Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 6-й де́нь.
Слу́жба преподо́бнаго отца́ на́шего Варлаа́ма, Новгоро́дскаго чудотво́рца, игу́мена Ху́тыня монастыря́.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, самогла́сны, гла́съ 6:

Вседержи́тельною десни́цею укрѣпля́емь, преподо́бне о́тче на́шъ Варлаа́ме, воздержа́ніемъ пи́шу боже́ственную позна́лъ еси́; и непреста́нною моли́твою и нощны́мъ стоя́ніемъ Анто́нія блаже́ннаго снаслѣ́дникъ бы́ти сподо́бился еси́, сле́зными же пото́ки вся́ де́монская ополче́нія потопи́лъ еси́. Тѣ́мже и Христо́съ тя́ дарова́ньми чуде́съ просла́ви, Его́же возжелѣ́лъ еси́ и Его́же ра́ди тяготу́ дневну́ю поне́слъ еси́, моли́ спасти́ся душа́мъ на́шимъ. [Два́жды.]

Пріиди́те вси́ концы́ земнíи, псалмы́ и пѣ́сньми свяще́нное и честно́е преподо́бнаго торжество́ Варлаа́ма дне́сь благоче́стно восхва́лимъ: а́ще бо и послѣди́ возсія́, но дре́внихъ че́сти сподо́бися и мо́лится Христу́ спасти́ся душа́мъ на́шимъ.

Стра́стная взыгра́нія воздержа́ніемъ, о́тче преподо́бне Варлаа́ме, изсуши́лъ еси́ и отъ сего́ до́мъ и жили́ще Ду́ха Свята́го показа́лся еси́, исцѣле́нія вѣ́рою приходя́щимъ къ тебѣ́ подае́ши, я́коже вторы́й Илія́ чудесы́ показа́лся еси́. Онъ бо, въ животѣ́ сы́й, возду́хи водото́чными чудодѣ́йствоваше, ты́ же и по сме́рти чудесы́ удивля́еши: не зерца́ломъ бо и гада́ньми, но явле́ннѣ и я́снѣ зри́ши Святу́ю Тро́ицу. Ейже моли́ся спасти́ся душа́мъ на́шимъ.

Сла́ва, гла́съ 8:

Пріиди́те, мона́ховъ мно́жества дне́сь, псало́мская пѣ́нія, а́ки цвѣ́ты духо́вныя, принесе́мъ, я́ко вои́стинну мона́шескому удобре́нію и преподо́бнымъ сожи́телю. Хва́ляще, си́це рце́мъ: ра́дуйся, свѣти́льниче многосвѣ́тлый, возводя́ ко Христу́ мона́ховъ мно́жества; ра́дуйся, всея́ Россíи похвала́ и утвержде́ніе, и всѣ́хъ вѣ́рныхъ благоути́шное приста́нище, и исцѣле́ніе боля́щимъ во грѣсѣ́хъ, на боже́ственное тѣ́хъ возвыша́я раче́ніе. Тѣ́мъ пречестну́ю и святу́ю твою́ и а́нгеломъ говѣ́йную обстоя́ще ра́ку, любе́зно облобыза́емъ, преподо́бне о́тче на́шъ Варлаа́ме, и Боже́ственнаго человѣколю́бія про́симъ получи́ти твои́ми къ Бо́гу моли́твами, и мíру ми́ръ дарова́ти, и душа́мъ на́шимъ ве́лію ми́лость.

И ны́нѣ, богоро́диченъ.

На стихо́внѣ стихи́ры самогла́сны, гла́съ 5:

Вѣ́рою и любо́вію, соше́дшеся, празднолю́бцы, псалмы́ и пѣ́сньми восхва́лимъ дне́сь небе́снаго человѣ́ка и земна́го а́нгела. Къ нему́же возопіе́мъ: о всеблаже́нне и преподо́бне, по́стниковъ похвала́, о на́съ моли́ся ко Христу́, Варлаа́ме о́тче на́шъ, поми́ловатися душа́мъ на́шимъ.

Сти́хъ: Честна́ предъ Го́сподемъ сме́рть преподо́бныхъ Его́.

Честны́й и свѣтоно́сный, преподо́бне, тво́й пра́здникъ испо́лненъ ра́дости и весе́лія духо́внаго. Тѣ́мже, соше́дшеся, мона́ховъ мно́жества и христоимени́тіи лю́діе, любо́вію восхваля́юще, блажи́мъ боже́ственная дѣя́нія твоя́, я́ко бо кри́нъ, во удо́ли процвѣ́лъ еси́, и благоуха́еши душе́вная на́ша чу́вства, Варлаа́ме о́тче на́шъ, моли́ спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

Яко уязви́вся жела́ніемъ боже́ственнымъ, преподо́бне о́тче на́шъ Варлаа́ме, взе́мъ бо кре́стъ тво́й, послѣ́довалъ еси́ Влады́цѣ Христу́. Тогда́ вся́ плотска́я мудрова́нія умертви́въ, и наслѣ́довалъ еси́ вои́стинну кро́ткихъ зе́млю, прича́стіемъ обожа́емь, и, неизрече́ннаго о́наго весе́лія наслажда́яся, помина́й на́съ, творя́щихъ всесвяту́ю и пречестну́ю па́мять твою́.

