Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ное́мврія въ 5-й де́нь.
Преставле́ніе и́же во святы́хъ отца́ на́шего Іо́ны, архіепи́скопа Новгоро́дскаго, чудотво́рца.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 8. Подо́бенъ: О, пресла́внаго чудесе́!

Водруже́ніе и́стины,* благоче́стія согла́сника тя́ зна́емъ* и вѣ́ры освяще́ніе,* чистоты́ же селе́ніе,* прія́телище избра́нно, святи́телю преподо́бне Іо́но,* мо́лимъ тя́: въ мíрѣ на́мъ моли́ сохрани́тися,* да при́сно сла́вимъ и воспѣва́емъ Го́спода на́шего, прославля́ющаго* и тебе́ ра́ди подаю́щаго на́мъ* спасе́ніе и ве́лію ми́лость. [Два́жды.]

Житіе́ твое́ добродѣ́тельми украси́лъ еси́,* свѣти́льникъ я́вѣ бы́въ и храни́тель Христо́ву ста́ду,* дѣя́нія бо видѣ́нія я́вѣ показа́лъ еси́ восхожде́ніемъ,* я́ко ду́шу согласи́лъ еси́ дѣ́тельно,* и изря́дно къ видѣ́нію взя́тся,* и зри́ши Го́спода, о́тче Іо́но.* Ему́же прилѣ́жно моли́ся дарова́ти ми́ръ мíрови,* спасе́ніе же и мно́гую ми́лость* почита́ющимъ на́мъ свяще́нную па́мять твою́.

Воздержа́ніемъ пре́жде умертви́въ* плотска́я мудрова́нія,* священнодѣ́йственникъ бы́лъ еси́,* Бо́жія боже́ственно соверша́я* и честнѣ́йшимъ по́мысломъ чи́стѣ прикаса́яся,* служи́тель яви́лся еси́ Вседержи́телю, архіере́ю Іо́но.* Его́же умоли́, я́ко Всеми́лостива и Бла́га,* дарова́ти ми́ръ мíрови и душа́мъ на́шимъ ве́лію ми́лость.

Сла́ва, гла́съ 4:

Весели́ся и ра́дуйся, Вели́кій Новгра́де, да игра́ютъ сы́ны твоя́ въ тебѣ́, свѣ́тло торжеству́юще въ па́мять іера́рха Іо́ны, сирота́мъ и вдова́мъ предста́теля, скорбя́щихъ утѣ́шителя, прибѣга́ющимъ къ нему́ помо́щника и те́пла засту́пника, призыва́ющихъ его́ ско́ро послу́шающа, Самодержа́вныхъ Госуда́рей на милосе́рдіе и ти́хость прелага́юща и проти́вныя примиря́юща: предстои́тъ бо Го́сподеви, моля́ся умири́ти мíръ и спасти́ ду́ши на́ша.

И ны́нѣ, богоро́диченъ:

Ве́ліе и пресла́вное, е́же о Тебѣ́ бы́вшее, чу́до, и кто́ дово́ленъ изглаго́лати си́лы Госпо́дня, я́же о Тебѣ́ бы́вшія, Богоро́дице? Устраша́етъ бо у́мъ на́шъ вели́ка видѣ́нія достоя́нія, я́ко непостижи́маго Твоего́ та́инства глаго́лати не могу́ще. Кто́ бо слы́ша отъ вѣ́ка Дѣ́ву дои́вшу и Ма́терь безъ му́жа я́вльшуся на земли́, и Своего́ Содѣ́теля я́ко Младе́нца на руку́ носи́вшу? Тѣ́мже тя́ вси́ ро́ди ублажа́емъ.

На стихо́внѣ стихи́ры, гла́съ 7:

Отче свяще́нне Іо́но, ты́ освяти́лся еси́ благода́тію Всесвята́го Ду́ха слове́сному ста́ду Христо́ву, но я́ко Влады́цѣ твоему́ подража́тель, ми́ловати на́съ жи́въ сы́й не преста́лъ еси́. И ны́нѣ та́коже моля́ не преста́й изба́вити на́съ отъ вся́каго лю́таго обстоя́нія и спасти́ ду́ши на́ша.

Сти́хъ: Свяще́нницы Твои́ облеку́тся въ пра́вду, [и преподо́бніи Твои́ возра́дуются].

Гла́съ 1: Отче преподо́бне Іо́но, ты́, земна́я мудрова́нія воздержа́ніемъ умертви́въ, ду́шу напра́вилъ еси́ къ невла́емому наслажде́нію. Проси́ на́мъ невла́емо преити́ пучи́ну житія́, прелага́я стро́потное въ тишину́, подая́ хва́лящимъ тя́ ми́ръ и спасе́ніе, блаже́нне.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Отче Іо́но блаже́нне, да́нный тебѣ́ тала́нтъ умно́жилъ еси́, ра́дости сподо́бився Го́спода твоего́, испещре́нъ благода́ти сія́ніемъ, заре́ю духо́вною блиста́я, предстои́ши Го́споду. Проси́ изба́витися на́мъ вся́каго гнѣ́ва и озлобле́нія, да въ ми́рѣ сла́вяще Го́спода, при́сно тя́ ублажа́емъ.

