Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 5-й де́нь.
Святы́хъ му́ченикъ Галактіо́на и Еписти́міи.

[ВЕЧЕРЪ,]
На Го́споди воззва́хъ: стихи́ры му́ченикомъ, гла́съ 8. Подо́бенъ: О, пресла́внаго чудесе́!

Млеко́мъ воспита́нъ вѣ́ры,* му́къ ра́ди мно́гихъ, Галактіо́не, и скорбе́й* во Христо́въ дости́глъ еси́ во́зрастъ,* бы́въ прія́тна же́ртва* и соверше́нно заколе́ніе* самово́льнымъ стремле́ніемъ, всебога́те.* О, тве́рдыя твоея́ и извѣ́стныя вѣ́ры,* е́юже Бо́га получи́лъ еси́,* обожа́емь ны́нѣ соверше́ннѣйше.

Худо́жественнѣ взыска́ла еси́* благи́хъ Исто́чника, жела́нныхъ кра́йнѣйшее;* Того́ свѣтлостьми́* и ду́шу и помышле́ніе* озари́ла еси́, богоблаже́нная,* и низложи́ла еси́ крѣ́пкими противле́ніи* многоко́зненнаго и дре́вняго мучи́теля,* мона́шествующихъ боже́ственное украше́ніе,* му́ченице многострада́льная.

Два́ свѣти́льника пресвѣ́тлая* Восто́ка у́мнаго* возсіява́ютъ благода́тію,* и тва́рь всю́ благоче́стно озаря́ютъ* превосходя́щими страда́ній свѣтлостьми́* и врачева́ній боже́ственными разжже́ніи.* Ихже пресвѣ́тлый пра́здникъ почита́юще,* тѣ́хъ ра́ди вся́* освяща́ющаго Христа́ просла́вимъ.

Сла́ва, и ны́нѣ, богоро́диченъ. Подо́бенъ то́йже.

Ра́дуйся, ду́шъ просвѣще́ніе,* грѣша́щихъ проще́ніе,* неради́выхъ исправле́ніе;* ра́дуйся, утѣше́ніе и ра́дость,* скорбя́щихъ помо́щнице;* ра́дуйся, Блага́я,* немощны́хъ ду́шъ исцѣле́ніе;* ра́дуйся, примире́ніе къ Бо́гу и хода́таице,* серафи́мовъ всѣ́хъ я́ко су́щи святѣ́йши, Чи́стая.

Крестобогоро́диченъ:

Тя́ ви́дящи пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́! — вопія́ше, — Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый милосе́рдіемъ Твои́мъ?

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


НА УТРЕНИ,
Оба кано́на окто́иха и святы́хъ кано́нъ на 4, его́же краегране́сіе: Сопру́гъ страда́льцевъ несопру́женъ пѣ́ти подоба́етъ. Гла́съ 8.

Пѣ́снь 1.

Ирмо́съ: Истря́сшему въ мо́ри мучи́тельство фарао́не и Изра́иля су́шею наста́вльшему, пои́мъ Христу́, я́ко просла́вися во вѣ́ки.

Животворя́щей Тро́ицѣ, всеблаже́нне, предстоя́ ра́достно и, свѣ́тлыми мо́лніями просвѣща́емь, испроси́ просвѣще́ніе соверша́ющимъ твою́ святу́ю па́мять.

Ду́хомъ Святы́мъ распали́въ твою́ ду́шу, пожже́ стра́сти плотскíя посто́мъ и погаси́лъ еси́ о́гнь безбо́жія кро́вными струя́ми.

Ро́дъ, и бога́тство, и держа́ву Христа́ ра́ди оста́вивъ и взе́мъ, преподо́бне, кре́стъ, мона́шествовалъ еси́ боголѣ́пно со Еписти́міею блаже́нною, твое́ю сопру́гою.

Богоро́диченъ: Засту́пнице скорбя́щихъ, спасе́ніе и наде́жде ненадѣ́ющихся, Богоро́дице Всепѣ́тая, моли́ прилѣ́жно изба́вится на́мъ отъ бѣ́дъ.

Пѣ́снь 3.

