Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 6-й де́нь.
Слу́жба и́же во святы́хъ отцу́ на́шему Ге́рману, архіепи́скопу Каза́нскому и Свія́жскому.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 2:

Презрѣ́въ блага́я ро́да и достоя́нія твоего́, изше́лъ еси́ на тѣ́сный пу́ть Христо́въ, идѣ́же а́ще и превозвы́сился еси́ па́че инѣ́хъ до́блестями послуша́нія, оба́че смиренному́дріемъ твори́лъ себе́ ме́ньша всѣ́хъ. Сего́ ра́ди отъ Вознося́щаго смире́нныя превознесе́нъ еси́.

Преподо́бныхъ житію́ послѣ́дуя прилѣ́жно, по́стническими освяти́лся еси́ дѣя́ньми, тѣ́мже освяти́ ду́ши на́ша твои́ми моли́твами и испроси́ на́мъ благода́ть послѣ́довати по стезя́мъ богоуго́днаго тече́нія твоего́, преблаже́нне.

Возше́лъ еси́ на высоту́ безстра́стія, свѣ́томъ боговѣ́дѣнія озаря́емый, и во свѣ́тѣ лица́ Бо́жія ходя́, блужда́ющія во тмѣ́ страсте́й пра́во ходи́ти наставля́лъ еси́; тѣ́мже вси́ Дѣ́йствовавшаго въ тебѣ́ Свое́ю благода́тію прославля́емъ.

Сла́ва, гла́съ 3:

Дѣ́вственнымъ лико́мъ соприча́стника, воздержа́нія блюсти́теля, смире́нія Христо́ва подража́теля, свѣти́льника Це́ркве, святи́теля Ге́рмана честну́ю па́мять пѣ́сненно восхва́лимъ.

И ны́нѣ, [богоро́диченъ, гла́съ то́йже]:

Прему́дрости сокро́вище вѣ́мы Тя́, Пречи́стая, и точа́щую благода́тію исто́чникъ приснотеку́щій ра́зума; ка́пли вѣ́дѣнія одожди́ на́мъ, Влады́чице, е́же воспѣва́ти Тя́ при́сно.

На стихо́внѣ стихи́ры, гла́съ 5:

Во оби́тели твое́й ли́къ и́ночествующихъ собра́въ и хра́мъ благолѣ́пенъ во сла́ву безсме́ртнаго Успе́нія Бо́жія Ма́тере созда́въ, въ не́мъ тѣ́ло твое́ предложи́лъ еси́, я́ко да́ръ освяще́нъ: Ейже моли́ся изба́витися на́мъ отъ внеза́пныя сме́рти и непосты́дно ста́ти предъ Судіе́ю Пра́веднымъ.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Ра́дуется свяще́нное сосло́віе и вси́, о́крестъ ра́ки моще́й твои́хъ предстоя́щіи: на тебе́ бо излія́ся нетлѣ́ніе, я́ко мѵ́ро святы́ни и благоуха́нія Христо́ва.

Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

Излія́ся благода́ть во устна́хъ твои́хъ, святи́телю, пото́комъ бо благи́хъ слове́съ и дѣя́ній твои́хъ напая́еши въ пѣ́снехъ и хвале́ніихъ тя́ велича́ющія.

Сла́ва, гла́съ то́йже:

Благоче́стно на престо́лѣ новопросвѣще́нныя Каза́нскія па́ствы святи́тельствуя и су́щія отъ ро́да ага́рянскаго озари́въ уче́ніемъ твои́мъ, Тро́ицу во Еди́номъ Божествѣ́ почита́ти научи́лъ еси́, приводя́ омраче́нныхъ къ Свѣ́ту Невече́рнему: Имже наслажда́яся, озаря́й свы́ше ста́до твое́.

И ны́нѣ, [богоро́диченъ, гла́съ то́йже]:

Еди́ну Тя́ Всенепоро́чную Содѣ́тель Сло́во обрѣ́тъ, всели́ся въ Твое́ чре́во, содѣва́я на́ше спасе́ніе благода́тію за неизрече́нную ми́лость.

Тропа́рь, гла́съ 4:

Отъ ю́ности и́го Христо́во усе́рдно воспріи́мъ, бдѣ́нными по́двиги поста́ и моли́твы просла́вился еси́. Отону́дуже призыва́ющу тя́ Бо́гу на служе́ніе Це́ркви въ новопросвѣще́ннѣмъ ца́рствѣ Каза́нстѣмъ, вку́пѣ со святи́телемъ Гу́ріемъ воззва́нъ бы́лъ еси́, идѣ́же я́ко первонача́льникъ созда́нной тобо́ю въ гра́дѣ Свія́жскѣ оби́тели и досто́йный первосвяти́телю прее́мникъ яви́лся еси́. Почива́я у́бо нетлѣ́нными моща́ми во оби́тели твое́й, а ду́хомъ предстоя́ престо́лу Влады́чню, моли́ся, святи́телю Ге́рмане, со святи́телемъ Гу́ріемъ оби́тели твое́й во святы́ни, правосла́внѣй же па́ствѣ во благоче́стіи преспѣва́ти и тмѣ́ иновѣ́рія свѣ́томъ вѣ́ры разгна́тися.

Инъ тропа́рь, гла́съ то́йже:

Яко вели́кимъ па́стыремъ единонра́вна и учи́телемъ вселе́нныя единомы́сленна, Це́ркве Бо́жія служи́теля усе́рдна и строи́теля та́инъ Христо́выхъ благоговѣ́йна, сте́кшеся, благовѣ́рніи лю́діе, Свія́жскія оби́тели богому́драго основа́теля и Каза́нскія новопросвѣще́нныя па́ствы святи́теля Ге́рмана пѣ́сньми и пѣ́ніи восхва́лимъ, глаго́люще: не преста́й присѣща́ти моли́твами твои́ми на оби́тель и на всю́ па́ству твою́, и оби́тель во святы́ни, па́ству же въ вѣ́рѣ и благоче́стіи блюди́ невреди́мо.

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 6:

Отъ мла́дости, преподо́бне, всего́ себе́ возложи́въ Христу́ и Того́ ра́ди любве́ до́льнаго мíра чу́вственныя красоты́ оста́вивъ, ско́рбная и жесто́кая терпѣ́ти произво́лилъ еси́. Тѣ́мже ны́нѣ во Свѣ́тѣ Незаходи́момъ съ ли́ки вѣ́рно подвиза́вшихся зря́ премíрную красоту́, моли́ся подвигополо́жнику Христу́ о спасе́ніи ду́шъ на́шихъ.