Сла́ва, гла́съ 5:

Пріиди́те, вѣ́рныхъ сосло́віе, соше́дшеся, восхва́лимъ архіере́я Іо́ну, и́бо до́брый па́стырь, пасо́мыя руководя́ къ вѣ́рѣ сло́вомъ и́стиннымъ и вѣ́ру извѣ́ствовати добродѣ́тельми наказу́я. Тѣ́мъ и Христо́съ возда́лъ е́сть сему́ мзду́, я́ко до́брому рабу́ Своему́, и на́мъ, блажа́щимъ па́мять его́, да́руетъ, я́ко Бла́гъ, мно́жество щедро́тъ Свои́хъ его́ ра́ди и бога́тую ми́лость.

И ны́нѣ, богоро́диченъ:

Ра́дуйся, две́ре мы́сленная, е́юже про́йде превѣ́чный Бо́гъ; ра́дуйся, же́зле Ааро́новъ, израсти́вшій цвѣ́тъ отъ ко́рене Іессе́ева; ра́дуйся, трапе́зо, я́же Хлѣ́бъ жи́зни на пи́щу всему́ пода́вши ро́ду человѣ́ческому, Дѣ́во Ма́ти Чи́стая.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: поста́вимъ стихо́въ 8 и пое́мъ стихи́ры, гла́съ 6. Подо́бенъ: Все́ отло́жше.

Якоже звѣзда́ возсія́лъ еси́ на тве́рди церко́внѣй,* озаря́я мíръ* исправле́ніемъ сло́ва и́стиннаго, му́дре Іо́но,* вдовы́ и сироты́ снабдѣва́я оте́чески* и ни́щія ми́луя,* оби́димыя изыма́я,* вражды́ утоля́я,* ми́ръ утвержда́я.* Христо́выхъ за́повѣдей дѣ́лателю,* о́тче всесвяще́нне,* проси́ ми́ра мíрови, мо́лимъ тя́,* и спасе́нія душа́мъ на́шимъ. [Три́жды.]

Досто́йно на тя́ архіере́йства* нарече́ніе пріи́де, преподо́бне о́тче,* отроча́ти еще́ тебѣ́ су́щу:* дѣя́нія бо въ тебѣ́ богоуго́дная воспита́ема,* кро́тость съ незло́біемъ.* Тѣ́мъ во дворы́ Госпо́дни вселя́ешися,* я́ко тако́въ подоба́ше архіере́й* бы́ти преподо́бенъ.* Но я́ко и́маши дерзнове́ніе,* моли́, мо́лимъ тя́, умири́ти мíръ* и спасти́ ду́ши на́ша. [Три́жды.]

Преподо́бне архіере́ю,* изво́лилъ еси́ примета́ти себе́* въ дому́ Бо́жіи па́че,* не́же жи́ти въ се́лѣхъ мíра,* и по́стническими пра́вилы испытова́шеся,* послѣ́дуя знаменоно́сцемъ, отце́мъ вели́кимъ, Варлаа́му и Се́ргію.* Тѣ́мже и Госпо́дь изведе́ тя́ па́стыря лю́демъ Свои́мъ* и я́ко вѣ́рну рабу́ стро́ити ду́ши си́хъ поручи́.* За ня́же моли́ поми́ловати я́ и спасти́. [Два́жды.]

Сла́ва, гла́съ 1:

Пріиди́те, Вели́каго Нова́града лю́діе, духо́внѣ торжеству́имъ, дне́сь бо де́нь поко́я трудо́въ до́браго на́шего па́стыря, въ о́ньже пѣ́сней трубо́ю возглаша́юще: ра́дуйся, свѣти́ло свѣ́тлое мíрови; ра́дуйся, мы́сленнаго Со́лнца свѣ́тлый о́бразе; ра́дуйся, заря́ми добродѣ́телей осіява́я вся́. Но, о́тче прекра́сне, хода́таю мíра и засту́пниче те́плый ста́ду твоему́, не преста́й моли́тися, мо́лимся тебѣ́, спасти́ся на́мъ отъ вся́каго навѣ́та, любо́вію чту́щимъ свяще́нную па́мять твою́.

И ны́нѣ, богоро́диченъ:

Всемíрную сла́ву, [отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ].

Вхо́дъ, проки́менъ дне́. Чте́нія три́ святи́тельская.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 1:

Свѣ́тлый содѣ́ловаетъ пра́здникъ дне́сь свяще́нный хра́мъ честна́го и сла́внаго Крести́теля Госпо́дня, ра́достно Христо́ва Це́ркви блаже́ннаго святи́теля Іо́ны, я́ко мѵ́ро благово́нное, облагоуха́я на́мъ свяще́нныя благода́ти, и болѣ́зней отгна́ніе, и я́ко ло́зу виногра́да живо́тнаго, вино́ иска́пающую исцѣле́нія, возвеселя́ющее сердца́ напа́стныхъ печа́лей разгна́ніемъ. Тѣ́мъ мо́лимся ему́, прося́ще ми́ра и спасе́нія ду́шъ на́шихъ.