Сла́ва, гла́съ 8:

Преподо́бне и богоблаже́нне о́тче Варлаа́ме, вои́стинну сподо́бился еси́ боже́ственныя жи́зни, посто́мъ бо и бдѣ́ніемъ тѣ́ло твое́ изнуря́я, о́бразъ бы́лъ еси́ мона́ховъ. Аще бо и тѣле́сный язы́къ умолче́, но чудеса́ свидѣ́тельствуютъ; вели́кій же Но́вградъ, проповѣ́дуя, хва́лится, — имѣ́ю бо, — рече́, — въ себѣ́ неистощи́мое сокро́вище, честну́ю ра́ку моще́й твои́хъ, и чудеса́ быва́емая, — и прославля́етъ просла́вльшаго тя́ Го́спода. Ему́же моли́ся дарова́ти вселе́ннѣй ми́ръ и ве́лію ми́лость.

И ны́нѣ, богоро́диченъ.

Тропа́рь, гла́съ 3:

Иже на земли́ лега́ніемъ, поще́ніемъ же и бдѣ́ніемъ тѣ́ло твое́ изнуря́я, преподо́бне, вся́ плотска́я мудрова́нія умертви́лъ еси́, и исцѣле́ній струя́ незави́стная яви́лся еси́ вѣ́рою притека́ющимъ къ ра́цѣ моще́й твои́хъ, Варлаа́ме о́тче на́шъ, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ воскре́сенъ:

[Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.]


НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, самогла́сны, гла́съ 8:

Преподо́бне и богоблаже́нне о́тче на́шъ Варлаа́ме, поучи́вся въ за́повѣдехъ Госпо́днихъ де́нь и но́щь и въ зако́нѣ Его́ досто́йно пожи́въ, обрѣ́лъ еси́ лѣ́ствицу небе́сную, по не́йже возше́дъ, дости́глъ еси́ Го́рняго Іерусали́ма. Болѣ́зней и по́двигъ досто́йную по́честь пріе́мля, и съ вы́шними ра́дуешися, Боже́ственнаго зрѣ́нія наслажда́яся, отъ Царя́ бо ца́рствующихъ, Христа́, вѣнце́мъ вѣнча́лся еси́ и Ца́рствія Его́ снаслѣ́дникъ, бы́лъ еси́. Но я́ко имѣ́я дерзнове́ніе ко Христу́, мíру ми́ръ испроси́ и душа́мъ на́шимъ ве́лію ми́лость. [Два́жды.]

Яко чи́стое и нескве́рное зерца́ло, яви́лся еси́ въ вы́шнихъ ликостоя́ніихъ, тѣ́мже и чи́стаго ра́ди житія́ твоего́ Тро́ицы жили́ще показа́лся еси́. И, я́ко свѣтоно́сное со́лнце, въ твое́й оби́тели сія́я, Варлаа́ме, яви́лся еси́, и всю́ поднебе́сную просвѣща́я. И, я́коже вторы́й Моисе́й, креста́ жезло́мъ мо́ре страстно́е пресѣ́клъ еси́, мы́сленнаго же Амали́ка побѣди́въ, безвре́дно небе́сный восхо́дъ обрѣ́лъ еси́, и со безпло́тными Тро́ицѣ предстоя́, моли́ спасти́ся душа́мъ на́шимъ. [Два́жды.]

Преподо́бне о́тче и богоно́се Варлаа́ме, си́лою креста́ утверди́вся, стра́стныя пото́ки изсуши́лъ еси́ и ра́достію и весе́ліемъ души́ дости́глъ еси́, идѣ́же гла́съ пра́зднующихъ слы́шашеся, и кра́снаго и неизрече́ннаго о́наго весе́лія насыща́ешися. Тѣ́мъ и свѣ́тлыми тя́ вѣнцы́ Христо́съ обогати́. Всечестна́я же твоя́ ра́ка исцѣле́ній неоску́дный исто́чникъ источа́ютъ вѣ́рою приходя́щимъ. Тѣ́мъ, со стра́хомъ и любо́вію предстоя́ще, мо́лимся: моли́ся, преподо́бне о́тче на́шъ, спасти́ся душа́мъ на́шимъ. [Два́жды.]

Чи́стое и пречестно́е прія́телище яви́лся еси́ Ду́ха Пресвята́го, Варлаа́ме преподо́бне, безпло́тнымъ бо во пло́ти подо́бяся, и тѣ́хъ житію́ подража́лъ еси́. Сего́ ра́ди отъ вседѣ́тельныя вѣнча́лся еси́ Десни́цы и чуде́съ исцѣле́ній отъ Него́ сподо́бился еси́, а́ще бо и преста́вился еси́ отъ земли́, но Бо́гу жи́въ предстои́ши со а́нгелы и мо́лишися о душа́хъ на́шихъ. [Два́жды.]