Таи́бницу дѣ́лъ Бо́жіихъ — Прему́дрость возлюби́въ, Христа́ еди́наго возжелѣ́лъ еси́: кре́стъ на ра́мо взе́мъ, Тому́ усе́рдно послѣ́довалъ еси́, крѣ́пкимъ воздержа́ніемъ и всено́щнымъ въ умиле́нной моли́твѣ стоя́ніемъ пло́ть твою́ ду́ху покори́лъ еси́. И ны́нѣ, ликовству́я вку́пѣ со вше́дшими тѣ́снымъ путе́мъ въ ра́дость Го́спода своего́, содѣ́лай моли́твами твои́ми, святи́телю, и на́мъ ше́ствовати путя́ми живо́тными.

Ди́вныхъ свидѣ́ній Бо́жіихъ стяжа́въ любому́дріе, имѣ́лъ еси́ зако́нъ посредѣ́ чре́ва твоего́, и се́рдце непоро́чно во оправда́ніяхъ святы́хъ: сего́ ра́ди процвѣ́лъ еси́, я́ко дре́во, насажде́нное при исхо́дищахъ во́дъ, и я́ко ма́слина плодови́та въ дому́ Бо́жіи. Моли́ся, святи́телю, и на́мъ въ дому́ Бо́жіи не безпло́днымъ бы́ти.

Богоблаже́нне о́тче Ге́рмане, пра́вды ра́ди Ца́рствія Христо́ва вся́, я́же на земли́, [я́ко] уме́ты вмѣни́въ, у́мъ тво́й безстра́стіемъ просвѣти́лъ еси́, нището́ю Христо́вою обогати́вся, путе́мъ непоро́чнымъ тече́ніе соверши́лъ еси́. Тѣ́мже и по преставле́ніи твое́мъ въ нетлѣ́ніи пребыва́я, моли́ и на́мъ отъ тлѣ́нія грѣхо́внаго неврежде́ннымъ бы́ти.

Ины стихи́ры, гла́съ 7:

Изволе́ніемъ Ду́ха Свята́го, избра́ніемъ Це́ркве и Держа́внымъ гла́сомъ, корми́ла Каза́нскія па́ствы прія́лъ еси́, ю́же управля́я сло́вомъ и́стины, тща́лся еси́ предста́вити Христу́, я́ко ни́ву благовоздѣ́ланну. Тѣ́мже, святи́телю, имѣ́я дерзнове́ніе ко Го́споду, вы́ну предста́тельствуй, вѣ́ры и благоче́стія плода́ми изоби́ловати е́й и вся́кимъ разновѣ́ріемъ непло́дствовати. [Два́жды.]

Гла́съ 5:

Яко апо́столомъ послѣ́дователя вѣ́рна и наста́вника свѣ́томъ благода́ти сло́во растворя́юща, пре́жде те́мный, ны́нѣ же просвѣще́нный гра́дъ Каза́нь, пріе́мъ тя́, ра́дуется, па́ства же твоя́, озаря́емая нетлѣ́ніемъ моще́й твои́хъ, вы́ну весели́тся: примѣ́ромъ бо по́двиговъ твои́хъ на стези́ пра́выя наставля́еміи, и́мамы тя́ путевождя́ благопрія́тна ко спасе́нію ду́шъ на́шихъ. [Два́жды.]

Сла́ва, гла́съ 8:

Пріиди́те, правосла́вныхъ собо́ри, свѣ́тлыя Свія́жскія оби́тели основа́теля и новопросвѣще́нныя Це́ркве Каза́нскія па́стыря, чудотво́рца Ге́рмана пѣ́сненно восхва́лимъ: то́й бо, въ благолѣ́піи святи́тельства принося́ же́ртву хвале́нія, и себе́ самаго́ приноша́ше въ же́ртву благоуго́дну Бо́гови, о слове́сномъ ста́дѣ свое́мъ, и сло́вомъ Христо́вымъ, мно́ги, во тмѣ́ блужда́вшія невѣ́рія, ко свѣ́ту вѣ́ры напра́ви. Тѣ́мъ и по преставле́ніи неоску́дно источа́етъ да́ры любо́вію почита́ющимъ па́мять его́.

И ны́нѣ, богоро́диченъ, гла́съ 8:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

[Вхо́дъ.] Проки́менъ дне́. Святи́тельская чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На литíи стихи́ра [Успе́нія], гла́съ 1.

Подоба́ше самови́дцамъ Сло́ва и слуга́мъ, и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою со́браніи, Сіо́на достиго́ша, и на не́бо иду́щую предсыла́ху, вы́шшую херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ.

Святи́телю стихи́ры, гла́съ 6:

Гласомъ предержа́щаго и собо́ромъ первосвяти́телей въ новопросвѣще́нную Каза́нскую страну́ основа́телемъ вели́кія оби́тели посыла́ешися; идѣ́же, ве́сь у́мъ тво́й впери́въ въ Зижди́теля вся́ческихъ, вельми́ подвиза́лся еси́ въ созда́ніи оби́тели и въ собра́ніи ли́ка мона́шествующихъ, неусы́пно моля́ся ко Го́споду, да, возгради́въ ю́ досто́йно, яви́ши жили́щемъ по Го́сподѣ жи́тельствующихъ, во е́же вку́пѣ съ ни́ми подвиза́тися о спасе́ніи свое́мъ и наставля́ти на пу́ть спасе́нія и вѣ́рныхъ, и невѣ́рующихъ.

Лику́етъ въ па́мяти твое́й, святи́телю Ге́рмане, оби́тель твоя́, въ не́йже, я́ко да́ръ освяще́нъ, предлежи́тъ тѣ́ло твое́, съ не́юже ку́пно ра́дуются и па́ствы Каза́нскія ча́да твоя́, любо́вію хва́ляще тебе́ Просла́вившаго, я́ко такова́ на́мъ хода́тая и моли́твенника дарова́лъ е́сть въ тебѣ́.

Сія́ніемъ добродѣ́телей твои́хъ сотвори́ тя́ Христо́съ, я́ко гра́дъ верху́ горы́, повѣ́дающій вели́кія дѣла́ Божія, и, я́ко свѣти́льникъ, поста́ви тя́ на свѣ́щницѣ, да тобо́ю наставля́еміи, вѣ́ру нераздѣ́льну соблюде́мъ и во свѣ́тѣ дѣ́йственной вѣ́ры у́зримъ Свѣ́тъ Незаходи́мый.