Гла́съ 3:

Ты́, укра́шенъ добродѣ́тельными дѣя́ніи, Несозда́нныя Тро́ицы хра́мъ освяще́нъ бы́лъ еси́, созда́лъ еси́ свяще́нныя хра́мы Госпо́дню и́мени, и во и́мя сла́внаго Крести́теля, и вели́кихъ святи́телей, и богоно́сныхъ оте́цъ. И ны́нѣ съ ни́ми водворя́яся, моли́ о творя́щихъ па́мять твою́ изба́витися отъ лука́ваго ловле́нія и собла́знъ проти́внаго, іера́рше Іо́но блаже́нне.

Гла́съ 4:

Весели́ся и ра́дуйся, Вели́кій Новгра́де, да игра́ютъ сы́ны твоя́ въ тебѣ́, свѣ́тло торжеству́юще въ па́мять архіере́я Іо́ны, сиро́тъ и вдо́въ предста́теля, скорбя́щихъ утѣ́шителя, прибѣга́ющимъ къ нему́ помо́щника и те́пла засту́пника, призыва́ющимъ его́ ско́ро послу́шающа, Самодержа́внаго Госуда́ря на милосе́рдіе и ти́хость прелага́юща и проти́вныя примиря́юща: предстои́тъ бо Го́сподеви, моля́ся умири́ти мíръ и спасти́ ду́ши на́ша.

Сла́ва, гла́съ 4:

Пріиди́те, лю́діе, и́же Вели́каго Нова́града порожде́ніе, вся́къ ро́дъ и во́зрастъ, пѣ́сньми почти́мъ до́браго па́стыря, я́ко того́ предстоя́ніемъ ко Христу́ дарова́шася блага́я вся́ гра́ду на́шему отъ Бо́га и всѣ́мъ предѣ́ломъ его́, и́бо благослови́шася бла́гостію вѣнцы́ лѣ́тъ епи́скопства его́. Госпо́дь да́стъ бла́гость его́ ра́ди, и земля́ на́ша подава́ше плоды́ своя́, насы́тися вся́ка душа́ благоволе́нія тогда́, умири́шася вси́ язы́цы проти́вніи, и приклони́шася стра́нъ христолю́бцы влады́ки держа́вніи, ми́лостивныма очи́ма смотря́юще, ти́хое промышле́ніе подава́ху, ра́дость и ми́ръ вся́ческая пріима́ше. Но, о блаже́нне Іо́но, и ны́нѣ такова́я да́руй лю́демъ твои́мъ, да и честну́ю па́мять твою́, чту́ще при́сно, ублажа́емъ.

И ны́нѣ, богоро́диченъ:

При́зри на моле́нія [Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 2:

Послѣ́дователя тя́ позна́хомъ, о́тче, кро́ткаго и незло́биваго Влады́ки Христа́: ти́хое бо сло́во и нра́ва молчали́вое отъ ю́ности се́ возрасте́ въ тебѣ́, смире́ніе же, и кра́сное, кро́тости совоспита́емо, и съ сѣди́ною спросія́ющу ра́зуму. Тѣ́мже Иже вся́ вѣ́дый Госпо́дь произведе́ тя́ па́стыря слове́сному ста́ду Своему́ и на престо́лѣ первопресто́льника Бо́жія Це́ркве посади́ тя, я́ко па́ствующа сія́ преподо́біемъ и пра́вдою.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Не по земли́ ни́зитися, ниже́ на тлѣ́ющая взира́ти, и ревнова́ти міродержи́телемъ по́мыслы души́ твоея́ утверди́шася, свяще́нне Іо́но, но возвы́сился еси́ на высоту́ безсме́ртныя добродѣ́тели, безсме́ртныя жи́зни рачи́телю, я́ко поучи́лся еси́ навы́кнути у кро́ткаго Учи́теля и смире́ннаго се́рдцемъ вои́стинну Влады́ки Христа́ и Бо́га. Того́ моли́, блаже́нне, уще́дрити мíръ и спасти́ и просвѣти́ти ду́ши на́ша.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Возлюби́ чи́стая душа́ твоя́, блаже́нне Іо́но, чистоту́ боже́ственныхъ чисти́тель, и́же ве́рхъ учи́тельства, и пра́вило добродѣ́телей, и естества́ украше́ніе, вои́стинну небеси́ изъявле́ніе, іера́рхомъ нача́ла: боже́ственнаго Никола́я и вели́каго Васи́лія, богосло́ва Григо́рія, Златоу́стаго же Іоа́нна, и́хже свяще́нныя хра́мы воздви́глъ еси́, я́ко вои́стинну во дворы́ и́хъ жела́я всели́тися, и́же во свѣ́тѣ присносу́щныя ра́дости Живота́ вѣ́чнаго, Началопа́стыря Христа́. Того́ съ ни́ми, іера́рше, не преста́й моля́ умири́ти мíръ и спасти́ ду́ши на́ша.