Сла́ва, гла́съ 8:

Всечестна́я и чудотво́рная ра́ка, идѣ́же лежи́тъ пречестно́е и свято́е тѣ́ло твое́, Варлаа́ме о́тче на́шъ, исцѣле́нія неоску́дно подае́тъ притека́ющимъ съ вѣ́рою и душетлѣ́нныя стра́сти исцѣля́етъ, мно́жества же де́моновъ отрѣва́етъ. Тѣ́мже и стада́ мона́ховъ, твои́ми чудесы́ удивля́еми, ра́достно отъ души́ вопіе́мъ: богоблаже́нне и преподо́бне о́тче на́шъ Варлаа́ме, моли́ Христа́ Бо́га уще́дрити ми́ръ и спасти́ ду́ши на́ша.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́. И чте́нія.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 8:

Боже́ственная и свѣтоно́сная наста́ па́мять въ по́стницѣхъ вели́каго Варлаа́ма, ду́ши и тѣлеса́ веселя́щая. Тѣ́мже, пріиди́те, празднолю́бцы, да наслади́мся ны́нѣшняго торжества́, се́ бо на́ше зва́ніе пріи́де и Россíйскія земли́ удобре́ніе, вели́каго же Нова́града похвала́ и утвержде́ніе, снаслѣ́дникъ бо Христо́въ яви́ся, и безпло́тныхъ житія́ подража́тель бы́въ, и мо́лится Спа́су всѣ́хъ умири́ти мíръ и спасти́ ду́ши на́ша.

Весели́ся и ра́дуйся въ Го́сподѣ, вся́ Россíйская земля́, процвѣ́тши въ себѣ́ но́ваго свѣти́льника, я́ко со́лнце, вселе́нную просвѣща́юща. Красу́йся и лику́й, Це́рковь Бо́жія, и мона́ховъ мно́жества, сра́дуйтеся, празднолю́бныхъ собо́ри, взыгра́йте, и, вѣне́цъ отъ духо́вныхъ цвѣто́въ спле́тше, съ Дави́домъ возопіи́мъ: со́нъ че́стенъ предъ Го́сподемъ сме́рть преподо́бныхъ Его́.

Честно́е и пречестно́е прія́телище яви́лся еси́ Ду́ха Пресвята́го, преподо́бне Варлаа́ме о́тче на́шъ, безпло́тныхъ во пло́ти житіе́ подража́лъ еси́, тѣле́сная двиза́нія воздержа́ніемъ умертви́въ, въ живоно́сную ме́ртвость одѣ́ялся еси́. И сего́ ра́ди отъ Вседержи́тельныя Десни́цы вѣнча́лся еси́ и чуде́съ исцѣле́ній отъ Него́ сподо́бился еси́. Аще бо и преста́вился еси́ отъ земли́, но Бо́гу жи́въ предстои́ши и здѣ́ съ на́ми неви́димо водворя́ешися, но, я́ко имѣ́я дерзнове́ніе, моли́ся о душа́хъ на́шихъ.

Сла́ва, гла́съ 6:

Свѣ́тлый и всепра́зднственный дне́сь возсія́ де́нь, я́коже второ́е со́лнце, вся́ празднолю́бныхъ собо́ры просвѣща́я и мглу́ отгоня́я дре́вняго помраче́нія: честна́я бо па́мять Варлаа́ма вселе́нную созыва́етъ е́же къ честнѣ́й его́ и чудотво́рнѣй ра́цѣ стещи́ся, и любе́зно лобыза́ти, и моли́ти: да, я́ко кро́ткому Дави́ду, Благочести́вому Импера́тору на́шему побѣ́дное одолѣ́ніе на сопроти́вныя испро́ситъ, и мíру ми́ръ, и душа́мъ на́шимъ ве́лію ми́лость.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

На стихо́внѣ стихи́ры самогла́сны. Гла́съ 2:

Ду́ха Свята́го теплото́ю, му́дре, жела́ніе се́рдца твоего́ е́же ко Го́споду согрѣ́явъ и зи́му страсте́й умертви́въ, многоко́зненную же си́лу и де́монскую низложи́лъ еси́ и въ коне́цъ не́мощны ты́я показа́лъ еси́, небе́сная же во́инства удиви́въ терпѣ́ніемъ свои́мъ, но я́ко по́стниковъ подража́тель и преподо́бныхъ сожи́тель, моли́ спасти́ся душа́мъ на́шимъ.

Сти́хъ: Честна́ предъ Го́сподемъ сме́рть преподо́бныхъ Его́.