Сла́ва, гла́съ 3:

Отче богому́дре Ге́рмане, вели́къ показа́лся еси́ дѣ́лы и словесы́: пася́ слове́сное ста́до на зла́чныхъ па́житяхъ сло́ва Христо́ва, изъ невѣ́рія въ вѣ́ру приводи́лъ еси́ и, благовѣствова́ніемъ породи́въ ча́да послуша́нія, сія́ обручи́лъ еси́ чистото́ю Христу́, подаю́щему ми́ръ душа́мъ на́шимъ.

И ны́нѣ, [богоро́диченъ, гла́съ то́йже]:

Пріиди́те, вси́ концы́ земнíи, честно́е преставле́ніе Богома́тере восхва́лимъ: въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́вся, во псалмѣ́хъ, и пѣ́ніихъ и пѣ́снехъ духо́вныхъ, со безпло́тными и апо́столы пра́зднуетъ свѣ́тло.

На стихо́внѣ стихи́ры, гла́съ 5:

Ра́дуйся, свяще́нная главо́, святи́телю Ге́рмане, ты́ отверже́ніемъ мíра ева́нгельски, тѣ́снымъ путе́мъ Христу́ послѣ́довавъ, побѣди́тель страсте́й яви́лся еси́ и, кра́сными добродѣ́телей исправле́ньми оби́тели твое́й и па́ствѣ возсія́въ, тѣ́ми, я́ко лѣ́ствицею, на не́бо возше́лъ еси́, идѣ́же въ ра́дости святы́хъ предстоя́ Христу́ Бо́гу, моли́ дарова́ти ми́ръ и единомы́сліе ста́ду твоему́.

Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй.

Ра́дуйся, богому́дре Ге́рмане, ты́, сія́ніемъ Утѣ́шителя просвѣти́вся, ору́жіемъ Креста́ ко́зни предста́теля тмы́ побѣди́въ, дѣ́йствіемъ святы́я про́повѣди на мѣ́стѣ зла́чнѣ ста́до твое́ упа́слъ еси́ и па́лицею вѣ́ры проти́вныя отгна́лъ еси́. О, богому́дрый виногра́да Христо́ва дѣ́лателю! Сотвори́ предста́тельствомъ твои́мъ, да не бу́демъ и мы́ безпло́днымъ ро́ждіемъ въ боже́ственномъ вертогра́дѣ лозы́ Христа́.

Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ.

Ра́дуйся, богоблаже́нне Ге́рмане, осѣне́нный благода́тію свы́ше, чистото́ю жи́зни и нетлѣ́ніемъ въ сме́рти озари́лся еси́, источа́я исцѣле́нія, ду́ши отъ страсте́й и тѣлеса́ отъ многообра́зныхъ неду́гъ врачу́еши. И ны́нѣ ско́рбныхъ наведе́ній разгони́ о́блацы отъ соверша́ющихъ любо́вію твое́ пра́зднество.

Сла́ва, гла́съ 5:

Ди́вный Бо́гъ во святы́хъ Свои́хъ, въ пусты́няхъ, гора́хъ и верте́пахъ многообра́зными по́двиги просія́вшихъ, па́че ди́венъ явля́ется въ тѣ́хъ, и́же по́стнически живу́ще въ мíрѣ, я́ко свѣти́ла, просія́ша посредѣ́ ро́да стропти́ва, сподвиза́юще и ходя́щихъ по стро́потнымъ путя́мъ къ исправле́нію; си́це, святи́телю, благоукраси́вся по́стническими добродѣ́тельми, и на престо́лѣ святи́тельства богосвѣ́тлыми добро́тами сія́лъ еси́. Тѣ́мже, вѣнча́нный отъ Подвигополо́жника, моли́ся вку́пѣ со святи́тели Гу́ріемъ и Варсоно́фіемъ держа́вѣ Россíйстѣй богоуго́днѣй бы́ти и сыново́мъ россíйскимъ спасти́ся.

И ны́нѣ, [богоро́диченъ], гла́съ то́йже:

Воспо́йте, лю́діе, Ма́тери Бо́га на́шего, воспо́йте: дне́сь бо всесвѣ́тлую ду́шу Свою́ въ пречи́стыя дла́ни, Иже изъ Нея́ Вопло́щшагося безъ сѣ́мене предае́тъ, Его́же и мо́литъ непреста́нно, дарова́ти вселе́ннѣй ми́ръ, и ве́лію ми́лость.

На благослове́ніи хлѣ́бовъ: Тропа́рь святи́теля, гла́съ 4: Отъ ю́ности и́го Христо́во усе́рдно воспріи́мъ.., или́: Яко вели́кимъ па́стыремъ.., два́жды. И Богоро́дице Дѣ́во, ра́дуйся.., еди́ножды.



НА УТРЕНИ,
На Бо́гъ Госпо́дь: Тропа́рь свято́му, два́жды. Сла́ва, и ны́нѣ, богоро́диченъ, по гла́су тропаря́.

По 1-мъ стихосло́віи сѣда́ленъ, гла́съ 4:

Отъ ю́ности на́йде на тя́, присноблаже́нне, боже́ственное раче́ніе: еще́ бо о́трокъ сы́й, па́че мѣ́ры и во́зраста въ воздержа́ніи и постѣ́ пребыва́лъ еси́. Отону́дуже роди́вшіе тя́, дви́жими сердобо́ліемъ, удержава́ху тя́, да не повреди́тся отъ по́стнаго изнуре́нія тѣле́сный соста́въ тво́й. Ты́ же, непоколеби́мою стопо́ю идя́ стезе́ю воздержа́нія, взыва́лъ еси́ Христу́ Бо́гу: къ Тебѣ́ приве́рженъ е́смь отъ чре́ва ма́тере моея́, Ты́ еси́ мо́й Покрови́тель. [Два́жды.]

Сла́ва, и ны́нѣ, [богоро́диченъ]:

Младе́нствующи пло́тію и соверше́нна душе́ю, Святы́й Киво́тъ въ до́мъ Бо́жій вхо́дитъ воспита́тися Боже́ственною благода́тію.

По 2-мъ стихосло́віи сѣда́ленъ, гла́съ 4:

Егда́ тя́ и́ноки Ста́рицкія оби́тели моля́ху, да бу́деши началово́ждь оби́тели и блюсти́тель спасе́нія ду́шъ и́хъ, ты́, богому́дре, глаго́лы смире́нія ре́клъ еси́ и́мъ: а́ще и корми́ло корабе́льное неиску́сному не ввѣря́ется ко́рмчему, кольми́ па́че спасе́ніе ду́шъ невѣ́дущему духо́внаго пути́ наста́внику. Оба́че, я́ко искуше́нный въ сло́вѣ и ра́зумѣ, единоду́шнымъ моле́ніемъ бра́тіи воепрія́въ корми́ло духо́вное и священноархимандри́тъ бы́въ, яви́лъ еси́ въ себѣ́ до́браго вождя́ и наста́вника ду́шъ во спасе́ніе.

