заха́ріина кро́вь пра́ведная. Отче преподо́бне, Христа́ Бо́га моли́ дарова́тися на́мъ ве́ліей ми́лости.




НА УТРЕНИ,
Оба кано́на окто́иха и свята́го кано́нъ на 6, его́же краегране́сіе: Тайноводи́теля Па́вла пою́ прему́дро. Ѳеофа́ново. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Вѣ́ры утвержде́ніе, Це́ркве учи́теля, и столпа́ непоколеби́ма исповѣ́данія, тя́, и многосвѣ́тлаго свѣти́льника благода́ти, и уста́ огнедохнове́нна, Па́вле, проповѣ́дуемъ.

Па́велъ велича́йшій, со́лнце вселе́нныя, треблаже́нне, предлага́етъ тя́ Па́вла втора́го, я́ко о́гнь, попаля́юща крѣ́пко е́реси, и сѣки́ру, сѣку́ща безбо́жіе.

Зако́нно подвиза́лся еси́, предбѣ́дствуя, богоглаго́ливе, Боже́ственному проповѣ́данію, я́ко іера́рхъ, вѣ́ренъ, и удави́лъ еси́ жи́лами твои́хъ догма́товъ, я́ко звѣ́ря, Арія суему́дреннаго.

Богоро́диченъ: Марíю Пречи́стую, пріиди́те, воспои́мъ вси́, еди́ну, украси́вшую человѣ́чество и ро́ждшую Бо́га воплоще́ннаго, Дѣ́ву же пребы́вшу неврежде́ну.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Сыноположи́вся благода́тію Боже́ственною, естество́мъ Сы́на Единоро́днаго въ тва́рь не сведе́, Отцу́ Собезнача́льна, Па́вле, Па́вла догма́томъ богоно́снаго послѣ́дуя.

Усты́, и се́рдцемъ, и язы́комъ му́дрость и си́лу Бо́жію, Сло́во Ѵпоста́сное, ты́, Христа́, проповѣ́далъ еси́, Па́вле богому́дре, преподо́бне, злочести́ваго обличи́въ Арія.

Пресу́щественныя вла́сти Ду́ха Свята́го Бо́жія, Имже боготвори́мся судо́мъ пра́веднымъ, всему́дре, естество́мъ Бо́га проповѣ́далъ еси́, и вседѣ́тельна, и всеси́льна.

Богоро́диченъ: Безнача́льна Роди́теля Сло́во, вы́шше вся́каго нача́ла, нача́ло ны́нѣ, воплоща́емо изъ Тебе́, Чи́стая, прія́тъ, и подъ лѣ́томъ бы́сть, лѣ́тъ всѣ́хъ превы́шши.

Сѣда́ленъ, гла́съ 3:

До́гму боже́ственную придержа́въ, глаго́лъ безбо́жный изве́рглъ еси́, Па́вле богому́дре, посрами́въ Арія: Отцу́ бо Сы́на единосу́щна проповѣ́далъ еси́, вѣ́рныя утверди́въ. Отче преподо́бне, Христа́ Бо́га моли́ дарова́тися на́мъ ве́ліей ми́лости.

Сла́ва, гла́съ 8. Подо́бенъ: Прему́дрости.

Яко сосу́да сы́й избра́ннаго тезоимени́тъ, о́тче, и подража́тель, бѣды́ претерпѣ́лъ еси́ за вѣ́ру и гоне́нія и, я́ко то́й, въ Ри́мъ пріи́де, преподо́бне, всю́ду проповѣ́дуя Тро́ицы равноче́стное; тѣ́мъ и тече́ніе во Арме́ніи сконча́въ, досто́йно прія́лъ еси́ отъ Го́спода вѣне́цъ, посрами́въ Македо́нія и безбо́жнаго Арія. Тѣ́мъ моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́.

И ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегрѣше́ній оставле́ніе вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Че́сть многоцѣ́нную твоему́ верху́ исповѣ́данія вѣне́цъ, я́ко побѣдоно́сцу, живоно́сною десни́цею Зижди́тель возложи́, Па́вле богоявле́нне, блаже́нне.

Якоже предподвиза́вся благочести́выхъ ра́ди, всему́дре, догма́товъ, прія́лъ еси́ воздая́нія, ны́нѣ дре́ва жи́зни получи́въ, блаже́нне, Па́вле богоявле́нне, чу́дне.

На небе́снѣй земли́ ликоходи́ти, идѣ́же но́ги кро́ткихъ ликовству́ютъ, сподо́бился еси́, я́ко свѣ́телъ подви́жникъ и и́стины, всече́стне Па́вле, бы́въ побо́рникъ.

Богоро́диченъ: Единосу́ществомъ Отчимъ, Спа́се, я́ко Сы́нъ ви́димь, изъ Дѣ́вы единосу́щенъ на́мъ воплоти́вся, бы́лъ еси́, спасти́ восхотѣ́въ человѣ́чество.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Па́жить е́реси и гни́лость уста́вилъ еси́, приложи́въ изя́щнѣйшее, богому́дре, врачева́ніе, о́тче, исповѣ́даніе твое́, и твои́хъ догма́товъ свѣ́тлое, ума́ же чистѣ́йшее, и ре́вность Боже́ственную.

Бога́тно излія́ся Свята́го Ду́ха благода́ть твои́мъ устна́мъ, всеблаже́нне, побо́рника и́стинно Правосла́вія крѣ́пка обрѣ́тши тя́, преизя́щна, вѣ́рныхъ: тѣ́мъ просвѣти́лъ еси́ боже́ственныя собо́ры.

Аріево безбо́жное и Македо́ніево вредосло́віе, Па́вле, богодухнове́нныхъ твои́хъ догма́товъ и уче́ній испращева́лъ еси́ плете́нія, я́ко Дави́дъ иноплеме́нника, пре́жде сія́ удави́въ, и тве́рдо низве́рглъ еси́.

Богоро́диченъ: Сы́й Превѣ́чный ны́нѣ подъ лѣ́ты бы́сть, пло́ть пріе́мъ, Дѣ́во, одушевле́ну и у́мну, Сло́во Безнача́льное изъ Тебе́, Неискусобра́чная, Чи́стая, всѣ́мъ, пою́щимъ Тя́, ми́ръ да́руя.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Глаго́лавый на высоту́ вредосло́віе и Сы́на и Сло́ва Бо́жія Арій въ тва́рь низведы́й, отъ тебе́ окая́нный, богому́дре, осуди́ся.

Безу́мный, и несмы́сленный, и безбо́жный отве́ргъ, о́тче, Македо́ній Боже́ственнаго Ду́ха, твои́мъ крѣ́пкимъ противле́ніемъ, богоявле́нне, низве́ржеся.

Умерщвля́ется плѣ́жущій змíй живи́тельными твои́ми словесы́, приложи́вый ересе́й по́лкъ, святи́телю Бо́жій всеблаже́нне, богоглаго́льниче свяще́ннѣйше.

Богоро́диченъ: Пое́мъ, Дѣ́во Богома́ти, па́че естества́ Рождество́ и Твою́ нескве́рную чистоту́, и́бо въ Тебѣ́ ди́вно стече́ся дѣ́вство и рождество́ нетлѣ́нно.

Конда́къ, гла́съ 2. Подо́бенъ: Вы́шнихъ ища́.

Облиста́вый на земли́, я́ко звѣзда́ небосвѣ́тлая, Каѳоли́ческую просвѣща́еши Це́рковь ны́нѣ, о не́йже и страда́льчествовалъ еси́, ду́шу твою́, Па́вле, предложи́въ, и, я́коже Заха́ріина и Авелева, я́сно вопіе́тъ твоя́ кро́вь ко Го́споду.