Взе́мъ кре́стъ Госпо́день, преподо́бне Варлаа́ме, терпѣли́вно послѣ́довалъ еси́ на Крестѣ́ на́съ ра́ди Распе́ншемуся, и Его́ ра́ди любве́ вся́ оста́вилъ еси́, и Того́ еди́наго, Христа́, возлюби́лъ еси́. Ему́же и со а́нгелы предстоя́, моли́ уще́дрити мíръ и спасти́ ду́ши на́ша.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Яко пріе́мъ, о́тче, небе́сное сѣ́мя, пло́дъ стори́чествующъ добродѣ́телей прине́слъ еси́, Варлаа́ме о́тче на́шъ, пита́я благоче́стно гла́домъ та́ющія добродѣ́телей, отону́дуже исцѣле́нія вѣ́рою приходя́щимъ подае́ши. Тѣ́мже, я́ко имѣ́я дерзнове́ніе ко Христу́, моли́, преподо́бне о́тче на́шъ, спасти́ся вѣ́рою чту́щимъ тя́ и пра́зднующимъ любо́вію па́мять твою́.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Варлаа́ме, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ. Съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

На благослове́ніи хлѣ́бовъ: Тропа́рь свята́го, два́жды. И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь два́жды. Сла́ва, и ны́нѣ, богоро́диченъ воскре́сный [пи́санъ на ма́лѣй вече́рни].

По 1-мъ стихосло́віи сѣда́ленъ, гла́съ 8. Подо́бенъ: Прему́дрости.

Мно́гимъ воздержа́ніемъ, преподо́бне, житіе́ украси́въ, пу́ть показа́лъ еси́, веду́щій въ жи́знь, добродѣ́телей смире́ніемъ. Мíра бо отве́ргся и, вся́, я́же въ мíрѣ кра́сная, преоби́дѣвъ, ева́нгельскимъ уче́ніемъ послѣ́довалъ еси́; жесто́кимъ же житіе́мъ пло́ть твою́ изнуря́я, го́рдаго змíя воздержа́ніемъ уби́лъ еси́. Тѣ́мже на небесѣ́хъ водворя́яся и Трисо́лнечному Божеству́ предстоя́, пресла́вне Варлаа́ме, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости.

Красоты́ мíра сего́ отъ млады́хъ ногте́й, преподо́бне, возненави́дѣвъ, еди́наго Христа́ отъ се́рдца возлюби́лъ еси́, и Тому́ все́ю душе́ю прилѣпи́лся еси́, и, я́ко безпло́тенъ, на земли́ пожи́лъ еси́ съ пло́тію, сла́ву же мимотеку́щую и бога́тство въ ничто́же вмѣни́въ, небе́сное бога́тство воспрія́лъ еси́ и сла́ву вѣ́чную. Тѣ́мже ублажа́емъ свято́е твое́ успе́ніе и, въ не́мъ торжеству́юще, вопіе́мъ ти́: преподо́бне о́тче на́шъ Варлаа́ме, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: О́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

По поліеле́и сѣда́ленъ, гла́съ 3. Подо́бенъ: Красотѣ́ дѣ́вства.

Сою́зомъ любве́ привяза́вся Христу́, земна́я же и мимотеку́щая возненави́дѣвъ, богому́дре, пусты́нное озлобле́ніе усе́рдно подъя́лъ еси́, де́монская же ополче́нія и и́хъ многоко́зненную си́лу посрами́лъ еси́, и подвигополо́жникъ Христо́съ дарова́ніемъ чуде́съ обогати́ тя́. Тѣ́мже Тя́ почита́емъ, Варлаа́ме богому́дре. [Два́жды.]

Сла́ва, и ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя до́брыхъ блажа́ще при́сно, со а́нгеломъ вопіе́мъ Ти́: ра́дуйся, Обра́дованная.

Та́же степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́, стихи́ра самогла́сна, гла́съ 6:

Свѣ́тлый и всепра́зднственный дне́сь возсія́ де́нь, [я́коже второ́е со́лнце, вся́ празднолю́бныхъ собо́ры просвѣща́я и мглу́ отгоня́я дре́вняго помраче́нія: честна́я бо па́мять Варлаа́ма вселе́нную созыва́етъ е́же къ честнѣ́й его́ и чудотво́рнѣй ра́цѣ стещи́ся, и любе́зно лобыза́ти, и моли́ти: да, я́ко кро́ткому Дави́ду, Благочести́вому Импера́тору на́шему побѣ́дное одолѣ́ніе на сопроти́вныя испро́ситъ, и мíру ми́ръ, и душа́мъ на́шимъ ве́лію ми́лость].

Та́же кано́нъ Богоро́дицы 2-го гла́са, со ирмосо́мъ на 6: Нетре́ну, необы́чну... И преподо́бнаго Варлаа́ма, на 8, его́же краегране́сіе си́це: Глаго́лъ да́ждь ми́, Христе́ мо́й, восхвали́ти Твоего́ уго́дника. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Отъ Свѣ́та Свѣ́тъ, Христе́ мо́й, отъ Отца́ пре́жде вѣ́къ рожде́йся, сы́й въ нача́лѣ со Отце́мъ и Ду́хомъ, согрѣше́ній мра́къ души́ моея́ отгна́въ, озари́ у́мъ мо́й, молю́ся, да возмогу́ пѣ́ти Варлаа́ма, Твоего́ уго́дника.