Сла́ва, гла́съ 2:

Пло́ть очи́стивъ воздержа́ніемъ, ду́хъ тво́й богомы́сліемъ на высоту́ богоподо́бія возвы́силъ еси́, и на́съ, плѣня́емыхъ страстьми́, на е́же по подо́бію твои́ми моли́твами наста́ви и возведи́.

И ны́нѣ, [богоро́диченъ]:

Отъ всѣ́хъ искуше́ній и бѣ́дъ душе́вныхъ свободи́ ны́, притека́ющія къ Тебѣ́, мольба́ми Твои́ми, Ма́ти Христа́ Бо́га.

По поліеле́и, сѣда́ленъ, гла́съ 8:

Въ моли́твенной ке́лліи твое́й, я́ко основа́тель оби́тели и во́ждь новонача́льно и́ночествующихъ, непреста́нныя приноси́лъ еси́, преподо́бне, со слеза́ми моли́твы Богома́тери: да благоволи́тъ новоустроя́емую оби́тель избра́ть въ мѣ́сто святы́ни, и въ не́й ли́къ и́ночествующихъ, денноно́щно служа́ Бо́гу во спасе́ніе свое́, и всѣ́мъ приходя́щимъ, сло́вомъ и дѣ́ломъ, спасе́ніе Бо́га и Христа́ да возвѣща́етъ.

Сла́ва, гла́съ 3:

Яко подви́жникъ крѣ́пкій, путе́мъ и́ноческой жи́зни восходя́ отъ си́лы въ си́лу по степе́немъ священнонача́лія, призыва́емь бы́лъ еси́ и на высоту́ престо́ла Всероссíйскія митропо́ліи, во е́же со все́ю Це́рковію служи́ти Бо́гу вся́ческихъ, оба́че и вы́ну приноси́лъ еси́, свя́те, Го́споду благопрія́тную же́ртву о благостоя́ніи держа́вы Россíйскій и о умире́ніи Це́ркве Правосла́вныя.

И ны́нѣ, [богоро́диченъ]:

Безневѣ́стная, Чи́стая Богоро́дице Дѣ́во, еди́на вѣ́рныхъ предста́тельство и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными Твои́ми моли́твами.

[Степе́нна, 1-й антифо́нъ 4-го гла́са.] Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ. Та́же: Вся́кое дыха́ніе да хва́литъ Го́спода... и про́ч. Ева́нгеліе Іоа́нна, зача́ло 36.

По 50-мъ псалмѣ́ стихи́ра, гла́съ 6:

Человѣ́че Бо́жій, вѣ́рный ра́бе и слуго́ Госпо́день, сосу́де избра́нный, сто́лпе и утвержде́ніе Це́ркве, Ца́рствія наслѣ́дниче, не премолчи́, за ны́ вопія́ ко Го́споду.

Кано́ны чте́мъ: Богоро́дицѣ, со ирмосо́мъ 8-го гла́са: Во́ду проше́дъ, я́ко су́шу.., на 6, и святи́телю, того́же гла́са, на 8.

Пѣ́снь 1.

Ирмо́съ: Мо́ре огусти́лъ еси́, погрузи́вый со ору́жіемъ го́рдаго фарао́на, и лю́ди спа́слъ еси́ немо́кренно, Го́споди, и вве́лъ еси́ я́ въ го́ру святы́ни, вопію́щія: пои́мъ Тебѣ́, Бо́гу на́шему, пѣ́снь побѣ́дную, я́ко просла́вися.

Іису́су: Іису́се, прославля́ющій святы́хъ Твои́хъ, озари́ потемне́нную мы́сль и омраче́нное на́ше чу́вство, да возвѣсти́мъ хвалы́ святи́телю Твоему́ и, восхваля́я его́, восхва́лимъ Тя́, ди́внаго во святы́хъ.

Боже́ственная благода́ть избра́ тя́, святи́телю, да пока́жеши си́лу ея́ въ очище́ніи прирожде́нной всѣ́мъ сына́мъ Ада́млимь не́мощи естества́ и въ благода́тнѣй чистотѣ́ да послу́жиши ро́ду твоему́ во сла́ву Христа́ и спасе́ніе ду́шъ.

Простра́нный пу́ть мірска́го житія́ оста́вивъ, съ отъя́тіемъ власо́въ земно́е пристра́стіе отсѣ́клъ еси́, и, къ го́рнему у́мъ и се́рдце твое́ устреми́въ, дѣ́лы глаго́лалъ еси́: Госпо́дь — крѣ́пость и упова́ніе мое́.

Еди́ному Бо́гу всего́ себе́ возложи́въ, Тому́ во дни́ и въ нощи́ рабо́талъ еси́, служа́ посто́мъ, всено́щнымъ въ моли́твѣ стоя́ніемъ и вся́кимъ ско́рбнымъ самолише́ніемъ, зовя́ въ крѣ́пости ду́ха: Госпо́дь — утѣше́ніе мое́.

Сла́ва: Всеору́жіемъ Креста́ низложи́въ мы́сленныхъ, вою́ющихъ на ду́шу враго́въ, въ благооти́шіе безстра́стія дости́глъ еси́ и, побѣ́дныя отъ вседѣ́тельныя руки́ воспрія́въ по́чести, спобо́рствуй и на́мъ изба́витися отъ плѣне́нія грѣхо́внаго и въ приста́нище спасе́нія дости́гнути.

И ны́нѣ, богоро́диченъ: Ви́дящи не́мощь мою́ тѣле́сную, смуще́ніе душе́вное и озлобле́ніе серде́чное, посѣще́нія сподо́би Боже́ственнаго, Всенепоро́чная Дѣ́во, и спаси́ мя́ моли́твами Твои́ми.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Нощны́ми моли́твами и глубо́кимъ утренева́ніемъ по любви́ ко Го́споду умертви́лъ еси́ пло́ти мудрова́ніе. И ны́нѣ изъ до́льнихъ въ небе́сныя возше́дъ оби́тели, не преста́й моли́тися о на́съ, среди́ мірскíя ле́сти бре́нныя жи́зни пу́ть преходя́щихъ.

Мы́слію благоразсу́дною и жела́ніемъ очище́ннымъ преподо́бныхъ жи́тельству ревнова́лъ еси́, сего́ ра́ди съ благоугоди́вшими, преподо́бне, Го́споду наслѣ́довалъ еси́ нетлѣ́ніе и жи́знь несконча́емую.