Сла́ва, гла́съ 6:

Преподо́бне, блаже́нне, архіере́ю свяще́нне Іо́но, кро́тость и незло́біе твое́ удиви́ша Самоде́ржцы благочести́выя, и вои́стинну отъ души́ возлюби́ша тя́: ра́ди бо добродѣ́телей исправле́нія обрѣ́лъ еси́ благода́ть отъ Бо́га. Тѣ́мже и Самоде́ржцы почто́ша тя́, моли́твъ твои́хъ и благослове́нія тре́бующе, при́сно благопослу́шны быва́ху преподо́бію твоему́, и лю́ди твоя́ незло́біемъ снабдѣва́юще. Но и ны́нѣ лю́демъ твои́мъ предстоя́ бу́ди, и Самоде́ржцу благопоспѣше́ніе да́руй моли́твами твои́ми, и душа́мъ на́шимъ ве́лію ми́лость.

И ны́нѣ, богоро́диченъ:

Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На благослове́ніи хлѣ́бовъ: Тропа́рь свята́го, гла́съ 4:

Исправле́ніе вѣ́ры, и о́бразъ кро́тости, и я́коже са́дъ посредѣ́ рая́, преподо́бными дѣ́лы твои́ми мíръ просвѣща́еши, и сего́ ра́ди къ честнѣ́й ра́цѣ твое́й любо́вію прикаса́емся и вѣ́рно вопіе́мъ: предста́ни въ по́мощь воспѣва́ющимъ па́мять твою́ свѣтоно́сную, о́тче Іо́но, и моли́ спасти́ся душа́мъ на́шимъ. [Два́жды.]

И Богоро́дице Дѣ́во, ра́дуйся… [Еди́ножды.]



НА УТРЕНИ,
На Бо́гъ Госпо́дь: Тропа́рь святи́телю, два́жды. Сла́ва, и ны́нѣ, богоро́диченъ: Еже отъ вѣ́ка утае́ное...

По 1-мъ стихосло́віи сѣда́ленъ, гла́съ 1:

Плоды́ слове́сныя принося́, му́дре Іо́но, Го́сподеви, восхваля́я архіере́и съ преподо́бными Его́ пѣ́сньми, съ ни́миже въ земли́ живы́хъ ра́дуешися, я́ко сла́ву и́хъ возлюби́лъ еси́. Тѣ́мже съ ни́ми, о́тче свяще́нне, о на́съ, восхваля́ющихъ тя́, не преста́й моля́ Царя́ Небе́снаго и Спа́са всего́ мíра Христа́, еди́наго Человѣколю́бца. [Два́жды.]

Сла́ва, и ны́нѣ, богоро́диченъ:

Проро́цы Тя́ я́сно провозвѣсти́ша, Отрокови́це, Ма́терь Бо́жію, и апо́столи боже́ственніи въ мíрѣ проповѣ́даша, и мы́ вѣ́ровахомъ. Тѣ́мже вси́, благочестному́дреннѣ почита́юще, воспѣва́емъ Тя́ и Богоро́дицу вои́стинну при́сно имену́емъ.

По 2-мъ стихословіи сѣдаленъ, гласъ 8:

Любо́вь твоя́ боже́ственная возведе́ тя, па́стыря изря́дна, слове́сному мно́жеству: все́ю бо душе́ю къ боже́ственнѣй любви́ прилѣпи́лся еси́ и святы́мъ честны́я хра́мы созда́лъ еси́, и лѣ́поту си́мъ свяще́нными ико́нами утворя́я, боже́ственному Предте́чи и пресвѣ́тлымъ учи́телемъ Васи́лію, Григо́рію и Іоа́нну съ му́дрымъ Никола́емъ, преподо́бному Ону́фрію и Се́ргію чудотво́рцу, пѣ́сньми же похваля́я чуде́снаго Варлаа́ма и Са́вву, Евѳи́мія же со Іо́ною митрополи́томъ. Тѣ́мже ны́нѣ слику́еши и́мъ, съ ни́миже, о́тче свяще́нне, моли́ о на́съ, любо́вію чту́щихъ честну́ю па́мять твою́. [Два́жды.]

Сла́ва, и ны́нѣ, богоро́диченъ:

Недви́жимое утвержде́ніе вѣ́ры и честны́й да́ръ ду́шъ на́шихъ, Богоро́дицу пѣ́сньми велича́емъ, вѣ́рніи: ра́дуйся, Ка́мень жи́зни во чре́вѣ Твое́мъ вмѣсти́вшая; ра́дуйся, конце́й наде́ждо, скорбя́щихъ заступле́ніе; ра́дуйся, Невѣ́сто неневѣ́стная.