Отъ ко́рене блага́го блажа́йшая о́трасль прозя́блъ еси́, земны́хъ маловре́меннаго житія́ избѣ́глъ еси́. Тѣ́мъ, ны́нѣ чистоты́ вѣне́цъ пріе́мля, со а́нгелы Христу́ воспѣва́еши: пои́мъ Го́сподеви, я́ко просла́вися.

Земна́я и мимотеку́щая, я́ко уме́ты, вмѣни́въ, Христа́ еди́наго пріобрѣ́лъ еси́, Его́же сою́зомъ любве́ уязви́въ ду́шу твою́, и Того́ потща́лся еси́ обрѣсти́ ненасыща́емыя добро́ты.

Богоро́диченъ: Услы́ша Ева прама́ти: въ печа́лехъ роди́ши ча́да. Ты́ же, чи́стая Дѣ́во, услы́шала еси́: Госпо́дь съ Тобо́ю, ра́дуйся! — И ра́дованнымъ гла́сомъ, Богоневѣ́сто, печа́ль прама́тере потреби́ла еси́.

Катава́сія: Отве́рзу уста́ моя́...

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

По апо́столу, о́тче, вы́шнихъ ища́, и мудрова́ніе имѣ́я е́же къ Бо́гу, вся́, я́же на земли́, оста́вилъ еси́ и па́че естества́ добро́ты сподо́бился еси́.

Свѣ́томъ Боже́ственнымъ осія́емь о не́мъ, и пу́ть, къ жи́зни веду́щь, позна́лъ еси́, о́тче на́шъ Варлаа́ме, и равноа́нгельнаго ра́ди житія́ чудотво́рецъ наре́клся еси́.

Зако́ны пита́яся всѣ́хъ Творца́ и Влады́ки, тѣ́мже и невече́рнимъ облистава́емь Свѣ́томъ, свѣ́тлое со́лнце яви́лся еси́ и прему́дрости сокро́вищемъ, мíръ обогаща́я.

Богоро́диченъ: Во ины́хъ жена́хъ ма́ти, до́ндеже дѣ́ва, не позна́ся, ни ма́ти по рождествѣ́ дѣ́вствовати сподо́бися, на Тебѣ́ же, Дѣ́во Богома́ти, обое́ сбы́стся. Тѣ́мъ весе́ліемъ ду́ха воспѣва́ю: нѣ́сть непоро́чны, па́че Тебе́, Влады́чице.

Сѣда́ленъ, гла́съ 8. Подо́бенъ: Прему́дрости.

Красоты́ мірскíя отъ млады́хъ ногте́й, преподо́бне, возненави́дѣвъ, еди́наго же Христа́ отъ се́рдца возлюби́лъ еси́ и Тому́ все́ю душе́ю прилѣпи́лся еси́; я́ко безпло́тенъ, на земли́ пожи́въ съ пло́тію, сла́ву же мимотеку́щую и бога́тство въ ничто́же вмѣни́въ, небе́сное бога́тство воспрія́лъ еси́ и сла́ву вѣ́чную. Тѣ́мже ублажа́емъ свято́е твое́ успе́ніе и, въ не́мъ торжеству́юще, вопіе́мъ ти́: богому́дре о́тче на́шъ Варлаа́ме, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́сто Творца́, я́ко неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нію мя́ су́ща скве́рное оби́телище и де́мономъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́. Свѣтоно́сная, Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Яко въ порфи́ру, и виссо́нъ, и въ ца́рскую багряни́цу одѣ́яся тобо́ю вели́кая Россíйская земля́: дне́сь у́бо, свѣ́тло торжеству́ющи, весели́тся, Варлаа́ме, имѣ́ющи тя́ въ себѣ́, я́ко неистощи́мое сокро́вище.

Мíра любве́ отре́кся, дости́глъ еси́ го́рній Іерусали́мъ, идѣ́же Христо́съ со Отце́мъ и Ду́хомъ, и, вѣнце́въ отъ Него́ сподо́бився, со безпло́тными ли́ки пое́ши, пріе́мля Его́ сія́ніе.

Аще у́бо, о́тче, тѣ́сный и болѣ́зненный пу́ть ше́ствовалъ еси́ въ житіи́, но оба́че нетлѣ́нную жи́знь наслѣ́довалъ еси́, отону́дными свѣ́тлостьми бога́тно просвѣща́яся, богоблаже́нне Варлаа́ме.