Ирмо́съ: Утверже́й сло́вомъ небеса́ и зе́млю основа́вый на вода́хъ мно́гихъ, утверди́ мя къ пѣ́нію славосло́вія Твоего́, Го́споди.

Дневну́ю звѣзду́ отъ непло́дныхъ чре́слъ, му́ченице, тя́ произведе́ ро́ждшая тя́, но́щь безбо́жія разоря́ющу.

Чистото́ю любве́ одержи́мь, дѣ́вствовати научи́лъ еси́ съ тобо́ю сопру́жницу; съ не́юже пострада́въ зако́нно, му́чениче Галактіо́не, просла́вися.

Оле жены́, преди́ искуше́нія му́ченическая научи́вшіяся вся́ приклю́чшаяся открове́ніемъ Боже́ственнымъ, и низложи́вши мучи́теля.

Богоро́диченъ: Умерщвле́на страстьми́ вре́дными, жи́ва сотвори́ мя, Живо́тъ ро́ждшая, разори́вшаго, Отрокови́це, всю́ сме́ртную си́лу.

Сѣда́ленъ, гла́съ 4. Подо́бенъ: Ско́ро предвари́.

Посто́мъ украси́въ твоея́ зри́тельное души́, луча́ми же страда́нія просвѣща́еши вѣ́рныя, Галактіо́не блаже́нне. Тѣ́мъ тво́й святы́й и свѣтоно́сный де́нь вѣ́рою соверша́юще, благоче́стно тебѣ́ вопіе́мъ: я́ко имѣ́я дерзнове́ніе къ Бо́гу, моли́ спасти́ся на́мъ.

Сла́ва, и ны́нѣ, богоро́диченъ:

Обнови́ла еси́, Чи́стая, боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Изъ горы́ пріосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Агнцы слове́сніи яви́стеся, па́стырю Всецарю́ я́вственно послѣ́дующе, и въ небе́снѣй огра́дѣ, вѣнцено́сцы, съ му́ченики всели́стеся.

Сопряже́ніе избра́нно яви́стеся, раздѣля́юще бразду́ честна́го и до́браго свидѣ́тельства, и содѣ́ласте кла́съ, въ жи́тницахъ небе́сныхъ соблюда́емь.

По Христѣ́ усѣка́еми, до́бліи, но́зѣ, и главы́, и но́гти, и ру́ки, искорени́сте ле́сть нече́стія и побѣдоно́сцы яви́стеся.

Богоро́диченъ: Язы́къ земны́хъ досто́йнѣ не мо́жетъ воспѣ́ти Тя́, Бо́жію Роди́тельницу я́вльшуюся, Всенепоро́чная Пречи́стая, христіа́нъ прибѣ́жище.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны́. Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Яко млеко́мъ, воспита́вся по́стнически, Галактіо́не, во исполне́ніе соверше́нное Христо́выхъ страсте́й дости́глъ еси́.

Умо́мъ очище́ннымъ ви́дѣла еси́, Еписти́міе, взята́ превысо́ко святы́хъ на поко́ище.

Му́чениковъ соводворе́ніе получи́сте въ вы́шнихъ, безсме́ртную сла́ву, преподобному́ченицы, обрѣто́сте.

Богоро́диченъ: Родила́ еси́ въ лѣ́то Безлѣ́тнаго, Пречи́стая, бы́вша Человѣ́ка, да спасе́тъ человѣ́ка.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́, Бо́же на́шъ.

Ба́нею боже́ственнаго просвѣще́нія къ безсопру́жнымъ приступи́сте, кро́вію послѣди́ кре́щшеся, страда́льцы, соверше́ннѣйше.

Мно́гимъ жесто́чествомъ ду́шу просвѣти́въ, посто́мъ, красну́ яви́лъ еси́, Галактіо́не, свѣ́томъ страда́нія.

На колесни́цѣ кро́ви ва́шея всѣ́дше, му́ченицы, и пу́ть постиго́сте небе́сный, въ не́мже почива́ете.

Богоро́диченъ: Равноче́стна родила́ еси́ Отцу́ Сы́на, Неискусобра́чная, и млеко́мъ пита́ла еси́ Пита́теля всѣ́хъ па́че ума́.