Въ человѣ́ческомъ естествѣ́ невеще́ственныхъ жи́тельству отъ всея́ души́ твоея́ тща́лся еси́ подража́ти, отоню́дуже съ невеще́ственными ли́ки сподо́бился еси́ престо́лу Бо́жію предстоя́ти.

Дви́жимый ре́вностію ду́ха, вели́ки по́двиги на земли́ соверши́лъ еси́, свя́те: небла́зненно бо протека́я пу́ть спасе́нія, ты́, въ тве́рдости душе́внѣй, а́ки адама́нтъ, вся́ земна́я нивочто́же вмѣни́въ, еди́наго Христа́ пріобрѣсти́ тща́лся еси́.

Сла́ва: Низложи́лъ еси́ ополче́нія мы́сленныхъ враго́въ крѣ́пкимъ твои́мъ воздержа́ніемъ и непристу́пенъ яви́лся еси́ и́мъ чистото́ю ду́ха; моли́твами твои́ми отжени́ отъ на́съ мра́чное злы́хъ духо́въ нахожде́ніе.

И ны́нѣ, богоро́диченъ: Очи́сти, Чи́стая, нечи́стую ду́шу мою́ отъ мно́жества прегрѣше́ній, во глубину́ поги́бели попо́лзшуюся, и въ ча́съ сме́ртный огради́ мя отъ оглаго́ланія де́моновъ и осужде́нія изба́ви.

Конда́къ, гла́съ 4:

Бо́дрствуя въ моли́твахъ, послуша́нія до́брый рачи́тель бы́въ, въ терпѣ́ніи стяжа́лъ еси́ ду́шу твою́, дѣ́лы смиренному́дрія и кро́тости изря́дствуя, престо́лъ святи́тельства благовѣ́ріемъ и благоче́стіемъ украси́лъ еси́, о́тче священнонача́льниче Ге́рмане, моли́ Христа́ Бо́га о оби́тели и о все́мъ ста́дѣ твое́мъ, я́ко па́ствы твоея́ утвержде́ніе и су́щимъ по тебѣ́ святи́телемъ свѣ́тлое украше́ніе.

Сѣда́ленъ, гла́съ 7:

Благознамени́тъ пу́ть восхожде́нія твоего́, блаже́нне: изъ глубо́каго бо смире́нной и́ноческой жи́зни послуша́нія моле́ніемъ Ста́рицкой бра́тіи воззва́нъ бы́лъ еси́ къ нача́льствованію. Возврати́вся же на пре́жній поко́й по любви́ къ душе́вному поко́ю, па́ки изъ о́наго предержа́щимъ гла́сомъ воззва́нъ бы́лъ еси́ въ новопросвѣще́нную Каза́нскую па́ству для устрое́нія вели́кой оби́тели, отъ оби́тельнаго же благоустрое́нія воззва́нъ еси́ на престо́лъ святи́тельскаго благоуправле́нія. Упра́ви, святи́телю, и на́мъ полага́ти восхожде́ніе въ се́рдце по степене́мъ исправле́нія жи́зни и дѣ́лъ.

Сла́ва, гла́съ 4:

Во́ждь бы́въ, преподо́бне, взыску́ющимъ спасе́нія своего́ путе́мъ жи́зни и́ноческой въ чистотѣ́, послуша́ніи и нестяжа́тельности, тѣ́мъ предше́ствовалъ еси́ дѣ́йственнымъ примѣ́ромъ твои́мъ въ слѣ́дъ Началовождя́ спасе́нія, путе́мъ креста́ и самоотверже́нія.

И ны́нѣ, [богоро́диченъ, гла́съ то́йже]:

Вели́кихъ дарова́ній, Дѣ́во Богома́ти, Ты́ сподо́билася еси́, я́ко родила́ еси́ пло́тію Еди́наго отъ Тро́ицы, Христа́ Жизнода́вца, во спасе́ніе ду́шъ на́шихъ.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́!

Не да́лъ еси́ сна́ очесе́мъ твои́мъ и вѣ́ждомъ дрема́нія, до́ндеже де́нь благода́ти озари́ твое́ се́рдце и боговмѣсти́мымъ содѣ́ла селе́ніемъ Тро́ицы, Ейже предстоя́, спаса́й гра́дъ и оби́тель твою́.

Зва́нія небе́снаго прича́стникъ бы́въ, нача́токъ соста́ва вѣ́ры соблю́лъ и си́лы гряду́щаго вѣ́ка возвѣсти́лъ еси́ лю́демъ. И ны́нѣ восхваля́ющихъ вѣ́рою твоя́ по́двиги просвѣща́й повелѣ́ньми Влады́ки вся́ческихъ и сотвори́ досто́йны бы́ти наслѣ́дія небе́снаго.

Труда́ми неосла́бными, а́лчбою и жа́ждою и всено́щнымъ въ моли́твѣ стоя́ніемъ удруча́лъ еси́ пло́ть твою́, святи́телю, и ны́нѣ премíрно упокоева́ешися.

Ми́рно протека́лъ еси́, о́тче, пу́ть жи́зни твое́й стезе́ю и́ноческою, явля́я въ себѣ́ о́бразъ смире́нія и уничиже́нія. Тѣ́мже Призира́ющій на смире́нныя вознесе́ тя́ и въ жи́зни вре́меннѣй, и по кончи́нѣ твое́й.

Сла́ва, Іису́су: Чи́ни а́нгельстіи ужасо́шася ди́вному снизхожде́нію Твоему́, Сло́ве Бо́жій, зря́ще Тя́, Творца́ своего́, до ра́бія зра́ка снизше́дша. Съ ни́ми же и мы́, пе́рстніи, благода́рственно взыва́емъ: сла́ва смотре́нію Твоему́, Человѣколю́бче!

И ны́нѣ, богоро́диченъ: Простира́ю ру́цѣ, и преклоня́ю колѣ́на се́рдца, и припа́даю къ Тебѣ́, Пречи́стая: воздви́гни мя́ съ одра́ лѣ́ности, я́ко да отря́сши грѣхо́вное разслабле́ніе, воспою́ благода́ть Твою́.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди, ра́звѣ Тебе́, ино́го не вѣ́мы, и́мя Твое́ имену́емъ.

Оби́тель зи́ждяй въ благооти́шное приста́нище взыску́ющихъ Бо́га, въ отрѣше́ніи отъ жите́йскихъ попече́ній, ты́, блаже́нне, вку́пѣ и са́мъ себе́ денноно́щно созида́лъ духо́внымъ трезвѣ́ніемъ и боже́ственнымъ раче́ніемъ, во оби́тель Обѣтова́вшему пріити́ со Отце́мъ Свои́мъ къ лю́бящему и оби́тель въ не́мъ сотвори́ти.