Богоро́диченъ: Истинно Тя́ сѣ́нь свидѣ́тельствова многоразли́чными о́бразы, я́вѣ показу́ющи Воплоще́ннаго изъ Тебе́, Еди́наго Тро́ицы, Пречи́стая, неизмѣ́нно, Богома́ти Влады́чице, и мíръ обнови́вша.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Яремъ Госпо́день отъ ю́ности, му́дре, взе́мъ, послѣ́довалъ еси́ Христу́ скорбьми́ и слеза́ми, преподо́бне, мы́сленно о́ко къ Нему́ имѣ́я, до́ндеже и святы́хъ селе́ній дости́глъ еси́, обрѣ́тъ поко́ище Го́рняго гра́да.

Страсте́й отгна́въ мглу́ я́вѣ заря́ми, о́тче, добродѣ́телей, просвѣще́ніе Ду́ха въ се́рдцы пріе́мъ, Варлаа́ме, и́мже попали́лъ еси́ вся́ де́монская ополче́нія и по́стническимъ лико́мъ причта́лся еси́.

Насажде́нъ во дво́рѣхъ Госпо́днихъ и въ дому́ Бо́га на́шего процвѣ́лъ еси́. Пріе́мъ небе́сное сѣ́мя, богодухнове́нне, серде́чною браздо́ю кла́съ стори́чествующь прине́слъ еси́, тѣ́мже обогати́лся еси́ вѣнце́мъ чуде́съ.

Богоро́диченъ: Упра́ви у́мъ мо́й, Влады́чице, тружда́ющійся въ пучи́нѣ скорбе́й и потопля́емь наше́ствіемъ тлетво́рныхъ страсте́й, и спаси́, Богоро́дице, къ Тебѣ́ прибѣга́ющія: ины́я бо Помо́щницы, Чи́стая, ра́звѣ Тебе́, не зна́емъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Мо́ре жите́йское, любому́дріемъ испыта́въ и разумѣ́въ су́етно су́що и я́ко вско́рѣ погиба́ющо, отве́рглъ еси́, еди́ному прилѣпи́лся еси́ Христу́. Его́же ра́ди и тяготу́ дневну́ю поне́слъ еси́, о всѣ́хъ Тому́ восхожде́нія въ се́рдцы свое́мъ полага́я.

Вѣ́триломъ окриля́емь воздержа́нія, и отту́ду дости́глъ еси́ въ приста́нище благоути́шное, поще́ніемъ пита́я ду́шу твою́, преподо́бне, и свѣ́тлу всѣ́хъ Творцу́ предста́вилъ еси́ ю́. Тѣ́мже и Христо́съ прія́тъ ю́, я́ко свѣтоза́рную звѣзду́, и своея́ сла́вы соприча́стну содѣ́ла.

Ангельская во́инства су́щему во пло́ти житію́ твоему́ удиви́шася, о́тче Варлаа́ме, бу́ри бо страсте́й отбѣ́глъ и соверше́ннаго ра́ди житія́, вѣ́триломъ воздержа́нія дости́глъ еси́ въ благоути́шное приста́нище Христо́во.

Богоро́диченъ: Обетша́вшія ны́ го́рькимъ дре́вле дре́ва вкуше́ніемъ и па́дшія поползнове́ніемъ, Пречи́стая, обнови́ла еси́, Зижди́теля ро́ждши, Сло́во Ѵпоста́сное, Дѣ́во-Ма́ти Влады́чице.

Конда́къ, гла́съ 8. Подо́бенъ: Взбра́нной.

Якоже другíй Илія́, о́тче, до́ждь съ небесе́ све́лъ еси́: о́нъ у́бо о́гнь сведе́ и царя́ удиви́, ты́ же лю́ди твоя́ возвесели́лъ еси́ и торжествова́ти устро́илъ еси́. Вели́кій бо Но́вградъ вельми́ тобо́ю хва́лится, имѣ́я мо́щи твоя́ въ себѣ́, его́же сохраня́й отъ вра́гъ непоколеби́ма, да зове́мъ ти́: ра́дуйся, преподо́бне Варлаа́ме, о́тче на́шъ.

Икосъ:

Аще и человѣ́къ естество́мъ бы́лъ еси́, преподо́бне о́тче, но Вы́шняго Іерусали́ма яви́лся еси́ согра́жданинъ и, человѣ́къ у́бо естество́мъ, безпло́тныхъ че́сти сподо́бился еси́. Тѣ́мже и са́мая, зря́ще, чудеса́ похва́льная удивля́ютъ на́съ и науча́ютъ зва́ти тебѣ́ такова́я: ра́дуйся, благочести́ва отца́ о́трасле; ра́дуйся, ма́тере благоговѣ́йныя вѣ́тве; ра́дуйся, смире́нія высото́; ра́дуйся, я́ко къ позна́нію Бо́га вся́ приводя́; ра́дуйся, я́ко мно́га чудеса́ о Христѣ́ сотвори́лъ еси́; ра́дуйся, цѣлому́дрія сто́лпе, и́мже де́монская свирѣ́пства искорени́шася; ра́дуйся, свѣти́льниче многосвѣ́тлый; ра́дуйся, я́ко увяди́лъ еси́ плотска́я мудрова́нія; ра́дуйся, я́ко до́ждь моли́твою све́лъ еси́ и, па́ки наводне́нію бы́вшу, моли́твою водото́чныя о́блаки востя́глъ еси́; ра́дуйся, Вели́каго Нова́града похвала́ и утвержде́ніе, его́же и сохрани́ отъ вра́гъ непоколеби́ма до конца́, да зове́мъ ти́: ра́дуйся, преподо́бне Варлаа́ме, о́тче на́шъ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Зѣ́льнымъ поще́ніемъ, я́ко благово́нною пи́щею, пита́я ду́шу твою́, преподо́бне Варлаа́ме, тѣ́мже и Трисо́лнечному Божеству́ предстоя́, со а́нгелы пое́ши: благослове́нъ Бо́гъ оте́цъ на́шихъ.