Конда́къ, гла́съ 2. Подо́бенъ: Вы́шнихъ ища́.

Му́ченикъ Христо́выхъ полко́мъ причто́стеся до́брѣ хра́брствовавшимъ, свѣ́тло подвиза́вшеся, Галактіо́не сла́вне, съ честно́ю сопру́жницею и сострада́вшею тебѣ́ Еписти́міею. Еди́ному Бо́гу непреста́нно моли́теся о всѣ́хъ на́съ.

Пѣ́снь 7.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Уневѣ́стившися Сло́ву, Еписти́міе, Боже́ственному, тя́ обнажи́ти тща́щіяся ослѣпи́ла еси́ невѣ́рныя, и пока́явшіяся Свѣ́та ча́да яви́ла еси́.

Пожре́ти бого́мъ безду́шнымъ отре́кшеся отню́дъ, и́стинному Бо́гу на́шему и ду́шъ Влады́цѣ же́ртва, му́ченицы, честна́я принесо́стеся.

На о́гнь муче́нія приведе́нъ, Галактіо́не, кро́вными пото́ки безбо́жія пла́мень, му́чениче, погаси́лъ еси́, му́дре, вопія́: благослове́нъ еси́, Го́споди, Бо́же оте́цъ на́шихъ.

Богоро́диченъ: Съ вы́шними всѣ́ми небе́сными чи́нми велегла́сно Тя́ вси́, Богороди́тельнице Отрокови́це, Тобо́ю спасе́нніи, блажи́мъ.

Пѣ́снь 8.

Ирмо́съ: Безнача́льнаго Царя́ сла́вы, Его́же трепе́щутъ небе́сныя си́лы, по́йте, свяще́нницы, лю́діе, превозноси́те во вся́ вѣ́ки.

Равноче́стны чистото́ю и ра́вни поще́ніемъ и страда́ніемъ су́ще, ра́вныя отъ Бо́га получи́сте да́ры, до́бліи страда́льцы.

Сочета́ніе нетлѣ́ніемъ сохрани́сте, возжелѣ́вше а́нгельское житіе́, съ ни́миже ра́достно, Госпо́дни страстоно́сцы, лику́ете досто́йно.

Стоя́ предъ суди́щемъ му́жески, проповѣ́далъ еси́, му́чениче, Еди́наго Го́спода Бо́га и́стиннаго и многобо́жія разруши́лъ еси́ шата́ніе.

Богоро́диченъ: Яко че́стенъ и превы́шшій престо́лъ, су́щую Бо́га Вы́шняго воспое́мъ, лю́діе, еди́ну по Рождестве́ Ма́терь и Дѣ́ву.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́ Рождество́ Приснодѣ́вы въ на́ше вѣ́рныхъ спасе́ніе, пѣ́сньми немо́лчными велича́емъ.

Сто́лпъ яви́лся еси́, богому́дре, небе́сный, Це́ркве основа́ніе и сто́лпъ благоче́стія, и му́чениковъ и по́стниковъ, Галактіо́не, утвержде́ніе и боже́ственное удобре́ніе.

Процвѣла́ еси́ въ дѣ́вственныхъ цвѣ́тѣхъ, я́коже шипо́къ, и во удо́ліихъ му́ченическихъ благово́нствующи, я́ко кри́нъ, Еписти́міе дѣ́во, му́ченице Госпо́дня, тѣ́мъ тя́ согла́сно ублажа́емъ.

Свѣ́томъ Трисо́лнечныя свѣ́тлости озаре́ни, къ Тому́ преидо́сте ны́нѣ, сы́нове Свѣ́та я́вльшеся, моли́теся просвѣще́ніе дарова́ти, му́ченицы, вѣ́рою хва́лящимъ вы́.

Богоро́диченъ: Ты́ еси́, Богоро́дице, ору́жіе на́ше и стѣна́, Ты́ еси́ заступле́ніе къ Тебѣ́ прибѣга́ющимъ, Тя́ ны́нѣ на моли́тву подвиза́емъ, да изба́вимся отъ вра́гъ на́шихъ.

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 31 – 33 об.

/ Къ оглавленію раздѣла /


Наверхъ / Къ титульной страницѣ

0