По поліеле́и сѣда́ленъ, гла́съ 8:

Возлюби́вшаго за благоутро́біе земны́я возлюби́лъ еси́ Христа́, сла́вою спаси́тельною тебе́ просла́вльшаго, добродѣ́тельми свяще́нными сія́юща, я́ко Бо́гови угожда́юща. Тѣ́мже и всѣ́мъ ра́тнымъ ми́ръ возвѣща́юща, де́монская стремле́нія возража́юща, іера́рше Іо́но блаже́нне. Ему́же не преста́й моля́ся согрѣше́ній проще́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому защище́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безъ сѣ́менне, моли́ся прилѣ́жно о всѣ́хъ рабѣ́хъ Свои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Степе́нна, 1-й антифо́нъ, 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми?] Вся́кое дыха́ніе... Ева́нгеліе Іоа́нна, зача́ло 35 отъ полу́: Рече́ Госпо́дь ко прише́дшимъ къ Нему́ іуде́омъ: не входя́й две́рьми...

По 50-мъ псалмѣ́ стихи́ра, гла́съ 6:

По и́мени твоему́ и житіе́, преблаже́нне, по Госпо́дни бо за́повѣди цѣ́лость голуби́цы вои́стинну стяжа́лъ еси́: съ кро́тостію бо незло́біемъ удобри́ся прекра́сная душа́ твоя́, ю́же я́ко любе́зну невѣ́сту и нескве́рну предста́вити потща́лся еси́ Пречи́стому еди́ному и безсме́ртному Жениху́, Христу́. Того́ моли́, іера́рше, при́сно ми́ръ мíрови дарова́ти и душа́мъ на́шимъ ве́лію ми́лость.

Кано́нъ Богоро́дицы со ирмосо́мъ на 6, гла́съ 4, и свята́го кано́нъ на 8. Гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Избра́ тя́ благода́ть, о́тче, отъ утро́бы ма́тере твоея́ поста́вити тя́ проро́ка лю́демъ свои́мъ, хода́тайствовати ко Го́споду о спасе́ніи мíра и оставле́ніи невѣ́ждествъ и́хъ, блаже́нне.

Руко́ю вели́каго архіере́я Іо́ны со и́же о не́мъ собо́ра свяще́нныхъ муже́й судо́мъ пріе́млеши пома́заніе архіере́йства, Ду́хомъ воздвиза́емь, Іо́но, и па́стырь вели́кому гра́ду, свяще́нне, полага́емь.

Блаже́ннаго Михаи́ла сбы́стся на тебѣ́ прорече́ніе, не внѣ́шнюю бо на тебѣ́ нищету́ зря́ше, но вну́треннее преспѣ́яніе души́ твоея́ духо́вными очесы́ смотря́я, а́ще и еще́ о́трочищу ти́ су́щу, блаже́нне.

Богоро́диченъ: Пресвѣ́тлая свѣще́ Со́лнца сла́вы, души́ моея́ о́гнь, угаше́нный при́сно уны́ніемъ, возжжи́, боже́ственныхъ дѣ́лъ еле́емъ, Пречи́стая, напая́ющи, да вѣ́рою и любо́вію при́сно Тя́ сла́влю, Богороди́тельнице.

Катава́сія: Отве́рзу уста́ моя́...

Пѣ́снь 3.

Ирмо́съ: Съ высоты́ снизше́лъ еси́ во́лею на зе́млю, превы́ше вся́каго нача́ла, и смире́нное возне́слъ еси́ изъ а́да преиспо́дняго естество́ человѣ́ческое: нѣ́сть бо свя́тъ па́че Тебе́, Человѣколю́бче.

Отъ ю́ности твоея́ боже́ственное просвѣще́ніе, Іо́но, на тебѣ́ сія́ше, я́коже преподо́бный прови́дѣ, и́же мíру юро́дъ, Бо́гу же прему́дръ: я́ко Бо́гу избра́нъ еси́ изъ чре́ва ма́тере твоея́, свяще́нне.

Мíръ усмири́ся моли́твами твои́ми, іера́рше, во твое́мъ епи́скопствѣ, но, я́ко тогда́, и ны́нѣ Бо́жіе человѣколю́біе умоли́ прилѣ́жно въ ми́рѣ утверди́тися мíру, Іо́но.

Плоды́ Го́споду нача́токъ дѣ́лъ твои́хъ прине́слъ еси́, плоды́ же земли́ моли́твами твои́ми умно́жилъ еси́. И ны́нѣ моли́, блаже́нне, земли́ на́шей плодоно́сіе при́сно подава́ти, я́ко благопослу́шна тя́ имѣ́емъ.

Богоро́диченъ: Евину дре́внюю кля́тву, Христа́ ро́ждши, Ма́ти Чи́стая, пресвѣ́тло разрѣши́ла еси́, и́же всѣ́хъ вѣнчава́ющаго благослове́ньми: нѣ́сть бо, Пречи́стая, па́че Тебе́, ины́я Помо́щницы.