Облиста́лъ еси́ я́коже невече́рнее со́лнце, оте́чество твое́ просвѣща́я, преподо́бне Варлаа́ме, тмы́ избавля́я страсте́й, и на на́съ навѣ́тующихъ совѣ́ты разори́, отъ вра́гъ непреткнове́ннымъ бы́ти на́мъ, пою́щимъ: благослове́нъ Бо́гъ оте́цъ на́шихъ.

Яко на боже́ственную добродѣ́телей лѣ́ствицу воздержа́ніемъ, о́тче, возше́дъ, у́мными очесы́ Христа́ Царя́ ви́дѣлъ еси́, оби́льною десни́цею по числу́ добродѣ́телей, Варлаа́ме, дарова́нія даю́ща отъ души́ вопію́щимъ: благослове́нъ Бо́гъ оте́цъ на́шихъ.

Дрема́нія отню́дъ и сна́ твои́мъ очесе́мъ не да́лъ еси́, до́ндеже возме́здіе отъ Христа́ трудо́въ обрѣ́лъ еси́, наслажде́ніе небе́снаго Ца́рствія, е́же угото́ва отъ вѣ́ры пою́щимъ: благослове́нъ Бо́гъ оте́цъ на́шихъ.

Богоро́диченъ: Обновля́ются въ Тебѣ́ естества́ зако́ны: па́че естества́ бо естество́мъ Непостижи́маго, Дѣ́во, Бо́га Емману́ила пресла́вно, Чи́стая, родила́ еси́ въ на́ше вѣ́рныхъ обновле́ніе.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Слеза́ми твои́ми, о́тче Варлаа́ме, умыва́яся, житіе́ проше́лъ еси́, и тѣ́ми мно́жества де́моновъ потопи́лъ еси́, вѣ́рныхъ же мы́сли возвесели́лъ еси́, пою́щихъ: вся́ дѣла́ Го́спода по́йте и превозноси́те Его́ во вѣ́ки.

Уязви́лся еси́ боже́ственнымъ жела́ніемъ, всеблаже́нне, тѣ́мже и непоро́чное и пра́ведное житіе́ проходя́, до́ндеже дости́глъ еси́ ца́рскаго престо́ла, отону́дными свѣтлостьми́ осія́я пою́щія: вся́ дѣла́ Го́спода по́йте и превозноси́те Его́ во вѣ́ки.

Къ Свѣ́ту незаходи́мому, сла́вне, взя́лся еси́, наслажде́ніе же земны́хъ веще́й оплева́въ вы́шняго ра́ди наслажде́нія, па́че воздержа́нію поревнова́лъ еси́ и страсте́й пла́мень потща́лся еси́ угаси́ти слеза́ми твои́хъ исто́чникъ, Варлаа́ме, вопія́: вся́ дѣла́ Го́спода по́йте и превозноси́те Его́ во вѣ́ки.

Богоро́диченъ: Распя́тіе и погребе́ніе, Иже отъ Тебе́ небра́чно, Дѣ́во, произы́де, претерпѣ́въ на́съ ра́ди муче́ніе, Его́же страсте́мъ ревну́я, преподо́бный Варлаа́мъ крестови́дно муче́нія поще́ніемъ Тому́, Чи́стая, послѣ́дова.

Пѣ́снь 9.

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Пожи́въ на земли́ равноа́нгельно, равноа́нгельну обрѣ́лъ еси́ свѣ́тлость, моли́ непреста́нно Изба́вителя, Варлаа́ме, о творя́щихъ благоче́стно па́мять твою́, о преблаже́нне, мона́шествующихъ похвало́.

Узкій и приско́рбный ше́ствовавъ пу́ть, о́тче Варлаа́ме, и тѣле́снѣ у́бо преста́вился еси́, ду́хомъ же жи́въ, предстои́ши Бо́гу. Но я́ко имѣ́я дерзнове́ніе, Ему́же въ житіи́ рабо́талъ еси́, моли́ спасти́ ду́ши на́ша.

Исцѣле́ній яви́лся еси́ струя́ оби́льная, многомяте́жнаго пла́мене у́гліе страсте́й угаси́лъ еси́. Умъ бо тво́й неокра́денъ, преподо́бне о́тче, соблю́лъ еси́ и, я́ко крѣ́покъ, Варлаа́ме, побѣжда́еши искуси́теля.