Созда́въ хра́мъ въ сла́ву и во успе́ніи Свое́мъ на́съ не Оставля́ющей, самаго́ себе́ чистото́ю тща́лся еси́ созида́ти въ хра́мъ Ду́ху Свято́му, я́ко да и въ веще́ственномъ и духо́вномъ хра́мѣ въ ду́хѣ и и́стинѣ соверша́емъ благопрія́тное служе́ніе Го́споду.

Огражда́я созида́емую тобо́ю оби́тель веще́ственнымъ огражде́ніемъ, огражда́лъ еси́ ю́ па́че бдѣ́нными моли́твами, отража́я и собла́зны ви́димые и навѣ́ты духо́въ неви́димыхъ отъ духо́вныхъ ча́дъ твои́хъ.

Науча́лъ еси́ преда́вшихся духо́вному води́тельству твоему́ и сло́вомъ Христо́вымъ, да кíйждо взе́мши кре́стъ сво́й, для благода́тнаго врачева́нія болѣ́зней и неду́говъ естества́, въ бо́дрости ду́ха ше́ствуетъ въ слѣ́дъ Подвигополо́жника, па́че же науча́лъ еси́ примѣ́ромъ христоподража́тельной жи́зни, явля́я всего́ до́браго и богоуго́днаго о́бразъ въ само́мъ себѣ́.

Сла́ва, Іису́су: Овча́ е́смь Твоего́ ста́да, Спа́се, лежу́ предъ врата́ми двора́ Твоего́, болѣ́зньми разсла́бленъ; я́ко Па́стырь До́брый, стру́пы моя́ обяжи́, гно́йныя ра́ны очи́сти и воздви́гни мя́ къ пра́вому хожде́нію путе́мъ за́повѣдей предста́тельствомъ святи́теля Твоего́.

И ны́нѣ, богоро́диченъ: На́мъ, лю́бящимъ тя́, святи́телю, и любо́вію почита́ющимъ, и въ хра́мѣ Пречи́стыя, тобо́ю созда́нномъ, лику́ющимъ, испроси́ моли́твами Ея́ исправле́ніе, и прегрѣше́ній проще́ніе.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся. Тѣ́мже, я́ко Іо́на, та́ко вопію́ Ти: возведи́ отъ тли́ живо́тъ мо́й, Благоутро́бне Го́споди.

По святи́телѣ Гу́ріи па́стыря тя́ и вождя́ Христо́съ поста́ви Каза́нстѣй па́ствѣ, его́же досто́йнымъ прее́мникомъ явля́я себе́ дѣ́лы и словесы́, и жи́знь твою́ въ таковѣ́мъ же по́двизѣ вѣ́ры и преподо́бія сконча́лъ еси́. Вку́пѣ предстоя́ съ ни́мъ престо́лу Святы́я Тро́ицы, моли́ непреста́нно о всѣ́хъ на́съ.

Якоже по чу́дномъ богови́дцѣ Моисе́ѣ ди́внаго дарова́ вождя́ лю́демъ Свои́мъ Бо́гъ — Іису́са Нави́на, та́ко по первопресто́льникѣ Гу́ріи новопросвѣще́нному гра́ду Каза́ни яви́ тя́ Христо́съ па́стыря вѣ́рна, и́же, церко́вная пріе́мъ корми́ла и къ трудо́мъ труды́ прилага́я, дѣя́ніемъ и ра́зумомъ всѣ́хъ ко Христу́ приводи́ти тща́лся еси́.

Ца́рскимъ путе́мъ зако́на Христо́ва неукло́нно ше́ствовавъ, святи́телю, тѣ́мъ же путе́мъ руководи́лъ еси́ ко спасе́нію не то́чію ча́дъ Правосла́вія, но и ага́рянскій ро́дъ изъ мра́ка магомета́нства къ свѣ́ту Христо́ву приводи́лъ еси́, возводя́ изъ заблужде́нія въ вѣ́ру спаси́тельную.

Яко свѣти́ло мы́сленное, просвѣща́я луча́ми добро́тъ твои́хъ Каза́нскую па́ству и су́щія въ не́й христоимени́тыя лю́ди въ позна́ніи Христа́, моли́, святи́телю, всѣ́мъ во свѣ́тѣ Христо́вомъ узрѣ́ти свѣ́тъ спасе́нія.

Сла́ва, Іису́су: Ви́ждь души́ моея́, Спа́се, обурева́ніе грѣхо́вное! Му́тныя пото́ки беззако́ній, наводни́въ все́ существо́ мое́, внидо́ша да́же до потопле́нія ду́ха моего́, но я́ко повелѣва́яй вѣ́тромъ и мо́рю, къ благооти́шному приста́нищу укроще́нія страсте́й мои́хъ моли́твами уго́дника Твоего́ упра́ви мя́.

И ны́нѣ, богоро́диченъ: Проро́цы Тя́ я́сно провозвѣсти́ша, Отрокови́це, Ма́терь Бо́жію апо́столи въ мíрѣ проповѣ́даша, му́ченицы исповѣ́даша, святи́теліе просла́виша, и мы́ вси́ Богоро́дицу Тя́ вои́стинну велича́емъ.

Конда́къ, гла́съ 4:

До́блестями преподо́бія и пра́вды вруче́нное тебѣ́ слове́сное ста́до озаря́я и на зла́чныхъ сло́ва Христо́ва па́житяхъ пита́я, на пра́вый пу́ть за́повѣдей Госпо́днихъ си́лою ду́ха твоего́ наставля́лъ еси́ е́. Тѣ́мже и ны́нѣ, осѣня́емое цѣльбоно́сными чудотворе́ніи твои́ми, въ святу́ю па́мять твою́, зове́мъ тебѣ́: не преста́й, святи́телю, предста́тельствовати предъ Пастыренача́льникомъ о ста́дѣ твое́мъ, я́ко па́ствы твоея́ утвержде́ніе и су́щимъ по тебѣ́ святи́телемъ удобре́ніе.

Икосъ:

Пѣ́ніе, приноси́мое тебѣ́ благоговѣ́йною мы́слію, благосе́рдно пріими́ отъ на́съ, святи́телю, си́це кра́сныя слѣды́ жи́зни твое́й, а́ще и недосто́йно, хвала́ми зна́менающихъ: ра́дуйся, пра́ведныхъ роди́телей честно́е прозябе́ніе, и Волокола́мскія оби́тели въ и́ноческихъ по́двигахъ воспита́ніе, и въ мѣ́ру му́жа возраще́ніе; ра́дуйся, въ Ста́рицкой оби́тели положи́вый восхожде́ніе къ священнонача́лію и въ гра́дѣ Свія́жскѣ благолѣ́пныя оби́тели основа́телю; ра́дуйся, первосвяти́телю Каза́нскія па́ствы, Гу́рію досто́йный прее́мниче; ра́дуйся, оби́тели твоея́ сла́во, гра́да Свія́жска огражде́ніе, па́ствы твоея́ благолѣ́піе и су́щимъ по тебѣ́ святи́телемъ хвала́ и изря́дное удобре́ніе.