Сѣда́ленъ, гла́съ 4:

Добродѣ́тельми свѣтя́ся, о́тче, па́ствити Христо́вы о́вцы поставля́емь, и преподо́бнаго Се́ргія красе́нъ хра́мъ вну́трь епи́скопіи воздви́глъ еси́. Яко душе́ю любя́ того́, по́двиги его́ почита́я и смоли́твенника себѣ́ о ста́дѣ твое́мъ ко Го́споду полага́я, ны́нѣ сра́дуешися ему́, о́тче свяще́нне, моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Боже́ственнаго Предте́чи, вели́каго Іоа́нна, хра́мъ свяще́нный воздви́глъ еси́, я́ко вѣ́ренъ, ду́шу тому́ и тѣ́ло въ снабдѣ́ніе возлага́я, о́тче свяще́нне.

Яко рачи́тель и подража́тель те́плъ Крести́телю Госпо́дню показа́лся еси́, тѣ́мже въ хра́мѣ его́, его́же тому́ созда́лъ еси́, тѣ́ло твое́ полага́еши, и во дворы́ его́ прія́тися жела́я.

Возлюби́лъ еси́, архіере́ю, свяще́нныхъ муже́й пѣ́сньми восхваля́ти свяще́нныя и́хъ па́мяти, я́ко рачи́тель добро́ты и́хъ и подража́тель дѣя́ній боголюбе́зныхъ.

Богоро́диченъ: Имѣ́я Тя́ Помо́щницу, кого́ убою́ся когда́ или́ устрашу́ся? Кто́ же, хотя́ ско́рбная навести́ рабу́ Твоему́, и не устраши́тся Тебе́, Пречи́стая, и не паде́тъ подъ но́зѣ?

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Приноси́мое я́ко че́стно возложе́ніе Бо́гу и освяще́нно первопресто́льникомъ Россíйскимъ, Іо́ною, твое́ свяще́нное па́стырства возведе́ніе, я́ко пасу́щу ти́ Госпо́дни лю́ди, Іо́но святи́телю, преподо́біемъ и кро́тостію.

Аще и на преставле́ніе митрополи́томъ Іо́ною зово́мъ самѣ́мъ погребсти́ его́, отре́клся еси́ ста́рости ра́ди пріити́, Іо́но свяще́нне, оба́че обѣща́лся еси́ ему́ ви́дѣти того́ по свое́мъ преставле́ніи во свѣ́тѣ Христо́вѣ.

Пѣ́сньми поче́лъ еси́ па́мять іера́рха, Іо́ны митрополи́та, и хвала́ми, я́ко досто́йно, ублажи́лъ еси́ того́: са́мъ ны́нѣ, іера́рше Іо́но, прича́ствуеши похвала́мъ его́ и по сотворе́нію твоему́ къ бли́жнему воспріе́млеши.

Богоро́диченъ: Низложи́, Влады́чице, враго́въ мои́хъ шата́ніе, Пренепоро́чная, Тя́ бо и́мамъ и предста́тельницу, и наде́жду, и по́мощь крѣ́пкую. Ты́ мя соблюди́, Чи́стая, навѣ́та вра́жія, избавля́ющи ла́янія тѣ́хъ.

Пѣ́снь 6.

Ирмо́съ: Пучи́ною жите́йскою дѣя́ньми мои́ми снидо́хъ во а́дъ, но, я́ко отъ ки́та Іо́на, та́ко вопію́: изъ глубины́ зо́лъ возведи́, молю́ся, Сы́не Бо́жій и Сло́ве.

Прильпе́ любо́вію душа́ твоя́ къ Госпо́дню Крести́телю, святи́телю богоблаже́нне, тѣ́мже тѣ́ло твое́ честно́е въ честнѣ́мъ хра́мѣ его́ нетлѣ́нно во мно́га лѣ́та соблюде́но яви́ся.

Красота́ говѣ́нія твоего́ е́же ко Го́споду привлече́ благода́ть благолѣ́пію души́ твоея́, свяще́нне, и возведе́ тя Вели́кому Нову́граду отца́ и первопресто́льника, Госпо́дня свяще́нства преподо́бна показа́.

Просла́ви тя́ Госпо́дь, Іо́но, тѣ́ло твое́ соблюде́ во мно́га лѣ́та нетлѣ́нно, явля́я тя́ о́бщника ра́бъ Свои́хъ, и́хже подража́тель въ житіи́ бы́лъ еси́, си́мъ и по сме́рти досто́йно соублажа́ешися, блаже́нне.

Богоро́диченъ: Всесвята́я Дѣ́во, Предста́тельнице и покро́ве всѣ́хъ вѣ́рныхъ, предста́ни и изба́ви ны́ вра́гъ на́шихъ нападе́нія, и отъ вся́кія ско́рби, и стра́шнаго Суда́ испыта́нія, да вѣ́рою при́сно пою́ Тя.