Богоро́диченъ: Еди́на иму́щи дерзнове́ніе, Влады́чице, за ве́сь мíръ Сы́ну Твоему́ моли́ся, не помина́я безчи́сленныхъ собла́знъ на́шихъ, и покры́й лю́ди, вопію́щія Ти́ умиле́ннымъ гла́сомъ: спаси́, Чи́стая Богоро́дице, тебе́ досто́йно велича́ющія.

Свѣти́ленъ. Подо́бенъ: Посѣти́лъ ны́.

Восто́ка восто́ковъ, разу́мнаго Со́лнца, Христа́, свѣтоза́рная луча́ возсія́, и свѣти́льникъ многосвѣ́тлый, пусты́нное воспита́ніе и чистоты́ кра́сная оби́тель, Христо́вы добро́ты я́сно зря́, Его́же сія́ньми у́мъ тво́й озари́лъ еси́. Тѣ́мже тя́ свѣти́льника стяжа́вше, о́тче на́шъ Варлаа́ме, мо́лимъ тя́ въ ми́рѣ сохране́ннымъ бы́ти па́мять твою́ почита́ющимъ. [Два́жды.]

Сла́ва, и ны́нѣ, богоро́диченъ:

Неизрече́ннаго чревоноше́нія была́ еси́, Всенепоро́чная Невѣ́ста, и я́ко су́щи честнѣ́йшій хра́мъ, Богоро́дице: Свѣ́тъ бо превѣ́чный въ Тя́ всели́ся, и родила́ еси́ Бо́га Сло́ва. Пою́ще Твое́ Рождество́, велича́емъ досто́йно, Всенепоро́чная Отрокови́це.

На хвали́техъ стихи́ры на 4, гла́съ 8:

Боже́ственная и свѣтоно́сная наста́ па́мять въ по́стницѣхъ вели́каго Варлаа́ма, ду́шу и тѣ́ло веселя́щая, тѣ́мже пріиди́те, празднолю́бцы, я́ко да наслади́мся ны́нѣшняго торжества́. Се́ бо на́ше зва́ніе пріи́де, всея́ вели́кія Россíйскія земли́ удобре́ніе, вели́каго же Нова́града похвала́ и утвержде́ніе, снаслѣ́дникъ бо Христо́въ бы́въ и безпло́тныхъ житія́ подража́тель, мо́лится Спа́су всѣ́хъ умири́ти мíръ и спасти́ ду́ши на́ша. [Два́жды.]

Яко въ терпѣ́ніи мно́гъ и въ зло́бѣ удобоотда́тливъ въ животѣ́ и по сме́рти, о́тче, показа́лся еси́. Всѣ́мъ, вѣ́рою приходя́щимъ, исцѣле́нія оби́льно подава́еши, хромы́мъ хожде́ніе и ду́хи лука́выя прогоня́еши. Па́мять твоя́ сла́вна, и успе́ніе со святы́ми, Варлаа́ме, о́тче на́шъ. Тѣ́мже, увѣря́еми, глаго́лемъ: па́мять пра́веднаго съ похвала́ми быва́етъ.

Ду́ха Боже́ственнаго благода́тію со́брани, празднолю́бцы, Варлаа́ма, благоче́стія подража́теля, веселя́щеся, восхва́лимъ дне́сь, Це́ркве пресвѣ́тлаго свѣти́льника, тѣ́ло бо неудобопокори́вое воздержа́нія брозда́ми я́вѣ низложи́ и благопокори́во души́ повину́лъ е́сть. Тѣ́мже Боже́ственнаго Ду́ха сосу́дъ досто́инъ угото́вася и, Тро́ицѣ со а́нгелы предстоя́, мо́лится непреста́нно о умире́ніи мíра и спасе́ніи ду́шъ на́шихъ.

Сла́ва, гла́съ 8:

Всечестна́я и чудотво́рная ра́ка, идѣ́же лежи́тъ всечестно́е и свято́е тѣ́ло твое́, Варлаа́ме, о́тче на́шъ, исцѣле́нія неоску́дно подае́тъ притека́ющимъ съ вѣ́рою, и душетлѣ́нная стра́сти исцѣля́ющи, мно́жества же де́монская отрѣва́ющи. Тѣ́мже и стада́ мона́ховъ со архіере́йскими ли́ки, чудесы́ удивля́еми, достолѣ́пно и ра́достно отъ души́ вопіе́мъ: богоблаже́нне и преподо́бне о́тче на́шъ Варлаа́ме, моли́ Христа́ Бо́га уще́дрити мíръ и спасти́ ду́ши на́ша.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ [и изба́ви на́съ отъ вся́кія ну́жды и печа́ли].

Славосло́віе вели́кое. И ча́съ 1-й. И отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 47-56.

/ Къ оглавленію раздѣла /


Наверхъ / Къ титульной страницѣ

0