Пѣ́снь 7.

Ирмо́съ: Халде́йская пе́щь, огне́мъ распала́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Возлія́ся вода́ искуше́нія до души́ твоея́, и бу́ря гнѣ́ва и гоне́нія возшумѣ́ о́крестъ тебе́, святи́телю, егда́ благоду́шно ре́клъ еси́ сло́во и́стины предъ царе́мъ, оба́че пребы́лъ еси́ непоколеби́мъ, апо́стольскимъ сло́вомъ утвержда́я себе́: я́ко Бо́гу подоба́етъ повинова́тися па́че, не́жели человѣ́комъ въ и́стинѣ.

Небоя́зненно уста́ твоя́ отве́рзлъ еси́ въ защи́ту непови́нности и правоты́ святи́теля Фили́ппа; а́ще же и не возмо́глъ еси́ загради́ти бездве́рная уста́ зло́бы, оба́че, яви́въ крѣ́пость въ безтре́петномъ оправда́ніи му́жа пра́веднаго, оста́вилъ еси́ вѣко́мъ примѣ́ръ свято́й ре́вности, съ каково́ю глаго́лалъ еси́ и́стину предъ царе́мъ Гро́знымъ.

Прича́стникъ бы́въ, блаже́нне, скорбе́й мяте́жной жи́зни, я́ко са́мъ искуси́выйся, и на́съ, искуша́емыхъ, изба́ви ско́рбнаго обстоя́нія моли́твами твои́ми.

Тве́рдъ въ пра́вдѣ и и́стинѣ бы́лъ еси́, святи́телю, не убоя́вся гнѣ́ва царе́ва, неустраши́мо вѣща́лъ еси́ сло́во во оправда́ніе святи́теля Фили́ппа. Съ ни́мъ предстоя́ Подвигополо́жнику въ чи́нѣ свидѣ́телей и́стины, моли́ся, да не отпаде́мъ въ ско́рби отъ и́стины.

Сла́ва, Тро́ицѣ: Непостижи́мая Прему́дросте, неизслѣ́димая бла́госте, вседержа́вное могу́щество и вседѣ́тельное смотре́ніе, Самосу́щная Свѣтонача́льная Тро́ице, рабо́въ Твои́хъ пѣ́ніе пріими́, вопію́щихъ: благослове́нъ еси́, Бо́же оте́цъ на́шихъ.

И ны́нѣ, богоро́диченъ: Ско́рый Тво́й покро́въ, и по́мощь, и ми́лость покажи́ на рабѣ́хъ Твои́хъ, и во́лны, Чи́стая, укроти́ су́етныхъ помышле́ній, и па́дшихъ на́съ воздви́гни, Богоро́дице: вѣ́мы бо, вѣ́мы, Дѣ́во, я́ко мо́жеши, ели́ка хо́щеши.

Пѣ́снь 8.

Ирмо́съ: Ангели и небеса́, на Престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Оправда́нія ри́зу соблю́дъ свѣ́тлу, во свѣ́тлости святы́я вше́лъ еси́ и вѣнце́мъ нетлѣ́нія вѣнча́лся еси́; нелѣ́пый зра́къ прегрѣше́ній богоуго́днымъ хода́тайствомъ твои́мъ совлецы́ съ ве́тхаго на́шего человѣ́ка и чи́стыми покая́нія оде́ждами облеки́ но́ваго, я́ко облече́нный нетлѣ́нною сла́вою но́ваго человѣ́ка и сія́ющій на небесѣ́хъ преподо́бнемъ и пра́вдою.

Свы́ше небе́снымъ предста́тельствомъ до́лу цѣльбо́носнымъ благоуха́ніемъ моще́й твои́хъ озаря́я къ о́нымъ притека́ющихъ, низпосли́, святи́телю, по коего́ждо потре́бѣ благо́е и поле́зное.

Украси́въ жи́знь твою́ непоро́чностію и святи́тельскій престо́лъ до́блестями па́стырства о Христѣ́, предстоя́ престо́лу Архіере́я, проше́дшаго небеса́, моли́ся о исполне́ніи проше́ній предстоя́щихъ о́крестъ ра́ки твоея́.

Вѣ́дуще тя́, святи́телю, пода́теля исцѣле́ній, къ тебѣ́ возно́симъ моли́твенный гла́съ: уврачу́й многолѣ́тныя стра́сти ду́шъ на́шихъ и отъ стрѣ́лъ вра́жіихъ неврежде́нныхъ сохрани́ подъ кро́въ тво́й прибѣга́ющихъ, утвержда́я на ка́мени Боже́ственныхъ за́повѣдей.

Сла́ва, Іису́су: Исто́чниче бла́гости и прему́дрости сокро́вище, Іису́се, яви́лъ еси́ отъ земны́хъ нѣ́дръ нетлѣ́нныя мо́щи Твоего́ уго́дника, моли́твами его́ исцѣли́ душе́вныя на́ши не́мощи по вели́цѣй Твое́й ми́лости.

И ны́нѣ, богоро́диченъ: Нетлѣ́нная Дѣ́во и Ма́ти, на́съ, тлѣ́ющихъ въ по́хотехъ преле́стныхъ, отъ ле́сти тли́теля ра́зумовъ и серде́цъ сохрани́ и стезе́ю новотворя́щаго покая́нія къ нетлѣ́нію душе́вному упра́ви.

Пѣ́снь 9.

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе, на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Пра́ведно и благоче́стно пожи́въ на земли́, въ го́рнихъ ны́нѣ живе́ши оби́телехъ и, созерца́я Сла́ву Бо́жію, моли́ся о на́съ, прегрѣше́ніями лише́нныхъ Сла́вы Бо́жіей.

Въ земно́й жи́зни сохрани́въ душе́вную и тѣле́сную чистоту́, облече́нный благода́тію въ свѣ́тлость ея́, предстои́ши ны́нѣ со а́нгелы Пресвятѣ́й Тро́ицѣ: Ейже не преста́й вопи́ти о проще́ніи и очище́ніи свы́ше грѣхо́въ на́шихъ и измове́ніи о́ныхъ и́стиннымъ на́шимъ покая́ніемъ.