Конда́къ, гла́съ 4:

Свы́ше прія́лъ еси́ Боже́ственную благода́ть хода́тайствовати Бо́гу и человѣ́комъ, я́ко архіере́й возноше́ніе вознося́, и ми́ръ лю́демъ твои́мъ снося́, и оби́ліе плодо́въ, Іо́но блаже́нне; ты́ бо еси́ Вели́каго Нова́града похвала́ и су́щихъ о не́мъ ра́дость.

Икосъ:

Похва́лимъ досто́йно ны́нѣ іера́рха, я́ко отъ чре́ва ма́тере своея́ избра́нъ Бо́гу во освяще́ніе, и, о́трочищь еще́ сы́й, пронарече́нъ во архіере́йство гра́ду своему́ отъ Бо́га. Тѣ́мже не отъ человѣ́къ произведе́нъ архіере́й, но свы́ше пронарече́нъ и Ду́хомъ пома́занъ, священнодѣ́йствуя богопрія́тно, и умире́ніе, и тишину́ моли́твами свои́ми да́руетъ, и оби́ліе плодо́въ. То́й бо Вели́каго Нова́града сла́ва и всѣ́хъ, и́же о не́мъ, ра́дость.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Зи́ждеши Боже́ственному и́мени бога́тною руко́ю въ пусты́няхъ уда́лено, Іо́но, свяще́нныя хра́мы вели́кихъ богоуго́дникъ, боже́ственныхъ архіере́й съ преподо́бными.

Но́ву оби́тель составля́еши вели́кихъ тріе́хъ іера́рхъ и мона́шестѣй чертѣ́ благоути́шно приста́нище, о́тче, мѣ́стнымъ же удале́ніемъ обруча́я и́мъ безмо́лвіе.

Виногра́дъ насажда́я Бо́гу, огра́ду свяще́нную, вино́ износя́щую веселя́щее, въ свяще́нныхъ хра́мѣхъ боже́ственное пѣ́ніе, Иже въ Тро́ицѣ Еди́ному, хвали́му и благослови́му Бо́гу оте́цъ на́шихъ.

Богоро́диченъ: Еди́ну Всесвяту́ю, Еди́ному Бо́гу вселе́ніе еди́но пречи́сто, отъ Іоаки́ма и Анны ражда́ему, свяще́ннымъ хра́момъ почита́я, я́ко въ не́мъ воспѣва́ти всепѣ́тое Дѣ́вы Рождество́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Кро́ткое и молчали́вое нра́ва твоего́ воспріе́мъ, Госпо́дь, блаже́нне, поста́ви тя́ па́стыря лю́демъ Свои́мъ, на кого́ бо при́зритъ? Но на кро́ткаго и молча́щаго, трепе́щущаго слове́съ Его́.

Уста́ вдо́въ благослови́ша тя́, заступле́нія отъ тебе́ сподо́бльшеся, іера́рше блаже́нне, благоугожда́ющаго Бо́гу, по непоро́чному Іову, и оби́димыя отъ наси́лія изыма́ющаго.

Лю́діе твои́, священнонача́льниче преподо́бне, сѣ́товаху сиротства́ своего́ въ твое́мъ къ Бо́гу отше́ствіи, до́браго па́стыря своего́, ны́нѣ же свяще́нною па́мятію твое́ю возра́довашася вся́ческая.

Богоро́диченъ: На Тя́ всю́ наде́жду спасе́нія моего́ возложи́хъ, Богома́ти Неискусобра́чная, и Тя́ призыва́ю при́сно на по́мощь: спаси́ мя отъ напа́стей и печа́ли врага́, разрѣши́ плени́цу зо́лъ мои́хъ и Суда́ мя́ исхити́.

Пѣ́снь 9.

Ирмо́съ: Сотвори́ держа́ву мы́шцею Свое́ю, низложи́ бо си́льныя со престо́лъ и вознесе́ смире́нныя Бо́гъ Изра́илевъ, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Блаже́ннаго Евѳи́мія престо́лъ наслѣ́довалъ еси́, свяще́нне Іо́но, я́ко подража́тель добродѣ́телей его́ бы́лъ еси́ и, пѣ́сньми сего́ ублажи́въ па́мять изря́дно, са́мъ ны́нѣ обществу́ешися хвала́мъ его́, я́ко соводворя́ешися ему́ во Свѣ́тѣ незаходи́мѣмъ.

Въ зе́млю кро́ткихъ со архіере́и досто́йно всели́лся еси́, іера́рше Іо́но, кро́ткаго Учи́теля учениче́. Тому́ предста́ни о на́съ, пою́щихъ па́мять твою́, и испроси́ на́мъ собла́зновъ оставле́ніе, и шу́ія ча́сти въ де́нь Суда́ избавле́ніе, и лю́тыя гее́нны, блаже́нне.