Икосъ:

Свы́ше имѣ́лъ еси́, Па́вле, зва́ніе, рождество́ же до́лѣ отъ земли́, я́ко са́дъ красе́нъ испо́лнь су́щи. Яко отъ рая́ бо, процвѣ́лъ еси́ посто́мъ, все́ благово́нствуя отъ вони́ мно́гихъ твои́хъ труда́ по́двиговъ, по́товъ, заточе́нія, гла́да, жа́жды и вся́кія тѣсноты́, въ ни́хже проше́лъ еси́ благоиску́сно, и вѣнце́мъ побѣ́ды украша́емь, вопіе́тъ бо твоя́ кро́вь ко Го́споду.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Преше́лъ еси́, богому́дре, къ небе́снымъ, Па́вле, ски́ніямъ и, прибли́жився Бо́гу, прича́стіемъ обожа́емь, боже́ственъ бы́лъ еси́, поя́, преподо́бне: препѣ́тый отце́въ Госпо́дь и Бо́гъ, благослове́нъ еси́.

Воумля́еми твои́ми словесы́, у́чимся, Па́вле всехва́льне, я́ко въ со́лнцѣхъ тре́хъ, нераздѣ́льное, несѣко́мо почита́ти Божество́, Ему́же и пое́мъ: препѣ́тый отце́въ Госпо́дь и Бо́гъ, благослове́нъ еси́.

Яко всесвяще́нное боже́ственное и богоуго́дное исповѣ́даніе твое́: я́ко зла́то бо очи́стився, Бо́гу прине́слся еси́ же́ртва благопрія́тна, веселя́ся, преподо́бне, подража́ніемъ страсте́й Спа́са на́шего.

Богоро́диченъ: Всѣ́мъ Хода́таица человѣ́комъ еди́на яви́лася еси́ боже́ственнаго избавле́нія, Изба́вителя всѣ́хъ ро́ждши, Всенепоро́чная. Ему́же вси́ пое́мъ: препѣ́тый отце́въ Госпо́дь и Бо́гъ, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Теку́тъ исто́чницы твои́хъ догма́товъ и всю́ Це́рковь напая́ютъ; кро́вію же честно́ю твое́ю, о́тче, вся́ освяти́лъ еси́, правосла́вною вѣ́рою тебѣ́ послѣ́довавшія, — Го́спода по́йте, — вопію́щія, — и превозноси́те Его́ во вся́ вѣ́ки.

Приста́нищу ти́хому ны́нѣ приста́лъ еси́, жите́йская треволне́нія отри́нувъ, имѣ́лъ бо еси́ направля́юща все́ ше́ствіе твое́ корми́теля Го́спода, Па́вле всехва́льне, ма́ніемъ вся́ творя́щаго, Его́же превозно́симъ во вся́ вѣ́ки.

Свѣ́тъ трисія́ненъ Пребоже́ственныя Тро́ицы, въ тя́ всели́вся, свѣ́тъ тя́ вторы́й показа́, просвѣща́юща собо́ръ правосла́вныхъ, ерети́ческій же по́лкъ, о́тче, омрача́юща и, — Го́спода по́йте, — вопію́ща, — и превозноси́те Его́ во вся́ вѣ́ки.

Богоро́диченъ: Глаго́ломъ проро́ческимъ послѣ́дующе, Дѣ́во, Тя́ Богоро́дицу возвѣща́емъ: родила́ бо еси́ Отроча́, всѣ́хъ дре́внѣйша, Емману́илъ нарица́ема, Ему́же ны́нѣ зове́мъ: Го́спода по́йте дѣла́ и превозноси́те Его́ во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Всего́ мене́ сама́го приношу́, богоглаго́ливе, боже́ственному покро́ву твоему́, я́ко священному́ченикъ вла́сть рѣши́ти прегрѣше́нія отъ Христа́ пріе́мъ, мои́хъ согрѣше́ній плени́цы растерза́въ, спаси́ мя моли́твами твои́ми и Боже́ственнымъ свѣ́томъ просвѣти́.