Пра́востію дѣ́лъ, я́ко оде́ждою многоцѣ́нною, одѣ́явся, живо́ю вѣ́рою и любо́вію, я́ко пресвѣ́тлымъ вѣнце́мъ, вѣнча́лся еси́, святи́телю. Тѣ́мже, въ благолѣ́піи чистоты́ предстоя́ Спа́су всѣ́хъ, моли́ся, да не яви́мся на судѣ́ Его́ бездерзнове́нны, на́ги и покры́ты студо́мъ осужде́нія.

Па́ству и оби́тель твою́ огражда́й твои́ми моли́твами, я́ко тве́рдыми забра́лы, отъ вра́жескихъ навѣ́товъ и обстоя́ній, взыва́я Христу́: я́же да́лъ ми́ еси́, сохрани́, да превозно́сятъ Тя́ во вся́ вѣ́ки.

Сла́ва, Тро́ицѣ: Отче Небе́сный — Трисія́ннаго Божества́ исто́чное нача́ло, Сы́не Бо́жій — Ѵпоста́сное зижди́тельное Сло́во Отчее, Ду́ше Святы́й — изъ Существа́ Того́жде Безнача́льнаго Свѣ́та Отца́ вѣ́чно исходя́щій и все́ освяща́ющій; Тро́ице Свята́я, поми́луй, спаси́ и соблюди́ на́съ, на Тя́ всю́ наде́жду жи́зни и спасе́нія возлага́ющихъ.

И ны́нѣ, богоро́диченъ: Умири́, Христе́, тезоимени́тое Твое́ жи́тельство мольба́ми Пречи́стыя Ма́тере Твоея́, низлага́я сопроти́вныхъ си́лу подъ держа́ву Импера́тора на́шего, храни́ непоколеби́мо Це́рковь и Правосла́віе, да, утвержда́яся уста́ми и се́рдцемъ во благоче́стіи, прославля́емъ Тя́ со Отце́мъ и Пресвяты́мъ Ду́хомъ Твои́мъ во вѣ́ки.

Свѣти́ленъ, гла́съ 4:

Во святи́телехъ благоче́стно пожи́въ, лю́ди къ богоразу́мію наста́вилъ еси́ и, до́брѣ Бо́гу угоди́въ, отъ Него́ нетлѣ́ніемъ и чудесы́ просла́вленъ еси́. Сего́ ра́ди, святи́телю, мо́лимъ тя́: не забу́ди гра́дъ се́й, его́же возлюби́лъ еси́, и оби́тель твою́, въ не́йже тѣ́ло твое́ предложи́лъ еси́, и моли́ Просла́вившаго тя́ непреста́нно о всѣ́хъ на́съ. [Два́жды.]

Сла́ва, и ны́нѣ, богоро́диченъ:

Влады́чице небесе́ и земли́, иму́щая дерзнове́ніе моли́тися о все́мъ мíрѣ и о всѣ́хъ, притека́ющихъ подъ благооти́шный кро́въ Тво́й, моли́ со святи́телемъ Ге́рманомъ неизглаго́ланно Вопло́щшагося отъ Тебе́ милосе́рдія ра́ди, да пріи́метъ въ сла́ву и́мени Своего́ ску́дную пѣ́снь на́шу и низпо́слетъ на́мъ благода́ть досто́йно пѣ́ти и моли́тися Ему́, Ди́вному во святы́хъ.

На хвали́техъ стихи́ры на 4, гла́съ 5:

Образъ, святи́телю, бы́лъ еси́ вѣ́рнымъ, серде́чною пра́востію и житія́ смиренному́дріемъ, и́миже, я́ко крила́ми ле́гкими, къ высотѣ́ небе́снаго блаже́нства возлетѣ́въ, престо́лу Сла́вы предстои́ши, предста́тельствуй о соверша́ющихъ вѣ́рою и любо́вію па́мять твою́. [Два́жды.]

Жезло́мъ святи́тельства ста́до твое́ упа́слъ еси́ на зла́чныхъ па́житяхъ за́повѣдей Христо́выхъ и благоче́стія проповѣ́даніемъ освѣти́лъ еси́ Це́рковь па́ствы твоея́, я́же стяжа́вши отъ нѣ́дръ земны́хъ бога́тство неиждива́емое, сокро́вище, благоуха́нія Боже́ственнаго испо́лненное — нетлѣ́нныя мо́щи твоя́, взыва́етъ на́ми: моли́, святи́телю, Человѣколю́бца Бо́га непреста́нно о всѣ́хъ на́съ.

Гла́съ 6:

Пріими́, святи́телю, на́ше пѣ́сненное хвале́ніе и вонми́ смире́нной моли́твѣ на́шей, я́ко вѣ́рный хода́тай и те́плый моли́твенникъ за ны́ Христу́ Бо́гу, Его́же содѣ́лай ми́лостива, да проше́нія на́ша тобо́ю испо́лнитъ во бла́го и спасе́ніе ду́шъ на́шихъ.

Сла́ва, гла́съ 2:

Хра́мъ всече́стенъ Бо́жіей Ма́тери воздви́глъ еси́, да подъ кро́вомъ Ея́ сози́ждеши себе́ и ча́дъ оби́тели твоея́ во спасе́ніе. Ейже моли́ся, святи́телю, да благода́тію Го́спода и мы́ сози́ждемся въ хра́мъ Бо́жій и въ жили́ще Ду́ха Свята́го.

И ны́нѣ, [богоро́диченъ], гла́съ 3:

Пріими́ отъ на́съ пѣ́снь исхо́дную, Ма́ти жива́го Бо́га, и свѣтоно́сною Твое́ю и Боже́ственною осени́ благода́тію, Императору — побѣдительная, христолюби́вымъ лю́демъ — ми́ръ, укрѣпле́ніе — пою́щимъ и душа́мъ спасе́ніе подаю́щи.

Славосло́віе вели́кое. [Ектеніи́ и отпу́стъ.]



НА ЛИТУРГІИ,

Блаже́нны отъ кано́на, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Апо́столъ ко Евре́омъ, зача́ло 318. [Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Слу́жба [съ Ака́ѳистомъ] и́же во святы́хъ отцу́ на́шему Ге́рману, архіепи́скопу Каза́нскому и Свія́жскому, Свія́жскаго Богоро́дицкаго Успе́нскаго монастыря́ Свяще́нно-Архимандри́ту. — Изда́ніе второ́е. — М.: Въ Сѵнода́льной Тѵпогра́фіи, 1881. — С. 1 – 34, 58-67.

/ Къ оглавленію раздѣла /


Наверхъ / Къ титульной страницѣ

0