Не изнемо́жетъ вся́къ глаго́лъ, и́же отъ Бо́га, убо́га тя́ и сироту́ Оте́цъ сиро́тъ пріе́млетъ, Бо́гъ, Иже на престо́лѣ со кня́зи посади́ тя, лю́демъ Свои́мъ я́ко досто́йна па́стыря производя́, отца́ сирота́мъ и засту́пника вдова́мъ те́пла положи́ тя́, Іо́но блаже́нне.

Богоро́диченъ: Просвѣти́, Чи́стая, любо́вію чту́щихъ Тя́ и велича́ющихъ, разрѣши́ стра́сти на́ша. Тѣ́мъ, Дѣ́во, уста́ви бу́рю, лука́ваго собла́зны отъ среды́ отжени́, ва́рвары покори́ Импера́тору Благочести́вому моли́твами Твои́ми.

Свѣти́ленъ:

Трисо́лнечнаго Свѣ́та, сла́вы сія́ніемъ, тріе́хъ учи́телей свѣ́томъ озари́вся, вся́ просвѣща́еши, просія́въ дѣ́тельми и благода́тію, преподо́бне священнонача́льниче. [Два́жды.]

[Сла́ва, и ны́нѣ,] богоро́диченъ:

Сла́дость а́нгеловъ, скорбя́щихъ ра́досте, христіа́нъ предста́тельнице, Дѣ́во, Ма́ти Госпо́дня, заступи́вши ны́, спаси́ отъ вѣ́чнаго муче́нія.

На хвали́техъ стихи́ры на 4, гла́съ 6. Подо́бенъ: Все́ отло́жше.

Яко звѣзда́, возсія́лъ еси́* на тве́рди церко́внѣй,* озаря́я мíръ исправле́ніемъ* сло́ва и́стиннаго,* прему́дре Іо́но,* вдовы́ и сироты́ снабдѣва́я оте́чески* и ни́щія ми́луя,* оби́димыя изыма́я,* вражды́ утоля́я,* ми́ръ утвержда́я, Христо́выхъ за́повѣдей дѣ́лателю,* о́тче всесвяще́нне, проси́ ми́ра мíру, мо́лимъ тя́,* и спасе́нія душа́мъ на́шимъ. [Два́жды.]

Досто́йно на тя́ архіере́йства* нарече́ніе пріи́де, преподо́бне о́тче,* отроча́ти и еще́ тебѣ́ су́щу:* дѣя́нія бо въ тебѣ́ благоуго́дная* совоспита́ема, кро́тость съ незло́біемъ.* Тѣ́мъ во дворы́ Госпо́дни вселя́ешися,* я́ко тако́въ подоба́ше архіере́й бы́ти преподо́бенъ,* но я́ко и́маши дерзнове́ніе,* моли́, мо́лимъ тя́,* умири́ти мíръ* и спасти́ ду́ши на́ша.

Преподо́бне архіере́ю,* изво́лилъ еси́ примѣта́ти себе́ въ дому́ Бо́жіи па́че,* не́же жи́ти въ се́лѣхъ мíра,* по́стническими пра́вилы испытова́шеся,* послѣ́дуя знаменоно́сцемъ вели́кимъ,* Варлаа́му и Се́ргію.* Тѣ́мже и Госпо́дь изведе́ тя* па́стыря лю́демъ Свои́мъ,* и, я́ко вѣ́рну рабу́,* стро́ити ду́ши си́хъ поручи́,* за ни́хже и моли́* поми́ловати я́ и спасти́.

Сла́ва, гла́съ 4. Самогла́сенъ:

Пріиди́те, лю́діе, и́же Вели́каго Нова́града порожде́ніе, вся́къ ро́дъ и во́зрастъ, и пѣ́сньми почти́мъ до́браго па́стыря, я́ко того́ предстоя́ніемъ ко Христу́ дарова́шася блага́я вся́ гра́ду на́шему отъ Бо́га и всѣ́мъ предѣ́ломъ его́, и́бо благослови́шася бла́гостію вѣнцы́ лѣ́тъ епи́скопства его́. Госпо́дь даде́ бла́гость его́ ра́ди, и земля́ на́ша подава́ше плоды́ своя́, насы́тися вся́ка душа́ благоволе́нія тогда́, умири́шася вси́ язы́цы проти́вніи и приклони́шася стра́нъ христолю́бцы влады́ки держа́вніи, ми́лостивными очесы́ смотря́ще, ти́хое промышле́ніе подава́ху, ра́дость и ми́ръ вся́ческая пріима́ху. Но, о блаже́нне Іо́но, и ны́нѣ такова́я да́руй лю́демъ твои́мъ, да честну́ю па́мять твою́, при́сно чту́ще, ублажа́емъ.

И ны́нѣ, богоро́диченъ, [гла́съ то́йже:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ вопіе́мъ Ти́: ра́дуйся, еди́но предста́тельство ду́шъ на́шихъ.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3 и 6. Проки́менъ свята́го, [гла́съ 1]: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, [и не за́пнутся стопы́ eго́]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Ное́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 34-42.

/ Къ оглавленію раздѣла /


Наверхъ / Къ титульной страницѣ

0