Но́въ яви́лся еси́, ре́вностію разжига́емь, Па́вле преизя́щне, и́же въ раи́ ны́нѣ неизрече́нная словеса́, о́тче, услы́шалъ еси́, я́ко о́бщникъ бо нра́вовъ, нарече́нія бо сопричасти́лся еси́ и вѣне́цъ пріе́мъ Ца́рствія Христо́ва благолѣ́пнѣйшій.

Яко нѣ́кій хра́бръ яви́лся еси́ оглаго́льникъ вся́кія е́реси, правосла́вія же, священному́чениче, боже́ственный побо́рникъ, луча́ми благода́ти просвѣще́нъ я́вѣ и свѣ́томъ, Па́вле всесла́вне, Несозда́нныя Тро́ицы облиста́емь.

Богоро́диченъ: Пло́тію изъ Тебе́ Сло́во, Всенепоро́чная, одѣ́явся, воплоти́вся же, поживе́ въ мíрѣ, я́ко благоутро́бенъ, пребы́въ не ху́ждше, я́ко пре́жде безтѣле́сенъ, и дре́вле вся́ му́чащаго Боже́ственною си́лою низложи́.

Свѣти́ленъ. Подо́бенъ: Ду́хомъ во святи́лищи.

Ре́вностію распаля́емь, отъ те́плаго се́рдца духо́вный побо́рникъ благода́ти яви́лся еси́, собо́рище ерети́ческое мече́мъ разсѣ́клъ слове́съ твои́хъ, святи́телю, тече́ніе же соверши́въ, равностоя́тель бы́лъ еси́ му́ченическому мно́жеству.

Богоро́диченъ:

Неизрече́ннаго чревоноше́нія была́ еси́, пренепоро́чная невѣ́ста и, я́ко су́щи честнѣ́йшій хра́мъ, Богоро́дице: Свѣ́тъ бо Превѣ́чный въ Тя́ всели́ся, и родила́ еси́ Бо́га Сло́ва. Пою́ще, Твое́ Рождество́ велича́емъ досто́йно, Всенепоро́чная Отрокови́це.

На стихо́внѣ во окто́ихѣ. Сла́ва, гла́съ 7:

Вни́кнулъ еси́ во глубины́ Ду́ха и, я́ко безпло́тенъ, на земли́ пожи́въ, и отту́ду поче́рплъ бога́тство Боже́ственнаго зна́нія, правосла́віемъ человѣ́ки обогати́лъ еси́, уче́ніи твои́ми, преподо́бне о́тче.

И ны́нѣ, богоро́диченъ или́ крестобогоро́диченъ:

Ви́дящи на дре́вѣ просте́рта Агнца, Агница и Дѣ́ва, посредѣ́ двою́ разбо́йнику, — увы́ Мнѣ́, — вопія́ше, — сла́дкое Ча́до! Что́ се́ стра́нное и пресла́вное та́инство? Ка́ко Тя́ беззако́нный собо́ръ на крестѣ́ пригвозди́ и же́лчію напои́, ма́нною напита́вшаго человѣ́ки?


НА ЛИТУРГІИ,

Блаже́нна окто́иха на 4 и отъ кано́на свята́го пѣ́снь 3-я на 4. Проки́менъ, гла́съ 7: Восхва́лятся преподо́бніи [во сла́вѣ, и возра́дуются на ло́жахъ свои́хъ]. Сти́хъ: Воспо́йте Го́сподеви [пѣ́снь но́ву, хвале́ніе Его́ въ це́ркви преподо́бныхъ]. Апо́столъ ко Евре́емъ, зача́ло 318, отъ полу́: Вся́къ первосвяще́нникъ... Аллилу́ія, гла́съ 2: Свяще́нницы Твои́ [облеку́тся въ пра́вду, и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Луки́, зача́ло 64. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 42-47.

/ Къ оглавленію раздѣла /


Наверхъ / Къ титульной страницѣ

0